သတင်း

ယူကရိန်းနှင့် အမေရိကန် ဒရုန်းနည်းပညာ သဘောတူညီချက်ရယူမည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၃ ရက်။   ရုရှားနှင့် စစ်ပွဲအတွင်း ဒရုန်းနည်းပညာတွင် ဆန်းသစ်တီထွင်မှုများ ပြုလုပ်ထားသည့် ယူကရိန်းနိုင်ငံသည် ၎င်းတို့၏ ဒရုန်းများကို အမေရိကန်မြေပေါ်တွင် စမ်းသပ်ရန် ပင်တဂွန်စစ်ဌာနချုပ်နှင့် Statement of Intent (SoI) ဟုခေါ်သည့် ရည်ရွယ်ချက်ဖော်ပြချက် မူကြမ်းကို လက်မှတ်ရေးထိုးရန် နီးစပ်နေပြီဖြစ်သည်။   သမ္မတ ဇလန်းစကီး၏ အဆိုအရ လက်ရှိတွင် နိုင်ငံပေါင်း ၂၀ ခန့်သည် ယူကရိန်း၏ ဒရုန်းနည်းပညာကို စိတ်ဝင်စားနေပြီး နိုင်ငံ ၄ နိုင်ငံနှင့် သဘောတူညီချက်များ လက်မှတ်ရေးထိုးပြီးဖြစ်သည်။   ဤသဘောတူညီချက်အရ ယူကရိန်း၏ ကြည်း၊ ရေ၊ လေ ဒရုန်းစနစ်များက အမေရိကန်စစ်တပ်၏ လိုအပ်ချက်များနှင့် ကိုက်ညီမှုရှိ၊ မရှိ စမ်းသပ်သွားမည် ဖြစ်သည်။   တစ်ဖက်တွင်လည်း ယူကရိန်းသမ္မတ ဗိုလိုဒီမာ ဇလန်းစကီးက ယခု အခါ နိုင်ငံပေါင်း ၂၀ နီးပါးသည် ယူကရိန်းနှင့် ဒရုန်းဆိုင်ရာ သဘောတူညီချက်များ လုပ်ဆောင်ရန် စိတ်ဝင်စားနေကြပြီး နိုင်ငံ ၄ နိုင်ငံနှင့်တော့ သဘောတူညီချက်များ လက်မှတ်ရေးထိုးပြီးဖြစ်ကြောင့် မေလ ၁၁ ရက်နေ့က တရားဝင် ပြောကြားခဲ့သည်။   ဧပြီလအတွင်းတွင် ဂျာမနီ၊ နော်ဝေ၊ နယ်သာလန်တို့နဲ့ ကာကွယ်ရေးဆိုင်ရာ သဘောတူညီချက်များ ရယူခဲ့သည်။   အရှေ့အလယ်ပိုင်းက ဆော်ဒီအာရေးဘီးယား၊ ကာတာနဲ့ ယူအေအီးနိုင်ငံများနှင့်လည်း ရေရှည်လုံခြုံရေး မိတ်ဖက်အဖြစ် ဆောင်ရွက်နေပြီဟု ဆိုထားသည်။   ယခု အမေရိကန်နှင့် ပူးပေါင်းဆောင်ရွက်မှုသည် နောင်တစ်ချိန်တွင် ယူကရိန်းဒရုန်းများကို အမေရိကန်က ဝယ်ယူခြင်း သို့မဟုတ် ပူးပေါင်းထုတ်လုပ်ခြင်းတို့အတွက် အလားအလာကောင်းသည့် ခြေလှမ်းတစ်ရပ် ဖြစ်လာနိုင်သည်။ #UkraineDrone

ယူကရိန်းနှင့် အမေရိကန် ဒရုန်းနည်းပညာ သဘောတူညီချက်ရယူမည်

ယူကရိန်းနှင့် အမေရိကန် ဒရုန်းနည်းပညာ သဘောတူညီချက်ရယူမည်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  ရုရှားနှင့် စစ်ပွဲအတွင်း ဒရုန်…

