NMG Doh – Page 52 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Apr 20

လူပေါင်း ၁ ထောင်ကျော်သာ လွှတ်သော်လည်း ၄ ထောင်ကျော်လွှတ်ဟု စစ်အစိုးရ လိမ်ညာ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၀ ရက်။ စစ်အစိုးရ ကြေညာသော လွတ်ငြိမ်းချမ်းသာခွင့်ပေးသူ ကိန်းဂဏန်းမှာ အတုအယောင်သာဖြစ်ဟု နိုင်ငံရေးအကျဉ်းသားအရေး လှုပ်ရှားသူများက ပြောသည်။ သမ္မတအဖြစ် ကိုယ့်ကိုယ်ကိုယ် ကျမ်းသစ္စာကျိန်ဆိုခဲ့သည့် စစ်ခေါင်းဆောင် ဦးမင်းအောင်လှိုင်က အကျဉ်းသား ၄,၃၃၅ ဦး လွတ်ပေးမည်ဟု ကမ္ဘာကို ကြေညာခဲ့သော်လည်း၊ မြေပြင်တွင် အမှန်တကယ် လွတ်မြောက်လာသူမှာ ၁,၆၈၆ ဦးသာ ရှိကြောင်း နိုင်ငံရေးအကျဉ်းသားများ ကွန်ရက် (PPNM) က အတည်ပြုသည်။ စစ်အစိုးရ၏ နှစ်ဆန်းတစ်ရက်နေ့ လွတ်ငြိမ်းချမ်းသာခွင့်သည် ကိန်းဂဏန်းများဖြင့် နိုင်ငံတကာကို လိမ်လည်လှည့်ဖြားကာ ၎င်းတို့၏ ယိမ်းယိုင်နေသော နိုင်ငံရေးပုံရိပ်ကို ပြန်လည်မြှင့်တင်ရန် ကြိုးပမ်းသည့် ‘နိုင်ငံရေးမျက်လှည့်’ တစ်ခုသာဖြစ်ကြောင်း နိုင်ငံရေးအကျဉ်းသားအရေး လှုပ်ရှားသူများက ပြောသည်။ ထိုသို့ ကိန်းဂဏန်းများ သိသိသာသာ ကွာဟနေခြင်းမှာ နိုင်ငံတကာကို ပုံမှန်အခြေအနေရှိနေသယောင် လှည့်စားခြင်းဖြစ်သည်ဟု ဆိုသည်။ PPNM ၏ ဦးဆောင်ကော်မတီဝင် မရောင်နီလင်းက “ဒီတစ်ခေါက် လွတ်ငြိမ်းဟာ အတုအယောင်အစိုးရက နိုင်ငံရေးပုံရိပ်အတွက် အသုံးချတဲ့ အယောင်ပြလုပ်ရပ်ပါ။ နိုင်ငံရေးအကျဉ်းသားဆိုရင်လည်း လွှတ်တယ်ဆိုရုံလောက်ပဲ ထည့်ပေးထားတယ်။ သေဒဏ်ကနေ တစ်သက်တစ်ကျွန်း၊ တစ်သက်တစ်ကျွန်းကနေ နှစ် ၄၀ စသဖြင့် ပြစ်ဒဏ်လျှော့ပေါ့တယ်လို့ ထုတ်ပြန်ပေမဲ့ တကယ့်မြေပြင်မှာ လွတ်လာသူအရေအတွက်က အင်မတန်နည်းပါတယ်” ဟု ထောက်ပြသည်။ ထို့ပြင် “နှစ်ဆန်း ၁ ရက်နေ့ လွတ်မြောက်လာကြတဲ့ နိုင်ငံရေးအကျဉ်းသား၊ အကျဉ်းသူတွေထဲမှာ ၅၂ နဲ့ ပတ်သက်တဲ့ အမှုတွေ တော်တော်များများ ပါဝင်လာတာကို တွေ့ရပါတယ်။ ပြီးခဲ့တဲ့ တစ်ခေါက်က လွှတ်ပေးခဲ့တဲ့ ၅၀-ညတွေ၊ ၅၂-ကတွေ နာမည်စာရင်းပါပြီးတော့ လွတ်ဖို့ကျန်သေးတဲ့သူတွေရှိတယ်။ အဲဒီလူတွေက ဒီတစ်ခေါက်မှာ ပြန်ပါလာနိုင်တယ်လို့ မျှော်လင့်ခဲ့ပေမဲ့ ပြန်မပါလာတာကို တွေ့ရပါတယ်” ဟု မရောင်နီလင်းက ဆက်ပြောသည်။ အမှန်တကယ် လွတ်မြောက်လာသည့် နိုင်ငံရေးအကျဉ်းသား ၂၉၂ ဦးထဲတွင် ဦးဝင်းမြင့်၊ ဒေါက်တာတင်မင်းထွဋ် နှင့် ရှင်ဒေဝီ တို့ကဲ့သို့ လူသိများသူအချို့ကိုသာ ထည့်သွင်းပေးခြင်းမှာလည်း နိုင်ငံတကာ၏ ဖိအားကို လျှော့ချရန်အတွက် ရည်ရွယ်သည့် ‘ဓားစာခံလဲလှယ်မှု’ သက်သက်သာဖြစ်ကြောင်း ဝေဖန်ခံနေရသည်။ နိုင်ငံရေးအကျဉ်းသူများအဖွဲ့ (WOPP) ၏ ဦးဆောင်တာဝန်ခံ မဇူးဇူးမေယွန်းက “အခုလို ကိန်းဂဏန်းတွေကို လိမ်လည်လှည့်ဖြားတဲ့ လုပ်ရပ်တွေအပေါ်မှာ နိုင်ငံတကာ အဖွဲ့အစည်းတွေကလည်း သိရှိလာပြီဖြစ်တယ်ပေါ့နော်။ ဒီဘက်က တော်လှန်ရေးအင်အားစုတွေ ပြီးတော့ နိုင်ငံရေးအကျဉ်းသားအရေးကို လုပ်ဆောင်တဲ့ အဖွဲ့တွေဘက်ကလည်း ဒေတာအချက်အလက်နဲ့ ဖော်ထုတ်တာဖြစ်တဲ့အတွက် နိုင်ငံတကာကလည်း သိလာပြီဖြစ်ပါတယ်” ဟု ပြောသည်။ ၎င်းက ဆက်လက်၍ ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားများအားလုံးကို ခြွင်းချက်မရှိ လွှတ်ပေးမှသာ စစ်မှန်သော ‘အရွေ့’ တစ်ခု ဖြစ်လာမည်ဟု သုံးသပ်သည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ကလည်း စစ်အစိုးရတပ်သည် ၎င်းတို့ကျူးလွန်ထားသည့် ရာဇဝတ်မှုများကို ဖုံးကွယ်ရန်အတွက် နိုင်ငံရေးအကျဉ်းသားများကို ဓားစာခံအဖြစ် အသုံးချနေခြင်းဖြစ်ကြောင်း ဧပြီ ၁၇ ရက်နေ့ ထုတ်ပြန်ချက်တွင် ဖော်ပြထားသည်။ အမျိုးသားညီညွတ်ရေးအစိုးရ (NUG) နှင့် နိုင်ငံတကာအဖွဲ့အစည်းများကလည်း ယခုကဲ့သို့ စစ်အစိုးရတပ်၏ လိမ်လည်မှုများကို ယုံကြည်ခြင်းမရှိဘဲ၊ ၂၀၂၀ ရွေးကောက်ပွဲရလဒ်နှင့်အညီ ပြည်သူ့ကိုယ်စားလှယ်များထံ အာဏာပြန်လည်လွှဲပြောင်းပေးရန်နှင့် နိုင်ငံရေးအကျဉ်းသားအားလုံး ချက်ချင်းလွှတ်ပေးရန် ဆက်လက်တောင်းဆိုနေကြသည်။ #လွတ်ငြိမ်းခွင့် #အကျဉ်းသား #နိုင်ငံရေးအကျဉ်းသား #အကျဉ်းထောင်

