NMG Doh – Page 53 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Feb 11

အိန္ဒိယက အာရေဗျပင်လယ်အတွင်း ရေနံမှောင်ခိုသင်္ဘော ၃ စီး ဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၁ ရက်။ အိန္ဒိယကမ်းခြေစောင့်တပ်ဖွဲ့သည် မွန်ဘိုင်းမြို့၏ အနောက်ဘက် ရေမိုင် ၁၀၀ ခန့်အကွာတွင် နိုင်ငံတကာ ရေနံမှောင်ခိုဂိုဏ်းတစ်ခုကို နှိမ်နင်းနိုင်ခဲ့ပြီး ရေနံတင်သင်္ဘော ၃ စီးကို ဖမ်းဆီးလိုက်သည်။ အဆိုပါသင်္ဘောများသည် အီရန်နိုင်ငံနှင့် ဆက်နွှယ်နေကြောင်း သင်္ဘောသွားလာမှု စောင့်ကြည့်ရေးအဖွဲ့ဖြစ်သော Tanker Trackers က ဆိုသည်။ မှောင်ခိုဂိုဏ်းသည် ပဋိပက္ခဖြစ်ပွားရာဒေသများမှ ဈေးပေါသောရေနံများကို နိုင်ငံတကာရေပိုင်နက်အတွင်း သင်္ဘောတစ်စီးမှ တစ်စီးသို့ လွှဲပြောင်းသည့်နည်းလမ်းဖြင့် အခွန်ရှောင်၍ သယ်ယူခဲ့ခြင်းဖြစ်သည်။ ဖမ်းဆီးရမိသော သင်္ဘောများမှာ Stellar Ruby၊ Al Jafzia နှင့် Asphalt Star တို့ဖြစ်ကြပြီး ၎င်းတို့သည် ဖမ်းဆီးမခံရစေရန် သင်္ဘောအမည်နှင့် အချက်အလက်များကို မကြာခဏ ပြောင်းလဲလေ့ရှိသည်ဟု ဆိုသည်။ လက်ရှိတွင် ၎င်းသင်္ဘောများကို ဥပဒေအရ အရေးယူနိုင်ရန် မွန်ဘိုင်းဆိပ်ကမ်းသို့ ခေါ်ဆောင်လာပြီဖြစ်သည်။ အိန္ဒိယ အစိုးရက ပင်လယ်ပြင် ရေနံ မှောင်ခိုဂိုဏ်းကို နှိမ်နင်းခြင်း ဖြစ်သည်ဟု ပြောသည်။ #အိန္ဒိယ #အာရေဗျပင်လယ် #ရေနံမှောင်ခိုသင်္ဘော #အိန္ဒိယကမ်းခြေစောင့်တပ်ဖွဲ့

အိန္ဒိယက အာရေဗျပင်လယ်အတွင်း ရေနံမှောင်ခိုသင်္ဘော ၃ စီး ဖမ်းဆီး

Feb 11

ဂျပန် အစိုးရသစ်၏ ကာကွယ်ရေး မူဝါဒများကို တရုတ်စိုးရိမ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၁ ရက်။ ဂျပန်နိုင်ငံတွင် ကျင်းပခဲ့သော ရွေးကောက်ပွဲ၌ ဝန်ကြီးချုပ် ဆာနာအဲ တာကာအီချီ ဦးဆောင်သော အာဏာရပါတီ (LDP) က အောက်လွှတ်တော်၏ သုံးပုံနှစ်ပုံကျော် အနိုင်ရရှိခဲ့သည်။ ထို့ကြောင့် ဂျပန်ကိုယ်ပိုင်ကာကွယ်ရေးတပ် (SDF) ကို တရားဝင် "စစ်တပ်" တစ်ခုအဖြစ် ပြောင်းလဲဖွဲ့စည်းရန် အခွင့်အလမ်းရရှိသွားခဲ့သည်။ ယင်းသည် တရုတ်နိုင်ငံနှင့် ဆက်ဆံရေးကို ပိုမိုတင်းမာလာစေနိုင်ကြောင်း အကဲခတ်များက သုံးသပ်ကြသည်။ ဂျပန်ဝန်ကြီးချုပ်သည် ကာကွယ်ရေးအသုံးစရိတ်ကို ပြည်တွင်းအသားတင်ထုတ်ကုန် (GDP) ၏ ၂ ရာခိုင်နှုန်းအထိ ရောက်ရှိရန် ယခင်သတ်မှတ်ထားသော အချိန်ဇယားထက်စော၍ ၂၀၂၆ ခုနှစ်၊ မတ်လကုန်တွင် အကောင်အထည်ဖော်ရန် တွန်းအားပေးနေသည်။ ထို့ပြင် လက်နက်ပစ္စည်းများ ပြည်ပသို့ တင်ပို့ရောင်းချမှုကို ဖြေလျှော့ရန်နှင့် အခြားနိုင်ငံများနှင့် ကာကွယ်ရေးဆိုင်ရာ ပူးတွဲစီမံကိန်းများ လုပ်ဆောင်ရန် စီစဉ်လျက်ရှိသည်။ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူကမူ ဂျပန်အနေဖြင့် နိုင်ငံတကာ၏ စိုးရိမ်မှုများကို လျစ်လျူမရှုရန်နှင့် စစ်ရေးဝါဒ အမှားများကို မလုပ်ဆောင်ရန် တိုက်တွန်းပြောကြားခဲ့သည်။

