သတင်း

ကချင်ပြည်တွင် တစ်နှစ်အတွင်း အရပ်သား ၁၃၀ ကျော် သေဆုံးဟု KHRW ပြော သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၉ ရက်။ ကချင်ပြည်တွင် တစ်နှစ်အတွင်း စစ်ကော်မရှင်တပ်ကြောင့် အရပ်သား ၁၃၀ ကျော် သေဆုံးခဲ့ပြီးနောက် စစ်အုပ်စု၏ တရားဝင်မှုကို ငြင်းပယ်ရန် နိုင်ငံတကာကို KHRW က တောင်းဆိုလိုက်သည်။ ပြီးခဲ့သည့် ၂၀၂၅ ခုနှစ်အတွင်း ကချင်ပြည်တွင် စစ်ကော်မရှင်တပ်၏ လေကြောင်းနှင့် လက်နက်ကြီး တိုက်ခိုက်မှု များကြောင့် အပြစ်မဲ့အရပ်သား ၁၃၀ ကျော် သေဆုံးခဲ့ရပြီးနောက် စစ်ကောင်စီ၏ တရားဝင်မှုကို ငြင်းပယ်ကာ နိုင်ငံတကာက ဖယ်ကြဉ်ထားရန် ကချင်လူ့အခွင့်အရေး စောင့်ကြည့်ရေးအဖွဲ့ (KHRW) က ပြင်းပြင်းထန်ထန် တောင်းဆိုလိုက်သည်။ KHRW က ဇန်နဝါရီလ ၇ ရက်နေ့တွင် ထုတ်ပြန်သည့် ၂၀၂၅ ခုနှစ် နှစ်စဉ်အစီရင်ခံစာအရ တစ်နှစ်တာအတွင်း စစ်ကောင်စီတပ်၏ တိုက်ခိုက်မှုများကြောင့် အရပ်သား ၁၃၃ ဦး သေဆုံးကာ ၁၁၇ ဦး ပြင်းထန်ဒဏ်ရာရရှိခဲ့ ကြောင်း ဖော်ပြထားသည်။ ထို့ပြင် အနည်းဆုံး ၅ ကြိမ်ထက်မနည်းမှာ လူအစုလိုက်အပြုံလိုက် သေဆုံးခဲ့ရသည့် လေကြောင်းဗုံးကြဲမှုများ ဖြစ်ပြီး ဗန်းမော်၊ တနိုင်းနှင့် ဖားကန့်မြို့နယ်ရှိ ဖြစ်စဉ်များသည် အဆိုးရွားဆုံးဖြစ်ခဲ့သည်။ စစ်ကော်မရှင်၏ ‘တရားဝင်မှု’ ဟူသော အချက်သည် အကြမ်းဖက်မှုများကို ဆက်လက်လုပ်ဆောင်နိုင်ရန် အသက်သွေးကြောသဖွယ် ဖြစ်နေကြောင်း KHRW ပြောရေးဆိုခွင့်ရှိသူ ဂျေကော့က ထောက်ပြထားသည်။ “တရားဝင်မှုဆိုတာ စစ်ကော်မရှင်ရဲ့ အသက်သွေးကြော ဖြစ်နေပါတယ်။ နိုင်ငံတကာနဲ့ အာဆီယံက သူတို့ကို အစိုးရတစ်ရပ် အနေနဲ့ ဆက်ဆံနေသရွေ့ကတော့ သူတို့ဟာ နိုင်ငံတကာဆီကနေ ငွေကြေးတွေ လက်နက်နဲ့ လေယာဉ်ဆီတွေကို တရားဝင် ဝယ်ယူခွင့် ရရှိနေအုံးမှာ ဖြစ်ပါတယ်။ ဒါတွေက ပြည်သူထုကို သတ်ဖြတ်နေတဲ့ လုပ်ရပ်တစ်ခု ဖြစ်ပါတယ်။ ဒါကြောင့်မို့လို့ သူတို့ရဲ့ တရားဝင်မှုကို ငြင်းပယ်လိုက်ခြင်းဟာ သူတို့ရဲ့ အကြမ်းဖက် ယန္တရားကို ဖြတ်တောက်လိုက်ခြင်းနဲ့ အတူတူဖြစ်ပါတယ်” ဟု ၎င်းက ဆိုသည်။ ထို့အပြင် စစ်ကော်မရှင်၏ အဓိကဝင်ငွေရလမ်းများ ဖြစ်သည့် ရေနံနှင့် သဘာဝဓာတ်ငွေ့၊ ဘဏ်စနစ်များကို ထိရောက်စွာ ပိတ်ဆို့ရန်နှင့် လေယာဉ်ဆီ တင်သွင်းမှုကို နိုင်ငံတကာက ညီညီညွတ်ညွှတ် တားမြစ်ပေးရန်လည်း တောင်းဆိုထားသည်။ လေကြောင်း တိုက်ခိုက်မှုများသည် အရပ်သားများကိုသာမက စစ်ဘေးရှောင်စခန်းများ၊ ဘုရားကျောင်းများနှင့် ဈေးတန်းများကိုပါ ပစ်မှတ်ထားနေကြောင်း ကချင်အမျိုးသမီးအစည်းအရုံး (ထိုင်းနိုင်ငံ) (KWAT) ကလည်း ဝေဖန်ထားသည်။ KWAT စည်းရုံးလှုံ့ဆော်ရေးအဖွဲ့ တာဝန်ခံ ဆန်ထွယ်က “မြန်မာစစ်တပ်အနေနဲ့ တိုင်းရင်းသားလက်နက်ကိုင် အဖွဲ့အစည်းတွေ ကိုပဲ Target (ပစ်မှတ်) ထားပြီး စစ်ပွဲလုပ်နေတာ မဟုတ်ဘဲနဲ့ ပြည်သူတွေရှိတဲ့ စစ်ဘေးရှောင် စခန်းတွေ၊ IDP တွေ ခိုလှုံနေတဲ့ ဘုရားကျောင်းတွေမှာ၊ ပြည်သူတွေ အများအပြားရှိတဲ့ ဈေးတန်းတို့၊ ဆု တောင်းစည်းဝေး လုပ်တဲ့ နေရာတွေမှာရော မရှောင်ဘဲနဲ့ ဗုံးကြဲ တိုက်ခိုက်တာတွေကို ကျွန်မတို့ တွေ့ရတယ်။ ဒါက စစ်ရာဇဝတ်မှု ကို ကျူးလွန်ချိုးဖောက်တဲ့ လုပ်ရပ်လည်း ဖြစ်သလို ပြည်သူတွေကို Target ထားပြီးမှ လုပ်နေတဲ့ လုပ်ရပ် ဖြစ်တယ်” ဟု ပြောသည်။ KHRW အနေဖြင့် နိုင်ငံတကာနှင့် အာဆီယံ အစည်းအဝေးများတွင် စစ်ကော်မရှင် ကိုယ်စားလှယ်များကို ဖိတ်ကြားခြင်း မပြုဘဲ နိုင်ငံရေးအရ ဖယ်ကြဉ်ရန် တိုက်တွန်းထားပြီး၊ ပြည်သူများကို ထောက်လှမ်း တိုက်ခိုက် ရာတွင် အသုံးပြုနိုင်သည့် (Dual-use technology) နည်းပညာများနှင့် ဆက်သွယ်ရေးပစ္စည်းများ ရောင်းချမှု ကိုလည်း ကန့်သတ်ပိတ်ပင်ပေးရန် တောင်းဆိုထားသည်။ လက်ရှိတွင် ကချင်ပြည်အတွင်း စစ်ရေးပဋိပက္ခများ ပိုမိုပြင်းထန်လာနေပြီး စစ်ကော်မရှင်၏ လေကြောင်းနှင့် ဒရုန်း တိုက်ခိုက်မှုများကြောင့် ပြည်သူများ၏ အသက်အိုးအိမ် စည်းစိမ်များ ကြီးမားစွာ ထိခိုက်ဆုံးရှုံးနေရဆဲ ဖြစ်သည်။ ဓာတ်ပုံ - The Kachin Net  

