သတင်း

သံရုံးထောက်ခံစာယူရသည့်အတွက် နေရပ်ပြန် ရွှေ့ပြောင်းလုပ်သားများ အခက်ကြုံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၇ ရက်။ ပြည်ပရောက် မြန်မာလုပ်သားများ နေရပ်သို့ ခွင့်ဖြင့်ပြန်လာရာတွင် သက်ဆိုင်ရာသံရုံး၏ ထောက်ခံချက် ပါရှိမှ သာ ပြန်လည် ထွက်ခွာခွင့်ပြုမည်ဆိုသည့် စစ်အုပ်စု၏ ကန့်သတ်ချက်အသစ်သည် အလုပ်သမားများ အပေါ် ဝန်ထုပ်ဝန်ပိုးဖြစ်စေပြီး အဂတိလိုက်စားမှုနှင့် လူကုန်ကူးမှုများကို ပိုမိုအားကောင်းလာစေနိုင်ကြောင်း အလုပ်သမားအရေး ဆောင်ရွက်သူများက ဝေဖန်ထောက်ပြလိုက်သည်။ စစ်အုပ်စု လက်အောက်ခံ အလုပ်သမား ညွှန်ကြားရေး ဦးစီးဌာနသည် ပြီးခဲ့သည့် ဧပြီလ ၂၈ ရက်နေ့တွင် အဆိုပါ ညွှန်ကြားချက်ကို စတင်ထုတ်ပြန်ခဲ့ပြီး၊ မေလ ၁ ရက်နေ့မှ စတင်ကာ မြန်မာနိုင်ငံသို့ ခွင့်ဖြင့်ပြန်လာသည့် အလုပ်သမားများအနေဖြင့် အလုပ်ရှင်၏ ခွင့်ပြုစာအပြင် သက်ဆိုင်ရာနိုင်ငံရှိ မြန်မာသံရုံး၊ အဖွဲ့ရုံး သို့မဟုတ် ကောင်စစ်ဝန်ချုပ်ရုံးတို့၏ စိစစ်ထောက်ခံချက်ကိုပါ တစ်ပါတည်း ယူဆောင်လာရမည် ဖြစ်သည်။ အထူးသဖြင့် ထိုင်းနိုင်ငံရောက် မြန်မာလုပ်သားများအတွက် ဘန်ကောက်မြို့ရှိ အလုပ်သမားသံအရာရှိရုံးတွင် မေလ ၅ ရက်နေ့မှ စတင်ကာ အဆိုပါထောက်ခံစာကို စတင်လျှောက်ထားရမည် ဖြစ်သည်။ ထိုကန့်သတ်ချက်ကြောင့် ရွှေ့ပြောင်းလုပ်သားများ ရင်ဆိုင်ရမည့် စိန်ခေါ်မှုများနှင့်ပတ်သက်၍ ပညာရေးနှင့် ဖွံ့ဖြိုးတိုးတက်ရေးဖောင်ဒေးရှင်း (FED) အမှုဆောင်ဒါရိုက်တာ ဦးထူးချစ်က ယခုကဲ့သို့ သုံးသပ်ပြောသည်။ “အလုပ်ရှင်အများစုက သူတို့အလုပ်သမားတွေကို ခွင့်ပြန်တာတို့ ဘာတို့ဆိုတာ ပေးလေ့ပေးထမျိုးက သိပ် မရှိ ဘူး။ ခဏတဖြုတ်ပဲဆိုတော့ အဲ့ဒါကလည်း အလုပ်ရှင်နဲ့ ပြဿနာရှိနိုင်တယ်။ နောက် သံရုံးမှာ ထောက်ခံစာ ယူရမယ်ဆိုတော့ သူတို့ Online စနစ်ကလည်း ယူရမယ်လို့လည်း မပြောထားဘူး။ ကျနော်တို့ နားလည်တာက သံရုံးမှာ လာယူရမယ်ဆိုတော့ အလုပ်သမားတွေက ဒီဘန်ကောက်မှာချည်းပဲ အလုပ်လုပ်တာ မဟုတ်ဘူးလေ။ ဆိုတော့ အလုပ်သမားတွေ အနေနဲ့ကတော့ ပိုပြီးတော့ ခက်ခဲလာမယ်၊ ကုန်ကျစရိတ်တွေ ပိုများလာမယ်၊ ပွဲစားတွေကို ပိုပြီးတော့ မှီခိုရမယ်လို့ ကျနော်အနေနဲ့ ပြောချင်တယ်။” သံရုံးထောက်ခံစာကြေးအဖြစ် ၁၅၀ ဘတ် ပေးသွင်းရမည်ဟု သတ်မှတ်ထားသော်လည်း ဘဏ်တွင် ချလန် သွင်းရခြင်းနှင့် သံရုံးသို့ လူကိုယ်တိုင်သွားရောက်ရမည်ဖြစ်ခြင်းတို့ကြောင့် နယ်ဝေးရှိ အလုပ်သမားများအတွက် ငွေကြေးနှင့် အချိန်ကုန်ကျမှု ဝန်ထုပ်ဝန်ပိုး ပိုမိုကြီးမားလာစေသည်။ ထို့ပြင် အလုပ်ရှင်ထံမှ ခွင့်ပြုစာတောင်းရမည့် အချက်သည် အလုပ်သမားများ၏ နေရပ်ပြန်ခွင့်ကို အလုပ်ရှင်က စိတ်ကြိုက်ထိန်းချုပ်နိုင်သည့် အခြေအနေ ဖြစ်သွားစေသည်ဟု ဝေဖန်မှုများ ရှိနေသည်။ အလားတူ ယခုလုပ်ရပ်သည် အလုပ်သမားများအပေါ် နည်းလမ်းမျိုးစုံဖြင့် အကြပ်ကိုင်ခြင်းသာဖြစ်ကြောင်း