သတင်း

ရပ်ကွက် အုပ်ချုပ်ရေးမှူးနှင့် ဇနီး ပစ်သတ်ခံရ၊ သမီးဖြစ်သူ ဒဏ်ရာရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။    ထားဝယ်မြို့၊ ဆန်းချီရပ်ကွက် အုပ်ချုပ်ရေးမှူးနှင့် မိသားစုဝင်များသည် နေအိမ်တွင် ရှိနေစဉ် သေနတ်ဖြင့် ပစ်ခတ်ခံရသဖြင့် အုပ်ချုပ်ရေးမှူးနှင့် ဇနီးဖြစ်သူတို့ သေဆုံးကာ သမီးဖြစ်သူ ပြင်းထန်စွာ ဒဏ်ရာရရှိခဲ့ကြောင်း ရပ်ကွက်သားများက ပြောသည်။   ဖြစ်စဉ်မှာ မေလ ၉ ရက်နေ့ ည ၈ နာရီခန့်တွင် ဆန်းချီဘုန်းကြီးကျောင်း အနီးရှိ နေအိမ်၌ အုပ်ချုပ်ရေးမှူးမိသားစု စကားပြောနေစဉ် အမျိုးသားနှစ်ဦး ရောက်ရှိလာပြီး သေနတ်ဖြင့် ပစ်ခတ်သွားခဲ့ခြင်း ဖြစ်သည်။   ပစ်ခတ်မှုကြောင့် အုပ်ချုပ်ရေးမှူး ဦးမြင့်လွင်၊ ဇနီးဖြစ်သူနှင့် အသက် ၂၀ ကျော်အရွယ် သမီးဖြစ်သူတို့တွင် သေနတ် ဒဏ်ရာများ အသီးသီးရရှိခဲ့သဖြင့် ထားဝယ်ဆေးရုံကြီးသို့ အရေးပေါ် ပို့ဆောင်ခဲ့ရသည်။   အသက် ၄၀ ခန့်အရွယ် အမျိုးသားတစ်ဦးက “အုပ်ချုပ်ရေးမှူး ဦးမြင့်လွင်ကို အရင်ဆုံးပစ်လိုက်တာ၊ ပြီးတော့မှ မိန်းမနဲ့သမီးတို့ကိုပါ ပစ်ခဲ့တာပါ။ ဦးမြင့်လွင်တစ်ကိုယ်လုံး နေရာအနှံ့ သေနတ်ဒဏ်ရာ ဆယ်ချက်လောက် ရခဲ့တာကြောင့် ထားဝယ်ဆေးရုံကြီးမှာ ဆေးကုသနေစဉ် သေဆုံးသွားတယ်၊ သူ့မိန်းမမှာလည်း ဒဏ်ရာ နှစ်ချက် ထိပြီး ဆေးကုနေတုန်း ထပ်ပြီး သေသွားတယ်” ဟု ပြောသည်။   သေဆုံးသူ အုပ်ချုပ်ရေးမှူး ဦးမြင့်လွင်နှင့် ဇနီးဖြစ်သူတို့၏ ရုပ်အလောင်းများကို ထားဝယ်ဆေးရုံကြီး ရင်ခွဲရုံတွင် ထားရှိပြီး၊ ညာဘက်ညှပ်ရိုး ကျည်ဆန်ဖောက်ဝင်ဒဏ်ရာနှင့် လက်ဖဝါးတွင် ကျည်ထိမှန်ဒဏ်ရာများ ရရှိခဲ့သည့် သမီးဖြစ်သူမှာမူ ဆေးရုံတွင် ဆေးကုသမှု ခံယူနေရဆဲ ဖြစ်သည်။   ၎င်းတို့ကို ထားဝယ်မြို့နယ် ကြက်ခြေနီတပ်ဖွဲ့နှင့် ဇမ္ဗူသီရိ အရေးပေါ်လူနာ ကူညီသယ်ဆောင်ရေးအဖွဲ့တို့မှ လူနာတင်ယာဉ်များဖြင့် ဆေးရုံသို့ ကူညီပို့ဆောင်ပေးခဲ့ခြင်း ဖြစ်သည်။   ထားဝယ်မြို့ပေါ်တွင် အလားတူ ပစ်ခတ်မှုမျိုး ပြီးခဲ့သည့် ဧပြီလ ၁၆ ရက်နေ့ကလည်း ဥဿာရံရပ်ကွက်၌ ဖြစ်ပွား ခဲ့ဖူးပြီး၊ ထိုစဉ်ကလည်း သားအဖနှစ်ဦး ပစ်ခတ်ခံရကာ ဖခင်ဖြစ်သူ သေဆုံးပြီး သမီးဖြစ်သူ ဒဏ်ရာအပြင်း အထန် ရရှိခဲ့သည့် ဖြစ်ရပ်မျိုး ရှိခဲ့သည်။   ယခုဖြစ်စဉ်နှင့် ပတ်သက်၍ ကျူးလွန်သူများကို ဖမ်းဆီးရမိခြင်း ရှိ၊ မရှိနှင့် မည်သည့်အဖွဲ့က လုပ်ဆောင်သည် ကိုမူ သီးခြားအတည်ပြုနိုင်ခြင်း မရှိသေးဘဲ မြို့ပေါ်လုံခြုံရေး အခြေအနေများအပေါ် ဒေသခံများအကြား စိုးရိမ်မှုများ မြင့်တက်နေကြသည်။   #ထားဝယ်မြို့ #ဆန်းချီရပ်ကွက် #အုပ်ချုပ်ရေးမှူး

ရပ်ကွက် အုပ်ချုပ်ရေးမှူးနှင့် ဇနီး ပစ်သတ်ခံရ၊ သမီးဖြစ်သူ ဒဏ်ရာရ

ရပ်ကွက် အုပ်ချုပ်ရေးမှူးနှင့် ဇနီး ပစ်သတ်ခံရ၊ သမီးဖြစ်သူ ဒဏ်ရာရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။   ထားဝယ်မြို့၊ ဆန်း…

