သတင်း

ကိုးကန့်တပ်ဖွဲ့များ သီပေါ-လားရှိုး လမ်းပိုင်းမှ ဆုတ်ခွာ၊ သီပေါ တံတား ပိတ်ထားဆဲ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၇ ရက်။ ရှမ်းပြည် မြောက်ပိုင်း ပြည်ထောင်စု လမ်းမကြီး တစ်လျှောက်ရှိ ကိုးကန့်တပ်ဖွဲ့ (MNDAA) ၏ စစ်ဆေးရေးဂိတ်များ ပိတ်သိမ်းကာ တပ်ဆုတ်ပေးလိုက်ပြီ ဖြစ်သော်လည်း စစ်ကော်မရှင်က သီပေါ တံတားဖြတ်သန်းခွင့်ကို ပိတ်ထားဆဲဖြစ်ကြောင်း ဒေသခံများက ပြောသည်။ ပြီးခဲ့သည့် ဒီဇင်ဘာလကုန်ပိုင်းက လားရှိုးမြို့တွင် ပြုလုပ်ခဲ့သော နှစ်ဖက်ဆွေးနွေးပွဲ သဘောတူညီချက်အရ MNDAA တပ်ဖွဲ့ဝင်များသည် သီပေါတံတားနှင့် လားရှိုးမြို့အထွက် မယ်ဟန်ဂိတ်များမှ ဇန္နဝါရီလဆန်းတွင် စတင်ဆုတ်ခွာပေးခဲ့ခြင်းဖြစ်သည်။ လက်ရှိတွင် သီပေါတံတား၌ စစ်ကော်မရှင်တပ် တစ်ဖွဲ့တည်းသာ ရှိတော့ပြီး ဒေသခံများကို ခြေလျင် ဖြတ်သန်း ခွင့်သာ အချိန်ပိုင်း ခွင့်ပြုထားကြောင်း ဆိုသည်။ တံတားပိတ်ထားမှုနှင့် ပတ်သက်၍ သီပေါဒေသခံ အမျိုးသမီးတစ်ဦးက “ကိုးကန့်တပ်ကတော့ ၉ မိုင်လမ်းခွဲ အထိ အကုန်ဆုတ်သွားပြီ။ လမ်းပေါ်မှာ ဂိတ်တွေလည်း မရှိတော့ဘူး။ ဒါပေမဲ့ တံတားကိုတော့ အခုထိ ကားတွေ ဆိုင်ကယ်တွေ ပေးမဖြတ်သေးဘူး။ လူပဲ လမ်းလျှောက်ဖြတ်လို့ ရသေးတာ။ ကုန်ကားတွေလည်း သွားလို့မရ တော့ ကုန်ဈေးနှုန်းတွေက အဆမတန် တက်နေပြီ။ အစိုးရ ဘက်ကတော့ ပြန်ဖွင့်မယ်ပဲ ပြောနေတာ လက်တွေ့ မှာတော့ ဘာမှ ဖြစ်မလာသေးဘူး” ဟု ပြောသည်။ MNDAA တပ်ဖွဲ့များသည် လမ်းမကြီးတစ်လျှောက်မှ ဖယ်ပေးခဲ့သော်လည်း ၉ မိုင်လမ်းခွဲမှတစ်ဆင့် ဆောင်ကြဲ၊ ဆင်ကျော့နှင့် မိုင်းရယ်မြို့နယ်ဘက်သို့ ပြောင်းရွှေ့အခြေစိုက်ထားကာ ကျေးရွာများအတွင်းတွင်မူ ဆက်လက်ရှိနေဆဲဖြစ်ကြောင်း မြေပြင်သတင်းရင်းမြစ်များက ပြောသည်။ စစ်ကော်မရှင်ဘက်ကမူ ပြည်ထောင်စု လမ်းမကြီးပေါ်တွင် မည်သည့် လက်နက်ကိုင်အဖွဲ့မျှ ဂိတ်ထိုင်ခြင်းမပြုရန် တောင်းဆိုထားပြီး တံတားပြန်ဖွင့်ရန် ပြင်ဆင်နေကြောင်း ဝါဒဖြန့်နေသော်လည်း ဇန်နဝါရီ ၆ ရက်အထိ ယာဉ် ဖြတ်သန်းခွင့်ကို ပိတ်ပင်ထားဆဲ ဖြစ်သည်။ သီပေါမြို့ခံ တစ်ဦးကလည်း “လမ်းပိတ်ထားတာ ၂ လနီးပါး ရှိလာပြီ။ အဓိက လမ်းမကြီးဖြစ်တဲ့အတွက် ပြည်မ နဲ့ ကုန်စည်စီးဆင်းမှုက လုံးဝရပ်သလို ဖြစ်နေတာ။ တံတားက လူပဲ ဖြတ်ခွင့်ပေးတာဆိုတော့ စက်လှေနဲ့ ကူးနေ ရတာထက်စာရင် နည်းနည်းသက်သာပေမဲ့ ကားတွေ သွားလို့မရသရွေ့တော့ အဆင်မပြေဘူး။ နောက်ပြီး တပ် တွေက ရွာတွေထဲမှာ ရှိနေသေးတော့ တိုက်ပွဲတွေ ပြန်ဖြစ်မှာကိုလည်း စိုးရိမ်နေကြတုန်းပဲ” ဟု ပြောသည်။ ရှမ်းမြောက်ဒေသနှင့် မန္တလေးအပါအဝင် မြို့ကြီးများကို ဆက်သွယ်ထားသည့် အဓိကသွေးကြောဖြစ်သော ဤလမ်းပိုင်းသည် ၂၀၂၅ ခုနှစ် အောက်တိုဘာလတွင် သီပေါမြို့ကို စစ်ကော်မရှင်က ပြန်လည်ထိန်းချုပ် ပြီးနောက်ပိုင်း လမ်းပိတ်ဆို့မှုများနှင့် စစ်ရေးတင်းမာမှုများကို တောက်လျှောက် ကြုံတွေ့နေရခြင်း ဖြစ်သည်။ သီပေါ-လားရှိုး လမ်းပိုင်းသည် တရုတ်-မြန်မာ နယ်စပ်ကုန်သွယ်ရေးအတွက် အဓိကကျသည့် လမ်းမကြီး ဖြစ်သော်လည်း လပေါင်းများစွာ လမ်းပိတ်ဆို့ထားမှုကြောင့် ဒေသတွင်းစီးပွားရေးမှာ များစွာ ထိခိုက်ကျဆင်း နေရသည်။ စစ်ကော်မရှင်ဘက်က လမ်းပြန်ဖွင့်ရန် ပြင်ဆင်နေသည်ဟု ဆိုသော်လည်း နယ်မြေစိုးမိုးရေးနှင့် လုံခြုံရေး အခြေ အနေများ အပေါ် မူတည်၍ လမ်းပိုင်းပြန်လည်ကောင်းမွန်လာမည့် အခြေအနေမှာမူ မရေရာသေးဘဲ ဖြစ်နေ သည်။  