ရခိုင်အလုပ်သမားများ အဖွဲ့ (AWO) ၏ ဒါရိုက်တာ ကိုနိုင်အောင်အောင်က ပြောသည်။ “ရွှေ့ပြောင်းအလုပ်သမား ပြဿနာကို ဖြေရှင်းဖို့ ဥပဒေအရ ကာကွယ်ပေးဖို့တော့ မစဉ်းစားပဲနဲ့ ရွှေ့ပြောင်း အလုပ်သမားတွေဆီက နည်းလမ်းပေါင်းစုံနဲ့ ပိုက်ဆံကလည်းယူသေးတယ် လွတ်လပ်စွာ ခရီးသွားလာခွင့်ကို လည်း ပိတ်ပင်တယ်။ ဒါတွေကို ပြန်ကြည့်မယ်ဆိုလို့ရှိရင်တော့ ရွှေ့ပြောင်း အလုပ်သမားတွေ အနေနဲ့က ရှေ့ဆက်ပိုပြီးတော့ စိုးရိမ်စရာတွေ ပိုများလာတယ်။” ထို့အပြင် “ဒါ‌တွေက ကျနော်တို့ လက်ခံလို့ မရဘူးပေါ့။ ကမ္ဘာမှာလည်း မရှိတဲ့ နည်းလမ်းတွေပေါ့။ သက်သက် အကြပ်ကိုင်တဲ့ နည်းလမ်းဖြစ်တယ်ပေါ့။ အလုပ်သမားတွေ အနေနဲ့လည်း တတ်နိုင်ရင် မပြန်တာတော့ အကောင်းဆုံးပေါ့။ အခြားတစ်ဖက်မှာလည်း ဒီဟာတွေကို ဆက်ပြီးတော့ မလုပ်ဖို့ တိုက်တွန်းရမှာ ကျနော်တို့ တာဝန်ပေါ့နော်” ဟု ကိုနိုင်အောင်အောင်က ဆက်ပြောသည်။ စစ်အုပ်စု၏ အလုပ်သမားညွှန်ကြားရေးဦးစီးဌာနကမူ ယခုကန့်သတ်ချက်သည် အလုပ်သမားသစ်များက ခွင့်ပြန် လုပ်သားအဖြစ် အသွင်ဆောင်ကာ တရားမဝင်ထွက်ခွာခြင်းကို တားဆီးရန်ဖြစ်သည်ဟု အကြောင်းပြထား သည်။ သို့သော် ဦးထူးချစ်ကမူ ယခုကဲ့သို့ တင်းကျပ်မှုများသည် အဂတိလိုက်စားမှုကိုသာ လမ်းဖွင့်ပေးရာရောက် နေကြောင်း ထောက်ပြသည်။ “အခုလိုမျိုး ပြဋ္ဌာန်းချက်တွေက ကျနော်တို့ တရားမဝင် ရွှေ့ပြောင်း အလုပ် သမားတွေ ပိုပြီးတော့ များသွားစေတယ်။ နောက်ပြီးတော့ အစိုးရဝန်ထမ်း အဆင့်ဆင့်တွေကိုလည်း အဂတိ လိုက်စားမှု ပိုမိုလွယ်ကူအောင် ဆောင်ရွက်ပေးနေတဲ့ ပုံစံမျိုး ဖြစ်နေတယ်။ ဒါကြောင့်မို့လို့ အစိုးရအနေနဲ့ အဲ့ဒီ လုပ်ငန်းစဉ်တွေကိုတော့ ပြန်စိစစ်သင့်တယ်လို့ ကျနော့်အနေနဲ့ ပြောချင်ပါတယ်။” လက်ရှိတွင် ခွင့်ပြန်လာသည့် အလုပ်သမားများအနေဖြင့် ခွင့်ကာလ (၁) လထက် ကျော်လွန်နေပါက ပြည်ပ ပြန်ထွက်ရန် အထောက်အထားခိုင်လုံစွာ တင်ပြရမည်ဖြစ်ပြီး၊ သံရုံးထောက်ခံစာ သို့မဟုတ် ခွင့်ပြုစာ လိမ်လည် မှုရှိပါက အမည်မည်းစာရင်း (Blacklist) သွင်းကာ ပြည်ပထွက်ခွာခွင့်ကို ပိတ်ပင်မည်ဟု စစ်အုပ်စု ဘက်က မေလ ၄ ရက်နေ့တွင် ထပ်မံထုတ်ပြန် သတိပေးထားသည်။ မြေပြင်အခြေအနေတွင်မူ လူမှုကွန်ရက်၌ ပျံ့နှံ့နေသည့် သတင်းများအရ ရန်ကုန်လေဆိပ်တွင် ပြည်ပပြန်ထွက် မည့် လုပ်သားအချို့သည် VIP အမြန်လမ်းကြောင်းကြေးအဖြစ် ကျပ်သိန်း ၄၀ ခန့်အထိ ပေးဆောင်နေရသည့် အခက်အခဲများနှင့် ကြုံတွေ့နေရကြောင်း သိရသည်။ ထို့ကြောင့် အစိုးရအနေဖြင့် လုပ်သားများထံမှ အခွန်ကောက်ခံရရှိရန်သာ မဟုတ်ဘဲ ၎င်းတို့၏ ရပိုင်ခွင့်နှင့် ဝန်ဆောင်မှုများကိုပါ စနစ်တကျ တာဝန်ယူ ဆောင်ရွက်ပေးသင့်ကြောင်း အလုပ်သမားအရေး လှုပ်ရှားသူများက အလေးအနက် တိုက်တွန်းထားကြသည်။ #migrantworker #ရွှေ့ပြောင်းအလုပ်သမား #သံရုံးထောက်ခံစာ

