NMG Doh – Page 78 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Apr 28

စစ်တပ်စစ်ကြောင်းများ အင်းတော်သို့ ထိုးစစ်ဆင်၊ မြို့ခံများ ရှောင်တိမ်းနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၈ ရက်။ အင်းတော်မြို့ကို ဦးတည်သည့် စစ်တပ်စစ်ကြောင်း နဘားလမ်းဆုံအနီးသို့ ရောက်ရှိလာ၊ မြို့ခံများ ဘေး လွတ်ရာသို့ တိမ်းရှောင်နေကြရသည်။ အမျိုးသားညီညွတ်ရေး အစိုးရ (NUG) နှင့် တော်လှန်ရေး အင်အားစုများ သိမ်းပိုက်ထားသည့် စစ်ကိုင်းတိုင်း၊ အင်းတော်မြို့ကို ပြန်လည်ထိန်းချုပ်ရန် စစ်တပ်၏ စစ်ကော်မရှင်တပ်ဖွဲ့များက အင်အားအလုံးအရင်းဖြင့် ထိုးစစ် ဆင်လာရာ လက်ရှိတွင် အင်းတော်မြို့နှင့် အလွန်နီးကပ်သည့် နဘားလမ်းဆုံအနီးသို့ ရောက်ရှိလာခြင်း ဖြစ် သည်။ ကသာမြို့ဘက်မှ ထွက်ခွာလာသည့် အဆိုပါ စစ်ကော်မရှင်စစ်ကြောင်းကို ကသာ-နဘား-အင်းတော် လမ်းပိုင်း တစ်လျှောက်တွင် တော်လှန်ရေးအင်အားစုများက ကြားဖြတ်တိုက်ခိုက်ခဲ့သဖြင့် ယမန်နေ့အထိ တိုက်ပွဲများ ပြင်း ထန်စွာ ဖြစ်ပွားခဲ့သည်။ သို့သော်လည်း ယနေ့ ဧပြီလ ၂၈ ရက် နံနက်ပိုင်းတွင် စစ်တပ် စစ်ကြောင်းသည် နဘားလမ်းဆုံနှင့် ၅ မိုင်ခန့်သာ ကွာဝေးတော့သည့် နတ်ပေါက်ဆင်စခန်းသို့ ရောက်ရှိလာခြင်း ဖြစ်သည်။ စစ်ကိုင်းနှင့် ကချင်အစပ်မှ ကာကွယ်ရေးတပ်ဖွဲ့ဝင်တစ်ဦးက “စစ်ကြောင်းက နဘားလမ်းဆုံရောက်တော့မှာ။ ဆင်စခန်းရောက်နေပြီ။ ဆင်စခန်းဆိုတာက နဘားလမ်းဆုံနဲ့ ၅ မိုင်လောက်ပဲ။ အရပ်သားတွေလည်း ထွက်နေ ရတာ အမှန်ပါပဲ။ အင်အားကလည်း သူတို့က တော်တော်များတယ်ပြောတယ်” ဟု မြေပြင်အခြေအနေကို ပြော သည်။ အင်းတော်မြို့နှင့် နဘားလမ်းဆုံသည် ဆိုင်ကယ်ဖြင့် သွားလာပါက ၁၃ မိနစ်ခန့်သာ ဝေးကွာသည့် အကွာအဝေး ဖြစ်သဖြင့် စစ်တပ်စစ်ကြောင်းသည် မြို့နှင့် အလွန်နီးကပ်နေပြီဖြစ်ကာ မြို့ခံများသည်လည်း ပြီးခဲ့သည့် ရက်ပိုင်း မှစတင်၍ ဘေးလွတ်ရာ တောတောင်များနှင့် ကျေးရွာများသို့ ကြိုတင်ရွှေ့ပြောင်း တိမ်းရှောင်နေကြရသည်။ ယခု စစ်ကြောင်းသည် တကောင်းနှင့် ထီးချိုင့်မြို့တို့ကို သိမ်းပိုက်ခဲ့သည့် စစ်တပ်လက်အောက်ခံ တပ်ဖွဲ့များဖြစ် ပြီး စစ်ကိုင်းတိုင်း မြောက်ပိုင်းနှင့် ကချင်ပြည်အစပ်ရှိ လမ်းကြောင်းများကို ပြန်လည်စိုးမိုးရန် ကြိုးပမ်းလာခြင်း ဖြစ်ကြောင်း သုံးသပ်ပြောဆိုမှုများ ရှိနေသည်။ နောက်ထပ် ကာကွယ်ရေးတပ်ဖွဲ့ဝင်တစ်ဦးကလည်း “သူတို့ဘက်က ကသာနဲ့ အင်းတော်တို့ကိုသာ စိုးမိုးသွားနိုင် ပြီ ဆိုရင်တော့ အစစအရာရာ ခက်ခဲသွားမယ့် အလားအလာတွေ ရှိနေပါတယ်။ ကသာမြို့အထွက် ကသာနဲ့ အင်းတော်ကြားမှာ တိုက်ပွဲတွေ ဖြစ်နေတာဟုတ်တယ်။ စစ်ကောင်စီတွေရော ကျဆုံးမှုတွေ ရှိတယ်လို့ သိရ တယ်။ သူတို့ဘက်က အင်းတော်မြို့ကို သိမ်းပိုက်ဖို့ ကြုံးဝါးထားတာလည်းရှိတယ်။ အဲ့အတိုင်းပဲ စစ်ရေး လှုပ် ရှားလာတယ်။ အဲ့တော့ တိုက်ပွဲဖြစ်တယ်” ဟု ပြောသည်။ အင်းတော်မြို့သည် ပြီးခဲ့သည့် ၂၀၂၅ ခုနှစ်၊ ဧပြီလတွင် တော်လှန်ရေးအင်အားစုများ လက်အောက်သို့ ကျရောက် ခဲ့ခြင်းဖြစ်ပြီး၊ ယခုအခါ တစ်နှစ်အတိအကြာတွင် စစ်တပ်က မြို့ကို ပြန်လည်ရရှိရန် အပြင်းအထန် ကြိုးပမ်းလာ ခြင်း ဖြစ်သည်။ စစ်ရေးနှင့် နိုင်ငံရေး လေ့လာသူများ၏ အဆိုအရ စစ်တပ်သည် ဧရာဝတီ မြစ်ကြောင်းကို အသုံးပြု၍ နှစ်စဉ် စစ်အင်အား ဖြည့်တင်းလေ့ရှိရာ၊ ယခုနှစ် မိုးတွင်းကာလ မရောက်မီတွင် မြစ်ကြောင်းနှင့် ကုန်းလမ်း ဆက်သွယ် ရေး အချက်အချာကျသည့် နယ်မြေများကို အမိအရ ပြန်လည်ထိန်းချုပ်ရန် ထိုးစစ်ဆင်လာခြင်းဖြစ်သည်။ #အင်းတော်မြို့ #ကသာ #ထီးချိုင့်

