NMG Doh – Page 11 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 20

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၉ ရက် ရခိုင်ပြည်၊ စစ်တွေ-ပုဏ္ဏားကျွန်းအစပ်တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ ပြင်းထန်လျက်ရှိပြီး AA က စစ်အုပ်စုတပ်၏ ကာကင်းစခန်းအချို့ကို ထိန်းချုပ်သိမ်းပိုက်ထားကြောင်း မြေပြင် စစ်ရေးသတင်းရင်းမြစ်များက ပြောသည်။ စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ စက်တင်ဘာလ ၄ ရက်နေ့မှစ၍ ထိုးစစ်ဆင်တိုက်ခိုက်လာ ခြင်း ဖြစ်ပြီး တိုက်ပွဲဖြစ်ပွားနေသည်မှာ ၁၆ ရက်ခန့်ရှိပြီဖြစ်သည်။ အဆိုပါ တိုက်ပွဲများအတွင်း နှစ်ဖက်အကျအဆုံးများရှိနေပြီး စစ်အုပ်စုတပ်၏ စပါးထား၊ ဆားကုန်းပို့၊ ခမောင်း တော ကာကင်းစခန်းများနှင့် ရွှေမင်းဂံရေတပ်စခန်း၏ ကာကင်းစခန်းဖြစ်သည့် အမြင့်ကျွန်း တံတားဂိတ်များကို AA က ထိန်းချုပ်သိမ်းပိုက်ထားခြင်းဖြစ်သည်။ ဒေသခံစစ်ရေးသတင်းရင်းမြစ် အမျိုးသားတစ်ဦးက “ပထမ ၁၄ ရက်နေ့ကတည်းက စစ်တပ် စစ်ကြောင်းတွေ စစ်တွေ - ပုဏ္ဏားကျွန်းအစပ်ကို ထိုးလာတော့ စပါးထား၊ ဆားကုန်းပို့၊ ခမောင်းတော ကာကင်းစခန်းတွေကို စစ်တပ်က ထိန်းလိုက်တယ်၊ ရက်ကြာရှည်လာတော့ အေအေရဲ့ တန်ပြန်ထိုးစစ်ကို မနိုင်တော့လို့ အကျအဆုံးနဲ့ ပြန်ဆုတ်တယ်၊ လက်ရှိ ပင်လယ်ရေပြင်တွေမှာလည်း စစ်တပ်အလောင်းတွေ များတယ်” ဟု ပြောသည်။ လက်ရှိတွင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်ရှိ မင်းချောင်းတံတား၊ ဝါဘို၊ အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတောနှင့် ကွမ်းတောင် ကျေးရွာတို့တွင် စစ်အင်အား ရာချီ ဖြန့်ကျက်ထားဆဲ ဖြစ်သည်။ ဒေသခံတစ်ဦးက “လက်ရှိမင်းချောင်းတံတား၊ ဝါဘို အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတော၊ ကွမ်းတောင် ဘက်တွေ မှာ စစ်တပ် ဘက်က စစ်အင်အားတိုးပြီးဖြန့်တယ်။ ဒါပေမယ့် အေအေသတ်ကွင်း ထဲဝင်သလိုဖြစ်နေတယ်။ ရခိုင် ကို အပြင်ဘက်က စစ်ကြောင်းထိုးမရတော့ အတွင်းထဲက သူတို့ထိန်းချုပ်တဲ့ စစ်တွေကတဆင့် အင်အားဖြည့်ပြီး စစ်ကြောင်းထိုးတာ အေအေကလည်းတော်တော်ခုခံယူနေရတယ်” ဟု ပြောသည်။ ထို့ပြင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ လေယာဉ်အုပ်စုလိုက်ဖြင့် လာရောက်ဗုံးကြဲ တိုက်ခိုက် နေသည့် အပြင် လက်နက်ကြီးများ၊ ဒရုန်းများဖြင့်လည်း နေ့စဉ် ပစ်ခတ်လျက်ရှိရာ AA ဘက်ကလည်း လက်နက်ကြီးများဖြင့် ပြန်လည်ပစ်ခတ်နေသဖြင့် တိုက်ပွဲများ အပြင်းအထန် ဖြစ်ပွားနေသည်။ လက်ရှိစစ်ရေး အနေအထားအရ AA သည် ပုဏ္ဏားကျွန်းဘက်မှတစ်ဆင့် စစ်တွေမြို့အနီးသို့ တန်ပြန်ထိုးစစ်ဖြင့် ရှေ့တိုးလာလျက်ရှိသည်။ အလားတူ စက်တင်ဘာလ ၁၈ ရက် နံနက်ပိုင်းမှ နေ့လယ်ပိုင်းအထိ စစ်တွေ၊ ပုဏ္ဏားကျွန်း၊ ဝီရဌာနီ (ပေါက်တော) နှင့် သံတွဲမြို့များကို စစ်အုပ်စုတပ်က ဂျက်ဖိုက်တာ လေယာဉ်များ အုပ်စုလိုက်အသုံးပြု၍ လေကြောင်းမှ တိုက်ခိုက်ခဲ့သည်။ စစ်အုပ်စုတပ်သည် လေကြောင်းနှင့် ရေကြောင်း ပစ်ကူအပြင် ရွှေမင်းဂံရေတပ်စခန်း၊ အမြင့်ကျွန်းရှိ လက်နက် ကြီးအထိုင်စခန်း၊ စစ်တွေပါဒလိတ်တပ်ရင်း၊ အမြောက်တပ်၊ ခလရ (၂၀)၊ ခလရ (၂၃၂)၊ ခလရ (၂၇၀)၊ ခမရ (၃၄၄) စသည့် စစ်တွေ-ပုဏ္ဏားကျွန်း ကားလမ်းပေါ်တွင် အခြေစိုက်ထားသည့် တပ်ရင်းများမှလည်း လက်နက်ကြီးများဖြင့် တိုက်ပွဲဖြစ်ပွားရာနေရာများသို့ ဆက်continuous ပစ်ကူပေး တိုက်ခိုက်လျက်ရှိသည်။ ဓာတ်ပုံ - Crd #AA #စစ်တွေ #ပုဏ္ဏားကျွန်း