လူပေါင်း ၁ ထောင်ကျော်သာ လွှတ်သော်လည်း ၄ ထောင်ကျော်လွှတ်ဟု စစ်အစိုးရ လိမ်ညာ

Apr 20

သံလွင်မြစ်အနီး ထိုင်းဘက်ကမ်းသို့ ဗုံးကျ၊ နယ်စပ်ဒေသခံများ တိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၀ ရက်။ ကရင်ပြည်၊ ဖာပွန် (မူတြော်) ခရိုင် သံလွင်မြစ်ကမ်းနံဘေး ရှိ KNU ဆေးရုံဝန်းကျင်ကို စစ်အစိုးရတပ်က ယနေ့ နံနက်ပိုင်းတွင် တိုက် လေယာဉ်များဖြင့် ဗုံးကြဲတိုက်ခိုက်ခဲ့ရာ ထိုင်းနိုင်ငံဘက်ခြမ်းသို့ပါ ဗုံးတစ်လုံး ကျရောက် ပေါက်ကွဲခဲ့သဖြင့် နယ်စပ်ဒေသခံများ အရေးပေါ် တိမ်းရှောင်နေရကြောင်း ထိုင်းသတင်းရင်းမြစ်များက ပြောသည်။ ယနေ့ နံနက် ၁၁ နာရီ အချိန်ခန့်တွင် စစ်အစိုးရ လေတပ်မှ လေယာဉ်များဖြင့် ဖာပွန်ခရိုင်အတွင်းရှိ ဆေးရုံ၊ ဆေးခန်းနှင့် ဘုရားကျောင်းများကို ပစ်မှတ်ထား၍ ဗုံး ၁၀ လုံးခန့် ကြဲချခဲ့ခြင်း ဖြစ် သည်။ မြန်မာဘက်ခြမ်းမှ ဒေသတွင်း သတင်းရင်းမြစ် တစ်ဦးက “မနေ့ကလည်း တစ်ခေါက်လာပစ်တယ်။ ဒီနေ့လည်း တစ်ခေါက် ထပ်ပြီး လာပစ်တယ်” ဟု ပြောသည်။ အဆိုပါ တိုက်ခိုက်မှုအတွင်း ဗုံးတစ်လုံးမှာ ထိုင်း-မြန်မာနယ်စပ် သံလွင်မြစ်၏ ထိုင်းဘက်ခြမ်း သဲသောင်ပြင်ပေါ် သို့ ကျရောက်ပေါက်ကွဲခဲ့ပြီး အနီးနားရှိ ထိုင်းဒေသခံနေအိမ် ၁၀ လုံးနီးပါး လက်နက်ကြီးစ ထိမှန်ပျက်စီးခဲ့သည်။ မယ့်စန်လက် (သောလယ်ထ) ကျေးရွာရှိ ဒေသခံတစ်ဦးက “ဗုံးပေါက်ကွဲသံကတော့ တကယ်ကို ကျယ်လောင်ပါတယ်။ ဒုတိယ လှိုင်း၊ တတိယလှိုင်း ဗုံးကြဲမှုတွေ မကြာခင် ထပ်ဖြစ်လာနိုင်တယ်လို့ ခန့်မှန်းထားတဲ့အတွက် ကျနော်တို့ဘက်က ကျန်းမာရေးဌာနအနေနဲ့ အရေးပေါ် အခြေအနေအတွက် အသင့်ပြင် (Standby) စောင့်ဆိုင်းနေကြပါတယ်” ဟု နယ်စပ်အခြေအနေကို ပြောသည်။ မြန်မာလေတပ်၏ ဗုံးကြဲမှုကြောင့် မယ့်စန်လက်ကျေးရွာနှင့် မျက်နှာချင်းဆိုင်ရှိ KNU ၏ အူးမေထဆေးရုံ အဆောက်အအုံ အချို့ ထိခိုက်ပျက်စီးခဲ့ပြီး ထိုင်းဘက်ခြမ်းရှိ မယ်စမ်လက်ကျေးရွာသား အိမ်ထောင်စု ၄၀ ခန့်မှာ လည်း ဘေးလွတ်ရာသို့ အရေးပေါ် ရွှေ့ပြောင်းခဲ့ရသည်။ မယ့်စန်လက်ကျေးရွာလူကြီး နိုင်သုဖပ် နွတ်ချနုန်ခရန် က “ပေါ့ပေါ့ဆဆ မနေကြဖို့နဲ့ အရေးပေါ် တိမ်းရှောင်ကြဖို့ ရွာသားတွေကို အသံချဲ့စက်နဲ့ နှိုးဆော်ခဲ့ရပါတယ်။ သံလွင်မြစ်ကမ်းဘေးက အိမ်ထောင်စု ၄၀ ကို ဟွေ့ကောင် ကတ်ရွာဘက်က ဘေးကင်းတဲ့နေရာဆီ ယာယီရွှေ့ပြောင်းခိုင်းထားပါတယ်” ဟု ထိုင်းသတင်းဌာနများကို ပြောဆိုထားသည်။ လက်ရှိတွင် သောပ်မွေမြို့နယ် အုပ်ချုပ်ရေးမှူးနှင့် ထိုင်းလုံခြုံရေးတပ်ဖွဲ့ဝင်များက နယ်စပ်တစ်လျှောက် အခြေအနေများကို စောင့်ကြည့်စစ်ဆေးလျက်ရှိပြီး ထိုင်းစစ်တပ်ဘက်မှာလည်း လုံခြုံရေး တိုးမြှင့်ထားသည်ဟု ဒေသခံများက ပြောသည်။ လက်ရှိတွင် ထိုင်းဘက်ခြမ်းရှိ ပြည်သူများနှင့် ဝန်ထမ်းများအားလုံး ဘေးကင်းလုံခြုံစွာ ရှိနေကြောင်းနှင့် ၎င်းတို့ ကို အကာအကွယ်ပေးနေသည့် ထိုင်းအထူးစစ်တပ် အဖွဲ့များ ရှိနေသဖြင့် စိုးရိမ်ပူပန်ရန် မလိုကြောင်း လုံခြုံရေး အရာရှိများက ဒေသခံများကို လာရောက် ပြောဆိုခဲ့သည်ဟု နယ်စပ်အခြေအနေနှင့် ပတ်သက်၍ ဒေသခံ သတင်းရင်းမြစ်က ပြောသည်။ ကရင်ပြည်၊ ဖာပွန်ခရိုင်အတွင်း ဧပြီလ ၁၀ ရက်နေ့မှ ၁၆ ရက်နေ့အတွင်း စစ်အစိုးရတပ်၏ လေကြောင်း တိုက် ခိုက်မှုများကြောင့် အရပ်သား ၆ ဦး သေဆုံးပြီး ၁၃ ဦးထက်မနည်း ဒဏ်ရာရရှိခဲ့ကြောင်း KNU တပ်မဟာ ၅ က ထုတ် ပြန်ထားသည်။ ယခုကဲ့သို့ နယ်စပ်စစ်ရေး တင်းမာနေချိန်တွင် ထိုင်းဒုတိယဝန်ကြီးချုပ်နှင့် နိုင်ငံခြားရေးဝန်ကြီး စီဟာဆက်သည် လာမည့် ဧပြီ လ၂၂ ရက်နေ့တွင် မြန်မာနိုင်ငံသို့ သွားရန် အစီအစဉ်ရှိနေသည်။ ဓါတ်ပုံ - Sukanraya S-Boungam #KNUတပ်မဟာ၅ #အူးမေထဆေးရုံ #ဖာပွန်မူတြော်ခရိုင်

