NMG Doh – Page 68 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Mar 17

ကုန်သွယ်ခွန်သစ်အပေါ် အမေရိကန်ကို တရုတ် သတိပေး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၇ ရက်။ ပဲရစ်မြို့၌ ပြုလုပ်ခဲ့သော အဆင့်မြင့်ကုန်သွယ်ရေးဆွေးနွေးပွဲအပြီးတွင် အမေရိကန်၏ သွင်းကုန်ခွန်အသစ်များသည် နှစ်နိုင်ငံကုန်သွယ်ရေးကို ထိခိုက်စေနိုင်ကြောင်း တရုတ်နိုင်ငံက သတိပေးလိုက်သည်။ အမေရိကန် အဆင့်မြင့် တရားရုံးကို သမ္မတ ထရန့် အစိုးရ၏ ကုန်သွယ်ခွန်များသည် တရားဝင်မှု မရှိကြောင်း ဆုံးဖြတ်ပြီး ပယ်ချပြီးနောက် သမ္မတ ထရန့်အစိုးရက နိုင်ငံခြားကုန်ထုတ်လုပ်မှုများအား စုံစမ်းစစ်ဆေးနေမှုများအပေါ် တရုတ်ဘက်က စိုးရိမ်ကြောင်း ပြောဆိုခဲ့ခြင်း ဖြစ်သည်။ သို့သော်လည်း ဆွေးနွေးပွဲအတွင်း နှစ်ဦးနှစ်ဖက်စလုံးက အခွန်နှုန်းထားများ တည်ငြိမ်စေရန် ကြိုးပမ်းသွားမည်ဟု သဘောတူညီခဲ့ကြပါသည်။ လာမည့် နှစ်ပတ်အတွင်း ပြုလုပ်ရန် စီစဉ်ထားသော သမ္မတထရန့်၏ တရုတ်နိုင်ငံခရီးစဉ်သည် နောက်ဆုတ်သွားနိုင်ခြေရှိကြောင်း အမေရိကန်ဘက်က ဆိုပါသည်။ အမေရိကန်ဘဏ္ဍာရေးဝန်ကြီး စကော့ ဘဲဆင့် (Scott Bessent) ကမူ ခရီးစဉ်ရွှေ့ဆိုင်းခြင်းမှာ ဖိအားပေးရန်မဟုတ်ဘဲ အီရန်စစ်ပွဲဖြစ်ပွားနေချိန်တွင် သမ္မတအနေဖြင့် ပြည်တွင်း၌သာ ရှိနေသင့်သောကြောင့်ဖြစ်ကြောင်း ရှင်းလင်းခဲ့ပါသည်။ အမေရိကန်သည် ဟော်မုဇ်ရေလက်ကြား ပြန်လည်ဖွင့်လှစ်နိုင်ရေးအတွက် တရုတ်၏ အကူအညီကို လိုအပ်လျက်ရှိနေသည်။ ကုန်သွယ်ရေး စစ်ပွဲများကြောင့် ထိခိုက်ခဲ့သော နှစ်နိုင်ငံဆက်ဆံရေး ကောင်းမွန်အောင် ကြိုးပမ်းနေချိန်သော်လည်း အီရန်စစ်ပွဲကြောင့် နှစ်နိုင်ငံဆက်ဆံရေး ပြန်လည်ကောင်းမွန်လာမည့် ကြိုးပမ်းချက်များမှာ အဟန့်အတားဖြစ်နေရသည်။ #တရုတ်အမေရိကန်ကုန်သွယ်ရေး #ကုန်သွယ်ခွန် #ChinaAmericanTradeWar #Trump #China #American

ကုန်သွယ်ခွန်သစ်အပေါ် အမေရိကန်ကို တရုတ် သတိပေး

Mar 17

အီရန် စစ်ပွဲ အရှိန်မြင့်ဆဲ၊ နေတိုးမဟာမိတ်များက ထရမ့်တောင်းဆိုချက်ကို ပယ်ချ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၇ ရက်။ အမေရိကန်-အစ္စရေးနှင့် အီရန်တို့အကြား ဖြစ်ပွားနေသော စစ်ပွဲသည် ၁၇ ရက်မြောက်နေ့သို့ ရောက်ရှိလာပြီး အီရတ်နိုင်ငံ၊ ဘဂ္ဂဒက်မြို့ရှိ အမေရိကန်သံရုံးသည် ဒရုန်းနှင့် ဒုံးကျည်များဖြင့် အပြင်းအထန် တိုက်ခိုက်ခံခဲ့ရပါသည်။ ဤတိုက်ခိုက်မှုသည် စစ်ပွဲကာလအတွင်း အပြင်းထန်ဆုံးဖြစ်ကြောင်း သိရှိရပါသည်။ အစ္စရေးစစ်တပ်သည် အီရန်မြို့တော် တီဟီရန်အပါအဝင် ရှီရပ်ဇ် (Shiraz) နှင့် တဘရစ်ဇ် (Tabriz) မြို့ကြီးများကို ပြင်းပြင်းထန်ထန် ဗုံးကြဲတိုက်ခိုက်ခဲ့ရာ တီဟီရန်မြို့အတွင်း ပျက်စီးမှုများစွာ ရှိခဲ့ပါသည်။ တစ်ဖက်တွင်လည်း ယူအေအီး (UAE) နိုင်ငံသည် လေကြောင်းအန္တရာယ်ကြောင့် ပိတ်ထားသော လေပိုင်နက်ကို ပြန်လည်ဖွင့်လှစ်လိုက်ပြီဖြစ်ကြောင်း အရပ်ဘက်လေကြောင်းအာဏာပိုင်က ထုတ်ပြန်ခဲ့ပါသည်။ သမ္မတ ဒေါ်နယ်ထရန့်က ဟော်မုဇ်ရေလက်ကြား လုံခြုံရေးအတွက် စစ်သင်္ဘောများစေလွှတ်ရန် မဟာမိတ်များနှင့် တရုတ်နိုင်ငံကို တောင်းဆိုခဲ့သော်လည်း ငြင်းဆိုခြင်း ခံခဲ့ရပါသည်။ ဗြိတိသျှဝန်ကြီးချုပ် ကီယာ စတာမာက ဗြိတိန်အနေဖြင့် စစ်ပွဲတွင် ပါဝင်မည်မဟုတ်ကြောင်း ပြောကြားခဲ့သလို၊ ဂျာမနီအဓိပတိ ဖရက်ဒရစ် မာ့ဇ် (Friedrich Merz) ကလည်း ဤပဋိပက္ခသည် နေတိုး (NATO) နှင့် မသက်ဆိုင်ကြောင်း ဆိုခဲ့ပါသည်။ သို့သော် နေတိုးအဖွဲ့နှင့် မဟာမိတ်များသည် မြေထဲပင်လယ်ဒေသတွင် လုံခြုံရေးတိုးမြှင့်ရန် ပြင်ဆင်နေကြပါသည်။ ၎င်းအပြင် ဗြိတိန်၊ ကနေဒါ၊ ပြင်သစ်၊ ဂျာမနီနှင့် အီတလီခေါင်းဆောင်များက အစ္စရေးအနေဖြင့် လက်ဘနွန်သို့ မြေပြင်ထိုးစစ်မဆင်ရန် ပူးတွဲသတိပေးချက် ထုတ်ပြန်ခဲ့ပါသည်။ မြေပြင်ထိုးစစ်လုပ်ခဲ့မည်ဆိုပါက လူသားချင်းစာနာမှုဆိုင်ရာ ဆိုးရွားသော အကျိုးဆက်များ ဖြစ်လာမည်ဟု ပူးတွဲ ကြေညာချက်တွင် ဖော်ပြထားသည်။ #AmericanIranWar #အီရန်အမေရိကန်စစ်ပွဲ #အီရန်စစ်ပွဲ #NATO #Trump