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ

Sep 18

ရခိုင်တွင် AA ထိန်းချုပ်ထားသော မြို့နယ် သုံးခုကို စစ်တပ် လေကြောင်းမှ ဗုံးကြဲ၊ အရပ်သားတစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၈ ရက်။ ရခိုင်ပြည်အတွင်း အာရက္ခတပ်တော် (AA) ထိန်းချုပ်ထားသည့် မြို့နယ်များကို စစ်အုပ်စုတပ်က ဆက်တိုက် လေကြောင်းတိုက်ခိုက်မှုများ ပြုလုပ်လျက်ရှိရာ သံတွဲ၊ ပုဏ္ဏားကျွန်းနှင့် ရှေးဟောင်းယဉ်ကျေးမှုနယ်မြေ မြောက်ဦးမြို့တို့ပါ ဗုံးကြဲခံရပြီး အရပ်သားတစ်ဦး ဒဏ်ရာပြင်းထန်စွာ ရရှိခဲ့ကြောင်း ဒေသခံများက ပြောသည်။ စက်တင်ဘာလ ၁၈ ရက်နေ့၊ နံနက် ၁၁ နာရီကျော်တွင် သံတွဲမြို့နယ်၊ သစ်ငုတ္တိုကျေးရွာနှင့် ဆိုးပုံကျေးရွာ အနီး ဝန်းကျင်သို့ စစ်အုပ်စုတပ်က ဂျက်ဖိုက်တာဖြင့် ဗုံး ၁၀ လုံးထက်မနည်း ကြဲချတိုက်ခိုက်ခဲ့သဖြင့် ဘုန်းတော်ကြီး ကျောင်းအနောက်ဘက် လယ်ကွင်းပြင်နှင့် တောင်တန်းများတွင် ကျရောက်ပေါက်ကွဲခဲ့သည်။ သံတွဲဒေသခံတစ်ဦးက “ဒီနေ့ ဗုံးကြဲသွားတာက သံတွဲ-ဂွ ကားလမ်းမပေါ်က သစ်ငုတ္တိုရွာနားတင် ဗုံးတွေ လာ ကြဲသွားတာ။ ရွာဘုန်းကြီးကျောင်း နောက်ဘက် လယ်ကွင်းတွေနဲ့ ဆိုးပုံရွာဘက်က တောင်တန်းတွေပေါ်မှာ ပေါက်ကွဲသံတွေ အကျယ်ကြီး ကြားရတယ်။ ဂျက်ဖိုက်တာနဲ့ ဗုံး ၁၀ လုံးမက ကြဲသွားတာ။ ထိခိုက်မှု အခြေ အနေတော့ လောလောဆယ် စုံစမ်းနေတုန်းပဲ” ဟု ပြောသည်။ သံတွဲမြို့နယ်တွင် စစ်အုပ်စုတပ်က ပြီးခဲ့သည့် လများအတွင်းကပင် လေကြောင်းမှ ပစ်မှတ်ထား ဗုံးကြဲခဲ့သည့် အပြင် ယခုအခါ ကားလမ်းမ အနီးဝန်းကျင်ရှိ ကျေးရွာများအထိ တိုက်ခိုက်မှုကို တိုးမြှင့်လုပ်ဆောင်လာခြင်း ဖြစ် သည်။ ထို့ပြင် ရှေးဟောင်းယဉ်ကျေးမှုနယ်မြေ ဖြစ်သည့် မြောက်ဦးမြို့ပေါ်သို့လည်း စက်တင်ဘာလ ၁၇ ရက်နေ့၊ နေ့လည်ပိုင်းတွင် စစ်အုပ်စုတပ်က တိုက်လေယာဉ် ၃ စီးဖြင့် ပတ်လည်ဗုံးကြဲခဲ့သဖြင့် မြို့ခံများ ဘေးလွတ်ရာ ဗုံးခိုကျင်းများအတွင်း ပုန်းခိုခဲ့ကြရသည်။ မြောက်ဦးမြို့ခံတစ်ဦးက “မွန်းတည့်ခါနီးမှာ တိုက်လေယာဉ် ၃ စီးနီးပါး မြို့ပေါ်ကို ဝဲပြီး ဆက်တိုက် ဗုံးကြဲတာ။ ဗုံးသံတွေက ဆက်တိုက်ပဲ။ ၄ လုံးလောက် တခါတည်းကြဲသွားတာ။ ပြည်သူတွေလည်း ကြောက်လန့်ပြီး ဗုံးခိုကျင်းတွေထဲမှာ ပုန်းနေကြရတယ်။ အသံတွေ တိတ်သွားတော့မှ ပြန်ထွက်ပေါ့။ အခြေအနေကတော့ အမြဲသတိထားကြည့်ပြီး နေရတာ” ဟု ပြောသည်။ အလားတူ စက်တင်ဘာလ ၁၇ ရက် နံနက်ပိုင်းနှင့် ညပိုင်းတို့တွင် ပုဏ္ဏားကျွန်းမြို့နယ် ကွမ်းတောင်ကျေးရွာ၊ မင်းချောင်းတံတားအနီးနှင့် ဖက်ကျကျေးရွာတို့ကို စစ်အုပ်စုတပ်က ဂျက်ဖိုက်တာ၊ Y-12 လေယာဉ်များ အသုံးပြု၍ ၁၀ ကြိမ်ထက်မနည်း ဗုံးကြဲသည့်အပြင် စက်သေနတ်များဖြင့်ပါ ပစ်ခတ်ခဲ့သဖြင့် ဖက်ကျကျေးရွာမှ ရွာသားတစ်ဦး ဒဏ်ရာပြင်းထန်စွာ ရရှိခဲ့သည်။ ပုဏ္ဏားကျွန်း ဒေသခံတစ်ဦးက “စစ်တွေဘက်ကနေ စစ်ကြောင်းထိုးဖို့ ကြိုးစားပေမဲ့ AA က ထိရောက်စွာ ပိတ် ဆို့ထားတော့ စစ်အုပ်စုတပ်က ရှေ့မတိုးနိုင်ဘူး။ အဲဒါကြောင့် လေကြောင်းနဲ့ လက်နက်ကြီးကိုပဲ သုံးပြီး ရွာတွေ ကို ရမ်းသန်းပစ်နေတာ။ စက်တင်ဘာ ၁၇ ရက်ရော၊ ၁၆ ရက်နေ့ရော ကြဲတယ်။ ကွမ်းတောင်နဲ့ မင်းချောင်း တံတားဘက်ကို တစ်နေကုန် ဗုံးကြဲရုံမက စက်သေနတ်တွေနဲ့ပါ လှမ်းပစ်နေတာ။ ဖက်ကျရွာက ရွာသား တစ်ယောက် ဒဏ်ရာရသွားတယ်” ဟု ပြောသည်။ စစ်တွေ-ပုဏ္ဏားကျွန်း အစပ်တွင် စက်တင်ဘာလ ၄ ရက်နေ့မှစ၍ တိုက်ပွဲများ ပြင်းထန်နေပြီး စစ်အုပ်စုတပ်သည် ပုဏ္ဏားကျွန်းဘက်သို့ စစ်ကြောင်းထိုးရန် ကြိုးပမ်းသော်လည်း AA ၏ ပိတ်ဆို့ခုခံမှုကြောင့် ရှေ့ဆက်မတိုးနိုင်ဘဲ လေကြောင်းနှင့် လက်နက်ကြီးကိုသာ အဓိက အားပြု ပစ်ခတ်နေခြင်းဖြစ်သည်။ လက်ရှိတွင် အဆိုပါ လေကြောင်းတိုက်ခိုက်မှုများကြောင့် ထိခိုက်ပျက်စီးမှု အနောက်ဆက်တွဲ အခြေအနေ အသေးစိတ်ကို ဆက်လက် စုံစမ်းလျက်ရှိသည်။ #AA #Rakhine