သံလွင်မြစ်အနီး ထိုင်းဘက်ကမ်းသို့ ဗုံးကျ၊ နယ်စပ်ဒေသခံများ တိမ်းရှောင်နေရ

Apr 20

ကျောက်ကြီး ဒေသခံ ၆၀၀ ကျော် ဗုံးဒဏ်ကြောင့် ထွက်ပြေးနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၀ ရက်။ ပဲခူးတိုင်း၊ ညောင်လေးပင်ခရိုင် ကျောက်ကြီး (လယ်ဒို) မြို့နယ်အတွင်း စစ်အစိုးရတပ်က လေကြောင်းမှ ဗုံးကြဲတိုက်ခိုက်မှုများကြောင့် ကျေးရွာ ၄ ရွာမှာ ဒေသခံပြည်သူ ၆၀၀ ကျော် ဘေးလွတ်ရာသို့ ထွက်ပြေး တိမ်းရှောင်နေကြရသည်ဟု KNU က ပြောသည်။ ကေအဲန်ယူ - ကရင်အမျိုးသားအစည်းအရုံး၊ တပ်မဟာ (၃) ထိန်းချုပ်နယ်မြေဖြစ်သော ကျောက်ကြီး (လယ်ဒို) မြို့နယ်အတွင်း၌ အတာသင်္ကြန် ရုံးပိတ်ရက်ကာလအတွင်း စစ်အစိုးရတပ်က လေကြောင်းမှ ဗုံးကြဲတိုက်ခိုက်မှု များ ဆက်တိုက်ပြုလုပ်ခဲ့သည်ဟု ကေအဲန်ယူ-ဗဟိုက ထုတ်ပြန်သည်။ မြေပြင်သတင်းရင်းမြစ် တစ်ဦးက “တခြားမြို့တွေ ရွာတွေမှာ သင်္ကြန်ကာလ အေးအေးဆေးဆေး ဆိုပေမယ့် ဒီလယ်ဒိုဘက်မှာတော့ အခြေအနေက မကောင်းပါဘူး။ ဆက်တိုက်ကို ဗုံးကြဲခံနေရတာ။ အိမ်တွေလည်း KNU က ဓါတ်ပုံတွေ ထုတ်ပြန်ထားတဲ့အတိုင်းပဲ အကုန်မီးလောင်ကုန်ပြီ။ လူတွေလည်း နေစရာမရှိတော့ဘူး။ အား လုံးက အခုထိ တောထဲမှာပဲ” ဟု ပြောသည်။ ပြီးခဲ့သည့် ဧပြီလ ၁၇ ရက် (နှစ်ဆန်းတစ်ရက်နေ့) က ထုတ်ပြန်ချက်အရ ဝါကေဒဲ၊ လယ်ဆူခို၊ ကိုထာနှင့် ကဒူးမူဒဲ ကျေးရွာများအနီးသို့ စစ်အစိုးရတပ်က လေကြောင်းမှ တိုက်ခိုက်ခဲ့ခြင်းကြောင့် အိမ်ထောင်စု ၈၄ စုမှ လူဦးရေ ၆၀၂ ဦးမှာ အသက်ဘေးလွတ်ရာ တောတောင်များအတွင်းသို့ တိမ်းရှောင်နေကြရခြင်း ဖြစ်သည်။ ထို့ပြင် ဧပြီလ ၉ ရက်နေ့ကလည်း သစ်ဖယောင်းတန်း ကျေးရွာအတွင်းသို့ စစ်အစိုးရတပ်က စက်တပ် လေထီး များ အသုံးပြုကာ ၁၂၀ မမ ဗုံးသီးများဖြင့် ကြဲချခဲ့သဖြင့် အရပ်သားနေအိမ် ၄ လုံး ထိမှန်ပျက်စီးခဲ့ရသည်။ ကော်လေဒဲကျေးရွာတွင်လည်း ဂျက်ဖိုက်တာဖြင့် ဗုံးကြဲခံရမှုကြောင့် နေအိမ်နှင့် တိရစ္ဆာန်တင်းကုပ်များ ပျက်စီး ခဲ့ရကြောင်း ကေအဲန်ယူ၏ ဓာတ်ပုံမှတ်တမ်းများတွင် ဖော်ပြထားသည်၊။ နယ်မြေခံ သတင်းရင်းမြစ်တစ်ဦးကလည်း “စစ်တပ်က အခါကြီးရက်ကြီးတွေမှာ ပြည်သူတွေ အပန်းဖြေနားနေ တာကိုတောင် မကြည့်ဘဲ တမင်ကို ရည်ရွယ်ချက်ရှိရှိ လိုက်တိုက်နေတာပါ။ ရွာထဲမှာလည်း ဘယ်သူမှ မနေရဲ တော့ဘူး။ ဒရုန်းတွေ လေယာဉ်တွေ လာမလားဆိုတာပဲ ထိတ်လန့်နေရတယ်” ဟု ပြောသည်။ ပြီးခဲ့သည့် မတ်လအတွင်းကလည်း ညောင်လေးပင် (ခလယ်လွီထူ) ခရိုင်၌ လေကြောင်းနှင့် လက်နက်ကြီး တိုက် ခိုက်မှုများကြောင့် အရပ်သား ၄၄ ဦး သေဆုံးခဲ့ပြီး၊ အခြေခံပညာကျောင်းနှင့် ဘာသာရေး အဆောက်အအုံများ အပါအဝင် အဆောက်အအုံ ၃၉ လုံး ပျက်စီးဆုံးရှုံးခဲ့ရသည်။ လက်ရှိ ဧပြီလ ၂၀ ရက်နေ့ နောက်ဆုံးအခြေအနေအရ လယ်ဒိုမြို့နယ်အတွင်း လေကြောင်းတိုက်ခိုက်မှုများ ထပ်မံပြုလုပ်လာနိုင်သဖြင့် တောတောင်များအတွင်း ဆက်လက် ပုန်းရှောင်နေရဆဲ ဖြစ်သည်ဟု ဆိုသည်။ မြေပြင်ကူညီကယ်ဆယ်ရေး ဆောင်ရွက်နေသူတစ်ဦးက “အခုက အလှူရှင်တွေလည်း သွားလာရခက်ခဲနေသလို၊ လေယာဉ်က အချိန်မရွေး ထပ်လာနိုင်တယ်ဆိုတဲ့ သတင်းတွေကြောင့် စစ်ရှောင်စခန်းတွေကို ပစ္စည်းပို့ဖို့တောင် တော်တော်လေး စိုးရိမ်နေရတယ်။ ကလေးတွေနဲ့ သက်ကြီးရွယ်အိုတွေ အကုန်လုံး ရွာကို ပြန်လို့ မရသေးဘူး” ဟု နောက်ဆုံးအခြေအနေကို ပြောသည်။ ထို့အပြင် စစ်အစိုးရတပ်သည် ကျေးရွာများအနီးသို့ ကင်းထောက်ဒရုန်းများဖြင့် လှည့်ပတ်ကြည့်ရှုနေသဖြင့် နေအိမ်ပျက်စီးသွားသည့် မိသားစုများမှာ မိမိတို့ရွာအတွင်းသို့ ပြန်လည်ဝင်ရောက်နိုင်ခြင်းမရှိဘဲ ဖြစ်သလို ယာယီတဲထိုးကာ နေထိုင်နေကြရသည်။ လက်ရှိတွင် စစ်ဘေးရှောင်နေရသူများအတွက် အခြေခံစားနပ်ရိက္ခာနှင့် အရေးပေါ် ကျန်းမာရေး စောင့်ရှောက်မှု များ လိုအပ်လျက်ရှိကြောင်း အကူအညီပေးနေသူများက ပြောသည်။ #ကျောက်ကြီးမြို့နယ် #ညောင်လေးပင်ခရိုင် #လယ်ဒိုမြို့နယ် #လေကြောင်းအန္တရာယ် #KNU #KNLA #စစ်အုပ်စု #စစ်တပ်