အီရန် စစ်ပွဲ အရှိန်မြင့်ဆဲ၊ နေတိုးမဟာမိတ်များက ထရမ့်တောင်းဆိုချက်ကို ပယ်ချ

Mar 16

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည် မြောက်ပိုင်း၊ ကွတ်ခိုင်မြို့ရှိ တအာင်းတပ်မတော် (TNLA) စခန်းများကို ကိုးကန့်တပ် (MNDAA) က ဒရုန်းရာချီ အသုံးပြုကာ အင်အားသုံး တိုက်ခိုက်ခဲ့ပြီးနောက် မြို့တစ်ခုလုံးကို အလုံးစုံထိန်းချုပ်လိုက်ပြီဟု ဒေသခံ များနှင့် မြေပြင်သတင်းရင်းမြစ်များက ပြောသည်။ ပြီးခဲ့သည့် မတ်လ ၁၄ ရက်နေ့မှ စတင်ကာ MNDAA ဘက်က ဒရုန်းအစီးရေ ရာနှင့်ချီအသုံးပြု၍ အပြင်းအထန် ထိုးစစ်ဆင်ခဲ့သဖြင့် မတ်လ ၁၅ ရက်နေ့ ညပိုင်းတွင် TNLA တပ်ဖွဲ့ဝင်များ ကွတ်ခိုင်ဗျူဟာကုန်းမှ ဆုတ်ခွာပေးခဲ့ ရခြင်း ဖြစ်သည်။ ကွတ်ခိုင်မြို့အပြင် မူဆယ် ၁၀၅ မိုင်နှင့် နမ့်ဖတ်ကာဘက်ရှိ TNLA စခန်းများကိုလည်း MNDAA က သိမ်းပိုက်ခဲ့ ပြီး တအာင်းအလံများ ဖြုတ်ချခြင်းနှင့် လူရာနှင့်ချီဖမ်းဆီးခြင်းများ လုပ်ဆောင်ခဲ့သည်ဟု ဆိုသည်။ မြေပြင်အခြေအနေနှင့်ပတ်သက်၍ ကွတ်ခိုင်ဒေသခံတစ်ဦးက “ကွတ်ခိုင်ကတော့ ကိုးကန့်လက်အောက် ကျသွား ပြီလို့ ပြောလို့ရတယ်။ မနေ့ညပိုင်းမှာ TNLA ဘက်က ဆုတ်သွားတာ။ ဒီနေ့မနက်မှာတော့ ပစ်ခတ်သံတွေ ငြိမ် နေပြီ၊ မြို့ပေါ်မှာ လူအသွားအလာ နည်းနည်းရှိလာပေမဲ့ မြို့ခံတွေကတော့ တော်တော်လေး စိုးရိမ်နေကြတုန်း ပဲ။ ဘာဖြစ်လာဦးမလဲ မသိရဘူးလေ” ဟု ပြောသည်။ တိုက်ပွဲအတွင်း ဟိုကျန့်ရွာရှိ နေအိမ်တစ်လုံးပေါ်သို့ ဒရုန်းဗုံးကျရောက်ပေါက်ကွဲခဲ့သဖြင့် အမျိုးသမီးတစ်ဦး သေဆုံးခဲ့ရပြီး ဒဏ်ရာရရှိသူများလည်း ရှိခဲ့သည်။ လက်ရှိတွင် ကွတ်ခိုင်၌ သေနတ်သံများ ငြိမ်သက်နေသော်လည်း နမ့်ခမ်းမြို့နယ်ဘက်တွင်မူ MNDAA က အင်အားဖြည့်တင်းကာ တိုက်ပွဲများ ဆက်လက်ဖြစ်ပွားနေဆဲဖြစ်ကြောင်း မြေပြင်သတင်းရင်းမြစ်က ပြောသည်။ ညီနောင်မဟာမိတ် အချင်းချင်းကြား ဖြစ်ပွားနေသည့် ယခုပဋိပက္ခအပေါ် လက်နက်ကိုင် ဖြေရှင်းခြင်း မပြုရန် အရပ်ဘက် အဖွဲ့အစည်းများကလည်း တိုက်တွန်းထားကြသည်။ တအာင်းအရပ်ဘက် အဖွဲ့အစည်းများကွန်ရက်က မတ်လ ၁၆ ရက်နေ့တွင် ထုတ်ပြန်ချက်တစ်စောင် ထုတ်ပြန်ခဲ့ ပြီး မဟာမိတ်အချင်းချင်းကြား စစ်ရေးပဋိပက္ခသည် စစ်အာဏာရှင်အတွက် အခွင့်အလမ်းများ ဖြစ်ပေါ်စေနိုင်ပြီး နွေဦးတော်လှန်ရေးကို စိန်ခေါ်မှုဖြစ်စေသဖြင့် စစ်ရေးကို ချက်ချင်းရပ်တန့်ကာ စားပွဲဝိုင်းတွင် ညှိနှိုင်းဖြေရှင်းကြ ရန် တိုက်တွန်းထားသည်။ ထို့ပြင် အမျိုးသားညီညွတ်ရေး အတိုင်ပင်ခံ ကောင်စီ (NUCC) နှင့် ကျန်းမာရေးအင်အားစု အသီးသီးကလည်း ယခုဖြစ်စဉ်ကို မိတ်ဖက်ပဋိပက္ခအဖြစ် ရှုမြင်ကာ နိုင်ငံရေးအရ ငြိမ်းချမ်းစွာ တွေ့ဆုံဆွေးနွေးကြရန် ပန်ကြားထား ကြသည်။ TNLA ဘက်ကမူ ၎င်းတို့အနေဖြင့် မဟာမိတ်အချင်းချင်းကြား ပြန်လည်ပစ်ခတ်ခြင်းမပြုဘဲ တွေ့ဆုံဆွေးနွေးရေး လမ်းကြောင်းဖြင့်သာ ကြိုးစားအဖြေရှာသွားမည်ဟု ထုတ်ပြန်ထားသည်။ သို့သော် MNDAA ဘက်ကမူ TNLA က ဦးစွာသေနတ်ဖောက်သဖြင့် တိုက်ပွဲစတင်ရခြင်းဖြစ်ကြောင်း မတ်လ ၁၄ ရက်နေ့တွင် ထုတ်ပြန်ထားရာ နှစ်ဖက်တပ်များကြား စစ်ရေးတင်းမာမှုသည် ကွတ်ခိုင်မှ နမ့်ခမ်းမြို့နယ် ဘက်သို့ ဆက်လက် ကူးစက်နေဆဲဖြစ်သည်။ #MNDAA #ကိုးကန့်တပ် #TNLA #တအာင်းတပ် #ကွတ်ခိုင်တိုက်ပွဲ #NUCC #

