MNDAA – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: MNDAA

ဒု-ဗိုလ်ချုပ်ကြီး ဂွန်မော် ရှမ်းပြည် ခရီးစဉ်အတွင်း မဟာမိတ် လက်တွဲ ဆောင်ရွက်ရေး ဆွေးနွေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၁ ရက်။ ကချင်လွတ်လပ်ရေး ကောင်စီ (KIC) ဒုတိယ ဥက္ကဋ္ဌ၊ ဒုတိယဗိုလ်ချုပ်ကြီး ဂွန်မော်သည် ဧပြီလပထမပတ်တွင် ရှမ်းပြည် မြောက်ပိုင်းသို့ သွားရောက်ကာ မြောက်ပိုင်းညီနောင်မဟာမိတ် တပ်ဖွဲ့များနှင့် SSPP တို့မှ ထိပ်ပိုင်း ခေါင်းဆောင်များကို သီးခြားစီ တွေ့ဆုံ၍ မဟာမိတ်အချင်းချင်းကြား အတူတကွ လက်တွဲ လုပ်ဆောင်ရေးကို ဦးစားပေးရန် ဆွေးနွေးခဲ့သည်။ အဆိုပါ ခရီးစဉ်အတွင်း ဒုတိယဗိုလ်ချုပ်ကြီး ဂွန်မော်သည် ကိုးကန့်တပ် (MNDAA)၊ တအာင်းတပ် (TNLA) နှင့် ရှမ်းတပ် (SSPP/SSA) တို့ကို သီးခြားစီ သွားရောက်တွေ့ဆုံခဲ့ခြင်းဖြစ်ပြီး၊ မဟာမိတ်တပ်များအကြား မကြာခင် က ဖြစ်ပွားခဲ့သည့် ပဋိပက္ခများကို ဖြေရှင်းရန်နှင့် တော်လှန်ရေးအင်အားစုများအကြား ပြန်လည်စည်းလုံးရန် တိုက်တွန်းခဲ့သည်။ ဧပြီလ ၄ ရက်နေ့မှ ၆ ရက်နေ့ထိ တွေ့ဆုံမှုများနှင့် ပတ်သက်၍ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ယခုကဲ့သို့ အတည်ပြု ပြောဆိုသည်။ “ကျနော်တို့ KIO/KIA ရဲ့ တောင်ပိုင်းဖက်မှာရှိနေတဲ့ စစ်တပ်တွေ၊ အရပ်ဖက်ဌာနတွေက အဖွဲ့သားတွေကို လာပြီးကြည့်ရှုတာ၊ အားပေးစကားပြောတာပါ။ လာတဲ့အချိန်မှာ MNDAA၊ TNLA နဲ့ SSPP/SSA အဖွဲ့ တွေနဲ့လည်း တစ်ဖွဲ့ချင်းစီ တွေ့ခဲ့ပါတယ်။ ဒါဟာ မဟာမိတ်တွေဆိုတော့ လာရင်းနဲ့တွေ့တဲ့ သဘောမျိုးပါပဲ။” ပြီးခဲ့သည့် မတ်လအတွင်းက MNDAA နှင့် TNLA တပ်ဖွဲ့များကြား နယ်မြေအငြင်းပွားမှုကြောင့် ပဋိပက္ခအချို့ ဖြစ်ပွားခဲ့ရာ ဒုတိယဗိုလ်ချုပ်ကြီး ဂွန်မော်၏ ခရီးစဉ်သည် အဆိုပါ တင်းမာမှုများကို လျှော့ချရန်နှင့် အချင်းချင်း လေးစားမှုရှိရန် အဓိက တိုက်တွန်းခဲ့ခြင်း ဖြစ်သည်။ ဗိုလ်မှူးကြီး နော်ဘူက ဆက်လက်၍ “MNDAA နဲ့ TNLA တွေ ပဋိပက္ခဖြစ်တာတွေကို အချင်းချင်းနားလည်ဖို့၊ လေးစားမှုနဲ့ ပြန်ပြီးပူးပေါင်းနေထိုင်ဖို့ လိုလားတဲ့အကြောင်းတွေကို ပြောထားပါတယ်။ TNLA နဲ့ဆိုရင်လည်း ပလောင်နဲ့ ကချင်ဟာ ယခင်ကတည်းက အတူတူယှဉ်တွဲနေထိုင်လာတဲ့ တိုင်းရင်းသားတွေဖြစ်သလို၊ တော်လှန် ရေး လောကမှာလည်း အတူလက်တွဲလာတာမို့ ဆက်ပြီးတော့လည်း အချင်းချင်း အားကိုးအားထားပြုပြီး နေဖို့ ပြောထားပါတယ်” ဟု ပြောသည်။ ဒုတိယဗိုလ်ချုပ်ကြီး ဂွန်မော်သည် KIA က ၂၀၂၄ ခုနှစ်၊ ဇန်နဝါရီလတွင် စစ်အစိုးရတပ်ထံမှ တိုက်ခိုက် သိမ်းပိုက် ထားခဲ့သည့် နမ့်ဖတ်ကာကျေးရွာသို့လည်း ပထမဆုံးအကြိမ် သွားရောက်ခဲ့ပြီး ဒေသခံ ကချင်နှင့် တအာင်း လူထုကို တွေ့ဆုံကာ နိုင်ငံရေးဆိုင်ရာ အသိပေးပြောကြားမှုများ ပြုလုပ်ခဲ့သည်။ သို့သော်လည်း အဆိုပါ ခရီးစဉ်အတွင်း စစ်ရေးဆိုင်ရာ ပေါ်လစီအသစ်များ ချမှတ်ခြင်းမျိုး မရှိခဲ့ကြောင်း ဗိုလ်မှူးကြီးနော်ဘူက ဆက်ပြောသည်။ “ထူးထူးထွေထွေ ပေါ်လစီနဲ့ဆိုင်တာတွေ၊ စီမံကိန်းနဲ့ ပတ်သက်တာတွေ၊ အထူးစစ်ဆင်ရေး လုပ်ဖို့ ကိစ္စတွေ ဘာမှမရှိပါဘူး။ မိတ်ဟောင်းဆွေဟောင်းတွေကို လာတွေ့တဲ့ သဘောပါပဲ။ ပြည်သူလူထုလည်း ပဋိပက္ခတွေ ကြောင့် စိတ်ဆင်းရဲ ကြောက်ရွံ့တာမျိုး မဖြစ်ဖို့ အတူတူလက်တွဲပြီး ကျော်ဖြတ်ဖို့ ခွန်အားပေး စကားတွေ ပြောထားပါတယ်။” တစ်ဖက်တွင်လည်း KIO သည် အမျိုးသားညီညွတ်ရေး အစိုးရ (NUG) နှင့် အခြားတိုင်းရင်းသား လက်နက်ကိုင် အဖွဲ့ကြီးများ (KNU, KNPP, CNF) နှင့် ပူးပေါင်းကာ 'ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီ' ကို မတ်လ ၃၀ ရက်နေ့တွင် ဖွဲ့စည်းကြောင်း ကြေညာထားသည်။ ထို့ကြောင့် ယခု ဒုတိယဗိုလ်ချုပ်ကြီး ဂွန်မော်၏ ရှမ်းမြောက်ခရီးစဉ်မှာ အဆိုပါ ဦးဆောင်ကောင်စီတွင် ရှမ်းမြောက်အခြေစိုက် တိုင်းရင်းသားတပ်ဖွဲ့များ ထပ်မံပါဝင်လာရေးအတွက် စည်းရုံးလှုံ့ဆော်သည့် သံတမန် ရေးရာ လှုပ်ရှားမှုတစ်ခု ဖြစ်နိုင်ကြောင်း ဒေသခံ သတင်းရင်းမြစ်များက ရှုမြင်နေကြသည်။ စစ်အာဏာရှင် ဖြုတ်ချရေးအတွက် KIA၊ TNLA၊ MNDAA နှင့် SSPP စသည့် အင်အားကြီး လေးဖွဲ့စလုံး စစ်ရေး၊ နိုင်ငံရေးအရ ပြန်လည်စည်းလုံးလာစေမည့် အပြုသဘောဆောင်သည့် အလှည့်အပြောင်းတစ်ခု ဖြစ်လာရန် ဒေသခံပြည်သူများက မျှော်လင့်စောင့်ကြည့်နေကြသည်။ #ဗိုလ်ချုပ်ဂွန်မော် #KIA #KIO #MNDAA #TNLA #SSPP

ဒု-ဗိုလ်ချုပ်ကြီး ဂွန်မော် ရှမ်းပြည် ခရီးစဉ်အတွင်း မဟာမိတ် လက်တွဲ ဆောင်ရွက်ရေး ဆွေးနွေး

