သတင်း

တိုက်ပွဲ ပြင်းထန်လာသဖြင့် ဗန်းမောက် ဒေသခံများ စစ်ရှောင် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၆ ရက်။ စစ်ကိုင်းတိုင်းဒေသကြီး၊ ဗန်းမောက်မြို့အနီး တိုက်ပွဲပြင်းထန်လာမှုကြောင့် ကျေးရွာ ၁၅ ရွာမှ ဒေသခံ ၂,၀၀၀ ခန့် စစ်ဘေးတိမ်းရှောင်နေရသည်။ ဗန်းမောက်မြို့အနီးတွင် စစ်ကော်မရှင်တပ်နှင့် ရှမ်းနီအမျိုးသား တပ်မတော် (SNA) ပူးပေါင်းတပ်ဖွဲ့တို့၏ ထိုးစစ် ကြောင့် ဒေသကာကွယ်ရေး ပူးပေါင်းတပ်ဖွဲ့များနှင့် တိုက်ပွဲများ ပြင်းထန်လာနေသည်။ အဆိုပါ စစ်ရေးတင်းမာမှု အခြေအနေများကြောင့် ကျေးရွာပေါင်း ၁၅ ရွာခန့်မှ အရပ်သားများ ဘေးလွတ်ရာသို့ ထွက်ပြေး တိမ်းရှောင်နေရကြောင်း ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့ (ပအဖ) က ထုတ်ပြန်ထားသည်။ စစ်ရေးအခြေအနေ သိရှိသူ ဒေသခံတစ်ဦးက “အခုတိုက်ပွဲက စက်တောကျေးရွာဘက်မှာ ဖြစ်နေတာ။ စစ်ဘေး ရှောင်တွေကတော့ များလာတယ်။ တော်လှန်ရေး အင်အားစုတွေဘက်ကို ပြေးလာတာတွေလည်း ရှိသလို ဗန်းမောက် အနောက်ဘက်ခြမ်းကို ပြေးသွားတာတွေလည်းရှိတယ်။ အခုမြို့သိမ်းပြီးတဲ့နောက်ပိုင်း SNA က ထိုးစစ်ဆင်လာတော့ စက်တောရွာအထိ သူတို့ရောက်လာကြတာ။ အခုတော့ အဲ့ဘက်မှာဘဲ တိုက်ပွဲတွေက ဆက်ဖြစ်နေတယ်” ဟု ပြောသည်။ တော်လှန်ရေးအင်အားစုများက ဗန်းမောက်မြို့ကို ထိန်းချုပ်ပြီးနောက်ပိုင်းတွင် စစ်ကော်မရှင်တပ်နှင့် SNA ပူးပေါင်းတပ်ဖွဲ့သည် မြို့ကို ပြန်လည်သိမ်းပိုက်ရန် အင်အားဖြည့်တင်းကာ ထိုးစစ်ဆင်မှု အရှိန်မြှင့် လုပ်ဆောင် လာခြင်း ဖြစ်သည်။ ထို့ကြောင့် နှစ်ဖက်တပ်များအကြား တိုက်ပွဲများ ပိုမိုပြင်းထန်လာနေသည်ဟု မြေပြင် သတင်းအရင်းအမြစ်များ က ပြောသည်။ လက်ရှိတွင် ဗန်းမောက်မြို့နှင့် အနီးတစ်ဝိုက်ရှိ စက်တောကျေးရွာ အနီး၌ နှစ်ဖက်တပ်များ တိုက်ပွဲပြင်းထန်နေ ကြောင်း သိရသည်။ စစ်ဘေးရှောင်တိမ်းနေရသည့် ကျေးရွာများတွင် စက်တော၊ အလယ်ရွာ၊ နားယကာ၊ ကံရွာ၊ ကြောင်လည်၊ ပင်ဟင်းခါး၊ ခမိုး၊ မြစ်သေးချင်း စသည့် ကျေးရွာများ အပါအဝင် စုစုပေါင်း ကျေးရွာ ၁၅ ရွာခန့် ပါဝင်ပြီး စစ်ရှောင်အရေအတွက် စုစုပေါင်း ၂ ထောင်ဝန်းကျင် ရှိနေသည်ဟု စစ်ရှောင်အရေး ကူညီပေးနေသူများက ခန့်မှန်းထားသည်။ ဗန်းမောက် - ပအဖ ၏ ထုတ်ပြန်ချက်အရ စစ်ဘေးရှောင် အများစုသည် သက်ကြီးရွယ်အိုများနှင့် ကလေးသူငယ်များ ဖြစ်ကြပြီး၊ အစားအသောက်၊ ဆေးဝါး၊ အဝတ်အထည်နှင့် ခြင်ထောင်များ အရေးတကြီး လိုအပ်လျက်ရှိသည်။ ဗန်းမောက် - ပအဖ ၏ လူမှုကွန်ရက် စာမျက်နှာတွင် “ဒီနေ့အထိ စစ်ရှောင်တွေက တဖွဲဖွဲရောက်ရှိလာ နေပါ တယ်။ အရေးပေါ် ကျန်းမာရေး စောင့်ရှောက်မှုတွေကို ပြည်သူ ၃၀၀ ထက်မနည်းကို ဆေးဝါးကုသပေးပြီး ဖြစ်ပါတယ်။ ရေရှည်မှာ အကူအညီတွေ လိုအပ်နေအုံးမှာပါ” ဟု ရေးသားထားသည်။ ဗန်းမောက်မြို့ကို ပြီးခဲ့သည့် စက်တင်ဘာလ ၂၀ ရက်နေ့တွင် တော်လှန်ရေးအင်အားစုများက သိမ်းပိုက်ထိန်းချုပ် ခဲ့ပြီး ခမိုးနှင့် စက်တော ကျေးရွာများကိုပါ ထိန်းချုပ်နိုင်ခဲ့သည်။ သို့သော် အောက်တိုဘာလ ၄ ရက်နေ့တွင် ဟုမ္မလင်းမှ တပ်မ ၃၃ လက်အောက်ခံ စစ်ကော်မရှင်တပ်များနှင့် SNA တပ်သားများ ပူးပေါင်းကာ ထိုးစစ်ဆင်လာသဖြင့် အဆိုပါ ကျေးရွာနှစ်ရွာကို တော်လှန်ရေး အင်အားစုက လက်လွှတ်ခဲ့ရသည်။ လက်ရှိတွင် ဗန်းမောက်မြို့ကို လက်မလွှတ်ရရေး တော်လှန်ရေး အင်အားစုဘက်က ပြင်းပြင်းထန်ထန် ခုခံကာ ကွယ်နေပြီး၊ စစ်ကော်မရှင် ပူးပေါင်းတပ်ဖွဲ့ကမူ တစ်ရက်ခြား လေကြောင်း တိုက်ခိုက်မှုများ ပြုလုပ်နေသည့် အပြင် သာလွန် အင်အားများဖြင့်ပါ မြေပြင်ထိုးစစ်ဆင်လာနေသည်။

