သတင်း

ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။   ကရင်နီပြည်၊ ဖားဆောင်းမြို့ကို ပြန်လည်ထိန်းချုပ်နိုင်ပြီဖြစ်၍ လမ်းပိုင်းများအားလုံး မကြာမီပြန်ဖွင့်မည်ဟု စစ်တပ်က ကြေညာခဲ့သော်လည်း နှစ်လကျော်ကြာမြင့်လာသည့် တိုင်အောင် ဖွင့်လှစ်နိုင်ခြင်း မရှိသေးဘဲ တိုက်ပွဲ များ ဆက်လက်ပြင်းထန်နေကြောင်း စစ်ရေးသတင်းရင်းမြစ်များက ပြောသည်။   စစ်တပ်သည် ၂၀၂၆ ခုနှစ်ဆန်းပိုင်းတွင် ဖားဆောင်းမြို့ထဲသို့ ပြန်လည်ဝင်ရောက်နိုင်ခဲ့ပြီးနောက်၊ လွိုင်ကော်-ဖားဆောင်း လမ်းတစ်ခုလုံးကို ပြန်လည်ဖွင့်လှစ်တော့မည်ဟု ဖေဖော်ဝါရီလ ၁၅ ရက်နေ့တွင် ထုတ်ပြန်ခဲ့သည်။   သို့သော် ကရင်နီတော်လှန်ရေး ပူးပေါင်းတပ်ဖွဲ့များ၏ ကြားဖြတ်တိုက်ခိုက်မှုများကြောင့် လက်ရှိအချိန်ထိ ထိုလမ်းပိုင်းအား ဖွင့်လှစ်ရန် ခက်ခဲနေဆဲဖြစ်သည်။   ကရင်နီအမျိုးသားများကာကွယ်ရေးတပ် (KNDF) မှ စစ်ရေးသတင်းရင်းမြစ်တစ်ဦးက “စခ(စစ်တပ်) ဘက် ကတော့ လမ်းပြန်ဖွင့်ဖို့ ကြိုးစားနေတာတွေရှိတယ်၊ ဒါပေမဲ့ ကျနော်တို့ဘက်ကတော့ ပြန်လည်ထိန်းချုပ်ဖို့ အလူးအလဲ ကြိုးစားနေကြတော့ လမ်းဖွင့်ဖို့ ခက်ခဲလိမ့်မယ်” ဟု ပြောသည်။   ဖေဖော်ဝါရီလလယ်မှ ဧပြီလ ၂၉ ရက်နေ့ အတွင်း ဖရူဆို–ဘောလခဲ-ဖားဆောင်း လမ်းပိုင်းရှိ စစ်တပ်ယာဉ်တန်း များကို KNDF နှင့် ပူးပေါင်းတပ်ဖွဲ့များက အနည်းဆုံး (၁၀) ကြိမ်ထက်မနည်း ကြားဖြတ်တိုက်ခိုက်ခဲ့သည်။     ဧပြီလ ၂၆ ရက်ကလည်း ဒီးမော့ဆို - ဖရူဆို လမ်းပိုင်းဖြစ်သည့် ဖရူဆိုမြို့နယ်၊ ဒေါညေးခူကျေးရွာဘက်မှ ထိုးစစ်ဆင်လာသည့် စစ်တပ် စစ်ကြောင်း သည် တော်လှန်ရေးတပ်ဖွဲ့များ၏ ခုခံမှုကြောင့် နောက်တစ်နေ့တွင် ပြန်လည်ဆုတ်ခွာသွားခဲ့ရသည်။   လက်ရှိဖြစ်ပေါ်နေသည့် တိုက်ပွဲများနှင့် လမ်းပိုင်းများ ပိတ်ထားရမှုကြောင့်လည်း ဒေသခံပြည်သူများမှာ ကျန်းမာရေးနှင့် ကုန်စည်စီးဆင်းမှုအတွက် အခက်အခဲများနှင့် ကြုံတွေ့နေရသည်။   မြေပြင်အခြေအနေသိသူတစ်ဦးက “လမ်းပိတ်သွားတော့ အထူးသဖြင့် အရှေ့ခြမ်းကလူတွေက အနောက်ခြမ်း ကို ကူးလို့မရတော့ဘူး။ ကုန်ပစ္စည်းတွေအစ ကျန်းမာရေးကိစ္စအဆုံး အနောက်ခြမ်းမှာပဲ ပိုစုံတော့ အဲ့ဒီ အခက် အခဲ ရှိသွားတယ်။ အရမ်းအရေး ပေါ်ဆိုရင်တော့ ရဲဘော်တွေက လမ်းရှင်းပြီး လူထုကို ပို့ပေးတယ်၊ ဒါပေမဲ့ အန္တရာယ်အရမ်းများတယ်” ဟု ပြောသည်။   ၎င်းက ဆက်လက်၍ "ဗမာစစ်တပ်က တောင်ပေါ်မှာဆိုတော့ လှမ်းမြင်ရတော့ ၉၇ တွေနဲ့ လှမ်းလှမ်းထုတာ။ အရပ်သားတွေကလည်း တောင်းဆိုတော့ ရှေ့ကင်းက ရဲဘော်တွေက လမ်းရှင်းပြီး ကာပေးပြီး ကူးကြတာ မျိုးပေါ့။ ဒါမယ့် အန္တရာယ်အရမ်းများတယ်။ ထိကြတယ် ရဲဘော်တွေ။ အခုတော့ မဖြစ်မနေမှ ကူးပေးတော့ တာမျိုးပေါ့နော်” ဟု ဆက်ပြောသည်။   ၉၇ ဆိုသည်မှာ ၉၇ အမျိုးအစား အမြှောက် လက်နက်ကြီးကို ဆိုလိုသည်။   လက်ရှိတွင် ပြည်ထောင်စု လမ်းမကြီးတစ်လျှောက်ရှိ ကျေးရွာများစွာမှ ပြည်သူများမှာ ရွာလုံးကျွတ် စစ်ဘေး ရှောင်နေရဆဲဖြစ်ပြီး ကုန်သွယ်ရေးနှင့် ခရီးသွားလာမှုများလည်း ရပ်တန့်နေသည်။     ထို့အပြင် စစ်တပ်သည် ဖားဆောင်းမှ တစ်ဆင့် ခဲသတ္တုထွက်ရှိရာ မော်ချီးဒေသသို့ ဆက်လက် စစ်ကြောင်း ထိုးရန် ပြင်ဆင်နေသဖြင့် ပြည်သူများအနေဖြင့် စစ်ရေးအသိ သတိဖြင့် နေထိုင်ကြရန် တော်လှန်ရေးတပ်ဖွဲ့များ က သတိပေးနှိုးဆော်ထားသည်။   #ဖားဆောင်းတိုက်ပွဲ #ကရင်နီပြည်တိုက်ပွဲ #KNDF #KA #PDF

ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး

ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  ကရင်နီပြည်၊ ဖားဆောင်းမြို့ကို…

  • April 30, 2026
 KNU နယ်မြေအတွင်း ဧက ၄ သိန်းကျယ်သော သဘာဝ နယ်မြေ ဖော်ထုတ်ကြေညာ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။   KNU တပ်မဟာ ၄ နယ်မြေတွင် ဒေသခံများက ဌာနေတိုင်းရင်းသား လူမျိုးစု ထိန်းသိမ်းနယ်မြေ ဟုခေါ်သည့် ဧက ၄ သိန်းခန့်ရှိသော သဘာဝ နယ်မြေတစ်ခုကို ဖော်ထုတ်လိုက်သည်၊ ။   KNU  ကရင့်အမျိုးသား အစည်းအရုံး မြိတ်-ထားဝယ်ခရိုင်အတွင်း သရက်ချောင်းမြို့နယ်အတွင်းမှ  ဌာနေတိုင်းရင်းသားများ၏ ထုံးတမ်းစဉ်လာနှင့် သဘာဝပတ်ဝန်းကျင်ကို ကာကွယ်ရန်အတွက် ‘ပေါခလိုး ဌာနေတိုင်းရင်းသား လူမျိုးစုတို့ ထိန်းသိမ်းနယ်မြေ’ ကို တရားဝင် အတည်ပြု သတ်မှတ်လိုက်ကြောင်း ပေါခလိုးဌာနေလူမျိုးစုများက ထုတ်ပြန်လိုက်သည်။   အဆိုပါ ထိန်းသိမ်းနယ်မြေသည် ကရင်အမျိုးသားအစည်းအရုံး (KNU) တပ်မဟာ ၄၊ မြိတ်-ထားဝယ်ခရိုင်၊ သရက်ချောင်း (ကစယ်ဒို) မြို့နယ်တွင် တည်ရှိပြီး ၂၀၂၆ ခုနှစ် ဧပြီလ ၂၂ ရက်နေ့တွင် အတည်ပြုခဲ့ခြင်းဖြစ်သည်။   စုစုပေါင်း ဧက ၃၅၈,၄၉၃ (၁.၄၅၁ စတုရန်းကီလိုမီတာခန့်) ကျယ်ဝန်းကာ ကျေးရွာပေါင်း ၂၄ ရွာမှ လူဦးရေ ၁၁,၅၀၀ ကျော်၏ လူနေမှုဘဝနှင့် ယဉ်ကျေးမှုများကို လွှမ်းခြုံထားသည်။   နယ်မြေဖော်ဆောင်ရသည့် ရည်ရွယ်ချက်နှင့်ပတ်သက်၍ KNU တပ်မဟာ ၄ အတွင်းရေးမှူး ပဒိုစောအယ်နားက “အဓိက ဖော်ပြချင်တာက ကျနော်တို့ ဘိုးဘေးမိဘတွေရဲ့ နယ်မြေဒေသတွေကို အတင်းအဓမ္မလာရောက် လုယူ တာကို ရပ်တန့်ရမယ်။ သယံဇာတ ခိုးယူမှုတွေကို ရပ်တန့်ရမယ်။ ကျနော်တို့ ဘိုးဘေးမိဘတွေ ထိန်းသိမ်းခဲ့ကြ တဲ့ ရိုးရာယဉ်ကျေးမှု ဓလေ့ထုံးတမ်းတွေကို နိုင်ငံတကာနဲ့ ငွေကြေးချမ်းသာသူတွေ၊ တိုင်းပြည်ကို အုပ်ချုပ်သူ တွေက လက်ခံအသိအမှတ်ပြုရမယ်” ဟု ပြောသည်။   ယခုနယ်မြေ သတ်မှတ်နိုင်ခြင်းသည် ကုလသမဂ္ဂ၏ ၂၀၃၀ အရောက်တွင် ကမ္ဘာ့မြေမျက်နှာပြင်၏ ၃၀ ရာခိုင်နှုန်း ကို သဘာဝနယ်မြေအဖြစ် ထိန်းသိမ်းရမည်ဆိုသည့် ပန်းတိုင်ကို များစွာအထောက်အကူပြုနိုင်ကြောင်း ကရင် သဘာဝ ပတ်ဝန်းကျင်နဲ့ လူမှုရေးဆိုင်ရာ လှုပ်ရှားမှုကွန်ယက် (KESAN) မှ ဒါရိုက်တာ စောပေါလ်စိန်ထွား က ပြောသည်။   စောပေါလ်စိန်ထွားက “ကျနော်တို့ ထိန်းသိမ်းကာကွယ်မယ်လို့ သတ်မှတ်ထားတဲ့ အကျယ်အဝန်းက ဧက လေးသိန်းနီးနီးလောက် ရှိတယ်။ ဒီအကျယ်အဝန်းဟာ ကမ္ဘာ့ကုသလမဂ္ဂက ချမှတ်ထားတဲ့ ကမ္ဘာမြေကို ကာကွယ်စောင့်ရှောက်ဖို့နဲ့ စိမ်းလန်းစိုပြည်တဲ့ သစ်တောကြီးတွေ ၃၀ ရာခိုင်နှုန်း ရှိရမယ်ဆိုတာကို အများကြီး အထောက်အပံ့ ဖြစ်စေတယ်။ ဒါက လူသားတွေအတွက် သတင်းကောင်းဖြစ်သလို တိရစ္ဆာန်တွေအတွက်လည်း ဖြစ်တယ်” ဟု ပြောသည်။   ပေါခလိုးဒေသသည် ဆယ်စုနှစ်များစွာ မြေယာသိမ်းပိုက်မှုနှင့် စစ်ရေးလှုပ်ရှားမှုဒဏ်များကို ခံစားခဲ့ရပြီး ၂၀၁၅ ခုနှစ် NCA လက်မှတ်ရေးထိုးပြီးနောက်ပိုင်း အလုံးအရင်းနှင့် ဝင်ရောက်လာသည့် ပျက်စီးမှုများသော စီမံကိန်း များကို တုံ့ပြန်ရန် ယခုကဲ့သို့ ကြေညာခဲ့ခြင်း ဖြစ်သည်။   ကိုယ်ပိုင်ပြဌာန်းခွင့်နှင့် ပတ်သက်၍ ပဒိုစောအယ်နားက “ဒီဒေသဟာ ကျနော်တို့ တိုင်းပြည်ဖြစ်တယ်။ ဒီဒေသ ဟာ ကျနော်တို့ အိပ်ရာ ဖြစ်တယ်။ ကျနော်တို့ ဇာတိချက်ကြွေတဲ့နေရာ ဖြစ်တယ်။ ဆိုတော့ ကျနော်တို့ဟာ ကိုယ့်ကြမ္မာကိုယ် ဖန်တီးခွင့်အတိုင်း ဒီဒေသကို ကျနော်တို့ အုပ်ချုပ်သွားမှာ ဖြစ်တယ်။ ဘိုးဘေးဘီဘင် အဆက် ဆက်က ထိန်းသိမ်းလာခဲ့တဲ့ ဒီဒေသကို ကျနော်တို့ ဆက်ပြီး ထိန်းသိမ်းပြီး အုပ်ချုပ် သွားမှာ ဖြစ်တယ်လို့ ပြောချင်တယ်” ဟု ဆက်ပြောသည်။   ပေါခလိုးဒေသသည် သက်ရှိ နယ်မြေတစ်ခုဖြစ်ပြီး ဒေသခံ ဌာနေလူမျိုးစုများမှ မျိုးဆက် အဆက်ဆက် စီမံ အုပ်ချုပ်လာသည့် နယ်မြေဒေသဖြစ်သည်ဟု ပေါခလိုး ဌာနေတိုင်းရင်းသားလူမျိုးစုများ ဆိုသည်။   ပေါခလိုးဌာနေ တိုင်းရင်းသား လူမျိုးစုတို့ ထိန်းသိမ်းနယ်မြေသည် ပြင်ပမှ ဝင်ရောက်စွတ်ဖက်မှုများကို လက်ခံ မည် မဟုတ်ဘဲ ကိုယ်ပိုင်ပြဌာန်းခွင့်နှင့် အုပ်ချုပ်ရေးစနစ်ကို အခြေခံထားသည်ဟု ပဒိုစောအယ်နားက ပြော သည်။   ယခု ပေါခလိုးနယ်မြေသည် KNU နယ်မြေအတွင်း တတိယမြောက် အတည်ပြုသည့် ဌာနေထိန်းသိမ်းနယ်မြေ ဖြစ်သည်။ ယခင်က ၂၀၁၉ ခုနှစ်တွင် တပ်မဟာ ၅ ၌ သံလွင်ငြိမ်းချမ်းရေးဥယျာဉ်နှင့် ၂၀၂၄ ခုနှစ်တွင် တပ်မဟာ ၂ ၌ သောသီတောအူ ဥယျာဉ်တို့ကို အတည်ပြုခဲ့ပြီးဖြစ်သည်။   ကော်သူးလေ ဗဟိုသစ်တောဌာနမှူး ပဒိုမန်းဘထွန်းကလည်း အခြားနယ်မြေများတွင်လည်း ဆက်လက် အကောင်အထည်ဖော်သွားရန် ရှိကြောင်း အသိပေးပြောဆိုထားသည်။   #ပေါခလိုးဌာနေတိုင်းရင်းသားလူမျိုးစုထိန်းသိမ်းနယ်မြေ #ပေါခလိုးဒေသ #သရက်ချောင်းမြို့နယ် #ကစယ်ဒိုမြို့နယ် #KNU

