NMG Doh – Page 12 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 17

စစ်တပ်ဗုံးကြဲ၍ မိဘမဲ့ကျောင်းရှိ ကလေး ၁ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ ကရင်နီပြည်၊ ဒီးမော့ဆိုမြို့နယ် အနောက်ဘက်ခြမ်းရှိ မိဘမဲ့ကျောင်းကို စစ်အုပ်စုတပ်က တိုက်ပွဲဖြစ်ပွားခြင်းမရှိ ဘဲ အသေခံဒရုန်းဖြင့် ပစ်မှတ်ထား တိုက်ခိုက်ခဲ့တာကြောင့် ကစားနေသည့် အသက် ၉ နှစ်အရွယ် ကလေးငယ် တစ်ဦး သေဆုံးပြီး ၃ ဦး ဒဏ်ရာရရှိခဲ့သည်။ စက်တင်ဘာလ ၁၆ ရက်နေ့၊ ညနေပိုင်းတွင် စစ်အုပ်စုတပ်က ကင်းထောက်ဒရုန်းများ ဝဲပျံပြီးနောက် မိဘမဲ့ ကျောင်းအနီးသို့ အသေခံဒရုန်း ၂ စီးဖြင့် တိုက်ခိုက်ခဲ့ခြင်းဖြစ်သည်။ ပထမတစ်စီး ထိုးဆင်းချိန်တွင် လူထိခိုက်မှု မရှိခဲ့သော်လည်း ဒုတိယတစ်စီး ထိုးဆင်းချိန်၌ ဆော့ကစားနေသည့် ကလေးငယ်များကို တိုက်ရိုက် ထိမှန်သွားခြင်းဖြစ်သည်ဟု ဒေသခံများက ပြောသည်။ “ဒရုန်းတစ်စီး လာပြီးပြီဆိုတော့ ဆက်မလာလောက်တော့ဘူးအထင်နဲ့ အားလုံး ပေါ့ဆသွားချိန်မှာ ဒုတိယ တစ်စီးက ထပ်ထိုးဆင်းလာတာပါ။ ကစားနေတဲ့ ကလေး ဦးခေါင်းကို ဒရုန်းစ ထိမှန်ပြီး ပွဲချင်းပြီး ဆုံးသွားရ တာပါ” ဟု နီးစပ်သည့် စစ်ဘေးရှောင် ဒေသခံတစ်ဦးက ပြောသည်။ အဆိုပါ ဒရုန်းတိုက်ခိုက်မှုကြောင့် အသက် ၁၆ နှစ်အရွယ် ကလေးငယ်တစ်ဦးအပါအဝင် ဒဏ်ရာရရှိသူ ၃ ဦး အနက် ၂ ဦးမှာ စိုးရိမ်ရသည့် အခြေအနေတွင် ရှိနေသည်။ ဒါ့အပြင် အနီးအနားရှိ လူနေအိမ်အချို့နှင့် မော်တော် ယာဉ် ၂ စီးပါ ထိခိုက်ပျက်စီးခဲ့ရသည်။ စစ်ရေးသတင်းရင်းမြစ်တစ်ဦးက “စစ်ဘေးရှောင်နေရတာ ကြာလာတော့ စိတ်ထွက်ပေါက်အဖြစ် ကစားကြ၊ ပွဲလေးတွေ လုပ်ကြတာကို နားလည်ပေမဲ့ လက်နက်ကြီးနဲ့ ဒရုန်းတွေ ခဏခဏ ကျနေတဲ့အချိန်မှာတော့ လူစု လူဝေးပွဲတွေကို အထူးသတိထား ဆင်ခြင်ကြဖို့ လိုပါတယ်” ဟု ပြောသည်။ မိုးဗြဲဘက်မှ ဒီးမော့ဆိုသို့ စစ်ကြောင်းထိုးလာသည့် စစ်အုပ်စုတပ်သည် တော်လှန်ရေးတပ်ဖွဲ့များ၏ ခုခံမှုကြောင့် ရှေ့ဆက်မတိုးနိုင်ဘဲ တိုက်ပွဲမရှိသည့် အရပ်သားနေရာများ၊ မိဘမဲ့ကျောင်းများနှင့် စာသင်ကျောင်းများကို လေကြောင်းနှင့် ဒရုန်းများ သုံး၍ ပစ်မှတ်ထား တိုက်ခိုက်နေခြင်း ဖြစ်သည်။ စက်တင်ဘာလအတွင်း စစ်အုပ်စုတပ်၏ တိုက်ခိုက်မှုများကြောင့် ဒီးမော့ဆို၊ လွိုင်ကော်နှင့် မော်ချီးဒေသတို့တွင် အရပ်သား ၂၀ ထက်မနည်း ထိခိုက်သေဆုံးခဲ့ရပြီး၊ ဒီးမော့ဆိုအနောက်ခြမ်းရှိ စာသင်ကျောင်းအများစုကိုလည်း ယာယီ ပိတ်ထားရသည်။ ဓါတ်ပုံ - CJ #ဒီးမော့ဆိုမြို့နယ်