စစ်တပ်စစ်ကြောင်းများ အင်းတော်သို့ ထိုးစစ်ဆင်၊ မြို့ခံများ ရှောင်တိမ်းနေရ

Apr 28

ထိုင်းပြန် သီရိလင်္ကာသံဃာတော် ၂၂ ပါးထံမှ ဆေးခြောက် အမြောက်အမြား ဖမ်းဆီးရမိ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၈ ရက်။ ထိုင်းနိုင်ငံမှ ဘုရားဖူးခရီးစဉ်အပြီး ပြန်လည်ရောက်ရှိလာသည့် သီရိလင်္ကာသံဃာတော် ၂၂ ပါးကို ကိုလံဘိုလေဆိပ်၌ အပြင်းစားဆေးခြောက် (Kush) အလေးချိန် ၁၁၀ ကီလိုဂရမ် မှောင်ခိုသယ်ဆောင်မှုဖြင့် ဖမ်းဆီးထိန်းသိမ်းလိုက်သည်။ ဖမ်းဆီးရမိသည့် မူးယစ်ဆေးဝါးများမှာ အမေရိကန်ဒေါ်လာ ၃.၅ သန်းကျော် တန်ဖိုးရှိပြီး ၎င်းမှာ ကိုလံဘိုလေဆိပ်၏ သမိုင်းတစ်လျှောက် တစ်ကြိမ်တည်းနှင့် အများဆုံး ဖမ်းဆီးရမိသည့် အမှုဖြစ်သည်။ သံဃာတော်များမှာ စီးပွားရေးလုပ်ငန်းရှင်တစ်ဦး၏ လှည့်ဖြားစေခိုင်းမှုကို ခံရခြင်းဖြစ်သည်ဟု ယူဆရသည်။ သံဃာတော်များ ကို စီးပွားရေး လုပ်ငန်းရှင် တစ်ဦးက ထိုင်းနိုင်ငံသို့ အခမဲ့/အလှူ ခရီးစဉ် အဖြစ် တကာခံခဲ့ခြင်း ဖြစ်သည်။ သံဃာများမှာ ၎င်းတို့ထံတွင် ပါလာသည့် ပစ္စည်းများမှာ ကျောင်းသုံး ပစ္စည်းကရိယာများ ဖြစ်ပြီး အလှူပေးလိုက်သည့် ပစ္စည်းများအဖြစ် သိထားခဲ့ကြသည်။ သို့သော်လည်း ၎င်းတို့၏ လက်ကိုင်ဖုန်းများအတွင်း၌ ဝိနည်းနှင့်မညီသည့် ဓာတ်ပုံများ တွေ့ရှိရခြင်းကြောင့် ဝေဖန်မှုများ ထွက်ပေါ်လျက်ရှိသည်။ လက်ရှိတွင် ခရီးစဉ်စီစဉ်ပေးခဲ့သည့် ဦးဇင်းတစ်ပါးကိုပါ ထပ်မံဖမ်းဆီးထားပြီး တရားရုံးက သံဃာတော်များအား (၇) ရက်ကြာ ချုပ်မိန့်ပေးကာ စုံစမ်းစစ်ဆေးမှုများ ဆက်လက်လုပ်ဆောင်လျက်ရှိသည်။ #ဆေးခြောက် #သိရိလင်္ကာသံဃာတော်

ထိုင်းပြန် သီရိလင်္ကာသံဃာတော် ၂၂ ပါးထံမှ ဆေးခြောက် အမြောက်အမြား ဖမ်းဆီးရမိ

Apr 28

ကမ္ဘာ့စစ်စရိတ်သုံးစွဲမှု ဒေါ်လာ ၂.၉ ထရီလီယံအထိ မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၈ ရက်။ စတော့ဟုမ်း အပြည်ပြည်ဆိုင်ရာ ငြိမ်းချမ်းရေး သုတေသနအဖွဲ့ (SIPRI) ၏ ထုတ်ပြန်ချက်အရ ၂၀၂၅ ခုနှစ်တွင် ကမ္ဘာတစ်ဝန်း စစ်ရေးအသုံးစရိတ်သည် အမေရိကန်ဒေါ်လာ ၂.၉ ထရီလီယံအထိ ရှိလာပြီး ၎င်းမှာ လွန်ခဲ့သော ၁၆ နှစ်အတွင်း အမြင့်ဆုံးပမာဏ ဖြစ်သည်ဟု ဆိုသည်။ ဥရောပနိုင်ငံများဖြစ်သည့် ဘယ်လ်ဂျီယံ၊ စပိန်နှင့် နော်ဝေတို့တွင် စစ်စရိတ် ၅၀ ရာခိုင်နှုန်းခန့်အထိ မြင့်တက်လာခဲ့သည်။ ဂျာမနီနိုင်ငံမှာလည်း ကမ္ဘာ့စစ်စရိတ် စတုတ္ထမြောက် အများဆုံးသုံးစွဲသည့် နိုင်ငံဖြစ်လာသည်။ အာရှတွင် တရုတ်နိုင်ငံသည် ၃၁ နှစ်ဆက်တိုက် စစ်စရိတ်တိုးမြှင့်ခဲ့ပြီး ဂျပန်နှင့် ထိုင်ဝမ် နိုင်ငံများကလည်း လက်နက်အတွက် ပိုက်ဆံ ပိုမို သုံးစွဲလာကြသည်။ အမေရိကန်နိုင်ငံမှာမူ အီရန်စစ်ပွဲကြောင့် ၂၀၂၆ ခုနှစ်တွင် စစ်စရိတ် ဒေါ်လာ ၁ ထရီလီယံကျော်အထိ ရှိလာနိုင်ကြောင်း ခန့်မှန်းထားသည်။ စစ်ဖြစ်ပွားနေသည့် ယူကရိန်း၊ ရုရှားနှင့် အီရန်တို့တွင်လည်း စစ်စရိတ်များ သိသိသာသာ တိုးမြင့်နေကြောင်း စီပရီ (SIPRI) က သုံးသပ်ထားသည်။ #ကမ္ဘာ့စစ်စရိတ်သုံးစွဲမှုမြင့်တက် #စစ်အသုံးစရိတ် #စတော့ဟုမ်းအပြည်ပြည်ဆိုင်ရာငြိမ်းချမ်းရေးသုတေသနအဖွဲ့ #SIPRI

