သတင်း

ဂါဇာ ထိုးစစ်ကြီး စတော့မည်ဟု အစ္စရေး စစ်တပ် အကြီးအကဲပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၉ ရက်။   ဂါဇာမြို့ကို ထိန်းချုပ်နိုင်ရေးအတွက် ထိုးစစ်ကြီး မကြာခင် စတင်တော့မည်ဟု အစ္စရေး စစ်တပ် အကြီးအကဲ အီယာလ် ဇာမီယာ (Eyal Zamir) က တနင်္ဂနွေနေ့က ထုတ်ပြောခဲ့သည်။   စစ်ဆင်ရေး နောက်တဆင့်ဖြစ်သော “ဂစ်ဒီယန်ရဲ့ စစ်ရထားများ” ဟု ခေါ်ဆိုသည့် စစ်ဆင်ရေးကို မကြာမီတွင်  ဆက်လက် လုပ်သွားမည်ဟု အစ္စရေး စစ်တပ် အကြီးအကဲ အီယာလ် ဇာမီယာ Eyal Zamir က စစ်ဆင်ရေး စီမံကိန်းများ ရေးဆွဲနေစဉ် ပြောကြားခဲ့ခြင်း ဖြစ်သည်။   တချိန်တည်းမှာပင် အစ္စရေး အငြိမ်းစား စစ်ဘက် ထောက်လှမ်းရေးမှူးချုပ်က စစ်ပြီးဆုံးရန် ပါလက်စတိုင်း ၅၀,၀၀၀ ခန့် သတ်ပစ်ရန် လိုအပ်ကြောင်း ပြောဆိုချက်လည်း ပေါက်ကြားလာခဲ့သည်။   လာမည့် အဆင့်တွင် အစ္စရေးစစ်တပ်သည် ဂါဇာမြို့တွင် ဟားမက်စ်အဖွဲ့ကို ပြတ်ပြတ်သားသား ချေမှုန်းနိုင်သည် အထိ ထိုးစစ်အရှိန်ကို ဆက်လက် မြှင့်တင်သွားမည်ဟု ဆိုသည်။   မြေပြင်၊ ဝေဟင်နှင့် ရေပြင်တို့၌ ၎င်းတို့၏ စွမ်းဆောင်ရည် အားလုံးကို အသုံးပြုသွားမည်ဟု ဇာမီယာက ဆိုသည်။   အစ္စရေး စစ်တပ် အနေဖြင့် ဂါဇာတွင် ဖမ်းဆီးခံထားရသော အသက်ရှင်နေဆဲ ဓားစာခံများကို သာမက သေဆုံး သူများကိုပါ နေရပ်သို့ ပြန်လည် ခေါ်ဆောင်ပေးရေးအတွက် ကျင့်ဝတ်ပိုင်းအရ တာဝန်ရှိနေကြောင်း ၎င်းက ဖြည့်စွက် ပြောကြားခဲ့သည်။   အစာငတ်မွတ်မှုများလည်း ဆက်လက်ပျံ့နှံ့ ဖြစ်ပေါ်လျက်ရှိကာ လွန်ခဲ့သည့် ၂၄ နာရီအတွင်း အစာငတ်မွတ်မှုနှင့် အာဟာရ ချို့တဲ့မှုများကြောင့် ကလေးငယ် ၂ ဦး အပါအဝင် လူ ၇ ဦး သေဆုံးခဲ့သည်။   သို့ဖြစ်၍ ဂါဇာ၌ အစာငတ်မွတ်မှုကြောင့် သေဆုံးသူ စုစုပေါင်းမှာ ကလေးငယ် ၁၁၀ ဦး အပါအဝင် ၂၅၈ ဦး ရှိလာခဲ့ပြီ ဖြစ်သည်။

ဂါဇာ ထိုးစစ်ကြီး စတော့မည်ဟု အစ္စရေး စစ်တပ် အကြီးအကဲပြော

ဂါဇာ ထိုးစစ်ကြီး စတော့မည်ဟု အစ္စရေး စစ်တပ် အကြီးအကဲပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၉ ရက်။  ဂါဇာမြို့ကို ထိန်းချုပ်နိုင်ရေးအ…

  • August 19, 2025
အမေရိကန်နှင့် ဥရောပက ယူကရိန်း လုံခြုံရေးအတွက် ပူးတွဲ တာဝန်ယူမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၉ ရက်။   ယူကရိန်း သမ္မတ ဗိုလိုဒီမာ ဇယ်လန်းစကီးက အိမ်ဖြူတော်ကို အနက်ရောင် ဝတ်စုံနှင့် ရောက်ရှိလာခဲ့သည်။   အမေရိကန် သမ္မတ ဒေါ်နယ် ထရန့်က ဇယ်လန်းစကီး ကားမှ ဆင်းသည်အထိ လာကြိုသည်။   ထို့နောက်တွင် သမ္မတ နှစ်ဦးနှင့် ဥရောပ သမဂ္ဂက ခေါင်းဆောင်များ နာရီအတော်ကြာ ဆွေးနွေးခဲ့ကြသည်။   ရုရှား သမ္မတ ဗလာဒီမာ ပူတင်၊ ယူကရိန်း သမ္မတ ဗိုလိုဒီမာ ဇယ်လန်းစကီးနှင့် အမေရိကန် သမ္မတ ဒေါ်နယ် ထရန့်တို့ ပါဝင်သော ဆွေးနွေးပွဲ တစ်ခု ဖြစ်လာတော့မည်ဟု ဆွေးနွေးပွဲ အပြီးတွင် အမေရိကန် သမ္မတက ပြောသည်။   ဥရောပနှင့် အမေရိကန် ပူးတွဲ၍ ယူကရိန်း၏ လုံခြုံရေးကို တာဝန်ယူသွားမည်ဟု အမေရိကန် သမ္မတက ပြောသည်။   တနင်္လာနေ့ ဆွေးနွေးပွဲ အပြီးတွင် ယူကရိန်းနှင့် အမေရိကန် ပြည်ထောင်စုအကြား ဒေါ်လာ ဘီလီယံ ၉၀ ဖိုး လက်နက်များ လွှဲပြောင်းမှု ဖြစ်လာမည်ဟု ယူကရိန်း သမ္မတ ဇယ်လန်းစကီးက ပြောလိုက်သည်။   အဆိုပါ အမေရိကန် လက်နက်များသည် ယူကရိန်းတွင် မရှိခဲ့ဖူးသော လက်နက်များဖြစ်သည့် လေကြောင်း စနစ်များ၊ ဒုံကျည် တုန့်ပြန်ရေး စခန်းများနှင့် သမ္မတ ဇယ်လန်းစကီး ထုတ်မပြောချင်သေးသော ပစ္စည်းများ ပါဝင်မည်ဟု ယူကရိန်း သမ္မတက ပြောပါတယ်။

