NMG Doh – Page 27 – Network Media Group

NMG Doh

Author: NMG Doh

Mar 27

အမေရိကန် အဆိုပြုချက် အီရန် ပယ်ချက်၊ အီရန် စစ်ပွဲ ဆက်လက် ပြင်းထန်ဆဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၆ ရက်။ အမေရိကန်အစိုးရမှ အချက် ၁၅ ချက်ပါဝင်သော ငြိမ်းချမ်းရေးအဆိုပြုလွှာကို တင်ပြခဲ့သော်လည်း အီရန်အစိုးရက ယင်းအဆိုပြုချက်သည် လက်တွေ့မကျဘဲ တစ်ဖက်သတ်ဆန်လွန်းသည်ဟုဆိုကာ ပယ်ချခဲ့သည်။ အမေရိကန်အလယ်ပိုင်းစစ်ဌာနချုပ် (CENTCOM) ၏ ထုတ်ပြန်ချက်အရ အရှေ့အလယ်ပိုင်းဒေသတွင် အမေရိကန်တပ်ဖွဲ့ဝင် ၅၀,၀၀၀ ကျော်၊ လေယာဉ်တင်သင်္ဘော ၂ စင်း၊ တိုက်လေယာဉ် ၂၀၀ ကျော်နှင့် အထူးတပ်ဖွဲ့ဝင်များကို ဖြန့်ကြက်ချထားကြောင်း အတည်ပြုသည်။ အမေရိကန်က ထောင်နှင့် ချီသော ကမ်းတက် မရိန်းတပ်ဖွဲ့များ နှင့် လေထီးခုန် တပ်သား များကို ထပ်မံ စေလွှတ်ထားသည်။ လက်ရှိတွင် ဟော်မုဇ်ရေလက်ကြား၌ သင်္ဘောအစီးရေ ၂,၀၀၀ ခန့်နှင့် သင်္ဘောသား ၂၀,၀၀၀ ခန့် ပိတ်မိနေသဖြင့် လူသားချင်းစာနာမှုဆိုင်ရာ အခက်အခဲများ ကြုံတွေ့နေရကာ ရေကြောင်းသွားလာမှု ပြန်လည်ကောင်းမွန်စေရန် ပြင်သစ်နိုင်ငံက ကြားဝင်ညှိနှိုင်းမှုများ ပြုလုပ်လျက်ရှိသည်။ ကူဝိတ်နိုင်ငံရှိ လေဆိပ်လောင်စာဆီကန်တစ်ခု ဒရုန်းဖြင့် တိုက်ခိုက်ခံရမှုကြောင့် မီးလောင်မှုဖြစ်ပွားခဲ့သကဲ့သို့၊ ဆော်ဒီအာရေဗျနိုင်ငံကလည်း ၎င်း၏ရေနံစက်ရုံများကို ဦးတည်တိုက်ခိုက်လာသော ဒရုန်း ၃၂ စင်းနှင့် ဒုံးကျည် ၁ စင်းကို ကြားဖြတ်ပစ်ချခဲ့ရသည်။ တစ်ဖက်တွင်လည်း အစ္စရေးစစ်တပ်သည် လက်ဘနွန်တောင်ပိုင်းအတွင်းသို့ ၃၀ ကီလိုမီတာခန့် ကျူးကျော်ဝင်ရောက်ကာ "လုံခြုံရေးဇုန်" အဖြစ် သတ်မှတ်ရန် ပြင်ဆင်လျက်ရှိသည်။ မတ်လ ၂ ရက်နေ့မှစတင်သော တိုက်ပွဲများကြောင့် လက်ဘနွန်တွင် သေဆုံးသူ ၁,၀၇၂ ဦးနှင့် ဒဏ်ရာရရှိသူ ၃,၀၀၀ နီးပါး ရှိလာပြီဖြစ်သည်။ စစ်ပွဲ၏ ရိုက်ခတ်မှုကြောင့် ကမ္ဘာ့ရေနံစျေးနှုန်းများ မတည်မငြိမ်ဖြစ်ပေါ်နေပြီး သီရိလင်္ကာနိုင်ငံတွင် လျှပ်စစ်ဓာတ်အားချွေတာရေးအတွက် လမ်းမီးနှင့် ဆိုင်းဘုတ်မီးများကို ပိတ်ထားရန် အမိန့်ထုတ်ပြန်ထားရသလို၊ ဖိလစ်ပိုင်နိုင်ငံကလည်း နိုင်ငံတော်အဆင့် စွမ်းအင်အရေးပေါ်အခြေအနေ ကြေညာထားရသည်။