  • May 11, 2026
ပြည်နယ် ဝန်ကြီးချုပ် ဖြစ်လာတဲ့ အိန္ဒိယ မင်းသား ဗီဂျေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   အိန္ဒိယ နိုင်ငံမှ နာမည်ကျော် ရုပ်ရှင်မင်းသား ဗီဂျေးဦးဆောင်သော TVK ပါတီသည် တမီးလ်နာဒူး ပြည်နယ်တွင် ရွေးကောက်ပွဲ အောင်နိုင်ခဲ့ပြီး မင်းသားဟောင်း ဗီဂျေးမှာ ပြည်နယ် ဝန်ကြီးချုပ် ဖြစ်လာခဲ့သည်။   ရုပ်ရှင်သရုပ်ဆောင်မှ နိုင်ငံရေးသမားဖြစ်လာသူ စီ ဂျိုးဇက် ဗီဂျေး (C Joseph Vijay) သည် အိန္ဒိယနိုင်ငံ၊ တမီးလ်နာဒူးပြည်နယ်၏ ဝန်ကြီးချုပ်သစ်အဖြစ် တနင်္ဂနွေနေ့က ကျမ်းသစ္စာဆိုနိုင်ခဲ့သည်။   လွန်ခဲ့သည့် အပတ် အတွင်း ကျင်းပခဲ့သော ရွေးကောက်ပွဲများအတွင်း ဗီဂျေး ဦးဆောင်သော Tamilaga Vettri Kazhagam (TVK) ပါတီ အနိုင်ရခဲ့သော်လည်း အစိုးရ ဖွဲ့ရန် အမတ်နေရာ မပြည့်ပဲ ရှိနေခဲ့သည်။   အမတ်ဦးရေ ၂၃၄ ဦးရှိသော လွှတ်တော်တွင် TVK ၁၀၈ နေရာ အနိုင်ရပြီး အစိုးရ ဖွဲ့ရန် (၁၀) နေရာခန့် လိုအပ်နေခြင်းဖြစ်သည်။   အိန္ဒိယနိုင်ငံ၏ အဓိကအတိုက်အခံပါတီဖြစ်သော ကွန်ဂရက်ပါတီသည် အမတ်နေရာ (၅) နေရာ ရရှိထားပြီး ရလဒ်ထွက်ပေါ်ပြီး နာရီပိုင်းအတွင်းမှာပင် ဗီဂျေးအား ထောက်ခံမည်ဟု ကတိပြုခဲ့သည်။     သို့သော်လည်း ပြည်နယ်ဘုရင်ခံ ရာဂျန်ဒရာ ဗစ်ရှ်ဝါနတ် အရ်လီကာ (Rajendra Vishwanath Arlekar) က အစိုးရဖွဲ့ရန်အတွက် လိုအပ်သော ကိုယ်စားလှယ် (၁၁၈) ဦး၏ ထောက်ခံမှုအထောက်အထားကို တင်ပြရန် TVK ပါတီကို တောင်းဆိုခဲ့သည်။   စနေနေ့ညနေပိုင်းတွင် TVK သည် အိန္ဒိယကွန်မြူနစ်ပါတီ (CPI)၊ အိန္ဒိယကွန်မြူနစ်ပါတီ-မာ့က်စ်ဝါဒီ (CPI-M)၊ Viduthalai Chiruthaigal Katchi (VCK)၊ အိန္ဒိယယူနီယံ မွတ်စလင်အဖွဲ့ချုပ် (IUML)တို့၏ ထောက်ခံမှု ရရှိပြီး ဗီဂျေးမှာ ဝန်ကြီးချုပ် ဖြစ်လာခဲ့ခြင်း ဖြစ်သည်။   အဆိုပါပါတီတစ်ခုစီတွင် လွှတ်တော်အမတ်နေရာ (၂) နေရာစီ ရှိကြသဖြင့် TVK ပါတီသည် စုစုပေါင်း ကိုယ်စားလှယ် (၁၂၀) ဦး၏ ထောက်ခံမှုကို ရရှိသွားခြင်းဖြစ်သည်။   တနင်္ဂနွေနေ့ နံနက်ပိုင်း ကျမ်းသစ္စာဆိုပွဲ အခမ်းအနားကို ပြည်နယ်မြို့တော် ချန်နိုင်းရှိ ဂျဝါဟာလာနေရူး အားကစားကွင်းတွင် လုံခြုံရေးအထူးတင်းကျပ်စွာဖြင့် ကျင်းပခဲ့သည်။ မင်းသားဗီဂျေးနှင့်အတူ ဝန်ကြီး (၉) ဦးလည်း ကျမ်းသစ္စာဆိုခဲ့ကြသည်။   သာလာပသီ "Thalapathy" ဟု လူသိများသော အသက် (၅၁) နှစ်အရွယ် အက်ရှင်မင်းသား ဗီဂျေးသည် ရုပ်ရှင်ဇာတ်ကားပေါင်း (၆၉) ကားတွင် သရုပ်ဆောင်ခဲ့ပြီး အိန္ဒိယတွင် အခကြေးငွေအများဆုံးရသော မင်းသားတစ်ဦးဖြစ်သည်။   ဗီဂျေးသည် တမီးလ်နာဒူးပြည်နယ်ရှိ လူငယ်များနှင့် အမျိုးသမီးများအကြား အလွန်ရေပန်းစားသူ ဖြစ်ပြီး ၎င်း၏အနိုင်ရမှုကြောင့် ထောက်ခံသူများမှာ များစွာဝမ်းမြောက်လျက်ရှိသည်။     တမီးလ်နာဒူးနိုင်ငံရေးကို ယခင်က DMK နှင့် AIADMK ဟူသော ဒေသတွင်းပါတီကြီး နှစ်ခုကသာ ဆယ်စုနှစ်များစွာ အလှည့်ကျကြီးစိုးခဲ့သော်လည်း ယခုအခါ TVK ပါတီက ထိုအစဉ်အလာကို ရိုက်ချိုးကာ အကြီးဆုံးပါတီအဖြစ် ထွက်ပေါ်လာခဲ့ခြင်းဖြစ်သည်။   ဗီဂျေးသည် ၂၀၂၄ ခုနှစ်တွင် TVK ပါတီကို စတင်တည်ထောင်ပြီးနောက် နိုင်ငံရေးကို အချိန်ပြည့်လုပ်ဆောင်ရန် ရုပ်ရှင်လောကမှ အနားယူမည်ဟု ကြေညာခဲ့သည်။   #ဗီဂျေး #CjosephVijay #Vijay

ပြည်နယ် ဝန်ကြီးချုပ် ဖြစ်လာတဲ့ အိန္ဒိယ မင်းသား ဗီဂျေး

ပြည်နယ် ဝန်ကြီးချုပ် ဖြစ်လာတဲ့ အိန္ဒိယ မင်းသား ဗီဂျေး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  အိန္ဒိယ နိုင်ငံမှ နာမည်ကျော် ရုပ…