အမေရိကန်နှင့် ဥရောပက ယူကရိန်း လုံခြုံရေးအတွက် ပူးတွဲ တာဝန်ယူမည်

အမေရိကန်နှင့် ဥရောပက ယူကရိန်း လုံခြုံရေးအတွက် ပူးတွဲ တာဝန်ယူမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၉ ရက်။  ယူကရိန်း သမ္မတ ဗိုလိုဒီမာ…

  • August 19, 2025
မော်ချီး သတ္တုတွင်းဒေသ စစ်ကော်မရှင် ဗုံးကြဲ၊ လူ အသေအပျောက်များဟု ဒေသခံများပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၇ ရက်။   ခဲသတ္တုတွင်းများရှိရာ ကရင်နီပြည်၊ မော်ချီးမြို့ကို စစ်တပ်က တစ်ရက်အတွင်း နှစ်ကြိမ် လေကြောင်းမှ ဗုံးကြဲတိုက်ခိုက်ခဲ့ရာ အရပ်သားသေဆုံးမှုအပြင် နေအိမ်များ ထိမှန်ပျက်စီးခဲ့သည်ဟု ဒေသခံများ က ပြောသည်။   ဘောလခဲခရိုင်၊ ဖားဆောင်းမြို့နယ်ထဲက မော်ချီးကို ဩဂုတ်လ ၁၇ ရက်နေ့၊ နံနက် ၈ နာရီဝန်းကျင်တွစ် တစ်ကြိမ်၊ နေ့လည် ၁၂ နာရီခန့်တွင် တစ်ကြိမ် လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်။   ဒေသခံတစ်ဦးက “မော်ချီးကို လေယာဉ်နဲ့ ဗုံးကြဲသွားတယ်ဆိုတာ ဟုတ်ပါတယ်ဗျ။ စစ်ကောင်စီက လေယာဉ်နဲ့ လာကြဲတာ တစ်ရက်တည်းမှာပဲ နှစ်ကြိမ်ပါဗျ။ အိမ်တွေရော ဆေးရုံရော ထိခိုက်ပျက်စီးသွားပါတယ်။” ဟု ပြောသည်။   သတင်းနှင့် မီဒီယာ ကွန်ရက်က သေဆုံးသူ ၂ ဦးကိုသာ အတည်ပြုနိုင်သေးသော်လည်း ဒေသတွင် သတင်းမီဒီယာ များက သေဆုံးသူ ဦးရေ ၂၀ ကျော်ရှိသည်ဟု ပြောထားသည်။   မော်ချီးဒေသအတွင်းရှိ ဆေးရုံနှင့် မူကြိုကျောင်းနေရာတို့အား စစ်တပ်က လေကြောင်းမှ ဗုံးကြဲတိုက်ခိုက်ခြင်း ဖြစ်သည်ဟု ဆိုသည်။   မော်ချီးမြို့က လိုခါးလိုကျေးရွာရှိ ပြည်သူ့ဆေးရုံမှာ နံနက်ပိုင်းတွင် လေကြောင်းမှ ဗုံးကြဲတိုက်ခိုက်ခံခဲ့ရပြီး (၁၆) ကုန်းရပ်ကွက်ရှိ မူကြိုကျောင်းမှာ နေ့လည်ပိုင်းတွင် ဗုံးကြဲတိုက်ခိုက်ခံရခြင်း ဖြစ်သည်။   အဆိုပါ ဗုံးကြဲတိုက်ခိုက်ခံရမှုထဲ အရပ်သား ထိမှန် သေဆုံးမှုများအပြင် ထိခိုက်ဒဏ်ရာရရှိသူလည်း များကြောင်း မြေပြင်တွင် အကူအညီပေးနေသူများက ပြောသည်။   သို့သော် ထိမှန်သေဆုံးသူနှင့် ထိခိုက်ဒဏ်ရာ ရရှိသူ စာရင်းကိုမူ အတိအကျ မသိရသေးပေ။   လေကြောင်းမှ ဗုံးကြဲတိုက်ခိုက်ခံရမှုများထဲ နေအိမ်များ၊ ဆိုင်ခန်းများ၊ စားသောက်ဆိုင်၊ ဆေးရုံနှင့် မူကြိုကျောင်း နေရာတို့ ထိမှန်ပျက်စီးကုန်သည်ဟု ဆိုသည်။   မြေပြင်တွင် အကူအညီပေးနေသူ တစ်ဦးက “တိုက်နယ်ဆေးရုံပေါ့နော် ဒီဆေးရုံကတော့ တော်တော်လေး ပျက် သွားတယ်။ လူလည်း ထိတယ်။ ဒဏ်ရာ ရတဲ့လူလည်း များတယ်။ အသေးစိတ်တော့ ပြောလို့ရမသေးဘူး” ဟု ပြောသည်။   မြေပြင်တွင် တိုက်ပွဲဖြစ်ပွားနေခြင်းမျိုး မရှိဘဲ လေကြောင်းမှ ဗုံးကြဲတိုက်ခိုက်ခံရခြင်း ဖြစ်သည်ဟု ဆိုကြသည်။   အဆိုပါ လေကြောင်း ဗုံးကြဲတိုက်ခိုက်မှုမှာလည်း အရပ်သားပြည်သူများကို ပစ်မှတ်ထား တိုက်ခိုက်ခြင်း ဖြစ်သည်ဟု ဆိုသည်။   စစ်ကော်မရှင်တပ်သည် ဇူလိုင်လအတွင်း၌လည်း မော်ချီးဒေသကို လေကြောင်းမှ ဗုံးကြဲ တိုက်ခိုက်မှု ၃ ကြိမ် ထက်မနည်းလုပ်ခဲ့ရာ ဒေသခံ ၁၁ ဦး သေဆုံးခဲ့ပြီး ၅ ဦးထက်မနည်း ထိမှန်ဒဏ်ရာရရှိခဲ့သည်။

