သတင်း

စစ်ကော်မရှင်က လူမျိုးစု အချင်းချင်းကြား သွေးခွဲနေဟု နှစ်သစ်ကူးမိန့်ခွန်းတွင် KIO ဥက္ကဌ ပြော သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂ ရက်။ စစ်ကော်မရှင်သည် တော်လှန်ရေးအင်အားစုများ စည်းလုံးလာမည်ကို စိုးရိမ်သဖြင့် လူမျိုးစုအချင်းချင်းကြား သွေးကွဲစေရန် နည်းမျိုးစုံဖြင့် ကြိုးပမ်းနေသည်ဟု ကချင်လွတ်လပ်ရေးအဖွဲ့ (KIO) ဥက္ကဋ္ဌ ဗိုလ်ချုပ်ကြီး အင်ဘန်လက သတိပေး ပြောဆိုလိုက်သည်။ ၂၀၂၆ ခုနှစ်အတွင်း ကျရောက်သည့် နှစ်သစ်ကူးမိန့်ခွန်းတွင် ဗိုလ်ချုပ်ကြီး အင်ဘန်လက ကချင်ပြည်နယ်သူ ပြည်နယ်သားများနှင့် တိုင်းရင်းသားပြည်သူများသို့ ထိုကဲ့သို့ ပြောဆိုလိုက်ခြင်း ဖြစ်သည်။ ဗိုလ်ချုပ်ကြီး အင်ဘန်လက “ရန်သူဟာ တော်လှန်ရေးအဖွဲ့တွေ စည်းလုံးပြီး အင်အားကြီးထွားလာမှာ အလွန် စိုးရိမ်တဲ့အတွက် တော်လှန်ရေးအဖွဲ့ အချင်းချင်းကြား၊ လူမျိုးအချင်းချင်းကြား အုပ်စုကွဲသွားဖို့အတွက် ပြည်သူ့စစ်၊ BGF ခေါင်းစဉ်အမျိုးမျိုးနဲ့ လက်နက်တပ်ဆင်ပေးပြီးတော့ အချင်းချင်း တိုက်ခိုင်းပါတယ်” ဟု ထည့်သွင်း ပြောဆိုသည်။ အထူးသဖြင့် ကချင်ပြည်အတွင်း ရှေးယခင်ကတည်းက အတူယှဉ်တွဲနေထိုင်လာခဲ့ကြသည့် ကချင်နှင့် ရှမ်း လူမျိုးစုများအကြား ရန်ဖက်ဖြစ်အောင် သပ်လျှိုနေသည့် လုပ်ရပ်များအပေါ် များစွာစိတ်ထိခိုက်မိကြောင်းနှင့် ရန်သူနှင့် မိတ်ဆွေကို ကွဲကွဲပြားပြား နားလည်ကြရန် လိုအပ်ကြောင်းလည်း ဆိုသည်။ “ကချင်နဲ့ ရှမ်းဟာ ဘယ်တော့မှ ရန်သူမဟုတ်ကြပါဘူး။ တခြားရန်သူရဲ့ လှည့်ဖျားမှုတွေကြောင့် အချင်းချင်း တိုက်ပွဲတွေ ဖြစ်နေတဲ့အတွက် ရင်နာရပါတယ်။ ဒါကြောင့် ဘယ်သူက ရန်သူ၊ ဘယ်သူက မိတ်ဆွေဆိုတာ ခွဲခြားသိဖို့ လိုပါတယ်” ဟု ၎င်းက တိုက်တွန်းသည်။ လွန်ခဲ့သည့် ၂၀၂၅ ခုနှစ်အတွင်း စစ်ရေးအခြေအနေနှင့် ပတ်သက်၍ နယ်မြေအချို့ကို သိမ်းပိုက်နိုင်ခဲ့သော်လည်း စစ်ကော်မရှင်၏ အင်အားသုံး ထိုးစစ်ဆင်လာမှုများကို ခုခံကာကွယ်ခဲ့ရသည့် နှစ်တစ်နှစ်ဖြစ်ကြောင်း၊ ထိုသို့ ခုခံစစ်ဆင်နွှဲရာတွင် ရဲဘော်များ၊ ပြည်သူများနှင့် မဟာမိတ်တပ်ဖွဲ့ဝင်များ၏ အသက်ပေးစတေးမှုများ ရှိခဲ့သည် ဟု ဆိုသည်။ စစ်ကော်မရှင်တပ်သည် စစ်ရေးနှင့် မသက်ဆိုင်သော ဆေးရုံ၊ စာသင်ကျောင်းနှင့် ဘာသာရေး အဆောက်အအုံ များကိုပါ လေကြောင်းနှင့် လက်နက်ကြီးများသုံး၍ တိုက်ခိုက်ခဲ့သဖြင့် ပြည်သူအများအပြား သေဆုံးခဲ့ရ ကြောင်းလည်း မိန့်ခွန်းတွင် ဖော်ပြထားသည်။ ပြန်လည်ထူထောင်ရေး လုပ်ငန်းစဉ်များနှင့် ပတ်သက်၍လည်း KIO အနေဖြင့် စစ်ရှောင်ပြည်သူများ နေရပ်ပြန် နိုင်ရန် ကျေးရွာများ ဖော်ထုတ်ခြင်း၊ အသက်မွေးဝမ်းကျောင်းအတွက် စက်ယန္တရားများ ကူညီပေးခြင်းနှင့် ဒေသ အချို့တွင် ကြုံတွေ့နေရသည့် ကြွက်ဘေးနှင့် ရေဘေးဒုက္ခများကိုလည်း ကူညီဖြေရှင်းပေးနေကြောင်း ဆိုသည်။ ထို့ပြင် အိမ်နီးချင်းနိုင်ငံများနှင့် ဆက်ဆံရေး တဖြည်းဖြည်း တိုးတက်လာပြီး နယ်စပ်ဂိတ်အချို့ ပြန်လည် ဖွင့်လှစ် လာသဖြင့် ပြည်သူများ ကျန်းမာရေးနှင့် ကုန်သွယ်ရေးအတွက် အဆင်ပြေလာနေပြီဖြစ်ကြောင်းလည်း ၎င်းက ဆိုသည်။ ဗိုလ်ချုပ်ကြီး အင်ဘန်လက စစ်အာဏာရှင်စနစ်နှင့် လူမျိုးကြီးဝါဒ ကျဆုံးသည်အထိ တော်လှန်ရေး အဖွဲ့အစည်း များ အားလုံး အင်အားစုစည်း၍ လက်တွဲမဖြုတ်ဘဲ ဆက်လက်တိုက်ပွဲဝင်သွားကြရန် တိုက်တွန်းနှိုးဆော်ခဲ့သည်။  

စစ်ကော်မရှင်က လူမျိုးစု အချင်းချင်းကြား သွေးခွဲနေဟု နှစ်သစ်ကူးမိန့်ခွန်းတွင် KIO ဥက္ကဌ ပြော

စစ်ကော်မရှင်က လူမျိုးစု အချင်းချင်းကြား သွေးခွဲနေဟု နှစ်သစ်ကူးမိန့်ခွန်းတွင် KIO ဥက္ကဌ ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂ ရက်။…

