NMG Doh – Page 159 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Dec 5

ဩစတေးလျက လူမှုမီဒီယာ အကောင့်ဖွင့်နိုင်သည့် အနိမ့်ဆုံးအသက် သတ်မှတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၅ ရက်။ ဩစတေးလျ အစိုးရသည် အွန်လိုင်း ဘေးကင်းလုံခြုံရေး ဥပဒေ ပြင်ဆင်ချက် ကို ထုတ်ပြန်လိုက်ရာ လူမှုမီဒီယာများတွင် အကောင့်ဖွင့်နိုင်မည့် အနိမ့်ဆုံး အသက်ကို သတ်မှတ်လိုက်သည်။ ယင်းဥပဒေအရ အသက် ၁၆ နှစ်အောက် ကလေးများ သည် သတ်မှတ်ထားသော လူမှုမီဒီယာ ပလက်ဖောင်းများတွင် အကောင့်ဖွင့်ခြင်းကို တားမြစ်လိုက်ခြင်း ဖြစ်သည်။ ဒီဇင်ဘာလ ၁၀ ရက်နေ့တွင် စတင်အသက်ဝင်မည့် ဤဥပဒေဖြင့် အကောင့်ဖွင့်ခွင့် ပိတ်ပင်လိုက်သည့် လူမှုမီဒီယာများမှာ YouTube, X, Facebook, Instagram, TikTok, Snapchat, Reddit, Twitch, Threads, နှင့် Kick တို့ ပါဝင်သည်။ ဩစတေးလျ အစိုးရက ၎င်းတို့၏ ကလေးသူငယ်များနှင့် ဆယ်ကျော်သက်များ၏ စိတ်ပိုင်းဆိုင်ရာ ကျန်းမာရေးနှင့် ကြံ့ခိုင်သန်စွမ်းရေး အတွက် ယခုလို တားမြစ်လိုက်ခြင်းဖြစ်ကြောင်း ရှင်းပြထားသည်။ အကယ်၍ အဆိုပါ ပလက်ဖောင်းများသည် အသက် ၁၆ နှစ်အောက် ကလေးများ၏ အကောင့်များကို ရပ်ဆိုင်းရန်အတွက် ကျိုးကြောင်းဆီလျော်သော လုပ်ဆောင်မှုများ မပြုလုပ်ခဲ့ပါက ဩစတေးလျဒေါ်လာ သန်း ၅၀ အထိ ဒဏ်ရိုက်ခံရနိုင်သည်။ ဥပဒေအရ ချိုးဖောက်မှုများအတွက် ကလေးများ သို့မဟုတ် ၎င်းတို့၏ မိဘများကို အရေးယူမည်မဟုတ်ဘဲ အကောင့်ဖွင့်ခွင့်ပြုသော လူမှုကွန်ရက် ကုမ္ပဏီများကိုသာ ဒဏ်ရိုက်မည်ဖြစ်သည်။ ထို့ပြင် မိဘများအနေဖြင့်လည်း အသက် ၁၆ နှစ်အောက် ကလေးများကို အကောင့်ဖွင့်ရန် သဘောတူညီချက် ပေးခွင့်မရှိကြောင်း ဖော်ပြထားသည်။ တားမြစ်မှုတွင် ကလေးများအတွက် သီးသန့်ပြုလုပ်ထားသော Messenger Kids, Whatsapp, Kids Helpline, Google Classroom နှင့် YouTube Kids တို့ကဲ့သို့သော လိုင်းများ ပါဝင်မည်မဟုတ်ပါ။ လက်ရှိတွင် Facebook နှင့် TikTok ကဲ့သို့သော နာမည်ကြီး လူမှုပလက်ဖောင်းများသည် ကလေးများ၏ အကောင့်များကို ပိတ်သိမ်းရန် လုပ်ဆောင်နေပြီဟု သတင်းများက ဆိုသည်။

ဩစတေးလျက လူမှုမီဒီယာ အကောင့်ဖွင့်နိုင်သည့် အနိမ့်ဆုံးအသက် သတ်မှတ်

Dec 5

အမေရိကန်အောက်လွှတ်တော်တွင် ကျားဖြန့် (ငွေလိမ်) ဂိုဏ်းများ နှိမ်နင်းရေး ဥပဒေကြမ်းအတည်ပြု သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၅ ရက်။ အမေရိကန်ပြည်ထောင်စု အောက်လွှတ်တော် နိုင်ငံခြားရေး ကော်မတီသည် ငွေလိမ်ဂိုဏ်းများ၊ ခေါ်ဆိုလေ့ရှိသည့် "ကျားဖြန့်" လုပ်ငန်းများကို နှိမ်နင်းရေးအတွက် ဥပဒေတစ်ရပ်ကို မနေ့က အတည်ပြုလိုက်သည်။ အဆိုပါ ဥပဒေကြမ်းတွင် ငွေလိမ်လုပ်ငန်းများ ကြီးထွားလာခြင်းနှင့် ပတ်သက်၍ မြန်မာစစ်အုပ်စု၌ တာဝန်ရှိသည်ဟု ဖော်ပြထားသည်။ အထူးသဖြင့်၊ မြန်မာစစ်အုပ်စုသည် ငွေလိမ်ဂိုဏ်းများကို လုပ်ငန်းလည်ပတ်ခွင့် ပေးခြင်း၊ လစ်လျူရှုခြင်းနှင့် ၎င်းတို့ထံမှ အကျိုးအမြတ် ရယူနေခြင်းတို့ကြောင့် တာဝန်ရှိကြောင်း ဥပဒေဖော်ပြချက်တွင် ထည့်သွင်းထားသည်။ ဤဥပဒေ၏ အဓိက ရည်ရွယ်ချက်မှာ ငွေလိမ်လုပ်ငန်းများ ပပျောက်သွားစေရန်အတွက် အမေရိကန် အစိုးရဌာနများ ပူးပေါင်းပါဝင်သည့် "လုပ်ငန်းအကောင်အထည်ဖော်ရေး အထူးအဖွဲ့ (Task Force)" ဖွဲ့စည်းရန် ခွင့်ပြုချက်ပေးရန် ဖြစ်သည်။ ဤဥပဒေကြမ်းကို အောက်လွှတ်တော်တွင် ကန့်ကွက်သူမရှိ အတည်ပြုခဲ့ပြီးဖြစ်ရာ အထက်လွှတ်တော်၏ အတည်ပြုချက်နှင့် သမ္မတ၏ လက်မှတ်ရေးထိုးမှု ရရှိပါက အသက်ဝင်လာမည်ဖြစ်သည်။ ယင်းဥပဒေတွင် ပစ်မှတ်ထား တိုက်ဖျက်မည့် နိုင်ငံသုံးနိုင်ငံအဖြစ် မြန်မာ၊ ကမ္ဘောဒီးယားနှင့် လာအို နိုင်ငံများကို ဖော်ပြထားသည်။

အမေရိကန်အောက်လွှတ်တော်တွင် ကျားဖြန့် (ငွေလိမ်) ဂိုဏ်းများ နှိမ်နင်းရေး ဥပဒေကြမ်းအတည်ပြု

