February 2026 – Page 4 – Network Media Group

Archive: February 2026

Feb 23

Messenger.com ဝဘ်ဆိုက်ကို ပိတ်သိမ်းမည် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၃ ရက်။ Messenger.com ဝက်ဘ်ဆိုက်ကို ဧပြီလ ၁၅ ရက်နေ့မှာ ပိတ်သိမ်းတော့မယ်လို့ မိခင် ကုမ္ပဏီ ဖြစ်တဲ့ Meta က ကြေညာလိုက်ပါတယ်။ အဲဒီလို ပိတ်သိမ်းလိုက်ပေမယ့် Messenger ဝန်ဆောင်မှုတွေကို Facebook က တဆင့် ဒါမှမဟုတ် ဖုန်း အက်ပလီကေးရှင်းက တဆင့် သုံးစွဲနေသူတွေ အတွက် သက်ရောက်မှု ရှိမှာ မဟုတ်ပဲ Messenger.com ကနေ့ သီးသန့် အကောင့်ဖွင့် သုံးစွဲသူတွေ အတွက်ပဲ အပြောင်းအလဲ ဖြစ်စေမှာ ဖြစ်ပါတယ်။ ဝန်ဆောင်မှု ရပ်ဆိုင်းလိုက်တာနဲ့ messenger.com က သုံးစွဲသူတွေကို Facebook ကနေ တဆင့် သုံးစွဲဖို့ အလိုအလျောက် ပြောင်းပေးမှာ ဖြစ်ပါတယ်။ Facebook အကောင့်မရှိပဲ Messenger အကောင့်ပဲ သုံးနေသူတွေ ဒါမှမဟုတ် Facebook အကောင့်ကို ပိတ်ထား (Deactivate) ပြီး Messenger တစ်ခုတည်းကိုပဲ ကွန်ပျူတာမှာ သီးသန့်သုံးချင်သူတွေအတွက် အခက်အခဲဖြစ်စေမှာ ဖြစ်ပါတယ်။ ဖုန်းနဲ့ပဲ သုံးနေတဲ့ Messenger သုံးစွဲသူတွေ အတွက်ကတော့ အပြောင်းအလဲ ရှိမှာ မဟုတ်ပါဘူး။ Meta ဟာ ပြီးခဲ့တဲ့လအနည်းငယ်ကလည်း Windows နဲ့ Mac အတွက် Messenger Desktop App တွေကို ပိတ်သိမ်းခဲ့ပါသေးတယ်။ ဒါဟာ ကုမ္ပဏီရဲ့ ကုန်ကျစရိတ်ကို လျှော့ချဖို့နဲ့ Messenger ကို Facebook App ထဲ ပြန်လည်ပေါင်းစည်းဖို့ (Merge) လုပ်ဆောင်နေတဲ့ ဗျူဟာတစ်ခု ဖြစ်တယ်လို့ ကျွမ်းကျင်သူတွေက သုံးသပ်ကြပါတယ်။

Messenger.com ဝဘ်ဆိုက်ကို ပိတ်သိမ်းမည်

Feb 23

မက္ကဆီကို မူးယစ်ရာဇာ "El Mencho" သေဆုံးပြီး အရေးပေါ် အခြေအနေ ကြေညာထား သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၃ ရက်။ မက္ကဆီကိုနိုင်ငံ၏ သြဇာအကြီးဆုံး မူးယစ်ရာဇာတစ်ဦးဖြစ်သူ CJNG ဂိုဏ်းခေါင်းဆောင် "El Mencho" (ခေါ်) နီမက်စီယို ရူဘင် အိုစီဂူရာ ကာဗင်တီးစ်သည် ၂၀၂၆ ခုနှစ်၊ ဖေဖော်ဝါရီလ ၂၂ ရက်နေ့တွင် မက္ကဆီကိုစစ်တပ်၏ စီးနင်းမှုအတွင်း ရရှိခဲ့သော ဒဏ်ရာများဖြင့် သေဆုံးသွားခဲ့ပါသည်။ ၎င်းသေဆုံးမှုကြောင့် မက္ကဆီကိုနိုင်ငံအတွင်းရှိ Jalisco ပြည်နယ်အပါအဝင် နေရာအမြောက်အမြား၌ ၎င်း၏နောက်လိုက်များက ကားများကို မီးရှို့ခြင်းနှင့် လမ်းပိတ်ဆို့ခြင်းများ ပြုလုပ်ကာ အင်အားပြတုံ့ပြန်ခဲ့ကြပါသည်။ အခြေအနေများ ဆိုးရွားလာသဖြင့် ပြည်နယ်အစိုးရက အရေးပေါ်အခြေအနေ (Code Red) ကြေညာခဲ့ရပြီး အများပြည်သူသုံး သယ်ယူပို့ဆောင်ရေးနှင့် လေကြောင်းခရီးစဉ်များကို ယာယီရပ်ဆိုင်းထားခဲ့ရပါသည်။ ရပ်ဆိုင်းထားသော လေကြောင်းလိုင်းများတွင် Delta, Southwest, Alaska နဲ့ Air Canada လေကြောင်းလိုင်းများ ပါဝင်သည်။ အမေရိကန်အစိုးရကမူ ဤမူးယစ်ရာဇာအား ဖမ်းဆီးရန် ဒေါ်လာ ၁၅ သန်း ဆုကြေးထုတ်ထားခဲ့ပြီး ၎င်း၏သေဆုံးမှုသည် မူးယစ်ဆေးဝါးတိုက်ဖျက်ရေးအတွက် ကောင်းမွန်သော တိုးတက်မှုဖြစ်ကြောင်း မှတ်ချက်ပြုခဲ့ပါသည်။ လက်ရှိတွင် ဒေသခံပြည်သူများအား အပြင်မထွက်ရန်နှင့် ဘေးကင်းရာ၌ ခိုလှုံနေကြရန် အာဏာပိုင်များက သတိပေးနှိုးဆော်ထားပါသည်။