အမေရိကန် အဆိုပြုချက် အီရန် ပယ်ချက်၊ အီရန် စစ်ပွဲ ဆက်လက် ပြင်းထန်ဆဲ

Mar 26

နိုင်ငံကူးလက်မှတ် ဥပဒေသစ်က နိုင်ကျဉ်းများ၏ လွတ်လပ်စွာ သွားလာခွင့်အား ခြိမ်းခြောက်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၆ ရက်။ နိုင်ငံကူးလက်မှတ် ဥပဒေသစ်ဖြင့် နိုင်ကျဉ်းဟောင်းများကို စစ်ကော်မရှင်က ပိတ်ဆို့ခြိမ်းခြောက်လိုက်သည်ဟု နိုင်ကျဉ်းအရေး လှုပ်ရှားသူများက ပြောသည်။ နိုင်ငံကူး လက်မှတ် ဥပဒေသစ်သည် နိုင်ငံရေး အကျဉ်းသားဟောင်းများ၏ ဘဝပြန်လည်ထူထောင်ရေးနှင့် လုံခြုံရေးဆိုင်ရာ စိန်ခေါ်မှုများကို တရားဝင် ဖန်တီးလိုက်ခြင်း ဖြစ်ကြောင်း နိုင်ကျဉ်းအရေးလှုပ်ရှားသူများက ဝေဖန်ထောက်ပြလိုက်သည်။ မတ်လ ၁၇ ရက်နေ့တွင် ထုတ်ပြန်ခဲ့သည့် အဆိုပါ ဥပဒေသစ်အရ နိုင်ငံတော်လုံခြုံရေးနှင့် အကျိုးစီးပွားကို နှောင့်ယှက်သူဟု ယူဆရသူများ၊ ဥပဒေပုဒ်မ ၄၀၁ (၁) အရ လွတ်ငြိမ်းခွင့် ရထားသူများနှင့် တရားရုံး၏ ခံဝန် ချုပ်ကာလ မပြည့်သေးသူများကို နိုင်ငံကူးလက်မှတ် (Passport) ထုတ်ပေးရန် ငြင်းပယ်နိုင်ကြောင်း ပြဋ္ဌာန်း ထားသည်။ အဆိုပါ အချက်သည် မြန်မာနိုင်ငံတစ်ဝန်းရှိ အကျဉ်းထောင်များမှ ပြန်လည်လွတ်မြောက်လာသည့် နိုင်ငံရေး အကျဉ်းသားများကို ပစ်မှတ်ထား ကန့်သတ်လိုက်ခြင်းဖြစ်ကြောင်း နိုင်ငံရေးအကျဉ်းသူများအဖွဲ့ (WOPP) က ဆိုသည်။ WOPP ၏ ဦးဆောင်တာဝန်ခံ မဇူးဇူးမေယွန်းက “ကျမတို့လွတ်လာတဲ့ နိုင်ငံရေး အကျဉ်းသားတွေ အနေနဲ့ လုံခြုံရေး အရမ်းအရေးကြီး လာတယ်ပေါ့နော်။ ပြည်ပထွက်ခွင့်တွေ ပိတ်ပင်တဲ့အတွက် သူများနိုင်ငံမှာ တရား မဝင် နေထိုင်ရတာတွေ များလာတယ်ပေါ့နော်။ အဲ့ဒီအတွက်လည်း နိုင်ငံရေး အကျဉ်းသား ပိုပြီးတော့ စိတ်ပိုင်း ဆိုင်ရာအပြင် လုံခြုံရေးပိုင်း ဆိုင်ရာတွေမှာပါ ခက်ခဲလာတာ ဖြစ်ပါတယ်” ဟု ပြောသည်။ ထို့အပြင် နိုင်ကျဉ်းဟောင်းများသည် PSMS (Person Scrutinization and Monitoring System) စနစ်ဖြင့် ဆက်လက်စောင့်ကြည့်ခံနေရပြီး ယခင်စွဲချက်ဟောင်းများကြောင့် လူမှုဘဝရပ်တည်ရေးနှင့် အသက်မွေးဝမ်း ကျောင်း လုပ်ငန်းများတွင်ပါ အခက်အခဲဖြစ်ပေါ်နေရသည်ဟု ဆိုသည်။ ၎င်းတို့သည် အဖမ်းခံရစဉ်ကပင် မှတ်ပုံတင် (ID) များ သိမ်းဆည်းခံရခြင်းနှင့် နိုင်ငံကူးလက်မှတ် လုပ်ခွင့် ငြင်း ပယ်ခံရခြင်း တို့ကို ကြုံတွေ့ခဲ့ရပြီး ယခုအခါတွင်မူ ဥပဒေဖြင့် ပေါ်ပေါ်ထင်ထင် ချိုးဖောက်လာခြင်း ဖြစ်ကြောင်း မဇူးဇူးမေယွန်းက ဆက်ပြောသည်။ “ဒါက တရားဝင် ထုတ်ပြန်လိုက်တာပေါ့နော်။ တရားဝင် ထုတ်မပြန်ခင် ကျမတို့ နိုင်ငံရေး အကျဉ်းသားတွေကို ပြည်ပထွက်ခွင့် ပိတ်ပင်တာမျိုးတွေ ဖမ်းဆီးတဲ့အချိန်မှာ ကျမတို့ရဲ့ ID တွေ အကုန်လုံးကို သူတို့က သိမ်းတယ်။ ပြီးရင် ပြန်မပေးဘူးပေါ့နော်။ ပြန်လုပ်ရတဲ့ အခါမျိုးမှာလည်း အရမ်းခက်ခဲတယ်ပေါ့နော်။ Passport တွေဆို လည်း လုပ်ခွင့်မပေးတာမျိုး ကျမတို့ ကိုယ်တိုင်လည်း ကြုံခဲ့ရတယ်ပေါ့နော်။ ဒီလိုမျိုးတွေ လုပ်နေတာကို အခုဆိုလို့ရှိရင် ပေါ်ပေါ်ထင်ထင်နဲ့ လူ့အခွင့်အရေး ချိုးဖောက်လာတာ ဖြစ်တယ်။” အလားတူ ကရင်နီနိုင်ငံရေး အကျဉ်းသားများ အစည်းအရုံး (KPPA) ဒု - ဥက္ကဋ္ဌ ထားဖိုးကလည်း ဤဥပဒေသစ် ကြောင့် နိုင်ငံရေးတက်ကြွလှုပ်ရှားသူများ၏ လွတ်လပ်စွာ သွားလာခွင့် လုံးဝပိတ်ပင်ခံလိုက်ရကြောင်း ထောက်ပြသည်။ ၎င်းက “အမျိုးသားလုံးခြုံရေး နိုင်ငံအကျိုးစီးပွားကို ဖျက်ဆီးလိုသူလို့ ယူဆနိုင်တဲ့ သူကို နိုင်ငံကူးလက်မှတ် မထုတ် ပေးဘူး ပြောတာကိုး။ အခုအချိန်မှာ ကျနော်တို့ ပြည်နယ်မှာက ရွေးကောက်ပွဲ ကိစ္စလောက် ပြောတာ နဲ့တင် ဖမ်းဆီးခံရတဲ့ အခြေအနေမှာ ရှိတဲ့အချိန်မှာ နိုင်ငံရေးအကျဉ်းသားဟောင်းဆိုတဲ့ နာမည်နဲ့ တွဲပါလာသူ တစ်ယောက် အတွက်ဆိုရင် တော်တော်ကြီးကို ကြီးမားတဲ့ အခက်အခဲတစ်ခု ဖြစ်သွားတယ်” ဟု ပြောသည်။ ထို့အပြင် ကရင်နီပြည်အတွင်းရှိ ပြည်သူများအတွက် (၂/) မှတ်ပုံတင် ကိုင်ဆောင်သူဖြစ်ရုံမျှဖြင့် နိုင်ငံကူး လက်မှတ်ရရှိရန် ပိုမိုစစ်ဆေးခံနေရသည့် အခြေအနေများကြောင့် နိုင်ကျဉ်းဟောင်းများအတွက် ပိုမိုဆိုးရွားနေ ကြောင်း ထားဖိုးက ဆက်ပြောသည်။ “ပတ်စ်ပို့စ် နိုင်ငံကူးလက်မှတ်နဲ့ ပတ်သက်ပြီးတော့ အကြားမှာ သူတို့ပိတ်ပင်တားဆီးတာ အများကြီး ရှိခဲ့တယ်။ ဥပမာ ၂/ ဆို မထုတ်ပေး တာတွေ ပိုပြီး စစ်ဆေးတာတွေ ဖြစ်ခဲ့တာပဲ။ အခုက ကျနော်တို့ ကရင်နီပြည်ကနေ ထွက်လာတဲ့ နိုင်ငံရေး အကျဉ်းသားဟောင်းတွေ အတွက်ဆိုရင် ကရင်နီပြည်က ဖြစ်တယ်ဆိုတဲ့ အချက်နဲ့ကို တော်တော်ကြီးကို နိုင်ငံကူးလက်မှတ် ရရှိဖို့ အခက်အခဲ ဖြစ်နေပြီ။” မြန်မာနိုင်ငံကူးလက်မှတ် ဆိုင်ရာ ဥပဒေသစ်သည် နိုင်ငံရေးအရ ဆန့်ကျင်သူများကို စနစ်တကျ ဖိနှိပ်ခြင်းဖြစ်ပြီး နိုင်ငံရေး အကျဉ်းသားဟောင်းများ၏ ဘဝပြန်လည်ထူထောင်ရေးကို တားဆီးထားခြင်း ဖြစ်သည်။ ထို့ကြောင့် ပြန်လည် လွတ်မြောက်လာသူများ အနေဖြင့် ပြည်တွင်းပြည်ပ ခရီးသွားလာမှုနှင့် ကိုယ်ရေး အချက် အလက် အသုံးပြုမှုများတွင် ကြုံတွေ့လာနိုင်သည့် လုံခြုံရေးအန္တရာယ်များကို အထူးသတိထားကြရန် နိုင်ငံရေး အကျဉ်းသူများအဖွဲ့ (WOPP) က မတ်လ ၂၆ ရက်နေ့တွင် ထုတ်ပြန်သတိပေးထားသည်။ ဓာတ်ပုံ - မြန်မာနိုင်ငံကူးလက်မှတ် ထုတ်ပေးရေးရုံး ရန်ကုန် ရန်ကင်း (Facebook) #နိုင်ငံကူးလက်မှတ် #နိုင်ငံကူးလက်မှတ်ဥပဒေသစ် #WOPP #ထားဖိုး #KPPA #နိုင်ကျဉ်း