ကချင်ပြည်တွင် တစ်နှစ်အတွင်း အရပ်သား ၁၃၀ ကျော် သေဆုံးဟု KHRW ပြော

ကချင်ပြည်တွင် တစ်နှစ်အတွင်း အရပ်သား ၁၃၀ ကျော် သေဆုံးဟု KHRW ပြော သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၉ ရက်။  ကချင်ပြည်တွင် တစ်…

  • January 9, 2026
မထိနဲ့၊ မရွှေ့နဲ့၊ သတင်းပို့ - စစ်လက်ကျန်ပစ္စည်း အန္တရာယ်   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဇန်နဝါရီလ ၉ ရက်။   ဒီတပတ် အစီအစဉ်မှာတော့ ပေါက်ကွဲစေတတ်တဲ့ စစ်လက်ကျန်ပစ္စည်းတွေရဲ့ အန္တရာယ်က ဘယ်လို ရှိသလဲ။ အဲဒီ အန္တရာယ်ကို ဘယ်လို ရှောင်ရှားကြမလဲ ဆိုတာကို တင်ဆက်ထားပါတယ်။   ပထမဆုံး သတင်းစကားကတော့ “မထိနဲ့၊ မရွှေ့နဲ့၊ မထိနဲ့၊ တွေ့ရင် သတင်းပို့ပါ” ဆိုတဲ့ သတင်းစကားပါ။   ဒါက မပေါက်ကွဲသေးတဲ့ စစ်လက်ကျန်ပစ္စည်းတွေ အကြောင်း ပြောတဲ့အခါ မမေ့မလျော့ ရှိနေရမယ့် အချက်ဖြစ်ပါတယ်။ အသေးစိတ်ကိုတော့ ဆက်လက် ပြောပြသွားမှာပါ။   မြန်မာ့ ငြိမ်းချမ်းရေး စောင့်ကြည့်ရေး အဖွဲ့ (MPM) ရဲ့  ၂၀၂၅ ခုနှစ် မေလ ၁၃ ရက်နေ့ ထုတ်ပြန်တဲ့ သတင်းတပုဒ်မှာ ဝမ်းနည်းစရာ အဖြစ်အပျက်တစ်ခု ပါဝင်နေပါတယ်။   နိရဉ္စရာ သတင်းဌာနကို ကိုးကားထားတဲ့ သတင်းက ရခိုင်ပြည် မောင်တောက အဖြစ်အပျက်တစ်ခုကို ဖော်ပြထားတာပါ။   မောင်တောမြို့ကနေ လေးမိုင်အကွာ နယ်စပ်နားက မကျည်းကုန်း ရွာလေးမှာ ဖြစ်ပွားခဲ့တာပါ။ ရွာက ကလေးနှစ်ယောက်က လက်ပစ်ဗုံး တစ်လုံးကို ကောက်ရပါတယ်။   ဒါပေမယ့် သူတို့က လက်ပစ်ဗုံးမှန်း မသိပါဘူး။ တယောက်နဲ့ တယောက် ပစ်ကစားကြပါတယ်။ အဲဒီလို ပစ်ကစားနေရင်း စနစ်တန် ပြုတ်ထွက်သွားတာလို့ ဒေသခံ တယောက်က ပြောပြပါတယ်။   စနက်တန် ပြုတ်ထွက်သွားတဲ့ လက်ပစ်ဗုံး ပေါက်ကွဲမှုကြောင့် ကစားနေတဲ့ ကလေး တစ်ယောက်ကတော့ နေရာမှာပဲ သေဆုံးသွားခဲ့ပြီး နောက်တယောက်ကတော့ ဆေးရုံကို ပို့နေရင်း သေဆုံးသွားခဲ့ရပါတယ်။   အဲဒီ အနီးအနားမှာရှိနေတဲ့ အသက် ၇၅ နှစ်အရွယ် အမျိုးသား တစ်ယောက်ကတော့ ဒဏ်ရာရသွားခဲ့ပါတယ်။   ကုလသမဂ္ဂ အဖွဲ့အစည်း တစ်ခု ဖြစ်တဲ့ ယူနီဆက်ဖ် (UNICEF) ရဲ့ အစီရင်ခံစာ တစ်ခုမှာတော့ မြန်မာနိုင်ငံမှာ မြေမြုပ်မိုင်းနဲ့ ပေါက်ကွဲစေတတ်သော စစ်လက်ကျန်ပစ္စည်းတွေရဲ့ အန္တရာယ် ဘယ်လောက်အထိ ကြီးမားနေ သလဲ ဆိုတာ ဖော်ပြထားပါတယ်။   အဲဒီ အစီရင်ခံစာကတော့ ၂၀၂၅ ခုနှစ် ဇန္နဝါရီလ ကနေ ဇွန်လအထိ မြန်မာနိုင်ငံ ကြုံတွေ့နေရတဲ့ မြေမြှုပ်မိုင်းနဲ့ ပေါက်ကွဲစေတတ်သော စစ်လက်ကျန် ပစ္စည်းတွေရဲ့ အန္တရာယ်ကို ဖော်ပြထားတာပါ။   အစီရင်ခံစာ အရဆိုရင် ဒီနှစ်ရဲ့ ပထမ ခြောက်လပတ်အတွင်းမှာ နိုင်ငံတဝှမ်း ထိခိုက် သေဆုံးသူ ၃၅၇ ယောက် ရှိတယ်လို့ ဆိုပါတယ်။   အဲဒီထဲမှာတော့ ရှမ်းပြည်မှာ ၂၉ % နဲ့ အများဆုံး၊ ဒုတိယက‌တော့ ရခိုင်ပြည် ဖြစ်တယ်လို့ ဆိုပါတယ်။   မြေမြုပ်မိုင်းအန္တရာယ်တွေ့ကြုံမှုတွေ များပြားလှသလို သူနဲ့ အမြဲတွဲဖက် ဖော်ပြတဲ့ ပေါက်ကွဲ စေတတ်တဲ့ စစ်လက်ကျန် ပစ္စည်း ပေါက်ကွဲမှု ကလည်း မနည်းလှပါဘူး။   လက်ရှိနိုင်ငံရေး အခြေအနေတွေအရ ရှမ်းပြည်မြောက်ပိုင်း က လားရှိုး၊ နောင်ချို၊ မိုးမိတ် နဲ့ မန္တလေးတိုင်းက မိုးကုတ်မြို့တွေမှာ လက်နက်ကိုင်တပ်ဖွဲ့တွေ အဝင်အထွက် အပြောင်းအလဲတွေ အများအပြား ရှိနေပါတယ်။   ၂၀၂၃ နဲ့ ၂၀၂၄ ခုနှစ်တွေ အတွင်းမှာ ၁၀၂၇ စစ်ဆင်ရေး အပိုင်း ၁ နဲ့ အပိုင်း ၂ အတွင်း ဒီဒေသတွေမှာ တိုက်ပွဲတွေ အပြင်းအထန် ဖြစ်ပွားခဲ့ပါတယ်။   ဒေသတွင်းမှာ အရင်က မြို့ကိုထိန်းသိမ်းထားတဲ့ အဖွဲ့တွေ ဆုတ်ခွာသွားပြီးနောက် တော်လှန်ရေးအင်အားစု တွေက မြို့နယ်အသီးသီးကို ဝင်ရောက်ထိန်းချုပ်ခဲ့ကြပါတယ်။   လားရှိုးမြို့အပါအဝင် နောင်ချို၊ မိုးမိတ်နဲ့ မိုးကုတ်မြို့တွေကို သက်ဆိုင်ရာ အင်အားစုအသီးသီးက နေရာ ယူထားခဲ့တာပါ။   ဒါပေမဲ့ ဒီနှစ်အတွင်းမှာတော့ အိမ်နီးချင်းနိုင်ငံရဲ့ ကြားဝင်စေ့စပ်မှုကြောင့် အဲ့ဒီဒေသတွေကနေ တော်လှန်ရေး