ကိုးကန့်တပ်ဖွဲ့များ သီပေါ-လားရှိုး လမ်းပိုင်းမှ ဆုတ်ခွာ၊ သီပေါ တံတား ပိတ်ထားဆဲ

ကိုးကန့်တပ်ဖွဲ့များ သီပေါ-လားရှိုး လမ်းပိုင်းမှ ဆုတ်ခွာ၊ သီပေါ တံတား ပိတ်ထားဆဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၇ ရက်။  ရှမ…

  • January 7, 2026
ဘန်ကောက်တွင် ခွေးများကို မိုက်ခရိုချစ်ပ် တပ်ဆင်ရမည် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၇ ရက်။ ထိုင်းနိုင်ငံ၊ ဘန်ကောက်မြို့ပြအုပ်ချုပ်ရေးရုံး (BMA) သည် ခွေးရူးရောဂါကာကွယ်ရန်နှင့် လမ်းဘေးခွေးများကို စနစ်တကျ ကြပ်မတ်နိုင်ရန်အတွက် အိမ်မွေးခွေးများနှင့် ကြောင်များကို မိုက်ခရိုချစ်ပ် (Microchip) ထည့်သွင်းပေးမည့် အစီအစဉ်ကို စတင်တော့မည် ဖြစ်ပါသည်။ စာရင်းသွင်းကာလမှာ ယခုမှစတင်၍ ဇွန်လ ၃၀ ရက်နေ့အထိ သတ်မှတ်ထားသည်။ ဤစီမံကိန်းသည် တိကျသော အိမ်မွေးတိရစ္ဆာန်ဦးရေစာရင်း (Data) ရရှိရန်နှင့် ပိုင်ရှင်များအနေဖြင့် တာဝန်ခံမှုရှိလာစေရန် ရည်ရွယ်ခြင်းဖြစ်ပါသည်။ ယင်းအချက်အလက်များအပေါ် အခြေခံ၍ ကာကွယ်ဆေးထိုးနှံခြင်းနှင့် သားကြောဖြတ်ခြင်း လုပ်ငန်းများကို ထိရောက်စွာ စီမံခန့်ခွဲသွားမည် ဖြစ်ပါသည်။ ဘန်ကောက်မြို့ ဒင်းဒန် (Din Daeng) ခရိုင်ရုံးဟောင်းနှင့် တိရစ္ဆာန်ဆေးခန်း (၈) ခုတို့တွင် တစ်ရက်လျှင် အကောင်ရေ ၅၀၀ (စာရင်းသွင်းထားသူ ၂၀၀ နှင့် တန်းစီစောင့်ဆိုင်းသူ ၃၀၀) ကို အခမဲ့ ထည့်သွင်းပေးသွားမည် ဖြစ်ပါသည်။ မြန်မာ အပါအဝင် နိုင်ငံခြားသားများအနေဖြင့်လည်း နိုင်ငံကူးလက်မှတ်၊ နေထိုင်ကြောင်း အထောက်အထား၊ အိမ်ရှင်၏ ခွင့်ပြုချက်နှင့် ကာကွယ်ဆေးမှတ်တမ်းများဖြင့် သွားရောက်လျှောက်ထားနိုင်ပါသည်။ အိမ်ထောင်စုတစ်ခုလျှင် တိရစ္ဆာန် ၄ ကောင်အထိ အခမဲ့ ဝန်ဆောင်မှုပေးမည်ဖြစ်ပြီး၊ အခမဲ့အစီအစဉ် မဟုတ်ပါက ပုဂ္ဂလိကဆေးခန်းများတွင် ဘတ် ၅၀၀ မှ ၁၀၀၀ ခန့်ဖြင့် ထည့်သွင်းနိုင်ပါသည်။ မိုက်ခရိုချစ်ပ် ထည့်သွင်းထားခြင်း မရှိပါက ဥပဒေအရ အကာအကွယ်မရရှိခြင်း၊ အခမဲ့ဝန်ဆောင်မှုများ ဆုံးရှုံးခြင်းနှင့် တိရစ္ဆာန်ပျောက်ဆုံးပါက ပြန်လည်ရှာဖွေရန် ခက်ခဲခြင်းစသည့် ဆိုးကျိုးများ ကြုံတွေ့ရနိုင်ကြောင်း သတိပေးထားသည်။

ဘန်ကောက်တွင် ခွေးများကို မိုက်ခရိုချစ်ပ် တပ်ဆင်ရမည်

ဘန်ကောက်တွင် ခွေးများကို မိုက်ခရိုချစ်ပ် တပ်ဆင်ရမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၇ ရက်။  ထိုင်းနိုင်ငံ၊ ဘန်ကောက်မြို့ပြ…

