PSLF/TNLA – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: PSLF/TNLA

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၅ ရက်။ တရုတ်၏ ကြီးကြပ်မှုဖြင့် တအာင်းအမျိုးသား လွတ်မြောက်ရေး တပ်မတော် (TNLA) မှ စစ်ကော်မရှင် တပ်ကို မိုးကုတ်-မိုးမိတ်ဒေသ နယ်မြေပြန်လွှဲပေးသည့် အစီအစဉ်ကို အမျိုးသားညီညွတ်ရေး အစိုးရ (NUG) က လက်မခံကြောင်း တရားဝင် ပြောဆိုလိုက် သည်။ NUG သည် အဆိုပါဒေသသို့ ပြန်လည် ဝင်ရောက်လာသော စစ်ကော်မရှင်တပ်များကို ပြည်သူလူထုနှင့် လက်တွဲ ၍ ဆက်လက်တိုက်ပွဲဝင်သွားမည်ဟု ပြောဆိုခဲ့ပြီး၊ လက်ရှိ တိုက်ပွဲများကြောင့် အရပ်သား သေဆုံးမှုများရှိနေ ကြောင်း ဒေသခံများက ဆိုသည်။ NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ဒီဇင်ဘာလ ၁၁ ရက်နေ့တွင် ထုတ် ပြန် ပြောဆိုခဲ့ခြင်းဖြစ်ပြီး၊ ထိုဒေသကို ပြန်လည်ထိန်းချုပ်နိုင်ရေး 'စစ်ဆင်ရေး စစ်ဦးစီးအဖွဲ့' ကို နိုဝင်ဘာလ ၉ ရက်နေ့ကပင် ဖွဲ့စည်းကာ စစ်ရေးလှုပ်ရှားမှုများ လုပ်ဆောင်ခဲ့ကြောင်း ပြောသည်။ တအာင်းတပ် TNLA နှင့် စစ်ကော်မရှင်တပ်တို့အကြား နိုဝင်ဘာလကုန်ပိုင်းက ပြုလုပ်ခဲ့သော နယ်မြေ ပြန်လွှဲ ပေးရေး သဘောတူညီချက်ကို NUG အနေဖြင့် လုံးဝလက်မခံနိုင်ကြောင်း ဦးနေဘုန်းလတ်က ပြောသည်။ “မိုးကုတ် - မိုးမိတ် ဒေသသို့ ကျူးကျော်ဝင်ရောက်လာသော အကြမ်းဖက် စစ်အုပ်စုတပ်တွေကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ပွဲဝင်လျက် ရှိနေပြီး နယ်မြေစိုးမိုးထိန်းချုပ်နိုင်မှု ပြန်လည်ရရှိနိုင်ရေး အတွက် ဆက်လက် တိုက်ပွဲဝင်နေပါတယ်။ မိုးကုတ်–မိုးမိတ်ဒေသသို့ ကျူးကျော်ဝင်လာတဲ့ စစ်အုပ်စုတပ်တွေ ကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ခိုက်မယ့်အပြင် နယ်မြေစိုးမိုးမှု ပြန်လည်ရရှိရေး အတွက် စစ်ရေးအရှိန်မြှင့်သွားမယ်။” မိုးကုတ် - မိုးမိတ်ဒေသသည် နိုင်ငံရေးနှင့် စစ်ရေးအရ အထိမခံသော အခြေအနေဖြစ်သောကြောင့် တရားဝင် ထုတ်ပြန်ချက်များကို အဆောတလျင် မထုတ်ပြန်နိုင်ခဲ့သော်လည်း စစ်ဆင်ရေးများကို စနစ်တကျ ကွပ်ကဲ ဆောင်ရွက်ခဲ့ကြောင်း ဦးနေဘုန်းလတ်က ရှင်းပြသည်။ နိုဝင်ဘာလ ၃၀ ရက်နေ့မှ ဒီဇင်ဘာလ ၆ ရက်နေ့အတွင်း တိုက်ပွဲကြီး ၉ ပွဲအထိ ဖြစ်ခဲ့ပြီး စစ်ကော်မရှင်၏ အရေးပါသည့် စခန်းကုန်းတစ်ခုကို သိမ်းပိုက်နိုင်ခဲ့သည်ဟုလည်း NUG က အတည်ပြုထားသည်။ စစ်ကော်မရှင်တပ်များ မိုးကုတ်နှင့် မိုးမိတ်မြို့များသို့ ပြန်လည် ဝင်ရောက်လာပြီးနောက် နိုဝင်ဘာလ ၃၀ ရက်နေ့မှ စတင်၍ တိုက်ပွဲများ ဆက်တိုက်ဖြစ်ပွားခဲ့ကာ စစ်ကော်မရှင်တပ်က လေကြောင်း တိုက်ခိုက်မှုများကိုပါ လုပ်ခဲ့သည်။ မိုးမိတ်မြို့အနီး ဗုံးကြဲတိုက်ခိုက်မှုကြောင့် ကိုယ်ဝန်ဆောင် အမျိုးသမီးတစ်ဦး အပါအဝင် အရပ်သား ၁၁ ဦး သေဆုံးခဲ့သည် ဟု ဒေသခံများက ပြောသည်။ စစ်ရေးတင်းမာမှုများကြောင့် အရပ်သားပြည်သူများမှာ လုံခြုံရေးအရ ပိုမိုစိုးရိမ်ပူပန်နေရကြောင်း ဒေသခံ တစ်ဦးက ၎င်းတို့၏ အခြေအနေကို ယခုကဲ့သို့ ပြောသည်။ “အခုရက်ပိုင်းမှာ တိုက်ပွဲတွေ ပြန်ဖြစ်လာတော့ အရပ်သားတွေက ကြားထဲက ပိတ်မိပြီး ခံနေရတာပါ။ မိုးမိတ် ဘက် ဗုံးကြဲတိုက်ခိုက်တော့ ကလေးတွေ၊ ကိုယ်ဝန်ဆောင် အမျိုးသမီးတွေပါ သေဆုံးခဲ့ရတယ်။ ဒီလို နယ်မြေ ပြန်လွှဲတာတွေကြောင့် ပြည်သူတွေရဲ့ လုံခြုံရေး ပိုဆိုးလာတာကိုပဲ မြင်ရတယ်။” အဆိုပါဒေသတွင်း စစ်ရေးလှုပ်ရှားမှုများနှင့် ပတ်သက်၍ ကချင်လွတ်လပ်ရေးအဖွဲ့ (KIO/KIA) ၏ ပြောရေး ဆိုခွင့်ရှိသူ ဗိုလ်မှူးကြီးနော်ဘူကလည်း KIA ၏ မဟာမိတ်တပ်ဖွဲ့များ အပေါ် ကူညီထောက်ပံ့မည့် အခြေအနေကို ယခုကဲ့သို့ ပြောသည်။ “တိုက်ပွဲ ဖြစ်လို့ ရှိရင်တော့ အမြဲတမ်းကူညီကြတဲ့ သဘောမျိုးနဲ့ ကူညီတဲ့ အနေအထားလောက်တော့ ရှိမှာပါ။ ဒါပေမယ့် လက်တွေ့ အခြေအနေကတော့ ဘယ်လောက်အထိ ဘယ်လိုအခြေအနေ ရှိတယ်ဆိုတာကတော့ အခုကတော့ ကျနော်က ပြောလို့တော့ အဆင်မပြေဘူးခင်ဗျာ။” မိုးမိတ်မြို့နယ်တွင် KIA တပ်ရင်းများ၊ ABSDF နှင့် PDF များ ပူးပေါင်း၍ အခြေချထားကြောင်း၊ TNLA ဆုတ်ခွာ သည့် မိုးမိတ်မြို့နှင့်ပတ်သက်၍ KIA အနေဖြင့် စစ်ရေးအရ လုပ်ဆောင်ရန် မရှိသော်လည်း မဟာမိတ်တပ်ဖွဲ့များ စစ်ရေးလှုပ်ရှားလာပါက ကူညီသွားမည်ဟု ဗိုလ်မှူးကြီးနော်ဘူက နိုဝင်ဘာလတွင် သတင်းနှင့်မီဒီယာ ကွန်ရက် သတင်းဌာနကို ထုတ်ဖော်ပြောဆိုခဲ့ဖူးသည်။