ကိုးကန့်တပ်များ နမ့်ခမ်းမှ တပ်ဆုတ်၊ တအာင်းအလံများ ၁၀၅ မိုင်တွင် ပြန်လွှင့်ထူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၄ ရက်။ ရှမ်းမြောက် နမ့်ခမ်းမှ ကိုးကန့်တပ် (MNDAA) တပ်ဖွဲ့ဝင်များ ဆုတ်ခွာသွားပြီး ၁၀၅ မိုင်တွင်လည်း တအာင်းအလံများ ပြန်လည်လွှင့်ထူထားသည်ဟု ဒေသခံများက ပြောသည်။ တအာင်းတပ် (TNLA) နှင့် ကိုးကန့်တပ် (MNDAA) တို့အကြား နယ်မြေစိုးမိုးမှုဆိုင်ရာ သဘောတူညီချက်ရရှိပြီး နောက် နမ့်ခမ်းမြို့နယ်အတွင်း ကျူးကျော်ဝင်ရောက်ခဲ့သည့် MNDAA တပ်ဖွဲ့ဝင်များ ပြန်လည် ဆုတ်ခွာသွား သကဲ့သို့၊ ၁၀၅ မိုင် ကုန်သွယ်ရေးဇုန်တွင်လည်း တအာင်းအလံများ ပြန်လည်စိုက်ထူလာကြောင်း ဒေသခံများနှင့် သတင်းရင်းမြစ်များက ပြောသည်။ ပြီးခဲ့သည့် မတ်လ ၂၀ ရက်က လောက်ကိုင်မြို့တွင် နှစ်ဖက်ခေါင်းဆောင်များ တွေ့ဆုံဆွေးနွေးပြီးနောက် မတ်လ ၂၃ ရက် နံနက်ပိုင်းမှ စတင်ကာ နမ့်ခမ်းမြို့အရှေ့ဘက် ပန်းဆေးဒေသတွင် အင်အားဖြည့်တင်းထားသည့် MNDAA တပ်ဖွဲ့ဝင် ရာနှင့်ချီ၍ စစ်ကားအစီးရေ ၇၀ ကျော်ဖြင့် နမ့်ဖတ်ကာလမ်းပိုင်းမှတစ်ဆင့် ကွတ်ခိုင်မြို့ ဘက်သို့ ပြန်လည်ဆုတ်ခွာသွားခဲ့ခြင်းဖြစ်သည်။ မြေပြင်အခြေအနေနှင့် ပတ်သက်၍ နမ့်ခမ်းဒေသခံတစ်ဦးက ယခုကဲ့သို့ ပြောသည်။ “နမ့်ခမ်းဘက်မှာတော့ နမ့်ခမ်းနဲ့ ကွတ်ခိုင်အစပ်ဖြစ်တဲ့ ဒီ ၁၂ မိုင် အရင်က TNLA ရဲ့ ဂိတ်ပေါ့နော် အဲ့ဒီ အကျော်မှာ ရောက်နေတဲ့ ဒီနမ့်ခမ်းမြို့ထဲကို ရောက်နေတဲ့ ကိုးကန့်တပ်တွေကတော့ တပ်ဆုတ်သွားပါပြီ။ ကိုးကန့်တပ်ကတော့ ကွတ်ခိုင်နယ်တကြောလုံးကို သူတို့အုပ်ချုပ်မယ်ပေါ့။ အဲ့ဒါကြောင့် မနေ့က ဒီနမ့်ခမ်း နယ်ဘက်ကို ကျူးကျော်နေတဲ့ အရှေ့ကိုရောက်နေတဲ့ ကိုးကန့်စစ်သားတွေက နောက်ဆုတ်သွားပါပြီ။” ထို့ပြင် ပြီးခဲ့သည့်ရက်ပိုင်းက ကိုးကန့်တပ် MNDAA ဘက်မှ တအာင်းအလံများကို ဖြုတ်ချပြီး အုပ်ချုပ်ရေး အဖွဲ့ဝင်များကို မောင်းထုတ်ခဲ့သည့် ၁၀၅ မိုင် ကုန်သွယ်ရေးဇုန်၌ ယနေ့တွင် တအာင်းအလံများကို ပြန်လည် စိုက်ထူခွင့် ရရှိလာခဲ့သည်။ သို့သော် အုပ်ချုပ်ရေးယန္တရားတွင် တအာင်းတပ်ဖွဲ့များ ပြန်လည်တာဝန်ယူခြင်း မရှိသေးကြောင်း ဒေသခံများက ပြောသည်။ “ဒီနေ့မနက်မှာတော့ ဒီညီနောင်မဟာမိတ် အုပ်ချုပ်တဲ့ ဒီ ၁၀၅ မိုင်ထဲမှာတော့ TNLA အလံတွေကို အကုန်လုံး ပြန်စိုက်ထူထားတာ တွေ့ရပါတယ်။ ၁၀၅ မိုင်မှာတော့ ကျနော်ကြားသိရသလောက်ကတော့ ဒီဘက်မှာတော့ TNLA အုပ်ချုပ်ရေးကတော့ မထိုင်တော့ဘူးလို့ ကြားသိရပါတယ်။ အရင်တုန်းကတော့ ဒီမှာ ၃ ဖွဲ့ထိုင်တာပေါ့ နော်။ အခုတော့ ဒီမှာ AA ရယ် MNDAA ရယ် နှစ်ဖွဲ့ပဲ ထိုင်မယ်လို့တော့ ကြားသိရပါတယ်။ အခွန်နဲ့ ပတ်သက် ရင်တော့ ဒီတိုင်းပဲ အခွန်ကို ၃ ဖွဲ့ကောက်မယ်လို့တော့ ကြားသိရပါတယ်။ TNLA ရဲ့ အခွန်လည်း ဒီဘက်မှာ ရှိမှာပေါ့။” လက်ရှိတွင် နမ့်ခမ်းမြို့အတွင်း ထိုးစစ်ဆင်လာမည်ကို စိုးရိမ်နေသည့် ဒေသခံများမှာ တပ်ဆုတ်ခွာမှုကြောင့် စိတ်အေးသွားရပြီဟု ဆိုကြသည်။ ယခုကဲ့သို့ ကိုးကန့်တပ် တပ်ဆုတ်ခွာမှုနှင့် တအာင်းအလံ ပြန်လည်စိုက်ထူမှုများသည် နှစ်ဖက်ခေါင်းဆောင်များ အကြား ရရှိထားသည့် သဘောတူညီချက် ၅ ချက်ပါ တပ်နေရာချထားရေးနှင့် မဟာမိတ်အချင်းချင်း အသိအမှတ်ပြုရေးဆိုင်ရာ အချက်များကို လက်တွေ့အကောင်အထည်ဖော်လာခြင်း ဖြစ်သည်။ ညီနောင်မဟာမိတ်အဖွဲ့ဝင် နှစ်ဖွဲ့အကြား ဖြစ်ပွားခဲ့သည့် ယင်းအငြင်းပွားမှုသည် ခေါင်းဆောင်ပိုင်းများ၏ ဆွေးနွေးမှုအရ ပြေလည်မှုရရှိသွားပြီဖြစ်သော်လည်း လားရှိုး-နမ္မတူ လမ်းပိုင်းရှိ အီနိုင်းကျေးရွာကဲ့သို့ နေရာ အချို့တွင်မူ MNDAA တပ်များ ဆက်လက်ရှိနေသေးကြောင်း ဒေသတွင်းသတင်းရင်းမြစ်များ၏ ဖော်ပြချက်အရ သိရသည်။ ဓာတ်ပုံ - (ပုံဟောင်း) #MNDAA #TNLA #ကိုးကန့်တပ် #တအာင်းတပ် #ကွတ်ခိုင်တိုက်ပွဲ