Dec 4

မိုင်းအန္တရာယ် ဆိုင်းဘုတ်တွေက ဘာတွေလဲ၊ တွေ့ရင် ဘာလုပ်မလဲ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၄ ရက်။ အရင် အပတ်တွေမှာ မြေမြုပ်မိုင်းနဲ့ စစ်လက်ကျန် ပစ္စည်းတွေနဲ့ ပတ်သက်လို့ ဘယ်လို လမ်းကြောင်းတွေ ရွေးသင့်တယ်၊ မသင်္ကာစရာ တစ်ခုခု တွေ့တယ်ဆိုရင် ဘာတွေ လုပ်ရမယ်၊ မလုပ်ရဘူး စတာတွေ ပြောခဲ့ပါတယ်။ ဒီတပါတ်တော့ မိုင်းအန္တရာယ် သတိပေးဆိုင်းဘုတ်တွေ အကြောင်း ပြောပြပါတယ်။ အခု နှစ်ထဲမှာ ရှမ်းပြည်မြောက်ပိုင်းမှာတော့ သိသိသာသာ တိုက်ပွဲတွေ လျော့နည်းသွားခဲ့ပါတယ်။ အိမ်နီးချင်း နိုင်ငံရဲ့ ဝင်ရောက် ညှိုနှိုင်းမှုနဲ့ လားရှိုးကို ကိုးကန့်တပ်တွေက စစ်ကော်မရှင်ကို ပြန်လွှဲပေးခဲ့ သလို တအာင်းတပ်တွေကလည်း မိုးကုတ်နဲ့ မိုးမိတ်ကို လွှဲပေးဖို့ သဘောတူထားခဲ့ပါတယ်။ ဒီလို အခြေအနေမှာ ရှမ်းမြောက်မှာ တိုက်ပွဲတွေက အရင်နှစ်တွေ လတွေကထက် လျော့နည်းသွားခဲ့ ပါတယ်။ တိုက်ပွဲတွေ လျော့နည်းသွားပေမယ့်လည်း မြေမြှုပ်မိုင်းနဲ့ စစ်လက်ကျန် ပစ္စည်းတွေရဲ့ ဘေးအန္တရာယ် တွေကတော့ ရှိနေဆဲပါပဲ၊ ဒီလပိုင်းတွေ ထဲမှာလည်း မြေမြှုပ်မိုင်းကြောင့် ထိခိုက် ဒဏ်ရာရတဲ့ သတင်းတွေ ဆက်ပြီး တွေ့ နေရပါတယ်။ စက်တင်ဘာလ ၂၀ ရက်နေ့က နောင်ချိုမြို့နယ် အုမ္မတီးရွာက ဒေသခံ အရပ်သား တစ်ယောက်ဟာ မြေမြှုပ်မိုင်း နင်းမိတဲ့အတွက် ခြေထောက်တဖက် ပြတ်ထွက်သွားခဲ့ရပါတယ်။ သူက တော့ အသက် ၇၉ နှစ် အရွယ် စိုင်းထွန်းလှ ဖြစ်ပါတယ်။ နောင်ချိုမှာ တိုက်ပွဲတွေ ပြီးသွားတဲ့ အချိန်မှာ စစ်ဘေးရှောင်ရာကနေ ပြန်လာပြီး သူ့ရဲ့ ခြံဝန်းအတွင်းမှာ ပဲ သန့်ရှင်းရေး လုပ်နေတုန်း မြေမြှုပ်မိုင်း နင်းမိတာ ဖြစ်ပါတယ်။ တိုက်ပွဲတွေ ဆဲသွားခဲ့တယ် ရပ်သွားခဲ့ရတယ် ဆိုပေမယ့် မြေမြှုပ်မိုင်း အန္တရာယ်နဲ့ စစ်လက်ကျန် ပစ္စည်း အန္တရာယ် တွေက ရှင်းသွားခဲ့တာ မဟုတ်ပါဘူး။ အောက်တိုဘာ ၁၇ ရက်နေ့ကတော့ နောင်ချိုမြို့နယ် မန်ကျည်းပင်ရွာက အသက် ၆၃ နှစ်အရွယ် ဦးစံမောင်ဟာ တောစပ်ကို အပေါ့အပါး သွားရင်းနဲ့ မြေမြှုပ်မိုင်းနင်းမိခဲ့ပါတယ်။ မြေမြှုပ်မိုင်း ပေါက်ကွဲမှုကြောင့် ညာခြေထောက်ဟာ ပေါင်ရင်းကနေ ပြတ်သွားခဲ့ပါတယ်။ သူတို့ မိသားစုဟာ နောင်ချိုက တအာင်းတပ်ဖွဲ့တွေ ဆုတ်ခွာသွားတဲ့ အချိန်မှာ နေရပ်မှာ ပြန်နေကြတာ ဖြစ်ပါတယ်။ ရွာပြန်ရောက်တာ တစ်လတောင် မပြည့်ခင်မှာပဲ မိုင်းနင်းမိခဲ့တာ ဖြစ်ပါတယ်။ လက်နက်ကိုင် တပ်ဖွဲ့ ဝင်ရောက်သွားတဲ့ နေရာတွေမှာ အများဆုံး မိုင်းထောင်သွားတာတွေ၊ ပေါက်ကွဲစေ တတ်တဲ့ ပစ္စည်းတွေ ကျန်နေခဲ့တာတွေက ရှိနေနိုင်ပါတယ်။ အခု ဆိုရင်တော့ မြို့တွေ ရွာတွေကို စစ်ဖြစ်နေတဲ့ ဘက်တွေက တပြန်တလှည့်စီ ထိန်းချုပ်တာတွေ လည်း ရှိတော့ အန္တရာယ်က ဆက်ရှိနေတာ ဖြစ်ပါတယ်။ တစ်ခါတစ်ရံ လက်နက်ကိုင် အဖွဲ့တစ်ဖွဲ့က ထိန်းချုပ်ခဲ့ပြီး ထွက်ခွာသွားတဲ့ အခါ တခြား လက်နက်ကိုင် အဖွဲ့တွေ ဝင်ရောက် ထိန်းချုပ်တာမျိုးလည်း ရှိတတ်ပါတယ်။ ဒီလို အခါမျိုးမှာ ရောက်လာတဲ့ လက်နက်ကိုင် အဖွဲ့တွေက မိုင်းရှင်းတာတွေ အပြင် ‌ဒေသခံတွေ အလွယ်တကူ နားလည်နိုင်တဲ့ မိုင်းသတိပေး ဆိုင်းဘုတ်တွေ၊ မြေမြှုပ်မိုင်း ရှိနေနိုင်တဲ့ နေရာတွေ၊ မိုင်းမရှင်းရသေးတဲ့ နေရာတွေ မှာ သတိပေး ဆောင်ပုဒ်တွေ လုပ်ဆောင်ပေးလေ့ ရှိကြပါတယ်။ ဒီဆိုင်းဘုတ်တွေဟာ လူတွေကို အသက်ကယ်တဲ့ သတိပေးချက်တွေလည်း ဖြစ်ပါတယ်။ မြေမြှုပ်မိုင်း ဆိုင်းဘုတ်တွေကို စိုက်ထူရတဲ့ ရည်ရွယ်ချက်က သုံးမျိုးလောက် ရှိပါတယ်။ ပထမ ရည်ရွယ်ချက်ကတော့ မိုင်းအန္တရာယ်ရှိတဲ့ ဧရိယာကို နယ်နမိတ် သတ်မှတ်ပေးတာ ဖြစ်ပါတယ်။ ဘယ်နေရာကနေ ဘယ်နေရာအထိ မိုင်းရှိနိုင်တယ် ဆိုပြီး မိုင်းရှိနိုင်တဲ့ ဧရိယာကို ဖော်ပြတဲ့ ဆိုင်းဘုတ် တွေ ဖြစ်ပါတယ်။ ဒုတိယ ရည်ရွယ်ချက်က‌တော့ အနီးအနားမှာရှိတဲ့ လူတွေကို အန္တရာယ်ကနေ ကြိုတင်ရှောင်ရှားနိုင်ဖို့ သတိပေး တာ ဖြစ်ပါတယ်။ တတိယ ရည်ရွယ်ချက်ကတော့ လူ နှင့် တရိဆ္တန် တွေ အန္တရာယ်ရှိတဲ့ နေရာ မသွားခြင်းအားဖြင့် သူတို့ရဲ့ အသက် ဆုံးရှုံးမှုနဲ့ ထိခိုက်ဒဏ်ရာရမှုတွေကို လျော့ချပေးဖို့ ဖြစ်ပါတယ်။ အဲဒီတော့ မြေမြှုပ်မိုင်း သတိပေး ဆိုင်းဘုတ်တွေက ဘယ်လိုပုံစံမျိုးလဲ၊ ဘာပုံတွေ ပါသလဲ၊ ဘာအရောင်တွေ ပါသလဲ ဆိုတာကို ဆက်ပြောပြပါတယ်။ နိုင်ငံတကာ စံနှုန်းတွေနဲ့ ဒေသအလိုက် အခြေအနေပေါ်မူတည်ပြီး သတိပေး ဆိုင်းပုဒ်တွေကို ပုံစံ အမျိုးမျိုးနဲ့ တွေ့နိုင်ပါတယ်။ ဒီထဲမှာ အတွေ့ ရများဆုံးက ပထမ ပုံစံကတော့ အနီရောင်နဲ့ အဖြူရောင် လက္ခဏာပါတဲ့ သတိပေး အမှတ်အသားတွေ ဖြစ်ပါတယ်။ တြိဂံပုံ ဒါမှမဟုတ် လေးထောင့်ပုံ ဖြစ်ပြီး အနီရောင် နောက်ခံပေါ်မှာ အဖြူရောင်နဲ့ ရေးဆွဲထားလေ့ ရှိပါတယ်။ အဲဒီ မှာ ပါဝင်တဲ့ သင်္ကေတကတော့ ဦးခေါင်းခွံ နဲ့ အရိုး၊ ဒါမှမဟုတ် ပေါက်ကွဲမှု ဖြစ်နေတဲ့ သင်္ကေတ တွေ ပါလေ့ရှိပါတယ်။ ပြီးရင်တောာ့ ဒေသခံတွေ နားလည်နိုင်တဲ့ စကားနဲ့ “မိုင်းအန္တရာယ်ရှိသည်”။ “မဝင်ရ” ဒါမှမဟုတ် “သေတတ်သည်” စတဲ့ စာသားတွေ ရေးသား ထားနိုင်ပါတယ်။ နောက်တမျိုးကတော့ ကျောက်တိုင်တွေ တိုင်တွေ စိုက်ထူထားတာပါ။ တိုင်တွေမှာ အနီရောင်သုတ်ထားတဲ့ ဒါမှမဟုတ် မိုင်းသတိပေး တံဆိပ် ကပ်ထားတဲ့ တိုင်တွေ ဒါမှမဟုတ် သစ်သားတိုင်တွေကို မိုင်းအန္တရာယ်ရှိတဲ့ ဧရိယာ တဝိုက်မှာ စိုက်ထူထားတတ်ပါတယ်။ နောက်တမျိုးကတော့ ကြိုးတွေ တိတ်တွေ တပ်ဆင်ထားတာပါ။ အန္တရာယ်ရှိတဲ့ ဧရိယာကို ရှင်းရှင်း လင်းလင်း ဝိုင်းရံထားဖို့အတွက် အနီရောင် ဒါမှမဟုတ် အဝါရောင် တိတ် ဒါမှမဟုတ် ကြိုးတွေကို အသုံးပြုထားနိုင်ပါတယ်။ ဒီလိုမျိုး သတိပေးထားတဲ့ အမှတ်အသားတွေ သင်္ကေတတွေ တွေ့ပြီဆိုရင် မိုင်းအန္တရာယ်ရှိတာကို သတိထားဖို့ လိုအပ်ပါတယ်။ ဒီလိုမျိုး အမှတ်အသားတွေ ဆိုင်းဘုတ်တွေ တွေ့ပြီဆိုရင်‌ ဘာလုပ်ကြမလဲ။ ဒီလိုမျိုး အမှတ်အသားတွေ မြေမြှုပ်မိုင်း သတိပေး ဆိုင်းဘုတ်တွေ တွေ့ပြီဆိုရင် ဘယ်မှာပဲ တွေ့တွေ့ အခုပြော မယ့် အချက်တွေကို တင်းတင်းကျပ်ကျပ် လိုက်နာဖို့ လိုပါတယ်။ ချက်ချင်း ရပ်လိုက်ပါ၊ စိတ်ကို အေးအေးထားပါ။ မြေမြှုပ်မိုင်း သတိပေး ဆိုင်းဘုတ် ဒါမှမဟုတ် အမှတ်အသား တွေ့တာနဲ့ ချက်ချင်း ရပ်လိုက်ပြီး စိတ်ကို အေးအေးထားပါ။ ကိုယ်နဲ့အတူပါလာတဲ့ သူတွေကို သတိပေးရပါမယ်၊ နောက်ပြန်ဆုတ်ပါ၊ ကိုယ်လာခဲ့တဲ့ လမ်းအတိုင်း ခြေရာအတိုင်း ဂရုတစိုက် နောက်ပြန်ဆုတ်ရပါမယ်။ အဲဒီပြီးရင်တော့ ဆိုင်းဘုတ်တွေ့တဲ့ အကြောင်း၊ အဲဒီ နေရာမှာ အန္တရာယ်ရှိနေတယ်ဆိုတာ နဲ့ အန္တရာယ် ရှိတဲ့ နေရာကို တခြားသူတွေ မသွားမလာအောင် သတိပေးဖို့ လိုပါတယ်။ မိုင်းအန္တရာယ်ရှိတာကြောင့် သူတို့ဆီကို ကိုယ်သွားတာ ဖြစ်စေ၊ ကိုယ့်ဆီကို သူတို့ကို လာခိုင်းတာ ဖြစ် စေ မလုပ်သင့်ပါဘူး။ နောက်ထပ် ရှောင်ရှားရမယ့် ကိစ္စကတော့ ဘယ်အရာကိုမှ မထိဖို့ပါ၊ ဆိုင်းဘုတ်တွေပဲ ဖြစ်ဖြစ်၊ ကျောက်တိုင်၊ သစ်သားတိုင်၊ ကြိုး ဒါမှမဟုတ် အနီးအနားက မသင်္ကာ စရာ ပစ္စည်း တစ်ခုခုကို လုံးဝ မထိမိအောင် သတိထားဖို့ လိုပါတယ်။ သင့် အနေဖြစ် ဘေးကင်းတဲ့နေရာကို ရောက်ပြီဆိုရင်တော့ ရွာထဲမှာ ရှိတဲ့သူတွေကို ရှင်းရှင်းလင်းလင်း ပြန် လည် မျှဝေပေးခြင်းနဲ့ အတူ ဒေသမှာရှိတဲ့ အာဏာပိုင်တွေ၊ နယ်မြေကို တာဝန်ယူထား တဲ့ လက်နက်ကိုင် အဖွဲ့ ဖြစ်စေ မိုင်းရှင်းလင်းရေး အဖွဲ့ကိုဖြစ်စေ သတင်းပို့ရမှာ ဖြစ်ပါတယ်။ ဆိုင်းဘုတ်တွေ အမှတ်အသားတွေကို မဖြုတ်ပစ်ပါနဲ့။ နေရာမရွှေ့ပါနဲ့။ ဒါဟာ တခြားသူတွေရဲ့ အသက် ကို ကယ်ပေးရာလည်း ရောက်ပါတယ်။ အားလုံး ဘေးကင်းကြပါစေ။

