NMG Doh – Page 79 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Feb 25

ဂျာမန်ဝန်ကြီးချုပ် တရုတ်နိုင်ငံ ခရီးစဉ်အတွင်း စီးပွား ကူးသန်းရေးနှင့် ယူကရိန်းစစ်ပွဲ ကိစ္စ ဆွေးနွေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၅ ရက်။ ဂျာမနီနိုင်ငံ၏ ဝန်ကြီးချုပ်သစ် ဖရက်ဒရစ် မာ့ဇ် (Friedrich Merz) သည် ရာထူးတက်လာပြီးနောက် ၎င်း၏ ပထမဆုံး တရုတ်နိုင်ငံခရီးစဉ်အဖြစ် ဘေဂျင်းမြို့သို့ ရောက်ရှိနေသည်။ ဝန်ကြီးချုပ်နှင့်အတူ Volkswagen၊ BMW နှင့် Siemens ကဲ့သို့သော ကုမ္ပဏီကြီး ၃၀ မှ အမှုဆောင်အရာရှိချုပ်များလည်း လိုက်ပါသွားကြသည်။ မာ့ဇ်က ယူကရိန်းစစ်ပွဲ ရပ်ဆိုင်းရန်အတွက် တရုတ်နိုင်ငံတွင် ဩဇာအရှိဆုံးဖြစ်ကြောင်းနှင့် သမ္မတ ရှီကျင့်ဖျင်ကသာ ရုရှားကို ဖိအားပေးမည်ဆိုပါက စစ်ပွဲသည် ချက်ချင်းရပ်တန့်သွားနိုင်ကြောင်း ပြောကြားခဲ့သည်။ စစ်ပွဲအရေး ဆွေးနွေးမှုများရှိသော်လည်း ဂျာမန်စီးပွားရေးလုပ်ငန်းရှင်များက တရုတ်ဈေးကွက်တွင် ဆက်လက်ရင်းနှီးမြှုပ်နှံရန် ဆန္ဒရှိနေကြသည်။ တရုတ်ဘက်ကမူ ဂျာမန်ဝန်ကြီးချုပ်ကို လှိုက်လှဲစွာ ကြိုဆိုခဲ့ပြီး၊ စစ်ပွဲအရေးကို နိုင်ငံရေးအရ ဖြည်းဖြည်းချင်း ဖြေရှင်းသွားရန်နှင့် နှစ်နိုင်ငံ စီးပွားရေးပူးပေါင်းဆောင်ရွက်မှုမှတစ်ဆင့် ကမ္ဘာ့တည်ငြိမ်ရေးကို တည်ဆောက်သွားရန် တုံ့ပြန်ခဲ့သည်။ #ဂျာအနီဝန်ကြီးချုပ် #တရုတ်ခရီးစဉ် #ယူကရိန်းစစ်ပွဲရပ်စဲရေး

ဂျာမန်ဝန်ကြီးချုပ် တရုတ်နိုင်ငံ ခရီးစဉ်အတွင်း စီးပွား ကူးသန်းရေးနှင့် ယူကရိန်းစစ်ပွဲ ကိစ္စ ဆွေးနွေး

Feb 25

ထိုင်း ဝန်ကြီးချုပ်ဟောင်း သက်ဆင် ခံဝန်ဖြင့် လွတ်မြောက်ခွင့်ရမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီ ၂၅ ရက်။ ယခုအခါ Klong Prem ဗဟိုအကျဉ်းထောင်တွင် ပြစ်ဒဏ်ကျခံနေရသော ထိုင်းဝန်ကြီးချုပ်ဟောင်း သက်ဆင် ရှင်နာဝပ်သည် ၂၀၂၆ ခုနှစ်၊ မေလ ၉ ရက်နေ့တွင် ခံဝန်ဖြင့် လွတ်မြောက်ခွင့် ရရှိတော့မည်ဖြစ်သည်။ အကျင့်ပျက်ခြစားမှုဖြင့် ချမှတ်ခံထားရသော ထောင်ဒဏ် (၁) နှစ်အနက် (၈) လ ကျခံပြီးနောက် ခံဝန်ဖြင့် လွတ်မြောက်ခွင့် ရမည်ဟု ထိုင်း ပြုပြင်ရေး ဌာန (အကျဉ်းဦးစီးဌာန) က ပြောကြားလိုက်သည်။ လက်ကျန် ရက် အနည်းငယ်သာ ကျန်ရှိခြင်းကြောင့် အီလက်ထရွန်နစ် ခြေချင်းဝတ် (EM bracelet) တပ်ဆင်ရန်လည်း မလိုအပ်ဟု ဆိုသည်။ မေလ ၉ ရက်နေ့သည် စနေနေ့ဖြစ်သော်လည်း အကျဉ်းသားအခွင့်အရေးအရ နံနက် ၇ နာရီမှ ၈ နာရီအတွင်း လွှတ်ပေးရမည်ဖြစ်သည်။ ပြစ်ဒဏ်၏ သုံးပုံနှစ်ပုံ (၈ လ) ကို ကျခံပြီးဖြစ်သောကြောင့် ခံဝန်လျှောက်ထားနိုင်သည့် စည်းကမ်းနှင့် ကိုက်ညီနေခြင်းဖြစ်သည်။ ကျန်ရှိနေသည့် ပြစ်ဒဏ်ကာလ တိုတောင်းသောကြောင့် ခြေချင်းဝတ် တပ်ဆင်ရန် မလိုသော်လည်း ခံဝန်ကြီးကြပ်ရေးဌာနသို့ သတ်မှတ်ထားသည့် ရက်ချိန်းများအတိုင်း သွားရောက် သတင်းပို့ရမည်ဖြစ်သည်။ အကျဉ်းထောင် တာဝန်ရှိသူများ၏ ပြောကြားချက်အရ သက်ဆင်သည် ပြစ်ဒဏ်ကာလ အပြည့်အဝ စေ့သွားသည့်အခါတွင် အကျဉ်းထောင်မှ လွတ်မြောက်ကြောင်း သက်သေခံလက်မှတ်ကို ရရှိမည်ဖြစ်သည်။ သက်ဆင်၏ ထောက်ခံသူများဖြင့် ဖွဲ့စည်းထားသော Pheu Thai ပါတီသည် နောက်ဆုံးကျင်းပသော ရွေးကောက်ပွဲတွင် တတိယ နေရာက အနိုင်ရရှိခဲ့ပြီး နေရာ အများဆုံးရရှိသော ဖွမ်ဂျိုင်ထိုင်းပါတီနှင့် ညွန့်ပေါင်း အစိုးရ ဖွဲ့ရန် သဘောတူညီချက် ရရှိထားပြီး ဖြစ်သည်။ #ထိုင်းဝန်ကြီးချုပ်ဟောင်းသက်ဆင် #PheuThaiParty