ကမ္ဘာ့စစ်စရိတ်သုံးစွဲမှု ဒေါ်လာ ၂.၉ ထရီလီယံအထိ မြင့်တက်

Apr 28

ရုရှားသမ္မတ ပူတင်က အီရန်ကို ထောက်ခံကြောင်း ကတိပြု သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၈ ရက်။ ရုရှားသမ္မတ ဗလာဒီမာပူတင်သည် အီရန်နိုင်ငံခြားရေးဝန်ကြီး အာရပ်ချီနှင့် တွေ့ဆုံစဉ် အမေရိကန်နှင့် အစ္စရေးတို့၏ ဖိအားပေးမှုများကြား၌ အချုပ်အခြာအာဏာကို ကာကွယ်နေသည့် အီရန်ပြည်သူများ၏ သတ္တိကို ချီးကျူးစကား ပြောကြားခဲ့သည်။ သမ္မတပူတင်က ရုရှားအနေဖြင့် အီရန်၏ အကျိုးစီးပွားနှင့် ဒေသတွင်း ငြိမ်းချမ်းရေးအတွက် တတ်နိုင်သမျှ ကူညီဆောင်ရွက်ပေးသွားမည်ဟု ကတိပြုခဲ့သည်။ အီရန်၏ ခေါင်းဆောင်သစ် မိုဂျတာဘာ ခါမေနီ (Mojtaba Khamenei) ထံသို့လည်း ရုရှားသည် မဟာဗျူဟာမြောက် မိတ်ဖက်အဖြစ် ဆက်လက်ရပ်တည်သွားမည့်အကြောင်း သတင်းစကား ပါးခဲ့သည်။ အရှေ့အလယ်ပိုင်း တင်းမာမှုများ လျှော့ချရန် အီရန်၏ သန့်စင်ပြီး ယူရေနီယံများကို ရုရှားတွင် လာရောက်သိုလှောင်ရန် ကမ်းလှမ်းချက်အပေါ် အမေရိကန်ဘက်က ပယ်ချထားခဲ့သည်။ ရုရှားသည် နှစ်ဖက်ကြား စေ့စပ်ညှိနှိုင်းသူအဖြစ် ဆောင်ရွက်ပေးရန် ဆက်လက်ကြိုးပမ်းနေသည်ဟု ဆိုသည်။ #ရုရှားသမ္မတပူတင် #အီရန်စစ်ပွဲ

ရုရှားသမ္မတ ပူတင်က အီရန်ကို ထောက်ခံကြောင်း ကတိပြု

Apr 28

အီရန်၏ စစ်ရပ်စဲရေးအဆိုပြုချက် သမ္မတထရန့် ပယ်ချ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၈ ရက်။ အီရန်နိုင်ငံမှ တင်သွင်းလာသည့် နောက်ဆုံးစစ်ရပ်စဲရေး အဆိုပြုချက်တွင် နျူကလီးယားဆိုင်ရာ ဆွေးနွေးမှုများကို စစ်ပွဲပြီးဆုံးမှသာ ဆောင်ရွက်ရန် ဖော်ပြထားခြင်းအပေါ် အမေရိကန်သမ္မတ ဒေါ်နယ်ထရန့်က ကျေနပ်မှုမရှိဘဲ ပယ်ချလိုက်ကြောင်း အမေရိကန်အစိုးရအရာရှိတစ်ဦးက အတည်ပြုပြောကြားသည်။ အီရန်နိုင်ငံခြားရေးဝန်ကြီး အက်ဘာ့စ် အာရပ်ချီ (Abbas Araqchi) တင်ပြလာသည့် အဆင့်လိုက်ဆောင်ရွက်မည့် အဆိုပြုချက်တွင် အမေရိကန်နှင့် အစ္စရေးတို့၏ စစ်ရေးအရ တိုက်ခိုက်မှုများကို ရပ်ဆိုင်းရန်နှင့် နောက်နောင် အလားတူတိုက်ခိုက်မှုများ ထပ်မံမပြုလုပ်ရန် အာမခံချက်ပေးရန်။ ဒုတိယအဆင့်တွင် အမေရိကန်ရေတပ်၏ စီးပွားရေးပိတ်ဆို့မှုများကို ဖယ်ရှားပေးရန်နှင့် ဟော်မုဇ်ရေလက်ကြား (Strait of Hormuz) အား အီရန်၏ ထိန်းချုပ်မှုအောက်၌ ပြန်လည်ဖွင့်လှစ်ရန် နှင့် နောက်ဆုံးအနေဖြင့် အထက်ပါအချက်များ ပြီးမြောက်မှသာ နျူကလီးယားအရေးကို စတင်ဆွေးနွေးရန် စသည့်အချက်များ ပါဝင်သည်။ သို့သော် သမ္မတထရန့်က နျူကလီးယားဆိုင်ရာ သဘောတူညီချက်အား ဆွေးနွေးပွဲ၏ အစကတည်းက ထည့်သွင်းဆွေးနွေးရန် ခိုင်ခိုင်မာမာ လိုလားနေခြင်း ဖြစ်သည်။ လက်ရှိတွင် စစ်ပွဲကြောင့် ဟော်မုဇ်ရေလက်ကြား၌ သင်္ဘောဖြတ်သန်းမှုမှာ နေ့စဉ် ပုံမှန်အစီးရေ ၁၃၀ ခန့်မှ ၇ စီးခန့်အထိ သိသိသာသာ လျော့ကျနေပြီး ကမ္ဘာ့ရေနံဈေးနှုန်းများမှာလည်း ဆက်လက် မြင့်တက်လျက် ရှိသည်။ #အီရန်စစ်ပွဲ #သမ္မတထရန့် #အီရန်အမေရိကန်ဆွေးနွေးပွဲ

