သတင်း

ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ရှမ်းပြည်မြောက်ပိုင်း မိုးမိတ်မြို့နယ်မှတစ်ဆင့် မဘိမ်း-ငါးအိုးဘက်သို့ စစ်ကြောင်းထိုးကာ ကချင်ပြည်အတွင်းသို့ ကုန်းလမ်းဖြင့် ဝင်ရောက်နိုင်ရန် စစ်တပ်က အင်အားအလုံးအရင်းဖြင့် စစ်ရေးပြင်ဆင်နေမှုကြောင့် နှစ်ဖက် စစ်ရေး တင်းမာမှုနှင့် တိုက်ပွဲများ ပိုမိုပြင်းထန်လာနေသည်ဟု တော်လှန်ရေးပူးပေါင်းတပ်ဖွဲ့များက ပြောသည်။   ပြီးခဲ့သည့် မေလဆန်းပိုင်းမှ စတင်ကာ မန္တလေးမြို့ဘက်မှ မိုးမိတ်မြို့ဘက်သို့ စစ်တပ်၏ စစ်ကားယာဉ်တန်းများ အင်အားအလုံးအရင်းဖြင့် ဆက်တိုက်တက်လာခဲ့ခြင်းဖြစ်ပြီး၊ လက်ရှိတွင် စစ်တပ်က မိုးမိတ်နှင့် မဘိမ်းမြို့ ကြား ရှိ ကျေးရွာများမှ ဒေသခံ ပြည်သူများကို နေအိမ်များမှ အတင်းအဓမ္မ ထပ်မံရွှေ့ပြောင်းခိုင်းထားကြောင်း ဆို သည်။   စစ်တပ်သည် မိုးမိတ်မှ မဘိမ်း-ငါးအိုး လမ်းကြောင်းအတိုင်း ကချင်ပြည်အတွင်းသို့ မြေပြင်စစ်ကြောင်း ပေါက် ထွက်နိုင်ရန် စစ်ရေးဗျူဟာချ၍ ထိုးစစ်ဆင်ရန် ကြိုးပမ်းနေခြင်းဖြစ်ကြောင်း တော်လှန်ရေးတပ်ဖွဲ့များက သုံးသပ် ထားသည်။   မိုးမိတ်နှင့် မဘိမ်းကြား စစ်ကောင်စီတပ်၏ လှုပ်ရှားမှုနှင့်ပတ်သက်၍ ဒေသခံ သတင်းရင်းမြစ်တစ်ဦးက “မန္တလေးက တက်လာတဲ့ စစ်တပ်ယာဉ်တန်းတွေ မိုးမိတ်ထဲ ရောက်လာကတည်းက မြေပြင်က တော်တော်လေး လှုပ်ခတ်သွားတာ။ အခုဆို မိုးမိတ်နဲ့ မဘိမ်းကြားက ရွာတွေကို စစ်တပ်က အတင်းအဓမ္မ ရွှေ့ခိုင်းနေပြီ။ သူတို့ က ကချင်ပြည်ဘက်ကို စစ်ကြောင်းပေါက်အောင် သွားချင်လို့ လမ်းကြောင်းရှင်းတဲ့ သဘောပဲ။ ရွာသားတွေ လည်း ပြေးနေကြရတယ်” ဟု ပြောသည်။     ပြီးခဲ့သည့်ရက်ပိုင်းကလည်း ငါးအိုးကျေးရွာဘက်မှ ထွက်ခွာလာသည့် စစ်တပ် စစ်ကြောင်းကို ကချင်လွတ်လပ် ရေး တပ်မတော် (KIA) ၊ ပြည်သူ့ကာကွယ်ရေး တပ်မတော် (PDF) နှင့် ကျောင်းသားတပ်မတော် (ABSDF) ပူးပေါင်းတပ်ဖွဲ့များက လမ်းခရီးတွင် ကြားဖြတ်တိုက်ခိုက်ခဲ့သဖြင့် စစ်တပ်ဘက်က အထိနာကာ ပြန်လည် ဆုတ် ခွာသွားခဲ့ရသည့် ဖြစ်စဉ်ရှိခဲ့သည်။   ဒေသတွင်း တော်လှန်ရေးတပ်ဖွဲ့မှ ရဲဘော်တစ်ဦးက “လမ်းပိုင်းအများစုကို ကျနော်တို့ဘက်က ထိန်းချုပ်ထား တော့ သူတို့ မြေပြင်စစ်ကြောင်း ထိုးဖို့ တော်တော်ရုန်းကန်နေရတယ်။ ဒါပေမဲ့ ရွှေကူနဲ့ ဗန်းမော်ဘက်ကို လမ်းပွင့်ဖို့ သူတို့ အသေအလဲ ကြိုးစားလာနိုင်တာမို့ စစ်ရေးအရ အနီးကပ် စောင့်ကြည့်ပိတ်ဆို့ထားပါတယ်။ ပြည်သူတွေအနေနဲ့လည်း စစ်ရေးသတိ အမြဲရှိနေဖို့ လိုပါတယ်” ဟု ပြောသည်။   စစ်တပ်သည် ဗန်းမော်နှင့် ရွှေကူမြို့နယ်ဘက်သို့ ကုန်းလမ်းပေါက်ရန် ဆက်လက် ကြိုးပမ်းနေဆဲ ဖြစ်ရာ တော် လှန်ရေး ပူးပေါင်းတပ်ဖွဲ့များဘက်ကလည်း ၎င်းတို့၏ စစ်ကြောင်းများကို အနီးကပ်စောင့်ကြည့်ကာ လမ်း ကြောင်းများကို ပိတ်ဆို့ထားသည့် အနေအထားတွင် ရှိနေသည်။   လက်ရှိတွင် မြစ်ကြီးနား - ဗန်းမော် - မန္တလေး လမ်းပိုင်းတစ်လျှောက်နှင့် ရွှေလီမြစ်ဝှမ်းဒေသများကို တော် လှန်ရေး ပူးပေါင်းတပ်ဖွဲ့များက စိုးမိုးထိန်းချုပ်ထားသဖြင့် စစ်တပ်စစ်ကြောင်းများ လှုပ်ရှားရန် ခက်ခဲနေသည်။   တိုက်ပွဲများ အချိန်မရွေး ပိုမိုပြင်းထန်လာနိုင်သည့် အခြေအနေကြောင့် ဒေသခံပြည်သူများအနေဖြင့် ဘေးလွတ် ရာသို့ ကြိုတင်ရှောင်တိမ်းကြရန် KIA ဘက်က သတိပေးနှိုးဆော်ထားသည်။   ဓါတ်ပုံ - ပုံဟောင်း   #ကချင်ပြည်နယ်  

ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး



ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ ရှမ်းပြည်မြောက်ပိ…

  • May 14, 2026
ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ချင်းပြည်၊ မင်းတပ်မြို့နှင့် စစ်ကိုင်းတိုင်း၊ ရွှေဘိုမြို့နယ်တို့တွင် စစ်တပ်က လေကြောင်းမှ ဗုံးကြဲတိုက်ခိုက်မှုများ ဆက်တိုက်လုပ်ဆောင်ခဲ့ရာ စစ်သုံ့ပန်းများ အပါအဝင် အရပ်သားပြည်သူများ သေဆုံးမှုရှိခဲ့ကြောင်း ဒေသခံများ နှင့် တော်လှန်ရေးအဖွဲ့အစည်းများက ပြောသည်။   အထူးသဖြင့် စစ်တပ်သည် လေကြောင်းမှ ဗုံးကြဲပြီးနောက် ဒဏ်ရာရရှိသူများကို လာရောက်ကူညီသည့် ကယ် ဆယ်ရေးသမားများကို ဒရုန်းဖြင့် စောင့်ကြည့်ကာ ဒုတိယအကြိမ် ထပ်ဆင့်ဗုံးကြဲသည့် ဗျူဟာ အသစ်ကို အသုံးပြုလာနေကြောင်း ချင်းပြည်သူ့အစည်းအရုံး (CPU/CPA) က သတိပေးလိုက်သည်။   ပြီးခဲ့သည့် မေလ ၁၁ ရက်နေ့ ညပိုင်းမှ မေလ ၁၂ ရက်နေ့ ညနေပိုင်းအထိ ၂၄ နာရီအတွင်း မင်းတပ်မြို့ပေါ်သို့ စစ်တပ်က လေကြောင်းတိုက်ခိုက်မှု ၁၁ ကြိမ်အထိ ဆက်တိုက်ပြုလုပ်ခဲ့ရာ စစ်သုံ့ပန်းများ အပါအဝင် လူ ၄ ဦး သေဆုံးခဲ့ပြီး၊ ပြည်သူ့နေအိမ် ၁၅ လုံးနှင့် အုပ်ချုပ်ရေးရုံးဌာန ၁၀ ခုထက်မနည်း ပျက်စီးဆုံးရှုံးခဲ့ရသည်။   လေကြောင်းဗျူဟာ အသစ်နှင့် ပတ်သက်၍ ချင်းပြည်သူ့အစည်းအရုံး (CPU/CPA) တာဝန်ရှိသူတစ်ဦးက “စစ်တပ်က အခုနောက်ပိုင်း အရင်လို ဗုံးကြဲပြီး ပြန်လှည့်သွားတာမျိုး မဟုတ်တော့ဘူး။ ဗုံးကြဲပြီးရင် ဒရုန်းနဲ့ အပေါ်ကနေ စောင့်ကြည့်နေတာ။ အဲဒီနောက် ဗုံးဒဏ်ကြောင့် ထိခိုက်ဒဏ်ရာရတဲ့သူတွေကို ကူညီဖို့ လူတွေ စုလာတဲ့အချိန်ကျမှ နောက်တစ်ကြိမ် ထပ်ဆင့်ဗုံးကြဲတဲ့ ဗျူဟာကို ကောက်ကျစ်စွာ အသုံးပြုလာတာ တွေ့ရ တယ်” ဟု ပြောသည်။     အလားတူ စစ်ကိုင်းတိုင်း၊ ရွှေဘိုမြို့နယ်၊ မဲတောကျေးရွာရှိ ဘုန်းကြီးကျောင်းကိုလည်း မေလ ၁၁ ရက်နေ့ ညပိုင်း တွင် စစ်တပ်က လေကြောင်းမှ ဗုံး ၂ လုံး ကြဲချတိုက်ခိုက်ခဲ့ရာ ဆွမ်းစားကျောင်းဆောင်ပေါ်သို့ တိုက်ရိုက် ကျရောက် ပေါက်ကွဲခဲ့သည်။   ထိုဖြစ်စဉ်ကြောင့် ဘုန်းကြီးကျောင်းအတွင်းရှိ အသက် ၃၀ အရွယ် အမျိုးသားတစ်ဦး နေရာ၌ပင် သေဆုံးခဲ့ပြီး အမျိုးသမီး ၂ ဦးအပါအဝင် ၃ ဦး ပြင်းထန်စွာ ဒဏ်ရာရရှိခဲ့သည်။   မြေပြသတင်းရင်းမြစ် တစ်ဦးက “ညဘက်ကြီး ဗုံးက ဝုန်းဆိုပြီး ကျောင်းပေါ်တည့်တည့် ကျလာတာ။ အိပ်နေ ရင်းနဲ့ကို အလန့်တကြား ထပြေးကြရတယ်။ အခုက ဘုန်းကြီးကျောင်းတွေပါ မချန်ဘဲ ပစ်မှတ်ထား တိုက်ခိုက် လာတော့ ဘယ်နေရာမှ မလုံခြုံတော့ဘူး။ ရွာထဲမှာလည်း လူစုလူဝေးမလုပ်ရဲကြတော့ဘူး” ဟု ပြောသည်။   စစ်တပ်သည် စစ်ရေးပစ်မှတ်မဟုတ်သည့် ဘာသာရေး အဆောက်အအုံများ၊ အရပ်သားပြည်သူများနှင့် ကယ်ဆယ်ရေးသမားများကိုပါ အငြိုးတေးဖြင့် ပစ်မှတ်ထားတိုက်ခိုက်လာနေခြင်း ဖြစ်သည်။   မြေပြင်စစ်မျက်နှာတွင် အထိနာနေသည့် စစ်တပ်သည် လေကြောင်း အသာစီးရမှုကို အသုံးချကာ အရပ်သား လူထုအား စိတ်ဓာတ်ရေးရာ ခြိမ်းခြောက်ရန်အတွက် ယခုကဲ့သို့ ဗုံးကြဲတိုက်ခိုက်မှုများကို ရက်ဆက် လုပ်ဆောင် နေခြင်း ဖြစ်သည်ဟု ဆိုသည်။   ထို့ကြောင့် ပြည်သူများအနေဖြင့် လေကြောင်းရန် သတိပေးချက်များကို ဂရုပြုရန်နှင့် လူစုလူဝေးများကို အထူးရှောင်ရှားကြရန် ဒေသတွင်း တော်လှန်ရေးအဖွဲ့အစည်းများက တိုက်တွန်းနှိုးဆော်ထားသည်။   #ချင်းပြည် #မင်းတပ် #စစ်တပ် #ရွှေဘို

ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ


ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ ချင်းပြ…

  • May 14, 2026
မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ်

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   ရှမ်းပြည်တောင်ပိုင်းနှင့် ကရင်နီပြည်အစပ်၊ ဖယ်ခုံမြို့နယ်၊ မိုးဗြဲမြို့တွင် စစ်ရေးမတည်ငြိမ်မှုနှင့် မြေပြင် အခြေ အနေများကြောင့် လာမည့်မိုးရာသီ စပါးစိုက်ပျိုးမှု လယ်ဧကထောင်နှင့်ချီ၍ ရပ်နားထားရသဖြင့် ဆန်ဈေးနှုန်း များ ထပ်မံမြင့်တက်လာမည်ကို ဒေသတွင်း ခိုလှုံနေသည့် စစ်ဘေးရှောင်များနှင့် ပြည်သူများ စိုးရိမ်နေကြသည်။   မိုးဗြဲမြို့၊ ဘီလူးချောင်းဘေး အနီးတစ်ဝိုက် ပတ်ပတ်လည်ရှိ လယ်ကွင်းများနှင့် ဘီလူးချောင်း အနောက်ဘက် ခြမ်းရှိ နောင်ခိုက်၊ လက်ပံကွင်း၊ စပါးကွင်းတို့တွင် လယ်ဧကတစ်ထောင်ကျော် ရှိသော်လည်း ယခုနှစ်တွင် မိုးစပါးစိုက်ပျိုးသူ ထက်ဝက်ကျော်ခန့် လျော့နည်းသွားခြင်း ဖြစ်ပြီး လက်ရှိအချိန်အထိ စိုက်ပျိုးသူ မရှိသ လောက် နည်းပါးနေဆဲ ဖြစ်သည်။   မိုးဗြဲမြို့အတွင်း ခိုလှုံနေသည့် စစ်ဘေးရှောင် ပြည်သူတစ်ဦးက ကြုံတွေ့နေရသည့် မြေပြင်အခြေအနေနှင့် ပတ်သက်၍ ယခုကဲ့သို့ ပြောသည်။   “လယ်ထဲဆင်းရင် တဝုန်းဝုန်းနဲ့ ဘယ်ချိန်ကျလာမလဲ မသိဘူး။ အသက်နဲ့ရင်းရတော့ စိုက်မယ့်လူ မရှိတော့ဘူး။ တချို့လည်း စိုက်ကြတယ်။ မကြောက်တတ်တဲ့လူ နည်းနည်းပါးပါးပေါ့။”   အလားတူ ဘီလူးချောင်း အရှေ့ဘက်ခြမ်းရှိ လယ်ကွင်းများမှာ စစ်တပ် လက်အောက်ခံ တပ်စခန်းများနှင့် နီးကပ် နေခြင်း၊ မိုးဗြဲဆည်မှ စိုက်ပျိုးရေရရှိနိုင်မှု အာမခံချက်မရှိခြင်း၊ ဒေသခံအများစု စစ်ဘေးရှောင်နေရခြင်းတို့အပြင် ဓာတ်မြေဩဇာ၊ ပိုးသတ်ဆေးနှင့် စက်သုံးဆီ ဈေးနှုန်းများ ၃ ဆခန့်အထိ မြင့်တက်လာခြင်းတို့ကြောင့် တောင်သူ များ မိုးစပါး မစိုက်ပျိုးနိုင်ကြခြင်း ဖြစ်သည်။   ထို့ပြင် စစ်တပ်က လယ်ကွင်းအတွင်း သွားရောက်သည့် တောင်သူများကို လုံခြုံရေးအကြောင်းပြ ပိတ်ပင်ခြင်း၊ ဒရုန်းများဖြင့် စောင့်ကြည့်ခြင်း၊ လယ်ကွင်းအချို့တွင် မြေမြုပ်မိုင်းအန္တရာယ်များ ရှိနေခြင်းနှင့် တောင်သူအချို့ ပေါ်တာဆွဲခံရခြင်းတို့ကြောင့် တောင်သူများ လယ်ယာလုပ်ငန်းခွင်သို့ မဆင်းရဲကြကြောင်း စစ်ဘေးရှောင်များက ပြောသည်။   မိုးဗြဲဒေသ၏ အနာဂတ် စားနပ်ရိက္ခာအခြေအနေအပေါ် ဒေသတွင်း စစ်ဘေးရှောင်အရေး ကူညီဆောင်ရွက်ပေး နေသူ တစ်ဦးကလည်း ယခုကဲ့သို့ သုံးသပ်ပြောဆိုသည်။   “မိုးဗြဲဆိုတာ ဆန်တအားထွက်တဲ့ ဒေသပဲလေ။ ဒီလိုနေရာတောင် မစိုက်နိုင်ဘူးဆိုတော့ လာမယ့်နှစ် ဆန်ဈေးကိုပဲ ခန့်မှန်းလို့ရနေပြီ။ အလုပ်သမားလည်း ခေါ်ရခက်တယ်လို့ ပြောနေကြတာပဲ။ စိုက်တဲ့သူလည်း ခုက အကုန်မရောက်သေးဘူးလေ။ ဒီမိုးရာသီ နည်းနည်းငြိမ်ရင်တော့ တော်တော်များများ ပြန်လာကြမှာပါ။”   မိုးဗြဲမြို့တွင် ရှမ်းမလေး၊ မနောသုခ၊ မနောနီ၊ ကောက်ညင်းဆန်၊ တောင်ယာဆန်နှင့် ဒေသထွက် ရှမ်းဆန်များကို အဓိက စိုက်ပျိုးကြပြီး လက်ရှိ မြေပြင်ပေါက်ဈေးအရ ဆန်တစ်အိတ်လျှင် ပျှမ်းမျှ မြန်မာကျပ်ငွေ ၁၆၀,၀၀၀ ဝန်းကျင်အထိ ရှိနေကြောင်း ဒေသခံများက ပြောသည်။   #မိုးဗြဲမြို့ #မိုးစပါး #စစ်ဘေးရှောင်  

မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ်


မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ …

  • May 14, 2026
ကျောင်းဖွင့်ခါနီးတွင် တနင်္သာရီရှိ စာသင်ကျောင်းကို စစ်တပ် လေကြောင်းမှဗုံးကြဲ

 သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၄ ရက်။   တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ် အတွင်းရှိ တကူကျေးရွာ အထက်တန်းကျောင်းကို စစ်တပ်က လေကြောင်းမှ ဗုံးကြဲတိုက်ခိုက်ခဲ့ရာ စာသင်ကျောင်းဆောင် နှစ်ဆောင် ပြင်းထန်စွာ ပျက်စီးသွားခဲ့ကြောင်း ဒေသခံရွာသားများက ပြောသည်။   မေလ ၁၃ ရက်နေ့၊ နံနက် ၁၀ နာရီဝန်းကျင်ခန့်တွင် မြေပြင်၌ တစ်စုံတစ်ရာ တိုက်ပွဲဖြစ်ပွားခြင်းမရှိဘဲ စစ်တပ်က တိုက်လေယာဉ်နှစ်စီးဖြင့် လာရောက်ဗုံးကြဲခဲ့ခြင်းဖြစ်ပြီး ကျောင်းဝင်းအတွင်းရှိ ကျောင်းဆောင် ၅ ဆောင်အနက် နှစ်ထပ်စာသင်ဆောင် တစ်ဆောင်နှင့် ရုံးခန်းပါရှိသည့် ကျောင်းဆောင်တို့ ပျက်စီးသွားခဲ့ရသည်။   ယင်းဖြစ်စဉ်နှင့်ပတ်သက်၍ အသက် ၅၀ အရွယ် ဒေသခံရွာသားတစ်ဦးက “ဝုန်း ဆိုပြီး အသံကြီး တစ်ချက် ကြားရတယ်။ ပြီးတာနဲ့ ပွိုင့်ဖိုက် (Point 5) ပစ်တဲ့အသံလည်း ကြားရတယ်။ ကျောင်းဖွင့်နေတဲ့ အချိန် မဟုတ် တော့ တော်သေးတာပေါ့” ဟု ပြောသည်။   ထို့ပြင် ထိုနေ့ နေ့လယ် ၁၂ နာရီ အချိန်ခန့်တွင်လည်း ကျေးရွာအနီးသို့ တိုက်လေယာဉ်တစ်စင်း ထပ်မံ ပျံသန်းလာ ခဲ့သော်လည်း ဗုံးကြဲတိုက်ခိုက်မှု ထပ်မံပြုလုပ်ခဲ့ခြင်းမရှိကြောင်း ၎င်းဒေသခံက ဆက်ပြောသည်။   လက်ရှိတွင် ကျောင်းဖွင့်ရာသီ ရောက်ရှိရန် နီးကပ်လာနေသည့်အချိန်၌ ယခုကဲ့သို့ စာသင်ကျောင်းများအထိ လေကြောင်းမှ ပစ်မှတ်ထားတိုက်ခိုက်ခံနေရခြင်းကြောင့် ကျောင်းသားမိဘများနှင့် ဒေသခံများအကြား သားသမီးများ၏ ပညာရေးနှင့် ဘေးကင်းလုံခြုံရေးအတွက် စိုးရိမ်ပူပန်မှုများ လွန်စွာမြင့်တက်နေကြသည်။   စစ်တပ်သည် တကူကျေးရွာအတွင်း မြေပြင်တိုက်ပွဲများ မရှိဘဲ ဝေဟင်မှနေ၍ မကြာခဏဆိုသလို ဗုံးကြဲ တိုက်ခိုက်လေ့ရှိရာ ပြီးခဲ့သည့် မတ်လ ၁ ရက်နေ့မှ ယနေ့ မေလလယ်အထိ ၎င်းကျေးရွာတစ်ရွာတည်းကိုပင် လေကြောင်းမှ (၄) ကြိမ်ထက်မနည်း ဗုံးကြဲတိုက်ခိုက်ခဲ့ပြီး ဖြစ်သည်။   ထိုသို့ ရက်ဆက် လေကြောင်းမှ တိုက်ခိုက်နေမှုများကြောင့် တကူကျေးရွာအတွင်း နေထိုင်သည့် အရပ်သား ပြည်သူ ၃ ဦး သေဆုံးကာ ၃ ဦး ထိခိုက်ဒဏ်ရာရရှိခဲ့သည်။   အလားတူ ဒေသခံပြည်သူများ၏ လူနေအိမ် ၃ ဆောင်လည်း လက်နက်ကြီးနှင့် ဗုံးစထိမှန်ကာ ပျက်စီးဆုံးရှုံးခဲ့ရ ကြောင်း ရွာသားများက ပြောသည်။   #တနင်္သာရီ #တကူးကျေးရွာ

ကျောင်းဖွင့်ခါနီးတွင် တနင်္သာရီရှိ စာသင်ကျောင်းကို စစ်တပ် လေကြောင်းမှဗုံးကြဲ


ကျောင်းဖွင့်ခါနီးတွင် တနင်္သာရီရှိ စာသင်ကျောင်းကို စစ်တပ် လေကြောင်းမှဗုံးကြဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၄ ရက်။ တနင်္သာရီတိုင်း၊…