သံရုံးထောက်ခံစာယူရသည့်အတွက် နေရပ်ပြန် ရွှေ့ပြောင်းလုပ်သားများ အခက်ကြုံ

သံရုံးထောက်ခံစာယူရသည့်အတွက် နေရပ်ပြန် ရွှေ့ပြောင်းလုပ်သားများ အခက်ကြုံ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၇ ရက်။ ပြည်ပရောက် မြန်မာလုပ်သာ…

  • May 7, 2026
လူသတ် ပုန်းရှောင်နေသည့် တောင်ကြီး ဘားဆိုင်ပိုင်ရှင် ဖမ်းဆီးခံရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၇ ရက်။   ရှမ်းပြည် တောင်ပိုင်း၊ တောင်ကြီးမြို့ရှိ ဘားဆိုင်တစ်ခုတွင် အသက် ၁၆ နှစ်အရွယ် အမျိုးသမီးဝန်ထမ်းကို ရိုက်နှက်သတ်ဖြတ်ပြီး ထွက်ပြေးတိမ်းရှောင်နေသည့် ဆိုင်ပိုင်ရှင် ကိုပီတာ (ခ) အောင်မျိုးသူကို ရှမ်းပြည် အရှေ့ပိုင်း၊ မိုင်းပြင်းမြို့နယ်အတွင်း၌ ဖမ်းဆီးရမိလိုက်ပြီ ဖြစ်သည်။   တရားခံဖြစ်သူသည် ၎င်းဖွင့်လှစ်ထားသည့် တောင်ကြီးမြို့၊ ပြည်တော်သာရပ်ကွက်၊ ဗိုလ်ချုပ်လမ်းပေါ်ရှိ ‘ပီတာဘား’ ဆိုင်တွင် အမျိုးသမီးဝန်ထမ်းဖြစ်သူကို ရိုက်နှက်သတ်ဖြတ်ခဲ့ပြီးနောက် ဆိုင်ကယ်ဖြင့် ထွက်ပြေး သွားခဲ့ခြင်းဖြစ်သည်။   ၎င်းအား မေလ ၆ ရက်နေ့၊ ညနေ ၅ နာရီခန့်တွင် မိုင်းပြင်းမြို့နယ်၊ တုံတာမြို့ စစ်ဆေးရေးဂိတ်တစ်ခု၌ လက်ရဖမ်းဆီးနိုင်ခဲ့ခြင်း ဖြစ်ကြောင်း ဘားလုပ်ငန်းအသိုင်းအဝိုင်းနှင့် ရဲတပ်ဖွဲ့နှင့် နီးစပ်သူများက ဆိုသည်။   ဖမ်းဆီးရမိမှုနှင့် ပတ်သက်၍ လုပ်သက် ၁၅ နှစ်ရှိ ဘားလောကသားတစ်ဦးက “ကိုယ်တိုင် အဖမ်းလာခံတာလိုလို ပြောနေကြတာတွေ တစ်ခုမှ မဟုတ်ပါဘူး။ သတင်းပေးရှိလို့ပါ။ ဒီကောင်က တာချီလိတ်၊ မယ်ဆိုင်နဲ့ တောင်ကြီးကို အိမ်ဦးကြမ်းပြင်လို သွားလာနေတာတွေက လူတကာသိနေတာပဲ။ ရဲတွေကလည်း ဂိတ်တွေ အားလုံး သတင်းပို့ထားတယ်လေ” ဟု ပြောသည်။   ဖြစ်စဉ်မှာ မေလ ၄ ရက်နေ့ညပိုင်းက အဆိုပါဘားဆိုင်တွင် အလုပ်လုပ်ကိုင်နေသည့် အသက် ၁၆ နှစ်အရွယ် ကိုးတန်းကျောင်းသူတစ်ဦးကို မုန့်ဖိုး ၅,၀၀၀ ကျပ် ပြန်မအပ်သည့် အကြောင်းပြချက်ဖြင့် ဆိုင်ပိုင်ရှင်က ရိုက်နှက်ခဲ့ခြင်းဖြစ်သည်။   သေဆုံးသူမှာ ရိုက်နှက်ခံရစဉ် နောက်ပြန်လဲကျကာ နောက်စေ့နှင့် ကြမ်းပြင်ရိုက်မိပြီး ဦးနှောက်သွေးကြော ပေါက်ကာ သေဆုံးခဲ့ရခြင်းဖြစ်ကြောင်း မေလ ၆ ရက်နေ့က ရရှိသည့် ဆေးစစ်ချက်များအရ သိရသည်။   သေဆုံးသူ မိန်းကလေးမှာ ညောင်ရွှေမြို့နယ်၊ အင်းလေးဒေသ၊ မင်းချောင်းရှေ့ကျေးရွာတွင် နေထိုင်သူဖြစ်ပြီး မိသားစုစားဝတ်နေရေး မပြေလည်မှုကြောင့် နွေရာသီကျောင်းပိတ်ရက်၌ အဆိုပါဆိုင်တွင် ဝင်ရောက် လုပ်ကိုင် နေရသူ ဖြစ်သည်။   ကျူးလွန်သူ ကိုပီတာသည် ယခင်ကလည်း အိမ်တွင်းအကြမ်းဖက်မှု မှတ်တမ်းများရှိပြီး စိတ်ရောဂါအခံ ရှိသည် ဟု အကြောင်းပြကာ အမှုပေါ့သွားမည်ကို မြို့ခံများနှင့် အမျိုးသမီး အဖွဲ့အစည်းများက စိုးရိမ်နေကြသည်။   အမှုအား စောင့်ကြည့်နေသည့် ဒေသတွင်းအမျိုးသမီးတက်ကြွ လှုပ်ရှားသူတစ်ဦးက “ကျမတို့ အမှုမပေါ့အောင် သေသေချာချာ လုပ်ရမှာပေါ့နော်။ အရင်အိမ်ထောင်ဖက်နဲ့ ကလေးတွေကိုလည်း ရိုက်တာတွေ ရှိတယ်။ ဆိုင်မှာလည်း အခုဆုံးသွားတဲ့ တစ်ယောက်ကိုပဲ မဟုတ်ဘူး၊ အားလုံးကို ရိုက်တယ်လို့ ကြားတယ်။ အဲဒါတွေ အမှုထပ်ပေါင်းပြီး တရားစွဲနိုင်အောင် တင်ပြသွားမှာပါ” ဟု ပြောသည်။   လက်ရှိတွင် တရားခံကို မိုင်းပြင်းမြို့နယ်ထဲက၊ တုံတာမြို့ နယ်မြေရဲစခန်း၌ စစ်ဆေးနေပြီး တောင်ကြီးမြို့မ ရဲစခန်းသို့ လွှဲပြောင်းရန် စီစဉ်နေသည်။   ဒေသခံပြည်သူများနှင့် လူမှုအဖွဲ့အစည်းများကမူ ကျူးလွန်သူအား အမှုမှန်အတိုင်း ပြင်းပြင်းထန်ထန် အပြစ် ပေးရန်နှင့် ၎င်း၏ ဇနီးဖြစ်သူကိုလည်း သက်သေဖျောက်ဖျက်မှုဖြင့် ထိရောက်စွာ အရေးယူပေးရန် လိုလားနေ ကြသည်။   #Peter #ပီတာဘားဆိုင်ပိုင်ရှင်

လူသတ် ပုန်းရှောင်နေသည့် တောင်ကြီး ဘားဆိုင်ပိုင်ရှင် ဖမ်းဆီးခံရ

လူသတ် ပုန်းရှောင်နေသည့် တောင်ကြီး ဘားဆိုင်ပိုင်ရှင် ဖမ်းဆီးခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၇ ရက်။  ရှမ်းပြည် တောင်ပိုင်း၊ တေ…

  • May 7, 2026
CNN တည်ထောင်သူ မီဒီယာသူဌေးကြီး Ted Turner ကွယ်လွန်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၇ ရက်။   ကမ္ဘာ့ပထမဆုံး ၂၄ နာရီပတ်လုံး သတင်းထုတ်လွှင့်သည့် CNN ရုပ်သံလိုင်းအား တည်ထောင်ခဲ့သူ မီဒီယာသူဌေးကြီး တက်ဒ်တာနာ (Ted Turner) သည် အမေရိကန်ဒေသစံတော်ချိန် မေလ ၆ ရက် ညပိုင်းတွင် အသက် ၈၇ နှစ်အရွယ်၌ ကွယ်လွန်သွားပြီဖြစ်ကြောင်း Cable News Network (CNN) က အတည်ပြု ကြေညာခဲ့ပါသည်။   ၁၉၈၀ ပြည့်နှစ်တွင် ၎င်းစတင်တည်ထောင်ခဲ့သော CNN သည် ကနဦးတွင် ဝေဖန်မှုများရှိခဲ့သော်လည်း ၁၉၈၁ ခုနှစ် သမ္မတ ရော်နယ်ရေဂင် လုပ်ကြံခံရမှု၊ ၁၉၈၆ ခုနှစ် ချယ်လင်ဂျာ အာကာသလွန်းပျံယာဉ် ပေါက်ကွဲမှုနှင့် ၁၉၉၀ ပြည့်နှစ် ပင်လယ်ကွေ့စစ်ပွဲတို့၏ သတင်းများကို ချက်ချင်းလက်ငင်း အဆက်မပြတ် ထုတ်လွှင့်ပြသနိုင်ခဲ့မှုကြောင့် ကမ္ဘာ့သတင်းလောကတွင် အရှိန်အဝါကြီးမားသော အချက်အချာဖြစ်လာခဲ့ပါသည်။   Ted Turner သည် TBS, TNT, Cartoon Network နှင့် Turner Classic Movies စသည့် ရုပ်သံအင်ပါယာကြီးကို တည်ထောင်ခဲ့သူဖြစ်သလို၊ အမေရိကဖလား ရွက်လှေပြိုင်ပွဲ အနိုင်ရအားကစားသမားနှင့် အားကစားအသင်းကြီးများ၏ ပိုင်ရှင်လည်း ဖြစ်ပါသည်။   ၎င်းသည် လူသားချင်းစာနာထောက်ထားမှုဆိုင်ရာ လုပ်ငန်းများတွင်လည်း ထင်ရှားပြီး ကုလသမဂ္ဂ (UN) သို့ အမေရိကန်ဒေါ်လာ ၁ ဘီလီယံ လှူဒါန်းခဲ့သည့်အပြင် ပတ်ဝန်းကျင်ထိန်းသိမ်းရေးကဏ္ဍများတွင်လည်း များစွာလှူဒါန်းခဲ့သူ ဖြစ်ပါသည်။   #TedTurner #CNN #CableNewsNetwork

