NMG Doh – Page 39 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Mar 6

ကချင်ပြည်နယ်တွင် အရပ်သား ရပ်ရွာများကို ပစ်မှတ်ထား တိုက်ခိုက်မှုများ ပိုများလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၆ ရက်။ ကချင်ပြည်တွင် စစ်ကော်မရှင်က ပြည်သူများရှိရာ ရပ်ရွာများကို လေကြောင်းမှ ပစ်မှတ်ထားတိုက်ခိုက်မှုများ လုပ်နေသည့်အပြင် နှစ်ဖက်ကြား စစ်ရေးတင်းမာမှု မြင့်တက်နေသည်ဟု KIO က ပြောသည်။ စစ်ကော်မရှင်တပ်သည် တိုက်ပွဲဖြစ်ပွားခြင်း မရှိသည့် နေရာများရှိ ပြည်သူလူထုကို လေကြောင်းမှ တစ်ဆင့် ရည်ရွယ်ချက်ရှိရှိ တိုက်ခိုက်နေမှုများအပေါ် ဗိုလ်မှူးကြီးနော်ဘူက ယခုကဲ့သို့ ထောက်ပြထားသည်။ “တိုက်ပွဲမရှိဘဲနဲ့ လေကြောင်းကနေ ဗုံးကြဲတာကတော့ ပြည်သူလူထုတွေ ရှိတဲ့နေရာမှာ ဗုံးကြဲတာလည်း ရှိတော့ရှိတယ်။ အခု သုံးရက်လောက် ဝိုင်းမော်မြို့နယ် ဆမ်ပိုင်ဆိုတဲ့ ရွာမှာလည်း ညသန်းခေါင်ယံ ၁၀ နာရီ ဝန်းကျင်လောက်မှာ ဗုံးကြဲတာ ရှိတယ်။ ဒါကပြည်သူထူပဲရှိတယ်။ တိုက်ပွဲလည်း မရှိဘူး၊ စခန်းလည်း မရှိဘူး၊ ဘာမှမရှိဘူး။ အဲ့ဒီနေရာမှာ ပြည်သူလူထုပဲ ရှိတဲ့နေရာမှာ သူတို့ ဗုံးကြဲတာ ဒါမျိုးတွေတော့ ရှိတယ်” ဟု ၎င်းက ဆက်ပြောသည်။ ကချင်ပြည် အတွင်းရှိ ဗန်းမော်၊ ဝိုင်းမော်နှင့် ဖားကန့်မြို့နယ်တို့တွင် စစ်ရေးအခြေအနေမှာ ဆက်လက် တင်းမာ နေပြီး ပြင်းထန်သော မြေပြင်တိုက်ပွဲကြီးများ မရှိသော်လည်း စစ်ကော်မရှင်တပ်က တိုက်ပွဲမရှိသည့် အရပ်သား နေထိုင်ရာ ကျေးရွာများကို လေကြောင်းနှင့် လက်နက်ကြီးများဖြင့် ပစ်မှတ်ထား တိုက်ခိုက်နေခြင်း ဖြစ်သည်။ ကချင်လွတ်လပ်ရေးအဖွဲ့ KIO/KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက “တင်းမာတာကတော့ ဗန်းမော် ဘက်မှာတော့ အချိန်မရွေး တိုက်ပွဲ ဖြစ်နိုင်တာပေါ့။ ဝိုင်းမော်တို့၊ ဖားကန့်တို့၊ အင်းတော်ကြီးတို့ ပေါ့နော် တင်း မာတဲ့ အနေအထားဖြစ်ပါတယ်။ ခေါင်လံဖူးတို့မှာတော့ အချိန်မရွေး တိုက်ပွဲဖြစ်နိုင်တဲ့ မြို့နယ်တွေ ဖြစ်ပါ တယ်။ ဗန်းမော်ဘက်မှာလည်း တိုက်ပွဲရှိတယ်။ လေကြောင်းနဲ့ ပစ်တာတော့ရှိတယ်။ ဒီနေ့တောင်မှ ပစ္စည်းတွေ ချပေးတယ်လို့ ပြောတယ်။ KIA နဲ့ ပူးပေါင်းတပ်တွေလည်း ထိုးစစ်ဆင်တာတော့ မရှိဘူး။ စစ်ကောင်စီဘက်က ထိုးလာလို့ရှိရင်တော့ ခုခံတိုက်ပွဲတွေတော့ ရှိပါတယ်” ဟု ပြောသည်။ မတ်လ ၅ ရက်နေ့က ဗန်းမော်မြို့နယ်အတွင်း တိုက်ပွဲအချို့ရှိနေပြီး စစ်ကော်မရှင်တပ်က လေကြောင်းမှ တစ်ဆင့် ထောက်ပံ့ရေးပစ္စည်းများ လာရောက်ချပေးခဲ့သည့် ဖြစ်စဉ်များရှိခဲ့ကြောင်းလည်း ဗိုလ်မှူးကြီးနော်ဘူက ပြောသည်။ ဖားကန့်ဘက်တွင်မူ ရက်အနည်းငယ်ကြာ တိုက်ပွဲငယ်လေးများ ဆက်ရှိနေပြီး ဗန်းမော်ဘက်တွင်မူ စစ်ကော်မရှင် တပ်က လက်နက်ကြီးများ၊ ဒရုန်းများနှင့် လေကြောင်းပစ်ခတ်မှုများကို ပုံမှန်လုပ်ဆောင်နေသည်။ ထို့ပြင် ဝိုင်းမော်မြို့နယ် အတွင်းရှိ စစ်ကော်မရှင်၏ ဗျူဟာကုန်းနှင့် တပ်မကုန်းများမှ လက်နက်ကြီးများဖြင့် ရမ်းသန်းပစ်ခတ်မှုကြောင့် ပြီးခဲ့သည့်ရက်ပိုင်းအတွင်းက ဒေသခံပြည်သူ ၃ ဦးထက်မနည်း ထိခိုက်ဒဏ်ရာ ရရှိခဲ့ သည့် ဖြစ်စဉ်များလည်း ရှိခဲ့သည်။ လတ်တလောတွင် ဆွမ်ပရာဘွမ်နှင့် ခေါင်လန်ဖူးဘက်တို့၌ တိုက်ပွဲများ ခေတ္တငြိမ်သက်နေသော်လည်း ဗန်းမော်၊ ဝိုင်းမော်၊ ဖားကန့်နှင့် အင်းတော်ကြီးဒေသတို့တွင် စစ်ရေးတင်းမာမှုများမှာ လျော့ကျသွားခြင်းမရှိဘဲ အချိန်မရွေး တိုက်ပွဲများ ပြန်လည်ပြင်းထန်လာနိုင်သည့် အခြေအနေတွင် ရှိနေသည်။ စစ်ကော်မရှင်က လေကြောင်းအင်အားကို အသုံးပြု၍ လူနေရပ်ရွာများကိုပါ ပစ်မှတ်ထားလာခြင်းကြောင့် ဒေသခံ ပြည်သူများအကြား စိုးရိမ်ထိတ်လန့်မှုများ ပိုမိုမြင့်တက်လျက်ရှိသည်။ #ကချင်တိုက်ပွဲ