နိုင်ငံကူးလက်မှတ် ဥပဒေသစ်က နိုင်ကျဉ်းများ၏ လွတ်လပ်စွာ သွားလာခွင့်အား ခြိမ်းခြောက်နေ

Mar 26

စစ်မှုထမ်းကြေး ကောက်ခံနေသည့် အုပ်ချုပ်ရေးမှူး ပစ်သတ်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၆ ရက်။ မြိတ်မြို့နယ်တွင် စစ်မှုထမ်းကြေး ကောက်ခံနေသည့် တောတန်းကျေးရွာ အုပ်ချုပ်ရေးမှူး ပစ်ခတ်သတ်ဖြတ် ခံလိုက်ရသည်ဟု ဒေသခံရွာသားများက ပြောသည်။ မြိတ်မြို့နယ်၊ မဇောကျေးရွာအုပ်စုရှိ တောတန်းကျေးရွာအုပ်ချုပ်ရေးမှူး ဦးအေးသန်းသည် ပြည်ထောင်စု လမ်းမကြီးပေါ်တွင် သေနတ်ဖြင့် ပစ်ခတ်ခံရပြီး နေရာ၌ပင် ပွဲချင်းပြီးသေဆုံးသွားကြောင်း ဒေသခံရွာသား များ၏ ပြောပြချက်အရ သိရသည်။ အဆိုပါ ဖြစ်စဉ်နှင့်ပတ်သက်၍ အသက် ၄၀ ခန့်အရွယ်ရှိ ရွာသားတစ်ဦးက “လကုန်ခါနီးဆိုတော့ ငွေကောက်ဖို့ အတွက် သွားတာပါ။ ငွေကောက်တာ လျော့ပေါ့တာမျိုးမရှိဘူး၊ အတော်ဆိုးတယ်လို့ ရွာသားတွေက ပြောကြ တယ်။ သူ့ကို ဘယ်လက်နက်ကိုင်အဖွဲ့က ပစ်သွားတယ်ဆိုတာတော့ မသိရသေးပါဘူး။ ခေါင်းမှာ ကျည်ထိတဲ့ ဒဏ်ရာနဲ့ သေသွားတယ်” ဟု ပြောသည်။ ဖြစ်စဉ်မှာ မတ်လ ၂၅ ရက်နေ့၊ နံနက် ၇ နာရီခန့်တွင် ခုံမော်ကျေးရွာအနီးရှိ ပြည်ထောင်စု လမ်းမကြီးပေါ်၌ ဖြစ်ပွားခဲ့ခြင်း ဖြစ်ပြီး ဦးအေးသန်းသည် ဦးခေါင်းတွင် သေနတ်ကျည်ဆန် ထိမှန်သည့်ဒဏ်ရာဖြင့် သေဆုံးခဲ့ခြင်း ဖြစ်သည်။ ၎င်းသည် မဇောကျေးရွာအုပ်စုဝင် ကျေးရွာများဖြစ်သည့် ခုံမော်၊ တောတန်းနှင့် သကန်တောင်ပု စသည့်ရွာများ တွင် လစဉ် စစ်မှုထမ်းကြေးများကို ဖိအားပေးကောက်ခံနေသူတစ်ဦးဖြစ်ကြောင်း ဒေသခံများက ဆိုသည်။ စစ်မှုထမ်းကြေးဆိုသည်မှာ စစ်မှု ထမ်းရန် အမည်စာရင်း ပါသူ ကိုယ်စား စစ်မှုထမ်းရန် သဘောတူသည့်သူ (သို့မဟုတ်) အစားထိုးသွားမည့်သူကို ပေးရသည့် ထောက်ပံ့ကြေး သို့မဟုတ် အချို့နေရာများတွင် စစ်မှုထမ်းသွားသည့် သူ၏ မိသားစုကို ကျန်ရစ်သူများက ထောက်ပံ့ကြေးပေးရန် ဆိုသည့် ခေါင်းစဉ်နှင့် ကောက်ခံပါသည်။ ထိုကောက်ခံငွေမှာ တရားဝင် သတ်မှတ်ထားသည့် ငွေမဟုတ်ပဲ တနေရာနှင့် တနေရာ ပမဏ ကွာခြားနိုင်ပါသည်။ သေဆုံးသူ ဦးအေးသန်း၏ ရုပ်အလောင်းကို မဇောအုပ်ချုပ်ရေးမှူးနှင့်အဖွဲ့က မြိတ်မြို့ရှိ စစ်ဆေးရုံသို့ သယ် ဆောင်သွားခဲ့ကြောင်း ရွာသားများက ပြောသည်။ ဦးအေးသန်းသည် ပြီးခဲ့သည့် ၂၀၂၅ ခုနှစ်၊ သြဂုတ်လအတွင်းကလည်း ခုံမော်ကျေးရွာမှ အသက် ၁၈ နှစ်အရွယ် လူငယ်လေးဦးအား စစ်မှုထမ်းစာရင်းတွင် ပါဝင်နေသည်ဟု အကြောင်းပြကာ လူငယ်တစ်ဦးလျှင် ငွေကျပ် ၁၄ သိန်းစီ တောင်းယူခဲ့သည့် သမိုင်းကြောင်းရှိသူဖြစ်ကြောင်း ကျေးရွာသားများက ဆိုသည်။ ၎င်းသည် ပြီးခဲ့သည့်နှစ် သြဂုတ်လ ၂၄ ရက်နေ့ကလည်း ပြည်သူ့ကာကွယ်ရေးအဖွဲ့ တစ်ဖွဲ့၏ ဝင်ရောက် ဖမ်းဆီးခြင်းကို ခံခဲ့ရဖူးသော်လည်း ထိုစဉ်က နေအိမ်တွင် မရှိသဖြင့် လွတ်မြောက်သွားခဲ့ခြင်း ဖြစ်သည်။ လက်ရှိတွင် မြိတ်မြို့နယ်နှင့် ပုလောမြို့နယ်အစပ်ရှိ ကျေးရွာများတွင် စစ်ကော်မရှင်တပ်၏ စစ်မှုထမ်းဥပဒေ အတွက် အုပ်ချုပ်ရေးမှူးများက ငွေကြေးကောက်ခံမှုများ ခပ်စိပ်စိပ် ပြုလုပ်လာနေသဖြင့် ဒေသခံပြည်သူများ အကြား စိုးရိမ်ထိတ်လန့်မှုများ မြင့်တက်လျက်ရှိသည်။ ထိုသို့ ငွေကြေးအတင်းအကြပ် ကောက်ခံမှုများကြောင့် ဒေသခံများနှင့် အုပ်ချုပ်ရေးပိုင်းအကြား တင်းမာမှုများ ရှိနေသကဲ့သို့၊ စစ်ကော်မရှင်၏ ယန္တရားကို အကောင်အထည် ဖော်ပေးနေသည့် အုပ်ချုပ်ရေးမှူးများ ပစ်မှတ်ထား တိုက်ခိုက်ခံရမှုများလည်း ဆက်တိုက်ဆိုသလို ဖြစ်ပွားလျက်ရှိကြောင်း နယ်မြေခံ သတင်းရင်းမြစ်များက ပြောပါသည်။ #စစ်မှုထမ်းဥပဒေ #စစ်မှုထမ်းကြေး #တောတန်းကျေးရွာ #အုပ်ချုပ်ရေးမှူး