 KNU နယ်မြေအတွင်း ဧက ၄ သိန်းကျယ်သော သဘာဝ နယ်မြေ ဖော်ထုတ်ကြေညာ

 KNU နယ်မြေအတွင်း ဧက ၄ သိန်းကျယ်သော သဘာဝ နယ်မြေ ဖော်ထုတ်ကြေညာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  KNU တပ်မဟာ ၄ နယ်မြေတွင်…

  • April 30, 2026
ကမ္ဘာ့ သတင်း လွတ်လပ်ခွင့် ၂၅ နှစ်အတွင်း အနိမ့်ဆုံးကို ကျဆင်း   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၃၀ ရက်။   နယ်စည်းမခြားသတင်းထောက်များအဖွဲ့ (RSF) ရဲ့ ၂၀၂၆ ခုနှစ် ကမ္ဘာ့သတင်းလွတ်လပ်ခွင့်အညွှန်းကိန်း (World Press Freedom Index) အရ ကမ္ဘာတစ်ဝန်းက သတင်းလွတ်လပ်ခွင့်ဟာ ၂၅ နှစ်အတွင်း အနိမ့်ဆုံးအဆင့်ကို ကျဆင်းသွားတယ်လို့ ဖော်ပြထားပါတယ်။   ကမ္ဘာ့နိုင်ငံပေါင်း ၁၈၀ ထဲက ထက်ဝက်ကျော်ဟာ သတင်းလွတ်လပ်ခွင့် “ခက်ခဲ” (Difficult) ဒါမှမဟုတ် “အလွန်ဆိုးရွား” (Very Serious) တဲ့ အခြေအနေကို ရောက်ရှိနေပါတယ်။   နိုင်ငံပေါင်း ၁၁၀ မှာ သတင်းသမားတွေကို နည်းမျိုးစုံနဲ့ ရာဇဝတ်သားလို ဖမ်းဆီးအရေးယူတာတွေ ရှိနေပါတယ်။   ဂါဇာကမ်းမြောင်ဒေသမှာ ၂၀၂၃ အောက်တိုဘာကစပြီး သတင်းထောက်ပေါင်း ၂၂၀ ကျော် သတ်ဖြတ်ခံခဲ့ရတာကြောင့် အစ္စရေးစစ်တပ်ဟာ သတင်းသမားတွေကို အသေအပျောက်အများဆုံးဖြစ်စေတဲ့ လက်သည်လို့ ဖော်ပြထားပါတယ်။   သတင်းလွတ်လပ်ခွင့်ရှိတဲ့ နိုင်ငံတွေထဲမှာ နော်ဝေ၊ နယ်သာလန်နဲ့ အက်စ်တိုးနီးယားတို့က ထိပ်ဆုံးမှာ ရှိနေပါတယ်။     အမေရိကန်ပြည်ထောင်စုဟာ သမ္မတ ဒေါ်နယ်ထရန့် လက်ထက်မှာ သတင်းမီဒီယာတွေအပေါ် တိုက်ခိုက်မှုတွေကြောင့် အဆင့် ၆၄ (Problematic အဆင့်) ကို ၇ ဆင့် လျောကျသွားပါတယ်။   ရုရှား (၁၇၂) နဲ့ အီရန် (၁၇၇) တို့ဟာ သတင်းသမားတွေအတွက် အန္တရာယ်အရှိဆုံး နိုင်ငံ ၁၀ ခုစာရင်းမှာ ပါဝင်နေပါတယ်။   RSF ရဲ့ နောက်ဆုံးထုတ်ပြန်ချက်တွေနဲ့ လက်ရှိအခြေအနေအရ မြန်မာနိုင်ငံဟာ “အလွန်ဆိုးရွား” (Very Serious) တဲ့ အနီရောင်အဆင့် နယ်ပယ်ထဲမှာ ရှိနေဆဲဖြစ်ပါတယ်။ အညွန်းကိန်းအရ နိင်ငံပေါင်း ၁၇၉ နိုင်ငံမှာ နံပါတ် ၁၆၆ မှာ ရှိနေပါတယ်။   မြန်မာနိုင်ငံဟာ ကမ္ဘာ့သတင်းလွတ်လပ်ခွင့် အဆိုးဆုံးနိုင်ငံတွေထဲမှာ အမြဲတမ်း ပါဝင်နေပြီး ရုရှား၊ အီရန်၊ မြောက်ကိုရီးယားတို့နဲ့အတူ ဇယားရဲ့ အောက်ခြေနားမှာ ရှိနေပါတယ်။   ၂၀၂၁ ခုနှစ်နောက်ပိုင်း သတင်းသမားတွေကို ဖမ်းဆီးထောင်ချတာ၊ သတင်းဌာနလိုင်စင်တွေ ပိတ်သိမ်းတာနဲ့ သတင်းထောက်တွေ စစ်ပွဲအတွင်း သေဆုံးတာတွေကြောင့် မြန်မာနိုင်ငံဟာ သတင်းသမားတွေအတွက် ဒုတိယမြောက် အကျဉ်းထောင်သဖွယ် ဖြစ်နေတယ်လို့ RSF က အမြဲတမ်း ထောက်ပြလေ့ရှိပါတယ်။   #WorldPressFreedomIndex #နယ်စည်းမခြားသတင်းထောက်များအဖွဲ့RSF