  • May 13, 2026
အမေရိကန်၊ ဖိလစ်ပိုင်၊ ဂျပန်နှင့် ကနေဒါ တပ်ဖွဲ့များ စစ်လေ့ကျင့်မှုကြီး ပြုလုပ်     သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၃ ရက်။   သမ္မတ ထရန့်၏ ပီကင်းခရီးစဉ်မတိုင်မီလေးတွင် အမေရိကန်၊ ဖိလစ်ပိုင်၊ ဂျပန်နှင့် ကနေဒါနိုင်ငံတို့သည် ယခုနှစ်အတွင်း အကြီးမားဆုံးသော Balikatan 2026 ပူးပေါင်းစစ်ရေးလေ့ကျင့်မှုကို ဖိလစ်ပိုင်နိုင်ငံ၊ မြောက်ပိုင်းလူဇုန်ကမ်းလွန်တွင် ကျည်အစစ်များအသုံးပြုကာ ပြုလုပ်ခဲ့သည်။   MARSTRIKE ဟု အမည်ပေးထားသည့် ၎င်းလေ့ကျင့်ခန်းတွင် မဟာမိတ် လေးနိုင်ငံမှ ခေတ်မီအာရုံခံကိရိယာများ၊ ဒုံးကျည်စနစ်များနှင့် တိုက်လေယာဉ်များကို အသုံးပြု၍ ပင်လယ်ပြင်ရှိ ရန်သူ့ပစ်မှတ်များကို စုပေါင်းချေမှုန်းသည့် စွမ်းရည်ကို စမ်းသပ်ခဲ့ကြသည်။   လေ့ကျင့်မှုအတွင်း ဖိလစ်ပိုင်ရေတပ်သင်္ဘောဟောင်းနှစ်စင်းကို ဂျပန်၏ Type-88 သင်္ဘောဖျက်ဒုံးကျည်၊ အမေရိကန်၏ HIMARS ဒုံးပစ်စင်များနှင့် ဖိလစ်ပိုင်လေတပ်၏ တိုက်လေယာဉ်များက ပစ်ခတ်နှစ်မြှုပ်ခဲ့သည်။     ဤစစ်ရေးလေ့ကျင့်မှုသည် အင်ဒို-ပစိဖိတ်ဒေသ လွတ်လပ်ပြီး ပွင့်လင်းစေရေးအတွက် မဟာမိတ်များ၏ ခိုင်မာသည့် ရပ်တည်ချက်ကို ပြသလိုက်ခြင်းဖြစ်သည်ဟု ဆိုသည်။ #Balikatan2026

အမေရိကန်၊ ဖိလစ်ပိုင်၊ ဂျပန်နှင့် ကနေဒါ တပ်ဖွဲ့များ စစ်လေ့ကျင့်မှုကြီး ပြုလုပ်

အမေရိကန်၊ ဖိလစ်ပိုင်၊ ဂျပန်နှင့် ကနေဒါ တပ်ဖွဲ့များ စစ်လေ့ကျင့်မှုကြီး ပြုလုပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။  သမ္မတ ထရန့်၏ ပ…