ဂျပန် အစိုးရသစ်၏ ကာကွယ်ရေး မူဝါဒများကို တရုတ်စိုးရိမ်

Feb 11

အီရန်ကို စစ်ရေးအရ အရေးယူရန်အတွက် ရွေးချယ်စရာများ ဆွေးနွေးရန် နေတန်ယာဟု အမေရိကားသို့ ရောက်ရှိနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၁ ရက်။ အမေရိကန်နှင့် အီရန်တို့ နျူကလီးယားအရေး ဆွေးနွေးနေစဉ်အတွင်း အစ္စရေးဝန်ကြီးချုပ် ဘင်ဂျမင် နေတန်ယာဟုသည် ဝါရှင်တန်သို့ ရောက်ရှိလာပြီး သမ္မတ ဒေါ်နယ်ထရမ့်နှင့် တွေ့ဆုံကာ အီရန်၏ စစ်ရေးခြိမ်းခြောက်မှုများကို တုံ့ပြန်မည့် နည်းလမ်းများအား ဆွေးနွေးမည်ဖြစ်ကြောင်း CNN သတင်းဌာနက ထုတ်ပြန်ခဲ့သည်။ အီရန်သည် ပဲ့ထိန်းဒုံးကျည်များကို အရှိန်အဟုန်ဖြင့် ဖြည့်တင်းလျက်ရှိရာ ရက်ပိုင်း သို့မဟုတ် လပိုင်းအတွင်း ဒုံးကျည်ပေါင်း ၁,၈၀၀ မှ ၂,၀၀၀ ခန့်အထိ ပိုင်ဆိုင်လာနိုင်ကြောင်း အစ္စရေးက ယူဆထားသည်။ အစ္စရေးသည် လက်ရှိကျင်းပနေသော နျူကလီးယားဆွေးနွေးပွဲများအပေါ် သံသယရှိနေပြီး၊ အကယ်၍ ဆွေးနွေးပွဲများ ပျက်ပြားသွားပါက အီရန်၏ စစ်ဘက်ဆိုင်ရာ အဆောက်အအုံများကို တိုက်ခိုက်မည့် စစ်ရေးရွေးချယ်စရာများကို သမ္မတထရမ့်နှင့် တိုင်ပင်မည်ဖြစ်သည်။ နေတန်ယာဟုက အီရန်၏ နျူကလီးယားအစီအစဉ်သာမက ဒုံးကျည်အစီအစဉ်နှင့် ဒေသတွင်းလက်နက်ကိုင်အဖွဲ့များအား ထောက်ပံ့နေမှုကိုပါ ကန့်သတ်ရန် တွန်းအားပေးနေသော်လည်း၊ သမ္မတထရမ့်က နျူကလီးယားကိစ္စ တစ်ခုတည်းကိုသာ ကန့်သတ်သည့် သဘောတူညီချက်ကို လက်ခံနိုင်ကြောင်း အရိပ်အယောင်ပြထားသည်။ တစ်ဖက်တွင်လည်း တရုတ်နိုင်ငံသည် အီရန်နှင့် ဆက်ဆံရေး ပိုမိုနီးကပ်လာပြီး အီရန်သို့ တရုတ်၏ J-20 ကိုယ်ပျောက်တိုက်လေယာဉ် ပုံစံတူအား လက်ဆောင်ပေးအပ်ခဲ့သည်။

အီရန်ကို စစ်ရေးအရ အရေးယူရန်အတွက် ရွေးချယ်စရာများ ဆွေးနွေးရန် နေတန်ယာဟု အမေရိကားသို့ ရောက်ရှိနေ

