သတင်း

စစ်တပ်မှလာသည့် ဒုထောင်မှူးက နိုင်ကျဉ်းများအား ဦးဆောင် ဖိနှိပ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၈ ရက်။ ဒိုက်ဦးထောင်တွင် စစ်တပ်မှ အသွင်ပြောင်းလာသည့် ဒုထောင်မှူးက နိုင်ငံရေးအကျဉ်းသားများအား ဦးဆောင် ဖိနှိပ်နေသည်ဟု နိုင်ကျဉ်းအရေး လုပ်ဆောင်နေသူများက ပြောသည်။ ပဲခူးတိုင်း၊ ညောင်လေးပင်ခရိုင် အတွင်းရှိ ဒိုက်ဦးအကျဉ်းထောင် (ကျိုက်စကော) ၌ စစ်ကော်မရှင်တပ်မှ အသွင် ပြောင်းလာသည့် ဒုထောင်မှူးက နိုင်ငံရေးအကျဉ်းသားများ အပေါ် စစ်တပ်ပုံစံဖြင့် ပြင်းထန်သော ဖိနှိပ်မှုများ ဦးဆောင် ကျူးလွန်နေခြင်းကြောင့် အကျဉ်းသားများ၏ အသက်အန္တရာယ် စိုးရိမ်ရသည့် အခြေအနေသို့ ရောက်ရှိနေသည်ဟု ဆိုသည်။ ယခု ဒီဇင်ဘာလနှောင်းပိုင်း အတွင်း ထောင်အာဏာပိုင်များက နိုင်ငံရေးအကျဉ်းသား (နိုင်ကျဉ်း) များအပေါ် လူ့အခွင့်အရေး ချိုးဖောက်မှုများ ဆိုးရွားစွာ ပြုလုပ်နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ယက် (PPNM) က ထုတ်ပြန်ထားသည်။ PPNM ပြောရေးဆိုခွင့်ရှိသူ မလင်းက “ဒိုက်ဦးအကျဉ်းထောင်ကလည်း အရင်ကတည်းက အဲလို ညှဉ်းပန်း နှိပ်စက်တာမျိုးတွေ ရှိတယ်။ ဒါပေမဲ့ အခု ပိုဆိုးလာတယ်ဆိုတာက ကျတော့ အခု ဒီ ဒုထောင်မှူး ပြောင်းလာ တယ်ပေါ့နော်။ သူပြောင်းလာကတည်းက ပိုပြီးတော့ ဆိုးတာပေါ့။ သူကတော့ အသွင်ပြောင်းထားတဲ့ လူဖြစ် တာပေါ့နော်။ ဒီစစ်တပ်ဘက်ကနေ အသွင်ပြောင်းလာတာ ဖြစ်တဲ့အတွက် အာ ဒီစစ်တပ်ရဲ့ လက်မရွံ့မှုတွေ သူ့မှာ ရှိနေတယ်ပေါ့နော်။ တစ်မိန့် တစ်အာဏာ ပေါ့နော် စနစ်နဲ့ ထောင်ကို ဒီစစ်တပ်ပုံစံမျိုး ထိန်းချုပ်နေတာ ကို တွေ့ရပါတယ်” ဟု ပြောသည်။ အဆိုပါ ဖိနှိပ်မှုများကို စစ်တပ်မှ အကျဉ်းဦးစီးဌာနသို့ အသွင်ပြောင်းလာသူ ဒုထောင်မှူး က အဓိက ဦးဆောင်နေခြင်းဖြစ်ပြီး၊ ၎င်းရောက်ရှိလာပြီးနောက်ပိုင်း ထောင်တွင်းအခြေအနေများ ပိုမိုဆိုးရွားလာခြင်း ဖြစ်သည်။ ထောင်အာဏာပိုင်များသည် ထောင်တွင်း ရှာဖွေရေးကို အကြောင်းပြကာ နိုင်ငံရေးအကျဉ်းသားများ ကျန်းမာ ရေး အတွက် ဆောင်ထားသည့် ဆေးဝါးများ၊ စာပေလေ့လာသင်ယူသည့် စာအုပ်များနှင့် စာရွက်စာတမ်းများကို လိုက်လံသိမ်းဆည်းလျက်ရှိသည်။ ထိုသို့ သိမ်းဆည်းရာတွင် မိသားစုဝင်များက ခက်ခဲစွာ ပို့ဆောင်ထားသည့် အရေးကြီးဆေးဝါးများပါ ပါဝင်နေ သဖြင့် နာတာရှည် ရောဂါဝေဒနာရှင်များအတွက် ကြီးမားသော အခက်အခဲဖြစ်နေသည်။ ဆေးကုသခွင့်နှင့် ပတ်သက်၍လည်း မလင်းက “ထောင်ထဲမှာ ဆေးကုသခွင့်လည်း ပေးပါတယ်။ အပြင်ဆေးရုံ ကုသခွင့်တွေလည်း ပေးတယ်။ ဒါပေမဲ့ အဆင့်ဆင့် သူတို့က တင်ရတာဖြစ်တယ်။ ကျန်းမာရေး ဖြစ်တဲ့ အခါမျိုးမှာ ဒီဆေးဝါးကို အရင်ပေးတယ်။ ပြီးတော့မှ ဟို မနေနိုင်တော့ဘူး၊ အဆင်မပြေတော့ဘူး ဆိုတော့ကျမှ ထောင်ဆေးရုံကို ပို့တာမျိုး ရှိတယ်” ဟု ပြောသည်။ သို့သော် ထောင်ဆေးရုံ သို့မဟုတ် အပြင်ဆေးရုံသို့ ပို့ဆောင်ရန် တင်ပြရာတွင် အဆင့်ဆင့်သော လုပ်ငန်းစဉ်များ ကြောင့် အချိန်အလွန် ကြန့်ကြာနေရသည်ဟု ဆိုသည်။ “အဲဒီအခါမှာ ထောင်ဆေးရုံ မပို့ခင်မှာလည်း အဆင့်ဆင့် တင်ပြရတာတွေက အချိန်အရမ်းကြာတယ်။ အဲဒီ အခါမှာ ဝန်ထမ်းတွေရဲ့ လျစ်လျူရှုမှုကြောင့်မို့လို့ အချိန်ကြာသွားတာမျိုးတွေ ရှိတယ်။ နောက်ပြီးတော့ အပြင် ဆေးရုံကို ပို့ရမယ်ဆိုလို့ရှိရင် ပိုပြီးတော့ အချိန်ကြာတာပေါ့နော်။ ထောင်မှူးရဲ့ လက်မှတ်တွေ ဘာတွေညာတွေ လိုသေးတာဆိုတော့ သူတို့ဘက်ကနေမှာ အချိန်မီပေါ့နော်။ ဟို မတင်ပို့နိုင်ဘူး ဆိုလို့ရှိရင် ဒီလူရဲ့ အသက် အန္တရာယ်က စိုးရိမ်ရတဲ့ အခြေအနေမျိုး ဖြစ်ပါတယ်” ဟု မလင်းက ဆက်လက် ရှင်းပြသည်။ ထို့အပြင် နိုင်ကျဉ်းများသည် စားနပ်ရိက္ခာ အခက်အခဲနှင့်လည်း ရင်ဆိုင်နေကြရသည်။ မိသားစုက ပို့ပေးသည့် ရိက္ခာများအပြင် ထောင်တွင်းဈေးဆိုင်မှ မတန်တဆဈေးဖြင့် ဝယ်ယူထားသည့် အစားအစာများကိုပါ အာဏာပိုင် များက လိုက်လံ သိမ်းဆည်းလေ့ရှိကြောင်း အကျဉ်းထောင်နှင့်နီးစပ်သူများက ပြောသည်။ အဆိုးရွားဆုံး အချက်မှာ ကျန်းမာရေး စောင့်ရှောက်မှု မလုံလောက်ခြင်းကို တင်ပြတောင်းဆိုသည့် အကျဉ်းသားများအား အမည်စာရင်း မှတ်သားထားပြီး လေးဖက်ထောက် တွားသွားခိုင်းခြင်း၊ ရိုက်နှက်ခြင်းနှင့် တိုက်ပိတ်ခြင်း စသည့် နှိပ်စက်မှုများကိုပါ ပြုလုပ်နေခြင်း ဖြစ်သည်။ ဒိုက်ဦးအကျဉ်းထောင် တည်ရှိရာ ပဲခူးတိုင်းဒေသကြီးသည် စစ်ရေးတင်းမာမှုများ ရှိနေသည့် နယ်မြေဖြစ် သကဲ့ သို့၊ ထောင်အတွင်း၌လည်း အသွင်ပြောင်း စစ်ဘက်အရာရှိများ၏ တင်းကျပ်သော အုပ်ချုပ်မှုကြောင့် နိုင်ငံရေးအကျဉ်းသားများ၏ အခွင့်အရေးများမှာ လုံးဝ ဆုံးရှုံးနေရသည်။ ယခုကဲ့သို့ ဆေးကုသခွင့် နှောင့်နှေးခြင်းနှင့် စနစ်တကျ ဖိနှိပ်နေခြင်းများကြောင့် နောက်နောင်တွင် အကျဉ်းသား များ အသက်သေဆုံးသည်အထိ ဖြစ်လာနိုင်ကြောင်း PPNM က သတိပေး သုံးသပ်ထားသည်။  