  • May 13, 2026
ဒေါ်နယ်ထရန့် တရုတ်ခရီးစဉ် မတိုင်မီ ဘဏ္ဍာရေး ဝန်ကြီးက ဂျပန်နှင့် ကိုရီးယားတွင် ပြင်ဆင်မှုလုပ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၃ ရက်။   အမေရိကန် သမ္မတ ဒေါ်နယ်ထရန့်သည် တရုတ်သမ္မတ ရှီကျင့်ပင်နှင့် တွေ့ဆုံဆွေးနွေးရန်အတွက် ယနေ့တွင် ပီကင်း (Beijing) သို့ တရားဝင်ခရီးစဉ် စတင်မည်ဖြစ်သည်။   ဤခရီးစဉ်အတွင်း နှစ်နိုင်ငံအကြား တင်းမာနေသည့် စစ်ရေး၊ ကူးသန်းရောင်းဝယ်ရေး၊ အခွန်အကောက်ဆိုင်ရာ မူဝါဒများနှင့် အရေးပါသည့် ဉာဏ်ရည်တု (AI) အသုံးပြုမှုဆိုင်ရာ ကိစ္စရပ်များကို အလေးထား ဆွေးနွေးသွားမည်ဟု အိမ်ဖြူတော်က ထုတ်ပြန်ထားသည်။   သမ္မတ၏ ခရီးစဉ်မတိုင်မီ ကြိုတင်ပြင်ဆင်မှုများအတွက် အမေရိကန် ဘဏ္ဍာရေးဝန်ကြီး စကော့ ဘက်ဆင့်န် (Scott Bessent) သည် အာရှမိတ်ဖက်နိုင်ငံများနှင့် တွေ့ဆုံလျက်ရှိသည်။   ဝန်ကြီး ဘက်ဆင့်န်သည် အင်္ဂါနေ့က ဂျပန်ဝန်ကြီးချုပ် တာကာအီချီ၊ ဘဏ္ဍာရေးဝန်ကြီး ကာတာယားမားတို့နှင့် တွေ့ဆုံခဲ့ပြီး ငွေလဲလှယ်နှုန်း တည်ငြိမ်စေရေးအတွက် နှစ်နိုင်ငံ ဘဏ္ဍာရေးဌာနများအကြား အမြဲတစေ နီးကပ်စွာ ဆက်သွယ်ဆောင်ရွက်သွားရန် သဘောတူညီခဲ့ကြသည်။   ၎င်းက ဂျပန်နိုင်ငံ၏ စီးပွားရေး အခြေခံအချက်အလက်များ ခိုင်မာမှုသည် ငွေလဲလှယ်နှုန်းအပေါ် ကောင်းမွန်စွာ ရောင်ပြန်ဟပ်လာမည်ဖြစ်ကြောင်း မှတ်ချက်ပြုခဲ့သည်။     ဝန်ကြီးသည် ယနေ့တွင် တောင်ကိုရီးယားနိုင်ငံ၊ ဆိုးလ်မြို့၌ တရုတ် ဒုတိယဝန်ကြီးချုပ် ဟဲလီဖုန်း (He Lifeng) နှင့် ဆက်လက်တွေ့ဆုံမည်ဖြစ်ကာ၊ ကြာသပတေးနေ့တွင် ပီကင်းသို့ သွားရောက်၍ သမ္မတ ထရန့်၏ ခရီးစဉ်တွင် ပူးပေါင်းပါဝင်မည်ဖြစ်သည်။ #Japan #US #Korea

ဒေါ်နယ်ထရန့် တရုတ်ခရီးစဉ် မတိုင်မီ ဘဏ္ဍာရေး ဝန်ကြီးက ဂျပန်နှင့် ကိုရီးယားတွင် ပြင်ဆင်မှုလုပ်

ဒေါ်နယ်ထရန့် တရုတ်ခရီးစဉ် မတိုင်မီ ဘဏ္ဍာရေး ဝန်ကြီးက ဂျပန်နှင့် ကိုရီးယားတွင် ပြင်ဆင်မှုလုပ်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၃ ရက်။&nb…