တိုက်ပွဲ ပြင်းထန်လာသဖြင့် ဗန်းမောက် ဒေသခံများ စစ်ရှောင်

တိုက်ပွဲ ပြင်းထန်လာသဖြင့် ဗန်းမောက် ဒေသခံများ စစ်ရှောင် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။ စစ်ကိုင်းတိုင်းဒေသကြီး၊ ဗန်းမ…

  • October 16, 2025
ထိုင်းမြန်မာနယ်စပ် ကန်ချနဘူရီခရိုင် တဘက်ရှိ ထီးခီးဒေသကို စစ်ကော်မရှင် ဗုံးကြဲ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၆ ရက်။ ထိုင်း-မြန်မာနယ်စပ် ထီးခီးဒေသကို စစ်ကော်မရှင်တပ်က လေကြောင်းဖြင့် ထပ်မံ ဗုံးကြဲခဲ့ရာ အရပ်သား ၂ ဦး ဒဏ်ရာရခဲ့သည်။ စစ်ကော်မရှင်တပ်သည် ထိုင်း-မြန်မာနယ်စပ်ရှိ ကရင်အမျိုးသား အစည်းအရုံး (KNU) ထိန်းချုပ်နယ်မြေ ဖြစ်သော ထီးခီးကျေးရွာကို တိုက်ပွဲဖြစ်ပွားနေခြင်းမရှိဘဲ အောက်တိုဘာလအတွင်း တတိယအကြိမ်မြောက် လေယာဉ်ဖြင့် ဗုံးထပ်မံကြဲချတိုက်ခိုက်ခဲ့ရာ ရွာသားနှစ်ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြော သည်။ နောက်ဆုံးတိုက်ခိုက်မှုကို အောက်တိုဘာလ ၁၄ ရက်နေ့၊ မွန်းလွဲ ၁၂ နာရီခွဲ အချိန်ခန့်က ဂျက်တိုက်လေယာဉ်ဖြင့် ဗုံး ၄ လုံး ကြဲချတိုက်ခိုက်ခဲ့ခြင်း ဖြစ်ပြီး၊ ဗုံးကြဲမှုကြောင့် ဈေးဆိုင်တစ်ဆိုင် မီးလောင်ပျက်စီးခဲ့ကာ အရပ်သား နှစ်ဦး ထိခိုက်ဒဏ်ရာရရှိခဲ့သည်။ ဒေသခံတစ်ဦးက “တိုက်ပွဲမရှိဘဲ ဗုံးလာကြဲနေတာက စစ်တပ်က ထိုးစစ်ဆင်ဖို့ ဖြစ်နိုင်ချေရှိနေတယ်။ ရွာသား တချို့လည်း နေမရဲတော့ဘူး၊ ရှောင်တိမ်းတဲ့သူတွေ ရှောင်နေကြပြီ” ဟု ပြောသည်။ ဗုံးကြဲတိုက်ခိုက်မှုများကြောင့် ကာစီနိုလောင်းကစားရုံများ အပါအဝင် အရပ်သားနေအိမ်များနှင့် အလုပ်ရုံ အဆောက်အအုံ အချို့ ထိခိုက်ပျက်စီးခဲ့ကြောင်း ၎င်းက ဆိုသည်။ စစ်ကော်မရှင်တပ်သည် အောက်တိုဘာလ ၈ ရက်နေ့မှ စတင်၍ ကေအန်ယူ တပ်မဟာ(၄) ထိန်းချုပ်နယ်မြေ ဖြစ်သည့် ထီးခီးဒေသကို စတင် ဗုံးကြဲတိုက်ခိုက်ခဲ့ခြင်း ဖြစ်ပြီး၊ အောက်တိုဘာလ ၁၀ ရက်နေ့တွင်လည်း တစ်ကြိမ် ထပ်မံဗုံးကြဲခဲ့သဖြင့် ယခုလအတွင်း ၃ ရက် ၃ ကြိမ်အထိ လေယာဉ်ဖြင့် တိုက်ခိုက်မှုများ ရှိလာခဲ့ သည်။ လက်ရှိတွင် ထားဝယ်ခရိုင်အတွင်းရှိ ကံပေါက်ဒေသနှင့် ထိစပ်နေသည့် နတ်အိမ်တောင်စခန်းမှလွဲ၍ ထိုင်း-မြန်မာ နယ်စပ်ဒေသ တစ်ခုလုံးကို ကေအန်ယူ (KNU) မှ ထိန်းချုပ်ထားသည်။ ယင်းဒေသ၌ ၂၀၂၅ ခုနှစ်၊ ဧပြီလ ၁၉ ရက်နေ့တွင် ထီးထစခန်း၊ မေလ ၉ ရက်နေ့တွင် ထီးခီးနယ်စပ်စခန်းနှင့် နယ်စပ် ကုန်သွယ်ရေးဂိတ်၊ ဇွန်လ ၁၀ ရက်နေ့တွင် ဗောဓိစခန်း၊ ဇူလိုင်လ ၇ ရက်နေ့တွင် သုခစခန်းများကို ကေအန်ယူ (KNLA) နှင့် ပြည်သူ့ကာကွယ်ရေး မဟာမိတ်ပူးပေါင်းတပ်ဖွဲ့များက တိုက်ခိုက်သိမ်းယူထားခဲ့သည်။ ထိုသို့ တိုက်ခိုက်သိမ်းယူခဲ့ပြီးနောက် စစ်ကော်မရှင်တပ်ဘက်မှ လေကြောင်းဖြင့် မကြာခဏ တိုက်ခိုက်လာခြင်း ဖြစ်သည်။

ထိုင်းမြန်မာနယ်စပ် ကန်ချနဘူရီခရိုင် တဘက်ရှိ ထီးခီးဒေသကို စစ်ကော်မရှင် ဗုံးကြဲ

ထိုင်းမြန်မာနယ်စပ် ကန်ချနဘူရီခရိုင် တဘက်ရှိ ထီးခီးဒေသကို စစ်ကော်မရှင် ဗုံးကြဲ သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။  ထ…