Feb 11

ဟိုပုံးရှိ ဘိုးဘွားပိုင်မြေကို စစ်ကော်မရှင် သိမ်းယူ သတင်းနှင့် မီဒီယာကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၁ ရက်။ စစ်တက္ကသိုလ်များနှင့် ထိစပ်နေသည့် ရှမ်းပြည်တောင်ပိုင်း၊ ဟိုပုံးမြို့နယ်အတွင်းရှိ ဘိုးဘွားပိုင်မြေဧက ၅၀၀ ကျော်ကို စစ်ကော်မရှင်က သိမ်းယူလိုက်ပြီး အမြန်ဆုံး ဖယ်ရှားပေးရန် ခြိမ်းခြောက်ထားသည်ဟု ဒေသခံများက ပြောသည်။ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်အတွင်းရှိ စစ်ကော်မရှင်၏ စစ်ဘက်ဆိုင်ရာ တက္ကသိုလ်များနှင့် ထိစပ်နေသော လူနေအိမ်ခြေများနှင့် ဘိုးဘွားပိုင်မြေဧက ၅၀၀ ကျော်ကို မြေလွတ်မြေရိုင်းအဖြစ် သတ်မှတ်ကာ အဓမ္မသိမ်းယူလိုက်ပြီး အချိန်မီမပြောင်းရွှေ့ပါက အင်အားသုံးဖယ်ရှားမည်ဟု ခြိမ်းခြောက်ထားခြင်း ဖြစ်သည်။ ဟိုပုံးမြို့နယ်၊ လုံခတ်ကျေးရွာ၊ နောင်တောင်း ပရဟိတကျောင်းအနီးရှိ မြေ ၅၆၁ ဒသမ ၇၅ ဧကခန့်ကို စစ်ကော်မ ရှင်တပ်က မြေလွတ်မြေရိုင်းစီမံခန့်ခွဲရေး ဗဟိုကော်မတီ၏ ခွင့်ပြုချက်ဖြင့် သိမ်းဆည်းလိုက်ခြင်း ဖြစ်သည်။ ၎င်းတို့လက်အောက်ခံ မြို့နယ်ထွေအုပ်ရုံးက ၁၈၈၉ ခုနှစ် အထက်မြန်မာနိုင်ငံမြေနှင့် အခွန်စည်းမျဉ်း ဥပဒေ များကို အကြောင်းပြကာ ဒေသခံများအား နှင်ထုတ်နေခြင်း ဖြစ်သည်ဟု ဆိုသည်။ လက်ရှိတွင် စစ်ကော်မရှင် လက်အောက်ခံ ပအိုဝ်းပြည်သူ့စစ် (PNA/PNO) နှင့် မြေပွဲစားများက မြေပိုင်ရှင်များ ကို နေအိမ်များမှ ဖယ်ရှားခိုင်းနေပြီး၊ မိမိတို့မြေကွက်အား ပြန်လည်ရရှိလိုပါက ငွေကျပ်သိန်း ၄၀ ပေးသွင်း၍ ပြန်လည်ဝယ်ယူရမည်ဟု ဖိအားပေးနေကြောင်း ဒေသခံများက ပြောသည်။ မြေသိမ်းခံရသည့် ဒေသခံတစ်ဦးက “သူတို့ ပြောတာက မင်းတို့နေတာက ကျူးကျော် ဖြစ်နေတယ်။ အဲ့ဒါ ကြောင့် ငါတို့က တရားဝင်အောင် လုပ်ပေးမယ်။ နေရာပြန်ပေးမယ်။ မီးလည်း ရမယ်။ သိန်း ၄၀ သွင်းပေါ့။ ပြန်ပေးတာက ဘယ်နေရာ ဖြစ်မလဲတော့ မသိသေးဘူး။ လောလောဆယ် အိမ်လည်းဆုံးမှာ။ ပိုက်ဆံလည်း ကုန်မှာ” ဟု ပြောသည်။ အဆိုပါမြေနေရာများတွင် နေထိုင်သူများ အနေဖြင့် လာမည့် ဖေဖော်ဝါရီလ ၂၇ ရက်နေ့ကို နောက်ဆုံးထား ပြောင်းရွှေ့ပေးရန် စစ်ကော်မရှင်က ရာဇသံပေးထားပြီး၊ လိုက်နာခြင်းမရှိပါက အင်အားသုံး ဖယ်ရှားရှင်းလင်း သွားမည်ဟု ဆိုသည်။ ဒေသတွင်း တက်ကြွလှုပ်ရှားသူများ၏ အဆိုအရ အဆိုပါမြေဧက ၅၀၀ ကျော်မှာ ရှေးယခင်ကတည်းက ရွာပိုင် မြေများဖြစ်ပြီး၊ လက်ရှိ နိုင်ငံရေး ရှုပ်ထွေးနေသည့် ကာလတွင် ပအိုဝ်းပြည်သူများ၏ အသိပညာနည်းပါးမှုကို အခွင့်ကောင်းယူကာ စစ်ကော်မရှင်တပ်က အမြတ်ထုတ်နေခြင်းဖြစ်သည်ဟု ဆိုသည်။ အုပ်ချုပ်ရေးပိုင်းနှင့် နီးစပ်သည့် ရွာသားတစ်ဦးကလည်း “သူတို့ ပြောပုံအရတော့ မင်းတို့ မြေပြန်ရမယ်။ မီးလည်းရမယ်။ လမ်းတွေလည်း ကောင်းလာမယ်ပေါ့။ ကျနော်တို့က PNO ကို ယုံတာ မယုံတာထက် သူတို့ပဲ ရှိတယ်ဆိုတဲ့ သဘောပေါ့။ တခုခု ပြောချင်ဆိုချင်ရင် သူတို့ကပဲ တဆင့်သွားရတာပဲ။ သိတဲ့အတိုင်း ပအိုဝ်းနီ (PNLO) အဖွဲ့ကလည်း အလှမ်းဝေးတယ်လေ။ အဲတော့လည်း ရွေးစရာမရှိ ထည့်တဲ့လူက ထည့်ကြတာပေါ့။ တချို့ကတော့ အသနားခံစာ တင်ထားတယ်ဆိုတော့ စောင့်ကြည့်မယ့် သဘောပေါ့” ဟု ပြောသည်။ အဆိုပါ သိမ်းဆည်းခံမြေနေရာများသည် စစ်ရေးနှင့် အုပ်ချုပ်ရေးအရ အချက်အချာကျသည့် နေရာတွင် ရှိနေပြီး အရှေ့ဘက်တွင် စစ်ကော်မရှင်၏ ကွန်ပျူတာတက္ကသိုလ်၊ မြောက်ဘက်တွင် နည်းပညာသိပ္ပံလေ့ကျင့်ရေး ကျောင်းနှင့် တောင်ဘက်တွင် PNO ၏ အုပ်ချုပ်ရေးရုံးများ တည်ရှိနေသည်။ သမိုင်းကြောင်းအရ အဆိုပါမြေများသည် ၁၉၉၂ ခုနှစ်တွင် တစ်ကြိမ် သိမ်းယူခြင်းခံခဲ့ရသော်လည်း ၂၀၁၅ ခုနှစ် တွင် လက်ရှိ PNO ဥက္ကဋ္ဌဖြစ်သူ ခွန်စံလွင်ထံ ပြန်လည်ပေးအပ်ခဲ့သည့် လုံခုတ်ကျေးရွာပိုင်မြေများ ဖြစ်ကြောင်း ရှေ့မီနောက်မီ ပအိုဝ်းရပ်မိရပ်ဖများက ထောက်ပြသည်။ လက်ရှိတွင် ပအိုဝ်းဒေသအတွင်း စစ်ကော်မရှင်တပ်နှင့် ပအိုဝ်းပြည်သူ့စစ်အဖွဲ့ PNA ပူးပေါင်းတပ်များက လူသစ် စုဆောင်းခြင်း၊ တိုက်ပွဲများ ဖော်ဆောင်ခြင်းအပြင် ယခုကဲ့သို့ ဒေသခံတို့၏ ဘိုးဘွားပိုင်မြေများကို ဥပဒေ အကြောင်းပြ သိမ်းယူနေခြင်းကြောင့် ဒေသခံပြည်သူများမှာ စားဝတ်နေရေးနှင့် နေထိုင်ရေးအတွက်ပါ အကျပ် အတည်းများစွာ ရင်ဆိုင်နေရသည်ဟု ဆိုသည်။