စစ်တပ်ဗုံးကြဲ၍ မိဘမဲ့ကျောင်းရှိ ကလေး ၁ ဦး သေဆုံး

Sep 17

ဆွီဒင်ရွေးကောက်ပွဲ ရလဒ် မြန်မာ့ဒီမိုကရေစီရေးအတွက် အလားအလာကောင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ ဆွီဒင်နိုင်ငံ ရွေးကောက်ပွဲ၌ လက်ယာစွန်းပါတီဖြစ်သော Sweden Democrats (SD) ထောက်ခံမှု ကျဆင်းခဲ့ပြီး ဗဟိုလက်ဝဲ ပါတီများ အနိုင်ရရှိခဲ့သည်။ ယင်းသည် ဆွီဒင်နိုင်ငံ၏ မြန်မာနိုင်ငံအပေါ် ထောက်ပံ့ကူညီမှုများ လျော့ကျမသွားစေရန် အပြုသဘောဆောင်သည့် သက်ရောက်မှုများ ရှိလာမည်ဟု မြန်မာ့အရေး လေ့လာသူများက သုံးသပ်သည်။ ဆွီဒင်နိုင်ငံသည် အပြည်ပြည်ဆိုင်ရာ ဖွံ့ဖြိုးတိုးတက်ရေး ပူးပေါင်းဆောင်ရွက်ရေး အေဂျင်စီ (Sida) မှတစ်ဆင့် မြန်မာနိုင်ငံရှိ ဒီမိုကရေစီရေးရာ လှုပ်ရှားသူများ၊ အရပ်ဘက် လူမှုအဖွဲ့အစည်းများ၊ လွတ်လပ်သော သတင်းမီဒီယာများနှင့် နယ်စပ်ဒေသ စစ်ဘေးရှောင်များအား အဓိက ဘဏ္ဍာရေး ထောက်ပံ့ပေးနေသည့် နိုင်ငံဖြစ်သည်။ ယခုကဲ့သို့ လက်ယာစွန်း SD ပါတီ၏ မဲဆန္ဒ ထောက်ခံမှု လျော့ကျသွားခြင်းကြောင့် မြန်မာနိုင်ငံသို့ ပေးအပ်နေသည့် အပြည်ပြည်ဆိုင်ရာ ကူညီထောက်ပံ့ရေး ဘတ်ဂျက်များ ဖြတ်တောက်ခံရမည်ဆိုသည့် စိုးရိမ်ချက်များ ပြေလော့သွားခဲ့သည်။ #SwedenDemocrats

ဆွီဒင်ရွေးကောက်ပွဲ ရလဒ် မြန်မာ့ဒီမိုကရေစီရေးအတွက် အလားအလာကောင်း

Sep 17

အီရန်-အမေရိကန် ဆက်ဆွေးနွေးရန်နှင့် ဟော်မုဇ် ရေလက်ကြား ပြန်ဖွင့်ရန် တရုတ်တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ အရှေ့အလယ်ပိုင်း တင်းမာမှုများ လျော့ပါးစေရေးအတွက် အီရန်နှင့် အမေရိကန်တို့အနေဖြင့် စိတ်အေးအေးထားကာ ထိန်းထိန်းသိမ်းသိမ်း ဆောင်ရွက်ကြရန်နှင့် ဇွန်လက ရရှိခဲ့သည့် ယာယီငြိမ်းချမ်းရေး သဘောတူညီချက်အတိုင်း ဆွေးနွေးပွဲများ ပြန်လည်စတင်ရန် တရုတ်နိုင်ငံခြားရေးဝန်ကြီး ဝမ်ယိ (Wang Yi) က တိုက်တွန်းလိုက်သည်။ ဘေဂျင်းမြို့သို့ ရောက်ရှိနေသည့် အီရန်နိုင်ငံခြားရေးဝန်ကြီး အဘက်စ် အာရက်ချီ (Abbas Araqchi) နှင့် ဗုဒ္ဓဟူးနေ့က တွေ့ဆုံစဉ် တရုတ်နိုင်ငံခြားရေးဝန်ကြီးက ယခုကဲ့သို့ တိုက်တွန်းခဲ့ခြင်း ဖြစ်သည်။ တရုတ်နိုင်ငံခြားရေးဝန်ကြီးက ကမ္ဘာ့စွမ်းအင် သယ်ယူပို့ဆောင်ရေး ဘေးကင်းရေးအတွက် ဟော်မုဇ် (Hormuz) ရေလက်ကြားကို အမြန်ဆုံး ပြန်လည်ဖွင့်လှစ်ရန် တောင်းဆိုခဲ့ပြီးသည်။ လက်ရှိ ပဋိပက္ခသည် ယီမင်နှင့် ပင်လယ်နီ ဒေသများသို့ ဆက်လက် ကူးစက်ကျယ်ပြန့်သွားမည်ကို မလိုလားကြောင်း အသိပေးခဲ့သည်။ ထို့ပြင် အရှေ့အလယ်ပိုင်းဒေသ၏ လက်ရှိ လုံခြုံရေးစနစ်ကို ပြုပြင်ပြောင်းလဲရန် လိုအပ်နေကြောင်းလည်း ဖော်ပြထားသည်။ #WangYi

အီရန်-အမေရိကန် ဆက်ဆွေးနွေးရန်နှင့် ဟော်မုဇ် ရေလက်ကြား ပြန်ဖွင့်ရန် တရုတ်တိုက်တွန်း