  • May 14, 2026
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၃ ရက်။   မြစ်ဆုံစီမံကိန်း ပြန်လည်စတင်ခြင်းသည် ငြိမ်းချမ်းရေးနှင့် ပိုမို အလှမ်းဝေး သွားစေမည်ဖြစ်သည့်အပြင် ဒေသခံများအတွက် အကျိုးဖြစ်မည်မဟုတ်သည့် အတွက် စီမံကိန်းကို လုံးဝဖျက်သိမ်းရန် ကချင်ဒေသခံများနှင့် အရပ်ဘက်အဖွဲ့အစည်းများက တောင်းဆိုထားသည်။   မြန်မာနိုင်ငံတစ်ဝန်း စစ်ပဋိပက္ခများ ပြင်းထန်နေသည့်ကာလအတွင်း ဧရာဝတီမြစ်ဆုံရေကာတာ စီမံကိန်းကို အတင်းအဓမ္မ ပြန်လည် အကောင်အထည်ဖော်ရန် ကြိုးပမ်းခြင်းသည် ငြိမ်းချမ်းရေးနှင့် ပိုမိုအလှမ်းဝေးသွား စေမည်ဟု ကချင် ဒေသခံများက ပြောသည်။   ၂၀၁၁ ခုနှစ်ကတည်းက ရပ်ဆိုင်းထားသည့် အဆိုပါစီမံကိန်းကို ပြန်လည်စတင်နိုင်ရေးအတွက် စစ်အုပ်စုက ကော်မရှင်ဖွဲ့စည်းကာ ဒေသတွင်း၌ စည်းရုံးရေးဆင်းနေမှုများအပေါ် ကချင်အရပ်ဘက်အဖွဲ့အစည်း ၄၉ ဖွဲ့က မေလ ၅ ရက်နေ့တွင် ထုတ်ပြန်ချက်တစ်စောင် ထုတ်ပြန်ကာ ကန့်ကွက်ခဲ့သည်။   ထုတ်ပြန်ချက်၏ ပြောရေးဆိုခွင့်ရှိသူ ဆိုင်းမိုင်က “ဒီလိုမျိုး ရင်းနှီးမြှုပ်နှံမှု အကြီးစားစီမံကိန်းတွေ သူတို့ လုပ်နေမယ်ဆိုရင် ငြိမ်းချမ်းရေး ဆွေးနွေးမှုစကားဝိုင်း၊ နိုင်ငံရေး ဆွေးနွေးမှုစကားဝိုင်းက ပိုပြီးတော့ အလှမ်း ဝေးသွားမှာ ဖြစ်တယ်။ ပြည်သူကို မျက်နှာမူတဲ့ အစိုးရတစ်ရပ်ဆိုရင် ငြိမ်းချမ်းရေးနဲ့ နိုင်ငံရေး ဆွေးနွေးမှုကိုပဲ ဦးစားပေးအနေနဲ့ လုပ်ဆောင်မှာ ဖြစ်တယ်။ ဒီလိုမတည်မငြိမ်မှုကို အခြေခံပြီးတော့ ဒီလိုအကြီးစား ရင်းနှီး မြှုပ်နှံမှုတွေကို အတင်းအဓမ္မ လုပ်ဆောင်သွားမယ်ဆိုရင် အဲဒီအတွက် ပဋိပက္ခ ပိုပြီးဖြစ်လာစေနိုင်မှာ ဖြစ်ပါ တယ်” ဟု ပြောသည်။   စီမံကိန်းကြောင့် အလုပ်အကိုင် အခွင့်အလမ်းများ ရရှိမည်ဟု စည်းရုံးပြောဆိုနေမှုများနှင့် ပတ်သက်၍လည်း ဆိုင်းမိုင်က ယခုကဲ့သို့ ဆက်ပြောသည်။   “စီမံကိန်းရဲ့ အကျိုးအမြတ် ပြည်သူတွေ မြင်ရမယ် အလုပ်အကိုင်ရမယ် ပြောတာ အခု ဒီ Suspension ပေါ့ နော်။ ရပ်ဆိုင်းမထားခင် ကတည်းက နေပြီးတော့ သူတို့ရဲ့ ဆောက်လုပ်ရေး ကုမ္ပဏီကို တရုတ်ပြည်သူတွေပဲ ခေါ်လာတယ်။ ထမင်းချက်ကအစ သူတို့နိုင်ငံကပဲ ခေါ်လာတာ။ ကိုယ့်နိုင်ငံက လူဆိုလို့ တကယ့် အလုပ်ကြမ်း လောက်ပဲ သူတို့ ခန့်ထားတာတွေ တွေ့ရတယ်။ ဒေသခံတွေဆို အနားကပ်လို့တောင် မရဘူး။ ဂိတ်တွေနဲ့ အလီလီ ချထားတယ်။ ဆိုတော့ ဒီလိုမျိုးနေရာမှာ ဘာမျှော်လင့်နေလဲ။”   ထို့ပြင် စီမံကိန်းမှ ရရှိမည့် အကျိုးအမြတ်များသည် တရုတ်နိုင်ငံသို့ အကြွေးဆပ်ရန်နှင့် စစ်လက်နက်ပစ္စည်း ဝယ်ယူရေးအတွက်သာ ဖြစ်နိုင်ကြောင်းနှင့် လက်ရှိတွင်လည်း မြစ်ဆုံအနီးတဝိုက်၌ ရွှေတူးဖော်မှုများကြောင့် သဘာဝပတ်ဝန်းကျင် ပျက်စီးမှုများ ကြုံတွေ့နေရကြောင်း ကချင်အရပ်ဘက် အဖွဲ့အစည်းများက ထောက်ပြ ထားသည်။   ကချင်လူ့အခွင့်အရေး စောင့်ကြည့်ရေးအဖွဲ့ (KHRW) မှ ဂျေကော့ကလည်း “နိုင်ငံတကာကို တောင်းဆိုချင်တာ က ပြည်သူလူထုနဲ့အတူ ရပ်တည်ပေးဖို့ တောင်းဆိုချင်ပါတယ်။ နောက်တစ်ခုကတော့ တရုတ်အစိုးရရော ပြည်သူလူထုရဲ့ အသံကို နားထောင်ပေးဖို့ တောင်းဆိုချင်ပါတယ်။ အခုလိုမျိုး အန္တရာယ်ကြီးမားတဲ့ စီမံကိန်းကို အမြန်ဆုံး ရပ်တန့်ပေးဖို့ ကျနော်တို့အနေနဲ့ တောင်းဆိုချင်ပါတယ်” ဟု တိုက်တွန်းထားသည်။   တရုတ်အစိုးရပိုင် ကုမ္ပဏီ (SPIC-YN) အနေဖြင့် ပြည်သူလူထု၏ ဆန္ဒကို လေးစားရန်နှင့် မည်သည့် အစိုးရ လက်ထက်တွင်မဆို ပြည်သူ့သဘောထား မပါသည့် ဖွံ့ဖြိုးရေး အမည်ခံ ရင်းနှီးမြှုပ်နှံမှုများကို အတင်းအဓမ္မ လုပ်ဆောင်ခြင်းမပြုရန် အရပ်ဘက်အဖွဲ့အစည်းများက စုပေါင်းတောင်းဆိုထားကြသည်။   #မြစ်ဆုံရေအားလျှပ်စစစ်စီမံကိန်း #မြစ်ဆုံရေကာတာ  

မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်

မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  မြစ်ဆုံစီမံကိန်…

  • May 13, 2026
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၃ ရက်။   မိုးရက်ဆက်ရွာသွန်းမှုကြောင့် ရှမ်းအရှေ့ပိုင်း ရော်ဘာခြံလုပ်သားများ စားဝတ်နေရေး ခက်ခဲလာနေသည်ဟု ပြောသည်။   ရှမ်းပြည် အရှေ့ပိုင်း၊ မိုင်းဆတ်နှင့် မိုင်းလားမြို့နယ်များအတွင်း မေလဒုတိယပတ်အတွင်း မိုးရက်ဆက် ရွာသွန်း မှုများကြောင့် ရော်ဘာစေးခြစ်ခြင်းလုပ်ငန်းများ ရပ်ဆိုင်းထားရပြီး ရွှေ့ပြောင်းလုပ်သားများမှာ စားဝတ်နေရေး ရပ်တည်ရန် အခက်အခဲကြုံနေကြောင်း ဒေသတွင်း သတင်းရင်းမြစ်များက ပြောသည်။   ရော်ဘာစေးခြစ်သည့်လုပ်ငန်းမှာ မိုးရွာသွန်းပါက ရော်ဘာစေးနှင့် မိုးရေရောနှောကာ အရည်အသွေး ကျဆင်း ခြင်းနှင့် အစေးထွက်နှုန်း လျော့နည်းခြင်းတို့ကြောင့် မိုးတစ်ကြိမ်ရွာလျှင် အနည်းဆုံး (၃) ရက်ခန့် လုပ်ငန်းရပ်နား ရလေ့ရှိသည်။   လက်ရှိတွင် မိုးရက်ဆက်ရွာသွန်းနေသည်မှာ တစ်ပတ်ခန့်ရှိပြီဖြစ်ရာ လုပ်သားများမှာ ဝင်ငွေ ပြတ်တောက်လာ နေခြင်း ဖြစ်သည်။   မြန်မာပြည်အလယ်ပိုင်းမှ လာရောက်လုပ်ကိုင်သည့် ရော်ဘာခြံလုပ်သားတစ်ဦးက “တရုတ်ပိုက်ဆံနဲ့ သုံးရတော့ တခေါက်တခေါက် နားရရင် မလွယ်ဘူးလေ။ အိမ်စရိတ်၊ စားစရိတ်တွေက ဗမာပြည်နဲ့ယှဉ်ရင် ၃ ဆလောက် များတယ်။ မိုးဒီတိုင်း ဆက်နေရင်တော့ တချို့က ပြန်ကြမယ် ထင်တယ်” ဟု ပြောသည်။   ရှမ်းပြည် အရှေ့ပိုင်းရှိ ရော်ဘာလုပ်ငန်းခွင်များတွင် လုပ်သားတစ်ဦးလျှင် တစ်လပျမ်းမျှ တရုတ်ယွမ်ငွေ (၆,၀၀၀) ခန့် ရရှိသော်လည်း၊ နယ်စပ်ဒေသ၏ ကုန်ဈေးနှုန်းကြီးမြင့်မှုကြောင့် နေထိုင်စားသောက်စရိတ်များ ဖယ်ထုတ်ပါက ယွမ် (၂,၀၀၀) ဝန်းကျင် (ကျပ် ၁၂ သိန်းကျော်) သာ ကျန်ရှိသည်ဟု ဆိုသည်။   အလုပ်အကိုင်ရှားပါးမှုကြောင့် နယ်စပ်ဒေသသို့ လာရောက်လုပ်ကိုင်သူ တိုးပွားလာသည်နှင့်အမျှ လုပ်ငန်းခွင် အတွင်း အခွင့်အရေး ချိုးဖောက်ခံရမှုများလည်း ရှိနေကြောင်း လုပ်သားများက ဆိုသည်။   အခြားရော်ဘာခြံလုပ်သားတစ်ဦးကလည်း “မနက် တစ်နာရီ နှစ်နာရီလောက်ကတည်းက ထခြစ်ရတယ်။ အလုပ်များတဲ့လမှ (ယွမ်) သုံးလေးထောင်လောက် ကျန်တာ။ ပါးတဲ့လဆို အနိုင်နိုင်။ မိုးလုံးလုံးရွာတဲ့လတွေဆို အိမ်ကို တစ်ပြားမှ မပို့နိုင်ဘူး” ဟု ပြောသည်။   လက်ရှိတွင် ရော်ဘာတစ်တန်လျှင် တရုတ်ယွမ်ငွေ (၁၂,၀၀၀) ဝန်းကျင်အထိ ဈေးကွက်ပေါက်ဈေး ကောင်းမွန် နေသော်လည်း၊ မိုးဆက်လက်ရွာသွန်းနေပါက အရည်အသွေးပိုင်းဆိုင်ရာ အားနည်းချက်များကြောင့် ဈေးနှုန်း ပြန်လည်ကျဆင်းလာနိုင်ပြီး လုပ်သားများ၏ စားဝတ်နေရေးမှာလည်း ရှေ့ဆက်ရန် ပိုမိုခက်ခဲလာနိုင်ကြောင်း ဒေသတွင်း လုပ်ငန်းရှင်များနှင့် လုပ်သားများက ပြောသည်။   #ရာ်ဘာ #ခြံလုပ်သား

အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  မိုးရက်ဆက်ရွာသွန်းမှုကြော…

  • May 13, 2026
ဒု လဝက မှူးကို ပကဖများ ဖမ်းဆီး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၃ ရက်။   တနင်္သာရီတိုင်းဒေသကြီး၊ ထားဝယ်ခရိုင်၊ သရက်ချောင်းမြို့နယ်ရှိ လူဝင်မှုကြီးကြပ်ရေးဦးစီးဌာနမှ ဒုလဝကမှူး အမျိုးသမီးတစ်ဦးကို ပြည်သူ့ကာကွယ်ရေးတပ်ဖွဲ့က ဖမ်းဆီးလိုက်သည်။   ပြီးခဲ့သည့် မေလ ၁၀ ရက်နေ့ နံနက်ပိုင်းက သရက်ချောင်းမြို့မှ ထားဝယ်မြို့သို့ ဆိုင်ကယ်ဖြင့် ထွက်ခွာလာသည့် ဒုလဝကမှူး ဒေါ်မေဂျာသော်ကို ရန်တောင်ကျေးရွာနှင့် ညောင်ဇင်ကျေးရွာအကြားရှိ တောက်ထိန်တောင်ဘုရား အနီး၌ ပြည်သူ့ကာကွယ်ရေးတပ်မတော် PDF ဗျူဟာ ၃၃-၃၄ အဖွဲ့က ဖမ်းဆီးခဲ့ခြင်း ဖြစ်သည်။   အဆိုပါ ဖမ်းဆီးမှုနှင့် ပတ်သက်၍ PDF ဗျူဟာ ၃၃-၃၄ ၏ တာဝန်ရှိသူတစ်ဦးက “သရက်ချောင်းမြို့နယ် လူဝင်မှုကြီးကြပ်ရေးဦးစီးဌာနက ဒုလဝကမှူးတစ်ဦးကို မြိတ်-ထားဝယ်ကားလမ်းပေါ်မှာ ဖမ်းဆီးရမိခဲ့တာ မှန်ပါတယ်” ဟု အတည်ပြု ပြောသည်။   အသက် ၄၀ ဝန်းကျင်အရွယ်ရှိ ဒေါ်မေဂျာသော်သည် သရက်ချောင်းမြို့နယ် လဝကရုံးတွင် တာဝန်ထမ်းဆောင် နေသူဖြစ်ပြီး သူမ၏ အမျိုးသားဖြစ်သူမှာလည်း တိုင်းလဝကရုံးတွင် တာဝန်ထမ်းဆောင်နေသည့် Non-CDM ဝန်ထမ်းတစ်ဦးဖြစ်ကြောင်း နီးစပ်သူများက ပြောသည်။   ၎င်းသည် ဖခင်ဖြစ်သူ ကျန်းမာရေးမကောင်းသဖြင့် ဆေးဝါးဝယ်ယူရန် ထားဝယ်မြို့သို့ သွားရောက်စဉ် လမ်းခရီး ၌ ဖမ်းဆီးခံခဲ့ရခြင်းဖြစ်ကြောင်း နီးစပ်သူတစ်ဦးက ဆိုသည်။   ၎င်းနီးစပ်သူက “ဒေါ်မေဂျာသော်ရဲ့ဖခင်ဖြစ်သူ ဦးသောင်းမြင့် ကျန်းမာရေးမကောင်းတာကြောင့် ဆေးဝါး ဝယ် ယူဖို့ ထားဝယ်ကို ဆိုင်ကယ်နဲ့သွားတာ လမ်းမှာအဖမ်းခံရတာ။ ညနေ ၃ နာရီလောက်မှ အဖမ်းခံရတာကို သိရ တယ်” ဟု ပြောသည်။   မြိတ်-ထားဝယ် ကားလမ်းတစ်လျှောက်တွင် ယခုကဲ့သို့ Non-CDM ဝန်ထမ်းများ မကြာခဏ ဖမ်းဆီးခံရလေ့ ရှိပြီး အချို့မှာ စစ်ဆေးမေးမြန်းပြီးနောက် ပြန်လည်လွတ်မြောက်လာလေ့ရှိသော်လည်း၊ ဒေါ်မေဂျာသော်၏ လက်ရှိအခြေအနေနှင့် ပတ်သက်၍မူ သက်ဆိုင်ရာ တော်လှန်ရေးအင်အားစုများဘက်က တစ်စုံတစ်ရာ ထုတ်ပြန် ခြင်း မရှိသေးပေ။   #ပကဖ #လူဝင်မှုကြီးကြပ်ရေးဦးစီးဌာန

ဒု လဝက မှူးကို ပကဖများ ဖမ်းဆီး

ဒု လဝက မှူးကို ပကဖများ ဖမ်းဆီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  တနင်္သာရီတိုင်းဒေသကြီး၊ ထားဝယ်ခရိုင်၊ သရက်ချောင်းမြို့နယ…