  • January 7, 2026
လူသတ်မှုသံသယရှိသူ မြန်မာနိုင်ငံသားအား ထိုင်းလဝက မှားယွင်းပြန်ပို့ သတင်းနှင့် မီဒီယာ ကွန်ရက်။
၂၀၂၆ ခုနှစ် ဇန္နဝါရီလ ၅ ရက်။ ထိုင်းနိုင်ငံ၊ မဲဆောက်မြို့တွင် ထိုင်းအမျိုးသမီးတစ်ဦးအား မုဒိမ်းကျင့်သတ်ဖြတ်ခဲ့သည်ဟု သံသယရှိရသူ မြန်မာနိုင်ငံသား ထွန်းသာအောင်အား ထိုင်းလူဝင်မှုကြီးကြပ်ရေးဌာနက မှားယွင်း၍ ပြည်နှင်ဒဏ်ပေးခဲ့သဖြင့် တရားခံမှာ လွတ်မြောက်လျက်ရှိသည်။ ထိုင်းရဲတပ်ဖွဲ့သည် သံသယရှိသူအား နိုဝင်ဘာလ ၁၁ ရက်နေ့တွင် ဖမ်းဆီးရမိခဲ့ပြီး၊ DNA စစ်ဆေးချက်ရလဒ် မထွက်မီ လဝက ရုံးသို့ လွှဲပြောင်းပေးအပ်ခဲ့သည်။ ရဲတပ်ဖွဲ့က ပြည်နှင်ဒဏ်မပေးဘဲ ဆိုင်းငံ့ထားရန် အကြောင်းကြားစာ ပို့ခဲ့သည်ဟု ဆိုသော်လည်း၊ လဝက ဘက်ကမူ အဆိုပါစာကို မရရှိခဲ့သဖြင့် နိုဝင်ဘာလ ၁၆ ရက်နေ့တွင် တရားမဝင်ဝင်ရောက်လာသူ အခြား ၅၀ ဦးနှင့်အတူ မြန်မာနိုင်ငံသို့ ပြန်လည်ပို့ဆောင်ခဲ့ခြင်းဖြစ်သည်။ ဒီဇင်ဘာလ ၁၈ ရက် DNA စစ်ဆေးချက်အရ ဖမ်းဝရမ်းထွက်လာချိန်တွင်မှ တရားခံမှာ လွတ်မြောက်သွားခြင်းဖြစ်ကြောင်း သိရှိခဲ့ရသည်။ ဤဖြစ်ရပ်နှင့် ပတ်သက်၍ ထိုင်းရဲတပ်ဖွဲ့၏ ပေါ့ဆမှုကို လူမှုကွန်ရက်တွင် ဝေဖန်မှုများ မြင့်တက်နေပြီး၊ လဝက အရာရှိများအနေဖြင့် တမင်သက်သက် လွှတ်ပေးခဲ့ခြင်း ရှိ၊ မရှိကို စုံစမ်းရေးကော်မတီဖြင့် စစ်ဆေးလျက်ရှိကြောင်း ဘန်ကောက်ပို့စ် သတင်းတွင် ဖော်ပြထားသည်။  

လူသတ်မှုသံသယရှိသူ မြန်မာနိုင်ငံသားအား ထိုင်းလဝက မှားယွင်းပြန်ပို့

လူသတ်မှုသံသယရှိသူ မြန်မာနိုင်ငံသားအား ထိုင်းလဝက မှားယွင်းပြန်ပို့ သတင်းနှင့် မီဒီယာ ကွန်ရက်။၂၀၂၆ ခုနှစ် ဇန္နဝါရီလ ၅ ရက်။  ထိုင်းနိုင်ငံ၊ မဲ…

  • January 5, 2026
ဆီးရီးယားရှိ IS အဖွဲ့ လက်နက်သိုလှောင်ရာကို ဗြိတိန်နှင့် ပြင်သစ်လေတပ်တို့ ပူးပေါင်းတိုက်ခိုက် သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဇန္နဝါရီလ ၅ ရက်။ ဗြိတိန်နှင့် ပြင်သစ်လေတပ်တို့သည် ဆီးရီးယားနိုင်ငံ၊ ပါလ်မိုင်ရာမြို့ မြောက်ဘက်ရှိ အစ္စလာမ္မစ်နိုင်ငံတော် (IS) အဖွဲ့၏ မြေအောက်လက်နက်သိုလှောင်ရုံကို ပူးပေါင်းဗုံးကြဲတိုက်ခိုက်ခဲ့သည်။ အဆိုပါ စစ်ဆင်ရေးတွင် ဗြိတိန်လေတပ်မှ Typhoon FGR4 တိုက်လေယာဉ်များနှင့် Voyager လောင်စာဆီဖြည့်တင်းရေး လေယာဉ်များကို အသုံးပြုခဲ့သည်။ ၎င်းတို့သည် မြေအောက်အဆောက်အအုံသို့ ဆက်သွယ်ထားသော လိုဏ်ခေါင်းများကို Paveway IV လမ်းညွှန်ဗုံးများဖြင့် ပစ်မှတ်ထား ချေမှုန်းခဲ့ခြင်းဖြစ်သည်။ တိုက်ခိုက်မှုပြုလုပ်ရာဒေသတွင် အရပ်သားများ နေထိုင်ခြင်းမရှိသဖြင့် ဘေးထွက်ဆိုးကျိုး မရှိခဲ့ကြောင်းနှင့် စစ်ဆင်ရေးမှာ အောင်မြင်ခဲ့ကြောင်း ဗြိတိန်ကာကွယ်ရေးဝန်ကြီးဌာနက အတည်ပြုသည်။ ဗြိတိန်ကာကွယ်ရေးဝန်ကြီး John Healey က ယခုလုပ်ဆောင်ချက်သည် IS အဖွဲ့ ပြန်လည်ရှင်သန်လာမှုကို တားဆီးရန်နှင့် အကြမ်းဖက်ဝါဒကို အမြစ်ပြတ်ချေမှုန်းရန်အတွက် ဖြစ်ကြောင်း ပြောကြားခဲ့သည်။