အီရန်၏ စစ်ရပ်စဲရေးအဆိုပြုချက် သမ္မတထရန့် ပယ်ချ

Apr 28

ရပ်ဆိုင်းထားသည့် Green Card လျှောက်လွှာများ ပြန်လည် စိစစ်ဆောင်ရွက်ရန် တရားရုံး အမိန့်ချ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၈ ရက်။ အမေရိကန် ဗဟိုတရားသူကြီးတစ်ဦးက ထရန့်အစိုးရအနေဖြင့် ခရီးသွားလာခွင့် ပိတ်ပင်ထားသည့် (Travel Ban) စာရင်းဝင် နိုင်ငံများမှ လာသူများ၏ ရပ်ဆိုင်းထားသော Green Card လျှောက်လွှာများကို ပြန်လည်စိစစ် ဆောင်ရွက်ပေးရန် အမိန့်ချမှတ်လိုက်သည်။ မေရီလန်းပြည်နယ် တရားသူကြီး ဂျော့ချ် အယ်လ် ရပ်ဆဲလ် (George L. Russell III) က "လူဝင်မှုကြီးကြပ်ရေးဌာန (USCIS) အနေဖြင့် လျှောက်လွှာများကို လုံးဝမစစ်ဆေးဘဲ နေခွင့်မရှိပါ" ဟု ရေးသားကာ အဆိုပါအေဂျင်စီအား လုပ်ငန်းစဉ်များ ဆက်လက်လုပ်ဆောင်ရန် အမိန့်ပေးခဲ့ခြင်း ဖြစ်သည်။ လက်ရှိ အမေရိကန်သို့ ရောက်ရှိနေပြီးသားဖြစ်သည့် လူဝင်မှုကြီးကြပ်ရေး လျှောက်ထားသူ ၈၃ ဦးက တရားစွဲဆိုခဲ့ခြင်း အပေါ် တရားရုံးက အနိုင်ပေးလိုက်ခြင်းဖြစ်သည်။ နိုင်ငံခြားရေးဝန်ကြီးဌာနက ဗီဇာကန့်သတ်ထားသည့် နိုင်ငံပေါင်း ၃၉ နိုင်ငံမှ လာသူများ၏ လျှောက်လွှာများကို USCIS က ရပ်ဆိုင်းထားခဲ့ရာ၊ ထိုမူဝါဒကြောင့် လျှောက်ထားသူ ၂ သန်းကျော် ထိခိုက်ခဲ့ရပြီး အေဂျင်စီအနေဖြင့် လျှောက်လွှာကြေး ဒေါ်လာ ၁ ဘီလီယံကျော်ကို ကောက်ခံထားသော်လည်း လုပ်ငန်းစဉ်များကို ရပ်တန့်ထားခဲ့သည်။ "Project Press Unpause" အမည်ရှိ လှုပ်ရှားမှုအဖွဲ့က ပြောရာတွင် ၎င်းတို့သည် အမေရိကန်တွင် ၅ နှစ်ထက်မနည်း နေထိုင်လာကြသူများဖြစ်ပြီး၊ အခွန်မှန်မှန်ဆောင်ကာ ဥပဒေချိုးဖောက်မှု မရှိသည့်အပြင် အမေရိကန်စီးပွားရေးကို အကျိုးပြုနေသူများ ဖြစ်သည်ဟု ဆိုသည်။ မိမိတို့ ကိုယ်တိုင် မရွေးချယ်နိုင်သည့် "မွေးဖွားရာနိုင်ငံ" အပေါ် အခြေခံပြီး ယခုကဲ့သို့ အကန့်အသတ်မရှိ ဆိုင်းငံ့ထားခြင်းမှာ တရားမျှတမှု မရှိကြောင်း ၎င်းတို့က ထောက်ပြထားသည်။ သမ္မတ ထရန့် အစိုးရအဖွဲ့က ဤခရီးသွားလာခွင့် ကန့်သတ်ချက်ကို လုံခြုံရေးအရ အကြောင်းပြကာ အသစ်ဝင်ရောက်လာမည့်သူများအတွက် ရည်ရွယ်ထုတ်ပြန်ခဲ့ခြင်း ဖြစ်သော်လည်း၊ အမေရိကန်အတွင်း ရောက်ရှိနေပြီးသား သူများပါ Green Card လျှောက်ထားရာတွင် အခက်ကြုံနေရခြင်း ဖြစ်သည်။ ဤစီရင်ချက်ကြောင့် ခရီးသွားလာခွင့် ကန့်သတ်ထားသည့် ၃၉ နိုင်ငံမှ လာသူများအတွက် ရပ်တန့်နေသည့် Green Card လုပ်ငန်းစဉ်များ ပြန်လည်စတင်နိုင်မည့် မျှော်လင့်ချက်များ ထွက်ပေါ်လာခဲ့သည်။ သို့သော်လည်း အမေရိကန် အစိုးရဘက်မှ မည်သို့ ဆောင်ရွက်မည်ကို မသိရသေးပေ။ #GreenCard #USCIS