ကမ္ဘာ့ သတင်း လွတ်လပ်ခွင့် ၂၅ နှစ်အတွင်း အနိမ့်ဆုံးကို ကျဆင်း

ကမ္ဘာ့ သတင်း လွတ်လပ်ခွင့် ၂၅ နှစ်အတွင်း အနိမ့်ဆုံးကို ကျဆင်း  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  နယ်စည်းမခြားသတင်းထောက်မ…

  • April 30, 2026
EU စက်မှု စည်းမျဉ်းသစ်အပေါ် တရုတ် လက်မခံနိုင်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၃၀ ရက်။   ဥရောပသမဂ္ဂ (EU) က ချမှတ်ရန် ပြင်ဆင်နေသည့် "Buy European" စက်မှုအက်ဥပဒေနှင့် ဆိုက်ဘာလုံခြုံရေး စည်းမျဉ်းအသစ်များသည် ခွဲခြားဆက်ဆံမှုရှိနေကြောင်း တရုတ်နိုင်ငံက စွပ်စွဲလိုက်ပြီး လိုအပ်ပါက လက်တုံ့ပြန်ဆောင်ရွက်သွားမည်ဟု သတိပေးလိုက်သည်။       EU အနေဖြင့် ဆိုက်ဘာလုံခြုံရေးအရ "အန္တရာယ်ရှိသော ပစ္စည်း ပေးသွင်းသူများ" ဟု သတ်မှတ်ကာ တရုတ်နည်းပညာကုမ္ပဏီ (ဥပမာ- Huawei) များကို ဖယ်ထုတ်ရန် ကြိုးပမ်းနေခြင်းကို တရုတ်ဘက်က ကန့်ကွက်နေခြင်းဖြစ်သည်။   ဥရောပထုတ်ကုန်များကို ဦးစားပေးဝယ်ယူမည့် "Industrial Accelerator Act" သည် ကမ္ဘာ့ကုန်သွယ်ရေးအဖွဲ့ (WTO) ၏ စည်းမျဉ်းများကို ချိုးဖောက်နေပြီး ဥရောပ၏ စံနှုန်းသစ်များသည် တရုတ်-ဥရောပ ကုန်သွယ်ရေးကို အဟန့်အတားဖြစ်စေကြောင်း တရုတ်စီးပွားရေးဝန်ကြီးဌာနက ထုတ်ပြန်ခဲ့သည်။   ဆိုက်ဘာလုံခြုံရေးဆိုင်ရာ ကန့်သတ်ချက်များနှင့် နည်းပညာလွှဲပြောင်းမှုဆိုင်ရာ စည်းကမ်းချက်များကို ပယ်ဖျက်ပေးရန် တရုတ်သံတမန်များက EU အဖွဲ့ဝင်နိုင်ငံများသို့ ဖိအားပေးစာများ ပေးပို့ထားသည်။   #BuyEuropean #စက်မှုအက်ဥပဒေ #ဆိုက်ဘာလုံခြုံရေးစည်းမျဉ်းအသစ် #EU #အီးယူ

EU စက်မှု စည်းမျဉ်းသစ်အပေါ် တရုတ် လက်မခံနိုင်

EU စက်မှု စည်းမျဉ်းသစ်အပေါ် တရုတ် လက်မခံနိုင်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  ဥရောပသမဂ္ဂ (EU) က ချမှတ်ရန် ပြင်ဆင်နေသ…

