NMG Doh – Page 160 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Nov 27

လွိုင်ကော်ထောင် အကျဉ်းသားများအား မဲထည့်ခိုင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၆ ရက်။ စစ်ကော်မရှင်က လွိုင်ကော်ထောင်ရှိ အကျဉ်းသားများအား ဖိအားပေးပြီး မဲမသာမှု လုပ်ဆောင်နေသည်ဟု ကရင်နီ နိုင်ကျဉ်း များ အဖွဲ့က စွပ်စွဲပြောဆိုသည်။ ကရင်နီပြည်၊ လွိုင်ကော်အကျဉ်းထောင်တွင် စစ်ကော်မရှင်က အကျဉ်းသားများကို မဖြစ်မနေ မဲပေးရန် ဖိအားပေးခဲ့သည်ဟု ကရင်နီ နိုင်ငံရေးအကျဉ်းသားများ အစည်းအရုံး (KPPA) က နိုဝင်ဘာလ ၂၅ ရက်နေ့တွင် ထုတ်ပြန်သည်။ လွိုင်ကော်အကျဉ်းထောင်တွင် ပြီးခဲ့သည့် စက်တင်ဘာလအတွင်း အချုပ်သားနှင့် အကျဉ်းသား စုစုပေါင်း ၇၀၀ ကျော်အား မဲပေးရန် စေခိုင်းခဲ့ခြင်း ဖြစ်သည်ဟု KPPA က ဆိုသည်။ KPPA ပြောရေးဆိုခွင့်ရှိသူက “သတိထားရမယ့် အချက်က ပြစ်ဒဏ်ချမှတ်ခံရသူက မဲပေးပိုင်ခွင့် မရှိဘူး။ အဲ့ဒါ အပြင် ပြစ်ဒဏ်ချမှတ်ခံရသူတွေရဲ့ နာမည်တွေကလည်း မဲစာရင်းမှာ မရှိဘူး။ ဆိုတော့ ဒီလိုကိစ္စကို ဗမာ့ တပ်မတော် က သိုသိုဝှက်ဝှက် လုပ်နေတာက နိုင်ငံရေး ရွှေ့ကစားဖို့အတွက်၊ မဲမသာမှုကိစ္စတွေ ဆောင်ရွက်ဖို့ အတွက် ကြိုတင်ကြံစည်ခြင်းပဲ ဖြစ်တယ်လို့ ယူဆပါတယ်” ဟု ပြောသည်။ အကျဉ်းသားများအား မဲပေးခိုင်းရာတွင် ပါတီတစ်ခုတည်းကိုသာ ပေးရန် ဖိအားပေးမှု ရှိ/မရှိ မေးမြန်းရာတွင်မူ ပါတီရွေးချယ်ခိုင်းသည့် ဖိအားပေးမှုမျိုး မကြားရသော်လည်း ‘မဲမပေးရင် မနေရဘူး’ ဆိုသည့် ပုံစံဖြင့် အတင်းအကြပ် စေခိုင်းခဲ့ခြင်းဖြစ်ကြောင်း KPPA ပြောရေးဆိုခွင့်ရှိသူက ပြောသည်။ “အဲ့လိုမျိုးတော့ မကြားမိဘူးပေါ့နော်။ ဒါပေမယ့် မဲမပေးရင် မနေရဘူးဆိုတဲ့ ပုံစံနဲ့ အတင်းအကြပ်ပေးခိုင်းတာ ပေါ့နော်” ဟု KPPA ပြောရေးဆိုခွင့်ရှိသူက ပြောသည်။ KPPA က အကျဉ်းကျခံနေရသူများအား မဖြစ်မနေ မဲပေးခိုင်းခြင်းသည် စစ်ကော်မရှင်က ရွေးကောက်ပွဲဆိုင်ရာ ဥပဒေများကို ပြောင်ပြောင်တင်းတင်း ကျူးလွန်နေခြင်းဖြစ်ပြီး၊ တစ်နည်းအားဖြင့် တရားမျှတစွာ မဲပေးပိုင်ခွင့် ဖြစ်သည့် နိုင်ငံသား အခွင့်အရေးကိုလည်း စော်ကားလိုက်ခြင်းပင် ဖြစ်သည်ဟု ဖော်ပြထားသည်။ KPPA သည် စစ်ကော်မရှင်က ကျင်းပမည့် ရွေးကောက်ပွဲကို အပြင်းအထန် ဆန့်ကျင်ကန့်ကွက်ကြောင်း ၎င်းတို့ ၏ နိုဝင်ဘာလ ၇ ရက်နေ့ ထုတ်ပြန်ချက်၌ ဖော်ပြထားသည်။ ထို့အပြင် ရွေးကောက်ပွဲ၌ ပြည်သူ့ပါတီမှ ဝင်ရောက်ယှဉ်ပြိုင်မည့် မောင်သက်မှူးအောင် ကိုလည်း အဖွဲ့ဝင်အဖြစ် မှ ထုတ်ပယ်လိုက်ကြောင်း ကြေညာထားသည်။ KPPA ကို ၂၀၂၃ ခုနှစ်၊ နိုဝင်ဘာလ ၂၃ ရက်နေ့တွင် ဒီးမော့ဆိုမြို့နယ်၊ ယူဆမိုဆို ကျေးရွာ၌ ပထမအကြိမ်မြောက် နိုင်ကျဉ်းဟောင်းများဆိုင်ရာ ညီလာခံ ကျင်းပသည့်ရက်တွင် ဖွဲ့စည်းခဲ့ပြီး၊ လွတ်မြောက်လာသည့် နိုင်ကျဉ်း အားလုံးကို အဖွဲ့ဝင်အဖြစ် သတ်မှတ်ထားသည်။