  • May 13, 2026
ဗြိတိန်ဝန်ကြီးချုပ် ကီယာ စတာမာအား နှုတ်ထွက်ရန် ဖိအားပေး   သတင်းနှင့် မီဒီယာကွန်ရက်။
၂၀၂၆ ခုနှစ်၊ မေလ ၁၂ ရက်။   ဗြိတိန်ဝန်ကြီးချုပ် ကီယာ စတာမာ (Keir Starmer) အား ရာထူးမှ နှုတ်ထွက်မည့် အချိန်ဇယား တိကျစွာ ထုတ်ပြန်ရန် ပြည်ထဲရေးဝန်ကြီး ရှာဘာနာ မာမွတ် (Shabana Mahmood) အပါအဝင် အစိုးရအဖွဲ့ဝန်ကြီးအချို့က တောင်းဆိုလိုက်ခြင်းကြောင့် ဗြိတိန်အစိုးရအဖွဲ့ အထက်ပိုင်းတွင် သဘောထားကွဲလွဲမှုများ လူသိရှင်ကြား ပေါ်ပေါက်လာသည်။   ပြည်ထဲရေးဝန်ကြီး မာမွတ်သည် အစိုးရအဖွဲ့အတွင်း လူနည်းစုဘက်မှ ရပ်တည်နေခြင်းဖြစ်သော်လည်း အစိုးရအဖွဲ့၏ အောက်ခြေအဆင့်ဖြစ်သည့် ဝန်ကြီးအဖွဲ့လက်ထောက် ၆ ဦးမှာ ဝန်ကြီးချုပ်အား ရာထူးမှနှုတ်ထွက်ရန် သို့မဟုတ် ဝန်ကြီးချုပ်သစ်ခန့်အပ်ရေး အချိန်ဇယား ထုတ်ပြန်ပေးရန် တောင်းဆိုရင်း ရာထူးမှ အသီးသီးနှုတ်ထွက်သွားကြသည်။   အင်္ဂါနေ့မနက်ပိုင်းအထိ စာရင်းများအရ ဝန်ကြီးချုပ် စတာမာအား ရာထူးမှနှုတ်ထွက်ရန် တောင်းဆိုသည့် လေဘာပါတီ လွှတ်တော်အမတ် အရေအတွက်မှာ ၇၂ ဦးအထိ ရှိလာပြီဖြစ်သည်။   ယခုကဲ့သို့ ဖိအားများရှိနေသော်လည်း ဝန်ကြီးချုပ် စတာမာကမူ ၎င်းသည် မှန်ကန်သည့် နိုင်ငံရေးဆုံးဖြတ်ချက်များကို ချမှတ်ခဲ့သူဖြစ်ကြောင်းနှင့် ရာထူးမှနှုတ်ထွက်မည်မဟုတ်ကြောင်း တုံ့ပြန်ပြောကြားထားသည်။   ဗြိတိန်အစိုးရအဖွဲ့သည် လက်ရှိဖြစ်ပေါ်နေသည့် အခြေအနေများအပေါ် ဆွေးနွေးရန် တရားဝင် တွေ့ဆုံရန်ရှိနေသည်။   #KeirStarmer #ShabanaMahmood

ဗြိတိန်ဝန်ကြီးချုပ် ကီယာ စတာမာအား နှုတ်ထွက်ရန် ဖိအားပေး

ဗြိတိန်ဝန်ကြီးချုပ် ကီယာ စတာမာအား နှုတ်ထွက်ရန် ဖိအားပေး  သတင်းနှင့် မီဒီယာကွန်ရက်။၂၀၂၆ ခုနှစ်၊ မေလ ၁၂ ရက်။  ဗြိတိန်ဝန်ကြီးချုပ် ကီယာ စတာမာ …