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ်

Mar 16

ဖားကန့်တွင် အမျိုးသားတစ်ဦး မိုင်းနင်းမိကာ သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ကချင်ပြည်၊ ဖားကန့်မြို့နယ်တွင် ရေမဆေးကျောက် ရှာဖွေသူတစ်ဦးဟု ယူဆရသည့် အမျိုးသား တစ်ဦး မိုင်းနင်းမိကာ သေဆုံးခဲ့ကြောင်း ဒေသခံများက ပြောသည်။ ဖြစ်စဉ်မှာ မတ်လ ၁၅ ရက်နေ့၊ ည ၉ နာရီဝန်းကျင်တွင် ဗလခကျေးရွာရှိ စစ်ကော်မရှင်တပ်များ ထိန်းချုပ် ထားသည့် မောင်ညိုလုပ်ကွက်အနီး၌ ဖြစ်ပွားခဲ့ခြင်းဖြစ်ပြီး၊ မိုင်းပေါက်ကွဲမှုကြောင့် ခန္ဓာကိုယ် အပိုင်းပိုင်း ပြတ်တောက်ကာ သေဆုံးခဲ့ခြင်း ဖြစ်သည်။ ဒေသခံတစ်ဦးက “သူက မြေစာပုံပေါ်မှာ ကျောက်ရှာရင်းနဲ့ မိုင်းနင်းမိတဲ့သဘောလို့ သိရတယ်။ အသေးစိတ် တော့ မသိရဘူး။ မိုင်းနင်းမိပြီးမှ သေဆုံးနေတဲ့သဘောမျိုး ကျနော်တို့ သိရတယ်။ ရေမဆေးကျောက် ရှာဖွေသူ လို့လည်း သိရတယ်။ ကျောက်ရှာဖွေသူ တစ်ဦးလို့ ယူဆရသူပေါ့ဗျာ။ ခန္ဓာကိုယ်အပိုင်းပိုင်းပြတ်ပြီးမှ မိုင်းနင်းမိ သေဆုံးတယ်လို့ အဲ့လိုမျိုး ကျနော်တို့ သိရတာပေါ့။ လက်နက်ကြီး ရမ်းသမ်းပစ်ခတ်တာတွေလည်း နေ့စဉ်လိုလို ရှိတဲ့အခါကျတော့ အတိအကျတော့ မသိရဘူးပေါ့။ ခန္ဓာကိုယ် အပိုင်းပိုင်း ပြတ်နေတာတော့ ဟုတ်တယ်” ဟု ပြောသည်။ ဖားကန့်မြို့နယ်အတွင်း စစ်ရေးတင်းမာမှုများကြောင့် စွန့်ပစ်မြေစာပုံများတွင် ကျောက်ရှာဖွေသူများ မိုင်းနင်းမိ သည့် ဖြစ်စဉ်များ မကြာခဏဖြစ်ပွားလေ့ရှိကြောင်း ဒေသခံများက ပြောသည်။ ယခုဖြစ်စဉ် ဖြစ်ပွားသည့်နေရာမှာ စစ်ကော်မရှင်တပ်များ ထိန်းချုပ်ထားသည့် နေရာအနီးတွင်ဖြစ်ပြီး မည်သည့် အဖွဲ့အစည်းက ထောင်ထားသည့်မိုင်းဖြစ်သည်ကိုမူ အတည်မပြုနိုင်သေးပေ။ ဖားကန့်မြို့နယ်အတွင်းရှိ ကာကွယ်ရေးတပ်ဖွဲ့ဝင်တစ်ဦးက “ဖားကန့်မှာ အဲ့လိုမိုင်းနင်းပြီးမှ သေဆုံးတာတွေ မကြာခဏဖြစ်နေတာပါ။ စစ်ရေးတင်းမာနေတဲ့ အရပ်ဒေသတွေမှာ အသွားအလာ ဂရုစိုက်ကြဖို့ လိုအပ်ပါ တယ်။ မိုင်းဆိုတာကလည်း စစ်ရေးတင်းမာနေတဲ့ ကာလဆိုတော့ ဟိုဘက်ဒီဘက် ထောင်ကြတာကိုး။ အခု တိုက်ပွဲတွေကလည်း မြို့တွေရွာတွေထဲ ဖြစ်ကြတော့ အန္တရာယ်အလွန်ကိုများတဲ့ အခြေအနေပါ။ စစ်ရေးတင်း မာနေကြတဲ့ ဒေသတွေမှာ အသွားအလာ ဂရုစိုက်ကြဖို့ ပြောချင်ပါတယ်” ဟု ပြောသည်။ စစ်ရေးတင်းမာနေသည့် ဖားကန့်မြို့နယ်တွင် နိုင်ငံတစ်ဝန်းမှ ရွှေ့ပြောင်းလာသူများသည် စားဝတ်နေရေး အကျပ်အတည်းကြောင့် ကျောက်စိမ်းကုမ္ပဏီများ၏ စွန့်ပစ်မြေစာပုံများတွင် ရေမဆေးကျောက်ကောက်ကာ အသက်မွေးနေကြရသဖြင့် ယခုကဲ့သို့ မိုင်းအန္တရာယ်နှင့် မကြာခဏ ရင်ဆိုင်နေရခြင်းဖြစ်သည်။ ဗလခကျေးရွာကိုလည်း စစ်ကော်မရှင်က ထိန်းချုပ်စိုးမိုးထားပြီး တိုက်ပွဲများ မကြာခဏဖြစ်ပွားလေ့ရှိသော ကြောင့် အရပ်သားအများစုမှာ ဘေးလွတ်ရာသို့ ရွှေ့ပြောင်းနေထိုင်နေရသည်ဟု ဆိုကြသည်။ Landmine Monitor ၏ ၂၀၂၅ ခုနှစ် အစီရင်ခံစာအရ မြန်မာနိုင်ငံသည် မြေမြှုပ်မိုင်းကြောင့် လူသေဆုံးမှု အများဆုံးနိုင်ငံဖြစ်ကြောင်း ဖော်ပြထားသည်။ #ဖားကန့် #ဗလခကျေးရွာ #မိုင်းအန္တရာယ် #မိုင်းပညာပေး #မြေမြှုပ်မိုင်း #ဖားကန့်တိုက်ပွဲ #စစ်ကော်မရှင်