ကချင်ပြည်နယ်တွင် အရပ်သား ရပ်ရွာများကို ပစ်မှတ်ထား တိုက်ခိုက်မှုများ ပိုများလာ

Mar 6

မူးယစ် မောင်းနှင်မှုဖြင့် အဆိုတော် ဘရစ်တ်နီ စပီးယား ဖမ်းဆီးခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၆ ရက်။ ကမ္ဘာကျော်အဆိုတော် ဘရစ်တ်နီ စပီးယားသည် အရက်နှင့် မူးယစ်ဆေးဝါး ရောနှောသုံးစွဲထားပြီး မတ်လ ၄ ရက် ညပိုင်းတွင် မူးယစ်ရီဝေစွာ ကားမောင်းနှင်ခဲ့သည်ဟူသော သံသယဖြင့် ကယ်လီဖိုးနီးယား အဝေးပြေးလမ်းမကြီး ရဲတပ်ဖွဲ့ (CHP) ၏ ဖမ်းဆီးခြင်းကို ခံခဲ့ရကြောင်း ရဲမှတ်တမ်း၌ ဖော်ပြထားပါသည်။ ဘရစ်တ်နီ စပီးယား မောင်းနှင်လာသည့် BMW 430i အမျိုးအစား မော်တော်ယာဉ်သည် လမ်းပေါ်၌ အရှိန်ပြင်းစွာဖြင့် ပုံမှန်မဟုတ်ဘဲ မောင်းနှင်နေကြောင်း တိုင်ကြားချက်အရ ရဲတပ်ဖွဲ့က လိုက်လံတားဆီးခဲ့ခြင်း ဖြစ်သည်။ ၎င်းကို ကြာသပတေးနေ့ နံနက်အစောပိုင်းတွင် ပြန်လည်လွှတ်ပေးခဲ့ပြီး မေလ ၄ ရက်နေ့၌ တရားရုံးသို့ လာရောက်ရန် ဆင့်ခေါ်ထားပါသည်။ ဘရစ်တ်နီ စပီးယားသည် ၁၉၉၀ ပြည့်လွန်နှစ်များ အကုန်တွင် တစ်ကမ္ဘာလုံးကို လွှမ်းမိုးခဲ့သော အဆိုတော်တစ်ဦး ဖြစ်သည်။ အသက် ၁၆ နှစ်အရွယ်တွင် ထွက်ရှိခဲ့သည့် "...Baby One More Time" သီချင်းသည် ကမ္ဘာတစ်ဝှမ်းတွင် အရောင်းရဆုံး ဖြစ်ခဲ့ပြီး ၎င်းကို နေ့ချင်းညချင်း ကြယ်ပွင့်တစ်ဦး ဖြစ်လာစေခဲ့သည်။ ထို့နောက် "Oops!... I Did It Again", "Toxic", "Gimme More" စသည့် သီချင်းများဖြင့် အယ်လ်ဘမ်ပေါင်း သန်း ၁၅၀ ကျော် ရောင်းချခဲ့ရပြီး ပေါ့ပ်ဂီတလောက၏ ပြယုဂ်တစ်ခု ဖြစ်လာခဲ့သည်။ ၂၀၀၇ ခုနှစ်ဝန်းကျင်တွင်မူ ၎င်းသည် စိတ်ပိုင်းဆိုင်ရာ ပြင်းထန်သော ဖိအားများနှင့် ကြုံတွေ့ခဲ့ရသည်။ မီဒီယာများ၏ အလွန်အကျွံ စောင့်ကြည့်ခံရခြင်းနှင့် အိမ်ထောင်ရေးပြိုကွဲခြင်းတို့ကြောင့် စိတ်ပိုင်းဆိုင်ရာ ဝေဒနာခံစားခဲ့ရပြီး ခေါင်းတုံးတုံးခြင်းနှင့် ပါပါရာဇီများကို ထီးဖြင့်ရိုက်ခြင်းများ ဖြစ်ပွားခဲ့သည်။ ၂၀၀၈ ခုနှစ်တွင် တရားရုံးက ၎င်း၏ဖခင်အား ဘရစ်တ်နီ၏ ဘဝနှင့် ငွေကြေးအားလုံးကို စီမံခန့်ခွဲခွင့် ပေးခဲ့သည်။ ၎င်းမှာ ယာယီဟု ထင်မြင်ခဲ့ကြသော်လည်း ၁၃ နှစ်တိုင် ကြာမြင့်ခဲ့သည်။ ၎င်းအား ဖခင်ဖြစ်သူက အကျဉ်းသားတစ်ဦးကဲ့သို့ ချုပ်ကိုင်ထားပြီး အတင်းအကျပ် အလုပ်လုပ်ခိုင်းနေသည်ကို ပရိသတ်များ သိရှိလာကြသောအခါ "ဘရစ်တ်နီကို လွတ်လပ်ခွင့်ပေးပါ" (Free Britney) ဟူသော ကမ္ဘာလုံးဆိုင်ရာ လှုပ်ရှားမှုကြီး ပေါ်ပေါက်လာခဲ့သည်။ ၂၀၂၁ ခုနှစ်၊ နိုဝင်ဘာလတွင်မူ တရားရုံးက အဆိုပါချုပ်ကိုင်မှုကို တရားဝင် ရုပ်သိမ်းပေးခဲ့ပါသည်။ #ဘရစ်တ်နီစပီးယား #Britneyspears