CNN တည်ထောင်သူ မီဒီယာသူဌေးကြီး Ted Turner ကွယ်လွန်

CNN တည်ထောင်သူ မီဒီယာသူဌေးကြီး Ted Turner ကွယ်လွန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၇ ရက်။  ကမ္ဘာ့ပထမဆုံး ၂၄ နာရီပတ်လုံး သတင်းထုတ်လွှ…

  • May 7, 2026
Apple ကုမ္ပဏီမှ ဖောက်သည်များအား ဒေါ်လာ သန်း ၂၅၀ ပေးလျော်ရန် သဘောတူ   သတင်းနှင့် မီဒီယာ ကွန်ရက်။
၂၀၂၆ ခုနစ်၊ မေလ ၇ ရက်။   Apple ကုမ္ပဏီက အမေရိကန်တွင် ဝယ်ယူခဲ့သော အိုင်ဖုန်း ပိုင်ရှင် အချို့ကို လျော်ကြေးပေးရန် သဘောတူခဲ့သည်။   ယင်းလျော်ကြေးပေးမှုသည် ၂၀၂၄ ခုနှစ်၊ ဇွန်လမှ ၂၀၂၅ ခုနှစ်၊ မတ်လအတွင်း အမေရိကန်နိုင်ငံ၌ iPhone 15 Pro, iPhone 15 Pro Max နှင့် iPhone 16 မော်ဒယ်အားလုံး (16, 16e, Plus, Pro, Pro Max) ဝယ်ယူခဲ့သူများနှင့် အကျုံးဝင်မည်ဖြစ်သည်။   သုံးစွဲသူတစ်ဦးလျှင် အများဆုံး ၉၅ ဒေါ်လာအထိ ရရှိနိုင်မည် ဖြစ်ပါသည်။   အမေရိကန်နည်းပညာကုမ္ပဏီကြီးဖြစ်သော Apple သည် ၎င်းတို့၏ iPhone များတွင် ပါဝင်သည့် "Apple Intelligence" AI နည်းပညာနှင့် ပတ်သက်၍ လှည့်စားကြော်ငြာခဲ့သည်ဟူသော အစုအဖွဲ့လိုက် တရားစွဲဆိုမှုအား ပြေလည်စေရန် အမေရိကန်ဒေါ်လာ ၂၅၀ သန်း ပေးလျော်ရန် အင်္ဂါနေ့တွင် သဘောတူညီခဲ့ပါသည်။   တရားစွဲဆိုသူများက Apple သည် လက်တွေ့တွင် မရှိသေးသော Siri ၏ စွမ်းဆောင်ရည်များနှင့် AI နည်းပညာများကို အလွန်အကျွံ လိမ်လည်ကြော်ငြာခဲ့သည်ဟု စွပ်စွဲထားပါသည်။   စုစုပေါင်း ဖုန်းအလုံးရေ ၃၇ သန်းခန့် လျော်ကြေးရရှိရန် အကျုံးဝင်မည်ဟု ခန့်မှန်းရသည်။ #Appleကုမ္မဏီ

Apple ကုမ္ပဏီမှ ဖောက်သည်များအား ဒေါ်လာ သန်း ၂၅၀ ပေးလျော်ရန် သဘောတူ

Apple ကုမ္ပဏီမှ ဖောက်သည်များအားဒေါ်လာသန်း ၂၅၀ ပေးလျော်ရန် သဘောတူ သတင်းနှင့် မီဒီယာ ကွန်ရက်။၂၀၂၆ ခုနစ်၊ မေလ ၇ ရက်။  Apple ကုမ္ပဏီက အမေရိကန်တွင် ဝ…

  • May 7, 2026
အီရန် စစ်ပွဲရပ်စဲရေး နီးစပ်မှုကြောင့် ရေနံဈေးကျ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၇ ရက်။   အမေရိကန်နှင့် အီရန်တို့အကြား လက်ရှိဖြစ်ပွားနေသော စစ်ပွဲအား ရပ်စဲရန် သဘောတူညီချက်ရရှိရန် နီးစပ်နေပြီဖြစ်ကြောင်း သတင်းများထွက်ပေါ်လာပြီးနောက် ကမ္ဘာ့ရေနံဈေးနှုန်းများ ကျဆင်းကာ စတော့ရှယ်ယာဈေးကွက်များ ပြန်လည်မြင့်တက်လာခဲ့ပါသည်။   Axios သတင်းဌာန၏ ဖော်ပြချက်အရ နှစ်ဖက်စလုံးသည် စစ်ပွဲအဆုံးသတ်ရေးအတွက် စာမျက်နှာတစ်မျက်နှာပါရှိသော နားလည်မှုစာချွန်လွှာ (MOU) တစ်ရပ် လက်မှတ်ရေးထိုးရန် အလွန်နီးစပ်သည့် အခြေအနေသို့ ရောက်ရှိနေကြသည်။   အဆိုပါ သဘောတူညီချက်တွင် ဒေသတွင်းစစ်ပွဲအား အဆုံးသတ်ရန်၊ (၃၀) ရက်အတွင်း ဟော်မုဇ်ရေလက်ကြား (Strait of Hormuz) အား ပြန်လည်ဖွင့်လှစ်ရန်၊ အီရန်၏ နျူကလီးယားအစီအစဉ်အား ကန့်သတ်ရန်နှင့် အမေရိကန်၏ စီးပွားရေးပိတ်ဆို့မှုများ ရုပ်သိမ်းရေးအတွက် အသေးစိတ်ညှိနှိုင်းရန်ဟူသည့် အချက်များ ပါဝင်ပါသည်။   အဆိုပါ သတင်းကြောင့် နိုင်ငံတကာရေနံစိမ်းဈေးနှုန်းမှာ တစ်စည်လျှင် ၉၇ ဒေါ်လာအထိ ကျဆင်းသွားခဲ့ပြီး လန်ဒန်၊ ဂျာမနီနှင့် အာရှစတော့ဈေးကွက်များမှာမူ သိသာစွာ မြင့်တက်လာခဲ့ပါသည်။   အီရန်နိုင်ငံခြားရေးဝန်ကြီး အဘတ်စ် အရတ်ချီသည်လည်း မေလ ၆ ရက်နေ့တွင် တရုတ်နိုင်ငံခြားရေးဝန်ကြီး ဝမ်ယိနှင့် ပေကျင်းမြို့၌ တွေ့ဆုံခဲ့ပြီး စစ်ပွဲအား လုံးဝရပ်တန့်ရန်နှင့် ဟော်မုဇ်ရေလက်ကြားအတွင်း ဘေးကင်းစွာ သွားလာနိုင်ရေးအတွက် တရုတ်နိုင်ငံဘက်မှ တိုက်တွန်းခဲ့ပါသည်။   #အီရန်စစ်ပွဲ #ရေနံစျေးကျ

