NMG Doh – Page 54 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Feb 10

ကျူးဘားနိုင်ငံတွင် လောင်စာဆီပြတ်လပ်မှုကြောင့် လေကြောင်းလိုင်းများ ရပ်နားရ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၀ ရက်။ အမေရိကန်ပြည်ထောင်စု၏ စီးပွားရေးပိတ်ဆို့မှုများကြောင့် ကျူးဘားနိုင်ငံတွင် လောင်စာဆီပြတ်လပ်မှု အကျပ်အတည်း ဆိုးရွားစွာ ဖြစ်ပေါ်နေသဖြင့် နိုင်ငံခြားလေယာဉ်များကို ဆီဖြည့်မပေးနိုင်တော့ကြောင်း ကျူးဘားလေကြောင်းအာဏာပိုင်များက သတိပေးချက် ထုတ်ပြန်ခဲ့သည်။ ၎င်းပြဿနာကြောင့် Air Canada လေကြောင်းလိုင်းသည် ကျူးဘားသို့ ပျံသန်းမှုများကို ရပ်နားခဲ့ပြီး အခြားလေကြောင်းလိုင်းများသည် ဒိုမီနီကန်နိုင်ငံတွင် ဆီဝင်ဖြည့်ပြီးမှသာ ဆက်လက်ပျံသန်းနေရသည်။ အမေရိကန်သမ္မတ ဒေါ်နယ်ထရမ့်သည် ကျူးဘားသို့ ရေနံရောင်းချသည့် နိုင်ငံများကို အခွန်တိုးကောက်မည့် အမိန့်ကို လက်မှတ်ရေးထိုးခဲ့သဖြင့် ဗင်နီဇွဲလားနှင့် မက္ကဆီကိုနိုင်ငံတို့မှ ရေနံရရှိမှု ပြတ်တောက်သွားခဲ့သည်။ လက်ရှိတွင် မြို့တော်ဟာဗားနား၌ ဘတ်စ်ကားလိုင်းများ ရပ်နားထားရပြီး၊ လျှပ်စစ်မီးကိုလည်း တစ်နေ့လျှင် ၁၀ နာရီခန့် ဖြတ်တောက်ထားရသည်။ တစ်နှစ်လျှင် ဒေါ်လာ ၃ ဘီလီယံခန့်ဝင်ငွေရှိသည့် နိုင်ငံ၏ အဓိကကျောရိုးဖြစ်သော ခရီးသွားလုပ်ငန်းမှာလည်း လေကြောင်းခရီးစဉ်များ ဖျက်သိမ်းခံရမှုကြောင့် များစွာထိခိုက်လျက်ရှိသည်။

