NMG Doh – Page 76 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Mar 3

AA ထိုးစစ်ကြောင့် စစ်တွေနှင့် ကပစ ၁၆ အနီး တိုက်ပွဲများ ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၃ ရက်။ အာရက္ခတပ်တော် (AA) ၏ ထိုးစစ်များကြောင့် ရခိုင်မြို့တော် စစ်တွေနှင့် ပဲခူးတိုင်း ပန်းတောင်ရှိ ကပစ (၁၆) စက်ရုံဝန်းကျင်တွင် တိုက်ပွဲများ အပြင်းအထန် ဖြစ်ပွားနေသည်။ စစ်ကော်မရှင်တပ်များသည် မြို့တော်စစ်တွေနှင့် ကပစ (၁၆) စက်ရုံကို ကာကွယ်ရန် ဒရုန်များနှင့် ရေကြောင်း ပစ်ကူများကို အသုံးပြု၍ အသည်းအသန် ခုခံနေရကြောင်း မြေပြင်သတင်းရင်းမြစ်များက ပြောသည်။ စစ်တွေမြို့နယ်အတွင်း၌ ဖေဖော်ဝါရီလ ၂၃ ရက်နေ့မှစတင်ကာ ကျေးတောကျေးရွာနှင့် ရွှေမင်းဂံရေတပ် စခန်း အနီးတွင် တိုက်ပွဲများ တစ်ကျော့ပြန် ပြန်လည်စတင်ခဲ့ခြင်း ဖြစ်သည်။ လက်ရှိတွင် AA သည် စစ်တွေမြို့နှင့် တစ်မိုင်ကျော်အကွာအထိ ချဉ်းကပ်လာနိုင်ပြီဖြစ်ရာ မြို့ပေါ်ရှိ စစ်ကော်မရှင်၏ အုပ်ချုပ်ရေးယန္တရားများအတွက် စိုးရိမ်စရာ အခြေအနေသို့ ရောက်ရှိနေပြီဟု မြေပြင် သတင်းရင်းမြစ်က ပြောသည်။ စစ်ရေးအခြေအနေနှင့် ပတ်သက်၍ စစ်တွေမြို့ခံ သတင်းရင်းမြစ်က “ညတိုင်းပဲ နေဗီသင်္ဘောတွေကနေ လက် နက်ကြီးတွေနဲ့ ပစ်နေတယ်။ AA ဘက်က ကုန်းကြောင်းရော ရေကြောင်းကပါ ပိတ်ဆို့ထားတယ်လို့ ကြားရ တယ်။ စစ်တပ်ဘက်ကတော့ မြို့ကို လက်မလွှတ်ရအောင် သင်္ဘောတွေနဲ့ပါ တစ်ညလုံး ပစ်ကူပေးပြီး တားနေရ တဲ့ သဘောရှိတယ်” ဟု ပြောသည်။ ရခိုင်ရှေ့တန်းစစ်မျက်နှာသာမကဘဲ ပဲခူးတိုင်း၊ ပန်းတောင်မြို့နယ်ရှိ စစ်ကော်မရှင်၏ အဓိက လက်နက်ခဲယမ်း ထုတ်လုပ်ရာ စက်ရုံတစ်ခုဖြစ်သော ကပစ (၁၆) ဝန်းကျင်တွင်လည်း ဖေဖော်ဝါရီ ၂၇ ရက်နေ့မှစ၍ တိုက်ပွဲများ အရှိန်မြင့်လာခဲ့သည်။ AA နှင့် ပူးပေါင်းတပ်များသည် စက်ရုံ၏ အဓိက ကာကင်းစခန်း ၅ ခုထက်မနည်းကို သိမ်းပိုက်ထားနိုင်ပြီဖြစ် သည်။ ပန်းတောင်မြို့နယ်အတွင်းရှိ တိုက်ပွဲအခြေအနေကို AA နှင့်နီးစပ်သည့် မြေပြင်သတင်းရင်းမြစ်က “စက်ရုံနားက ကာကင်းစခန်းတွေ တော်တော်များများ ကျသွားပြီလို့ သိရတယ်။ AA ဘက်က လက်နက်ခဲယမ်းတွေပါ သိမ်းမိ ထားတယ်ဆိုတော့ စစ်တပ်ဘက်က တော်တော် အကျအဆုံးများပုံရတယ်။ အခုဆို သူတို့က ဒရုန်းတွေသုံးပြီး စက်ရုံပတ်ပတ်လည် ၃ မိုင်လောက်အထိ တောတွေကို မီးရှို့ပစ်နေတာ။ AA က ကပ်လို့မရအောင် လမ်းရှင်းတဲ့ သဘောမျိုး လုပ်နေတာပါ” ဟု ပြောသည်။ စစ်ကော်မရှင်ဘက်မှ AA ၏ ထိုးစစ်ကို တားဆီးရန်အတွက် စစ်တွေတွင် ရေတပ်အင်အားကို အဓိကအသုံးပြုနေ ပြီး၊ ပန်းတောင် ကပစ (၁၆) တွင်မူ တောတောင်များကို မီးရှို့ဖျက်ဆီးသည့် ဗျူဟာကို အသုံးပြုနေသည်။ သို့သော်လည်း AA ဘက်မှ ထိုးစစ်အရှိန်ကို မလျှော့ဘဲ နယ်မြေစိုးမိုးရေးအတွက် ဆက်လက် ဖိအားပေးနေဆဲ ဖြစ်သည်။ ကပစ (၁၆) မှာ အမြောက်နှင့် လက်နက်ကြီးများထုတ်လုပ်သော စစ်ပစ္စည်း စက်ရုံ ဖြစ်သည်။ အနီးအနားတွင် အရေးပါသော ကပစ (၁)၊ (၃) နှင့် (၁၄) တို့လည်း တည်ရှိသည်။ ယခုကဲ့သို့ စစ်တွေနှင့် ပဲခူးတိုင်းရှိ အချက်အချာကျသော နေရာများတွင် တိုက်ပွဲများ ပြင်းထန်လာခြင်းသည် စစ်ကော်မရှင်အတွက် စစ်ရေးအရ အကျပ်ရိုက်စေသည့်အပြင် ဒေသခံပြည်သူများ အတွက်လည်း ဘေးလွတ်ရာ သို့ တိမ်းရှောင်ရမည့် အခြေအနေများ ဖြစ်ပေါ်နေသည်။ #AA #ကပစ #စစ်တွေတိုက်ပွဲ #အာရက္ခတပ်တော် #စစ်ကော်မရှင်တပ်