ကျောက်ကြီး ဒေသခံ ၆၀၀ ကျော် ဗုံးဒဏ်ကြောင့် ထွက်ပြေးနေရ

Apr 20

ရခိုင် မြို့နယ် ၃ ခု ဗုံးကြဲမှု အရပ်သား ၁ ဦးသေ ၁၄ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၀ ရက်။ ရခိုင်ပြည် အတွင်းရှိ မြို့နယ် ၃ ခုကို စစ်အစိုးရတပ် လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ၁ ဦး သေဆုံး ပြီး၊ ရဟန်းသံဃာတော်များ အပါအဝင် ပြည်သူ ၁၄ ဦး ဒဏ်ရာရရှိခဲ့သည်။ ရခိုင်ပြည် အတွင်းရှိ ပုဏ္ဏားကျွန်း၊ မြောက်ဦးနှင့် ကျောက်တော်မြို့နယ်များရှိ အရပ်ဘက်နေရာများကို စစ်အစိုးရ တပ်က ဧပြီလ ၁၉ ရက်နေ့တွင် လေကြောင်းမှ တစ်ပြိုင်နက်တည်း ဗုံးကြဲတိုက်ခိုက်ခဲ့ခြင်းကြောင့် ယခုကဲ့သို့ ထိခိုက်သေဆုံးမှုများ ရှိခဲ့ကြောင်း အာရက္ခတပ်တော် (AA) က သတင်းထုတ်ပြန်သည်။ ယမန်နေ့ မွန်းတည့် ၁၂ နာရီခန့်တွင် ပုဏ္ဏားကျွန်းမြို့နယ် ငှက်ကြီးကျွန်းကျေးရွာသို့ ဂျက်ဖိုက်တာတစ်စီးဖြင့် ဗုံးကြဲခဲ့သဖြင့် အပြစ်မဲ့ အရပ်သားပြည်သူတစ်ဦး သေဆုံးခဲ့ရသည်။ ထို့ပြင် ပုဏ္ဏားကျွန်းမြို့ပေါ်ရှိ ရွာဟောင်းပိုင်းရပ်ကွက်နှင့် လျှပ်စစ်မီးခွဲရုံတို့ကိုလည်း ဂျက်ဖိုက်တာ ၃ စီးဖြင့် ၇ ကြိမ်တိုင်တိုင် ရှေ့ဆင့်နောက်ဆင့် ဗုံးကြဲခဲ့သဖြင့် မီးခွဲရုံနှင့် လူနေအိမ် ၆ လုံး မီးလောင်ပျက်စီးခဲ့ကြောင်း ဒေသခံ များက ပြောသည်။ ပုဏ္ဏားကျွန်းမြို့နယ်မှ ဒေသခံတစ်ဦးက “ပုဏ္ဏားကျွန်းမြို့နယ်ထဲကို ကြဲတာက ဗုံး ၆ လုံး၊ နောက်ပြီး မြောက်ဦး ကိုလည်း ကြဲသွားတယ်။ မြောက်ဦးက ကျောက်ဆည်ပြင်ရွာကို နှစ်ကြိမ်လာ ကြဲသွားတယ်လို့ ပြောတယ်” ဟု မြေပြင်အခြေအနေကို ပြောပြသည်။ မြောက်ဦးမြို့နယ်တွင်လည်း ကျောက်ဆည်ပြင်ကျေးရွာရှိ ဘုန်းကြီးကျောင်းအား စစ်အစိုးရတပ်က ဂျက်ဖိုက် တာဖြင့် နှစ်ကြိမ်တိုင်တိုင် ဗုံးကြဲတိုက်ခိုက်ခဲ့သည်။ ထိုတိုက်ခိုက်မှုကြောင့် စာသင်နေသည့် သံဃာတော်များ အပါအဝင် စုစုပေါင်း ၁၃ ဦး ဒဏ်ရာရရှိခဲ့ပြီး သာသနိက အဆောက်အအုံများပါ မီးလောင်ပျက်စီးခဲ့ရသည်။ မြောက်ဦးဒေသမှ သတင်းရင်းမြစ်တစ်ဦးက “မြိုလူမျိုးတွေ နေထိုင်ကြတဲ့ မြောက်ဦးမြို့နယ်၊ ကျောက်ဆည် ပြင်ရွာကို လေတပ်က ၁၉ ရက်နေ့၊ မနက် ၁၀ နာရီလောက်မှာ ဗုံးကြဲသွားတာပါ။ ပေါင် ၅၀၀ ဗုံး ၂လုံး ၁၀ နာရီ လောက်မှာ ကြဲတယ်။ ၁၂ ခွဲလောက်မှာ ပေါင် ၅၀၀ ဗုံး ၂ လုံး ထပ်ကြဲတယ်။ အဲ့မှာ သံဃာ ၃ ပါး၊ အမျိုးသမီး ၂ ယောက်၊ အမျိုးသား ၈ ယောက် ဒဏ်ရာ ရတယ်။ တချို့မှာက တော်တော်လေး စိုးရိမ်ရတဲ့ အခြေအနေ ရှိပါတယ်။ ဘုန်းကြီးကျောင်းနဲ့ သိမ်မှာလည်း လုံးဝပျက်စီး သွားခဲ့တယ်” ဟု ပြောသည်။ စစ်အစိုးရတပ်သည် ယခုရက်သတ္တပတ်အတွင်း ရခိုင်နှင့် ချင်းပြည် (ပလက်ဝ) တို့ရှိ ဆေးရုံ၊ စာသင်ကျောင်း၊ ဘာသာရေး အဆောက်အအုံများနှင့် လမ်းတံတားများကဲ့သို့သော အရပ်ဘက် အခြေခံအဆောက်အအုံများကို ဂျက်ဖိုက်တာ ၅ စီး၊ Y-12 လေယာဉ် ၂ စီးတို့ဖြင့် အပြင်းအထန် တိုက်ခိုက်မှုများ ဆက်တိုက်လုပ်ဆောင်နေ ကြောင်း အာရက္ခတပ်တော်၏ ထုတ်ပြန်ထားသည်။ ဓါတ်ပုံ - (ဝေဟင်အောင်) မြောက်ဦးမြို့နယ်၊ ကျောက်ဆည်ပြင်(မြို)ရွာ ဘုန်းကြီးကျောင်းကို လေကြောင်းမှ ဗုံးကြဲခံရမှုကြောင့် မီးလောင်နေသည့်ပုံ။ #ရခိုင်ပြည်နယ် #ကျောက်တော် #မြောက်ဦး #ပုဏ္ဏားကျွန်း #လေကြောင်းတိုက်ခိုက်