ကိုးကန့်တပ်များ နမ့်ခမ်းမှ တပ်ဆုတ်၊ တအာင်းအလံများ ၁၀၅ မိုင်တွင် ပြန်လွှင့်ထူ

အပစ်ရပ်သော်လည်း တအာင်းပြည်သူများ စိုးရိမ်နေရဆဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ ရှမ်းပြည် မြောက်ပိုင်းတွင် နယ်မြေအငြင်းပွားမှုများကြောင့် တိုက်ပွဲများအထိ ဖြစ်ပွားခဲ့သည့် ကိုးကန့်တပ် (MNDAA) နှင့် တအာင်းတပ် (TNLA) တို့အကြား အပစ်အခတ်ရပ်စဲရေး သဘောတူညီချက် ရရှိသွားပြီ ဖြစ်သော်လည်း မြေပြင်တွင်မူ တအာင်းတိုင်းရင်းသားများ၏ ယဉ်ကျေးမှုနှင့် စာပေဆိုင်ရာ အခွင့်အရေးများ ကန့်သတ်ပိတ်ပင်ခံနေရကြောင်း ဒေသခံများက ပြောသည်။ ကိုးကန့်ဒေသ လောက်ကိုင်မြို့တွင် ၄ ရက်ကြာ ဆွေးနွေးခဲ့ပြီးနောက် မတ်လ ၂၁ ရက်နေ့တွင် အဓိက သဘောတူ ညီချက် (၅) ချက် ရရှိခဲ့ခြင်းဖြစ်သည်။ အဆိုပါ တွေ့ဆုံမှုနှင့်ပတ်သက်၍ PSLF/TNLA သတင်းနှင့်ပြန်ကြားရေး တာဝန်ခံ လွေးယေဦးက ယခုကဲ့သို့ အတည်ပြုပြောသည်။ “တွေ့ဆုံဆွေးနွေးမှုမှာ နှစ်ဖက်တပ်တွေ အပစ်ရပ်နိုင်ဖို့ သဘောတူခဲ့တယ်။ နောက်ပြီး နှစ်ဖက်တပ်က မဟာမိတ် အဖြစ် ဆက်လက်ရပ်တည်ဖို့၊ နောက်တစ်ခုက နယ်မြေတွေ သတ်မှတ်နိုင်ခဲ့တယ်။ နယ်မြေနဲ့ ပတ်သက်ပြီးတော့ ပြောနိုင်ခြင်းမရှိသေးဘူး။ တခြားတပ် နေရာချထားရေးတွေ တဖြည်းဖြည်း သတ်မှတ်ထားတဲ့ နေရာ ပြန် ရောက်မှပဲ ပြောနိုင်မှာ ဖြစ်ပါတယ်။ လောလောဆယ် ကွတ်ခိုင်ကိုတော့ MNDAA က ဆက်လက်ထိန်းချုပ်မှာ ဖြစ်တယ်။ နောက်ထပ်တစ်ခုကတော့ နှစ်ဖက်တပ်ကြား ထိန်းသိမ်းထားတဲ့ တပ်သားတွေ၊ လက်နက်ခဲယမ်းတွေ ပြန်လည်အပ်နှံဖို့ နှစ်ဖက်သဘောတူတာတွေ ရှိတယ်” အဆိုပါ အပစ်ရပ်စဲရေး သဘောတူညီချက် မရရှိမီ ရက်ပိုင်းအလို မတ်လ ၁၇ ရက်နေ့က မန်ပြိန်းကျေးရွာသူကြီး ဦးနိုင်ကိန်အား MNDAA တပ်ဖွဲ့ဝင်များက အကြောင်းမဲ့ ပစ်သတ်ခဲ့ခြင်းနှင့် မတ်လ ၁၅ ရက်နေ့က လွယ်ဆိုင် ကျေးရွာရှိ ဘုန်းကြီးကျောင်းနှင့် စာသင်ကျောင်းများ ဒရုန်းဗုံးထိမှန် ပျက်စီးခဲ့သည့် ဖြစ်စဉ်များကြောင့် ဒေသခံ များမှာ စိုးရိမ်ထိတ်လန့်နေဆဲ ဖြစ်သည်။ အလားတူ မြေပြင်အခြေအနေတွင် MNDAA အုပ်ချုပ်ရေးအောက် ရောက်ရှိသွားသည့် ကွတ်ခိုင်မြို့နယ် အတွင်း ရှိ တအာင်းကျေးရွာ ၁၄ ရွာထက်မနည်းတွင် တအာင်းအမျိုးသားအလံများအား ဖြုတ်ချခိုင်းခြင်းနှင့် တအာင်း စာပေဖြင့် ရေးထိုးထားသော ဆိုင်းဘုတ်များကို မြန်မာ (သို့မဟုတ်) တရုတ်ဘာသာဖြင့်သာ လဲလှယ်ရေးသားရန် ဖိအားပေး ညွှန်ကြားမှုများ ရှိနေသည်။ နမ့်ဖတ်ကာဘက်မှ တအာင်းဒေသခံ အမျိုးသမီးတစ်ဦးက “အပစ်ရပ်တယ်ဆိုတာ ကြားရလို့ ဝမ်းသာပေမဲ့ မြေ ပြင်မှာတော့ ကျမတို့က ကြောက်နေရတုန်းပဲ။ အမြဲတော့ သတိနဲ့ နေရမယ့် အနေအထားမျိုးပေါ့နော်။ ကိုးကန့် တပ်သားတွေက အိမ်ထဲအထိ ဝင်မွှေပြီး ဆိုင်ကယ်တွေ၊ အိမ်သုံးပစ္စည်းတွေ ယူသွားကြတယ်။ ပိုဆိုးတာက ကျမတို့ရဲ့ တအာင်းအလံတွေကို ဖြုတ်ခိုင်းပြီး တအာင်းစာနဲ့ ရေးထားတဲ့ ဆိုင်းဘုတ်တွေကို ပေးမသုံးတော့ဘူး” ဟု ပြောသည်။ ထို့အပြင် ပြီးခဲ့သည့် မတ်လ ၁၄ ရက်နေ့က ဖြစ်ပွားခဲ့သော ကွတ်ခိုင်တိုက်ပွဲအတွင်း MNDAA ၏ ဒရုန်းဗုံးဖြင့် ပစ်ခတ်မှုကြောင့် အရပ်သားများ သေဆုံးခဲ့ရသည့် ဖြစ်စဉ်ကလည်း ဒေသခံများ အကြား စိုးရိမ်ထိတ်လန့်မှုကို ပိုမိုမြင့်တက်စေခဲ့သည်။ လက်ရှိတွင် နှစ်ဖက်ခေါင်းဆောင်များက အငြင်းပွားမှုများကို ဆွေးနွေးအဖြေရှာရန် သဘောတူထားကြ သော်လည်း နယ်မြေစိုးမိုးမှု အပြောင်းအလဲကြားတွင် တအာင်းတိုင်းရင်းသားတို့၏ လုံခြုံရေး၊ ယဉ်ကျေးမှု ဆိုင်ရာ ကန့်သတ်မှုများနှင့် လူမျိုးရေးဆိုင်ရာ အခွင့်အရေးများမှာ ကြီးမားသော စိန်ခေါ်မှုများနှင့် ရင်ဆိုင်နေရဆဲ ဖြစ်သည်။ #TNLA #MNDAA #အပစ်ရပ် #ကွတ်ခိုင်