စစ်မှုထမ်းကြေး ကောက်ခံနေသည့် အုပ်ချုပ်ရေးမှူး ပစ်သတ်ခံရ

Mar 26

ဒီးမော့ဆို မြို့နယ်ရှိ KTV အားလုံး ပိတ်သိမ်းရန် အမိန့်ထုတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၆ ရက်။ ကရင်နီပြည်၊ ဒီးမော့ဆိုမြို့နယ် အနောက်ခြမ်းရှိ စစ်ဘေးရှောင်စခန်းများနှင့် လူနေအိမ်ခြေများအကြား တရား မဝင်ဖွင့်လှစ်ထားသည့် KTV (ကာရာအိုကေဆိုင်) များအားလုံးကို နန်းမယ်ခုံမြို့နယ် ပူးပေါင်းအုပ်ချုပ် ရေးအဖွဲ့က အပြီးပိုင်ပိတ်သိမ်းလိုက်သည်။ ကရင်နီပြည်တွင် 'တစ်လေးလုံး' စစ်ဆင်ရေးအပြီး ၂၀၂၅ ခုနှစ် ဇူလိုင်လပိုင်းမှ စတင်ကာ ချယ်ရီကုန်းရှိ လူနေ အိမ်များနှင့် စစ်ဘေးရှောင်စခန်းများကြား၌ KTV ဆိုင် ၄ ဆိုင်ခန့် စတင်ပေါ်ပေါက်လာခဲ့ရာမှ လက်ရှိတွင် ဆိုင် ပေါင်း ၁၀ ဆိုင်ထက်မနည်းထိ ရှိလာပြီဟု စစ်ရှောင်များက ပြောသည်။ လူမှုပတ်ဝန်းကျင်အပေါ် သက်ရောက်မှုရှိလာသည့် လုပ်ငန်းများအား ထိန်းကျောင်းနိုင်ရန် နန်းမယ်ခုံ၊ လွိုင်နန်းဖ နှင့် ဒီးဘောင်းခူ မြို့နယ်အုပ်ချုပ်ရေးအဖွဲ့များ၊ ကရင်နီပြည်တပ်ပေါင်းစုံနှင့် ကရင်နီပြည်ရဲတပ်ဖွဲ့ (KSP) တို့ ပူးပေါင်း၍ အရေးပေါ် အစည်းအဝေးတစ်ရပ် ပြုလုပ်ကာ ဆိုင်အားလုံးကို မတ်လ ၁၆ ရက်နေ့ နောက်ဆုံးထား ပိတ်သိမ်းရန် ညွှန်ကြားခဲ့ခြင်း ဖြစ်သည်။ နန်းမယ်ခုံမြို့နယ် ပူးပေါင်းအုပ်ချုပ်ရေးကော်မတီဝင်တစ်ဦးက “အာဏာသိမ်းမှ ဖွင့်တဲ့ KTV တွေပါ။ ယေဘုယျ အားဖြင့် ၂၀၂၂ - ၂၃ မှ ပိုများလာတယ် ခုထိဘဲပေါ့။ လက်ရှိက ၁၀ ဆိုင်၊ ၁၁ ဆိုင်ရှိမယ်။ မကြာသေးခင် တိုးချဲ့ ထားတာ ရှိတယ်။ အခုတော့ အားလုံး တပ်ပေါင်းစုနဲ့ ၃ မြို့နယ် အစည်းဝေး ဆုံးဖြတ်ချက်အရ အကုန်ပိတ်သိမ်း လိုက်ပါပြီ” ဟု ပြောသည်။ ယခုကဲ့သို့ ပိတ်သိမ်းရန် ဆုံးဖြတ်ရခြင်းမှာ ဒေသတွင်းရှိ ပြည်သူများ ဘေးကင်းလုံခြုံစွာ သွားလာနေထိုင်နိုင် ရေးနှင့် တရားဥပဒေစိုးမိုးရေး လုပ်ငန်းများကို ထိရောက်စွာ ဆောင်ရွက်နိုင်ရန်ဖြစ်ကြောင်း ကရင်နီပြည် တပ်ပေါင်းစုံ အဖွဲ့အစည်းက ဆိုသည်။ ဒေသခံများ၏ ပြောကြားချက်အရ ပြီးခဲ့သည့် ဖေဖော်ဝါရီလ ၂၈ ရက်နေ့က KTV ဆိုင်တစ်ခုတွင် အငြင်းပွားမှု ဖြစ်ကာ အချင်းချင်းကြား ပစ်ခတ်မှု တစ်ခု ဖြစ်ပွားခဲ့သည်။ ဒီးမော့ဆိုမြို့နယ် အနောက်ခြမ်းတွင် ခိုလှုံနေသည့် စစ်ဘေးရှောင် အမျိုးသားတစ်ဦးက “ဆူညံသံတွေ မကြားရ တော့ တစ်မျိုး စိတ်ချမ်းသာတာပေါ့နော်။ အခုလို KTV ကို ပိတ်သိမ်းလိုက်တာ တရားဥပဒေ အားကောင်းရေး အတွက် လမ်းစဖြစ်သလို စစ်ဘေးရှောင် ပြည်သူလူထုအတွက် ပြဿနာကို တစ်နည်းတစ်ဖုံ လျော့ချပေး သလို မျိုးလည်း ဖြစ်တယ်လို့ မြင်မိပါတယ်” ဟု ပြောသည်။ ၎င်းက ဆက်လက်၍ “KTV က လမ်းမကြီးဘေးမှာပဲရှိတော့ ကလေးတွေက ကျောင်းသွား ကျောင်းလာရင် အမြင်မတော်ဘူးပေါ့နော်။ ကလေးတွေရဲ့ အကျင့်စာရိတ္တလည်း ပျက်စီးလာမှာကို စိုးရိမ်မိတာပေါ့။ ပြီးတော့ အိမ်ထောင်ရေး ဖောက်ပြန်မှုတွေ အရမ်းများလာတာလည်း KTV ကြောင့်လို့ ပြောလို့ရတာပေါ့။ ဒီးမော့ဆို အနောက်ဘက်ခြမ်းဆို မိသားစု အိမ်ထောင်ရေးပြဿနာတွေ အများရီး ပေါ်လာခဲ့တယ်။ အရင်တစ်ပတ်တုန်း ကဆို KTV က ကောင်မလေးတွေ လုကြရင်းနဲ့ သေနတ်တွေ ဖောက်ကြတယ်ဆိုတော့ ပြည်သူတွေအတွက် လုံခြုံစိတ်ချမှု မရှိဘူးပေါ့နော်” ဟု ပြောသည်။ ကရင်နီပြည် ကြားကာလအုပ်ချုပ်ရေး ကောင်စီ (IEC) အနေဖြင့် တော်လှန်ရေးကာလအတွင်း လူမှုဘဝ လုံခြုံစေ ရန် ၂၀၂၄ ခုနှစ် စက်တင်ဘာလတွင် ကရင်နီပြည် တော်လှန်ရေး တပ်ပေါင်းစုံနှင့် ပူးပေါင်း၍ မူးယစ်ဆေးဝါးနှင့် လိင်ဖျော်ဖြေရေး လုပ်ငန်းများကဲ့သို့ တော်လှန်ရေး လူမှုကျင့်ဝတ်နှင့် မညီသော လုပ်ငန်းများကို တားမြစ်သည့် ‘တရားဥပဒေစိုးမိုးရေးစီမံချက်’ တစ်ရပ်ကို ချမှတ်ထားခဲ့သည်။ ယခုအခါ အဆိုပါ စီမံချက်နှင့်အညီ ‘တရားဥပဒေ စိုးမိုးရေးဆိုင်ရာ အလုပ်အဖွဲ့ (Task Force) နှင့် အထူးတပ်ဖွဲ့ (Special Force)’ တို့ကို ဖွဲ့စည်းကာ လုပ်ပိုင်ခွင့်များ ပေးအပ်ထားပြီး ဖြစ်သဖြင့် နယ်မြေအတွင်း တရားဥပဒေ စိုးမိုးရေးနှင့် ပြည်သူ့လုံခြုံရေးကို ထိရောက်စွာ ဆက်လက် ကိုင်တွယ်ဆောင်ရွက်သွားမည်ဟု ထုတ်ပြန်ထား သည်။ #KTV # TaskForce #KSP #Karenni #ကာရာအိုကေဆိုင်