ဆီးရီးယားရှိ IS အဖွဲ့ လက်နက်သိုလှောင်ရာကို ဗြိတိန်နှင့် ပြင်သစ်လေတပ်တို့ ပူးပေါင်းတိုက်ခိုက်

ဆီးရီးယားရှိ IS အဖွဲ့ လက်နက်သိုလှောင်ရာကို ဗြိတိန်နှင့် ပြင်သစ်လေတပ်တို့ ပူးပေါင်းတိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၅ ရက်…

  • January 5, 2026
တောင်ကိုရီးယား သမ္မတ တရုတ်ခရီးစဉ်အတွင်း မြောက်ကိုရီးယားက ဒုံးကျည် စမ်းသပ် သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဇန္နဝါရီလ ၅ ရက်။ တောင်ကိုရီးယားသမ္မတ လီဂျေမြောင်၏ တရုတ်နိုင်ငံခရီးစဉ်နှင့် တိုက်ဆိုင်၍ မြောက်ကိုရီးယားက အသံထက်မြန်သော ဒုံးကျည်များကို ပစ်လွှတ်စမ်းသပ်ခဲ့သည်။ တောင်ကိုရီးယားသမ္မတသည် တရုတ်သမ္မတ ရှီကျင့်ဖျင်နှင့် တွေ့ဆုံကာ ဒေသတွင်းလုံခြုံရေးနှင့် K-Pop ယဉ်ကျေးမှုဆိုင်ရာ ပိတ်ဆို့မှုများအကြောင်း ဆွေးနွေးရန် ပီကင်းမြို့သို့ ရောက်ရှိနေစဉ်အတွင်း ယခုကဲ့သို့ စမ်းသပ်မှု ပေါ်ပေါက်လာခြင်းဖြစ်သည်။ ဇန်နဝါရီလ ၄ ရက်နေ့တွင် မြောက်ကိုရီးယားက ပစ်လွှတ်ခဲ့သော ဒုံးကျည်များသည် အသံထက် ၅ ဆကျော် မြန်ရုံသာမက ပျံသန်းနေစဉ် လမ်းကြောင်းပြောင်းလဲနိုင်သည့် အဆင့်မြင့်နည်းပညာသုံး ဒုံးကျည်များဖြစ်ကြောင်း မြောက်ကိုရီးယားအစိုးရပိုင် KCNA သတင်းဌာနက ထုတ်ပြန်သည်။ အဆိုပါဒုံးကျည်များသည် ကီလိုမီတာ ၁,၀၀၀ အကွာရှိ ပစ်မှတ်ကို တိကျစွာ ထိမှန်ခဲ့သည်။ တောင်ကိုရီးယားသမ္မတအနေဖြင့် ကိုရီးယားကျွန်းဆွယ် ပြန်လည်ပေါင်းစည်းရေးအတွက် တရုတ်နိုင်ငံ၏ ကူညီမှုကို မျှော်လင့်နေသော်လည်း မြောက်ကိုရီးယား၏ စစ်ရေးပြသမှုကြောင့် အဆိုပါသံတမန်ရေးရာ ကြိုးပမ်းမှုများမှာ အဟန့်အတား ဖြစ်လာနိုင်ဖွယ်ရှိသည်။

တောင်ကိုရီးယား သမ္မတ တရုတ်ခရီးစဉ်အတွင်း မြောက်ကိုရီးယားက ဒုံးကျည် စမ်းသပ်

တောင်ကိုရီးယား သမ္မတ တရုတ်ခရီးစဉ်အတွင်း မြောက်ကိုရီးယားက ဒုံးကျည် စမ်းသပ်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၅ ရက်။  တောင်ကိ…

  • January 5, 2026
မာဒူရို ကို ဖမ်းဆီးပြီးနောက် ဗင်နီဇွဲလားတွင် တင်းမာမှုများ ဆက်ရှိနေ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၅ ရက်။ ဗင်နီဇွဲလားသမ္မတ နီကိုလပ်စ် မာဒူရို (Nicolás Maduro) ဖမ်းဆီးခံရပြီးနောက် နိုင်ငံအတွင်း တင်းမာမှုများ ဖြစ်ပေါ်လျက်ရှိသည်။ အမေရိကန်သမ္မတ ဒေါ်နယ်ထရန့်က ဗင်နီဇွဲလားနိုင်ငံကို အမေရိကန်က တိုက်ရိုက်စီမံခန့်ခွဲသွားမည်ဟု ကြေညာထားသော်လည်း၊ လက်ရှိတွင် ဒုတိယသမ္မတ ဒယ်လ်စီ ရော့ဒရီဂွက်ဇ် (Delcy Rodriguez) က ယာယီသမ္မတအဖြစ် ကျမ်းသစ္စာဆိုကာ တာဝန်ယူထားသည်။ မာဒူရို၏ လူယုံဖြစ်သူ ဒယ်လ်စီသည် မာဒူရိုကိုသာ တစ်ဦးတည်းသော တရားဝင်သမ္မတအဖြစ် အသိအမှတ်ပြုထားပြီး ၎င်းအား ချက်ချင်းပြန်လွှတ်ပေးရန် တောင်းဆိုနေသည်။ ဗင်နီဇွဲလားစစ်တပ်သည်လည်း ဒယ်လ်စီကို ယာယီခေါင်းဆောင်အဖြစ် ထောက်ခံထားပြီး အစိုးရယန္တရားကို ဆက်လက်ထိန်းချုပ်ထားဆဲဖြစ်သည်။ တစ်ဖက်တွင်လည်း သမ္မတဒေါ်နယ်ထရန့်က ယာယီသမ္မတသစ်အနေဖြင့် အမေရိကန်နှင့် ပူးပေါင်းဆောင်ရွက်ခြင်းမရှိပါက မာဒူရိုထက် ပိုမိုဆိုးရွားသော အကျိုးဆက်များ ကြုံတွေ့ရမည်ဟု သတိပေးခြိမ်းခြောက်ထားသည်။ မြို့တော် ကာရာကပ်စ်တွင် တိုက်ခိုက်မှုများကြောင့် လျှပ်စစ်မီးပြတ်တောက်မှုများ ရှိနေသော်လည်း စစ်တပ်က လုံခြုံရေးရယူထားသဖြင့် အခြေအနေမှာ တည်ငြိမ်သယောင်ရှိနေကြောင်း BBC သတင်းတွင် ဖော်ပြသည်။ ရှေ့ဆက်ဖြစ်ပေါ်လာနိုင်သည့် အခြေအနေများတွင် မာဒူရိုနှင့် ဇနီးဖြစ်သူတို့သည် နယူးယောက်မြို့၌ မူးယစ်ဆေးဝါးမှောင်ခိုမှုနှင့် အကြမ်းဖက်မှုစွဲချက်များဖြင့် တရားရင်ဆိုင်ရမည်ဖြစ်သည်။ ထို့ပြင် သမ္မတထရန့်သည် အမေရိကန်ရေနံကုမ္ပဏီများကို စေလွှတ်၍ ဗင်နီဇွဲလား ရေနံလုပ်ငန်းမှ တစ်ဆင့် စစ်စရိတ်များ ပြန်လည်တောင်းခံရန် စီစဉ်နေသဖြင့် အာဏာဟောင်း အသိုင်းအဝိုင်းနှင့် အမေရိကန်တို့အကြား အာဏာလုပွဲများ ဆက်လက်ပြင်းထန်လာနိုင်ဖွယ်ရှိသည်။