  • May 11, 2026
အင်ဒိုနီးရှားတွင် ကျားဖြန့် လုပ်ငန်း လုပ်နေသော နိုင်ငံခြားသားများ ဖမ်းဆီးရမိ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၁၁ ရက်။   အင်ဒိုနီးရှားနိုင်ငံ၊ မြို့တော်ဂျကာတာရှိ အွန်လိုင်းလောင်းကစားလုပ်ငန်းတစ်ခုကို ရဲတပ်ဖွဲ့က ဝင်ရောက်စီးနင်းခဲ့ရာ မြန်မာအပါအဝင် နိုင်ငံခြားသား ၃၀၀ ကျော်ကို ဖမ်းဆီးရမိခဲ့ကြောင်း အေပီ သတင်းတပုဒ်တွင် ဖော်ပြသည်။   ဤနှိမ်နင်းမှုသည် အင်ဒိုနီးရှားနိုင်ငံအတွင်း အကြီးမားဆုံးသော တရားမဝင် ဒစ်ဂျစ်တယ် လောင်းကစားကွန်ရက် နှိမ်နင်းမှုများထဲမှ တစ်ခုဖြစ်ကြောင်း စနေနေ့တွင် ရဲတပ်ဖွဲ့က ထုတ်ပြန်ခဲ့သည်။   ဂျကာတာမြို့ တရုတ်တန်းအနီးရှိ စီးပွားရေးအဆောက်အအုံတစ်ခုတွင် ဝင်ရောက်စီးနင်းခဲ့ခြင်းဖြစ်ပြီး ဖမ်းဆီးရမိသူ ၃၂၁ ဦးအနက် အများစုမှာ ဗီယက်နမ်နိုင်ငံသားများ ဖြစ်ကြသည်။   ဖမ်းဆီးခံရသူများထဲတွင် ဗီယက်နမ်နိုင်ငံသား ၂၂၈ ဦး၊ တရုတ်နိုင်ငံသား ၅၇ ဦး ပါဝင်ပြီး ကျန်ရှိသူများမှာ လာအို၊ မြန်မာ၊ ထိုင်း၊ မလေးရှားနှင့် ကမ္ဘောဒီးယားနိုင်ငံတို့မှဖြစ်ကြောင်း အင်ဒိုနီးရှားအမျိုးသားရဲတပ်ဖွဲ့၊ အထွေထွေရာဇ၀တ်မှုဆိုင်ရာ ညွှန်ကြားရေးမှူး Wira Satya Triputra က ပြောကြားခဲ့သည်။   အဆိုပါနေရာသည် အွန်လိုင်းလောင်းကစားဝက်ဘ်ဆိုက်ပေါင်း ၇၀ ကျော်ကို ချုပ်ကိုင်ထားသည့် ဗဟိုချက်ဖြစ်ပြီး ဒစ်ဂျစ်တယ်သက်သေအထောက်အထားများအရ အင်ဒိုနီးရှားနိုင်ငံပြင်ပရှိ ကစားသမားများကို ပစ်မှတ်ထားလုပ်ဆောင်နေခြင်းဖြစ်ကြောင်း စုံစမ်းစစ်ဆေးသူများက ပြောကြားခဲ့သည်။   လက်ရှိတွင် အဆိုပါကွန်ရက်၏ နောက်ကွယ်မှ စီစဉ်သူများနှင့် ငွေကြေးထောက်ပံ့သူများကို စုံစမ်းဖော်ထုတ်လျက်ရှိသည်။   အဆိုပါလုပ်ငန်းသည် လွန်ခဲ့သော နှစ်လခန့်ကပင် စနစ်တကျဖွဲ့စည်းလုပ်ကိုင်နေခြင်းဖြစ်ပြီး ဖောက်သည်ဝန်ဆောင်မှု၊ တယ်လီမားကတ်တင်းနှင့် ဘဏ္ဍာရေးစီမံခန့်ခွဲမှုဟူ၍ အခန်းကဏ္ဍများခွဲကာ လုပ်ကိုင်နေစဉ် ဖမ်းဆီးရမိခဲ့ခြင်းဖြစ်သည်။   ဖမ်းဆီးခံရသူအများစုမှာ ရက်တို ဗီဇာသက်တမ်းဖြင့် ဝင်ရောက်လာသူများဖြစ်ပြီး ဗီဇာသက်တမ်းကျော်လွန်နေထိုင်မှုများအပြင် ငွေကြေးခဝါချမှုနှင့် လောင်းကစားဆိုင်ရာ ပြစ်မှုများဖြင့်လည်း စွဲချက်တင်ခံရဖွယ်ရှိသည်။   စနေနေ့အထိ သံသယရှိသူ ၂၇၅ ဦးကို တရားဝင်အမှုဖွင့်လှစ်ထားပြီး ပြစ်မှုထင်ရှားပါက ထောင်ဒဏ် ၉ နှစ်အထိ ကျခံရနိုင်သည့်အပြင် အင်ဒိုနီးရှား ရူပီး ၂ ဘီလီယံ (အမေရိကန်ဒေါ်လာ ၁၁၆,၀၀၀ ခန့်) ဒဏ်ငွေရိုက်ခံရနိုင်သည်။   အင်ဒိုနီးရှားအခြေစိုက် နိုင်ငံတကာ ရဲတပ်ဖွဲ့ အင်တာပိုလ်ဗျူရို အတွင်းရေးမှူး Untung Widyatmoko ၏ ပြောကြားချက်အရ ယခင်က မြန်မာနှင့် ကမ္ဘောဒီးယားနိုင်ငံတို့တွင် အခြေစိုက်ခဲ့သော အွန်လိုင်းလောင်းကစားလုပ်ငန်းများသည် အဆိုပါနိုင်ငံများတွင် နှိမ်နင်းမှုများ ပြုလုပ်လာခြင်းကြောင့် အင်ဒိုနီးရှားအပါအဝင် အခြားနိုင်ငံများသို့ ပြောင်းရွှေ့လာသည့် လက္ခဏာများ တွေ့ရှိနေသည်ဟု ဆိုသည်။   ပြီးခဲ့သည့် ဗုဒ္ဓဟူးနေ့ကလည်း စင်ကာပူနိုင်ငံနှင့် ကပ်လျက်ရှိသော အင်ဒိုနီးရှားနိုင်ငံ ဘတမ် (Batam) ကျွန်းတွင် ရင်းနှီးမြှုပ်နှံမှုဆိုင်ရာ လိမ်လည်မှုများ၌ ပါဝင်သည်ဟု သံသယရှိသူ ဗီယက်နမ်၊ တရုတ်နှင့် မြန်မာနိုင်ငံသား ၂၁၀ ဦးကို ဖမ်းဆီးခဲ့သည်။   ထို့ပြင် ဆူရာဘာယားမြို့တွင်လည်း ရဲအရာရှိအဖြစ် ဟန်ဆောင်ကာ ဖုန်းဖြင့်လိမ်လည်နေသည့် ဂျပန်နှင့် တရုတ်နိုင်ငံသား ၄၄ ဦးကို ဖမ်းဆီးခဲ့သည်။   ကမ္ဘာ့အကြီးဆုံး မူစလင်လူဦးရေ အများဆုံးဖြစ်သည့် အင်ဒိုနီးရှားနိုင်ငံတွင် အွန်လိုင်းလောင်းကစားပြုလုပ်ခြင်းမှာ တရားမဝင်ဘဲ၊ ယခုအခါ နယ်စပ်ဖြတ်ကျော် ဆိုက်ဘာရာဇ၀တ်မှုများကို တိုက်ဖျက်ရန်အတွက် နှိမ်နင်းမှုများကို အရှိန်အဟုန်မြှင့် ဆောင်ရွက်လျက်ရှိသည်ဟု ရဲတပ်ဖွဲ့က ဆိုသည်။   #Indo #Scammer #Scam