ဟိုပုံးရှိ ဘိုးဘွားပိုင်မြေကို စစ်ကော်မရှင် သိမ်းယူ

Feb 11

ပျောက်ဆုံးနေသော ရွာသားများ၏ အလောင်းများကိုသာ တွေ့ရှိခဲ့ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၁ ရက်။ ရှမ်းပြည်တောင်ပိုင်း၊ ပင်းတယတွင် ပျောက်ဆုံးနေသည့် လယ်ကိုင်းရွာသား ၄ ဦး၏ ရုပ်အလောင်းများကို တွေ့ရှိခဲ့ကြသည်။ ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်အတွင်း၌ နေအိမ်မှ ဖမ်းဆီးခေါ်ဆောင်ခံရပြီး နှစ်ပတ်နီးပါးကြာ ပျောက်ဆုံးနေသည့် ဒေသခံ ၄ ဦးကို ရုပ်အလောင်းများအဖြစ် ပြန်လည်တွေ့ရှိခဲ့ကြောင်း သေဆုံးသူ မိသားစု ဝင်များနှင့် နီးစပ်သူများထံမှ သိရသည်။ အဆိုပါ ဒေသခံ ၄ ဦး၏ ရုပ်အလောင်းများကို ဖေဖော်ဝါရီလ ၉ ရက်နေ့ ညပိုင်းတွင် လယ်ကိုင်းကျေးရွာ၏ မြောက်ဘက် လမ်းခုလတ်တစ်နေရာ၌ ရွာခံများက ဝိုင်းဝန်းရှာဖွေရာမှ တွေ့ရှိခဲ့ခြင်းဖြစ်သည်။ ၎င်းတို့သည် ပြီးခဲ့သည့် ဇန်နဝါရီလ ၂၇ ရက်နေ့ ညပိုင်းကတည်းက အမည်မသိ လက်နက်ကိုင်အဖွဲ့တစ်ခု၏ ဖမ်းဆီးခြင်းကို ခံခဲ့ရခြင်း ဖြစ်သည်။ သေဆုံးသူများနှင့် မိတ်ဆွေရင်းချာဖြစ်သူ တစ်ဦးက လက်ရှိအခြေအနေနှင့် ပတ်သက်ပြီး “အလောင်းကတော့ အရမ်းကြီး မပျက်စီးသေးဘူး။ သူတို့ မိသားစုကတော့ ခပ်အေးအေးပါပဲ။ စစ်တပ်နဲ့ ပတ်သက်လားဆိုတာတော့ မသိဘူး။ အလိုက်ထိုက် ဆက်ဆံရတာတော့ ရှိတာပေါ့လေ။ ဘယ်ဖက်လဲဆိုတာတော့ ကျနော်တို့ မခိုင်လုံဘဲနဲ့ ရမ်းမပြောရဲဘူး။ သူတို့ ပြီးရင် ကျနော်တို့အလှည့် ဖြစ်သွားမှာ ကြောက်လို့” ဟု ပြောသည်။ သေဆုံးသွားသူများမှာ လယ်ကိုင်းကျေးရွာတွင် နေထိုင်သည့် အသက် ၅၄ နှစ်အရွယ် ဦးစံရွှေမြင့်၊ အသက် ၄၃ နှစ်အရွယ် ဦးကျော်မိုးသူ၊ အသက် ၄၄ နှစ်အရွယ် မဝေဆုလှိုင်နှင့် အသက် ၆၃ နှစ်အရွယ် အမျိုးသားတစ်ဦးတို့ ဖြစ်ကြသည်။ ၎င်းတို့ ၄ ဦးသည် နေအိမ်၌ ရှိနေစဉ် ဇန်နဝါရီ ၂၇ ရက်နေ့၊ ည ၉ နာရီခွဲ အချိန်ခန့်တွင် လက်နက်ကိုင်များက လာရောက် ဖမ်းဆီးသွားခြင်းဖြစ်ပြီး ၁၃ ရက်အကြာတွင် အလောင်းများကို ပြန်လည်တွေ့ရှိခဲ့ရခြင်း ဖြစ်သည်။ လက်ရှိတွင် ဓနုကိုယ်ပိုင်အုပ်ချုပ်ခွင့်ရဒေသ အတွင်း၌ စစ်ကော်မရှင်တပ်အပြင် ဓနုပြည်သူ့လွတ်မြောက်ရေး တပ်ဦး (DPLA)၊ ရွာငံပြည်သူ့ကာကွယ်ရေးတပ် (YGN-PDF) နှင့် ဓနုပြည်နယ် အမျိုးသားတပ်မတော် (DSNA) တို့ စစ်ရေးလှုပ်ရှားလျက်ရှိသည်။ သို့သော် လယ်ကိုင်းကျေးရွာ ဝန်းကျင်တွင်မူ စစ်ကော်မရှင်တပ်နှင့် ရွာငံ PDF အဖွဲ့တို့သာ အဓိက လှုပ်ရှားနေ ကြောင်း မြေပြင်သတင်းရင်းမြစ်များက ဆိုသည်။ အဆိုပါ သတ်ဖြတ်မှုဖြစ်စဉ်နှင့် ပတ်သက်၍ စစ်ကော်မရှင်ဘက်က တစ်စုံတစ်ရာ ထုတ်ပြန်ခြင်းမရှိသေးသလို၊ ရွာငံ PDF ထံ သတင်းနှင့် မီဒီယာကွန်ယက် (NMG) သတင်းဌာနက က ဆက်သွယ်မေးမြန်းရန် ကြိုးပမ်းသော် လည်း ဖုန်းစက်ပိတ်ထားသဖြင့် ဆက်သွယ်၍ မရသေးပေ။ ပင်းတယနှင့် ထိစပ်နေသည့် ရွာငံမြို့နယ်အတွင်း၌ ပြီးခဲ့သည့် ၂၀၂၂ ခုနှစ် ဧပြီလပိုင်းကလည်း ပဲယင်းတောင် ကျေးရွာမှ ဒေသခံ ၆ ဦးကို စစ်ကော်မရှင်တပ်က သတ်ဖြတ်ခဲ့သည့် ဖြစ်စဉ်ရှိခဲ့ဖူးသည်။ ထိုစဉ်က စစ်ကော်မရှင် ၏ ဝါဒဖြန့်လော်ဘီများက အဆိုပါ သတ်ဖြတ်မှုကို PDF များက ကျူးလွန်ခြင်း ဖြစ် သည်ဟု ဝါဒဖြန့်ခဲ့သော်လည်း ဒေသခံများကမူ စစ်တပ်၏ လက်ချက်ဖြစ်ကြောင်း အတည်ပြုခဲ့ကြသည်။ ယခုဖြစ်စဉ်တွင်လည်း မည်သည့်အဖွဲ့က ကျူးလွန်သည်ကို အတည်မပြုနိုင်သေးသော်လည်း လက်နက်ကိုင် အဖွဲ့များကြား မြေစာပင်ဖြစ်နေရသည့် ဒေသခံပြည်သူများမှာ လုံခြုံရေးအတွက် စိုးရိမ်ထိတ်လန့်နေကြရ သည်ဟု ဆိုသည်။