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား

မိုးကုတ် သယံဇာတများ TNLA က တတ်စွမ်းသလောက် ထုတ်ယူသွားဟု ဒေသခံများပြော သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၇ ရက်။ တအာင်းတပ် TNLA ထိန်းချုပ်မှု နောက်ဆုံးအချိန်အထိ မြို့၏ အဖိုးတန်သယံဇာတများကို “အလွန်အကျွံ” ထုတ်ယူခြင်းနှင့် ပြည်သူပိုင်ပစ္စည်းများ သိမ်းယူခြင်းတို့ကြောင့် မြို့၏ အမွေအနှစ်နှင့် သဘာဝပတ်ဝန်းကျင် “ပြင်းထန်စွာ” ထိခိုက်ပျက်စီးခဲ့ရကြောင်း မြို့ခံများက ပြောသည်။ စစ်ရေးအရ သိမ်းယူထားသော မြို့ကို စွန့်ခွာချိန်တွင် မိုးကုတ်မြို့သည် ‘အခွံသက်သက်’ သာ ကျန်ရှိတော့မည့် အခြေအနေကို “ရင်နာစရာ” မြင်တွေ့နေရသည်ဟု ဒေသခံများက ပြောသည်။ TNLA က မိုးကုတ်မြို့ကို သိမ်းယူထားသည့် ကာလတစ်လျှောက်လုံး၊ ၎င်းတို့နှင့် အဆက်အသွယ်ရှိသော တရုတ်ကုမ္ပဏီများနှင့် မဟာမိတ် ကိုးကန့်ဒေသမှ လုပ်ငန်းများကို ပတ္တမြားမြေတွင် ကျောက်တူးဖော်ခွင့်များ ချထားပေးခဲ့သည်။ ယခင်က တူးဖော်ခြင်းမရှိသည့် မြို့ရှိ ဂေါက်ကွင်းနှင့် ပတ်ဝန်းကျင် ဒေသများတွင်ပင် ကျောက်တူးဖော်မှုအား “အရှိန်အဟုန်ဖြင့်” ပြုလုပ်ခဲ့ခြင်းကို ဒေသခံများက ထောက်ပြကြသည်။ အပစ်အခတ်ရပ်စဲရေးအရ တအာင်းတပ် TNLA က မြို့မှ ဆုတ်ခွာရန် နီးကပ်လာသော နောက်ဆုံးအချိန်အထိ တရုတ်ကုမ္ပဏီများက ဂေါက်ကွင်းတွင် ကျောက်တူးဖော်မှု အရှိန်မြှင့်တင် လုပ်ကိုင်ခဲ့သည်။ မိုးကုတ်မြို့ခံ အမျိုးသမီးတစ်ဦးက “ကျမတို့ မြို့ရဲ့ ဂေါက်ကွင်းလည်း ကုန်ပြီ ရစရာကို မရှိတော့ဘူး။ ကျမတို့ရဲ့ ဒီဂေါက်ကွင်းကြီးကိုပါ ကျောက်တူးခွင့် ပေးခဲ့တာက ကျမတို့ ဒေသခံတွေရဲ့ မျက်နှာကို လုံးဝ မထောက်ခဲ့တဲ့ ရုပ်ဆိုးအကျည်းတန်တဲ့ လုပ်ရပ်ပဲ။ ဒီလိုဆုံးရှုံးမှုက ငွေနဲ့ ပြန်ဝယ်လို့ မရနိုင်ဘူး” ဟု ပြောသည်။ ဒေသခံကျောက်တူးသမားများကိုပါ ထုတ်ယူခွင့်ပေးမှု အနည်းငယ်ရှိခဲ့သည် ဆိုသော်လည်း အများစုမှာ တရုတ်ကုမ္ပဏီများကသာ လုပ်ကွက်ရရှိခဲ့ခြင်း ဖြစ်ပြီး အဆိုပါ ကျောက်တူးဖော်ရေး လုပ်ကွက် များတွင်လည်း ဒေသခံများကို ခေါ်ယူငှားရမ်းခြင်းပင် မရှိခဲ့ဟု ဆိုသည်။ တအာင်းတပ် TNLA ဆုတ်ခွာချိန်တွင် သဘာဝသယံဇာတများ အပြင် မြို့လယ်ရှိ ပြည်သူပိုင်ပစ္စည်းများ၊ ဌာနဆိုင်ရာ ပရိဘောဂများနှင့် သစ်တောထွက် ပစ္စည်းများကိုပင် ယူဆောင်သွားခဲ့ကြောင်း ဒေသခံများက ထောက်ပြသည်။ မြို့၏ စိမ်းစိုသော အမွေအနှစ်များကိုပါ ထိခိုက်ခဲ့သည့်အပေါ် ပြည်သူများက ရင်နာနေရသည်ဟု ဆိုသည်။ မိုးကုတ်မြို့ခံ တစ်ဦးက “နောက်ဆုံး ကုန်ကုန်ပြောရရင်‌တော့ သစ်တောဆို သစ်တောဌာနမှာစိုက်တဲ့ ကျွန်းပင် ကစ ခုတ်လှဲပြီး ယူသွားတာမျိုး ဒါကျတော့ ရုပ်ဆိုးတဲ့ အပိုင်းတွေဖြစ်ပါတယ်” ဟု ပြောသည်။ အဆိုပါ ကိစ္စရပ်များနှင့် ပတ်သက်၍ တအာင်းတပ် TNLA ပြောခွင့်ရ လွေးယေဦးကို ဆက်သွယ်ခဲ့သော်လည်း ဆက်သွယ်၍ မရခဲ့ပေ။ အခြားဒေသခံတစ်ဦးကလည်း “ဒီလိုမျိုးကြီး ပေးလိုက်တယ်ဆိုတာ ပြည်သူလည်း အခုလက်ရှိ မိုးကုတ်၊ မိုးမိတ် ကို ပေးလိုက်တဲ့ ပြည်သူလူထုတွေလည်း မျက်နှာမထောက် သူတို့ရဲ့လူမျိုးအတွက်ပဲ သူတို့လုပ်သွားတယ်လို့ ထင်တယ်” ဟု ပြောသည်။ TNLA ၏ လုပ်ဆောင်မှုများကို တားမြစ်၍ မရနိုင်သောကြောင့် “ရင်နာနာဖြင့်” လက်ပိုက်ကြည့်နေရသည် ဟုလည်း မြို့ခံများက ပြောသည်။ နိုဝင်ဘာလ နောက်ဆုံးပတ်ထိ မြို့ခံလူဦးရေ ထက်ဝက်ကျော်သည် စစ်ကော်မရှင်၏ ထိုးစစ်အသစ်နှင့် ဗုံးကြဲ တိုက်ခိုက်မှုများကို စိုးရိမ်သဖြင့် ဆက်လက် ထွက်ပြေးတိမ်းရှောင်နေကြရသည်။ မြို့ကို ပြန်လည်လွှဲပြောင်းပေးခြင်းကြောင့် လုံခြုံရေး မတည်ငြိမ်မှုများအပြင် သယံဇာတ ထုတ်ယူမှုကြောင့် ပျက်စီးသွားသော ပတ်ဝန်းကျင်နှင့် စီးပွားရေးအခက်အခဲများကိုပါ ရင်ဆိုင်ကြုံတွေ့နေရသော မိုးကုတ် ဒေသခံများသည် မျှတမှုရှိသော အုပ်ချုပ်မှုနှင့် လုံခြုံရေးကိုသာ အဓိက မျှော်လင့် တောင်းဆိုနေကြသည်။