ရပ်ဆိုင်းထားသည့် Green Card လျှောက်လွှာများ ပြန်လည် စိစစ်ဆောင်ရွက်ရန် တရားရုံး အမိန့်ချ

Apr 27

စစ်ကိုင်း-ကချင် အစပ်တွင် စစ်တပ်က အင်အားဖြည့်ထိုးစစ်ပြင်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၇ ရက်။ စစ်ကိုင်းတိုင်းနှင့် ကချင်ပြည် အစပ်ရှိ မြို့နယ်များတွင် စစ်တပ်က စစ်ဆင်ရေးများ အတွက် လူအင်အား အလုံး အရင်း ဖြည့်တင်းလျက်ရှိပြီး အချိန်မရွေးတိုက်ပွဲများ ပြင်းထန်လာနိုင်သည့် အခြေအနေမျိုး ဖြစ်သည်ဟု ကချင် လွတ်လပ်ရေးအဖွဲ့ (KIO) နှင့် ဒေသခံကာကွယ်ရေးတပ်ဖွဲ့ တာဝန်ရှိသူတို့က အတည်ပြုပြောသည်။ လက်ရှိမြေပြင်အခြေအနေနှင့် ပတ်သက်၍ KIO ပြောရေးဆိုခွင့်ရှိသူ ဗိုလ်မှူးကြီးနော်ဘူက “အခုထီးချိုင့်၊ ရွှေကူ၊ ကသာဖက်မှာလည်း စစ်ကော်မရှင်ဖက်တွေကတော့ စစ်ဆင်ရေးတွေ၊ လူအင်အားတွေ ဖြည့်ထားတယ်ဆိုတဲ့ သတင်းတွေကတော့ ရပါတယ်ခင်ဗျား” ဟု ပြောသည်။ စစ်တပ်သည် ပြီးခဲ့သည့် မတ်လအတွင်း ထီးချိုင့်မြို့ကို ပြန်လည်ထိန်းချုပ်နိုင်ခဲ့ပြီးနောက် ကသာနှင့် အင်းတော် မြို့နယ်များသို့ စစ်အင်အားများ ဆက်တိုက်ဖြည့်တင်းကာ ၎င်းတို့လက်လွှတ်ခဲ့ရသည့် နယ်မြေများကို ပြန်လည် သိမ်းပိုက်ရန် ကြိုးပမ်းလာနေခြင်း ဖြစ်သည်။ ထိုသို့ စစ်ရေးတင်းမာနေချိန်အတွင်း ကချင်ပြည်၊ ရွှေကူမြို့နယ်ရှိ ဗျူဟာမြောက် ရွှေကူ ၅ လမ်းဆုံ စစ်တပ် စခန်းကြီးနှင့် ကာကင်းစခန်း ၂ ခုကို ကချင်လွတ်လပ်ရေး တပ်မတော် (KIA) နှင့် ပူးပေါင်းတပ်များက ဧပြီလ ၂၃ ရက် ညနေပိုင်းတွင် သိမ်းပိုက်နိုင်ခဲ့သည်။ အဆိုပါ သိမ်းပိုက်ရရှိသည့် စခန်းများအနက် ရွှေကူမြို့နယ်ရှိ တော်လှန်ရေးအင်အားစုများဘက်က ဧပြီလ ၁၉ ရက်နေ့တွင် ခေတ္တလက်လွှတ်ခဲ့ရသည့် တပ်စခန်းတစ်ခုလည်း ပါဝင်ပြီး၊ ၎င်းစခန်းကို ကချင်လွတ်လပ်ရေး တပ်မတော် (KIA) နှင့် PDF ပူးပေါင်းတပ်များက ပြန်လည်တိုက်ခိုက်သိမ်းပိုက်နိုင်ခဲ့ခြင်း ဖြစ်သည်။ ဧပြီလ ၂၀ ရက်နေ့ကတည်းက စတင်ခဲ့သည့် အဆိုပါထိုးစစ်ကြောင့် ၅ လမ်းဆုံစခန်းရှိ စစ်တပ် လက်အောက်ခံ တပ်သားများမှာ စခန်းကိုစွန့်ခွာ၍ မြို့ထဲသို့ ထွက်ပြေးသွားကြပြီး၊ တိုက်ပွဲအတွင်း လက်နက်ခဲယမ်းနှင့် စစ်အသုံးအဆောင်ပစ္စည်း