လွိုင်ကော်ထောင် အကျဉ်းသားများအား မဲထည့်ခိုင်း

Nov 27

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၆ ရက်။ တနင်္သာရီတိုင်း ဒေသကြီး၊ မြန်မာ-ထိုင်းနယ်စပ်ရှိ အရေးပါသော ကုန်သွယ်ရေးမြို့ဖြစ်သည့် မောတောင်မြို့သိမ်း တိုက်ပွဲ ကြောင့် တိမ်းရှောင်ခဲ့ရသည့် ဒေသခံ ၃,၀၀၀ ဝန်းကျင် သည် နေရပ်သို့ ပြန်၍ မရသည့်အပြင် ထိုင်းဘက်ခြမ်းတွင်ပါ ဆက်လက်ခိုလှုံရန် ခက်ခဲနေသည်ဟု အကူအညီပေးနေသူများက ပြောသည်။ မောတောင်မြို့ကို ကရင်အမျိုးသား လွတ်မြောက်ရေး တပ်မတော် (KNLA) ဦးဆောင်သည့် ပူးပေါင်းတပ်က နိုဝင်ဘာ ၁၄ ရက်နေ့တွင် အပြီးသတ် သိမ်းပိုက်နိုင်ခဲ့သော်လည်း၊ မြို့၏ အဓိက လမ်းမကြီးပေါ်ရှိ သိန်ခွန်း နှင့် သဲဖြူကျေးရွာ တို့တွင် နိုဝင်ဘာလ ၁၅ ရက်နေ့မှစ၍ ယနေ့အထိ တိုက်ပွဲများ ပြင်းထန်နေဆဲ ဖြစ်သည်။ စစ်ကော်မရှင်တပ်သည် အင်အား အလုံးအရင်းဖြင့် စစ်ကြောင်းထိုးခြင်း၊ လေကြောင်းတိုက်ခိုက်မှုများ ဆက်တိုက် လုပ်နေခြင်းတို့ကြောင့် ဒေသခံများသည် မြို့ထဲသို့ ပြန်လည်ဝင်ရောက်နေထိုင်ရန် စိုးရိမ်ကြောက်ရွံ့ နေကြရသည်။ ခုနှစ်စင်ကြယ်အဖွဲ့ (မြိတ်ခရိုင် စစ်ဘေးရှောင် ကူညီရေး) အဖွဲ့ဝင် ကိုဘလက် က “မောတောင်မြို့အဝင်ဖြစ်တဲ့ သိန်ခွန်းနဲ့ သဲဖြူဆိုတဲ့ကျေးရွာတွေမှာက လက်ရှိအချိန်အထိ တိုက်ပွဲတွေ အရမ်းကြီး ပြင်းထန်နေဆဲဖြစ်တယ်။ အဲ့နှစ်ရွာမှာ စစ်တိုက်နေခြင်းက မောတောင်မြို့ကို ပိတ်ဆို့ လိုက်သလို ဖြစ်တယ်ပေါ့နော်။ အကယ်၍ စစ်ရှောင် တွေက မြို့ထဲကိုပြန်ဝင်ပြီးနေမယ်ဆိုရင် ကျနော်တို့ လေယာဉ်ကို ကြောက်ရတဲ့အနေအထား စိန်ခေါ်မှု ဖြစ်နေ တယ်ပေါ့နော်” ဟု ပြောသည်။ မောတောင်မြို့ဒေသခံ ၁,၄၀၀ ဦးကျော်သည် နိုဝင်ဘာလ ၁၁ ရက်နေ့မှ စ၍ မြန်မာ - ထိုင်းနယ်စပ်ရှိ အလယ်ဂိတ်တွင် တိမ်းရှောင်နေထိုင်ခဲ့ကြသည်။ သို့သော်လည်း စစ်ရှောင်များက အမှိုက်များကို စနစ်တကျ မစွန့်ပစ်ခြင်း၊ ယာယီတဲဆောက်လုပ်ရာတွင် ထိုင်းပိုင် သစ်များကို ခုတ်ယူခြင်းတို့ကြောင့် ထိုင်းအာဏာပိုင်တို့က နိုဝင်ဘာလ ၂၄ ရက်နေ့မှစ၍ နေရပ်ပြန်ခိုင်းသည့် အခြေအနေနှင့် ရင်ဆိုင်ခဲ့ရသည်။ ထို့ကြောင့် စစ်ရှောင်အချို့သည် လေကြောင်းအန္တရာယ်ကို စိုးရိမ်စိတ်ဖြင့်ပင် မြန်မာဘက်ခြမ်းရှိ လုံခြုံသည့် နေရာများသို့ ပြန်လည်ပြောင်းရွှေ့နေကြရသည် ဟု ကိုဘလက်က ဆက်ပြောသည်။ “အဓိကအားဖြင့်က ထောင်နဲ့ချီတဲ့ လူဦးရေတွေက အနီးနားဝန်ကျင်မှာ ယာယီတဲတွေဆောက်ဖို့အတွက် သစ်ခုတ်တဲ့ဟာသည် ထိုင်းရဲ့သစ်တွေ တော်တော်များကိုလည်း ခုတ်တဲ့ဟာထဲမှာ ပါသွားတယ်ပေါ့နော်။ ဆိုတော့ အဲ့လို အခြေအနေမျိုးဖြစ်တဲ့ အခါ ကြတော့ ထိုင်းအာဏာပိုင်တွေက လူဦးရေလျော့ပါးသွားအောင် လုပ်လိုက် တဲ့ဟာမျိုးပဲ ကျနော်ထင်တယ်။” မောတောင်မြို့အနီး တောထဲနှင့် ဥယျာဉ်ခြံများထဲတွင် တိမ်းရှောင်နေရသူ ၇၀၀ ကျော်ရှိပြီး၊ စစ်ကော်မရှင်၏ ရမ်းသန်းပစ်ခတ်မှုများကြောင့် နေရပ်မပြန်ရဲကြသေးပေ။ ကမ်းမယ့်လက်အဖွဲ့ဝင် ကိုပိုင်ကိုဦး က “ပြန်ဝင်လို့ မရသေးဘူးဆိုတာ စစ်ကြောင်းလည်း အမြဲတမ်းထိုးတယ်။ ရဟတ်ယာဉ် ဂျက်ဖိုက်တာနဲ့ ရမ်းသမ်းပစ်လာနေတယ်။ လေယာဉ်နဲ့ ဗုံးကြဲတယ်။ လူရှိတဲ့နေရာတွေကြဲတယ်။ အဲ့တာက အမြဲတမ်း တွေ့မြင်နေရတာကိုးနော်။ ဘယ်လောက် ကြာကြာစစ်ရှောင်ရမလဲ ဆိုရင် အနည်းဆုံး ၂လ ဝန်းကျင်လောက်မှာ ရှိတယ်” ဟု ပြောသည်။ လက်ရှိတွင် စစ်ဘေးရှောင်များအတွက် အစားအစာ ရိက္ခာခြောက်များ၊ စောင်၊ အနွေးထည်များအပြင် ကလေးများအတွက် နို့မှုန့်နှင့် နို့တိုက်ပစ္စည်းများပါ အဓိက လိုအပ်နေကြောင်း အကူအညီပေးနေသူများက ပြော သည်။ စစ်ကော်မရှင်ဘက်က မောတောင်မြို့ကို နည်းအမျိုးမျိုးဖြင့် ပြန်လည်ရယူရန် ကြိုးပမ်းနေခြင်းကြောင့် ဒေသခံ ပြည်သူများအနေဖြင့် ပိတ်ဆို့မှုဒဏ် အမျိုးမျိုးကို ရင်ဆိုင်လာရနိုင်သည်ဟု ကိုဘလက်က ပြောသည်။ ထို့ကြောင့် စစ်ရှောင်အရေးကို အားစိုက်လုပ်ဆောင်ရန်အတွက် သက်ဆိုင်ရာ လူသားချင်း စာနာထောက်ထားမှု အဖွဲ့များ၊ NGO အဖွဲ့အစည်းများ နှင့် ထိုင်းနိုင်ငံသို့ ရောက်ရှိနေသည့် အဖွဲ့အစည်းများအနေဖြင့် မောတောင် စစ်ဘေးရှောင်များကို ကူညီပေးကြရန်နှင့် ဝိုင်းဝန်းအသံထုတ်ပေးကြရန် တိုက်တွန်းနှိုးဆော်ထားသည်။ ဓါတ်ပုံ - ကိုဘလက်