ရခိုင် မြို့နယ် ၃ ခု ဗုံးကြဲမှု အရပ်သား ၁ ဦးသေ ၁၄ ဦး ဒဏ်ရာရ

Apr 20

မြောက်ကိုရီးယားက ပဒေသာဗုံးတပ် ဒုံးကျည်များ စမ်းသပ် ပစ်ခတ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၀ ရက်။ မြောက်ကိုရီးယားနိုင်ငံသည် လူ အစုအပြုံလိုက် သေဆုံးစေနိုင်သည့် ပဒေသာဗုံး (Cluster Munitions) တပ်ဆင်ထားသော တာတိုပစ် ပဲ့ထိန်းဒုံးကျည် အမြောက်အမြားကို စမ်းသပ် ပစ်ခတ်ခဲ့ကြောင်း အစိုးရပိုင် KCNA ကိုရီးယား ဗဟို သတင်း အေဂျင်စီ က ဧပြီလ ၂၀ ရက်နေ့တွင် ထုတ်ပြန်ခဲ့သည်။ ၎င်းသည် နျူကလီးယားလက်နက်ပိုင်ဆိုင်ထားပြီဖြစ်သော မြောက်ကိုရီးယား၏ ဆက်တိုက်လုပ်ဆောင်နေသော လက်နက် စမ်းသပ်မှု တစ်ခုလည်း ဖြစ်သည်၊။ ခေါင်းဆောင် ကင်ဂျုံအန်း ကိုယ်တိုင် ကြီးကြပ်ကွပ်ကဲခဲ့သည့် တနင်္ဂနွေနေ့က စမ်းသပ်မှုများသည် နည်းဗျူဟာမြောက် ပဲ့ထိန်းဒုံးကျည်များတွင် အသုံးပြုထားသည့် ပဒေသာဗုံးထိပ်ဖူးနှင့် အပိုင်းအစများ ပြန့်ကျဲစေသော မိုင်းဗုံးထိပ်ဖူး (Fragmentation mine warhead) တို့၏ ဝိသေသလက္ခဏာများနှင့် စွမ်းအားကို အတည်ပြုရန် ရည်ရွယ်ခြင်းဖြစ်ကြောင်း ကိုရီးယားဗဟိုသတင်းအေဂျင်စီ (KCNA) က ဖော်ပြခဲ့သည်။ ပြီးခဲ့သည့် သီတင်းပတ်များအတွင်း မြောက်ကိုရီးယားသည် ပဲ့ထိန်းဒုံးကျည်များ၊ သင်္ဘောဖျက် ခရုဇ်ဒုံးကျည်များနှင့် ပဒေသာဗုံးများ အပါအဝင် လက်နက်စမ်းသပ်မှုများကို ဆက်တိုက်လုပ်ဆောင်ခဲ့သည်။ ယခု စမ်းသပ်မှု ပြုရာတွင် မြေပြင်မှ မြေပြင်ပစ် နည်းဗျူဟာမြောက် ပဲ့ထိန်းဒုံးကျည် Hwasongpho-11 Ra ကို အသုံးပြုခဲ့သည်။ ပစ်ခတ်သည့်နေရာမှ ၁၃၆ ကီလိုမီတာ (၈၅ မိုင်) အကွာရှိ ကျွန်းတစ်ကျွန်းကို ချိန်ရွယ် ပစ်ခတ်ခဲ့ခြင်း ဖြစ်သည်။ စမ်းသပ်ရာတွင် ၁၂.၅ ဟက်တာမှ ၁၃ ဟက်တာ (၃ ဧကနီးပါး) အတွင်းရှိ ဧရိယာကို အလွန်သိပ်သည်းစွာ ထိမှန်ခဲ့ပြီး တိုက်ခိုက်ရေးစွမ်းရည်ကို အပြည့်အဝ ပြသနိုင်ခဲ့သည်ဟု ဆိုသည်။ ခေါင်းဆောင် ကင်ဂျုံအန်းက "ပဒေသာဗုံးထိပ်ဖူးများ တိုးတက်လာခြင်းသည် သတ်မှတ်ထားသော ပစ်မှတ်ဧရိယာကို သိပ်သည်းဆမြင့်မားစွာဖြင့် အင်တိုက်အားတိုက် တိုက်ခိုက်နိုင်စွမ်းကို မြှင့်တင်ပေးနိုင်မည်" ဟု ပြောကြားကာ စမ်းသပ်မှုရလဒ်အပေါ် များစွာကျေနပ်အားရမှု ရှိကြောင်း ဖော်ပြခဲ့သည်။ ကိုရီးယား အမျိုးသားပြန်လည်ပေါင်းစည်းရေး အင်စတီကျုမှ အကြီးတန်းသုတေသနအရာရှိ Hong Min က "ဒီစနစ်ဟာ ဒုံးပျံလွှတ်စင်တွေနဲ့ တာတိုပစ် ပဲ့ထိန်းဒုံးကျည်တွေကြားက ကွာဟချက်ကို ဖြည့်ဆည်းဖို့ ဒီဇိုင်းထုတ်ထားတာဖြစ်ပြီး ဆိုးလ်မြို့နဲ့ အမေရိကန် စစ်အခြေစိုက်စခန်းတွေကိုပါ ပစ်မှတ်ထားနိုင်တဲ့ အကွာအဝေးဖြစ်တယ်" ဟု ဆိုသည်။ အခြားတစ်ဖက်တွင် တောင်ကိုရီးယားကာကွယ်ရေးဝန်ကြီးဌာနက မြောက်ကိုရီးယား၏ ရန်စမှုများသည် တင်းမာမှုများကို မြင့်တက်စေကြောင်း ပြင်းထန်စွာ ရှုတ်ချခဲ့ပြီး၊ အမေရိကန်နှင့် ပူးပေါင်းကာ ခိုင်မာသော ကာကွယ်ရေး အနေအထားကို ထိန်းသိမ်းထားမည်ဟု ပြောကြားခဲ့သည်။ မြောက်ကိုရီးယားသည် ၎င်း၏ ရေတပ်အင်အားကိုလည်း အရှိန်အဟုန်ဖြင့် မြှင့်တင်နေပြီး လက်ရှိတွင် တန်ချိန် ၅,၀၀၀ အဆင့်ရှိ ဖျက်သင်္ဘော (Destroyer) နှစ်စင်း ပိုင်ဆိုင်ထားသည့်အပြင်၊ နောက်ထပ် ဖျက်သင်္ဘော နှစ်စင်း ကိုလည်း ထပ်မံတည်ဆောက်နေသည်ဟု သတင်းများတွင် ဖော်ပြသည်။ လေ့လာသူများက မြောက်ကိုရီးယားသည် ရုရှားနိုင်ငံထံမှ စစ်ရေးဆိုင်ရာ နည်းပညာအကူအညီများ ရယူကာ ရေတပ်အင်အားကို ခေတ်မီအောင် ဆောင်ရွက်နေခြင်းဖြစ်သည်ဟု ဆိုသည်။