ဖားကန့်တွင် အမျိုးသားတစ်ဦး မိုင်းနင်းမိကာ သေဆုံး

Mar 16

ရွေးကောက်ပွဲရလဒ် နှင့် NCA လမ်းကြောင်းကို မွန်ဖိုရမ် လက်မခံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ စစ်ကော်မရှင်၏ “အတုအယောင်” ရွေးကောက်ပွဲနှင့် NCA လမ်းကြောင်းကို လက်ခံမည်မဟုတ်ကြောင်း မွန်တော်လှန်ရေးဖိုရမ် ကြေညာလိုက်သည်။ စစ်ကော်မရှင်၏ ရွေးကောက်ပွဲမှတစ်ဆင့် ပေါ်ပေါက်လာမည့် မည်သည့် အုပ်ချုပ်ရေး အဖွဲ့အစည်းကိုမဆို အသိအမှတ်ပြုမည် မဟုတ်သလို၊ NCA စာချုပ်အပေါ် အခြေခံသည့် နိုင်ငံရေးဆွေးနွေးမှုများကိုလည်း လုံးဝလက်ခံမည်မဟုတ်ကြောင်း မွန်တော်လှန်ရေးအင်အားစုများက ပြောဆိုလိုက်သည်။ မွန်ဖိုရမ်ပြောရေးဆိုခွင့်ရှိသူ နိုင်အောင်းရော့က “၂၀၀၈ ဖွဲ့စည်းပုံကိုအခြေခံပြီး ကျင်းပသည့် ၂၀၂၅ အတု အယောင် ရွေးကောက်ပွဲမှ ထွက်လာသည့် မည်သည့် အုပ်ချုပ်ရေးအဖွဲ့ကိုမဆို အသိအမှတ်မပြုပါ။ ၂၀၂၅ အတုအယောင် ရွေးကောက်ပွဲမှ ထွက်လာသည့် ပြည်ထောင်စုနှင့် ပြည်နယ်၏ အုပ်ချုပ်ရေးအဖွဲ့များသည် ၂၀၀၈ ဖွဲ့စည်းပုံကို အသက်သွင်းသူများ ဖြစ်သောကြောင့် နည်းလမ်းပေါင်းစုံဖြင့် အရေးယူ ဆောင်ရွက်သွား မည်” ဟု ပြောသည်။ မွန်ပြည် တည်ဆောက်ရေးဆိုင်ရာ ဘုံသဘောထား ရပ်တည်ချက်တစ်ရပ် ဖော်ထုတ်ရန် ရည်ရွယ်၍ မတ်လ ၉ ရက်နေ့မှ ၁၁ ရက်နေ့အထိ ၃ ရက်ကြာ ပြုလုပ်ခဲ့သည့် ‘မွန်တော်လှန်ရေးဖိုရမ်’ မှတစ်ဆင့် ယခုကဲ့သို့ သဘော ထား ထုတ်ပြန်လိုက်ခြင်း ဖြစ်သည်။ အဆိုပါဖိုရမ်သို့ မွန်ပြည်သစ်ပါတီ (စစ်အာဏာရှင်တိုက်ဖျက်ရေး-NMSP/AD)၊ မွန်ပြည်ဖက်ဒရယ်ကောင်စီ (MSFC)၊ မွန်ပြည်နယ်အတိုင်ပင်ခံကောင်စီ (MSCC)၊ ပြည်ပရောက် မွန်ပူးပေါင်းဆောင်ရွက်ရေးကော်မတီ (OMCC) တို့အပြင် မွန်အရပ်ဘက်အဖွဲ့အစည်းများ၊ သံဃာတော်များနှင့် လေ့လာသူများ စုစုပေါင်း ၇၃ ဦး တက်ရောက်ခဲ့ကြသည်။ ဖိုရမ်၏ ထုတ်ပြန်ချက်တွင် ၂၀၀၈ ဖွဲ့စည်းပုံအခြေခံဥပဒေနှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တို့ကို အခြေခံထားသည့် မည်သည့်နိုင်ငံရေးဆွေးနွေးပွဲကိုမျှ လက်မခံကြောင်း ဖော်ပြထားသည်။ ထို့ပြင် အနာဂတ်နိုင်ငံရေးတွင် စစ်တပ်ပါဝင်မှု လုံးဝမရှိစေရေးနှင့် ဖွဲ့စည်းပုံအခြေခံဥပဒေသစ် ရေးဆွဲသွားမည့် သဘောထားများကိုလည်း ချမှတ်ခဲ့ကြသည်။ ၃ ရက်ကြာ ဆွေးနွေးမှုများအပြီးတွင် ရရှိခဲ့သည့် ဘုံသဘောတူညီချက် ၅ ချက်နှင့် ပတ်သက်၍ နိုင်အောင်းရော့ က “ဘုံသဘောတူညီချက်များကတော့ ဖက်ဒရယ်ဒီမိုကရေစီပြည်ထောင်စုအတွင်း ကိုယ်ပိုင်ပြဌာန်းခွင့် အပြည့် အဝရှိသော မွန်ပြည်ကို တည်ဆောက်သွားမည်။ စစ်အာဏာရှင်စနစ်နှင့် အာဏာရှင်အားလုံး တိုက်ဖျက်ရန်။ ၂၀၀၈ ဖွဲ့စည်းပုံအခြေခံဥပဒေ ဖျက်သိမ်းရန်။ လူမျိုးများအားလုံး တန်းတူညီရေးနှင့် တိုင်းရင်းသား လူမျိုးများ ၏ ကိုယ်ပိုင်ပြဌာန်းခွင့်ကို အပြည့်အဝအာမခံထားသည့် ဖက်ဒရယ်ဒီမိုကရေစီ ပြည်ထောင်စုကို ပြည်နယ်နှင့် ဖက်ဒရယ်ယူနစ်များ အားကောင်းရေးမှ ပြည်ထောင်စုအားကောင်းရေးကို ချဉ်းကပ်သည့်နည်းလမ်းဖြင့် တည်ဆောက်သွားရန်။ အာဏာရှင်စနစ်အားလုံးကို အထောက်အကူပြုသည့် လုပ်ရပ်များအားလုံး တိုက်ဖျက်သွားရန်” ဖြစ်သည်ဟု ပြောသည်။ ထို့ပြင် မွန်တော်လှန်ရေးကာလအတွက် ရည်ရွယ်၍ ‘မွန်ပြည်တော်လှန်ရေး ပဋိညာဉ်’ (Mon State Revolutionary Charter) ကို အင်အားစုအသီးသီး၊ ဥပဒေပညာရှင်များနှင့် ပူးပေါင်းကာ ရေးဆွဲသွားမည်ဟု ဆိုသည်။ နိုင်ငံရေးနှင့် စစ်ရေးဆိုင်ရာ ရှေ့လုပ်ငန်းစဉ်များကို ညှိနှိုင်းဆောင်ရွက်ရန်အတွက် ‘မွန်တော်လှန်ရေးဆိုင်ရာ ပူးပေါင်းဆောင်ရွက်ရေး အလုပ်အဖွဲ့’ ကိုလည်း ဖွဲ့စည်းခဲ့ပြီး မွန်ပြည် အတွင်း စစ်အာဏာရှင်စနစ် တိုက်ဖျက် ရေးကို ပိုမိုအရှိန်မြှင့် လုပ်ဆောင်သွားမည်ဟု ဆိုသည်။ #မွန်တော်လှန်ရေးဖိုရမ် #NMSPAD #MSFC #MSCC #OMCC #NCA #အတုအယောင်ရွေးကောက်ပွဲရလဒ်