အပစ်ရပ်သော်လည်း တအာင်းပြည်သူများ စိုးရိမ်နေရဆဲ

ကွတ်ခိုင်တွင် MNDAA က တအာင်း ဘာသာ ဆိုင်းဘုတ်များ အလံများ ဖြုတ် သတင်းနှင့် မီဒိယာ ကွန်ရက်။ ၂၀၂၆ ခုနှစ်၊ မတ်လ ၂၂ ရက်။ ရှမ်းပြည် မြောက်ပိုင်း၊ ကွတ်ခိုင်မြို့နယ်အတွင်းရှိ တအာင်းကျေးရွာအဝင် ဆိုင်းဘုတ်များကို ဖျက်ဆီးပြီးနောက် တအာင်းဘာသာနှင့် အလံများ အသုံးမပြုရန် MNDAA သတိပေးလိုက်သည်။ ကွတ်ခိုင်မြို့နယ်အတွင်းရှိ တအာင်းအမျိုးသား လွတ်မြောက်ရေး တပ်မတော် (TNLA) ထိန်းချုပ်ခဲ့သည့် ကျေးရွာများတွင် ရွာအဝင်ဆိုင်းဘုတ်များကို ဖျက်ဆီးခဲ့ပြီး တအာင်းဘာသာနှင့် အလံများ ထပ်မံအသုံးမပြုရန် ကိုးကန့်တပ်မတော် (MNDAA) က သတိပေးကန့်သတ်မှုများ ပြုလုပ်လာကြောင်း ဒေသခံများက ပြောသည်။ ကွတ်ခိုင်မြို့ရှိ ဒေသခံအမျိုးသားတစ်ဦးက “နောက်ဆုံးအကြိမ် သတိပေးတာလို့ ပြောတယ်။ သူတို့အုပ်ချုပ်ရင် သူတို့အလံပဲ သုံးရမယ့်သဘောပေါ့။ အလံကတော့ အကုန်ဖြုတ်ရတယ်။ လမ်းတွေရော ကျောင်းတွေရော အကုန်လုံးပါတယ်” ဟု လက်ရှိမြေပြင်အခြေအနေကို ပြောပြသည်။ MNDAA က ကွတ်ခိုင်မြို့ကို သိမ်းယူပြီးနောက်ပိုင်း နယ်မြေစိုးမိုးမှု အပြောင်းအလဲများ ပြုလုပ်လာခြင်းဖြစ်ကာ တအာင်းဘာသာဖြင့် ရေးထိုးထားသည့် ဆိုင်းဘုတ်များနှင့် အလံများကို အတင်းအဓမ္မ ဖယ်ရှားခိုင်းနေခြင်း ဖြစ်သည်။ မတ်လ ၂၀ ရက်နေ့က ပြုလုပ်သည့် အစည်းအဝေးတွင် ဟိုကျန့်၊ ဟွေခုတ်၊ တုံဆင်၊ ကုန်းချမ်း အပါအဝင် ကျေးရွာ ၁၄ ရွာမှ တာဝန်ရှိသူများကို ခေါ်ယူကာ တအာင်းအလံများ အသုံးမပြုရန်နှင့် တအာင်းဘာသာအစား မြန်မာ (သို့မဟုတ်) တရုတ်ဘာသာဖြင့်သာ ရေးသားရန် ညွှန်ကြားခဲ့ကြောင်း ရွာသားများက ပြောသည်။ ထို့အပြင် ကျေးရွာများအတွင်းရှိ TNLA တပ်ဖွဲ့ဝင်များအနေဖြင့် လက်နက်အပ်နှံကြရန်နှင့် ဆက်လက် တာဝန်ထမ်းဆောင်လိုပါက MNDAA ထံတွင်သာ အမှုထမ်းရန် ဖိအားပေးမှုများ ရှိနေသည်။ TNLA နှင့် နီးစပ်သည့် ဒေသခံတစ်ဦးက “လက်နက်ကိုင်ချင်ရင် သူတို့ဆီမှာပဲ ကိုင်ရမယ်တဲ့။ လစာလည်း ပေးမယ်ပြောတယ်။ သူတို့အဖွဲ့မဝင်ချင်လည်း လက်နက်လာအပ်ရင် နေခွင့်ပေးမယ်ပြောတယ်” ဟု ပြောသည်။ လက်ရှိတွင် MNDAA သည် ဒေသခံများအား TNLA နှင့် ဆက်စပ်မှု ရှိ၊ မရှိ စစ်ဆေးမှုများ ပြုလုပ်နေသဖြင့် ဆက်စပ်သူအချို့မှာ ဘေးလွတ်ရာသို့ ထွက်ပြေးတိမ်းရှောင်နေကြရဆဲဖြစ်သည်။ ၁၀၂၇ စစ်ဆင်ရေးနောက်ပိုင်း မဟာမိတ်တပ်ဖွဲ့များအကြား နယ်မြေခွဲဝေမှု တင်းမာမှုများ ဖြစ်ပေါ်ခဲ့ပြီးနောက် မတ်လ ၂၁ ရက်နေ့တွင် နှစ်ဖက်တပ်များအကြား အပစ်ရပ်သဘောတူညီမှု ရယူနိုင်ခဲ့သည်ဟု သတင်းများ ထွက်ပေါ်နေသည်။ အဆိုပါ သဘောတူညီချက်တွင် တပ်များ ပြန်လည်နေရာချထားရေး၊ သုံ့ပန်းလဲလှယ်ရေးနှင့် နယ်မြေခွဲဝေရေး ကိစ္စရပ်များ ပါဝင်သည်ဟု ဆိုသော်လည်း မြေပြင်တွင် မဟာမိတ်အချင်းချင်းကြား ယဉ်ကျေးမှုနှင့် စာပေဆိုင်ရာ ကန့်သတ်မှုများကြောင့် ဒေသခံ တအာင်းတိုင်းရင်းသားများ အကြား စိုးရိမ်ပူပန်မှုများ မြင့်တက်လျက်ရှိသည်။ #TNLA #MNDAA #TNLA_MNDAAတင်းမာမှု #ကွတ်ခိုင်တိုက်ပွဲ #ညီနောင်မဟာမိတ်

ကွတ်ခိုင်တွင် MNDAA က တအာင်း ဘာသာ ဆိုင်းဘုတ်များ အလံများ ဖြုတ်

မူဆယ်-လားရှိုးလမ်းမပေါ်ရှိ KIA ဂိတ်များကို MNDAA က ဖယ်ရှားခိုင်းခြင်းမရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၂ ရက်။ မူဆယ်-လားရှိုး ပြည်ထောင်စု လမ်းမကြီးပေါ်ရှိ ကချင်လွတ်လပ်ရေး တပ်မတော် (KIA) ၏ စစ်ဆေးရေး ဂိတ်များကို ကိုးကန့်တပ် (MNDAA) က ဖယ်ရှားခိုင်းသည်ဆိုသည့် သတင်းများမှာ အခြေအမြစ်မရှိကြောင်း KIA ဘက်က တုံ့ပြန်ပြောဆိုလိုက်သည်။ ၁၀၂၇ စစ်ဆင်ရေးနောက်ပိုင်း ရှမ်းပြည်မြောက်ပိုင်းတွင် တိုင်းရင်းသားလက်နက်ကိုင် မဟာမိတ်တပ်ဖွဲ့များ အကြား နယ်မြေစိုးမိုးမှု အပြောင်းအလဲများ ဖြစ်ပေါ်နေသည်။ ကွတ်ခိုင်တွင် ကိုးကန့်တပ် MNDAA နှင့် တအာင်းတပ် TNLA တို့ အကြား တိုက်ပွဲများ ဖြစ်ပွားပြီးနောက် မူဆယ်-လားရှိုး ပြည်ထောင်စုလမ်းမကြီးပေါ်ရှိ ကချင်လွတ်လပ်ရေး တပ်မတော် (KIA) ၏ စစ်ဆေးရေးဂိတ်များကို ကိုးကန့်တပ် (MNDAA) က ဖယ်ရှားခိုင်းသည်ဆိုသည့် သတင်း များ ထွက်ပေါ် လာခဲ့သည်။ အဆိုပါ သတင်းများနှင့် ပတ်သက်၍ KIA ဘက်က အခြေအမြစ်မရှိကြောင်း ပြန်လည်တုံ့ပြန်လိုက်ပြီး လက်ရှိ အချိန်အထိ တစ်စုံတစ်ရာ အကြောင်းကြားလာခြင်း မရှိသေးဟု ဆိုသည်။ ပြီးခဲ့သည့် မတ်လ ၁၄ ရက်နေ့က ကွတ်ခိုင်မြို့နယ်အတွင်း ညီနောင်မဟာမိတ်နှစ်ဖွဲ့ဖြစ်သည့် တအာင်းတပ် (TNLA) နှင့် ကိုးကန့်တပ် (MNDAA) တို့အကြား ထိတွေ့တိုက်ပွဲများ ဖြစ်ပွားခဲ့ပြီးနောက် MNDAA က ကွတ်ခိုင်မြို့ တစ်ခုလုံးကို ထိန်းချုပ်လိုက်သည့် အခြေအနေတွင် ယခုကဲ့သို့ ဂိတ်များဖယ်ရှားခိုင်းသည့် သတင်း များ လူမှုကွန်ရက်နှင့် မီဒီယာအချို့တွင် ပျံ့နှံ့လာခဲ့ခြင်းဖြစ်သည်။ အဆိုပါ သတင်းများနှင့်ပတ်သက်၍ KIO/KIA ၏ ပြောရေးဆိုခွင့်ရှိသူ ဗိုလ်မှူးကြီးနော်ဘူက “သူတို့ဘက်ကနေ အကြောင်းကြားလာတာ မရှိပါဘူး။ ဂိတ်ကို ဖယ်ခိုင်းတာလည်း မရှိဘူး” ဟု အတည်ပြု ပြောသည်။ KIA အနေဖြင့် သိန္နီနှင့် ကွတ်ခိုင်အကြားရှိ ဟိုမုန်းအပါအဝင် အဓိကနေရာနှစ်ခုတွင် အခွန်ကောက်ခံသည့် ဂိတ်များနှင့် လုံခြုံရေးဂိတ်များ ရှိနေဆဲဖြစ်သော်လည်း ပြည်ထောင်စုလမ်းမကြီးပေါ်တွင် အခွန်ကောက်ခံခြင်း ကိုမူ ရပ်ဆိုင်းထားသည်မှာ ကြာပြီဖြစ်ကြောင်း ဆိုသည်။ ဗိုလ်မှူးကြီးနော်ဘူက “ကျနေည်တို့ ဘက်ကနေတော့ ဒီပြည်ထောင်စု လမ်းမပေါ်မှာကတော့ အခွန်အကောက် တွေ မကောက်ဖို့ကတော့ ကျွန်တော်တို့ ဗဟိုကော်မတီရဲ့ ဆုံးဖြတ်ချက်ချထားတာကတော့ ကြာပါပြီ။ အဓိက ကတော့ ဂိတ် ၂ ဂိတ် ဖြစ်ပါတယ်။ ဟို ကျနော်တို့ ဟိုမုန်းဆိုတဲ့ နေရာနဲ့ ဟို သိန္နီနဲ့ ကွတ်ခိုင်အကြားပေါ့ ဒီ ၂ နေရာပါပဲ။ အဓိက ကျနော်တို့ အခွန်ကောက်တဲ့ ဂိတ်ကတော့ ဒါတွေက အခု အခွန်ကောက်တာက အခု မလုပ် တော့ဘူးလေ။ ကြာပါပြီ အဲဒီမှာ ဗဟိုကော်မတီရဲ့ ဆုံးဖြတ်ချက်ပါပဲ ဒီအခွန်တွေ မကောက်တာကတော့ ကြာ ပါပြီ။ ကျန်တဲ့နေရာမှာတော့ ဂိတ်တော့ရှိပါတယ်။ ဒါပေမဲ့ ဘယ်လို ပြောရမှာလဲ လုံခြုံရေး ဂိတ်တွေပေါ့။ အဲဒါတွေကတော့ ရှိပါတယ်။ အခုလည်း ရှိပါတယ် အဲဒါတွေကတော့” ဟု အသေးစိတ် ရှင်းပြသည်။ လက်ရှိတွင် MNDAA ဘက်မှ ကွတ်ခိုင်မြို့နယ်အတွင်း နယ်မြေစိုးမိုးမှုပိုင်းဆိုင်ရာ ပြန်လည်စီမံခန့်ခွဲမှုများ လုပ်ဆောင်နေခြင်းကြောင့် မဟာမိတ်တပ်ဖွဲ့များအကြား နားလည်မှုလွဲမှားခြင်းများ မရှိစေရန် KIA ဘက်မှ ဗဟိုကော်မတီ၏ လမ်းညွှန်ချက်ကိုသာ အဓိကထား ကိုင်တွယ်သွားမည်ဟု ဆိုသည်။ ၁၀၂၇ စစ်ဆင်ရေးအပြီး ရှမ်းမြောက်ဒေသတွင် တိုင်းရင်းသား လက်နက်ကိုင်တပ်ဖွဲ့ အသီးသီးက နယ်မြေ ထိန်း ချုပ်မှုများ မြှင့်တင်လာသဖြင့် အဖွဲ့အချင်းချင်းကြား နယ်မြေထိစပ်မှုနှင့် ဂိတ်များအရေးမှာ စစ်ရေး၊ နိုင်ငံရေး အရ အထူးစိတ်ဝင်စားစရာ ဖြစ်နေသော်လည်း လက်ရှိအချိန်အထိ KIO/KIA အား တရားဝင် အကြောင်းကြား ကန့်ကွက်လာမှုမျိုး မရှိသေးဘူးဟု ဆိုသည်။ ဓာတ်ပုံ - KSSM (ပုံဟောင်း) KIA စစ်ဆေးရေးဂိတ်မှ MNDAA တပ်ဖွဲ့သိမ်းယူသွားသည့် စစ်ဆေးရေး ဂိတ်သုံး ပစ္စည်းများ ပြန်လာပို့ပေးနေစဉ်။ #KIA #MNDAA #KIAဂိတ်