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ

Nov 27

ကျားဖြန့် စခန်းမှ ထွက်လာသော နိုင်ငံခြားသားများ ထိုင်းနယ်စပ်တွင် သောင်တင်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၆ ရက်။ ကရင်ပြည်နယ်၊ မြဝတီမြို့နယ်ရှိ DKBA ထိန်းချုပ်ထားသော မင်းလက်ပံကျေးရွာရှိ ကျားဖြန့်ဂိုဏ်းမှ နိုင်ငံခြား သား ၁,၀၀၀ ကျော် ထိုင်းနယ်စပ်တွင် သောင်တင်နေသည်။ မင်းလက်ပံကျေးရွာ မှ တရားမဝင် အွန်လိုင်းငွေလိမ်ဂိုဏ်း (ကျားဖြန့်) လုပ်သား ၁,၀၀၀ ကျော်သည် သောင်ရင်း မြစ်ကို ဖြတ်ကူး၍ ထိုင်းနိုင်ငံဘက်သို့ ဝင်ရောက်ရန် ကြိုးစားခဲ့သော်လည်း ထိုင်းစစ်တပ်၏ လက်မခံမှုကြောင့် မြန်မာဘက် ကမ်းနဖူးတွင် သောင်တင်နေသည် ဟု နယ်စပ်သတင်းရင်းမြစ်များက ပြောသည်။ ထိုင်း-မြန်မာနယ်စပ်သတင်းရင်းမြစ်တစ်ဦးက “မနေ့ညကတည်းက သောင်းရင်းမြစ် ကမ်းနဖူးမှာ လာစောင့် နေကြတာလို့ သတင်းရတယ်။ နိုင်ငံခြားသား ၁၀၀၀ ကျော်တယ်လို့ ပြောတယ်ဗျ။ ထိုင်းဘက်ကို ဝင်ဖို့ ကြိုးစား တာပေါ့ဗျာ။ မင်းလက်ပံကနေ လာကြတာ။ ထိုင်းက အဝင်မခံဘူး” ဟု ပြောသည်။ ထိုင်းနိုင်ငံဘက်ခြမ်းသို့ ဝင်ရောက်ရန် ကြိုးစားသော နိုင်ငံခြားသား ၁,၀၀၀ ကျော်ကို ထိုင်းစစ်တပ်က လက်မခံဘဲ မြစ်ကမ်းနဖူးတစ်လျှောက်တွင် တစ်ညလုံး စောင့်ကြည့် ပိတ်ဆို့ထားခဲ့သည်ဟု နယ်စပ်သတင်းရင်းမြစ်များက ပြောသည်။ သို့သော် “သူတို့ ထိုင်းနိုင်ငံသားတွေကိုတော့ လက်ခံတယ်လို့တော့ ကြားတယ်ဗျ။ တခြားနိုင်ငံခြားသားတွေက တော့ ဒီနေ့အထိ ဆက်စောင့်နေတုန်းပဲလို့ ပြောတယ်” ဟု အဆိုပါ နယ်စပ်သတင်းရင်းမြစ်က ဆက်ပြောသည်။ အဆိုပါ ဖြစ်စဉ်သည် ကရင်အမျိုးသား အစည်းအရုံး (KNU) လက်အောက်ခံတပ်ဖွဲ့များက DKBA တပ်များ တပ်စွဲထားသည့် မင်းလက်ပံကျေးရွာရှိ ကြီးမားသော ခြံဝင်းကို နိုဝင်ဘာလ ၂၁ ရက်နေ့၊ တိုက်ပွဲများအပြီးတွင် သိမ်းပိုက်ရရှိခဲ့ပြီးနောက် ထွက်ပေါ်လာခြင်းဖြစ်သည်။ KNU က အဆိုပါခြံဝင်းအတွင်း လူရာပေါင်းများစွာကို တရားမဝင်ချုပ်နှောင်ထားသည့် ကျားဖြန့်အလုပ်ရုံများ ကို တွေ့ရှိခဲ့ကြောင်း ယမန်နေ့ (နိုဝင်ဘာ ၂၅ ရက်) က သတင်းထုတ်ပြန်ခဲ့သည်။ KNU ၏ ထုတ်ပြန်ချက် ထွက်ပေါ်လာပြီးနောက် နိုဝင်ဘာလ ၂၅ ရက်နေ့ ည ၁၀ နာရီခန့်တွင် တရုတ်၊ ဗီယက်နမ် နှင့် လာအိုနိုင်ငံသားများသည် ထိုင်းနိုင်ငံဘက်ခြမ်းသို့ ဝင်ရောက်ရန် သောင်ရင်းမြစ်ကို ဖြတ်ကာ ထိုင်းနိုင်ငံ၊ မဲ့ကိုကင်းကျေးရွာဘက်သို့ ထွက်ခွာလာခဲ့ကြခြင်း ဖြစ်သည်ဟု ဆိုသည်။ နိုဝင်ဘာလ ၂၆ ရက်နေ့၊ နံနက်ပိုင်းတွင် စစ်ကော်မရှင်တပ်က မင်းလက်ပံကျေးရွာထိပ်သို့ လေကြောင်းမှ ဗုံးကြဲ တိုက်ခိုက်ခဲ့သောကြောင့် ကျားဖြန့်လုပ်သား အများစုမှာ ယနေ့ ညနေပိုင်းတွင် ထိုင်းနိုင်ငံဘက်ခြမ်းသို့ ထပ်မံ ရောက်ရှိနေသည်ဟု မြေပြင် သတင်းရင်းမြစ်က ဆိုသည်။ DKBA ၏ အကာအကွယ်အောက်တွင်ရှိသော အဆိုပါ ကျားဖြန့်လုပ်ငန်းခွင်များသည် KNU ၏ ဝင်ရောက် စစ်ဆေးမှုများကြောင့် နိုင်ငံတကာ၏ အာရုံစိုက်မှုကို ခံနေရပြီး၊ KNU ကလည်း အဆိုပါ အလုပ်ရုံများမှ အခြေ အနေများကို စုံစမ်းဖော်ထုတ်ရန် နိုင်ငံတကာသို့ အကူအညီတောင်းခံထားသည်။

ကျားဖြန့် စခန်းမှ ထွက်လာသော နိုင်ငံခြားသားများ ထိုင်းနယ်စပ်တွင် သောင်တင်နေ

Nov 27

အိန္ဒိယ နယ်စပ် စစ်ရှောင်များအကြား ဖြစ်ပွားနေသည့် ဝမ်းလျှောရောဂါ ထိန်းချုပ်နိုင်ပြီ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၆ ရက်။ မြန်မာ-အိန္ဒိယနယ်စပ်၊ အိန္ဒိယနိုင်ငံ မီဇိုရမ်ပြည်နယ်ရှိ မြန်မာနိုင်ငံမှ စစ်ဘေးရှောင် များ ခိုလှုံရာစခန်းများတွင် ဖြစ်ပွားနေသည့် ဝမ်းပျက်ဝမ်းလျှော ကူးစက်ရောဂါကို ထိန်းချုပ်နိုင်ပြီဟု တာဝန်ရှိသူ များက ပြောသည်။ ချင်းပြည် (ပလက်ဝနှင့် ဆမီးမြို့နယ်) မှ စစ်ဘေးရှောင်များ အကြား နိုဝင်ဘာလဆန်းပိုင်းမှ စတင်ဖြစ်ပွားခဲ့သော ပြင်းထန်သည့် ဝမ်းပျက်ဝမ်းလျှော ကူးစက်ရောဂါကို လက်ရှိတွင် အပြည့်အဝနီးပါး ထိန်းချုပ်နိုင်ပြီဟု ပြောသည်။ Paletwa IDPs and Humanitarian Supporting (ပလက်ဝ စစ်ရှောင်နှင့် လူသားချင်းစာနာမှု ပံ့ပိုးရေး) အဖွဲ့ တာဝန်ခံ ဆလိုင်းစိုးသန်း က “အခု ထိန်းနိုင်တဲ့ အနေ အထား ရှိပါပြီ။ ထပ်တိုးလူနာတွေလည်း မရှိတော့ပါဘူး” ဟု ပြောသည်။ သို့သော်လည်း၊ ဒေသခံလူငယ်အဖွဲ့များ၊ စခန်းတာဝန်ရှိသူများနှင့် ကျန်းမာရေးအဖွဲ့များ၏ အချိန်မီ ကြိုးပမ်း ဆောင်ရွက်မှုများကြောင့် ယခုအခါ အခြေအနေများ ပြန်လည် တည်ငြိမ်လာပြီဖြစ်ကြောင်း Paletwa IDPs and Humanitarian Supporting အဖွဲ့ တာဝန်ခံ က ပြောသည်။ အဆိုပါ ကူးစက်ရောဂါသည် ကာကီ၊ တွီဒင်းနှင့် လောင်းပဆူး စစ်ဘေးရှောင်စခန်းများတွင် ပြန့်ပွားခဲ့ခြင်းဖြစ်ပြီး၊ ရောဂါကူးစက်မှု ကာလအတွင်း လူပေါင်း ၁၅၀ ခန့် ကူးစက်ခံခဲ့ရကာ၊ ကလေးငယ်တစ်ဦး အပါအဝင် စုစုပေါင်း ၅ ဦး သေဆုံးခဲ့သည်။ ရောဂါပြန့်ပွားမှုကို ကာကွယ်ဖို့ နှစ်ပတ်အကြာ ချမှတ်ထားခဲ့သော Lockdown အစီအမံများကိုလည်း စတင် ဖြေလျှော့ပေးနေပြီ ဖြစ်သည်။ အထူးသဖြင့် တွီဒင်းစခန်းတွင် Lockdown ကို ဖြေလျှော့ခဲ့ပြီး၊ အဓိက ရောဂါဖြစ်ပွားရာ ကာကီစစ်ရှောင် စခန်း ကိုလည်း မကြာမီ ပြန်လည်ဖွင့်လှစ်ပေးသွားမည်ဟု ဆိုသည်။ ဆလိုင်းစိုးသန်းက “အခုဒီ တွီဒင်းစစ်ရှောင်စခန်းဖက်က ဖြေတယ်ဆိုတာက မြေပြင်ရဲ့ အတည်ပြုချက်အရ ကျန်းမာရေးဌာနဖက်ကနေ သူတို့ရဲ့ မြေပြင်ကွင်းဆင်းချက်အပေါ်မှာ အတည်ပြုပြီးမှ သူတို့က Lockdown ကို ဖြေတဲ့သဘောတော့ ဖြစ်တာပေါ့နော်။ ဆိုတော့ အခု ဒီ ကာကီဖက်ခြမ်းကတော့ ကျနော်တို့ လုံးဝထပ်တိုး လုံးဝကို မရှိတော့ဘူးဆိုရင် ပုံမှန်လည်း ဖြစ်ပြီဆိုရင် အဲဒါလည်း မကြာခင်မှာတော့ ဖွင့်နိုင်မယ်” ဟု ပြောသည်။ ရောဂါကူးစက်မှု အန္တရာယ်မှ ကျော်လွှားနိုင်ပြီ ဖြစ်သောကြောင့် ဒေသတွင်း စားနပ်ရိက္ခာ ပြတ်လပ်မှုကို ဖြေရှင်း ရန်အတွက် နှစ်ပတ်ကြာ ပိတ်ထားခဲ့သည့် ကုန်သွယ်ရေးလမ်းကြောင်းများကိုလည်း ပြန်လည်ဖွင့်လှစ်ပေးခဲ့ပြီး စနေနေ့မှစ၍ ကုန်သွယ်ရေးလုပ်ငန်းများ ပြန်လည်စတင်နေပြီ ဖြစ်သည်။ လမ်းပန်းဆက်သွယ်ရေး ခက်ခဲမှုနှင့် ဆေးဝါးပြတ်လပ်မှုများ ကြားမှ ဒေသခံလူငယ်အဖွဲ့များနှင့် စခန်း တာဝန်ရှိ သူများ၏ ကြိုးပမ်းမှုကြောင့် ရောဂါကို အချိန်တိုအတွင်း ထိန်းချုပ်နိုင်ခဲ့ခြင်းဖြစ်ကြောင်း ကူညီဆောင်ရွက် နေသူများက ပြောသည်။ နောက်ထပ် ကူးစက်မှုများ ထပ်မံမဖြစ်ပွားစေရန်အတွက် အာရက္ခပြည်သူ့ကျန်းမာရေးဌာန (APH) ကလည်း နိုဝင်ဘာလ ၁၄ ရက်နေ့တွင် အသိပေးနှိုးဆော်ချက် တစ်ရပ်ကို ထုတ်ပြန်ထားသည်။ အဆိုပါ ထုတ်ပြန်ချက်ထဲတွင် ချောင်းရေ၊ မြစ်ရေများကို ကြိုချက်ပြီးမှ သောက်သုံးရန်၊ လက်ကို ဆပ်ပြာနှင့် စင်ကြယ်အောင် ဆေးကြောရန်၊ ယင်နားစာများကို လုံးဝ မစားရန် တိုက်တွန်းထားပြီး၊ ယင်လုံအိမ်သာများကို ဆောက်လုပ်သုံးစွဲကာ ချောင်းနီး၊ မြစ်နီးတွင် မစင်မစွန့်ရန် သတိပေးထားသည်။ ထို့အပြင် ဝမ်းပျက်ဝမ်းလျှောဖြစ်ပါက ဓာတ်ဆားကို မဖြစ်မနေ သောက်သုံးကာ နီးစပ်ရာ ကျန်းမာရေးဌာနသို့ ချက်ချင်းသွားရောက် ကုသမှုခံယူရန် နှိုးဆော်ထားသည်။ APH က စစ်ဘေးရှောင်များနှင့် ရပ်ကျေးပြည်သူများအနေဖြင့် အဆိုပါ နှိုးဆော်ချက်များကို အထူးဂရုပြု လိုက်နာဆောင်ရွက်ပေးကြပါရန် အသိပေးတိုက်တွန်းထားသည်။