မိုးကုတ် သယံဇာတများ TNLA က တတ်စွမ်းသလောက် ထုတ်ယူသွားဟု ဒေသခံများပြော

ငွေကြေး မတတ်နိုင်သော မိုးကုတ်မြို့ခံများ မြို့မှ မထွက်ခွာနိုင်ကြ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၇ ရက်။ တအာင်းတပ်မတော် (TNLA) က မိုးကုတ်နှင့် မိုးမိတ်မြို့တို့ကို စစ်ကော်မရှင်ထံ ပြန်လည်အပ်နှံမည့် ဆုံးဖြတ် ချက်ကြောင့် မြို့ခံများ စစ်ဘေးရှောင်နေကြသော်လည်း၊ ငွေကြေး အဆင်မပြေသူများမှာ ရွှေ့ပြောင်းနိုင်ခြင်း မရှိပဲ အခက်ကြုံနေကြသည်။ စစ်ရှောင်စရိတ်များ ကြီးမြင့်ခြင်း၊ လမ်းပန်းဆက်သွယ်ရေး ပြတ်တောက်မှုကြောင့် ကုန်ဈေးနှုန်းများ မြင့်တက် နေခြင်းတို့သည် မိုးကုတ်နှင့် မိုးမိတ် ဒေသခံ ပြည်သူများ အခက်တွေ့နေကြသည်။ TNLA မှ အဆိုပါမြို့များမှ နိုဝင်ဘာ ၂၅ ရက်နေ့တွင် ဆုတ်ခွာမည်ဟု ထုတ်ပြန်ပြီးနောက်၊ မိုးကုတ်နှင့် မိုးမိတ် မြို့များမှ ပြည်သူအများအပြားသည် စစ်ဘေးရှောင်ရန် ကြိုးပမ်းနေကြသော်လည်း ရွှေ့ပြောင်းစရိတ် ကြီးမြင့်မှုက ငွေကြေးမတတ်နိုင်သည့် ပြည်သူများကို တားဆီးထားသည်။ မိုးကုတ်မြို့ခံတစ်ဦးက “အိမ်ပြောင်းရတာက ဈေးကြီးပေးပြီးတော့ ပြောင်းနေရတာပေါ့နော်။ ပိုက်ဆံရှိတဲ့ သူတွေလောက်ပဲ ပြောင်းနိုင်နေတာပေါ့။ ပိုက်ဆံမရှိတဲ့သူတွေကျတော့ မပြောင်းနိုင်ဘူးပေါ့နော်” ဟု လက်ရှိ အခြေအနေကို ရှင်းပြခဲ့သည်။ လက်ရှိတွင် စီးပွားရေး မပြေလည်သူများ၊ နေရပ်ကို စွန့်ခွာရန် စိတ်မပါသူများသာ မြို့ပေါ်တွင် အများဆုံး ကျန်ရှိနေပြီး၊ တော်တော်များများ စွန့်ခွာသွားသဖြင့် မြို့သည် ‘မရှိသလောက်’ ဖြစ်နေပြီ ဟုလည်း ဒေသခံများ က ပြောဆိုသည်။ အပစ်အခတ် ရပ်စဲထားသော်လည်း စစ်ရေးပဋိပက္ခများ၏ နောက်ဆက်တွဲ အခြေအနေများကြောင့် ဒေသ၏ စီးပွားရေးသည် လုံးဝ နလန်မထူနိုင်သေးဘဲ ကုန်ဈေးနှုန်းများမှာ ဆက်လက် မြင့်တက်နေသည်။ စီးပွားရေးကဏ္ဍမှာ အဆုံးထိ ကျဆင်းနေသည့် အပြင် လမ်းပန်းဆက်သွယ်ရေး ပြတ်တောက်ခြင်းနှင့် ဂိတ်များမှ ငွေကြေး အတင်းအကျပ် တောင်းခံမှုများကိုလည်း ခံနေရသည်ဟု မိုးကုတ်မြို့ခံများက ပြောသည်။ “အခုက လမ်းပန်းဆက်သွယ်ရေး မကောင်းလို့သာ ဒီဘက်မှာ မြှင့်တက်တာလေး ကုန်ဈေးနှုန်းတွေက။ လမ်းပန်းဆက်သွယ်ရေး လမ်းကြောင်းတွေ ဖွင့်ပေးရမယ်။ နောက်ပြီးတော့မှ ဂိတ်တွေရှိတဲ့နေရာမှာ ဂိတ်တွေ ကနေပြီးတော့မှ ငွေတောင်းတာမျိုး မဟုတ်ဘဲ လုံခြုံရေးအရ စစ်ဆေးတာမျိုး ဆိုရင်တော့ ပြည်သူတွေ အနေနဲ့ နားလည်ပေးလို့ရတယ်” ဟု မိုးကုတ်ဒေသခံက ပြောသည်။ တအာင်းတပ် TNLA မှ မြို့ကို ပြန်လည်လွှဲပြောင်းပေးမည့် ဆုံးဖြတ်ချက်အပေါ် ဒေသခံများသည် စိုးရိမ် ထိတ်လန့်ရုံသာမက စိတ်ပျက်ဝမ်းနည်းမှုများပါ ဖြစ်နေကြသည်။ မိုးမိတ် ဒေသခံတစ်ဦးက “အဲ့ဒီ ထုတ်ပြန်ချက် ကြေညာတဲ့နေ့ကဆိုလို့ရှိရင် သက်ကြီးရွယ်အိုတွေကအစပေါ့နော် ယောက်ယက်တွေ ခတ်ပြီးတော့မှ သူတို့လည်း စိုးရိမ်ကြောင့်ကြမှုတွေရော မလုံခြုံမှုတွေရော အကုန်လုံး ပေါင်းပြီးပေါ့လေးနော် အဲ့လိုမျိုး ဒီဟာကြီးကို မဖြစ်စေချင်တာပေါ့” ဟု ပြောသည်။ လက်ရှိတွင် စစ်ရှောင်ရန် မတတ်နိုင်ဘဲ ကျန်ခဲ့သူများအတွက် စားဝတ်နေရေးနှင့် ဘေးကင်းလုံခြုံရေးသည် အဓိက စိန်ခေါ်မှု ဖြစ်နေသည်။ ဒေသခံပြည်သူများသည် ကုန်ဈေးနှုန်း ကြီးမြင့်မှု၊ ငွေကြေး အခက်အခဲနှင့် လုံခြုံရေး မတည်ငြိမ်မှုများအကြား မည်သည့် အဖွဲ့အစည်းကမှ မိမိတို့၏ ဘဝလုံခြုံရေးနှင့် စီးပွားရေးအပေါ် မထိခိုက်စေရန်သာ အဓိက မျှော်လင့် တောင်းဆိုနေကြသည်။