ကျူးဘားနိုင်ငံတွင် လောင်စာဆီပြတ်လပ်မှုကြောင့် လေကြောင်းလိုင်းများ ရပ်နားရ

Feb 10

ငြိမ်းချမ်းရေး လမ်းလျှောက် သံဃာများ ခရီးဆုံး တိုင်တော့မည် သတင်းနှင့် မီဒီယာ ကွန်ရက်။ ၂၀၂၆ ခုနှစ် ဖေဖော်ဝါရီလ ၁၀ ရက်။ အမေရိကန် ပြည်ထောင်စု တက္ကဆက်ပြည်နယ်၊ ဖော့တ်ဝေါ့သ် (Fort Worth) မြို့က ဗုဒ္ဓဘာသာ ဘုန်းတော်ကြီးတွေဟာ ပြင်းထန်တဲ့ အအေးဒဏ်နှင့် ခြေထောက်တစ်ဖက် ဖြတ်လိုက်ရတဲ့ ဘေးအန္တရာယ်ကို ကြံ့ကြံ့ခံကျော်ဖြတ်ပြီး မိုင်ပေါင်း ၂,၃၀၀ ကျော်ရှည်လျားတဲ့ ငြိမ်းချမ်းရေးခရီးစဉ်ကို အောင်မြင်စွာ အဆုံးသတ်နိုင်ကြတော့မှာ ဖြစ်ပါတယ်။ ငြိမ်းချမ်းရေး၊ မေတ္တာတရားနဲ့ အကြမ်းမဖက်ရေး ရည်ရွယ်ချက်တွေနဲ့ အောက်တိုဘာလက စတင်ခဲ့တဲ့ လမ်းလျှောက် ခရီးစဉ်ဟာ ရက်ပေါင်း ၁၀၈ ရက်မြောက်နေ့မှာ ခရီးဆုံး ဖြစ်တဲ့ ဝါရှင်တန် ဒီစီကို ရောက်လာတော့မှာ ဖြစ်ပါတယ်။ သံဃာတော်တွေဟာ အင်္ဂါနေ့ (ဖေဖော်ဝါရီ ၁၀ ရက်) အမေရိကန် နံနက်ပိုင်းမှာ ဝါရှင်တန်ဒီစီမှာရှိတဲ့ အမေရိကန် တက္ကသိုလ် American University သို့ ဆိုက်ရောက်ကြမှာ ဖြစ်ပါတယ်။ ပြည်နယ် ၁၀ ခုကို ပြင်းထန်ပြီး အအေးဒဏ်ကဲတဲ့ ဆောင်းရာသီအတွင်း ဖြတ်ကျော်လာတုန်းမှာ နိုဝင်ဘာလအတွင်းမှာတော့ ဟူစတန် (Houston) နားက ဒေတွန် (Dayton) မြို့မှာ ကားတိုက်ခံရမှုကြောင့် သံဃာတော်တချို့ ဒဏ်ရာရခဲ့ပါတယ်။ အဲဒီထဲက အရှင်မဟာဒမ် ဖုမ်မာဆန် (Maha Dam Phommasan) ဟာ ဆိုရင် ခြေထောက်တစ်ဖက် ဖြတ်လိုက်ရတဲ့အထိ ဒဏ်ရာပြင်းထန်ခဲ့ပါတယ်။ အရှင် မဟာဒမ်ဟာ ခြေထောက်ဖြတ်လိုက်ရပေမယ့် လက်တွန်း ကုလားထိုင်နဲ့ လိုက်ပါလာပြီး ခရီးဆုံးမှာတော့ ခြေတုကို အမှီပြုပြီး လမ်းလျောက် လိုက်ပါမယ်လို့ ဆိုပါတယ်။ ငြိမ်းချမ်းရေး အတွက် လမ်းလျှောက်ကြတဲ့ သံဃာတွေဟာ ဇန်နဝါရီလကုန်ပိုင်းက ဗာဂျီးနီးယားပြည်နယ်မှာ ဆီးနှင်းမုန်တိုင်းကြောင့် အလွန်အေးတဲ့ ဒဏ်ကို ခံခဲ့ရသလို၊ အဖွဲ့နဲ့အတူပါလာတဲ့ "အာလောက" ခွေးလေးဟာလည်း ခွဲစိတ်ကုသမှု ခံယူခဲ့ရပါသေးတယ်။ ခွေးကလေး အာလောက ဟာ လမ်းတလျောက် သံဃာတွေနဲ့ အတူ လိုက်ပါခဲ့ပြီး လူထု ပရိဿတ်တွေရဲ့ အထူး စိတ်ဝင်စားမှုကို ခံခဲ့ရပါတယ်။ သံဃာတော်တွေရဲ့ ငြိမ်းချမ်းရေး လမ်းလျှောက်ခရီးစဉ်ကို သန်းနဲ့ချီတဲ့ ပရိဿတ်တွေဟာ လူမှု ကွန်ရက်တွေက စောင့်ကြည့်ခဲ့ကြပြီး Google Maps ကနေတစ်ဆင့် ခရီးစဉ်ကို တိုက်ရိုက် (Live) လိုက်ကြည့်သူတွေလည်း အများအပြား ရှိခဲ့ပါတယ်။ လမ်းခရီးတလျှောက်မှာ ငြိမ်းချမ်းရေး အတွက် တရားဟောခဲ့သလို ဘာသာပေါင်းစုံနဲ့တွေ့ဆုံမှုတွေကိုလည်း လုပ်ခဲ့ပါတယ်။ ဒီခရီးစဉ်ဟာ အလှူငွေအတွက် လုပ်တာမဟုတ်ပဲ ငြိမ်းချမ်းရေး အတွက် အသိတရား တိုးပွားအောင် လှုံ့ဆော်တဲ့ ခရီးစဉ်ဖြစ်တယ်လို့ လည်း သံဃာတော်တွေက မိန့်ပါတယ်။