ရွေးကောက်ပွဲရလဒ် နှင့် NCA လမ်းကြောင်းကို မွန်ဖိုရမ် လက်မခံ

Mar 16

တာချီလိတ်မှ ထိုင်းနိုင်ငံသို့ ကူးသူများကို ကျပ် ၁၃ သိန်းထိတောင်းခံနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည် အရှေ့ပိုင်း၊ တာချီလိတ်မြို့မှတစ်ဆင့် ထိုင်းနိုင်ငံ၊ မယ်ဆိုင်မြို့သို့ ကူးသန်းသွားလာရာတွင် စစ်ကော်မရှင် လက်အောက်ခံ ဝန်ထမ်းများနှင့် အေးဂျင့်များက VIP Pass ခေါင်းစဉ်ဖြင့် တစ်ဦးလျှင် ငွေကျပ် ၁၃ သိန်း (ထိုင်းဘတ် ၈,၀၀၀ ခန့်) အထိ တောင်းခံနေကြောင်း ခရီးသွားလာသူများက ပြောသည်။ ပြည်ပသို့ ထွက်ခွာမည့်သူများကို စစ်ကော်မရှင် လက်အောက်ခံ လဝက ဝန်ထမ်းများ၊ ရဲတပ်ဖွဲ့ဝင်များနှင့် အေးဂျင့်ကုမ္ပဏီများ ပူးပေါင်းကာ VIP Pass မပါရှိပါက အမျိုးမျိုး အကြောင်းပြချက်ပေး၍ တားဆီးခြင်းများ လုပ်ဆောင်နေခြင်း ဖြစ်သည်။ အဆိုပါ အခက်အခဲမရှိစေရန်အတွက် ခရီးသွားလာသူများမှာ မဖြစ်မနေ ငွေပေးဆောင်နေရသည့် အခြေအနေ ဖြစ်သည်ဟု ဆိုသည်။ ယခုရက်ပိုင်းအတွင်း နယ်စပ်ဖြတ်ကျော်ခဲ့သူတစ်ဦးက “မဖြစ်မနေ ပေးရတာတော့ မဟုတ်ဘူး။ သူတို့ ရစ်ရင် ဒီမှာစီစဉ်ထားသမျှ အလကားဖြစ်မှာစိုးလို့ ပေးရတာ။ တကယ်လည်း ရှေ့မှာတင် လူငယ် ၃ ယောက်။ သူတို့ ရစ်လို့ ထွက်မရတော့ဘူး” ဟု ၎င်းကိုယ်တိုင် ကြုံတွေ့ခဲ့ရသည်ကို ပြောပြသည်။ ထိုသို့ ငွေတောင်းခံရာတွင် ထိုင်းနိုင်ငံသို့ အလည်အပတ်ဗီဇာ၊ အလုပ်ဗီဇာ၊ ပညာရေးနှင့် ပင်စင်ဗီဇာ စသည့် တရားဝင်ဗီဇာကိုင်ဆောင်သူများ အေးဂျင့်များမှတစ်ဆင့် ပေးဆောင်နေရခြင်းဖြစ်သော်လည်း၊ တာချီလိတ် အိမ်ထောင်စုစာရင်းဖြင့် ပြုလုပ်ထားသည့် (စာအုပ်အပြာ) ကိုင်ဆောင်ထားသူများနှင့် နေ့စဉ်သွားလာနေသည့် အခြေခံလုပ်သားများမှာမူ အကျုံးမဝင်ဟု ဆိုကြသည်။ ထို့ပြင် စစ်ကော်မရှင်က အတင်းအကျပ် ပြဌာန်းထားသည့် ပြည်ပအလုပ်အကိုင် အလုပ်သမား သက်သေခံ ကတ်ပြား (OWIC) ကတ် ကိုင်ဆောင်ထားသူများမှာလည်း အဆိုပါ VIP ကြေးကို ပေးဆောင်နေရသဖြင့် နေရပ်ပြန်လာသည့် ရွှေ့ပြောင်းလုပ်သားများအတွက်လည်း ဝန်ထုတ်ဝန်ပိုး ဖြစ်စေသည်ဟု ဆိုကြသည်။ ပွဲစားနှင့် နီးစပ်သူတစ်ဦးက “ရန်ကုန်လမ်းကြောင်းက ဈေးပိုလို့ ဒီဘက်ကို လေယာဉ်နဲ့လာပြီးမှ ဟိုဘက်ကမ်း ပြန်ကူးတာပါ။ တာချီလိတ် လေယာဉ်ခဈေးကြီးတာနဲ့ အတူတူလောက်ပါပဲ” ဟု ပြောသည်။ လက်ရှိတွင် ရန်ကုန်လေဆိပ်မှ ထိုင်းနိုင်ငံသို့ ထွက်ခွာရာတွင်လည်း VIP Pass ကြေးမှာ တစ်ဦးလျှင် ကျပ်သိန်း ၃၀ အထိ ပေါက်ဈေးရှိနေကြောင်း ခရီးသွားအေးဂျင့်အသိုင်းအဝိုင်းက ပြောသည်။ ၂၀၂၄ ခုနှစ်၊ ဖေဖော်ဝါရီလတွင် စစ်မှုထမ်းဥပဒေ ပြဌာန်းပြီးနောက်ပိုင်း မြန်မာနိုင်ငံအတွင်းမှ ပြည်ပသို့ ထွက်ခွာ သည့် လူငယ်ဦးရေ နေ့စဉ်တိုးပွားလျက်ရှိသည်။ ထိုအခြေအနေကို အခွင့်ကောင်းယူကာ စစ်ကော်မရှင် လက်အောက်ခံ Non-CDM ဝန်ထမ်းများက အဂတိ လိုက်စားမှုများ ပေါ်ပေါ်ထင်ထင် လုပ်ဆောင်လာနေခြင်း ဖြစ်သည်ဟု ပြည်သူများအကြား ဝေဖန်ပြောဆိုနေ ကြသည်။ #တာချီလိတ်နယ်စပ်ဂိတ် #ထိုင်းမြန်မာနယ်စပ်ဂိတ် #ပြည်ပထွက်ခွင့် #VIPPass