အိန္ဒိယ နယ်စပ် စစ်ရှောင်များအကြား ဖြစ်ပွားနေသည့် ဝမ်းလျှောရောဂါ ထိန်းချုပ်နိုင်ပြီ

Nov 27

ငွေကြေး မတတ်နိုင်သော မိုးကုတ်မြို့ခံများ မြို့မှ မထွက်ခွာနိုင်ကြ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၇ ရက်။ တအာင်းတပ်မတော် (TNLA) က မိုးကုတ်နှင့် မိုးမိတ်မြို့တို့ကို စစ်ကော်မရှင်ထံ ပြန်လည်အပ်နှံမည့် ဆုံးဖြတ် ချက်ကြောင့် မြို့ခံများ စစ်ဘေးရှောင်နေကြသော်လည်း၊ ငွေကြေး အဆင်မပြေသူများမှာ ရွှေ့ပြောင်းနိုင်ခြင်း မရှိပဲ အခက်ကြုံနေကြသည်။ စစ်ရှောင်စရိတ်များ ကြီးမြင့်ခြင်း၊ လမ်းပန်းဆက်သွယ်ရေး ပြတ်တောက်မှုကြောင့် ကုန်ဈေးနှုန်းများ မြင့်တက် နေခြင်းတို့သည် မိုးကုတ်နှင့် မိုးမိတ် ဒေသခံ ပြည်သူများ အခက်တွေ့နေကြသည်။ TNLA မှ အဆိုပါမြို့များမှ နိုဝင်ဘာ ၂၅ ရက်နေ့တွင် ဆုတ်ခွာမည်ဟု ထုတ်ပြန်ပြီးနောက်၊ မိုးကုတ်နှင့် မိုးမိတ် မြို့များမှ ပြည်သူအများအပြားသည် စစ်ဘေးရှောင်ရန် ကြိုးပမ်းနေကြသော်လည်း ရွှေ့ပြောင်းစရိတ် ကြီးမြင့်မှုက ငွေကြေးမတတ်နိုင်သည့် ပြည်သူများကို တားဆီးထားသည်။ မိုးကုတ်မြို့ခံတစ်ဦးက “အိမ်ပြောင်းရတာက ဈေးကြီးပေးပြီးတော့ ပြောင်းနေရတာပေါ့နော်။ ပိုက်ဆံရှိတဲ့ သူတွေလောက်ပဲ ပြောင်းနိုင်နေတာပေါ့။ ပိုက်ဆံမရှိတဲ့သူတွေကျတော့ မပြောင်းနိုင်ဘူးပေါ့နော်” ဟု လက်ရှိ အခြေအနေကို ရှင်းပြခဲ့သည်။ လက်ရှိတွင် စီးပွားရေး မပြေလည်သူများ၊ နေရပ်ကို စွန့်ခွာရန် စိတ်မပါသူများသာ မြို့ပေါ်တွင် အများဆုံး ကျန်ရှိနေပြီး၊ တော်တော်များများ စွန့်ခွာသွားသဖြင့် မြို့သည် ‘မရှိသလောက်’ ဖြစ်နေပြီ ဟုလည်း ဒေသခံများ က ပြောဆိုသည်။ အပစ်အခတ် ရပ်စဲထားသော်လည်း စစ်ရေးပဋိပက္ခများ၏ နောက်ဆက်တွဲ အခြေအနေများကြောင့် ဒေသ၏ စီးပွားရေးသည် လုံးဝ နလန်မထူနိုင်သေးဘဲ ကုန်ဈေးနှုန်းများမှာ ဆက်လက် မြင့်တက်နေသည်။ စီးပွားရေးကဏ္ဍမှာ အဆုံးထိ ကျဆင်းနေသည့် အပြင် လမ်းပန်းဆက်သွယ်ရေး ပြတ်တောက်ခြင်းနှင့် ဂိတ်များမှ ငွေကြေး အတင်းအကျပ် တောင်းခံမှုများကိုလည်း ခံနေရသည်ဟု မိုးကုတ်မြို့ခံများက ပြောသည်။ “အခုက လမ်းပန်းဆက်သွယ်ရေး မကောင်းလို့သာ ဒီဘက်မှာ မြှင့်တက်တာလေး ကုန်ဈေးနှုန်းတွေက။ လမ်းပန်းဆက်သွယ်ရေး လမ်းကြောင်းတွေ ဖွင့်ပေးရမယ်။ နောက်ပြီးတော့မှ ဂိတ်တွေရှိတဲ့နေရာမှာ ဂိတ်တွေ ကနေပြီးတော့မှ ငွေတောင်းတာမျိုး မဟုတ်ဘဲ လုံခြုံရေးအရ စစ်ဆေးတာမျိုး ဆိုရင်တော့ ပြည်သူတွေ အနေနဲ့ နားလည်ပေးလို့ရတယ်” ဟု မိုးကုတ်ဒေသခံက ပြောသည်။ တအာင်းတပ် TNLA မှ မြို့ကို ပြန်လည်လွှဲပြောင်းပေးမည့် ဆုံးဖြတ်ချက်အပေါ် ဒေသခံများသည် စိုးရိမ် ထိတ်လန့်ရုံသာမက စိတ်ပျက်ဝမ်းနည်းမှုများပါ ဖြစ်နေကြသည်။ မိုးမိတ် ဒေသခံတစ်ဦးက “အဲ့ဒီ ထုတ်ပြန်ချက် ကြေညာတဲ့နေ့ကဆိုလို့ရှိရင် သက်ကြီးရွယ်အိုတွေကအစပေါ့နော် ယောက်ယက်တွေ ခတ်ပြီးတော့မှ သူတို့လည်း စိုးရိမ်ကြောင့်ကြမှုတွေရော မလုံခြုံမှုတွေရော အကုန်လုံး ပေါင်းပြီးပေါ့လေးနော် အဲ့လိုမျိုး ဒီဟာကြီးကို မဖြစ်စေချင်တာပေါ့” ဟု ပြောသည်။ လက်ရှိတွင် စစ်ရှောင်ရန် မတတ်နိုင်ဘဲ ကျန်ခဲ့သူများအတွက် စားဝတ်နေရေးနှင့် ဘေးကင်းလုံခြုံရေးသည် အဓိက စိန်ခေါ်မှု ဖြစ်နေသည်။ ဒေသခံပြည်သူများသည် ကုန်ဈေးနှုန်း ကြီးမြင့်မှု၊ ငွေကြေး အခက်အခဲနှင့် လုံခြုံရေး မတည်ငြိမ်မှုများအကြား မည်သည့် အဖွဲ့အစည်းကမှ မိမိတို့၏ ဘဝလုံခြုံရေးနှင့် စီးပွားရေးအပေါ် မထိခိုက်စေရန်သာ အဓိက မျှော်လင့် တောင်းဆိုနေကြသည်။