ပျောက်ဆုံးနေသော ရွာသားများ၏ အလောင်းများကိုသာ တွေ့ရှိခဲ့ရ

Feb 10

ရွေးကောက်ပွဲသည် စစ်ရာဇဝတ်မှုများ ကျူးလွန်ရန် လမ်းဖွင့်ပေးလိုက်သည်ဟု အမျိုးသမီးအဖွဲ့ချုပ် ပြော သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၀ ရက်။ စစ်ကော်မရှင်၏ အတုအယောင်ရွေးကောက်ပွဲသည် စစ်ရာဇဝတ်မှုများ ဆက်လက်ကျူးလွန်ရန် လမ်းဖွင့်ပေး လိုက်ခြင်းသာ ဖြစ်သည်ဟု အမျိုးသမီးများအဖွဲ့ချုပ် (မြန်မာနိုင်ငံ) - WLB က သတိပေးလိုက်သည်။ စစ်ကော်မရှင်က ၎င်းတို့ကိုယ်တိုင် တရားဝင်မှုရရှိရန် ကြိုးပမ်းမှုဖြစ်ပြီး တစ်နိုင်ငံလုံးတွင် စစ်ရေးထိုးစစ်များ၊ စစ်ရာဇဝတ်မှုများနှင့် လူ့အခွင့်အရေး ချိုးဖောက်မှုများကို ဆက်လက်ကျူးလွန်ရန် အခွင့်အရေး ဖန်တီးပေးခြင်း သာ ဖြစ်ကြောင်း ပြောဆိုလိုက်သည်။ WLB က ဖေဖော်ဝါရီလ ၁ ရက်နေ့တွင် ထုတ်ပြန်သည့် ‘၂၀၂၅ ခုနှစ်ကို လည်ပြန်ကြည့်ခြင်း’ အစီရင်ခံစာအရ စစ်ကော်မရှင်သည် ၎င်းတို့ အာဏာတည်မြဲရေး အတွက် ရွေးကောက်ပွဲကို အသုံးချနေခြင်းဖြစ်ကြောင်း ဆိုသည်။ WLB ၏ မူဝါဒရေးရာ ဦးဆောင်အဖွဲ့ဝင် မမိငယ်က “အမျိုးသမီး လူ့အခွင့်အရေး လှုပ်ရှားသူတွေကို အရင်က ထက် ပိုမိုဖမ်းဆီးတာ ကျမတို့ ကြုံတွေ့ရတယ်။ လုံခြုံရေးက ပိုမိုခက်ခဲလာတယ်။ လမ်းတွေမှာ စစ်ဆေးရေး ဂိတ်တွေ ထားပြီးမှ အဆမတန်တွေ့တာ အကုန်လုံး ပေါ်တာဆွဲပေါ့နော်။ ဒီလိုပဲ အပြစ်မဲ့ ပြည်သူတွေကို နေ့စဉ် သတ်ဖြတ်တယ်။ စစ်ရာဇဝတ်မှု၊ လူမျိုးတုန်းသတ်ဖြတ်မှုတွေ စစ်တပ်က ဆက်လက်ပြီးမှ ကျူးလွန်နေတာ တွေ့ရတယ်” ဟု ပြောသည်။ အစီရင်ခံစာ မှတ်တမ်းများအရ ၂၀၂၅ ခုနှစ်အတွင်း လိင်နှင့်ဂျင်ဒါအခြေပြု အကြမ်းဖက်မှုပေါင်း ၂၀၉ မှု ဖြစ်ပွားခဲ့ ပြီး လိင်ပိုင်းဆိုင်ရာ အကြမ်းဖက်မှုမှ ရှင်သန်လွတ်မြောက်လာသူ အမျိုးသမီး ၁,၂၁၂ ဦးအထိ ရှိခဲ့သည်။ အထူးသဖြင့် စစ်ကိုင်းတိုင်းနှင့် ချင်းပြည်တို့တွင် စစ်ကော်မရှင်တပ်သည် မုဒိမ်းကျင့်မှုကို စစ်လက်နက်သဖွယ် ဗျူဟာကျကျ အသုံးပြုနေကြောင်း မမိငယ်က ထောက်ပြသည်။ “မုဒိမ်းကျင့်မှုကို လက်နက်သဖွယ် အသုံးပြုတာကို ဗျူဟာကျကျ ပေါ့နော်။ ပြည်သူလူထုက