တပ်ဖွဲ့တွေ ပြန်လည်ထွက်ခွာပေးခဲ့ရပြီး လက်ရှိအုပ်ချုပ်ရေး ယန္တရားကပဲ နယ်မြေတွေကို ပြန်လည်စိုးမိုးလာခဲ့ ပါတယ်။   ဒီလို တပ်ဖွဲ့တွေ မထွက်ခွာခင်နဲ့ ထွက်ခွာပြီးနောက်မှာလည်း ဒီမြို့တွေ ပတ်ဝန်းကျင်မှာ တိုက်ပွဲတွေ ရှိနေခဲ့ပါ တယ်။   ဒီလို တိုက်ပွဲတွေနဲ့ တပ်အဝင်အထွက်တွေ ရှိခဲ့တာကြောင့် ဒီဒေသတွေဟာ မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်ကျန် ပစ္စည်းတွေ အန္တရာယ် ကြီးမားလျက်ရှိနေပါတယ်။   မြေမြုပ်မိုင်းတွေနဲ့ ပတ်သက်လို့ အရင် အပတ်တွေမှာ အတော်များများ ပြောပြပြီး ဖြစ်တာမို့ ဒီတပါတ်မှာတော့ မပေါက်ကွဲသေးတဲ့ စစ်လက်ကျန် ပစ္စည်းတွေ အကြောင်း အဓိကထားပြီး ပြောပြချင်ပါတယ်။   မပေါက်ကွဲသေးတဲ့ စစ်လက်ကျန်ပစ္စည်းဆိုတာကတော့ စစ်ပွဲ အတွင်း ပစ်ခတ်ခဲ့ပေမယ့် မပေါက်ကွဲသေးပဲ ကျန်နေတဲ့ ဗုံးတွေ၊ မိုင်းတွေ၊ လက်ပစ်ဗုံးတွေ၊ အမြောက်ဆံတွေနဲ့ တခြား ပေါက်ကွဲနိုင်တဲ့ ပစ္စည်းတွေ ဖြစ်ပါတယ်။   အဲဒီ ပစ္စည်းတွေကိုတော့ စစ်ပွဲ ဖြစ်ခဲ့ဖူးတဲ့ နေရာတွေ၊ စိုက်ခင်းတွေဦ၊ တောတွေ၊ ရေကန်တွေ၊ လမ်းဘေး နေရာတွေနဲ့ စစ်တပ်တွေရဲ့ စစ်လေ့ကျင့်ရေး နေရာဟောင်းတွေမှာ တွေ့ရတတ်ပါတယ်။   ဒီပစ္စည်းတွေဟာ အထဲမှာပါတဲ့ ယမ်းတွေနဲ့ မိုင်းစတွေ ကျန်ရှိနေတာကြောင့် ကာလကြာရှည်ပေမယ့်လည်း မတော်တဆ ထိမိရုံနဲ့ ပေါက်ကွဲနိုင်စွမ်း ရှိနေသေးတာလည်း ဖြစ်ပါတယ်။   မတ်လ ၇ ရက် နေ့လည်ပိုင်းက ရှမ်းပြည်မြောက်ပိုင်း ကျောက်မဲမြို့မှာတော့ ခေါက်ဆွဲဆိုင် တစ်ဆိုင်မှာ လူတယောက်ရဲ့ အိတ်ထဲမှာပါလာတဲ့ လက်ပစ်ဗုံးကို ဆွဲမိရာက ပေါက်ကွဲ ခဲ့ပြီး လူ ၂ ယောက်သေဆုံးပြီး လူ ၃ ယောက် ဒဏ်ရာ ရခဲ့ပါတယ်။   လက်ပစ်ဗုံးပါလာတဲ့ ဦးအားရှင်းနဲ့ ဦးကျော်ဌေး ဆိုသူ နှစ်ယောက် သေဆုံးခဲ့ပါတယ်။   အလားတူပဲ ဖေဖော်ဝါရီလ ၂၁ ရက်နေ့တုန်းကလည်း သီပေါမြို့ ကုံးစုံ ကျေးရွာက နေအိမ် တစ်ခု အတွင်းမှာ ပေါက်ကွဲမှု ဖြစ်ပြီး ဒေသခံ ၂ ယောက် သေဆုံးခဲ့ပါတယ်။   ဖေဖော်ဝါရီလ ၂၅ ရက်နေ့မှာတော့ သီပေါမြို့က တုံစင့်ရပ်ကွက် နယ်မြေ ၂ မှာ လက်နက်ကိုင် တပ်ဖွဲ့တွေရဲ့ လက်ပစ်ဗုံးကို ဆော့ကစားရာကနေ ပေါက်ကွဲပြီး အမျိုးသား ၂ ဦး သေဆုံးခဲ့ပါသေးတယ်။   ဒါကြောင့် စစ်လက်ကျန် ပစ္စည်းတွေ တွေ့ခဲ့မယ်ဆိုရင် ပေါက်ကွဲ နိုင်သည် ဖြစ်စေ မပေါက်ကွဲ နိုင်သည်ဖြစ်စေ တွေ့တာနဲ့ ချက်ချင်း ရပ်တန့်ပါ၊ ရောက်ရှိနေတဲ့ နေရာကနေ ကြည့်ရှုပါ။   လုံးဝ မထိပါနဲ့၊ မရွှေ့ပါနဲ့ တူးဖော်ခြင်း သို့မဟုတ် ရှိနေတဲ့ ပုံသဏ္ဍာန်ကို မပြောင်းလဲပါနဲ့။   သက်ဆိုင်ရာ လက်နက်ကိုင် တပ်ဖွဲ့က ပေါက်ကွဲပစ္စည်း ရှင်းလင်းရေး အဖွဲ့ ဒါမှ မဟုတ် သက်ဆိုင်ရာ အုပ်ချုပ်ရေး ဌာန ကို ချက်ချင်း အကြောင်းကြားရမှာ ဖြစ်ပါတယ်။   တွေ့ရှိတဲ့နေရာကို ကျောက်တုံး၊ သစ်ကိုင်း စတဲ့ လူအများမြင်နိုင်မယ့် အရာတစ်ခုခုနဲ့ အမှတ်အသား လုပ်ခဲ့ရမှာ ဖြစ်ပါတယ်။   ဒါမှလည်း ကိုယ်ကိုယ်တိုင် ပြန်လာ ပြတဲ့အခါ ဒါမှမဟုတ် သက်ဆိုင်တဲ့ ပုဂ္ဂိုလ်တွေ ပြောပြီး လာရှာတဲ့အခါ အလွယ်တကူ တွေ့နိုင်မှာ ဖြစ်ပါတယ်။   တခြားလူတွေ၊ အထူးသဖြင့် ကလေးငယ်တွေ အဲဒီနေရာကို မသွားအောင် သတိပေးပါ၊ အနီးအနားက လူတွေကိုလည်း အကူအညီတောင်းထားဖို့ လိုပါလိမ့်မယ်။   ပေါက်ကွဲ တတ်တဲ့ စစ်ကျန်ပစ္စည်းတွေဟာ အထူး သဖြင့် ကလေးတွေကို အန္တရာယ် ဖြစ်စေတတ်ပါတယ်။   ဒါကြောင့် ကလေးတွေကို လက်ပစ်ဗုံးတွေ၊ မိုင်းတွေ၊ ကျည်ခွံတွေ၊ မော်တာကျည်တွေ အကြောင်း၊ ဘယ်လို ပုံသဏ္ဍာန် ရှိတတ်တယ်ဆိုတာ သင်ပြထားပေးဖို့ လိုပါတယ်။   အဲဒါမျိုးတွေ တွေ့ရင် မထိဖို့၊ မရွှေ့ဖို့၊ မဆော့ဖို့ နဲ့ တွေ့တာနဲ့ လူကြီးတွေကို အကြောင်းကြားဖို့ သင်ပေးထားဖို့ လိုအပ်ပါတယ်။   ဒါကြောင့် စစ်လက်ကျန် ပစ္စည်းတွေ တွေ့ရင်   မထိပါနဲ့၊ မရွှေ့ပါနဲ့၊ မထိပါနဲ့၊ တွေ့ရင် သတင်းပို့ပါ။   ကလေးတွေကိုလည်း မထိဖို့၊ မဆော့ဖို့ သင်ထားပေးပါ။   ကျေးဇူးတင်ပါတယ်။