  • April 30, 2026
အိမ်ဖြူ ညစာစားပွဲ သေနတ်သမားအား သမ္မတအား လုပ်ကြံမှုဖြင့် တရားစွဲ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၃၀ ရက်။   အိမ်ဖြူတော်သတင်းထောက်များအသင်း ညစာစားပွဲ (WHCD) တွင် သမ္မတထရမ့်အား လုပ်ကြံရန် ကြိုးပမ်းခဲ့သည့် တရားခံ Cole Thomas Allen အား ဖမ်းဆီးထိန်းသိမ်းထားရန် ဖက်ဒရယ်အစိုးရရှေ့နေများက ဗုဒ္ဓဟူးနေ့တွင် တရားရုံး၌ လျှောက်ထားခဲ့သည်။   အသက် ၃၁ နှစ်အရွယ်ရှိ တရားခံသည် ကယ်လီဖိုးနီးယားမှ ဝါရှင်တန်သို့ ရထားဖြင့် လာရောက်ခဲ့သည်။   သူသည် သေနတ်၊ ဓားနှင့် ခဲယမ်းအမြောက်အမြားဖြင့် လုပ်ကြံရန် တစ်လနီးပါး ကြိုတင်စီစဉ်ခဲ့ကြောင်း အချက်အလက်များက ပြသနေသည်။   သူသည် တည်းခိုမည့် ဟိုတယ်ကို ဧပြီလဆန်းကတည်းက ငှားရမ်းထားခဲ့ခြင်း ဖြစ်သည်။       တရားခံသည် လုံခြုံရေးစစ်ဆေးရေးဂိတ်ကို ကျော်ဖြတ်ကာ သမ္မတရှိရာ ခန်းမလှေကားဘက်သို့ သေနတ်ဖြင့် တစ်ချက်ပစ်ခတ်ခဲ့သော်လည်း လုံခြုံရေးအဖွဲ့ (Secret Service) က အချိန်မီ ဟန့်တားဖမ်းဆီးနိုင်ခဲ့သည်။   အစိုးရရှေ့နေများက ယင်းလုပ်ရပ်ကို "ပြင်းထန်သော နိုင်ငံရေးအကြမ်းဖက်မှု" အဖြစ် သတ်မှတ်ခဲ့သည်။   တရားခံ၏ ရှေ့နေများကမူ ထောင်တွင်း၌ ဥပဒေကြောင်းအရ တွေ့ဆုံခွင့်များ ကန့်သတ်ခံထားရသည့်အပေါ် ကန့်ကွက်ထားသည်။   #ColeThomasAllen

အိမ်ဖြူ ညစာစားပွဲ သေနတ်သမားအား သမ္မတအား လုပ်ကြံမှုဖြင့် တရားစွဲ

အိမ်ဖြူ ညစာစားပွဲ သေနတ်သမားအား သမ္မတအား လုပ်ကြံမှုဖြင့် တရားစွဲ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  အိမ်ဖြူတော်သတင်းထောက…

  • April 30, 2026
ယာယီနေထိုင်ခွင့် TPS အကာအကွယ်ပေးရေးကိစ္စ အစိုးရဘက်က နိုင်ချေများလာ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၃၀ ရက်။   အမေရိကန်ပြည်ထောင်စုတွင် စစ်ဘေးနှင့် သဘာဝဘေးအန္တရာယ်များကြောင့် ယာယီနေထိုင်ခွင့် (TPS) ရရှိထားသည့် ဟေတီနှင့် ဆီးရီးယားအပါအဝင် နိုင်ငံခြားသား တစ်သန်းကျော်အား နေရပ်ပြန်ပို့မည့် သမ္မတထရမ့်၏ မူဝါဒအပေါ် အမေရိကန်တရားရုံးချုပ်တွင် ဗုဒ္ဓဟူးနေ့က ကြားနာစစ်ဆေးခဲ့သည်။   ထရမ့်အစိုးရ၏ ရှေ့နေချုပ် D. John Sauer က ဥပဒေကြောင်းအရ အစိုးရ၏ ဆုံးဖြတ်ချက်ကို တရားရုံးက ပြန်လည်သုံးသပ်ပိုင်ခွင့်မရှိကြောင်း တင်းခံလျှောက်လဲခဲ့သည်။   လစ်ဘရယ်တရားသူကြီးများဖြစ်သော Sotomayor၊ Kagan နှင့် Jackson တို့က အစိုးရ၏လုပ်ရပ်သည် လူမျိုးရေးခွဲခြားမှုကို အခြေခံခြင်း ရှိ၊ မရှိနှင့် အုပ်ချုပ်ရေးပိုင်း၏ လုပ်ပိုင်ခွင့်ကို တရားစီရင်ရေးက ထိန်းကျောင်းနိုင်စွမ်း မရှိတော့သည့်အခြေအနေအပေါ် ပြင်းထန်စွာ မေးခွန်းထုတ်ခဲ့ကြသည်။   တရားရုံးချုပ်၏ ကွန်ဆာဗေးတစ်အများစုက ထရမ့်အစိုးရ၏ မူဝါဒကို ခွင့်ပြုပေးမည့် အလားအလာရှိနေသည်။   တစ်နေ့တည်းမှာပင် "မဲပေးပိုင်ခွင့်အက်ဥပဒေ" (Voting Rights Act) ပါ အချက်အလက်အချို့ကိုလည်း ၆ မဲ - ၃ မဲဖြင့် ပယ်ဖျက်ခဲ့သဖြင့် သမ္မတထရမ့်အတွက် နိုင်ငံရေးအရ အသာစီးရသည့် အနေအထားသို့ ရောက်ရှိနေသည်။   #TPS #ယာယီနေထိုင်ခွင့်TPS

ယာယီနေထိုင်ခွင့် TPS အကာအကွယ်ပေးရေးကိစ္စ အစိုးရဘက်က နိုင်ချေများလာ 

ယာယီနေထိုင်ခွင့် TPS အကာအကွယ်ပေးရေးကိစ္စ အစိုးရဘက်က နိုင်ချေများလာ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  အမေရိကန်ပြည်ထောင်…