ရခိုင်တွင် AA ထိန်းချုပ်ထားသော မြို့နယ် သုံးခုကို စစ်တပ် လေကြောင်းမှ ဗုံးကြဲ၊ အရပ်သားတစ်ဦး ဒဏ်ရာရ

Sep 18

ညောင်ဦးမြို့နယ် အတွင်း ကျေးရွာတစ်ရွာကို စစ်တပ် ၃ ကြိမ်မြောက် မီးရှို့၊ နေအိမ် ၂၀၀ ကျော်ပြာကျ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၈ ရက်။ မန္တလေးတိုင်း၊ ညောင်ဦးမြို့နယ်အတွင်း ရွာစဉ်ပတ်၍ စစ်ကြောင်းထိုးလာသည့် စစ်အုပ်စုတပ်က ကျောက်ပြင် ကန်ကျေးရွာကို အကြောင်းမဲ့ မီးရှို့ဖျက်ဆီးခဲ့သဖြင့် နေအိမ် ၂၀၀ ကျော် မီးလောင်ဆုံးရှုံးခဲ့ကြောင်း ဒေသခံများက ပြောသည်။ ကြအိုကျေးရွာဘက်မှ ဖောကားတစ်စီး၊ စစ်ကားတစ်စီးနှင့် တင့်ကားတစ်စီးတို့ဖြင့် အင်အား ၁၀၀ ကျော်ပါ စစ်တပ် စစ်ကြောင်း ကျောက်ပြင်ကန်ကျေးရွာသို့ စက်တင်ဘာလ ၁၄ ရက် နံနက် ၈ နာရီခန့်တွင် ဝင်ရောက်လာ သဖြင့် ရွာခံပြည်သူများ ဘေးလွတ်ရာသို့ ထွက်ပြေးတိမ်းရှောင်ခဲ့ကြရသည်။ ထို့နောက် အင်အား ၂၀၀ ခန့်အထိ တိုးမြှင့်ရောက်ရှိလာသည့် အဆိုပါ စစ်ကြောင်းသည် မောင်းပြန်သေနတ်များ ဖြင့် အကြောင်းမဲ့ အလုအယက် ပစ်ခတ်ကာ နေအိမ်များကို မီးစတင်ရှို့ခဲ့ခြင်း ဖြစ်သည်။ မြောင်ရွာမှ အသက် ၅၀ ခန့်ရှိ အမျိုးသားတစ်ဦးက “ဘာအကြောင်းမှမရှိပဲနဲ့ ရှို့ချင်လို့ကို ရှို့တာလို့ပြောရမှာပဲ။ မီးတောက်တွေ မီးလုံးတွေ တွေ့နေရတယ်။ သေနတ်သံတွေလည်း ကြားနေရတော့ တိုက်ပွဲဖြစ်နေတယ်လို့ ထင် တာ မဟုတ်ဘူး။ သူတို့ဟာသူတို့ ပစ်နေကြတာ” ဟု ပြောသည်။ ကျောက်ပြင်ကန်ကျေးရွာမှ စစ်ဘေးရှောင် ပြည်သူများသည် ယာတောကြီး၊ ပျဉ်းချောင်း၊ သဖျင်းကန်၊ မကျီး တန်း၊ ကျောက်ကန်၊ ကန်နီပေါက်၊ ရွာလေးနှင့် ပျော်ဘွယ် ကျေးရွာများသို့ ပတ်ချာလှည့် စစ်ဘေးရှောင်ခဲ့ကြရပြီး ညနေ ၃ နာရီကျော်တွင် ရွာဘက်မှ မီးခိုးလုံးများနှင့်အတူ သေနတ်သံများကို အဆက်မပြတ် ကြားခဲ့ရကြောင်း ဆိုသည်။ အသက် ၅၀ ကျော် အမျိုးသမီးတစ်ဦးကလည်း “တနေကုန်ကို သူတို့မင်း သူတို့ချင်း စိတ်တိုင်းကျ လုပ်ချင် တိုင်းကို လုပ်သွားကြတာ။ စောင်တွေ မွေ့ယာတွေ ခေါင်းအုံးတွေနဲ့ မီးမွှေးပြီး အိမ်ကို မီးရှို့သွားကြတာ တော် တော် လူစိတ်မရှိတဲ့ဟာတွေ” ဟု ပြောသည်။ စက်တင်ဘာလ ၁၅ ရက်နေ့၊ နံနက်ပိုင်း ၁၁ နာရီ အချိန်ခန့်တွင် စစ်အုပ်စုတပ် စစ်ကြောင်း ပြန်လည် ထွက်ခွာ သွားသဖြင့် ရွာသားအချို့ ပြန်လည်ဝင်ရောက်ရန် ကြိုးပမ်းခဲ့သော်လည်း မီးလောင်နံ့ အနံ့ဆိုးများကြောင့် ရွာပြင် သို့ ပြန်ထွက်ခဲ့ကြရသည်။ ထို့နောက် စက်တင်ဘာလ ၁၆ ရက်နေ့တွင် ကျေးရွာအတွင်းသို့ သေချာစွာ ပြန်လည်ဝင်ရောက် စစ်ဆေးနိုင်ခဲ့ပြီး နေအိမ် ၂၀၀ ကျော် မီးလောင်ပြာကျခဲ့ကြောင်း အတည်ပြုနိုင်ခဲ့ခြင်း ဖြစ်သည်။ အိမ်ခြေ ၄၀၀ ခန့်ရှိသည့် ကျောက်ပြင်ကန်ကျေးရွာသည် စစ်အုပ်စုတပ်၏ မီးရှို့ဖျက်ဆီးမှုကို ၃ ကြိမ်မြောက် ခံခဲ့ရခြင်းဖြစ်ပြီး လက်ရှိတွင် ရွာတစ်ရွာလုံး၌ နေအိမ် ၁၀၀ ခန့်ပင် ကျန်ရှိတော့မည် မဟုတ်ကြောင်း ရွာသား များက ပြောသည်။ #ညောင်ဦးမြို့နယ်

ညောင်ဦးမြို့နယ် အတွင်း ကျေးရွာတစ်ရွာကို စစ်တပ် ၃ ကြိမ်မြောက် မီးရှို့၊ နေအိမ် ၂၀၀ ကျော်ပြာကျ