စစ်တပ်မှလာသည့် ဒုထောင်မှူးက နိုင်ကျဉ်းများအား ဦးဆောင် ဖိနှိပ်

စစ်တပ်မှလာသည့် ဒုထောင်မှူးက နိုင်ကျဉ်းများအား ဦးဆောင် ဖိနှိပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၈ ရက်။ ဒိုက်ဦးထောင်တွင် စစ်တပ်မှ …

  • December 28, 2025
ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး သတင်းနှင့်မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၈ ရက်။ ရွေးကောက်ပွဲ ကျင်းပသည့် ယနေ့ ဒီဇင်ဘာလ ၂၈ ရက်နေ့တွင် ရွေးကောက်ပွဲ မကျင်းပနိုင်သည့် မြို့နယ် ၉ ခုကို ထပ်မံ ဖြည့်စွက်ခဲ့သည်။ စစ်ကော်မရှင် ရွေးကောက်ပွဲ မကျင်းပနိုင်သည့် မြို့နယ် ၆၅ ခုအထိ ရှိလာပြီး စံချိန်တင်နယ်မြေများ ဆုံးရှုံးနေ သည်။ စစ်ကော်မရှင်က အတင်းအကျပ် ကျင်းပရန် ကြိုးပမ်းနေသည့် ရွေးကောက်ပွဲကို ယနေ့တွင် စတင်လိုက်သော် လည်း ရွေးကောက်ပွဲကျင်းပရန် နာရီပိုင်းအလိုအထိ မကျင်းပနိုင်သည့် မြို့နယ်စာရင်းကို ထပ်မံတိုးမြှင့် ကြေညာခဲ့သည်။ ထို့ကြောင့် တစ်နိုင်ငံလုံးအတိုင်းအတာဖြင့် မြို့နယ် ၆၅ ခုအထိ ရှိလာပြီး ရွေးကောက်ပွဲ သမိုင်းတစ်လျှောက် မကျင်းပနိုင်သည့် နယ်မြေအရေအတွက် အများဆုံးအဖြစ် စံချိန်တင်သွားခဲ့သည်။ စစ်ကော်မရှင် လက်အောက်ခံ ပြည်ထောင်စု ရွေးကောက်ပွဲကော်မရှင် (UEC) သည် ရွေးကောက်ပွဲ ကျင်းပရန် နာရီပိုင်းအလိုတွင် ချင်းပြည်မှ ၃ မြို့နယ်၊ စစ်ကိုင်းတိုင်းမှ ၂ မြို့နယ်နှင့် ရခိုင်ပြည်မှ ၄ မြို့နယ်၊ စုစုပေါင်း မြို့နယ် ၉ ခုကို ရွေးကောက်ပွဲ မကျင်းပနိုင်သည့် မြို့နယ်စာရင်းထဲသို့ ထပ်မံဖြည့်စွက်ခဲ့ခြင်း ဖြစ်သည်။ ယခင်က ရွေးကောက်ပွဲ မကျင်းပနိုင်ဟု ကြေညာထားသည့် မြို့နယ် ၅၆ မြို့နယ်ရှိရာမှ ယခုထပ်တိုးစာရင်းအရ မြန်မာနိုင်ငံရှိ မြို့နယ်ပေါင်း ၃၃၀ အနက် မြို့နယ် ၆၅ ခုတွင် ရွေးကောက်ပွဲ လုံးဝကျင်းပနိုင်ခြင်း မရှိတော့ကြောင်း စစ်ကော်မရှင်က တရားဝင်ဝန်ခံလိုက်ရခြင်းလည်း ဖြစ်သည်။ အဆိုပါ ထပ်တိုးမြို့နယ်များမှာ ချင်းပြည်ရှိ တွန်းဇံ၊ ဖလမ်းနှင့် ထန်တလန်၊ စစ်ကိုင်းတိုင်းရှိ ကောလင်းနှင့် ဗန်းမောက်၊ ရခိုင်ပြည်ရှိ အမ်း၊ သံတွဲ၊ ဂွနှင့် တောင်ကုတ်မြို့နယ်တို့ ဖြစ်သည်။ မြို့နယ်အဆင့်သာမက ရပ်ကွက် နှင့် ကျေးရွာအုပ်စုအဆင့်တွင်လည်း မကျင်းပနိုင်သည့် နေရာများစွာ ရှိနေသည်။ ဒီဇင်ဘာလ ၂၇ ရက်နေ့ ထုတ်ပြန်ချက်အရ ရွေးကောက်ပွဲ အပိုင်း (၃) တွင် မကျင်းပနိုင်သည့် ရပ်ကွက်နှင့် ကျေးရွာ အုပ်စုပေါင်း ၁,၀၆၄ ခု ရှိနေပြီး ယခင်အပိုင်း (၁) နှင့် (၂) တို့ရှိ မကျင်းပနိုင်သည့် နေရာ ၂,၉၃၁ ခုနှင့် ပေါင်းစပ်လိုက်ပါက တစ်နိုင်ငံလုံးတွင် ရွေးကောက်ပွဲ တစ်စိတ်တစ်ပိုင်း မကျင်းပနိုင်သည့် ရပ်ကွက်၊ ကျေးရွာအုပ်စု ၄,၀၀၀ နီးပါးအထိ ရှိလာသည်။ ယခုကဲ့သို့ စစ်ကော်မရှင်က မကျင်းပနိုင်သည့် နယ်မြေစာရင်းကို နောက်ဆုံးအချိန်အထိ ထုတ်ပြန်နေရခြင်းမှာ မြေပြင်တွင် တော်လှန်ရေးအင်အားစုများ၏ စိုးမိုးမှုနှင့် တိုက်ပွဲများကြောင့်ဖြစ်ကြောင်း ဒေသခံများက သုံးသပ်ကြသည်။ စစ်ကိုင်းတိုင်းမှ ဒေသခံတစ်ဦးက "သူတို့ ဘယ်လိုပဲ အတင်းလုပ်ချင်လုပ်၊ ကျနော်တို့ဆီမှာတော့ ဘယ်သူမှ မဲမပေးသလို သူတို့လည်း ရုံးမဖွင့်နိုင်ဘူး။ မဲစာရင်းကပ်တဲ့ရက်ကတည်းက မြို့ထဲမှာ ပေါက်ကွဲသံတွေ ကြားနေရတာ။ မနေ့ညကဆိုရင်လည်း ဗန်းမောက်ဘက်မှာ အသံတွေ ကြားနေရတယ်။ ဒီရွေးကောက်ပွဲက စာရွက်ပေါ်မှာပဲ ရှိတာပါ” ဟု မြေပြင်အခြေအနေကို ပြောပြသည်။ ထို့အပြင် ရွေးကောက်ပွဲကျင်းပသည့် မြို့ကြီးများတွင်လည်း မဲရုံများအနီး ပေါက်ကွဲမှုများ ဖြစ်ပွားနေသဖြင့် ပြည်သူများမှာ စိုးရိမ်ထိတ်လန့်နေကြသည်။ ဧရာဝတီတိုင်းမှ ဝန်ထမ်းမိသားစုဝင်တစ်ဦးက "မနက်ပိုင်းကစပြီး မဲရုံတွေ ဖွင့်တယ်ဆိုပေမယ့် လမ်းပေါ်မှာ လူသူသိပ်မရှိဘူး။ စစ်တပ်နဲ့ ပျူစောထီးတွေတော့ ရှိတယ်။ မဲမပေးရင် အိမ်တွေကို ချိပ်ပိတ်မယ်၊ တော်လှန် ရေး အဖွဲ့တွေနဲ့ ပတ်သက်တယ်လို့ သတ်မှတ်မယ်ဆိုပြီး ခြိမ်းခြောက်ထားလို့သာ လူတချို့ ထွက်လာကြတာ" ဟု ပြောသည်။ စစ်ကော်မရှင်၏ ၂၀၂၅ ရွေးကောက်ပွဲသည် နိုင်ငံတကာ၏ အသိအမှတ်ပြုမှုရရန်နှင့် နိုင်ငံရေးထွက်ပေါက်ရှာရန် ကြိုးပမ်းခြင်းဖြစ်သော်လည်း၊ မြေပြင်တွင် နယ်မြေ အများအပြား ဆုံးရှုံးနေခြင်းနှင့် ပြည်သူလူထု၏ သပိတ်မှောက် ဆန့်ကျင်မှုများကြောင့် ရွေးကောက်ပွဲမှာ တရားဝင်မှု ကင်းမဲ့နေကြောင်း နိုင်ငံရေးလေ့လာသူများ က သုံးသပ်နေကြသည်။

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၈ ရက်။  ရွေးကောက်ပွဲ ကျင်းပသည့် …