ဒီးမော့ဆို မြို့နယ်ရှိ KTV အားလုံး ပိတ်သိမ်းရန် အမိန့်ထုတ်

Mar 25

ထိုင်း ရေနံတင်သင်္ဘော ဟော်မုဇ် ရေလက်ကြားကို ကျော်ဖြတ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၂၅ ရက်။ ထိုင်းနိုင်ငံအခြေစိုက် Bangchak Corporation ပိုင် "BGP 3" ဆီတင်သင်္ဘောသည် ဟော်မုဇ်ရေလက်ကြားကို မတ်လ ၂၄ ရက်နေ့တွင် ဘေးကင်းစွာ ဖြတ်သန်းနိုင်ခဲ့သည်။ အဆိုပါ ရေလမ်းကြောင်းတွင် မတ်လ ၁၁ ရက်နေ့က ထိုင်းကုန်တင်သင်္ဘော Mayuree Naree တိုက်ခိုက်ခံရပြီး သင်္ဘောသား ၃ ဦး ပျောက်ဆုံးခဲ့သည့် ဖြစ်စဉ်ရှိခဲ့သော်လည်း ယခုအခါ သံတမန်ရေးရာ ညှိနှိုင်းမှုများဖြင့် ဘေးကင်းစွာ ဖြတ်သန်းနိုင်ခဲ့ခြင်းဖြစ်သည်။ မနေ့က ဖြတ်သန်းခဲ့သော BGP ၃ သင်္ဘောမှာ မတ်လ ၁၁ ရက်ကတည်းက ကျောက်ချ ရပ်နားထားခဲ့သော သင်္ဘောဖြစ်သည်။ ထိုင်းနိုင်ငံခြားရေးဝန်ကြီးဌာနသည် အီရန်နှင့် အိုမန်အစိုးရတို့နှင့် နီးကပ်စွာ ညှိနှိုင်းဆောင်ရွက်ခဲ့သဖြင့် ယခုကဲ့သို့ အဆင်ပြေချောမွေ့ခဲ့ခြင်းဖြစ်ပြီး အီရန်အစိုးရကလည်း ထိုင်းနိုင်ငံနှင့် ချစ်ကြည်ရင်းနှီးမှုကို တန်ဖိုးထားကြောင်း ထုတ်ဖော်ပြောကြားခဲ့သည်။ လက်ရှိတွင် အဆိုပါ ဆီတင်သင်္ဘောသည် အိန္ဒိယသမုဒ္ဒရာအတွင်း ရောက်ရှိနေပြီဖြစ်ပြီး လာမည့် ဧပြီလဆန်းတွင် ထိုင်းနိုင်ငံသို့ ရေနံစိမ်းများ ဘေးကင်းစွာ ပို့ဆောင်နိုင်မည်ဟု ခန့်မှန်းရသည်။ ထို့ပြင် SCG Chemicals ကုမ္ပဏီပိုင် သင်္ဘောတစ်စင်းလည်း ဟော်မုဇ်ရေလက်ကြားကို ထပ်မံဖြတ်သန်းရန် အစီအစဉ်ရှိသည်ဟု ဆိုသည်။ #ထိုင်းရေနံတင်သင်္ဘော #ဟော်မုဇ်ရေလက်ကြား