  • January 2, 2026
လက်နက်ကိုင် တော်လှန်ရေးနှင့် လူထု တိုက်ပွဲ ဟန်ချက်ညီရန် လိုအပ်ကြောင်း လူထုလှုပ်ရှားမှု ဦးဆောင်သူများ တိုက်တွန်း သတင်းနှင့် မီဒိယာ ကွန်ရက်။ 
၂၀၂၆ ခုနှစ်၊ ဇန္နဝါရီလ ၂ ရက်။ စစ်အာဏာရှင်စနစ် အမြစ်ပြတ်ရေးအတွက် လက်နက်ကိုင် တော်လှန်ရေးနှင့် လူထုတိုက်ပွဲ ဟန်ချက်ညီရန် ဦးဆောင်သူများ တိုက်တွန်းလိုက်သည်။ တော်လှန်ရေး၏ အဆုံးအဖြတ်နှင့် စစ်ရေးအောင်မြင်မှုများ ရရှိရန်အတွက် လူထုပါဝင်မှုသည် အဓိကကျသည့် အခန်းကဏ္ဍတွင် ရှိနေကြောင်း အထွေထွေသပိတ် ပေါင်းစပ်ညှိနှိုင်းရေး အင်အားစု (GSCB) အတွင်းရေးမှူး အဖွဲ့ဝင် မချောစုစံက အောက်ပါအတိုင်း ထောက်ပြပြောဆိုသည်။ ”လူထုလှုပ်ရှားမှုတွေကလည်း စစ်ရေးတိုက်ပွဲကဲ့သို့ပဲ အရေးကြီးတယ်။ စစ်ရေးက လူထုလှုပ်ရှားမှုထက် ပို အရေးကြီးတာ မဟုတ်ဘဲနဲ့ နှစ်ခုစလုံးက အတူယှဉ်တွဲပြီးတော့ သွားဖို့ လိုအပ်တာဖြစ်တယ်။ ဒီတော်လှန်ရေးရဲ့ အဆုံးအဖြတ်က လူထုပဲဖြစ်တယ်။ လူထုအားနဲ့ပဲ အရွေ့ကို ဆက်ပြီး ချီတက်နေရတာ ဖြစ်တဲ့အတွက် လူထု ပါဝင်မှု မရှိရင် တော်လှန်ရေးရဲ့ အရွေ့က ရှေ့ကိုရောက်မှာ မဟုတ်ဘူး” ဟု ပြောသည်။ မြန်မာ့နွေဦးတော်လှန်ရေး အတွင်း စစ်အာဏာရှင်စနစ်ကို အပြီးတိုင် အမြစ်ပြတ်ချေမှုန်းနိုင်ရန် အတွက် လက်နက်ကိုင် တော်လှန်ရေးနှင့်အတူ လူထုတိုက်ပွဲနည်းနာများကို ဟန်ချက်ညီညီ ဖော်ဆောင်ရန် လိုအပ် ကြောင်း လူထုလှုပ်ရှားမှု ဦးဆောင်သူများက တိုက်တွန်းပြောကြားလိုက်သည်။ ပြီးခဲ့သည့် ဒီဇင်ဘာလ ၂၆ ရက်နေ့က “အသံအဖွဲ့” မှ ကြီးမှူးကျင်းပသည့် “မြန်မာစစ်တပ်၏ အတုအယောင် ရွေးကောက်ပွဲ အကြိုကာလ ရွေးကောက်ပွဲကာကွယ်ရေးဥပဒေဖြင့် ဖမ်းဆီးတရားစွဲဆိုမှုများ စောင့်ကြည့် လေ့ လာခြင်း” စကားဝိုင်းဆွေးနွေးပွဲတွင် တော်လှန်ရေးအင်အားစု အသီးသီးက ထည့်သွင်းပြောဆိုခဲ့ကြခြင်း ဖြစ်သည်။ လက်ရှိတော်လှန်ရေးတွင် လက်နက်ကိုင်တိုက်ပွဲနှင့် လူထုလှုပ်ရှားမှုသည် အပြန်အလှန် အထောက်အကူပြု ချိတ်ဆက်နေပြီး၊ စစ်ကိုင်းတိုင်းဒေသကြီးကဲ့သို့ နယ်မြေများတွင် စစ်ကော်မရှင်က အုပ်ချုပ်ရေးယန္တရား မဖော် ဆောင်နိုင်ခြင်းမှာ လက်နက်ကိုင် တော်လှန်ရေးအပြင် ပြည်သူများ၏ “စစ်အုပ်စုနှင့် မပူးပေါင်းရေး” သပိတ် လှုပ်ရှားမှုများကြောင့်လည်း ဖြစ်ကြောင်း ဆွေးနွေးပွဲတွင် သုံးသပ်ခဲ့ကြသည်။ အရပ်ဘက် အဖွဲ့အစည်းများ၏ အသံထွက်မှု၊ လူ့အခွင့်အရေးဆိုင်ရာ ထောက်ပြချက်များနှင့် နိုင်ငံတကာ စည်းရုံး ဆော်ဩမှုများသည် တော်လှန်ရေးအတွက် အရေးကြီးသည့် အထောက်အပံ့များဖြစ်ကြောင်း သွေးစွန်းငွေ ဖြတ်တောက်ရေးလှုပ်ရှားမှုအဖွဲ့ (BMC) မှ မမူလန်က ယခုကဲ့သို့ ပြောသည်။ “လက်နက်ကိုင် တော်လှန်ရေးက အရေးကြီးတယ်။ တစ်ပြိုင်နက်တည်းမှာ လူထုလှုပ်ရှားမှု၊ အရပ်ဖက် အဖွဲ့ အစည်းတွေရဲ့ အသံထွက်မှု၊ လူ့အခွင့်အရေး အဖွဲ့တွေရဲ့ တောက်လျှောက် ထောက်ပြဝေဖန်မှု၊ နိုင်ငံတကာကို စည်းရုံးလုပ်ဆောင်မှုတွေသည် တစ်ပြိုင်နက်တည်းမှာ တူတူလုပ်ရမယ့် အရေးကြီးတဲ့အရာ ဖြစ်တယ်။” ပြည်သူလူထုသည် လုံခြုံရေးအရ ဖိနှိပ်မှုများ ကြုံတွေ့နေရသော်လည်း ပြီးခဲ့သည့် ဒီဇင်ဘာလ ၁၀ ရက်နေ့ အသံ တိတ်သပိတ်တွင် ပါဝင်ခဲ့သကဲ့သို့ ၎င်းတို့ ပါဝင်နိုင်သည့် နည်းလမ်းမျိုးစုံဖြင့် တော်လှန်ရေးတွင် ဆက်လက် ရှိနေကြောင်း တကသကျောင်းသားဟောင်းများ အင်အားစု (USUAF) မှ ကိုဘုန်းသစ်က ပြောသည်။ “လူထုသည် လူထုလှုပ်ရှားမှုနဲ့ ပတ်သက်လို့ရှိရင် သူတို့လုပ်လို့ရတဲ့ အခြေအနေ၊ သူတို့ ဘယ်လောက်ပဲ ကျပ် တည်းနေပါစေ၊ ဘယ်လောက် ဖိနှိပ်ခံရပါစေ၊ ခက်ခဲ ကြမ်းတမ်းနေပါစေ သူတို့ ပူးပေါင်းပါဝင်လို့ရတဲ့ အခင်း အကျင်းမှာ ဒီလူထုလှုပ်ရှားမှုတွေကို သူတို့ ပူးပေါင်းပါဝင်တယ် ဆိုတာကို ကျနော်တို့ မြင်ရပါတယ်” ဟု ကိုဘုန်းသစ်က ပြောသည်။ လက်ရှိတွင် ပုံစံမျိုးစုံဖြင့် ဖော်ဆောင်နေသော လူထုတိုက်ပွဲနည်းနာများသည် စစ်ရေးအရှိန်အဟုန် ကောင်းမွန် စေရန် များစွာ အထောက်အပံ့ဖြစ်စေပြီး၊ စစ်အာဏာရှင်စနစ် အမြစ်ပြတ်ရေးအတွက် လူထုအားနှင့် စစ်ရေး အားကို ဟန်ချက်ညီညီ ပေါင်းစပ်သွားရန် လိုအပ်ကြောင်း တော်လှန်ရေး အင်အားစုများက ဘုံသဘောထား အဖြစ် တိုက်တွန်းပြောဆိုခဲ့ကြသည်။  

လက်နက်ကိုင် တော်လှန်ရေးနှင့် လူထု တိုက်ပွဲ ဟန်ချက်ညီရန် လိုအပ်ကြောင်း လူထုလှုပ်ရှားမှု ဦးဆောင်သူများ တိုက်တွန်း