မော်ချီး သတ္တုတွင်းဒေသ စစ်ကော်မရှင် ဗုံးကြဲ၊ လူ အသေအပျောက်များဟု ဒေသခံများပြော

မော်ချီး သတ္တုတွင်းဒေသ စစ်ကော်မရှင် ဗုံးကြဲ၊ လူ အသေအပျောက်များဟု ဒေသခံများပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၇ ရက်။  ခဲသတ္တုတွင…

  • August 17, 2025
ရခိုင်ပြည်သူများကို စစ်ကော်မရှင်သာမက မူဆလင် အစွန်းရောက်အဖွဲ့များကလည်း ခြိမ်းခြောက်နေ - AA ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၇ ရက်။   ရခိုင်ပြည်မှ ပြည်သူများသည် စစ်ကော်မရှင် သာမက မူဆလင်အစွန်းရောက် အဖွဲ့များထံမှ ခြိမ်းခြောက်မှုမျိုးစုံ နှင့်ပါ ရင်ဆိုင်နေရသည်ဟု အာရက္ခတပ်တော် ULA/AA က ပြောသည်။   ရခိုင်ပြည်ထဲတွင် အာရက္ခတပ်တော် ULA/AA အနေဖြင့် စစ်ကော်မရှင်တပ်နှင့် တိုက်ပွဲများ၊ စစ်ရေးပဋိပက္ခများ ဖြစ်နေသည့်အပြင် မူဆလင်အစွန်းရောက် အဖွဲ့များ၏ ခြိမ်းခြောက်မှုများနှင့်လည်း ရင်ဆိုင်နေရသည်ဟု AA ပြောရေးဆိုခွင့်ရှိသူ ဦးခိုင်သုခက ပြောသည်။   “ရခိုင်ပြည် အခြေအနေက ခြိမ်းခြောက်မှု မျိုးစုံအောက်မှာ ရောက်နေတယ်လို့ ပြောလို့ရပါတယ်။ ကျနော်တို့ ခြိမ်းခြောက်မှုမျိုးစုံနဲ့ ရင်ဆိုင်နေရတဲ့ အခြေအနေပါ။ တစ်ဖက်မှာလည်း အကြမ်းဖက် စစ်ကောင်စီနဲ့ ကျနော် တို့ ရင်ဆိုင်နေရတယ်၊ နောက်တစ်ခုက မပြီးပြတ်သေးတဲ့ တိုက်ပွဲတွေကိုလည်း ဆက်ပြီးတိုက်နေရတယ်။ တစ် ဖက်မှာ မူဆလင် အကြမ်းဖက် အဖွဲ့အစည်းတွေရဲ့ ခြိမ်းခြောက်မှု အန္တရာယ်ကိုလည်းပဲ ကျနော်တို့ ရင်ဆိုင်နေရ တယ်။ ရခိုင်ပြည်အခြေအနေက အသက်ရှင်ရပ်တည်ဖို့နဲ့ စစ်တိုက်ဖို့က တစ်ထပ်တည်း ကျနေတယ်လို့ ပြောလို့ ရပါတယ်။”   အာရက္ခတပ်တော် ULA/AA က ဩဂုတ်လ ၁၁ ရက်နေ့တွင် ပြုလုပ်သည့် သတင်းစာ ရှင်းလင်းပွဲအတွင်း သတင်းထောက်များ၏ မေးမြန်းချက်ကို ပြန်လည် ဖြေကြားခဲ့ခြင်း ဖြစ်သည်။   AA သည် မောင်တောမြို့နယ် အပါအဝင် ရခိုင်ပြည်အတွင်းရှိ မြို့နယ် ၁၄ မြို့နယ်ကို ထိန်းချုပ်ထားနိုင်ပြီ ဖြစ်သော်လည်း နယ်စပ်ဒေသတွင် လုံခြုံရေး စိန်ခေါ်မှုများ ဆက်လက်ရှိနေဆဲ ဖြစ်သည်ဟု ဆိုသည်။   လက်ရှိတွင် AA က ထိန်းချုပ်ဒေသများကို စစ်ကော်မရှင်တပ်က လေကြောင်းမှ ဗုံးကြဲ တိုက်ခိုက်မှုများနှင့် လက်နက်ကြီးဖြင့် ပစ်ခတ်တိုက်ခိုက်မှု ဆက်လုပ်နေသည့်အပြင် ARSA နှင့် RSO ကဲ့သို့သော ရိုဟင်ဂျာ လက်နက်ကိုင် အဖွဲ့များနှင့် နယ်စပ်တစ်လျှောက်တွင် ထိတွေ့ပစ်ခတ်မှုများ မကြာခဏ ဖြစ်ပွားနေကြောင်း ဒေသခံများက ပြောသည်။   ထိုပြဿနာများ အတွက် AA ဘက်မှ ခုခံကာကွယ်မှုများ ပြုလုပ်နေသလို ရန်သူများ၏ လှုပ်ရှားမှုများကို