မထိနဲ့၊ မရွှေ့နဲ့၊ သတင်းပို့ – စစ်လက်ကျန်ပစ္စည်း အန္တရာယ် 

မထိနဲ့၊ မရွှေ့နဲ့၊ သတင်းပို့ - စစ်လက်ကျန်ပစ္စည်း အန္တရာယ် သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဇန်နဝါရီလ ၉ ရက်။ ဒီတပတ် အစီအစဉ်မှာတော့ ပေါက်ကွဲစ…

  • January 9, 2026
မန္တလေးတိုင်းအတွင်း နေအိမ် အလုံး ၁၀၀ နီးပါး မီးရှို့ဖျက်ဆီးခံရပြီး ရွာသားတစ်ဦး အသတ်ခံရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၈ ရက်။ ညောင်ဦးတွင် စစ်ကော်မရှင် စစ်ကြောင်းက နေအိမ် အလုံးရေ ၁၀၀ နီးပါး ကို မီးရှို့ဖျက်ဆီးခဲ့သည့်အပြင် ရွာသားတစ်ဦးကိုလည်း သတ်ဖြတ်ခဲ့သည်ဟု ဒေသခံများက ပြောသည်။ မန္တလေးတိုင်း၊ ညောင်ဦးမြို့နယ်ရှိ ကျေးရွာများကို စစ်ကော်မရှင်တပ်က လက်နက်ကြီးများ ပစ်ကူကာ ၄ ရက် ဆက်တိုက် စစ်ကြောင်းထိုး စီးနင်းခဲ့ပြီးနောက်၊ ကျေးရွာ ၆ ရွာမှ နေအိမ် အလုံးရေ ၁၀၀ နီးပါးကို မီးရှို့ဖျက်ဆီး ခဲ့သည့်အပြင် အရပ်သားတစ်ဦးကိုလည်းနှိပ်စက်သတ်ဖြတ်ခဲ့သည်။ အင်အား ၂၀၀ ကျော်ပါဝင်သည့် စစ်ကော်မရှင် စစ်ကြောင်းသည် ဇန်နဝါရီလ ၄ ရက်နေ့မှ စတင်ကာ ညောင်ဦး-ကျောက်ပန်းတောင်း ကားလမ်း အနောက်ဘက်ခြမ်းသို့ လက်နက်ကြီးများ ပစ်ခတ်ကာ စစ်ကြောင်းထိုး ဝင်ရောက်လာခဲ့ခြင်း ဖြစ်သည်။ အဆိုပါစစ်ကြောင်းသည် ဇီးစမြင်၊ ကျောက်ပြင်ကန်၊ ဇက၊ ကြအို၊ ကြအိုကျွန်းနှင့် မီးလောင်ဖျားကျေးရွာများကို တစ်ရွာဝင်တစ်ရွာထွက် စီးနင်းကာ နေအိမ်များအတွင်းရှိ တန်ဖိုးကြီးပစ္စည်းများကို ယူဆောင်ခြင်းနှင့် အိမ်မွေး တိရစ္ဆာန်များကို သတ်ဖြတ်စားသောက်ခြင်းများ ပြုလုပ်ခဲ့ကြသည်ဟု ဒေသခံများက ပြောသည်။ ဇီးစမြင်ရွာသားတစ်ဦးက ၎င်းတို့ကြုံတွေ့ခဲ့ရသည့် အခြေအနေကို ယခုကဲ့သို့ ပြောပြသည်။ “အဝေးကနေပြီး ရွာထဲကို လက်နက်ကြီးနဲ့ လှမ်းထုတာ၊ နောက်မှဝင်လာပြီး ဗြောင်းဆန်အောင် မွှေနှောက်ပြီး စိတ်ကြိုက်ဖြစ်တော့မှ အိမ်တွေကို မီးရှို့သွားတာ။ ကြက်၊ ဝက်၊ ဆိတ် ဆိုတာကတော့ သတ်ပြီး ချက်စားသွား ကြတာပေါ့။” ဇန်နဝါရီလ ၅ ရက်နေ့တွင်မူ ကျောက်ပြင်ကန်ရွာအတွင်းသို့ လက်နက်ကြီးကျည် ကျရောက်ပေါက်ကွဲသဖြင့် ရွာသား ၂ ဦး ဒဏ်ရာရရှိခဲ့ပြီး၊ ထိုအထဲမှ ပေါင်တွင် ဒဏ်ရာရရှိထားသဖြင့် မပြေးနိုင်သည့် အမျိုးသားတစ်ဦးကို စစ်ကော်မရှင်တပ်က ဖမ်းဆီးကာ ဓားဖြင့် မွှန်းနှိပ်စက်၍ သတ်ဖြတ်ခဲ့သည်။ ကျောက်ပြင်ကန်ရွာသားတစ်ဦးက “ပေါင်ထိတဲ့သူက မပြေးနိုင်ဘဲ အဖမ်းခံရပြီး အသတ်ခံလိုက်တာ။ ဓားနဲ့ မွှန်းသွားတဲ့ ဒဏ်ရာတွေ မြင်မကောင်းဘူး။ ရွာထဲက အိမ်တွေနဲ့ ကား၊ ဆိုင်ကယ်တွေကိုလည်း မီးရှို့သွားတယ်” ဟု ဆိုသည်။ ထို့ပြင် ကြအိုကျွန်းကျေးရွာရှိ နေအိမ်များကို မီးရှို့ဖျက်ဆီးရုံသာမက ကျေးရွာသား ၃၀ ကျော်ကိုလည်း စစ်ကြောင်းနှင့်အတူ ဖမ်းဆီးခေါ်ဆောင်သွားခဲ့ပြီး၊ ဖမ်းဆီးခံရသူများကို ပြန်လည်လွတ်မြောက်ရန် ငွေကြေးဖြင့် လာရောက်ရွေးခိုင်းနေကြောင်း ကြအိုကျွန်းရွာမှ အမျိုးသမီးတစ်ဦးက ပြောပြသည်။ ညောင်ဦးမြို့နယ်အတွင်းရှိ ကျေးရွာများသည် ပြီးခဲ့သည့် ၂၀၂၅ ခုနှစ် မေလအတွင်းကလည်း ယခုကဲ့သို့ စစ်ကော်မရှင်၏ စစ်ကြောင်းထိုးမှုများကြောင့် ဒေသခံသောင်းနှင့်ချီ၍ ဘေးလွတ်ရာသို့ ထွက်ပြေးတိမ်းရှောင်ခဲ့ရ သည့် ဖြစ်စဉ်များ ရှိခဲ့သည်။ လက်ရှိတွင် အဆိုပါ စစ်ကော်မရှင် စစ်ကြောင်းသည် မီးလောင်ဖျားကျေးရွာဘက်သို့ လက်နက်ကြီးများ ပစ်ခတ် ကာ ဆက်လက်စစ်ကြောင်းထိုးနေသဖြင့် အနီးနားရှိ ကျေးရွာပေါင်းများစွာမှ ပြည်သူများမှာ စိုးရိမ်ထိတ်လန့်ကာ တောတောင်များအတွင်းသို့ ထပ်မံတိမ်းရှောင်နေကြရသည်။

ဓါတ်ပုံ - ပုံဟောင်း  

မန္တလေးတိုင်းအတွင်း နေအိမ် အလုံး ၁၀၀ နီးပါး မီးရှို့ဖျက်ဆီးခံရပြီး ရွာသားတစ်ဦး အသတ်ခံရ

မန္တလေးတိုင်းအတွင်း နေအိမ် အလုံး ၁၀၀ နီးပါး မီးရှို့ဖျက်ဆီးခံရပြီး ရွာသားတစ်ဦး အသတ်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၈ ရက်။&nbsp…