ငြိမ်းချမ်းရေး လမ်းလျှောက် သံဃာများ ခရီးဆုံး တိုင်တော့မည်

Feb 10

နယူးယောက် ဆရာတော် ဦးဩဘာသ ကျောင်းအပါအဝင် အဆောက်အဦး ၃ ခု မီးလောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၀ ရက်။ အမေရိကန် ပြည်ထောင်စုရှိ အလင်းပါရမီ ဆရာတော် ဦးဩဘာသ သတင်းသုံးရာ ကျောင်းတိုက် အပါအဝင် အဆောက်အဦတချို့ ယမန်နေ့က မီးလောင်ကျွမ်းခဲ့ရာ လူတစ်ဦး သေဆုံးပြီး ကျောင်းတိုက် တစ်ခုလုံး နီးပါး မီးထဲပါသွားခဲ့သည်ဟု အမေရိကန်ရှိ မြန်မာအချို့၏ လူမှု ကွန်ရက် အကောင့်များတွင် ရေးသား ဖော်ပြနေကြသည်။ ဒေသခံ အမေရိကန် သတင်းဌာနများက လူနေအိမ် သုံးလုံး အဆင့် ၄ မီးလောင်ကျွမ်းမှု ဖြစ်ပွားခဲ့ကြောင်း ဖော်ပြပြီး လူ တစ်ဦး သေဆုံးကာ လူအနည်းဆုံး ၉ ဦး ဒဏ်ရာရရှိကြောင်း ဖော်ပြခဲ့သည်။ နယူးယောက်မြို့၊ ကွင်းစ် (Queens) အရပ်ရှိ လူနေအိမ်တစ်လုံးတွင် ဖေဖော်ဝါရီ ၉ ရက် တနင်္လာနေ့ ညနေ ၆:၄၄ နာရီတွင် အဲလ်မ်းဟတ်စ် (Elmhurst) ရပ်ကွက်ရှိ Dongan Avenue ရှိ အဆောက်အအုံတစ်ခု၌ မီးလောင်နေကြောင်း သတင်းရရှိခဲ့သည်ဟု နယူးယောက် မီးသတ်ဌာနက ထုတ်ပြန်သည်။ မီးသည် လျင်မြန်စွာ ကူးစက်သွားခဲ့ပြီး အနီးနားရှိ အဆောက်အအုံ ၃ လုံးကို ဝါးမြိုသွားခဲ့သည်။ ည ၇:၂၂ နာရီတွင် ဒုတိယအမြင့်ဆုံး အရေးပေါ်တုန့်ပြန်မှုအဆင့်ဖြစ်သော "4-alarm" အဆင့်အဖြစ် ကြေညာခဲ့ရသည်။ အသက် ၃၄ နှစ်အရွယ် အမျိုးသမီးတစ်ဦးသည် အခင်းဖြစ်နေရာတွင်ပင် သေဆုံးသွားခဲ့ကြောင်း ရဲတပ်ဖွဲ့က အတည်ပြုသည်။ အသက် ၂၂ နှစ်အရွယ် အမျိုးသားတစ်ဦးသည် စိုးရိမ်ရသည့် အခြေအနေဖြင့် ဆေးရုံတွင် ကုသမှုခံယူနေရသည်။ ကျန်ရှိသော ဒဏ်ရာရရှိသူ ရှစ်ဦးအနက် နှစ်ဦးမှာ မီးသတ်သမားများ ဖြစ်ကြသည်။ မီးလောင်နေစဉ်အတွင်း လူအများအပြားကို လူနာတင်စင်များဖြင့် လူနာတင်ယာဉ်များပေါ်သို့ တင်ဆောင်သွားသည်ကို တွေ့မြင်ခဲ့ကြရသည်။ မီးသတ်ဌာနက ထုတ်ပြန်သော ဓာတ်ပုံများတွင် မီးလျှံများသည် အဆောက်အအုံခေါင်မိုးများမှတစ်ဆင့် ကောင်းကင်ယံအထိ ထိုးတက်နေသည်ကို တွေ့ရသည်။ မီးလောင်ရသည့် အကြောင်းရင်းကိုမူ လက်ရှိအချိန်အထိ တိကျစွာ မသိရသေးဘဲ စုံစမ်းစစ်ဆေးဆဲ ဖြစ်သည်။