အင်ဒိုနီးရှားတွင် ကျားဖြန့် လုပ်ငန်း လုပ်နေသော နိုင်ငံခြားသားများ ဖမ်းဆီးရမိ

အင်ဒိုနီးရှားတွင် ကျားဖြန့် လုပ်ငန်း လုပ်နေသော နိုင်ငံခြားသားများ ဖမ်းဆီးရမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  အင်ဒိုနီးရ…

  • May 11, 2026
အမေရိကန်-တရုတ် ထိပ်သီးဆွေးနွေးပွဲ ကုန်သွယ်ရေး၊ စစ်ရေး နှင့် AI တို့ ပါဝင်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   အမေရိကန်-တရုတ် ခေါင်းဆောင်နှစ်ဦး ပေကျင်းတွင် တွေ့ဆုံမည့်ခရီးစဉ် အမေရိကန်သမ္မတ ဒေါ်နယ်ထရန့်နှင့် တရုတ်သမ္မတ ရှီကျင့်ဖျင်တို့သည် ယခုရက်သတ္တပတ်အတွင်း တရုတ်နိုင်ငံ၊ ပေကျင်းမြို့တွင် မျက်နှာချင်းဆိုင် တွေ့ဆုံဆွေးနွေးကြမည်ဖြစ်သည်။   ဤခရီးစဉ်သည် သမ္မတထရန့်အနေဖြင့် ၂၀၁၇ ခုနှစ်နောက်ပိုင်း ပေကျင်းသို့ ပထမဆုံးအကြိမ် ပြန်လည်ရောက်ရှိမည့် ခရီးစဉ်ဖြစ်သည်။   ဆွေးနွေးပွဲတွင် နှစ်နိုင်ငံကြား တင်းမာနေသော ကုန်သွယ်ရေး၊ အီရန်စစ်ပွဲအရေး၊ ထိုင်ဝမ်အရေး၊ နျူကလီးယားလက်နက်နှင့် နောက်ဆုံးပေါ် AI နည်းပညာ အန္တရာယ်ကင်းရှင်းရေး စသည့် အရေးကြီးအကြောင်းအရာများကို ဆွေးနွေးသွားရန်ရှိသည်။   အမေရိကန်အစိုးရ တာဝန်ရှိသူများ၏ အဆိုအရ ဤခရီးစဉ်အတွင်း တရုတ်နိုင်ငံဘက်က အမေရိကန်၏ Boeing လေယာဉ်များ၊ စိုက်ပျိုးရေးထွက်ကုန်များနှင့် စွမ်းအင်ကဏ္ဍများကို ဒေါ်လာဘီလီယံနှင့်ချီ၍ ဝယ်ယူမည့် သဘောတူညီချက်များ ရရှိရန် မျှော်လင့်ထားကြသည်။   ထို့ပြင် နှစ်နိုင်ငံကြား “ကုန်သွယ်ရေးနှင့် ရင်းနှီးမြှုပ်နှံမှုကော်မတီ” များ ဖွဲ့စည်းရန်လည်း စီစဉ်နေကြသည်။   သမ္မတထရန့်သည် အမေရိကန်၊ အစ္စရေးနှင့် အီရန်တို့ကြား ဖြစ်ပွားနေသော စစ်ပွဲကို အဆုံးသတ်နိုင်ရေးအတွက် အီရန်အပေါ် သြဇာညောင်းသည့် တရုတ်နိုင်ငံက ကူညီပေးရန် တိုက်တွန်းသွားမည်ဖြစ်သော်လည်း၊ တရုတ်သမ္မတ ရှီကျင့်ဖျင်မှာမူ အမေရိကန်၏ ထိုင်ဝမ်အရေး ပါဝင်ပတ်သက်မှုအပေါ် စိတ်ပျက်နေဆဲဖြစ်သည်။   နည်းပညာပိုင်းတွင် AI ကြောင့် မလိုလားအပ်သော ပဋိပက္ခများမဖြစ်စေရန် နှစ်နိုင်ငံကြား ဆက်သွယ်ရေးလမ်းကြောင်းတစ်ခု ထားရှိရန်လည်း အမေရိကန်ဘက်က အဆိုပြုသွားရန် ရှိနေသည်။ #americanChinaSummit

အမေရိကန်-တရုတ် ထိပ်သီးဆွေးနွေးပွဲ ကုန်သွယ်ရေး၊ စစ်ရေး နှင့် AI တို့ ပါဝင်မည်

အမေရိကန်-တရုတ် ထိပ်သီးဆွေးနွေးပွဲ ကုန်သွယ်ရေး၊ စစ်ရေး နှင့် AI တို့ ပါဝင်မည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  အမေရိကန်-တ…