  • January 8, 2026
စစ်ကော်မရှင် လက်နက်ကြီးကြောင့် ကလေး တစ်ဦးအပါအဝင် ရွာသား ၃ ဦး ဒဏ်ရာရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၈ ရက်။ တနင်္သာရီမြို့နယ်အတွင်း စစ်ကော်မရှင်တပ်က လက်နက်ကြီးဖြင့် ရမ်းသန်းပစ်ခတ်မှုကြောင့် အသက် ၁၂ နှစ်အရွယ် ကလေး အပါအဝင် ရွာသားသုံးဦး ဒဏ်ရာရခဲ့သည်ဟု ဒေသခံများက ပြောသည်။ တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်အတွင်းရှိ ကျေးရွာများသို့ စစ်ကော်မရှင်တပ်က လက်နက်ကြီးများ ဖြင့် ရည်ရွယ်ချက်ရှိရှိ ရမ်းသန်းပစ်ခတ်ခဲ့သဖြင့် ၁၂ နှစ်အရွယ် ကလေးတစ်ဦးအပါအဝင် ကျေးရွာသားသုံးဦး ထိခိုက်ဒဏ်ရာရရှိခဲ့ခြင်း ဖြစ်သည်။ ဖြစ်စဉ်နှင့်ပတ်သက်၍ မုတ်ဆိတ်ကွင်းရွာသားတစ်ဦးက “ကလေးတစ်ယောက်က ခြေမှာဒဏ်ရာရတယ်၊ လူကြီးတစ်ယောက်မှာက ဒဏ်ရာရများတယ်၊ နောက်ထပ် လူကြီးတစ်ယောက်မှာကတော့ ဒဏ်ရာနည်းတယ်” ဟု ပြောသည်။ ဇန်နဝါရီလ ၆ ရက်နေ့ ညနေပိုင်းတွင် တနင်္သာရီအခြေစိုက် စစ်ကော်မရှင်၏ အမှတ် (၅၆၁) ခြေမြန်တပ်ရင်းကို ပြည်သူ့ကာကွယ်ရေးတပ်ဖွဲ့များက ဝင်ရောက်တိုက်ခိုက်ခဲ့ပြီးနောက်၊ စစ်ကော်မရှင်တပ်က ကျေးရွာများအတွင်း သို့ လက်နက်ကြီးများဖြင့် တန်ပြန်ပစ်ခတ်ခဲ့ခြင်း ဖြစ်သည်။ အဆိုပါ ပစ်ခတ်မှုကြောင့် မုတ်ဆိတ်ကွင်းကျေးရွာအတွင်း လက်နက်ကြီးကျည် ကျရောက်ပေါက်ကွဲခဲ့ပြီး အသက် ၁၂ နှစ်အရွယ် ကလေးငယ်တစ်ဦး၏ ခြေထောက်တွင် ဒဏ်ရာရရှိခဲ့သလို၊ ကျန်အမျိုးသားနှစ်ဦးမှာ လည်း ခြေနှင့်လက်တို့တွင် ထိခိုက်ဒဏ်ရာများ ရရှိခဲ့သည်။ ၎င်းလက်နက်ကြီးကျည်များသည် မုတ်ဆိတ်ကွင်းရွာအပြင် အနီးနားရှိ အခြားကျေးရွာနှစ်ရွာအတွင်းသို့လည်း ကျရောက်ပေါက်ကွဲခဲ့သဖြင့် ဒေသခံများမှာ ဘေးလွတ်ရာသို့ တိမ်းရှောင်နေကြရသည်။ တနင်္သာရီမြို့နယ်အတွင်းရှိ စစ်ကော်မရှင်တပ်များသည် တိုက်ပွဲဖြစ်ပွားသည့် အခါတိုင်း အရပ်သားများနေထိုင် ရာ ကျေးရွာများကို ပစ်မှတ်ထားကာ လက်နက်ကြီးများဖြင့် တုံ့ပြန်လေ့ရှိကြောင်း ဒေသခံများက ဆိုသည်။ ပြီးခဲ့သည့် ၂၀၂၅ ခုနှစ်၊ ဩဂုတ်လအတွင်းကလည်း မုတ်ဆိတ်ကွင်းရွာအပါအဝင် ကျေးရွာလေးရွာကို တိုက်ပွဲ ဖြစ်ပွားခြင်းမရှိဘဲ စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့သည့် သာဓကများ ရှိခဲ့သည်။ လက်ရှိတွင် တနင်္သာရီမြို့နယ်အတွင်း စစ်ရေးတင်းမာမှုများ ဆက်ရှိနေပြီး စစ်ကော်မရှင်တပ်၏ လက်နက်ကြီး အန္တရာယ်ကြောင့် ဒေသခံရွာသားများမှာ လုပ်ငန်းခွင်သို့ မသွားရဲဘဲ စိုးရိမ်ထိတ်လန့်နေကြရသည်။ နိုင်ငံတကာလူ့အခွင့်အရေး စံနှုန်းများအရ အရပ်သားများကို ပစ်မှတ်ထားတိုက်ခိုက်ခြင်းမှာ စစ်ရာဇဝတ်မှု မြောက်သော်လည်း စစ်ကော်မရှင်တပ်ကမူ ယခုကဲ့သို့ ကျေးရွာများအတွင်းသို့ ရည်ရွယ်ချက်ရှိရှိ ပစ်ခတ်မှုများ ကို ဆက်တိုက်ကျူးလွန်လျက်ရှိသည်ဟု ဒေသတွင်း ကူညီကယ်ဆယ်ရေး လုပ်ဆောင်နေသူများက ပြောသည်။

စစ်ကော်မရှင် လက်နက်ကြီးကြောင့် ကလေး တစ်ဦးအပါအဝင် ရွာသား ၃ ဦး ဒဏ်ရာရ

စစ်ကော်မရှင် လက်နက်ကြီးကြောင့် ကလေး တစ်ဦးအပါအဝင် ရွာသား ၃ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၈ ရက်။  တနင်္သာရီမြို့…

  • January 8, 2026
နိုင်ကျဉ်း ၃၀ ကျော် ရိုက်နှက် တိုက်ပိတ် ခံနေရ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၈ ရက်။ မကွေးထောင်တွင် နိုင်ငံရေးအကျဉ်းသား အယောက် ၃၀ ကျော်ကို ရိုက်နှက်နှိပ်စက်ပြီး တိုက်ပိတ်ထားသည်ဟု အကျဉ်းဦးစီးနှင့် နီးစပ်သူများက ပြောသည်။ မကွေးအကျဉ်းထောင် အတွင်းရှိ နိုင်ငံရေး အကျဉ်းသား ၃၅ ဦးကို ထောင်အာဏာပိုင်များက ဝါယာကြိုးများ၊ နံပါတ်တုတ်များဖြင့် အကြမ်းဖက်ရိုက်နှက်နှိပ်စက်ပြီးနောက် တစ်လနီးပါးကြာသည်အထိ တိုက်ပိတ်ပြစ်ဒဏ် ပေးထားသည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်သည်။ အဆိုပါဖြစ်စဉ်နှင့် ပတ်သက်၍ အကျဉ်းသားမိသားစုဝင်နှင့် နီးစပ်သူတစ်ဦးက “ထောင်ထဲမှာက အခုထိ တိုက် ပိတ်ထားတုန်းပဲလို့ သိရတယ်။ အရိုက်ခံရတဲ့သူတွေထဲမှာ ဒဏ်ရာပြင်းပြင်းထန်ထန် ရထားတဲ့သူတွေလည်း ပါတော့ ကျန်းမာရေးအတွက် အရမ်းစိုးရိမ်ရပါတယ်။ ထောင်ဝင်စာတွေ့ဖို့လည်း ကန့်သတ်ထားတာတွေ ရှိနေတော့ သူတို့ ဘယ်လိုအခြေအနေရှိနေလဲဆိုတာ အတိအကျမသိရဘဲ ရင်တမမ ဖြစ်နေရတယ်” ဟု ပြောသည်။ ဖြစ်စဉ်မှာ ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၈ ရက်နေ့က စတင်ခဲ့ခြင်းဖြစ်ပြီး အကျဉ်းထောင်တစ်ခုလုံးရှိ စားပြီးသားပန်းကန်များကို ဆေးကြောရန် ထောင်အာဏာပိုင်များက ခိုင်းစေခဲ့ရာမှ စတင်ခဲ့သည်။ ထိုသို့ခိုင်းစေမှုကို မဆောင်ရွက်နိုင်ကြောင်း ပြောဆိုသည့် နိုင်ငံရေးအကျဉ်းသားများကို မျက်နှာအဝတ်စည်းကာ ခေါင်းကွဲဒဏ်ရာများ ရရှိသည်အထိ အုပ်စုဖွဲ့ရိုက်နှက်ခဲ့ခြင်း ဖြစ်သည်။ ဤအကြမ်းဖက်မှုတွင် ထောင်ဝန်ထမ်းများ ပါဝင်ကျူးလွန်ခဲ့သည့်အပြင် တန်းစီးများနှင့် အခန်းလူကြီးများကိုပါ လုပ်ပိုင်ခွင့်ပေးကာ ရိုက်နှက်ခိုင်းခဲ့ကြောင်း (PPNM) က ဇန်နဝါရီလ ၅ ရက်နေ့က ထုတ်ပြန်ထားသည်။ ထို့ပြင် ထောင်တွင်းဈေးဆိုင်များ၌ ကုန်ဈေးနှုန်း မတန်တဆကြီးမြင့်နေမှုကို တွန်းလှန်ရန်အတွက် ‘ကွမ်းဖြတ် တောက်ရေး လှုပ်ရှားမှု’ ပြုလုပ်ခဲ့သည့် နိုင်ငံရေးအကျဉ်းသား ၁၁ ဦးကိုလည်း ထောင်ဝန်ထမ်းများက ထပ်မံ ရိုက်နှက်ကာ ခြေကျင်းခတ်၍ တိုက်ပိတ်ထားကြောင်း မြန်မာနိုင်ငံလုံးဆိုင်ရာ (PPNM) က ဆိုသည်။ PPNM ၏ တာဝန်ရှိသူတစ်ဦးက "ဒါဟာ အကျဉ်းသားအခွင့်အရေးနဲ့ နိုင်ငံတကာ စံချိန်စံညွှန်းတွေကို ပြောင် ပြောင် တင်းတင်း ချိုးဖောက်တာပါ။ ထောင်ဝန်ထမ်းတွေ ကိုယ်တိုင် အကြမ်းဖက်မှုမှာ ပါဝင်နေသလို၊ တန်းစီး တွေကို လုပ်ပိုင်ခွင့်ပေးပြီး ရိုက်နှက်ခိုင်းနေတာတွေကို ကျနော်တို့ PPNM အနေနဲ့ ပြင်းပြင်းထန်ထန် ရှုတ်ချ ပါတယ်" ဟု ပြောသည်။ လက်ရှိတွင် မကွေး အကျဉ်းထောင်အတွင်း၌ ထောင်ဝင်စာပစ္စည်း ပေးပို့မှုများကိုပါ ကန့်သတ်ပိတ်ပင်ထားပြီး ဧည့်တွေ့ခွင့်အတွက်ပါ ငွေကြေးတောင်းခံမှုများ ရှိနေသည်ဟု အကျဉ်းဦးစီးနှင့် နီးစပ်သူများက ပြောသည်။ ၊