လက်နက်ကိုင် တော်လှန်ရေးနှင့် လူထု တိုက်ပွဲ ဟန်ချက်ညီရန် လိုအပ်ကြောင်း လူထုလှုပ်ရှားမှု ဦးဆောင်သူများ တိုက်တွန်း သတင်းနှင့် မီဒိယာ ကွန်ရက်။၂၀၂၆ ခုနှ…

  • January 2, 2026
ခရစ္စမတ်ကျင်းပသော အကျဉ်းသူများ ရိုက်နှက် တိုက်ပိတ်ခံရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂ ရက်။ ဒိုက်ဦး အကျဉ်းထောင်တွင် ခရစ္စမတ် ဆုတောင်းသည့် အကျဉ်းသူ အမျိုးသမီး ၁၅ ဦးကို ထောင်အာဏာပိုင်များက ရိုက်နှက်ကာ တိုက်ပိတ်အပြစ်ပေးခဲ့သည်ဟု နိုင်ကျဉ်းအရေး စောင့်ကြည့်နေသူများက ပြောသည်။ ပဲခူးတိုင်း၊ ညောင်လေးပင်ခရိုင်ရှိ ဒိုက်ဦးအကျဉ်းထောင်တွင် ခရစ္စမတ်နေ့ ဝတ်ပြုဆုတောင်းပွဲ ပြုလုပ်သည့် နိုင်ငံရေးအကျဉ်းသူများ အပါအဝင် အမျိုးသမီး ၁၅ ဦးကို ထောင်အာဏာပိုင်များက အုပ်စုလိုက် ဝိုင်းဝန်းရိုက် နှက်၍ တိုက်ပိတ်ပြစ်ဒဏ် ပေးခဲ့ပြီး လက်ရှိတွင် ဆေးကုသခွင့်နှင့် မိသားစုထောင်ဝင်စာ တွေ့ခွင့်များပါ ပိတ်ပင်ကန့် သတ်ခံထားရကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် (PPNM) က ထုတ်ပြန်သည်။ ခရစ္စမတ်နေ့က အကျဉ်းသူ ၁၅ ဦး ဝတ်ပြုဆုတောင်းနေစဉ် ဒုထောင်ပိုင်၊ အမျိုးသမီးဝန်ထမ်း တစ်ဦးနှင့် အာဏာပိုင်များ မွေးထားသော အကျဉ်းသား တစ်ဦးတို့က ဝင်ရောက်နှောင့်ယှက်ကာ ဝိုင်းဝန်းရိုက်နှက်ခဲ့ခြင်း ဖြစ်သည်။ PPNM ပြောရေးဆိုခွင့်ရှိသူ မရောင်နီလင်းက တိုက်ပိတ်ခံထားရသူများ၏ အခြေအနေနှင့် ပတ်သက်၍ ယခုကဲ့ သို့ ပြောသည်။ “တိုက်ပိတ်ခံထားရတဲ့ အကျဉ်းသူ (၁၅) ဦးထဲမှာမှ ရိုက်နှက်ခံထားရတဲ့ နိုင်ငံရေးအကျဉ်းသူတွေ ပါတယ်လို့ လည်း သိရှိရပါတယ်။ အခုလက်ရှိမှာတော့ ဒိုက်ဦးထောင်က ကျပ်နေတာမျိုးဖြစ်တယ်ပေါ့နော်။ အဲ့ဒီတော့ သူတို့ ကို ဆက်သွယ်ဖို့ရာအတွက်လည်း ခက်ခဲနေတာမျိုးတွေလည်း ရှိပါတယ်။ ဒါကြောင့်မို့လို့ အခု သူတို့ရဲ့ ကျန်းမာ ရေးစောင့်ရှောက်မှု အခြေအနေကိုလည်း ကျနော်တို့ စုံစမ်းနေတုန်းပဲ ရှိပါသေးတယ်။” ထို့အပြင် ဒိုက်ဦးထောင်၏ အမျိုးသမီးဆောင်အတွင်းသို့ ဒုထောင်ပိုင်က ဦးဆောင်၍ အခြား ရာဇဝတ်အကျဉ်းသားများကို ခေါ်ယူကာ မကြာခဏ ဝင်ထွက်သွားလာနေသည့် လုပ်ရပ်အပေါ် အမျိုးသမီးများ ၏ လုံခြုံရေးအတွက် PPNM က များစွာစိုးရိမ်ကြောင်း ပြောဆိုထားသည်။ မရောင်နီလင်းက “အမျိုးသမီးဆောင်မှာ ဆိုလို့ရှိရင် သုံးပွင့် (အမျိုးသမီးဝန်ထမ်း) ကနေမှ လက်ခံလို့မို့လို့ လည်း အထဲထဲကို ဝင်လို့ရတာတွေလည်း ပါပါတယ်။ ဒါကတော့လေ ဒီအမျိုးသမီးတွေရဲ့ အခွင့်အရေး အတွက် ပေါ့နော်၊ ဒါဘာပဲဖြစ်ဖြစ် ဒီအမျိုးသားဆောင်က အကျဉ်းသားတွေ ရောက်လာပြီဆိုကတည်းက သူတို့မှာ မလုံ ခြုံတော့ ဘူးပေါ့နော်။ မလုံခြုံတော့တဲ့ အခြေအနေမျိုးတွေ ရှိတယ်” ဟု ထောက်ပြထားသည်။ ဒိုက်ဦးထောင် အာဏာပိုင်များသည် နိုင်ငံရေး အကျဉ်းသားများက ကိုယ်ထူကိုယ်ထ စုဆောင်းထားသည့် ကျပ်သိန်း ၃၀ ခန့်တန်ဖိုးရှိ ဆေးပဒေသာပင်ကိုလည်း မလိုအပ်ဟုဆိုကာ သိမ်းဆည်းသွားခဲ့သည်ဟု ဆိုသည်။ ဒုထောင်ပိုင်မှာ စစ်တပ်မှ ပြောင်းရွှေ့လာသည့် ဗိုလ်မှူးဟောင်းတစ်ဦးဖြစ်ပြီး ဆေးဝါး တောင်းဆိုသည့် နိုင်ငံရေးအကျဉ်းသားများကို လေးဖက်ထောက် ရိုက်နှက်ခြင်း၊ မိသားစုမှ ပို့ပေးသည့် ထောင်ဝင် စာများကို သိမ်းဆည်းခြင်းများ စသည့် လူ့အခွင့်အရေး ချိုးဖောက်မှုများကို ဆက်တိုက် ကျူးလွန်နေသူ ဖြစ်ကြောင်း PPNM က ဆိုသည်။ ၎င်း၏ ရက်စက်သည့် နှိပ်စက်မှုများကြောင့် ယခင်ကလည်း အကျဉ်းသားအချို့ ခြေထောက်နှစ်ချောင်း ပုတ်ခြင်း နှင့် ကိုယ်လက်အင်္ဂါ ချို့ယွင်းခြင်းများအထိ ကြုံတွေ့ခဲ့ရဖူးကြောင်း နိုင်ကျဉ်းဟောင်းများ၏ ပြောပြချက်အရ သိရသည်။ လက်ရှိတွင် ခရစ္စမတ်နေ့ ဖြစ်စဉ်ကြောင့် တိုက်ပိတ်ခံထားရသည့် အမျိုးသမီးများ၏ အသက်အန္တရာယ်နှင့် ကျန်းမာရေးအတွက် မိသားစုဝင်များနှင့် လူ့အခွင့်အရေးအဖွဲ့များက စိုးရိမ်နေကြသည်။  

ခရစ္စမတ်ကျင်းပသော အကျဉ်းသူများ ရိုက်နှက် တိုက်ပိတ်ခံရ

ခရစ္စမတ်ကျင်းပသော အကျဉ်းသူများ ရိုက်နှက် တိုက်ပိတ်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂ ရက်။  ဒိုက်ဦး အကျဉ်းထောင်တွင် ခရစ္…