  • October 16, 2025
တနင်္သာရီတွင် စစ်ကော်မရှင် သတင်းပေး သံသယဖြင့် လူတစ်ဦး ဖမ်းဆီးခံရ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၆ ရက်။ မြိတ်ခရိုင်၊ တနင်္သာရီမြို့နယ်၊ ရမ်းဖိုကျေးရွာတွင် စစ်ကော်မရှင်တပ်အား သတင်းပေးဟု သံသယရှိသူ ဒေသခံတစ်ဦး ဖမ်းဆီးခံလိုက်ရသည်။ လက်နက်ကိုင်အဖွဲ့တစ်ခုမှ လာရောက် ဖမ်းဆီးခေါ်ဆောင် သွားကြောင်း ရွာသားများက ပြောသည်။ အဖမ်းခံရသူမှာ အသက် ၅၀ အရွယ်ရှိ ဦးမောင်ယု ဆိုသူ ဖြစ်ပြီး အောက်တိုဘာလ ၁၁ ရက်နေ့၊ နံနက် ၃ နာရီ အချိန်ခန့်တွင် ရမ်းဖိုကျေးရွာရှိ ၎င်း၏ ဥယျာဉ်ခြံထဲမှ လာရောက်ဖမ်းဆီးသွားခြင်းဖြစ်ကြောင်း သိရသည်။ အောက်တိုဘာလ ၁၄ ရက်နေ့အထိ ပြန်လွတ်မြောက်လာခြင်း မရှိသေးဘူးဟု ဆိုကြသည်။ ရမ်းဖိုရွာသားတစ်ဦးက “သူ့ဥယျာဉ်ထဲက တဲမှာ လက်နက်ကိုင်ဆောင်ထားတဲ့သူ ၅ ဦးက လာဖမ်းသွားတာပါ။ မိသားစုတွေလည်း အကုန်လုံးရှိတယ်၊ မေးမြန်းစရာ ရှိတယ်ဆိုပြီး လက်ကို ကြိုးတုပ်ပြီး ခေါ်သွားတာပါ" ဟု ပြောသည်။ မည်သည့် လက်နက်ကိုင် အဖွဲ့အစည်းက ဖမ်းဆီးသွားသည်ကို တိတိကျကျ မသိရသေးသော်လည်း အဖမ်းခံရသူ ဦးမောင်ယုသည် ရမ်းဖိုကျေးရွာအတွင်း တပ်စွဲထားသည့် စစ်ကော်မရှင်တပ်ဖွဲ့ဝင်များအတွက် စားနပ်ရိက္ခာများ ကို ဝယ်ယူထောက်ပံ့ပေးနေသူတစ်ဦး ဖြစ်ကြောင်း ဒေသခံများက ပြောဆိုကြသည်။ လက်ရှိတွင် ရမ်းဖိုကျေးရွာသား အများစုသည် စစ်ကော်မရှင်တပ်မှ တပ်စွဲထားခြင်းကြောင့် မြိတ်မြို့နှင့် အနီးအနားရှိ တောတောင်များအတွင်းသို့ စစ်ရှောင်တိမ်းရှောင်နေကြသည်မှာ ၂ နှစ်နီးပါးခန့် ရှိပြီဖြစ်သည်။ သို့သော်လည်း ဦးမောင်ယုတို့ မိသားစုမှာမူ စစ်ကြောင်းထိုးမှုများ ရှိနေသော်လည်း ထွက်ပြေးတိမ်းရှောင်ခြင်း မပြုဘဲ ၎င်းတို့၏ ဥယျာဉ်ခြံအတွင်း၌ပင် ဟန်မပျက် နေထိုင်လေ့ရှိခြင်းကြောင့် ၎င်းအား သတင်းပေးဟု သံသယရှိခဲ့ကြကြောင်း ဒေသခံများက ပြောသည်။ ဖမ်းဆီးခံရသူ ဦးမောင်ယုအား မည်သည့်နေရာသို့ ခေါ်ဆောင်သွားသည်၊ မည်သည့်အဖွဲ့အစည်းက ဖမ်းဆီးထား သည်ကိုမူ အောက်တိုဘာလ ၁၄ ရက်နေ့အထိ တိကျသေချာစွာ မသိရသေးပေ။

တနင်္သာရီတွင် စစ်ကော်မရှင် သတင်းပေး သံသယဖြင့် လူတစ်ဦး ဖမ်းဆီးခံရ

တနင်္သာရီတွင် စစ်ကော်မရှင် သတင်းပေး သံသယဖြင့် လူတစ်ဦး ဖမ်းဆီးခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။  မြိတ်ခရိုင်၊ တ…