Sep 18

AI ဉာဏ်ရည်တု နည်းပညာ ထိန်းချုပ်ရေး နည်းပညာထိပ်သီးများ သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၈ ရက်။ ဉာဏ်ရည်တု (AI) နည်းပညာများ လျှင်မြန်စွာ တိုးတက်လာမှုအပေါ် မိုက်ခရိုဆော့ဖ် (Microsoft) ကုမ္ပဏီ၏ AI ဌာန အကြီးအကဲ မူစတာဖာ ဆူလေမန် (Mustafa Suleyman) နှင့် ဘီလျံနာ အီလွန်မာ့စ် (Elon Musk) အပါအဝင် ကမ္ဘာ့နည်းပညာ ထိပ်သီးများက အန္တရာယ်ရှိကြောင်း သတိပေး တောင်းဆိုလိုက်ကြသည်။ မိုက်ခရိုဆော့ဖ် AI အကြီးအကဲ မူစတာဖာ ဆူလေမန်က AI နယ်ပယ်တွင် လုပ်ကိုင်နေကြသူ အားလုံးအနေဖြင့် လူသားများ ရာနှုန်းပြည့် ထိန်းချုပ်နိုင်သည့် AI စနစ်များကိုသာ ဖန်တီးမည်ဆိုသည့် ကတိကဝတ်ကို လူသိရှင်ကြား ပြုလုပ်ကြရန် ဘီဘီစီ သတင်းဌာနနှင့် တွေ့ဆုံမေးမြန်းခန်းတွင် တောင်းဆိုခဲ့သည်။ နည်းပညာ ကုမ္ပဏီကြီးများအနေဖြင့် လူသားများထက် ပိုမိုထက်မြက်လာသည့် AI စနစ်များကို လူသားတို့၏ လွှမ်းမိုးထိန်းချုပ်မှုအောက်တွင် အမြဲတမ်း ကန့်သတ်ထားနိုင်ရန် မဖြစ်မနေ လိုအပ်ကြောင်း ထောက်ပြထားသည်။ အလားတူ ဘီလျံနာ အီလွန်မာ့စ်ကလည်း AI နည်းပညာသည် နျူကလီးယား လက်နက်များထက်ပင် ပိုမို အန္တရာယ်ကြီးမားကြောင်း သတိပေးထားသည်။ စနစ်တကျ ထိန်းချုပ်ထားခြင်း မရှိပါက လူသားတို့၏ ပါဝင်စွက်ဖက်မှု မပါဘဲ AI နည်းပညာက နျူကလီးယား စနစ်များကို ထိန်းချုပ် ပစ်ခတ်ခြင်း သို့မဟုတ် ကမ္ဘာ့စစ်ပွဲများ ဖြစ်ပွားအောင် ဖန်တီးလာနိုင်သည့် အန္တရာယ် ရှိကြောင်း သတိပေးခဲ့သည်။ နည်းပညာ ထိပ်သီးများ၏ ထုတ်ဖော်ပြောဆိုချက်များအရ ခေတ်မီဆန်းသစ်လာသည့် AI စနစ်များကို ကမ္ဘာလုံးဆိုင်ရာ ဘေးကင်းရေး စည်းမျဉ်းများ၊ ထိန်းချုပ်မှု မူဘောင်များဖြင့် စနစ်တကျ ထိန်းကျောင်းခြင်း မရှိပါက လူသားမျိုးနွယ်အတွက် ကြီးမားသည့် ခြိမ်းခြောက်မှု ဖြစ်လာနိုင်ကြောင်း မီးမှောင်းထိုးပြနေသည်။ #AI

AI ဉာဏ်ရည်တု နည်းပညာ ထိန်းချုပ်ရေး နည်းပညာထိပ်သီးများ သတိပေး

Sep 18

ကုလသမဂ္ဂ အထွေထွေညီလာခံလာမည့် အပတ်တွင် ကျင်းပမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာ ၁၇ ရက်။ အမေရိကန်ပြည်ထောင်စု၊ နယူးယောက်မြို့ရှိ ကုလသမဂ္ဂ ဌာနချုပ်၌ (၈၁) ကြိမ်မြောက် ကုလသမဂ္ဂ အထွေထွေ ညီလာခံကြီးကို လာမည့်ရက်သတ္တပတ်အတွင်း စတင်ကျင်းပမည်ဖြစ်ပြီး ကမ္ဘာ့ခေါင်းဆောင်များ တက်ရောက် ဆွေးနွေးကြမည် ဖြစ်သည်။ ယခုနှစ် ညီလာခံကို "ယုံကြည်မှု ပြန်လည်တည်ဆောက်ရေးနှင့် အပြောင်းအလဲများကို စီမံခန့်ခွဲရေး" ဆိုသည့် ဆောင်ပုဒ်ဖြင့် ကျင်းပမည်ဖြစ်သည်။ ညီလာခံ ကာလအတွင်း မြန်မာ့အရေးနှင့် ပတ်သက်၍လည်း ကုလသမဂ္ဂ အထူးကိုယ်စားလှယ်နှင့် လူ့အခွင့်အရေး ကောင်စီတို့၏ သုံးသပ်ချက်များ ထွက်ပေါ်လာခဲ့သည်။ မြန်မာနိုင်ငံဆိုင်ရာ ကုလသမဂ္ဂ အထူးကိုယ်စားလှယ်က ပဋိပက္ခများ အရှိန်မြင့်တက်လာမှုကြောင့် အရပ်သား ပြည်သူများ ထိခိုက်ခံစားနေရမှုကို ထောက်ပြကာ အကြမ်းဖက်မှုများ ချက်ချင်းရပ်တန့်ရန်နှင့် စစ်ဘေးဒုက္ခသည်များထံ အကူအညီများ အဟန့်အတားမရှိ ပေးအပ်နိုင်ရေး တောင်းဆိုထားသည်။ တစ်ချိန်တည်းမှာပင် ကုလသမဂ္ဂ လူ့အခွင့်အရေး ကောင်စီကလည်း အရပ်သားများအပေါ် လေကြောင်းမှ ဗုံးကြဲတိုက်ခိုက်မှုများကို ပြင်းထန်စွာ ရှုတ်ချလိုက်ပြီး စစ်ကောင်စီထံ စစ်လက်နက်နှင့် လေယာဉ်ဆီ တင်ပို့နေမှုများကို နိုင်ငံတကာက အမြန်ဆုံး ပိတ်ဆို့တားဆီးပေးရန်နှင့် မတရားဖမ်းဆီးခံထားရသူ အားလုံးကို ချက်ချင်းလွှတ်ပေးရန် တောင်းဆိုထားသည်။ ထို့အပြင် အရည်အသွေး စစ်ဆေးရေး ကော်မတီကလည်း ကုလသမဂ္ဂဆိုင်ရာ မြန်မာသံအမတ်ကြီး မည်သူ့ကို အသိအမှတ်ပြုမည်ဆိုသည်ကိုလည်း ဆုံးဖြတ်ရန် ရှိနေသည်။ ကမ္ဘာတဝှမ်း ကိစ္စရပ်များနှင့် ပတ်သက်၍ ဉာဏ်ရည်တု (AI) နည်းပညာ ထိန်းချုပ်ရေး၊ အရှေ့အလယ်ပိုင်းနှင့် အီရန်အရေး၊ ယူကရိန်းစစ်ပွဲ၊ ဆူဒန် လူသားချင်းစာနာမှု အကျပ်အတည်း၊ ရာသီဥတု ပြောင်းလဲမှုနှင့် ၂၀၂၆ နှစ်ကုန်တွင် သက်တမ်းကုန်ဆုံးမည့် ကုလသမဂ္ဂ အတွင်းရေးမှူးချုပ်နေရာအတွက် အနာဂတ် အတွင်းရေးမှူးချုပ်သစ် လျာထားရေးဆိုင်ရာ ကိစ္စရပ်များကို အဓိကထား ဆွေးနွေးကြမည် ဖြစ်သည်။ #UN #ကုလသမဂ္ဂညီလာခံ #Conference