ထိုင်း ဝန်ကြီးချုပ်ဟောင်း သက်ဆင် ခံဝန်ဖြင့် လွတ်မြောက်ခွင့်ရမည်

Feb 24

ကမ္ဘောဒီးယားက အမေရိကန်မှ ဒေါ်လာ ၃.၂၄ ဘီလီယံတန်ဖိုးရှိ လေယာဉ်ဝယ်ယူမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ကမ္ဘောဒီးယားဝန်ကြီးချုပ် ဟွန်မာနက် (Hun Manet) ၏ အမေရိကန်ခရီးစဉ်အတွင်း Air Cambodia လေကြောင်းလိုင်းအတွက် Boeing 737 MAX လေယာဉ် အစီး ၂၀ ဝယ်ယူရန် သဘောတူညီချက် ရရှိခဲ့သည်။ ဒေါ်လာ ၃.၂၄ ဘီလီယံ တန်ဖိုးရှိသော ဤအရောင်းအဝယ်သည် နှစ်နိုင်ငံစီးပွားရေး ဆက်ဆံရေးတွင် အရေးပါသော မှတ်တိုင်တစ်ခု ဖြစ်လာခဲ့ကြောင်း ဖေဖော်ဝါရီလ ၂၀ ရက်နေ့တွင် ထုတ်ပြန်ခဲ့သည်။ ဤစီမံကိန်းသည် အမေရိကန်နိုင်ငံတွင် အလုပ်အကိုင်ပေါင်း ၁၂,၀၀၀ ကျော် ဖန်တီးပေးနိုင်မည်ဖြစ်ပြီး ကမ္ဘောဒီးယားနိုင်ငံအတွက်မူ လေကြောင်းကဏ္ဍ ခေတ်မီလာစေရန်နှင့် ခရီးသွားလုပ်ငန်း၊ ကုန်သွယ်ရေးကဏ္ဍများ ဖွံ့ဖြိုးတိုးတက်စေရန် အထောက်အကူပြုမည်ဟု ခမာတိုင်းမ် သတင်းစာ က ဆိုသည်။ ၂၀၂၅ ခုနှစ်အတွင်း နှစ်နိုင်ငံကုန်သွယ်မှု ၂၉ ရာခိုင်နှုန်း တိုးတက်လာခဲ့ခြင်းနှင့်အတူ ကမ္ဘောဒီးယားပို့ကုန်များအပေါ် အမေရိကန်က အခွန်နှုန်းထား ၁၉ ရာခိုင်နှုန်းခန့် သတ်မှတ်ပေးရန်လည်း ယခုခရီးစဉ်အတွင်း ညှိနှိုင်းနိုင်ခဲ့ကြသည်။ #ကမ္ဘောဒီးယား #Boeing737MAX # ကမ္ဘောဒီးယားဝန်ကြီးချုပ်ဟွန်မာနက် #HunManet