မက္ကဆီကို မူးယစ်ရာဇာ “El Mencho” သေဆုံးပြီး အရေးပေါ် အခြေအနေ ကြေညာထား

Feb 23

ဗီယက်နမ်က Starlink ကို လုပ်ငန်း လိုင်စင် ခွင့်ပြုလိုက်ပြီ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၃ ရက်။ ဗီယက်နမ်အစိုးရသည် Elon Musk ၏ Starlink ဂြိုဟ်တုအင်တာနက်ကို နိုင်ငံအတွင်း စီးပွားဖြစ် လုပ်ကိုင်ခွင့်လိုင်စင်အား ၂၀၂၆ ခုနှစ်၊ ဖေဖော်ဝါရီလ ၂၂ ရက်နေ့တွင် အတည်ပြု ထုတ်ပေးလိုက်ပါသည်။ ဗီယက်နမ်နိုင်ငံသည် ဒေတာလုံခြုံရေးနှင့် ပတ်သက်၍ အလွန်တင်းကျပ်သော နိုင်ငံဖြစ်သော်လည်း ယခုအခါ နိုင်ငံခြားသားပိုင်ဆိုင်မှု ကန့်သတ်ချက်မရှိဘဲ (၅) နှစ်တိတိ စမ်းသပ်ခွင့်ပြုရန် ဝန်ကြီးချုပ်က လက်မှတ်ရေးထိုးခဲ့ခြင်း ဖြစ်ပါသည်။ Starlink ကုမ္ပဏီအနေဖြင့် ဗီယက်နမ်နိုင်ငံတစ်ဝန်းတွင် ဂိတ်ဝေးစခန်း (Gateway Station) ၄ ခု တည်ဆောက်မည်ဖြစ်ပြီး အသုံးပြုသူလက်ခံစက် (User Terminals) ပေါင်း ၆ သိန်းအထိ တပ်ဆင်ရန် စီစဉ်ထားပါသည်။ ဤခြေလှမ်းသည် ဗီယက်နမ်နိုင်ငံ၏ ဝေးလံခေါင်ဖျားဒေသများနှင့် ကျွန်းစုများတွင် ဒီဂျစ်တယ်ချိတ်ဆက်မှု မြှင့်တင်ရန်အတွက် သိသာထင်ရှားသော တိုးတက်မှုတစ်ခု ဖြစ်လာမည်ဖြစ်ပါသည်။

ဗီယက်နမ်က Starlink ကို လုပ်ငန်း လိုင်စင် ခွင့်ပြုလိုက်ပြီ

Feb 23

ပါကစ္စတန်က အာဖဂန်နစ္စတန် အတွင်း နေရာ ၇ ခုကို ဒရုန်းနှင့် တိုက်ခိုက် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၃ ရက်။ ပါကစ္စတန်စစ်တပ်သည် ဖေဖော်ဝါရီလ ၂၂ ရက် မနက်အစောပိုင်းတွင် အာဖဂန်နစ္စတန်နိုင်ငံအတွင်းရှိ စစ်သွေးကြွစခန်းများကို လေကြောင်းမှ တိုက်ခိုက်ခဲ့ရာ စစ်သွေးကြွ ၇၀ ခန့်ကို ခြေမှုန်းနိုင်ခဲ့ကြောင်း ထုတ်ပြန်ခဲ့ပါသည်။ ပါကစ္စတန်အစိုးရက ၎င်းတို့နိုင်ငံအတွင်း ဖြစ်ပွားခဲ့သော အသေခံဗုံးခွဲမှုများသည် အာဖဂန်တာလီဘန်များ ကျောထောက်နောက်ခံပေးထားသည့် TTP နှင့် IS-K အဖွဲ့များ၏ လက်ချက်ဖြစ်ကြောင်း ခိုင်လုံသော အထောက်အထားများရှိသည်ဟု ဆိုကာ လက်စားချေတိုက်ခိုက်ခဲ့ခြင်း ဖြစ်ပါသည်။ သို့သော်လည်း တာလီဘန်အစိုးရကမူ ပါကစ္စတန်၏ တိုက်ခိုက်မှုကြောင့် အမျိုးသမီးနှင့် ကလေးငယ်များအပါအဝင် အရပ်သား ၁၈ ဦး သေဆုံးခဲ့ရပြီး မိသားစုဝင် ၂၃ ဦးရှိသော နေအိမ်တစ်လုံးတွင် ၅ ဦးသာ အသက်ရှင်ကျန်ရစ်သည့်ဖြစ်စဉ်မျိုး ရှိခဲ့ကြောင်း တုံ့ပြန်ခဲ့ပါသည်။ တာလီဘန်တို့က ဤလုပ်ရပ်သည် အချုပ်အခြာအာဏာ ကျူးကျော်မှုဖြစ်ပြီး သင့်တော်သလို ပြန်လည်တုံ့ပြန်သွားမည်ဟု သတိပေးထားသဖြင့် နယ်စပ်တင်းမာမှုများ မြင့်တက်လျက်ရှိပါသည်။