Sep 17

ပင်လယ်ကွေ့ အကျပ်အတည်း လျော့ကျလာသဖြင့် ရေနံစိမ်းဈေးကျ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ ဆော်ဒီအာရေးဘီးယားနိုင်ငံက အိုမန်နိုင်ငံ၏ ဆိပ်ကမ်းမှတစ်ဆင့် အာရှနိုင်ငံများသို့ ရေနံစိမ်းများ ပိုမိုတင်ပို့ရန် စီစဉ်နေကြောင်း သတင်းများ ထွက်ပေါ်လာပြီးနောက် ကမ္ဘာ့ရေနံစိမ်း ဈေးနှုန်းများ အနည်းငယ် ပြန်လည်ကျဆင်းသွားခဲ့သည်။ စက်တင်ဘာ ၁၇ ရက် နံနက်ပိုင်း ဈေးကွက်ဖွင့်ချိန်၌ ဘရန့် (Brent) ရေနံစိမ်း တစ်ပါရီ ပေါက်ဈေးသည် ၁ ဒေါ်လာ ၂၄ ဆင့် (၁ ဒသမ ၂ ရာခိုင်နှုန်း) ကျဆင်းခဲ့ပြီး ၁၀၄ ဒေါ်လာ ၅၉ ဆင့်သို့ ရောက်ရှိခဲ့သည်။ ဆော်ဒီအာရေးဘီးယား၏ အရှေ့-အနောက် ရေနံပိုက်လိုင်း ပန့်စက်ရုံများ တိုက်ခိုက်ခံရပြီးနောက် ပင်လယ်နီ ထွက်ပေါက်မှ ရေနံတင်ပို့မှုများ ခေတ္တရပ်ဆိုင်းသွားခဲ့သည်။ သို့သော်လည်း ယခုအခါ အိုမန်နိုင်ငံ စိုဟာ (Sohar) ဆိပ်ကမ်းအနီး၌ သင်္ဘောတစ်စင်းမှ တစ်စင်းသို့ ရေနံစိမ်း ပြောင်းရွှေ့တင်ဆောင်သည့် စနစ်ဖြင့် အာရှ ရေနံချက်စက်ရုံများသို့ တိုးမြှင့် တင်ပို့ပေးရန် ကမ်းလှမ်းထားခြင်း ဖြစ်သည်။ ဒါ့အပြင် လာမည့်သတင်းပတ်အတွင်း ကျင်းပမည်ဖြစ်သော အမေရိကန်-တရုတ် ထိပ်သီးဆွေးနွေးပွဲ မတိုင်မီ တင်းမာမှုများ လျော့ပါးလာနိုင်သည့် မျှော်လင့်ချက်များလည်း ရှိနေသည်။ အမေရိကန် စွမ်းအင်သတင်းအချက်အလက် အေဂျင်စီ (EIA) ၏ ရေနံစိမ်းလက်ကျန် လျှော့ပါးမှု နည်းပါးခဲ့သည့် အချက်အလက်များကလည်း ရေနံဈေး မြင့်တက်မှုကို ထိန်းချုပ်ပေးလျက် ရှိသည်။ #Brent

ပင်လယ်ကွေ့ အကျပ်အတည်း လျော့ကျလာသဖြင့် ရေနံစိမ်းဈေးကျ

Sep 17

ကနေဒါကို EU ၏ ပထမဆုံး ပူးတွဲအဖွဲ့ဝင်အဖြစ် ဖိတ်ခေါ်မှုအပေါ် အမေရိကန် သမ္မတ သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ ဥရောပသမဂ္ဂ (EU) ၏ ပထမဆုံး "ပူးတွဲအဖွဲ့ဝင်" (Associate Member) အဖြစ် ကနေဒါနိုင်ငံအား လက်ခံရန် ဥရောပကော်မရှင် ဥက္ကဋ္ဌ အာဆူလာ ဗွန်ဒါလိုင်ယန် (Ursula von der Leyen) က ဖိတ်ခေါ်လိုက်သည်။ သို့သော်လည်း အဆိုပါ အရေးယူဆောင်ရွက်ချက်သည် ရန်လိုသည့် အပြုအမူ ဖြစ်နိုင်ကြောင်း အမေရိကန် သမ္မတ ဒေါ်နယ်ထရမ့်က တုံ့ပြန် သတိပေးလိုက်သည်။ အမေရိကန် သမ္မတ ဒေါ်နယ်ထရမ့်က အကယ်၍ ဥရောပသမဂ္ဂ၏ မူလရည်ရွယ်ချက်မှာ သဘောထား မှန်ကန်မှု မရှိပါက ဥရောပ သမဂ္ဂအပေါ် ပြင်းထန်သည့် ပို့ကုန်အခွန်များ တိုးမြှင့် စည်းကြပ်ခြင်း သို့မဟုတ် ကုန်သွယ်ရေး ပိတ်ပင်ခြင်းများ ပြုလုပ်သွားမည်ဟု သတိပေးခဲ့သည်။ ဥရောပပါလီမန် မိန့်ခွန်းအတွင်း အာဆူလာ ဗွန်ဒါလိုင်ယန်က ယင်းသို့ အဆိုပြုခဲ့ခြင်းဖြစ်ပြီး၊ အခမ်းအနားသို့ တက်ရောက်နေသည့် ကနေဒါ ဝန်ကြီးချုပ် မာခ် ကာနီ (Mark Carney) ကလည်း ပိုမိုခိုင်မာသည့် မဟာမိတ်အဖြစ် ပူးပေါင်းဆောင်ရွက်ရေး ကမ်းလှမ်းချက်ကို ကြိုဆိုခဲ့သည်။ ယခု ကမ်းလှမ်းမှုသည် အမေရိကန် သမ္မတ ဒေါ်နယ်ထရမ့် အုပ်ချုပ်ရေးအဖွဲ့ အပါအဝင် တရုတ်နိုင်ငံတို့နှင့် ကုန်သွယ်ရေးဆိုင်ရာ တင်းမာမှုများ ရင်ဆိုင်နေရချိန်၌ ထွက်ပေါ်လာခြင်း ဖြစ်သည်။ အမေရိကန်နှင့် ကုန်သွယ်ရေး ဆွေးနွေးပွဲများ ပျက်ပြားသွားခဲ့ပြီးနောက် ကနေဒါနိုင်ငံသည် လာမည့် ၁၀ နှစ်အတွင်း အမေရိကန် မဟုတ်သော အခြားနိုင်ငံများနှင့် ကုန်သွယ်မှုကို နှစ်ဆတိုးမြှင့်ရန် ကြိုးပမ်းလျက် ရှိသည်။ #Canada #EU