မြောက်ကိုရီးယားက ပဒေသာဗုံးတပ် ဒုံးကျည်များ စမ်းသပ် ပစ်ခတ်

Apr 20

အသွင်ကူးပြောင်းရေး အစိုးရ ပေါ်ပေါက်စေရန် SCEF ကို ဖွဲ့စည်းခြင်း ဖြစ်ဟု ဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၀ ရက်။ SCEF ဦးဆောင်ကော်မတီကို အနာဂတ် အသွင်ကူးပြောင်းရေး အစိုးရ တစ်ရပ် ပေါ်ပေါက်လာစေရန် ဦးတည် သည့် ‘နိုင်ငံရေးဦးဆောင်အဖွဲ့’ အဖြစ် အဓိက မဟာမိတ် ၆ ဖွဲ့ဖြင့် စတင်ဖွဲ့စည်းလိုက်ခြင်းဖြစ်ကြောင်း တရားဝင် ထုတ်ဖော်ပြောဆိုသည်။ ယခု ဖွဲ့စည်းလိုက်သည့် ‘ဖက်ဒရယ် ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီ (SCEF)’ သည် တော်လှန်ရေးအပြီး အသွင်ကူးပြောင်းရေးကာလ အစီအမံများ အသက်မဝင်မီ ကြားကာလအတွင်း နိုင်ငံရေးနှင့် အဖွဲ့အစည်းလိုက် တည်ဆောက်မှုဆိုင်ရာ (Institutional) ဦးဆောင်မှုပေးနိုင်ရန် ရည်ရွယ် ခြင်း ဖြစ်သည်ဟု ဆိုသည်။ SCEF အတွင်းရေးမှူး အဖွဲ့ဝင် ဦးအောင်ဆန်းမြင့်က “၅ နှစ်တာ တော်လှန်ရေးကာလ အတွင်းမှာလည်း စစ်ရေး အရ နိုင်ငံရေးအရ အောင်မြင်မှုတွေ တချို့ရရှိခဲ့ပေမဲ့ ကျနော်တို့ တော်လှန်ရေးကြီးကို အပြီးသတ် အောင်မြင် အောင် ကျနော်တို့ မစွမ်းဆောင်နိုင်ခဲ့သေးပါဘူး။ ဒါကြောင့်မို့လို့ တော်လှန်ရေးကို အရှိန်အဟုန် မြင့်တင်ပြီး အသွင်ကူးပြောင်းရေးကာလ အစိုးရ တစ်ရပ်ကို အောင် မြင်စွာ ဖွဲ့စည်းနိုင်ရေးနဲ့ အနာဂတ်ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးအတွက် SCEF ကို ကျနော်တို့ စတင်ဖွဲ့စည်းလိုက်ရတာ ဖြစ်ပါတယ်” ဟု ပြောသည်။ ဦးဆောင်ကောင်စီ၏ အနာဂတ် ပြည်ထောင်စု တည်ဆောက်ရေး ပုံစံနှင့် ပတ်သက်၍လည်း ဧပြီလ ၁၁ ရက်နေ့ တွင် ပြုလုပ်သည့် သတင်းစာရှင်းလင်းပွဲတွင် ဦးအောင်ဆန်းမြင့် က “ကျနော်တို့ ဖက်ဒရယ် ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီကို ပေါင်းကူးပေးမဲ့ တံတား တစ်စင်းအဖြစ်လည်း ရည်ရွယ်ပြီး ဖွဲ့စည်းထားတယ်ဆိုတာကို သိမြင်နိုင်မှာ ဖြစ်ပါ တယ်။ ကျနော်တို့ အချင်း ချင်း ကြားထဲမှာ ချည်းကပ်တဲ့အခါ ပြည်နယ်အားကောင်းရေးမှ ပြည်ထောင်စု အားကောင်းရေး ချဉ်းကပ်မှု ဖက်ဒရယ်စနစ် (Bottom-up federalism) အနာဂတ်ဖက်ဒရယ် ပြည်ထောင်စု တည်ဆောက်သွားဖို့ သဘော တူညီခဲ့ကြပြီး ထုတ်ပြန်ကြေညာချက်များလည်း ထုတ်ပြန်ခဲ့ကြတာ ရှိပါတယ်။” ဟု ပြောသည်။     SCEF ၏ စုဖွဲ့မှုကို ပြည်နယ် ဖက်ဒရယ်ယူနစ်များ၊ ပြည်သူ့ကိုယ်စားလှယ်များနှင့် အမျိုးသမီး ဆိုသည့် မဏ္ဍိုင် ၃ ရပ်အပေါ် အခြေခံထားပြီး နိုင်ငံခြားရေး၊ လုံခြုံရေးနှင့် ကာကွယ်ရေး၊ ဖက်ဒရယ်ရေးရာ၊ ဘဏ္ဍာရေးနှင့် စစ်မဟာဗျူဟာ ပေါင်းစပ်ညှိနှိုင်းရေးဟူသည့် ကဏ္ဍ ၅ ရပ်တို့ဖြင့် အကောင်အထည်ဖော် ဆောင်ရွက်သွားမည်ဟု ဆိုသည်။ အမျိုးသမီးများ ပါဝင်မှုကဏ္ဍနှင့် ပတ်သက်၍ ဦးအောင်ဆန်းမြင့်က “နောက်ဆုံး မဏ္ဍိုင်တစ်ခုကတော့ အမျိုး သမီး ကိုယ်စားပြု အခန်းကဏ္ဍဖြစ်ပါတယ်။ ဒီနေရာမှာ အမျိုးသမီး မဏ္ဍိုင်ကို ကောင်စီဖွဲ့စည်းပုံ ပါ စဉ်းစား ထည့်သွင်းထားခြင်းဟာ ကျနော်တို့ သရုပ်ပြ သက်သက် မဟုတ်ဘူးဆိုတာကို ပြောချင်ပါတယ်။ အမျိုးသမီး မဏ္ဍိုင်ဟာ ဖက်ဒရယ်ပေါ်ထွန်းရေး ဦးဆောင်ကော်မတီ ကောင်စီရဲ့ အခြေခံ အုတ်မြတ် တစ်ခု ဖြစ်ပါတယ်။ အမျိုးသမီးများ ဦးဆောင်မှုမှာ ပါဝင်နေခြင်းအားဖြင့် အုပ်ချုပ်စီမံခန့်ခွဲမှု လုပ်ငန်းများ တာဝန်ယူမှု တာဝန်ခံမှု ဆိုင်ရာများနဲ့ ဆုံးဖြတ်ချက်ချတဲ့နေရာများမှာ ပိုပြီး အားကောင်းစေနိုင်မယ်လို့ ကျနော်တို့ အနေနဲ့ ယုံကြည်ပါ တယ်” ဟု ဖြည့်စွက် ပြောဆိုသည်။ ဦးဆောင်ကောင်စီ အနေဖြင့် အချုပ်အခြာအာဏာကို ခွဲဝေကျင့်သုံးခြင်း၊ ပူးပေါင်းခေါင်းဆောင်မှု၊ အသွင် ကူးပြောင်းရေးဆိုင်ရာ တာဝန်ယူမှုနှင့် အပြန်အလှန် လေးစားမှုဆိုသည့် မူ ၄ ချက်ကို ကိုင်စွဲကာ တော်လှန်ရေး အမြန်ဆုံး အောင်မြင်စေရန် လုပ်ဆောင်သွားမည်ဟု ဆိုသည်။ ရှေ့လုပ်ငန်းစဉ်များနှင့် ပတ်သက်၍ ဒေါ်ဇင်မာအောင်က “ကျမတို့က Next level ပိုပြီးထိရောက်တဲ့ စုဖွဲ့မှုတွေ နဲ့ အလုပ်ပါတဲ့ အစုအဖွဲ့ ဖြစ်အောင် လို့ ဖြတ်သန်းခဲ့တဲ့ ၅ နှစ်အတွင်းက စုဖွဲ့မှုတွေ အပေါ်မှာလည်း သင်ခန်းစာ တွေ ယူပြီးတော့ ကျမတို့တွေ ခုန ကဏ္ဍ ၅ ရပ်ပါမယ်။ စစ်ရေးရယ်၊ နိုင်ငံခြားရေး ၊လုံခြုံရေး ကာကွယ်ရေး၊ ဖက်ဒရယ်ရေး နဲ့ ဘဏ္ဍာရေးပေါ့နော်။ ဆိုတော့ ဒီကဏ္ဍ ၅ ရပ်ကိုလည်းပဲ မဟာဗျူဟာအရ ပေါင်းစပ်ပြီး အကောင်အထည် ဖော်ဖို့ ဆိုတဲ့နေရာမှာ အသီးသီးသော ကဏ္ဍအလိုက် လုပ်ငန်းတွေမှာလည်း လုပ်ငန်းတွေ ဖော်ဆောင်ဖို့လိုတယ်” ဟု ပြောသည်။ ထို့ပြင် လာမည့် ရက်ပေါင်း ၆၀ အတွင်း အဖွဲ့ဝင်သစ်များ ထပ်မံတိုးချဲ့နိုင်ရေးနှင့် ပြည်တွင်းပြည်ပ ထောက်ခံမှု ရရှိရေးတို့ကို ဦးစားပေး လုပ်ဆောင်သွားမည်ဟု ဆိုသည်။ လက်ရှိတွင် အဖွဲ့အစည်း ၆ ဖွဲ့ဖြင့် ကနဦး စတင်ထားသော်လည်း တော်လှန်ရေး အဖွဲ့အစည်း အားလုံး ပါဝင်လာ နိုင်ရေးအတွက် ဆက်သွယ်ညှိနှိုင်းမှုများကို ဆက်လက်လုပ်ဆောင်သွားမည် ဖြစ်ကြောင်း သတင်းစာရှင်းလင်းပွဲ တွင် ထည့်သွင်း ပြောဆိုခဲ့သည်။ #SCEF #ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ #ဦးအောင်ဆန်းမြင့် #ဒေါ်ဇင်မာအောင် #KNU #KNPP #KIA #CNF #CRPH #NUG