မာဒူရို ကို ဖမ်းဆီးပြီးနောက် ဗင်နီဇွဲလားတွင် တင်းမာမှုများ ဆက်ရှိနေ

မာဒူရို ကို ဖမ်းဆီးပြီးနောက် ဗင်နီဇွဲလားတွင် တင်းမာမှုများ ဆက်ရှိနေ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၅ ရက်။  ဗင်နီဇွဲလားသမ…

  • January 5, 2026
မော်လူးဗုံးကြဲမှု ကျောင်းသူ တစ်ဦးသေဆုံးပြီး နှစ်ဦး ဒဏ်ရာရ သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဇန္နဝါရီလ ၃ ရက်။ မော်လူးဒေသရှိ စာသင်ကျောင်းတစ်ကျောင်းကို စစ်ကော်မရှင်က ဂျက်တိုက်လေယာဉ်ဖြင့် ဗုံးကြဲတိုက်ခိုက်ခဲ့ရာ ကျောင်းအိပ်ကျောင်းစား နေထိုင်သည့် Grade-12 ကျောင်းသူ တစ်ဦး သေဆုံးပြီး အခြားကျောင်းသူနှစ်ဦး ဒဏ်ရာပြင်းထန်စွာ ရရှိခဲ့သည်ဟု ဒေသခံများက ပြောသည်။ ဇန်နဝါရီလ ၂ ရက်နေ့၊ နံနက် အစောပိုင်း ၁ နာရီ ၁၇ မိနစ်နှင့် ၂၀ မိနစ်တို့တွင် စစ်ကိုင်းတိုင်း၊ အင်းတော်မြို့နယ်၊ မော်လူးမြို့အနောက်ဘက်ရှိ ပဲခူးကျေးရွာ (ရွာရှည်ရွာ) စာသင်ကျောင်းသို့ စစ်ကော်မရှင်တပ်က ဗုံးနှစ်လုံး လာရောက်ကြဲချခဲ့ခြင်းဖြစ်သည်။ အဆိုပါကျောင်းသည် တိုက်ပွဲဖြစ်ပွားခြင်းမရှိဘဲ ကျောင်းသူ၊ ကျောင်းသားများ ကျောင်းအိပ်ကျောင်းစားဖြင့် ပညာသင်ကြားနေသည့် နေရာဖြစ်သည်။ ဖြစ်စဉ်နှင့်ပတ်သက်၍ အင်းတော်မြို့ခံတစ်ဦးက မြေပြင်အခြေအနေကို ယခုကဲ့သို့ ပြောပြသည်။ “တံတားဦးကနေ တက်လာပြီး ကြဲတာ။ ကျောင်းက ကျောင်းအိပ်ကျောင်းစား နေကြတာ။ စာသင်‌ကျောင်းကို တည်ပစ်တာပါ။ ကျောင်းက ကျောင်းအိပ်ကျောင်းစား ဖွင့်ထားတာဖြစ်ပြီး သေတဲ့ကောင်မလေးက တောင်ဖီ လာရွာကနေ လာတက်နေတာ။ ကျန်တဲ့ ကျောင်းသူနှစ်ယောက်လည်း ဒဏ်ရာတော်တော်ပြင်းတယ်။” လေကြောင်း တိုက်ခိုက်မှုကြောင့် တောင်ဖီလာကျေးရွာမှ လာရောက် ပညာသင်ကြားနေသည့် Grade-12 ကျောင်းသူတစ်ဦး အသက်ဆုံးရှုံးခဲ့ရပြီး၊ ဒဏ်ရာရရှိသူနှစ်ဦးမှာလည်း စိုးရိမ်ရသည့်အခြေအနေတွင် ရှိနေသည်။ ထို့အပြင် ဗုံးပေါက်ကွဲမှုကြောင့် စာသင်ကျောင်းအဆောက်အအုံနှင့် အနီးနားရှိ နေအိမ်အချို့လည်း ထိခိုက် ပျက်စီးခဲ့ရသည်။ ထိုဒေသတွင် တိုက်ပွဲဖြစ် ပွားခြင်း သို့မဟုတ် စစ်ရေးလှုပ်ရှားမှု တစ်စုံတစ်ရာမရှိဘဲ စစ်ကော်မရှင်တပ်က အရပ်သားပစ်မှတ်ဖြစ်သည့် စာသင်ကျောင်းကို ရည်ရွယ်ချက်ရှိရှိ တိုက်ခိုက်ခဲ့ခြင်းဖြစ်သည်ဟု ဒေသတွင်း သတင်းရင်းမြစ်ဖြစ်သည့် Indaw Revolution-IR က ထုတ်ပြန်သည်။ အင်းတော်မြို့နယ်သည် ၂၀၂၅ ခုနှစ် ဧပြီလတွင် ကချင်လွတ်လပ်ရေး တပ်မတော် KIA၊ ကျောင်းသားတပ်မတော် ABSDF နှင့် ပြည်သူ့ကာကွယ်ရေးတပ် PDF ပူးပေါင်းတပ်များက အလုံးစုံသိမ်းပိုက်ထားသည့် စစ်ကော်မရှင် ကင်းစင်နယ်မြေဖြစ်ပြီး၊ မော်လူးဒေသကိုမူ ၂၀၂၃ ခုနှစ်ကတည်းက တော်လှန်ရေးတပ်များက ထိန်းချုပ်ထားခြင်း ဖြစ်သည်။ စစ်ကော်မရှင်တပ်သည် ၎င်းတို့ လက်လွှတ်လိုက်ရသည့် နယ်မြေများရှိ စာသင်ကျောင်းများကို ပစ်မှတ်ထား တိုက်ခိုက်လေ့ရှိရာ၊ ဇန်နဝါရီလ ၁ ရက်နေ့ကလည်း ဒီပဲယင်းမြို့နယ်ရှိ စစ်ဘေးရှောင်များ ခိုလှုံနေသည့် စာသင်ကျောင်းကို ဗုံးကြဲခဲ့သဖြင့် အရပ်သား ၇ ဦး ဒဏ်ရာရရှိခဲ့သည်။ လက်ရှိတွင် အင်းတော်မြို့နယ်အတွင်း စစ်ကော်မရှင်တပ်၏ လေကြောင်းရန်ကို ပြည်သူများက အထူးစိုးရိမ် ထိတ်လန့်နေကြရပြီး ဘေးလွတ်ရာ ဗုံးခိုကျင်းများအတွင်း၌သာ သတိကြီးစွာ နေထိုင်နေကြရသည်ဟု ဒေသခံများက ပြောသည်။  