နိုင်ကျဉ်း ၃၀ ကျော် ရိုက်နှက် တိုက်ပိတ် ခံနေရ

နိုင်ကျဉ်း ၃၀ ကျော် ရိုက်နှက် တိုက်ပိတ် ခံနေရ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၈ ရက်။  မကွေးထောင်တွင် နိုင်ငံရေးအကျဉ်းသား …

  • January 8, 2026
ရွေးကောက်ပွဲ နှောက်ယှက်သည်ဆိုကာ လူ ၃၃၀ ကျော် ဖမ်းဆီးထား သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၈ ရက်။ ရွေးကောက်ပွဲကို ဆန့်ကျင်နှောင့်ယှက်သည်ဟု ဆိုကာ ဇန်နဝါရီလ ၅ ရက်နေ့အထိ ပြည်သူ ၃၃၅ ဦးကို ဖမ်းဆီးအရေးယူထားကြောင်း စစ်ကော်မရှင်၏ ရွေးကောက်ပွဲကာလ လုံခြုံရေးဆိုင်ရာ ကြီးကြပ်မှု ဗဟိုကော်မတီက ထုတ်ပြန်လိုက်သည်။ ဖမ်းဆီးခံရသူများတွင် အမျိုးသမီး ၆၀ ဦးအထိ ပါဝင်နေပြီး ၎င်းတို့ကို သေဒဏ်အထိ ချမှတ်နိုင်သည့် ပြင်းထန် သော ဥပဒေများဖြင့် အမှုဖွင့်ထားခြင်း ဖြစ်သည်။ အဆိုပါ ဖမ်းဆီးမှုများနှင့် ပတ်သက်၍ လုံခြုံရေးအရ အမည်မဖော်လိုသည့် ရန်ကုန်မြို့ခံတစ်ဦးက အခြေအနေကို ယခုကဲ့သို့ ပြောသည်။ “အခုက အွန်လိုင်းမှာ တစ်ခုခုရေးတာနဲ့တင် အဖမ်းခံနေရတာ။ ရွေးကောက်ပွဲကို မကြိုက်လို့ ဆန့်ကျင်တာက ပြည်သူ့အခွင့်အရေးပဲလေ။ ဒါကို သေဒဏ်အထိပေးနိုင်တဲ့ ဥပဒေတွေနဲ့ ခြိမ်းခြောက်ပြီး အတင်းမဲပေးခိုင်းဖို့ လုပ်နေတာကတော့ တရားမျှတမှု လုံးဝမရှိတဲ့ လုပ်ရပ်ပဲ။” စစ်ကော်မရှင်၏ ပြည်ထဲရေးဝန်ကြီး ဒုတိယဗိုလ်ချုပ်ကြီး ထွန်းထွန်းနောင်က ဇန်နဝါရီလ ၆ ရက်နေ့ အစည်း အဝေးတွင် ၂၀၂၅ ခုနှစ်၊ ဇူလိုင်လတွင် ပြဋ္ဌာန်းခဲ့သည့် ‘ပါတီစုံဒီမိုကရေစီ အထွေထွေ ရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ’ ဖြင့် အမှုပေါင်း ၂၄၀ ဖွင့်လှစ်ခဲ့သည်ဟု ပြောသည်။ မြန်မာအမျိုးသမီး သမဂ္ဂ BWU ၏ မူဝါဒရေးရာ ဦးဆောင်အဖွဲ့ဝင် တင်တင်ညိုက “အခုလိုမျိုး အွန်ုလိုင်းခေတ် မှာ ရွေးကောက်ပွဲနဲ့ ပတ်သက်တာကို reaction ပေးတာတောင် မရတဲ့ခေတ် ဖြစ်နေတယ်။ ရွေးကောက် ပွဲ ကာကွယ်ပေးတဲ့ ဥပဒေဆိုတာက ခိုင်ခိုင်မာမာနဲ့ကို ထုတ်ပြန်ပေးခဲ့တာ။ ရွေးကောက်ပွဲကို ဘယ်လိုနည်းနဲ့ပဲ ဆန့်ကျင် ဆန့်ကျင် ဖမ်းမယ်။ ထောင်ချမယ်ဆိုတဲ့ဟာမျိုး အကြီးလေးဆုံး အပြစ်တွေလည်း ပေးလို့ရတယ်။ သေဒဏ်လည်း ပေးလို့တယ်။ တရားစီရင်ရေး စနစ်ကလည်း စစ်တပ်အောက်မှာပဲ ရှိနေတာ” ဟု ပြောသည်။ ဖမ်းဆီးခံရသူများသည် လူမှုကွန်ရက်စာမျက်နှာပေါ်တွင် ရွေးကောက်ပွဲ ဆန့်ကျင်ရေး ရေးသားခြင်း၊ စည်းရုံးလှုံ့ဆော်ခြင်းနှင့် ရွေးကောက်ပွဲဆိုင်ရာ ဆိုင်းဘုတ်များကို ဖျက်ဆီးခြင်းတို့ကြောင့် ဖြစ်သည်ဟု ဆိုသည်။ ဧရာဝတီသတင်းဌာန အမှုဆောင်အယ်ဒီတာ ဦးရဲနည်က “ကန့်ကွက်ပိုင်ခွင့် ဝေဖန်ပိုင်ခွင့် မရှိဘူး ဆိုကတည်းက အဲ့ဒါ ခြိမ်းခြောက်တာပေါ့။ ခြိမ်းခြောက်ရုံတင် မကဘူး။ အဲ့လိုမျိုး ကန့်ကွက်တဲ့ ဝေဖန်တဲ့ လူတွေပါ ထောင်ချ ဖမ်းဆီးမယ် ဆိုတဲ့ဟာက ဖိနှိပ်တာပေါ့။ ဆိုတော့ ဒီဟာက ကာကွယ်ရေး ဥပဒေလို့သာ ပြောပေမယ့် ဥပဒေ မဟုတ်ဘဲနဲ့ အဲ့လိုမျိုး ဖိနှိပ်ရေးယန္တရား တစ်ခုပဲ ဖြစ်တယ်လို့ပဲ ပြောရမှာပေါ့” ဟု ပြောသည်။ စစ်ကော်မရှင်သည် ဒီဇင်ဘာလ ၂၈ ရက်က ရွေးကောက်ပွဲ အပိုင်း (၁) ကို ကျင်းပခဲ့ပြီးဖြစ်ကာ ကျန်ရှိနေသည့် အပိုင်း (၂) နှင့် (၃) ကို လာမည့် ဇန်နဝါရီ ၁၁ ရက်နှင့် ၂၅ ရက်တို့တွင် ဆက်လက်လုပ်ဆောင်ရန် ပြင်ဆင်နေ သည်။ သို့သော်လည်း အမျိုးသားညီညွတ်ရေးအစိုးရ (NUG) အပါအဝင် တော်လှန်ရေးအင်အားစုများကမူ ဤရွေး ကောက်ပွဲကို ‘အတုအယောင်’ အဖြစ် သတ်မှတ်ထားပြီး အသိအမှတ်မပြုကြောင်းနှင့် နည်းမျိုးစုံဖြင့် ဆက်လက် ဆန့်ကျင်သွားမည်ဖြစ်ကြောင်း အတိအလင်း ကြေညာထားသည်။ နိုင်ငံရေးလေ့လာသူများကမူ စစ်ကော်မရှင်သည် ရွေးကောက်ပွဲကို လူထုထောက်ခံမှုရရှိရန်ထက် ၎င်းတို့၏ အာဏာတည်မြဲရေးအတွက် တရားဝင်မှုရှာဖွေသည့် နည်းလမ်းတစ်ခုအဖြစ်သာ အသုံးချနေခြင်းဖြစ်ပြီး၊ ပြည်သူများကို အကြောက်တရားဖြင့် ဖိနှိပ်ဖမ်းဆီးနေခြင်းမှာ ရွေးကောက်ပွဲ၏ ဂုဏ်သိက္ခာကို ပိုမိုပျက်ပြား စေကြောင်း သုံးသပ်နေကြသည်။  