အသွင်ကူးပြောင်းရေး အစိုးရ ပေါ်ပေါက်စေရန် SCEF ကို ဖွဲ့စည်းခြင်း ဖြစ်ဟု ဆို

Apr 20

၇.၄ ငလျင်ကြောင့် ဂျပန်တွင် ဆူနာမီ သတိပေးချက် ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၀ ရက်။ ဂျပန်နိုင်ငံတွင် ယနေ့ (ဧပြီလ ၂၀ ရက်၊ တနင်္လာနေ့) နေ့လယ်ပိုင်းတွင် အင်အားပြင်းငလျင်တစ်ခု လှုပ်ခတ်သွားသည့်အတွက် ဆူနာမီ သတိပေးချက်များ ထုတ်ပြန်ထားသည်။ ဂျပန်နိုင်ငံ မိုးလေဝသဌာန၏ ထုတ်ပြန်ချက်အရ ယနေ့ နေ့လယ်ပိုင်းတွင် ဂျပန်နိုင်ငံ မြောက်ဘက်ကမ်းရိုးတန်း အလွန် ပင်လယ်ပြင်ကို ဗဟိုပြုလျှက် အင်အား ရစ်ခ်ျတာစကေး ၇.၄ အဆင့်ရှိသည့် အင်အားပြင်းငလျင်တစ်ခု လှုပ်ခတ်သွားခဲ့သည်။ ဤငလျင်ကြောင့် ဂျပန် အာဏာပိုင်များက ဆူနာမီသတိပေးချက် ထုတ်ပြန်ထားပြီး အိုင်ဝါတေး (Iwate) စီရင်စုနှင့် ဟော့ကိုင်းဒိုး (Hokkaido) ကျွန်း ကမ်းရိုးတန်းတစ်လျှောက်တွင် အမြင့် ၃ မီတာ (၁၀ ပေခန့်) အထိရှိသည့် ဆူနာမီလှိုင်းများ ရိုက်ခတ်နိုင်သည်ဟု ခန့်မှန်းထားသည်။ #japanTsunami2026 #ဂျပန်ဆူနာမီ