အီရန် စစ်ပွဲရပ်စဲရေး နီးစပ်မှုကြောင့် ရေနံဈေးကျ

အီရန် စစ်ပွဲရပ်စဲရေး နီးစပ်မှုကြောင့်ရေနံဈေးကျ  သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၇ ရက်။  အမေရိကန်နှင့် အီရန်တို့အကြား လက်ရှိဖြစ်…

  • May 7, 2026
သံလွင်မြစ်ကြောင်းမှ ဒေသခံများအား  အာဆင်းနစ် ပါဝင်မှု စစ်ဆေး   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၇ ရက်။   မယ်ဟောင်ဆောင်ခရိုင်အတွင်းရှိ သံလွင်မြစ်ရေတွင် အဆိပ်သင့်ဓာတ်ပစ္စည်းများ ပါဝင်နေခြင်းရှိမရှိ စိုးရိမ်ပူပန်မှုများ မြင့်တက်လာပြီးနောက်၊ မြစ်ကမ်းတစ်လျှောက် နေထိုင်ကြသော ဒေသခံပြည်သူများအား အာဆင်းနစ် (Arsenic) ဓာတ်ရောင်ခြည်သင့်မှု ရှိ၊ မရှိ ဆီးနမူနာများရယူ၍ ကျန်းမာရေးတာဝန်ရှိသူများက စတင်စစ်ဆေးနေပြီဖြစ်သည်။   ထိုင်းနိုင်ငံ ချင်းမိုင်တက္ကသိုလ်မှ သုတေသနပညာရှင်များ၏ ၂၀၂၅ ခုနှစ်နှောင်းပိုင်း အစီရင်ခံစာအရ သံလွင်မြစ်၏ အချို့နေရာများတွင် အာဆင်းနစ်ပါဝင်မှုနှုန်းသည် ထိုင်းနိုင်ငံ၏ ဘေးကင်းလုံခြုံမှုစံနှုန်းထက် ငါးဆခန့်အထိ ပိုမိုမြင့်မားနေကြောင်း ဖော်ပြခဲ့ပြီးနောက် ယခုကဲ့သို့ ကျန်းမာရေးစစ်ဆေးမှုများ ပေါ်ပေါက်လာခြင်း ဖြစ်ပါသည်။   ညစ်ညမ်းမှုထိန်းချုပ်ရေးဦးစီးဌာနက မယ်ဟောင်ဆောင်ခရိုင်အတွင်းရှိ စမ်းသပ်ချက် ၁၃ ခုကို ထပ်မံစစ်ဆေးခဲ့ရာတွင်လည်း အာဆင်းနစ်ပါဝင်မှုနှုန်းမှာ သတ်မှတ်စံချိန်စံညွှန်းထက် ကျော်လွန်နေကြောင်း တွေ့ရှိခဲ့ရသည်။   မေလ ၆ ရက်နေ့တွင် ရောဂါထိန်းချုပ်ရေးဦးစီးဌာန၊ ဒေသန္တရပြည်သူ့ကျန်းမာရေးရုံးများနှင့် ဆေးရုံများမှ တာဝန်ရှိသူများသည် သံလွင်မြစ်နှင့် ထိစပ်နေသော သုမွဲ (Sob Moei) နှင့် မယ်စရင်း (Mae Sariang) မြို့နယ်များရှိ ဒေသခံများအား အာဆင်းနစ်နှင့် ဆက်စပ်သည့် ကျန်းမာရေးဆိုင်ရာ ဘေးထွက်ဆိုးကျိုးများ ရှိ၊ မရှိ စစ်ဆေးမှုများ ပြုလုပ်ခဲ့ကြသည်။   သူးမွဲမြို့နယ်၊ မယ်ဆမ်လက် (Mae Sam Laep) ကျေးရွာအုပ်စု စီမံခန့်ခွဲရေးအဖွဲ့ အမှုဆောင်အရာရှိချုပ် Mr. Phongphipat Meebenjamat ၏ ပြောကြားချက်အရ အဆိုပါ စစ်ဆေးမှုလုပ်ငန်းများတွင် ချင်းမိုင်အခြေစိုက် အမှတ် (၁) ဒေသဆိုင်ရာ ရောဂါကာကွယ်ထိန်းချုပ်ရေးရုံး၊ အသက်မွေးဝမ်းကျောင်းနှင့် ပတ်ဝန်းကျင်ဆိုင်ရာ ရောဂါဌာနစု၊ သုမွဲဆေးရုံနှင့် သံလွင်မြစ်စောင့်ကြည့်ရေး စေတနာ့ဝန်ထမ်းအဖွဲ့များ ပူးပေါင်းပါဝင်ခဲ့ကြသည်။   အဆိုပါ ကျန်းမာရေးစစ်ဆေးမှုကို မယ်ဆမ်လက်ကျေးရွာအုပ်စု စီမံခန့်ခွဲရေးရုံး၌ ပြုလုပ်ခဲ့ပြီး (Ban Tha Ta Fang)၊ (Ban Mae Sam Laep) နှင့် (Ban Sob Moei) ကျေးရွာများမှ ဒေသခံများကို အဓိကထား ဆောင်ရွက်ခဲ့ခြင်းဖြစ်သည်။   အဆိုပါ စစ်ဆေးမှုတွင် ဒေသခံ ၉၉ ဦး၏ ကျန်းမာရေးမှတ်တမ်းများနှင့် ဆီးနမူနာများကို ဓာတ်ခွဲခန်းသို့ ပေးပို့စစ်ဆေးရန် စုဆောင်းခဲ့သည်။   သို့ရာတွင် ဘတ်ဂျက်ကန့်သတ်ချက်နှင့် စစ်ဆေးစရိတ် မြင့်မားမှုကြောင့် ထိခိုက်ခံစားရသည့် ရွာသူရွာသားအားလုံးကိုမူ စစ်ဆေးပေးနိုင်ခြင်း မရှိသေးကြောင်း တာဝန်ရှိသူများက ဆိုသည်။   ဓာတ်ခွဲခန်းစစ်ဆေးချက် အဖြေများကို လာမည့် ၃ လအတွင်း သိရှိရမည်ဟု ခန့်မှန်းထားသည်။   သံလွင်မြစ်ကို နေ့စဉ်အသုံးပြုခြင်းနှင့် သောက်သုံးရေအဖြစ် နှစ်ရှည်လများ မှီခိုနေရသော သုမွဲနှင့် မယ်စရင်းမြို့နယ်ရှိ ဒေသခံများမှာ မြစ်ရေညစ်ညမ်းမှုကြောင့် ကျန်းမာရေးနှင့် စိတ်ပိုင်းဆိုင်ရာ ထိခိုက်မှုများအတွက် အလွန်အမင်း စိုးရိမ်လျက်ရှိကြသည်။   #သံလွင်မြစ် #အာဆင်းနစ် #မယ်ဟောင်ဆောင်ခရိုင်