မူဆယ်-လားရှိုးလမ်းမပေါ်ရှိ KIA ဂိတ်များကို MNDAA က ဖယ်ရှားခိုင်းခြင်းမရှိ

ရှမ်းမြောက် ပဋိပက္ခအတွင်း အရပ်သားများ အခွင့်အရေး ချိုးဖောက်ခံနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၈ ရက်။ ရှမ်းပြည် မြောက်ပိုင်းတွင် ညီနောင်မဟာမိတ် အဖွဲ့ဝင်များ ဖြစ်ကြသည့် ကိုးကန့်တပ် (MNDAA) နှင့် တအာင်း တပ် (TNLA) တို့အကြား စစ်ရေး ပဋိပက္ခများနှင့် တိုက်ခိုက်မှုများအတွင်း တအာင်းတိုင်းရင်းသားများနှင့် ဒေသခံ အရပ်သားများမှာ ဖမ်းဆီးနှိပ်စက်ခံရခြင်းနှင့် ဒရုန်းဗုံးထိမှန် သေဆုံးခြင်းများကို ဆိုးရွားစွာ ရင်ဆိုင်နေရသည်။ မတ်လ ၁၄ ရက်နေ့မှ ၁၆ ရက်နေ့အတွင်း MNDAA ၏ ထိုးစစ်ဆင်မှုများအတွင်း မုံးကိုးမြို့နယ်၌ TNLA နှင့် ဆက်စပ်သည်ဟု စွပ်စွဲကာ တအာင်းတိုင်းရင်းသား ၉ ဦးထက်မနည်း ဖမ်းဆီးခြင်း ခံခဲ့ရသည်။ ထို့ပြင် ကွတ်ခိုင်မြို့နယ် နမ့်ဖတ်ကာတွင်လည်း တအာင်းအမျိုးသားအချို့ ဖမ်းဆီးခေါ်ဆောင်ခံရပြီး တစ်ဦးမှာ အပြင်းအထန် ရိုက်နှက်နှိပ်စက်ခံခဲ့ရကြောင်း မြေပြင်သတင်းများအရ သိရသည်။ ဒေသခံ အမျိုးသားတစ်ဦးက “အခုက လမ်းပေါ်သွားလာဖို့တောင် မရဲတော့ဘူး။ TNLA နဲ့ ပတ်သက်တယ်ဆိုပြီး စွပ်စွဲဖမ်းတာတွေ ခပ်စိပ်စိပ် ဖြစ်လာတယ်။ ဖမ်းသွားတဲ့သူတွေထဲက တစ်ယောက်ဆိုရင် လူမဆန်အောင် အနှိပ်စက်ခံထားရတယ်လို့ ကြားရတယ်။ ဘယ်သူ့ကို အားကိုးရမှန်း မသိတဲ့ အခြေအနေပဲ” ဟု ပြောသည်။ စစ်ရေးအရှိန် မြင့်တက်လာမှုနှင့်အတူ MNDAA ၏ ဒရုန်းဗုံးကြဲ တိုက်ခိုက်မှုများကြောင့် ကွတ်ခိုင်မြို့နယ် လွယ်ဆိုင်ကျေးရွာတွင် စစ်ဘေးရှောင်များကို ကူညီပေးနေသည့် ပရဟိတသမား မိုင်းထွန်းလှ အပါအဝင် ဒေသခံ ၃ ဦး သေဆုံးခဲ့ရသည်။ လွယ်ဆိုင်ကျေးရွာအတွင်းသို့ ဒရုန်းဗုံး အလုံး ၁၀၀ ကျော် ကြဲချခဲ့သဖြင့် နေအိမ်များနှင့် ဘုန်းကြီးကျောင်းများပါ ထိခိုက်ပျက်စီးခဲ့ရကြောင်း ဒေသခံများက ပြောသည်။ ပရဟိတသမား မိုင်းထွန်းလှနှင့် နီးစပ်သူတစ်ဦးက “ထွန်းလှက စစ်ရှောင်တွေကို အကြိမ်ကြိမ်ကယ်ခဲ့တဲ့သူပါ။ သူ ဒရုန်းဗုံးထိတာ သိတယ်။ ဒဏ်ရာ ရထားပေမယ့် သူဘာမှမဖြစ်လောက်ဘူး ထင်ခဲ့တာ။ တကယ် စိတ်မကောင်း ဖြစ်ရတယ်။ အားလုံးကလည်း စစ်ရှောင်တွေကို ဦးစားပေးနေရတာ ဆိုတော့လေ။ သူ့ကိုတော့ ငါတို့က မကယ်လိုက်နိုင်ဘူး။ တာဝန်မကျေသလို ခံစားရတယ်” ဟု ပြောသည်။ လက်ရှိတွင် ကွတ်ခိုင်၊ မူဆယ် ၁၀၅ မိုင်နှင့် နမ့်ဖတ်ကာ စသည့်နေရာများတွင် MNDAA ဘက်က အင်အား အလုံးအရင်းဖြင့် လှုပ်ရှားနေသဖြင့် တအာင်းဒေသခံ အများအပြားမှာ ဖမ်းဆီးခံရမည်ကို စိုးရိမ်ကာ နေရပ် စွန့်ခွာ ထွက်ပြေးနေကြရသည်။ မတ်လ ၁၅ ရက်ကတည်းက နမ့်ခမ်းမှ ကွတ်ခိုင်သို့ အဆင်းတွင် MNDAA ၏ ဖမ်းဆီးခြင်း ခံလိုက်ရသည့် တအာင်းအမျိုးသား ၃ ဦးနှင့် ပတ်သက်၍ ယနေ့အထိ အဆက်အသွယ် လုံးဝမရရှိသေးသဖြင့် အသက်အန္တရာယ် အတွက် မိသားစုများက စိုးရိမ်နေကြသည်။ မဟာမိတ် အချင်းချင်းကြား ဖြစ်ပွားသည့် စစ်ရေးပဋိပက္ခများတွင် အပြစ်မဲ့အရပ်သားများ ပစ်မှတ်ထား ခံနေရသည့် အပေါ် တအာင်းလူမှုအဖွဲ့အစည်းများက ပြင်းပြင်းထန်ထန် ကန့်ကွက်ရှုတ်ချနေကြပြီး၊ ဖမ်းဆီးထား သူများကို အမြန်ဆုံးပြန်လွှတ်ပေးရန်နှင့် ဒေသခံများ၏ လုံခြုံရေးကို အာမခံပေးရန် တောင်းဆိုနေကြသည်။ ညီနောင်မဟာမိတ် အချင်းချင်းကြား ဖြစ်ပွားနေသည့် ယခုစစ်ရေးတင်းမာမှုများသည် ပြည်သူလူထု၏ အသက်အိုးအိမ်စည်းစိမ်ကို သာမက၊ တော်လှန်ရေး အင်အားစုများ အပေါ် ထားရှိသည့် လူထု၏ယုံကြည်မှုနှင့် ဒေသတွင်း လူမျိုးစုများအကြား ရေရှည်တည်ဆောက်ရမည့် စည်းလုံးညီညွတ်မှုကိုပါ အကြီးအကျယ် ရိုက်ခတ် နေသည်။ လက်နက်ကိုင် အဖွဲ့အစည်းများ အနေဖြင့် စစ်ရေးနည်းလမ်းဖြင့် နယ်မြေစိုးမိုးရန် ကြိုးပမ်းခြင်းထက် အပြစ်မဲ့ အရပ်သားများအား ကာကွယ်ရန်နှင့် ရေရှည်ငြိမ်းချမ်းရေးအတွက် နှစ်ဖက်အဖွဲ့အစည်းကြား တွေ့ဆုံဆွေးနွေး ကာ အဖြေရှာညှိနှိုင်းကြရန် ဒေသခံများနှင့် လူမှုအဖွဲ့အစည်းများက တိုက်တွန်းတောင်းဆိုထားသည်။ ဓါတ်ပုံ - ဒရုန်းထိမှန်သေဆုံးသွားသည့် ပရဟိတသမား မိုင်းထွန်းလှပုံ #ရှမ်းမြောက်တိုက်ပွဲ #TNLAတအာင်းတပ် #MNDAAကိုးကန့်တပ်