ပါကစ္စတန်က အာဖဂန်နစ္စတန် အတွင်း နေရာ ၇ ခုကို ဒရုန်းနှင့် တိုက်ခိုက်

Feb 23

ယူကရိန်း စစ်ပွဲ ၄ နှစ်ပြည့်တွင် ရုရှားက လေကြောင်းတိုက်ခိုက်မှု အရှိန်မြှင့် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၃ ရက်။ ရုရှား-ယူကရိန်း ကျူးကျော်စစ် သက်တမ်း (၄) နှစ်ပြည့်မြောက်ရန် ရက်ပိုင်းအလိုဖြစ်သော ၂၀၂၆ ခုနှစ်၊ ဖေဖော်ဝါရီလ ၂၂ ရက်နေ့တွင် ရုရှားစစ်တပ်က ယူကရိန်းနိုင်ငံတစ်ဝန်းသို့ ဒရုန်းစင်းရေ ၂၉၇ စင်းနှင့် ဒုံးကျည် ၅၀ နီးပါးကို အသုံးပြု၍ အပြင်းအထန် ဗုံးကြဲတိုက်ခိုက်ခဲ့သည်ဟု နိုင်ငံတကာ သတင်းများတွင် ဖော်ပြသည်။ ဤတိုက်ခိုက်မှုကြောင့် ကိုင်ဗ်မြို့တော်အတွင်းရှိ လူနေအိမ်များ၊ လျှပ်စစ်ဓာတ်အားလိုင်းများ၊ ရေပေးဝေရေးနှင့် သယ်ယူပို့ဆောင်ရေး အခြေခံအဆောက်အအုံများ ပြင်းထန်စွာ ထိခိုက်ပျက်စီးခဲ့သည်။ လက်ရှိတွင် ကိုင်ဗ်မြို့နေလူထု ၅ သိန်းကျော်မှာ လျှပ်စစ်မီး ပြတ်တောက်လျက်ရှိပြီး အနုတ် ၂၂ ဒီဂရီ စင်တီဂရိတ် အထိ ရှိသော ပြင်းထန်သည့် ဆောင်းရာသီအအေးဒဏ်ကို ရင်ဆိုင်နေကြရသည်။ တစ်ဖက်တွင်လည်း ယူကရိန်းနယ်မြေကို ဖြတ်သန်းသွားသော "Druzhba" ရေနံပိုက်လိုင်း ပျက်စီးမှုကြောင့် ရုရှားရေနံ မရရှိတော့သည့်အပေါ် အိမ်နီးချင်း ဟန်ဂေရီနှင့် စလိုဗက်ကီးယားနိုင်ငံတို့က ယူကရိန်းအား ဖိအားပေးလျက်ရှိပါသည်။ ဟန်ဂေရီနိုင်ငံက ရေနံပိုက်လိုင်းကို အမြန်ဆုံး ပြုပြင်ပေးရန်နှင့် ပျက်ကွက်ပါက ဥရောပသမဂ္ဂ၏ အရေးယူပိတ်ဆို့မှုများကို ဗီတိုအာဏာဖြင့် ပိတ်ပင်မည်ဟု ခြိမ်းခြောက်ထားသလို၊ စလိုဗက်ကီးယားနိုင်ငံကလည်း ရေနံပြန်လည်ပေးပို့ခြင်းမရှိပါက ယူကရိန်းသို့ ရောင်းချနေသော အရေးပေါ်လျှပ်စစ်ဓာတ်အားများကို ဖြတ်တောက်မည်ဟု ရာဇသံပေးထားသည်။