  • October 16, 2025
ဒိုက်ဦးထောင်တွင် နိုင်ကျဉ်း ၁၆ ဦးကို ခြေကျဉ်းဒေါက်များ ထည့်ထား   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၁ ရက်။   ပဲခူးတိုင်းဒေသကြီး၊ ဒိုက်ဦးအကျဉ်းထောင်၌ နိုင်ငံရေးအကျဉ်းသား (နိုင်ကျဉ်း) ၁၆ ဦးကို ခြေကျင်းဒေါက်များ ခတ်၍ တိုက်ပိတ်ထားဆဲဖြစ်ကြောင်း မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ယက် (PPNM) က ထုတ်ပြန်ကြေညာလိုက်သည်။   တိုက်ပိတ်ခံထားရသည့် နိုင်ကျဉ်းများမှာ မည်သည့်ပြစ်မှုမှ ကျူးလွန်ထားခြင်းမရှိဘဲ၊ ထောင်အာဏာပိုင်များက 'လူစုလူဝေးပြုလုပ်သည်' ဟု တစ်ဖက်သတ်စွပ်စွဲကာ အရေးယူခြင်းဖြစ်သည်ဟု PPNM က အောက်တိုဘာလ ၁၁ ရက်နေ့တွင် ထုတ်ပြန်သည်။   PPNM ဦးဆောင်ကော်မတီဝင် ကိုသိုက်ထွန်းဦး၏ ပြောကြားချက်အရ အဆိုပါဖြစ်စဉ်သည် ထောင်တွင်းရှိ နိုင်ငံရေးအကျဉ်းသား တစ်ဦးကို အခြားရာဇဝတ် အကျဉ်းသားများက အနိုင်ကျင့်ခဲ့သည့် ကိစ္စမှ စတင်ခဲ့ခြင်း ဖြစ်သည်ဟု သိရသည်။   “အနိုင်ကျင့်ခံရမှု အပေါ် ကျန်တဲ့ နိုင်ကျဉ်းတွေက ဒီကိစ္စကို ထောင်အာဏာပိုင်တွေအနေနဲ့ ဖြေရှင်းပေးဖို့ တင်ပြ တောင်းဆိုတဲ့ အခါမျိုးမှာ၊ သူတို့ဘက်က ဒါဟာ လူစုလူဝေး လုပ်တယ်ဆိုတဲ့ အကြောင်းပြချက်နဲ့ ဘာမှဖြေရှင်း ပေးခြင်း မရှိဘဲ လာရောက်တင်ပြကြတဲ့ လူတွေကို အခုလိုမျိုး တိုက်ပိတ်လိုက်တာလို့ ကျနော်တို့ကတော့ စုံစမ်းသိရှိထားရပါတယ်” ဟု ၎င်းက ရှင်းပြသည်။   ထို့ကြောင့် တိုက်ပိတ်ထားသူများကို အမြန်ဆုံး ပြန်လည်လွှတ်ပေးရန် PPNM အနေဖြင့် ထုတ်ပြန်ရခြင်း ဖြစ် ကြောင်းလည်း ဖြည့်စွက်ပြောဆိုသည်။   တိုက်ပိတ်ခံထားရသူ နိုင်ကျဉ်း ၁၆ ဦးကို အောက်တိုဘာလ ၂ ရက်နေ့မှစ၍ ယနေ့အချိန်အထိ ၅ ဦးတစ်စုနှင့် ၆ ဦးစီ နှစ်စုခွဲကာ ချုပ်နှောင်ထားသည်။   ၎င်းတို့အား မိသားစုနှင့် တွေ့ဆုံခွင့်နှင့် ထောင်ဝင်စာပို့ခွင့်များကိုပါ ပိတ်ပင်ထားသည်ဟု ဆိုသည်။   တိုက်ပိတ်ခံထားရသူများ၏ အမည်စာရင်းမှာ ဉာဏ်လင်းနိုင်၊ သဲဦးပိုင်၊ ခန့်ညားသူ၊ ကိုလင်း၊ ကျော်လင်းမောင်၊ ဇော်မျိုး၊ ရှမ်းလေး၊ မင်းနိုင်ထွန်း(ခ)ကြက်ဖကြီး၊ ကျော်သူရဝင်း(ခ)ကျော်ကြီး၊ ဇော်မင်းထိုက်၊ မျိုးကြီး၊ ဇော်ကြီး၊ ဇင်မျိုးထိုက်၊ ထက်လင်း၊ ဇင်ကိုဖြိုး၊ အာကာမင်းနှင့် ဘူးသီး တို့ဖြစ်ပြီး၊ အသက် ၂၀ ဝန်းကျင်မှ ၄၀ ကျော် အရွယ်များ ဖြစ်ကြသည်ဟု PPNM တာဝန်ရှိသူများက ဖော်ပြသည်။   ကိုသိုက်ထွန်းဦးက လက်ရှိဖြစ်စဉ်များ အပါအဝင် ယခင်က ဖြစ်ခဲ့သော ဖြစ်စဉ်များသည် “လုံးဝမဖြစ်သင့်တဲ့ ကိစ္စတွေကို ထောင်အာဏာပိုင်တွေက ရည်ရွယ်ချက်ရှိရှိ နိုင်ကျဉ်းတွေကို တိုက်ပိတ်တာ၊ ခြေကျင်း ဒေါက်ခတ် တာမျိုးတွေ ပိုလုပ်လာတာကို တွေ့ရပါတယ်” ဟု ထောက်ပြသည်။   “တစ်ခါတစ်ခါမှာ ဆိုရင် နိုင်ကျဉ်းတွေကို ရိုက်နှက်တာ၊ နှိပ်စက်တာ၊ သတ်ဖြတ်တဲ့အထိကိုမှ ကျူးလွန်ထားပြီး ဖြစ်ပါတယ်” ဟု ၎င်းက ဆိုသည်။   ထို့ကြောင့် ဒိုက်ဦးထောင်ကို စောင့်ကြည့်မှုများ ပိုမိုလုပ်ဆောင်ရန်နှင့် တာဝန်ထမ်းဆောင်နေသော အဓိက တာဝန်ရှိသူများကို အရေးယူဆောင်ရွက်နိုင်ရန် လုပ်ဆောင်နေကြောင်းလည်း သတင်းစကား ပါးခဲ့သည်။   အလားတူ ဖိနှိပ်မှုမျိုးကို ယခင် ဇူလိုင်လ ၂၂ နှင့် ၂၃ ရက်နေ့များကလည်း နိုင်ငံရေးအကျဉ်းသား (အမျိုးသမီး) ၈ ဦးကို ခိုင်လုံသော အကြောင်းပြချက် မရှိဘဲ ရိုက်နှက် ဖမ်းဆီးပြီး အမျိုးသား အဆောင်ဝင်းအတွင်း၌ ရက် အတန် ကြာ ချုပ်နှောင်ထားခဲ့ဖူးကြောင်း နိုင်ကျဉ်းဟောင်းများက ပြောသည်။   လက်ရှိအချိန်တွင် မြန်မာနိုင်ငံရှိ ဒိုက်ဦး၊ သာယာဝတီ၊ အိုးဘို၊ အင်းစိန်နှင့် မကွေး စသည့် အကျဉ်းထောင် ၅ ခု သည် စစ်ကော်မရှင် လက်အောက်ခံ အကျဉ်းဦးစီးဌာနမှ ဖိနှိပ်မှု အများဆုံး ကျူးလွန်လေ့ရှိသည့် ထောင်များ အဖြစ် သတ်မှတ်ခံထားရသည်။   ပြီးခဲ့သည့် ၂၀၂၄ ခုနှစ်အတွင်း ဒိုက်ဦးထောင်သည် အဆိုးရွားဆုံး ထောင်များစာရင်းတွင် နံပါတ် ၃ နေရာ၌ ရှိခဲ့ပြီး၊ ယခုနှစ် အခြေအနေအရ နံပါတ် ၄ နေရာပသို့ ကျဆင်းသွားသည်ဟု ထောင်နှင့်နီးစပ်သူများက ပြောဆိုသည်။

ဒိုက်ဦးထောင်တွင် နိုင်ကျဉ်း ၁၆ ဦးကို ခြေကျဉ်းဒေါက်များ ထည့်ထား

ဒိုက်ဦးထောင်တွင် နိုင်ကျဉ်း ၁၆ ဦးကို ခြေကျဉ်းဒေါက်များ ထည့်ထား သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၁ ရက်။  ပဲခူးတိုင်းဒေသကြီး၊ ဒ…