ရှမ်းမြောက် ပဋိပက္ခအတွင်း အရပ်သားများ အခွင့်အရေး ချိုးဖောက်ခံနေရ

နမ့်ခမ်းဒေသခံများ နေရပ်ပြန်နိုင်လောက်သည့် လုံခြုံမှု မရှိသေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၈ ရက်။ ရှမ်းပြည်မြောက်ပိုင်းတွင် ကိုးကန့်တပ် (MNDAA) နှင့် တအာင်းတပ် (TNLA)တို့ကြား တိုက်ပွဲများ ယာယီ ငြိမ်သက် သွားသော်လည်း နမ့်ခမ်းဒေသခံများ နေရပ်ပြန်ရန် စိုးရိမ်နေဆဲဖြစ်သည်။ ဆေးရုံများနှင့် စာသင်ကျောင်းများ၊ ဌာန ဆိုင်ရာများ အပါအဝင် အရပ်သား အများအပြားမှာ စစ်ရှောင်နေကြပြီး နေရပ် မပြန်ရဲသေးပဲ ရှိနေခြင်း ဖြစ်သည်။ ရှမ်းပြည် မြောက်ပိုင်းတွင် ညီနောင်မဟာမိတ်တပ်ဖွဲ့ဝင်များ ဖြစ်ကြသည့် ကိုးကန့်တပ် (MNDAA) နှင့် တအာင်း တပ် (TNLA) တို့အကြား ဖြစ်ပွားခဲ့သော စစ်ရေးပဋိပက္ခများမှာ ယနေ့တွင် ယာယီငြိမ်သက်သွားသော် လည်း၊ နမ့်ခမ်းမြို့နယ်အတွင်းရှိ စစ်ဘေးရှောင်ပြည်သူများမှာမူ တိုက်ပွဲများ ပြန်လည်ဖြစ်ပွားလာမည်ကို စိုးရိမ်သဖြင့် နေအိမ်များသို့ ပြန်လည်ဝင်ရောက်ရန် ဝန်လေးနေကြကြောင်း ပြောသည်။ ပြီးခဲ့သည့် မတ်လ ၁၄ ရက်နေ့မှ စတင်ကာ ကွတ်ခိုင်မြို့ရှိ TNLA တပ်စခန်းများကို MNDAA က အင်အား အလုံး အရင်းဖြင့် ထိုးစစ်ဆင်ခဲ့ပြီးနောက် မတ်လ ၁၆ ရက်နေ့တွင် ကွတ်ခိုင်မြို့တစ်ခုလုံးကို MNDAA က အပြည့်အဝ ထိန်းချုပ်လိုက်ပြီဖြစ်ကြောင်း ဒေသခံများက အတည်ပြုသည်။ ထိုမှတစ်ဆင့် တိုက်ပွဲများသည် နမ့်ခမ်းမြို့နယ်ဘက်သို့ ကူးစက်ပျံ့နှံ့ခဲ့ပြီး TNLA ထိန်းချုပ်ထားသော ဗျူဟာ ကုန်းများနှင့် နမ့်ဖတ်ကာလမ်းပိုင်းများကို MNDAA က ဆက်လက်တိုက်ခိုက်ခဲ့ခြင်း ဖြစ်သည်။ နမ့်ခမ်းမြို့ပေါ်တွင် တိုက်ပွဲများ အပြင်းအထန် ဖြစ်ပွားလာမည်ကို စိုးရိမ်သဖြင့် ဒေသခံများသည် ဘေးလွတ်ရာ သို့ ကြိုတင်တိမ်းရှောင်ခဲ့ကြရာ မြို့ပေါ်ရပ်ကွက်အချို့မှာ ယနေ့တိုင် တိတ်ဆိတ် ခြောက်ကပ်နေဆဲ ဖြစ်သည်။ နမ့်ခမ်းမြို့ခံ အမျိုးသားတစ်ဦးက “ဆေးရုံကလူတွေရော၊ ဌာနဆိုင်ရာတွေရော တော်တော်များများ ရွှေ့ကြ တယ်။ ဆိုင်ကယ်တွေ၊ ကားတွေ အများကြီးပဲ။ ဘော်ဒါဆောင်က ကျောင်းတက်တဲ့ ကလေးတွေကိုလည်း မိဘတွေက ရွာဘက်ပိုင်းကို ပြန်ခေါ်သွားကြတာမျိုးတွေ ရှိတယ်” ဟု ပြီးခဲ့သည့်ရက်ပိုင်းက မြို့တွင်း အခြေ အနေကို ပြောပြသည်။ သို့သော် မတ်လ ၁၇ ရက်နှင့် ယနေ့ ၁၈ ရက်တို့တွင် တိုက်ပွဲသံများ သိသိသာသာ ငြိမ်သက်သွားခဲ့သည်။ လက်ရှိတွင် နှစ်ဖက်တပ်ဖွဲ့မှ တာဝန်ရှိသူများသည် လောက်ကိုင်မြို့၌ အရေးပေါ် တွေ့ဆုံဆွေးနွေးမှုများ ပြုလုပ်နေကြောင်း သတင်းများ ထွက်ပေါ်နေသော်လည်း တရားဝင် အပစ်ရပ်စဲရေး သဘောတူညီချက် တစ်စုံတစ်ရာကိုမူ ထုတ်ပြန်ခြင်း မရှိသေးပေ။ အဆိုပါ ဒေသခံအမျိုးသားက “တိုက်ပွဲတွေမဖြစ်တော့ဘူး ငြိမ်နေတယ်။ ဒါပေမဲ့ ဘယ်အဖွဲ့ကမှ အတည်တကျ ထုတ်ပြန်ထားတာ မရှိတော့ အခြေအနေကို စောင့်ကြည့်နေရတုန်းပဲ။ အဲ့ဒါကြောင့် ရှောင်သွားတဲ့လူတွေလည်း မြို့ထဲကို တော်ရုံပြန်မဝင်ကြသေးဘူး။ အခြေအနေကို စောင့်ကြည့်ဦးမှာပဲ” ဟု ဆိုသည်။ လက်ရှိတွင် တရုတ်-မြန်မာ နယ်စပ်ကုန်သွယ်ရေး လမ်းကြောင်းနှင့် နီးကပ်သော နေရာများ၌ လူသူသွားလာမှု အလွန်နည်းပါးနေပြီး စီးပွားရေးလုပ်ငန်းများလည်း ရပ်တန့်လုနီးပါး ဖြစ်နေသည်။ နမ့်ခမ်းမြို့သည် ကချင်ပြည်နယ်နှင့် ရှမ်းပြည်မြောက်ပိုင်း အစပ် တရုတ်-မြန်မာနယ်စပ်ကုန်သွယ်ရေး၏ အရေးပါသော လမ်းဆုံလမ်းခွ ဖြစ်သဖြင့် ယခုစစ်ရေးတင်းမာမှုသည် ကုန်စည်စီးဆင်းမှုကိုပါ ထိခိုက်စေလျက်ရှိသည်။ ဒေသခံပြည်သူများကမူ ညီနောင်မဟာမိတ် အချင်းချင်းကြား ဖြစ်ပေါ်နေသော အကျပ်အတည်းများကို စစ်ရေး နည်း လမ်းထက် တွေ့ဆုံဆွေးနွေးမှုဖြင့်သာ အမြန်ဆုံး အဖြေရှာဖြေရှင်းပေးရန်နှင့် ၎င်းတို့၏ အသက်အိုးအိမ် စည်းစိမ်များကို အကာအကွယ်ပေးရန် လိုလားနေကြသည်။ #ရှမ်းမြောက်စစ်ရေးအခြေအနေ #ကွတ်ခိုင်တိုက်ပွဲ #နမ့်ခမ်းတိုက်ပွဲ #TNLAတအာင်းတပ် #ကိုးကန့်တပ်MNDAA #စစ်ကော်မရှင်တပ် #တရုတ်ဖိအား