မော်လူးဗုံးကြဲမှု ကျောင်းသူ တစ်ဦးသေဆုံးပြီး နှစ်ဦး ဒဏ်ရာရ

မော်လူးဗုံးကြဲမှု ကျောင်းသူ တစ်ဦးသေဆုံးပြီး နှစ်ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၃ ရက်။  မော်လူးဒေသရှိ စာသင်ကျောင…

  • January 3, 2026
ကသာအနီး ကျေးရွာဗုံးကြဲမှုတွင် အရပ်သား ၁ ဦးသေ၊ ၃ ဦး ဒဏ်ရာရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၃ ရက်။ ကသာအနီး ကျေးရွာတစ်ရွာကို စစ်ကော်မရှင်က ဗုံးကြဲတိုက်ခိုက်မှုကြောင့် အရပ်သား တစ်ဦး သေဆုံးပြီး အခြား ၃ ဦး ဒဏ်ရာရရှိခဲ့သည်။ စစ်ကိုင်းတိုင်း၊ ကသာမြို့သိမ်းတိုက်ပွဲအတွင်း စစ်ကော်မရှင်၏ လေကြောင်းတိုက်ခိုက်မှုကြောင့် ကျေးရွာ အတွင်းရှိ ခေါက်ဆွဲဆိုင်တွင် ထိုင်နေသည့် အသက် ၅၀ ကျော်အရွယ် အမျိုးသားတစ်ဦး ဗုံးစထိမှန်သေဆုံးခဲ့ပြီး အရပ်သား ၃ ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။ ဇန်နဝါရီလ ၂ ရက် မွန်းလွဲ ၁ နာရီဝန်းကျင်တွင် မြို့သိမ်းတိုက်ပွဲဖြစ်ပွားရာ ကသာမြို့နှင့် ၁၅ မိုင်ခန့်အကွာရှိ မိုးတားလေးတိုက်နယ်၊ ဟဲနားကျေးရွာအတွင်းသို့ စစ်ကောင်စီလေယာဉ်က ဗုံးကြဲတိုက်ခိုက်ခဲ့ခြင်းဖြစ်သည်။ ဗုံးသီးကျရောက်ပေါက်ကွဲသည့်နေရာနှင့် မလှမ်းမကမ်းရှိ ခေါက်ဆွဲဆိုင်အတွင်း ထိုင်နေသူများ ဗုံးစထိမှန်ခဲ့ခြင်း ဖြစ်ကြောင်း ဒေသခံများက ပြောသည်။ ဖြစ်စဉ်နှင့်ပတ်သက်၍ ဒေသခံအမျိုးသမီးတစ်ဦးက “ခေါက်ဆွဲဆိုင်မှာထိုင်နေတာ။ ဗုံးအစအနသွားထိတာ။ ဗုံးသီးကျတဲ့နေရာနဲ့က နည်းနည်းဝေးတယ်။ ၃ ယောက်ဒဏ်ရာရပြီး ၁ ယောက်သေတယ်” ဟု အတည်ပြု ပြောဆိုသည်။ စစ်ကော်မရှင်တပ်သည် မြို့သိမ်းတိုက်ပွဲစတင်သည့် ဒီဇင်ဘာလနောက်ဆုံးပတ်မှ စတင်ကာ ယနေ့အထိ ကသာမြို့ပတ်ပတ်လည်နှင့် အနီးနားရှိကျေးရွာများကို လေကြောင်းမှ အပြင်းအထန် တိုက်ခိုက်နေခြင်းဖြစ်သည်။ ထိုသို့ တိုက်ခိုက်မှုများကြောင့် ကသာမြို့ပေါ်ရှိ ပတ္တမြားရပ်ကွက်မှ ပတ္တမြားစျေးနှင့် အထက (၂) စာသင်ကျောင်း ဆောင် အချို့ မီးလောင်ပျက်စီးခဲ့ရသည်။ ဇန်နဝါရီ ၂ ရက် ညပိုင်း ၇ နာရီဝန်းကျင်တွင်လည်း လေကြောင်းတိုက်ခိုက်မှုများ ဆက်တိုက်ရှိနေခဲ့ပြီး ဗုံးခိုကျင်း များအတွင်း ပုန်းအောင်းနေရသည့် စစ်ဘေးရှောင် အမျိုးသားတစ်ဦးက မြေပြင်အခြေအနေကို ယခုကဲ့သို့ ပြောပြသည်။ “ပျံတာနိမ့်နိမ့်လေး။ ကျဲနေတာ။ ကျနော်တို့လည်း ဗုံးခိုကျင်းထဲဝင်နေတာ။ မြန်လိုက်တာ အဲ့တိုက်လေယာဉ် တွေက နီးမှသိရတာ။ အခြေအနေကတော့ မကောင်းဘူးနေမှာ အဲ့လိုလာရင်။” တော်လှန်ရေး ပူးပေါင်းတပ်ဖွဲ့များသည် ဒီဇင်ဘာလ ၂၈ ရက် (စစ်ကော်မရှင်၏ အတုအယောင် ရွေးကောက်ပွဲ နေ့) တွင် ကသာမြို့သိမ်းတိုက်ပွဲကို စတင်ဆင်နွှဲခဲ့ခြင်းဖြစ်ပြီး၊ တိုက်ပွဲတစ်ပတ်အကြာတွင် မြို့လယ်ခေါင်အထိ ဝင်ရောက်စိုးမိုးထားနိုင်ပြီဖြစ်သည်။ လက်ရှိတွင် ခမရ ၃၀၉ တပ်ရင်းအနီးတစ်ဝိုက်၌ တိုက်ပွဲများ အပြင်းထန်ဆုံးဖြစ်ပွားနေပြီး နေအိမ်အများအပြား မီးလောင်ပျက်စီးနေသကဲ့သို့ မြို့ခံအများစုမှာလည်း ဘေးလွတ်ရာသို့ တိမ်းရှောင်နေကြရသည်။ တော်လှန်ရေး အင်အားစုများသည် ၂၀၂၃ ခုနှစ်ကတည်းက ကသာမြို့ပေါ်မှလွဲ၍ ကျေးရွာအုပ်စုအများစုကို ထိန်းချုပ်ထားခဲ့ခြင်း ဖြစ်ပြီး၊ ၂၀၂၅ ခုနှစ် နှစ်ကုန်ပိုင်းတွင်မှ မြို့သိမ်းတိုက်ပွဲကို အရှိန်မြှင့်တင်ကာ အပြတ်အသတ် တိုက်ခိုက်လာခြင်း ဖြစ်ကြောင်း မြေပြင်သတင်းရင်းမြစ်များက ပြောသည်။  

ကသာအနီး ကျေးရွာဗုံးကြဲမှုတွင် အရပ်သား ၁ ဦးသေ၊ ၃ ဦး ဒဏ်ရာရ

ကသာအနီး ကျေးရွာဗုံးကြဲမှုတွင် အရပ်သား ၁ ဦးသေ၊ ၃ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၃ ရက်။  ကသာအနီး ကျေးရွာတစ်ရွာကို…