ငွေကြေး မတတ်နိုင်သော မိုးကုတ်မြို့ခံများ မြို့မှ မထွက်ခွာနိုင်ကြ

Nov 26

မောတောင်စစ်ရှောင်များ စားနပ်ရိက္ခာနှင့် အမိုးအကာ အရေးပေါ်လိုအပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၂ ရက်။  မော‌တောင် မြို့သိမ်းတိုက်ပွဲတွင် ထွက်ပြေးတိမ်းရှောင် နေကြသူများအထဲမှ စစ်ဘေးရှောင် ရှစ်ရာကျော် အမိုးကာ၊ စားနပ်ရိက္ခာနှင့် စောင်များ လိုအပ်နေကြသည်ဟု စစ်ဘေးရှောင်များအား ကူညီနေသူများက ပြောသည်။ မောတောင်မြို့သိမ်းတိုက်ပွဲ၏ အရှိန်မသေသေးသည့် နောက်ဆက်တွဲအဖြစ် ထွက်ပြေးတိမ်းရှောင်နေကြရသော အသက်ကြီးရွယ်အိုများနှင့် မီးဖွားပြီးစ အမျိုးသမီးများ အပါအဝင် စစ်ဘေးရှောင် ရှစ်ရာကျော်သည် ဥယျာဉ်ခြံ များနှင့် တောနက်အတွင်း၌ ခိုလှုံနေကြရခြင်း ဖြစ်သည်။ ၎င်းတို့အတွက် အမိုးအကာ၊ စားနပ်ရိက္ခာနှင့် ဆေးဝါးများ အရေးပေါ် လိုအပ်နေကြောင်း ကူညီထောက်ပံ့သူများ က ပြောသည်။ စစ်ကော်မရှင်တပ်မှ လေကြောင်းဖြင့် ဗုံးကြဲတိုက်ခိုက်မှုများ ဆက်လက် လုပ်ဆောင်နေခြင်းကြောင့် ဒေသခံများ မှာ ၎င်းတို့၏ နေအိမ်များသို့ ပြန်ရန် မဖြစ်နိုင်သေးပေ။ အသက် ၄၀ နှစ်ခန့်အရွယ် စစ်ဘေးရှောင်နေရသူ အမျိုးသမီးတစ်ဦးက အမိုးအကာနှင့် စားနပ်ရိက္ခာ အခြေအနေ ကို အောက်ပါအတိုင်း ရှင်းပြသည်။ “ဘယ်လောက်ကြာကြာ ရှောင်ရမလဲ မသိဘူး။ လနဲ့ချီပြီး အကြာကြီး ရှောင်နေရရင် အမိုးအကာကလည်း မရှိ၊ စားဖို့လည်း ရိက္ခာက မရှိ၊ ဆေးဝါးကလည်းမရှိနဲ့ ဒုက္ခရောက်နေကြရတယ်၊ အမိုးအကာ တာလပတ် ပါတဲ့သူက နည်းနည်းပဲရှိတယ်။ လက်ရှိ တောငှက်ပျောရွက်တွေ ကာရံနေကြရတယ်၊ သုံးလေးရက်တစ်ကြိမ်လဲပေး နေရ တယ်။ မိုးရွာရင် မလွယ်ဘူး” ဟု ၎င်းက ပြောသည်။ လက်ရှိ တောထဲ၌ ပုန်းရှောင်နေကြရသူ ၈၀၀ ကျော်အထဲတွင် သံဃာတော်များ၊ ကလေးသူငယ်များ၊ မီးဖွားထား သည့် အမျိုးသမီးများ စသည့် ထိခိုက်လွယ်အုပ်စုများ ပါဝင်နေသည်ဟု အကူအညီပေးနေသူများက ပြောသည်။ ၎င်းတို့သည် ယာယီခိုလှုံရန်အတွက် တာလပတ် အနည်းငယ်သာ ပါရှိသဖြင့် တောငှက်ပျောရွက်များကိုသာ အားပြုကာရံနေကြရပြီး ယင်းတို့အား သုံးလေးရက်လျှင် တစ်ကြိမ် လဲလှယ်ပေးနေရသည်။ စစ်ဘေးရှောင်တိမ်းနေကြရသူများတွင် ချက်ပြုတ်စားသောက်ရန်အတွက် အိုး၊ ခွက်၊ ပန်းကန်များလည်း လုံးဝမပါလာသည့် အပြင် မီးဖွားထားသူများပါ ရှိနေသဖြင့် စောင်များကဲ့သို့သော အနွေးဓာတ်ပေးသည့် ပစ္စည်းများလည်း အရေးတကြီး လိုအပ်နေကြောင်း ကူညီသူများက ဆိုသည်။ လက်ရှိအခြေအနေအရ စစ်ကော်မရှင်တပ်မှ မောတောင်မြို့နှင့် အနီးတစ်ဝိုက်ရှိ သဲဖြူ၊ သိန်ခွန်းအပါအဝင် ကျေးရွာ ၁၀ ရွာကျော်ကို လေကြောင်းဖြင့် ဗုံးကြဲမှုများ ဆက်လက်လုပ်ဆောင်နေဆဲ ဖြစ်သည်။ ထို့ကြောင့် ရွာသားများမှာ လေကြောင်းအန္တရာယ်ကို စိုးရိမ်သဖြင့် မိမိတို့နေရပ်သို့ မပြန်နိုင်သေးဘဲ နီးစပ်ရာ ဘေးလွတ်နိုင်မည့် ဥယျာဉ်ခြံများနှင့် တောတွင်းနေရာများသို့ ဆက်လက်တိမ်းရှောင်နေကြရကာ လူသားချင်း စာနာထောက်ထားမှု အကူအညီများ အမြန်ဆုံး လိုအပ်လျက်ရှိသည်။