နမ့်ခမ်းဒေသခံများ နေရပ်ပြန်နိုင်လောက်သည့် လုံခြုံမှု မရှိသေး

ကိုးကန့် MNDAA နှင့် တအာင်း TNLA တို့ တိုက်ပွဲများ ရပ်ပြီး လောက်ကိုင်တွင် ဆွေးနွေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၇ ရက်။ ညီနောင်မဟာမိတ်ချင်း သွေးထွက်သံယိုဖြစ်ပြီးနောက် ကိုးကန့်တပ် (MNDAA) နှင့် တအာင်းတပ် (TNLA) တို့ တိုက်ပွဲများ ရပ်တန့်ပြီး လောက်ကိုင်တွင် တွေ့ဆုံဆွေးနွေးနေသည်။ ရှမ်းပြည် မြောက်ပိုင်း၊ တရုတ်-မြန်မာနယ်စပ် ကုန်သွယ်ရေးလမ်းကြောင်းပေါ်ရှိ နယ်မြေစိုးမိုးမှု အငြင်းပွားရာမှ စတင်ခဲ့သည့် ကိုးကန့်တပ် (MNDAA) နှင့် တအာင်းတပ် (TNLA) တို့အကြား တိုက်ပွဲများ မတ်လ ၁၆ ရက်နေ့၊ ညနေပိုင်းတွင် ရပ်တန့်သွားခဲ့ပြီး ယနေ့တွင် နှစ်ဖက်ခေါင်းဆောင်များ လောက်ကိုင်မြို့၌ တွေ့ဆုံကာ အရေးပေါ် ညှိနှိုင်းနေကြပြီ ဖြစ်သည်။ ကွတ်ခိုင်မြို့အပါအဝင် မဟာဗျူဟာကျသည့် တပ်စခန်းများကို MNDAA က အင်အားသုံး တိုက်ခိုက်သိမ်းပိုက် ခဲ့ပြီးနောက် ရက်ပိုင်းအတွင်း ဖြစ်ပွားခဲ့သည့် အဆိုပါ ထိပ်တိုက်ရင်ဆိုင်မှုများကြောင့် မဟာမိတ်အချင်းချင်းကြား တိုက်ခိုက်မှုများ ဖြစ်ပွားပြီးနောက် ယခုကဲ့သို့ စားပွဲဝိုင်းဆွေးနွေးမှု ပေါ်ပေါက်လာခြင်းဖြစ်သည်။ TNLA နှင့် နီးစပ်သည့် သတင်းရင်းမြစ်တစ်ခု၏ အဆိုအရ “မနေ့ညနေကစပြီး ပစ်ခတ်မှုတွေ ရပ်သွားပြီပေါ့ ကွာ။ ဒီနေ့ပေါ့နော် မတ်လ ၁၇ ရက်နေ့ ဒီနေ့တော့ နှစ်ဖက်ကိုယ်စားလှယ်တွေ လောက်ကိုင်မှာ တွေ့နေကြ တယ်။ အဓိကကတော့ ကွတ်ခိုင်၊ နမ့်ဖတ်ကာနဲ့ ၁၀၅ မိုင်ကိစ္စတွေ၊ ဖမ်းဆီးခံထားရတဲ့ တပ်ဖွဲ့ဝင်တွေအရေးကို အဓိကထား ညှိနှိုင်းနေတာပါ” ဟု ပြောသည်။ ပြီးခဲ့သည့် ရက်ပိုင်းအတွင်းက MNDAA ၏ ထိုးစစ်ကြောင့် TNLA ဘက်က ကွတ်ခိုင်မြို့၊ နမ့်ဖတ်ကာနှင့် မူဆယ် ၁၀၅ မိုင်ရှိ စခန်းများကို လက်လွှတ်ခဲ့ရသည့်အပြင် တပ်ဖွဲ့ဝင် ၁၀၀ နီးပါးခန့်လည်း ဖမ်းဆီးခံခဲ့ရသည်။ အဆိုပါတိုက်ပွဲများတွင် MNDAA နှင့်အတူ စစ်ကော်မရှင်လက်အောက်ခံ ပြည်သူ့စစ်အချို့ပါ ပူးပေါင်းပါဝင်ခဲ့ သည်ဟူသော သတင်းများကြောင့် တော်လှန်ရေးအင်အားစုများကြားတွင် စိုးရိမ်မှုနှင့် ဝေဖန်မှုများ ကျယ်ကျယ် လောင်လောင် ထွက်ပေါ်ခဲ့ရသည်။ နိုင်ငံရေးလေ့လာသုံးသပ်သူ အချို့ကမူ အဆိုပါ ပဋိပက္ခသည် တရုတ်နယ်စပ် ကုန်သွယ်ရေး လမ်းကြောင်း တစ်ခုလုံးကို MNDAA က တစ်ဖွဲ့တည်း စိုးမိုးနိုင်ရေး ဦးတည်သည့် ဗျူဟာမြောက် ရွှေ့ကွက်တစ်ခုဖြစ်နိုင် ကြောင်း သုံးသပ် နေကြသည်။ အလားတူ နွေဦးတော်လှန်ရေး မဟာမိတ် တပ်ပေါင်းစု SRA၊ အမျိုးသား ညီညွတ်ရေး အတိုင်ပင်ခံ ကော်စီ NUCC နှင့် အရပ်ဘက်အဖွဲ့အစည်းများကလည်း မဟာမိတ်အချင်းချင်းကြား သွေးထွက် သံယိုမှုများကို ချက်ချင်းရပ်တန့်ရန် ထုတ်ပြန်တောင်းဆိုထားသည်။ မြေပြင်အခြေအနေနှင့် ပတ်သက်၍ ကွတ်ခိုင်မြို့ခံ အမျိုးသားတစ်ဦးက “မြို့ထဲမှာတော့ သေနတ်သံတွေ ငြိမ် သွားပြီ။ ဒါပေမဲ့ လူတွေက ကြောက်နေတုန်းပဲ။ ကိုယ့်အချင်းချင်းကြားမှာ ဖြစ်တာဆိုတော့ ဘယ်သူ့ကို အားကိုးရမှန်း မသိတာတော့ အမှန်ပဲ။ အခု လောက်ကိုင်မှာ ဆွေးနွေးနေတယ်ဆိုပေမဲ့ နမ့်ခမ်းဘက်ကိုပါ MNDAA က ထပ်လာမယ်ဆိုတဲ့ သတင်းတွေကြားနေရတော့ စစ်ပွဲတွေ ပြန်ဖြစ်လာမှာကို အရမ်းစိုးရိမ်တယ်” ဟု ပြောသည်။ လတ်တလောတွင် MNDAA သည် ကွတ်ခိုင်ကို သိမ်းပိုက်ပြီးနောက် နမ့်ခမ်းမြို့ဘက်သို့ပါ ထိုးစစ်ဆင်ရန် ပြင် ဆင်နေသည့် လက္ခဏာများ ရှိနေသဖြင့် လောက်ကိုင်ဆွေးနွေးပွဲ၏ ရလဒ်သည် ရှမ်းမြောက်ဒေသ၏ တည်ငြိမ် ရေးအတွက် အလွန်အရေးပါသည့် အဆုံးအဖြတ် ဖြစ်လာဖွယ်ရှိသည်ဟု ရှမ်းမြောက်အရေး စောင့်ကြည့်နေသူ များက ဆိုသည်။ #TNLA #MNDAA #Kutkai #တအာင်းတပ် #ကိုးကန့်တပ် #လောက်ကိုင်