AA ထိုးစစ်ကြောင့် စစ်တွေနှင့် ကပစ ၁၆ အနီး တိုက်ပွဲများ ပြင်းထန်

Mar 3

အကြမ်းဖက် ပုဒ်မများဖြင့် စွဲဆို ခံထားရသူများ အမှုပိတ်သိမ်းခြင်း မရှိသေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၃ ရက်။ စစ်ကော်မရှင်က လွတ်ငြိမ်းချမ်းသာခွင့်နှင့် အတူ စွဲဆိုထားသော အမှုများကို ပိတ်သိမ်းပေးမည်ဟု ကြေညာ ထားသော်လည်း မြိတ်ဒေသအတွင်း တိမ်းရှောင် နေရသူများနှင့် ကြားနာစစ်ဆေးဆဲ အမှုတွဲအများအပြားမှာမူ ဥပဒေကြောင်းအရ ထူးခြားသော တိုးတက်မှုများ မရှိသေးဘဲ အကျဉ်းထောင်တွင်းနှင့် တရားရုံးများတွင် ဆက်လက်ကျန်ရှိနေဆဲ ဖြစ်သည်ဟု မိသားစုဝင်များက ပြောသည်။ အမှုများ ပိတ်သိမ်းခြင်း မရှိသေးသော်လည်း မြိတ်အကျဉ်းထောင်မှ အကြမ်းဖက်မှု တိုက်ဖျက်ရေး ဥပဒေ ပုဒ်မများဖြင့် ထောင်ဒဏ်ကျ ခံနေရသူ အချို့ အပါအဝင် စုစုပေါင်း ၃၅ ဦး ပြန်လည်လွတ်မြောက်လာခဲ့ သည်ဟု ဒေသခံ သတင်း ရင်းမြစ်များက ဆိုသည်။ မတ်လ ၂ ရက် နံနက်ပိုင်းတွင် အမျိုးသား ၁၃ ဦးနှင့် အမျိုးသမီး ၁၆ ဦးကို ဦးစွာလွှတ်ပေးခဲ့ပြီး၊ ညနေပိုင်းတွင် အမျိုးသား ၅ ဦးနှင့် အမျိုးသမီး ၁ ဦး ထပ်မံလွတ်မြောက်လာခဲ့ရာ တစ်နေ့တာအတွင်း စုစုပေါင်း ၃၅ ဦး လွတ် မြောက်လာခြင်း ဖြစ်သည်။ လွတ်မြောက်လာသူများထဲတွင် အကြမ်းဖက်မှုတိုက်ဖျက်ရေး ဥပဒေပုဒ်မများဖြင့် ထောင်ဒဏ် ၁၀ နှစ်ကျော် ချမှတ်ခံထားရသည့် နိုင်ငံရေးအကျဉ်းသားအချို့ ပါဝင်လာခြင်းမှာ ထူးခြားချက်တစ်ခု ဖြစ်သည်။ သို့သော်လည်း အမှုတူများထဲမှ အချို့မှာမူ ချန်လှပ်ထားခြင်းခံရသည့်အတွက် မိသားစုဝင်များအကြား ဝမ်းနည်း မှုနှင့် စိုးရိမ်မှုများ ရှိနေကြသည်။ အကျဉ်းကျခံနေရသူများ၏ အသက် ၅၀ ခန့်အရွယ် ဖခင်ဖြစ်သူက “ပြန်လွတ်လာသူတွေထဲမှာ အကြမ်းဖက် ဥပဒေ ပုဒ်မနဲ့ ထောင်ချခံထားရသူတွေပါသလို၊ ထောင်ဒဏ် ဆယ်နှစ်ကျော်ချခံထားရသူတွေလည်း ပါပါတယ်။ ၂၀၂၅ ခုနှစ် သြဂုတ်လတုန်းက အမိန့်ချထားတဲ့ ပင်လယ်ရွာဘက်က မောင်နှမနှစ်ယောက်မှာ ၅ နှစ်ကျတဲ့ အမျိုးသား တစ်ယောက်တော့ လွတ်ပြီ၊ ၁၇ နှစ်ကျထားတဲ့ အမျိုးသမီးကတော့ အခုထိ မလွှတ်ပေး သေးဘူး” ဟု ပြောသည်။ မတ်လ ၁ ရက်နေ့ ညပိုင်းက နိုင်ငံပိုင်မီဒီယာများမှ တစ်ဆင့် ကြေညာခဲ့သည့် စစ်ကော်မရှင်၏ လွတ်ငြိမ်း ချမ်းသာခွင့်တွင် အကြမ်းဖက်မှုတိုက်ဖျက်ရေး ဥပဒေပုဒ်မ ၅၀-ည နှင့် ၅၂-က တို့ဖြင့် စွပ်စွဲခံထားရသူ ၇,၃၃၇ ဦးနှင့် အခြားအကျဉ်းသား ၂,၈၂၅ ဦး ပါဝင်သည်။ ထို့အပြင် နိုင်ငံခြားသား အကျဉ်းသား ၁၀ ဦးကိုလည်း ပြည်နှင်ဒဏ်ပေးသည့်အနေဖြင့် လွှတ်ပေးခဲ့သည်။ သို့ရာတွင် ဤလွတ်မြောက်မှုနောက်၌ တင်းကျပ်သော ကန့်သတ်ချက်များ ပါဝင်နေသည်။ ပြန်လည်လွတ်မြောက်လာသူများအနေဖြင့် နောက်နောင်တွင် ပြစ်မှုထပ်မံကျူးလွန်ပါက ယခုကျခံရန် ကျန်ရှိ သော ပြစ်ဒဏ်များကိုပါ ပေါင်းစပ်၍ ဆက်လက်ကျခံရမည်ဟူသော ‘ဝန်ခံကတိ’ ပုဒ်မ ၄၀၁ ဖြင့် လွှတ်ပေးခဲ့ခြင်း ဖြစ်သည်။ စစ်ကော်မရှင်က မတ်လ ၂ ရက်နေ့ မတိုင်မီ ပြစ်ဒဏ်ကျခံနေရသူများကို ပြစ်ဒဏ်၏ ၆ ပုံ ၁ ပုံ လျှော့ပေါ့ပေး မည်ဟု ဆိုသော်လည်း လူသတ်မှု၊ မုဒိမ်းမှုနှင့် ပေါက်ကွဲမှုဆိုင်ရာအမှုများ၊ မတရားသင်း အက်ဥပဒေနှင့် လက်နက်မှုများ၊ မူးယစ်ဆေးဝါး၊ သဘာဝဘေးစီမံမှုနှင့် အဂတိလိုက်စားမှုများ ကို ချန်လှပ်ထားသည်။ #မြိတ် #ထားဝယ် #လွတ်ငြိမ်းချမ်းသာခွင့်