ကမ္ဘောဒီးယားက အမေရိကန်မှ ဒေါ်လာ ၃.၂၄ ဘီလီယံတန်ဖိုးရှိ လေယာဉ်ဝယ်ယူမည်

Feb 24

သမ္မတထရမ့်၏ အခွန်မူဝါဒကြောင့် ကမ္ဘာ့ကုန်သွယ်ရေး မရေမရာ ဖြစ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ အမေရိကန်သမ္မတ ဒေါ်နယ်ထရမ့်၏ "အမေရိကန် ပထမ" (America First) မူဝါဒနှင့် အမေရိကန်တရားစီရင်ရေးစနစ်တို့အကြား ဖြစ်ပွားလာသည့် ပဋိပက္ခသည် ကမ္ဘာ့ကုန်သွယ်ရေးလောကတွင် မရေရာမှုများကို ဖြစ်ပေါ်စေလျက် ရှိသည်။ သမ္မတထရမ့်က နိုင်ငံခြားသွင်းကုန်များအပေါ် အခွန်တိုးမြှင့်ရန် ကြိုးပမ်းမှုကို အမေရိကန်တရားရုံးချုပ်က ပယ်ချလိုက်သော်လည်း၊ ၎င်းက ဥပဒေဟောင်းတစ်ခုကို အသုံးပြု၍ ၁၅ ရာခိုင်နှုန်း အခွန်သစ် ထပ်မံတိုးကောက်မည်ဟု တုံ့ပြန်လိုက်ခြင်းကြောင့် နိုင်ငံတကာတွင် ဝေဖန်မှုများ ထွက်ပေါ်လာခဲ့သည်။ တရုတ်နိုင်ငံ စီးပွားကူးသန်းဝန်ကြီးဌာနက ဤလုပ်ရပ်သည် WTO စည်းမျဉ်းများကို ချိုးဖောက်ခြင်းဖြစ်ကြောင်း ပြစ်တင်ရှုတ်ချခဲ့ပြီး တူညီသော တုံ့ပြန်မှုများ ပြုလုပ်သွားမည်ဟု သတိပေးခဲ့သည်။ ဥရောပသမဂ္ဂ (EU) ကလည်း တရားရုံး၏ ဆုံးဖြတ်ချက်ကို ကြိုဆိုသော်လည်း ထရမ့်၏ အခွန်သစ်ခြိမ်းခြောက်မှုအတွက် တန်ပြန်ကောက်ခံမည့် စာရင်းများကို ပြင်ဆင်ထားကြောင်း အသိပေးထားသည်။ ဂျပန်အစိုးရက ဤသို့အခွန်တိုးမြှင့်မှုများသည် ကမ္ဘာ့စီးပွားရေး ပြန်လည်ဦးမော့လာမှုကို အဟန့်အတားဖြစ်စေနိုင်ကြောင်း ထောက်ပြခဲ့သည်။ အိန္ဒိယနိုင်ငံကမူ အခြေအနေအရပ်ရပ်ကို စောင့်ကြည့်ရန်အတွက် ဝါရှင်တန်သို့ သွားရောက်မည့် ကုန်သွယ်ရေးကိုယ်စားလှယ်အဖွဲ့၏ ခရီးစဉ်ကို ခေတ္တဆိုင်းငံ့လိုက်သည်။ #အမေရိကန် #ကုန်သွယ်ခွန် #ကုန်သွယ်ရေး # သမ္မတထရမ့်အခွန်မူဝါဒ

သမ္မတထရမ့်၏ အခွန်မူဝါဒကြောင့် ကမ္ဘာ့ကုန်သွယ်ရေး မရေမရာ ဖြစ်နေ

Feb 24

အီရန် တက္ကသိုလ်ကျောင်းသားများအကြား ဆန္ဒပြပွဲများ ပြန်လည် ကျယ်ပြန့်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ အီရန်အစိုးရက ရာသီဥတု အေးမြမှုကို အကြောင်းပြ၍ ဇန်နဝါရီလဆန်းမှစတင်ကာ ပိတ်ထားခဲ့သော တက္ကသိုလ်များကို စနေနေ့တွင် ပြန်လည်ဖွင့်လှစ်လိုက်ပြီးနောက် ကျောင်းသားထု၏ အစိုးရဆန့်ကျင်ရေး လှုပ်ရှားမှုများ တစ်ကျော့ပြန် ပြင်းထန်လာခဲ့သည်။ ဤဆန္ဒပြပွဲများသည် ဇန်နဝါရီလအတွင်းက အစိုးရ၏ အကြမ်းဖက်နှိမ်နင်းမှုများနောက်ပိုင်း ပထမဆုံးအကြိမ် ပေါ်ပေါက်လာသည့် အကြီးစားလှုပ်ရှားမှုများ ဖြစ်သည်။ မြို့တော်တီဟီရန်ရှိ အမျိုးသမီးသီးသန့် Al-Zahra တက္ကသိုလ် အပါအဝင် အဓိကမြို့ကြီးများတွင် ကျောင်းသားများက လက်ရှိ အစ္စလာမ္မစ်သမ္မတနိုင်ငံတော်အလံကို မီးရှို့ဖျက်ဆီးကြသလို၊ ၁၉၇၉ တော်လှန်ရေးမတိုင်မီ သျှားဘုရင် လက်ထက်က အသုံးပြုခဲ့သော "ခြင်္သေ့နှင့် နေမင်း" ပါ အလံများကို ကိုင်ဆောင်၍ ဆန္ဒပြခဲ့ကြသည်။ ထို့အပြင် ၂၀၂၂ ခုနှစ်ကတည်းက စတင်ခဲ့သော "အမျိုးသမီး၊ ဘဝ၊ လွတ်လပ်မှု" (Woman, Life, Freedom) ဟူသော ကြွေးကြော်သံများလည်း ပြန်လည်ထွက်ပေါ်လာခဲ့သည်။ တက္ကသိုလ်ဝင်းအတွင်း ဆန္ဒပြကျောင်းသားများနှင့် အစိုးရကျောထောက်နောက်ခံပြု Basij လက်နက်ကိုင်များအကြား ထိပ်တိုက်တွေ့ဆုံမှုများ ရှိနေသည်။ တစ်ဖက်တွင်လည်း အစိုးရလိုလားသည့် ကျောင်းသားအုပ်စုများက အမေရိကန်နှင့် အစ္စရေးအလံများကို မီးရှို့ကာ တန်ပြန်ဆန္ဒပြမှုများ ပြုလုပ်ခဲ့ကြသည်။ #အီရန်ဆန္ဒပြပွဲ #အီရန်တက္ကသိုလ်ကျောင်းသား