  • January 3, 2026
တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၂ ရက်။ တော်လှန်ရေး ပူးပေါင်းတပ်များက ကသာမြို့လယ်အထိ ထိုးစစ်ဆင်နိုင်ခဲ့ပြီး စစ်ကော်မရှင် အခြေစိုက်စခန်း ၄ ခုကို သိမ်းပိုက်ထားနိုင်သည်ဟု မြေပြင်စစ်ရေး သတင်းရင်းမြစ်များက ပြောသည်။ စစ်ကိုင်းတိုင်းနှင့် ကချင်ပြည်အစပ်ရှိ ဗျူဟာကျသည့် ခရိုင်ရုံးစိုက်ရာ ကသာမြို့သိမ်းတိုက်ပွဲကို ရွေးကောက်ပွဲ မတိုင်မီ ၂ ရက်အလို ဒီဇင်ဘာ ၂၆ ရက်က စတင်ခဲ့ခြင်း ဖြစ်သည်။ တိုက်ပွဲ အတွင်း တော်လှန် ရေးပူးပေါင်းတပ်ဖွဲ့များက မြို့ပြင်ရှိ ကာကင်းစခန်း ၂ ခုကို ရှေးဦးစွာ သိမ်းပိုက်နိုင်ခဲ့ခြင်းဖြစ်ပြီး၊ ဒီဇင်ဘာလ ၃၀ ရက်နေ့တွင် မြို့တွင်းရှိ စစ်ကောင်စီတပ်စွဲထားရာ အမှတ် (၅) ရပ်ကွက်မှ စိုးမိုးကုန်း (ဘုန်းကြီးကျောင်း) နှင့် အမှတ် (၈) ရပ်ကွက်ရှိ စေတီကုန်းအထိုင်စခန်းတို့ကိုပါ ထပ်မံ သိမ်းပိုက်နိုင်ခဲ့ခြင်း ဖြစ်သည်။ ကသာဒေသခံ တော်လှန်ရေးတပ်ဖွဲ့ဝင်တစ်ဦးက မြေပြင်စစ်ရေးအခြေအနေနှင့် ပတ်သက်၍ ယခုကဲ့သို့ အတည်ပြု ပြောဆိုသည်။ “လက်ရှိကတော့ စခန်း ၄ ခု ရထားပြီ။ တော်လှန်ရေးတပ်တွေ မြို့ထဲကို တောက်လျှောက်ဝင်သွားပြီး မြို့ရဲ့ တစ်ဝက်လောက် ရောက်နေပြီ။ မြို့လယ်ခေါင်လို့တောင် ပြောလို့ရပါတယ်။ စစ်ကောင်စီဘက်ကတော့ ခမရ ၃၀၉ တပ်ရင်းတစ်ခုကနေပဲ အဓိကခုခံနိုင်တော့တဲ့ အခြေအနေပါ။” အမျိုးသားညီညွတ်ရေး အစိုးရ (NUG) လက်အောက်ခံ PDF တပ်ဖွဲ့များနှင့် ကချင်လွတ်လပ်ရေး တပ်မတော် (KIA) ပူးပေါင်းတပ်များ၏ ထိုးစစ်ဆင်မှုကြောင့် စစ်ကော်မရှင်တပ်သည် မြေပြင်လမ်းကြောင်းများ ပြတ်တောက်နေသည်ဟု ဆိုသည်။ ဇန်နဝါရီ ၂ ရက် ယနေ့နံနက်ပိုင်းတွင် ထောက်ပို့လေယာဉ် ၂ စီးအသုံးပြုကာ ခမရ ၃၀၉ တပ်ရင်းအတွင်းသို့ ရိက္ခာနှင့် စစ်ကူတပ်သားများ လေကြောင်းမှတစ်ဆင့် ချပေးခဲ့သည်။ စစ်ကော်မရှင်တပ်သည် ခမရ ၃၀၉ တပ်ရင်းအတွင်းမှ နေ၍ ဒရုန်းနှင့် လက်နက်ကြီးများအသုံးပြုကာ မြို့ပေါ် ရပ်ကွက်များသို့ နေ့စဉ်ဗုံးကြဲတိုက်ခိုက်နေသဖြင့် လူနေအိမ်အများအပြား