ငွေကြေး မတတ်နိုင်သော မိုးကုတ်မြို့ခံများ မြို့မှ မထွက်ခွာနိုင်ကြ

မိုးကုတ်-မိုးမိတ်မှ ဆုတ်ရန် ဆုံးဖြတ်ချက်ကို ခက်ခက်ခဲခဲ ချရခြင်း ဖြစ်သည်ဟု TNLA ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၁ ရက်။ တအာင်းအမျိုးသား လွတ်မြောက်ရေး တပ်မတော် TNLA နှင့် စစ်ကော်မရှင်တို့ အပစ်ရပ်စဲရေး သဘောတူ လက်မှတ်ထိုးရခြင်းမှာ အရပ်သားထိခိုက်မှုများကြောင့် ခက်ခဲသော ဆုံးဖြတ်ချက်ချမှတ်ခဲ့ရခြင်း ဖြစ်သည်ဟု TNLA က ပြောသည်။ တအာင်းတပ်မတော် (TNLA) သည် တရုတ်နိုင်ငံ၊ ကူမင်းမြို့၌ စစ်ကော်မရှင်တပ်နှင့် လက်မှတ်ရေးထိုးခဲ့သည့် နှစ်ဖက် အပစ်အခတ်ရပ်စဲရေး သဘောတူစာချုပ်သည် ၎င်းတို့အတွက် အလွယ်တကူ ဆုံးဖြတ်ခဲ့ခြင်း မဟုတ်ဘဲ ခက်ခဲသော ရွေးချယ်မှု ဖြစ်ကြောင်း ပြောရေးဆိုခွင့်ရှိသူ လွေးယေဦး က ပြောသည်။ သဘောတူစာချုပ် ရေးထိုးရန် ရက်ပိုင်းအလို၌ TNLA ထိန်းချုပ်နယ်မြေများအတွင်း စစ်ကော်မရှင်တပ်က လေကြောင်း တိုက်ခိုက်မှုများ ရက်ဆက် ပြုလုပ်ခဲ့ပြီးနောက် အရပ်သား ထိခိုက်မှုများ တိုးလာခဲ့သည်။ ယင်းအခြေအနေကြောင့် လူထု၏ ဘေးကင်းလုံခြုံမှုနှင့် ထိခိုက်နစ်နာမှု လျော့နည်းစေရန် ရည်ရွယ်၍ ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း ၎င်းက ရှင်းပြသည်။ TNLA ပြောရေးဆိုခွင့်ရှိသူ လွေးယေဦးက “ဆုံးဖြတ်ချက်နဲ့ ပတ်သက်ပြီးတော့မှ ခက်ခက်ခဲခဲ ရွေးချယ်ဆုံးဖြတ် ရတာ ဖြစ်တယ်။ အဓိကတော့ လူထုတွေရဲ့ ဘေးကင်းလုံခြုံမှုနဲ့ လူထုတွေရဲ့ ထိခိုက်နစ်နာမှု လျော့နည်းသွား အောင်၊ စစ်ရေးဖိအားတွေ အခြားသော ဖိအားတွေကြားက ပိုပြီးတော့ နစ်နာလာတာမျိုးတွေ ရှိလာတာကြောင့် ခက်ခဲတဲ့ ဆုံးဖြတ်ချက်ကို ရွေးချယ်ရတာ ဖြစ်ပါတယ်” ဟု ပြောသည်။ ယခု အောက်တိုဘာလအတွင်း TNLA ထိန်းချုပ်နယ်မြေများ၌ စစ်ကော်မရှင်၏ လေကြောင်းတိုက်ခိုက်မှုကြောင့် အရပ်သား ၅၀ ကျော် ထိခိုက်သေဆုံးခဲ့ရပြီး ၈၀ ကျော် ပြင်းထန်ဒဏ်ရာ ရရှိခဲ့သည် ဟု သတင်းများတွင် ဖော်ပြထားသည်။ အဆိုပါ စာချုပ်တွင် အောက်တိုဘာ ၂၉ ရက်မှ စတင်၍ နှစ်ဖက်တပ်များ ရောက်ရှိသည့် နေရာ၌ အပစ်ရပ်ရ မည်ဟု ပါရှိသည်။ TNLA အနေဖြင့်လည်း စစ်ကော်မရှင်တပ်က တအာင်းဒေသများအား လေကြောင်းတိုက်ခိုက်မှု၊ ထိုးစစ်ဆင်မှု များ ရပ်တန့်ခြင်းရှိမရှိကို အနီးကပ် လေ့လာစောင့်ကြည့်သွားမည် ဟု လွေးယေဦးက ပြောသည်။ လွေးယေဦးက “လောလောဆယ်မှာတော့ ကျမတို့က ဒီအပေါ်မှာ လေ့လာစောင့်ကြည့်သွားမယ်။ စောင့်ကြည့် လေ့လာရေးကိုပဲ ပိုပြီးတော့ ဆောင်ရွက်မှာ ဖြစ်ပါတယ်” ဟု အတည်ပြုခဲ့သည်။ TNLA တပ်ဖွဲ့များမှာ ရှမ်းပြည်မြောက်ပိုင်းရှိ မိုးမိတ်မြို့ နှင့် မိုးကုတ်မြို့ တို့မှ ဆုတ်ခွာရမည် ဖြစ်သော်လည်း၊ မန္တလေး PDF နှင့် မိုးကုတ်ဗျူဟာတို့အပါအဝင် မဟာမိတ်တပ်ဖွဲ့များက ၎င်းတို့ ထိန်းချုပ်နယ်မြေများကို အစွမ်း ကုန် ကာကွယ်သွားမည်ဟု ထုတ်ပြန်ထားပြီး ဖြစ်သည်။ TNLA မှ မြို့တွင်း ကျန်ရှိနေသည့် ပြည်သူများအား ၎င်းတို့ ထိန်းချုပ်ထားသော အခြားမြို့နယ်များသို့ လာရောက် အကူအညီတောင်းခံ ခိုလှုံနိုင်သည် ဟု လွေးယေဦးက အမှာစကားပါးခဲ့သည်။ လွေးယေဦး၏ ပြည်သူသို့ မှာကြားချက်မှာ “လောလောဆယ်မှာတော့ ကျမတို့က လူထုနဲ့အတူ ရပ်တည်ပါ တယ်။ မြို့သိမ်းကာလမှာ ကျမတို့ကို ဝိုင်းဝန်းကူညီပေးကြတဲ့ လူတွေကိုလည်း ကျမတို့ အခုလို ပြန်လက်လွှတ် ပေးရတာ စိတ်တော့မကောင်းဘူး။ ခက်ခဲတဲ့ ဆုံးဖြတ်ချက်တခု ဖြစ်ပါတယ်။ လူထုအနေနဲ့ ကျမတို့ ထိန်းချုပ် ထားတဲ့ အခြားမြို့နယ်တွေမှာ လာရောက်ခိုလှုံနိုင်ပါတယ်၊ အကူအညီတောင်းခံနိုင်ပါတယ်” ဟု ပြောသည်။ TNLA တပ်များမှာ ယခုလက်ရှိ အချိန်၌ ၎င်းတို့ ထိန်းချုပ်ဒေသများမှ စတင်ဆုတ်ခွါနေပြီဖြစ်ပြီး မည်မျှ ကြာမြင့်မည်ကို မသိရသေးပေ။ စစ်ရေးလေ့လာစောင့်ကြည့်သူများက လတ်တလော သဘောတူညီချက်သည် စစ်ကော်မရှင်နှင့် TNLA အတွက် သာ အကျုံးဝင်သဖြင့် အပစ်ရပ်ကာလအတွင်း စစ်ကော်မရှင်တပ်သည် TNLA အစား ရှမ်းမြောက်ရှိ အခြား လက်နက်ကိုင်တပ်များနှင့် တိုက်ပွဲ ထပ်မံဖြစ်ပွားနိုင်ပြီး စစ်ရေးအခြေအနေ ပိုမို ရှုပ်ထွေးလာနိုင်သည် ဟု သုံးသပ်နေကြကြောင်း နီးစပ်သည့် စစ်ရေး သတင်းရင်းမြစ်များက ပြောသည်။