မတုံ့ပြန်နိုင် အောင် အကြောက်တရားနဲ့ အရှက်တရားကို အသုံးချပြီးမှ ပြုလုပ်နေတာ ကျမတို့ တွေ့ရတယ်။ အမျိုးသား ဆိုရင်လည်း ပေါ်တာဆွဲတယ်၊ စစ်မှုထမ်းခိုင်းတယ်၊ နှိပ်စက်ရိုက်နှက်ခြင်းတွေ အဲ့လိုမျိုး ဗျူဟာတွေကို သုံး တယ်။” ထို့အပြင် ရွေးကောက်ပွဲအတွက် လူထုအား အကျပ်ကိုင်မှုများ ရှိခဲ့ကြောင်း ကျေးလက်မြေအဖွဲ့ ဒါရိုက်တာ ဒေါ်မူစဲက ပြောသည်။ “အတုအယောင် ရွေးကောက်ပွဲမှာ မဲထည့်ခိုင်းတယ်၊ ဖိအားပေးတယ်။ ကရင်နီမှာ ကြည့်မယ်ဆိုလို့ရှိရင် စစ်ဘေးရှောင်တွေကို ပြန်လာ၊ မပြန်လာလို့ရှိရင် အိမ်ယာတွေ ချိတ်ပိတ်မယ်။ တော်လှန်ရေးအဖွဲ့နဲ့ တစ်ဖွဲ့တည်းလို့ သတ်မှတ်မယ်ဆိုတဲ့ အရာတွေက ခြိမ်းခြောက်မှုဖြစ်တယ်။ ဒါသည် လူ့အခွင့်အရေးနဲ့ လုံးဝ ဆန့်ကျင်ဘက် ဖြစ်တယ်။” မြေပြင်တွင် ဘေးအန္တရာယ်များ ရှိနေသော်လည်း WLB အနေဖြင့် ပြီးခဲ့သည့်နှစ်အတွင်း နေရပ်စွန့်ခွာရသူ (IDPs) ၅၄,၃၁၁ ဦး၊ CDM အမျိုးသမီး ၁၀၈ ဦးနှင့် အမျိုးသမီးလူ့အခွင့်အရေး ကာကွယ်စောင့်ရှောက်သူ ၃၁၀ ဦးကို ကူညီပံ့ပိုးပေးနိုင်ခဲ့သည်။ WLB သည် အမျိုးသမီးများနှင့် မိန်းကလေးငယ်များ အပေါ် အကြမ်းဖက်မှုများ အတွက် ပြစ်ဒဏ်ကင်းလွတ်ခွင့် (Impunity) ကို အဆုံးသတ်ရန်နှင့် နိုင်ငံရေးအရ ဆုံးဖြတ်ချက်ချသည့် အဆင့်တိုင်းတွင် အမျိုးသမီးများ အဓိပ္ပာယ်ပြည့်ဝစွာ ပါဝင်ခွင့်ရရှိရန် တောင်းဆိုထားသည်။ နိုင်ငံတကာ အသိုက်အဝန်းအနေဖြင့် စစ်ကော်မရှင်၏ အတုအယောင် ရွေးကောက်ပွဲကို ငြင်းပယ်ရန်နှင့် လက်နက် ရောင်းချပေးနေမှုများ ရပ်တန့်ရန် လိုအပ်ကြောင်း၊ ခိုင်မာသော လုပ်ဆောင်မှု မရှိပါက ပြည်သူများ အနေဖြင့် ပိုမိုပြင်းထန်သည့် ဆိုးကျိုးများ ဆက်လက်ခံစားရမည် ဖြစ်ကြောင်း WLB မူဝါဒရေးရာ ဦးဆောင်အဖွဲ့ ဝင် မဖိုးဒါးက သတိပေး ပြောဆိုထားသည်။ ဓာတ်ပုံ - ပုံဟောင်း (Women Alliance Burma - အမျိုးသမီးမဟာမိတ်အင်အားစု) #စစ်ကော်မရှင် #ရွေးကောက်ပွဲ #စစ်ရာဇဝတ်မှု #လူ့အခွင့်အရေးချိုးဖောက်မှု #WLB

ရွေးကောက်ပွဲသည် စစ်ရာဇဝတ်မှုများ ကျူးလွန်ရန် လမ်းဖွင့်ပေးလိုက်သည်ဟု အမျိုးသမီးအဖွဲ့ချုပ် ပြော