  • October 11, 2025
တနင်္သာရီတွင် လေကြောင်းတိုက်ခိုက်မှုကြောင့် အရပ်သား ၁၀ ဦးကျော် ဒဏ်ရာရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၁ ရက်။   တနင်္သာရီတိုင်းဒေသကြီး၊ တနင်္သာရီမြို့နယ်ရှိ တကူကျေးရွာကို စစ်ကောင်စီတပ်ဖွဲ့က ဂျက်ဖိုက်တာလေယာဉ် ဖြင့် ဗုံးကြဲတိုက်ခိုက်ခဲ့ရာ ရွာသား ၁၀ ဦးကျော် ထိခိုက်ဒဏ်ရာများ ရရှိခဲ့ကြောင်း ဒေသခံရွာသားများက ပြောသည်။   အောက်တိုဘာလ ၁၀ ရက်နေ့၊ နံနက် ၉ နာရီခွဲခန့်တွင် FTC-2000G အမျိုးအစား တိုက်လေယာဉ်သည် တကူကျေးရွာရှိ ဈေးအနီးရှိ မီးသတ်ရုံး အဆောက်အအုံကို ပစ်မှတ်ထား၍ လာရောက် ဗုံးကြဲချခဲ့ခြင်းဖြစ်ပြီး၊ စက်သေနတ်ဖြင့်ပါ ပစ်ခတ်သွားခဲ့သည်။   အဆိုပါ ဗုံးကြဲတိုက်ခိုက်မှုကြောင့် ထိခိုက်ဒဏ်ရာရရှိသူများထဲတွင် ကလေးငယ်တစ်ဦး အပါအဝင် ရွာသား ၁၀ ဦးထက်မနည်း ပါဝင်ပြီး၊ ၎င်းတို့အနက် ၅ ဦးမှာ အသက်အန္တရာယ် စိုးရိမ်ရသည့် အခြေအနေရှိနေသည်။   အသက် ၄၀ ခန့်အရွယ် ဒေသခံရွာသားတစ်ဦးက “မီးသတ်ရုံးမှာ လူမရှိလို့ တော်သေးတယ်။ ယောက်ျား တွေရော၊ မိန်းမတွေပါ ဈေးသွားဈေးပြန် လုပ်သူတွေ ထိတာများတယ်။ လေယာဉ်က နောက်ထပ် ပြန်တက် လာနေလို့ ရွာသားတွေ ဗုံးခိုကျင်းတွေထဲမှာ ပုန်းနေကြရတယ်” ဟု ပြောသည်။   ၎င်း၏ အဆိုအရ မီးသတ်ရုံး အဆောက်အအုံ၏ အရှေ့ဘက်မျက်နှာပြင် တစ်ခြမ်းလုံး ထိခိုက်ပျက်စီးသွားခဲ့ သည်ဟု ဆိုသည်။   တနင်္သာရီမြို့နယ် အတွင်းရှိ တကူကျေးရွာသည် လက်ရှိတွင် ပြည်သူ့ကာကွယ်ရေး တပ်ဖွဲ့များ (PDF) စိုးမိုးထား သည့် နယ်မြေဖြစ်ပြီး၊ စစ်ကောင်စီတပ်က ရွာကို စားသောက်ကုန် ရိက္ခာများနှင့် အင်တာနက် ဖုန်းလိုင်းများ ဖြတ်တောက်ထားသည်ဟုလည်း တကူရွာသားတစ်ဦးက ပြောသည်။   ထို့အပြင် တကူကျေးရွာကို ဗုံးမကြဲမီ နံနက် ၈ နာရီခန့်တွင်လည်း ထိုင်းနိုင်ငံနယ်စပ်ရှိ ကရင်အမျိုးသား အစည်း အရုံး KNU ထိန်းချုပ်နယ်မြေ ဖြစ်သော ထီးခီးကျေးရွာကို လေကြောင်းမှ ဗုံးကြဲခဲ့သေးသည်။   ထီးခီးကျေးရွာကို FTC-2000G အမျိုးအစား ဂျက်ဖိုက်တာ လေယာဉ်ဖြင့် ၂ ကြိမ် ဗုံးကြဲချကာ စက်သေနတ်များ ဖြင့် ပစ်ခတ်တိုက်ခိုက်ခဲ့သေးကြောင်း KNU မြိတ် - ထားဝယ်ခရိုင်မှ ထုတ်ပြန်ထားသည်။

တနင်္သာရီတွင် လေကြောင်းတိုက်ခိုက်မှုကြောင့် အရပ်သား ၁၀ ဦးကျော် ဒဏ်ရာရ 

တနင်္သာရီတွင် လေကြောင်းတိုက်ခိုက်မှုကြောင့် အရပ်သား ၁၀ ဦးကျော် ဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၁ ရက်။  တနင်္သာရီတိုင်…