  • January 2, 2026
ထားဝယ် စုပေါင်းရုံးနဲ့ ရဲတပ်ဖွဲ့မှူး ရုံးများ ဒရုန်းဖြင့် တိုက်ခံရ၊ ခရီးသွားအချို့ ဒဏ်ရာရ သတင်းနှင့် မီဒီယာကွန်ရက်။
၂၀၂၆ ခုနှစ်၊ ဇန္နဝါရီလ ၂ ရက်။ ထားဝယ်မြို့ပေါ်ရှိ စုပေါင်းရုံးနှင့် ရဲတပ်ဖွဲ့မှူးရုံးအပါအဝင် နေရာ ၄ ခု ဒရုန်းဖြင့် တိုက်ခိုက်ခံရပြီး ကျောင်းသူ ၂ ဦးအပါအဝင် ၅ ဦး ဒဏ်ရာရခဲ့သည်ဟု မြို့ခံများက ပြောသည်။ တနင်္သာရီတိုင်းဒေသကြီး၊ ထားဝယ်မြို့ပေါ်ရှိ စစ်ကော်မရှင်၏ အုပ်ချုပ်ရေးယန္တရား ရုံးစိုက်ရာနေရာများနှင့် အဓိကစစ်ဆေးရေးဂိတ်များအား ၂၀၂၅ ခုနှစ်၊ ဒီဇင်ဘာလ ၃၁ ရက် နှစ်ကုန်ရက်တွင် ပြည်သူ့ကာကွယ်ရေး တပ်ဖွဲ့တစ်ဖွဲ့က ဒရုန်းဖြင့် ဗုံးသီးချတိုက်ခိုက်မှုများ ဆက်တိုက်လုပ်ဆောင်ခဲ့သည်။ ယင်းသို့ တိုက်ခိုက်ခံရမှုများအနက် ကမြောကင်းတံတား စစ်ဆေးရေးဂိတ်တွင် ဗုံးသီးကျရောက်ပေါက်ကွဲမှု ကြောင့် ကျောင်းဝတ်စုံ ဝတ်ဆင်ထားသည့် ကျောင်းသူ နှစ်ဦးနှင့် ခရီးသွားအမျိုးသမီး သုံးဦး၊ စုစုပေါင်း ၅ ဦး ထိခိုက်ဒဏ်ရာများ ရရှိခဲ့သည်။ ဒီဇင်ဘာလ ၃၁ ရက် နံနက် ၈ နာရီခန့်တွင် ထားဝယ်မြို့ရှိ စုပေါင်းရုံးအား ဒရုန်းဖြင့် ဗုံးသီးတစ်လုံး စတင်ချကာ တိုက်ခိုက်ခဲ့ခြင်းဖြစ်ပြီး၊ ထို့နောက် နံနက် ၁၁ နာရီမှ ၁၂ နာရီအတွင်း ကမြောကင်းတံတား စစ်ဆေး ရေးဂိတ်သို့ ဗုံးသီးနှစ်လုံး၊ ထားဝယ်ခရိုင် ရဲတပ်ဖွဲ့မှူးရုံးအနီး တစ်လုံးနှင့် ကမ်းနားလမ်းသဲကွင်းသို့ နှစ်လုံး၊ စုစုပေါင်း ဗုံးသီး ၆ လုံးဖြင့် အဆင့်ဆင့် တိုက်ခိုက်ခဲ့ခြင်း ဖြစ်သည်။ ကမြောကင်းတံတားအနီး နေထိုင်သူ အမျိုးသားတစ်ဦးက “အားလုံးပေါင်း ခြောက်လုံးတောင်မှ။ ကမြောကင်း တံတားမှာတော့ ကျောင်းသူနှစ်ယောက် ကျောင်းဝတ်စုံတွေနဲ့။ ကျောင်းသူတစ်ယောက်က ဝမ်းဗိုက်နဲ့ ခြေလက် တွေ ထိထားတယ်။ အမျိုးသမီး သုံးယောက်မှာလည်း ခြေထောက်တွေ ထိထားတယ်။ ကျန်တဲ့နေရာတွေမှာ တော့ ထိခိုက်တာမျိုး မရှိဘူးလို့ သိရတယ်” ဟု ပြောသည်။ ဒဏ်ရာရရှိသူများကို ထားဝယ်ဆေးရုံကြီးသို့ အရေးပေါ်ပို့ဆောင်ကာ ဆေးကုသမှု ပေးနေရကြောင်းနှင့် တံတား စစ်ဆေးရေးဂိတ် တိုက်ခိုက်ခံရပြီးနောက် တံတားဖြတ်သန်းခွင့်ကို ယာယီပိတ်ထားခဲ့ရာမှ မွန်းလွဲ ၁ နာရီခန့်တွင် ပြန်လည်ဖွင့်လှစ်ပေးခဲ့ကြောင်း မြို့ခံများက ပြောသည်။ ကမြောကင်းတံတား စစ်ဆေးရေးဂိတ်သည် စစ်ကော်မရှင်တပ် အတွက် အရေးပါသော လုံခြုံရေးဂိတ်တစ်ခု ဖြစ်ပြီး ပြီးခဲ့သည့် ဒီဇင်ဘာလ ၂၅ ရက် ခရစ္စမတ်နေ့ ညသန်းခေါင်အချိန်ကလည်း ဒရုန်းဖြင့် တိုက်ခိုက်ခံခဲ့ရသေး သည်။ ထိုစဉ်က ဂိတ်ဧရိယာအတွင်းရှိ နေအိမ်တစ်လုံးအနီး ဗုံးသီးကျရောက် ပေါက်ကွဲခဲ့သဖြင့် အိမ်အတွင်း အိပ်ပျော်နေသည့် အမျိုးသမီးတစ်ဦး ခြေသလုံးတွင် ဒဏ်ရာရရှိခဲ့သည့် ဖြစ်စဉ်လည်း ရှိခဲ့သည်။ ယခုနှစ်ကုန်ရက် မြို့ပေါ် တိုက်ခိုက်မှုများအတွင်း ကမ်းနားလမ်းသဲကွင်း၊ စုပေါင်းရုံးနှင့် ခရိုင်ရဲတပ်ဖွဲ့မှူးရုံးတို့တွင် လူထိခိုက်မှု မရှိကြောင်း သိရသော်လည်း မြို့တွင်းလုံခြုံရေးမှာမူ ယခင်ကထက် ပိုမိုတင်းကျပ်လာနေသည်။ ထားဝယ်မြို့ပေါ်ရှိ အဆိုပါနေရာများကို ဒရုန်းဖြင့် ဗုံးသီးချတိုက်ခိုက်မှုကို မည်သည့်တော်လှန်ရေးတပ်ဖွဲ့မှ လုပ်ဆောင်ခဲ့သည်ဆိုသည်ကိုမူ လက်ရှိအချိန်ထိ သတင်းထုတ်ပြန်ခြင်း မရှိသေးပေ။ တနင်္သာရီတိုင်းအတွင်း၌ စစ်ကော်မရှင်တပ်နှင့် ဒေသခံကာကွယ်ရေး တပ်ဖွဲ့များအကြား စစ်ရေးတင်းမာမှုများ မြင့်တက်နေပြီး၊ ယခုကဲ့သို့ မြို့ပေါ်ပစ်မှတ်များကို ဒရုန်းဖြင့် တိုက်ခိုက်လာခြင်းမှာ နှစ်သစ်ကူးကာလတွင် တော်လှန်ရေးအရှိန် မြှင့်တင်လာခြင်းဖြစ်နိုင်ကြောင်း စစ်ရေးလေ့လာသူများက သုံးသပ်နေကြသည်။  

ထားဝယ် စုပေါင်းရုံးနဲ့ ရဲတပ်ဖွဲ့မှူး ရုံးများ ဒရုန်းဖြင့် တိုက်ခံရ၊ ခရီးသွားအချို့ ဒဏ်ရာရ

ထားဝယ် စုပေါင်းရုံးနဲ့ ရဲတပ်ဖွဲ့မှူး ရုံးများ ဒရုန်းဖြင့် တိုက်ခံရ၊ ခရီးသွားအချို့ ဒဏ်ရာရ သတင်းနှင့် မီဒီယာကွန်ရက်။၂၀၂၆ ခုနှစ်၊ ဇန္နဝါရီလ ၂ ရက်။&nb…