မျက်ခြေမပြတ် စောင့်ကြည့်နေရသည့် အခြေအနေဖြစ်သည် ဟု ဦးခိုင်သုခ က ဆက်ပြောသည်။   “ဆိုတော့ ပြဿနာရှိတာက တစ်ခါတစ်ခါမှာ ကိုယ်က ဘာမှမလုပ်ပေမယ့် ကိုယ်က အေးအေးချမ်းချမ်း နေချင် ပေမယ့် တစ်ဖက်က ကျူးကျော် တိုက်ခိုက်လာတဲ့ အခါ ကိုယ့်ကို ရန်သူဘက်ကနေ ရည်ရွယ်ချက်ရှိရှိနဲ့ နည်း မျိုးစုံနဲ့ ဒုက္ခပေးဖို့ ကြိုးစားလာတဲ့အခါ ကိုယ့်ဘက်က ပြန်လည်ပြီးတော့ ခုခံချေမှုန်းဖို့အတွက် တာဝန်ရှိပါ တယ်။ ဒါကြောင့်ပဲ စစ်ပွဲ ဘယ်ချိန်ပြီး မလဲဆိုတာ ပြောဖို့ခက်ပါတယ်၊ ဒီအချက်ကတော့ ဘာနဲ့ဆိုင်လဲဆိုရင် အကြမ်း ဖက် စစ်ကောင်စီဘက်က သူတို့ရှေ့မှာ ဘာဆက်လုပ်မလဲ ဆိုတာနဲ့ ကျနော်တို့ တိုက်ရိုက် အချိုးကျပါ တယ်။ ဆိုတော့ ရန်သူဘက်က လှုပ်ရှားမှု အခြေအနေကို ကြည့်ပြီးတော့ ရှေ့ကို ဘာဆက်လုပ်မလဲဆိုတာ ပြော ရမယ့် အခြေအနေ ဖြစ်ပါတယ်။ တစ်ဖက်မှာလည်း ကျနော်တို့ Islamization ခြိမ်းခြောက်မှု အခြေအနေ တွေနဲ့ ကြီးကြီးမားမား ရင်ဆိုင်နေရတဲ့ အခြေအနေဖြစ်ပါတယ်။”   ဩဂုတ်လ ၁၀ ရက်နေ့တွင်လည်း မူဆလင်လက်နက်ကိုင် အဖွဲ့ တစ်ဖွဲ့ဖြစ်သော ARSA တပ်ဖွဲ့ဝင်များက ဘင်္ဂလားဒေ့ရှ် နယ်စပ်တွင် ရှိသော အာရက္ခတပ်တော် AA ၏ နယ်စပ်လုံခြုံရေး ကင်းစခန်းအချို့ကို အင်အား အများအပြားဖြင့် ဝင်ရောက် တိုက်ခိုက်နေကြောင်း ဒေသတွင်း သတင်းအရင်းမြစ်များက ပြောသည်။   ထိုသို့ ရှောင်လွဲ၍ မရသည့် အခြေအနေများအား တန်ပြန်နိုင်ရန် လူထု အခြေပြု လုံခြုံရေး စနစ်တစ်ခု အခိုင်အမာ တည်ဆောက်နိုင်ရန် ကြိုးစားနေသည်ဟု ဆိုသည်။   ULA/AA က ၂၀၂၅ ခုနှစ်၊ မတ်လ ၁၈ ရက်နေ့တွင် အမျိုးသားကာကွယ်ရေး အရေးပေါ်ပြဋ္ဌာန်းချက် NDEP ကို ထုတ်ပြန်ခဲ့ပြီး အမျိုးသားများ အတွက် အသက် ၁၈ နှစ်မှ အသက် ၄၅ နှစ်အထိနှင့် အမျိုးသမီးများအတွက် အသက် ၁၈ နှစ်မှ အသက် ၂၅ နှစ်အထိ စစ်မှုထမ်းရန် ပြဋ္ဌာန်းခဲ့သည်။   အာရက္ခတပ်တော် AA သည် ရခိုင်ပြည်၏ နယ်မြေ ၉၀ ရာခိုင်နှုန်းခန့်ကို ထိန်းချုပ်ထားပြီး ကျန်ရှိနေသော ကျောက်ဖြူ၊ စစ်တွေ၊ မာန်အောင်မြို့နယ်များရှိ ကျေးရွာ အများစုကိုပါ ထိန်းချုပ်ထားနိုင်ပြီ ဖြစ်ကြောင်း AA က ဆိုသည်။   အာရက္ခတပ်တော် AA သည် ညီနောင်မဟာမိတ် သုံးဖွဲ့နှင့် အတူ ‘၁၀၂၇ စစ်ဆင်ရေး’ ကို ၂၀၂၃ ခုနှစ်တွင် စတင်ခဲ့ ပြီးနောက် ရခိုင်ပြည်တွင် စစ်ရေးအရ အောင်မြင်မှုများ ဆက်တိုက်ရရှိခဲ့သည်။   ၂၀၂၄ ခုနှစ် ဒီဇင်ဘာလတွင် မောင်တောမြို့နယ်ကို အပြီးသတ် သိမ်းပိုက်နိုင်ခဲ့ပြီးနောက် ကီလိုမီတာ ၂၇၀ ရှည် လျားသည့် မြန်မာ - ဘင်္ဂလားဒေ့ရှ် နယ်စပ် တစ်လျှောက်ရှိ စစ်ကော်မရှင်၏ နယ်ခြားစောင့်တပ် စခန်းများ အားလုံးကို ချေမှုန်းနိုင်ခဲ့ပြီး ဖြစ်သည်။