  • April 30, 2026
အသတ်ခံရတော့မည့် ကိုလံဘီယာ ရေမြင်းများကို အိန္ဒိယ သူဌေးသား ကယ်တင်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။   ကိုလံဘီယာ အစိုးရက သုတ်သင် သတ်ဖြတ်တော့မည့် ရေမြင်း အကောင်ရေ ၈၀ ကို အိန္ဒိယဘီလီယံနာသူဌေးကြီး Mukesh Ambani ၏ သားဖြစ်သူ Anant Ambani က ကယ်တင်ပြီး အိန္ဒိယကို ခေါ်ယူစောင့်ရှောက်ရန် ကမ်းလှမ်းလိုက်ကြောင်း  CNN သတင်းတွင် ဖော်ပြထားသည်။   ကိုလံဘီယာနိုင်ငံတွင် ဂေဟစနစ် ထိခိုက်မှုများကြောင့် သုတ်သင်ဖယ်ရှားခြင်း ခံရတော့မည့် ရေမြင်းအကောင် ၈၀ အား အိန္ဒိယနိုင်ငံရှိ ၎င်း၏ ပုဂ္ဂလိကပိုင် တောရိုင်းတိရစ္ဆာန် ဘေးမဲ့တောတွင် လက်ခံစောင့်ရှောက်ရန် အိန္ဒိယ ဘီလီယံနာ အမွေဆက်ခံသူ Anant Ambani က ကမ်းလှမ်းလိုက်ခြင်းဖြစ်သည်။   ယင်းရေမြင်းများသည် ၁၉၈၀ ပြည့်လွန်နှစ်များအတွင်း ကိုလံဘီယာ မူးယစ်ရာဇာ Pablo Escobar က ၎င်း၏ ကိုယ်ပိုင်တိရစ္ဆာန်ရုံအတွက် တရားမဝင် တင်သွင်းခဲ့သည့် တိရစ္ဆာန်များမှ ဆင်းသက်လာခြင်း ဖြစ်သည်။   မူလက ကောင်ရေအနည်းငယ်သာ ရှိခဲ့သော်လည်း လက်ရှိတွင် အကောင်ရေ ၁၆၀ ခန့်အထိ တိုးပွားလာပြီး ဒေသရင်း မျိုးစိတ်များနှင့် ဂေဟစနစ်ကို အကြီးအကျယ် ခြိမ်းခြောက်လျက်ရှိသည်။   ထို့ကြောင့် ကိုလံဘီယာ အစိုးရက ရေမြင်းများအား သုတ်သင်ရှင်းလင်းရန် စီစဉ်နေခြင်း ဖြစ်သည်။   Anant Ambani သည် အိန္ဒိယက နာမည်ကျော် သူဌေးကြီး Mukesh Ambani ၏ သားတစ်ဦးဖြစ်သည်။ Mukesh Ambani သည် အိန္ဒိယနိုင်ငံ၏ အကြီးဆုံး ပုဂ္ဂလိကကုမ္ပဏီကြီး ဖြစ်သော Reliance Industries Limited (RIL) ၏ ဥက္ကဋ္ဌနှင့် အုပ်ချုပ်မှုဒါရိုက်တာ ဖြစ်သည်။ သူသည် အာရှတွင် အချမ်းသာဆုံးစာရင်းဝင် ဖြစ်ရုံသာမကဘဲ ကမ္ဘာ့အချမ်းသာဆုံး ပုဂ္ဂိုလ် ၁၀ ဦးစာရင်းတွင်လည်း မကြာခဏ ပါဝင်လေ့ရှိသူ ဖြစ်သည်။ သူသည် ဘုံဘေမြို့ရှိ အထပ်ပေါင်း ၂၇ ထပ်ရှိပြီး အမြင့်ပေ ၅၇၀ ကျော်ရှိသည့် ကမ္ဘာ့ ဈေးအကြီးဆုံး အိမ်ကြီးကို ပိုင်ဆိုင်သူလည်း ဖြစ်သည်။ သူ၏ အိမ်ကြီးတွင် ရုပ်ရှင်ရုံ၊ ရေကူးကန်ဦ ရဟတ်ယာဉ်ကွင်း ၃ ခုနှင့် ကား အစီးရေ ၁၆၀ ဆန့်သော ဂိုဒေါင်များ ပါဝင်သည်။   Anant Ambani မှာ Mkesh ၏ သားထွေး ဖြစ်သည်။ အိန္ဒိယနိုင်ငံ၊ ဂူဂျာရတ်ပြည်နယ်ရှိ ၎င်းတည်ထောင်ထားသော Vantara တိရစ္ဆာန် ကယ်တင်ရေးစင်တာတွင် အဆိုပါ ရေမြင်းများကို လက်ခံလိုခြင်းဖြစ်သည်။   ယင်းစင်တာသည် မျိုးစိတ်ပေါင်း ၂,၀၀၀ ကျော်နှင့် တိရစ္ဆာန်ပေါင်း ၁ သိန်းခွဲကျော်ကို ပြုစုစောင့်ရှောက်ပေးနေသည့် နေရာဖြစ်သည်။   ရေမြင်းများအတွက် သဘာဝပတ်ဝန်းကျင်နှင့် ကိုက်ညီသော နေရာကို အထူးဖန်တီးပေးမည်ဖြစ်ပြီး တိရစ္ဆာန်များ၏ သက်တမ်းတစ်လျှောက်လုံးကို လူသားဆန်စွာ စောင့်ရှောက်သွားမည်ဟု Ambani က ကတိပြုထားသည်။     ကိုလံဘီယာ ပတ်ဝန်းကျင်ထိန်းသိမ်းရေးဝန်ကြီးဌာန၏ အဆိုအရ အဆိုပါ ရေမြင်းများကို မထိန်းချုပ်နိုင်ပါက ၂၀၃၀ ပြည့်နှစ်တွင် အကောင်ရေ ၅၀၀ ကျော်အထိ တိုးပွားလာမည်ဖြစ်ပြီး ဒေသရင်း ရေဝက် (Manatee) နှင့် လိပ်များ၏ ရှင်သန်မှုကို ထိခိုက်စေနိုင်သည်ဟု ဆိုသည်။   အစိုးရအနေဖြင့် ရေမြင်းများကို အခြားနိုင်ငံများသို့ ပြောင်းရွှေ့ရန် ကြိုးပမ်းခဲ့သော်လည်း နိုင်ငံတကာ ကန့်သတ်ချက်များနှင့် သယ်ယူပို့ဆောင်ရေး အခက်အခဲများကြောင့် မအောင်မြင်ခဲ့ဘဲ အကောင် ၈၀ ကို သုတ်သင်ရန် ဆုံးဖြတ်ခဲ့ခြင်း ဖြစ်ရာမှ ယခုအခါ ကယ်တင်ရှင် ပေါ်ပေါက်လာခဲ့ခြင်း ဖြစ်သည်။   #Manatee #MukeshAmbani #AnantAmbani #Vantara  #endangeredhippos #hippos

အသတ်ခံရတော့မည့် ကိုလံဘီယာ ရေမြင်းများကို အိန္ဒိယ သူဌေးသား ကယ်တင်မည်

အသတ်ခံရတော့မည့် ကိုလံဘီယာ ရေမြင်းများကို အိန္ဒိယ သူဌေးသား ကယ်တင်မည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  ကိုလံဘီယာ အစိုးရက…