Feb 10

ဗန်းမောက်ကို စစ်ကော်မရှင်နှင့် ရှမ်းနီတပ် ပြန်လည်ထိန်းချုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၀ ရက်။ ဗန်းမောက်မြို့ကို စစ်ကော်မရှင်တပ်နှင့် ရှမ်းနီ တပ်မတော် SNA ပူးပေါင်းတပ် ပြန်လည်ထိန်းချုပ်လိုက်ပြီဟု စစ်ရေးသတင်းရင်းမြစ်များက ပြောသည်။ စစ်ကိုင်းတိုင်းအတွင်း တော်လှန်ရေးအင်အားစုများ သိမ်းပိုက်စိုးမိုးထားသည့် ဗန်းမောက်မြို့ကို လေကြောင်း ပစ်ကူနှင့် အဆင့်မြင့်ဒရုန်းနည်းပညာများကို အသုံးပြုကာ ဖေဖော်ဝါရီ ၈ ရက်နေ့တွင် ပြန်လည်ထိန်းချုပ်သွားခြင်း ဖြစ်သည်ဟု ဆိုသည်။ ပြီးခဲ့သည့် ၂၀၂၅ ခုနှစ်၊ စက်တင်ဘာ ၂၀ ရက်နေ့တွင် တော်လှန်ရေးပူးပေါင်းတပ်များက ဗန်းမောက်မြို့ကို အောင်မြင်စွာ သိမ်းပိုက်နိုင်ခဲ့သော်လည်း ၄ လကျော်ကြာ တန်ပြန်ထိုးစစ်များကို ပြင်းထန်စွာ ရင်ဆိုင်ခဲ့ရခြင်း ဖြစ်သည်။ ဖေဖော်ဝါရီ ၈ ရက်နေ့တွင် စစ်ကော်မရှင်တပ်က တိုက်လေယာဉ် ၃ စင်းဖြင့် အပြင်းအထန် ဗုံးကြဲတိုက်ခိုက်ခဲ့ သဖြင့် မြို့ပေါ်၌ နောက်ဆုံးကျန်ရှိနေသည့် အောင်သာကုန်းရပ်ကွက်မှ တော်လှန်ရေးတပ်ဖွဲ့ဝင်များ ဆုတ်ခွာ ပေးခဲ့ရပြီး မြို့ပေါ်ရပ်ကွက် ၄ ခုလုံးကို လက်လွှတ်လိုက်ရခြင်း ဖြစ်သည်။ ဗန်းမောက်မြို့ကို ပြန်လည်ရရှိရေးအတွက် စစ်ကော်မရှင်တပ်သည် SNA တပ်ကို အဆင့်မြင့်နည်းပညာသုံး လက်နက်များ ထောက်ပံ့ပေးခဲ့ကြောင်း တော်လှန်ရေးအင်အားစုများနှင့် နီးစပ်သည့် ဒေသခံတစ်ဦးက ပြောသည်။ “ဗန်းမောက်မှာ သုံးသွားတာဆိုရင် အဆင့်မြင့် ကင်းထောက်ဒရုန်းနဲ့ ဗန်းမောက်ကို ဝဲတယ်။ ဝဲပြီးတော့မှ လက်နက်ကြီးနဲ့ အတိအကျချိန်ပြီး လှမ်းထုတယ်။ အသေခံဒရုန်းတွေရောပေါ့ တောက်လျှောက်သုံးလာတာ။ အဲ့လိုနဲ့ပဲ ဗန်းမောက်မြို့ကြီးကို အရယူသွားတာ။ ရဲဘော်တွေကတော့ သူတို့လောက်လည်း ဖြုံးလည်းမဖြုံးနိုင် သုံးလည်းမသုံးနိုင်ဆိုတော့ နောက်ဆုတ်ခဲ့ရတာပေါ့။ စစ်ကောင်စီကလည်း တောက်လျှောက်ကူညီနေတာ။” စစ်ကော်မရှင်သည် ဗန်းမောက်မြို့သိမ်း ထိုးစစ်တွင် ဂျက်ဖိုက်တာ တိုက်လေယာဉ်များသာမက Y-12 ယာဉ်များ ဖြင့်ပါ ဗုံးကြဲတိုက်ခိုက်မှုများ ပြုလုပ်ခဲ့သဖြင့် တော်လှန်ရေးတပ်ဖွဲ့ဝင်များဘက်တွင် သေဆုံးမှုများပြားခဲ့ကြောင်း ဆိုသည်။ ထို့ပြင် ဟုမ္မလင်းမြို့ရှိ စစ်ကော်မရှင် ဗျူဟာအဖွဲ့နှင့် တပ်ရင်း ၃ ရင်းခန့်သည် လက်နက်နှင့် လူအင်အား အလုံး အရင်းဖြင့် ကူညီပေးခဲ့သည်ဟု စစ်ကိုင်းနှင့် ကချင်အစပ်ရှိ ကာကွယ်ရေးတပ်ဖွဲ့ဝင်တစ်ဦးက အတည်ပြု သည်။ “ဟုတ်တယ်။ ဆုတ်ခဲ့ရပြီ။ ဟုမ္မလင်းကနေ စကမအဖွဲ့က ဆင်းလာတာ။ စကမ တစ်ဗျူဟာနဲ့ တပ်ရင်း ၃ ရင်း ရှမ်းနီတွေရော။ ကသာ၊ ထီးချိုင့်တို့ကိုလည်း ဖိအားပေးမလို့ ထင်တယ်။ တစ်ခရိုင်တည်း ဖြစ်နေတာကို။ အရေးကြီးတဲ့ နေရာအားလုံး ပေးလိုက်ရတဲ့ သဘောပေါ့လေ။” လက်ရှိတွင် ဗန်းမောက်မြို့ပေါ်၌ စစ်ကော်မရှင်တပ်နှင့် SNA တပ်များ နေရာယူထားပြီး မြို့ခံပြည်သူများမှာ ဘေးလွတ်ရာသို့ ထွက်ပြေးတိမ်းရှောင်နေကြရဆဲ ဖြစ်သည်။ စစ်ရေးအခြေအနေ စောင့်နေကြည့်နေသူများကမူ ဗန်းမောက်မြို့ကို ပြန်လည်ရရှိသွားသည့် ပူးပေါင်းတပ်များ သည် ယခုအခါ အင်အားတောင့်တင်းလာသဖြင့် တော်လှန်ရေးတပ်ဖွဲ့များ ထိန်းချုပ်ထားဆဲဖြစ်သော ဗန်းမောက် တောင်ပိုင်းနှင့် မြောက်ပိုင်းဒေသများအထိ နယ်မြေဖြန့်ကျက် ထိုးစစ်ဆင်လာနိုင်ကြောင်း သုံးသပ်နေကြသည်။ ရွှေနှင့် သစ်ကဲ့သို့သော သယံဇာတ ပေါများသည့် ဗန်းမောက်မြို့သည် ကချင်ပြည်နှင့် ထိစပ်နေသည့် မဟာ ဗျူဟာကျသော မြို့ဖြစ်ပြီး ရှမ်းနီ၊ ကဒူး၊ ကနန်း လူမျိုးစုများ အများစု နေထိုင်ရာ ဒေသတစ်ခုလည်း ဖြစ်သည်။