နယူးယောက် ဆရာတော် ဦးဩဘာသ ကျောင်းအပါအဝင် အဆောက်အဦး ၃ ခု မီးလောင်

Feb 9

မြောက်ကိုရီးယား၏ (၉) ကြိမ်မြောက် အလုပ်သမားပါတီ ညီလာခံ မကြာမီ ကျင်းပမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ မြောက်ကိုရီးယားနိုင်ငံ၏ အမြင့်ဆုံးမူဝါဒချမှတ်ရာ အလုပ်သမားပါတီ ညီလာခံကို ၅ နှစ်အတွင်း ပထမဆုံးအကြိမ်အဖြစ် ယခုဖေဖော်ဝါရီလနှောင်းပိုင်းတွင် ကျင်းပသွားမည် ဖြစ်သည်။ မြောက်ကိုရီးယား နိုင်ငံသည် ၅ နှစ်တစ်ကြိမ် ကျင်းပသော ကွန်ဂရက်များတွင် နိုင်ငံ၏ နိုင်ငံခြားရေး၊ စီးပွားရေး၊ အုပ်ချုပ်ရေး ဆိုင်ရာ ရှေ့လုပ်ငန်းစဉ်နှင့် မူဝါဒများကို ချမှတ်လေ့ရှိသည်။ လက်ရှိ အထွေထွေအတွင်းရေးမှူးချုပ် ကင်ဂျုံအန်းအား "နိုင်ငံတော်သမ္မတ" ရာထူး ပေးအပ်နိုင်ဖွယ်ရှိကြောင်း ခန့်မှန်းရသည်။ အမေရိကန်နှင့် ဆက်ဆံရေးတွင် နျူကလီးယားဖျက်သိမ်းရေးထက် "ငြိမ်းချမ်းစွာ အတူယှဉ်တွဲနေထိုင်ရေး" လမ်းစဉ်ကို အဆိုပြုလာနိုင်သလို၊ တောင်ကိုရီးယားနှင့် ပတ်သက်၍လည်း ပေါင်းစည်းရေး သို့မဟုတ် ရန်ဘက်နိုင်ငံအဖြစ် ဆက်လက်ရပ်တည်ရေးတို့ကို ပြတ်သားစွာ ချမှတ်လာဖွယ်ရှိသည်။ စစ်ရေး အရမူ နျူကလီးယားလက်နက်နှင့် စစ်လက်နက်ပစ္စည်းများ အဆင့်မြှင့်တင်ရေးအတွက် အဆင့်မြင့် စီမံကိန်းအသစ်များကို အတည်ပြုနိုင်ကြောင်း ပညာရှင်များက သုံးသပ်ထားကြသည်။