သံလွင်မြစ်ကြောင်းမှ ဒေသခံများအား  အာဆင်းနစ် ပါဝင်မှု စစ်ဆေး

သံလွင်မြစ်ကြောင်းမှ ဒေသခံများအား  အာဆင်းနစ် ပါဝင်မှု စစ်ဆေး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၇ ရက်။  မယ်ဟောင်ဆောင်ခရိုင်အတွင်းရှိ သံလွ…

  • May 7, 2026
Tiktok က ထိုင်းနိုင်ငံတွင် ဒေါ်လာ ၂၉ ဘီလီယံ ရင်းနှီးမြှုပ်နှံမည်။ ထိုင်း creator များ Tiktok မှ တိုက်ရိုက် ဝင်ငွေ ရနိုင်ရန် မျှော်လင့်ချက်ရှိလာ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၆ ရက်။   ထိုင်းနိုင်ငံက TikTok ၏ ဒေါ်လာ ၂၅ ဘီလီယံ ရင်းနှီးမြှုပ်နှံမှုကို ယနေ့ မေလ ၆ ရက်တွင် အတည်ပြုလိုက်ပြီဖြစ်ပြီး ရင်းနှီးမြှုပ်နှံမှု စုစုပေါင်း ဒေါ်လာ ၂၉ ဘီလီယံတန်ဖိုးရှိ စီမံကိန်းကြီး ၆ ခုပါဝင်မည်ဖြစ်သည်။   ၎င်းတို့အနက် ဒေတာစင်တာ (Data Centre) လုပ်ငန်းမှာ အကြီးမားဆုံးဖြစ်သည်။   ထိုင်းနိုင်ငံ ရင်းနှီးမြှုပ်နှံမှုဘုတ်အဖွဲ့ (BOI) သည် ဗုဒ္ဓဟူးနေ့တွင် စုစုပေါင်း တန်ဖိုး ဘတ် ၉၅၈ ဘီလီယံ (အမေရိကန်ဒေါ်လာ ၂၉ ဘီလီယံ) ရှိသည့် အဓိကစီမံကိန်းကြီး ၆ ခုကို အတည်ပြုပေးခဲ့သည်ဟု ဘန်ကောက်ပို့စ် သတင်းတွင် ဖော်ပြထားသည်။   ယင်းစီမံကိန်းများထဲတွင် TikTok ၏ ထိုင်းအခြေစိုက်လုပ်ငန်းခွဲမှ ဒေတာအခြေခံအဆောက်အအုံ တိုးချဲ့မည့်လုပ်ငန်းမှာ အကြီးဆုံးဖြစ်ပြီး တန်ဖိုးအားဖြင့် ဘတ် ၈၄၂ ဘီလီယံ (ဒေါ်လာ ၂၅ ဘီလီယံခန့်) ရှိသည်။   ၎င်းသည် ဘန်ကောက်၊ စမွတ်ပရာကန် နှင့် ချာချိုအန်ဆောင် ပြည်နယ်တို့တွင် ဆာဗာများ တိုးမြှင့်တပ်ဆင်ခြင်းနှင့် ဒေတာသိုလှောင်မှု အဆောက်အအုံများကို တိုးချဲ့သွားမည်ဖြစ်သည်။   ဒစ်ဂျစ်တယ်ဝန်ဆောင်မှုများအတွက် မြင့်တက်လာသော ဝယ်လိုအားကို ဖြည့်ဆည်းရန်နှင့် ဒေသတွင်း ဒစ်ဂျစ်တယ်အခြေခံအဆောက်အအုံတွင် ထိုင်းနိုင်ငံ၏ အခန်းကဏ္ဍကို မြှင့်တင်ရန်ဖြစ်သည်။   ထို့အပြင် TikTok သည် ထိုင်းလုပ်ငန်းရှင်များအတွက် ဒစ်ဂျစ်တယ်စာတတ်မြောက်မှုနှင့် e-commerce သင်ရိုးညွှန်းတမ်းများကို ကူညီဖော်ဆောင်ပေးရန်လည်း ကတိပြုထားသည်။   တရုတ်နိုင်ငံ ByteDance ကုမ္ပဏီပိုင် TikTok သည် ကမ္ဘာတစ်ဝန်းတွင် အသုံးပြုသူ ၂ ဘီလီယံကျော်ရှိပြီး အရှေ့တောင်အာရှတွင် ၃၆၈ သန်းနှင့် စီးပွားရေးလုပ်ငန်းရှင် အသုံးပြုသူ ၁၅ သန်းကျော်ရှိသည်။   ၂၀၂၁ ခုနှစ်တွင် ထိုင်းနိုင်ငံ၌ TikTok Technologies Co ကို ဒေသဆိုင်ရာရုံးအဖြစ် စတင်တည်ထောင်ခဲ့သည်။   ၂၀၂၆ ခုနှစ် ပထမသုံးလပတ်အတွင်း ထိုင်းနိုင်ငံတွင် ရင်းနှီးမြှုပ်နှံမှု လျှောက်ထားမှုများမှာ သိသိသာသာ မြင့်တက်လာပြီး ယခင်နှစ်ထက် ၂.၄ ဆ ပိုများလာကာ ဘတ် ၁ ထရီလီယံကျော်အထိ ရှိလာခဲ့သည်။   ၎င်းသည် အထူးသဖြင့် ဒစ်ဂျစ်တယ်၊ အီလက်ထရွန်နစ်နှင့် AI (ဉာဏ်ရည်တု) ကဏ္ဍများတွင် စီမံကိန်းကြီးများကြောင့် ဖြစ်သည်။ လက်ရှိတွင် TikTok Creator Fund လို့ လူသိများတဲ့ သုံးစွဲသူများကို Monetization စနစ်ဖြင့် တိုက်ရိုက် ငွေပေးသည့် အစီအစဉ်သည် အမေရိကန်နှင့် ဥရောပနိုင်ငံအချို့တွင်သာ ရှိခဲ့သည်။   ၂၀၂၆ ခုနှစ်ရဲ့ ရင်းနှီးမြှုပ်နှံမှု အသစ်များအရ ထိုင်းနိုင်ငံကို ဒေသတွင်း Content Hub (ဗဟိုချက်) အဖြစ် ပြောင်းလဲရန် ရည်ရွယ်ထားသည့်အတွက် ဤ Rewards Program ကို ထိုင်း Creator များအတွက်ပါ တရားဝင် ပိုမိုကျယ်ပြန့်အောင် လုပ်ဆောင်ရန်  အလားအလာ အလွန်များသည်ဟု သုံးသပ်မှုများ ရှိနေသည်။   #Tiktok