ရခိုင်ပြည်သူများကို စစ်ကော်မရှင်သာမက မူဆလင် အစွန်းရောက်အဖွဲ့များကလည်း ခြိမ်းခြောက်နေ – AA ပြော 

ရခိုင်ပြည်သူများကို စစ်ကော်မရှင်သာမက မူဆလင် အစွန်းရောက်အဖွဲ့များကလည်း ခြိမ်းခြောက်နေ - AA ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၇ ရက်…

  • August 17, 2025
စစ်ကော်မရှင်၏ ထိုးစစ်များမှာ ရွေးကောက်ပွဲ အတွက်ဟု ကရင်နီ တော်လှန်ရေးအင်အားစုများပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၇ ရက်။   စစ်ကော်မရှင်သည် ရွေးကောက်ပွဲ ကျင်းပပြုလုပ်နိုင်ရေး ကရင်နီပြည်အတွင်း ဆုံးရှုံးထားသည့် နယ်မြေများ ပြန်ရရှိရန် အတွက် အင်းအားဖြည့်တင်းကာ ထိုးစစ်များ ပိုမိုလုပ်ဆောင်နေသည်ဟု ကရင်နီပြည်ရှိ တော်လှန်ရေး အင်အားစုများက ပြောသည်။   စစ်ကော်မရှင်သည် လေယာဉ်အပြင် လက်နက်ကြီး၊ ဒရုန်းများ အသုံးပြု၍ ဗုံးကြဲတိုက်ခိုက်ကာ ပြည်သူများကို အကြောက်တရား ရိုက်သွင်းပြီး ရွေးကောက်ပွဲ ပြုလုပ်ရန်နိုင်အတွက် ကြိုးပမ်းနေသည်ဟု ကရင်နီပြည် အတိုင်ပင်ခံ ကောင်စီ (KSCC) အထွေအထွေအတွင်းရေးမှူး မော်ဒေးမြာက ပြောသည်။   “အကြမ်းဖက်စစ်တပ်က ရွေးကောက်ပွဲလုပ်မယ်ဆိုရင် တရားမျှတမှုရှိပါ့မလားပေါ့။ ဒါကလုံးဝမဖြစ်နိုင်ဘူး။ နိုင်ငံတကာကလည်း အသိအမှတ်ပြုမှာမဟုတ်ဘူး။ ကျမတို့ကရင်နီမှာ အခုဒီရက်ပိုင်းတွေမှာဆိုရင် ထိုးစစ်တွေ အရမ်းပဲများလာတယ်။ မတန်တစ်ဆအင်အားတွေသုံးပြီးတော့ အထူးသဖြင့် လေကြောင်းတိုက်ခိုက်မှုတွေ ဆိုရင်လည်း လူထုကို အကြောက်တရားပိုပြီးတော့ ရှိလာအောင်လို့ တမင်တကာလုပ်နေတာလို့ ကျမ မြင် တယ်။“   ရွေးကောက်ပွဲ ဖြစ်မြောက်ရေးအတွက် စစ်ကော်မရှင်သည် နည်းမျိုးစုံ သုံးပြီး လုပ်ဆောင်သွားနိုင်သည်ဟု ကယန်းအမျိုးသား တပ်မတော် (KNA) ၏ နိုင်ငံရေးဦးဆောင် ကော်မတီ ခွန်းရဲခေါင်က ယခုကဲ့သို့ သုံးသပ် ပြောဆိုသည်။   “စစ်အာဏာရှင်ကတော့ စစ်အာဏာသက်စွန့်ရှည်ဖို့ အတွက် နည်းလမ်းပေါင်းစုံနဲ့ ကြိုးစားသွားမှာ ဖြစ်ပါ တယ်။ ရွေးကောက်ပွဲ လုပ်ဖို့အတွက် ငွေရေးကြေးရေးတွေနဲ့ စားစရာသောက်စရာ ပေးကမ်းပြီးတော့မှ လုပ်တဲ့ နည်းလမ်းလည်း ရှိသလို စစ်ရေးအရ သူတို့ကို မဲမပေးတဲ့ ပြည်သူလူထုကို ဖိနှိပ်တာ၊ ခြိမ်းခြောက်တာ၊ ဖမ်းဆီး တာ၊ ပုဒ်မအမျိုးမျိုးတပ်တာလည်း လုပ်လာနိုင်ပါတယ်။ ဒါဟာသူ့ရဲ့ သဘောသဘာဝ ဖြစ်ပါတယ်။”   စစ်ကော်မရှင်က တော်လှန်ရေးတပ်ဖွဲ့များက အလုံးစုံ ထိန်းချုပ်ထားသည့် မယ်စဲ့မြို့နယ်၊ ရှားတောမြို့နယ်တို့ အပါအဝင် ပြည်နယ်အတွင်းက မြို့နယ် ၇ မြို့နယ်တွင် ရွေးကောက်ပွဲကျင်းပသွားမည်ဟု ဩဂုတ်လ ၁၅ ရက်နေ့က ထုတ်ပြန်ထားသည်။   ဒီးမော့ဆို၊ ဖရူဆိုမြို့၊ ဖားဆောင်း၊ ဘောလခဲ၊ မယ်စဲ့၊ လွိုင်ကော်နှင့် ရှားတောမြို့နယ် တို့ကို ပြည်သူ့လွှတ်တော် မဲဆန္ဒနယ် နှင့် အမျိုးသားလွှတ်တော် မဲဆန္ဒနယ် အဖြစ် သတ်မှတ်ထားပြီး ရွေးကောက်ပွဲ လုပ်သွားမည်ဟု စစ်ကော်မရှင်က ဆိုသည်။   အဆိုပါ ကိစ္စနှင့် ပတ်သက်၍ ခွန်းရဲခေါင် က “စစ်ကောင်စီက ရွေးကောက်ပွဲ လုပ်ဖို့အတွက် မြို့တွေကို ပြန်ပြီး ထိန်းချုပ်တာ ရှိပါတယ်။ ကျနော်တို့ စိုးမိုးထားတဲ့ နေရာတွေမှာတော့ ရွေးကောက်ပွဲဖြစ်မှာ မဟုတ်ပါဘူး။ လောလောဆယ် သူတို့စိုးမိုးထားတဲ့ လွိုင်ကော်မှာကတော့ သူတို့ လုပ်ကောင်းလုပ်လာနိုင်တယ်။ ဒီဖယ်ခုံမိုးဗြဲမှာ လည်း တစ်စုံတစ်ရာ ဖြစ်ကောင်း ဖြစ်လာနိုင်ပါတယ်” ဟု ဆက်ပြောသည်။   ကရင်နီပြည်တွင် စစ်ကော်မရှင်က ရွေးကောက်ပွဲကို အလွယ်တကူ လုပ်နိုင်မှာမဟုတ်ကြောင်း ကရင်နီပြည် ကြားကာလ အုပ်ချုပ်ရေးကောင်စီ (IEC) အရေးပေါ် ကယ်ဆယ်ရေးဌာနခွဲ ဦးစီးမှူး ကျားခင်စိန်က ယခုကဲ့သို့ ပြောသည်။   “လက်ရှိသူတို့ မဲဆန္ဒနယ်လုပ်ဖို့ စီစဥ်နေတဲ့ မြို့တွေဟာလဲ တော်လှန်ရေးအင်အားစုနဲ့က တစ်ဝက်ဆီ နယ်မြေ စိုးမိုး ထားပါတယ်၊၊ အခုစစ်ကြောင်း အဆမတန် ထိုးပြီး သိမ်းဖို့ကြိုးစားနေတဲ့ နယ်မြေတွေကိုလည်း ကျမတို့ ဘက်က အစွန်းကုန် ကာကွယ်နေတာဖြစ်လို့  သူတို့ ရွေးကောက်ပွဲဟာလည်း ကရင်နီပြည်မှာ ဖြစ်မြောက်ဖို့ လွယ်မှာ မဟုတ်ပါဘူး။”   ရွေးကောက်ပွဲအား မတရားသည့် နည်းလမ်းများကို သုံး၍ ဖြစ်မြောက်အောင် လုပ်ဆောင်ခဲ့သည် ရှိသော်လည်း ပြည်သူများထံက စစ်မှန်သည့် ဆန္ဒမဲများကို ရရှိမှာ မဟုတ်ဘူးဟု ဆိုကြသည်။   ထို့သို့ ပြည်သူလူထု၏ ထောက်ခံခြင်း မရှိသည့် ရွေးကောက်ပွဲကို နိုင်ငံတကာ အစိုးရအနေဖြင့် အသိအမှတ် မပြုရန်၊ သံတမန်ရေးအရ ဖိအားပေးခြင်းနှင့် ဆန့်ကျင်ပေးကြရန် ကယန်းအမျိုးသား တပ်မတော် (KNA) နှင့် ကရင်နီတော်လှန်ရေး အင်အားစုများက တောင်းဆိုထားသည်။   လက်ရှိတွင် ကရင်နီပြည်အတွင်းက မြို့နယ် ၇ မြို့နယ်စလုံးတွင် စစ်ကော်မရှင်တပ်နှင့် ကရင်နီ တော်လှန်ရေး အင်အားစုတို့အကြား ထိတွေ့တိုက်ပွဲများ ပြင်းထန်နေခြင်း ဖြစ်သည်။   ထိတွေ့တိုက်ပွဲများ ဖြစ်ပွားနေသည့် ကရင်နီပြည်ထဲက မြို့နယ် ၇ မြို့နယ်လုံးတွင် ရွေးကောက်ပွဲလုပ်ရန် စစ်ကော်မရှင်တပ်က သြဂုတ်လ ၁၅ ရက်နေ့က ကြေညာထားသော်လည်း ထိုကြေညာချက်မှာ လုံးဝမဖြစ်နိုင် ဘူးဟု ကရင်နီတော်လှန်ရေး အင်အားစုများက ပြောသည်။