အကြမ်းဖက် ပုဒ်မများဖြင့် စွဲဆို ခံထားရသူများ အမှုပိတ်သိမ်းခြင်း မရှိသေး

Mar 3

ဟော်မုဇ် ရေလက်ကြား ပိတ်ဆို့မှုကြောင့် ကမ္ဘာ့ ကုန်စည်စီးဆင်းမှု ထိခိုက် လောင်စာဆီနှင့် ကုန်ပစ္စည်းများ ဈေးတက်နိုင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၃ ရက်။ ပင်လယ်ကွေ့ စစ်ပွဲကြောင့် အီရန် အနီးမှာ ရှိတဲ့ ဟော်မုဇ် ရေလက်ကြားဟာ မနေ့က မတ်လ ၂ ရက်နေ့နှောင်းပိုင်းက စလို့ အသွားအလာ မရှိအောင် ပိတ်သွားပါတယ်။ ဟော်မုဇ် ရေလက်ကြားဟာ ကမ္ဘာ့စွမ်းအင်စျေးကွက်အတွက် အသက်သွေးကြောဖြစ်ပြီး ကမ္ဘာ့ပင်လယ်ရေကြောင်းမှတစ်ဆင့် တင်ပို့တဲ့ ရေနံ စုစုပေါင်းရဲ့ ၂၀ ရာခိုင်နှုန်း ဟာ ဒီလမ်းကြောင်းကနေ ဖြတ်သန်းတာ ဖြစ်ပါတယ်။ ဒါ့အပြင် ဒူဘိုင်းမြို့မှာရှိတဲ့ Jebel Ali ဆိပ်ကမ်း (ကမ္ဘာ့ ၁၀ ခုမြောက် အကြီးဆုံး ကွန်တိန်နာဆိပ်ကမ်း) ကို သွားရာလမ်းကြောင်းဖြစ်လို့ ဒေသတွင်းနိုင်ငံပေါင်း ၁၀ ကျော်ရဲ့ ကုန်စည်စီးဆင်းမှုအတွက် မရှိမဖြစ် အရေးပါပါတယ်။ ၁၉၈၀-၁၉၈၈ အီရန်-အီရတ် စစ်ပွဲအတွင်းမှာတောင် ဒီရေလက်ကြားကို ကုန်သွယ်ရေးအတွက် ဖွင့်လှစ်ထားနိုင်ခဲ့ပေမဲ့၊ အခု စနေနေ့က စတင်တဲ့ တိုက်ခိုက်မှုတွေနောက်ပိုင်းမှာတော့ သမိုင်းမှာ ပထမဆုံးအကြိမ်အဖြစ် ကုန်စည်စီးဆင်းမှုတွေ လုံးဝရပ်တန့် (Freeze) သွားခဲ့ပါတယ်။ ကမ္ဘာ့အကြီးဆုံး သင်္ဘောလိုင်းကြီးများဖြစ်တဲ့ MSC, Maersk, CMA CGM, Hapaq Lloyd နဲ့ တရုတ်နိုင်ငံပိုင် Cosco တို့ဟာ သူတို့ရဲ့ သင်္ဘောတွေကို ဘေးကင်းရာမှာ ခိုလှုံနေဖို့ အမိန့်ပေးထားပါတယ်။ အရှေ့အလယ်ပိုင်းကနေ ထွက်တဲ့ ရေနံ၊ သဘာဝဓာတ်ငွေ့၊ မြေဩဇာ၊ ပလတ်စတစ်နဲ့ ကမ္ဘာ့အလူမီနီယမ် ထုတ်လုပ်မှု ၉ ရာခိုင်နှုန်း တို့ ထိခိုက်နေပါတယ်။ ပြန်လည်တင်သွင်းမှုအပိုင်းမှာ ဂျာမနီရဲ့ ကားနဲ့ စက်ယန္တရားများ၊ ပြင်သစ်ရဲ့ စိုက်ပျိုးရေးထုတ်ကုန်နဲ့ ဆေးဝါးများ၊ အီတလီရဲ့ စကျင်ကျောက်နဲ့ ကြွေထည်ပစ္စည်း တင်ပို့မှုတွေ ရပ်ဆိုင်းကုန်ပါတယ်။ အွန်လိုင်းစျေးဝယ်ပလက်ဖောင်းတွေ ဖြစ်တဲ့ Amazon, Temu နဲ့ Shein တို့က ကုန်ပစ္စည်းပို့ဆောင်မှုတွေ ရက်ပေါင်းများစွာ ကြန့်ကြာနိုင်ကြောင်း ဝယ်ယူသူတွေကို သတိပေးထားပါတယ်။ သင်္ဘောတွေဟာ အန္တရာယ်ရှိတဲ့ ပင်လယ်နီလမ်းကြောင်းကို ရှောင်ကွင်းပြီး အာဖရိကတိုက် တောင်ဘက် ဂွတ်ဟုတ် အငူ (Cape of Good Hope) ကနေ ပတ်သွားနေရလို့ ခရီးစဉ် ၁၀ ရက်ခန့် ပိုကြာမြင့်ကာ သယ်ယူစရိတ် ၃၀ ရာခိုင်နှုန်းခန့် ပိုမိုမြင့်တက် လာနေပါတယ်။ #ဟော်မုဇ်ရေလက်ကြား #အရှေ့အလယ်ပိုင်း #လောင်စာဆီ