ယူကရိန်း စစ်ပွဲ ၄ နှစ်ပြည့်တွင် ရုရှားက လေကြောင်းတိုက်ခိုက်မှု အရှိန်မြှင့်

Feb 23

ဖလမ်းမြို့နယ်တွင် စစ်ကော်မရှင် တပ်စခန်းကို ချင်းတော်လှန်ရေးတပ်များ ဝင်ရောက်တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၂ ရက်။ ချင်းပြည်၊ ဖလမ်းမြို့နယ်အတွင်း စစ်ကြောင်းထိုးလာသည့် စစ်ကော်မရှင်တပ်နှင့် ချင်းတော်လှန်ရေး ပူးပေါင်း တပ်များအကြား တိုက်ပွဲပြင်းထန်နေပြီး၊ စစ်တပ်ဘက်မှ အကျအဆုံးများသည့်အပြင် လက်နက်ခဲယမ်းများပါ သိမ်းဆည်းရရှိထားကြောင်း စစ်ရေးအရင်းအမြစ်များက ပြောသည်။ ဖေဖော်ဝါရီလ ၂၂ ရက်နေ့၊ နံနက်ပိုင်းတွင် ဖလမ်းမြို့နယ်၊ ထင်းရှူးစခန်း၌ တပ်စွဲထားသည့် စစ်ကော်မရှင်တပ်ဖွဲ့ ကို CNA၊ CNDF နှင့် CDF ပူးပေါင်းတပ်များက ဝင်ရောက်တိုက်ခိုက်ခဲ့ခြင်းဖြစ်သည်။ အဆိုပါ တိုက်ပွဲအတွင်း လက်နက် ၉ လက်နှင့်အတူ စစ်ကော်မရှင်တပ်သား ရုပ်အလောင်းအချို့ကို သိမ်းဆည်း ရရှိသည်ဟု ချင်းသတင်းရင်းမြစ်တစ်ဦးက ပြောသည်။ တိုက်ပွဲနောက်ပိုင်း မြေပြင်အခြေအနေနှင့်ပတ်သက်၍ သူက ယခုကဲ့သို့ ပြောပြသည်။ “ဒီမနက်မှာလည်း နယ်မြေရှင်းလင်းရေး လုပ်နေတုန်း ကျန်ရှိနေတဲ့ စကစတွေနဲ့ တိုက်ပွဲထပ်ဖြစ်တယ်။ စကစက လေယာဉ်နဲ့ ဗုံးကြဲတိုက်ခိုက်တာတွေရှိသလို ကျနော်တို့ဘက်ကလည်း ဒဏ်ရာရသူတွေရှိပါတယ်။ CDF KKG က ရဲဘော်တစ်ယောက် ကျဆုံးခဲ့ရတယ်။” ထို့အပြင် ယနေ့ နံနက် ၁ နာရီဝန်းကျင်တွင်လည်း CNDF ၏ လက်ဖြောင့်တပ်သားများက စစ်ကော်မရှင်တပ်ကို ပစ်ခတ်တိုက်ခိုက်ခဲ့ရာ စစ်တပ်ဘက်မှ ၁၀ ဦးထက်မနည်း သေဆုံးခဲ့ကြောင်း CNDF က ထုတ်ပြန်ထားသည်။ ဖေဖော်ဝါရီလ ၂၁ ရက်နေ့ကလည်း ခွန်လီကျေးရွာအနီး တိုက်ပွဲတွင် စစ်ကော်မရှင် တပ်သား ၂ ဦး သေဆုံးကာ ၁ ဦးကို အရှင်ဖမ်းမိခဲ့သည့်အပြင် လက်နက်အချို့ပါ သိမ်းဆည်းရရှိခဲ့သည်။ စစ်ကော်မရှင်တပ်သည် မြေပြင်တွင် အထိနာနေသဖြင့် လေကြောင်းပစ်ကူကို အလွန်အကျွံအသုံးပြုနေပြီး ယနေ့ နံနက် ၁၁ နာရီခန့်တွင် ဖလမ်းမြို့နယ် အနောက်မြောက်ခြမ်းသို့ Yak-130 ဂျက်ဖိုက်တာနှစ်စီးဖြင့် ဗုံး ၃ လုံး ကြဲချခဲ့သည်။ ပြီးခဲ့သည့် ဖေဖော်ဝါရီ ၂၀ ရက်နေ့ ချင်းအမျိုးသားနေ့တွင်လည်း ဖလမ်းမြို့နယ်အတွင်းရှိ ကျေးရွာ ၆ ရွာထက် မနည်းကို အကြိမ်ရေ ၅၀ ကျော်အထိ လေကြောင်းမှ ဗုံးကြဲတိုက်ခိုက်ခဲ့ကြောင်း မြေပြင်သတင်းရင်းမြစ်များက ပြောသည်။ စစ်ကော်မရှင်တပ်သည် ချင်းမြောက်ပိုင်း နယ်မြေများ ပြန်လည်ရရှိရန် စစ်အင်အားထောင်ဂဏန်းဖြင့် စစ်ကြောင်းထိုးနေသည်မှာ ၄ လခန့် ရှိလာပြီဖြစ်သော်လည်း အထိနာနေသဖြင့် တပ်ဖွဲ့ဝင်များ လက်နက်ချခြင်း နှင့် ထွက်ပြေးခြင်းများ မကြာခဏ ဖြစ်ပွားနေသည်။     လက်ရှိတွင် ဖလမ်းမြို့နယ်အတွင်းရှိ ကျေးရွာပေါင်း ၁၀၀ ခန့်မှ ဒေသခံပြည်သူ ၂ သောင်းကျော်မှာ စစ်ကော်မရှင် တပ်၏ လေကြောင်းနှင့် လက်နက်ကြီးအန္တရာယ်ကြောင့် ဘေးလွတ်ရာ တောတောင်များအတွင်း ထွက်ပြေးတိမ်း ရှောင်နေကြရသည်။ အခြားတစ်ဖက်တွင်လည်း ဟားခါးမြို့၌ ကျင်းပသည့် စစ်ကော်မရှင်၏ ချင်းအမျိုးသားနေ့ အခမ်းအနားသို့ စစ်ကော်မရှင်အဖွဲ့ဝင် ဒုတိယဗိုလ်ချုပ်ကြီး ရာပြည့် ရောက်ရှိနေစဉ် (CDF-Hakha) က ဒရုန်းများဖြင့် ဝင်ရောက် တိုက်ခိုက်ခဲ့သည်။ ထိုသို့ တိုက်ခိုက်ခံရမှုကြောင့် ဒုတိယဗိုလ်ချုပ်ကြီး ရာပြည့်သည် အခမ်းအနားမှ ချက်ချင်းတိမ်းရှောင်သွားခဲ့ရပြီး၊ စစ်ကော်မရှင်ဘက်ကမူ အဆိုပါ ဒရုန်းများကို လက်ဦးမှုရယူ ဟန့်တားနိုင်ခဲ့ကြောင်း သတင်းထုတ်ပြန်ထား သော်လည်း တိုက်ခိုက်မှုဖြစ်စဉ် ရုပ်သံဖိုင်များ လူမှုကွန်ရက်တွင် ပျံ့နှံ့လျက်ရှိသည်။

ဖလမ်းမြို့နယ်တွင် စစ်ကော်မရှင် တပ်စခန်းကို ချင်းတော်လှန်ရေးတပ်များ ဝင်ရောက်တိုက်ခိုက်