ကုလသမဂ္ဂ အထွေထွေညီလာခံလာမည့် အပတ်တွင် ကျင်းပမည်

Sep 18

ယူကရိန်းစစ်ပွဲနောက်ပိုင်း ပထမဆုံးရုရှား ပါလီမန် ရွေးကောက်ပွဲ စတင်ကျင်းပ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၈ ရက်။ ယူကရိန်းစစ်ပွဲ စတင်ခဲ့ပြီးနောက်ပိုင်း ပထမဆုံးအကြိမ်အဖြစ် ရုရှား ပါလီမန် အောက်လွှတ်တော် (စတိတ်ဒူးမား - State Duma) ရွေးကောက်ပွဲကို စက်တင်ဘာ ၁၈ ရက်မှ ၂၀ ရက်နေ့အထိ သုံးရက်ကြာ စတင်ကျင်းပနေပြီ ဖြစ်သည်။ အဆိုပါ ရွေးကောက်ပွဲတွင် မဲဆန္ဒရှင် သန်း ၁၁၁ ကျော်က အောက်လွှတ်တော် အာဏာပိုင် ၄၅၀ နေရာအတွက် မဲပေးရွေးချယ်ကြမည်ဖြစ်သည်။ သမ္မတ ဗလာဒီမီယာ ပူတင်အား ကျောထောက်နောက်ခံပြုထားသည့် အာဏာရ ယူနိုက်တက် ရုရှား (United Russia) ပါတီက အများစုနေရာကို ဆက်လက်လွှမ်းမိုးထားရန် ရေပန်းစားနေသည်။ စစ်ပွဲကို ပွင့်ပွင့်လင်းလင်း ဆန့်ကျင်သည့် အတိုက်အခံ ရာဘလိုကို (Yabloko) ပါတီအား ရုရှား တရားရုံးချုပ်က ပါတီလိုက် မဲပေးစနစ်မှ ပိတ်ပင်ထားသည်။ ကရင်မလင် အစိုးရနှင့် သဘောထား တိုက်ဆိုင်သည့် ကွန်မြူနစ်ပါတီနှင့် နယူပီပယ် (New People) ပါတီတို့သာ အဓိက ယှဉ်ပြိုင်ခွင့် ရရှိထားသည်။ အာဏာရပါတီ အနိုင်ရရှိရန် ကြိုတင် ရေရေရာရာ ရှိနေသော်လည်း အဆိုပါ ရွေးကောက်ပွဲသည် ယူကရိန်းစစ်ပွဲအပေါ် ပြည်သူများ၏ သဘောထား၊ စီးပွားရေး ကျဆင်းမှုနှင့် ကုန်ဈေးနှုန်း ကြီးမြင့်မှုအပေါ် မကျေနပ်ချက်များကို တရားဝင် ထုတ်ဖော်ပြသနိုင်သည့် အခွင့်အရေး ဖြစ်သဖြင့် စောင့်ကြည့်ရမည်ဖြစ်ကြောင်း သုတေသီများက သုံးသပ်ကြသည်။ အတိုက်အခံ ကွန်မြူနစ်ပါတီနှင့် နယူပီပယ်ပါတီတို့ မဲရရှိမှု အခြေအနေအပေါ် မူတည်၍ ပြည်သူများ၏ စီးပွားရေး ကြပ်တည်းမှုနှင့် စစ်ဆန့်ကျင်ရေး သဘောထား အတိုင်းအတာကို ခန့်မှန်းနိုင်မည် ဖြစ်သည်။ တစ်ဖက်တွင်လည်း ကရင်မလင် အစိုးရအနေဖြင့် စစ်ပွဲ ဆက်လက်ဆင်နွှဲရေးအတွက် ပြည်သူ့ထောက်ခံမှု ရရှိထားကြောင်း တရားဝင်မှု တည်ဆောက်ရာတွင် အဆိုပါ ရွေးကောက်ပွဲ ရလဒ်ကို အဓိက အသုံးပြုသွားမည် ဖြစ်သည်။ Photo:SNA #State_Duma_Election