ရွေးကောက်ပွဲ နှောက်ယှက်သည်ဆိုကာ လူ ၃၃၀ ကျော် ဖမ်းဆီးထား

ရွေးကောက်ပွဲ နှောက်ယှက်သည်ဆိုကာ လူ ၃၃၀ ကျော် ဖမ်းဆီးထား သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၈ ရက်။  ရွေးကောက်ပွဲကို ဆန့်ကျင်နှ…

  • January 8, 2026
တနိုင်းဒေသ တိုက်ပွဲများ ပြင်းထန်၊ ဗျူဟာ စခန်းနှင့် မှော်များကို စစ်ကော်မရှင် ထိုးစစ်ဆင် သတင်းနှင့် မီဒီယာ ကွန်ရက်
၂၀၂၆ ခုနှစ်၊ ဇန္နဝါရီလ ၈ ရက်။ ကချင်ပြည်၊ တနိုင်းမြို့နယ်အတွင်းရှိ အချက်အချာကျသော နမ်ဗျူစခန်းနှင့် ပယင်း၊ ရွှေမှော်ဒေသများကို ထိန်းချုပ်နိုင်ရန် စစ်ကော်မရှင်တပ်က အင်အားအလုံးအရင်းဖြင့် အပြင်းအထန် ထိုးစစ်ဆင်နေ သည်ဟု ဒေသခံများနှင့် မြေပြင်သတင်းရင်းမြစ်များက ပြောသည်။ လွန်ခဲ့သည့် ဒီဇင်ဘာလ ဒုတိယပတ်ကတည်းက စတင်ခဲ့သည့် ထိုးစစ်ဆင် တိုက်ခိုက်မှုများသည် ယနေ့အထိ ပြင်းထန်နေ ဆဲဖြစ်ပြီး စစ်ကော်မရှင်တပ်သည် ဒရုန်းများ၊ လက်နက်ကြီးများနှင့် လေကြောင်းတိုက်ခိုက်မှုများကို အဆက် မပြတ် အသုံးပြုနေသည်။ ထိုသို့ ထိုးစစ်ဆင်မှုကြောင့် နမ်ဗျူနှင့် လမုန်ခ မှော်အနီးရှိ ကချင်လွတ်မြောက်ရေးတပ်မတော် (KIA) တပ်ရင်း (၁၄) ၏ ကာကင်းစခန်းအချို့ လက်လွှတ်ခဲ့ရသည်။ တိုက်ပွဲများကြောင့် မှော်လုပ်သား သောင်းနှင့်ချီ၍ မြို့ပေါ်၌ ခိုလှုံနေကြရသည်။ ပယင်းမှော်မှ ထွက်လာသည့် မှော်လုပ်သားတစ်ဦးက “မှော်ထဲမှာက နေလို့ အဆင်မပြေတော့လို့ပါ။ ဦးလေးက ပြီးခဲ့တဲအပတ်ထဲက မြစ်ကြီးနားကို ပြန်ရောက်လာပြီလေ။ မှော်ထဲမှာလည်း အများကြီး ကျနေသေးတယ်။ ဦးလေးတို့ မှော်ထဲမှာ ရှိနေတုန်းကဆိုရင် လက်နက်ကြီးတွေက နေ့တိုင်းကျနေတာ၊ အလုပ်လည်း လုပ်လို့မရ ဘူး။ တချို့ကတော့ အခြေအနေစောင့်ကြည့်အုံးမယ်ဆိုပြီး နေခဲ့ကြတာ” ဟု ပြောသည်။ ထို့ပြင် စစ်ကော်မရှင်နှင့် လက်တွဲနေသော ဝါရာဇွပ်ပြည်သူ့စစ်နှင့် ရှမ်းနီပြည်သူ့စစ်အဖွဲ့များသည်လည်း ပယင်းနှင့် ရွှေမှော်များကို စီးနင်းရန်အတွက် နမ်ဗျူစခန်းဘက်သို့ ဦးတည်ကာ စစ်ကော်မရှင်တပ်နှင့်အတူ စစ်ကြောင်းထိုးလျက်ရှိသည်ဟု မြေပြင် သတင်း ရင်းမြစ်က ပြောသည်။ စစ်ကော်မရှင်၏ တနိုင်းဒေသကွပ်ကဲမှု စစ်ဌာနချုပ် (ဒကစ) က မှော်ဒေသများအတွင်းသို့ လက်နက်ကြီးများဖြင့် ဆက်တိုက်ပစ်ခတ်နေပြီး မှော်အတွင်းရှိ ပြည်သူများကို အမြန်ဆုံးထွက်ခွာရန် အမိန့်ထုတ်ပြန်ထားသည်။ စစ်ဘေးရှောင်များ ရုတ်တရက် အလုံးအရင်းနှင့် ရောက်ရှိလာခြင်းကြောင့် တနိုင်းမြို့ပေါ်ရှိ အိမ်ငှားခနှင့် အခန်းခ များသည် ယခင်ကထက် ၃ ဆနီးပါးအထိ ဈေးတက်သွားကြောင်း ဒေသခံများ၏ ပြောဆိုချက်ကို ကိုးကား၍ ကချင်သတင်းဌာနက KNG က ဖော်ပြထားသည်။ ယခင်က ကျပ်နှစ်သိန်းဝန်းကျင်သာရှိသည့် လုံးချင်းအိမ်ငှားခမှာ ကျပ်ငါးသိန်းအထိ ဖြစ်လာပြီး အခန်းငှားခများ မှာလည်း တစ်သိန်းခွဲအထိ စျေးတက်လာသဖြင့် လက်လုပ်လက်စား မိသားစုများမှာ နေရေးထိုင်ရေး အကျပ် အတည်းနှင့် ရင်ဆိုင်နေရသည်ဟု ဆိုသည်။ တနိုင်းဒေသခံ လူငယ်သူတစ်ဦးက “သူတို့ ဒီဗမာစစ်တပ်က ရွေးကောက်ပွဲလုပ်ဖို့ နယ်မြေစိုးမိုးရေးအတွက် မှော်တွေကို ထိုးစစ်ဆင်နေတာလို့ မြင်တယ်။ ဒီမှာက အဲ့လိုမျိုးလည်း သုံးသပ်ကြတာပေါ့နော်။ ဒါပေမဲ့ လက်တွေ့မှာတော့ လူထုက မဲပေးဖို့ထက် အသက်ရှင်ဖို့အတွက် တနိုင်းမြို့ပေါ်ကို ပြေးနေရတာပါ။ အိမ် ငှားခတောင် မတတ်နိုင်တဲ့ ပြည်သူတွေအတွက် ဒီရွေးကောက်ပွဲက ဘာမှအဓိပ္ပာယ်မရှိပါဘူး” ဟု ပြောသည်။ လက်ရှိတွင် စစ်ကော်မရှင်တပ်သည် စစ်ရေးဖိအားပေးမှုများ အပြင် နိုင်ငံရေးအရလည်း ၎င်းတို့ကျင်းပမည့် ရွေးကောက်ပွဲအတွက် နယ်မြေစိုးမိုးမှုရရန် ကြိုးပမ်းနေခြင်းဖြစ်သည်ဟု ဒေသတွင်းက တက်ကြွလှုပ်ရှား သူများနှင့် စစ်ရေးလေ့လာသူများက သုံးသပ်ကြသည်။  