  • May 12, 2026
ယူကရိန်းက စစ်ပွဲ အသာစီး ပြန်ရလာ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၂ ရက်။   ရုရှား၏ ကျူးကျော်စစ် စတင်ခဲ့ပြီးနောက်ပိုင်း လေးနှစ်အတွင်း ပထမဆုံးအကြိမ်အဖြစ် စစ်ရေးအသာစီးရမှုမှာ ယူကရိန်းဘက်သို့ စတင်ယိမ်းယိုင်လာနေပြီဖြစ်ကြောင်း စစ်ရေးလေ့လာသူများက သုံးသပ်နေကြသည်။   ယူကရိန်း၏ ဒရုန်းစစ်ဆင်ရေးများ၊ တန်ပြန်တိုက်စစ်များနှင့် ရုရှားနိုင်ငံအတွင်းပိုင်းအထိ ထိုးနှက်တိုက်ခိုက်နိုင်မှုများကြောင့် ရုရှားတပ်ဖွဲ့များမှာ မြေပြင်တွင် အထိနာနေပြီး ထောက်ပံ့ပို့ဆောင်ရေးနှင့် လေကြောင်းရန်ကာကွယ်ရေးပိုင်းတွင် အကြပ်အတည်းများနှင့် ရင်ဆိုင်နေရသည်။   ဗြိတိန်အခြေစိုက် The Economist မဂ္ဂဇင်း၏ ဖော်ပြချက်အရ ရုရှားတပ်ဖွဲ့များသည် စစ်မျက်နှာအနှံ့တွင် ဆုံးရှုံးမှုများနှင့် ကြုံတွေ့နေရသလို ပြီးခဲ့သည့် မေလ ၉ ရက်က မော်စကိုမြို့၌ ကျင်းပသည့် စစ်အောင်ပွဲနေ့ စစ်ရေးပြအခမ်းအနားတွင် စစ်လက်နက်အင်အား အနည်းငယ်သာ ပြသနိုင်ခြင်းမှာ ရုရှား၏ စစ်ရေးစွမ်းဆောင်ရည် ကျဆင်းလာမှုကို ပြသနေခြင်းဖြစ်သည်။   မြေပြင်တိုက်ပွဲများတွင်လည်း ရုရှား၏ နွေဦးတိုက်စစ်မှာ ထင်သလောက် ခရီးမပေါက်ဘဲ ပြီးခဲ့သည့် ဧပြီလအတွင်း၌ပင် ရုရှားတပ်ဖွဲ့များသည် ၎င်းတို့သိမ်းပိုက်ထားသည့် နယ်မြေ စတုရန်းကီလိုမီတာ ၁၁၀ ကျော်ကို ပြန်လည်လက်လွှတ်ခဲ့ရကြောင်း သိရသည်။   ရုရှားသည် တစ်လလျှင် ပျမ်းမျှစစ်သည်အင်အား ၃၅,၀၀၀ ခန့် ဆုံးရှုံးနေပြီး ကျူးကျော်စစ်စတင်ကတည်းက စုစုပေါင်း သေဆုံးနှင့် ဒဏ်ရာရသူအရေအတွက်မှာ ၁ ဒသမ ၄ သန်းအထိ ရှိလာပြီဟု ယူကရိန်းဘက်က ခန့်မှန်းထားသည်။   အထူးသဖြင့် AI နည်းပညာသုံး FPV ဒရုန်းများကြောင့် ရုရှားစစ်သည်များမှာ ရှေ့တန်းတွင် အစုလိုက်အပြုံလိုက် သေဆုံးနေရခြင်းဖြစ်သည်။   ထို့ပြင် ယူကရိန်း၏ အဝေးပစ်ဒရုန်းများမှာ ရုရှားနိုင်ငံအတွင်းပိုင်း ကီလိုမီတာ ၂,၀၀၀ အထိ ထိုးဖောက်တိုက်ခိုက်နိုင်လာသဖြင့် ရုရှားလူဦးရေ၏ ၇၀ ရာခိုင်နှုန်းခန့်မှာ စစ်ပွဲ၏ ခြိမ်းခြောက်မှုကို ခံစားနေရသည်။   စွမ်းအင်ကဏ္ဍတွင်လည်း ရုရှားရေနံချက်စက်ရုံများ တိုက်ခိုက်ခံရမှုကြောင့် ယခုနှစ်အတွင်း ရေနံဝင်ငွေ ဒေါ်လာ ၇ ဘီလီယံခန့် ဆုံးရှုံးခဲ့ရကြောင်း ယူကရိန်းသမ္မတ ဇလန်းစကီးက ပြောကြားထားသည်။   #ယူကရိန်းစစ်ပွဲ #UkraineWar

ယူကရိန်းက စစ်ပွဲ အသာစီး ပြန်ရလာ

ယူကရိန်းက စစ်ပွဲ အသာစီး ပြန်ရလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၂ ရက်။  ရုရှား၏ ကျူးကျော်စစ် စတင်ခဲ့ပြီးနောက်ပိုင်း လေးနှစ်အတွင်း ပ…