Feb 23

NCA မဟုတ်သည့် နိုင်ငံရေး လမ်းကြောင်းသစ် လိုအပ်ကြောင်း တိုင်းရင်းသား ခေါင်းဆောင်များက ဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၂ ရက်။ NCA လမ်းကြောင်းဖြင့် မလုံလောက်တော့ဘဲ သက်ဆိုင်သူအားလုံး ပါဝင်နိုင်သည့် နိုင်ငံရေး လမ်းကြောင်းသစ် ပေါ်ပေါက်လာရန် တိုင်းရင်းသားခေါင်းဆောင်များ တောင်းဆိုလိုက်သည်။ မြန်မာ့နိုင်ငံရေး အကျပ်အတည်းကို လက်တွေ့ကျကျ ဖြေရှင်းနိုင်ရန်အတွက် သက်ဆိုင်သူအားလုံး ပါဝင်ခွင့်ရှိ သည့် နိုင်ငံရေး အခင်းအကျင်းသစ် တစ်ခု ပေါ်ပေါက်လာရန် လိုအပ်နေပြီဖြစ်ကြောင်း တိုင်းရင်းသား လက်နက် ကိုင် ခေါင်းဆောင်များနှင့် တော်လှန်ရေးအင်အားစုများက ထောက်ပြပြောဆို လိုက်ကြသည်။ စစ်ကော်မရှင်ဘက်က တိုင်းရင်းသားအဖွဲ့များကို NCA လမ်းကြောင်းအတိုင်း ပူးပေါင်းပါဝင်ရန် ဖိတ်ခေါ်နေ သော်လည်း တိုင်းရင်းသားခေါင်းဆောင်များကမူ လက်ရှိအခြေအနေမှာ NCA စာချုပ်ပါ အချက်အလက်များ နှင့် ကိုက်ညီမှု မရှိတော့ကြောင်း တုံ့ပြန်ခဲ့ကြသည်။ ပအိုဝ်းအမျိုးသား ဖက်ဒရယ်ကောင်စီ (PNFC) ဥက္ကဋ္ဌ ခွန်မြင့်ထွန်းက NCA ဖြစ်စဉ်သည် ယနေ့တွင် သမိုင်း မှတ်တမ်း တစ်ခု အဖြစ်သာ ကျန်ရစ်ခဲ့ပြီ ဖြစ်ကြောင်းနှင့် တော်လှန်ရေး အင်အားစုများ၏ ဘုံသဘောထားကို ယခုကဲ့သို့ ပြောသည်။ “ဆွေးနွေးမယ်ဆိုရင်လည်းပဲ စစ်တပ်က နိုင်ငံရေးကထွက်ရမယ်၊ ၂၀၀၈ အောက်က အကောင်အထည် ဖော်မှု တွေကို ကျနော်တို့ လက်မခံဘူး၊ Transitional Justice (အသွင်ကူးပြောင်းရေးကာလ တရားမျှတမှု) ကို လက်ခံမယ် အပါအဝင်ပေါ့နော်၊ အချက်ခြောက်ချက်ကို ကျနော်တို့ ဦးတည်ချက်နဲ့ သတ်မှတ်ထားတယ်။” အလားတူ NCA လမ်းကြောင်းပေါ်တွင် ရှိနေဆဲဖြစ်သည့် 7 EAO Alliance မှ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်ကလည်း နိုင်ငံ၏ ပကတိအခြေအနေအရ NCA ထက် ပိုမိုကောင်းမွန်ပြီး သက်ဆိုင်သူအားလုံး ပူးပေါင်းဆောင်ရွက်နိုင်မည့် လမ်းကြောင်းသစ်ကို မျှော်လင့်နေကြောင်း ဆိုသည်။ “ဒီပဋိပက္ခထဲမှာ ပါဝင်နေတဲ့ သက်ဆိုင်တဲ့ အင်အားစုတွေ အကုန်လုံး ပူးပေါင်းဆောင်ရွက်နိုင်တဲ့ လမ်းကြောင်း၊ အဲဒါမျိုး ပေါ်လာခဲ့တယ်ဆိုရင်လည်းပဲ ကျွန်တော်တို့ကတော့ ပူးပေါင်းလုပ်ဆောင်ဖို့ အဆင့်သင့် ရှိတယ် ဆိုတာ ကိုတော့ ကျနော်တို့ အမြဲတမ်း ၇ ဖွဲ့ထဲမှာ ပြောလေ့ပြောထ ရှိပါတယ်။ လက်ရှိ ပဋိပက္ခတွေကို ဖြေရှင်းနိုင်မယ့် ဒါထက်ကောင်းတဲ့ လမ်းကြောင်းအသစ်တွေ ပေါ်လာခဲ့တယ် ဆိုရင်လည်းပဲ ကျနော်တို့အနေနဲ့ ဒါ ပူးပေါင်း ဆောင်ရွက်ဖို့ ကျနော်တို့မှာ အဲ့လိုမျိုး စဉ်းစားချက်တွေ ရှိပါတယ်။” တစ်ဖက်တွင် လွတ်လပ်သော သုတေသနအဖွဲ့ဖြစ်သော မြန်မာ့စစ်ဘက်ရေးရာနှင့် လုံခြုံရေးဆိုင်ရာ လေ့လာ ရေးအဖွဲ့ MDSI က စစ်ကော်မရှင်သည် တော်လှန်ရေး အင်အားစု အားလုံးကို စုပေါင်းဆွေးနွေးမည့်အစား အာရက္ခတပ်တော် AA နှင့် ကချင်လွတ်လပ်ရေး တပ်မတော် KIA ကဲ့သို့သော အဖွဲ့ကြီးများကို သီးသန့်ခွဲထုတ်၍ အပစ်ရပ်ဆွေးနွေးသည့် (Selective Ceasefires) နည်းလမ်း ကို အသုံးပြုလာနိုင်ကြောင်း သတိပေးထားသည်။ သို့သော် ကချင်လွတ်လပ်ရေးအဖွဲ့ (KIO) ဒုတိယ ဥက္ကဋ္ဌ (၁) ဒုတိယဗိုလ်ချုပ်ကြီး ဂွန်မော်က ထိုကဲ့သို့ ခွဲထုတ် ဆွေးနွေးမည့် ပုံစံကို ပြတ်သားစွာ ငြင်းပယ်လိုက်ပြီး NUG အပါအဝင် အင်အားစုအားလုံး ပါဝင်ရမည်ဖြစ် ကြောင်း ၆၅ နှစ်မြောက် ကချင်တော်လှန်ရေးနေ့ အခမ်းအနားတွင် ပြောဆိုထားသည်။ “KIO တစ်ဖွဲ့တည်းနဲ့ စကားပြောလို့ မပြီးနိုင်ပါဘူး၊ တစ်ဖွဲ့ချင်းနဲ့ စကားပြောတဲ့ ပုံစံမျိုးကို KIO က လက်ခံမှာ မဟုတ်ဘူးဆိုတာ ကျနော်တို့ နိုင်ငံတကာနဲ့ ဒီအိမ်နီးချင်းနိုင်ငံများ အားလုံးကို ကျနော်တို့ ပြောပြထားပြီးသား ဖြစ်ပါတယ်။” စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကမူ (၇၉) နှစ်မြောက် ပြည်ထောင်စုနေ့ သဝဏ်လွှာတွင် ငြိမ်းချမ်းရေးတံခါး ဖွင့်လှစ်ထားကြောင်းနှင့် ရွေးကောက်ပွဲမှ ပေါ်ထွက်လာသော အစိုးရထံ တာဝန် လွှဲပြောင်း ပေးမည်ဖြစ်ကြောင်း ဆိုထားသည်။ သို့ရာတွင် တိုင်းရင်းသားခေါင်းဆောင်များကမူ စစ်ကော်မရှင်တပ်သည် နိုင်ငံရေးအရ ရင်ကြားစေ့ရန် ပြောဆို နေသော်လည်း မြေပြင်တွင် အရပ်သားများကို ပစ်မှတ်ထားသည့် လေကြောင်းဗုံးကြဲမှုများ ဆက်လက် ပြုလုပ်နေခြင်းကြောင့် အဆိုပါဖိတ်ခေါ်မှုများမှာ ဟန်ပြလုပ်ရပ်သာ ဖြစ်သည်ဟု ဆိုကြသည်။