  • May 11, 2026
မြောက်ကိုရီးယားက နျူကလီးယား အလိုအလျောက် လက်တုံ့ပြန်မှု ဥပဒေပြဌာန်း   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   မြောက်ကိုရီးယားနိုင်ငံသည် ၎င်းတို့၏ ခေါင်းဆောင်ပိုင်းအား ပစ်မှတ်ထားတိုက်ခိုက်လာပါက နျူကလီးယားလက်နက်ဖြင့် အလိုအလျောက် ချက်ချင်းလက်တုံ့ပြန်တိုက်ခိုက်မည့် ဥပဒေတစ်ရပ်ကို ပြဋ္ဌာန်းလိုက်သည်။   အဆိုပါ အခြေခံဥပဒေပြင်ဆင်ချက်အရ ခေါင်းဆောင်ကင်ဂျုံအန်း သတ်ဖြတ်ခံရခြင်း သို့မဟုတ် နိုင်ငံတော်၏ နျူကလီးယားအင်အားစုများကို ကွပ်ကဲအုပ်ချုပ်သည့်စနစ် (Command-and-Control) သည် ရန်သူ့တိုက်ခိုက်မှုကြောင့် အန္တရာယ်ကျရောက်လာပါက နျူကလီးယားလက်နက်ဖြင့် အလိုအလျောက် ပြန်လည်တိုက်ခိုက်ရမည်ဟု ပါရှိသည်။   ဘယ်သူ့ကို တိုက်ခိုက်မည်နည်းဟူသော အချက်တွင် အတိအကျဖော်ပြထားခြင်းမရှိဘဲ “ရန်လိုသောအင်အားစုများ” ဟုသာ ယေဘုယျသုံးနှုန်းထားသည်။ ပစ်မှတ်များတွင် တောင်ကိုရီးယား၊ ဂျပန်နှင့် အမေရိကန်ရှိ မြို့ကြီးများ ပါဝင်နိုင်သည်ဟု စစ်ရေး အကဲခတ်များက ယူဆသည်။   ဤကဲ့သို့ ပြင်ဆင်ပြဋ္ဌာန်းရခြင်းမှာ ပြီးခဲ့သည့် အီရန်စစ်ဆင်ရေးအတွင်း အီရန်ဘာသာရေးခေါင်းဆောင် အလီခါမေနီ အသတ်ခံရမှုအပြီး ကမ္ဘာ့အခြေအနေများ တင်းမာလာမှုကြောင့်ဖြစ်ကြောင်း နိုင်ငံတကာသတင်းများက သုံးသပ်ဖော်ပြကြသည်။   မြောက်ကိုရီးယား၏ ပြဋ္ဌာန်းချက်အသစ်အရ နျူကလီးယားကွပ်ကဲမှုစနစ် အန္တရာယ်ကျရောက်ပါက လက်တုံ့ပြန်မှုကို “အလိုအလျောက်နှင့် ချက်ချင်း” ဆောင်ရွက်သွားမည်ဖြစ်သည်။   #Nuclear #NorthKoreaNuclear

မြောက်ကိုရီးယားက နျူကလီးယား အလိုအလျောက် လက်တုံ့ပြန်မှု ဥပဒေပြဌာန်း

မြောက်ကိုရီးယားက နျူကလီးယား အလိုအလျောက် လက်တုံ့ပြန်မှု ဥပဒေပြဌာန်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  မြောက်ကိုရီးယားနိုင်…

  • May 11, 2026
အီရန်၏ စစ်ရပ်စဲရေး တုန့်ပြန်ချက်ကို သမ္မတ ထရန့်ပယ်ချ သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   အမေရိကန်သမ္မတ ဒေါ်နယ်ထရန့်သည် စစ်ပွဲအဆုံးသတ်ရန် အမေရိကန်ဘက်မှ ကမ်းလှမ်းချက်အပေါ် အီရန်၏ ပြန်လည်တုံ့ပြန်မှုကို “လုံးဝလက်ခံနိုင်စရာမရှိ” ဟု ဆိုကာ ယနေ့တွင် ပြတ်သားစွာ ပယ်ချလိုက်သည်။   အီရန်နိုင်ငံသည် ပါကစ္စတန်နိုင်ငံမှတစ်ဆင့် ၎င်းတို့၏ တုံ့ပြန်ချက်ကို ပေးပို့ခဲ့ခြင်းဖြစ်ပြီး၊ သမ္မတထရန့်က အီရန်သည် အမေရိကန်နှင့် တစ်ကမ္ဘာလုံးကို “ကစားပွဲတစ်ခုကဲ့သို့ ကစားနေခြင်းဖြစ်သည်” ဟု ၎င်း၏ Truth Social လူမှုကွန်ရက်တွင် ပြင်းပြင်းထန်ထန် စွပ်စွဲပြစ်တင်ခဲ့သည်။   အီရန်ဘက်မှ တုံ့ပြန်ချက်တွင် လက်ဘနွန်အရေးအပါအဝင် စစ်မျက်နှာအားလုံး၌ တိုက်ပွဲများရပ်တန့်ရန်၊ ပိတ်ဆို့ခံထားရသော ဟော်မုဇ်ရေလက်ကြားအပေါ် ၎င်းတို့၏ အချုပ်အခြာအာဏာကို အသိအမှတ်ပြုရန်နှင့် စစ်ပွဲနစ်နာကြေးပေးရန်တို့ကို တောင်းဆိုထားသည်။   သို့သော် အမေရိကန်က အဓိကကိုင်တွယ်လိုသည့် နျူကလီးယားအစီအစဉ်ကိစ္စကို အီရန်ဘက်က ထည့်သွင်းပြောကြားခြင်းမရှိသေးသည့်အပြင်၊ ဗြိတိန်နှင့် ပြင်သစ်နိုင်ငံတို့က ဟော်မုဇ်ရေလက်ကြားအတွင်းသို့ စစ်သင်္ဘောများ စေလွှတ်ပါက ပြတ်သားစွာတုံ့ပြန်သွားမည်ဟု ခြိမ်းခြောက်ထားသည်။   အလားတူ အစ္စရေးဝန်ကြီးချုပ် နေတန်ယာဟုကလည်း “စစ်ပွဲမပြီးသေးကြောင်းနှင့် အီရန်တွင် လုပ်ဆောင်ရန်များစွာ ကျန်ရှိနေသေးကြောင်း” ပြောကြားခဲ့သည်။   ယခုကဲ့သို့ ငြိမ်းချမ်းရေးဆွေးနွေးပွဲများ တစ်ကျော့ပြန်ရပ်တန့်သွားခြင်းကြောင့် ကမ္ဘာ့ရေနံဈေးနှုန်းများ ၃ ရာခိုင်နှုန်းကျော် ပြန်လည်မြင့်တက်လာပြီး ရေနံစိမ်းတစ်စည်လျှင် ၁၀၄ ဒသမ ၅၀ ဒေါ်လာအထိ ရောက်ရှိသွားခဲ့သည်။   #အီရန်စစ်ပွဲ #IranWar

အီရန်၏ စစ်ရပ်စဲရေး တုန့်ပြန်ချက်ကို သမ္မတ ထရန့်ပယ်ချ

အီရန်၏ စစ်ရပ်စဲရေး တုန့်ပြန်ချက်ကို သမ္မတ ထရန့်ပယ်ချ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  အမေရိကန်သမ္မတ ဒေါ်နယ်ထရန့်သည် စစ်ပ…