ယူကရိန်းစစ်ပွဲနောက်ပိုင်း ပထမဆုံးရုရှား ပါလီမန် ရွေးကောက်ပွဲ စတင်ကျင်းပ

Sep 17

ရေဦး၌ စစ်တပ်ဖမ်းထားသည့် လူငယ်များ အချုပ်ခန်းဖောက်ထွက်ပြေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ စစ်ကိုင်းတိုင်း၊ ရေဦးမြို့နယ်၌ စစ်အုပ်စုတပ်က အဓမ္မစစ်မှုထမ်းခိုင်းရန် ပေါ်တာဆွဲ ဖမ်းဆီးချုပ်နှောင်ထားသည့် အသက် ၂၀ မှ ၃၀ အကြားရှိ လူငယ် ၂၀ နီးပါးသည် အချုပ်ခန်းကို ဖောက်၍ ထွက်ပြေးလွတ်မြောက်လာခဲ့ ကြောင်း အမျိုးသားညီညွတ်ရေးအစိုးရ (NUG)၊ ရေဦးမြို့နယ် ပြည်သူ့ကာကွယ်ရေးအဖွဲ့ (ပကဖ) နှင့် ဒေသခံများ က ပြောသည်။ ပြီးခဲ့သည့် စက်တင်ဘာ ၁၆ ရက်နေ့၊ နေ့လယ်ပိုင်းတွင် ရေဦးမြို့ ဗိုလ်အောင်ဇေယျရပ်ကွက်ရှိ အမှတ် (၂) အခြေခံပညာအထက်တန်းကျောင်း အတွင်း အချုပ်ခန်းအဖြစ် အသုံးပြုထားသည့် စာသင်ဆောင်မှ အချုပ်စောင့် များ မူးယစ်နေချိန်တွင် ထွက်ပြေးခဲ့ကြခြင်း ဖြစ်သည်။ အဆိုပါကျောင်း၌ စုစုပေါင်း လူငယ် ၂၆ ဦး ချုပ်နှောင်ခံထားရပြီး ကျန်းမာရေးမကောင်းသူ ၆ ဦးမှလွဲ၍ ကျန်လူ ငယ် ၂၀ ခန့်မှာ ထွက်ပြေးခဲ့ကြခြင်းဖြစ်ကာ ၎င်းတို့အနက် ၁၂ ဦးကို ရေဦးမြို့နယ် ပကဖက လွတ်မြောက်နယ်မြေ တစ်ခု၌ ဘေးကင်းစွာ လက်ခံစောင့်ရှောက်ထားနိုင်ခဲ့သည်။ ရေဦးမြို့နယ် ပကဖ တာဝန်ရှိသူတစ်ဦးက “ပြောရမယ်ဆိုရင်တော့ (စခ) စစ်အုပ်စု တပ်သားနဲ့ ရဲ၊ ပျူစောထီး အချုပ်စောင့်တွေ အရက်မူးနေကြတုန်း ဖောက်ထွက်လာကြတာပါ။ သွပ်ပြားတွေနဲ့ ကာထားတဲ့ ဝင်းထရံကို ကျော်ပြီး ထွက်ပြေးလာကြတာ ဖြစ်ပါတယ်။ အခု ကျနော်တို့ကတော့ လွတ်လာတဲ့ လူငယ်တွေကို စားသောက်နေထိုင်ရေးနဲ့ ကျန်းမာရေးစောင့်ရှောက်မှုတွေ ဆောင်ရွက်ပေးထားပါတယ်” ဟု ပြောသည်။ ကျန်ရှိသည့် ထွက်ပြေးလွတ်မြောက်လာသူ အချို့မှာမူ စစ်အုပ်စုတပ်၏ လိုက်လံပစ်ခတ်မှုများကြောင့် လမ်းခု လတ်တွင် အဆက်အသွယ် ပြတ်တောက်နေဆဲ ဖြစ်သည်။ လွတ်မြောက်လာသူများမှာ လွန်ခဲ့သည့် ၃ လ၊ ၄ လဝန်းကျင်က ရေဦးမြို့ပေါ်ရှိ လမ်းများ၊ စားသောက်ဆိုင်များ နှင့် နေအိမ်များအထိ စစ်အုပ်စုတပ်က ဝင်ရောက်ပေါ်တာဆွဲ ဖမ်းဆီးသွားခဲ့သည့် လူငယ်များ ဖြစ်ကြသည်။ ရေဦးမြို့ခံတစ်ဦးက “စာသင်ဆောင်တွေကို စစ်မှုထမ်းဖို့ ဖမ်းထားတဲ့သူတွေကို ချုပ်ထားတာ။ အရင်က အထက (၁) မှာ၊ အခု အထက (၂) ကို ပြောင်းထားတာပါ။ ပြောရမယ်ဆိုရင်တော့ ကျောင်းကို အချုပ်ခန်းလုပ်ပြီး အဲ့ဒီမှာ ထည့်ထားတာလို့ ပြောလို့ရတယ်။ ဒီမှာကတော့ မြို့ပေါ်ဆိုရင်လည်း အိမ်တွေထဲအထိပါ ဝင်ဖမ်းနေတော့ လူငယ်တွေလည်း မြို့မှာ မနေရဲကြတော့ဘဲ ဘေးလွတ်ရာကို ရှောင်နေကြရတယ်” ဟု ပြောသည်။ ရေဦးမြို့နယ်ရှိ ကျေးရွာ ၁၉၁ ရွာတွင် တော်လှန်ရေးအင်အားစုများက နယ်မြေစိုးမိုးထားပြီး စစ်အုပ်စုတပ်မှာ မြို့ပေါ်၌သာ ခြေကုပ်ယူထားနိုင်သဖြင့် ဖမ်းဆီးထားသည့် လူငယ်များကို တပ်သားသစ်သင်တန်းကျောင်းများသို့ ပို့ဆောင်ရာတွင် မြေပြင်လမ်းကြောင်းမှ မပို့နိုင်ဘဲ ရဟတ်ယာဉ်ဖြင့်သာ ပို့ဆောင်နေရသည်။ ရေဦးမြို့၌ စစ်အုပ်စုတပ်က အဓမ္မ ဖမ်းဆီးထားသူများ ထွက်ပြေးလွတ်မြောက်မှုမှာ ယခုအကြိမ်သည် ဒုတိယ အကြိမ် ဖြစ်ပြီး၊ လွန်ခဲ့သည့် ဇွန်လအတွင်းကလည်း အမှတ် (၂) အထက်တန်းကျောင်း၌ပင် ဖမ်းဆီးခံထားရသည့် လူငယ် ၇ ဦးသည် အစောင့်များကို တုံ့ပြန်ရိုက်နှက်၍ ထွက်ပြေးလွတ်မြောက်ခဲ့ဖူးသည်။ စစ်အုပ်စုတပ်သည် ယခု စက်တင်ဘာလအတွင်း စစ်မှုထမ်း အပတ်စဉ် (၂၈) ကို စတင်ဖွင့်လှစ်နေပြီ ဖြစ်သော် လည်း ရန်ကုန်နှင့် မန္တလေး မြို့ကြီးများအပါအဝင် ကျောက်ပန်းတောင်း၊ မြင်းခြံ၊ ညောင်ဦးနှင့် ဝမ်းတွင်း အစရှိ သည့် ဒေသများတွင်ပါ စစ်မှုထမ်းရန် ဆင့်ခေါ်ခြင်း၊ အဓမ္မ စစ်သားသစ် စုဆောင်းနေခြင်းနှင့် ပေါ်တာဆွဲ ဖမ်းဆီး ခြင်းများကို ဆက်တိုက် ပြုလုပ်နေဆဲ ဖြစ်သည်။ လက်ရှိ မြေပြင်အခြေအနေတွင် စစ်အုပ်စုတပ်၏ အဓမ္မ ပေါ်တာဆွဲမှုများသည် ပိုမိုရက်စက် ကြမ်းကြုတ်လာပြီး မြို့ပေါ်မှ လူငယ်များမှာ နေအိမ်များ၌ပင် လုံခြုံမှုမရှိတော့ဘဲ ထွက်ပြေးတိမ်းရှောင်နေကြရသည်။ ဓါတ်ပုံ - (စစ်မှုထမ်းတပ်သားသစ်များ / စစ်အုပ်စုတပ်) #ရေဦးမြို့နယ်