NCA မဟုတ်သည့် နိုင်ငံရေး လမ်းကြောင်းသစ် လိုအပ်ကြောင်း တိုင်းရင်းသား ခေါင်းဆောင်များက ဆို

Feb 23

မြစ်ကြီးနား မြို့ပေါ်ရပ်ကွက်များ လက်နက်ကြီးကျည်များ ကျရောက်၊ အရပ်သား ၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၂ ရက်။ မြစ်ကြီးနား လေဆိပ်တိုက်ခိုက်မှု ဖြစ်ပွားပြီးနောက် မြို့ပေါ်ရပ်ကွက်များသို့ လက်နက်ကြီးကျည်များ ကျရောက်ကာ ကလေးငယ် အပါအဝင် အရပ်သားပြည်သူ ၃ ဦး ထိမှန်ဒဏ်ရာရခဲ့သည်။ ကချင်ပြည်၊ မြစ်ကြီးနားမြို့ရှိ အများပြည်သူသုံး လေဆိပ်အတွင်း ဒရုန်းဖြင့် တိုက်ခိုက်ခံရမှု ဖြစ်ပွားပြီးနောက် မြို့ပေါ်ရပ်ကွက်များ အတွင်းသို့ လက်နက်ကြီးကျည်များ ကျရောက်ပေါက်ကွဲခဲ့သဖြင့် ကလေးငယ်တစ်ဦး အပါအဝင် အရပ်သား ၃ ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။ ပြီးခဲ့သည့် ဖေဖော်ဝါရီလ ၂၀ ရက်နေ့၊ ည ၈ နာရီခွဲခန့်တွင် မြစ်ကြီးနားလေဆိပ်မှ မန္တလေးသို့ ထွက်ခွာရန် ပြင်ဆင်နေ သည့် မြန်မာအမျိုးသားလေကြောင်းလိုင်းပိုင် ATR-72-600 အမျိုးအစား ခရီးသည်တင် လေယာဉ် တစ်စင်း ဒရုန်းဖြင့် တိုက်ခိုက်ခံခဲ့ရခြင်း ဖြစ်သည်။ အဆိုပါ တိုက်ခိုက်မှုကြောင့် လေယာဉ်၏ ကိုယ်ထည်နှင့် အမြီးပိုင်းတို့တွင် ဗုံးစထိမှန်ပျက်စီးခဲ့ပြီး မြစ်ကြီးနား လေကြောင်းလိုင်းကို သုံးလခန့် ရပ်နားထားရမည်ဖြစ်ကြောင်း လေဆိပ်တာဝန်ရှိသူများက အတည်ပြုသည်။ အဆိုပါ ဖြစ်စဉ်ဖြစ်ပွားပြီးနောက် ဖေဖော်ဝါရီလ ၂၁ ရက်နေ့၊ နံနက် ၁ နာရီဝန်းကျင်တွင် မြောက်ပိုင်းတိုင်း စစ်ဌာနချုပ် (မပခ) ဘက်မှ လက်နက်ကြီးများ ပြန်လည်ပစ်ခတ်ခဲ့ရာ မြစ်ကြီးနားမြို့ပေါ်ရှိ စီတာပူနှင့် ရွှေညောင်ပင်ရပ်ကွက်များအတွင်းသို့ ကျရောက်ပေါက်ကွဲခဲ့ခြင်း ဖြစ်သည်။ စီတာပူရပ်ကွက် (၄) အတွင်း လက်နက်ကြီးကျည် ကျရောက်မှုနှင့်ပတ်သက်၍ ဒေသခံအမျိုးသားတစ်ဦးက မြေပြင်အခြေအနေကို ယခုကဲ့သို့ ပြောသည်။ “စီတာပူအပိုင်းကို လက်နက်ကြီးကျတာပါ။ သားအမိနှစ်ယောက်နဲ့ အမျိုးသားတစ်ဦး ထိခိုက်ဒဏ်ရာရတယ်လို့ ကြားတယ်။ အိမ်တွေလည်း ထိခိုက်ပျက်စီးတာလည်း ရှိတယ်။ မနေ့ညက လေဆိပ်မှာ ပေါက်ကွဲသံတွေ ကြားပြီးနောက်ပိုင်း မပခ ဘက်ကနေ လက်နက်ကြီးတွေ ပစ်ခတ်သံတွေ ဆက်တိုက်ကြားခဲ့နေရတယ်။” စစ်ကော်မရှင် ပြန်ကြားရေးဝန်ကြီးဌာနကမူ အဆိုပါ ဒရုန်းတိုက်ခိုက်မှုကို ကချင်လွတ်လပ်ရေး တပ်မတော် KIA နှင့် PDF ပူးပေါင်းတပ်များက အသေခံ ဒရုန်းဟုခေါ်သော FPV Suicide Drone များအသုံးပြု၍ လုပ်ဆောင်ခဲ့ခြင်းဖြစ်ကြောင်း စွပ်စွဲ ထုတ်ပြန်ထားသည်။ သို့သော်လည်း KIO ပြန်ကြားရေးတာဝန်ခံ ဗိုလ်မှူးကြီးနော်ဘူက KIA အနေဖြင့် ရန်သူမရှိသည့်နေရာနှင့် စစ်ရေး ပစ်မှတ်မဟုတ်သော အရပ်သားနေရာများကို ပစ်ခတ်လေ့မရှိကြောင်း ငြင်းဆိုထားသည်။ ကချင်နိုင်ငံရေး လေ့လာသုံးသပ်သူများကမူ ယခုဖြစ်စဉ်သည် စစ်ကော်မရှင်က ၎င်းတို့ဖော်ဆောင်လိုသည့် မြစ်ဆုံစီမံကိန်းအတွက် ပြည်သူလူထု၏ အားပေးထောက်ခံမှုရရှိရန်နှင့် KIA/PDF များအပေါ် နိုင်ငံတကာ အမြင်တွင် အကြမ်းဖက်အဖွဲ့အစည်းများအဖြစ် ထင်ယောင်ထင်မှားဖြစ်စေရန် လုပ်ဇာတ်ဖန်တီးခြင်း ဖြစ်နိုင် ကြောင်း သုံးသပ်ကြသည်။ ၎င်းတို့၏ အဆိုအရ KIA ပူးပေါင်းတပ်များအနေဖြင့် တိုက်ခိုက်မည်ဆိုပါက အရပ်သားလေဆိပ်ထက် စစ်ရေး ပစ်မှတ်များကိုသာ ဦးတည်လိမ့်မည်ဟု ဆိုသည်။ မြစ်ကြီးနားမြို့ပေါ်တွင် လက်နက်ကြီးကျည် ကျရောက်ပေါက်ကွဲမှုမှာ စစ်အာဏာသိမ်းပြီး ၅ နှစ်တာအတွင်း ယခု အကြိမ်သည် ပထမဆုံးဖြစ်ပြီး၊ လက်ရှိတွင် ဝိုင်းမော်မြို့နယ် အတွင်း၌လည်း စစ်ကော်မရှင်တပ်နှင့် KIA ပူးပေါင်းတပ်များအကြား တစ်နှစ်ကျော်ကြာ တိုက်ပွဲများ ဆက်လက်ပြင်းထန်နေဆဲဖြစ်သည်။