မောတောင်စစ်ရှောင်များ စားနပ်ရိက္ခာနှင့် အမိုးအကာ အရေးပေါ်လိုအပ်

Nov 26

ကိုးကန့်နှင့် စစ်ကော်မရှင်တို့ လားရှိုးအနီး တင်းမာမှု ဖြစ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၅ ရက်။ ကိုးကန့်တပ်မတော် MNDAA မှ တပ်ဆုတ်ရန် ငြင်းပယ်မှုကြောင့် ရှမ်းပြည် မြောက်ပိုင်း၊ လားရှိုးမြိုးအနီး နှစ်ဖက်ကြား စစ်ရေးတင်းမာကာ အဓိကလမ်းပိုင်းများ ပိတ်ဆို့မှုကြောင့် တရုတ်-မြန်မာ ကုန်သွယ်ရေး ထိခိုက် နေရသည်။ လားရှိုးမြို့အနီးတွင် စစ်ကော်မရှင်တပ်နှင့် ကိုးကန့်တပ် (MNDAA) တို့အကြား ယခုနှစ်ဆန်းပိုင်းက တရုတ်၏ ကြားဝင်မှုဖြင့် ရရှိထားသည့် အပစ်ရပ်စဲရေး သဘောတူညီမှုမှာ တစ်နှစ်မပြည့်မီပင် စစ်ရေးတင်းမာမှု များ ပြန်လည်မြင့်တက်လာခဲ့သည်။ ထိုသို့ တင်းမာမှုများကြောင့် အဓိက လမ်းပိုင်းများ ပိတ်ဆို့ခံထားရပြီး ဒေသတွင်း စီးပွားရေးနှင့် တရုတ်-မြန်မာ နယ်စပ်ကုန်သွယ်ရေးကိုပါ ထိခိုက်လာကြောင်း ဒေသခံများက ပြောသည်။ ရှမ်းမြောက်ရှိ လက်နက်ကိုင်အဖွဲ့များနှင့် နီးစပ်သူတစ်ဦးက “အဓိကတော့ သီပေါ-လားရှိုး လမ်းပိုင်းကို MNDAA က တပ်ဆုတ်ပေးမှာ မဟုတ်တဲ့အတွက် တင်းမာမှုက ဆက်ဖြစ်နေတယ်။ မြေပြင်မှာ ညှိနှိုင်းမှုတွေ လုပ်ခဲ့ပေမယ့် မပြေလည်တာကြောင့် ဖြစ်လာတဲ့ အခြေအနေတွေပါ” ဟု ပြောသည်။ တင်းမာမှုများ မြင့်တက်လာခြင်းမှာ နိုဝင်ဘာလ ၁၁ ရက်နေ့တွင် ပြုလုပ်သည့် တွေ့ဆုံဆွေးနွေးပွဲ၌ စစ်ကော်မရှင် တပ်ဘက်မှ ကိုးကန့်တပ် MNDAA ကို သီပေါ-လားရှိုး လမ်းပိုင်းမှ ဆုတ်ခွာပေးရန် တောင်းဆိုခဲ့ရာ ကိုးကန့်ဘက် က လက်မခံဘဲ ငြင်းပယ်ခဲ့ရာမှ စတင်ခဲ့ခြင်း ဖြစ်သည်။ ထိုသို့ ငြင်းပယ်မှုကြောင့် နှစ်ဖက်တပ်များအကြား စစ်ရေးအရ အပြန်အလှန် ဖိအားပေးမှုများ ပြုလုပ်ခဲ့ပြီး သီပေါ-လားရှိုး လမ်းမကြီးပေါ်ရှိ အဓိက လမ်းပိုင်းများကို ပိတ်ဆို့ထားသည်။ ထိုလမ်းပိုင်းသည် မန္တလေး-မူဆယ် ပြည်ထောင်စုလမ်းမကြီး၏ အရေးပါသော အစိတ်အပိုင်းဖြစ်သောကြောင့် လမ်းပိတ်ဆို့မှုက တရုတ်-မြန်မာ နယ်စပ် ကုန်တင်ယာဉ်များမှာ ကြီးမားသော အခက်အခဲနှင့် ရင်ဆိုင်နေရသည်။ လားရှိုးမြို့ပေါ်တွင်လည်း စစ်ရေးတင်းမာမှု၏ အရိပ်အယောင်များကို မြင်တွေ့နေရကြောင်း ဒေသခံများက ပြောသည်။ နိုဝင်ဘာလ ၂၄ ရက်နေ့ ညပိုင်းတွင် လားရှိုးမြို့ ရပ်ကွက်တစ်ခုအနီးရှိ စစ်ကော်မရှင်တပ်စခန်းမှ သေနတ် အချက် ၂၀ ခန့်ကို တဖက်သတ် ပစ်ခတ်သံများ ကြားရသဖြင့် မြို့ခံများ စိုးရိမ်နေသည်။ လားရှိုး ဒေသခံတစ်ဦးက “ညဘက် ၉ နာရီလောက်က တဖက်သတ် ပစ်တဲ့အသံကြားကြတာပါ။ လက်နက်ငယ် အချက် ၂၀ လောက် ပစ်ခတ်တာ။ တိုက်ပွဲမဟုတ်တာတော့ သေချာတယ်။ ဘာကြောင့်ပစ်တယ်ဆိုတာ ရှင်းရှင်း လင်းလင်း မသိရတော့ ဒေသခံတွေ စိုးရိမ်နေကြတာပါ” ဟု ပြောသည်။ တစ်ချိန်တည်းမှာပင် လားရှိုးမြို့ပြင်ရှိ ကျေးရွာများတွင်မူ MNDAA တပ်ဖွဲ့များ၏ လှုပ်ရှားမှုသည် ပုံမှန်အတိုင်း ပင် ရှိနေပြီး၊ စစ်ကော်မရှင်တပ်က တပ်ဆုတ်ရန် ဖိအားပေးနေသော်လည်း ကိုးကန့်တပ်ဘက်က တပ်ဆုတ်ခြင်း မရှိဘဲ အုပ်ချုပ်ရေးလုပ်ငန်းများကို ပုံမှန်အတိုင်း လည်ပတ်ဆောင်ရွက်နေကြောင်း ဒေသခံ သတင်း အရင်းအမြစ်များက အတည်ပြု ပြောဆိုသည်။ တရုတ်နိုင်ငံ၏ ကြားဝင်မှုဖြင့် ရရှိခဲ့သော အမည်ခံ အပစ်ရပ်စဲမှုသည် စစ်ကော်မရှင်တပ်၏ တပ်ဆုတ်ရေး တောင်းဆိုချက်များကြောင့် ပျက်ပြားမည့် အခြေအနေနှင့် ရင်ဆိုင်နေရပြီး ရှမ်းမြောက်ဒေသ၏ စစ်ရေး တည်ငြိမ်မှုနှင့် ကုန်သွယ်ရေး လမ်းကြောင်းများ၏ အခြေအနေကို ဆက်လက် စောင့်ကြည့်နေရသည်ဟု ဒေသခံများက ဆိုသည်။ ဓါတ်ပုံ - (Crd) မန္တလေးမှ မူဆယ်သွား လမ်းမပေါ်၌ ကုန်ကားများ ရာချီပြီး ပိတ်မိနေ (ပုံဟောင်း)