အီရန် တက္ကသိုလ်ကျောင်းသားများအကြား ဆန္ဒပြပွဲများ ပြန်လည် ကျယ်ပြန့်လာ

Feb 24

ဖိလစ်ပိုင်သမ္မတဟောင်း ဒူတာတေးအား ICC တွင် စတင်စစ်ဆေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ဖိလစ်ပိုင်သမ္မတဟောင်း ရိုဒရီဂို ဒူတာတေး (Rodrigo Duterte) ၏ သမ္မတသက်တမ်းအတွင်း ကျင့်သုံးခဲ့သော မူးယစ်ဆေးဝါး တိုက်ဖျက်ရေးစီမံချက်နှင့် ပတ်သက်၍ လူသားမျိုးနွယ်အပေါ် ကျူးလွန်သည့် ရာဇဝတ်မှုများ ရှိ၊ မရှိကို နယ်သာလန်နိုင်ငံ၊ သည်ဟိဂ်မြို့ရှိ အပြည်ပြည်ဆိုင်ရာ ရာဇဝတ်တရားရုံး (ICC) က စတင်စစ်ဆေးလျက် ရှိသည်။ စွပ်စွဲချက်များအရ ဒူတာတေးသည် ၂၀၁၆ ခုနှစ်မှ ၂၀၂၂ ခုနှစ်အတွင်း မူးယစ်ဆေးဝါး ရောင်းဝယ်ဖောက်ကားသူများနှင့် အသုံးပြုသူများကို တရားဥပဒေမဲ့ သတ်ဖြတ်ရန် အမိန့်ပေးခဲ့သဖြင့် လူပေါင်း ၃၀,၀၀၀ ခန့် သေဆုံးခဲ့ရသည်ဟု ဆိုသည်။ အဆိုပါသေဆုံးသူများထဲတွင် ကလေးသူငယ်များပင် ပါဝင်ခဲ့ကြောင်း လူ့အခွင့်အရေးအဖွဲ့များက ထောက်ပြထားသည်။ လက်ရှိတွင် အသက် ၈၀ အရွယ်ရှိပြီဖြစ်သော သမ္မတဟောင်း ဒူတာတေးသည် နယ်သာလန်နိုင်ငံရှိ အကျဉ်းထောင်တွင် ဖမ်းဆီးထိန်းသိမ်းခံထားရသည်မှာ တစ်နှစ်နီးပါး ရှိပြီဖြစ်သော်လည်း ၎င်းကမူ ပြစ်မှုကျူးလွန်ခြင်းမရှိကြောင်းနှင့် ICC ၏ စီရင်ပိုင်ခွင့်ကို အသိအမှတ်မပြုကြောင်း ငြင်းဆိုထားသည်။ ဖေဖော်ဝါရီလ ၂၃ ရက်နေ့မှစ၍ လေးရက်ကြာ ကျင်းပမည့် ဤကြားနာပွဲအပြီး ရက်ပေါင်း ၆၀ အတွင်း အထောက်အထား ခိုင်လုံမှု ရှိ၊ မရှိကို တရားသူကြီးများက ဆုံးဖြတ်မည် ဖြစ်သည်။ အကယ်၍ အထောက်အထား ခိုင်လုံပါက ဒူတာတေးသည် ICC တွင် ပထမဆုံးအကြိမ် တရားစွဲဆိုခြင်းခံရသည့် အာရှနိုင်ငံခေါင်းဆောင်ဟောင်း တစ်ဦး ဖြစ်လာမည် ဖြစ်သည်။ #ICC #ဒူတာတေး #Dutarta