မူးယစ် မောင်းနှင်မှုဖြင့် အဆိုတော် ဘရစ်တ်နီ စပီးယား ဖမ်းဆီးခံရ

Mar 6

ပင်လယ်ကွေ့နိုင်ငံများ ရေနံ လမ်းကြောင်းသစ် ရှာဖွေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၆ ရက်။ အီရန်၏ တိုက်ခိုက်မှုအန္တရာယ်ကြောင့် ဟော်မုဇ်ရေလက်ကြားတွင် သင်္ဘောသွားလာမှုများ ရပ်တန့်လုနီးပါး ဖြစ်ပေါ်နေသဖြင့် ဆော်ဒီအာရေဗျနှင့် ယူအေအီး (UAE) နိုင်ငံများသည် အခြားလမ်းကြောင်းသစ်များကို ရှာဖွေလျက်ရှိကြသည်။ ဆော်ဒီအစိုးရပိုင် အာရမ်ကို (Aramco) ကုမ္ပဏီသည် ၎င်းတို့၏ ရေနံစိမ်းများကို ပင်လယ်နီ (Red Sea) လမ်းကြောင်းမှတစ်ဆင့် ပြောင်းလဲတင်ပို့ရန် ကြိုးပမ်းနေကြောင်း ရိုက်တာသတင်းဌာန၌ ဖော်ပြထားသည်။ အမေရိကန်နှင့် အစ္စရေးတို့က အီရန်ကို စတင်တိုက်ခိုက်ခဲ့သည့် သောကြာနေ့မှစ၍ ဆော်ဒီ၊ ယူအေအီး၊ ကူဝိတ်နှင့် အီရတ်နိုင်ငံတို့သည် ဟော်မုဇ်ရေလက်ကြားမှတစ်ဆင့် ရေနံတင်ပို့နိုင်ခြင်း မရှိတော့ပေ။ အီရန်နိုင်ငံကလည်း ဤလမ်းကြောင်းကို ဖြတ်သန်းသည့် မည်သည့်သင်္ဘောကိုမဆို ပစ်ခတ်မည်ဟု ခြိမ်းခြောက်ထားသည်။ ထို့ကြောင့် ဆော်ဒီအာရမ်ကိုကုမ္ပဏီသည် ရေနံထုတ်လုပ်မှု မရပ်နားလိုသဖြင့် အရှေ့-အနောက် ပိုက်လိုင်း (East-West Pipeline) ကို အသုံးပြုကာ ပင်လယ်နီဘက်ရှိ ယန်ဘူ (Yanbu) ဆိပ်ကမ်းမှတစ်ဆင့် ရေနံတင်ပို့ရန် ဝယ်ယူသူများအား အကြောင်းကြားထားသည်။ အဆိုပါပိုက်လိုင်းသည် တစ်ရက်လျှင် ရေနံစည် ၅ သန်းမှ ၇ သန်းအထိ သယ်ဆောင်နိုင်စွမ်း ရှိသည်။ သို့သော်လည်း လမ်းကြောင်းပြောင်းလဲရန်အတွက် စိန်ခေါ်မှုများ ရှိနေပါသေးသည်။ ယန်ဘူဆိပ်ကမ်း၌ ပိုက်လိုင်းမှ ပို့လွှတ်လိုက်သော ရေနံပမာဏအားလုံးကို သင်္ဘောပေါ်သို့ တင်ဆောင်ပေးနိုင်သည့် စွမ်းဆောင်ရည် ရှိ၊ မရှိအပေါ် ကုန်သည်များက သံသယရှိနေကြသည်။ ထို့ပြင် ရေနံပိုက်လိုင်းမှာ အီရန်နှင့် ၎င်း၏မဟာမိတ်များ၏ ပစ်မှတ်ဖြစ်လာနိုင်သကဲ့သို့ ပင်လယ်နီလမ်းကြောင်းတွင်လည်း ယီမင်နိုင်ငံရှိ အီရန်မဟာမိတ်များ၏ တိုက်ခိုက်မှုအန္တရာယ် ရှိနေပါသည်။ ယန်ဘူဆိပ်ကမ်းမှ ရေနံတင်ဆောင်ခများမှာလည်း နှစ်ဆကျော် မြင့်တက်သွားခဲ့သည်။ ဆော်ဒီအာရေဗျနိုင်ငံကဲ့သို့ပင် ယူအေအီးနိုင်ငံ၌လည်း ဟော်မုဇ်ရေလက်ကြားကို ရှောင်ကွင်း၍ ဖူဂျာအီရာ (Fujairah) ဆိပ်ကမ်းသို့ ပို့ဆောင်နိုင်သည့် ပိုက်လိုင်းရှိသော်လည်း အဆိုပါဆိပ်ကမ်းမှာ ဒရုန်းဖြင့် တိုက်ခိုက်ခံခဲ့ရသဖြင့် ရေနံတင်ဆောင်မှုများ နှောင့်နှေးကြန့်ကြာလျက် ရှိပါသည်။ #လောင်စာဆီ #ပင်လယ်ကွေ့နိုင်ငံများ #ဆော်ဒီအာရေဗျ #ယူအေအီး #ရေနံလမ်းကြောင်းသစ် #ရေနံ