တာချီလိတ်မှ ထိုင်းနိုင်ငံသို့ ကူးသူများကို ကျပ် ၁၃ သိန်းထိတောင်းခံနေ

Mar 16

ဖယ်ခုံ စစ်ရှောင်များအတွက် တဲများ အရေးပေါ် လိုအပ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည်တောင်ပိုင်း၊ ဖယ်ခုံမြို့နယ်အတွင်း အိမ်ငှားခမပေးနိုင်၍ အိမ်ရှင်များ၏ နှင်ထုတ်ခြင်းကို ခံနေရသည့် ထပ်ဆင့် စစ်ဘေးရှောင်များအတွက် နေထိုင်ရေးစစ်ရှောင်တဲများ အရေးပေါ်လိုအပ်နေသည်ဟု စစ်ရှောင်အရေး ကူညီနေသူများက ပြောသည်။ အဆိုပါ စစ်ဘေးရှောင်များသည် ၂၀၂၅ ခုနှစ်၊ အောက်တိုဘာလနှောင်းပိုင်းတွင် ဖယ်ခုံမြို့နယ်၊ ဘောရန်မြောက် စလုံးကျေးရွာအား စစ်ကော်မရှင်နှင့် ပအိုဝ်းပြည်သူ့စစ် (PNA) တို့ ဝင်ရောက်စီးနင်းခဲ့မှုကြောင့် စတင်ထွက်ပြေး ခဲ့ကြရသူများဖြစ်ပြီး၊ ယခုအခါ စစ်ကြောင်းထိုးမှုများကြောင့် တစ်နေရာမှတစ်နေရာသို့ အဆင့်ဆင့် တိမ်းရှောင် နေကြရခြင်း ဖြစ်သည်။ စစ်ဘေးရှောင်ကူညီရေးအဖွဲ့ဖြစ်သည့် Dove KK မှ တာဝန်ခံ ကိုနိုင်းနိုင်းက “ဘောရန်မြောက်စလုံး ပွဲကတည်း က ရှောင်လာရတာပါ။ စားနပ်ရိက္ခာလည်း လိုအပ်တယ်။ အခုနေရာမှာတော့ သူတို့အတွက် ၆၀ ရာခိုင်နှုန်း လောက် လုံခြုံပါတယ်။ ဓာတ်ဆီအခက်အခဲကြောင့်လည်း သစ်တွေ ဝါးတွေ သယ်ဖို့ ခက်နေပါတယ်” ဟု လက်ရှိ ရင်ဆိုင်နေရသည့် အခြေအနေကို ပြောပြသည်။ လက်ရှိတွင် စစ်ဘေးရှောင်ဦးရေ တိုးပွားလာခြင်း၊ အိမ်ငှားခများ ဈေးကြီးမြင့်လာခြင်းနှင့် ငွေကြေးမတတ်နိုင် သဖြင့် အိမ်ရှင်များက နှင်ထုတ်ခြင်းများ ကြုံတွေ့နေရသည့်အတွက် ကိုယ်ပိုင်စစ်ရှောင်တဲများ အမြန်ဆုံး ဆောက်လုပ်ရန် လိုအပ်နေခြင်းဖြစ်သည်။ တဲတစ်လုံးလျှင် မြန်မာငွေ ၆ သိန်းကျပ်ခန့် ကုန်ကျမည်ဖြစ်ပြီး စုစုပေါင်း တဲအလုံး ၅၁ လုံးအထိ အရေးပေါ် လိုအပ်နေသည်ဟု အကူအညီပေးနေသူများက ပြောသည်။ စစ်ဘေးရှောင်များ၏ ရပ်တည်ရေးနှင့်ပတ်သက်၍လည်း ကိုနိုင်းနိုင်းက “အရမ်း စာနာဖို့ကောင်းတယ်ဗျာ့။ အလုပ်ခေါ်တဲ့သူရှိရင် လုပ်ကြတယ်။ လက်သမားတို့၊ တောင်ယာတို့ပေါ့။ မရှိရင် အလုပ်ကိုင်မရှိဘူးဗျ။ သူတို့ကျွမ်းကျင်တဲ့ ရွာပတ်ဝန်းကျင်မဟုတ်တော့” ဟု ရှင်းပြသည်။ ၎င်းတို့ ယခင်နေထိုင်ခဲ့သည့် ကျေးရွာများတွင် စစ်ကော်မရှင်နှင့် PNA တပ်များက တပ်စွဲထားဆဲဖြစ်သဖြင့် နေရပ်ပြန်ရန်မှာ အချိန်ကာလကြာမြင့်ဦးမည် ဖြစ်ကြောင်း စစ်ရှောင်များက ဆိုသည်။ ထို့ပြင် မတ်လ ၇ ရက်နေ့မှစတင်ကာ ဖယ်ခုံမြို့နယ်၊ မိုးဗြဲမြို့ဘက်သို့ စစ်ကော်မရှင်တပ်များ ထပ်မံ စစ်ကြောင်း ထိုးလာခြင်းကြောင့် အနီးနားရှိ ကျေးရွာသားများမှာလည်း ဘေးလွတ်ရာသို့ ထပ်မံတိမ်းရှောင်နေကြရသည်ဟု ဆိုသည်။ အဆိုပါ စစ်ရှောင်များအတွက် အရေးပေါ်စားနပ်ရိက္ခာနှင့် နေရာထိုင်ခင်းများ လိုအပ်နေသည်ဟု ဆိုကြသည်။ #ဖယ်ခုံစစ်ရှောင် #PNA #PNO #တဲအိမ်