ရေဦး၌ စစ်တပ်ဖမ်းထားသည့် လူငယ်များ အချုပ်ခန်းဖောက်ထွက်ပြေး

Sep 17

အရေးပေါ် ဆေးကုသခွင့် ကြန့်ကြာသဖြင့် ၈၈ မျိုးဆက် နိုင်ကျဉ်းတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ မန္တလေးတိုင်း၊ မြင်းခြံမြို့ရှိ အကျဉ်းထောင်တွင် အရေးပေါ် ဆေးကုသခွင့်တောင်းဆိုမှုကို ထောင်အာဏာပိုင်များ ထံ အဆင့်ဆင့် တင်ပြနေရသဖြင့် အချိန်ကြန့်ကြာခဲ့ရာမှ နှလုံးရောဂါအခံရှိသည့် ၈၈ မျိုးဆက် နိုင်ငံရေးအကျဉ်း သားတစ်သီး ကျဆုံးသွားခဲ့သည်။ အရေးပေါ် ဆေးကုသခွင့် ကြန့်ကြာနေသဖြင့် ကျဆုံးသွညးသည့် နိုင်ငံရေး အကျဉ်းသားမှာ ဦးစိုးမိုးနိုင် (ခ) စိုးနိုင် (ခ) ဒိန်းဒေါင် ဖြစ်သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ဆိုသည်။ နှလုံးသွေးကြောကျဉ်ရောဂါအခံ ရှိသူ ဦးစိုးမိုးနိုင်သည် စက်တင်ဘာလ ၁၅ ရက်နေ့၊ ည ၁၀ နာရီ အချိန်ခန့်တွင် ရုတ်တရက် အမောဖောက်လာသဖြင့် ဆေးကုသခွင့် တောင်းဆိုခဲ့သော်လည်း ထောင်အာဏာပိုင်များက အဆင့် ဆင့် စိစစ်တင်ပြနေ၍ ပြင်ပဆေးရုံသို့ အချိန်မီ ပို့ဆောင်နိုင်ခဲ့ခြင်း မရှိကြောင်း ဆိုသည်။ PPNM ပြောရေးဆိုခွင့်ရှိသူ မရောင်နီလင်းက “ဆေးကုသခွင့် မရတာတော့ မဟုတ်ဘူး၊ ဆေးကုသခွင့် ရတယ်။ အရင်ကတည်းကကိုက နှလုံးဆေး သောက်နေရတဲ့သူ ဖြစ်ပါတယ်။ ရုတ်တရက် ဒီနှလုံးဖောက်လာတဲ့ အချိန်မှာ ချက်ချင်းပေါ့နော် အပြင်ဆေးရုံကို ပို့ရမယ်ပေါ့လေ။ အဲဒီအချိန်မှာ ချက်ချင်းပို့တာမျိုး မရှိဘဲနဲ့ အချိန်ကြန့် ကြာ သွားတာကြောင့်မို့လို့ ဒီလိုမျိုးပေါ့နော် မသေဆုံးသင့်ဘဲနဲ့ သေဆုံးရတာ ဖြစ်ပါတယ်” ဟု ပြောသည်။ မြင်းခြံဆေးရုံ မှတ်တမ်းများအရ ၎င်းသည် စက်တင်ဘာလ ၁၅ ရက်နေ့၊ ည ၁၁ နာရီခွဲ အချိန်ခန့်တွင် ဆေးရုံ၌ ကျဆုံးခဲ့ရခြင်း ဖြစ်သည်။ အဆိုပါ ဖြစ်စဉ်နှင့် ပတ်သက်၍ မရောင်နီလင်းက “လုပ်ငန်းအဆင့်ဆင့်ကို ပြောရမယ်ဆိုရင် ထောင်တွင်း ဆေး ကုသမှုမှာ ဆိုရင်လည်း သက်ဆိုင်ရာ ဝန်ထမ်း၊ ဝန်ထမ်းကနေမှ အဆောင်မှူး၊ အဆောင်မှူးကနေမှ ထောင်ပိုင်ဆို ပြီး တင်ပြရတယ်။ ဒါဟာ ထောင်တွင်း ဆေးကုသမှုပဲ ရှိသေးတယ်။ ပြင်ပဆေးရုံကို တင်ပြရတယ် ဆိုရင်တော့ အဲဒီထက်ပိုတဲ့ အဆင့်ဆင့် ရှိလာလိမ့်မယ်။ ဒါကြောင့်မလို့ အရေးပေါ်လူနာတွေအတွက် တင်ပြရတဲ့ အချိန်ကြာ မြင့်မှုအပေါ်မှာ မူတည်ပြီးတော့ အသက်အန္တရာယ် စိုးရိမ်ရပါတယ်” ဟု ဆက်ပြောသည်။ ထို့သို့ သေဆုံးခဲ့ပြီးနောက် နောက်တစ်နေ့ စက်တင်ဘာ ၁၆ ရက် နံနက်ပိုင်းတွင် ထောင်အာဏာပိုင်များက မိသားစုထံ အကြောင်းကြားခဲ့သော်လည်း ရုပ်အလောင်းအား လိုက်ပါပို့ဆောင်ခွင့် မပြုဘဲ ထောင်လုပ်ထုံး လုပ်နည်းအရ ထိုနေ့ မွန်းလွဲ ၂ နာရီခွဲခန့်တွင် မြင်းခြံသုသာန်၌ မြေမြှုပ်သင်္ဂြိုဟ်ခဲ့ကြသည်။ ကျဆုံးသွားသူ ဦးစိုးမိုးနိုင်သည် ၈၈ မျိုးဆက် နိုင်ငံရေးအကျဉ်းသားတစ်ဦး ဖြစ်သည့်အပြင် ၂၀၀၇ ရွှေဝါရောင် အရေးအခင်းနှင့် ၂၀၂၁ အာဏာသိမ်းမှု ဆန့်ကျင်ရေးတို့တွင် လှုပ်ရှားခဲ့သူ ဖြစ်သည်။ ၎င်းကို ၂၀၂၁ ခုနှစ်၊ ဒီဇင်ဘာလ ၈ ရက်နေ့တွင် စစ်အုပ်စုတပ်က ဖမ်းဆီးခဲ့ပြီး အကြမ်းဖက်မှုတိုက်ဖျက်ရေး ဥပဒေပုဒ်မ ၅၂ - က၊ ပေါက်ကွဲစေတတ်သော ဝတ္ထုပစ္စည်းများ အက်ဥပဒေ ၁၉ - က တို့ဖြင့် ထောင်ဒဏ် ၂၄ နှစ် ချမှတ်ထားခြင်းဖြစ်သည်ဟု PPNM က ထုတ်ပြန်သည်။ ဓါတ်ပုံ - PPNM #မြင်းခြံမြို့