အမြောက်အမြားကို သိမ်းဆည်းရမိခဲ့ကြောင်း KIA စစ်ရေးသတင်းရင်းမြစ်က ဆို သည်။ ဧပြီလ ၂၃ ရက်နေ့က ပြန်လည် သိမ်းပိုက်နိုင်ခဲ့သည့် တိုက်ပွဲအတွင်း စစ်တပ်ဘက်မှ ၆ ဦး သေဆုံးကာ ၁၆ ဦး ဒဏ်ရာရရှိခဲ့သည်။ စစ်ရေးသတင်းရင်းမြစ်တစ်ဦးက “ကျနော်တို့သိရတာကတော့ စစ်ကောင်စီဘက်က ၆ ဦးသေဆုံးပြီးတော့ ၁၆ ဦး ဒဏ်ရာရတယ်လို့ အဲ့နေ့ကဘဲသိရတယ်ဗျ။ အရင်ကတော့ ကာကွယ်ရေး ပူးပေါင်းတပ်တွေ နေရာ ယူထား ကြတာ ဟုတ်တယ်။ အဲ့နေရာကိုမှ စစ်တပ်က ဝင်လာလို့ PDF နဲ့ KIA တို့က ခဏပြန်ဆုတ်ပေးလိုက်ရတာ ဟုတ်တယ်။ ပြီးမှ ပြန်သိမ်းပိုက်နိုင်တဲ့အခြေနေဟုတ်တယ်” ဟု ပြောသည်။ တိုက်ပွဲအတွင်း RPG၊ ၄၀ မမ ဗုံးသီးများနှင့် အခြား စစ်အသုံးအဆောင် ပစ္စည်းများကိုလည်း သိမ်းဆည်းရမိခဲ့ကြ သည်။ ရွှေကူမြို့နယ်အတွင်းရှိ KIA တပ်မဟာ (၁၁) နယ်မြေသို့ စစ်တပ် လက်အောက်ခံ ခလရ ၅၆၊ ခမရ ၆၀၂ နှင့် တပ်မ ၈၈ လက်အောက်ခံ တပ်ရင်းများက ပူးပေါင်းစစ်ကြောင်းထိုးလာသဖြင့် တိုက်ပွဲများ ဖြစ်ပွားနေခြင်း ဖြစ်သည်။ လက်ရှိတွင် ရွှေကူမြို့ပတ်ဝန်းကျင်ရှိ ကျန်ရှိနေသေးသည့် စစ်တပ်၏ ကာကင်းစခန်းများကိုလည်း KIA ပူးပေါင်း တပ်များက ဆက်လက် ထိုးစစ်ဆင်နေသဖြင့် တိုက်ပွဲများမှာ အချိန်မရွေး ပိုမိုပြင်းထန်လာနိုင်သည့် အခြေအနေ တွင် ရှိနေသည်။ ရွှေကူမြို့ကာကွယ်ရေးတပ်ဖွဲ့နှင့် နီးစပ်သူတစ်ဦးက “စစ်ရေးအခြေနေကတော့ တစ်ဖက်နဲ့တစ်ဖက် စောင့်ကြည့် နေတဲ့ အခြေအနေမှာ ရှိပါတယ်။ အချိန်မရွေး တိုက်ပွဲ ဖြစ်လာနိုင်တယ်လို့ ပြောလို့ရတယ်။ တစ်ဖက်က ဖြစ် လာရင်လည်း ကျနော်တို့ဘက်က တိုက်သင့်ရင်တိုက်ရမှာပေါ့” ဟု လက်ရှိအခြေအနေကို ပြောသည်။ စစ်တပ်သည် ဧပြီလ ၂၃ ရက်နေ့က ရွှေကူ၊ ဆွမ်ပရာဘွမ်၊ ဆော့လော်၊ အင်ဂျန်းယန် နှင့် ချီဖွေမြို့နယ်တို့ကို စစ်အုပ်ချုပ်ရေး (Martial Law) အမိန့်ထုတ်ပြန်ထားပြီး၊ နယ်မြေပြန်လည် စိုးမိုးရေးအတွက် ထိုးစစ်အရှိန်မြှင့်ရန် ပြင်ဆင်နေသဖြင့် စစ်ကိုင်း-ကချင်အစပ် တစ်ကြောတွင် တိုက်ပွဲများ ပိုမိုပြင်းထန်လာနိုင်ကြောင်း ဒေသခံ ကာကွယ်ရေး တပ်ဖွဲ့များနှင့် စစ်ရေးလေ့လာသူများက သုံးသပ်နေကြသည်။ #Katha #ကသာ #ထီးချိုင့် #ရွှေကူ #MartialLaw