စစ်ကော်မရှင်၏ ထိုးစစ်များမှာ ရွေးကောက်ပွဲ အတွက်ဟု ကရင်နီ တော်လှန်ရေးအင်အားစုများပြော

စစ်ကော်မရှင်၏ ထိုးစစ်များမှာ ရွေးကောက်ပွဲ အတွက်ဟု ကရင်နီ တော်လှန်ရေးအင်အားစုများပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၇ ရက်။  စစ်က…

  • August 17, 2025
တောင်ကိုရီးယားရှိ မြန်မာ ကျောင်းသားများ ကိုယ်အင်္ဂါလှူဒါန်းရန် စာရင်းပေး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၅ ရက်။   တောင်ကိုရီးယားရှိ မြန်မာကျောင်းသား ၃၀ ကျော်သည် အသက်ဝေမျှခြင်း လှုပ်ရှားမှုအတွင်းတွင် ကိုယ်အင်္ဂါ အစိတ်အပိုင်းများ လှူဒါန်းရန် စာရင်းပေးခဲ့ကြသည်။   အကယ်၍ ဦးနှောက် သို့မဟုတ် နှလုံး သေဆုံးသွားသည့် အခြေအနေမျိုးတွင် ၎င်းတို့၏ ကိုယ်အင်္ဂါများနှင့် ခန္ဓာကိုယ် တစ်ရှူးများကို ထုတ်ယူနိုင်သည်ဟု မြန်မာကျောင်းသား ၃၆ ဦးသည် ယခုလ ၁၂ ရက်နေ့တွင်  စာရင်းသွင်းခဲ့သည်ဟု ကိုရီးယား ကိုယ်အင်္ဂါ လှူဒါန်းရေး အေဂျင်စီ (KODA) က ပြောသည်။   ဘူချွန်ရှိ ကိုရီးယား မြန်မာ ကျောင်းသား အဖွဲ့ *Korean Myanmar Students Association) က မကြာသေးမီက  အသက် ဝေမျှရေး လှုပ်ရှားမှုတွင် ပါဝင်လာခဲ့သည်ဟု KODA က ပြောသည်။   ကိုယ်အင်္ဂါ လှူခွင့်ရလျှင် လှူဒါန်းမည်ဟု စာရင်းသွင်းသူ ၃၆ ဦးရှိပြီး မြန်မာကျောင်းသား ၄၁ ဦးကတော့ သွေးလှူခဲ့သည်ဟု ဆိုသည်။   ကိုရီးယား နိုင်ငံတွင် ကောင်းမှု လုပ်ချင်၍ ယခုလို ပါဝင်ရခြင်း ဖြစ်သည်ဟု မြန်မာကျောင်းသားများက ပြောကြောင်း KODA က ပြောပြသည်။   KODA အဖွဲ့ ခေါင်းဆောင် Lee Sam-yeol ကတော့ နိုင်ငံရပ်ခြားတွင် ပညာသင်ကြားရင်း စိတ်ကောင်း နှလုံးကောင်းကို ပြသသည့် အတွက် မြန်မာကျောင်းသားများအား လေးစားဂုဏ်ယူကြောင်း ပြောသည်။

တောင်ကိုရီးယားရှိ မြန်မာ ကျောင်းသားများ ကိုယ်အင်္ဂါလှူဒါန်းရန် စာရင်းပေး

တောင်ကိုရီးယားရှိ မြန်မာ ကျောင်းသားများ ကိုယ်အင်္ဂါလှူဒါန်းရန် စာရင်းပေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၅ ရက်။ တောင်ကိုရီးယားရှိ…