အရေးပေါ် ဆေးကုသခွင့် ကြန့်ကြာသဖြင့် ၈၈ မျိုးဆက် နိုင်ကျဉ်းတစ်ဦး သေဆုံး

Sep 17

ဘုန်းကြီးကျောင်း ရေသန့်စက်ဖွင့်ပွဲကို စစ်တပ် ဗုံးကြဲ၊ ဆရာတော် အပါအဝင် ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ စစ်ကိုင်းတိုင်း၊ ရွှေဘိုမြို့နယ်အနောက်ခြမ်းရှိ နှမစားရစ်ကျေးရွာ ဘုန်းကြီးကျောင်းတွင် ကျေးရွာသူ ရွာသားများ အတွက် ရေသန့်စက်ဖွင့်ပွဲ အလှူပြုလုပ်နေစဉ် စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် ကျောင်း ထိုင်ဆရာတော် ပျံလွန်တော်မူပြီး ရွာခံ ၂ ဦး သေဆုံးကာ ၈ ဦး ဒဏ်ရာရရှိခဲ့သည်။ ပြီးခဲ့သည့် စက်တင်ဘာ ၁၆ ရက်နေ့၊ မွန်းလွဲ ၁၂ နာရီခွဲခန့်တွင် တစ်ရွာလုံး သုံးစွဲနိုင်ရန် ဆရာတော် ဦးစီး၍ ဆောက်လုပ်ထားသည့် ရေသန့်စက်ရုံ အလှူပွဲ ကျင်းပနေစဉ် မိတ္ထီလာလေတပ်မှ တက်လာသည့် ဂျက်ဖိုက်တာ ဖြင့် ဗုံး ၃ လုံး ကြဲချတိုက်ခိုက်ခဲ့ခြင်း ဖြစ်သည်။ လေကြောင်းမှ ဗုံးထိမှန်မှုကြောင့် သက်တော် ၄၃ နှစ်ရှိ ကျောင်းထိုင်ဆရာတော် ပျံလွန်တော်မူခဲ့ ရသလို အလှူပွဲသို့ ရောက်ရှိနေသည့် အသက် ၆၀ ကျော်အရွယ် ရပ်မိရပ်ဖ အမျိုးသား ၂ ဦးလည်း ပွဲချင်းပြီး သေဆုံးခဲ့ရ သည်။ “ရွာက လူတွေ ရေသန့်သန့် သောက်ရအောင် ဘုန်းဘုန်းကိုယ်တိုင် ဦးစီးပြီး ဆောက်ပေးထားတာပါ။ အဲဒါလေး ဖွင့်ပွဲလုပ်ပြီး လူတွေ စုနေကြတဲ့အချိန်မှာ လေယာဉ်နဲ့ တမင် လာကြဲတာ။ ဆရာတော်လည်း ပျံလွန်တော်မူသွား သလို အဘိုး နှစ်ယောက်လည်း ပွဲချင်းပြီး ဆုံးသွားရတယ်” ဟု ဒေသခံတစ်ဦးက ပြောသည်။ ထို့ပြင် ဗုံးထိမှန်၍ သေဆုံးသူများနှင့် ဒဏ်ရာရရှိသူများကို မြေပြင်ကယ်ဆယ်ရေး ဆောင်ရွက်နေချိန်တွင်လည်း ရွှေဘိုမြို့အခြေစိုက် ခလရ (၄၂) တပ်ရင်းက ၁၂၀ မမ လက်နက်ကြီးများဖြင့် ၃ ကြိမ်ထက်မနည်း ထပ်မံ ပစ်ခတ် တိုက်ခိုက်ခဲ့ကြောင်း ရွှေဘိုမြို့နယ် ပကဖ ပြန်ကြားရေးတာဝန်ခံက ပြောသည်။ အဆိုပါ နှမစားရစ်ကျေးရွာ ပတ်ဝန်းကျင်တွင် စစ်ရေးလှုပ်ရှားမှုနှင့် ထိတွေ့တိုက်ပွဲဖြစ်ပွားခြင်း မရှိဘဲ အရပ်သား ပြည်သူများ အေးချမ်းစွာ စုဝေးနေသည့် သာသနိက အဆောက်အအုံကို စစ်အုပ်စုတပ်က ပစ်မှတ်ထား၍ တမင်ရည်ရွယ် တိုက်ခိုက်ခဲ့ခြင်း ဖြစ်သည်ဟုလည်း ဆိုသည်။ လက်ရှိတွင် စစ်အုပ်စုတပ်သည် ရွှေဘိုနယ်အတွင်းရှိ ပျူစောထီးရွာများကို စစ်သင်တန်းပေး၊ လက်နက်တပ်ဆင် ပေးကာ ကျေးရွာများကို စီးနင်းလုယက်ခိုင်းနေသည်ဟုလည်း ဒေသခံ တော်လှန်ရေးအဖွဲ့များကပြောသည်။ ထို့ပြင် စစ်အုပ်စုသည် အရပ်သားပြည်သူများနှင့် စာသင်ကျောင်း၊ ဘုန်းကြီးကျောင်း၊ ဆေးရုံများကို အချိန်မရွေး ပစ်မှတ်ထား တိုက်ခိုက်နေသဖြင့် ပြည်သူများအနေဖြင့် လေကြောင်းနှင့် လက်နက်ကြီး အန္တရာယ်ကို သတိပြု ရန်၊ လေယာဉ်သံနှင့် ပစ်ခတ်သံကြားပါက လုံခြုံသည့်နေရာသို့ အမြန်ဆုံး ရွှေ့ပြောင်းရန်နှင့် မလိုအပ်ဘဲ လူစု လူဝေး ပြုလုပ်ခြင်း မပြုကြရန် ရွှေဘိုမြို့နယ် ပြည်သူ့ကာကွယ်ရေးအဖွဲ့ကလည်း သတိပေးထားသည်။ ဓါတ်ပုံ - (ပကဖ၊ ရွှေဘိုမြို့နယ်၊ NUG) #ရွှေဘိုမြို့နယ်

ဘုန်းကြီးကျောင်း ရေသန့်စက်ဖွင့်ပွဲကို စစ်တပ် ဗုံးကြဲ၊ ဆရာတော် အပါအဝင် ၃ ဦး သေဆုံး

« Prev 1 … 9 10 11 12 13 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close