ဖယ်ခုံ စစ်ရှောင်များအတွက် တဲများ အရေးပေါ် လိုအပ်နေ

Mar 16

စစ်ရာဇဝတ်မှုများကို လက်တွေ့ကျကျ တားဆီးပေးရန် နိုင်ငံတကာကို ကရင် အဖွဲ့အစည်းများ တောင်းဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၆ ရက်။ ညောင်လေးပင်တွင် ပြည်သူ ၃၀၀ ကျော် လူသားဒိုင်းအဖြစ် အသုံးချခံရပြီးနောက် စစ်ရာဇဝတ်မှုများကို လက်တွေ့ကျကျ တားဆီးပေးရန် ကရင့်အမျိုးသားအစည်းအရုံး KNU နှင့် ကရင်အရပ်ဘက်အဖွဲ့အစည်းများက နိုင်ငံတကာကို တိုက်တွန်း လိုက်သည်။ မြန်မာနိုင်ငံတစ်ဝန်းတွင် စစ်ကော်မရှင်၏ စစ်ရာဇဝတ်မှုများ နေ့စဉ်နှင့်အမျှ ပိုမိုဆိုးရွားလာနေပြီး ညောင်လေး ပင်ခရိုင်အတွင်း ပြည်သူ ၃၀၀ ကျော်ကို လူသားဒိုင်းအဖြစ် အသုံးပြုကာ သတ်ဖြတ်မှုများ ကျူးလွန်ခဲ့သည့် အပေါ် နိုင်ငံတကာအနေဖြင့် စိုးရိမ်ကြောင်း ထုတ်ပြန်ရုံတင်မကဘဲ လက်တွေ့ကျကျ တားဆီးပေးရန် တိုက်တွန်း လိုက်ခြင်း ဖြစ်သည်။ လက်တွေ့ကျကျ တားဆီးပေးရန် ဆိုသည်မှာ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေလမ်း ကြောင်းများကို အမြန်ဆုံး ဖြတ်တောက်ပေးရန် တောင်းဆိုထားခြင်း ဖြစ်သည်။ ပြီးခဲ့သည့် မတ်လ ၅ ရက်နေ့မှစတင်ကာ ပဲခူးတိုင်း၊ ညောင်လေးပင်မြို့နယ်အတွင်းရှိ ကျေးရွာများကို စစ်ကော်မရှင်၏ တပ်မ ၇၇ စစ်ကြောင်းများက စီးနင်းခဲ့ပြီး ရေတွင်းကုန်း၊ ခရုကုန်းနှင့် ကျောင်းကုန်းရွာတို့မှ ပြည်သူ ၃၀၀ ကျော်ကို လူသားဒိုင်းအဖြစ် ဖမ်းဆီးကာ ရက်ရက်စက်စက် ညှဉ်းပန်းနှိပ်စက်ခဲ့ခြင်းဖြစ်သည်။ အဆိုပါ ဖမ်းဆီးခံပြည်သူများကို ကယ်တင်ရန် KNLA နှင့် PDF ပူးပေါင်းတပ်ဖွဲ့များက အသက်ပေးစစ်ဆင်ရေး ဖော်ဆောင်ခဲ့ရပြီး မတ်လ ၁၁ ရက်နေ့တွင် အားလုံးကို ကယ်ထုတ်နိုင်ခဲ့သော်လည်း စစ်ကော်မရှင်၏ သတ်ဖြတ် မှုကြောင့် ကိုယ်ဝန်ဆောင်မိခင်နှင့် ကလေးငယ်များ အပါအဝင် ပြည်သူ ၄၀ ကျော် သေဆုံးခဲ့ရသည်။ ထို့ပြင် အဆိုပါ စစ်ဆင်ရေးတွင် တော်လှန်ရေးရဲဘော် ၁၁ ဦးလည်း ကျဆုံးခဲ့သည်။ ကရင်လူ့အခွင့်အရေးအဖွဲ့ (KHRG) မှ ပြောရေးဆိုခွင့်ရှိသူ စောအဲလ်ဘတ်က “စစ်ကောင်စီကတော့ ဒီလူ့အခွင့် အရေးတွေကို တန်ဖိုးမထားဘူး။ လုံးဝပြောင်ပြောင်တင်းတင်း ချိုးဖောက်မှုတွေ ကျူးလွန်နေတယ်။ ပြည်သူ လူထုကို သူတို့ရဲ့ အကာအကွယ်သဖွယ် အသုံးပြုတာသည် လည်း crime against humanity ဖြစ်တယ်ပေါ့ နော်။ စစ်ရာဇဝတ်မှုလည်း ပြောလို့ရသလိုမျိုး၊ လူသားမျိုးနွယ်အပေါ် ကျူးလွန်တဲ့ ရာဇဝတ်မှု မြောက်တယ် လို့လည်း ကျနော်တို့ ပြောလို့ရပါတယ်” ဟု ပြောသည်။ အလားတူ ကရင်အမျိုးသားအစည်းအရုံး (KNU) ကလည်း မတ်လ ၁၂ ရက်နေ့တွင် ကြေညာချက်တစ်စောင် ထုတ်ပြန်ခဲ့ပြီး နိုင်ငံတကာအသိုင်းအဝန်းအနေဖြင့် စိုးရိမ်ပူပန်ကြောင်း ကြေညာချက်များ ထုတ်ပြန်နေရုံနှင့် မလုံလောက်တော့ဘဲ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေလမ်းကြောင်းများကို အမြန်ဆုံး ဖြတ်တောက်ပေးရန် တောင်းဆိုထားသည်။ KNU ၏ အချက်အလက်များအရ ၂၀၂၆ ခုနှစ် ဖေဖော်ဝါရီနှင့် မတ်လအတွင်းမှာပင် KNU နယ်မြေကို လေကြောင်းမှ အကြိမ် ၆၀ ကျော် ဗုံးကြဲခဲ့ပြီး အရပ်သား ၅၀ ကျော် သေဆုံးခဲ့ရကြောင်း သိရသည်။ ကရင်ငြိမ်းချမ်းရေး အထောက်အကူပြုကွန်ရက် (KPSN) မှ နော်ချယ်ရီကလည်း “နှောင့်နှေးမှုတွေ ကြန့်ကြာ မှုတွေ ရှိနေတဲ့အပေါ်မှာလည်း အားမရဘူးပေါ့နော်။ ကျမတို့တွေက ရင်ဆိုင်လာရတာ အသက်ပေါင်းတွေနဲ့ ပေးဆပ်ရတာ သေဆုံးတဲ့သူတွေလည်း မနည်းဘူးလေနော်။ ပေးဆပ်ရတာ ဘယ်လိုခေါ်မလဲ ဖွံ့ဖြိုးတိုးတက် နှောင့်နှေးတဲ့ နိုင်ငံမို့လို့ ဂရုမစိုက်တာလား နှောင့်နှေးမှုတွေ ကြန့်ကြာမှုတွေ ဒီလိုမျိုး စာနာပါတယ်၊ နားလည် ပါတယ်။ ဆိုတာလောက်နဲ့ မမြင်ချင်တော့ဘူးလေ။ အမှန်အတိုင်းပြောရင် တစ်ခုခုကို အကောင်အထည် ဖော်စေချင်တယ်” ဟု ပြောသည်။ ထို့ပြင် စစ်ကော်မရှင်၏ အတုအယောင် ရွေးကောက်ပွဲကို အသိအမှတ်မပြုရန်နှင့် လူသားချင်းစာနာမှု အကူအညီများကို စစ်ကော်မရှင်မှတစ်ဆင့် မပေးဘဲ တော်လှန်ရေးအဖွဲ့အစည်းများနှင့် တိုက်ရိုက်ထိတွေ့ ပေးအပ်ရန်လည်း KNU က တိုက်တွန်းထားသည်။ စစ်ကော်မရှင်သည် စစ်မြေပြင်တွင် ရှုံးနိမ့်လေလေ အရပ်သားပြည်သူများ၊ စာသင်ကျောင်းနှင့် ဘုရားကျောင်း များကို ပစ်မှတ်ထားလေလေ ဖြစ်နေသည်ဟု နော်ချယ်ရီက ဆက်လက်ဝေဖန်သည်။ “စစ်တပ်အချင်းချင်း စစ်လက်နက်ကိုင် အချင်းချင်း တိုက်လို့ မနိုင်တဲ့အတွက် ဘာမှ စစ်ဖက်ရေးရာ နားမလည် တဲ့ ပြည်သူလူထုတွေကို သက်သက်မဲ့ပေါ့နော် လူညွှန့်တုံးအောင် အဲဒါက ကျမ အဲလိုပဲ ပြောချင်တယ်။ တော် တော်ယုတ်ညံ့တယ်။ လူလို့တောင် ပြောလို့မရတဲ့ အခြေအနေလေနော်” ဟု ၎င်းက ပြောသည်။ အာဆီယံနှင့် နိုင်ငံတကာ အသိုင်းအဝန်းအနေဖြင့် စစ်ကော်မရှင်ကို သံတမန်အခင်းအကျင်းတွင် ဆက်လက် နေရာပေးနေခြင်းသည် စစ်ရာဇဝတ်မှုများကို ပိုမိုအားပေးရာရောက်နေကြောင်း KNU က သတိပေးထားသည်။ အလားတူ စကားလုံးများထက် ထိရောက်သည့် အရေးယူဆောင်ရွက်မှုများကသာ ပြည်သူများ၏အသက်ကို ကယ်တင်နိုင်မည်ဖြစ်ကြောင်း ထုတ်ပြန်ချက်တွင် ဖော်ပြထားသည်။ #စစ်ရာဇဝတ်မှု #crimeagainsthumanity #KNU #KPSN #KHRG #စစ်ကော်မရှင်