ဖိလစ်ပိုင်သမ္မတဟောင်း ဒူတာတေးအား ICC တွင် စတင်စစ်ဆေး

Feb 24

တနင်္သာရီတိုင်းတွင် ဇန္နဝါရီလ အတွင်း နေအိမ် ၂၅၀ ကျော် မီးရှို့ဖျက်ဆီးခံရဟု သုတေသနအဖွဲ့ ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ တနင်္သာရီတိုင်းတွင် တစ်လအတွင်း နေအိမ် ၂၅၀ ကျော် မီးရှို့ဖျက်ဆီးခံခဲ့ရပြီး စစ်ဘေးရှောင် ၈ သောင်းကျော် အတွက် ရိက္ခာနှင့် ဆေးဝါးပြတ်လပ်မှု ကြုံတွေ့နေရသည်ဟု အကူအညီပေးနေသူများက ပြောသည်။ တနင်္သာရီတိုင်းအတွင်းရှိ ကျေးရွာများကို စစ်ကော်မရှင်တပ်က စစ်ကြောင်းထိုးဝင်ရောက်ကာ မီးရှို့ဖျက်ဆီးသည့် ဗျူဟာကို အရှိန်မြှင့်ကျင့်သုံးလာခြင်းကြောင့် ဇန်နဝါရီလတစ်လအတွင်း ဒေသခံနေအိမ် ၂၅၀ ကျော် ပြာကျခဲ့ရသည်။ ထို့အပြင် စစ်ဘေးရှောင်ဦးရေ ၈ သောင်းကျော်အထိ မြင့်တက်လာကြောင်း ဒေသတွင်း သုတေသနအဖွဲ့တစ်ခု ဖြစ်သည့် FE5Tanintaryi က ထုတ်ပြန်လိုက်သည်။ မြိတ်ခရိုင်အတွင်းရှိ ကျွန်းစု၊ တနင်္သာရီနှင့် ပုလောမြို့နယ်တို့သည် အများဆုံး မီးရှို့ဖျက်ဆီးခံခဲ့ရသည့် ဒေသများဖြစ်ပြီး၊ ၂၀၂၅ ခုနှစ် စက်တင်ဘာလမှ ယခု ဖေဖော်ဝါရီလဆန်းပိုင်းအထိ ခြောက်လတာကာလအတွင်း တိုင်းတစ်တိုင်းလုံးတွင် နေအိမ် ၈၀၀ ဝန်းကျင် မီးလောင်ပျက်စီးခဲ့ရသည်ဟု FE5 Tanintharyi က ဆိုသည်။ FE5Tanintaryi ၏ အယ်ဒီတာတစ်ဦးက လက်ရှိမြေပြင်အခြေအနေနှင့် ပတ်သက် ယခုကဲ့သို့ ပြောသည်။ “နေအိမ်မီးရှို့ခံရတဲ့ ပြည်သူတွေက စားရေးသောက်ရေးအပြင် နေထိုင်ရေးအတွက်ပါ အခက်တွေ့နေကြတဲ့ အနေအထား ရှိတယ်။ အဓိကကတော့ စစ်ကောင်စီတပ်က သူတို့ စစ်ကြောင်းတွေ၊ စခန်းတွေ တိုက်ခိုက်ခံရ တိုင်း အနီးနားက ကျေးရွာကို ပိုပြီး မီးရှို့တဲ့ ဗျူဟာကို ကျင့်သုံးလာတာပါ။” စစ်ကော်မရှင်တပ်သည် ဒေသခံလူထုအကြား အကြောက်တရားဖြစ်စေရန်နှင့် တော်လှန်ရေးအင်အားစုများ အပေါ် ထောက်ပံ့မှုအားနည်းသွားစေရန် ရည်ရွယ်၍ နေအိမ်များကို မီးရှို့နေခြင်းဖြစ်ကြောင်း၊ စစ်ကြောင်းထိုး လာစဉ် ရွာသားများကို ခေါ်ယူ၍ ‘တိုက်ခိုက်ခံရပါက ရွာကို မီးရှို့မည်’ ဟု ပေါ်ပေါ်တင်တင် ခြိမ်းခြောက်လေ့ရှိ သည်ဟု ဆိုသည်။ “တော်လှန်ရေးတပ်တွေကြောင့်မို့လို့ ရွာတွေကို မီးရှို့ရတာ ဆိုတဲ့ ဇာတ်ညွှန်းကို သူတို့က ပိုပြီးတော့ အကောင် အထည် ဖော်လာတာမျိုး တွေ့ရတယ်” ဟု အဆိုပါ အယ်ဒီတာက ဆက်ပြောသည်။ မီးရှို့ဖျက်ဆီးမှုများအပြင် အရပ်သားများကို လူသားဒိုင်းအဖြစ် ဖမ်းဆီးခြင်း၊ နေအိမ်ပစ္စည်းများ ဖောက်ထွင်း ခိုးယူခြင်းနှင့် လက်နက်ကြီး၊ ရေကြောင်းပစ်ခတ်မှုများကြောင့် ဇန်နဝါရီလအတွင်း နေရပ်စွန့်ခွာထွက်ပြေးရသူ အနည်းဆုံး ၈၅,၀၀၀ ခန့်အထိ ရှိလာခဲ့သည်။ ၎င်းတို့အနက် ထောင်ဂဏန်းခန့်သာ စစ်ဘေးရှောင်စခန်းများတွင် ခိုလှုံနိုင်ပြီး အများစုမှာ တောတောင်နှင့် ဥယျာဉ်ခြံများအတွင်း ဆိုးရွားစွာ နေထိုင်နေကြရသည်။ လက်ရှိ စစ်ဘေးရှောင်များ၏ ကျန်းမာရေးအခြေအနေနှင့် ပတ်သက်၍လည်း FE5Tanintaryi အယ်ဒီတာက ယခုကဲ့သို့ သတိပေးထားသည်။ “စစ်ဘေးရှောင်တွေမှာ အရေပြားရောဂါနဲ့ ငှက်ဖျားရောဂါ အဖြစ်များနေတဲ့အတွက် ဆေးဝါးလိုအပ်ချက်က အရမ်းမြင့်မားနေတယ်။ တိုက်ပွဲတွေ ငြိမ်တဲ့အချိန် ရွာထဲ ခဏပြန်ဝင်လိုက်၊ စစ်ကြောင်းလာရင် ပြန်ပြေးလိုက် နဲ့ စားနပ်ရိက္ခာ လိုအပ်ချက်ကလည်း အရမ်းများနေတာ သတိပြုမိတယ်။” ဇန်နဝါရီလအတွင်း စစ်ကော်မရှင်က ပြုလုပ်ခဲ့သည့် ရွေးကောက်ပွဲ အပိုင်း (၂) နှင့် (၃) ကာလများအတွင်း တိုက်ပွဲပေါင်း ၅၈ ကြိမ်ထက်မနည်း ဖြစ်ပွားခဲ့ပြီး စစ်တပ်ဘက်က ဒရုန်းဖြင့် ဗုံးချတိုက်ခိုက်မှုများ ပိုမိုလုပ် ဆောင်လာသည်။ ရှေ့လျှောက်တွင် တိုက်ပွဲများ ပိုမိုပြင်းထန်လာနိုင်ပြီး အလှူရှင်နည်းပါးလာခြင်းကြောင့် စစ်ဘေးရှောင်ကူညီရေး အဖွဲ့များမှာ ရှိနေသည့် လူဦးရေကိုပင် လုံလောက်စွာ မထောက်ပံ့နိုင်သည့် စိန်ခေါ်မှုကြီးနှင့် ရင်ဆိုင်နေရကြောင်း မြေပြင်ရှိ သတင်းရင်းမြစ်များက ပြောသည်။    ဓာတ်ပုံ - The Tanintharyi Times (ပုံဟောင်း) #တနင်္သာရီတိုင်း #နေအိမ်မီးရှို့ #စစ်ကော်မရှင် #FE5Tanintaryi #ပုလောမြို့နယ် #မြိတ်ခရိုင်