  • December 28, 2025
မန္တလေး၊ မုံရွာ၊ ထားဝယ်၊ ပြည်၊ မြဝတီနှင့် ဖားကန့်တို့တွင် ရွေးကောက်ပွဲနေ့မနက် ပေါက်ကွဲမှုများ ဖြစ်ပွား သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်၏ ရွေးကောက်ပွဲကို ယနေ့ (ဒီဇင်ဘာ ၂၈) နံနက်ပိုင်းတွင် စတင်ခဲ့သော်လည်း နာရီပိုင်းအလိုကပင် မြို့အများအပြားတွင် ပေါက်ကွဲမှုများ ဆက်တိုက်ဖြစ်ပွားခဲ့သည်။ မန္တလေး၊ မုံရွာ၊ ထားဝယ်၊ ပြည်၊ မြဝတီနှင့် ဖားကန့်မြို့နယ်တို့တွင် ပေါက်ကွဲမှုများ ဖြစ်ပွားခဲ့သည်။ တစ်နိုင်ငံလုံး အတိုင်းအတာဖြင့် ရွေးကောက်ပွဲ မကျင်းပနိုင်သည့် နယ်မြေအရေအတွက်မှာလည်း စံချိန်တင် များပြားနေသည်။ ပြည်ထောင်စု ရွေးကောက်ပွဲကော်မရှင် (UEC) ၏ ဒီဇင်ဘာ ၂၇ ရက် ထုတ်ပြန်ချက်အရ ယနေ့ပြုလုပ်သည့် ရွေးကောက်ပွဲ အပိုင်း (၃) တွင် ရွေးကောက်ပွဲ မကျင်းပနိုင်သည့် ရပ်ကွက်နှင့် ကျေးရွာအုပ်စုပေါင်း ၁,၀၆၄ ခု ရှိနေသည်။ ယခင်ကြေညာထားသည့် အပိုင်း (၁) နှင့် (၂) တို့မှ စာရင်းများ အပါအဝင်ဆိုလျှင် ယခု ၂၀၂၅ ရွေးကောက်ပွဲတွင် တစ်နိုင်ငံလုံး အတိုင်းအတာဖြင့် မြို့နယ် ၆၄ မြို့နယ်၌ ရွေးကောက်ပွဲ လုံးဝ မကျင်းပနိုင်ခြင်း ဖြစ်ရာ ရပ်ကွက်နှင့် ကျေးရွာ အုပ်စုပေါင်း ၄,၀၀၀ နီးပါးတွင် မကျင်းပနိုင်ခြင်း ဖြစ်သည်။ ဤသည်မှာ မြန်မာ့ရွေးကောက်ပွဲ သမိုင်းတစ်လျှောက် ရွေးကောက်ပွဲ မကျင်းပနိုင်သည့် နယ်မြေဒေသ အများဆုံးအဖြစ် စံချိန်တင်ခဲ့ခြင်းလည်း ဖြစ်သည်။ ရွေးကောက်ပွဲ စတင်ရန် နာရီပိုင်းအလို ဒီဇင်ဘာလ ၂၇ ရက်နေ့ ညပိုင်းတွင် ထားဝယ်၊ ပြည်၊ မြဝတီ နှင့် ဖားကန့် မြို့များ၌ ပြင်းထန်သော ပေါက်ကွဲမှုများ ဖြစ်ပွားခဲ့သည်။ ပဲခူးတိုင်း၊ ပြည်မြို့တွင် မဲရုံများနှင့် ရဲစခန်းအနီး၌ ပေါက်ကွဲမှု သုံးကြိမ်ဖြစ်ပွားခဲ့သည်။ ပြည်မြို့ခံတစ်ဦးက “ဒီမှာက ရွေးကောက်ပွဲကို ဘယ်သူမှ စိတ်မဝင်စားကြဘူး။ တခြားမြို့တွေမှာလိုပါပဲဗျာ။ ဒီနေ့တော့ ရ ဘာတွေဆက်ဖြစ်မယ်ဆိုတာ မသိဘူး။ ပေါက်ကွဲမှုတွေ ဖြစ်နေတော့ လူထုကတော့ စိုးရိမ်နေတာ ပေါ့။ မဆိုင်တဲ့လူတွေကို ဆွဲစိမှာတို့၊ ပေါက်ကွဲမှု ဖြစ်လို့ဆိုပြီး လုံခြုံရေး ပိုပြီး တင်းကျပ်လာမှာတို့က အစပေါ့ ဗျာ။ အခုလည်း စစ်တပ်က ခြိမ်းခြောက်ပြီး မဲရုံတွေကို လာခိုင်းထားတယ်” ဟု မြေပြင်ဖိအားပေးခံရမှု အခြေအနေကို ပြောသည်။ အလားတူ ထိုင်း-မြန်မာနယ်စပ် မြဝတီမြို့တွင်လည်း ကြံ့ခိုင်ရေးပါတီ USDP ရုံး နှင့် ရပ်ကွက်အုပ်ချုပ်ရေးမှူးရုံး များ အနီး၌ ဗုံးသုံးကြိမ်ထက်မနည်း ပေါက်ကွဲခဲ့သည်။ မြဝတီမြို့ခံတစ်ဦးက "အုံးဆိုတဲ့အသံက တော်တော်ကို ကျယ်တာ။ သတိနဲ့ နေရတယ်။ ဒရုန်းနဲ့ ကြဲတာလိုလို၊ ဗုံးကွဲတာလိုလိုပဲ ပြောနေကြတယ်။ ကြံ့ဖွတ်ရုံးကို ချတာ၊ လူထိတယ်လို့ ကြားတယ်" ဟု ဆိုသည်။ ပေါက်ကွဲမှုများဖြစ်ပြီးနောက် စစ်ကော်မရှင်တပ်နှင့် BGF များက မြို့အတွင်း ရမ်းသမ်းပစ်ခတ်မှုများ ပြုလုပ်ခဲ့ ကြောင်း မြေပြင်သတင်းရင်းမြစ်က ပြောသည်။ အလားတူ မန္တလေးမြို့တွင်လည်း ယနေ့ (ဒီဇင်ဘာ ၂၈ ရက်) နံနက် ၁ နာရီကျော် အချိန်တွင် အောင်မြေသာစံ မြို့နယ် အတွင်း ရှော့တိုက်ဒုံးတစ်လုံး ကျရောက်ပေါက်ကွဲခဲ့သဖြင့် အိမ်တွင်းအိပ်ပျော်နေသည့် ဇနီးမောင်နှံ နှစ်ဦး ထိခိုက်ဒဏ်ရာရရှိခဲ့ကာ ဇနီးဖြစ်သူမှာ ခြေကျင်းဝတ်ပြတ်တောက်သွားသည့် စိုးရိမ်ရဒဏ်ရာ ရရှိခဲ့သည်။ စစ်ကိုင်းတိုင်း၊ မုံရွာမြို့ပေါ်တွင် ယမန်နေ့ ည ၁၀ နာရီဝန်းကျင် အချိန်တွင် ပေါက်ကွဲသံများ ထွက်ပေါ်ခဲ့ပြီး စစ်တပ်နှင့်ရဲ၊ ပျူစောထီးများက ကင်းလှည့်နေသည်ဟု မြို့ခံများက ပြောသည်။ လက်ရှိတွင် ရန်ကုန်နှင့် မန္တလေးကဲ့သို့ မြို့ကြီးများ၌ စစ်ကော်မရှင်က လုံခြုံရေးအင်အား အပြည့်ဖြင့် မဲရုံများ ဖွင့်လှစ်ကာ ရွေးကောက်ပွဲကို အရှိန်မြှင့်လုပ်ဆောင်နေသော်လည်း၊ တော်လှန်ရေးအင်အားစုများကမူ ယခု ရွေးကောက်ပွဲကို ဝိုင်းဝန်းဆန့်ကျင်ကြရန်နှင့် မဲရုံများအနီးသို့ မသွားကြရန် ပြည်သူများကို သတိပေးထားသည်။ စစ်ကော်မရှင်ဘက်ကမူ ဝန်ထမ်းများနှင့် ဒေသခံများကို မဲပေးရန် ခြိမ်းခြောက်ဖိအားပေးမှုများ ဆက်တိုက်လုပ် ဆောင်နေသဖြင့် မြေပြင်တွင် တင်းမာမှုများ မြင့်တက်လျက်ရှိသည်။  