ပင်လယ်ကွေ့နိုင်ငံများ ရေနံ လမ်းကြောင်းသစ် ရှာဖွေ

Mar 6

အမေရိကန်နှင့် ဗင်နီဇွဲလား သံတမန် ဆက်ဆံရေး ပြန်လည် ထူထောင်၊ အမေရိကန်က နိုင်ငံရေး၊ စီးပွားရေး အကျိုးအမြတ် များ ရဖွယ်ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၆ ရက်။ ကာလရှည်ကြာ ရန်ဘက်ဖြစ်ခဲ့ကြသော အမေရိကန်ပြည်ထောင်စုနှင့် ဗင်နီဇွဲလားနိုင်ငံတို့သည် သံတမန်ဆက်ဆံရေး ပြန်လည်ထူထောင်ရန် သဘောတူညီလိုက်ပြီဖြစ်ကြောင်း အမေရိကန် နိုင်ငံခြားရေးဝန်ကြီးဌာနက ၂၀၂၆ ခုနှစ်၊ မတ်လ ၅ ရက်နေ့တွင် ထုတ်ပြန်ကြေညာခဲ့ပါသည်။ ၂၀၂၆ ခုနှစ်၊ ဇန်နဝါရီလအတွင်းက အမေရိကန်၏ စစ်ရေးစစ်ဆင်ရေးတစ်ခုကြောင့် ဗင်နီဇွဲလားသမ္မတ နီကိုးလပ်စ် မာဒူရိုမှာ ရာထူးမှ ဖယ်ရှားခံခဲ့ရသည်။ ထို့နောက်ပိုင်းတွင် ထရန့်အစိုးရအဖွဲ့မှ တာဝန်ရှိသူများသည် ဗင်နီဇွဲလားနိုင်ငံသို့ အကြိမ်ကြိမ် သွားရောက်ခဲ့ကြပြီးနောက် ယခုကဲ့သို့ သံတမန်လမ်းကြောင်း ပြန်လည်ဖွင့်လှစ်ရန် သဘောတူညီချက် ရရှိခဲ့ခြင်း ဖြစ်ပါသည်။ အမေရိကန် ပြည်ထဲရေးဝန်ကြီး ဒေါ့ခ်ဘာဂမ် (Doug Burgum) ၏ နှစ်ရက်ကြာ ဗင်နီဇွဲလားခရီးစဉ် အတွင်း သတ္တုတွင်းကဏ္ဍကို အဓိကထား ဆွေးနွေးခဲ့ကြသည်။ ဗင်နီဇွဲလားနိုင်ငံမှ ရွှေအပြင် မြေရှားသတ္တုများဖြစ်သော လစ်သီယမ် (Lithium) နှင့် ကိုဘော့ (Cobalt) တို့ ထွက်ရှိသဖြင့် ၎င်းတို့ကို အမေရိကန်က တူးဖော်လုပ်ကိုင်ခွင့် ရရှိရန် အလားအလာရှိနေပါသည်။ ၎င်းပြင် ပြီးခဲ့သည့် ဖေဖော်ဝါရီလအတွင်းကလည်း စွမ်းအင်ဝန်ကြီး ခရစ်ရိုက် (Chris Wright) လာရောက်ခဲ့ပြီး ရေနံကဏ္ဍတွင် နိုင်ငံခြားရင်းနှီးမြှုပ်နှံမှုများ ပြန်လည်ဝင်ရောက်လာရေးအတွက် ဆွေးနွေးခဲ့သည်။ ဗင်နီဇွဲလားနိုင်ငံသည် ကမ္ဘာပေါ်တွင် အရန်ရေနံအများဆုံး ရှိသည့်နိုင်ငံဖြစ်ရာ အဆိုပါရေနံများကို အမေရိကန်ကုမ္ပဏီကြီးများက လုပ်ကိုင်ခွင့်ရရှိလာနိုင်ပါသည်။ မာဒူရိုလက်ထက်က ဒုတိယသမ္မတဖြစ်ခဲ့ပြီး လက်ရှိတွင် ယာယီသမ္မတအဖြစ် တာဝန်ယူထားသော ဒယ်လ်စီ ရိုဒရီဂွက်ဇ် (Delcy Rodríguez) က ဤခြေလှမ်းသည် နှစ်နိုင်ငံနားလည်မှုနှင့် အကျိုးစီးပွားကို ခိုင်မာစေမည်ဖြစ်ကြောင်း ပြောကြားခဲ့ပါသည်။

အမေရိကန်နှင့် ဗင်နီဇွဲလား သံတမန် ဆက်ဆံရေး ပြန်လည် ထူထောင်၊ အမေရိကန်က နိုင်ငံရေး၊ စီးပွားရေး အကျိုးအမြတ် များ ရဖွယ်ရှိ