၇.၄ ငလျင်ကြောင့် ဂျပန်တွင် ဆူနာမီ သတိပေးချက် ထုတ်ပြန်

Apr 20

လူပုံစံတူစက်ရုပ်က ဟာ့ဖ် မာရသွန် ကမ္ဘာ့စံချိန်ချိုးပြီး ပန်းဝင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၀ ရက်။ တရုတ်နိုင်ငံ၊ ပေကျင်းမြို့၌ ဧပြီလ ၁၈ ရက်နေ့က ကျင်းပခဲ့သော ဟာ့ဖ်မာရသွန် (Half Marathon) ပြိုင်ပွဲတွင် တရုတ်စမတ်ဖုန်းထုတ်လုပ်သည့် Honor ကုမ္ပဏီမှ တီထွင်ထားသော လူပုံစံတူစက်ရုပ် (Humanoid Robot) သည် လူသားများတင်ထားသည့် ကမ္ဘာ့စံချိန်ကို ချိုးဖျက်ကာ ပန်းဝင်သွားခဲ့သည်။ အဆိုပါစက်ရုပ်သည် ၁၃ မိုင်ခရီးစဉ်ကို ၅၀ မိနစ်နှင့် ၂၆ စက္ကန့် တည်းဖြင့် ပန်းဝင်ခဲ့ခြင်းဖြစ်ပြီး၊ လက်ရှိလူသားများအကြား ကမ္ဘာ့စံချိန်တင်ထားသည့် ယူဂန်ဒါအပြေးသမား Jacob Kiplimo ၏ စံချိန် (၅၇ မိနစ် ၂၀ စက္ကန့်) ထက် ၇ မိနစ်နီးပါး ပိုမိုမြန်ဆန်ခဲ့သည်။ မနှစ်က ပြိုင်ပွဲတွင် စက်ရုပ်များမှာ မကြာခဏလဲကျမှုများရှိခဲ့ပြီး အမြန်ဆုံးစက်ရုပ်ပင်လျှင် ၂ နာရီခွဲကျော် ကြာမြင့်ခဲ့သော်လည်း ယခုနှစ်တွင် နည်းပညာတိုးတက်မှုကြောင့် သိသာသော ရလဒ်ကို ရရှိခဲ့ခြင်းဖြစ်သည်။ တရုတ်နိုင်ငံသည် စက်ရုပ်နည်းပညာနှင့် AI ကဏ္ဍတွင် အကြီးအကျယ် ရင်းနှီးမြှုပ်နှံလျက်ရှိရာ ၂၀၂၅ ခုနှစ် တစ်နှစ်တည်းတွင်ပင် ရင်းနှီးမြှုပ်နှံမှုပမာဏ ယွမ် ၇၃ ဘီလီယံကျော် (အမေရိကန်ဒေါ်လာ ၁၀ ဘီလီယံကျော်) အထိ ရှိခဲ့သည်ဟု ဆိုသည်။ အဆိုပါပြိုင်ပွဲတွင် စက်ရုပ်များနှင့် လူသားများကို လမ်းကြောင်းခွဲ၍ ယှဉ်ပြိုင်စေခဲ့ခြင်း ဖြစ်သည်။ #HumanoidRobot #HalfMarathon #လူပုံစံတူစက်ရုပ် #စက်ရုပ်လူ

လူပုံစံတူစက်ရုပ်က ဟာ့ဖ် မာရသွန် ကမ္ဘာ့စံချိန်ချိုးပြီး ပန်းဝင်

Apr 20

ဒေါ်အောင်ဆန်းစုကြည် လွှတ်ပေးရန် ဖိလစ်ပိုင်နှင့် ကုလသမဂ္ဂ တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၀ ရက်။ အာဆီယံအလှည့်ကျ ဥက္ကဋ္ဌ ဖြစ်သော ဖိလစ်ပိုင်အစိုးရက မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နှင့် ကျန်ရှိနေသေးသည့် နိုင်ငံရေးအကျဉ်းသားအားလုံးကို အမြန်ဆုံးလွှတ်ပေးရန် တနင်္ဂနွေနေ့တွင် ထပ်မံတိုက်တွန်းလိုက်သည်။ ဖိလစ်ပိုင်နိုင်ငံခြားရေးဝန်ကြီးဌာန၏ ထုတ်ပြန်တွင် ဒေါ်အောင်ဆန်းစုကြည်အား လွှတ်ပေးခြင်းသည် မြန်မာနိုင်ငံ၌ အားလုံးပါဝင်သည့် ဆွေးနွေးပွဲများ ဖြစ်ပေါ်လာရန်နှင့် အာဆီယံဘုံသဘောတူညီချက် (၅) ရပ်ကို အကောင်အထည်ဖော်ရန်အတွက် မရှိမဖြစ်လိုအပ်သည့်အချက် ဖြစ်သည်ဟု ဖော်ပြထားသည်။ တစ်ချိန်တည်းမှာပင် ဒေါ်အောင်ဆန်းစုကြည်၏ သားငယ်ဖြစ်သူ ဦးထိန်လင်း (ခေါ်) ကင်မ်အဲရစ်က မိခင်ဖြစ်သူ ၂၀၂၁ ခုနှစ်ကတည်းက လူမြင်ကွင်းမှ ပျောက်ကွယ်နေသည့်အပေါ် စိုးရိမ်ပူပန်ကြောင်းနှင့် "မိခင်ဖြစ်သူ အသက်ရှင်နေကြောင်း အထောက်အထားပြပေးရန်" သားတစ်ဦးအနေဖြင့် တောင်းဆိုခဲ့သည်။ ကုလသမဂ္ဂကလည်း ဒေါ်အောင်ဆန်းစုကြည်နှင့် မတရားဖမ်းဆီးခံထားရသူအားလုံးကို လွှတ်ပေးရန် တောင်းဆိုထားဆဲဖြစ်သည်။ သမ္မတသစ်အဖြစ် ကျမ်းသစ္စာကျိန်ဆိုခဲ့သည့် မင်းအောင်လှိုင်က သင်္ကြန်ကာလအတွင်း အကျဉ်းသား ၄,၃၀၀ ကျော်ကို လွတ်ငြိမ်းခွင့်ပေးခဲ့သည်ဟု ဆိုခဲ့သည်။ လွတ်မြောက်လာသူများတွင် သမ္မတဟောင်း ဦးဝင်းမြင့် ပါဝင်လာခဲ့သော်လည်း နိုင်ငံရေးအကျဉ်းသားကူညီစောင့်ရှောက်ရေးအဖွဲ့များကမူ အမှန်တကယ်လွတ်မြောက်လာသူ အရေအတွက်မှာ ထိုထက်များစွာနည်းပါးကြောင်း ဝေဖန်နေကြသည်။ ဝေဖန်သူများက ဤလွတ်ငြိမ်းခွင့်သည် နိုင်ငံတကာ၏ အသိအမှတ်ပြုမှုကို ရယူလိုသော ပြကွက်တစ်ခုသာဖြစ်သည်ဟု သုံးသပ်ကြသည်။ ထိုအခြေအနေများအတွင်းမှာပင် ထိုင်းဒုတိယဝန်ကြီးချုပ်နှင့် နိုင်ငံခြားရေးဝန်ကြီး ဆီဟာဆက်သည် လာမည့်အပတ်တွင် နေပြည်တော်သို့ သွားရောက်ရန် စီစဉ်ထားကြောင်း ထိုင်း PBS သတင်းဌာနက ထုတ်ပြန်ထားသည်။ #ဖိလစ်ပိုင် #ကုလသမဂ္ဂ #ဒေါ်အောင်ဆန်းစုကြည်

ဒေါ်အောင်ဆန်းစုကြည် လွှတ်ပေးရန် ဖိလစ်ပိုင်နှင့် ကုလသမဂ္ဂ တောင်းဆို

« Prev 1 … 50 51 52 53 54 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close