  • May 13, 2026
ထိုင်း-ကမ္ဘောဒီးယား နယ်စပ် ပစ်ခတ်မှု အချို့ ဖြစ်ပွား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၃ ရက်။   ထိုင်းကမ္ဘောဒီးယား နယ်စပ် အိုစမတ် (O Smach) နယ်စပ်တလျှောက် နေရာအချို့တွင် ယနေ့ ဗုဒ္ဓဟူးနေ့ညနေပိုင်းက ကမ္ဘောဒီးယားတပ်ဖွဲ့ဝင်များဘက်မှ သေနတ် ၁၁ ချက် ပစ်ခတ်ခဲ့ကြောင်း ထိုင်းတော်ဝင်စစ်တပ်၊ အမှတ် ၂ စစ်ဒေသက ထုတ်ပြန်ကြေညာ လိုက်သည်။   လက်ရှိတွင် ထိုင်း နယ်စပ်လုံခြုံရေးတပ်ဖွဲ့ဝင်များက ၂၄ နာရီပတ်လုံး စောင့်ကြပ်ကြည့်ရှုလျက်ရှိပြီး အခြေအနေကို ထိန်းချုပ်ထားနိုင်ကြောင်း ထိုင်းအာဏာပိုင်များက ပြောကြားခဲ့သည်ဟု Khaosod သတင်းဌာနက ထုတ်ပြန်သည်။   ယနေ့ အစောပိုင်းတွင်လည်း အိုစမတ်ဝင်ပေါက်လမ်းအနီးရှိ ဆူးကြိုးခြံစည်းရိုးသို့ အနောက်နိုင်ငံသားတစ်ဦး ချဉ်းကပ်လာသည်ကို တွေ့ရှိရသဖြင့် ထိုင်းတာဝန်ရှိသူများက သတိပေးပစ်ခတ်မှု နှစ်ချက် ပြုလုပ်ခဲ့သည်။   နယ်စပ်ဒေသအတွင်း ကျူးကျော်ဝင်ရောက်မှုများကို တားဆီးရန်နှင့် နယ်စပ်လုံခြုံရေးကို ထိခိုက်စေနိုင်သည့် နားလည်မှုလွဲမှားမှုများ မဖြစ်ပွားစေရန်အတွက် ယခုကဲ့သို့ ဆောင်ရွက်ခဲ့ခြင်းဖြစ်ကြောင်း အာဏာပိုင်များက အတည်ပြုပြောကြားထားပါသည်။   O Smach မြို့မှာ ကမ္ဘောဒီးယား နိုင်ငံ အနောက်မြောက်ပိုင်းရှိ နယ်စပ်မြို့ငယ်လေး ဖြစ်သည်။ ထိုင်းနိုင်ငံ၊ ဆူရင်ခရိုင် (Surin Province) မှ Chong Chom (ချောင်ချွန်) နယ်စပ်ဂိတ်နှင့် တိုက်ရိုက်ထိစပ်နေသည့် အပြည်ပြည်ဆိုင်ရာ နယ်စပ်ဂိတ်တစ်ခု ဖြစ်သည်။   ထိုင်းနိုင်ငံမှ ကမ္ဘောဒီးယားနိုင်ငံသို့ ကုန်းလမ်းမှ ဝင်ရောက်ဖရန်အတွက် အဓိကအသုံးပြုသော ဂိတ်များထဲမှ ဂိတ်တစ်ခု ဖြစ်သည်။   ဤနယ်စပ်ဂိတ်နေရာကို ကာစီနိုရုံများ၊ ဟိုတယ်များနှင့် နယ်စပ်အရောင်းအဝယ် လုပ်ငန်းများကြောင့် လူသိများသည်။    #OSmach #Thaicambodiaborder #Thailand #Combodia

ထိုင်း-ကမ္ဘောဒီးယား နယ်စပ် ပစ်ခတ်မှု အချို့ ဖြစ်ပွား

ထိုင်း-ကမ္ဘောဒီးယား နယ်စပ် ပစ်ခတ်မှု အချို့ ဖြစ်ပွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  ထိုင်းကမ္ဘောဒီးယား နယ်စပ် အိုစမတ် …

  • May 13, 2026
နစ်မြုပ်သွားသည့် ရုရှားကုန်တင်သင်္ဘော နျူကလီးယား ဓါတ်ပေါင်းဖို သယ်ဆောင်လာ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၁၃ ရက်။       စပိန်နိုင်ငံ၊ ကာတာဂျီးနား (Cartagena) ကမ်းလွန်တွင် ပဟေဠိဆန်စွာ နစ်မြုပ်သွားခဲ့သည့် ရုရှားကုန်တင်သင်္ဘော "Ursa Major" သည် မြောက်ကိုရီးယားသို့ နျူကလီးယားရေငုပ်သင်္ဘော နည်းပညာများ သယ်ဆောင်သွားခြင်းဖြစ်နိုင်ကြောင်း CNN သတင်းဌာန၏ စုံစမ်းဖော်ထုတ်ခဲ့သည်။   ၂၀၂၄ ခုနှစ်၊ ဒီဇင်ဘာလက ပေါက်ကွဲမှု ဖြစ်ပွားခဲ့ပြီး နစ်မြုပ်သွားခဲ့သော ၎င်းသင်္ဘောသည် ရေငုပ်သင်္ဘောသုံး နျူကလီးယားဓာတ်ပေါင်းဖို နှစ်လုံးကို တင်ဆောင်လာခြင်းဖြစ်ပြီး မြောက်ကိုရီးယား၏ ရာဆန် (Rason) ဆိပ်ကမ်းသို့ ဦးတည်နေခြင်းဖြစ်ကြောင်း သင်္ဘောကပ္ပတိန်က ဝန်ခံခဲ့သည်။   ဤဖြစ်စဉ်သည် ရုရှားက ယူကရိန်းစစ်ပွဲအတွက် မြောက်ကိုရီးယားစစ်သားများကို အလဲအလှယ်အဖြစ် နျူကလီးယားနည်းပညာ ပံ့ပိုးပေးခြင်းဖြစ်နိုင်ကြောင်း သံသယများ ထွက်ပေါ်နေသည်။   အဆိုပါသင်္ဘောသည် ရှားပါးသည့် တော်ပီဒိုတစ်မျိုးဖြင့် တိုက်ခိုက်ခံရခြင်းဖြစ်နိုင်ပြီး၊ အနောက်အုပ်စုက နည်းပညာလွှဲပြောင်းမှုကို ကြားဖြတ်ဟန့်တားခဲ့ခြင်း ဖြစ်နိုင်ကြောင်း စုံစမ်းစစ်ဆေးမှုများက ညွှန်းဆိုနေသည်။ #RussiaNuclear #UrsaMajor #Cartagena

နစ်မြုပ်သွားသည့် ရုရှားကုန်တင်သင်္ဘော နျူကလီးယား ဓါတ်ပေါင်းဖို သယ်ဆောင်လာ

နစ်မြုပ်သွားသည့် ရုရှားကုန်တင်သင်္ဘော နျူကလီးယား ဓါတ်ပေါင်းဖို သယ်ဆောင်လာ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  စပိန်နိုင်ငံ…

  • May 13, 2026
×Close