မန္တလေး၊ မုံရွာ၊ ထားဝယ်၊ ပြည်၊ မြဝတီနှင့် ဖားကန့်တို့တွင် ရွေးကောက်ပွဲနေ့မနက် ပေါက်ကွဲမှုများ ဖြစ်ပွား

သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၈ ရက်။  စစ်ကော်မရှင်၏ ရွေးကောက်ပွဲကို ယနေ့ (ဒီဇင်ဘာ ၂၈) နံနက်ပိုင်းတွင် စတင်ခဲ့သော်လည်း နာရီပ…

  • December 28, 2025
ထိုင်းမှာ ဖမ်းမိတဲ့ DJI ဒရုန်းတွေ ဘယ်လောက် အသုံးဝင်သလဲ။ သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ ဒီဇင်ဘာလ ၂၄ ရက်။ လတ်တလော ဘန်ကောက်မြို့တွင် ထိုင်းအာဏာပိုင်များ သိမ်းဆည်းရမိခဲ့သော ဒရုန်းများအနက် တရုတ်နိုင်ငံထုတ် DJI (Mavic Series) ဒရုန်းများသည် စစ်မြေပြင်တွင် အသုံးများသည့် အဆင့်မြင့်ဒရုန်းများ ဖြစ်သည်။ အဆိုပါဒရုန်းများသည် ထိန်းချုပ်သူရှိသည့်နေရာမှ ၁၂ မိုင်အကွာအဝေးအထိ ပြတ်တောက်မှုမရှိဘဲ ပျံသန်းနိုင်သည့်အပြင်၊ ပင်လယ်ရေမျက်နှာပြင်အထက် ပေပေါင်း ၁၉,၀၀၀ (၆,၀၀၀ မီတာ) အထိ မြင့်မားစွာ ပျံသန်းနိုင်သောကြောင့် မြေပြင်မှ သာမန်မျက်စိဖြင့် မမြင်နိုင်သလို အသံကိုလည်း မကြားနိုင်ပေ။ DJI ဒရုန်းများ၏ ကင်မရာမှန်ဘီလူးသည် ၂၈ ဆအထိ ဆွဲကြည့်နိုင်သောကြောင့် လူတစ်ဦး၏ လှုပ်ရှားမှုကို အဝေးမှ အသေးစိတ် ထောက်လှမ်းနိုင်ပါသည်။ အချို့အမျိုးအစားများတွင် အပူလှိုင်းဖမ်းကင်မရာ ပါဝင်သည့်အတွက် ညဖက်အမှောင်အတွင်းရှိ လူနှင့် ယာဉ်များ၏ အပူရှိန်ကို သိရှိနိုင်ပါသည်။ ထို့ပြင် အဆိုပါဒရုန်းများသည် ၀.၅ ကီလိုဂရမ်မှ ၂ ကီလိုဂရမ်အထိ အပိုပစ္စည်းများ သယ်ဆောင်နိုင်သောကြောင့် အောက်ခြေတွင် စက်ခလုတ်ငယ်များ တပ်ဆင်၍ ဗုံးကြဲယာဉ်အဖြစ် ပြောင်းလဲအသုံးပြုနိုင်ပါသည်။ တိကျကောင်းမွန်သော GPS စနစ်ကြောင့် ပစ်မှတ်ပေါ်သို့ တည့်တည့်ရောက်ရှိအောင် မောင်းနှင်နိုင်ပြီး ၎င်းတို့၏ ဘက်ထရီသက်တမ်းမှာ မိနစ် ၃၀ မှ ၄၅ မိနစ်အထိ ရှိသောကြောင့် ထောက်လှမ်းရေးနှင့် တိုက်ခိုက်ရေးလုပ်ငန်းများအတွက် အလွန်ထိရောက်သော ကိရိယာများ ဖြစ်ကြပါသည်။

ထိုင်းမှာ ဖမ်းမိတဲ့ DJI ဒရုန်းတွေ ဘယ်လောက် အသုံးဝင်သလဲ။

ထိုင်းမှာ ဖမ်းမိတဲ့ DJI ဒရုန်းတွေ ဘယ်လောက် အသုံးဝင်သလဲ။  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၅ ရက်။  လတ်တလော ဘန်ကောက်မြို့တွင် ထိုင…

  • December 25, 2025
လစ်ဗျားစစ်ဖက်ဆိုင်ရာဦးစီးချုပ်နှင့်အဖွဲ့ လေယာဉ်ပျက်ကျမှုကြောင့် သေဆုံး သတင်းနှင့်မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၅ ရက်။ လစ်ဗျားနိုင်ငံ၏ စစ်ဖက်ဆိုင်ရာဦးစီးချုပ် ဒုတိယဗိုလ်ချုပ်ကြီး မိုဟာမက် အယ်လ်ဟာဒက် (Lieutenant General Mohammed al-Haddad) နှင့် အဖွဲ့ဝင် (၄) ဦးတို့သည် တူရကီနိုင်ငံတွင် လေယာဉ်ပျက်ကျမှုကြောင့် ကွယ်လွန်သွားခဲ့သည်။ ၎င်းတို့စီးနင်းလာသော ဂျက်လေယာဉ်သည် တူရကီနိုင်ငံ၊ အန်ကာရာလေဆိပ်မှ ဒေသစံတော်ချိန် ညနေ ၅ နာရီ ၁၀ မိနစ်တွင် ထွက်ခွာခဲ့ပြီး ၄၂ မိနစ်အကြာတွင် အဆက်အသွယ် ပြတ်တောက်သွားခဲ့ခြင်း ဖြစ်သည်။ လေယာဉ်ပျက်ကျသည့်နေရာမှာ အန်ကာရာမြို့ အနောက်တောင်ဘက်ရှိ Haymana (ဟေမန္န) ခရိုင်အတွင်း ဖြစ်ကြောင်း တူရကီပြည်ထဲရေးဝန်ကြီးက အတည်ပြုခဲ့သည်။ လေယာဉ်ပျက်ကျမှု မဖြစ်ပွားမီ အရေးပေါ်ဆင်းသက်ရန် အချက်ပေးမှု တစ်ကြိမ် ပြုလုပ်ခဲ့သော်လည်း အောင်မြင်မှု မရှိခဲ့ပေ။ လစ်ဗျားပြန်ကြားရေးဝန်ကြီးက "စက်ပိုင်းဆိုင်ရာ ချို့ယွင်းမှု" ကြောင့် ဖြစ်နိုင်သည်ဟု ခန့်မှန်းထားသော်လည်း တူရကီအစိုးရရှေ့နေရုံးက အသေးစိတ် စုံစမ်းစစ်ဆေးမှုများ စတင်လျက်ရှိသည်။ ဤဖြစ်စဉ်တွင် ဦးစီးချုပ်နှင့်အတူ သူ၏အကြံပေးပုဂ္ဂိုလ်၊ ဗိုလ်ချုပ်ကြီး နှစ်ဦးနှင့် ကိုယ်ရံတော်တစ်ဦးတို့ သေဆုံးခဲ့ခြင်းဖြစ်ပြီး၊ ၎င်းတို့သည် တူရကီစစ်ဘက်ခေါင်းဆောင်များနှင့် ဆွေးနွေးပြီးနောက် လစ်ဗျားနိုင်ငံသို့ ပြန်အလာတွင် ယခုကဲ့သို့ ကြုံတွေ့ခဲ့ရခြင်း ဖြစ်ပါသည်။