  • January 2, 2026
ထိုင်းဘတ်ငွေတန်ဖိုး အဆမတန်မြင့်တက်မှုကို ထိုင်းဗဟိုဘဏ် ထိန်းချုပ်မည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၉ ရက်။ ထိုင်းဘတ်ငွေတန်ဖိုးသည် ခန့်မှန်းထားသည်ထက် ပိုမိုမြင့်တက်လာနေသောကြောင့် ထိုင်းနိုင်ငံ၏ ပို့ကုန်လုပ်ငန်းနှင့် ခရီးသွားလုပ်ငန်းများအပေါ် ထိခိုက်မှုများ ဖြစ်ပေါ်လျက်ရှိသည်။ နိုင်ငံခြားသားများအတွက် ထိုင်းနိုင်ငံတွင် ငွေသုံးစွဲရန်နှင့် ထိုင်းကုန်ပစ္စည်းများ ဝယ်ယူရန် ဈေးနှုန်းပိုမို မြင့်မားလာခြင်းကြောင့် ထိုင်းဗဟိုဘဏ်က ဘတ်ငွေတန်ဖိုး ပြန်လည်ကျဆင်းစေရန် နည်းလမ်း (၃) ခုဖြင့် ကြိုးပမ်းနေသည်။ ပထမဦးစွာ ထိုင်းနိုင်ငံသားများ ပြည်ပတွင် ရရှိသည့်ဝင်ငွေများကို ချက်ချင်းပြန်လည်လွှဲပို့ရမည့် ကန့်သတ်ချက်ကို လျှော့ချပေးလိုက်သည်။ ၎င်းသည် ပြည်တွင်းသို့ နိုင်ငံခြားငွေဝင်ရောက်မှုကို လျော့နည်းစေကာ ဘတ်ငွေတန်ဖိုးကို ထိန်းညှိပေးမည်ဖြစ်သည်။ ဒုတိယအနေဖြင့် ရွှေဈေးကစားခြင်းကြောင့် ငွေကြေးဈေးကွက် မတည်မငြိမ်မဖြစ်စေရန် ရွှေကုန်သည်များအား ငွေအဝင်အထွက်စာရင်းများကို တိကျစွာ အစီရင်ခံရန် ညွှန်ကြားထားသည်။ တတိယအချက်မှာ ဘဏ်အတိုးနှုန်းများကို လျှော့ချခြင်းဖြစ်ပြီး ၎င်းသည် နိုင်ငံခြားရင်းနှီးမြှုပ်နှံသူများ ငွေထုတ်ယူသွားစေရန် လှုံ့ဆော်ကာ ဘတ်ငွေတန်ဖိုး ပြန်လည်ကျဆင်းစေမည်ဖြစ်သည်။ ယခုကဲ့သို့ လုပ်ဆောင်ခြင်းအားဖြင့် ဘတ်ငွေဈေး အဆမတန်မြင့်တက်နေမှုကို တန့်သွားစေနိုင်ပြီး ပို့ကုန်နှင့် ခရီးသွားလုပ်ငန်းရှင်များအတွက် အဆင်ပြေလာမည်ဟု ထိုင်း ဗဟိုဘဏ်က မျှော်လင့်ထားသည်။ ပညာရှင်များ၏ ခန့်မှန်းချက်အရ ယခုနှစ်ကုန်တွင် ထိုင်းဘတ်ငွေဈေးမှာ ၁ ဒေါ်လာလျှင် ၃၁.၇ ဘတ် မှ ၃၂.၂ ဘတ် ကြားတွင် ရှိနေနိုင်ကြောင်း သိရှိရပါသည်။

ထိုင်းဘတ်ငွေတန်ဖိုး အဆမတန်မြင့်တက်မှုကို ထိုင်းဗဟိုဘဏ် ထိန်းချုပ်မည်

ထိုင်းဘတ်ငွေတန်ဖိုး အဆမတန်မြင့်တက်မှုကို ထိုင်းဗဟိုဘဏ် ထိန်းချုပ်မည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၉ ရက်။  ထိုင်းဘတ်ငွေတန်ဖိ…

  • December 29, 2025
အမေရိကန်က ကုလသမဂ္ဂရန်ပုံငွေ ၈ ဆ ဖြတ်တောက်၊  မြန်မာနိုင်ငံ လူသားချင်းစာနာမှု အခက်အခဲ ကြုံတွေ့နိုင်ဟု ထောက်ပံ့ရေးနှင့် လူ့အခွင့်အရေး အဖွဲ့များ ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၉ ရက်။ အမေရိကန်အစိုးရသည် ကုလသမဂ္ဂ (UN) ၏ လူသားချင်းစာနာမှုဆိုင်ရာ အကူအညီများအတွက် ယခင်က နှစ်စဉ် ဒေါ်လာ ၁၇ ဘီလီယံခန့် ထောက်ပံ့ပေးခဲ့သော်လည်း ယခုအခါ ဒေါ်လာ ၂ ဘီလီယံသို့ ၈ ဆခန့် လျှော့ချလိုက်ကြောင်း ကြေညာခဲ့သည်။ ထို့အပြင် ရန်ပုံငွေပေးအပ်သည့်စနစ်ကိုလည်း အေဂျင်စီတစ်ခုချင်းစီသို့ တိုက်ရိုက်မပေးတော့ဘဲ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးမှူးရုံး (UNOCHA) မှတစ်ဆင့်သာ ခွဲဝေပေးတော့မည်ဖြစ်သည်။ သမ္မတ ဒေါ်နယ်ထရန့်က ကုလသမဂ္ဂအေဂျင်စီများအနေဖြင့် အသုံးစရိတ်လျှော့ချခြင်းနှင့် ပြုပြင်ပြောင်းလဲမှုများ မလုပ်ဆောင်ပါက ရပ်ဆိုင်းသွားမည့်အန္တရာယ် (Adapt or Die) နှင့် ရင်ဆိုင်ရမည်ဟု သတိပေးထားသည်။ ဂါဇာ၊ ဆူဒန်နှင့် အာဖဂန်နစ္စတန်တို့တွင် အကူအညီလိုအပ်ချက် မြင့်မားနေချိန်၌ ယခုကဲ့သို့ ဘတ်ဂျက်ဖြတ်တောက်မှုကြောင့် ကမ္ဘာ့စားနပ်ရိက္ခာအစီအစဉ် (WFP )၊ ဒုက္ခသည်များဆိုင်ရာ မဟာမင်းကြီးရုံး (UNHCR) နှင့် နိုင်ငံတကာ ရွှေ့ပြောင်းနေထိုင်သူများအဖွဲ့ (IOM) တို့တွင် ဝန်ထမ်းလျှော့ချခြင်းနှင့် လုပ်ငန်းစဉ်များ ရပ်တန့်ခြင်းတို့ ကြုံတွေ့နေရသည်။ မြန်မာနိုင်ငံသည် ကုလသမဂ္ဂ၏ ဦးစားပေးနိုင်ငံစာရင်းတွင် ပါဝင်မှုနည်းပါးနေခြင်းကြောင့် ယခုဖြတ်တောက်မှုဒဏ်ကို အဆိုးရွားဆုံး ခံရနိုင်ကြောင်း ပညာရှင်များက သုံးသပ်ကြသည်။ မြန်မာနိုင်ငံအတွင်းရှိ စစ်ဘေးရှောင် (IDP) ၃ သန်းကျော်မှာ ငတ်မွတ်ခေါင်းပါးမှုဘေးနှင့် တိုက်ရိုက်ရင်ဆိုင်ရနိုင်ကြောင်း WFP နှင့် UNHCR တို့က သတိပေးထားသည်။ Human Rights Watch နှင့် Amnesty International တို့ကလည်း အမေရိကန်၏ ဤမူဝါဒသစ်သည် မြန်မာနိုင်ငံကဲ့သို့သော ပဋိပက္ခဒေသများတွင် "လူသားချင်းစာနာမှုဆိုင်ရာ ကပ်ဘေး" ကို ဦးတည်စေနိုင်ကြောင်း ထောက်ပြဝေဖန်ထားသည်။