ဗန်းမောက်ကို စစ်ကော်မရှင်နှင့် ရှမ်းနီတပ် ပြန်လည်ထိန်းချုပ်

Feb 10

ထိုင်းရွေးကောက်ပွဲ နေရာအချို့တွင် လူထုက မဲပြန်ရေတွက်ရန် တောင်းဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၀ ရက်။ ထိုင်းနိုင်ငံတွင် မကြာသေးမီက ကျင်းပခဲ့သော ရွေးကောက်ပွဲ၌ အိမ်စောင့်အစိုးရ အာဏာရပါတီဖြစ်သည့် "ဖုန်ကျိုင်ထိုင်း" (Bhumjaithai) ပါတီက နေရာအများစုတွင် အနိုင်ရရှိခဲ့သည်။ သို့သော် အချို့ဒေသများတွင် မဲမသမာမှုများ ရှိသည်ဟုဆိုကာ မဲပြန်လည်ရေတွက်ရန် ဆန္ဒပြတောင်းဆိုမှုများ ပေါ်ပေါက်လျက်ရှိသည်။ တစ်ချိန်တည်းမှာပင် ထိုင်းနိုင်ငံ အမျိုးသား အကျင့်ပျက်ခြစားမှု တိုက်ဖျက်ရေးကော်မရှင် (NACC) က ပြည်သူ့ပါတီ (People’s Party) ၏ ခေါင်းဆောင် ၄၄ ဦးသည် ယခင် Move Forward ပါတီတွင်ရှိစဉ်က ဘုရင်ကို အကြည်ညိုပျက်စေမှု ဥပဒေကို ပြင်ဆင်ရန် ကြိုးပမ်းမှုဖြင့် အပြစ်ရှိကြောင်း ဆုံးဖြတ်လိုက်သည်။ ထိုသူများထဲတွက် လက်ရှိ People’s Party ၏ ခေါင်းဆောင်များဖြစ်ကြသော ဖိထာ လင်ဂျာရွန်ရတ်၊ နတ်သဖုန်း ရီယွန်ပန်ယားဝတ် နှင့် ဆီရိကန်ညာ တန်စကူးလ် အပါအဝင် ခေါင်းဆောင် အများအပြား ပါဝင်သည်။ ၎င်းတို့သည် တရားစွဲဆိုခံရပြီး ပြစ်ဒဏ်ချမှတ်ခံရပါက နိုင်ငံရေးလောကမှ ရာသက်ပန် အပယ်ခံရမည့် အခြေအနေရှိနေသည်။

ထိုင်းရွေးကောက်ပွဲ နေရာအချို့တွင် လူထုက မဲပြန်ရေတွက်ရန် တောင်းဆို

Feb 10

အမေရိကန်စစ်တပ်က အိန္ဒိယ သမုဒ္ဒရာအတွင်း ရေနံတင်သင်္ဘောတစ်စီးကို သိမ်းဆည်း သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၀ ရက်။ အမေရိကန်စစ်တပ်သည် ပိတ်ဆို့အရေးယူခံထားရသည့် ဗင်နီဇွဲလားရေနံတင်သင်္ဘော "Aquila II" ကို ကာရစ်ဘီယံပင်လယ်မှ အိန္ဒိယသမုဒ္ဒရာအထိ မိုင်ပေါင်းထောင်ချီ ခြေရာခံလိုက်လံပြီးနောက် စီးနင်းသိမ်းပိုက်လိုက်သည်။ ၎င်းသင်္ဘောသည် အမေရိကန်၏ ပိတ်ဆို့မှုစည်းကမ်းကို ဖောက်ဖျက်၍ ထွက်ပြေးခဲ့ခြင်းဖြစ်သည်။ ပြီးခဲ့သည့် ဒီဇင်ဘာလအတွင်းက ဗင်နီဇွဲလားသမ္မတ နိကိုးလပ်စ် မာဒူရိုအား နေအိမ်တွင် ဝင်ရောက်ဖမ်းဆီးခဲ့ပြီးနောက် အမေရိကန်သည် ဗင်နီဇွဲလား၏ ရေနံတင်ပို့မှုများကို တင်းကျပ်စွာ ပိတ်ဆို့ခဲ့သည်။ အမေရိကန်သည် ဗင်နီဇွဲလား ရေနံများအား တရုတ်နှင့် ကျူးဘားနိုင်ငံများသို့ မရောက်ရှိစေရန် အထူး ကြပ်မတ် ပိတ်ဆို့ထားသည်။ ယခုသိမ်းဆည်းရမိသည့် သင်္ဘောသည် တစ်နှစ်အတွင်း ၇ စီးမြောက် သိမ်းဆည်းသည့် သင်္ဘောဖြစ်သည်။ အမေရိကန်၏ ပိတ်ဆို့မှုများကြောင့် ဗင်နီဇွဲလား၏ ရေနံတင်ပို့မှုသည် ဇန်နဝါရီလအတွင်း၌ ထက်ဝက်နီးပါးအထိ ကျဆင်းသွားခဲ့သည်။

အမေရိကန်စစ်တပ်က အိန္ဒိယ သမုဒ္ဒရာအတွင်း ရေနံတင်သင်္ဘောတစ်စီးကို သိမ်းဆည်း

« Prev 1 … 51 52 53 54 55 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close