မြောက်ကိုရီးယား၏ (၉) ကြိမ်မြောက် အလုပ်သမားပါတီ ညီလာခံ မကြာမီ ကျင်းပမည်

Feb 9

အမေရိကန်နှင့် အိန္ဒိယနိုင်ငံတို့၏ ကြားဖြတ်ကုန်သွယ်ရေး သဘောတူညီချက်ကြေညာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ အမေရိကန်နှင့် အိန္ဒိယနိုင်ငံတို့အကြား လွတ်လပ်သော ကုန်သွယ်ရေး သဘောတူညီချက် (FTA) မရရှိမီ စပ်ကြားတွင် အပြန်အလှန် အကျိုးစီးပွားအတွက် အကောင်အထည်ဖော်မည့် ကြားဖြတ်ကုန်သွယ်ရေး သဘောတူညီချက် (Interim Trade Agreement) ကို ဖေဖော်ဝါရီလ ၆ ရက်နေ့တွင် အိမ်ဖြူတော်က ထုတ်ပြန်ခဲ့သည်။ အမေရိကန်မှ တင်သွင်းသည့် စက်မှုကုန်ပစ္စည်းများနှင့် စိုက်ပျိုးရေးထွက်ကုန်များ (ဝိုင်၊ အခွံမာသီး၊ ပဲဆီ စသည်) အပေါ် အခွန်များကို အိန္ဒိယဘက်မှ လျှော့ချ သို့မဟုတ် ပယ်ဖျက်ပေးမည် ဖြစ်သည်။ ထို့အပြင် ဆေးဘက်ဆိုင်ရာနှင့် နည်းပညာပစ္စည်းများအပေါ် ကန့်သတ်ထားသော လိုင်စင်လုပ်ထုံးလုပ်နည်းများကိုလည်း ဖြေလျှော့ပေးမည်ဖြစ်သည်။ အိန္ဒိယ၏ အဓိကပို့ကုန်များဖြစ်သော ဆေးဝါး၊ ကျောက်မျက်ရတနာနှင့် လေယာဉ်အစိတ်အပိုင်းများအပေါ် အခွန်များကို အမေရိကန်ဘက်မှ ပြန်လည်ဖယ်ရှားပေးမည်ဖြစ်ပြီး၊ သံမဏိနှင့် အလူမီနီယမ် အခွန်အချို့ကိုလည်း လျှော့ချပေးမည် ဖြစ်သည်။ အိန္ဒိယသည် လာမည့် ၅ နှစ်အတွင်း အမေရိကန်ထံမှ ဒေါ်လာ ၅၀၀ ဘီလီယံဖိုးရှိသော စွမ်းအင်၊ လေယာဉ်နှင့် နည်းပညာပစ္စည်းများကို ဝယ်ယူရန် ကတိပြုခဲ့သည်။ ဤသဘောတူညီချက်ကြောင့် အိန္ဒိယနိုင်ငံသည် ဒေသတွင်း၌ အရေးပါသော ကုန်ထုတ်လုပ်မှု ဗဟိုချက်မအဖြစ် ပြောင်းလဲလာနိုင်ကြောင်း ပညာရှင်များက ခန့်မှန်းထားကြသည်။

အမေရိကန်နှင့် အိန္ဒိယနိုင်ငံတို့၏ ကြားဖြတ်ကုန်သွယ်ရေး သဘောတူညီချက်ကြေညာ

Feb 9

ရွေးကောက်ပွဲရလဒ်များကြောင့် ထိုင်းနှင့် ဂျပန် စတော့ဈေးကွက်များ ထိုးတက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ ထိုင်းနှင့် ဂျပန်နိုင်ငံတို့တွင် ကျင်းပခဲ့သော ရွေးကောက်ပွဲများ၌ အာဏာရပါတီများ အပြတ်အသတ် အနိုင်ရရှိခဲ့ခြင်းကြောင့် ရင်းနှီးမြှုပ်နှံသူများအကြား ယုံကြည်မှု မြင့်တက်လာပြီး စတော့ဈေးကွက်များ သိသိသာသာ ထိုးတက်သွားခဲ့သည်။ ++ ထိုင်းနိုင်ငံအခြေအနေ +++ ထိုင်းအထွေထွေရွေးကောက်ပွဲတွင် အိမ်စောင့်အစိုးရအဖွဲ့၌ အဓိကပါဝင်သည့် ဘူမ်ဂျိုင်ထိုင်း (Bhumjaithai) ပါတီက အပြတ်အသတ် အနိုင်ရရှိခဲ့သည်။ ထိုသို့ နိုင်ငံရေးအရ တည်ငြိမ်မှုရှိမည်ဟု အာမခံချက်ရရှိသွားခြင်းကြောင့် တနင်္လာနေ့နံနက်ပိုင်းတွင် ထိုင်းရှယ်ယာဈေးကွက် အညွှန်းကိန်း (SET Index) သည် ၃ ရာခိုင်နှုန်းကျော် (၄၀.၇၄ ပွိုင့်) အထိ မြင့်တက်သွားခဲ့သည်။ အကျိုးအမြတ် အများဆုံးရရှိခဲ့သော ကုမ္ပဏီများမှာ ထိုင်းလေဆိပ်လုပ်ငန်း (AOT)၊ Delta Electronics၊ Krungthai Bank (KTB)၊ PTT ရေနံကုမ္ပဏီနှင့် CPALL တို့ဖြစ်ပြီး၊ အထူးသဖြင့် AOT ၏ ရှယ်ယာဈေးနှုန်းမှာ ၁၀.၈၅ ရာခိုင်နှုန်းအထိ စံချိန်တင် မြင့်တက်ခဲ့သည်။ +++ ဂျပန်နိုင်ငံအခြေအနေ +++ ဂျပန်နိုင်ငံတွင်လည်း ဝန်ကြီးချုပ် စနာအဲ တာကာအီချီ ဦးဆောင်သည့် LDP ပါတီသည် အောက်လွှတ်တော် အမတ်နေရာ ၄၆၅ နေရာအနက် ၃၁၆ နေရာအထိ အနိုင်ရရှိကာ သမိုင်းဝင် အောင်ပွဲခံခဲ့သည်။ ၎င်းသည် ၁၉၄၇ ခုနှစ်နောက်ပိုင်း ဂျပန်နိုင်ငံရေးသမိုင်းတွင် တစ်ပါတီတည်းက လွှတ်တော်၏ သုံးပုံနှစ်ပုံကို ပထမဆုံးအကြိမ် ထိန်းချုပ်နိုင်ခြင်း ဖြစ်သည်။ ရလဒ်အနေဖြင့် ဂျပန် Nikkei အညွှန်းကိန်းသည် ၅ ရာခိုင်နှုန်းကျော် ခုန်တက်သွားပြီး သမိုင်းတစ်လျှောက် ပထမဆုံးအကြိမ်အဖြစ် ၅၇,၀၀၀ ပွိုင့်ကို ကျော်ဖြတ်သွားခဲ့သည်။ ဝန်ကြီးချုပ် တာကာအီချီအနေဖြင့် လက်ရှိအစိုးရအဖွဲ့ကို ဆက်လက်ထိန်းသိမ်းကာ ထိုးစစ်ဆင်သည့် ဘဏ္ဍာရေးမူဝါဒများဖြင့် စီးပွားရေးကို မြှင့်တင်သွားမည်ဟု ပြောကြားခဲ့သည်။