  • May 12, 2026
အာဆီယံထိပ်သီးညီလာခံတွင် မြန်မာကိုယ်စားလှယ်အဖြစ် အဆင့်မြင့်အရာရှိသာ တက်ရောက်ခွင့်ရ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၈ ရက်။   ဖိလစ်ပိုင်နိုင်ငံ၊ စီဘူးမြို့၌ ကျင်းပနေသည့် အာဆီယံထိပ်သီးညီလာခံသို့ အဖွဲ့ဝင် (၁၀) နိုင်ငံမှ နိုင်ငံအဆင့် အမြင့်ဆုံးခေါင်းဆောင်များ တက်ရောက်လျက်ရှိသော်လည်း မြန်မာနိုင်ငံမှ နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးဟောက်ခန်ဆွမ် သာ တက်ရောက်ခွင့်ရရှိခဲ့သည်။   မြန်မာနိုင်ငံသည် အာဆီယံ၏ ဘုံသဘောတူညီချက် (၅) ရပ်ကို လိုက်နာရန် ပျက်ကွက်ခြင်းကြောင့် နိုင်ငံရေးအရ ကိုယ်စားပြုသူ တက်ရောက်ခွင့် မရခြင်းဖြစ်သည်။   ညီလာခံတွင် မြန်မာ့အရေးနှင့် ပတ်သက်၍ ထိုင်း၊ ကမ္ဘောဒီးယား၊ လာအိုနှင့် ဗီယက်နမ်တို့က ထိတွေ့ဆက်ဆံလိုသော်လည်း စင်ကာပူ၊ မလေးရှားနှင့် အင်ဒိုနီးရှားတို့က သိသာသော တိုးတက်မှုမရှိမချင်း စစ်ကောင်စီကို အသိအမှတ်ပြုရန် လက်မခံသေးကြောင်း သုံးသပ်ချက်များ ထွက်ပေါ်နေသည်။   အလားတူ မေလ ၉ ရက်နေ့တွင် ကျင်းပမည့် ရုရှားနိုင်ငံ၏ ဒုတိယကမ္ဘာစစ် အောင်ပွဲနေ့ အခမ်းအနားတွင်လည်း မြန်မာနိုင်ငံမှ နိုင်ငံရေးခေါင်းဆောင်များ တက်ရောက်မည့် စာရင်းတွင် ပါဝင်ခြင်း မရှိကြောင်း သိရသည်။   #အာဆီယံ #aseansummit2026

မြန်မာအပေါ် အာဆီယံက ဘုံသဘောတူညီချက် ၅ ရပ်အတိုင်း ဆက်လက်ကိုင်စွဲသွားမည်

မြန်မာအပေါ် အာဆီယံက ဘုံသဘောတူညီချက် ၅ ရပ်အတိုင်း ဆက်လက်ကိုင်စွဲသွားမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၂ ရက်။  ဖိလစ်ပိုင်နိုင်င…