  • May 11, 2026
ထိုင်းဝန်ကြီးချုပ်ဟောင်း တာ့က်ဆင် ထောင်မှ လွတ်မြောက် သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   ထိုင်းဝန်ကြီးချုပ်ဟောင်း တာ့က်ဆင် ရှင်နာဝပ်သည် ဘန်ကောက်မြို့ရှိ ကလောင်ပရမ် ဗဟိုအကျဉ်းထောင်မှ ယနေ့မနက် ၇ နာရီ ၄၄ မိနစ်တွင် ခံဝန်ချက်ဖြင့် ပြန်လည်လွတ်မြောက်လာခဲ့သည်။   အသက် ၇၆ နှစ်အရွယ်ရှိ ဝန်ကြီးချုပ်ဟောင်း တာ့က်ဆင်သည် အင်္ကျီအဖြူ၊ ဘောင်းဘီအပြာ ဝတ်ဆင်၍ အကျဉ်းထောင်ဂိတ်ဝတွင် စောင့်ကြိုနေသော မိသားစုဝင်များနှင့် ရှပ်နီဝတ်ထောက်ခံသူများကို နှုတ်ဆက်ခဲ့ပြီး၊ မာစီးဒီးကားဖြင့် ထောင်အတွင်းမှ ထွက်ခွာသွားခဲ့သည်ဟု ဘန်ကောက်ပို့စ် သတင်းတွင် ဖော်ပြသည်။   တာ့က်ဆင်သည် ခံဝန်ဖြင့် လွတ်မြောက်လာသော်လည်း လိုက်နာရမည့် စည်းကမ်းချက်များရှိနေပြီး၊ လာမည့် စက်တင်ဘာလ ၉ ရက်နေ့အထိ EM (Electronic Monitoring) ဟုခေါ်သော အီလက်ထရောနစ်စောင့်ကြည့်ခြေချင်းဝတ်ကို ဝတ်ဆင်ထားရမည် ဖြစ်သလို၊ ၃ ရက်အတွင်း ခံဝန်စောင့်ကြည့်ရေးရုံးသို့ သွားရောက်သတင်းပို့ရမည်ဖြစ်သည်။   တာ့က်ဆင်သည် ၂၀၂၅ ခုနှစ်၊ စက်တင်ဘာလ ၉ ရက်နေ့မှစ၍ အာဏာအလွဲသုံးစားမှုနှင့် အကျိုးစီးပွားပဋိပက္ခမှုများဖြင့် ထောင်ဒဏ်တစ်နှစ် ကျခံရန် တရားရုံးက အမိန့်ချမှတ်ခဲ့ခြင်းဖြစ်သည်။   ယခင်က ရဲဆေးရုံတွင် တက်ရောက်ခဲ့သော ကာလများကို ထောင်ဒဏ်အဖြစ် တရားရုံးက အသိအမှတ်မပြုခဲ့ခြင်းကြောင့် ဆေးရုံတက်သည့် ကာလ ၁ နှစ်စာအတွက် ထောင်ဒဏ် ၃ ပုံ ၂ ပုံ ကျခံပြီးမှသာ ခံဝန်ဖြင့် လွတ်မြောက်ခွင့်ရရှိခဲ့ခြင်း ဖြစ်သည်။   Photo:Bangkok Post   #ThaksinShinawatra #Thaksin

ထိုင်းဝန်ကြီးချုပ်ဟောင်း တာ့က်ဆင် ထောင်မှ လွတ်မြောက်

ထိုင်းဝန်ကြီးချုပ်ဟောင်း တာ့က်ဆင် ထောင်မှ လွတ်မြောက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  ထိုင်းဝန်ကြီးချုပ်ဟောင်း တာ့က်ဆင် …