လစ်ဗျားစစ်ဖက်ဆိုင်ရာဦးစီးချုပ်နှင့်အဖွဲ့ လေယာဉ်ပျက်ကျမှုကြောင့် သေဆုံး

လစ်ဗျားစစ်ဖက်ဆိုင်ရာဦးစီးချုပ်နှင့်အဖွဲ့ လေယာဉ်ပျက်ကျမှုကြောင့် သေဆုံး သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၅ ရက်။  လစ်ဗျားနိုင်…

  • December 25, 2025
ရုရှားအပေါ် စီးပွားရေးပိတ်ဆို့မှုများ ဥရောပသမဂ္ဂ သက်တမ်းတိုး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၅ ရက်။ ဥရောပသမဂ္ဂ (EU) သည် ယူကရိန်းနိုင်ငံအပေါ် ကျူးကျော်စစ်ဆင်နွှဲနေသည့် ရုရှားနိုင်ငံအပေါ် ချမှတ်ထားသော စီးပွားရေးပိတ်ဆို့မှုများကို နောက်ထပ် (၆) လ သက်တမ်းတိုးမြှင့်လိုက်ကြောင်း ထုတ်ပြန်ခဲ့သည်။ ဥရောပကောင်စီ၏ ထုတ်ပြန်ချက်အရ လက်ရှိပိတ်ဆို့မှုများကို ၂၀၂၆ ခုနှစ်၊ ဇူလိုင်လ ၃၁ ရက်နေ့အထိ ဆက်လက်အတည်ပြုထားမည် ဖြစ်သည်။ အဆိုပါ ပိတ်ဆို့မှုများကို ၂၀၁၄ ခုနှစ်တွင် စတင်ကျင့်သုံးခဲ့ပြီး ၂၀၂၂ ခုနှစ် ယူကရိန်းစစ်ပွဲစတင်ချိန်တွင် ပိုမိုတိုးမြှင့်ခဲ့ခြင်း ဖြစ်သည်။ EU ၏ ပိတ်ဆို့မှုများတွင် ရုရှားဘဏ်အချို့ကို နိုင်ငံတကာငွေပေးချေမှုစနစ် (SWIFT) မှ ဖယ်ရှားခြင်း၊ ရုရှားနိုင်ငံထုတ် ရေနံစိမ်းနှင့် ရေနံထွက်ပစ္စည်းများကို ရေကြောင်းမှ တင်သွင်းခြင်းနှင့် လွှဲပြောင်းခြင်းအား ပိတ်ပင်ခြင်းတို့ ပါဝင်သည်။ ထို့ပြင် ရုရှားအစိုးရ နောက်ကွယ်မှ ပံ့ပိုးပေးထားသည့် သတင်းမှားဖြန့်ချိရေးဌာနများ၏ ထုတ်လွှင့်ခွင့်လိုင်စင်များကိုလည်း ရပ်ဆိုင်းထားသည်။ ထပ်မံ၍ ရုရှားအတိုက်အခံများနှင့် လူ့အခွင့်အရေးလှုပ်ရှားသူများကို ဖိနှိပ်ရာတွင် ပါဝင်ခဲ့သည့် တရားရေးအရာရှိ နှစ်ဦးကိုလည်း ပိုင်ဆိုင်မှုများ ပိတ်ဆို့ရပ်ဆိုင်းကာ အရေးယူမှုအသစ်များ ချမှတ်ခဲ့သည်။ ရုရှားနိုင်ငံအနေဖြင့် နိုင်ငံတကာဥပဒေများကို ဆက်လက်ချိုးဖောက်နေသရွေ့ ယခုကဲ့သို့ ပိတ်ဆို့မှုများကို ဆက်လက်ထားရှိမည်ဖြစ်ကြောင်း EU က အသိပေးထားသည်။

ရုရှားအပေါ် စီးပွားရေးပိတ်ဆို့မှုများ ဥရောပသမဂ္ဂ သက်တမ်းတိုး

ရုရှားအပေါ် စီးပွားရေးပိတ်ဆို့မှုများ ဥရောပသမဂ္ဂ သက်တမ်းတိုး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၅ ရက်။  ဥရောပသမဂ္ဂ (EU) သည် ယ…