  • May 12, 2026
ကယ်လီဖိုးနီးယား မြို့တော်ဝန်ဟောင်း တရုတ် စပိုင်လုပ်မှုဖြင့် စွဲချက်တင်ခံရ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၂ ရက်။   အမေရိကန်ပြည်ထောင်စုတွင် တရုတ်အစိုးရ၏ လျှို့ဝှက်အကျိုးဆောင်အဖြစ် ဆောင်ရွက်ခဲ့သည့် ကယ်လီဖိုးနီးယားပြည်နယ်၊ အာကေးဒီးယား (Arcadia) မြို့၏ မြို့တော်ဝန်ဟောင်း အိုင်လင်းဝမ် (Eileen Wang) ကို ဖက်ဒရယ်အစိုးရက တရားစွဲဆိုလိုက်သည်။   အိုင်လင်းဝမ်သည် တရုတ်ပြည်သူ့သမ္မတနိုင်ငံ၏ တရားမဝင်အကျိုးဆောင်အဖြစ် လျှို့ဝှက်ဆောင်ရွက်ခဲ့မှုဖြင့် တရားစွဲဆိုခံရခြင်းဖြစ်သည်။   ဖက်ဒရယ်အစိုးရရှေ့နေများ၏ ထုတ်ပြန်ချက်အရ သူမသည် ၂၀၂၀ ပြည့်နှစ်မှ ၂၀၂၂ ခုနှစ်အတွင်း တရုတ်အစိုးရအရာရှိများ၏ ညွှန်ကြားချက်နှင့် ထိန်းချုပ်မှုအောက်တွင် အလုပ်လုပ်ခဲ့ပြီး တရုတ်အစိုးရလိုလားသည့် ဝါဒဖြန့်သတင်းများ ဖြန့်ဝေရန် လျှို့ဝှက်ညှိနှိုင်း ဆောင်ရွက်ခဲ့ခြင်းဖြစ်သည်။   ထိုသို့ဆောင်ရွက်ရာတွင် အမေရိကန်ဥပဒေအရ ရှေ့နေချုပ်ထံ အကြောင်းကြားရမည့် လုပ်ငန်းစဉ်များကိုလည်း တမင်ချန်လှပ်ထားခဲ့သည်ဟု ဆိုသည်။   စုံစမ်းစစ်ဆေးမှုများအရ အိုင်လင်းဝမ်သည် ဒေသတွင်းသတင်းဌာနအဖြစ် အယောင်ဆောင်ထားသည့် ဝက်ဘ်ဆိုက်တစ်ခုကို တရုတ်အေးဂျင့်များနှင့် ပူးပေါင်းဖွင့်လှစ်ကာ တရုတ်အစိုးရက ပေးပို့သည့် ဝါဒဖြန့်ဆောင်းပါးများကို ချက်ချင်းဖော်ပြပေးခဲ့သည်။   အထူးသဖြင့် ရှင်ကျန်းဒေသတွင် အတင်းအဓမ္မ လုပ်အားခိုင်းစေမှု စွပ်စွဲချက်များကို ငြင်းဆိုထားသည့် ဆောင်းပါးများကို တရုတ်အရာရှိများ၏ စေခိုင်းချက်အတိုင်း ဖော်ပြပေးခဲ့ခြင်း ဖြစ်သည်။   အိုင်လင်းဝမ်သည် ၂၀၂၂ ခုနှစ် ဒီဇင်ဘာလတွင် မြို့ကောင်စီဝင်အဖြစ် ရွေးကောက်ခံခဲ့ရပြီးနောက် မြို့တော်ဝန် ဖြစ်လာခဲ့သူဖြစ်သည်။   သူမသည် လက်ရှိတွင် ရာထူးမှ နှုတ်ထွက်သွားပြီဖြစ်ကာ အာကေးဒီးယားမြို့ အာဏာပိုင်များကမူ ယခုကိစ္စမှာ သူမ၏ တစ်ကိုယ်ရေပြစ်မှုသာဖြစ်ပြီး မြို့တော်လုပ်ငန်းများအပေါ် ထိခိုက်မှုမရှိကြောင်း ထုတ်ပြန်ထားသည်။   အိုင်လင်းဝမ်သည် အပြစ်ရှိကြောင်း ဝန်ခံရန် သဘောတူညီထားပြီး ပြစ်မှုထင်ရှားပါက ထောင်ဒဏ် ၁၀ နှစ်အထိ ကျခံရနိုင်သည့်အပြင် ဒေါ်လာနှစ်သိန်းခွဲအထိ ဒဏ်ငွေရိုက်ခံရနိုင်ကြောင်း သိရသည်။   #EileenWang #ကယ်လီဖိုးနီးယားမြို့တော်ဝန်ဟောင်း #တရုတ်စပိုင်

ကယ်လီဖိုးနီးယား မြို့တော်ဝန်ဟောင်း တရုတ် စပိုင်လုပ်မှုဖြင့် စွဲချက်တင်ခံရ

ကယ်လီဖိုးနီးယား မြို့တော်ဝန်ဟောင်း တရုတ် စပိုင်လုပ်မှုဖြင့် စွဲချက်တင်ခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၂ ရက်။  အမေရိကန်ပြည်ထောင်စ…