  • August 15, 2025
အိန္ဒိယ-မြန်မာနယ်စပ်တွင် လူနှစ်ဦးကို ငွေအမြောက်အများနှင့် ဖမ်းဆီး သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ ဩဂုတ်လ ၁၅ ရက်။ အိန္ဒိယ-မြန်မာနယ်စပ်မှာ အရင်းအမြစ် မပြသနိုင်ပဲ အိန္ဒိယ ရူပီးငွေ အမြောက်အများ လက်ထဲထားရှိ သယ်ဆောင်လာသော လူနှစ်ဦးကို အာသံ ရိုင်ဖယ် တပ်ဖွဲ့များက အိန္ဒိယ-မြန်မာ နယ်စပ်အနီးတွင် ဖမ်းဆီးလိုက်သည်ဟု PTI သတင်းဌာနက ဖော်ပြသည်။   ထိုသူ နှစ်ဦးကို ရူပီးငွေ ၆၈ သိန်းနှင့် အတူ မီဇိုရမ်ပြည်နယ် အရှေ့ပိုင်း ချန်ဖိုင်း ခရိုင်တွင် ဖမ်းဆီးမိခဲ့ခြင်း ဖြစ်သည်ဟု အာဏာပိုင်များက ဩဂုတ် ၁၄ ရက်နေ့တွင် ထုတ်ဖော်ပြောကြားခဲ့သည်။ ချန်ဖိုင်းခရိုင်ရှိ ဇိုတဲ (Zote) ရွာတွင် အာသံ ရိုင်ဖယ် တပ်ဖွဲ့က  သတင်းရထားသောကြောင့် ဩဂုတ်လ ၁၁ ရက်နေ့က ကားတစ်စီးကို တားပြီး စစ်ဆေးခဲ့ခြင်း ဖြစ်သည်။ သေချာစွာ စစ်ဆေးပြီးနောက်တွင် လူနှစ်ဦးဆီမှ အိန္ဒိ ငွေ ရူပီး သိန်း ၆၀ ကျော်ကို တွေ့ရှိခဲ့သည်။ ငွေအမြောက်အများ လက်ဝယ် ကိုင်ဆောင်ထားသူ နှစ်ဦးမှာ ဂျိုးဇက် လယ်ထန်ဆန်ဂါ (Joseph Lalthansanga) နဲ့ ဗင်လာရူအာတီ (Vanlalruati) တို့ နှစ်ယောက်ဖြစ်သော်လည်း မည်သည့် နိုင်ငံသား ဖြစ်သည်ကို ဖော်ပြထားခြင်း မရှိပါ။ ထိုသူ နှစ်ဦးသည် မည်သည့်နေရာက မည်သည့်အတွက် ယူဆောင်လာသည့် ပိုက်ဆံတွေ ဖြစ်ကြောင်း သေချာစွာ ပြောပြနိုင်ခြင်း မရှိကြောင်း အာသံ ရိုင်ဖယ်က သတင်းမီဒီယာများကို ပြောသည်။ အာသံရိုင်ဖယ်က သူတို့နှစ်ဦးကို ချက်ချင်းပင် ရဲလက်သို့ လွှဲပြောင်းပေးခဲ့သည်ဟု ဆိုသည်။ နောက်ထပ် စစ်ဆင်ရေး တစ်ခုတွင် အာသံရိုင်ဖယ်တပ်ဖွဲ့များက အဆိုပါ ဇိုတဲရွာမှာပင် ရူပီး ၇၈ သိန်း တန်ဖိုးရှိသော ဘိန်းဖြူ ၉၁၀၀ ဂရမ် နီးပါးကို ဩဂုတ်လ ၁၃ ရက်နေ့က ဖမ်းဆီး ရမိခဲ့သည်။

အိန္ဒိယ-မြန်မာနယ်စပ်တွင် လူနှစ်ဦးကို ငွေအမြောက်အများနှင့် ဖမ်းဆီး

အိန္ဒိယ-မြန်မာနယ်စပ်တွင် လူနှစ်ဦးကို ငွေအမြောက်အများနှင့် ဖမ်းဆီး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၅ ရက်။  အိန္ဒိယ-မြန်မာနယ်စ…

  • August 15, 2025
ဖိလစ်ပိုင်တွင် အမေရိကန် ဒုံးကျည်ပစ် စနစ်ချထားရန် ဖိလစ်ပိုင်နှင့် အမေရိကန် စဉ်းစားနေ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဩဂုတ်လ ၁၅ ရက်။ တောင်တရုတ်ပင်လယ်တွင် နယ်မြေ ပိုင်ဆိုင်မှု အငြင်းပွားမှုများ တင်းမာလာနေစဉ်မှာပင် အမေရိကန်၏ ဒုံးကျည်ပစ်လွှတ်ရေးစနစ်များကို ဖိလစ်ပိုင် ကမ်းခြေတလျောက် ချထားရန် နှစ်နိင်ငံ ဆွေးနွေးနေကြသည်။ ဝါရှင်တန်အခြေစိုက် ဖိလစ်ပိုင် သံအမတ်ကြီး Jose Manuel Romualdez ကတော့ နှစ်နိုင်ငံကြား သဘောတူညီတဲ့ အဆင့်ကို မရောက်သေးဘူးဟု ပြောသည်။ ယခင်နှစ် ဧပြီလအတွင်းက အမေရိကန်၏ တိုင်ဖွန်း (Typhon) ဟု ခေါ်သော တာလတ်ပစ် ဒုံးကျည်စနစ်များကို ဖိလစ်ပိုင် မြောက်ပိုင်းတွင် တပ်ဆင်ခဲ့သည်။ ထိုစနစ်များက စံ ဒုံးကျည် အမှတ်-၆ (Standard Missile-6) နဲ့ တိုမာဟော့ (Tomahawk) မြေပြင်တိုက်ခိုက်ရေး ဒုံးကျည်တွေကို ပစ်လွှတ်နိုင်သည်။ ထို ဒုံးကျည်ပစ်စင်များ ကိုတော့ ယခင်နှစ်က ပြုလုပ်သည့် နှစ်နိုင်ငံပူးတွဲ စစ်လေ့ကျင့်ရေးတွင် ချထားခဲ့ခြင်း ဖြစ်ပြီး ထိုင်ဝမ်းကျွန်းနှင့် မျက်နှာချင်းဆိုင်တွင် ချထားခဲ့ခြင်း ဖြစ်သည်။ ဖိလစ်ပိုင်တွင် အမေရိကန် ဒုံးကျည် စနစ်များ ချထားမှုကို တရုတ်နိုင်ငံက အပြင်းအထန် ကန့်ကွက်ခဲ့သည်။ ထိုလုပ်ရပ်သည် တရုတ်ပြည်၏ တိုးမြင့်မှုကို ဟန့်တားခြင်းသာဖြစ်ပြီး ဒေသတွင်း တည်ငြိမ်မှုကို ခြိမ်းခြောက် တာလဲ ဖြစ်သည်ဟု တရုတ်က ပြောသည်။ တရုတ်၏ အမေရိကန် ဒုံးကျည်များ ရုတ်သိမ်းရန် တောင်းဆိုချက်ကို ဖိလစ်ပိုင် သမ္မတ ဖာဒီနန် မားကို့စ် ဂျူနီယာ ဦးဆောင်သည့် အစိုးရ အရာရှိများက ပယ်ချခဲ့သည်။ ဖိလစ်ပိုင် သံအမတ်ကြီး (Jose Manuel Romualdez) ကတော့ အမေရိကန် နှင့် ဖိလစ်ပိုင် နှစ်နိုင်ငံလုံးက (NMESIS Missile Launchers) ဟု ခေါ်သော ဒုံးကျည်ပစ် စနစ်များ တပ်ဆင်ရန် စိတ်ဝင်စားနေသည်ဟု ဆိုသည်။ ယင်းမှာ အမေရိကန်၏ ရင်းနှီးမြှုပ်နှံမှုများ ဖိလစ်ပိုင်သို့ ပြန်လာခြင်း ဖြစ်သလို  မဟာမိတ်ဖြစ်မှု ပြန်လာခြင်းလည်း ဖြစ်သည်ဟု ဖိလစ်ပိုင် သံအမတ်ကြီးက ပြောသည်။