ဟော်မုဇ် ရေလက်ကြား ပိတ်ဆို့မှုကြောင့် ကမ္ဘာ့ ကုန်စည်စီးဆင်းမှု ထိခိုက်လောင်စာဆီနှင့် ကုန်ပစ္စည်းများ ဈေးတက်နိုင်

Mar 3

ပြင်သစ်က နျူကလီးယား လက်နက်များ အရေအတွက် တိုးမြှင့်မည်၊ ဥရောပ နိုင်ငံများကို ဖိတ်ခေါ် လုပ်ဆောင်မည် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၃ ရက်။ ပြင်သစ်သမ္မတ မက်ခရွန်က နျူကလီးယားအင်အားကို မြှင့်တင်သွားမည် ဖြစ်ပြီး အဆိုပါ အစီအစဉ်တွင် ဥရောပမဟာမိတ်များကိုလည်း ပါဝင်ခွင့်ပြုမည်ဟု မတ်လ ၂ ရက်နေ့က ကြေညာလိုက်သည်။ ပြင်သစ်သမ္မတ မက်ခရွန်က ပြင်သစ်၏ နျူကလီးယားလက်နက် အရေအတွက်ကို တိုးမြှင့်သွားမည်ဖြစ်ကြောင်း ကြေညာခဲ့ခြင် ဖြစ်သည်။ လက်ရှိတွင် ပြင်သစ်သည့် ကမ္ဘာ့စတုတ္ထအကြီးဆုံး နျူကလီးယားပိုင်ရှင်ဖြစ်ပြီး ထိပ်ဖူးပေါင်း (၂၉၀) ခန့် ရှိသည်။ ယခင်က ဥရောပနိုင်ငံများသည် အမေရိကန်၏ နျူကလီးယားကာကွယ်မှုကိုသာ အဓိက အားထားခဲ့ကြသည်။ ယခုအခါတွင် ပြင်သစ်က ဂျာမနီ၊ ပိုလန်၊ နယ်သာလန်၊ ဘယ်လ်ဂျီယံ၊ ဒိန်းမတ်နှင့် ဆွီဒင်နိုင်ငံများကို ပြင်သစ်၏ နျူကလီးယားစစ်ရေးလေ့ကျင့်မှုများတွင် ပါဝင်ခွင့်ပြုတော့မည် ဖြစ်သည်။ ပြင်သစ်ရဲ့ နျူကလီးယားတင်ဆောင်နိုင်သည့် လေယာဉ်များကို အခြားဥရောပမဟာမိတ်နိုင်ငံများ၏ အခြေစိုက်စခန်းများတွင် ထားရှိရန် အထိ မက်ခရွန်က ရည်ရွယ်ထားသည်။ ယင်းမှာ ရန်သူများက ဥရောပကို မတိုက်ခိုက်ရဲအောင် ကြိုတင်ဟန့်တားမည့် မူဝါဒသစ် ဖြစ်သည်။ ဂျာမနီအဓိပတိသစ် ဖရိုင်းဒရစ် မာ့ဇ် (Friedrich Merz) နဲ့ မက်ခရွန်တို့သည် နျူကလီးယားဆိုင်ရာ ပူးပေါင်းဆောင်ရွက်ရေးအဖွဲ့ (Nuclear Steering Group) တစ်ခုကို ဖွဲ့စည်းလိုက်ပြီး ယခုနှစ်အတွင်းမှာပင် လက်တွေ့ကျသော စစ်ရေးပူးပေါင်းမှုများကို စတင်တော့မှာလည်း ဖြစ်သည်။ ပြင်သစ်က သူ့နိုင်ငံအတွက် နျူကလီးယား လက်နက်အရေအတွက် တိုးမြှင့်သွားရုံမကပဲ နျူကလီးယား ကိစ္စတွင် ဥရောပကို ဦးဆောင်သွားမည့် သဘော ဖြစ်သည်။

ပြင်သစ်က နျူကလီးယား လက်နက်များ အရေအတွက် တိုးမြှင့်မည်၊ ဥရောပ နိုင်ငံများကို ဖိတ်ခေါ် လုပ်ဆောင်မည်

Mar 3

ကနေဒါက အိန္ဒိယကို နျူကလီးယား စွမ်းအင်အတွက် ယူရေနီယံကို ၁၀ နှစ်ကြာ ထောက်ပံ့မည် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၃ ရက်။ အိန္ဒိယနဲ့ ကနေဒါနိုင်ငံတို့အကြား နှစ်ရှည်လများ တင်းမာနေသည့် ဆက်ဆံရေးကို ပြန်လည်ကုစားပြီး "သမိုင်းဝင် နျူကလီးယားစွမ်းအင်ဆိုင်ရာ သဘောတူညီချက်" အပါအဝင် ကဏ္ဍစုံ ပူးပေါင်းဆောင်ရွက်ရန် မတ်လ ၂ ရက်နေ့တွင် လက်မှတ်ရေးထိုးလိုက်သည်။ ကနေဒါဝန်ကြီးချုပ် မာ့ခ် ကာနေး (Mark Carney) နှင့် အိန္ဒိယဝန်ကြီးချုပ် နရင်ဒရာ မိုဒီ (Narendra Modi) တို့ နယူးဒေလီမြို့တွင် တွေ့ဆုံခဲ့ကြခြင်း ဖြစ်သည်။ အိန္ဒိယကို ၁၀ နှစ်ကြာ ယူရေနီယံ (Uranium) ထောက်ပံ့ပေးမည့် သမိုင်းဝင် သဘောတူညီချက်ကို ရရှိခဲ့ကြသည်။ ထို့အပြင် အဆင့်မြင့် နျူကလီးယား ဓာတ်ပေါင်းဖို နည်းပညာများတွင် လည်း ပူးပေါင်းလုပ်ဆောင်သွားရန် သဘောတူထားကြသည်။ ယခင် ကနေဒါ ဝန်ကြီးချုပ် ဂျပ်စတင် ထရူးဒိုး လက်ထက်က ဆစ်ခ်ခွဲထွက်ရေးခေါင်းဆောင် လုပ်ကြံခံရမှုနှင့် ပတ်သက်ပြီး ဖြစ်ပွားခဲ့သည့် သံတမန်ရေး တင်းမာမှုများကို အဆုံးသတ်ရန် ကြိုးစားခဲ့ကြခြင်းလည်း ဖြစ်သည်။ ထို့အပြင် ၂၀၂၆ ခုနှစ် အကုန်တွင် လွတ်လပ်သော ကုန်သွယ်မှု သဘောတူညီချက် (Free Trade Deal) ကို အပြီးသတ်ရန် ရည်မှန်းထားသည်။ ကနေဒါ အိန္ဒိယ ဆက်ဆံရေးသည် အမေရိကန် သမ္မတ ထရမ့်ရဲ့ အခွန်တိုးမြှင့်မှု (Tariffs) များ ကြောင့် ဖြစ်လာမည့် စီးပွားရေး ရိုက်ခတ်မှုများကို လျှော့ချရန် နှစ်နိုင်ငံလုံးက ကြိုးစားခြင်းလည်း ဖြစ်သည်။ AI (ဉာဏ်ရည်တု)၊ စက်မှုနည်းပညာ၊ အာကာသ၊ ကာကွယ်ရေးနှင့် ပညာရေး ကဏ္ဍများတွင်လည်း ပူးပေါင်းဆောင်ရွက်သွားရန် သဘောတူခဲ့ကြသည်။ ကနေဒါနှင့် အိန္ဒိယနှစ်နိုင်ငံစလုံးမှာ အမေရိကန်၏ ကုန်သွယ်ရေးဖိအားများကို ခံနေရသောကြောင့် အချင်းချင်း မဟာမိတ်ပြန်လုပ်ပြီး "အမေရိကန်အပေါ် အားကိုးရမှု လျှော့ချရန်" ကြိုးစားလာခြင်းလည်း ဖြစ်သည်။ #ကနေဒါ #အိန္ဒိယ #ယူရေနီယံ #နျူကလီးယား