တနင်္သာရီတိုင်းတွင် ဇန္နဝါရီလ အတွင်း နေအိမ် ၂၅၀ ကျော် မီးရှို့ဖျက်ဆီးခံရဟု သုတေသနအဖွဲ့ ဆို

Feb 24

ဗုံးသီးဟောင်း တစ်လုံးကို စမ်းသပ်စစ်ဆေးရာမှ ဒီးမော့ဆို ဒေသခံ ကာကွယ်ရေး တပ်ဖွဲ့ဝင် ၂ ဦး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ကရင်နီပြည်၊ ဒီးမော့ဆိုမြို့နယ် အနောက်ဘက်ခြမ်း တစ်နေရာတွင် မပေါက်ကွဲသေးသည့် လက်နက်ကြီး ဗုံးသီးဟောင်းတစ်လုံးကို စမ်းသပ်စစ်ဆေးရာမှ ပေါက်ကွဲမှုဖြစ်ပွားပြီး ဒေသခံကာကွယ်ရေးတပ်ဖွဲ့ဝင် ၂ ဦး သေဆုံးကာ ၁ ဦး ပြင်းထန်ဒဏ်ရာရရှိခဲ့သည်။ ဖြစ်စဉ်မှာ ပြီးခဲ့သည့် ဖေဖော်ဝါရီလ ၂၂ ရက် နံနက် ၈ နာရီခန့်တွင် ဒီးမော့ဆိုမြို့နယ် အနောက်ဘက်ခြမ်းရှိ တဲအိမ်တစ်လုံး၌ ဖြစ်ပွားခဲ့ခြင်းဖြစ်သည်။ စစ်ကော်မရှင်တပ်မှ ပစ်ခတ်ထားသော်လည်း မပေါက်ကွဲဘဲ ကျန်ရှိနေသည့် ၆၀ မမ လက်နက်ကြီးကျည်အား ဒေသခံကာကွယ်ရေးတပ်ဖွဲ့ဝင် ၃ ဦးက ပြန်လည်အသုံးပြုရန်ရည်ရွယ်၍ စနက်တံဖြုတ်ကြည့်ရာမှ ပေါက်ကွဲမှု ဖြစ်ပွားခဲ့ခြင်းဖြစ်သည်။ ဒေသတွင်း ခိုလှုံနေထိုင်သည့် စစ်ဘေးရှောင်တစ်ဦးက “ဗုံးသီးက ရှိနေတာ တော်တော်ကြာပြီ။ ဘယ်ကတည်း က ကျထားတာလည်း မသိဘူး။ သူတို့ကလည်း တွေ့တော့ အဟောင်းဆိုပြီး ထင်တာ။ ပြန်သုံးလို့လည်းရအောင် ဖြုတ်ကြည့်မယ်ဆိုပြီး ဖြုတ်လိုက်တာနဲ့ ထကွဲတယ် ပြောတယ်။ ဒဏ်ရာရထားတဲ့တစ်ယောက် အပြောပေါ့။ သူတို့ အသံကြားတာနဲ့ ချက်ချင်းသွားတာပဲ။ ဟိုရောက်တော့ တစ်ယောက်က သေနေပြီ” ဟု ပြောသည်။ ပေါက်ကွဲမှုအတွင်း အသက် ၃၀ ဝန်းကျင်အရွယ်ရှိ အမျိုးသား ၂ ဦး သေဆုံးခဲ့ရပြီး၊ ကျန်ရှိသည့်တစ်ဦးမှာမူ ခြေထောက်တွင် ပြင်းထန်ဒဏ်ရာများ ရရှိခဲ့သဖြင့် အရေးပေါ် ကုသပေးနေရကြောင်း စစ်ရှောင်များက ပြော သည်။ ၎င်း၏ ဒဏ်ရာမှာ စိုးရိမ်ရသည့်အခြေအနေရှိနေပြီး အခြေအနေ ပိုမိုဆိုးရွားလာပါက ခြေထောက်ဖြတ်ပစ်ရမည့် အခြေအနေတွင် ရှိနေသည်ဟု နီးစပ်သူများက ပြောဆိုသည်။ နီးစပ်သည့် ကာကွယ်ရေးတပ်ဖွဲ့ဝင်တစ်ဦးက “တစ်ယောက်က ပွဲချင်းပြီးတယ်။ နောက်တစ်ယောက်က ဆေးရုံ မှာ ဆုံးတာ။ ရောက်တာနဲ့ ဘာမှမကြာလိုက်ဘူး။ ဒဏ်ရာပြင်းလို့လား မသိဘူး။ ကုတင်ပေါ်ရောက်တာနဲ့ အသက်ထွက်တာပဲ။ ဘာမှတောင် သူမပြောနိုင်တော့ဘူး” ဟု ပြောသည်။ လက်ရှိတွင် ဒီးမော့ဆိုမြို့နယ်၏ ၉၀ ရာခိုင်နှုန်းခန့်ကို ကရင်နီတော်လှန်ရေး ပူးပေါင်းတပ်ဖွဲ့များက ထိန်းချုပ်ထား သော်လည်း မြို့ပေါ်နေရာအချို့တွင် စစ်ကော်မရှင်တပ်၏ ခလရ ၄၂၇ နှင့် ခလရ ၁၀၂ တပ်ရင်းများက အခိုင်အမာ နေရာယူထားဆဲဖြစ်သည်။ စစ်ကော်မရှင်တပ်သည် ပြီးခဲ့သည့် ရွေးကောက်ပွဲမတိုင်မီနှင့် ရွေးကောက်ပွဲကာလများအတွင်း ဒီးမော့ဆိုမြို့နယ် အား အလုံးစုံပြန်လည်ထိန်းချုပ်နိုင်ရန် လေကြောင်းနှင့် လက်နက်ကြီး တိုက်ခိုက်မှုများကို အဆက်မပြတ် ပြုလုပ်ခဲ့သည်။ ယခု ရွေးကောက်ပွဲအပြီးကာလတွင်လည်း မြေပြင်ထိုးစစ်များကို ယခင်ထက် ပိုမိုအရှိန်မြှင့် လုပ်ဆောင်လာနေ သဖြင့် မြေပြင်တွင် မပေါက်ကွဲသေးသည့် လက်နက်ကြီးကျည် အကြွင်းအကျန်များမှာ ဒေသခံများနှင့် တော်လှန်ရေးအဖွဲ့ဝင်များ အတွက် ကြီးမားသော ခြိမ်းခြောက်မှုတစ်ခု ဖြစ်နေဟု ဆိုကြသည်။ #စစ်လက်ကျန်ပစ္စည်း #ပေါက်ကွဲ #ကရင်နီပြည် #ဒီးမော့ဆိုမြို့နယ်