  • October 11, 2025
ဖားကန့်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၁ ရက်။ ကချင်ပြည်ရှိ မြန်မာနိုင်ငံ၏ အဓိက ကျောက်စိမ်းထွက်ရာ ဒေသဖြစ်သော ဖားကန့်မြို့နယ် တွင် စစ်ကော်မရှင် တပ်ဖွဲ့က ညမထွက်ရအမိန့် နှင့် လူငါးဦးထက် ပိုမစုရအမိန့် များကို ထပ်မံထုတ်ပြန်လိုက်ကြောင်း ဒေသခံများက ပြောသည်။ ဖားကန့် ဒေသခံ အမျိုးသားတစ်ဦးက “၁၄၄ မထုတ်တာတောင် ဖမ်းဆီးတာ၊ စစ်ဆေးတာ၊ ပစ်သတ်တာတွေက ဆက်တိုက်ဆိုတော့ အခုက ပိုဆိုးမှာပေါ့ဗျာနော်။ အခု ဒီလိုလိုက်တော့ ဥပဒေမဲ့လုပ်နေရာကနေ ဥပဒေအရ လုပ်တာဆိုပြီး အဖမ်းခံတာ၊ ပစ်သတ်ခံရတာ တွေ ပိုများလာမှာပေါ့ဗျာ” ဟု ပြောသည်။ ညရေးညတာ ကိစ္စများ ပေါ်လာပါက အခက်ကြုံနိုင်သည်ဟု လည်း ပြောသည်။ “ညဘက်တွေမှာ တိုက်ပွဲတွေ ရုတ်တရက် ဖြစ်လာရင်ပေါ့ လူနာတွေကို အရေးပေါ် အခြေအနေအရ ကယ်ဆယ်ရေးလုပ်ဖို့ ကူညီဖို့ ပိုခက်ခဲသွားမယ်။ သွားကယ်တဲ့လူကအစ အဖမ်းခံရတာမျိုး ပစ်သတ်ခံရတာမျိုး တွေ ဖြစ်လာမှာပေါ့နော်” ဟု အဆိုပါ ဒေသခံက ဆက်ပြောသည်။ ဖားကန့်မြို့နယ် (အုပ်ချုပ်ရေးမှူး) က လက်မှတ်ရေးထိုးထားသော အဆိုပါ အမိန့်ကို ရာဇဝတ်ကျင့်ထုံး ဥပဒေပုဒ်မ ၁၄၄ အရ ၂၀၂၅ ခုနှစ်၊ အောက်တိုဘာလ ၈ ရက်နေ့ တွင် စတင် အသက်သွင်းခဲ့သည်။ အဆိုပါ ညမထွက်ရအမိန့် ကို ည ၁၀ နာရီမှ နံနက် ၄ နာရီအထိ သတ်မှတ်ထားသည်။ ယင်းအမိန့်သည် ဖားကန့်မြို့နယ်အတွင်း စစ်ရေးတင်းမာမှုများ ဆက်လက်မြင့်တက်နေဆဲ ဖြစ်ကြောင်းကို ပြသ နေသည်။ KIO/KIA သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက “သူတို့ကတော့ အခု ရွေးကောက်ပွဲလည်း နီးလာပြီဆိုတော့ ရွေးကောက်ပွဲနယ်မြေတွေ၊ မဲဆွယ်နယ်မြေတွေ ပိုပြီးမှ တိုးချဲ့နိုင်ဖို့အတွက် လက်လွှတ်ဆုံးရှုံး ခဲ့တဲ့ စခန်းဟောင်းတွေ နေရာဟောင်းတွေ ပြန်ရနိုင်ဖို့အတွက် ကြိုးစားတဲ့ အနေနဲ့ အခုလိုမျိုး ၁၄၄ တွေ ချတာ နေမှာ။ တိုက်ပွဲကို မထိန်းနိုင်လို့ ပြည်သူလူထုဘက်ကို လှည့်ပြီးမှ အဲ့လိုမျိုး လုပ်တာပဲလို့ ကျနော်ကတော့ သုံးသပ်ပါတယ်” ဟု ပြောသည်။ ထို့အပြင် မြို့နယ်အတွင်းရှိ လမ်းမများ၊ လမ်းသွယ်များနှင့် အများပြည်သူနှင့် သက်ဆိုင်သော နေရာများတွင် လူငါးဦး သို့မဟုတ် ငါးဦးထက် ပိုမို၍ စုဝေးခြင်းကို လုံးဝ မပြုလုပ်ရဟု ဆိုသည်။ စုဝေးခြင်း၊ ဟောပြောခြင်း၊ ဖျက်ဆီးခြင်းနှင့် ရုန်းရင်းဆန်ခတ်ပြုမူခြင်းမျိုး မှန်သမျှကိုလည်း တားမြစ်ထားသည်။ ထိုအမိန့်ကို မလိုက်နာပါက တည်ဆဲဥပဒေများ အရ အရေးယူခံရမည် ဖြစ်ကြောင်း ထုတ်ပြန်ချက်တွင် ဖော်ပြ ထားသည်။ ဗိုလ်မှူးကြီးနော်ဘူက “၁၄၄ ထုတ်တာပဲ ဖြစ်ဖြစ်၊ မထုတ်တာပဲ ဖြစ်ဖြစ် ပြည်သူလူထုကို ပစ်ခတ်တာတွေ၊ ဖမ်း ဆီးတာတွေ စစ်ဆေးတာတွေ အများကြီး လုပ်နေတာ။ ဒါပေမယ့် အဲ့ဒီ ၁၄၄ ထုတ်ပြီ ဆိုလို့ရှိရင်တော့ ပိုပြီးမှ သတိထားဖို့ လိုတာပေါ့နော်” ဟု ပြောသည်။ အမိန့်ထုတ်ပြန်ရခြင်း၏ တရားဝင်အကြောင်းပြချက်အဖြစ် စစ်ကော်မရှင်ဘက်မှ ဒေသတွင်း ရာဇဝတ်မှုများနှင့် လုယက်မှုများ များပြားလာခြင်းကြောင့် လုံခြုံရေးထိန်းသိမ်းရန်ဟု ဆိုသည်။ သို့သော် နိုင်ငံရေး လေ့လာသူများနှင့် ဒေသခံများ၏ သုံးသပ်ချက်မှာ မတူညီပေ။ ဖားကန့်မြို့နယ်သည် ကချင်လွတ်လပ်ရေး တပ်မတော် (KIA) နှင့် ပြည်သူ့ကာကွယ်ရေး တပ်ဖွဲ့ (PDF) ပူးပေါင်း တပ်များ၏ ထိုးစစ်ဒဏ်ကို အပြင်းအထန် ခံနေရသောဒေသ ဖြစ်သည်။ စစ်ကော်မရှင်တပ်အနေဖြင့် စစ်ရေးဖိအားကြောင့် လုံခြုံရေးကို အပြင်းအထန် တင်းကျပ်နေရသည်ဟု သုံးသပ်မှု များ ရှိနေသည်။ နိုင်ငံရေးလေ့လာသူများက ဤအမိန့်သည် အရပ်သား ပြည်သူများ၏ လှုပ်ရှားမှုကို ထိန်းချုပ်ရန် နှင့် စစ်ကော်မရှင်တပ်၏ စစ်ရေးလှုပ်ရှားမှုများကို ပိုမို လွယ်ကူစေရန် ရည်ရွယ်ပြီး ထုတ်ပြန်ခြင်း ဖြစ်ကြောင်း ဝေဖန်သုံးသပ်ထားသည်။ ဖားကန့်မြို့နယ်ရှိ ဒေသခံများမှာမူ ညမထွက်ရ အမိန့်ကြောင့် လုပ်ငန်းဆောင်တာများနှင့် လူမှုရေးကိစ္စရပ်များ တွင် အခက်အခဲများစွာနှင့် ရင်ဆိုင်ရနိုင်ပြီး လုံခြုံရေး အခြေအနေအတွက် စိုးရိမ်ပူပန်မှုများ မြင့်တက်နေသည်ဟု ပြောသည်။
 ဓါတ်ပုံ - Tarlin Mg

ဖားကန့်တွင် ညမထွက်ရ အမိန့်ထုတ်ပြန်

ဖားကန့်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၁ ရက်။  ကချင်ပြည်ရှိ မြန်မာနိုင်ငံ၏ အဓိက ကျောက်စိမ်း…