Tiktok က ထိုင်းနိုင်ငံတွင် ဒေါ်လာ ၂၉ ဘီလီယံ ရင်းနှီးမြှုပ်နှံမည်။ ထိုင်း creator များ Tiktok မှ တိုက်ရိုက် ဝင်ငွေ ရနိုင်ရန် မျှော်လင့်ချက်ရှိလာ 

Tiktok က ထိုင်းနိုင်ငံတွင် ဒေါ်လာ ၂၉ ဘီလီယံ ရင်းနှီးမြှုပ်နှံမည်။ ထိုင်း creator များ Tiktok မှ တိုက်ရိုက် ဝင်ငွေ ရနိုင်ရန် မျှော်လင့်ချက်ရှိလာ  သတ…

  • May 6, 2026
ဘားဆိုင်ပိုင်ရှင်က အမျိုးသမီးဝန်ထမ်းအား သတ်ပြီး ထွက်ပြေးနေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၆ ရက်။   ရှမ်းပြည်၊ တောင်ကြီးမြို့ရှိ “Peter” ဘားဆိုင်ပိုင်ရှင်ဖြစ်သူက အသက် (၁၆) နှစ်အရွယ်ရှိ အမျိုးသမီး ဝန်ထမ်းတစ်ဦးအား ရိုက်နှက်သတ်ဖြတ်ခဲ့ပြီး ထွက်ပြေးလွတ်မြောက်နေကြောင်း ဒေသခံများနှင့် နီးစပ်သူများက ပြောသည်။   ဖြစ်စဉ်မှာ ပြီးခဲ့သည့် မေလ ၄ ရက်နေ့ ညသန်းခေါင်အချိန်တွင် တောင်ကြီးမြို့၊ ပြည်တောင်သာရပ်ကွက်၊ ဗိုလ်ချုပ်လမ်းမကြီးပေါ်ရှိ အဆိုပါဘားဆိုင်၌ ပိုင်ရှင်ဖြစ်သူ ပီတာ (ခေါ်) အောင်မျိုးသူက အမျိုးသမီး ဝန်ထမ်း အား မျက်နှာ၊ လည်ပင်းနှင့် ဝမ်းဗိုက်တို့ကို အညိုအမည်းစွဲသည်အထိ ပြင်းထန်စွာ ရိုက်နှက်ခဲ့ခြင်း ဖြစ်သည်။   ရိုက်နှက်ခံရသည့် ဝန်ထမ်းအမျိုးသမီးမှာ ညတွင်းချင်းပင် သေဆုံးသွားခဲ့သည်ဟု နီးစပ်သူများက ခန့်မှန်းထား ကြသည်။   သေဆုံးသူမှာ ညောင်ရွှေမြို့နယ်၊ မင်းချောင်းရှေ့ကျေးရွာမှဖြစ်ပြီး သေဆုံးချိန်တွင် အသက် ၁၆ နှစ်သာ ရှိသေး သည်ဟုဆိုသည်။   ဖြစ်စဉ်နှင့်ပတ်သက်၍ နီးစပ်သူတစ်ဦးက “ကောင်မလေးက အသက်မပြည့်သေးဘူးဗျာ့။ မသေခင် ဘယ် လောက်တောင် ခံစားရမလဲ။ ဧည့်သည်ပေးတဲ့ မုန့်ဖိုး ၅ ထောင်ကို သူ့ဆီ ပြန်မပေးလို့ ရိုက်တာလို့ ကြားတယ်။ ဒီကောင် လွတ်သွားတယ် ဆိုရင်တောင် ဘားလောကမှာ ဆက်ရပ်တည်လို့ မရတော့ပါဘူး” ဟု ပြောသည်။   အခင်းဖြစ်ပွားပြီးနောက် မေလ ၅ ရက်နေ့၊ နံနက်ပိုင်းတွင် ကျူးလွန်သူ၏ ဇနီးဖြစ်သူက နာရေးပြုလုပ်ရန် စီစဉ်နေခဲ့သော်လည်း ပိုင်ရှင် ပီတာ ဆိုသူမှာမူ နံနက် ၅ နာရီခန့်တွင် ကားဖြင့် ထွက်ပြေးသွားသည်ကို အိမ်နီးနား ချင်းများက တွေ့မြင်ခဲ့ရသည်ဟု ဆိုသည်။   ရပ်ကွက်နေ ပြည်သူတစ်ဦးက “သူတို့ အဲညအော်သံတွေ ကြားကတည်းက သေနေပြီလားတော့ မသိဘူး။ မနက်ရောက်တော့ သူ့မိန်းမက ရပ်ကွက်ကို အကြောင်းကြားပြီး နာရေးလုပ်ဖို့ စီစဉ်နေတာ။ အဲ့ဒါနဲ့ အိမ်နီး နားချင်းလည်း မသိရဘူး။ ကျမတို့လည်း စပ်စုကြည့်တော့ ဝန်ထမ်း ကောင်မလေး ဖြစ်နေတာ။ နောက်ရက် မနက်ကြတော့ ပိုင်ရှင်က မရှိတော့ဘူး” ဟု ပြောသည်။   အဆိုပါ 'Peter' ဘားဆိုင်မှာ ယခင်က ညောင်ရွှေနှင့် ကလောမြို့တို့တွင် ဖွင့်လှစ်ခဲ့ဖူးပြီး ၂၀၂၄ ခုနှစ် ရေကြီးမှု နောက်ပိုင်းတွင် တောင်ကြီးမြို့သို့ ပြောင်းရွှေ့ဖွင့်လှစ်ခဲ့ခြင်းဖြစ်သည်။   ၎င်းဘားဆိုင်တွင် အသက်မပြည့်သေးသည့် အမျိုးသမီးများအား ခန့်အပ်ထားလေ့ရှိပြီး ဝန်ထမ်းများအပေါ် မကြာခဏ ရိုက်နှက်လေ့ရှိကြောင်းလည်း နီးစပ်သူများက ပြောသည်။   လက်ရှိတွင် ကျူးလွန်သူအား ဖမ်းဆီးရမိရေးအတွက် ၎င်း၏ နီးစပ်သူများမှတစ်ဆင့် လိုက်လံရှာဖွေနေသည်ဟု ဆိုသည်။   #PeterBar #Peter