မိုင်းအန္တရာယ် ဆိုင်းဘုတ်တွေက ဘာတွေလဲ၊ တွေ့ရင် ဘာလုပ်မလဲ

Nov 28

တနင်္သာရီတိုင်းတွင် ရေးကောက်ပွဲ ဆန့်ကျင်သူများ တရားစွဲ ခံနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၉ ရက်။ တနင်္သာရီတိုင်းတွင် စစ်ကော်မရှင်၏ ရွေးကောက်ပွဲ ဥပဒေဖြင့် ဒေါင်းနက်အဖွဲ့ အပါအဝင် ဆန့်ကျင်သူများ တရားစွဲခံနေရသည်။ စစ်ကော်မရှင်က လာမည့်ရွေးကောက်ပွဲကို နှောင့်ယှက်ဟန့်တားခြင်းမှ ကာကွယ်ရန်ဟုဆိုကာ ပြဋ္ဌာန်းထားသော ရွေးကောက်ပွဲ ကာကွယ်ရေး (ရွေး/ကာ) ဥပဒေဖြင့် တနင်္သာရီတိုင်း ဒေသကြီး၊ မြိတ်ခရိုင်အတွင်းရှိ ဒေါင်းနက် အဖွဲ့ အပါအဝင် စစ်အာဏာရှင်ဆန့်ကျင်ရေး လှုပ်ရှားသူများကို တရားစွဲဆိုမှုများ ပြုလုပ်လျက်ရှိသည်ဟု နီးစပ်သူများက ပြောသည်။ ကျွန်းစုမြို့နယ်၊ ကံမော်နယ်မြေရဲစခန်းတွင် ကိုသိန်းဇော်မင်း (ဒေါင်းနက်) ဦးဆောင်သည့် အဖွဲ့ဝင် ၅၀ ဦးပါ PDF အဖွဲ့ကို ရွေး/ကာ ဥပဒေပုဒ်မ ၂၄ (က) နှင့် ၂၄ (ခ) တို့ဖြင့် အမှုဖွင့်ထားသည်ဟု ရဲစခန်းနှင့်နီးစပ်သူက ပြောသည်။ စစ်ကော်မရှင်၏ စွပ်စွဲချက်အရ အဆိုပါအဖွဲ့သည် နိုဝင်ဘာလ ၁၁ ရက်နေ့က ကျွန်းစုမြို့နယ်အတွင်းရှိ မဲတော၊ အုတ်ဖိုမော်၊ စန္ဒားငယ်၊ ဂျုံးဂျုံးကြ၊ ချောင်းညီကိုနှင့် ချောင်းကြီးဝ စသည့် ကျေးရွာများမှ ရပ်ကျေး အုပ်ချုပ်ရေး မှူးများနှင့် ရွေးကောက်ပွဲ ကော်မရှင်အဖွဲ့ဝင်များထံသို့ ခြိမ်းခြောက်စာများ ပေးပို့ခဲ့သည်ဟု ဆိုသည်။ ဒေါင်းနက်အဖွဲ့သည် ကျွန်းစုမြို့နယ်အတွင်း စစ်ရေးလှုပ်ရှားမှုများ လုပ်ဆောင်နေသည့် အဖွဲ့ဖြစ်ကြောင်း ဒေသခံကာကွယ်ရေးအဖွဲ့ (ပကဖ) တာဝန်ရှိသူတစ်ဦးက အတည်ပြု ပြောသည်။ “ကိုသိန်းဇော်မင်းတို့အဖွဲ့က ကျွန်းစုမြို့နယ်ထဲမှာ စစ်ရေးလှုပ်ရှားမှုတွေ လုပ်နေတဲ့အဖွဲ့ ပါ၊ သူတို့ကို ဒေါင်းနက် အဖွဲ့လို့ လူသိများတယ်၊ ရွာက လူကြီးတွေကို ရွေးကောက်ပွဲနဲ့ ပတ်သက်တဲ့ သတိပေးစာတွေ လိုက်ပေးနေတာ လည်း ဟုတ်ပါတယ်” ဟု ကျွန်းစုမြို့နယ် ပကဖတာဝန်ရှိသူတစ်ဦးက ပြောသည်။ သို့သော် စစ်ကော်မရှင်မှ တရားစွဲဆိုထားသော်လည်း ဒေါင်းနက်အဖွဲ့ကို လွယ်လင့်တကူ ဖမ်းဆီးနိုင်ခြင်း မရှိကြောင်း ၎င်း ပကဖ တာဝန်ရှိသူက ပြောသည်။ တနင်္သာရီတိုင်းအတွင်း ရွေး/ကာ ဥပဒေဖြင့် တရားစွဲဆိုမှုများသည် ကျွန်းစုမြို့နယ်တွင်သာမက အခြားမြို့နယ် များတွင်လည်း ဆက်တိုက် ဖြစ်ပွားလျက်ရှိသည်။ နိုဝင်ဘာလ ၇ ရက်နေ့က စစ်ကော်မရှင်၏ ရွေးကောက်ပွဲကို ဆန့်ကျင်ကြောင်း လမ်းမပေါ်တွင် စာရေးသားကာ ဆန္ဒထုတ်ဖော်ခဲ့သည့် DDMSC ၏ ပြန်ကြားရေးတာဝန်ခံ ကိုကျော်ကျော် ကို ရွေး/ကာ ပုဒ်မ ၂၃ (က)၊ ၂၃ (ခ) တို့ဖြင့် သရက်ချောင်းမြို့မရဲစခန်း၌ အမှုဖွင့်ထားသည်။ အလားတူ နိုဝင်ဘာလ ၁၉ ရက်နေ့တွင် ဘုတ်ခြံကျေးရွာ၌ စိုက်ထူထားသည့် ကြံ့ခိုင်ရေးပါတီ မဲဆွယ်ဆိုင်းဘုတ် ဖျက်ဆီးခံရသည်ဟုဆိုကာ ရှာဖွေနေဆဲဖြစ်သူ တစ်ဦးကို ရွေး/ကာ ပုဒ်မ ၂၄ (က) ဖြင့် ပုလောမြို့မရဲစခန်း၌ အမှုဖွင့်ထားသည်။ စစ်ကော်မရှင်က ပြဋ္ဌာန်းထားသည့် ရွေးကောက်ပွဲ ကာကွယ်ရေး ဥပဒေပုဒ်မများသည် ထောင်ဒဏ် သုံးနှစ်မှ ခုနစ်နှစ်အထိ ကျခံရမည့်အပြင် ငွေဒဏ်ကိုလည်း ချမှတ်နိုင်သော ပြစ်ဒဏ်ပြင်းထန်သည့် ဥပဒေများ ဖြစ်သည်။ စစ်ကော်မရှင်သည် လာမည့် ဒီဇင်ဘာလ ရွေးကောက်ပွဲ မတိုင်မီ တိုင်းရင်းသား လက်နက်ကိုင်အဖွဲ့အစည်းများ၊ ဒေသကာကွယ်ရေးတပ်ဖွဲ့များ အပါအဝင် ရွေးကောက်ပွဲကို ဆန့်ကျင်သူများအား ဤဥပဒေကို အသုံးပြု၍ ဖိနှိပ်ခြိမ်းခြောက်ခြင်းများ ဆက်လုပ်နေသည်ဟု ဒေသတွင်း သတင်းရင်းမြစ်များက သုံးသပ်သည်။