ကနေဒါက အိန္ဒိယကို နျူကလီးယား စွမ်းအင်အတွက် ယူရေနီယံကို ၁၀ နှစ်ကြာ ထောက်ပံ့မည်

Mar 3

တရုတ်က အီရန်ကို ထောက်ခံကြောင်း ကြေညာ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၃ ရက်။ တရုတ်နိုင်ငံခြားရေးဝန်ကြီးက အီရန်နိုင်ငံ၏ အချုပ်အခြာအာဏာနှင့် နယ်မြေတည်တံ့ခိုင်မြဲရေး အတွက် ထောက်ခံမှုပေးမည်ဟု ကတိပြုလိုက်သည်။ ယင်းကို တရုတ် အစိုးရပိုင် ဆင်ဟွာ သတင်းဌာနတွင် ဖော်ပြပါရှိသည်။ တရုတ်နိုင်ငံခြားရေးဝန်ကြီး ဝမ်ယိ (Wang Yi) က တရုတ်နှင့် အီရန်နိုင်ငံတို့ အကြားရှိ ရှေးယခင်ကတည်းက တည်ရှိခဲ့သော ချစ်ကြည်ရင်းနှီးမှုကို တရုတ်နိုင်ငံအနေဖြင့် တန်ဖိုးထားသည်ဟု မတ်လ ၂ ရက်နေ့က ပြောကြားခဲ့သည်။ ထို့အပြင် အီရန်နိုင်ငံ၏ အချုပ်အခြာအာဏာ၊ လုံခြုံရေး၊ နယ်မြေတည်တံ့ခိုင်မြဲမှုနဲ့ အမျိုးသားဂုဏ်သိက္ခာ တို့ကို ကာကွယ်စောင့်ရှောက်ရာတွင် တရုတ်နိုင်ငံက ထောက်ခံအားပေးသွားမည်ဖြစ်ကြောင်းလည်း ပြောကြားလိုက်သည်။ တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဦးဆောင်အဖွဲ့ဝင်လည်းဖြစ်သည့် ဝမ်ယိသည် အီရန်နိုင်ငံခြားရေးဝန်ကြီး ဆယက်ဒ် အဘတ်စ် အရတ်ချီ (Seyed Abbas Araghchi) နှင့် တယ်လီဖုန်း ဆက်သွယ်မှု အတွင်း ယခု ကဲ့သို့ထည့်သွင်းပြောကြားခဲ့ခြင်း ဖြစ်သည်။ နယ်မြေတည်တံ့ခိုင်မြဲမှု ကို ထောက်ခံသည်ဟု ပြောကြားခဲ့ခြင်းဖြင့် အမေရိကန်အနေဖြင့် အီရန်နိုင်ငံအတွင်းသို့ ကျူးကျော်ဝင်ရောက်တာမျိုး (သို့မဟုတ်) အီရန်နိုင်ငံကို အစိတ်စိတ်အမွှာမွှာ ဖြစ်အောင်လုပ်တာမျိုးကို တရုတ်က လက်မခံဘူးဟု သတိပေးလိုက်ခြင်းလည်း ဖြစ်သည်။ တချိန်တည်းလိုလိုမှာပင် တရုတ် နိုင်ငံခြားရေး ဝန်ကြီး ဝမ်ယိက အိုမန် နိုင်ငံခြားရေး ဝန်ကြီးဆီကို ဖုန်းခေါ်ပြီး ပင်လယ်ကွေ့ဒေသတွင်း နိုင်ငံတွေအနေဖြင့် စည်းလုံးညီညွတ်မှုကို အားကောင်းရန်နှင့် အိမ်နီးချင်းကောင်း ပီသတဲ့ ချစ်ကြည်ရင်းနှီးမှုကို တည်ဆောက်ကြမယ်လို့ မျှော်လင့်ကြောင်း ပြောကြားခဲ့သည်။ ဆိုလိုသည်မှာ ပင်လယ်ကွေ့နိုင်ငံတွေ အနေနဲ့ အီရန်ကို ပံ့ပိုးကူညီကြဖို့ တောင်းဆိုလိုက်ခြင်းဖြစ်သည်။