ရွေးကောက်ပွဲရလဒ်များကြောင့် ထိုင်းနှင့် ဂျပန် စတော့ဈေးကွက်များ ထိုးတက်

Feb 9

ကြံ့ခိုင်ရေး နိုင်သော်လည်း ရွေးကောက်ပွဲ တရားဝင်မှုမရှိဟု ဝေဖန်ခံရ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ စစ်ကော်မရှင်က ကျင်းပသည့် အထွေထွေ ရွေးကောက်ပွဲ အပိုင်း ၃ ပိုင်း အပြီးတွင် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ (USDP) က လွှတ်တော် နေရာအများစု အနိုင်ရသော်လည်း ရွေးကောက်မှာ တရားမျှတမှု မရှိကြောင်းနှင့် တရားဝင်မှု မရှိကြောင်း သတင်းအယ်ဒီတာများက ထောက်ပြသည်။ စစ်ကော်မရှင်က ကျင်းပခဲ့သည့် အထွေထွေရွေးကောက်ပွဲ အပိုင်း ၃ ပိုင်းပေါင်းတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) က အမတ်နေရာအားလုံး၏ ၇၂ ရာခိုင်နှုန်းကို အပြတ်အသတ် အနိုင်ရရှိခဲ့ကြောင်း Data for Myanmar (D4M) ၏ ဖေဖော်ဝါရီ ၈ ရက်ထုတ် အစီရင်ခံစာတွင် ဖော်ပြထားသည်။ အစီရင်ခံစာအရ လွှတ်တော်သုံးရပ်အတွက် ရွေးကောက်တင်မြှောက်ခဲ့သည့် ကိုယ်စားလှယ် ၁,၀၂၅ ဦးအနက် ကြံ့ခိုင်ရေးပါတီက ၇၃၉ ဦးအထိ အနိုင်ရရှိခဲ့ခြင်းဖြစ်သည်။ သံလွင်တိုမ်း သတင်းဌာနက အယ်ဒီတာချုပ် ကိုကိုဇော်က “နေရာတိုင်းမှာ ကြိုတင်မဲနဲ့ အနိုင်ယူတဲ့အပြင်ကို တစ်ဦးချင်းကို ခြိမ်းခြောက်မှုတွေနဲ့ မဲပေးခိုင်းတဲ့ အခြေအနေ မျိုးတွေ ရှိခဲ့တယ်” ဟု ပြောသည်။ စစ်ကော်မရှင်ဘက်က မြို့နယ် ၆၁ မြို့နယ်၌ မဲပေးသူ ၅၆ ရာခိုင်နှုန်းကျော်ရှိခဲ့သည်ဟု ထုတ်ပြန်ထားသော်လည်း မြေပြင်တွင်မူ ပဋိပက္ခပေါင်းစုံနှင့် ရင်ဆိုင်ခဲ့ရသည်။ ကန္တာရဝတီတိုင်း (မ်) သတင်းဌာနက သတင်းအယ်ဒီတာ နော်ဒွေးအယ်ခူ က “ဒီရွေးကောက်ပွဲကို စိတ်အားထက် သန်စွာနဲ့ လူထုကနေ မဲပေးခဲ့တယ် ဆိုတဲ့ ပုံစံမျိုးနဲ့ လူထုတွေက သွားတာတော့ မဟုတ်ဘူးပေါ့နော်။ ဖြစ်လာ မယ့် အကျိုးဆက်တွေကို လူထုတွေက စိုးရိမ်ကြောက်လန့်နေရာတာပေါ့နော်။ ဒီဒေသခံတစ်ယောက်နဲ့ ချိက် ဆက်မှု အရဆိုရင် မဲသွားပေးတယ်ပေါ့နော် သွားတဲ့အချိန်မှာ လူအများကြီးပေါ့နော်။ ဒီလောက်များ မယ်လို့ မထင်ဘူးပေါ့နော် သူက အဲ့လိုမျိုးပြောတယ်” ဟု လွိုင်ကော်မြို့က အခြေအနေကို ပြောပြသည်။ နော်ဒွေးအယ်ခူက “နောက် ဘာလို့ ကိုယ်တိုင်ကလည်း မဲ သွားပေးရလဲဆိုရင် အခုနကပြောသလို ဖိအားပေးမှု တွေ ကြောက်တယ်။ လူထုတွေက မဲရုံမှာ မြန်မြန်မဲသွားပေးပြီးရင် ပြီးသွားပြီပေါ့နော်။ ခနနေ နေမြင့်လို့မှ လက်နက်ကြီးတွေ ကျလာမလား ဒီလိုမျိုးတွေပေါ့နော်။ တော်လှန်ရေးဘက်ကလည်း သတိပေးမှုတွေ ရှိတယ် နော်။ အဲ့လိုပြောကြတယ်” ဟု ဆက်ပြောသည်။ ရွေးကောက်ပွဲ ကျင်းပချိန်အတွင်း ဗုံးပေါက်ကွဲမှုနှင့် ပစ်ခတ်မှုဖြစ်စဉ်ပေါင်း ၁၁၀ ကျော် ရှိခဲ့ပြီး မဲရုံများနှင့် ရွေးကောက်ပွဲရုံးများ ပစ်မှတ်ထား တိုက်ခိုက်ခံခဲ့ရသည်။ ရွေးကောက်ပွဲကို လက်မခံသည့် ပြည်သူများကလည်း ‘အသံတိတ်သပိတ်’ များ ပြုလုပ်ခြင်း၊ မြို့နယ်အသီးသီး၌ ဆန့်ကျင်ဆန္ဒပြခြင်းများဖြင့် ကန့်ကွက်ခဲ့ကြသည်။ အခြားတစ်ဖက်တွင်လည်း ယခုရွေးကောက်ပွဲ၏ နောက်ကွယ်၌ တရုတ်နိုင်ငံ၏ ကြီးမားသော တွန်းအားနှင့် ဖိအားများ ပါဝင်နေကြောင်း တက်ကြွလှုပ်ရှားသူများက ထောက်ပြကြသည်။ အထူးသဖြင့် တရုတ်နိုင်ငံ၏ One Belt One Road (BRI) စီမံကိန်းများနှင့် မြစ်ဆုံရေကာတာ စီမံကိန်းများကို ပြန်လည်အသက်သွင်းရန်အတွက် စစ်ကော်မရှင်အပေါ် ဖိအားပေးခဲ့ခြင်းဖြစ်သည်ဟု ဝေဖန်မှုများ ထွက်ပေါ်နေ ခြင်းဖြစ်သည်။ ကချင်အမျိုးသမီး အစည်းအရုံး-ထိုင်းနိုင်ငံ (KWAT) မှ စည်းရုံးလှုံ့ဆော်ရေးအဖွဲ့ တာဝန်ခံ ဆန်ထွယ်က “စစ်ကော်မရှင်ရဲ့ ရွေးကောက်ပွဲကို ကြည့်ရတာတော့ တရုတ်ပြည်က ထုတ်လုပ်တဲ့ ရွေးကောက်ပွဲလို့တောင် ပြောလို့ရတယ်။ ကျွန်မတို့ရဲ့ ကချင်ဒေသ မြစ်ဆုံ Dam ကို ပြန်လုပ်ဖို့ ဖိအားပေးနေတာတွေ၊ လူတွေလွှတ်နေ တာတွေ ရှိတယ်။ ဒါတွေက အလဲအလှယ်လုပ်တဲ့ ပုံစံမျိုး ဖြစ်နေလို့ Made in China Election လို့ ပြောလို့ ရတာပါ” ဟု သုံးသပ်ပြောဆိုထားသည်။ စစ်ကော်မရှင်က ရွေးကောက်ပွဲ အောင်မြင်စွာ ကျင်းပနိုင်ခဲ့သည်ဟု ဆိုနေသော်လည်း မြေပြင်အခြေအနေအရ လုံခြုံရေးစိန်ခေါ်မှုများ၊ လူထု၏ ကန့်ကွက်မှုများနှင့် နိုင်ငံတကာ၏ လက်မခံမှုများကြောင့် ဤရွေးကောက်ပွဲ၏ တရားဝင်မှုမှာ များစွာ မေးခွန်းထုတ်စရာ ဖြစ်နေကြောင်း Data for Myanmar ၏ အစီရင်ခံစာက အကျဉ်းချုပ် ထောက်ပြထားပါသည်။