ကနေဒါကို EU ၏ ပထမဆုံး ပူးတွဲအဖွဲ့ဝင်အဖြစ် ဖိတ်ခေါ်မှုအပေါ် အမေရိကန် သမ္မတ သတိပေး

Sep 17

မူးယစ်ဆေးဝါး တိုက်ဖျက်ရန် ပျက်ကွက်သည့် နိုင်ငံစာရင်းတွင် မြန်မာအား အမေရိကန် ထည့်သွင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၇ ရက်။ အမေရိကန် အိမ်ဖြူတော်က ထုတ်ပြန်သည့် နှစ်စဉ် မူးယစ်ဆေးဝါး ထိန်းချုပ်ရေးဆိုင်ရာ အစီရင်ခံစာ၌ မြန်မာနိုင်ငံသည် နိုင်ငံတကာ မူးယစ်ဆေးဝါး တိုက်ဖျက်ရေး သဘောတူညီချက်များကို လိုက်နာရန်နှင့် အမေရိကန်နှင့် ပူးပေါင်းဆောင်ရွက်ရန် ထိရောက်စွာ ကြိုးပမ်းမှု မရှိဘဲ ပျက်ကွက်ခဲ့သည့် နိုင်ငံများစာရင်းတွင် ထည့်သွင်းဖော်ပြထားသည်။ အဆိုပါ အစီရင်ခံစာတွင် မြန်မာနိုင်ငံသည် အာရှဒေသအတွင်း စိတ်ကြွရူးသွပ်ဆေးပြား (Methamphetamine) အများဆုံး ထုတ်လုပ်ဖြန့်ဖြူးသည့် အဓိက ရင်းမြစ်ဖြစ်ကြောင်း ထောက်ပြထားသည်။ တားမြစ်ဆေးဝါး မှောင်ခိုကူးသူများကို အရေးယူဆောင်ရွက်သည့် မြန်မာအစိုးရ၏ ကြိုးပမ်းချက်များမှာ မမှန်မကန်ဘဲ အားနည်းနေသေးကြောင်း သုံးသပ်ထားသည်။ သို့သော် မြန်မာနိုင်ငံ၏ မူးယစ်ဆေးဝါး တိုက်ဖျက်ရေး ဆောင်ရွက်ချက်အများစုကို အလွန်အမင်း အနုတ်သဘောဆောင်သည်ဟု သတ်မှတ်ထားသော်လည်း၊ အစိုးရ၏ အတိုင်းအတာတစ်ခုအထိ ကြိုးပမ်းမှုကြောင့် ဘိန်းစိုက်ပျိုးမှုမှာ ယခင် အမြင့်ဆုံးအဆင့်ထက် ၈၀ ရာခိုင်နှုန်းကျော်အထိ လျှော့ချနိုင်ခဲ့ကြောင်း အစီရင်ခံစာ၌ အသိအမှတ်ပြု ဖော်ပြထားသည်။ အမေရိကန် ကွန်ဂရက်၏ ဥပဒေအရ ပြုစုရသည့် ယင်းအစီရင်ခံစာတွင် ကမ္ဘာပေါ်၌ မူးယစ်ဆေးဝါး အဓိက ထုတ်လုပ်သည့် သို့မဟုတ် ဖြတ်သန်းသယ်ဆောင်သည့် နိုင်ငံ ၂၀ ကို အမည်ပျက်စာရင်း သတ်မှတ်ထားပြီး မြန်မာနိုင်ငံသည် ပူးပေါင်းဆောင်ရွက်ရန် သိသိသာသာ ပျက်ကွက်ခဲ့သည့် နိုင်ငံအဖြစ် ဖော်ပြခံခဲ့ရခြင်းဖြစ်သည်။ အမေရိကန် ဥပဒေအရ မူးယစ်တိုက်ဖျက်ရေး ပျက်ကွက်သည်ဟု သတ်မှတ်ခံရသည့် နိုင်ငံများသည် အမေရိကန်ထံမှ ကူညီထောက်ပံ့ငွေများ ဖြတ်တောက်ခံရမည့် အန္တရာယ်နှင့် ရင်ဆိုင်ရလေ့ရှိသည်။ သို့သော် အမေရိကန် သမ္မတအနေဖြင့် အမျိုးသား အကျိုးစီးပွား လိုအပ်ချက်ပေါ် မူတည်၍ အဆိုပါ အကူအညီ ပိတ်ဆို့မှု ပြစ်ဒဏ်များကို ကင်းလွှတ်ခွင့်ပြုနိုင်သည့် အာဏာရှိသည်။ #မူးယစ်ဆေးဝါးတိုက်ဖျက်ရေး #Methamphetamine