ဗုံးသီးဟောင်း တစ်လုံးကို စမ်းသပ်စစ်ဆေးရာမှ ဒီးမော့ဆို ဒေသခံ ကာကွယ်ရေး တပ်ဖွဲ့ဝင် ၂ ဦး သေဆုံး

Feb 24

တောင်ကြီးတွင် အမျိုးသမီးများကို စစ်မှုထမ်းရန်အတွက် စာရင်းကောက်ယူသဖြင့် လူထု အကြား စိုးရိမ်မှု မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ရှမ်းပြည်၏ မြို့တော် တောင်ကြီးမြို့ပေါ်ရှိ ရပ်ကွက်အချို့တွင် ယခုဖေဖော်ဝါရီလ နောက်ဆုံးပတ်အတွင်း အမျိုးသမီးများကိုပါ စစ်မှုထမ်းရန်အတွက် စာရင်းကောက်ယူမှုများ စတင်ပြုလုပ်လာသဖြင့် မြို့ခံလူထုအကြား စိုးရိမ်ထိတ်လန့်နေကြသည်။ စစ်ကော်မရှင် လက်အောက်ခံ အထွေထွေအုပ်ချုပ်ရေးဦးစီးဌာနက တောင်ကြီးမြို့ရှိ ကန်အောက်၊ ဈေးပိုင်းနှင့် ဟော်ကုန်းရပ်ကွက်များတွင် စစ်မှုထမ်းရန် လိုအပ်ချက်အရဟုဆိုကာ အသက် (၁၈) နှစ်မှ (၂၇) နှစ်အတွင်းရှိ အမျိုးသမီးငယ်များကို အဓိကပစ်မှတ်ထား စာရင်းကောက်ယူနေခြင်းဖြစ်သည်။ စာရင်းကောက်ယူရာတွင် အမျိုးသမီးများကို စိတ်အေးစေမည့် စကားများဖြင့် ဖျောင်းဖျပြောဆိုမှုများ ရှိနေ ကြောင်း ဈေးပိုင်းရပ်ကွက်အတွင်းရှိ စစ်မှုထမ်းရန် အကျုံးဝင်သည့် အမျိုးသမီးငယ်တစ်ဦးက ပြောပြသည်။ "သူတို့ပြောပုံအရတော့ လောလောဆယ် စာရင်းသက်သက်ပဲတဲ့။ အရမ်းမကြောက်ဖို့တော့ ပြောတယ်။ ခေါ်ရင်လည်း မိန်းကလေးဆိုတော့ စစ်မတိုက်ရဘူးပေါ့။ ဘွဲ့ရဆိုရင် သူတို့ ရာထူးပေးမယ်။ နှစ်ပြည့်ရင်လည်း ထွက်လို့ရမယ်ပေါ့။ ဒါပေမဲ့ ရပ်ကွက်တိုင်းတော့ မလာသေးဘူး ပြောတယ်" ဟု ၎င်းက ပြောသည်။ လက်ရှိသတ်မှတ်ချက်အရ Non-CDM ဝန်ထမ်းများ၊ အိမ်ထောင်သည်များ၊ ကလေးရှိသူများနှင့် ကျောင်းသူများ ကိုမူ ကင်းလွတ်ခွင့်ပေးထားသေးကြောင်း ဆိုသည်။ သို့သော်လည်း စာရင်းသွင်းခံရသူများကိုမူ နီးစပ်ရာစစ်တပ်သို့ အမြန်ဆုံးသတင်းပို့ရန်နှင့် ဤသတင်း အချက် အလက်များကို အွန်လိုင်းပေါ်တင်ခြင်း၊ ပေါက်ကြားအောင်ပြုလုပ်ခြင်းများ လုံးဝမပြုလုပ်ရန် တင်းကျပ်စွာ မှာကြားထားကြောင်း မြို့ခံများက ပြောသည်။ ဟော်ကုန်းရပ်ကွက်ရှိ သမီးပျိုနှစ်ဦးရှိသည့် မိခင်တစ်ဦးကမူ လက်ရှိကင်းလွတ်ခွင့်များအပေါ် စိတ်မအေးနိုင်ဘဲ ရှေ့ရေးအတွက် စိုးရိမ်မကင်း ဖြစ်နေသည်။ "တောင်ကြီးမှာတော့ စစ်မှုထမ်းစထွက်ကတည်းက