  • May 11, 2026
ငြိမ်းချမ်းရေး ဆွေးနွေးမှုအတွက် အချို့အဖွဲ့များနှင့် အလွတ်တွေ့ဆုံမှုများ စတင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၉ ရက်။   မြန်မာနိုင်ငံအနှံ့အပြားတွင် လေကြောင်းတိုက်ခိုက်မှုများနှင့် စစ်ရေးပဋိပက္ခများ ပြင်းထန်နေချိန်တွင် စစ်အုပ်စုက တိုင်းရင်းသား လက်နက်ကိုင်အဖွဲ့အစည်းများနှင့် ငြိမ်းချမ်းရေးဆွေးနွေးမှုများ ပြုလုပ်နိုင်ရန်အတွက် အလွတ် သဘော တွေ့ဆုံဆွေးနွေးမှုများကို စတင်လုပ်ဆောင်နေပြီ ဖြစ်သည်။   စစ်အုပ်စုသည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောစာချုပ် (NCA) လက်မှတ်ရေးထိုးထားသည့် အဖွဲ့များ၊ လက်မှတ်မရေးထိုးထားသည့် အဖွဲ့များသာမက NCA လက်မှတ်ထိုးထားပြီး လက်ရှိတွင် ၎င်းတို့နှင့် တိုက်ပွဲဖြစ်ပွားနေသည့် အဖွဲ့များကိုပါ တွေ့ဆုံဆွေးနွေးရန် စာပို့ဖိတ်ခေါ်ထားခြင်း ဖြစ်သည်။   NCA အပစ်ရပ် ၇ ဖွဲ့၏ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အဖွဲ့ဝင် ဗိုလ်မှူးကြီး ခွန်ဥက္ကာက စစ်အုပ်စု၏ ဖိတ်ခေါ်စာကို ဧပြီလ ၂၄ ရက်နေ့ကတည်းက ရရှိထားသည်ဟု အတည်ပြုသည်။   ၎င်းက “တစ်ဖွဲ့ချင်းကိုလည်း ဖိတ်တယ်၊ ၇ ဖွဲ့စုပေါင်းပြီးတော့ တစ်ပေါင်းတည်း ဖိတ်တယ်ဆိုတော့ သူက ပုံစံ ၂ မျိုးဖြစ်တယ်။ ဒါကြောင့် တစ်ဖွဲ့ချင်းကလည်းပဲ ကိုယ့်အခြေအနေပေးတဲ့အပေါ်မှာ သွားရောက်တွေ့ဆုံ ဆွေး နွေး၊ တစ်ဖက်ကလည်း တစ်စုတစ်စည်းတည်းလည်း သွားပေါ့လေ။ အဲဒီအတွက် ပြင်ဆင်ကြတာဖြစ်ပါတယ်” ဟု ပြောသည်။   ထို့ပြင် လက်ရှိတွင် စစ်အုပ်စုသည် တိုင်းရင်းသားလက်နက်ကိုင်အဖွဲ့အချို့နှင့် အလွတ်သဘောတွေ့ဆုံမှုများကို စတင်လုပ်ဆောင်နေပြီဟု ဆိုသည်။   ဗိုလ်မှူးကြီးခွန်ဥက္ကာက “စတွေ့နေပါပြီခင်ဗျာ။ တရားဝင်မပြောတာ ဆိုပေမယ့် အလွတ်သဘောလည်း ဖြစ်တာ ကိုး။ နောက် ပဏာမ ဖိတ်ခေါ်ချက်တွေ၊ ရှင်းလင်းချက်တွေ၊ ကမ်းလှမ်းချက်တွေ ဖြစ်နေတော့ တွေ့နေကြ ပါပြီ။ ကျနော်ကတော့ တွေ့ပြီးပြီခင်ဗျာ။ လွန်ခဲ့တဲ့ သုံးလေးရက်ကပဲ ကျနော်တို့ တွေ့ပါတယ်။ နောက်ပိုင်း ကျတော့ မော်လမြိုင်မှာ တောင်ပိုင်းအဖွဲ့တွေ တချို့နဲ့တွေ့လိမ့်မယ်။ အဲဒါပြီးရင်တော့ မြောက်ပိုင်းမှာ တချို့ အဖွဲ့တွေ တွေ့လိမ့်မယ်” ဟု လက်ရှိအခြေအနေကို ရှင်းပြသည်။   သို့သော်လည်း စစ်အုပ်စု၏ ဤဖိတ်ခေါ်မှုသည် မြေပြင်တွင် အရပ်သားများကို ပစ်မှတ်ထားတိုက်ခိုက်နေသည့် အခြေအနေများနှင့် များစွာကင်းကွာနေသည်ဟု ကရင်နီအမျိုးသားတိုးတက်ရေး ပါတီ (KNPP) အထွေထွေ အတွင်းရေးမှူး ဦးအောင်ဆန်းမြင့်က ပြောသည်။   “ငြိမ်းချမ်းရေးကို ခေါ်တယ်ပြောပြီးတော့မှ ဒီနေ့အချိန်အထိ ကျနော်တို့ ပြည်နယ်ထဲမှာ နောက်တစ်ခြား ဒေသတွေမှာ နေ့စဉ် လေယာဉ်နဲ့ ဗုံးကြဲ၊ ဒရုန်းနဲ့ပစ်၊ အမြောက်နဲ့ပစ် ဒါတွေကို မရပ်စဲဘဲနဲ့ ကျနော်တို့က ဘယ်လိုလုပ် စားပွဲပေါ်မှာ တင်ပြီးမှ နိုင်ငံရေး ဆွေးနွေးရမှာလဲ။ အပြောတစ်မျိုး အလုပ်တစ်မျိုးနဲ့ကတော့ ကျနော်တို့ အလုပ်မဖြစ်ဘူး။”   PPST ပြောရေးဆိုခွင့်ရှိသူ ဗိုလ်မှူးကြီးစောကျော်ညွှန့်ကလည်း ၎င်းတို့အနေဖြင့် ဖိတ်ခေါ်စာရရှိထားပြီး ဆွေးနွေးရန် ပြင်ဆင်နေသော်လည်း စစ်ရေးနှင့် နိုင်ငံရေးအခင်းအကျင်း ကွဲပြားနေသည့် စိန်ခေါ်မှုများစွာ ရှိနေသည်ဟု ပြောသည်။   ၎င်းက “ငြိမ်းချမ်းရေးအတွက် အာသီသရှိနေရက်သားနဲ့ ကျနော်တို့ရဲ့ လုပ်နည်းလုပ်ဟန်တွေ၊ ကျနော်တို့ သွားနည်းသွားဟန်က ကွဲပြားမှုရှိနေမယ်ဆိုတာ ဘယ်လိုမှ လွန်ဆန်လို့မရတဲ့ အရှိတရားပါ။ ဒါပေမဲ့ ကျနော် တို့အနေနဲ့ တတ်နိုင်တဲ့အဆင့်ကနေ စပြီးတော့ တစ်ဖြည်းဖြည်းပေါ့လေ သက်ဆိုင်သူတွေအားလုံးပါဝင်တဲ့ ငြိမ်းချမ်းရေးတွေ့ဆုံဆွေးနွေးပွဲ ဖြစ်မြောက်ဖို့ဆိုတာက အခက်အနေတွေ၊ စိန်ခေါ်မှုတွေ အများကြီးကြားကနေ ကျနော်တို့ ဆက်လက်ရုန်းကန် ကြိုးပမ်းရမယ့် လုပ်ငန်းတွေကလည်း တော်တော်လေး အများကြီးရှိတယ်” ဟု ပြောသည်။   စစ်အုပ်စုသည် အလွတ်သဘော တွေ့ဆုံမှုများကို ထိုင်းနိုင်ငံအပြင် ပြည်တွင်းရှိ မော်လမြိုင်၊ ကျိုင်းတုံနှင့် မိုင်းလားဒေသများတွင် ပြုလုပ်ရန် စီစဉ်နေပြီး အစုအဖွဲ့အားလုံးကို နေပြည်တော်၌ တွေ့ဆုံရန် ရည်ရွယ်ထား ဟု ဆိုသည်။   သို့သော်လည်း NCA လက်မှတ်မထိုးထားသည့် အဖွဲ့များနှင့် လက်ရှိ တိုက်ပွဲဖြစ်ပွားနေသည့် အဖွဲ့များအနေဖြင့် ဤဖိတ်ခေါ်စာကို လက်ခံရရှိခြင်း ရှိ၊ မရှိကိုမူ သတင်းနှင့်မီဒီယာ ကွန်ရက် ( NMG) သတင်းဌာန အနေဖြင့် သီးခြား အတည်မပြုနိုင်သေးပေ။   မြေပြင်တွင် လေကြောင်းဗုံးကြဲမှုများကြောင့် အရပ်သားသေဆုံးမှုများ မြင့်တက်နေချိန်တွင် စစ်အုပ်စု၏ ငြိမ်းချမ်းရေး ကမ်းလှမ်းမှုသည် နိုင်ငံရေးအရ အကျပ်အတည်းမှ လွတ်မြောက်ရန် ကြိုးပမ်းမှုတစ်ခုသာ ဖြစ်နိုင်သည်ဟု လေ့လာစောင့်ကြည့်သူများက သုံးသပ်မှုများ ရှိနေသည်။   ဓါတ်ပုံ - ပုံဟောင်း   #myanmarpacetalk #Paceprocess #ငြိမ်းချမ်းရေးဆွေးနွေးပွဲ #NCA #EAOs #EROs

ငြိမ်းချမ်းရေး ဆွေးနွေးမှုအတွက် အချို့အဖွဲ့များနှင့် အလွတ်တွေ့ဆုံမှုများ စတင်

ငြိမ်းချမ်းရေး ဆွေးနွေးမှုအတွက် အချို့အဖွဲ့များနှင့် အလွတ်တွေ့ဆုံမှုများ စတင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၉ ရက်။  မြန်မာနိုင…