စစ်ကိုင်း-ကချင် အစပ်တွင် စစ်တပ်က အင်အားဖြည့်ထိုးစစ်ပြင်နေ

Apr 27

နှစ် ၃၀ ကြာ ဆုံးရှုံးခဲ့သော ကဘောတူ စခန်းကို KNU ပြန်သိမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၇ ရက်။ ကရင်ပြည်၊ ဖာပွန်တွင် နှစ် ၃၀ ကြာ စစ်တပ် အခြေစိုက်ခဲ့သည့် ကဘောတူစခန်းကို KNU က အပြီးသတ် တိုက်ခိုက် သိမ်းပိုက်နိုင်ခဲ့သည်။ ကရင်အမျိုးသားအစည်းအရုံး (KNU)၊ တပ်မဟာ (၅) နယ်မြေဖြစ်သော ဖာပွန် (မူတြော်) ခရိုင်အတွင်း စစ်တပ် ၏ လမ်းပန်းဆက်သွယ်ရေးနှင့် နယ်မြေလုံခြုံရေးအတွက် ဗျူဟာမြောက် အရေးပါသည့် ကဘောတူစခန်းကို ကရင်အမျိုးသား လွတ်မြောက်ရေး တပ်မတော် (KNLA) ပူးပေါင်းတပ်ဖွဲ့များက ဧပြီလ ၂၅ ရက်နေ့တွင် အပြီး သတ် တိုက်ခိုက်သိမ်းပိုက်နိုင်ခဲ့ခြင်း ဖြစ်သည်။ အဆိုပါ ကဘောတူတပ်စခန်းသည် ဖာပွန်ခရိုင်၊ လူသောမြို့နယ်အတွင်း တည်ရှိပြီး ၁၉၉၇ ခုနှစ်ခန့်မှစ၍ စစ်တပ် က နှစ်ပေါင်း ၃၀ နီးပါး ကျူးကျော်အခြေစိုက်ထားသည့် စခန်းဖြစ်သည်။ စခန်းမကျစေရန် စစ်တပ်ဘက်မှ လေကြောင်းပစ်ကူများ အဆက်မပြတ် ပြုလုပ်ခဲ့သော်လည်း KNLA ပူးပေါင်း တပ်များက ဝိုင်းဝန်းပိတ်ဆို့ကာ သိမ်းပိုက်နိုင်ခဲ့ခြင်း ဖြစ်သည်။ တပ်မဟာ (၅) နယ်မြေတွင်းရှိ သတင်းရင်းမြစ်တစ်ဦးက “ကဘောတူ စခန်းကို သိမ်းလိုက်ပါပြီဗျ။ မြေပြင်မှာ အားလုံးက အောင်ပွဲခံနေကြပြီ။ ဒီစခန်းမသိမ်းခင်က နေ့တိုင်းလိုလို စခက လေယာဉ်နဲ့ ဗုံးကြဲတာရှိတယ်။ သိမ်း တာက ဧ ပြီ ၂၅ ရက်နေ့ ၁၂ ဝန်းကျင်မှာတော့ အပြီးသတ်သိမ်းနိုင်ခဲ့တာပါ” ဟု ပြောသည်။ စခန်းသိမ်းပိုက်မှုအတွင်း လက်နက်မျိုးစုံ ၁၈ လက်ထက်မနည်း သိမ်းဆည်းရမိခဲ့ပြီး ၎င်းအထဲတွင် ငါးကြင်းမြီး ဟုခေါ်သည့် စက်သေနတ် ၂ လက်နှင့် ၆၀ မမ လက်နက်ကြီး ၁ လက်တို့ ပါဝင်ကြောင်း၊ စစ်တပ် လက်အောက်ခံ တပ်သား အချို့၏ အလောင်းများကို တွေ့ရှိရသည့်အပြင် အချို့မှာ ထွက်ပြေးသွားကြကြောင်း ကရင်စစ်ရေးသတင်း ရင်းမြစ်များက ဆိုသည်။ ကဘောတူစခန်းသည် စစ်အာဏာသိမ်းပြီးနောက် ၂၀၂၁ ခုနှစ် စက်တင်ဘာလအတွင်းကလည်း KNU ဘက်မှ ပထမတစ်ကြိမ် တိုက်ခိုက်သိမ်းပိုက်ခဲ့ဖူးသော်လည်း ထိုစဉ်က ပြန်လည်ဆုတ်ခွာပေးခဲ့သဖြင့် စစ်တပ်က နေရာ ပြန်ဝင်ယူကာ တပ်စွဲထားခဲ့ခြင်းဖြစ်သည်။ ယခုတစ်ကြိမ်တွင်မူ ဒေသခံများ၏ လုံခြုံရေးအတွက် အပြီးသတ်တိုက်ခိုက်သိမ်းယူခဲ့ခြင်းဖြစ်ပြီး စခန်း သိမ်း ပိုက်ပြီးနောက် နယ်မြေရှင်းလင်းရေးလုပ်ငန်းများကို ဆက်လက်လုပ်ဆောင်လျက်ရှိသည်။ ဖာပွန် (မူတြော်) ခရိုင်အတွင်း အာဏာသိမ်းပြီးနောက်ပိုင်း KNLA မဟာမိတ်ပူးပေါင်းတပ်များက စစ်တပ် စခန်း ပေါင်း ၇၀ နီးပါးအထိ သိမ်းပိုက်နိုင်ခဲ့ပြီဖြစ်ရာ လက်ရှိတွင် ဖာပွန်ခရိုင်အတွင်း၌ စစ်တပ်၏ ဖာပွန်ဗျူဟာကုန်း အပါအဝင် တပ်စခန်း ၁၀ ခုခန့်သာ ကျန်ရှိတော့သည်ဟု ဆိုသည်။ လက်ရှိတွင် အဆိုပါ ဖာပွန်ဗျူဟာကုန်းကို သိမ်းပိုက်နိုင်ရန် KNLA ဘက်မှ ဆက်လက် ပိတ်ဆို့တိုက်ခိုက်နေပြီး၊ စစ်တပ်ဘက်မှလည်း နယ်ခြားစောင့်တပ် (BGF) အင်အားများကို အသုံးပြု၍ စစ်အင်အားဖြည့်တင်းမှုများ လုပ်ဆောင်နေသဖြင့် ဒေသတွင်း စစ်ရေးတင်းမာမှုများ ပိုမိုပြင်းထန်လာသည်ဟု ဆိုသည်။