ဖိလစ်ပိုင်တွင် အမေရိကန် ဒုံးကျည်ပစ် စနစ်ချထားရန် ဖိလစ်ပိုင်နှင့် အမေရိကန် စဉ်းစားနေ

ဖိလစ်ပိုင်တွင် အမေရိကန် ဒုံးကျည်ပစ် စနစ်ချထားရန် ဖိလစ်ပိုင်နှင့် အမေရိကန် စဉ်းစားနေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၅ ရက်။  …

  • August 15, 2025
စစ်ကော်မရှင် ဒရုန်းကြောင့် ကျောင်းသား တစ်ဦး အပါ အရပ်သား ၅ဦး ဒဏ်ရာရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၅ ရက်။    ကချင်ပြည်၊ ဖားကန့်မြို့တွင် စစ်ကော်မရှင်တပ်က ဒရုန်းနှင့် ဗုံးကြဲတိုက်ခိုက်ခဲ့သဖြင့် ကျောင်းသားတစ်ဦး အပါအဝင် အရပ်သား ၅ ဦး ထိခိုက်ဒဏ်ရာရခဲ့သည်။   ဩဂုတ်လ ၁၄ ရက်နေ့ ယနေ့မွန်းလွှဲ ၁ နာရီဝန်းကျင် အချိန်တွင် ဖားကန့်မြို့၊ အေးမြသာယာ အုပ်စုထဲက ရှရော်ခကျေးရွာ အတွင်းရှိ နေအိမ်ခြံဝင်းထဲတွင် ဒရုန်းဖြင့် ဗုံးကြဲခဲ့ခြင်း ဖြစ်သည်။   ဖားကန့် ဒေသခံတစ်ဦးက “ရှရော်ခရွာထဲ ဒရုန်းဗုံးသီးချတာက စစ်ကောင်စီက လုပ်တာဟုတ်တယ်။ အဲ့ဒီဘက် တစ်ဝိုက်မှာက နှစ်ဖက်တပ်တွေ မျက်နှာချင်းဆိုင်ထားတဲ့ အနေအထားဖြစ်ပေမဲ့ တိုက်ပွဲ ဖြစ်ပွားတာ မရှိဘဲနဲ့ ရည်ရွယ်ချက်ရှိရှိ ဒရုန်း ဗုံးသီးချတာပေါ့ဗျာ” ဟု ပြောသည်။   ထိခိုက်ဒဏ်ရာ ရသူများထဲပါဝင်သည့် ကျောင်းသားမှာ ဆယ်တန်းကျောင်းသား ဖြစ်သည်။   စစ်ကောင်စီတပ်က ဖားကန့်မြို့ရှိ အရပ်သားများ နေထိုင်သည့် ရပ်ရွာများထဲ ယခုကဲ့သို့ ဒရုန်းဖြင့် ဗုံးကြဲချခြင်း၊ လက်နက်ကြီးများဖြင့် ပစ်ခတ်ခြင်းများကို မကြာခဏ ပြုလုပ်လေ့ရှိသည်ဟု ဒေသခံများက ပြောသည်။   ထိခိုက်ဒဏ်ရရှိသူများသည် အသက် ၁၆ နှစ် အရွယ် ၁၀ တန်းကျောင်းသား မောင်ထန်ရှမ်းခိုင်၊ ကိုဝင်းနိုင် အသက် ၅၂ နှစ် အရွယ် ကိုဝင်းနိုင်၊ အသက် ၅၆ နှစ်အရွယ် ကိုရဲနိုင်၊ အသက် ၅၇ နှစ်အရွယ် ကိုထူးကျော် နှင့် အသက် ၅၀ နှစ်အရွယ် ကိုတင်ထွဋ် ၅၀ တို့ဖြစ်ကြသည်။   ထိခိုက်ဒဏ်ရာရှိခဲ့သူများနက် နှစ်ဦးမှာ ပြင်းထန်ဒဏ်ရာများကြောင့် အသက်အန္တရာယ် စိုးရိမ်ရသည်ဟု နီးစပ်သူ များက ပြောသည်။   အခြား ဖားကန့်ဒေသခံတစ်ဦးက “တိုက်ပွဲမရှိဘဲ ပြည်သူလူထုကို အကြောက်တရားပေးသွင်းတဲ့ အနေနဲ့ ရွာထဲ လူစုတဲ့ နေရာတွေကို ဒရော့ဗုံးချတာလို့ ထင်ပါတယ်” ဟု စစ်ကောင်စီ၏ လုပ်ရပ်အပေါ် သုံးသပ်ပြောဆိုသည်။   စစ်ကော်မရှင်တပ်နှင့် ရှမ်းနီ အမျိုးသားတပ်မတော် SNA ပူးပေါင်းတပ် စစ်ကြောင်းတို့သည် မေလနောက်ဆုံး အပတ်မှ စတင်ကာ ဖားကန့်မြို့ကို ဝင်ရောက်နိုင်ခဲ့ပြီး မြို့ကို ဝင်ရောက်နိုင်သည့် လမ်းပိုင်းများကိုပါ ထိန်းချုပ် ထားသည့် အပြင် နေရာအချို့ကိုပါ ပြန်လည်နေရာယူထားနိုင်ပြီ ဖြစ်သည်။   အဆိုပါ စစ်ကြောင်းမှာ ကချင်လွတ်လပ်ရေး တပ်မတော် KIA ပူးပေါင်းတပ်ဖွဲ့များနှင့် စစ်ရေးတင်းမာနေပြီး ရှရော်ခ၊ လုံးခင်း၊ ဆိုင်းတောင်၊ မှောစီစာစသည့် ကျေးရွာများ အပါအဝင် ရွာပေါင်းများစွာက ဒေသခံ အရပ်သား ထောင်နှင့်ချီမှာ ဘေးလွှတ်ရာသို့တွင် တိမ်းရှောင်နေကြရသည်။

စစ်ကော်မရှင် ဒရုန်းကြောင့် ကျောင်းသား တစ်ဦး အပါ အရပ်သား ၅ဦး ဒဏ်ရာရ

စစ်ကော်မရှင် ဒရုန်းကြောင့် ကျောင်းသား တစ်ဦး အပါ အရပ်သား ၅ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၅ ရက်။   ကချင်ပြည်၊ ဖားကန့်မြိ…

  • August 15, 2025
×Close