ဘားဆိုင်ပိုင်ရှင်က အမျိုးသမီးဝန်ထမ်းအား သတ်ပြီး ထွက်ပြေးနေ

ဘားဆိုင်ပိုင်ရှင်က အမျိုးသမီးဝန်ထမ်းအား သတ်ပြီး ထွက်ပြေးနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။  ရှမ်းပြည်၊ တောင်ကြီးမြို့ရှိ …

  • May 6, 2026
ထောင်ချခံထားရသည့် ကရင်ပြည်နယ် ဝန်ကြီးချုပ် ကျန်းမာရေး မကောင်း၍ ဆေးရုံပို့ရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊  မေလ ၆ ရက်။   စစ်အုပ်စုက ထောင်ဒဏ် နှစ် ၄၀ ချမှတ်ထားသည့် ကရင်ပြည် ဝန်ကြီးချုပ် ဒေါ်နန်းခင်ထွေးမြင့်သည် ကျန်းမာရေး အခြေအနေ ဆိုးရွားလာသဖြင့် ပြီးခဲ့သည့် ဧပြီလကုန်ပိုင်းက ဘားအံဆေးရုံကြီးသို့ အရေးပေါ် ပို့ဆောင်ကုသခဲ့ရကြောင်း နီးစပ်သူများက ပြောသည်။   လာမည့် မေလ ၁၀ ရက်နေ့တွင် အသက် ၇၂ နှစ် ပြည့်တော့မည့် ဝန်ကြီးချုပ်သည် အာရုံကြောရောဂါ၊ ခဏ ခဏဖျားနာသည့် ဝေဒနာနှင့် အစာအိမ်၊ အူလမ်းကြောင်းဆိုင်ရာ ရောဂါများကြောင့် ဘားအံဆေးရုံကြီးတွင် ၅ ရက်ခန့် တက်ရောက်ကုသခဲ့ရခြင်း ဖြစ်သည်။   လက်ရှိတွင် ၎င်းအား ဘားအံအကျဉ်းထောင်သို့ ပြန်လည်ပို့ဆောင်ထားသော်လည်း ထောင်တွင်း၌ ဆေးကုသမှု များ ဆက်လက်ခံယူနေရဆဲ ဖြစ်သည်။   ကျန်းမာရေးအခြေအနေနှင့် ပတ်သက်၍ အကျဉ်းထောင်နှင့် နီးစပ်သူတစ်ဦးက “ထောင်ထဲမှာ ကျန်းမာရေး ခဏခဏ ဖောက်နေတာကို မိသားစုရော အားလုံးရောက စိုးရိမ်နေကြတာဗျ။ ဆေးရုံမှာတော့ ကုပြီး အခုက ထောင်ထဲ ပြန်ပို့လိုက်ပေမဲ့ အာရုံကြောရောဂါနဲ့ အစာအိမ်ဝေဒနာတွေက အမြဲတမ်း စောင့်ကြည့်ကုသဖို့ လိုနေတာဗျ” ဟု ပြောသည်။   ဒေါ်နန်းခင်ထွေးမြင့်သည် ၂၀၂၁ ခုနှစ် အာဏာသိမ်းသည့်နေ့ကတည်းက ဖမ်းဆီးခံခဲ့ရခြင်းဖြစ်ပြီး ၎င်းအား စစ်တပ်က အမှုပေါင်းများစွာဖြင့် စွပ်စွဲကာ စုစုပေါင်း ထောင်ဒဏ် အနှစ် ၈၀ အထိ ချမှတ်ခဲ့ခြင်း ဖြစ်သည်။   အဆိုပါ အမှုများတွင် ၂၀၂၁ ခုနှစ် ဩဂုတ်လ၌ နိုင်ငံတော် အကြည်ညိုပျက်အောင် လုပ်ဆောင်မှု ပုဒ်မ ၅၀၅-ခ ဖြင့် ထောင်ဒဏ် ၂ နှစ်၊ နိုဝင်ဘာလတွင် အဂတိလိုက်စားမှုဖြင့် ၇၅ နှစ်နှင့် ဒီဇင်ဘာလတွင် ရွေးကောက်ပွဲ မသမာမှု စွပ်စွဲချက်ဖြင့် ၃ နှစ်တို့ ပါဝင်သည်။   သို့သော်လည်း ၂၀၂၂ ခုနှစ် ဖေဖော်ဝါရီလ ၁၂ ရက်နေ့တွင် စစ်တပ်က ပြစ်ဒဏ်ထက်ဝက် လျှော့ပေါ့ပေးခဲ့သဖြင့် လက်ရှိတွင် ထောင်ဒဏ် နှစ် ၄၀ ကို ဆက်လက်ကျခံနေရခြင်း ဖြစ်သည်။   မိသားစုနှင့်နီးစပ်သူ တစ်ဦးက “အခုကတော့ ထောင်ထဲမှာပဲ ဆရာဝန်တွေက ဆက်ပြီး ကြည့်ပေးနေရတယ် ပေါ့နော်။ ခေါင်းမူးခေါင်းကိုက်တာအပြင် မကြာခဏလည်း ဖျားတတ်တော့ အပြင်ဆေးရုံမှာ သေချာ ထိထိ ရောက်ရောက် ကုသခွင့်ရစေချင်တာကတော့ အားလုံးရဲ့ ဆန္ဒပါပဲ” ဟု ပြောသည်။   ၎င်းသည် ဒေါ်အောင်ဆန်းစုကြည် ဦးဆောင်သည့် အစိုးရအဖွဲ့တွင် တစ်ဦးတည်းသော အမျိုးသမီးဝန်ကြီးချုပ် ဖြစ်သလို၊ အာဏာသိမ်းပြီးနောက်ပိုင်း စစ်တပ်၏ နည်းလမ်းပေါင်းစုံဖြင့် ဖိနှိပ်မှုများကိုလည်း ကြံ့ကြံ့ခံ ရင်ဆိုင်ခဲ့ သူတစ်ဦး ဖြစ်သည်။   လက်ရှိတွင် ဝန်ကြီးချုပ်အား သင့်တော်သည့် ဆေးဝါးကုသခွင့်ပေးရန်နှင့် အမြန်ဆုံးပြန်လွှတ်ပေးရန် မိသားစုဝင် များနှင့် နိုင်ငံတကာအဖွဲ့အစည်းအချို့က တောင်းဆိုထားသည်။   #ဒေါ်နန်းခင်ထွေးမြင့်

ထောင်ချခံထားရသည့် ကရင်ပြည်နယ် ဝန်ကြီးချုပ် ကျန်းမာရေး မကောင်း၍ ဆေးရုံပို့ရ

ထောင်ချခံထားရသည့် ကရင်ပြည်နယ် ဝန်ကြီးချုပ် ကျန်းမာရေး မကောင်း၍ ဆေးရုံပို့ရ  သတင်းနှင့် မီဒီယာ ကွန်ရက်။၂၀၂၆ ခုနှစ်၊  မေလ ၆ ရက်။  စစ်အုပ…

  • May 6, 2026
×Close