စစ်ရာဇဝတ်မှုများကို လက်တွေ့ကျကျ တားဆီးပေးရန် နိုင်ငံတကာကို ကရင် အဖွဲ့အစည်းများ တောင်းဆို

Mar 16

အီရန်အပေါ် တိုက်ခိုက်မှု တိုးမြှင့်၊ အီရန်က အမေရိကန်စခန်းများကို လက်တုံ့ပြန် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၆ ရက်။ အမေရိကန်နှင့် အစ္စရေးတို့၏ အီရန်နိုင်ငံအပေါ် စစ်ရေးအရ တိုက်ခိုက်မှုသည် ၁၆ ရက်မြောက်နေ့သို့ ရောက်ရှိလာပြီး နှစ်ဖက်စလုံးတွင် ထိခိုက်ပျက်စီးမှုများ ပိုမိုပြင်းထန်လာနေသည်။ အီရန်နိုင်ငံ၏ နျူကလီးယားသုတေသနနှင့် လက်နက်ထုတ်လုပ်ရေး ဗဟိုချက်ဖြစ်သော အစ္စဖာဟန် (Isfahan) မြို့အား မတ်လ ၁၅ ရက် တနင်္ဂနွေနေ့က ဒုံးကျည်နှင့် ဒရုန်းများဖြင့် တိုက်ခိုက်ခဲ့ရာ အနည်းဆုံး လူ ၁၅ ဦး သေဆုံးပြီး သုတေသနဌာနနှင့် စက်ရုံများစွာ ပြင်းထန်စွာ ပျက်စီးခဲ့သည်ဟု အမေရိကန်က ထုတ်ပြန်သည်။ ထို့ပြင် အီရန်၏ အဓိက ရေနံတင်ပို့ရာ အချက်အချာဖြစ်သည့် ခါ့ဂ် (Kharg) ကျွန်းကိုလည်း အမေရိကန်နှင့် အစ္စရေးတို့က ခရုစ်ဒုံးကျည်များဖြင့် မတ်လ ၁၃ ရက် သောကြာနေ့က ပစ်ခတ်တိုက်ခိုက်ခဲ့သည်။ အီရန်အစိုးရ၏ ထုတ်ပြန်ချက်အရ ဖေဖော်ဝါရီ ၂၈ ရက် စစ်ပွဲစတင်ချိန်မှ ယနေ့အထိ အီရန်နိုင်ငံသား ၁၄၀၀ ကျော် သေဆုံးခဲ့ပြီး နေအိမ်ပေါင်း ၁၀၀၀၀ ကျော် ပျက်စီးခဲ့သည်။ အီရန်တော်လှန်ရေး အစောင့်တပ်ဖွဲ့ (IRGC) ကလည်း လက်တုံ့ပြန်သည့်အနေဖြင့် အစ္စရေးနိုင်ငံအလယ်ပိုင်းသို့ ဒုံးကျည်များဖြင့် ပစ်ခတ်ခဲ့ရာ အစ္စရေးနိုင်ငံသား ၁၀၀ ကျော် ဒဏ်ရာရရှိခဲ့သည်။ ယခုအခါ အစ္စရေးဘက်တွင် ဒုံးခွင်းဒုံးများ ပြတ်လပ်မှုနှင့် ရင်ဆိုင်နေရသည်။ ထို့ပြင် ယူအေအီး၊ ဘာရိန်းနှင့် ကူဝိတ်နိုင်ငံများရှိ အမေရိကန်စစ်စခန်းများကိုလည်း အီရန်ဘက်က "၅၀ ကြိမ်မြောက် ထိုးစစ်" အဖြစ် တိုက်ခိုက်ခဲ့ရာ ထိခိုက်သေဆုံးမှုများ ရှိခဲ့ပြီး လေကြောင်းကာကွယ်ရေး စနစ်များဖြင့် ကြားဖြတ် တားဆီး ခဲ့ကြရသည်။ လက်ရှိတွင် အီရန်က ဟော်မုဇ်ရေလက်ကြား (Strait of Hormuz) ကို အနီးကပ် ထိန်းချုပ်ထားသည်။ လက်ဘနွန်တွင်လည်း အစ္စရေး၏ တိုက်ခိုက်မှုကြောင့် သေဆုံးသူ ၈၀၀ ကျော်နှင့် အိုးမဲ့အိမ်မဲ့ဖြစ်သူ ၈ သိန်းကျော်အထိ ရှိလာပြီဖြစ်သည်။ အီရတ်နိုင်ငံအတွင်း လုံခြုံရေးအခြေအနေ ဆိုးရွားလာမှုကြောင့် အမေရိကန်နိုင်ငံသားများ ချက်ချင်းထွက်ခွာရန် အမေရိကန်သံရုံးက သတိပေးချက် ထုတ်ပြန်ထားသည်။ #အမေရိကန် #အီရန်စစ်ပွဲ #အမေရိကန်တပ်စခန်းများ

အီရန်အပေါ် တိုက်ခိုက်မှု တိုးမြှင့်၊ အီရန်က အမေရိကန်စခန်းများကို လက်တုံ့ပြန်

« Prev 1 … 66 67 68 69 70 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close