  • December 25, 2025
AI နည်းပညာသုံး Deepfake ရုပ်ပုံများကြောင့် အမေရိကန် ကျောင်းသူတစ်ဦး ထိခိုက်နစ်နာခဲ့ရ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၄ ရက်။ အမေရိကန်နိုင်ငံ၊ လူဝီစီယားနားပြည်နယ်က အလယ်တန်းကျောင်းတစ်ခုမှာ ဖြစ်ပွားခဲ့တဲ့ AI နည်းပညာသုံး Deepfake ရုပ်ပုံတွေကြောင့် ကျောင်းသူတစ်ယောက် ဘဝပျက်လုနီးပါး ဖြစ်ခဲ့ရပါတယ်။ ကျောင်းသား နှစ်ယောက်က အသက် ၁၃ နှစ်အရွယ် ကျောင်းသူတစ်ဦးနဲ့ သူငယ်ချင်းတွေရဲ့ မျက်နှာပုံတွေကို AI သုံးပြီး ကိုယ်တုံးလုံး ပုံတွေ ဖန်တီးကာ ကျောင်းသားတွေကြားထဲမှာ ဖြန့်ဝေခဲ့ကြပါတယ်။ ကျောင်းသူလေးဟာ ကျောင်းရဲ့ အကြံပေးပုဂ္ဂိုလ်နဲ့ ရဲအရာရှိတွေကို အကူအညီတောင်းခဲ့ပေမယ့် ကျောင်းသားတွေဟာ Snapchat လိုမျိုး ကြည့်ပြီးတာနဲ့ ပို့လိုက်တဲ့ Message တွေ ပျောက်ကွယ်သွားတတ်တဲ့ App နဲ့ ဖြန့်တာဖြစ်လို့ လူကြီးတွေက သက်သေရှာမတွေ့ဘဲ ကောလာဟလလို့သာ သတ်မှတ်ပြီး လျစ်လျူရှုခဲ့ကြပါတယ်။ အဲဒီနောက်တော့ ကျောင်းဆင်းချိန် ကျောင်းကားပေါ်မှာ အဲဒီ ကိုယ်တုံးလုံးပုံတွေကို ကျောင်းသားတစ်ဦးက ပြသပြီး လှောင်ပြောင်နေတာကို တွေ့လိုက်ရတဲ့အခါမှာတော့ ကျောင်းသူလေးဟာ စိတ်မထိန်းနိုင်ဘဲ အဲဒီကျောင်းသားကို ကိုယ်ထိလက်ရောက် ထိုးကြိတ်ခဲ့ပါတယ်။ ရလဒ်အနေနဲ့ ကျောင်းအာဏာပိုင်တွေက သူမကို ကျောင်းကနေ ၁၀ ပတ်ကျော်ကြာ ထုတ်ပယ်ပြီး ပြုပြင်ရေးကျောင်းကို ပို့ခဲ့ပါတယ်။ ပုံဖန်တီးဖြန့်ဝေသူလို့ ယူဆရတဲ့ ကျောင်းသားကိုတော့ ဘာပြစ်ဒဏ်မှ မပေးခဲ့ပါဘူး။ နောက်ပိုင်းမှာမှ ရဲတပ်ဖွဲ့က သေချာစုံစမ်းစစ်ဆေးတဲ့အခါမှာတော့ AI သုံးပြီး ပုံဖန်တီးဖြန့်ဝေခဲ့တဲ့ ကျောင်းသား နှစ်ဦးကို ရှာဖွေတွေ့ရှိပြီး ဥပဒေအရ အမှုဖွင့် အရေးယူခဲ့ပါတယ်။ ကျောင်းဘက်ကတော့ ကျောင်းသူလေးကို (ရက်ပေါင်း ၈၉ ရက်) ရှိတဲ့ ဆီမက်စ်တာ တစ်ခု အထိ ကျောင်းထုတ်ဖို့ ဆုံးဖြတ်ခဲ့ပါတယ်။ ကျောင်းကနေ ထုတ်ပယ်ခံရပြီး ပြုပြင်ရေးကျောင်း ရောက်သွားတဲ့အခါမှာ ကျောင်းသူလေးဟာ စိတ်ဓာတ်ကျခြင်း နဲ့ စိုးရိမ်သောကလွန်ကဲခြင်း ဝေဒနာတွေကို ခံစားခဲ့ရပြီး အစားအသောက်ပျက်ကာ စာသင်ကြားမှုတွေမှာလည်း နောက်ကျကျန်ခဲ့ပါတယ်။ ရှေ့နေတွေက ကျောင်းဘုတ်အဖွဲ့ကို အယူခံဝင်ခဲ့လို့ ပြီးခဲ့တဲ့ နိုဝင်ဘာလမှာတော့ ကျောင်းသူလေးကို ကျောင်းပြန်တက်ခွင့် ပြုခဲ့ပါတယ်။ ဒါပေမဲ့ ဇန်နဝါရီလကုန်အထိ စောင့်ကြည့်ကာလ (Probation) အဖြစ် သတ်မှတ်ထားတာကြောင့် အားကစားနဲ့ ကျောင်းပြင်ပ လှုပ်ရှားမှုတွေမှာ ပါဝင်ခွင့် မရသေးပဲ ရှိနေသေးပါတယ်။

AI နည်းပညာသုံး Deepfake ရုပ်ပုံများကြောင့် အမေရိကန် ကျောင်းသူတစ်ဦး ထိခိုက်နစ်နာခဲ့ရ

AI နည်းပညာသုံး Deepfake ရုပ်ပုံများကြောင့် အမေရိကန် ကျောင်းသူတစ်ဦး ထိခိုက်နစ်နာခဲ့ရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၄ ရက်။  …

  • December 24, 2025
စစ်ကောင်စီ၏ ဝါဒဖြန့်ချန်နယ်များကို နိုင်ငံတကာ မီဒီယာ ပလက်ဖောင်းများ ဖယ်ရှား သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၄ ရက်။ လာမည့် ဒီဇင်ဘာလ ၂၈ ရက်တွင် ကျင်းပရန် ပြင်ဆင်နေသည့် စစ်ကောင်စီ၏ ရွေးကောက်ပွဲအကြိုကာလတွင် နိုင်ငံတကာနည်းပညာကုမ္ပဏီများက စစ်ကောင်စီ၏ ဝါဒဖြန့်ချန်နယ်များကို ဆက်တိုက်ပိတ်သိမ်းလျက်ရှိသည်။ ၂၀၂၅ ခုနှစ်၊ ဒီဇင်ဘာလ ၂၃ ရက်တွင် ဩစတေးလျအခြေစိုက် တိုက်ရိုက်ရုပ်သံထုတ်လွှင့်သည့် Kick ပလက်ဖောင်းက MRTV နှင့် MITV အပါအဝင် ချန်နယ် ၇ ခုကို ပိတ်သိမ်းခဲ့ကြောင်း Justice For Myanmar (JFM) အဖွဲ့က ထုတ်ပြန်ခဲ့သည်။ အလားတူ အမေရိကန် အခြေစိုက် Amazon ပိုင် Twitch ပလက်ဖောင်းကလည်း ဒီဇင်ဘာလ ၁၈ ရက်တွင် MRTV နှင့် မြန်မာ့အသံရုပ်သံချန်နယ် ၁၄ ခုကို ဖယ်ရှားခဲ့ပါသည်။ Meta ကုမ္ပဏီပိုင် Facebook သည်လည်း စစ်တပ်ပိုင် ရတနာပုံသတင်းစာစာမျက်နှာများကို ယခုဒီဇင်ဘာလအတွင်း ထပ်မံဖယ်ရှားခဲ့သလို၊ MediaFire ဖိုင်ဝေမျှသည့်ဝဘ်ဆိုက်ကလည်း ရတနာပုံသတင်းစာ PDF ဖိုင်များကို ပိတ်သိမ်းခဲ့ပါသည်။ YouTube သည်လည်း MRTV နှင့် ပတ်သက်သည့် အကောင့်သစ်များကို ဖယ်ရှားခဲ့သော်လည်း MITV အကောင့်တစ်ခုမှာမူ ရှိနေဆဲဖြစ်သည်။