  • April 30, 2026
ယူကရိန်း စစ်စတင်ပြီးနောက် ရုရှားတွင် လုပ်သား အင်အား ၂.၅ သန်း လျော့နည်းသွား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဧပြီလ ၃၀ ရက်။   ရုရှားနိုင်ငံမှာ သမိုင်းတလျောက် လူအရင်းအမြစ် အရှားပါးဆုံးအခြေအနေကို ရင်ဆိုင်နေရတယ်လို့ ရုရှား ဗဟိုဘဏ်ဥက္ကဌ က ပြောလိုက်ပါတယ်။   ဒီလို ရှားပါးမှုကြောင့် အဆိုးရွားဆုံး လုပ်သား အင်အား ပြတ်လပ်မှုကို ကြုံနေကြရပါတယ်။   ဒီလို ဖြစ်ရတာဟာ လေးနှစ်ကျော်ကြာ တိုက်နေရတဲ့ ယူကရိန်း စစ်ပွဲဟာ အဓိက အကြောင်းရင်း တစ်ခု ဖြစ်နေပါတယ်။   စစ်ပွဲမှာ လူပေါင်း ၁ သန်းကျော် သေဆုံးခဲ့ရပြီး လူငယ် အများအပြားဟာ စစ်ထဲမဝင်ချင်တဲ့အတွက် နိုင်ငံခြားကို ထွက်ခွာသွားနေကြပါတယ်၊။   တဘက်မှာလည်း ကလေးမွေးဖွားနှုန်းက ကျဆင်းနေပြန်တော့ လုပ်သား အင်အား ပြတ်လပ်မှုကို ကြုံနေရပြီး လူငယ်တွေကို စစ်တပ်နဲ့ စက်ရုံတွေက အပြိုင်အဆိုင် လုနေရတဲ့ အခြေအနေ ဖြစ်နေပါတယ်။     ယူကရိန်းကို ကျူးကျော်စစ်စတင်ကတည်းက ရုရှားရဲ့ အရန်လုပ်သားအင်အား (Labor Reserve) ဟာ လူဦးရေ ၂.၅ သန်း ခန့် လျော့နည်းသွားပါတယ်။ ဒါဟာ ခေတ်သစ်ရုရှားသမိုင်းမှာ တစ်ခါမှမကြုံဖူးတဲ့ အခြေအနေဖြစ်တယ်လို့ ဗဟိုဘဏ်ဥက္ကဋ္ဌ Elvira Nabiullina က ဆိုပါတယ်။   ကမ္ဘာကျော် တင့်ကားထုတ်လုပ်ရေးစက်ရုံ Uralvagonzavod နဲ့ ကားထုတ်လုပ်ရေးလုပ်ငန်း AvtoVAZ တို့ဟာ ဝန်ထမ်းရှားပါးမှုနဲ့ ကုန်ကြမ်းအခက်အခဲကြောင့် အလုပ်ချိန်လျှော့ချတာနဲ့ လူလျှော့တာတွေ လုပ်နေရပါတယ်။   လူရှားတဲ့အတွက် လုပ်ခလစာတွေ အဆမတန် တိုးပေးနေရပြီး ဒါဟာ ကုန်ဈေးနှုန်းကြီးမြင့်မှုကို ပိုမိုဆိုးရွားစေပါတယ်။   ရုရှားအစိုးရက စက်ရုပ်တွေနဲ့ AI နည်းပညာတွေ သုံးဖို့၊ အသေးစားလုပ်ငန်းတွေကို အားပေးဖို့ ကြိုးစားနေပါတယ်။ ဒါ့အပြင် စစ်ပွဲအတွင်း သေဆုံးသွားသူတွေရဲ့ မိသားစုဝင်တွေ (ဥပမာ- စစ်မုဆိုးမများ) ကို အလုပ်အကိုင်ရရှိဖို့ အခမဲ့ သင်တန်းတွေပေးပြီး လုပ်သားလိုအပ်ချက်ကို ဖြည့်ဆည်းဖို့ ကြိုးစားနေပါတယ်။   တစ်ဖက်မှာလည်း စစ်စရိတ်အတွက် အခွန်တွေကို တိုးမြှင့်လိုက်တာကြောင့် အသေးစားလုပ်ငန်း အမြောက်အမြား ပိတ်သိမ်းနေရပါတယ်။   ရုရှားရဲ့ စစ်ပွဲစီးပွားရေး (War Economy) ဟာ အခုဆိုရင် "လုပ်သားအင်အား အကန့်အသတ်" ကို ရောက်ရှိသွားပြီလို့ သုံးသပ်သူတွေက ဆိုပါတယ်။   ဒီအချက်က ရုရှားရဲ့ ရေရှည်စီးပွားရေး ဖွံ့ဖြိုးမှုကို ကြီးမားတဲ့ ခြိမ်းခြောက်မှုတစ်ခု ဖြစ်လာနေပါတယ်လို့လည်း သုံးသပ်ထားကြပါတယ်။   #ယူကရိန်းစစ်ပွဲ #ElviraNabiullina #WarEconomy

ယူကရိန်း စစ်စတင်ပြီးနောက် ရုရှားတွင် လုပ်သား အင်အား ၂.၅ သန်း လျော့နည်းသွား

ယူကရိန်း စစ်စတင်ပြီးနောက် ရုရှားတွင် လုပ်သား အင်အား ၂.၅ သန်း လျော့နည်းသွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  ရုရှားနိုင…