အမေရိကန်က ကုလသမဂ္ဂရန်ပုံငွေ ၈ ဆ ဖြတ်တောက်၊  မြန်မာနိုင်ငံ လူသားချင်းစာနာမှု အခက်အခဲ ကြုံတွေ့နိုင်ဟု ထောက်ပံ့ရေးနှင့် လူ့အခွင့်အရေး အဖွဲ့များ ပြော 

အမေရိကန်က ကုလသမဂ္ဂရန်ပုံငွေ ၈ ဆ ဖြတ်တောက်၊  မြန်မာနိုင်ငံ လူသားချင်းစာနာမှု အခက်အခဲ ကြုံတွေ့နိုင်ဟု ထောက်ပံ့ရေးနှင့် လူ့အခွင့်အရေး အဖွဲ့များ ပြော  …

  • December 29, 2025
ထိုင်ဝမ်ကျွန်းပတ်လည်တွင် တရုတ်နိုင်ငံက ကြည်း၊ ရေ၊ လေ စစ်ရေးလေ့ကျင့်မှုကြီး ပြုလုပ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၉ ရက်။ တရုတ်နိုင်ငံသည် ထိုင်ဝမ်ကျွန်းပတ်ပတ်လည်၌ "Justice Mission 2025" ဟု အမည်ပေးထားသည့် အကြီးစားစစ်ရေးလေ့ကျင့်မှုများကို စတင်ပြုလုပ်နေသည်။ တရုတ်ပြည်သူ့လွတ်မြောက်ရေးတပ်မတော် (PLA) ၏ အရှေ့ပိုင်းစစ်ဒေသကွပ်ကဲမှုအဖွဲ့သည် တနင်္လာနေ့မှစတင်ကာ ကျွန်းပတ်လည်ရှိ သတ်မှတ်ဇုန် (၅) ခုတွင် ကြည်း၊ ရေ၊ လေ နှင့် အမြောက်တပ်ဖွဲ့များကို အသုံးပြု၍ လေ့ကျင့်လျက်ရှိသည်။ မနက်ဖန် အင်္ဂါနေ့တွင် ကျည်ဆန်အစစ်များဖြင့် ပစ်ခတ်လေ့ကျင့်မည်ဖြစ်ကြောင်း ကြေညာထားသည်။ ဤစစ်ရေးလေ့ကျင့်မှု၏ အဓိကရည်ရွယ်ချက်မှာ "ထိုင်ဝမ်လွတ်လပ်ရေး" လိုလားသည့် ခွဲထွက်ရေးသမားများနှင့် ပြင်ပစွက်ဖက်မည့် အင်အားစုများကို ပြင်းထန်စွာသတိပေးရန်ဖြစ်ကြောင်း တရုတ်အစိုးရက ဆိုသည်။ အထူးသဖြင့် ထိုင်ဝမ်ကျူးကျော်ခံရပါက ဂျပန်နိုင်ငံက ကာကွယ်ပေးမည်ဟူသော ဂျပန်ဝန်ကြီးချုပ်၏ မှတ်ချက်နှင့် အမေရိကန်က ထိုင်ဝမ်သို့ ဒေါ်လာ ၁၁ ဘီလီယံဖိုး လက်နက်ရောင်းချမှုအပေါ် တုံ့ပြန်ခြင်းလည်း ဖြစ်သည်။ ယခုလေ့ကျင့်မှုတွင် ထူးခြားချက်မှာ ထိုင်ဝမ်၏ အဓိကဆိပ်ကမ်းများဖြစ်သော မြောက်ပိုင်းမှ ကီးလုံ (Keelung) နှင့် တောင်ပိုင်းမှ ကောက်ဆွန်း (Kaohsiung) တို့ကို ပိတ်ဆို့ဖြတ်တောက်ရန် ပထမဆုံးအကြိမ် လူသိရှင်ကြား လေ့ကျင့်လာခြင်း ဖြစ်သည်။ ထိုင်ဝမ်ကာကွယ်ရေးဝန်ကြီးဌာနကမူ ဤလုပ်ရပ်ကို "မဆင်မခြင်ရန်စမှု" အဖြစ် ပြင်းထန်စွာရှုတ်ချပြီး တပ်ဖွဲ့ဝင်များကို အမြင့်ဆုံးသတိပေးအခြေအနေတွင် ထားရှိကာ တရုတ်ဘက်က ရုတ်တရက်ကျူး ကျော်လာပါက ပြန်လည်တုံ့ပြန်နိုင်ရန် အလျင်အမြန်တုံ့ပြန်ရေးလေ့ကျင့်ခန်း (Rapid Response Exercise) ကို လုပ်ဆောင်နေသည်။   သို့သော်လည်း ထိုင်ဝမ်စတော့ဈေးကွက်မှာမူ ဤစစ်ရေးခြိမ်းခြောက်မှုများကြားမှ စံချိန်တင်မြင့်တက်ခဲ့သည်ကို တွေ့ရသည်။

ထိုင်ဝမ်ကျွန်းပတ်လည်တွင် တရုတ်နိုင်ငံက ကြည်း၊ ရေ၊ လေ စစ်ရေးလေ့ကျင့်မှုကြီး ပြုလုပ်

ထိုင်ဝမ်ကျွန်းပတ်လည်တွင် တရုတ်နိုင်ငံက ကြည်း၊ ရေ၊ လေ စစ်ရေးလေ့ကျင့်မှုကြီး ပြုလုပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၉ ရက်။  တရုတ…