Mar 5

စစ်သုံ့ပန်းများ နေထိုင်ရာ စခန်းကို စစ်ကော်မရှင် ဗုံးကြဲ၊ ကလေးငယ် တစ်ဦး အပါအဝင် ၅ ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၅ ရက်။ ကရင်နီပြည်၊ မယ်စဲ့မြို့နယ်အတွင်းရှိ စစ်သုံ့ပန်းမိသားစုဝင်များ ထိန်းသိမ်းရာစခန်းကို စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့ရာ ကလေးငယ်တစ်ဦး အပါအဝင် ၅ ဦး သေဆုံးခဲ့သည်။ မယ်စဲ့မြို့နယ်ရှိ စစ်သုံ့ပန်းမိသားစုဝင်များကို ထိန်းသိမ်းစောင့်ရှောက်ထားသည့် စခန်းတစ်ခုအား စစ်ကော်မရှင် က ယနေ့ (မတ်လ ၅ ရက်) နံနက်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့ရာ ၈ နှစ်အရွယ် ကလေးငယ်တစ်ဦး အပါအဝင် ၅ ဦး သေဆုံးသွားကြောင်း ကရင်နီပြည် ကြားကာလအုပ်ချုပ်ရေးကောင်စီ (IEC) က ပြောသည်။ အဆိုပါဖြစ်စဉ်နှင့်ပတ်သက်၍ IEC အတွင်းရေးမှူး -၂ ဦးဗညားက “မယ်စဲ့မှာ တိုက်ပွဲမရှိဘူးဗျ။ အခုသေဆုံးသွား တဲ့ သူတွေက ဖားဆောင်းမှာ ဖမ်းမိပြီး ထိန်းသိမ်းထားတဲ့ တပ်မိသားစုဝင်တွေပါ။ ကျနော်တို့က အသေအချာ ကာကွယ်စောင့်ရှောက် ထားတဲ့ချိန်မှာ သူ့တပ်ဖွဲ့ဝင် မိသားစုကို တမင်တကာ ဗုံးကြဲ သတ်ဖြတ်တာကတော့ မင်းမဲ့ စရိုက်ပဲ လို့ပြောလိုတယ်။ ဒီမနက် ၁၀နာရီ ၁၅မိနစ်မှာ ထိန်းသိမ်းရေးစင်တာကို ဗုံးကြဲလို့ အမျိုးသမီး ၄ ဦး အပါ အဝင် ၅ ဦးသေတယ်။ သေဆုံးတဲ့ အမျိုးသမီးတွေထဲမှာ ၈နှစ်ရွယ်သမီး တစ်ဦးပါဝင်တယ်” ဟု ပြော သည်။ ယနေ့ နံနက် ၁၀ နာရီကျော်အချိန်တွင် တိုက်ပွဲ ဖြစ်ပွားနေခြင်းမရှိဘဲ စစ်ကော်မရှင်လေတပ်က ပေါင် ၂၀၀ ဗုံးဟု ယူဆရသည့် ဗုံးသီး ၈ လုံးခန့်ကို အဆိုပါ ထိန်းသိမ်းရေးစခန်းနှင့် အနီးဝန်းကျင်သို့ ကြဲချတိုက်ခိုက်ခဲ့ခြင်း ဖြစ် သည်ဟု ဒေသခံများက ပြောသည်။ အဆိုပါ ထိန်းသိမ်းရေးစခန်းသည် ကရင်နီပြည် တရားရေးဌာနအောက်တွင်ရှိပြီး ဖားဆောင်းတိုက်ပွဲအတွင်း ဖမ်း ဆီးရမိထားသည့် စစ်ကော်မရှင် တပ်ဖွဲ့ဝင်များနှင့် ၎င်းတို့၏ မိသားစုဝင်များကို လူသားချင်းစာနာမှုအရ ထိန်း သိမ်းထားရှိသည့် နေရာဖြစ်သည်။ မယ်စဲ့မြို့နယ်အတွင်းရှိ သတင်းရင်းမြစ်တစ်ခုကလည်း “ကျနော်တို့အနောက်နားက လာကြဲသွားတာဗျ။ အခုန က ရဲဘော်တစ်ယောက် သွားကြည့်ပြီး ပြန်လာပြောပြတာတော့ ၅ ယောက်သေတယ်တဲ့။ ၇ ယောက် ဒဏ်ရာရ တယ်ဆိုပြီး ပြန်လာပြောပြတယ်ဗျ။ တော်လှန်ရေး ရဲဘော်တွေကို မေးရင်တော့ ပိုတိကျမယ်။ ခနနေ လေယာဉ် က ပြန်လာအုံးမယ်ပြောတော့ ကျနော်တို့လည်း ဘယ်မှ မသွားရဲဘူး” ဟု ပြောသည်။ မယ်စဲ့မြို့နယ်သည် ထိုင်းနိုင်ငံနယ်စပ်နှင့် နီးကပ်သည့် မြို့ဖြစ်သော်လည်း စစ်ကော်မရှင်တပ်က လေကြောင်းမှ ဗုံးကြဲမှုကို မကြာခဏ ပြုလုပ်လေ့ရှိသည်။ ထို့ပြင် ပြီးခဲ့သည့် ဇန်နဝါရီလ ၁၈ ရက်နေ့ကလည်း မယ်စဲ့ရှိ အကျဉ်းထောင်တစ်ခုတွင် စစ်သုံ့ပန်း ၇၆ ဦးနှင့် အကျဉ်းသားအချို့ အပါအဝင် စုစုပေါင်း ၈၃ ဦး ထောင်ဖောက်ထွက်ပြေးသည့် ဖြစ်စဉ်တစ်ခု ဖြစ်ပွားခဲ့ဖူးသည်။ ၎င်းတို့အနက် ထိုင်းနိုင်ငံဘက်သို့ ထွက်ပြေးလွတ်မြောက်သွားသူများကို ထိုင်းစစ်တပ်က ဇန်နဝါရီ ၂၆ ရက်တွင် မြဝတီ-မဲဆောက် အမှတ် (၂) ချစ်ကြည်ရေးတံတားမှတစ်ဆင့် စစ်ကော်မရှင်ထံ ပြန်လည်လွှဲပြောင်းပေးခဲ့သည်။ ယခုကဲ့သို့ စစ်ကော်မရှင်က မိမိတို့၏ တပ်ဖွဲ့ဝင်မိသားစုဝင်များ ခိုလှုံရာနေရာကိုပါ ပစ်မှတ်ထား တိုက်ခိုက်လာ ခြင်းကြောင့် ဒေသတွင်း လုံခြုံရေးနှင့်ပတ်သက်၍ ဒေသခံများ၏ စိုးရိမ်မှုမှာ ပိုမိုမြင့်တက်လျက်ရှိသည်။ လက်ရှိတွင် IEC အနေဖြင့် ဗုံးကြဲခံရမှုကြောင့် အသေးစိတ် ထိခိုက်ပျက်စီးဆုံးရှုံးမှု အခြေအနေများကို ဆက် လက် အတည်ပြုနိုင်ရန် ကြိုးပမ်းနေဆဲ ဖြစ်သည်။ #IEC #မယ်စံမြို့နယ် #စစ်သုံ့ပန်း #စစ်ကော်မရှင်