ကလေးတွေ ကျောင်းပြန်တက်ကြတယ်လေ။ အဲဒီအတွက် က စိတ်အရမ်းမပူရဘူး။ ကျမစိုးရိမ်တာက အခုအခြေအနေမဟုတ်ဘူး။ နောက်ပိုင်း ခေါ်စရာလူကုန်သွားရင် ကျောင်းသားတွေဘက် လှည့်မှာ။ အဲဒီကျရင် ကျောင်းသားလား၊ ကျားလား၊ မလား အကုန်ပါမှာ။ အဲဒီ တစ်ချက်တော့ ကျမသမီးတွေအတွက် စိတ်ပူတယ်" ဟု ၎င်းက ပြောသည်။ ယခုစာရင်းကောက်ယူထားသူများကို လာမည့်မတ်လကုန် သို့မဟုတ် သင်္ကြန်ကာလအပြီးတွင် ဆင့်ခေါ်ဖွယ်ရှိ သည်ဟု မြို့ခံများအကြား သတင်းများ ပျံ့နှံ့နေသည်။ မြို့မဈေးအနီးရှိ ဈေးသည်တစ်ဦးကမူ လူစည်ကားရာ ရပ်ကွက်များကို ဦးစားပေးကောက်ယူခြင်းမှာ သတင်း ပြန့်နှံ့မှုကို ထိန်းချုပ်ရန် ရည်ရွယ်ပုံရကြောင်းနှင့် အုပ်ချုပ်ရေးမှူးအချို့မှာ ၎င်းတို့သားသမီးများကို ဝန်ထမ်း စာရင်းသွင်းကာ ကင်းလွတ်ခွင့်ရအောင် ကြိုတင်စီစဉ်နေကြကြောင်း သုံးသပ်ပြောဆိုသည်။ မြို့မဈေးရှိ ဈေးသည်တစ်ဦးက “ဒီရပ်ကွက်တွေက ဈေးနားပတ်ပတ်လည်ဆိုတော့ လူဝင်လူထွက်များ တယ် လေ။ စာရင်းအရင်ကောက်ရင် သတင်းပြန့်မလား တွေးတာလည်း ပါမှာပါ။ တခြားရပ်ကွက်တွေက အသံ မကြား ဘူးလေ။ အုပ်ကြီးတချို့ကတော့ သူတို့ သားသမီးတွေ ဝန်ထမ်းစာရင်း သွင်းထားပြီ” ဟု ပြောသည်။ စစ်ကော်မရှင်၏ စစ်မှုထမ်းဥပဒေတွင် အပတ်စဉ် (၅) မှစ၍ အမျိုးသမီးများကို မိမိဆန္ဒအလျောက်သာ လက်ခံ မည်ဟု ကြေညာထားသော်လည်း တောင်ကြီးမြို့တွင် ယခုကဲ့သို့ အိမ်တိုင်ရာရောက် စာရင်းကောက်ယူလာ ခြင်းမှာ အတင်းအကြပ် စုဆောင်းမည့်သဘော သက်ရောက်နေသည်။ ရှမ်းပြည် တောင်ပိုင်းရှိ မြို့ကြီးများတွင် စစ်ကော်မရှင်၏ အုပ်ချုပ်ရေးယန္တရား ပိုမိုတင်းကျပ်လာခြင်းနှင့်အတူ နိုင်ငံရေး တက်ကြွလှုပ်ရှားသူများ နည်းပါးသွားသည့် အခြေအနေကို အခွင့်ကောင်းယူကာ ယခုကဲ့သို့ အမျိုးသမီး များကိုပါ စစ်မှုထမ်းရန် ပထမဆုံးအကြိမ် စာရင်းကောက်ယူလာခြင်းဖြစ်ကြောင်း ဆိုကြသည်။ #တောင်ကြီး #စစ်မှုထမ်း #အမျိုးသမီး #စစ်ကော်မရှင် #အမျိုးသမီးစစ်မှုထမ်း

တောင်ကြီးတွင် အမျိုးသမီးများကို စစ်မှုထမ်းရန်အတွက် စာရင်းကောက်ယူသဖြင့် လူထု အကြား စိုးရိမ်မှု မြင့်တက်

« Prev 1 … 77 78 79 80 81 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close