မိုးကုတ်-မိုးမိတ်မှ ဆုတ်ရန် ဆုံးဖြတ်ချက်ကို ခက်ခက်ခဲခဲ ချရခြင်း ဖြစ်သည်ဟု TNLA ပြော

မိုးကုတ်ဗုံးကြဲမှုကလေးသုံးဦး သေဆုံး၊ အရပ်သား ၁၂ ဦး ဒဏ်ရာရ သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ အောက်တိုဘာလ ၂၂ ရက်။ မိုးကုတ်မြို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုကြောင့် ကလေးငယ် (၃) ဦး သေဆုံးကာ အရပ်သား (၁၂) ဦး ဒဏ်ရာရခဲ့သည်။ တအာင်းတပ်မတော် (PSLF/TNLA) ထိန်းချုပ်ထားသော မိုးကုတ်မြို့ကို စစ်ကော်မရှင်တပ်က အောက်တိုဘာလ ၂၁ ရက်၊ မွန်းလွှဲ ၃ နာရီဝန်းကျင် အချိန်တွင် လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ကလေးငယ် (၃) ဦး သေဆုံးပြီး (၁၂) ဦး ထိခိုက်ဒဏ်ရာများ ရရှိခဲ့ကြောင်း TNLA က သတင်းထုတ်ပြန်သည်။ ဖြစ်စဉ်မှာ တိုက်ပွဲဖြစ်ပွားမှုမရှိဘဲ မိုးကုတ်မြို့အရှေ့ပိုင်း၊ ရှောလီဝိုင်းအုပ်စု၊ ကန်တော်ရပ်ကွက်ရှိ ကန်သုံးလုံး ဖူဆယ်ဘောလုံးကွင်း အနီးကို စစ်ကော်မရှင်တပ်၏ လေယာဉ်က ပေါင် (၂၅၀) ဗုံး (၂) လုံး ကြဲချတိုက်ခိုက်ခဲ့ ခြင်း ဖြစ်သည်။ မိုးကုတ်ဒေသခံ အမျိုးသားတစ်ဦးက “ဘုရားငါးဆူအနီးနဲ့ ရှမ်းဘုန်းကြီးကျောင်း နားက ဖူဆယ်ကွင်းမှာ ကျတာ ဟုတ်တယ်။ အဲ့ဒီမှာ ကစားနေကြတဲ့ ကလေးတွေ ထိသွားတယ်။ ကလေး ၃ ယောက်က သေတယ်။ ဒဏ်ရာ ရတာက ၁၂ ရတယ်။ ဒဏ်ရာရတဲ့ထဲမှာလည်း ကလေးတွေ ပါသေးတယ်” ဟု ပြောသည်။ ယင်းဗုံးကြဲတိုက်ခိုက်မှုကြောင့် ဖူဆယ်ကွင်းတွင် ဘောလုံးကစားနေသည့် ကလေးငယ်များ ထိမှန်ခဲ့ပြီး အသက် (၆) နှစ်၊ (၁၀) နှစ်နှင့် (၁၂) နှစ်အရွယ် ကလေးငယ် (၃) ဦး သေဆုံးခဲ့သည်ဟု ဖြစ်စဉ်သိရှိသူ မိုးကုတ်မြို့ခံ အမျိုးသားတစ်ဦး က ပြောသည်။ ဒဏ်ရာရရှိသူ (၁၂) ဦးတွင်လည်း ကလေးငယ်များ ပါဝင်ပြီး၊ အသက် (၇) နှစ်နှင့် (၁၂) နှစ်အရွယ် ကလေးငယ်များ အပါအဝင် အသက် (၃၈) နှစ်မှ (၇၁) နှစ်အရွယ်ရှိ အမျိုးသား (၇) ဦးနှင့် အမျိုးသမီး (၅) ဦးတို့ ထိမှန်ဒဏ်ရာရရှိခဲ့ သည်။ ထို့ပြင် ဗုံးကြဲမှုကြောင့် အရပ်သားနေအိမ် (၁၁) လုံးနှင့် ဖူဆယ်ဘောလုံးကွင်းတစ်ခု ပျက်စီးခဲ့သည်။ စစ်ကော်မရှင်တပ်သည် TNLA ထိန်းချုပ်ထားသော မြို့ရွာများကို လေကြောင်း စစ်ဆင်ရေးများ ဆက်တိုက် ပြုလုပ်နေသည်။ TNLA ၏ ထုတ်ပြန်ချက်အရ ယခု အောက်တိုဘာလ တစ်လတည်းတွင်ပင် ကလေးငယ်များ အပါအဝင် အရပ်သား (၄၀) ကျော်၊ သေဆုံးကာ (၅၀) ကျော် ဒဏ်ရာရရှိခဲ့သည်။ အောက်တိုဘာလအတွင်း မန်တုံ၊ ကျောက်မဲ၊ သီပေါ၊ မိုင်းငေါ့၊ မိုင်းလုံ၊ နမ့်ဆန်၊ နမ္မတူ၊ မိုးမိတ်နှင့် မိုးကုတ်မြို့များ အပါအဝင် မြို့ရွာများကို လေကြောင်း တိုက်ခိုက်မှု အကြိမ် (၃၀) ကျော် ပြုလုပ်ခဲ့ကြောင်း TNLA က ထုတ်ပြန်သည်။ TNLA သည် စစ်ကော်မရှင်တပ်၏ ဗုံးကြဲမှုများ ဆက်တိုက် ဖြစ်ပေါ်နေခြင်းကြောင့် ပြည်သူများ စစ်ရေး သတိရှိရန်နှင့် လေကြောင်းရန် ကာကွယ်ရေး ဆိုင်ရာ နည်းလမ်းများ လိုက်နာရန် နှိုးဆော်ထား သည်။ ထို့အပြင် ပြည်သူကို ပစ်မှတ်ထား တိုက်ခိုက်ခြင်းသည် စစ်ရာဇဝတ်မှု ကျူးလွန်ခြင်း ဖြစ်သည်ဟုလည်း TNLA က ပြင်းထန်စွာ ရှုတ်ချထားသည်။ အလားတူ ယမန်နေ့ အောက်တိုဘာလ (၂၀) ရက်နေ့ကလည်း မိုင်းငေါ့မြို့မစျေးကို စစ်ကော်မရှင်တပ်က ဗုံးကြဲ တိုက်ခိုက်ခဲ့ခြင်းကြောင့် ဒေသခံ (၂) ဦး သေဆုံးကာ (၂) ဦး ဒဏ်ရာရရှိခဲ့သည့် အပြင် မြို့မစျေးလည်း မီးလောင် ပျက်စီးသွားသည်။