မူးယစ်ဆေးဝါး တိုက်ဖျက်ရန် ပျက်ကွက်သည့် နိုင်ငံစာရင်းတွင် မြန်မာအား အမေရိကန် ထည့်သွင်း

Sep 16

PDF-Zoland မှ စစ်သုံ့ပန်း ၈၀ ခန့် အစုလိုက် ထွက်ပြေးလွတ်မြောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ချင်းပြည်မြောက်ပိုင်း၊ တီးတိန်မြို့နယ်ရှိ PDF-Zoland ထိန်းသိမ်းရေးစခန်းတွင် ထိန်းသိမ်းထားသော ဗိုလ်မှူး၊ ဗိုလ်ကြီးများ အပါအဝင် စစ်သုံ့ပန်း ၈၀ ခန့် အချုပ်စောင့်များကို တိုက်ခိုက်ကာ အစုလိုက် ထွက်ပြေး လွတ်မြောက်သွားကြသည်။ ပြီးခဲ့သည့် စက်တင်ဘာလ ၁၃ ရက်နေ့ ညပိုင်းက ကနေဒီတောင်တိုက်ပွဲနှင့် ဒေသတွင်းတိုက်ပွဲများအတွင်း ဖမ်းဆီးရမိထားသည့် စစ်သုံ့ပန်းများသည် အချုပ်စောင့် ရဲဘော်များကို ရိုက်နှက်၍ လက်နက်နှင့် ကျည်ဆန်များ လုယူကာ ထွက်ပြေးခဲ့ကြခြင်းဖြစ်သည်။ ထို့နောက် စက်တင်ဘာလ ၁၅ ရက် နံနက်ပိုင်းတွင် ထွက်ပြေးလွတ်မြောက်သွားသည့် စစ်သုံ့ပန်းများအနက် အယောက် ၃၀ ထက်မနည်းသည် တီးတိန်မြို့အခြေစိုက် ခလရ (၂၆၉) စစ်အုပ်စုတပ်ထံ ပြန်လည်ရောက်ရှိသွား ကြောင်း ဒေသခံများနှင့် စစ်ရေးသတင်းရင်းမြစ်များက ပြောသည်။ “စက်တင်ဘာ ၁၅ ရက် မနက်ပိုင်းက ခလရ ၂၆၉ တပ်ကုန်းဘက်ကို မောင်းသွားတဲ့ စစ်ကားပေါ်မှာ စစ်ဝတ်စုံ ဝတ်ထားသူတွေအပြင် အရပ်ဝတ်နဲ့ စစ်သုံ့ပန်း ၃၀ ကျော် ၄၀ လောက် တင်လာတာကို မြင်လိုက်ရတယ်။ စစ်ကောင်စီတပ်ကလည်း သူတို့ သုံ့ပန်းတွေကို လာကြိုပြီး လမ်းဇန်ရွာမှာ အင်အား ၃၀ လောက်နဲ့ ဝင်တပ်စွဲ ထားတာ မျိုးတွေ ရှိပါတယ်” ဟု PDF-Zoland နှင့် နီးစပ်သည့် စစ်ရေးသတင်းရင်းမြစ်တစ်ဦးက ပြောသည်။ ထို့ပြင် စက်တင်ဘာလ ၁၄ ရက်နေ့ ညနေပိုင်းက ထွက်ပြေးနေသည့် စစ်သုံ့ပန်းများနှင့် ချင်းကာကွယ်ရေး တပ်ဖွဲ့ များအကြား ထိတွေ့မှုဖြစ်ပွားစဉ် ထွက်ပြေးစစ်သုံ့ပန်းများ၏ ပစ်ခတ်မှုကြောင့် လမ်းဇန်ကျေးရွာ နှစ်ခြင်းအသင်းတော်မှ ခရီးသွားနေသည့်ခရစ်ယာန် ဓမ္မအမှုတော်ဆောင် ဆရာတော်တစ်ဦး ကျည်ထိမှန် သေဆုံးခဲ့ပြီး၊ ၎င်း၏အစ်ကိုဖြစ်သူလည်း ဒဏ်ရာ ရရှိခဲ့သည်။ “စစ်သုံ့ပန်းတွေဟာ ရေချိုးဖို့ အကြောင်းပြပြီး အချုပ်စောင့်ကို ရိုက်နှက် လက်နက်လုယူ ပြေးကြတာပါ။ အချုပ် စောင့်ရဲဘော်တချို့ ဒဏ်ရာရသွားတယ်။ လမ်းမှာ သုံ့ပန်းတွေ ပစ်ခတ်တာကြောင့် ခရီးသွားနေတဲ့ အသင်းအုပ်ဆရာတော်တစ်ပါး ကျည်ထိသေဆုံးခဲ့ရတယ်” ဟု သတင်းရင်းမြစ်က ဆက်ပြောသည်။ လက်ရှိတွင် စစ်အုပ်စုတပ်က ထွက်ပြေးနေသည့် စစ်သုံ့ပန်းများ လွယ်ကူစွာ ထွက်ပြေးလွတ်မြောက်နိုင်ရေးနှင့် နယ်မြေရှင်းလင်းနိုင်ရန်အတွက် စက်တင်ဘာလ ၁၅ ရက်နေ့မှစ၍ စစ်ကိုင်းတိုင်း၊ ကလေးမြို့ဘက်မှ ချင်းပြည် မြောက်ပိုင်း၊ တီးတိန်မြို့သို့ တက်လာမည့် မော်တော်ယာဉ်များအားလုံးကို သွားလာခွင့် ပိတ်ပင်ထားကြောင်း မြေပြင်သတင်းရင်းမြစ်များက ပြောသည်။ အလားတူ ပြီးခဲ့သည့် ဩဂုတ်လဆန်းပိုင်းကလည်း PDF-Zoland ထိန်းသိမ်းရေးစခန်းမှ စစ်သုံ့ပန်း ၁၀ ဦးထက် မနည်း ထွက်ပြေးလွတ်မြောက်ခဲ့ဖူးပြီး၊ ၎င်းတို့ကို စစ်အုပ်စုက ကလေးမြို့ စစ်ဆေးရေးဂိတ်များတွင် ပြန်လည် တာဝန်ချထားသဖြင့် စစ်ရေးသတင်းအချက်အလက် ပေါက်ကြားမည်ကို တော်လှန်ရေးတပ်ဖွဲ့များနှင့် ဒေသခံ များက စိုးရိမ်နေကြသည်။ ဓါတ်ပုံ - စစ်အုပ်စုထံမှ သိမ်းဆည်းရမိခဲ့သော လက်နက်ခဲယမ်းများနှင့်အတူ တွေ့ရသည့် စစ်သုံ့ပန်းများ / PDF-Zoland) #PDF_Zoland #စစ်သုံ့ပန်း