တနင်္သာရီတိုင်းတွင် ရွေးကောက်ပွဲ ဆန့်ကျင်သူများ တရားစွဲ ခံနေရ

Nov 28

မြိတ်နှင့် ထားဝယ်ထောင်မှ နိုင်ကျဉ်း ၁၀ ဦး သာ လွတ်မြောက် သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၈ ရက်။ မြိတ်နှင့် ထားဝယ်ထောင်မှ နိုင်ငံရေးအကျဉ်းသား ၁၀ ဦးသာ လွတ်မြောက်လာသည်ဟု နိုင်ငံရေးအကျဉ်းသား မိသားစုဝင်များနှင့် နီးစပ်သူများက ပြောသည်။ စစ်ကော်မရှင်၏ နိုဝင်ဘာလ ၂၆ ရက်နေ့၊ ညပိုင်း ထုတ်ပြန်ကြေညာခဲ့သော ပုဒ်မ ၅၀၅-က အမှုများ ရုတ်သိမ်း ခြင်းနှင့် လွတ်ငြိမ်းခွင့်ပေးခြင်း အစီအစဉ်အရ တနင်္သာရီတိုင်း ဒေသကြီး မြိတ်နှင့် ထားဝယ်အကျဉ်းထောင်တို့မှ နိုင်ငံရေးအကျဉ်းသူ/သား စုစုပေါင်း ၁၀ ဦး သည် နိုဝင်ဘာလ ၂၇ ရက်နေ့တွင် လွတ်မြောက်လာခဲ့သည်။ လွတ်မြောက်မည့် သတင်းကို ကြားသိရပြီးနောက် မိမိတို့၏ သားသမီးများကို စောင့်ဆိုင်းခဲ့ကြသော်လည်း လွတ်မြောက်လာသူ နည်းပါးသည်ဟု မြိတ်ထောင်ရှေ့တွင် စောင့်ဆိုင်းနေသည့် အသက် ၅၀ ကျော်အရွယ် နိုင်ငံရေးအကျဉ်းသားတစ်ဦး၏ ဖခင်ဖြစ်သူက ပြောသည်။ “ညက ၅၀၅-က တွေ လွှတ်ပေးမယ်လို့ သတင်းကြားရတော့ မနက်စောစောပိုင်းကတည်းက ထောင်အရှေ့မှာ သွားစောင့်တာ၊ ကိုယ့်သားက မပါလာဘူးဗျာ။ မိန်းကလေး ၄ ယောက်နဲ့ ယောက်ကျားလေး တစ်ယောက်တော့ လွတ်တယ်၊ စောင့်ရကျိုး မနပ်ဘူးဗျာ။” မြိတ်နှင့် ထားဝယ်အကျဉ်းထောင်များ အနီးတွင် မိသားစုဝင်များက မျှော်လင့်တကြီး လာရောက် စောင့်ဆိုင်းခဲ့ ကြသော်လည်း လွတ်မြောက်လာသူ ဦးရေသည် ကြေညာခဲ့သည့် အကျဉ်းသားဦးရေနှင့် နှိုင်းယှဉ်ပါက နည်းပါး နေသောကြောင့် ကျန်ရှိသူများ၏ မိသားစုဝင်များအကြား စိတ်ပျက်နေကြသည်ဟု နီးစပ်သူက ပြောသည်။ ၂၀၂၅ ခုနှစ် အစောပိုင်း စာရင်းများအရ ထားဝယ် အကျဉ်းထောင်တွင် နိုင်ငံရေး အကျဉ်းသား ၄၀၀ ကျော် အပါအဝင် အကျဉ်းသား တစ်ထောင်ကျော်ရှိပြီး မြိတ်အကျဉ်းထောင်တွင် အကျဉ်းသူ/သား စုစုပေါင်း ၂၀၀၀ ကျော်ရှိသည်။ ထိုအထဲမှ ၁၀ ဦးသာ လွတ်လာခြင်း ဖြစ်သည်။ မြိတ်အကျဉ်းထောင်မှ နိုင်ငံရေးအကျဉ်းသား၊ အကျဉ်းသူ ၅ ဦး (အမျိုးသမီး ၄ ဦး၊ အမျိုးသား ၁ ဦး) နှင့် ထားဝယ်အကျဉ်းထောင်မှ ၅ ဦး (အမျိုးသား ၂ ဦး၊ အမျိုးသမီး ၃ ဦး) တို့သည် ပုဒ်မ ၅၀၅ - က ဖြင့် အကျဉ်းချ ခံထားရသူများဖြစ်ပြီး ယခုရုတ်သိမ်းချက်ကြောင့် လွတ်မြောက်ခဲ့ခြင်း ဖြစ်သည်။ လွတ်မြောက်လာသူများမှာ နောက်ထပ် စစ်အာဏာသိမ်းမှုကို ဆန့်ကျင်သည့် လှုပ်ရှားမှုမျိုး ထပ်မံပြုလုပ်ပါက ယခုလက်ကျန် ပြစ်ဒဏ်များကိုပါ ပြန်လည်ကျခံရမည်ဟူသော ခံဝန်ချက်ကို လက်မှတ်ရေးထိုး ခဲ့ရခြင်း ဖြစ်သည်။ ကော့သောင်းအကျဉ်းထောင်တွင်မူ လွတ်မြောက်လာသူ ရှိမရှိကိုမူ စုံစမ်းမေးမြန်း၍ မရသေးဘူးဟု နိုင်ငံရေး အကျဉ်းသား မိသားစုဝင်များနှင့် နီးစပ်သူတစ်ဦးက ပြောသည်။ စစ်ကော်မရှင်သည် နိုဝင်ဘာလ ၂၆ ရက်နေ့ ညပိုင်းတွင် ပုဒ်မ ၅၀၅-က ဖြင့် အကျဉ်းကျခံထားရသူ ၃,၀၈၅ ဦးအား လွှတ်ပေးရန်နှင့် အမှုရင်ဆိုင်နေရသူ ၅,၅၈၀ ဦး၏ အမှုများကို ရုတ်သိမ်းပေးရန် ထုတ်ပြန်ခဲ့သည်။ အဆိုပါ ထုတ်ပြန်ချက်ထဲတွင် မကြာမီ ဒီဇင်ဘာလအတွင်း ကျင်းပမည့် ရွေးကောက်ပွဲတွင် မဲပေးနိုင်ရန်နှင့် ရွေးကောက်ပွဲ အောင်မြင်ရန်တို့အတွက် ယခုကဲ့သို့ လွတ်ပေးခြင်းဖြစ်သည်ဟု ပါရှိသည်။ စစ်ကော်မရှင်၏ ယခုလုပ်ရပ်သည် နိုင်ငံတကာ ဖိအားများကို လျော့ချရန်နှင့် လာမည့်ရွေးကောက်ပွဲ အတွက်သာ ရည်ရွယ်သည့် နိုင်ငံရေးအရ ချိန်ကိုက်ထားသော လှုပ်ရှားမှု အဖြစ် နိုင်ကျဉ်းအရေး တက်ကြွလှုပ်ရှားသူများက သုံးသပ်ကြသည်။  ဓါတ်ပုံ - မြိတ်အကျဥ်းထောင်နှင့် ထားဝယ်အကျဥ်းထောင်တို့မှ လွတ်မြောက်လာသူများပုံ။

မြိတ်နှင့် ထားဝယ်ထောင်မှ နိုင်ကျဉ်း ၁၀ ဦး သာ လွတ်မြောက်

Nov 27

ဦးကျော်မိုးထွန်း ကုလသမဂ္ဂ မြန်မာနိုင်ငံဆိုင်ရာ ကိုယ်စားလှယ် အဖြစ် ဆက်လက် တည်ရှိမည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၇ ရက်။ ကုလသမဂ္ဂ ဆိုင်ရာ မြန်မာနိုင်ငံအမြဲတမ်း ကိုယ်စားလှယ်အဖြစ် သံအမတ်ကြီး ဦးကျော်မိုးထွန်းကို ဆက်လက်ထားရှိရန် နိုင်ငံကိုယ်စားပြု ကိုယ်စားလှယ် စိစစ်ရေး ကော်မတီက မနေ့က အစည်းအဝေးတွင် ကန့်ကွက်သူမရှိ အတည်ပြုခဲ့သည်။ သံအမတ်ကြီး ဦးကျော်မိုးထွန်းသည် ကုလသမဂ္ဂ ဆိုင်ရာ မြန်မာအမြဲတမ်း ကိုယ်စားလှယ်အဖြစ် NLD အစိုးရ လက်ထက်ကတည်း က တာဝန်ထမ်းဆောင်သူ ဖြစ်သည်။ စစ်တပ်က အာဏာသိမ်းယူသည့် ၂၀၂၁ ခုနှစ် ဖေဖော်ဝါရီလတွင် အာဏာသိမ်းမှုကို ဆန့်ကျင်ပြီး ပြည်သူလူထုဘက်မှ ရပ်တည်ခဲ့သူဖြစ်သည်။ ၂၀၂၁ ခုနှစ် ဖေဖော်ဝါရီ ၂၆ ရက်နေ့က ကုလသမဂ္ဂ အထွေထွေ ညီလာခံတွင် ဦးကျော်မိုးထွန်းက လက်သုံးချောင်းထောင်က စစ်ကောင်စီ အာဏာသိမ်းမှုကို ဆန့်ကျင်ခဲ့ပြီး အမျိုးသား ဒီမိုကရေစီ အဖွဲ့ချုပ် NLD ကိုယ်စား ရပ်တည်ခဲ့သည်။ စစ်ကောင်စီက သူ့ကို နောက်တရက်တွင် သံအမတ်ကြီး အဖြစ်မှ ထုတ်ပယ်ကြောင်း ကျေညာခဲ့သည်။ သို့သော်လည်း ကုလသမဂ္ဂ အနေဖြင့် မြန်မာစစ်ကောင်စီကို မြန်မာနိုင်ငံ ကိုယ်စားပြုအဖြစ် အသိအမှတ် ပြုခြင်းမပြုခဲ့သည့်အတွက် သံအမတ်ကြီး ဦးကျော်မိုးထွန်းသည် ကုလသမဂ္ဂ ဆိုင်ရာ မြန်မာနိုင်ငံ အမြဲတမ်း ကိုယ်စားလှယ်အဖြစ် ဆက်လက် ရပ်တည်နိုင်ခဲ့ခြင်း ဖြစ်သည်။ ယင်း အနေအထားကို နှစ်စဉ် သက်တမ်းတိုးလာခဲ့ရာမှ ယခုနှစ်တွင်လည်း မြန်မာနိုင်ငံ ကိုယ်စားလှယ်အဖြစ် ဆက်လက် တည်ရှိခွင့် ရရှိခဲ့ခြင်း ဖြစ်သည်။