စစ်သုံ့ပန်းများ နေထိုင်ရာ စခန်းကို စစ်ကော်မရှင် ဗုံးကြဲ၊ ကလေးငယ် တစ်ဦး အပါအဝင် ၅ ဦးသေဆုံး

Mar 5

လန်ဒန်ရဲများက တရုတ်နိုင်ငံအတွက် သူလျှိုလုပ်ပေးသည်ဟူသော စွပ်စွဲချက်ဖြင့် လူ ၃ ဦး ဖမ်းဆီး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၅ ရက်။ ဗြိတိန်နိုင်ငံတွင် တရုတ်နိုင်ငံအတွက် သူလျှိုလုပ်ပေးနေသည်ဟု သံသယရှိရသူ ၃ ဦးကို လန်ဒန်ရဲတပ်ဖွဲ့က ဖမ်းဆီးလိုက်သည်။ ဖမ်းဆီးခံရသူများထဲတွင် အာဏာရ လေဘာပါတီမှ လွှတ်တော်အမတ် Joani Reid ၏ ခင်ပွန်းဖြစ်သူ David Taylor (၃၉ နှစ်) ပါဝင်နေကြောင်း ဗြိတိန်မီဒီယာများက ဖော်ပြကြသည်။ ၎င်းတို့ ၃ ဦးကို ၂၀၂၃ ခုနှစ်တွင် ပြဋ္ဌာန်းခဲ့သော အမျိုးသားလုံခြုံရေးအက်ဥပဒေအရ ဗုဒ္ဓဟူးနေ့တွင် ဖမ်းဆီးခဲ့ခြင်း ဖြစ်သည်။ လွှတ်တော်အမတ် Joani Reid က သူမ၏ခင်ပွန်းသည် ဥပဒေချိုးဖောက်ခဲ့သည်ဟု သံသယဖြစ်ဖွယ် တစ်စုံတစ်ရာ မတွေ့ရှိခဲ့ဖူးကြောင်းနှင့် ခင်ပွန်းဖြစ်သူ၏ စီးပွားရေးလုပ်ငန်းများတွင် သူမ ပါဝင်ပတ်သက်မှု မရှိကြောင်း ထုတ်ပြန်ထားသည်။ ဗြိတိန်လုံခြုံရေးဝန်ကြီး Dan Jarvis က တရုတ်နိုင်ငံသည် ဗြိတိန်အတွက် ခြိမ်းခြောက်မှုများစွာ ဖြစ်ပေါ်စေသဖြင့် အထူးစိုးရိမ်ကြောင်း ပြောကြားခဲ့သော်လည်း လန်ဒန်ရှိ တရုတ်သံရုံးကမူ ဤစွပ်စွဲချက်များမှာ လုပ်ကြံဖန်တီးထားခြင်းသာ ဖြစ်သည်ဟု ပြန်လည်တုံ့ပြန်ခဲ့သည်။ ယခုသူလျှိုမှုသည် တရုတ်နိုင်ငံနှင့် စီးပွားရေးဆက်ဆံရေး ကောင်းမွန်အောင် ကြိုးပမ်းနေသည့် ဝန်ကြီးချုပ် ကီယာစတာမာအတွက် ကြီးမားသော နိုင်ငံရေး အခက်အခဲတစ်ခု ဖြစ်လာစေခဲ့ပါသည်။ #SpyingChina #သူလျှို #တရုတ်သူလျှို

လန်ဒန်ရဲများက တရုတ်နိုင်ငံအတွက် သူလျှိုလုပ်ပေးသည်ဟူသော စွပ်စွဲချက်ဖြင့် လူ ၃ ဦး ဖမ်းဆီး