ကိုးကန့်နှင့် စစ်ကော်မရှင်တို့ လားရှိုးအနီး တင်းမာမှု ဖြစ်နေ

Nov 26

ရှမ်းတောင် စစ်ရှောင်များ စောင်၊ အနွေးထည် နှင့် ခြင်ထောင်များ လိုအပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၆ ရက်။ ရှမ်းပြည်တောင်ပိုင်း၊ ဖယ်ခုံမြို့နယ်၊ မိုးဗြဲမြို့ အနောက်ခြမ်းရှိ စစ်ဘေးရှောင်စခန်း ၂၆ ခု၌ အအေးဒဏ် ပိုမို ပြင်းထန်လာခြင်းကြောင့် စစ်ရှောင်ပြည်သူများ အတွက် အရေးပေါ် အနွေးထည်၊ စောင်နှင့် ခြင်ထောင်များ လိုအပ်နေသည်ဟု အကူအညီပေးနေသူများက ပြောသည်။ စစ်ရှောင်စခန်း ၂၆ ခုက စစ်ရှောင်ပြည်သူများအတွက် စုစုပေါင်း အနွေးထည်၊ စောင် နှင့် ခြင်ထောင် အထည်ရေ ၃,၀၀၀ ခန့်စီ အရေးပေါ် လိုအပ်နေသည်ဟု မြေပြင်ရှိ စစ်ရှောင်အကူအညီပေးရေး အဖွဲ့များက ပြောသည်။ အဆိုပါဒေသ၌ ယခင်နှစ်များက ဒီဇင်ဘာလလယ်မှသာ အအေးပိုလေ့ရှိသော်လည်း ယခုနှစ်တွင် နိုဝင်ဘာလ အစကတည်းကပင် အအေးပိုနေပြီဖြစ်သည်ဟု အကူအညီပေးရေး တာဝန်ခံများက ပြောသည်။ နွေဦးရောင်ခြည်ဖောင်ဒေးရှင်း တာဝန်ခံ ကိုဇူလိုင်က ယခုနှစ်ဆောင်းရာသီ အအေးပိုမိုမှုကြောင့် နိုဝင်ဘာလ ၁ ရက်နေ့မှ ၂၅ ရက်နေ့အတွင်း သက်ကြီးပိုင်းအရွယ် သေဆုံးသူ ၆ ဦး အထိရှိကြောင်း ပြောသည်။ “ဒီနှစ်က နှစ်တိုင်းထက် ပိုအေးနေတယ်။ အအေးပိုမူကြောင့် သက်ကြီးပိုင်းတွေ သေဆုံးမှုများလာတယ်။ ဒါ ကြားရတာပဲ ရှိသေးတယ်။ တစ်ချို့သော ကျနော်တို့နဲ့ နည်းနည်းဝေးတဲ့ စခန်းတွေကြတော့ ကျနော်တို့ မကြား ရတာတွေ ရှိကောင်းရှိအုံးမယ်။ လက်ရှိ စောင်၊ အနွေးထည်၊ ခြင်ထောင် လိုအပ်မှုက အထည်ရေ ၃,၀၀၀ ဝန်းကျင် လိုအပ်နေပါတယ်။” ဖယ်ခုံ၊ မိုးဗြဲဒေသရှိ စစ်ရှောင်စခန်းများတွင် အာဏာသိမ်းပြီးချိန်မှ စတင်၍ ရှောင်တိမ်းလာသူများနှင့် ပြီးခဲ့သည့် ဇူလိုင်၊ ဩဂုတ်လများအတွင်း တိုက်ပွဲကြောင့် အသစ်ပြောင်းရွှေ့လာသူ မိသားစု ထောင်နှင့်ချီ ရှိနေသော်လည်း လက်ရှိတွင် အိမ်ထောင်စု ၂၀၀/၃၀၀ ဝန်းကျင်သာ အကူအညီရရှိသေးကြောင်း ကိုဇူလိုင်က ဆိုသည်။ စစ်ဘေးရှောင်များသည် တောတောင်ထဲတွင် နေထိုင်ကြရသဖြင့် အအေးဒဏ်အပြင် ငှက်ဖျား၊ သွေးလွန် တုပ်ကွေး၊ ရာသီတုပ်ကွေး စသည့် ရောဂါဝေဒနာများလည်း ဖြစ်နေကြောင်း ကရင်နီအမျိုးသမီးအစည်းအရုံး (KNWO) ဥက္ကဋ္ဌ မော်ဖရေးမြာက ပြောသည်။ မော်ဖရေးမြာက “ပြီးခဲ့တဲ့နှစ် ကျမတို့ မြေပြင်အခြေအနေအရ ငှက်ဖျားတွေ၊ တုပ်ကွေးတွေ အဖြစ်များတာ မျိုးတွေ ရှိတော့ အခုဆိုရင်လည်း ကလေးတွေ နှာစေးချောင်းဆိုးတာ ဖြစ်သလို တုပ်ကွေးနဲ့ ပတ်သက်ပြီး ဖြစ် တဲ့ဟာတွေ ရှိတယ်။ သက်ကြီးပိုင်းမှာဆို နာတာရှည်ရောဂါ ဝေဒနာသည်တွေ အတွက် စောင်တို့ အနွေးထည် တို့ မဖြစ်မနေလိုအပ်တဲ့ အခြေအနေတွေ ရှိတယ်” ဟု ပြောသည်။ KNWO က သက်ကြီးရွယ်အိုများ၊ ကိုယ်ဝန်သည်များ၊ ကလေးသူငယ်များအတွက် အနွေးထည်များ၊ စောင်များ နှင့် ခြင်ထောင်များ အထူးလိုအပ်နေကြောင်း အလေးထားပြောဆိုသည်။ ကျေးလက်မြေအဖွဲ့ တာဝန်ခံ ဦးဇော်မင်းထိုက်ကလည်း “ဒီစစ်ဘေးရှောင်တွေအတွက် အနွေထည်တွေ စောင် တွေက အရေးကြီးလိုအပ်တယ်။ ဘာကြောင့်လိုအပ်လဲဆိုလို့ရှိရင် ခြုံစရာစောင်တို့ မလုံတာတို့ ခြင်ထောင်တို့ ဘာတို့ မလုံတာဆိုရင် ဒီအချိန်မှာ ခြင်တို့ဘာတို့ ကိုက်ပြီးတော့ အအေးမိတာတွေ ဖျားနာတာတွေ မလိုလား အပ်တဲ့ ကျန်းမာရေး ထိခိုက်တာတွေ ဖြစ်လာနိုင်တယ်ပေါ့နော်” ဟုပြောသည်။ ကရင်နီ လူ့အခွင့်အရေးအဖွဲ့ (KnHRG) ၏ ထုတ်ပြန်ချက်အရ ကရင်နီပြည်တစ်ခုလုံး၌ လူဦးရေ သုံးသိန်းဝန်း ကျင် ရှိသည့်အနက် ပြည်သူ နှစ်သိန်းကျော်မှာ စစ်ဘေးရှောင်နေရပြီး အောက်တိုဘာလအတွင်း ထပ်မံရွှေ့ ပြောင်းရသူ ဦးရေ တစ်သောင်းခန့် ရှိခဲ့သည်။ လက်ရှိတွင် အဆိုပါ စစ်ဘေးရှောင်များအတွက် အနွေးထည်၊ စောင်၊ ခြင်ထောင်အပြင် ဆေးဝါးများ၊ ဆန်၊ ဆီ၊ ဆား စသည့် အခြေခံ စားနပ်ရိက္ခာများနှင့် ရေကန်များအတွက် မိုးကာများလည်း အရေးပေါ် လိုအပ်နေဆဲ ဖြစ်၍ ကူညီလှူဒါန်းပေးကြရန် မြေပြင်၌ အကူအညီပေးသည့် အဖွဲ့များက တိုက်တွန်းတောင်းဆိုထားသည်။