  • May 9, 2026
စစ်တပ်က ရခိုင်တွင် လေယာဉ် အုပ်စုလိုက် တိုက်ခိုက်နေ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၉ ရက်။   ရခိုင်ပြည်အတွင်း စစ်ရေးအရ ရှုံးနိမ့်နေသည့် စစ်တပ်သည် အာရက္ခတပ်တော် (AA) ထိန်းချုပ်ရာ မြို့ရွာများကို နေ့ရောညပါ လေကြောင်းမှ အပြင်းအထန် ဗုံးကြဲတိုက်ခိုက်နေပြီး မင်းပြားနှင့် ကျောက်တော်မြို့နယ်တို့ကို လေယာဉ်အုပ်စုလိုက်ဖြင့် တိုက်ခိုက်ခဲ့သည်။   မေလ ၇ ရက်နေ့၊ နေ့လယ်ပိုင်းတွင် မင်းပြားမြို့နယ်၊ ကျောက်ခုတ်ကျေးရွာအနီးရှိ တောင်တန်းများကို စစ်တပ်၏ ဂျက်ဖိုက်တာ ၅ စီးနှင့် Y-12 လေယာဉ် ၂ စီးတို့ဖြင့် တစ်စီးပြီးတစ်စီး ပတ်၍ ဗုံးကြဲခဲ့ပြီး၊ ညပိုင်း ၁၀ နာရီကျော် တွင်လည်း နေပြည်တော်နှင့် တံတားဦးလေတပ်မှ တက်လာသည့် လေယာဉ်များက ကျောက်တော်မြို့နယ်၊ အာကာတောင်ခြေရင်းကို အဆမပြတ် ဗုံးကြဲတိုက်ခိုက်ခဲ့သည်။   လက်ရှိတွင် ဂွမြို့နယ်အပါအဝင် ရခိုင်တောင်ပိုင်း မြို့နယ်များ၌ပါ ညဘက်တွင် Y-12 လေယာဉ်များ ပတ်ပျံ နေသဖြင့် ဒေသခံများမှာ ဘေးလွတ်ရာသို့ တိမ်းရှောင်နေကြရသည်။   ဂွမြို့နယ်မှ ဒေသခံတစ်ဦးက “ညဆိုရင် အင်ဂျင်သံကြားတာနဲ့ အိမ်ထဲမှာ မနေရဲတော့ဘူး။ ကလေးတွေနဲ့ ဆိုတော့ ပိုသတိထားရတယ်။ အသံကြားတဲ့ ကလေးကိုဆွဲပြီး နီးစပ်ရာ ဗုံးခိုကျင်းထဲ ပြေးရတာပဲ။ ဘယ်အချိန် ကိုယ့်ခေါင်းပေါ် ဗုံးကျလာမလဲဆိုတာ မသိရတော့ ညတိုင်း ရင်တထိတ်ထိတ်ပဲ” ဟု ပြောသည်။   စစ်တပ်သည် ပြီးခဲ့သည့် ဧပြီလအတွင်းကလည်း ပုဏ္ဏားကျွန်း၊ မြောက်ဦးနှင့် သံတွဲမြို့နယ်တို့တွင် လေကြောင်းမှ ဗုံးကြဲခဲ့သဖြင့် ကလေးငယ်များအပါအဝင် အရပ်သားသေဆုံးမှုများ ရှိခဲ့သည်။ ဤကဲ့သို့ အရပ်သားများကို ပစ်မှတ်ထားနေသည့် လုပ်ရပ်နှင့် ပတ်သက်၍ အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်က The Diplomat သတင်းဌာနှင့် အင်တာဗျူးတွင် ယခုကဲ့သို့ သတိပေးပြောဆို ထားသည်။   “စစ်တပ်က အရပ်သားတွေကို ဆက်ပြီး ဗုံးကြဲနေသရွေ့ ကျနော်တို့အတွက် နိုင်ငံရေးအရ အဖြေရှာဖို့ဆိုတာ အလွန်ခက်ခဲပါလိမ့်မယ်။ သူတို့ဟာ အသာစီးရတဲ့ အနေအထားကနေ ဆွေးနွေးချင်နေတာပါ။ ဒါပေမဲ့ ကျနော်တို့ကတော့ အဲဒီလို ဖိအားပေးမှုတွေအောက်မှာ အရှုံးပေး ဒူးထောက်သွားမှာ မဟုတ်ပါဘူး” ဟု ၎င်းက ပြောသည်။   စစ်တပ်ဘက်ကမူ မြေပြင်တိုက်ပွဲများတွင် အထိနာနေခြင်းကြောင့် လေကြောင်းအားကိုးဖြင့် အရပ်သား ပြည်သူများကို ပစ်မှတ်ထား ခြိမ်းခြောက်နေခြင်းဖြစ်ပြီး၊ ပြည်သူများအနေဖြင့် လေကြောင်းအန္တရာယ်ကို အထူးသတိထားကြရန် အာရက္ခတပ်တော် (AA) က သတိပေးထားသည်။   စစ်တပ်၏ ယခုကဲ့သို့ အရပ်သားပြည်သူများ အပေါ် လေကြောင်းမှ ပစ်မှတ်ထား တိုက်ခိုက်နေမှုများသည် စစ်ရာဇဝတ်မှု ကျူးလွန်နေခြင်းဖြစ်သည်ဟု လူ့အခွင့်အရေးအဖွဲ့အစည်းများက ထောက်ပြနေကြပြီး နိုင်ငံတကာအနေဖြင့် စစ်အုပ်စုထံသို့ လေယာဉ်ဆီနှင့် လက်နက်ခဲယမ်းများ စီးဆင်းရာလမ်းကြောင်းကို ပိုမိုတင်းကျပ်စွာ ပိတ်ဆို့ပေးရန် တောင်းဆိုမှုများလည်း ကျယ်ကျယ်လောင်လောင် ထွက်ပေါ်နေသည်။   သို့သော်လည်း မြေပြင်တွင်မူ စစ်တပ်သည် လေကြောင်းအင်အားကို အလွဲသုံးစားပြုကာ ပြည်သူများအား ထိတ်လန့်တုန်လှုပ်စေရန် ဆက်လက်လုပ်ဆောင်နေဆဲ ဖြစ်သည်ဟု လေ့လာစောင့်ကြည့်သူများက သုံးသပ်ထားသည်။   #RakhineAirstrike #ရခိုင်တိုက်ပွဲ

စစ်တပ်က ရခိုင်တွင် လေယာဉ် အုပ်စုလိုက် တိုက်ခိုက်နေ

စစ်တပ်က ရခိုင်တွင် လေယာဉ် အုပ်စုလိုက် တိုက်ခိုက်နေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၉ ရက်။  ရခိုင်ပြည်အတွင်း စစ်ရေးအရ ရှုံးနိမ့်န…

  • May 9, 2026
×Close