  • October 11, 2025
၂၀၂၅ ခုနှစ် ငြိမ်းချမ်းရေး နိုဘယ်လ်ဆုရှင် မာရီယာ ကိုရီနာ မာချာဒို သို့မဟုတ် ဗင်နီဇွဲလား၏ သံမဏိ မိန်းမသား သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၁ ရက်။ အမေရိကန် သမ္မတ ဒေါ်နယ် ထရန့်က သူ့ကို နိုဘယ်လ်ငြိမ်းချမ်းရေး ဆု ပေးသင့်တယ်လို့ အကြိမ်ကြိမ် ထုတ်ဖော်ပြောကြားခဲ့ပေမယ့် နိုဘယ်လ်ဆုရွေးချယ်ရေး ကော်မတီက ဗင်နီဇွဲလား နိုင်ငံက အတိုက်အခံခေါင်းဆောင် တစ်ဦးဖြစ်တဲ့ မာရီယာ ကိုရီနာ မာချာဒို (María Corina Machado) ကို ရွေးချယ်ခဲ့ပါတယ်။ ဒါဟာ မာရီယာ ရဲ့ မဆုတ်မနစ်တဲ့ ဇွဲနဲ့ ငြိမ်းချမ်းတဲ့ အကြမ်းမဖက်တဲ့ လမ်းစဉ်နဲ့ အာဏာရှင်ကို ဆန့်ကျင်တိုက်ပွဲဝင်မှုကို ကမ္ဘာက အသိအမှတ် ပြုလိုက်တာလည်း ဖြစ်ပါတယ်။ သူ့အကြောင်း အကျဉ်းချုပ်လေးကို အခု ပြောပြသွားမှာ ဖြစ်ပါတယ်။ မာရီယာ ကိုရီနာ မာချာဒိုကို ၁၉၆၇ ခုနှစ်မှာ ဗင်နီဇွဲလားနိုင်ငံ၊ ကရာကက်စ်မြို့မှာ မွေးဖွားခဲ့ပါတယ်။ ဒါကြောင့် သူဟာ အခုဆိုရင် အသက် ၅၈ နှစ် ရှိပြီ ဖြစ်ပါတယ်။ သူဟာ စက်မှုအင်ဂျင်နီယာဘွဲ့ ရရှိထားသူဖြစ်ပြီး အစောပိုင်း ကာလတွေမှာတော့ လူမှုရေး လုပ်ငန်းတွေမှာ ပါဝင်လုပ်ဆောင်ခဲ့ပါတယ်။ သူဟာ အတူတကွ ပူးပေါင်းပါဝင်ခြင်းလို့ အဓိပ္ပာယ်ရတဲ့ Sumate လို့ခေါ်တဲ့ အရပ်ဘက် အဖွဲ့အစည်းကို ပူးတွဲ တည်ထောင်ချိန်ကစလို့ နိုင်ငံရေးလှုပ်ရှားမှုတွေမှာ ပါဝင်လာခဲ့ပါတယ်။ မာရီယာဟာ ၂၀၁၁ ကနေ ၂၀၁၄ ခုနှစ်တွေအတွင်းမှာ‌တော့ အမျိုးသား လွှတ်တော် အမတ် ဖြစ်လာခဲ့ပါတယ်။ အဲဒီကာလမှာ ဆိုရှယ်လစ် အစိုးရရဲ့ မူဝါဒတွေကို ပြတ်ပြတ်သားသား ဝေဖန်သူအဖြစ် နာမည်ကြီးလာခဲ့ပါတယ်။  သူဟာ လက်ရှိ  နီကိုလပ်စ် အစိုးရရဲ့ ဖိနှိပ်မှုတွေကို နှစ်ပေါင်းများစွာ ကြုံတွေ့ ရင်ဆိုင်ခဲ့ရသူလည်း ဖြစ်ပါတယ်။ သူ့ရဲ့ ခရီးသွားလာခွင့်တွေကို အစိုးရက ပိတ်ပင်ခဲ့တယ်၊ နိုင်ငံတော် သစ္စာဖောက်မှုနဲ့ တရားစွဲခံခဲ့ရတယ်၊ ရွေးကောက်ပွဲ ပါဝင်ခွင့်ကိုလည်း ပိတ်ပင်ခံခဲ့ရပါတယ်။ ဒါပေမယ့် သူဟာ နိုင်ငံအတွင်းက ထွက်ခွာသွားခြင်း မရှိပဲ အာဏာပိုင်တွေရဲ့ ဖမ်းဆီးထိန်းသိမ်းမှု၊ အသက်အန္တရာယ် ခြိမ်းခြောက်မှုတွေကို ရင်ဆိုင်ရင်း ပြည်သူတွေရဲ့ တော်လှန်ရေး စိတ်ဓါတ်ကို မြှင့်တင်ပေးခဲ့သူ ဖြစ်ပါတယ်။ အောက်တိုဘာ ၁၀ ရက် သောကြာနေ့ကတော့ နိုဘယ်လ်ဆုရွေးချယ်ရေး ကော်မတီက ၂၀၂၅ ခုနှစ် ငြိမ်းချမ်းရေး နိုဘယ်ဆုရှင်အဖြစ် မာရီယာ ကိုရီနာ မာချာဒိုကို ရွေးချယ်ကြောင်း ကြေညာခဲ့ပါတယ်။ နိုဘယ်လ်ကော်မတီက မာချာဒိုဟာ ဒီမိုကရေစီနည်းလမ်းတွေဟာ ငြိမ်းချမ်းရေးဖြစ်တယ် ဆိုတဲ့ အချက်ကို ထည့်သွင်း ပြောဆိုသွားခဲ့ပါတယ်။ နိုင်ငံတကာမှာ 'ဗင်နီဇွဲလားရဲ့ သံမဏိအမျိုးသမီး' အဖြစ် တင်စားခံရတဲ့ မာချာဒိုဟာ နိုင်ငံရေးအရ အရေးပါတဲ့ ဒီမိုကရေစီစံနှုန်းတွေ၊ တရားဥပဒေ စိုးမိုးရေးနဲ့ လူ့အခွင့်အရေး တို့ကို အမြဲတစေ ထောက်ခံပြောဆိုသူ တယောက်လည်း ဖြစ်ပါတယ်။

၂၀၂၅ ခုနှစ် ငြိမ်းချမ်းရေး နိုဘယ်လ်ဆုရှင် မာရီယာ ကိုရီနာ မာချာဒို (သို့မဟုတ်) ဗင်နီဇွဲလား၏ သံမဏိ မိန်းမသား 

၂၀၂၅ ခုနှစ် ငြိမ်းချမ်းရေး နိုဘယ်လ်ဆုရှင် မာရီယာ ကိုရီနာ မာချာဒို (သို့မဟုတ်) ဗင်နီဇွဲလား၏ သံမဏိ မိန်းမသား  သတင်းနှင့် မီဒီယာ ကွန်ရက်။၂၀၂၅ ခုနှစ်၊ …