ရှမ်းတောင် စစ်ရှောင်များ စောင်၊ အနွေးထည် နှင့် ခြင်ထောင်များ လိုအပ်

Nov 25

ကျားဖြန့်ရုံ ဝင်စီးရာမှ KNLA နဲ့ DKBA တိုက်ပွဲများ ပြင်းထန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၅ ရက်။ မြန်မာ-ထိုင်းနယ်စပ်၊ ကရင်ပြည်၊ မြဝတီတောင်ဘက်ရှိ စစ်ကော်မရှင်တပ်နှင့် DKBA ထိန်းချုပ်သော ငွေလိမ်လုပ်ငန်း 'ကျားဖြန့်' ရုံကို KNLA ပူးပေါင်းတပ်များက စီးနင်းခဲ့ရာမှ တိုက်ပွဲများ ပြင်းထန်လာခဲ့သည်။ ထိုတိုက်ပွဲအတွင်းက လက်နက်ကြီးကျည်မှာ ထိုင်းနိုင်ငံအတွင်းသို့ ကျရောက်မှုကြောင့် ထိုင်းစစ်တပ်ကပါ သတိပေးပစ်ခတ်မှု ပြုလုပ်ခဲ့ကြောင်း သိရသည်။ နယ်စပ်လုံခြုံရေး အမြင့်ဆုံး အခြေအနေသို့ ရောက်ရှိနေပြီး၊ မြန်မာဘက်ခြမ်းက အရပ်သားပြည်သူများ ထိုင်းဘက်သို့ စစ်ဘေးရှောင်မှုများလည်း ရှိနေသည်ဟု အကူအညီပေးနေသူများက ပြောသည်။ နိုဝင်ဘာလ ၂၁ ရက်နေ့က ဖြစ်ပွားခဲ့သော မင်းလက်ပံကျေးရွာအဝင် ကျားဖြန့်ရုံ စီးနင်းမှုသည် DKBA တပ်ဖွဲ့ဝင်များဘက်မှ ကရင်အမျိုးသား လွတ်မြောက်ရေး တပ်မတော် KNLA ပူပေါင်းတပ်ကို စတင်ပစ်ခတ်ရာမှ ပဋိပက္ခဖြစ်ပွားခဲ့ခြင်း ဖြစ်သည်ဟု ဒေသအခြေစိုက် သတင်းဌာနများက ဖော်ပြသည်။ စစ်ကော်မရှင်တပ်နှင့် လက်ဝါးချင်းရိုက်ကာ ကျားဖြန့်ရုံကို စောင့်ကြပ်နေသည့် ဗိုလ်သခွားသီး ဦးစီးသော DKBA တပ်ဖွဲ့များသည် KNLA တပ်မဟာ (၆) ဦးဆောင်သည့် တော်လှန်ရေး ပူးပေါင်းတပ်များကို သေနတ်ဖြင့် စတင်ပစ်ခတ်ခဲ့ခြင်းဖြစ်ကြောင်း စစ်ရေးသတင်းရင်းမြစ်များက ပြောသည်။ တော်လှန်ရေး ပူးပေါင်းတပ်ဘက်မှ ပြန်လည်ပစ်ခတ်ကာ အဆိုပါ ကျားဖြန့်ရုံကို ဝင်ရောက်စီးနင်းခဲ့ရာ DKBA တပ်ဖွဲ့ဝင်များနှင့် လက်နက်ခဲယမ်းများကို ဖမ်းဆီးထိန်းသိမ်းလိုက်သည်။ ပစ်ခတ်ရန် အမိန့်ပေးခဲ့သည့် ဗိုလ်သခွားသီးကမူ ထွက်ပြေးတိမ်းရှောင်သွားခဲ့သည်။ ဒေသတွင်း စစ်ရေးအခြေအနေကို စောင့်ကြည့်နေသူတစ်ဦးက “ဒီ ကျားဖြန့်ဂိုဒေါင်တွေဟာ စစ်ကောင်စီနဲ့ ပူးပေါင်းအဖွဲ့တွေအတွက် ငွေရှာပေးရာ နေရာတွေပါ။ KNLA ပူးပေါင်းတပ်တွေက ဒါကို တိုက်ခိုက်သိမ်းပိုက် နိုင်တာဟာ စစ်ရေးအရရော၊ ငွေကြေးအရပါ သူတို့ရဲ့ ထိန်းချုပ်မှုကို ဖြတ်တောက်လိုက်တာ ဖြစ်တယ်” ဟု ပြောသည်။ ဖမ်းဆီးထိန်းသိမ်းခံထားရသည့် DKBA တပ်ဖွဲ့ဝင်များနှင့် လက်နက်များ ပြန်လည်ရရှိရေးအတွက် DKBA ခေါင်း ဆောင်တစ်ဦး ဖြစ်သူ စောဆန်းအောင်က နယ်မြေခံ KNLA တာဝန်ရှိသူများနှင့် လာရောက်ညှိနှိုင်းခဲ့ကြောင်း သတင်းရရှိထားသည်ဟု အဆိုပါ စောင့်ကြည့်နေသူက ဆိုသည်။ မြဝတီတောင်ဘက် ဖလူးနှင့် မင်းလက်ပံကျေးရွာတိုဘက်တွင် KNLA မဟာမိတ် ပူးပေါင်းတပ်နှင့် စစ်ကော်မရှင် တပ်မ (၂၂) တို့အကြား နိုဝင်ဘာလ ၂၂ ရက်နေ့ကစ၍ ယနေ့အချိန်ထိ တိုက်ပွဲများ ဆက်လက်ပြင်းထန်နေသည်။ ယင်းတိုက်ပွဲအတွင်း လမ်းကြောင်းချော်လာသော ၆၀ မမ အမြောက်ကျည်ဆံတစ်လုံးသည် နယ်စပ်စည်းမှ တစ်ကီလိုမီတာခန့်သာ ဝေးသော ထိုင်းနိုင်ငံ၊ မဲဆောက်ခရိုင်၊ မဲ့ကိုကင်းကျေးရွာထဲသို့ ကျရောက်ခဲ့သည်။ ယင်းဖြစ်ရပ်ကြောင့် နေအိမ် ၄ လုံးနှင့် ပစ်ကပ်ကား ၁ စီး ပျက်စီးခဲ့ပြီး ဒေသခံများကြား စိုးရိမ်မှုများ မြင့်တက်ခဲ့ သည်။ ထို့နောက်တွင် ထိုင်းစစ်တပ်ဘက်မှ ၁၂၀ မမ မီးခိုးဗုံးကျည်ကို သတိပေးချက်အဖြစ် မြန်မာဘက်သို့ ပြန်လည် ပစ်ခတ်ခဲ့သည်ဟု ထိုင်းသတင်းဌာနများက ဖော်ပြသည်။ ထိုင်းအမှတ် (၃) စစ်ဒေသကလည်း နယ်စပ်ဒေသတစ်လျှောက် လုံခြုံရေး အစီအမံများကို အမြင့်ဆုံး တိုးမြှင့်ချ ထားကြောင်း ထုတ်ပြန်ခဲ့သည်။ ထိုင်းစစ်တပ်အရာရှိများသည် ပျက်စီးသွားသော မဲ့ကိုကင်းကျေးရွာထဲထိ သွားရောက်စစ်ဆေးခဲ့ပြီး နိုင်ငံ၏ နယ်စပ်ကို ခိုင်ခိုင်မာမာ ကာကွယ်စောင့်ရှောက်သွားမည်ဟု ဒေသခံများကို အာမခံ ပြောဆိုခဲ့သည်ဟု ထိုင်း သတင်းများက ဆိုသည်။ တိုက်ပွဲများကြောင့် မြန်မာဘက်ခြမ်းမှ အရပ်သား ၁၀၀ ကျော်လည်း ထိုင်းနိုင်ငံဘက်သို့ စစ်ဘေးတိမ်းရှောင် နေရပြီး ထိုင်းလုံခြုံရေးအဖွဲ့များက လူသားချင်းစာနာမှု အကူအညီများ ပေးနေသည်ဟု စစ်ရှောင်များကို အကူအညီပေးနေသူများက ပြောသည်။ လက်ရှိတွင် စစ်ရှောင်များကို အရင်ကလို ပြန့်ကျဲမထားတော့ဘဲ မဲ့ကိုကင်းကျေးရွာရှိ နွားခြံတစ်နေရာတည်း တွင်သာ စုစည်းထားရန် စီစဉ်နေကြောင်း စစ်ဘေးရှောင်အရေး ကူညီသူများက ပြောသည်။

ကျားဖြန့်ရုံ ဝင်စီးရာမှ KNLA နဲ့ DKBA တိုက်ပွဲများ ပြင်းထန်

« Prev 1 … 158 159 160 161 162 … 1,115 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု — August 21, 2026 8:07 pm
ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု — August 21, 2026 8:04 pm
အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း — August 21, 2026 8:02 pm

Recent Posts

ရွှေကူ လေကြောင်းတိုက်ခိုက်မှုတွင် ကိုယ်ဝန်ဆောင် အမျိုးသမီးအပါ အရပ်သားများ ဒဏ်ရာရ
သောင်ရင်းမြစ်ရေတက်ပြီး မြဝတီနှင့် မဲဆောက်တွင် ရေကြီးရေလျှံမှုဖြစ်
အင်းလေးရေ မြင့်တက်လာ၍ ကြိုတင်ရွှေ့ပြောင်းမှုများ ပြုလုပ်
မြောင် ဘုန်းကြီးကျောင်း ဥပုသ်နေ့တွင် ဗုံးကြဲခံရ၍ ၁၂ ဦး ထက်မနည်း သေဆုံး
ဂွနှင့်သံတွဲကို စစ်တပ်က လေယာဉ်အုပ်ဖွဲ့ ဗုံးကြဲမှုကြောင့် စစ်ဘေးရှောင်များ ဒဏ်ရာရ

Archives

Archives

×Close