ထိုင်း ရေနံတင်သင်္ဘော ဟော်မုဇ် ရေလက်ကြားကို ကျော်ဖြတ်

Mar 25

ထောင်နှင့် ချီသော လေထီးခုန် တပ်ဖွဲ့များ အီရန် သို့ ပို့မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၅ ရက်။ အမေရိကန် သမ္မတ ဒေါ်နယ်ထရန့်က အီရန်နှင့် စစ်ပွဲရပ်စဲရန် ဆွေးနွေးမှုများရှိကြောင်း ပြောကြားနေသော်လည်း အမေရိကန်စစ်ဌာနချုပ် (Pentagon) အနေဖြင့် အီရန်နိုင်ငံအတွင်းသို့ ဝင်ရောက်နိုင်သည့် အထူးတပ်ဖွဲ့များ စေလွှတ်ရန် ပြင်ဆင်လျက်ရှိသည်။ အမေရိကန် လေကြောင်းချီတပ်မ ၈၂ မှ စစ်သည်တော် ၃,၀၀၀ နှင့် ၄,၀၀၀ ကြားကို အရှေ့အလယ်ပိုင်းသို့ ထပ်မံစေလွှတ်မည်ဖြစ်ပြီး ၎င်းသည် ဒေသတွင်းရှိ အမေရိကန်တပ်အင်အား ၅၀,၀၀၀ ထက် ကျော်လွန်သွားမည်ဖြစ်သည်။ အဆိုပါ စစ်ရေးပြင်ဆင်မှုများတွင် အီရန်နိုင်ငံ၏ ရေနံတင်ပို့မှု ဗဟိုချက်ဖြစ်သော Kharg ကျွန်းကို သိမ်းပိုက်ရေးအစီအစဉ်များလည်း ပါဝင်နေသည်ဟု စစ်ရေး အကဲခတ်များက ဆိုသည်။ တစ်ဖက်တွင် အီရန်နိုင်ငံခြားရေးဝန်ကြီးဌာနက ကုလသမဂ္ဂသို့ အကြောင်းကြားစာပေးပို့ရာတွင် ဟော်မုဇ်ရေလက်ကြား (Strait of Hormuz) အတွင်း ရန်လိုသောသဘောမဆောင်သည့် သင်္ဘောများကို ကြိုတင်ညှိနှိုင်းမှုဖြင့် ဖြတ်သန်းခွင့်ပြုမည်ဟု ဖော်ပြထားသည်။ သို့သော် အမေရိကန်၊ အစ္စရေးနှင့် ၎င်းတို့ကို ထောက်ခံသောနိုင်ငံများမှ သင်္ဘောများနှင့် ပစ္စည်းကိရိယာများကိုမူ ဖြတ်သန်းခွင့် လုံးဝပြုမည်မဟုတ်ကြောင်း ပြတ်သားစွာ ထုတ်ပြန်ထားသည်။ ဖေဖော်ဝါရီ ၂၈ ရက်မှ စတင်ခဲ့သော စစ်ပွဲအတွင်း အမေရိကန်က အီရန်နိုင်ငံအတွင်းရှိ ပစ်မှတ်ပေါင်း ၉,၀၀၀ ကျော်ကို တိုက်ခိုက်ခဲ့ပြီး အမေရိကန်စစ်သည် ၁၃ ဦး သေဆုံးကာ ၂၉၀ ဦး ဒဏ်ရာရရှိခဲ့သည်။ အမေရိကန်ပြည်သူ ၆၁ ရာခိုင်နှုန်းခန့်မှာလည်း အဆိုပါ တိုက်ခိုက်မှုများကို သဘောမတူကြောင်း စစ်တမ်းများတွင် ဖော်ပြထားသည်။ #အီရန်စစ်ပွဲ #အမေရိကန်စစ်တပ် #ဟော်မုဇ်ရေလက်ကြား

ထောင်နှင့် ချီသော လေထီးခုန် တပ်ဖွဲ့များ အီရန် သို့ ပို့မည်

Mar 25

တရုတ်သံတမန်ဆက်ဆံရေး ဂျပန် အဆင့်လျှော့ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၂၅ ရက်။ ဂျပန်အစိုးရသည် ၂၀၂၆ ခုနှစ်အတွက် ထုတ်ပြန်မည့် နှစ်ပတ်လည် သံတမန်ရေးရာ အစီရင်ခံစာ (Diplomatic Bluebook) မူကြမ်းတွင် တရုတ်နိုင်ငံနှင့် ဆက်ဆံရေးအပေါ် ဖော်ပြသည့် အသုံးအနှုန်းကို အဆင့်လျှော့ချ သတ်မှတ်ရန် စီစဉ်လျက်ရှိသည်။ ယခင်က တရုတ်နိုင်ငံကို "အရေးအကြီးဆုံးသော ဆက်ဆံရေးရှိသည့် နိုင်ငံများထဲမှ တစ်ခု" ဟု သုံးနှုန်းခဲ့သော်လည်း ယခုမူကြမ်းတွင် "အရေးပါသော အိမ်နီးချင်းနိုင်ငံ" ဟုသာ ပြောင်းလဲဖော်ပြထားပြီး နှစ်နိုင်ငံဆက်ဆံရေးကို "ဗျူဟာမြောက်၍ နှစ်ဦးနှစ်ဖက် အကျိုးဖြစ်ထွန်းစေသော ဆက်ဆံရေး" အဖြစ်သာ ရည်ညွှန်းထားသည်။ ဤကဲ့သို့ အဆင့်လျှော့ချသတ်မှတ်ခြင်းသည် ဝန်ကြီးချုပ် စာနာအီး တာကာအိချီ အစိုးရလက်ထက်တွင် နှစ်နိုင်ငံဆက်ဆံရေး သိသိသာသာ ဆိုးရွားလာမှုကို တရားဝင် အသိအမှတ်ပြုလိုက်ခြင်း ဖြစ်သည်။ အစီရင်ခံစာတွင် တရုတ်နိုင်ငံ၏ မြေရှားသတ္တု (Rare Earths) တင်ပို့မှု ကန့်သတ်ခြင်း၊ ဂျပန်စစ်ဘက်လေယာဉ်များကို ရေဒါဖြင့် ပစ်မှတ်ထား နှောင့်ယှက်ခြင်းနှင့် ထိုင်ဝမ်အရေး ဖိအားပေးမှု မြင့်တက်လာခြင်းတို့ကို အဓိကအကြောင်းရင်းများအဖြစ် ဖော်ပြထားသည်။ ထိုသို့ ဆက်ဆံရေး တင်းမာနေစဉ်အတွင်း မတ်လ ၂၄ ရက်နေ့ နံနက်ပိုင်းတွင် အသက် (၂၃) နှစ်အရွယ်ရှိ ဂျပန်ကြည်းတပ် (GSDF) တပ်ဖွဲ့ဝင်တစ်ဦးသည် တိုကျိုမြို့ရှိ တရုတ်သံရုံးဝင်းအတွင်းသို့ ခြံစည်းရိုးကျော်၍ တရားမဝင် ကျူးကျော်ဝင်ရောက်ခဲ့သဖြင့် ဖမ်းဆီးထိန်းသိမ်းခံခဲ့ရသည်။ ယင်းဖြစ်ရပ်နှင့် ပတ်သက်၍ ဂျပန်အစိုးရအဖွဲ့ အတွင်းဝန်ချုပ် မီနိုရု ကီဟာရာက တရုတ်နိုင်ငံထံ ဝမ်းနည်းစကား ပြောကြားခဲ့သော်လည်း တရုတ်အစိုးရဘက်က ပြင်းထန်စွာ ကန့်ကွက်ထားသဖြင့် သံတမန်ရေးရာ တင်းမာမှုများ ပိုမိုမြင့်တက်လျက်ရှိသည်။ #ဂျပန်တရုတ်ဆက်ဆံရေး #တရုတ်ဂျပန်တင်းမာမှု