  • December 29, 2025
မြန်မာ့ ရွေးကောက်ပွဲကို အနောက်နိုင်ငံတွေက ဘယ်လို သဘောထားသလဲ။   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။   ယနေ့ ကျင်းပခဲ့သော မြန်မာ့ ရွေးကောက်ပွဲကို အနောက်နိုင်ငံများက လွတ်လပ်ပြီး တရားမျှတသည့် ရွေးကောက်ပွဲ မဖြစ်နိုင်ဟု သုံးသပ်ကြပြီး ရွေးကောက်ပွဲ စောင့်ကြည့်သူများကိုပင် စေလွှတ်ခြင်းမရှိခဲ့ပေ။   နိုင်ငံတကာ အနေဖြင့် အမေရိကန်၊ ယူကေ၊ အီးယူ၊ တို့အပြင် အာဆီယံတို့ကပါ ၎င်းတို့၏ သဘောထားများကို တရားဝင် ထုတ်ပြန်ခဲ့ကြသည်။   အမေရိကန် နိုင်ငံခြားရေး ဝန်ကြီးဌာနသည် ဤရွေးကောက်ပွဲကို "လုံးဝ တရားမဝင်" ဟု သတ်မှတ်ထားသည်။ နိုင်ငံရေးပါတီများကို ဖျက်သိမ်းထားပြီး အတိုက်အခံများကို ဖမ်းဆီးထားသည့် အခြေအနေတွင် ကျင်းပသည့် ရွေးကောက်ပွဲသည် ပြည်သူ့ဆန္ဒကို ဖော်ဆောင်နိုင်မည်မဟုတ်ကြောင်း ဆိုသည်။ နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဝါရှင်တန်ဒီစီတွင် ပြုလုပ်သော ပုံမှန်သတင်းစာရှင်းလင်းပွဲ (Press Briefing)များနှင့် နိုင်ငံခြားရေးဝန်ကြီးဌာန၏ တရားဝင် ဝက်ဘ်ဆိုက်တွင် အမေရိကန် ပြည်ထောင်စု၏ သဘောထားကို ထုတ်ပြန်ထားသည်။ "စစ်မှန်တဲ့ ဒီမိုကရေစီဖြစ်စဉ် မဟုတ်ဘဲ အတင်းအကျပ် ကျင်းပတဲ့ ဒီရွေးကောက်ပွဲရလဒ်ကို ကျွန်ုပ်တို့ အသိအမှတ်ပြုမှာ မဟုတ်ဘူး" ဟု ပြောကြားထားသည်။ ဤရွေးကောက်ပွဲသည် "အတုအယောင်" (Sham Election) သာဖြစ်ပြီး၊ ရွေးကောက်ပွဲကို အကြောင်းပြ၍ အာဏာတည်မြဲအောင် ကြိုးပမ်းခြင်းကို လက်မခံဘဲ နောက်ထပ် စီးပွားရေး ပိတ်ဆို့မှုများ လုပ်ဆောင်မည်ဟု သတိပေးထားသည်။ ဥရောပနိုင်ငံများကလည်း အမေရိကန်နှင့် အလားတူ သဘောထားမျိုး ရှိကြသည်။ ယူကေနိုင်ငံက မြန်မာ့ဒီမိုကရေစီရေးကို ပြန်လှည့်သွားစေသည့် လုပ်ရပ်အဖြစ် ဝေဖန်ပြီး၊ အားလုံးပါဝင်နိုင်မှု မရှိသည့်အတွက် ရွေးကောက်ပွဲရလဒ်ကို အသိအမှတ်ပြုမည်မဟုတ်ကြောင်း ထုတ်ပြန်ထားသည်။ ဥရောပသမဂ္ဂ နိုင်ငံခြားရေးနဲ့ လုံခြုံရေးမူဝါဒဆိုင်ရာ အဆင့်မြင့်ကိုယ်စားလှယ် ဂျိုးဇက် ဘိုရဲလ် Josep Borrell က ဘယ်လ်ဂျီယံနိုင်ငံ၊ ဘရပ်ဆဲလ်မြို့မှာရှိတဲ့ EU ဌာနချုပ် ကနေ ထုတ်ပြန်တဲ့ ကြေညာချက်နဲ့ သူ့ရဲ့ X (Twitter) လူမှုကွန်ရက်စာမျက်နှာမှာ EU ရဲ့ သဘောထားကို ဖော်ထုတ်ထားသည်။ "ဒါဟာ (ဒီရွေးကောက်ပွဲဟာ) မြန်မာ့နိုင်ငံရေး ပြဿနာကို ဖြေရှင်းမယ့်အစား ပိုမိုနက်ရှိုင်းသွားစေမယ့် လမ်းကြောင်းဖြစ်တယ်" ဟု ဝေဖန်ခဲ့သည်။ ကုလသမဂ္ဂကမူ မြန်မာနိုင်ငံတွင် လွတ်လပ်ပြီး တရားမျှတသော ရွေးကောက်ပွဲ ပြုလုပ်နိုင်သည့် အခြေအနေမရှိကြောင်း ပြောသည်။ ရွေးကောက်ပွဲတစ်ခုသည် ခြိမ်းခြောက်မှုနှင့် အကြောက်တရားကင်းသော ပတ်ဝန်းကျင်တွင် ကျင်းပရမည်ဖြစ်သော်လည်း မြန်မာနိုင်ငံတွင် ထိုအခြေအနေမရှိဟု ဆိုသည်။ ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားအားလုံးကို မလွှတ်ပေးဘဲ ကျင်းပသည့် ရွေးကောက်ပွဲသည် ကုလသမဂ္ဂ၏ စံနှုန်းများနှင့် မကိုက်ညီကြောင်း ပြောဆိုထားသည်။ ကုလသမဂ္ဂ၏ သဘောထားကို ကုလသမဂ္ဂ အတွင်းရေးမှူးချုပ်၏ ပြောရေးဆိုခွင့်ရှိသူ Stephane Dujarric သို့မဟုတ် မြန်မာနိုင်ငံဆိုင်ရာ အထူးကိုယ်စားလှယ်က နယူးယောက်မြို့ရှိ ကုလသမဂ္ဂ ဌာနချုပ် (UN Headquarters) မှ သတင်းထောက်တွေကို ပြောကြားခဲ့သည်။ ထို့အပြင် ကုလသမဂ္ဂ၏ ရပ်တည်ချက်မှာ အတွင်းရေးမှူးချုပ်၏ တရားဝင် ထုတ်ပြန်ချက် (Official Statement) တွင်လည်း ပါရှိသည်။   "မြန်မာပြည်သူတွေရဲ့ အခြေခံရပိုင်ခွင့်တွေနဲ့ လွတ်လပ်စွာ ဆန္ဒထုတ်ဖော်ခွင့်တွေကို မကာကွယ်နိုင်တဲ့ ဘယ်ရွေးကောက်ပွဲမဆို ငြိမ်းချမ်းရေးအတွက် အဖြေမဟုတ်ဘူး" ဟု ထုတ်ပြန်ထားသည်။ အနောက်နိုင်ငံများ၏ သဘောထားများမှာ ပြတ်ပြတ်သားသား ဖြစ်သော်လည်း အာဆီယံအဖွဲ့အတွင်းတွင်မူ သဘောထား ကွဲလွဲမှုများ ရှိနေခဲ့သည်။ သို့သော်လည်း အာဆီယံ တစ်ခုလုံး၏ သဘောထားကို မကြာခင်ကကျင်းပသော အာဆီယံ ထိပ်သီးညီလာခံတွင် ထုတ်ပြန်ခဲ့သည်။ အာဆီယံ အလှည့်ကျဥက္ကဋ္ဌ (မလေးရှားနိုင်ငံခြားရေးဝန်ကြီးဌာန)က မလေးရှားနိုင်ငံ၊ ကွာလာလမ်ပူမြို့ မှာ ကျင်းပတဲ့ သတင်းစာရှင်းလင်းပွဲမှာ အာဆီယံ တစ်ခု လုံး၏ ရပ်တည်ချက်ကို ထုတ်ပြန်ခဲ့ခြင်း ဖြစ်သည်။  ပြောကြားခဲ့တာဖြစ်ပါတယ်။ "အာဆီယံအနေနဲ့ မြန်မာ့အရေးမှာ ဘုံသဘောတူညီချက် ၅ ချက်အတိုင်း ဆက်လက်ရပ်တည်မှာဖြစ်ပြီး၊ အားလုံးပါဝင်တဲ့ တွေ့ဆုံဆွေးနွေးမှုမရှိဘဲ ကျင်းပတဲ့ ရွေးကောက်ပွဲအပေါ် စိုးရိမ်မိတယ်" ဟု ပြောဆိုခဲ့သည်။ အာဆီယံ အနေဖြင့် မြန်မာ့ ရွေးကောက်ပွဲကို စောင့်ကြည့်သူ လွှတ်မည်မဟုတ်ကြောင်းလည်း ပြောဆိုခဲ့သည်။ သို့သော်လည်း အဖွဲ့ဝင် နိုင်ငံများက စေလွှတ်ခြင်းကိုတော့ အာဆီယံက ပိတ်ပင်ထားမှာ မဟုတ်ကြောင်း ပြောခဲ့သည်။  

မြန်မာ့ ရွေးကောက်ပွဲကို အနောက်နိုင်ငံတွေက ဘယ်လို သဘောထားသလဲ။ 

မြန်မာ့ ရွေးကောက်ပွဲကို အနောက်နိုင်ငံတွေက ဘယ်လို သဘောထားသလဲ။ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၈ ရက်။  ယနေ့ ကျင်းပခဲ့သော မြန်မာ့ …