Mar 5

အမေရိကန် ရေငုပ်သင်္ဘောက အိန္ဒိယသမုဒ္ဒရာအတွင်း အီရန် စစ်သင်္ဘောကို တော်ပီဒိုဖြင့် ပစ်ခတ်နှစ်မြှုပ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၅ ရက်။ သီရိလင်္ကာနိုင်ငံအနီးတွင် အမေရိကန်ရေငုပ်သင်္ဘောက အီရန်စစ်သင်္ဘောတစ်စင်းကို တိုက်ခိုက်နှစ်မြှုပ်လိုက်သဖြင့် လူ ၈၇ ဦးထက်မနည်း သေဆုံးသွားခဲ့သည်။ ဤဖြစ်စဉ်သည် ဒုတိယကမ္ဘာစစ်နောက်ပိုင်း ဖောက်ကလန်ကျွန်းတိုက်ပွဲအပြီးတွင် ပထမဆုံးအကြိမ် ရေငုပ်သင်္ဘောမှ တော်ပီဒိုဖြင့် စစ်သင်္ဘောတစ်စင်းကို ပစ်ခတ်နှစ်မြှုပ်ခြင်း ဖြစ်သည်။ အိန္ဒိယသမုဒ္ဒရာအတွင်း သီရိလင်္ကာတောင်ဘက် ကမ်းရိုးတန်းအနီးတွင် အမေရိကန်ရေငုပ်သင်္ဘောက အီရန်စစ်သင်္ဘော IRIS Dena ကို တော်ပီဒိုဖြင့် ပစ်ခတ်ခဲ့ခြင်း ဖြစ်သည်။ အမေရိကန် ကာကွယ်ရေးဝန်ကြီး Pete Hegseth က "အပြည်ပြည်ဆိုင်ရာ ရေပိုင်နက်ထဲတွင် ဘေးကင်းပြီဟု ထင်နေသည့် အီရန်စစ်သင်္ဘောကို အမေရိကန်ရေငုပ်သင်္ဘောက တော်ပီဒိုဖြင့် ပစ်ခတ်ပြီး 'တိတ်ဆိတ်သော သေခြင်းတရား' ပေးလိုက်ခြင်း ဖြစ်သည်" ဟု ပြောကြားခဲ့သည်။ အဆိုပါ IRIS Dena စစ်သင်္ဘောသည် အိန္ဒိယနိုင်ငံတွင် ပြုလုပ်သည့် ရေတပ်စစ်ရေးလေ့ကျင့်မှုမှ အပြန်လမ်းတွင် တိုက်ခိုက်ခံရခြင်း ဖြစ်ပြီး သင်္ဘောပေါ်၌ လူ ၁၈၀ ခန့် ပါရှိရာ ၃၂ ဦးကိုသာ ကယ်ဆယ်နိုင်ခဲ့သည်။

အမေရိကန် ရေငုပ်သင်္ဘောက အိန္ဒိယသမုဒ္ဒရာအတွင်း အီရန် စစ်သင်္ဘောကို တော်ပီဒိုဖြင့် ပစ်ခတ်နှစ်မြှုပ်

Mar 5

အီရန်နိုင်ငံမှ စစ်ပွဲ အခြား ပင်လယ်ကွေ့ဒေသတွင်းနိုင်ငံများသို့ ကူးစက်ကျယ်ပြန့်လာ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၅ ရက်။ အမေရိကန်နှင့် အစ္စရေးတို့က အီရန်ကို တိုက်ခိုက်ပြီး (၅) ရက်မြောက်နေ့တွင် ဤစစ်ပွဲသည် အီရန်နိုင်ငံအတွင်း၌သာမကဘဲ ပင်လယ်ကွေ့ဒေသတစ်ခုလုံးသို့ ကျယ်ပြန့်လာခဲ့သည်။ အီရန်၏ လက်တုံ့ပြန်တိုက်ခိုက်မှုများကြောင့် ဒေသတွင်းနိုင်ငံများစွာ စစ်ပွဲအတွင်း ပါဝင်လာခဲ့ရသည်။ • အာရပ်စော်ဘွားများပြည်ထောင်စု (UAE): အီရန်ဘက်မှ ပစ်ခတ်သည့် ဒုံးကျည်နှင့် ဒရုန်း ၈၀၀ ခန့်ဖြင့် တိုက်ခိုက်ခံခဲ့ရပြီး ဒူဘိုင်းမြို့ရှိ ဇိမ်ခံဟိုတယ်တစ်ခုနှင့် ဂျေဘယ်လ်အလီ (Jebel Ali) ဆိပ်ကမ်းတို့တွင် မီးလောင်မှုများ ဖြစ်ပွားခဲ့သဖြင့် အီရန်ရှိ UAE သံရုံးကို ပိတ်ထားလိုက်ရသည်။ • ကာတာ (Qatar): စွမ်းအင်အဆောက်အအုံများ တိုက်ခိုက်ခံရပြီးနောက် သဘာဝဓာတ်ငွေ့ ထုတ်လုပ်မှု အများစုကို ရပ်ဆိုင်းထားရသည်။ ကာတာလေတပ်သည် အီရန်၏ Su-24 တိုက်လေယာဉ် နှစ်စင်းကို ပစ်ချခဲ့သည်။ • ကူဝိတ် (Kuwait): စစ်ပွဲပထမနေ့တွင်ပင် တိုက်ခိုက်ခံခဲ့ရပြီး အမေရိကန်စစ်သည်များ ပထမဆုံး စတင်သေဆုံးခဲ့သည့် နေရာဖြစ်သည်။ • ဆော်ဒီအာရေဗျ (Saudi Arabia): အမေရိကန်စစ်စခန်းများနှင့် ရီယတ်မြို့ရှိ အမေရိကန်သံရုံးတို့ တိုက်ခိုက်ခံခဲ့ရသည်။ ကမ္ဘာ့အကြီးဆုံး ရေနံချက်စက်ရုံတစ်ခုဖြစ်သည့် Ras Tanura မှာလည်း အီရန်ဒရုန်းများကြောင့် ရေနံထုတ်လုပ်မှု တစ်စိတ်တစ်ပိုင်း ရပ်ဆိုင်းခဲ့ရသည်။ • လက်ဘနွန် (Lebanon): ဟစ်ဇဘိုလာ (Hezbollah) အဖွဲ့သည် အီရန်ဘက်မှ စစ်ပွဲအတွင်း ပါဝင်လာပြီး အစ္စရေးကို တိုက်ခိုက်ခဲ့သဖြင့် အစ္စရေး၏ ပြန်လည်တိုက်ခိုက်မှုကြောင့် ဟစ်ဇဘိုလာတပ်မှူးများအပါအဝင် လူ ၄၀ ကျော် သေဆုံးခဲ့သည်။ • အခြားနိုင်ငံများ: ဘာရိန်းရှိ အမေရိကန် ပဉ္စမရေတပ်စုဌာနချုပ်အနီး၊ အိုမန်ရှိ အမေရိကန်စစ်စခန်းများနှင့် အီရတ်ရှိ အမေရိကန်စခန်းများမှာလည်း အီရန်နှင့် အီရန်လိုလားသည့် လက်နက်ကိုင်များ၏ တိုက်ခိုက်ခြင်းကို ခံခဲ့ရသည်။ #အီရန်စစ်ပွဲ #အမေရိကန် #အစ္စရေး #ဘာရိန်း #အိုမန် #ပင်လယ်ကွေ့ဒေသ