PDF-Zoland မှ စစ်သုံ့ပန်း ၈၀ ခန့် အစုလိုက် ထွက်ပြေးလွတ်မြောက်

Sep 16

ဆန်တက်လာသည့် စစ်သင်္ဘော (၁) စီး ထပ်မံ နစ်မြုပ်၊ လေယာဉ်တစ်စီး ပျက်ကျနိုင်ဖွယ်ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ကချင်ပြည်၊ ဧရာဝတီမြစ်ကြောင်းအတိုင်း ဆန်တက်လာသည့် စစ်အုပ်စုတပ်၏ စစ်ရေယာဉ်များကို ကချင်လွတ် လပ်ရေးတပ်မတော် (KIA) နှင့် ပူးပေါင်းတပ်ဖွဲ့များက စောင့်ကြို တိုက်ခိုက်ခဲ့ရာ စစ်သင်္ဘော (၁) စီး ထပ်မံ နစ်မြုပ်သွားခဲ့ပြီး ကျန်ရှိသည့် သင်္ဘောများလည်း ရှေ့ဆက်မတိုးနိုင်ဘဲ ပြန်လည်ဆုတ်ခွာသွားရသည်။ စက်တင်ဘာလ ၁၆ ရက်နေ့ (ယနေ့) နံနက်ပိုင်းတွင် ရွှေကူမြို့ဘက်မှ ဗန်းမော်မြို့ဘက်သို့ ဆန်တက်လာသည့် စစ်အုပ်စု စစ်သင်္ဘော (၃) စီးကို KIA ဦးဆောင်သည့် တော်လှန်ရေး ပူးပေါင်းတပ်များက ရွှေကူနှင့် ဗန်းမော် အကြား ရေနီကျေးရွာနှင့် နမ့်ခုပ်ရွာအနီးတွင် စောင့်ကြိုတိုက်ခိုက်ခဲ့ခြင်းဖြစ်သည်။ ထိုတိုက်ခိုက်မှုကြောင့် စစ်သင်္ဘော (၁) စီးမှာ ထိမှန်ကာ ဧရာဝတီမြစ်အတွင်း ထပ်မံ နစ်မြုပ်သွားခဲ့ပြီး ကျန်ရှိ သည့် စစ်သင်္ဘော (၂) စီးမှာ ရွှေကူဘက်သို့ ပြန်လည်ဆုတ်ခွာသွားခဲ့ရခြင်း ဖြစ်သည်ဟု မြေပြင် သတင်း ရင်းမြစ်က ပြောသည်။ ထို့ပြင် ဗန်းမော်ဘက်မှ စုန်ဆင်းလာသည့် စစ်သင်္ဘောများကိုလည်း စင်းခန်းတံတားအနီးတွင် တော်လှန်ရေး တပ်ဖွဲ့များက ဆက်လက်စောင့်ကြို တိုက်ခိုက်နေသဖြင့် မြစ်ကြောင်းတစ်လျှောက် တိုက်ပွဲများ ပြင်းထန်နေ သည်။ မြေပြင်တွင် လှုပ်ရှားနေသည့် တော်လှန်ရေး တပ်ဖွဲ့ဝင်တစ်ဦးက “မနက်က ရွှေကူဘက်က တက်လာတဲ့ သင်္ဘော ၃ စီးကို နမ့်ခုပ်ဘက်မှာ ပစ်လိုက်တာပါ။ စစ်သင်္ဘော တစ်စီးက တော့ ထပ်ပြီး ချက်ချင်းကို မြုပ်သွားတယ်။ စစ်အုပ်စုတပ်ဖွဲ့ဝင်တွေ မြစ်ထဲမျောနေတာ မြင်ရတယ်။ ကျန်တဲ့ နှစ်စီးကတော့ ရှေ့မတိုးရဲတော့ဘဲ ရွှေကူ ဘက်ကို ပြန်လှည့်သွားရတာ” ဟု ပြောသည်။ ရေကြောင်းတိုက်ပွဲများအတွင်း စစ်အုပ်စုဘက်က အထိနာနေသဖြင့် သင်္ဘောလမ်းကြောင်း လုံခြုံရေးနှင့် ပစ်ကူ ပေးနိုင်ရန် တရုတ်နိုင်ငံထုတ် Y-12 အမျိုးအစား လေယာဉ်ဖြင့် ဗုံးလာရောက်ကြဲချစဉ် KIA ပူးပေါင်းတပ်ဖွဲ့ များက စက်သေနတ်ကြီးများဖြင့် ပြန်လည်ပစ်ခတ်ရာ လေယာဉ်မှာ မီးခိုးအူကာ တောင်ပေါ်ဘက်သို့ ပျက်ကျ သွားခဲ့ကြောင်းဆိုသည်။ “Y-12 လေယာဉ်က ဗုံးလာကြဲတာကို ရဲဘော်တွေက စက်သေနတ်ကြီးနဲ့ ပြန်ဆော်လိုက်တာ ထိသွားတယ်။ လေယာဉ် စောင်းသွားပြီး မီးခိုးတွေ ထွက်လာတာ တွေ့တယ်။ တောင်ပေါ်ဘက်ကို ကျသွားတယ်လို့ ပြောလို့ရတယ်။ လက်ရှိမှာတော့ သွားရောက်စစ်ဆေးနေတုန်းပဲ။ အခြေအနေအတိအကျတော့ မသိရသေးဘူး” ဟု ကချင်စစ်ရေး သတင်းရင်းမြစ်တစ်ဦးက ပြောဆိုသည်။ ဧရာဝတီမြစ်ကြောင်းအတိုင်း ဆန်တက်လာသည့် စစ်အုပ်စု၏ စစ်ရေယာဉ်များကို KIA နှင့် ပြည်သူ့ကာကွယ်ရေး တပ် (PDF) ပူးပေါင်းတပ်များက ဆက်လက်ပိတ်ဆို့ တိုက်ခိုက်နေခြင်း ဖြစ်သည်။ မန္တလေး-ဗန်းမော် မြစ်ကြောင်းခရီးစဉ်အတွင်း စစ်အုပ်စု၏ စစ်သင်္ဘော၊ တိုက်ခိုက်ရေး ရေယာဉ်နှင့် စက်လှေ စုစုပေါင်း (၁၇) စီးထက်မနည်း ဖျက်ဆီးထားနိုင်ခဲ့ပြီဟုလည်း KIO/KIA နှင့် တော်လှန်ရေးတပ်ဖွဲ့များဘက်က အတည်ပြု ပြောဆိုထားသည်။ #KIA