မိုးကုတ်ဗုံးကြဲမှုကလေးသုံးဦး သေဆုံး၊ အရပ်သား ၁၂ ဦး ဒဏ်ရာရ

မဟာမိတ်ဆက်ဆံရေး ခိုင်မာပြီး လူထု ထောက်ခံမှု ရှိမှသာ သိမ်းပိုက်မြို့ရွာများ ရေရှည်ထိန်းနိုင်မည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ တော်လှန်ရေး တပ်ဖွဲ့များ အကြားတွင် ပိုမို ခိုင်မာသော မဟာမိတ် ဆက်ဆံရေးနှင့် ပြည်သူများ၏ ထောက်ခံမှုကို ရရှိအောင် လုပ်ဆောင်နိုင်မှသာ သိမ်းပိုက်ထိန်းချုပ်ထားသည့် မြို့ရွာများကို ရေရှည်ထိန်းထားနိုင်မည်ဟု နိုင်ငံတကာ မြန်မာသတင်း BNI သုတေသန လုပ်ငန်းစဉ် က ပြောသည်။ နိုင်ငံတကာ မြန်မာ့သတင်း BNI ၏ မြန်မာ့ငြိမ်းချမ်းရေး စောင့်ကြည့်ရေးအဖွဲ့ BNI-MPM က ဩဂုတ်လ ၂၆ ရက်နေ့က လုပ်ခဲ့သည့် “မြန်မာ့ငြိမ်းချမ်းရေး လုပ်ငန်းစဥ်ကို ပုံဖော်ခြင်း ရည်ညွှန်း အကိုးအကား ၂၀၂၄-၂၀၂၅” စာအုပ်မိတ်ဆက်သည့် အခမ်းအနားတွင် BNI-MPM က ပြောဆိုလိုက်ခြင်း ဖြစ်သည်။ BNI-MPM တာဝန်ခံ ကိုနှင်းကိုဦးက “ စစ်ရေးစစ်ရာက ကိုယ်ကအနိုင်ရတယ် အောင်မြင်မှုတွေရတယ် ဆိုပေမဲ့ ပြည်သူလူထုရဲ့ နှလုံးသားထဲက ထောက်ခံမှု ရရှိရေးကတော့ တော်တော်သိမ်မွေ့တဲ့ လုပ်ငန်းစဉ်တွေ ဖြစ်တယ် ပေါ့နော်။ ဒါကြောင့်မို့လို့ ဒီမြို့သိမ်းဖြစ်စဉ်တွေမှာ အဓိကသိမ်းပိုက်ထားတဲ့မြို့တွေအနေနဲ့ ပြည်သူ လူ ထုရဲ့ မျက်နှာကို ကြည့်ဖို့ ပြည်သူလူထုရဲ့ ထောက်ခံမှုရရှိရေးအတွက် ကြိုးပမ်းမှုကို ဦးတည်သင့် တယ်ပေါ့ နော်။ နောက်တစ်ခုက တော်လှန်ရေး အဖွဲ့ဝင်အချင်းချင်း ပိုခိုင်မာအောင်လုပ်ဖို့ လိုအပ်တယ်ဆို တာမျိုးတွေ တွေ့ရပါ တယ်” ဟုပြောသည်။ ၂၀၂၁ ဖေဖော်ဝါရီလ ၁ ရက်နေ့တွင် စစ်တပ်က အာဏာသိမ်းပြီးနောက် တော်လှန်ရေး အဖွဲ့အစည်းများက စစ်အုပ်စု၏ နယ်မြေအများအပြားကို တိုက်ခိုက်သိမ်းပိုက်ထားသည်။ တိုက်ခိုက် သိမ်းပိုက်ထားသည့် ဒေသများတွင် နယ်မြေ အငြင်းပွားဆိုင်ရာ ကိစ္စရပ်များနှင့် လက်နက်ကိုင် အဖွဲ့အ စည်း အချင်းချင်းကြားတွင် သော်လည်းကောင်း၊ ဒေသခံ ပြည်သူများနှင့် လက်နက်ကိုင် တော်လှန်ရေး အဖွဲ့အ စည်းများကြား၌ သော်လည်းကောင်း မသင့်မြတ်မှု များစွာ ရှိလာခဲ့သည်။ ထိုအခြေအနေ အောက်တွင် တိုက်ခိုက်သိမ်းပိုက်ထားသည့် နယ်မြေများကို ရေရှည်ထိန်းထားနိုင်ရေးမှာ ခက်ခဲ သည်ဟု BNI-MPM က ဆိုသည်။ တစ်ဖက်တွင်လည်း တော်လှန်ရေး အင်အားစုများ အနေဖြင့် ၎င်းတို့သိမ်းပိုက်ထားသည့် မြို့ရွာများကို ရေရှည် ထိန်းထားနိုင်ရန် စစ်ကော်မရှင်တပ်၏ လေကြောင်း တိုက်ခိုက်မှုများသည် ကြီးမားသည့် စိန်ခေါ်မှု တစ်ရပ် အဖြစ်ရှိနေသည်ဟု ကိုနှင်းကိုဦးက ဆက်ပြောသည်။ “အဓိက ဒီမြို့သိမ်းဖြစ်စဉ်တွေကို ကျနော်တို့ ကြည့်လို့ရှိရင် အရင်ဆုံး ကျနော်တို့ သတိထားရမှာက တော်လှန်ရေ အင်အားစုတွေ အနေနဲ့ ထိန်းချုပ် သိမ်းပိုက်ထားတယ်ဆိုတာ တကယ်တမ်းတော့ တစ်ဖက်က ကြည့်ရင်လည်း စိန်ခေါ်မှုအများကြီးရှိတယ်။ ဥပမာ သိမ်းတာကလွယ်တယ် ဒါပေမဲ့ ရေရှည်ထိန်းချုပ် နိုင်ရေးက အများကြီးစိန်ခေါ်မှုရှိတယ်။ အဲ့ဒီထဲမှာမှ စစ်အုပ်စုရဲ့ လေကြောင်းရန်က စိန်ခေါ်မှု အကြီးဆုံး ဖြစ်နေတာပေါ့နော်။” လက်ရှိတွင် စစ်ကော်မရှင်တပ်သည် တော်လှန်ရေးတပ်များ ထိန်းချုပ်သိမ်းပိုက်ထားသည့် ပြည်နယ်နှင့် တိုင်းဒေ သကြီးများရှိ မြို့ရွာများကို လေကြောင်းမှတစ်ဆင့် ဗုံးကြဲတိုက်ခိုက်မှုများကို ဆက်တိုက်လုပ်ဆောင် လျက်ရှိ သည်။ လေကြောင်းတိုက်ခိုက်မှုများကြောင့် ပြည်သူလူထုများ ထိမှန်သေဆုံး ဒဏ်ရာရရှိခြင်း၊ လူနေအဆောက် အအုံ များ၊ ဆေးရုံများ၊ စာသင်ကျောင်များ၊ ဘုန်းကြီးကျောင်းများနှင့် ခရစ်ယာန် ဘုရားကျောင်းများ ထိမှန်ပျက် စီးခဲ့ရသည်။ တော်လှန်ရေးတပ်များထိန်းချုပ်ထားသည့် နယ်မြေအချို့အား ပြန်လည်လက်လွှတ်လိုက်ရသည့် အခြေအနေကို တအာင်းအမျိုးသား လွတ်မြောက်ရေး တပ်မတော် PSLF/TNLA ပြောခွင့်ရ လွေးယေဦးက ဩဂုတ်လ ၅ ရက်နေ့ တွင် လုပ်ခဲ့သည့် အွန်လိုင်းသတင်းစာရှင်းလင်းပွဲတွင် ယခုကဲ့သို့ ပြောသည်။ “အဓိကကတော့ တိုက်ပွဲတွေဖြစ်ပွားနေတဲ့အချိန်မှာ စစ်ကောင်စီသည်တိုက်ပွဲဖြစ်ပွားခြင်းမရှိသည့်နေရာကို အရပ်သားတွေကိုပဲ ရည်ရွယ်ချက်ရှိရှိ ပစ်မှတ်ထားပြီးတော့မှ တိုက်ခိုက်တာ အရပ်သားတွေကို ဗုံးကြဲ တိုက်ခိုက်တာ အရပ်သားတွေ သေကြေတာ ပျက်စီးစေတာ အဲ့လိုမျိုးတွေလုပ်လာတဲ့အတွက်ကြောင့် ကျမတို့ PSLF/TNLA အနေနဲ့ အရပ်သားတွေ ထိခိုက်နစ်နာမှုမရှိအောင် အရပ်သားတွေ ဒီထက်ပိုပြီးတော့မှ သေကြေ ပျက်စီးမှုမရှိအောင်ဆိုပြီမှ ဗဟိုကော်မတီကနေတစ်ဆင့် ဆုံးဖြတ်ချက်ချမှတ်ပြီးတော့မှ ပြန်လည် ဆုတ်ခွာတာ ဖြစ်ပါတယ်။ တစ်ခြားသောအကြောင်းအရာတွေကတော့ မရှိဘူးပေါ့နော်။” ကိုးကန့်တပ်ဖွဲ့ MNDAA က လားရှိုးမြို့ကို ၂၀၂၄ ခုနှစ် ဩဂုတ်လ ၃ ရက်နေ့တွင် သိမ်းပိုက်နိုင်ခဲ့ပြီး တရုတ်၏ ဖိအားကြောင့် ယခုနှစ် ဧပြီလတွင်း စစ်ကော်မရှင်က လားရှိုးမြို့ကို ပြန်လည်ထိန်းချုပ်နိုင်ခဲ့သည်။ ထို့အတူ ယခုနှစ်အတွင်း စစ်ကော်မရှင်တပ်သည် တော်လှန်ရေးတပ်များ ထိန်းချုပ်ထားသည့် ရှမ်းပြည်နယ် မြောက်ပိုင်း နောင်ချိုမြို့ကို ဇူလိုင်လ ၁၅ ရက်နေ့ ၊ ရှမ်းပြည်နယ်တောင်ပိုင်း မိုးဗြဲမြို့နယ်ကို ဇူလိုင်လ ၆ ရက်နေ့ နှင့် ဇူလိုင်လ ၂၂ရက်နေ့၌ မန္တလေးတိုင်းရှိ သပိတ်ကျင်း စသည့်မြို့များကို ပြန်လည်သိမ်းပိုက် နိုင်ခဲ့သည်။ BNI-Myanmar Peace Monitor ၏ မှတ်တမ်းအရ စစ်အာဏာသိမ်းမှု လေးနှစ်တာကာလအတွင်း တော်လှန် ရေး အင်အားစုများက မြို့ပေါင်း ၉၅ မြို့ကို ထိန်းချုပ်နိုင်ခဲ့သည်။ လေးနှစ်ကျော် ကြာမြင့်ပြီ ဖြစ်သည့် နွေဦးတော်လှန်ရေးသည် စစ်ရေးအောင်မြင်မှုများနှင့် နယ်မြေများ စိုးမိုး ထိန်းချုပ်လာနိုင်သည့် အနေအထားများအောက်တွင် ရှိလာနေပြီ ဖြစ်သည်။ အဆိုပါ အနေအထားအောက်မှ တိုင်းရင်းသား လူမျိုးပေါင်းစုံပါဝင်သည့် ဖက်ဒရယ်ဒီမို ကရေစီ ပြည်ထောင်စု ပေါ်ပေါက်ရေးအတွက် အင်းအားစုအားလုံး ပူးပေါင်းပါဝင်မှုနှင့် စုစည်းညီညွှတ်မှုက အထူးလိုအပ်နေသည်ဟု BNI-MPM ၏ “စစ်အုပ်စု၏ ရွေးကောက်ပွဲ အစီအစဉ်၊ ပြည်သူလူထု၏ အကြပ်အတည်းနှင့် နွေဦးတော်လှန်ရေး လမ်းဆုံလမ်းခွ” စာအုပ်တွင် ထည့်သွင်း ဖော်ပြထားသည်။ Photo - Mai A Hein (၂၀၂၄ ခုနှစ် ဇူလိုင်လ ၂၄ ရက်နေ့က တအာင်းအမျိုးသား လွတ်မြောက် ရေးတပ်မတော် (TNLA) ပူးပေါင်းတပ်များက မန္တလေးတိုင်း မိုးကုတ်မြို့အတွင်းသို့ ဝင်ရောက်လာသည်ကို တွေ့ရစဉ်)