နှစ် ၃၀ ကြာ ဆုံးရှုံးခဲ့သော ကဘောတူ စခန်းကို KNU ပြန်သိမ်း

Apr 27

ခေါင်လန်ဖူးရှိ ပြည်သူ့စစ်များ အများအပြား ထွက်ပြေးနေဟု KIO ပြောခွင့်ရပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၇ ရက်။ ကချင်ပြည် မြောက်ဖျားပိုင်း၊ ခေါင်လန်ဖူးဒေသတွင် လှုပ်ရှားနေသည့် စစ်တပ် လက်အောက်ခံ ပြည်သူ့စစ် အဖွဲ့ဝင်များသည် ထွက်ပြေးမှုများ ဆက်တိုက်ရှိနေကြောင်း ကချင်လွတ်လပ်ရေးအဖွဲ့ (KIO) ပြောရေးဆိုခွင့်ရှိသူ ဗိုလ်မှူးကြီးနော်ဘူက ပြောသည်။ အဆိုပါ ထွက်ပြေးနေသည့် ပြည်သူ့စစ်များသည် ပူတာအိုအခြေစိုက် တန်ဂူးတန် ပြည်သူ့စစ်အဖွဲ့ဝင်များ ဖြစ်ကြ ပြီး ၎င်းတို့သည် ရှေ့တန်းစစ်မျက်နှာပြင်များတွင် စစ်တပ်နှင့်အတူ ကချင်လွတ်လပ်ရေး တပ်မတော် KIA ပူးပေါင်းတပ်များကို ရင်ဆိုင်ရန် စေလွှတ်ခံထားရသူများ ဖြစ်သည်။ သို့သော်လည်း လက်ရှိတွင် စစ်ရေးအခြေအနေနှင့် စစ်တပ်၏ ဖိအားများကြောင့် ၎င်းတို့မှာ စစ်မတိုက်လိုတော့ ဘဲ တောလမ်းများမှတစ်ဆင့် ထွက်ပြေးနေကြခြင်း ဖြစ်သည်။ ဗိုလ်မှူးကြီးနော်ဘူက “တချို့ ပြည်သူစစ်တွေ တော်တော်များများကတော့ စစ်မတိုက်ချင်လို့ ထွက်ပြေးသွားတဲ့ သတင်းတွေ တော်တော်များများ ထွက်နေပါတယ်။ သူတို့ရဲ့ ပူတာအိုတို့ မချမ်းဘော့တို့ပေါ့နော် သူတို့အိမ်တွေကို ပြန်ဖို့လည်း အခက်အခဲရှိပါတယ်။ ပြန်ရင်လည်း ပြန်ဖမ်းမှာကို သူတို့လည်း စိုးရိမ်နေတယ်” ဟု ပြောသည်။ ခေါင်လန်ဖူးဒေသသည် မြန်မာနိုင်ငံ မြောက်ဘက်ဆုံး ပူတာအို ခရိုင်အတွင်းရှိ မြို့နယ် တစ်ခု ဖြစ်ပြီး လမ်းပမ်းဆက်သွယ်ရေး အလွန်ခက်ခဲသည့် တောင်ပေါ်ဒေသဖြစ်သဖြင့် ထွက်ပြေးသည့် ပြည်သူ့စစ်များမှာ နေရပ်သို့ ပြန်လည်ရောက်ရှိရန် လမ်းခရီးတွင် အခက်အခဲများစွာ ကြုံတွေ့နေရသည့်အပြင်၊ နေရပ်ပြန်ရောက်ပါကလည်း စစ်တပ်၏ ပြန်လည်ဖမ်းဆီးခြင်း ခံရမည်ကို စိုးရိမ်နေကြခြင်း ဖြစ်သည်။ လက်ရှိ ခေါင်လန်ဖူးဒေသတွင် ဧပြီလအတွင်း မြေပြင်တိုက်ပွဲ ပြင်းပြင်းထန်ထန် မရှိသေးသော်လည်း စစ်တပ် ဘက်မှ ဒရုန်းများဖြင့် ကင်းထောက်ခြင်းနှင့် လက်နက်ကြီးများဖြင့် ရမ်းသန်းပစ်ခတ်ခြင်းများကို လုပ်ဆောင်နေ ကြောင်း ဆိုသည်။ “ခေါင်လန်ဖူးဖက်မှာကတော့ ဒီဧပြီလအတောအတွင်းမှာတော့ သိပ်ပြင်းထန်တဲ့ တိုက်ပွဲကတော့ မရှိဘူး။ အချင်းချင်း ရမ်းပြီးမှ လက်နက်ကြီးနဲ့ ပစ်တာတွေ၊ ဒရုန်းနဲ့ စောင့်ပြီးမှ ပစ်တာတွေတော့ရှိပါတယ်။ မြေပြင် တိုက်ပွဲ ပြင်းပြင်းထန်ထန်ကတော့ မရှိပါဘူး” ဟု ဗိုလ်မှူးကြီးနော်ဘူက ပြောသည်။ ပြည်သူ့စစ်အဖွဲ့ဝင်များမှာမူ KIA ပူးပေါင်းတပ်များ၏ အချိန်မရွေး ဝင်ရောက်တိုက်ခိုက်နိုင်သည့် အခြေအနေနှင့် စစ်တပ်၏ အတင်းအကျပ် ခိုင်းစေမှုများကြားတွင် စိုးရိမ်ကြောက်လန့်နေသည့် အနေအထားရှိကြောင်း ဒေသခံ များ၏ ပြောပြချက်ကို ကိုးကား၍ KIO က ဆိုသည်။ အလားတူ ကချင်ပြည်၊ တနိုင်းဒေသရှိ ပယင်းမှော်ဘက်တွင်လည်း KIA နှင့် ပူးပေါင်းတပ်များက စစ်တပ်၏ အခိုင်အမာစခန်းများကို ထိုးစစ်ဆင်လျက်ရှိရာ ဧပြီလ ၂၄ ရက်နေ့အထိ တိုက်ပွဲများ ဆက်လက် ပြင်းထန်နေ သည်။ နန်ဗျူချောင်းတစ်ကြောရှိ စစ်တပ်၏ ရှေ့တန်းကာကင်းစခန်း ၂ ခုကို ပူးပေါင်းတပ်များက သိမ်းပိုက်နိုင်ခဲ့ သော်လည်း အခိုင်အမာစခန်းကြီးများမှာမူ ကျန်ရှိနေသေးကြောင်း KIO က ဆိုသည်။ ကချင်ပြည်အတွင်း KIA ၏ ဗျူဟာမြောက် ထိုးစစ်များကြောင့် စစ်တပ် လက်အောက်ခံ ပြည်သူ့စစ် တပ်ဖွဲ့ဝင် များအတွင်း စိတ်ဓာတ်ပျက်ပြားမှုများ ပိုမိုများပြားလာနေပြီး ယခုကဲ့သို့ စွန့်ခွာထွက်ပြေးမှုများမှာ ရှေ့တန်း စစ်မျက်နှာပြင်များတွင် ပိုမိုထင်ရှားလာနေသည်ဟု ဒေသတွင်း စစ်ရေးလေ့လာသူများက ဆိုသည်။ #KIA #KIO #ခေါင်လန်ဖူး #ပူတာအို #ပြည်သူ့စစ်

ခေါင်လန်ဖူးရှိ ပြည်သူ့စစ်များ အများအပြား ထွက်ပြေးနေဟု KIO ပြောခွင့်ရပြော

« Prev 1 … 76 77 78 79 80 … 1,113 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

တရုတ်နိုင်ငံခြားရေးဝန်ကြီး ဝမ်ယိ တောင်ကိုရီးယားနှင့် အင်ဒိုနီးရှားသို့ သွားမည် — August 19, 2026 2:17 pm
ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့ — August 19, 2026 2:14 pm
ရုရှားတွင် ဘဏ်အပ်ငွေ ထုတ်ယူမှု စံချိန်တင် မြင့်တက် — August 19, 2026 2:11 pm

Recent Posts

တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး
ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း
မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား
ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး
ဝမ်းပျက်ဝမ်းလျှောရောဂါကြောင့် လူသေဆုံးမှု ရှိနေစဉ် စစ်တပ်က စစ်တွေကို လမ်းပိတ်ထား

Archives

Archives

×Close