တရုတ်က အီရန်ကို ထောက်ခံကြောင်း ကြေညာ

Mar 3

အရှေ့အလယ်ပိုင်း စစ်မီး ပိုမို ကျယ်ပြန်လာ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၃ ရက်။ အမေရိကန်နှင့် အစ္စရေးတို့ ပူးပေါင်း၍ အီရန်နိုင်ငံအပေါ် ထိုးစစ်ဆင်နွှဲခဲ့သည့် တတိယမြောက်နေ့တွင် စစ်မီးသည် အီရန်နယ်နိမိတ်ကို ကျော်လွန်၍ လက်ဘနွန်၊ ကူဝိတ်၊ ယူအေအီး၊ ကာတာနှင့် ဆော်ဒီအာရေဗျနိုင်ငံများအထိ ကူးစက်ပြန့်နှံ့လျက် ရှိပါသည်။ အစ္စရေး၏ လက်ဘနွန်အပေါ် ဗုံးကြဲတိုက်ခိုက်မှုကြောင့် လူပေါင်း ၅၀ ကျော် သေဆုံးခဲ့ရသည်။ အီရန်နိုင်ငံအတွင်း၌လည်း မူလတန်းကျောင်းသူငယ်လေးများ အပါအဝင် အရပ်သား ၅၅၅ ဦး ထက်မနည်း အသက်ဆုံးရှုံးခဲ့ရပြီ ဖြစ်ပါသည်။ အီရန်၏ အမြင့်ဆုံး ဘာသာရေးခေါင်းဆောင် အယာတိုလာ ခါမေနီ လုပ်ကြံခံရမှုမှာလည်း အတည်ဖြစ်သွားခဲ့ပြီး လက်ရှိတွင် သမ္မတအပါအဝင် သုံးဦးပါဝင်သော ကောင်စီက နိုင်ငံကို ယာယီဦးဆောင်လျက် ရှိသည်။ အမေရိကန်သမ္မတ ထရမ့်က ဤစစ်ပွဲသည် လေးပတ်ခန့် ကြာမြင့်နိုင်ကြောင်း ခန့်မှန်းထားသော်လည်း အမေရိကန်စစ်သည်များ ကျဆုံးမှုနှင့် လေယာဉ်ပျက်ကျမှုများ ရှိနေခြင်းကြောင့် တင်းမာမှုများ လျော့ပါးမည့်လက္ခဏာ မရှိသေးပေ။ အမေရိကန် စစ်သည် အနည်းဆုံး ၆ ဦး သေဆုံးခဲ့ပြီ ဖြစ်သည်။ စစ်ပွဲ၏ နောက်ဆက်တွဲအဖြစ် ကမ္ဘာ့ရေနံဈေးနှုန်း ၉ ရာခိုင်နှုန်းနှင့် သဘာဝဓာတ်ငွေ့ဈေးနှုန်း ၄၈ ရာခိုင်နှုန်းအထိ ထိုးတက်သွားခဲ့သည်။ ဟော်မုဇ်ရေလက်ကြား ပိတ်ဆို့ခံရနိုင်သည့် ခြိမ်းခြောက်မှုကြောင့် ကမ္ဘာ့ကုန်သွယ်ရေးကို ရိုက်ခတ်မှု ကြီးမာနေသည်။ ဒေသတွင်း တိုက်ခိုက်မှုများနှင့် လေဆိပ်များကို ပစ်မှတ်ထး တိုက်ခိုက်မှုများကြောင့် လေကြောင်းခရီးစဉ်များ အကြီးအကျယ် ရပ်တန့်နှောင့်နှေးလျက် ရှိသည်။