တနိုင်းဒေသ တိုက်ပွဲများ ပြင်းထန်၊ ဗျူဟာ စခန်းနှင့် မှော်များကို စစ်ကော်မရှင် ထိုးစစ်ဆင်

တနိုင်းဒေသ တိုက်ပွဲများ ပြင်းထန်၊ ဗျူဟာ စခန်းနှင့် မှော်များကို စစ်ကော်မရှင် ထိုးစစ်ဆင် သတင်းနှင့် မီဒီယာ ကွန်ရက်၂၀၂၆ ခုနှစ်၊ ဇန္နဝါရီလ ၈ ရက်။ က…

  • January 8, 2026
ကမ္ဘာ့ အကြီးဆုံး Tomorrowland ဂီတပွဲတော်ကြီး ထိုင်းနိုင်ငံတွင် ကျင်းပမည်   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။   ကမ္ဘာကျော် အကနှင့် ဂီတပွဲတော်ကြီးဖြစ်သော Tomorrowland ကို ၂၀၂၆ ခုနှစ်၊ ဒီဇင်ဘာလတွင် ထိုင်းနိုင်ငံ၊ ချွန်ဘူရီခရိုင်၌ ကျင်းပသွားရန် ဆုံးဖြတ်လိုက်သည်။   အဆိုပါပွဲတော်အတွက် ကြိုတင်စာရင်းသွင်းခြင်း (Pre-registration) ကို ယနေ့ ဇန်နဝါရီလ ၈ ရက်၊ မြန်မာစံတော်ချိန် နေ့လယ် ၃ နာရီခွဲတွင် စတင်ဖွင့်လှစ်ပြီဖြစ်သည်။ ယခင်က ဘယ်လ်ဂျီယံနိုင်ငံ၌သာ ကျင်းပခဲ့သဖြင့် အာရှသားများအတွက် ဗီဇာနှင့် ငွေကြေးအခက်အခဲရှိခဲ့သော်လည်း ယခုအခါ အနီးကပ်ဆုံးနေရာဖြစ်သည့် ထိုင်းနိုင်ငံသို့ ရောက်ရှိလာခြင်း ဖြစ်သည်။ ဤပွဲတော်ကို ပုံမှန်အားဖြင့် ဘယ်လ်ဂျီယံ နိုင်ငံတွင် နှစ်စဉ် ကျင်းပခဲ့ပြီး ကမ္ဘာတဝှမ်းမှ နာမည်ကြီး DJ များ၊ ဂီတ ဝါသနာ ရှင်များ ပါဝင် ဆင်နွဲကြသည်။ နေရာထိုင်ခင်းများတွင် ကွင်းပြင်တွင် တဲထိုးနေထိုင်သည်မှ ကြယ်ငါးပွင့် အဆင့် ဇိမ်ခံ အခန်းများ အထိ ပါဝင်လေ့ရှိသည်။  ပွဲတက်ရောက်လိုသူများသည် Tomorrowland ဝက်ဘ်ဆိုက်တွင် အကောင့်ဖွင့်လှစ်ထားရန် လိုအပ်ပြီး မတ်လ ၇ ရက်နေ့တွင် လက်မှတ်များကို ကမ္ဘာအနှံ့ စတင်ရောင်းချမည်ဖြစ်သည်။ ဤပွဲတော်ကြီးကြောင့် ထိုင်းနိုင်ငံအတွင်းသို့ လာမည့် ၅ နှစ်အတွင်း ဘတ်ငွေ ၂၁ ဘီလီယံခန့် ဝင်ရောက်လာမည်ဟု ခန့်မှန်းထားပါသည်။  

ကမ္ဘာ့ အကြီးဆုံး Tomorrowland ဂီတပွဲတော်ကြီး ထိုင်းနိုင်ငံတွင် ကျင်းပမည် 

ကမ္ဘာ့ အကြီးဆုံး Tomorrowland ဂီတပွဲတော်ကြီး ထိုင်းနိုင်ငံတွင် ကျင်းပမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။  ကမ္ဘာကျော် အက…

  • January 8, 2026
ချင်းမိုင်မြို့ နေအိမ်မီးလောင်မှုကြောင့် မိသားစုဝင် ၅ ဦး သေဆုံး သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇန္နဝါရီလ ၈ ရက်။ ထိုင်ဝမ်နိုင်ငံ၊ ချင်းမိုင်မြို့၊ ပါဒဲ့တ်ရပ်ကွက်ရှိ နေအိမ်တစ်လုံးတွင် ဇန်နဝါရီလ ၇ ရက် ညသန်းခေါင်အချိန်၌ မီးလောင်မှုဖြစ်ပွားခဲ့ရာ မိသားစုဝင် (၅) ဦး ဆုံးပါးသွားခဲ့သည်။ သေဆုံးသူများထဲတွင် အသက် (၅) နှစ်အရွယ် အမြွှာညီမငယ်နှစ်ဦး၊ အသက် (၃၈) နှစ်အရွယ် ဇနီးမောင်နှံနှင့် အသက် (၇၀) အရွယ် အဘွားတစ်ဦးတို့ ပါဝင်သည်။ မီးသည် နေအိမ်အောက်ထပ်မှ စတင်လောင်ကျွမ်းခဲ့ခြင်းဖြစ်ပြီး အိမ်တစ်အိမ်လုံး၌ သံပန်းများကို အလုံပိတ်တပ်ဆင်ထားသောကြောင့် အိမ်နီးချင်းများက အချိန်မီ ကယ်တင်နိုင်ခြင်း မရှိခဲ့ပေ။ မီးသတ်တပ်ဖွဲ့ဝင်များ ရောက်ရှိလာချိန်တွင် အပေါ်ထပ်၌ မိသားစုဝင်အားလုံး သတိလစ်နေသည်ကို တွေ့ရှိခဲ့ရပြီး မီးခိုးမွန်း၍ သေဆုံးခဲ့ခြင်းဖြစ်နိုင်သည်ဟု အာဏာပိုင်များက ခန့်မှန်းထားသည်။ ယခုဖြစ်စဉ်သည် နေအိမ်များတွင် လုံခြုံရေးအတွက် သံပန်းများတပ်ဆင်ရာ၌ အရေးပေါ်ထွက်ပေါက် (Fire Escape) ထည့်သွင်းရန် အရေးကြီးကြောင်း သင်ခန်းစာလည်း ဖြစ်သည်။ #ChiangMai #မီးလောင် #ချင်းမိုင်

ချင်းမိုင်မြို့ နေအိမ်မီးလောင်မှုကြောင့် မိသားစုဝင် ၅ ဦး သေဆုံး

ချင်းမိုင်မြို့ နေအိမ်မီးလောင်မှုကြောင့် မိသားစုဝင် ၅ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဇန္နဝါရီလ ၈ ရက်။  ထိုင်းနိုင်ငံ၊ ချင…

  • January 8, 2026
×Close