  • April 30, 2026
တရုတ်အကြွေးဖြင့် ဆောက်လုပ်ထားသော လေဆိပ်ကြီးကို သီရိလင်္ကာ အစိုးရ ပြန်ရောင်းမည်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဧပြီလ ၃၀ ရက်။   သီရိလင်္ကာနိုင်ငံရှိ အရှုံးပေါ်နေသော "Mattala Rajapaksa" အပြည်ပြည်ဆိုင်ရာလေဆိပ်ကို ဝယ်ယူလိုသူများအား အစိုးရက ထပ်မံဖိတ်ခေါ်လိုက်ပါတယ်။   သီရိလင်္ကာနိုင်ငံ တောင်ဘက်ကမ်းရိုးတန်းရှိ တောရိုင်းတိရစ္ဆာန်ဘေးမဲ့တော အနီးတွင် တည်ရှိပြီး ပုံမှန်လေကြောင်းလိုင်းများ ဆင်းသက်ခြင်းမရှိသည့် ဆင်ဖြူတော် လေဆိပ်ဟု ခိုင်းနှိုင်းခေါ်ဝေါ်ကြသည့် Mattala Rajapaksa အပြည်ပြည်ဆိုင်ရာလေဆိပ်တွင် ရင်းနှီးမြှုပ်နှံရန် အစိုးရက ဧပြီလ ၂၆ ရက် (တနင်္ဂနွေနေ့) တွင် တရားဝင် ဖိတ်ခေါ်လိုက်သည်။   ဆင်ဖြူတော် လေဆိပ် ဟု ခေါ်ဆိုရခြင်းမှာ ထိန်းသိမ်းစောင့်ရှောက်ရသည့် စရိတ် ကြီးမားလွန်းပြီး အကျိုးအမြတ် မရှိသည်ကို ဖော်ညွှန်းခြင်း ဖြစ်သည်။   ယခင်က အိန္ဒိယ-ရုရှား ဖက်စပ်ကုမ္ပဏီတစ်ခုနှင့် ချုပ်ဆိုရန် ပြင်ဆင်ခဲ့သည့် နှစ် ၃၀ ငှားရမ်းမှု သဘောတူညီချက် ပျက်ပြယ်သွားပြီးနောက် ယခုကဲ့သို့ ထပ်မံဖိတ်ခေါ်ခြင်းဖြစ်သည်။   ဤလေဆိပ်ကို တရုတ်နိုင်ငံထံမှ ချေးငွေရယူကာ သမ္မတဟောင်း Mahinda Rajapaksa လက်ထက်တွင် တည်ဆောက်ခဲ့ပြီး ၂၀၁၃ ခုနှစ်တွင် ဖွင့်လှစ်ခဲ့သည်။   သမ္မတဟောင်း Mahinda Rajapaksa လက်ထက်တွင် စီးပွားရေးအရ တွက်ခြေမကိုက်သည့် အခြေခံအဆောက်အအုံ စီမံကိန်းကြီးများကို တရုတ်နိုင်ငံမှ ချေးငွေများဖြင့် လုပ်ကိုင် ခဲ့ပြီး တရုတ်တွင် အကြွေးများ အဆမတန် တင်ရှိနေခဲ့သည်။     ယင်း စီမံကိန်းများတွင် ကမ္ဘာ့ အမြင့်ဆုံး Lotus မျှော်စင် Hambantota ဆိပ်ကမ်းနှင့် ယခု  Mattala လေဆိပ်တို့ ပါဝင်ခဲ့သည်။ 
Mattala လေဆိပ်မှာ လည်ပတ်မှုစတင်ကတည်းက လျှပ်စစ်မီးဖိုး ပေးဆောင်ရန်ပင် လုံလောက်သော ဝင်ငွေမရရှိဘဲ နိုင်ငံတော်ဘဏ္ဍာကို နှစ်စဉ် ထိခိုက်စေခဲ့သည်။   လေဆိပ်သည် ငှက်များ ရွှေ့ပြောင်းသွားလာရာ လမ်းကြောင်းပေါ်တွင် တည်ရှိသဖြင့် လေယာဉ်နှင့် ငှက်များ တိုက်မိသည့် ဖြစ်စဉ်များ မကြာခဏ ဖြစ်ပွားလေ့ရှိသည်။   ထို့ပြင် ပြေးလမ်းပေါ်သို့ ဆင်၊ တောကျွဲနှင့် သမင်များ ကျူးကျော်ဝင်ရောက်မှုကို တားဆီးရန် စစ်တပ်မှ အင်အားရာနှင့်ချီ အသုံးပြုကာ ရှင်းလင်းခဲ့ရသည့် သာဓကများလည်း ရှိခဲ့သည်။   သီရိလင်္ကာနိုင်ငံသည် တရုတ်နိုင်ငံထံမှ အခြေခံအဆောက်အအုံ စီမံကိန်းများအတွက် အလွန်အကျွံ ချေးယူခဲ့ခြင်းကြောင့် ၂၀၂၂ ခုနှစ်တွင် အမေရိကန်ဒေါ်လာ ၄၆ ဘီလီယံရှိသော ပြည်ပကြွေးမြီများကို ပြန်မဆပ်နိုင်ဘဲ ဒေဝါလီခံခဲ့ရသည်။   အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) ထံမှ အကူအညီရယူပြီးနောက် အစိုးရသည် ရှုံးပေါ်နေသော နိုင်ငံပိုင်လုပ်ငန်းများကို ပုဂ္ဂလိကပိုင်ပြုလုပ်ရန် ကြိုးပမ်းခဲ့သော်လည်း ယနေ့အထိ အောင်မြင်မှု မရရှိသေးပေ။   ၂၀၁၇ ခုနှစ်တွင် တရုတ်ချေးငွေ မဆပ်နိုင်သည့်အတွက် လေဆိပ်အနီးရှိ Hambantota ဆိပ်ကမ်းကို တရုတ်ကုမ္ပဏီတစ်ခုအား နှစ် ၉၉ အငှားစာချုပ် ဖြင့် လွှဲပြောင်းပေးခဲ့ရဖူးသည်။   လက်ရှိတွင် ကုန်တင်လေယာဉ်အချို့နှင့် စင်းလုံးငှားလေယာဉ်အနည်းငယ်သာ ဆင်းသက်သဖြင့် လေဆိပ်ထိန်းသိမ်းခပင် မလုံလောက်ပဲ ရှိနေသည်။   သို့သော်လည်း၊ အစိုးရကမူ ဤလေဆိပ်သည် "ခရီးသွားကဏ္ဍသစ်နှင့် မဟာဗျူဟာမြောက် ရင်းနှီးမြှုပ်နှံမှုများအတွက် အသုံးမချရသေးသော အလားအလာကောင်းများ" ရှိနေသည်ဟု ထုတ်ဖော်ပြောကြားကာ ရင်းနှီးမြှုပ်နှံသူများကို ဆွဲဆောင်ထားသည်။   #MattalaRajapaksa #သီရိလင်္ကာနိုင်ငံ #အပြည်ပြည်ဆိုင်ရာလေဆိပ်

တရုတ်အကြွေးဖြင့် ဆောက်လုပ်ထားသော လေဆိပ်ကြီးကို သီရိလင်္ကာ အစိုးရ ပြန်ရောင်းမည် 

တရုတ်အကြွေးဖြင့် ဆောက်လုပ်ထားသော လေဆိပ်ကြီးကို သီရိလင်္ကာ အစိုးရ ပြန်ရောင်းမည်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဧပြီလ ၃၀ ရက်။  သီရိလ…

  • April 30, 2026
×Close