ဆန်တက်လာသည့် စစ်သင်္ဘော (၁) စီး ထပ်မံ နစ်မြုပ်၊ လေယာဉ်တစ်စီး ပျက်ကျနိုင်ဖွယ်ရှိ

Sep 16

ရှမ်း-ကရင်နီအစပ်တွင် စစ်အုပ်စု လေကြောင်းမှ ဆက်တိုက်ဗုံးကြဲ၍ ပြည်သူများ စိုးရိမ်ထိတ်လန့်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ရှမ်း-ကရင်နီနယ်စပ် မိုးဗြဲ-နန်းမယ်ခုံ-ဒီးမော့ဆို လမ်းကြောင်းတစ်လျှောက် စစ်အုပ်စုတပ်က စစ်ကြောင်းထိုး လာပြီးနောက် အရပ်သားများနေထိုင်ရာ ကျေးရွာများအထိ လေကြောင်းနှင့် ဒရုန်းများအသုံးပြုကာ ဆက်တိုက် ဗုံးကြဲ တိုက်ခိုက်နေသဖြင့် ဒေသခံပြည်သူများနှင့် စစ်ဘေးရှောင်များမှာ လုံခြုံရေးအတွက် စိုးရိမ်နေကြသည်။ ထိုသို့ လေကြောင်းရန် စိုးရိမ်ရသည့် အခြေအနေများကြောင့် ဒီးမော့ဆိုမြို့နယ် အနောက်ဘက်ခြမ်းရှိ စာသင် ကျောင်းများကို အရေးပေါ် ပိတ်ထားလိုက်ရသည်။ စက်တင်ဘာလ ၁၅ ရက်နေ့ နံနက် ၉ နာရီခွဲဝန်းကျင်တွင်လည်း ဒီးမော့ဆိုမြို့နယ် ပဆေးလာကျေးရွာဘက်သို့ တိုက်ပွဲဖြစ်ပွားခြင်းမရှိဘဲ စစ်အုပ်စုတပ်က ဂျက်ဖိုက်တာ (၂) စီးဖြင့် ဗုံး (၈) လုံးခန့် ကြဲချခဲ့သလို၊ ခလရ (၁၀၂) တပ်ရင်းကလည်း လက်နက်ကြီးများဖြင့် (၅) ကြိမ်ထက်မနည်း ပစ်ခတ်တိုက်ခိုက်ခဲ့သည်။ ထိုသို့ ရုတ်တရက် လေကြောင်းမှ ဝင်ရောက်တိုက်ခိုက်မှုကြောင့် စာမေးပွဲဖြေဆိုနေသည့် စစ်ဘေးရှောင် ကလေး ငယ်များနှင့် ဆရာ၊ ဆရာမများမှာ ဗုံးခိုကျင်းများထဲသို့ ဝင်ရောက်ပုန်းအောင်းခဲ့ကြရသည်။ “လေယာဉ်လာတဲ့အချိန်က ကျောင်းချိန်ဆိုတော့ အသံကြားတာနဲ့ ချက်ချင်း ကလေးတွေကို ဗုံးခိုကျင်းထဲ အရင် ပြေးခိုင်းရတယ်။ ပြီးမှ ခဏပြန်စောင့်ကြ။ လေယာဉ်ကလည်း ပျံတာ အရမ်းနိမ့်နိမ့်လေးပေါ့နော် အရမ်းနီး နီးကပ် ကပ်လေး ပျံတော့ အားလုံး အရမ်းကြောက်ကြတာ။ လေယာဉ်သံ ငြိမ်သွားတာနဲ့ ကလေးတွေ ပြန်ခိုင်း ပြီး ကျောင်းပိတ်ထားလိုက်ရတယ်” ဟု ဒီးမော့ဆို အနောက်ခြမ်းမှ ကျောင်းဆရာမတစ်ဦးက ပြောသည်။ လတ်တလောတွင် စစ်အုပ်စုတပ်သည် မိုးဗြဲမှတစ်ဆင့် နန်းမယ်ခုံမြို့ဘက်သို့ စစ်ကြောင်းထိုးလာနေပြီး ရှေ့ဆက် မတိုးနိုင်သည့်အဆုံး တိုက်ပွဲနှင့်မသက်ဆိုင်သည့် အရပ်သားပစ်မှတ်များကို ရည်ရွယ်ချက်ရှိရှိ တိုက်ခိုက်နေ ကြောင်း ဒေသခံများက ဆိုသည်။ ပြီးခဲ့သည့် စက်တင်ဘာလ ၁၄ ရက်နေ့ ညနေပိုင်းကလည်း နန်းမယ်ခုံမြို့နယ်အတွင်းရှိ ကျေးရွာတစ်ရွာကို အသေခံဒရုန်းဖြင့် တိုက်ခိုက်ခဲ့ရာ အရပ်သားထိခိုက်သေဆုံးမှု ရှိခဲ့သည်။ “ဒီရက်ပိုင်း လေကြောင်းရော၊ ဒရုန်းပါ တော်တော်စိပ်လာတယ်။ အမြဲတမ်းသတိထားနေရတယ်။ ကလေးတွေ အတွက်လည်း စိုးရိမ်ရသလို လူကြီးတွေလည်း တောင်ယာတို့လည်း သွားလို့မရဘူး။ ဘာမှ လုပ်ကိုင် စား သောက်လို့ရမဘူး။ နေ့ရော ညရော အမြဲသတိနဲ့ပဲနေနေရတယ်” ဟု စစ်ရှောင်တစ်ဦးက ပြောသည်။ ဒီးမော့ဆို အနောက်ဘက်ခြမ်းတွင် စစ်အုပ်စုတပ်၏ လက်နက်ကြီးနှင့် လေကြောင်းရန်ကြောင့် ကျောင်းများ မည်သည့်အချိန်တွင် ပြန်လည်ဖွင့်လှစ်နိုင်မည်ကို အတိအကျ မသိရသေးဘဲ စစ်ဘေးရှောင် ပြည်သူများအနေဖြင့် ဗုံးခိုကျင်းများ၌သာ သတိထားနေထိုင်ကြရန် ကူညီရေးအဖွဲ့များက တိုက်တွန်းထားသည်။ ယခု စက်တင်ဘာလအတွင်း စစ်အုပ်စုတပ်၏ လေကြောင်း၊ ဒရုန်းနှင့် လက်နက်ကြီး ပစ်ခတ်မှုများကြောင့် ဒီးမော့ဆို၊ လွိုင်ကော်နှင့် မော်ချီးဒေသ တစ်ကြောတွင် ကလေးငယ်များ အပါအဝင် အရပ်သားပြည်သူ အယောက် (၂၀) နီးပါးခန့် ထိခိုက်သေဆုံးခဲ့ရပြီး ဖြစ်ကြောင်း မြေပြင်သတင်းရင်းမြစ်များက ပြောသည်။ ဓါတ်ပုံ - (ဒီးမော့ဆို အနောက်ဘက်ခြမ်းတွင် စစ်အုပ်စု၏ လေကြောင်းရန်ကြောင့် ဘေးလွတ်ရာသို့ ထွက်ပြေးနေကြရသည့် စစ်ဘေးရှောင် ကလေးငယ်များ။ / Crd) #နန်းမယ်ခုံ #ဒီးမော့ဆို #မိုးဗြဲ

ရှမ်း-ကရင်နီအစပ်တွင် စစ်အုပ်စု လေကြောင်းမှ ဆက်တိုက်ဗုံးကြဲ၍ ပြည်သူများ စိုးရိမ်ထိတ်လန့်နေ

« Prev 1 … 10 11 12 13 14 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close