  • December 28, 2025
ကချင်တွင် မဲစာရင်းမှားယွင်းမှုနှင့် တင်းမာမှုများကြောင့် မဲပေးသူ နည်းပါး သတင်းနှင့်မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ရေးတင်းမာမှုကြား ကချင်တွင် ဟန်ပြမဲရုံများဖွင့်ထားပြီး မဲစာရင်းမှားယွင်းမှုနှင့် ခြိမ်းခြောက်မှုများကြောင့် ပြည်သူများစိုးရိမ်နေကြသည်။ ကချင်ပြည် အတွင်းရှိ မြို့နယ်အချို့ကို ကချင်လွတ်လပ်ရေး တပ်မတော် (KIA) နှင့် ပူးပေါင်းတပ်ဖွဲ့များက ထိန်းချုပ်ထားချိန်တွင် စစ်ကော်မရှင်သည် မြစ်ကြီးနားနှင့် ပူတာအိုကဲ့သို့သော မြို့ပေါ်ရပ်ကွက်အချို့၌သာ ရွေးကောက်ပွဲကို အတင်းအကျပ် ကျင်းပနေသည်ဟု မြို့ခံများက ပြောသည်။ သို့သော် မဲစာရင်းမှားယွင်းမှုများနှင့် စစ်ရေးတင်းမာမှုများကြောင့် မဲရုံများတွင် လူသူကင်းမဲ့ နေကြောင်း မြို့ခံများက ပြောသည်။ ယနေ့ (ဒီဇင်ဘာ ၂၈ ရက်) ကျင်းပသည့် ရွေးကောက်ပွဲအပိုင်း (၁) တွင် ကချင်ပြည်နယ်မှ မြစ်ကြီးနား၊ တနိုင်း၊ ခေါင်လန်ဖူး၊ နောင်မွန်၊ ပူတာအိုနှင့် မိုးညှင်းမြို့နယ်တို့ ပါဝင်သည်။ သို့သော် ရွေးကောက်ပွဲမတိုင်မီ တစ်ရက်အလိုအထိ ဒေသခံအများစုမှာ သတင်းအချက်အလက် ရရှိမှုအားနည်း နေပြီး ပါဝင်ယှဉ်ပြိုင်မည့် ကိုယ်စားလှယ်များကိုပင် မသိရှိကြကြောင်း မြစ်ကြီးနားမြို့ခံများက ဆိုသည်။ မြစ်ကြီးနားမြို့၊ မြို့သစ်ကြီးရပ်ကွက်နေ ပြည်သူတစ်ဦးက “မနက်ဖြန်လုပ်မှန်းတောင် မသိဘူး။ ရပ်ကွက်၊ အိမ်မှာလည်း ဘယ်သူမှ ဘာမှ လာမပြောကြဘူး။ ဘယ်မှာ သွားထည့်ရမှန်းလည်း မသိဘူး" ဟု မြေပြင် အခြေအနေကို ပြောသည်။ ထို့အပြင် မဲစာရင်းများတွင် နာမည်စာရင်းမပါဝင်သူများ ရှိနေသည့်အပြင် သေဆုံးပြီးသူများ၏ နာမည်များ ပါဝင်နေခြင်းကြောင့် မဲစာရင်းသွားရောက်ကြည့်ရှုသူများအကြား ဝေဖန်မှုများ ထွက်ပေါ်နေသည်။ အလားတူ ပူတာအိုမြို့နယ်တွင်လည်း အုပ်ချုပ်ရေးအဖွဲ့များက အိမ်ထောင်စုစာရင်းများ လိုက်လံကောက်ယူကာ ဓာတ်ပုံရိုက်ယူမှုများ ပြုလုပ်ခဲ့သဖြင့် ဒေသခံများမှာ ဖမ်းဆီးခံရမည်ကို စိုးရိမ်နေကြသည်။ ပူတာအိုဒေသခံတစ်ဦးက “ဒီအိမ်ထောင်စုစာရင်းက စစ်တပ်ကလူတွေဆီမှာ ရှိတယ်။ ဆိုတော့ မဲသွားမထည့်ရင် သိမှာစိုးရိမ်တယ်။ အဲ့ဒါကြောက်တယ်လေနော်။ စိုးရိမ်လို့ မဲထည့်တဲ့ဘက်ပဲ ဖြစ်မှာ” ဟု ပြောသည်။ စစ်ကော်မရှင်သည် မြစ်ကြီးနားမြို့ပေါ်ရှိ သီတာ၊ မင်းရပ်နှင့် အောင်နန်းရိပ်သာရပ်ကွက်များတွင် မဲရုံများ ပြင်ဆင်ကာ ပြည်နယ်ဝန်ကြီးချုပ် ဦးခက်ထိန်နန်နှင့် တိုင်းမှူး ဗိုလ်ချုပ်အောင်ဇော်ထွေးတို့က ကွင်းဆင်းစစ်ဆေး မှုများ ပြုလုပ်ခဲ့သော်လည်း၊ ဖားကန့်၊ ဝိုင်းမော်နှင့် ကျန်မြို့နယ်အများစုတွင်မူ ရွေးကောက်ပွဲ လုံးဝကျင်းပနိုင်ခြင်း မရှိပေ။ ယနေ့တွင်ပင် ဖားကန့်မြို့၌ ပေါက်ကွဲမှုဖြစ်ပွားကာ ဒေသခံတစ်ဦး သေဆုံးခဲ့သဖြင့် လုံခြုံရေးအခြေအနေမှာ ပိုမိုစိုးရိမ်စရာ ဖြစ်နေသည်။ ကချင်သတင်းဌာန (KNG) ၏ အယ်ဒီတာချုပ် ကိုဆမ်နော်ကလည်း ယခုရွေးကောက်ပွဲသည် ယခင်ရွေးကောက်ပွဲများနှင့် လုံးဝမတူဘဲ ပြည်သူများ သိရှိမှုပင် မရှိကြောင်း သုံးသပ်သည်။ “ဒီနေ့မှာ မဲမထည့်ကြဘူး။ မဲရုံတွေက တော်တော်လေး ခြောက်ကပ်နေတယ်။ သတ်မှတ်ထားတဲ့ မြို့နယ်တွေဆိုတာထက် မြို့ပေါ်တွေမှာပဲ လုပ်နေတယ်ဆိုတဲ့ သတင်းမျိုး ရရှိထားတယ်” ဟု ၎င်းက ပြောသည်။ ထို့အပြင် ယခုရွေးကောက်ပွဲအပြီးတွင်လည်း စစ်တပ်နှင့် မဟာမိတ်ဖြစ်သည့် USDP ကဲ့သို့သော ပါတီများသာ အစိုးရဖြစ်လာမည်ဟု ပြည်သူများက ကြိုတင်မှတ်ချက်ပြုထားကြကြောင်းလည်း ကိုဆမ်နော်က ဆက်လက် ပြောဆိုသည်။ လက်ရှိတွင် တနိုင်းမြို့နယ်နှင့် မြစ်ကြီးနား-မြစ်ဆုံလမ်းပေါ်ရှိ အောင်မြင်သာကျေးရွာတို့တွင်လည်း စစ်ကော် မရှင်တပ်များက မဲရုံများ၌ လုံခြုံရေးယူထားသော်လည်း အနီးတစ်ဝိုက်တွင် စစ်ကြောင်းထိုးမှုများရှိနေသဖြင့် စစ်ရေးတင်းမာနေသည်။ ကချင်လွတ်လပ်ရေးတပ်မတော် (KIA) ဘက်ကလည်း ယခုရွေးကောက်ပွဲသည် တရားမဝင်ကြောင်း ကြိုတင် သတိပေးထားသဖြင့် ကချင်ပြည်အတွင်းရှိ စစ်ကော်မရှင်၏ ရွေးကောက်ပွဲမှာ မြေပြင်တွင် နယ်မြေစိုးမိုးမှု ကင်းမဲ့နေပြီး ကျရှုံးနေသည့် အခြေအနေသာ ဖြစ်ကြောင်း နိုင်ငံရေးလေ့လာသူများက သုံးသပ်ကြသည်။ ဓါတ်ပုံ - MOI  

ကချင်တွင် မဲစာရင်းမှားယွင်းမှုနှင့် တင်းမာမှုများကြောင့် မဲပေးသူ နည်းပါး

ကချင်တွင် မဲစာရင်းမှားယွင်းမှုနှင့် တင်းမာမှုများကြောင့် မဲပေးသူ နည်းပါး သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၂၈ ရက်။  စစ်ရေးတင်း…

  • December 28, 2025
×Close