ဦးကျော်မိုးထွန်း ကုလသမဂ္ဂ မြန်မာနိုင်ငံဆိုင်ရာ ကိုယ်စားလှယ် အဖြစ် ဆက်လက် တည်ရှိမည်

Nov 27

ကချင်ပြည် မြို့နယ် ၃ ခုတွင် စစ်ရေးတင်းမာမှုနှင့် ထိုးစစ်ဆင်မှုများ ဆက်ရှိနေ သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ နိုဝင်ဘာလ ၂၇ ရက်။ ကချင်ပြည်ရှိ ဖားကန့်၊ ဝိုင်းမော်နှင့် ဗန်းမော်မြို့နယ်များတွင် စစ်ရေးတင်းမာမှုများ ဆက်လက်ဖြစ်ပွားနေပြီး၊ အထူးသဖြင့် ဖားကန့်မြို့နယ်၌ စစ်ကော်မရှင်တပ်၏ ထိုးစစ်ဆင်မှုများကြောင့် အရပ်သားထိခိုက်သေဆုံးမှုများ မြင့်တက်လာသည်ဟု ဒေသခံသတင်းရင်းမြစ်များနှင့် တော်လှန်ရေးအဖွဲ့များက ပြောသည်။ နိုဝင်ဘာလ ၂၅ ရက်နေ့ ညပိုင်းက ဖားကန့်မြို့နယ်၊ ကုဋေမှော်နှင့် ဆန်းကြွယ်ကျေးရွာများဘက်သို့ အင်အားကြီး စစ်ကြောင်းထိုးလာသည့် စစ်ကော်မရှင် ပူးပေါင်းတပ် (ဒကစ၊ SNA ရှမ်းနီ ပြည်သူ့စစ်အဖွဲ့) ကို ကချင်လွတ်လပ် ရေး တပ်မတော် KIA နှင့် KPDF ပူးပေါင်းတပ်ဖွဲ့တို့က ခုခံတိုက်ခိုက်ခဲ့သည်။ “ဒီစစ်ကြောင်းမှာ ဒကစ (၃)၊ SNA ရှမ်းနီ ပြည်သူ့စစ်အဖွဲ့ဝင်တွေ အပါအဝင် အင်အား ၅၀ ကျော် ပါဝင်ပြီး၊ ရွေးကောက်ပွဲအတွက် နယ်မြေရှင်းလင်းရေး လုပ်ဆောင်တာ ဖြစ်နိုင်တယ်လို့ တော်လှန်ရေး တပ်ဖွဲ့ဝင်တွေက ပြောပါတယ်” ဟု မြေပြင် သတင်းအရင်းမြစ်က ပြောသည်။ အဆိုပါတိုက်ပွဲကြောင့် နိုဝင်ဘာလ ၂၆ ရက်နေ့တွင် စစ်ကော်မရှင်ဘက်မှ စစ်ကြောင်းမှူးအဆင့် အရာရှိတစ်ဦး အပါအဝင် ၁၀ ဦးကျော် သေဆုံးခဲ့ပြီး စစ်သုံ့ပန်းအချို့ကို ဖမ်းဆီးရမိခဲ့ကြောင်း ဖားကန့်ဒေသခံ သတင်း အရင်းအမြစ်များက ပြောသည်။ ယင်းတိုက်ပွဲများအတွင်း တော်လှန်ရေးတပ်ဖွဲ့ဝင် KPDF တစ်ဦးလည်း ကျဆုံးခဲ့ရသည်။ လက်ရှိတွင် စစ်ကော်မရှင် စစ်ကြောင်းတစ်ကြောင်းသည် ကုဋေမှော်ဘုန်းကြီးကျောင်းနှင့် စာသင်ကျောင်း တို့တွင် ဝင်ရောက်တပ်စွဲထားဆဲဖြစ်ပြီး ဒေသခံများက တိုက်ပွဲဖြစ်ပွားလာမည်ကို စိုးရိမ်နေကြသည်။ စစ်ကော်မရှင်တပ်သည် ၎င်းတို့၏ စစ်ကြောင်းထိုးမှုကို ရွေးကောက်ပွဲအတွက် နယ်မြေရှင်းလင်းရေး လုပ်ဆောင် ခြင်းဖြစ်နိုင်ကြောင်း တော်လှန်ရေးတပ်ဖွဲ့ဝင်များက သုံးသပ်သည်။ စစ်ကော်မရှင်တပ်က နိုဝင်ဘာလ ၂၅ ရက်နေ့၊ နံနက်ပိုင်းက မလောင်ကုန်းနားတဝိုက်ကို လက်နက်ကြီးများဖြင့် ရမ်းသန်းပစ်ခတ်ခဲ့ပြီး၊ ကုဋေမှော်ရှိ မီးသတ်ရုံးကို ထိမှန်ပေါက်ကွဲခဲ့ရာ မီးသတ်ဝန်ထမ်းတစ်ဦး လက်နက်ကြီး စထိမှန် ဒဏ်ရာရရှိခဲ့ကြောင်း ဒေသခံများက ပြောသည်။ ဝိုင်းမော်မြို့နယ်တွင် နိုဝင်ဘာ ၂၄ ရက်နေ့က စစ်ကောင်စီနှင့် KIA ပူးပေါင်းတပ်ဖွဲ့တို့ကြား လမြန်ကျေးရွာအနီး ထိတွေ့တိုက်ပွဲဖြစ်ခဲ့ပြီး၊ လက်နက်ကြီး အပြန်အလှန်ပစ်ခတ်မှုကြောင့် ဝူယာန်ရွာက အရပ်သား ၂ ဦး ထိခိုက်ဒဏ်ရာရခဲ့သည်။ နိုဝင်ဘာလ ၂၀ ရက်နေ့ကလည်း စစ်ကော်မရှင်တပ်၏ ဒရုန်းတိုက်ခိုက်မှုကြောင့် အရပ်သားတစ်ဦး သေဆုံးခဲ့ဖူး သည်။ အလားတူ ဗန်းမော်မြို့နယ်တွင်လည်း စစ်ကော်မရှင်တပ်သည် မြေပြင်၊ လေကြောင်းနှင့် လက်နက်ကြီးများကို အသုံးပြုကာ မြို့တွင်းနေရာများကို ပြန်လည်ထိန်းချုပ်နိုင်ရန် ထိုးစစ်ဆင်နေဆဲဖြစ်သည် ဟု KIA နှင့် နီးစပ်သူ တစ်ဦးက ပြောသည်။ “ဗန်းမော်ဘက်မှာလည်း စစ်ကော်မရှင်တပ်က မြေပြင်စစ်ကြောင်း၊ လေကြောင်းနဲ့ လက်နက်ကြီးတွေကို အသုံးပြုပြီး မြို့တွင်းက နေရာတွေကို ပြန်လည်ထိန်းချုပ်နိုင်ဖို့ ထိုးစစ်ဆင်နေဆဲဖြစ်လို့ စစ်ရေးအခြေအနေဟာ ဆက်ပြင်းထန်နေတယ်လို့ KIA က ပြောပါတယ်” ဟု ပြောသည်။ ဒေသတွင်း စစ်ရေးတင်းမာမှုများကြောင့် ဖားကန့်၊ ဝိုင်းမော်နှင့် ဗန်းမော်မြို့နယ်တွေက ဒေသခံ ထောင်နှင့်ချီမှာ ယခင်ကတည်းက စစ်ဘေးတိမ်းရှောင်နေကြရသူများ အပြင် နောက်ထပ် ထွက်ပြေးတိမ်းရှောင်သူများပါ ထပ်မံတိုးလာခဲ့သည်။ ၎င်းတို့သည် စစ်ကော်မရှင်တပ်၏ လေကြောင်း အန္တရာယ်များကြောင့် ဘေးလွတ်ရာသို့ ရွှေ့ပြောင်းနေကြရပြီး၊ နေရပ်ရင်းကို ယခုတိုင် ပြန်လည်ဝင်ရောက်နိုင်ခြင်းမရှိဘဲ အခက်အခဲများစွာဖြင့် ရင်ဆိုင်နေကြရဆဲဖြစ်သည်။ ဓါတ်ပုံ - ပုံဟောင်း (ဦးဇော်မိုး)