ကြံ့ခိုင်ရေး နိုင်သော်လည်း ရွေးကောက်ပွဲ တရားဝင်မှုမရှိဟု ဝေဖန်ခံရ

Feb 9

သံတွဲမြို့ကို စစ်ကော်မရှင် လေကြောင်းမှ ဗုံးကြဲ၊ အရပ်သား ၂ ဦး ဒဏ်ရာရပြီး နေအိမ်များ ပျက်စီး   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ အာရက္ခတပ်တော် (AA) ထိန်းချုပ်ထားသည့် ရခိုင်ပြည်၊ သံတွဲမြို့ပေါ်ရှိ လူနေရပ်ကွက်တစ်ခု အတွင်းသို့ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ၂ ဦး ထိခိုက်ဒဏ်ရာရရှိပြီး နေအိမ် ၉ လုံး ပျက်စီးဆုံးရှုံးခဲ့သည်ဟု ဒေသခံများက ပြောသည်။ ဖေဖော်ဝါရီလ ၈ ရက်နေ့၊ နေ့လယ် ၁ နာရီခွဲခန့်တွင် စစ်ကော်မရှင်၏ ဂျက်ဖိုက်တာတစ်စီးသည် သံတွဲမြို့၊ အမှတ် (၃) ရပ်ကွက်အတွင်းသို့ ဗုံးကြဲချခဲ့ခြင်းဖြစ်သည်။ အဆိုပါ တိုက်ခိုက်မှုကြောင့် အသက် ၅၀ ဝန်းကျင်အရွယ်ရှိ ဦးအောင်သန်းလင်းနှင့် ဦးသက်အောင်တို့ ဒဏ်ရာရ ရှိခဲ့ပြီး၊ ဦးသက်အောင်မှာ ဦးခေါင်းတွင် ပြင်းထန်ဒဏ်ရာရရှိခဲ့သဖြင့် အရေးပေါ်ဆေးကုသမှု ခံယူနေရသည်။ သံတွဲမြို့ခံတစ်ဦးက “ဗုံးက ဗိုလ်ချုပ်လမ်းနားက အိမ်တွေပေါ် တည့်တည့်ကျတာ။ အိမ်တွေတော်တော်ကို ပျက်စီးသွားတယ်။ ဒီနေ့က လေယာဉ်နဲ့ပါ ဝဲပြီးပစ်တာဆိုတော့ မြို့ခံတွေလည်း တော်တော်လေးကိုမှ လန့်သွား ကြတယ်။ မြို့ထဲမှာ လူတွေမနေရဲအောင် တမင်တကာ ခြောက်လှန့်နေတဲ့သဘောပဲ” ဟု ပြောသည်။ သံတွဲမြို့နယ်အတွင်းရှိ ငပလီမြို့တွင်လည်း ပြီးခဲ့သည့် ဒီဇင်ဘာလကုန်ပိုင်းက လေကြောင်းတိုက်ခိုက်ခံရမှု ကြောင့် ကလေးငယ်များ အပါအဝင် ၉ ဦး သေဆုံးခဲ့ရပြီး၊ ရာစုနှစ်နှင့်ချီ သက်တမ်းရှိသည့် ရှေးဟောင်း နေအိမ် အချို့လည်း ပျက်စီးဆုံးရှုံးခဲ့ရဖူးသည်။ လက်ရှိတွင် စစ်ကော်မရှင်သည် ရခိုင်ပြည်အတွင်းက လက်လွှတ်လိုက်ရသည့် မြို့ရွာများကို ပြန်လည် သိမ်းပိုက် နိုင်ရန် လေကြောင်း အင်အားသာမက ရေတပ်သင်္ဘောများပေါ်မှပါ လက်နက်ကြီးများဖြင့် မကြာခဏ ပစ်ခတ်နေသည်ဟု ဒေသခံများက ပြောသည်။ သံတွဲဒေသခံတစ်ဦးက “သူတို့က မြေပြင်မှာ စစ်ရှုံးနေတော့ လေယာဉ်နဲ့ရော၊ သင်္ဘောနဲ့ရော ပတ်ရမ်းနေတာ။ ဘယ်အချိန် ဗုံးကျလာမလဲဆိုတာကိုပဲ ထိုင်စောင့်နေရသလို ဖြစ်နေတယ်” ဟု ပြောသည်။ ယခုကဲ့သို့ သံတွဲမြို့ကို ပစ်မှတ်ထား တိုက်ခိုက်နေချိန်မှာပင် စစ်ကော်မရှင်တပ်သည် ရခိုင်ပြည် အတွင်းရှိ အခြား သော မြို့နယ်များကိုလည်း လေကြောင်းနှင့် ရေတပ်အင်အား အသုံးပြုကာ ထိုးစစ်ဆင်ရန် ပြင်ဆင်လျက်ရှိ သည်။  ထို့ကြောင့် ရခိုင်တစ်ပြည်နယ်လုံးရှိ အရပ်သားပြည်သူများ အနေဖြင့် လုံခြုံရေးသတိ အမြဲရှိကြရန် အာရက္ခတပ် တော် (AA) က အထူးသတိပေး နှိုးဆော်ထားသည်။  ဓါတ်ပုံ - Arakan Princess Media

သံတွဲမြို့ကို စစ်ကော်မရှင် လေကြောင်းမှ ဗုံးကြဲ၊ အရပ်သား ၂ ဦး ဒဏ်ရာရပြီး နေအိမ်များ ပျက်စီး  