တရုတ်သံတမန်ဆက်ဆံရေး ဂျပန် အဆင့်လျှော့

Mar 25

နျူဓါတ်အားပေးစက်ရုံ တည်ဆောက်ရေး ရုရှားနှင့် ဗီယက်နမ် လက်မှတ်ထိုး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၅ ရက်။ ဗီယက်နမ်နိုင်ငံတွင် နျူကလီးယားစွမ်းအင်သုံး လျှပ်စစ်ဓာတ်အားပေးစက်ရုံသစ် တည်ဆောက်ရန် မတ်လ ၂၃ ရက်နေ့က ရုရှားနိုင်ငံနှင့် သဘောတူစာချုပ် ချုပ်ဆိုလိုက်သည်။ ၂၀၂၆ ခုနှစ်၊ မတ်လ ၂၃ ရက် (တနင်္လာနေ့) တွင် ဗီယက်နမ်ဝန်ကြီးချုပ် ဖန်မင်းချင်း၏ မော်စကိုခရီးစဉ်အတွင်း ဗီယက်နမ်နိုင်ငံ၌ "နင်းသွမ်-၁" (Ninh Thuan 1) နျူကလီးယားဓာတ်အားပေးစက်ရုံ တည်ဆောက်ရန် နှစ်နိုင်ငံအစိုးရချင်း သဘောတူညီချက်တစ်ရပ်ကို လက်မှတ်ရေးထိုးခဲ့ကြခြင်းဖြစ်သည်။ အဆိုပါစက်ရုံတွင် ရုရှားဒီဇိုင်း VVER-1200 ရေအေးပေးစနစ်သုံး ရီအက်တာ (Reactor) နှစ်လုံး တပ်ဆင်မည်ဖြစ်ပြီး ရုရှားရှိ Leningrad NPP-2 စက်ရုံကို စံနမူနာပြု တည်ဆောက်မည် ဖြစ်သည်။ ဤသဘောတူစာချုပ်ကို ရုရှားနိုင်ငံပိုင် နျူကလီးယားကော်ပိုရေးရှင်း (Rosatom) ညွှန်ကြားရေးမှူးချုပ် Alexey Likhachev နှင့် ဗီယက်နမ်အစိုးရရုံးဝန်ကြီး Tran Van Son တို့က နှစ်နိုင်ငံဝန်ကြီးချုပ်များ ရှေ့မှောက်တွင် လက်မှတ်ရေးထိုးခဲ့ကြသည်။ ဤစီမံကိန်းသည် ဗီယက်နမ်၏ စွမ်းအင်လွတ်လပ်ခွင့်ကို ခိုင်မာစေပြီး အဆင့်မြင့်နည်းပညာနှင့် သုတေသနကဏ္ဍများတွင် နှစ်နိုင်ငံ ရေရှည်ပူးပေါင်းဆောင်ရွက်မှုအတွက် အုတ်မြစ်ဖြစ်လာမည်ဟု ဆိုသည်။ ဗီယက်နမ်သည် ၂၀၀၉ ခုနှစ်ကတည်းက နင်းသွမ်ပြည်နယ်တွင် နျူကလီးယားစက်ရုံတည်ဆောက်ရန် စီစဉ်ခဲ့သော်လည်း စီးပွားရေးအခြေအနေများကြောင့် ၂၀၁၆ ခုနှစ်တွင် ရပ်ဆိုင်းခဲ့ဖူးသည်။ သို့သော် စွမ်းအင်လုံခြုံရေးနှင့် ကာဗွန်လျှော့ချရေး ရည်မှန်းချက်များကြောင့် ၂၀၂၄ ခုနှစ် နိုဝင်ဘာလတွင် စီမံကိန်းကို ပြန်လည်စတင်ရန် ဗီယက်နမ်အမျိုးသားလွှတ်တော်က အတည်ပြုခဲ့ခြင်း ဖြစ်သည်။ ဗီယက်နမ်ဝန်ကြီးချုပ်က နင်းသွမ်ပြည်နယ်ရှိ နျူကလီးယားဓာတ်အားပေးစက်ရုံ နှစ်ရုံလုံးကို ၂၀၃၀ ပြည့်နှစ်ကုန်တွင် အပြီးသတ်တည်ဆောက်ရန် ရည်မှန်းချက် ထားရှိပါသည်။ အရှေ့တောင် အာရှနိုင်ငံများအတွင်း ဖိလစ်ပိုင်နိုင်ငံတွင် နျူကလီးယား ဓါတ်အားပေး စက်ရုံ တစ်ခု တည်ဆောက်ခဲ့သော်လည်း ဘေးကင်းလုံခြုံရေးနှင့် နိုင်ငံရေး အကြောင်းရင်းများကြောင့် ယခုထိ လည်ပတ်နိုင်ခဲ့ခြင်း မရှိပေ။ အင်ဒို နီးရှား နိုင်ငံကလည်း ၂၀၃၀ ခုနှစ်များအတွင်း နျူကလီးယား ဓါတ်အားပေး စက်ရုံ တည်ဆောက်လည်ပတ်နိုင်ရန် ရုရှား၊ အမေရိကန် တို့ နှင့် ဆွေးနွေးလျက်ရှိသည်။ ထိုင်းနိုင်ငံတွင်လည်း နျူကလီးယား ဓါတ်အားပေး စက်ရုံအငယ်စားများ တည်ဆောက်ရန် စီမံကိန်းများ ရေးဆွဲလျက်ရှိသည်။