ကချင်ပြည် မြို့နယ် ၃ ခုတွင် စစ်ရေးတင်းမာမှုနှင့် ထိုးစစ်ဆင်မှုများ ဆက်ရှိနေ

Nov 27

မြိတ် အားကစားကွင်း အရှေ့ဖက် မှ ဆိုင်ခန်းများ နစ်နာကြေးမပေးပဲ ဖယ်ရှားခိုင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၇ ရက်။ တနင်္သာရီတိုင်းဒေသကြီး၊ မြိတ်မြို့ရှိ မြို့မအားကစားကွင်း အရှေ့ဘက်တွင် နှစ်ပေါင်းများစွာ တည်ရှိခဲ့သော ဆိုင်ခန်းတွဲပေါင်း ၃၀ နီးပါးကို အားကစားဝန်ကြီးဌာန၏ အမိန့်ဖြင့် နိုဝင်ဘာလ ၃၀ ရက်နေ့ နောက်ဆုံးထား၍ အပြီးသတ် ဖယ်ရှားပေးရန် အဓမ္မစေခိုင်းခံနေရသည်ဟု ဆိုင်ခန်းပိုင်ရှင်များက ပြောသည်။ အဆိုပါ ဖယ်ရှားမှုသည် မြို့မအားကစားကွင်းကို အဆင့်မြင့် တိုးချဲ့ဆောက်လုပ်မည့် စီမံကိန်းကြောင့်ဖြစ်ကြောင်း သိရှိရပြီး၊ နှစ်ရှည် စာချုပ်စာတမ်းဖြင့် တရားဝင် ဝယ်ယူထားသူများအနေဖြင့် နစ်နာကြေး တစ်စုံတစ်ရာ မရဘဲ ရုတ်တရက် ဖယ်ရှားခံရသည်ဟု ဆိုင်ခန်း ပိုင်ရှင်များက ပြောသည်။ ဖယ်ရှားခံရမည့် ဆိုင်ခန်းတွဲများတွင် အိမ်သုံးပစ္စည်းအမျိုးမျိုး၊ လျပ်စစ်ပစ္စည်းဆိုင်များ၊ အထည်ဆိုင်များ၊ အလှပြင်ဆိုင်များ၊ ကား/လေယာဉ် လက်မှတ်အရောင်းဆိုင်များနှင့် အစားအသောက်ဆိုင်များ ပါဝင်သည်။ ဆိုင်ခန်းပိုင်ရှင် အများစုသည် နှစ် ၃၀ စာချုပ်ဖြင့် တရားဝင် ရောင်းချဝယ်ယူထားခြင်းဖြစ်ပြီး၊ အချို့မှာ စာချုပ် သက်တမ်း ပြည့်ရန် လေးနှစ်ခန့်လိုသေးသည်ဟု ဆိုသည်။ အသက် ၅၀ ခန့်အရွယ် ဆိုင်ခန်းပိုင်ရှင် အမျိုးသားတစ်ဦးက “တရားဝင် နှစ်ရှည်စာချုပ်နဲ့ ဝယ်ထားတာပါ၊ နှစ်ပြည့်အောင် မစောင့်ဘဲ ချက်ခြင်းကြီး မောင်းထုတ်တာက အတော်လေး လွန်တယ်ဗျာ၊ တဆင့်ငှားရမ်းတဲ့ သူတွေကတော့ ထားပါတော့၊ စာချုပ်စာတမ်းနဲ့ တရားဝင် ဝယ်ထားတဲ့သူတွေမှာ အရမ်း နစ်နာပါတယ်၊ အာ ဏာကြီးနဲ့အချိန် ဆယ်ရက်လောက်နဲ့ ဖယ်ခိုင်းတာဆိုတော့ ဖယ်ပေးရမှာပေါ့လေ” ဟု ပြောသည်။ ဆိုင်ခန်းများကို ဖယ်ရှားပေးရန် မြို့နယ်အားကစားဦးစီးဌာနမှ ပေးပို့သော အကြောင်းကြားစာတွင်လည်း အခန်း ပိုင်ရှင်များအား နစ်နာကြေးအတွက် တစ်စုံတစ်ရာ ပြန်ပေးရန် ဆိုသည်ကို ထည့်သွင်းဖော်ပြထားခြင်း မရှိကြောင်း ဆိုင်ခန်းပိုင်ရှင်များက ပြောသည်။ ဆိုင်ခန်းတွဲနေရာများကို ဖြိုဖျက်ပြီးနောက် မြို့မအားကစားကွင်းကို အဆင့်မြင့် တိုးချဲ့ဆောက်လုပ်သွားမည် ဖြစ်ကြောင်း မြို့ခံများက ပြောဆိုသည်။ ထိုစီမံကိန်းသည် စစ်ကော်မရှင်ခေါင်းဆောင် မြိတ်မြို့သို့ လာရောက်ခဲ့စဉ်က မြိတ်မြို့မအားကစားကွင်းကို တိုးချဲ့ဆောက်လုပ်ရန်နှင့် မြိတ်လေယာဉ်ကွင်းကိုပါ တိုးချဲ့ရန်အတွက် ပြောဆိုသွားခဲ့ခြင်းနှင့် ဆက်စပ်မှုရှိသည်ဟု မြို့ခံများက ယူဆနေကြသည်။ ဒေသအတွင်း အုပ်ချုပ်ရေး အာဏာတည်ငြိမ်မှု မရှိသေးသည့် ကာလတွင် နှစ်ရှည်စာချုပ်ဖြင့် ရင်းနှီးမြှုပ်နှံထား သည့် ပြည်သူများအား အချိန်တိုအတွင်း နစ်နာကြေးမပါဘဲ ဖယ်ရှားခိုင်းခြင်းသည် အာဏာသုံး ဖိအားပေးမှုသာ ဖြစ်ပြီး၊ တရားဥပဒေ စိုးမိုးရေးအရ မသင့်လျော်ဟု ဆိုင်ခန်းပိုင်ရှင်များက ထောက်ပြဝေဖန်လျက်ရှိသည်။