မြစ်ကြီးနား မြို့ပေါ်ရပ်ကွက်များ လက်နက်ကြီးကျည်များ ကျရောက်၊ အရပ်သား ၃ ဦး ဒဏ်ရာရ

Feb 22

အကျဉ်းထောင်များကို ငရဲခန်းများ အဖြစ် ပြောင်းလဲ အသုံးချနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၁ ရက်။ မြန်မာနိုင်ငံတွင် စစ်အာဏာသိမ်းပြီးနောက်ပိုင်း အကျဉ်းထောင်များသည် ပြည်သူကို နှိပ်ကွပ်သည့် ဖိနှိပ်ရေးယန္တရားနှင့် ‘လူ့ငရဲခန်း’ များအဖြစ်သို့ ပြောင်းလဲအသုံးချခံနေရကြောင်း နိုင်ငံရေးအကျဉ်းသားအရေး လှုပ်ရှားနေသည့် အဖွဲ့အစည်းများက ထောက်ပြဝေဖန်လိုက်သည်။ စစ်အာဏာသိမ်းပြီး ၅ နှစ်တာကာလအတွင်း အကျဉ်းထောင်များ၏ အခြေအနေမှာ လူ့ဂုဏ်သိက္ခာကို အောက် ဆုံးအဆင့်အထိ ချိုးဖောက်နေသည့် အခြေအနေဖြစ်ကြောင်း နိုင်ငံရေးအကျဉ်းသားများကွန်ယက် (PPNM) ဦးဆောင်ကော်မတီဝင် မရောင်နီလင်းက ယခုကဲ့သို့ ဆိုသည်။ “ဥပမာအနေနဲ့ ပြောရမယ်ဆိုရင် လူဦးရေ များလာတယ်ပေါ့နော်။ အဲ့ဒါကြောင့်မို့လို့ အကျပ်အတည်း နေထိုင်ရ တာရှိတယ်။ ဆေးဝါးကုသခွင့်တွေမှာ ကန့်သတ်ခံထားရတာတွေ ရှိတယ်။ တချို့နိုင်ငံရေး အကျဉ်းသားတွေမှာ ဆိုရင် မိသားစုတွေ့ဆုံခွင့် ကန့်သတ်ခံထားရတာရှိတယ်။ ပြီးတော့ တိုက်ပိတ်ထားတဲ့ အခန်းတွေ လက်ရှိအချိန် ထိ တိုက်ပိတ်ပြီးတော့ ခေါ်ထုတ်ရိုက်နှက်တဲ့ ဖြစ်စဉ်တွေက ရှိနေပါတယ်။ ဒါကြောင့်မို့လို့ အကျဉ်းထောင် တွေကို လူ့ငရဲခန်းလို့ ခေါ်ဝေါ်ရလောက်အောင်ကို လူ့ဂုဏ်သိက္ခာကို ချိုးဖောက်နေတဲ့ အခြေအနေ ရှိနေပါ တယ်။” Myanmar Prison Witness (မြန်မာအကျဉ်းထောင် သက်သေ အဖွဲ့) ၏ ဖေဖော်ဝါရီလ ၁၆ ရက်နေ့ ထုတ်ပြန်ချက်အရ စစ်အာဏာသိမ်းထားသည့် ၅ နှစ်အတွင်း ကြီးမားသည့် ထောင်တွင်းဆန္ဒပြမှု ၁၈ ခုထက်မနည်း ဖြစ်ပွားခဲ့ပြီး ဖြစ်စဉ်များအတွင်း နိုင်ငံရေး အကျဉ်းသား အပါအဝင် အကျဉ်းသား အနည်းဆုံး ၁၆ ဦး အသက်ဆုံးရှုံးခဲ့ရသည်။ ထို့ပြင် အကျဉ်းသား ၄၀၀ ကျော်မှာလည်း ရိုက်နှက်နှိပ်စက်ခံရခြင်းနှင့် တိုက်ပိတ်ခံရခြင်းတို့ကို ကြုံတွေ့ခဲ့ရ သည်ဟု ဆိုသည်။ ထိုကဲ့သို့သော ဖိနှိပ်မှုများကြားမှပင် နိုင်ကျဉ်းများသည် ထောင်တွင်း မတရားမှုများကို ရပ်တန့်ရန်၊ အထိမ်း အမှတ်နေ့ လှုပ်ရှားမှုများတွင် ပူးပေါင်းပါဝင်ရန်နှင့် ပြည်သူကို သတ်ဖြတ်နေမှုများအပေါ် ကန့်ကွက်ရန်အတွက် အသက်နှင့်ရင်း၍ တောင်းဆိုမှုများကို ဆက်တိုက်လုပ်ဆောင်ခဲ့ကြသည်။ မရောင်နီလင်းက နိုင်ကျဉ်းများ၏ စိတ်ဓာတ်နှင့်ပတ်သက်၍ ယခုကဲ့သို့ ဆက်ပြောသည်။ “လွတ်လပ်ချင်တဲ့ ဆန္ဒ၊ အချုပ်အနှောင်မှာ မနေချင်တဲ့ဆန္ဒ ပြသတာ ဖြစ်တယ်။ အကျဉ်းထောင်တွေဆိုတာက တိတ်ဆိတ်စွာ ထိန်းချုပ် ထားတဲ့ နေရာတစ်ခု မဟုတ်ဘူး ပေါ့နော်။ အသံတွေ ထွက်လို့ ရတယ် ဆိုတဲ့ အကြောင်းကို ပြသတာ ဖြစ်တယ်။ အပြင်ဘက်လူထု ဒီထောင်ထဲမှာ မဟုတ်တဲ့ ပြည်သူလူထုတွေနဲ့ တစ်သားတည်း ရှိနေတယ်ဆိုတဲ့ စိတ်ဓာတ် ချိတ် ဆက်မှုတွေလည်း ရှိနေတယ်ဆိုတဲ့ အကြောင်း ပြသတာ ဖြစ်တယ်။ ပြီးတော့ အာဏာရှင်စနစ်ရဲ့ တရားဝင်မှုကို ဖော်ထုတ်တာမျိုးလည်း ဖြစ်ပါတယ်။” လက်ရှိတွင် အကျဉ်းဦးစီးဝန်ထမ်းများသည် အခြားရာဇဝတ် အကျဉ်းသားများကို ‘တန်းစီး’ အဖြစ် လက်ကိုင် တုတ် ခန့်အပ်ကာ နိုင်ကျဉ်းများကို စိတ်ပိုင်း၊ ရုပ်ပိုင်းဆိုင်ရာ ညှဉ်းပန်းနှိပ်စက်ခြင်း၊ အတင်းအဓမ္မ အလုပ်ခိုင်းစေ ခြင်းနှင့် ဆေးကုသခွင့် ပိတ်ပင်ခြင်းများကို အပြည်ပြည်ဆိုင်ရာ လူ့အခွင့်အရေး စံချိန်စံညွှန်းများနှင့် ဆန့်ကျင်ကာ ကျူးလွန်နေကြောင်း PPNM က ဆိုသည်။ PPNM အနေဖြင့် နိုင်ငံရေးအကျဉ်းသားများကို အမြန်ဆုံးပြန်လွှတ်ပေးရန်၊ ရိုက်နှက်နှိပ်စက်မှုများ ရပ်တန့်ရန်နှင့် လွတ်လပ်သည့် စောင့်ကြည့်စစ်ဆေးခွင့်များ ပေးရန် တောင်းဆိုထားသည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ အချက်အလက်များအရ စစ်အာဏာသိမ်း ပြီးနောက် မတရားဖမ်းဆီးခံရသူ စုစုပေါင်း ၃၀,၄၉၇ ဦးရှိပြီး ၎င်းတို့အနက် ၂၂,၇၈၃ ဦးမှာ အကျဉ်းထောင် အသီးသီးတွင် ဆက်လက်ချုပ်နှောင်ခံထားရဆဲဖြစ်သည်။ ဓါတ်ပုံ - PPNM #ငရဲခန်း #PPNM #အကျဉ်းထောင် #နိုင်ငံရေးအကျဉ်းသား

အကျဉ်းထောင်များကို ငရဲခန်းများ အဖြစ် ပြောင်းလဲ အသုံးချနေ

« Prev 1 2 3 4 5 6 … 19 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