မဟာမိတ်ဆက်ဆံရေး ခိုင်မာပြီး လူထု ထောက်ခံမှု ရှိမှသာ သိမ်းပိုက်မြို့ရွာများ ရေရှည်ထိန်းနိုင်မည်

ကျောက်မဲက ပြည်သူ ၈,၀၀၀ ကျော် စစ်ဘေးတိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ ရှမ်းပြည်မြောက်ပိုင်း၊ ကျောက်မဲမြို့နယ်ထဲက ပြည်သူ ၈,၆၀၀ ကျော် စစ်ဘေးလွှတ်ရာသို့ ထွက်ပြေးတိမ်းရှောင် နေကြရသည်။ စစ်ကော်မရှင်တပ်၏ လေကြောင်းအပြင် မြေပြင်မှ ထိုးစစ်များ၊ လက်နက်ကြီးဖြင့် ပစ်ခတ်မှုများနှင့် တိုက်ပွဲများ ကြောင့် ကျောက်မဲ ပြည်သူ ၈,၆၀၀ ကျော် နေရပ်မှ ထွက်ပြေး တိမ်းရှောင်နေရသည်ဟု ရှမ်း လူ့အခွင့်အရေး မဏ္ဍိုင် SHRF က စက်တင်ဘာလ ၉ ရက်နေ့တွင် ထုတ်သည်။ SHRF က “ကျောက်မဲမြို့နယ်၌ စစ်ကောင်စီ၏ လေကြောင်းနှင့် မြေပြင်မှ ထိခိုက်သေဆုံးစေနိုင်သော ပစ်ခတ် တိုက်ခိုက်မှုများကြောင့် အရပ်သားပြည်သူ ၂၉ ဦးသေဆုံးကာ အများစုမှာ ဘုန်းကြီးကျောင်းများတွင် ဖြစ်ပြီး ၆၆ ဦး ဒဏ်ရာရရှိခဲ့ရာ အရပ်သားပြည်သူ ၈,၆၀၀ ကျော် မှာ ထွက်ပြေးတိမ်း ရှောင်ခဲ့ကြရသည်” ဟု ဆိုသည်။ အဆိုပါ စာရင်းမှာ ဩဂုတ်လ ၁၈ ရက်နေ့မှ ၃၀ ရက်နေ့ အတွင်း ထွက်ပြေးတိမ်းရှောင်ရသည့် စာရင်းဟု ဆိုရမည်။ ကျောက်မဲမြို့နယ်ထဲ စစ်တပ်၏ ပစ်ခတ်တိုက်ခိုက်မှုများကြောင့် အရပ်သားပြည်သူ ၂၉ ဦး သေဆုံးပြီး ၆၆ ဦး ထိမှန်ဒဏ်ရာ ရခဲ့သည်ဟု SHRF က ဆိုသည်။ ဖြစ်စဉ်အများစုမှာ ဘုန်းကြီးကျောင်းနေရာများ၌ ဖြစ်ခဲ့သည်ဟု ထုတ်ပြန်ထားသည်။ စစ်တပ်က လေကြောင်းအပြင် လက်နက်ကြီးဖြင့် ပစ်ခတ်တိုက်ခိုက်ရာ ကျောက်မဲမြို့နယ်ထဲက နောင်ပိန် ကျေးရွာအုပ်စုကို အဓိက ပစ်မှတ်ထားခဲ့သည်ဟု ဒေသခံများက ပြောသည်။ ဗုံးများနှင့် လက်နက်ကြီးကျည်များသည် နောင်ပိန်ကျေးရွာအုပ်စုကို ဖြတ်သန်းသွားသည့် တရုတ်နိုင်ငံ၏ ရေနံနှင့် သဘာဝဓာတ်ငွေ့ပိုက်လိုင်းများအနီး အန္တရာယ် ရှိလောက်အောင် ကျရောက်ပေါက်ကွဲခဲ့သည်ဟု SHRF က ဆိုသည်။ ဒေသခံတစ်ဦးက “အခုက လေယာဉ်လည်း နေ့တိုင်းလာတယ်လို့ ပြောလို့ရတယ်။ တိုက်ပွဲကလည်း ဆက်တိုက် ဖြစ်နေတော့ လူတောင် မရှိတော့ဘူး။ မြို့ထဲဆိုလည်း လူပြတ်တယ်။ ရွာလမ်းတွေပေါ်လည်း လူက မရှိတော့ ဘူး။ ရှောင်တဲ့လူတွေက ရှောင်ကုန်တာပေါ့နော်။ ရွာမှာ မြို့မှာ ကျန်ခဲ့တဲ့လူတွေကလည်း အရင်လို ဘယ်သူမှ အပြင် မထွက်ကြတော့ဘူး သတိနဲ့နေရတာပေါ့ဗျာ။ ကျောက်မဲ ဗဟိုစျေး၊ မနက်စျေးတွေမှာလည်း လူမရှိ တော့ဘူး” ဟု ပြောသည်။ နောင်ချိုမြို့နယ်ဘက်မှ စစ်ကြောင်းထိုးလာသည့် စစ်ကော်မရှင်တပ်က မူဆယ် - မန္တလေး ကားလမ်းမပေါ်မှ တအာင်း တပ်မတော် (TNLA) ကို ရှင်းလင်းဖယ်ရှားနိုင်ရေး ကြိုးပမ်းနေသည်ဟု SHRF က ဆိုသည်။ ကျောက်မဲမြို့ခံ အမျိုးသားတစ်ဦးက “ဒီနေ့မနက် အစောကြီးနော် ၁ နာရီလောက်မှာပဲ ကျောက်မဲမြို့က လွယ် ခေါ် ရွာဖက် လေယာဉ်နဲ့ ဗုံးကြဲသွားသေးတယ်။ နောက်ပြီးတော့ ပြီးခဲ့တဲ့ ၇ ရက်နေ့တုန်းကရော၊ ၆ ရက်နေ့မှာ ရော လေယာဉ်က ဗုံးကြဲသွားတယ်ဗျ။ ၇ ရက်နေ့ရော ၆ ရက်ရော ညပိုင်းပဲ ကျောက်မဲ (၇) ရပ်ကွက် မြောက် ကုန်းကို ကြဲတာ၊ အိမ်တွေ ပျက်ကုန်တယ်။ ကုန်စုံဆိုင်နားလေးကို ကြဲတာဗျ။ လူတော့ ထိတာမရှိဘူး” ဟု ပြော သည်။ စစ်ရှောင် ၈,၆၀၀ ကျော်မှာ လက်ရှိတွင် ကျောက်မဲမြို့နယ် တောင်ပိုင်းက ရှမ်းပြည်တိုးတက်ရေးပါတီ (SSPP) ထိန်းချုပ်နယ်မြေထဲသို့ ထွက်ပြေးခိုလှုံနေကြရခြင်း ဖြစ်သည်။ ထိုစစ်ရှောင်ပြည်သူများမှာ သောက်သုံးရေ၊ အစားအသောက်၊ ဆေးဝါးနှင့် အခြား အခြေခံလိုအပ်ချက်များ ပြတ်လပ်မှုနှင့် ရင်ဆိုင်နေရသောကြောင့် အကူအညီများ လိုအပ်နေသည်ဟု ၎င်းတို့အား ကူညီပေးနေသူများက ပြောသည်။

ကျောက်မဲက ပြည်သူ ၈,၀၀၀ ကျော် စစ်ဘေးတိမ်းရှောင်နေရ

တအာင်းတပ် ထိန်းချုပ်ထားသည့် ကျောက်မဲနှင့် မိုးကုတ်မြို့ကို စစ်တပ်က လေကြောင်းမှ ဗုံးကြဲတိုက်ခိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ ရှမ်းမြောက်နှင့် မန္တလေးတိုင်းထဲရှိ တအာင်းတပ် TNLA က ထိန်းချုပ်ထားသည့် မြို့တို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုခဲ့ရာ ကိုရင် ၃ ပါး နှင့် အရပ်သား ၃ ဦး ထိမှန်ဒဏ်ရာ ရခဲ့သည်။ တအာင်းတပ် TNLA သိမ်းထားသည့် ရှမ်းပြည်မြောက်ပိုင်းက ကျောက်မဲမြို့နယ် လေကြောင်းမှ ဗုံးကြဲတိုက်ခိုက် ခံရမှုထဲ ကိုရင် ၃ ပါးနှင့် အမျိုးသား ၁ ဦး ထိမှန်ဒဏ်ရာရခဲ့သည်။ ဩဂုတ် ၂၅ ရက်နေ့၊ နံနက် ၁၁ နာရီကျော်အချိန်ခန့်တွင် ကျောက်မဲမြို့နယ်၊ ပိန္နဲကုန်းရပ်ကွက်၊ ဝါဆိုကျောင်း ဘက်ကို တိုက်ပွဲဖြစ်ပွားခြင်းမျိုး မရှိဘဲ လေကြောင်းမှ ဗုံးကြဲသွားခြင်း ဖြစ်သည်ဟု တအာင်းတပ် TNLA က ထုတ်ပြန်သည်။ အလားတူ နေအိမ် ၂၂ လုံး၊ ကျောင်းဆောင် ၄ ဆောင်နှင့် ကားနှစ်စီးလည်း ထိမှန်ပျက်စီးသွားသည်ဟု TNLA က ဆိုသည်။ “ပလောင်တပ်က ဝင်လို့ လေကြောင်းကနေ တိုက်တယ် အဲ့လိုပြောကြတယ်။ ဘာမှ မဆိုင်ဘူး တကယ်တော့ စစ်တပ်က ကြဲချင်လို့ကို ကြဲတာ။ ဝါဆိုကျောင်းဘက်မှာ တိုက်ပွဲလည်း မရှိဘူး။ အဲ့ဒါကို လေယာဉ်နဲ့ ဗုံးကြဲသွား တာ။ အဲ့မှာ ကျောင်းက သာမဏေပေါ့ ကိုရင် ၃ ပါး ဒဏ်ရာရတယ်။ ပြည်သူတွေထဲက ထိတာလည်း ရှိတယ်။ အိမ်အပျက်အစီးလည်း များတယ်” ဟု ဒေသခံ အမျိုးသမီးတစ်ဦးက ပြောသည်။ ထို့အပြင် ကျောက်မဲနှင့် နောင်ချိုမြို့နယ် အစပ်က အသက် ၁၂၅ နှစ်ကျော် သက်တမ်းရှိသည့် ဂုတ်ထိပ်တံတားမှာ လည်း ဩဂုတ်လ ၂၄ ရက်နေ့၊ နံနက်ပိုင်းတွင် ဖျက်ဆီးခံလိုက်ရသည်။ အဆိုပါ ကိစ္စနှင့် ပတ်သက်၍လည်း စစ်ကော်မရှင်တပ်နှင့် တအာင်းတပ် TNLA တို့က အပြန်အလှန် စွပ်စွဲနေကြ သည်။ ထို့အပြင် ဩဂုတ်လ ၂၅ ရက်နေ့ ည ၁၁ နာရီအချိန်ခန့်တွင် တအာင်းတပ် (TNLA) ထိန်းချုပ်ထားသည့် မိုးကုတ် မြို့ကို စစ်တပ်က လေကြောင်းမှ ထပ်မံ ဗုံးကြဲတိုက်ခိုက်ခဲ့သည်။ မန္တလေးတိုင်း၊ မိုးကုတ်မြို့နယ်ထဲက စည်ပင်သာယာရပ်ကွက်ကို တိုက်ပွဲမရှိဘဲ လေကြောင်းမှ ဗုံးကြဲခဲ့ခြင်း ကြောင့် အရပ်သား ၁ ဦး ထိခိုက်ဒဏ်ရာရပြီး နေအိမ် ၅ လုံး ထိမှန်ပျက်စီးခဲ့သည်ဟု တအာင်းတပ်က ဩဂုတ်လ ၂၆ ရက်နေ့တွင် သတင်း ထုတ်ပြန်ထားသည်။ မိုးကုတ်ဒေသခံ အမျိုးသမီးတစ်ဦးက “အခုကလေ အသံကြားရင်ကို ဘယ်ပြေးလို့ ပြေးရမှန်း မသိတော့ဘူး။ မိုးကုတ် လေကြာင်းတိုက်ခိုက်မှုက အရှေ့ပိုင်း စည်ပင်သာယာရပ်ကွက်ပေါ့နော်။ ဂေါ်ရခါးဘုရားကျောင်း ရှေ့မှာ ကျတာပါ” ဟု ပြောသည်။ သြဂုတ်လအတွင်း စစ်တပ်က မိုးကုတ်မြို့ကို လေကြောင်းမှ အကြိမ်ကြိမ် ဗုံးကြဲ တိုက်ခိုက်ခဲ့ခြင်းကြောင့် ကလေးနှင့် အမျိုးသမီး အပါအဝင် လူပေါင်း ၄၀ ကျော် သေဆုံးခဲ့ပြီး ဖြစ်သည်။ ထိုသို့ လေကြောင်းမှ တိုက်ခိုက်မှုမျာကြောင့် ထိခိုက်ဒဏ်ရာရသူလည်း အယောက် ၂၀ ကျော်သွားပြီ ဟု မိုးကုတ် ဒေသခံများက ပြောသည်။ စစ်တပ်က နောင်ချိုမြို့ကို ပြန်ထိန်းချုပ်အပြီး မိုးကုတ်၊ ကျောက်မဲ၊ သီပေါမြို့နယ်တို့ကို မြေပြင် စစ်ကြောင်း အပြင် လေကြောင်းကနေပါ ဗုံးကြဲတိုက်ခိုက် ဖိအားပေးနေသည်ဟု လေ့လာသူများ သုံးသပ်ပြောဆိုနေကြ သည်။