မြိတ် အားကစားကွင်း အရှေ့ဖက် မှ ဆိုင်ခန်းများ နစ်နာကြေးမပေးပဲ ဖယ်ရှားခိုင်း

Nov 27

မိုးကုတ် သယံဇာတများ TNLA က တတ်စွမ်းသလောက် ထုတ်ယူသွားဟု ဒေသခံများပြော သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၇ ရက်။ တအာင်းတပ် TNLA ထိန်းချုပ်မှု နောက်ဆုံးအချိန်အထိ မြို့၏ အဖိုးတန်သယံဇာတများကို “အလွန်အကျွံ” ထုတ်ယူခြင်းနှင့် ပြည်သူပိုင်ပစ္စည်းများ သိမ်းယူခြင်းတို့ကြောင့် မြို့၏ အမွေအနှစ်နှင့် သဘာဝပတ်ဝန်းကျင် “ပြင်းထန်စွာ” ထိခိုက်ပျက်စီးခဲ့ရကြောင်း မြို့ခံများက ပြောသည်။ စစ်ရေးအရ သိမ်းယူထားသော မြို့ကို စွန့်ခွာချိန်တွင် မိုးကုတ်မြို့သည် ‘အခွံသက်သက်’ သာ ကျန်ရှိတော့မည့် အခြေအနေကို “ရင်နာစရာ” မြင်တွေ့နေရသည်ဟု ဒေသခံများက ပြောသည်။ TNLA က မိုးကုတ်မြို့ကို သိမ်းယူထားသည့် ကာလတစ်လျှောက်လုံး၊ ၎င်းတို့နှင့် အဆက်အသွယ်ရှိသော တရုတ်ကုမ္ပဏီများနှင့် မဟာမိတ် ကိုးကန့်ဒေသမှ လုပ်ငန်းများကို ပတ္တမြားမြေတွင် ကျောက်တူးဖော်ခွင့်များ ချထားပေးခဲ့သည်။ ယခင်က တူးဖော်ခြင်းမရှိသည့် မြို့ရှိ ဂေါက်ကွင်းနှင့် ပတ်ဝန်းကျင် ဒေသများတွင်ပင် ကျောက်တူးဖော်မှုအား “အရှိန်အဟုန်ဖြင့်” ပြုလုပ်ခဲ့ခြင်းကို ဒေသခံများက ထောက်ပြကြသည်။ အပစ်အခတ်ရပ်စဲရေးအရ တအာင်းတပ် TNLA က မြို့မှ ဆုတ်ခွာရန် နီးကပ်လာသော နောက်ဆုံးအချိန်အထိ တရုတ်ကုမ္ပဏီများက ဂေါက်ကွင်းတွင် ကျောက်တူးဖော်မှု အရှိန်မြှင့်တင် လုပ်ကိုင်ခဲ့သည်။ မိုးကုတ်မြို့ခံ အမျိုးသမီးတစ်ဦးက “ကျမတို့ မြို့ရဲ့ ဂေါက်ကွင်းလည်း ကုန်ပြီ ရစရာကို မရှိတော့ဘူး။ ကျမတို့ရဲ့ ဒီဂေါက်ကွင်းကြီးကိုပါ ကျောက်တူးခွင့် ပေးခဲ့တာက ကျမတို့ ဒေသခံတွေရဲ့ မျက်နှာကို လုံးဝ မထောက်ခဲ့တဲ့ ရုပ်ဆိုးအကျည်းတန်တဲ့ လုပ်ရပ်ပဲ။ ဒီလိုဆုံးရှုံးမှုက ငွေနဲ့ ပြန်ဝယ်လို့ မရနိုင်ဘူး” ဟု ပြောသည်။ ဒေသခံကျောက်တူးသမားများကိုပါ ထုတ်ယူခွင့်ပေးမှု အနည်းငယ်ရှိခဲ့သည် ဆိုသော်လည်း အများစုမှာ တရုတ်ကုမ္ပဏီများကသာ လုပ်ကွက်ရရှိခဲ့ခြင်း ဖြစ်ပြီး အဆိုပါ ကျောက်တူးဖော်ရေး လုပ်ကွက် များတွင်လည်း ဒေသခံများကို ခေါ်ယူငှားရမ်းခြင်းပင် မရှိခဲ့ဟု ဆိုသည်။ တအာင်းတပ် TNLA ဆုတ်ခွာချိန်တွင် သဘာဝသယံဇာတများ အပြင် မြို့လယ်ရှိ ပြည်သူပိုင်ပစ္စည်းများ၊ ဌာနဆိုင်ရာ ပရိဘောဂများနှင့် သစ်တောထွက် ပစ္စည်းများကိုပင် ယူဆောင်သွားခဲ့ကြောင်း ဒေသခံများက ထောက်ပြသည်။ မြို့၏ စိမ်းစိုသော အမွေအနှစ်များကိုပါ ထိခိုက်ခဲ့သည့်အပေါ် ပြည်သူများက ရင်နာနေရသည်ဟု ဆိုသည်။ မိုးကုတ်မြို့ခံ တစ်ဦးက “နောက်ဆုံး ကုန်ကုန်ပြောရရင်‌တော့ သစ်တောဆို သစ်တောဌာနမှာစိုက်တဲ့ ကျွန်းပင် ကစ ခုတ်လှဲပြီး ယူသွားတာမျိုး ဒါကျတော့ ရုပ်ဆိုးတဲ့ အပိုင်းတွေဖြစ်ပါတယ်” ဟု ပြောသည်။ အဆိုပါ ကိစ္စရပ်များနှင့် ပတ်သက်၍ တအာင်းတပ် TNLA ပြောခွင့်ရ လွေးယေဦးကို ဆက်သွယ်ခဲ့သော်လည်း ဆက်သွယ်၍ မရခဲ့ပေ။ အခြားဒေသခံတစ်ဦးကလည်း “ဒီလိုမျိုးကြီး ပေးလိုက်တယ်ဆိုတာ ပြည်သူလည်း အခုလက်ရှိ မိုးကုတ်၊ မိုးမိတ် ကို ပေးလိုက်တဲ့ ပြည်သူလူထုတွေလည်း မျက်နှာမထောက် သူတို့ရဲ့လူမျိုးအတွက်ပဲ သူတို့လုပ်သွားတယ်လို့ ထင်တယ်” ဟု ပြောသည်။ TNLA ၏ လုပ်ဆောင်မှုများကို တားမြစ်၍ မရနိုင်သောကြောင့် “ရင်နာနာဖြင့်” လက်ပိုက်ကြည့်နေရသည် ဟုလည်း မြို့ခံများက ပြောသည်။ နိုဝင်ဘာလ နောက်ဆုံးပတ်ထိ မြို့ခံလူဦးရေ ထက်ဝက်ကျော်သည် စစ်ကော်မရှင်၏ ထိုးစစ်အသစ်နှင့် ဗုံးကြဲ တိုက်ခိုက်မှုများကို စိုးရိမ်သဖြင့် ဆက်လက် ထွက်ပြေးတိမ်းရှောင်နေကြရသည်။ မြို့ကို ပြန်လည်လွှဲပြောင်းပေးခြင်းကြောင့် လုံခြုံရေး မတည်ငြိမ်မှုများအပြင် သယံဇာတ ထုတ်ယူမှုကြောင့် ပျက်စီးသွားသော ပတ်ဝန်းကျင်နှင့် စီးပွားရေးအခက်အခဲများကိုပါ ရင်ဆိုင်ကြုံတွေ့နေရသော မိုးကုတ် ဒေသခံများသည် မျှတမှုရှိသော အုပ်ချုပ်မှုနှင့် လုံခြုံရေးကိုသာ အဓိက မျှော်လင့် တောင်းဆိုနေကြသည်။

မိုးကုတ် သယံဇာတများ TNLA က တတ်စွမ်းသလောက် ထုတ်ယူသွားဟု ဒေသခံများပြော

« Prev 1 … 157 158 159 160 161 … 1,115 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု — August 21, 2026 8:07 pm
ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု — August 21, 2026 8:04 pm
အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း — August 21, 2026 8:02 pm

Recent Posts

ရွှေကူ လေကြောင်းတိုက်ခိုက်မှုတွင် ကိုယ်ဝန်ဆောင် အမျိုးသမီးအပါ အရပ်သားများ ဒဏ်ရာရ
သောင်ရင်းမြစ်ရေတက်ပြီး မြဝတီနှင့် မဲဆောက်တွင် ရေကြီးရေလျှံမှုဖြစ်
အင်းလေးရေ မြင့်တက်လာ၍ ကြိုတင်ရွှေ့ပြောင်းမှုများ ပြုလုပ်
မြောင် ဘုန်းကြီးကျောင်း ဥပုသ်နေ့တွင် ဗုံးကြဲခံရ၍ ၁၂ ဦး ထက်မနည်း သေဆုံး
ဂွနှင့်သံတွဲကို စစ်တပ်က လေယာဉ်အုပ်ဖွဲ့ ဗုံးကြဲမှုကြောင့် စစ်ဘေးရှောင်များ ဒဏ်ရာရ

Archives

Archives

×Close