  • October 11, 2025
မလေးရှား နိုင်ငံခြားရေး ဝန်ကြီး ခရီးစဉ်အပေါ် အာဆီယံ သတင်းထုတ်ပြန် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၁ ရက်။ မလေးရှား နိုင်ငံခြားရေး ဝန်ကြီး ဒါတို ဆာရီ ဥတ္တမ ဟာဂျီ မိုဟာမက် ဘင် ဟာဂျီဟာဆန် (Dato' Seri Utama Haji Mohamad bin Haji Hasan)သည် အောက်တိုဘာ ၉ ရက်နေ့တွင် မြန်မာနိုင်ငံသို့ အလုပ်ခရီးစဉ်အဖြစ် တစ်ရက်တာ သွားရောက်ခဲ့သည်။  နေပြည်တော်တွင် မလေးရှား နိုင်ငံခြားရေး ဝန်ကြီးသည် နိုင်ငံတော် လုံခြုံရေးနှင့် ငြိမ်းချမ်းရေး ကော်မရှင် ဥက္ကဌ နဲ့ ယာယီ သမ္မတ ဗိုလ်ချုပ်မှူးကြီး မင်းအောင်လှိုင်၊ ဝန်ကြီးချုပ် ဦးညိုစောနှင့် နိုင်ငံခြားရေး ဝန်ကြီး ဦးသန်းဆွေတို့နှင့် တွေ့ဆုံ ခဲ့သည်။ ခရီးစဉ် အပြီးတွင် အာဆီယံက သတင်းထုတ်ပြန်ချက်တစ်ရပ် ထုတ်ပြန်ခဲ့သည်။ ထိုထုတ်ပြန်ချက်ထဲတွင် မြန်မာ စစ်ကော်မရှင်က ထုတ်ပြန်ခြင်း မရှိသည့် အချက်တစ်ချို့လည်း ပါဝင်သည်။ အာဆီယံ၏ ထုတ်ပြန်ချက်အရ မလေးရှားနိုင်ငံခြားရေး ဝန်ကြီးသည် အာဆီယံ၏ တာဝန်ပေးချက်အရ အာဆီယံ ဘုံသဘောတူညီချက် ၅ ချက်မှ အဓိကအချက်များ ဖြစ်သည့် အကြမ်းဖက်မှုများ ရပ်စဲရေး၊ လူသားချင်းစာနာထောက်ထားမှု အကူအညီများကို လိုအပ်သူများထံ ပေးနိုင်ရေးနှင့် မြန်မာ့ပြဿနာကို သက်ဆိုင်သူအားလုံးပါဝင်သော ဆွေးနွေးမှု ပြုလုပ်ရေးများ ပါဝင်သည်။ မလေးရှား နိုင်ငံခြားရေး ဝန်ကြီးက အရပ်သားများနှင့် အရပ်ဘက် အဆောက်အအုံများအား တိုက်ခိုက်မှုများကို ချက်ချင်းရပ်တန့်ရန်၊ အပစ်အခတ်ရပ်စဲရေး ကြေညာရန်၊ နှင့် လူသားချင်းစာနာမှု အကူအညီများကို ကန့်သတ်ချက်မရှိ ပေးအပ်နိုင်ရန် စသည့် အချက်များကို တောင်းဆိုခဲ့သည်ဟု ထုတ်ပြန်ချက်က ဆိုသည်။ အာဆီယံ အနေဖြင့် မြန်မာနိုင်ငံရှိ သက်ဆိုင်သူ အားလုံးနှင့် အားလုံး ပါဝင်သော ဆွေးနွေးပွဲ ဖြစ်မြောက်စေရန် အတွက် အထောက်အကူပြုပြီး ဘက်မလိုက်သည့် ပတ်ဝန်းကျင်ကို ဖန်တီးပေးလိုကြောင်း မလေးရှား၏ ကမ်းလှမ်းချက်ကိုလည်း တင်ပြခဲ့သည်ဟု ဆိုသည်။ ထို့အပြင် မလေးရှားနိုင်ငံသည် အာဆီယံ ဥက္ကဌ တာဝန်ကို စယူစဉ်ကတည်းက မြန်မာနိုင်ငံ အလွှာပေါင်းစုံမှ သက်ဆိုင်သူများနှင့် ထိတွေ့ဆက်ဆံခဲ့ရာမှ မြန်မာ့သက်ဆိုင်သူများ၏ မျှော်လင့်ချက်များကိုလည်း မြန်မာ စစ်ကော်မရှင်ထံ ပေးပို့ခဲ့သည်ဟု အာဆီယံ သတင်းထုတ်ပြန်ချက်တွင် ဖော်ပြထားသည်။

မလေးရှား နိုင်ငံခြားရေး ဝန်ကြီး ခရီးစဉ်အပေါ် အာဆီယံ သတင်းထုတ်ပြန်

မလေးရှား နိုင်ငံခြားရေး ဝန်ကြီး ခရီးစဉ်အပေါ် အာဆီယံ သတင်းထုတ်ပြန် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၁ ရက်။  မလေးရှား နိုင…

  • October 11, 2025
တရုတ်သွင်းကုန်များအား အမေရိကန်က အခွန် ၁၀၀ ရာနှုန်း ကောက်မည် သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ အောက်တိုဘာလ ၁၁ ရက်။ အမေရိကန် သမ္မတ ဒေါ်နယ်ထရန့်က တရုတ်သွင်းကုန်တွေကို အခွန် ၁၀၀ ရာနှုန်း ကောက်ခံသွားတော့မည်ဟု အောက်တိုဘာ ၁၀ ရက်နေ့က ပြောလိုက်သည်။ တရုတ်နိုင်ငံက ပို့ကုန် ထိန်းချုပ်မှုများ လုပ်လာခဲ့ခြင်းကြောင့် ယခုကဲ့သို့ အခွန်တိုးကောက်ခံရန် ဆုံးဖြတ်ရခြင်း ဖြစ်သည်ဟုလည်း သမ္မတ ထရန့်က ပြောသည်။ အမေရိကန်သည် တရုတ်၏ မြေရှားသတ္တုနှင့် ပဲပိစပ် ကုန်သွယ်မှုအပေါ် ကုန့်သတ်မှုများအား ရင်ဆိုင်နေရခြင်း ဖြစ်သည်။ သမ္မတထရန့်၏ လူမှု ကွန်ရက် Truth တွင် အခွန်တိုးမြှင့်မှုကို နိုဝင်ဘာလ ၁ ရက်နေ့မှ စတင်မည်ဖြစ်ကြောင်း ရေးသား ထားသည်။ လက်ရှိတွင် တရုတ်နိုင်ငံမှ ပို့ကုန်များ အပေါ်တွင် အမေရိကန် နိုင်ငံက ၃၀% အခွန်ကောက်ခံနေသည်။ တရုတ်က မြေရှား သတ္တု တင်ိပု့မှုနှင့် ပတ်သက်သည့် ကန့်သတ်ချက်အသစ်များ ထုတ်ပြန်ခဲ့ပြီး တရက် အကြာတွင် သမ္မတထရန့်က ယခုလို ပြောလိုက်ခြင်း ဖြစ်သည်။ မူလအစီအစဉ်အရ အောက်တိုဘာ လကုန်ပိုင်းတွင် ကျင်းပမည့် အာရှပစိဖိတ် စီးပွား ပူးပေါင်းဆောင်ရွက်ရေး APEC ထိပ်သီး အစည်းအဝေးတွင် တရုတ်နှင့် အမေရိကန် သမ္မတ နှစ်ဦး တွေ့ဆုံရန် စီစဉ်ထားပြီး ကုန်သွယ်ရေးတင်းမာမှုနဲ့ မဟာဗျူဟာကျသည့်  ကိစ္စရပ်များအပေါ် ဆွေးနွေးရန် စီစဉ်ထားခဲ့သည်။ သောကြာနေ့ကတော့ သမ္မတ ထရန့်က တရုတ်သမ္မတနှင့် တွေ့ဆုံမှုကို မသွားတော့ကြောင်း သူ့အနေနှင့် ခြိမ်းခြောက်ကောင်း ခြိမ်းခြောက်နိုင်သည်ဟု ပြောခဲ့သည်။

တရုတ်သွင်းကုန်များအား အမေရိကန်က အခွန် ၁၀၀ ရာနှုန်း ကောက်မည်

တရုတ်သွင်းကုန်များအား အမေရိကန်က အခွန် ၁၀၀ ရာနှုန်း ကောက်မည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၁ ရက်။  အမေရိကန် သမ္မတ ဒေါ်…

  • October 11, 2025
×Close