နျူဓါတ်အားပေးစက်ရုံ တည်ဆောက်ရေး ရုရှားနှင့် ဗီယက်နမ် လက်မှတ်ထိုး

Mar 24

ကသာ အဝင်အထွက် ပိတ်ထားပြီး ဗုံးကြဲ တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၄ ရက်။ လူပေါင်း ၈၀ ခန့် သေဆုံးခဲ့ရသည့် တိုက်ခိုက်မှု နောက်ပိုင်း စစ်ကိုင်းတိုင်း ဒေသကြီး၊ ကသာမြို့တွင် စစ်ကော်မရှင်တပ်က မြို့အဝင်အထွက် လမ်းကြောင်းအားလုံးကို ပိတ်ဆို့ထားပြီး လေကြောင်းမှတစ်ဆင့် နေ့ရောညပါ အပြင်းအထန် ဗုံးကြဲတိုက်ခိုက်နေခြင်းကြောင့် ဒေသခံ ပြည်သူ ၅,၀၀၀ ခန့် မြို့အတွင်း ပိတ်မိနေသည်။ ပြီးခဲ့သည့် မတ်လ ၂၀ ရက်နေ့က စစ်ဘေးရှောင်များ ခိုလှုံနေသည့် မဟာလေးထပ်ကျောင်းတိုက် ဗုံးကြဲခံရပြီး နောက်ပိုင်း စစ်ကော်မရှင်တပ်သည် ဂျက်လေယာဉ်၊ Y-12 အပါအဝင် လေယာဉ် ၁၀ စီးကျော်ဖြင့် ကသာမြို့ ပေါ်သို့ ၄ ရက်ဆက်တိုက် ဗုံးမိုးရွာချနေခြင်းဖြစ်သည်။ မတ်လ ၂၃ ရက်နေ့ (ယမန်နေ့) ကလည်း ရပ်ကွက် ၅ ထဲ လေကြောင်းမှ ဗုံးကြဲခဲ့သည့်အပြင် ယနေ့ထိ လေယာဉ်သံများ ဆက်ကြားနေရသည်ဟု မြို့ခံများက ပြောသည်။ လက်ရှိတွင် ဆက်သွယ်ရေးလိုင်းများနှင့် အင်တာနက်လိုင်းများ ဖြတ်တောက်ခံထားရသဖြင့် မြို့တွင်းရှိ မိသားစု ဝင်များနှင့် အဆက်အသွယ်ပြတ်တောက်ကာ စိုးရိမ်ပူပန်မှုများ မြင့်တက်နေသည်။ မြို့ခံအမျိုးသားတစ်ဦးက “မြို့ထဲမှာ ပိတ်မိနေတာ ၅,၀၀၀ ကျော်ပြီ။ စစ်တပ်က မြို့ပြင်ထွက်တဲ့သူမှန်သမျှ ပစ်သတ်မယ်လို့ ခြိမ်းခြောက်ထားတာ။ ကျနော်တို့ကို လူသားဒိုင်းလို လုပ်ထားပြီး မြို့ပေါ်ကို ဗုံးတွေ ဆက် တိုက်ကြဲနေတာပဲ။ ရပ်ကွက် (၅) ဘက်မှာလည်း ဗုံးတွေကျနေတယ်။ ဘယ်သူတွေ ထိခိုက်ကုန်ပြီလဲ ဆိုတာ တော့ အတိအကျ မသိရဘူး။ သွားကြည့်လို့လည်း မရဘူး” ဟု ပြောသည်။ မတ်လ ၂၀ ရက်နေ့ တိုက်ခိုက်မှုတွင် သံဃာတော်နှင့် အရပ်သား ၈၀ ခန့် သေဆုံးခဲ့ရပြီး အလောင်းအများစုမှာ မီးလောင်ကျွမ်းခဲ့သဖြင့် မည်သူမည်ဝါဖြစ်ကြောင်း ခွဲခြား၍မရမီ စစ်ကော်မရှင်က အလျင်အမြန် သင်္ဂြိုဟ်ခိုင်းခဲ့ ကြောင်း မြို့ခံများက ပြောသည်။ ထို့ပြင် ဒဏ်ရာရရှိသူ ၃၀ ကျော်မှာလည်း ဆေးရုံ၊ ဆေးခန်းများ ပိတ်ထားသဖြင့် လုံလောက်သော ဆေးဝါး ကုသခွင့်မရဘဲ အသက်အန္တရာယ် စိုးရိမ်နေရသည့် အခြေအနေဖြစ်နေသည်။ ကသာမြို့ပြင်တွင် စစ်ဘေးရှောင်နေရသူ မြို့ခံတစ်ဦးကလည်း “မြို့ထဲက လူတွေကတော့ အကုန်ထွက်ချင်နေ ကြတာပဲ။ ဒါပေမဲ့ လမ်းတွေကို သံချပ်ကာကားတွေနဲ့ ပိတ်ထားတော့ ဘယ်မှသွားလို့မရဘူး။ အခု ဖုန်းလိုင်းတွေ လည်း မရတော့ မိသားစုတွေ ဘာဖြစ်နေလဲဆိုတာ မသိရလို့ လူမှုကွန်ရက်ပေါ်မှာတင်ပြီး လူချင်း အဆက် အသွယ်ရအောင် လိုက်စုံစမ်းနေရတယ်” ဟု ပြောသည်။ ယခု ကသာမြို့တွင်း ပိတ်မိနေသည့် ပြည်သူများမှာ ၂၀၂၆ နှစ်ဆန်းပိုင်းတွင် တိုက်ပွဲများ ငြိမ်သက်လာသဖြင့် မြို့သို့ပြန်လည်ဝင်ရောက်လာသူများနှင့် ထွက်ပြေးတိမ်းရှောင်ခြင်း မရှိဘဲ ဆက်နေထိုင်နေသူများ ဖြစ်သည်။ ဒေသတွင်း တော်လှန်ရေးအင်အားစုများဘက်ကလည်း စစ်ကော်မရှင်သည် အရပ်သားပြည်သူများကို ဓားစာခံ အဖြစ် အသုံးချရန် မြို့တွင်းသို့ ပြန်လည်ဝင်ရောက်နေထိုင်ရန် ဖိအားပေးနေခြင်းဖြစ်ကြောင်း၊ ထို့ကြောင့် မြို့တွင်းသို့ ပြန်လည်ဝင်ရောက်ခြင်းမပြုဘဲ ဘေးလွတ်ရာတွင်သာ ဆက်လက်ခိုလှုံကြရန် သတိပေးချက်များ ထုတ်ပြန်ထားသည်။ ထို့ပြင် တိုက်ပွဲများမှာ အချိန်မရွေး ပြန်လည်ပြင်းထန်လာနိုင်သည့်အပြင် စစ်ကော်မရှင်၏ မြေပြင်စစ်ကြောင်း များမှာ လည်း မြို့တွင်းရှိ အရပ်သားများကို ပစ်မှတ်ထားကာ ဖမ်းဆီးနှိပ်စက်မှုများ ပြုလုပ်နိုင်သောကြောင့် တော်လှန်ရေးတပ်ဖွဲ့များက မြို့တွင်းသို့ ပြန်လည်ဝင်ရောက်ခြင်း မပြုကြရန် တိုက်တွန်းထားသည်။ စစ်ကော်မရှင်သည် ကသာမြို့အပြင် စစ်ကိုင်းတိုင်းအတွင်းရှိ ကနီ၊ မြောင်နှင့် ကျွန်းလှမြို့နယ်များကိုလည်း လေကြောင်းမှတစ်ဆင့် ဆက်တိုက် ဗုံးကြဲတိုက်ခိုက်နေသည်။ မတ်လ ၂၁ ရက်က ကနီမြို့နယ်ထဲက ဆူးလေကုန်းကျေးရွာရှိ စာသင်ကျောင်းနှင့် ဘုန်းကြီးကျောင်းကို ဂျက်ဖိုက် တာ ၇ စီးဖြင့် ဗုံးကြဲခဲ့သလို၊ မတ်လ ၂၃ ရက်နေ့ကလည်း မြောင်မြို့နယ် သောင်ကြီးကျေးရွာကို ဗုံးကြဲခဲ့သဖြင့် အရပ်သားများ ထပ်မံသေဆုံးခဲ့ရသည်။ ဓါတ်ပုံ - Indaw Revolution (IR) #ကသာမြို့ #စစ်ကိုင်းတိုင်း #ဗုံးကြဲတိုက်ခိုက်

ကသာ အဝင်အထွက် ပိတ်ထားပြီး ဗုံးကြဲ တိုက်ခိုက်

« Prev 1 … 25 26 27 28 29 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