ကိုးကန့် MNDAA နှင့် တအာင်း TNLA တို့ တိုက်ပွဲများ ရပ်ပြီး လောက်ကိုင်တွင် ဆွေးနွေး

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည် မြောက်ပိုင်း၊ ကွတ်ခိုင်မြို့ရှိ တအာင်းတပ်မတော် (TNLA) စခန်းများကို ကိုးကန့်တပ် (MNDAA) က ဒရုန်းရာချီ အသုံးပြုကာ အင်အားသုံး တိုက်ခိုက်ခဲ့ပြီးနောက် မြို့တစ်ခုလုံးကို အလုံးစုံထိန်းချုပ်လိုက်ပြီဟု ဒေသခံ များနှင့် မြေပြင်သတင်းရင်းမြစ်များက ပြောသည်။ ပြီးခဲ့သည့် မတ်လ ၁၄ ရက်နေ့မှ စတင်ကာ MNDAA ဘက်က ဒရုန်းအစီးရေ ရာနှင့်ချီအသုံးပြု၍ အပြင်းအထန် ထိုးစစ်ဆင်ခဲ့သဖြင့် မတ်လ ၁၅ ရက်နေ့ ညပိုင်းတွင် TNLA တပ်ဖွဲ့ဝင်များ ကွတ်ခိုင်ဗျူဟာကုန်းမှ ဆုတ်ခွာပေးခဲ့ ရခြင်း ဖြစ်သည်။ ကွတ်ခိုင်မြို့အပြင် မူဆယ် ၁၀၅ မိုင်နှင့် နမ့်ဖတ်ကာဘက်ရှိ TNLA စခန်းများကိုလည်း MNDAA က သိမ်းပိုက်ခဲ့ ပြီး တအာင်းအလံများ ဖြုတ်ချခြင်းနှင့် လူရာနှင့်ချီဖမ်းဆီးခြင်းများ လုပ်ဆောင်ခဲ့သည်ဟု ဆိုသည်။ မြေပြင်အခြေအနေနှင့်ပတ်သက်၍ ကွတ်ခိုင်ဒေသခံတစ်ဦးက “ကွတ်ခိုင်ကတော့ ကိုးကန့်လက်အောက် ကျသွား ပြီလို့ ပြောလို့ရတယ်။ မနေ့ညပိုင်းမှာ TNLA ဘက်က ဆုတ်သွားတာ။ ဒီနေ့မနက်မှာတော့ ပစ်ခတ်သံတွေ ငြိမ် နေပြီ၊ မြို့ပေါ်မှာ လူအသွားအလာ နည်းနည်းရှိလာပေမဲ့ မြို့ခံတွေကတော့ တော်တော်လေး စိုးရိမ်နေကြတုန်း ပဲ။ ဘာဖြစ်လာဦးမလဲ မသိရဘူးလေ” ဟု ပြောသည်။ တိုက်ပွဲအတွင်း ဟိုကျန့်ရွာရှိ နေအိမ်တစ်လုံးပေါ်သို့ ဒရုန်းဗုံးကျရောက်ပေါက်ကွဲခဲ့သဖြင့် အမျိုးသမီးတစ်ဦး သေဆုံးခဲ့ရပြီး ဒဏ်ရာရရှိသူများလည်း ရှိခဲ့သည်။ လက်ရှိတွင် ကွတ်ခိုင်၌ သေနတ်သံများ ငြိမ်သက်နေသော်လည်း နမ့်ခမ်းမြို့နယ်ဘက်တွင်မူ MNDAA က အင်အားဖြည့်တင်းကာ တိုက်ပွဲများ ဆက်လက်ဖြစ်ပွားနေဆဲဖြစ်ကြောင်း မြေပြင်သတင်းရင်းမြစ်က ပြောသည်။ ညီနောင်မဟာမိတ် အချင်းချင်းကြား ဖြစ်ပွားနေသည့် ယခုပဋိပက္ခအပေါ် လက်နက်ကိုင် ဖြေရှင်းခြင်း မပြုရန် အရပ်ဘက် အဖွဲ့အစည်းများကလည်း တိုက်တွန်းထားကြသည်။ တအာင်းအရပ်ဘက် အဖွဲ့အစည်းများကွန်ရက်က မတ်လ ၁၆ ရက်နေ့တွင် ထုတ်ပြန်ချက်တစ်စောင် ထုတ်ပြန်ခဲ့ ပြီး မဟာမိတ်အချင်းချင်းကြား စစ်ရေးပဋိပက္ခသည် စစ်အာဏာရှင်အတွက် အခွင့်အလမ်းများ ဖြစ်ပေါ်စေနိုင်ပြီး နွေဦးတော်လှန်ရေးကို စိန်ခေါ်မှုဖြစ်စေသဖြင့် စစ်ရေးကို ချက်ချင်းရပ်တန့်ကာ စားပွဲဝိုင်းတွင် ညှိနှိုင်းဖြေရှင်းကြ ရန် တိုက်တွန်းထားသည်။ ထို့ပြင် အမျိုးသားညီညွတ်ရေး အတိုင်ပင်ခံ ကောင်စီ (NUCC) နှင့် ကျန်းမာရေးအင်အားစု အသီးသီးကလည်း ယခုဖြစ်စဉ်ကို မိတ်ဖက်ပဋိပက္ခအဖြစ် ရှုမြင်ကာ နိုင်ငံရေးအရ ငြိမ်းချမ်းစွာ တွေ့ဆုံဆွေးနွေးကြရန် ပန်ကြားထား ကြသည်။ TNLA ဘက်ကမူ ၎င်းတို့အနေဖြင့် မဟာမိတ်အချင်းချင်းကြား ပြန်လည်ပစ်ခတ်ခြင်းမပြုဘဲ တွေ့ဆုံဆွေးနွေးရေး လမ်းကြောင်းဖြင့်သာ ကြိုးစားအဖြေရှာသွားမည်ဟု ထုတ်ပြန်ထားသည်။ သို့သော် MNDAA ဘက်ကမူ TNLA က ဦးစွာသေနတ်ဖောက်သဖြင့် တိုက်ပွဲစတင်ရခြင်းဖြစ်ကြောင်း မတ်လ ၁၄ ရက်နေ့တွင် ထုတ်ပြန်ထားရာ နှစ်ဖက်တပ်များကြား စစ်ရေးတင်းမာမှုသည် ကွတ်ခိုင်မှ နမ့်ခမ်းမြို့နယ် ဘက်သို့ ဆက်လက် ကူးစက်နေဆဲဖြစ်သည်။ #MNDAA #ကိုးကန့်တပ် #TNLA #တအာင်းတပ် #ကွတ်ခိုင်တိုက်ပွဲ #NUCC #

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ်

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ကရင်နယ်မြေ သတ္တုတွင်း ဗုံးကြဲရာ တရုတ် လုပ်ငန်းရှင် အပါအဝင် အလုပ်သမားများ ထိခိုက် သေဆုံး
ဒေါ်အောင်ဆန်းစုကြည် သက်ရှိထင်ရှားရှိကြောင်း သက်သေ ဆက်လက်တောင်းဆို
သမ္မတ ထရန့်ရဲ့ မိတ်ဆွေကို စည်းရုံးလှုံ့ဆော်ပေးဖို့ စစ်အုပ်စု ငှားရမ်း
နိုင်ငံရင်းတွင် အန္တရာယ်ရှိသူများ အမေရိကန် ဗီဇာ ပေးမည်မဟုတ်
နိုဘယ်လ်ငြိမ်းချမ်းရေးဆုအတွက် သမ္မတထရန့် အပါအဝင် ၂၈၇ ဦးကို အဆိုပြုထား

Archives

Archives

×Close