တအာင်းတပ် ထိန်းချုပ်ထားသည့် ကျောက်မဲနှင့် မိုးကုတ်မြို့ကို စစ်တပ်က လေကြောင်းမှ ဗုံးကြဲတိုက်ခိုက်

TNLA တပ်အတွင်း အခြား တိုင်းရင်းသားများပါ လာရောက် ပူးပေါင်း သတင်းနှင့် မီဒီယာကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ တအာင်း (ပလောင်) လူမျိုးများ အပြင် အခြားတိုင်းရင်းသား လူမျိုးစုများကလည်း ၎င်းတို့၏ တပ်တွင် ဆန္ဒ အလျောက် ပါဝင် စစ်မှုထမ်းလာကြကြောင်း တအာင်းအမျိုးသား လွတ်မြောက်ရေး တပ်မတော် (TNLA) က ပြောသည်။ အထူးသဖြင့် မိုးကုတ်၊ မိုးမိတ်ကဲ့သို့ လူမျိုးပေါင်းစုံနေထိုင်သည့် ဒေသများတွင် တအာင်းလူမျိုး မဟုတ်သည့် အခြားသော လူမျိုးစုများက တပ်ဖွဲ့ဝင်အဖြစ် ပါဝင်လာမှုများ ရှိနေကြောင်း တအာင်းတပ် TNLA ၏ ပြောရေး ဆိုခွင့်ရှိသူ လွေးယေဦးက ပြောသည်။ “တခြား လူမျိုးစုတွေလည်း ပါဝင်လာတာ တွေ့ရပါတယ်။ အထူးသဖြင့် မိုးကုတ် မိုးမိတ်လို ဒေသမျိုးဆိုရင် တအာင်းလူမျိုးစု မဟုတ်တဲ့ သူတွေလည်း ပါဝင်လာတာ တွေ့ရပါတယ်။ ဒီအပေါ်မှာလည်း ကျမတို့ ကြိုဆို ပြီးတော့ ဆောင်ရွက်တာတွေလည်း ရှိပါတယ်” ဟု ဩဂုတ်လ ၅ ရက်နေ့က ပြုလုပ်သော online သတင်းစာ ရှင်းလင်းပွဲတွင် လွေးယေဦးက ပြောဆိုလိုက်ခြင်း ဖြစ်သည်။ TNLA ၏ စစ်မှုထမ်းဥပဒေသည် တအာင်းလူမျိုးများကိုသာ အဓိက ရည်ရွယ်သော်လည်း အခြားသော တိုင်းရင်း သား လူမျိုးစုများ အနေဖြင့် ၎င်းတို့ ဆန္ဒရှိပါက သက်ဆိုင်ရာ ရပ်ကွက်ထောက်ခံစာနှင့် တကွ စနစ်တကျ စိစစ် လက်ခံပေးလျက်ရှိကြောင်း လွေးယေဦးက ဆက် ပြောသည်။ “ကျမတို့ PSLF/TNLA သည် လက်ရှိ လောလောဆယ်မှာတော့ မူအရ ဒီဥပဒေအရ သတ်မှတ်ထားတာကတော့ ကျမတို့သည် ဒီတအာင်းလူမျိုးကိုပဲ ၁၈ နှစ်ပြည့်ပြီးတဲ့ သူတွေကိုပဲ ဒီတရား ဥပဒေအရ ကျနော်တို့ ကောက်ခံနေ တာ ဖြစ်ပါတယ်။ တခြား လူမျိုးစုတွေကတော့ သူတို့ရဲ့ ဒီပါဝင်လာနိုင်မှုကတော့ ကျနော်တို့ ကြိုးပမ်းတာမျိုး တွေ ရှိပါတယ်။” တအာင်းတပ် TNLA သည် မိုးကုတ်မြို့ရှိ ဂေါ်ရခါးလူမျိုးများအား အတင်းအကျပ် စစ်သား စုဆောင်းနေသည် ဆိုသော သတင်းများ ထွက်ပေါ်နေခြင်းနှင့် ပတ်သက်၍လည်း ၎င်းက ဒေသလုံခြုံရေးအတွက် ပူးပေါင်းပါဝင်ရန် လူမျိုးစု ခေါင်းဆောင်များနှင့် ညှိနှိုင်းဆွေးနွေးခြင်းသာ ဖြစ်ပြီး အတင်းအကျပ် စုဆောင်းခြင်းမျိုး မရှိဘူးဟု ဆိုသည်။ TNLA အနေဖြင့် တော်လှန်ရေး ရည်မှန်းချက်တူသည့် မည်သည့် လူမျိုးစုကိုမဆို ဆန္ဒအလျောက် ပူးပေါင်း ပါဝင် လာမှုအား ကြိုဆိုလျက်ရှိပြီး ဒေသတည်ငြိမ်ရေးနှင့် တရားဥပဒေ စိုးမိုးရေး လုပ်ငန်းများတွင် အတူတကွ လက်တွဲ ဆောင်ရွက်သွားမည်ဟု ဆိုသည်။ ညီနောင်မဟာမိတ်သုံးဖွဲ့၏ ‘၁၀၂၇’ စစ်ဆင်ရေး နောက်ပိုင်း တအာင်းတပ် TNLA သည် ရှမ်းပြည်မြောက်ပိုင်းရှိ မြို့နယ် အများအပြားကို ထိန်းချုပ်နိုင်ခဲ့သော်လည်း၊ လက်ရှိတွင် စစ်ကော်မရှင်တပ်၏ ပြန်လည်ထိုးစစ်များကို ပြင်းထန်စွာ ရင်ဆိုင်နေရသည်။ အထူးသဖြင့် လတ်တလောတွင် နောင်ချိုမြို့ကို စစ်ကော်မရှင်က လေကြောင်းတိုက်ခိုက်မှုနှင့်အတူ အဓမ္မ စုဆောင်းထားသည့် စစ်မှုထမ်း အင်အား အလုံးအရင်းသုံးကာ ပြန်လည် သိမ်းပိုက်ခဲ့ခြင်းသည် TNLA အတွက် စစ်ရေးအရ ဖိအားတစ်ခုဖြစ်စေခဲ့သည်။ ထို့အပြင် ကျောက်မဲ၊ သီပေါနှင့် မိုးကုတ်ကဲ့သို့သော မြို့များ၏ အနီးဝန်းကျင်တွင်လည်း တိုက်ပွဲများ ဆက်လက် ဖြစ်ပွားနေပြီး နှစ်ဖက်စလုံးမှ မဟာဗျူဟာကျသည့် နယ်မြေများကို ထိန်းချုပ်နိုင်ရန် အပြန်အလှန် ကြိုးပမ်းနေ သည့်အတွက် ဒေသတွင်း နှစ်ဘက်ကြား စစ်ရေးတင်းမာမှုများ မြင့်တက်နေသည်။

TNLA တပ်အတွင်း အခြား တိုင်းရင်းသားများပါ လာရောက် ပူးပေါင်း

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့
BBC က ဝန်ထမ်း ၂၀၀၀ လျှော့မည်
ဥရောပတွင် လေယာဉ်ဆီ ၆ ပတ်စာသာကျန်တော့သည်ဟု IEA ဆို
အငြင်းပွား တောင်တရုတ်ပင်လယ်တွင် တရုတ်လှေမှ ပြင်းထန်သော အဆိပ်ငွေ့များ ဖမ်းဆီးရမိ

Archives

Archives

×Close