အရှေ့အလယ်ပိုင်း စစ်မီး ပိုမို ကျယ်ပြန့်လာ

Mar 2

မိုးကုတ်နှင့် မိုးမိတ်တွင် တိုက်ပွဲများ ဆက်လက် ဖြစ်ပွားဆဲဖြစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂ ရက်။ စစ်ကော်မရှင်တပ်က ပြန်လည်ဝင်ရောက်တပ်စွဲထားသည့် မန္တလေးတိုင်း၊ မိုးကုတ်မြို့နှင့် ရှမ်းပြည် မြောက်ပိုင်း မိုးမိတ်မြို့တို့တွင် ယခုနှစ်ဆန်းပိုင်းအတွင်း တိုက်ပွဲကြီးငယ် ၁၇ ကြိမ်ထက်မနည်း ဖြစ်ပွားခဲ့ပြီး စစ်တပ်ဘက် မှ အကျအဆုံးများသည်ဟု အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာန က ထုတ်ပြန်သည်။ စစ်အုပ်စုဘက်မှ မြို့တွင်းပိုင်း၌ တည်ငြိမ်နေသယောင် ဝါဒဖြန့်ချိမှုများ ပြုလုပ်နေသော်လည်း မြို့နှင့် တစ်မိုင်ခန့် သာဝေးသည့် ပတ်ဝန်းကျင်ကျေးရွာများတွင် နေ့စဉ်နီးပါး တိုက်ပွဲများ ပြင်းထန်နေဆဲဖြစ်သည်ဟု ဆိုသည်။ တရုတ်နိုင်ငံ၏ ကြားဝင်စေ့စပ်မှုအရ ပြီးခဲ့သည့် ၂၀၂၅ ခုနှစ်၊ နိုဝင်ဘာလကုန်တွင် တအာင်းတပ်မတော် (TNLA) က မိုးကုတ်နှင့် မိုးမိတ်မြို့တို့မှ ပြန်လည်ဆုတ်ခွာပေးခဲ့ရသည်။ သို့သော် စစ်ကော်မရှင်တပ်များ ပြန်လည်ဝင်ရောက်လာသည့် နောက်တစ်နေ့မှစ၍ ပြည်သူ့ကာကွယ်ရေး တပ်မ တော် (PDF) ပူးပေါင်းတပ်များက ခုခံစစ်ဆင်ရေးများကို အရှိန်မြှင့်လုပ်ဆောင်ခဲ့ရာ ယနေ့အချိန်အထိ စစ်ရေး တင်းမာမှုများ လျော့ပါးသွားခြင်း မရှိသေးပေ။ မြေပြင်အခြေအနေနှင့် ပတ်သက်၍ မိုးကုတ်မြို့ခံ အမျိုးသမီးတစ်ဦးက “မြို့ထဲမှာတော့ အရင်ကထက် ငြိမ်သလို ရှိပေမယ့် အနောက်ခြမ်းဘက်ကတော့ လက်နက်ကြီးသံတွေ နေ့တိုင်းလိုလိုမျိုး မဟုတ်ရင်တောင် မကြာမကြာ ကြားနေရတာ။ မြို့ပြင်ထွက်တာနဲ့ တိုက်ပွဲအသံတွေက ကြားနေရပြီ ဟုတ်တယ်။ တစ်ခါတလေဆို ရှော့တိုက် ဒုံးသံလိုမျိုး၊ လက်နက်ကြီးသံလိုမျိုး ကြားရတယ်။ မြို့ထဲအထိပါ တုန်သွားတာမျိုး ရှိတယ်” ဟု ပြောသည်။ NUG ကာကွယ်ရေးဝန်ကြီးဌာန၏ ထုတ်ပြန်ချက်အရ ဇန်နဝါရီလအတွင်း တိုက်ပွဲကြီး ၇ ကြိမ်နှင့် ဖေဖော်ဝါရီလ အတွင်း တိုက်ပွဲကြီးငယ် ၁၀ ကြိမ် ဖြစ်ပွားခဲ့ရာ စစ်ကော်မရှင်ဘက်မှ ၂၁ ဦး သေဆုံးခဲ့ပြီး PDF ရဲဘော်အချို့ လည်း ထိခိုက်ကျဆုံးမှုများ ရှိခဲ့သည်။ ထို့ပြင် တိုက်ပွဲအတွင်း ဖမ်းဆီးရမိသည့် စစ်သုံ့ပန်းများကိုလည်း စနစ်တကျ ထိန်းသိမ်းစောင့်ရှောက်ထား ကြောင်း မြေပြင်ရှိ စစ်ရေးသတင်းရင်းမြစ်က ပြောသည်။ တော်လှန်ရေးတပ်ဖွဲ့ဝင်တစ်ဦးက “စစ်တပ်ဘက်က မြို့ကို သူတို့စိုးမိုးထားနိုင်ပြီလို့ ပြောနေတာက ဟန်ပြ သက် သက်ပဲ။ ကျနော်တို့ PDF တွေက မြို့ပတ်ပတ်လည်မှာ ရှိနေတယ်။ သူတို့ရဲ့ ထောက်ပံ့ရေး လမ်းကြောင်း တွေနဲ့ အုပ်ချုပ်ရေးပစ်မှတ်တွေကို အထူးစစ်ဆင်ရေးတွေနဲ့ နေ့တိုင်း ထိုးနှက်နေတာ။ မြို့အနောက်ခြမ်းက ရွာတွေမှာ ဆိုရင် သူတို့ တော်တော်လေး အထိနာနေတာတွေ ရှိပါတယ်” ဟု ပြောသည်။ လက်ရှိတွင် PDF တပ်ဖွဲ့များသည် စစ်ရေးတိုက်ခိုက်မှုများအပြင် နယ်မြေလုံခြုံရေးနှင့် မူးယစ်ဆေးဝါး တားဆီး နှိမ်နင်းရေး လုပ်ငန်းများကိုပါ ပူးတွဲဆောင်ရွက်နေကြောင်း ဆိုသည်။ ပုသိမ်-မုံရွာ လမ်းပိုင်းနှင့် မိုးကုတ်-မိုးမိတ် လမ်းပိုင်းတလျှောက် စစ်ရေးအခြေအနေမှာ အချိန်မရွေး ပေါက်ကွဲနိုင် သည့် အနေအထားတွင် ရှိနေသဖြင့် ခရီးသွားပြည်သူများ အနေဖြင့် လုံခြုံရေးသတိ အထူးရှိကြရန် တော်လှန်ရေးအဖွဲ့များက သတိပေးထားသည်။