မီးလောင်ပျက်စီးလျက်ရှိသည်။ ထို့အပြင် Y-12 လေယာဉ်ဖြင့် မြို့ပတ်ပတ်လည်ကို ဗုံးအလုံးပေါင်း ၆၀ ကျော် ဆက်တိုက်ကြဲချခဲ့သလို မြို့အဝင် အထွက်လမ်းများကိုလည်း ပိတ်ဆို့ထားခဲ့သည်။ သို့သော်လည်း ဒီဇင်ဘာလ ၃၁ ရက်နေ့တွင် တော်လှန်ရေးတပ်ဖွဲ့များက လမ်းကြောင်းများ ရှင်းလင်းပေးခဲ့သဖြင့် မြို့ခံပြည်သူများသည် ဘေးလွတ်ရာသို့ အစုလိုက်အပြုံလိုက် ထွက်ခွာနိုင်ခဲ့ကြသည်။ ကသာမြို့မှ စစ်ဘေးရှောင်လာသည့် ဒေသခံတစ်ဦးက ၎င်းတို့ကြုံတွေ့ခဲ့ရသည့် အခြေအနေကို ယခုကဲ့သို့ ပြောပြသည်။ “အရင်နေ့တွေက စစ်တပ်က မြို့ထွက်လမ်းတွေအကုန် ပိတ်ထားတာ။ အခု PDF တွေက မြို့တစ်ဝက်ရပြီ ဆို တော့မှ သူတို့ထိန်းထားတဲ့ နေရာတွေကနေ ပြည်သူတွေ ထွက်လာနိုင်တာပါ။ တော်လှန်ရေးအဖွဲ့တွေက လမ်း ရှင်းပေးတာ၊ ကူညီပေးတာတွေ လုပ်ပေးတယ်။ လေယာဉ်ကလည်း တစ်ညလုံး ဗုံးတွေပတ်ချနေတာ။” လက်ရှိတွင် ကသာမြို့၏ တစ်ဝက်နီးပါးကို တော်လှန်ရေးတပ်များက ထိန်းချုပ်ထားပြီး ခမရ ၃၀၉ တပ်ရင်း အနီးနှင့် ဇေယျာချောင်ရပ်ကွက်များ၌ တိုက်ပွဲများ ဆက်လက်ပြင်းထန်နေသည်။ တိုက်ပွဲအတွင်း စစ်ကော်မရှင် တပ်သား ၅၀ ကျော်ကို အရှင်ဖမ်းမိထားပြီး လက်နက်ခဲယမ်း အချို့ကိုလည်း သိမ်းဆည်းရမိထားသည်ဟု ဆိုသည်။ ကသာခရိုင်အတွင်းရှိ အင်းတော်နှင့် ဗန်းမောက်မြို့များကို ၂၀၂၅ ခုနှစ်အတွင်း တော်လှန်ရေးတပ်ဖွဲ့များက သိမ်းပိုက်ထိန်းချုပ်ထားပြီးဖြစ်ရာ၊ ခရိုင်မြို့ဖြစ်သည့် ကသာကိုပါ သိမ်းပိုက်နိုင်ရေး ထိုးစစ်ဆင်နေခြင်း ဖြစ်သည်။ သို့သော် စစ်ကော်မရှင်တပ်က လေကြောင်းနှင့် လက်နက်ကြီးများကို အလွန်အကျွံ အသုံးပြု၍ ခုခံနေသဖြင့် အရပ်သားထိခိုက်မှုများ ပိုမိုရှိလာနိုင်မည်ကို ဒေသခံများက စိုးရိမ်လျက်ရှိကြသည်။ ကသာ မြို့သိမ်း တိုက်ပွဲနှင့်အတူ ဗန်းမော် တိုက်ပွဲကိုလည်း တော်လှန်ရေး တပ်ဖွဲ့များက စစ်ရှိန် ပြန်မြှင့်ထားခဲ့သည်။  

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၂ ရက်။  တော်လှန်ရေး ပူးပ…

  • January 2, 2026
×Close