Feb 9

တအာင်းဒေသတွင် ၃ နှစ်အတွင်း အရပ်သား ၉၀၀ နီးပါး ထိခိုက်နစ်နာဟု TWO ပြော   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ ရှမ်းပြည်မြောက်ပိုင်း၊ တအာင်းဒေသအတွင်း စစ်ကော်မရှင်၏ ရည်ရွယ်ချက်ရှိရှိ ပစ်မှတ်ထား တိုက်ခိုက်မှုများ ကြောင့် အမျိုးသမီးနှင့် ကလေးငယ်များ အပါအဝင် အရပ်သား ၉၀၀ နီးပါး ထိခိုက်နစ်နာခဲ့ရကြောင်း တအာင်း အမျိုးသမီးအဖွဲ့အစည်း (TWO) က ပြောသည်။ ‘လုံခြုံမှု ကင်းမဲ့သော ဘဝများ’ အမည်ရှိ အစီရင်ခံစာတစ်ရပ် ထုတ်ပြန်ကာ သတိပေးပြောဆိုလိုက်ခြင်း ဖြစ်သည်။ ပြီးခဲ့သည့် ၂၀၂၁ ခုနှစ်မှ ၂၀၂၄ ခုနှစ်အထိ ၃ နှစ်တာအတွင်း စစ်ကော်မရှင်တပ်သည် လေကြောင်းမှ ဗုံးကြဲခြင်း၊ လက်နက်ကြီးဖြင့် အဆင်အခြင်မဲ့ ပစ်ခတ်ခြင်း အပါအဝင် လူ့အခွင့်အရေး ချိုးဖောက်မှုပေါင်း ၂၈၀ ကျော် ကျူးလွန်ခဲ့ကြောင်း TWO ၏ မှတ်တမ်းများအရ သိရသည်။ အဆိုပါ ဖြစ်စဉ်များအနက် လက်နက်ကြီးကြောင့် ထိခိုက်ရသူ ၂၆၀ ကျော်နှင့် လေကြောင်းတိုက်ခိုက်မှုကြောင့် ထိခိုက်ရသူ ၂၇၀ ကျော်အထိ ရှိခဲ့သည်။ ကွက်ခိုင်မြို့ခံ အမျိုးသမီးတစ်ဦးက “အာဏာသိမ်းပြီး နောက်ပိုင်း အခြေအနေကို ပြောရမယ်ဆိုရင် ကျမတို့ ရွာထဲကို လက်နက်ကြီးတွေ ကျလာတာက တိုက်ပွဲဖြစ်နေလို့ မဟုတ်ဘူး။ ရည်ရွယ်ချက်ရှိရှိ ပစ်နေတာ။ အိမ်ထဲမှာ ထိုင်နေရင်းနဲ့တင် ဗုံးစထိပြီး သေတဲ့သူသေ၊ ဒဏ်ရာရတဲ့သူရနဲ့။ ကလေးတွေဆိုရင် လေယာဉ်သံ ကြားတာနဲ့တင် တုန်နေကြပြီ။ ဘယ်အချိန် ကိုယ့်အလှည့် ရောက်မလဲဆိုတာပဲ ကြောက်နေရတာ” ဟု ပြောသည်။ စစ်ကော်မရှင်တပ်သည် အရပ်သားများကို လူသားဒိုင်းအဖြစ် အသုံးပြုခြင်း၊ မတရား ဖမ်းဆီးညှဉ်းပန်းခြင်းနှင့် အမျိုးသမီးများအပေါ် လိင်ပိုင်းဆိုင်ရာ အကြမ်းဖက်မှုများကိုပါ စနစ်တကျ ကျူးလွန်နေကြောင်း အစီရင်ခံစာက ထောက်ပြထားသည်။ လက်ရှိတွင် တိုက်ပွဲများကြောင့် တအာင်းဒေသ၌ စစ်ဘေးရှောင်ဦးရေ ၁ သိန်းကျော်အထိ ရှိလာနေပြီး အရေး ပေါ် လူသားချင်းစာနာမှု အကူအညီများ ပြတ်လပ်နေသည့် အခြေအနေဖြစ်ကြောင်း ထောက်ပြထားသည်။ “အခုက စားဖို့သောက်ဖို့ထက် လုံခြုံရေးက အဓိက ဖြစ်နေတာ။ တိုက်ပွဲတွေ ရပ်သွားရင်လည်း လူက အမြဲ စိတ်ခြောက်ခြားနေတာ။ ညဘက်ဆိုလည်း ကောင်းကောင်းမအိပ်ရဘူး။ လေယာဉ်လာမလား၊ လက်နက် ကြီးကျမလားနဲ့။ ဒဏ်ရာရတဲ့သူတွေဆိုလည်း ဆေးကုဖို့က အရမ်းခက်ခဲတယ်။ လမ်းတွေပိတ်ထားတော့ မြို့ပေါ်တက်ဖို့က မလွယ်ဘူး” ဟု မိုးကုတ်မြို့က စစ်ရှောင်တစ်ဦးက ဟု ပြောသည်။ တအာင်းအမျိုးသမီးအဖွဲ့အစည်း (TWO) က နိုင်ငံတကာ အသိုက်အဝန်းအနေဖြင့် စစ်ကော်မရှင်ထံသို့ လေယာဉ် ဆီ တင်ပို့ရောင်းချမှုများကို အမြန်ဆုံး ရပ်တန့်ရန်နှင့် ကျူးလွန်ထားသည့် စစ်ရာဇဝတ်မှုများအတွက် ထိရောက် စွာ အရေးယူပေးရန် အလေးအနက် တောင်းဆိုထားသည်။ ၎င်းတို့၏ အစီရင်ခံစာအရ ပြီးခဲ့သည့် ၃ နှစ်အတွင်း တအာင်းဒေသရှိ အရပ်သားများ၏ ဘဝမှာ လုံခြုံမှု ကင်းမဲ့နေပြီး နိုင်ငံတကာ၏ အရေးယူဆောင်ရွက်မှုမှာ အရေးတကြီး လိုအပ်နေကြောင်း ဖော်ပြထားသည်။

တအာင်းဒေသတွင် ၃ နှစ်အတွင်း အရပ်သား ၉၀၀ နီးပါး ထိခိုက်နစ်နာဟု TWO ပြော  

« Prev 1 … 52 53 54 55 56 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close