စစ်ကောင်စီ၏ ဝါဒဖြန့်ချန်နယ်များကို နိုင်ငံတကာ မီဒီယာ ပလက်ဖောင်းများ ဖယ်ရှား

စစ်ကောင်စီ၏ ဝါဒဖြန့်ချန်နယ်များကို နိုင်ငံတကာ မီဒီယာ ပလက်ဖောင်းများ ဖယ်ရှား  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၄ ရက်။  လာမည့…

  • December 24, 2025
သုဝဏ္ဏဘူမိလေဆိပ်အနီး ဒရုန်း ထိန်းချုပ် ပျံသန်းသည့် မြန်မာနိုင်ငံသား ၄ ဦး အား ဖမ်းဆီး၊ ဒရုန်း ၂၅၀၀ ကျော် သိမ်းဆီးရမိ 

 သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၄ ရက်။ ထိုင်းနိုင်ငံ၊ ဘန်ကောက်မြို့ရှိ သုဝဏ္ဏဘူမိအပြည်ပြည်ဆိုင်ရာလေဆိပ်အနီးတွင် သံသယဖြစ်ဖွယ် ဒရုန်း (Drone) များ ခွင့်ပြုချက်မရှိဘဲ ပျံသန်းနေမှုကို အကြောင်းပြု၍ ထိုင်းလုံခြုံရေးတပ်ဖွဲ့များက စုံစမ်းစစ်ဆေးခဲ့ရာ လေဆိပ်နှင့် မလှမ်းမကမ်းရှိ အဆောက်အဦတစ်ခုအတွင်း ဒရုန်းများကို ထိန်းချုပ်မောင်းနှင်နေသည့် မြန်မာနိုင်ငံသား ၄ ဦးကို ဖမ်းဆီးရမိခဲ့သည်။ ဖမ်းဆီးခံရသူများမှာ ဇွဲထက်အောင် (၂၃ နှစ်)၊ စနေလင်းထက် (၂၄ နှစ်)၊ ကျော်ဇင်ဟိန်း (၃၄ နှစ်) နှင့် သိန်းဇော် (၃၄ နှစ်) တို့ ဖြစ်ကြသည်။ အဆိုပါဖမ်းဆီးမှုမှတစ်ဆင့် ကွင်းဆက်လိုက်လံရှာဖွေရာတွင် ဂိုဒေါင်တစ်ခုအတွင်း ဂျပ်ပုံးများဖြင့် ထည့်ထားသည့် ဒရုန်းအစင်းရေ ၂,၅၀၀ ကျော်ကိုပါ ထပ်မံသိမ်းဆည်းရမိခဲ့သည်။ ထိုင်းအမျိုးသားရုပ်သံနှင့် တယ်လီဖုန်းဆက်သွယ်ရေးကော်မရှင် (NBTC) ၏ အဆိုအရ သိမ်းဆည်းရမိသည့် ဒရုန်းအချို့မှာ ယူကရိန်းစစ်ပွဲတွင် အသုံးပြုသည့် အုပ်စုလိုက်တိုက်ခိုက်ရေးဒရုန်းများနှင့် ဆင်တူနေပြီး၊ ၎င်းတို့အနက် တရုတ်နိုင်ငံ DJI ကုမ္ပဏီထုတ် အဆင့်မြင့်ဒရုန်း ၁၀ ခုလည်း ပါဝင်နေသည်။ အဆိုပါဒရုန်းများသည် ကုန်းလမ်းမှတစ်ဆင့် မှောင်ခိုသွင်းလာပြီး ထိုင်းနိုင်ငံအတွင်း၌ ပြန်လည်တပ်ဆင်ထားခြင်း ဖြစ်နိုင်သည်ဟု အာဏာပိုင်များက ယူဆထားကြသည်။ လက်ရှိတွင် ဖမ်းဆီးခံရသူများ၏ ရည်ရွယ်ချက်နှင့် ၎င်းတို့၏နောက်ကွယ်မှ အဖွဲ့အစည်းများကို ထိုင်းစုံစမ်းစစ်ဆေးရေးအဖွဲ့များက စစ်ဆေးမေးမြန်းလျက်ရှိသည်။ ဤဖြစ်စဉ်သည် လေကြောင်းလုံခြုံရေးသာမက မြန်မာနိုင်ငံ၏ စစ်ရေးပဋိပက္ခများ သို့မဟုတ် ကမ္ဘောဒီးယားနယ်စပ် အခြေအနေများနှင့် ပတ်သက်မှု ရှိ၊ မရှိကိုလည်း ထိုင်းလုံခြုံရေးတပ်ဖွဲ့များက အထူးအလေးထား စစ်ဆေးနေသည်ဟု ဆိုသည်။

သုဝဏ္ဏဘူမိလေဆိပ်အနီး ဒရုန်း ထိန်းချုပ် ပျံသန်းသည့် မြန်မာနိုင်ငံသား ၄ ဦး အား ဖမ်းဆီး၊ဒရုန်း ၂၅၀၀ ကျော် သိမ်းဆီးရမိ 



သုဝဏ္ဏဘူမိလေဆိပ်အနီး ဒရုန်း ထိန်းချုပ် ပျံသန်းသည့် မြန်မာနိုင်ငံသား ၄ ဦး အား ဖမ်းဆီး၊  ဒရုန်း ၂၅၀၀ ကျော် သိမ်းဆီးရမိ သတင်းနှင့် မီဒီယာ ကွန်ရက်။၂၀၂၅…

  • December 24, 2025
×Close