မိုးကုတ်နှင့် မိုးမိတ်တွင် တိုက်ပွဲများ ဆက်လက် ဖြစ်ပွားဆဲဖြစ်

Mar 2

ကော်သူးလေပြည်ကို ပြည်ထောင်စု ယူနစ် တစ်ခု အဖြစ် တည်ထောင်ဖွဲ့စည်းမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂ ရက်။ ကရင်ဘိုးဘေးတို့၏ မျှော်လင့်ချက်ဖြစ်သလို ကရင်တစ်မျိုးသားလုံး၏ အိပ်မက်လည်းဖြစ်သည့် ‘ကော်သူးလေ ပြည်’ တည်ဆောက်ရေးကို ဖက်ဒရယ် ပြည်ထောင်စုမူဘောင် အတွင်းမှပင် အကောင်အထည် ဖော်သွားမည် ဖြစ်ကြောင်း ကရင်အမျိုးသားအစည်းအရုံး (KNU) က အတိအလင်း ပြောကြားလိုက်သည်။ အဆိုပါ တည်ဆောက်ရေးသည် ပြည်ထောင်စုမှ ခွဲထွက်ရန်မဟုတ်ဘဲ တိုင်းရင်းသားညီအစ်ကိုများနှင့်အတူ တန်းတူညီမျှစွာ ယှဉ်တွဲနေထိုင်နိုင်မည့် ပြည်နယ်တစ်ခုအဖြစ် ရည်ရွယ်ခြင်းဖြစ်သည်ဟု ဆိုသည်။ “ကော်သူးလေ” ဟူသည့် အမည်နာမနှင့် ပတ်သက်၍ KNU ပြောရေးဆိုခွင့်ရှိသူ ပဒိုစောတောနီးက “ကျနော်တို့က ကော်သူးလေပြည်သားတွေဆိုတာက ကျနော်တို့ ဒီဘိုးဘွားတွေကနေ လက်ဆင့်ကမ်းလာတဲ့ အမည်နာမ တစ်ခု အနေနဲ့ ကျနော်တို့ ကရင်တွေ နေထိုင်တဲ့ တိုင်းပြည်နော်။ ဒါပေမယ့် သူ့ရဲ့ မူရင်းအဓိပ္ပာယ်ကတော့ မကောင်းမှု အလုံးစုံကင်းစင်တဲ့ တိုင်းပြည်လို့ အဓိပ္ပာယ်သက်ရောက်ပါတယ်။ အဲ့ဒီထဲမှာကတော့ ကျနော်တို့ နေထိုင်ကြတာ ဖြစ်တယ်” ဟု ပြောသည်။ KNU အနေဖြင့် ကော်သူးလေပြည် တည်ဆောက်ရေး မူဝါဒကို ၁၉၅၆ ခုနှစ်ကတည်းက စတင်ချမှတ်ခဲ့ခြင်း ဖြစ် ပြီး ယခုလက်ရှိ တော်လှန်ရေးကာလ အကူးအပြောင်းတွင် အပြောင်းအလဲတစ်ခု ဖြစ်ပေါ်စေရန်အတွက် ‘ကော်သူးလေချာတာ’ (Kawthoolei Charter) ကို ရေးဆွဲပြဋ္ဌာန်းကာ လက်တွေ့ကျကျ ဆောင်ရွက်နေပြီ ဖြစ် သည်။ ပဒိုစောတောနီးက ဆက်လက်၍ “နှစ်ပေါင်း ခုနှစ်ဆယ်ထဲမှာပဲ ကျနော်တို့ မယိမ်းမယိုင်ပဲ ပြည်ထောင်စု စစ်စစ် ကို တည်ဆောက်မယ်ဆိုတာ ကျနော်တို့ ခံယူချက်ပြင်းပြင်းနဲ့ပဲ ကျနော်တို့ ချီတက်နေပါတယ်။ အဲဒါကြောင့်မို့ လို့ ကျနော်တို့ ပြောနေတဲ့ ကော်သူးလေပြည်က လွတ်လပ်ချုပ်ခြာအာဏာရှိတဲ့ ကျနော်တို့ သီးခြားနိုင်ငံလည်း မဟုတ်ပါဘူး။ ကျနော်တို့ ပြည်ထောင်စုထဲမှာ ပြည်ထောင်စုအဖွဲ့ဝင် ဆက်ရှိမယ်။ ကျနော်တို့ တခြားညီအစ်ကို လက်တွဲပြီးတော့ အင်မတန်ဖွံ့ဖြိုးတိုးတက် ခိုင်မာတဲ့ ပြည်ထောင်စု၊ သာယာဝပြောတဲ့ ပြည်ထောင်စုတစ်ခု တည်ဆောက်နိုင်ဖို့အတွက် ကျနော်တို့ ဆက်ပြီးတော့ ရုန်းကန်နေကြပါတယ်” ဟု ပြောသည်။ ကော်သူးလေပြည်ကို လက်ရှိ KNU ထိန်းချုပ်ထားသည့် တပ်မဟာ ၇ ခု (သထုံ၊ တောင်ငူ၊ ညောင်လေးပင်၊ မြိတ်-ထားဝယ်၊ ဖာပွန်၊ ဒူးပလာယာ နှင့် ဘားအံခရိုင်) အပေါ် အခြေခံကာ တည်ဆောက်သွားရန် ရည်မှန်းထား သည်။ သို့သော် အဆိုပါဒေသများတွင် ကရင်လူမျိုးများသာမက ဗမာ၊ ရှမ်း၊ မွန်၊ ပအိုဝ်း အစရှိသည့် တိုင်းရင်းသား ပေါင်းစုံ စုပေါင်းနေထိုင်ကြသည့်အတွက် နယ်မြေအငြင်းပွားမှုများကို ရှောင်ရှားကာ အားလုံးလက်ခံနိုင်သည့် ငြိမ်းချမ်းစွာ ယှဉ်တွဲနေထိုင်ရေးမူကို ကျင့်သုံးသွားမည်ဟု ဆိုသည်။ “ကျနော်တို့ ပြည်ထောင်စုကို ဖွဲ့နိုင်ရေးအတွက် ပြည်နယ်အသီးသီးမှာရှိတဲ့ ပြည်နယ်တွေက သူ့မှာသူ ဖွဲ့စည်းပုံ အခြေခံဥပဒေဆိုတာလည်း ရှိရမယ်လေ။ ဒါပေမယ့် ကျနော်တို့ ဒီလိုမျိုး တော်လှန်ရေးကာလ အကူးအပြောင်း ဖြစ်နေတဲ့ ကာလတွေမှာတော့ ဒီလိုမျိုး တကယ်တိကျခိုင်မာတဲ့ ဖွဲ့စည်းပုံအခြေခံဥပဒေကို မသုံးနိုင်သေးတဲ့ အနေအထားမှာ ကော်သူးလေပဋိညာဉ်ဆိုတဲ့ တစ်ခုကိုတော့ ကျနော်တို့ ပြဋ္ဌာန်းပြီးတော့ လုပ်ဆောင်သွားဖို့ ရှိတာပေါ့” ဟု ပဒိုစောတောနီးက အကူးအပြောင်းကာလ အုပ်ချုပ်ရေးယန္တရားနှင့် ပတ်သက်၍ ရှင်းပြသည်။ လက်ရှိမြေပြင်အခြေအနေတွင် စစ်ကောင်စီတပ်များသည် ၂၀၂၁ ခုနှစ်နောက်ပိုင်း ဆုံးရှုံးသွားသော နယ်မြေများ ကို ပြန်လည်ရရှိရန် KNU ထိန်းချုပ်နယ်မြေများအတွင်း အပြင်းအထန် ထိုးစစ်ဆင်နေသဖြင့် တိုက်ပွဲများ နေ့စဉ်နှင့်အမျှ ဖြစ်ပွားလျက်ရှိသည်။ စစ်ရေးတင်းမာမှုများ ကြုံတွေ့နေရသော်လည်း KNU အနေဖြင့် အောက်ခြေမှ အထက်သို့ သွားသည့် (Bottom-up) ပြည်ထောင်စုစနစ်ကို တည်ဆောက်ရန်အတွက် ကော်သူးလေပြည် ဖော်ဆောင်ရေးကို ဆက်လက်ရုန်းကန် သွားမည်ဟု ပြောသည်။

ကော်သူးလေပြည်ကို ပြည်ထောင်စု ယူနစ် တစ်ခု အဖြစ် တည်ထောင်ဖွဲ့စည်းမည်

« Prev 1 … 74 75 76 77 78 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close