အီရန်နိုင်ငံမှ စစ်ပွဲ အခြား ပင်လယ်ကွေ့ဒေသတွင်းနိုင်ငံများသို့ ကူးစက်ကျယ်ပြန့်လာ

Mar 5

ရေနံစိမ်း ဈေးနှုန်း ၂ ဆ ခုန်တက် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၅ ရက်။ အီရန်စစ်ပွဲ (၅) ရက်မြောက်နေ့သို့ ရောက်ရှိလာချိန်တွင် ရေနံစိမ်းစျေးနှုန်းမှာ နှစ်ဆနီးပါး မြင့်တက်လာပြီး ကမ္ဘာတစ်ဝှမ်း လောင်စာဆီနှင့် ကုန်စျေးနှုန်းများ မြင့်တက်လာနိုင်သည့် အလားအလာများ ရှိနေပါသည်။ စစ်ပွဲမတိုင်မီက ရေနံတစ်စည်လျှင် ၇၅ ဒေါ်လာမှ ၈၅ ဒေါ်လာကြား ရှိခဲ့ရာမှ ဟော်မုဇ်ရေလက်ကြား၌ သင်္ဘောများ ပိတ်မိနေမှုကြောင့် လက်ရှိတွင် ရေနံစိမ်းစျေးနှုန်းမှာ ၁၅၀ ဒေါ်လာကျော်အထိ ရောက်ရှိသွားခဲ့ပြီ ဖြစ်ပါသည်။ အမေရိကန် ဗဟိုစစ်ဌာနချုပ်၏ ထုတ်ပြန်ချက်အရ အီရန်ရေတပ်သင်္ဘော အစင်း ၂၀ ကို ဖျက်ဆီးလိုက်ပြီးနောက် အဆိုပါ ရေလက်ကြားအတွင်း အီရန်စစ်သင်္ဘောများ သွားလာခြင်း မရှိတော့ဟု ဆိုသည်။ သို့သော်လည်း အီရန်နိုင်ငံဘက်မှ ကမ်းခြေပစ်ဒုံးကျည်များနှင့် ဒရုန်းများကို အသုံးပြု၍ ရေလမ်းကြောင်းကို ဆက်လက်ခြိမ်းခြောက်နေဆဲ ဖြစ်သည်။ ထို့ကြောင့် ကုန်သွယ်ရေးသင်္ဘောနှင့် ရေနံတင်သင်္ဘော ရာပေါင်းများစွာမှာ ရေလက်ကြားအတွင်းသို့ ဝင်ရောက်ရန် စိုးရိမ်နေကြသဖြင့် ပြင်ပ၌ ကျောက်ချရပ်နားထားကြရသည်။ အီရန်အစိုးရက အမေရိကန်နှင့် အစ္စရေးတို့၏ တိုက်ခိုက်မှုများ မရပ်တန့်ပါက ဟော်မုဇ်ရေလက်ကြားကို အပြီးတိုင် ပိတ်ပစ်မည်ဟု တရားဝင် သတိပေးထားသည်။ အီရန်သည် ရေမြှုပ်မိုင်းများ ခင်းထားနိုင်ခြေ ရှိသဖြင့် အမေရိကန်ရေတပ်က မိုင်းရှင်းလင်းရေး လုပ်ငန်းများ ဆောင်ရွက်ရန် ပြင်ဆင်လျက်ရှိသည်။ ရေနံစိမ်းစျေးနှုန်းများ ခုန်တက်သွားသကဲ့သို့ သင်္ဘောများအတွက် ရေကြောင်းအာမခံကြေး များမှာလည်း အဆမတန် မြင့်တက်သွားခြင်းကြောင့် ကုန်စည်စီးဆင်းမှုများ နှောင့်နှေးကြန့်ကြာလျက် ရှိပါသည်။

ရေနံစိမ်း ဈေးနှုန်း ၂ ဆ ခုန်တက်

« Prev 1 … 37 38 39 40 41 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close