  • May 12, 2026
စစ်တပ်က ကရင်နီ စစ်ရှောင်စခန်းကို မီးရှို့   သတင်းနှင့်မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   ကရင်နီပြည်၊ ဖရူဆိုမြို့နယ် အရှေ့ခြမ်းတွင် စစ်တပ် စစ်ကြောင်းက စစ်ရှောင်စခန်းကို မီးရှို့ဖျက်ဆီးခဲ့ရာ ဒေသခံ ၁,၀၀၀ ကျော် အရေးပေါ် ထွက်ပြေးတိမ်းရှောင်နေကြရသည်။   ဖရူဆိုမြို့နယ်အရှေ့ခြမ်းသို့ စစ်တပ် လက်အောက်ခံ တပ်များ စစ်ကြောင်းထိုးဝင်ရောက်လာပြီး စစ်ဘေးရှောင် စခန်းတစ်ခုကို မီးရှို့ဖျက်ဆီးခဲ့သဖြင့် ဒေသခံရွာသူရွာသား ၁,၀၀၀ ကျော်မှာ ဘေးလွတ်ရာ တောတောင်များ အတွင်းသို့ အရေးပေါ် ထွက်ပြေးတိမ်းရှောင်နေရကြောင်း အရေးပေါ်ကယ်ဆယ်ရေးအဖွဲ့ CTER-Karenni နှင့် ဒေသခံများက ပြောသည်။   စစ်ဘေးရှောင်တစ်ဦးက “စစ်တပ်က သေနတ်တွေ ပစ်ပြီး ဝင်လာတော့ အားလုံးက လန့်ပြီး ကိုယ်လွတ် ရုန်း ပြေးခဲ့ရတာ။ ပစ္စည်းယူချိန် မပြောနဲ့ ဘာမှကို မယူလိုက်ရဘူး။ ဘာပစ္စည်းမှ ယူချိန်ကို မရလိုက်ဘူး။ အချိန်မီ မပြေးနိုင်တဲ့သူတွေကိုလည်း ဖမ်းဆီးရိုက်နှက်တာတွေ ရှိတယ်” ဟု ပြောသည်။   ပြီးခဲ့သည့် ရက်အနည်းငယ်က ဒေသခံ ၂၀၀ ကျော် စစ်ဘေးရှောင်ခဲ့ရပြီးနောက်၊ ယခုမေလ ၁၁ ရက်နေ့တွင် နောက်ထပ်ဒေသခံ ၁,၀၀၀ ကျော်မှာလည်း စစ်ကြောင်းအန္တရာယ်ကြောင့် ထပ်မံထွက်ပြေးနေကြရခြင်း ဖြစ်သည်။   မေလ ၈ ရက်နေ့၊ မွန်းလွဲ ၂ နာရီဝန်းကျင်တွင် ဖရူဆိုမြို့နယ်ရှိ ဝှယ်ဒူးလျားစစ်ရှောင်စခန်းသို့ စစ်တပ်စစ်ကြောင်း က သေနတ်များပစ်ဖောက်ကာ ရုတ်တရက်ဝင်ရောက်စီးနင်းခဲ့ပြီး စစ်ရှောင်တဲအိမ်များနှင့် ယာဉ်များကို မီးရှို့ ဖျက်ဆီးခဲ့ခြင်းဖြစ်သည်။   အဆိုပါစခန်းတွင် အိမ်ခြေ ၆၈ အိမ်ရှိပြီး လူဦးရေ ၃၀၀ ကျော် ခိုလှုံနေခြင်းဖြစ်ကာ မီးရှို့မှုကြောင့် လူနေတဲအိမ် တစ်ဝက်နီးပါး ပြာကျပျက်စီးသွားခဲ့သည်။   ထို့ပြင် မေလ ၉ ရက်နေ့ ညနေပိုင်းတွင်လည်း ဖရူဆိုမြို့နယ်အခြေစိုက် အမှတ် (၁၄) တန်းမြင့် စစ်ရေးလေ့ကျင့် ရေး ကျောင်းမှနေ၍ ကျေးရွာများအတွင်းသို့ လက်နက်ကြီး ၉ လုံးခန့် ပစ်ခတ်ခဲ့ရာ အသက် ၉၀ အရွယ် အမျိုးသားတစ်ဦး ထိမှန်ဒဏ်ရာရရှိခဲ့သေးသည်။   လတ်တလောတွင် စစ်တပ် စစ်ကြောင်းများသည် ဖရူဆိုအရှေ့ခြမ်းရှိ ကျေးရွာများအနီးတွင် တပ်စွဲထားဆဲ ဖြစ် ပြီး အချို့သော ဒေသခံများမှာ ကျေးရွာများအတွင်း ပိတ်မိနေဆဲဖြစ်သည်ဟု CTER-Karenni အဖွဲ့က အသိပေး ထားသည်။   စစ်ရှောင်များကို အကူအညီပေးနေသူတစ်ဦးက “လက်ရှိမှာ စစ်ရှောင်တွေက တောတောင်တွေထဲမှာပဲ ယာယီ ခိုလှုံနေကြရတယ်။ နေရာထိုင်ခင်း အနည်းငယ်ရပေမယ့် စားနပ်ရိက္ခာကတော့ အရမ်းကို လိုအပ်နေပါတယ်။ လုံခြုံရေး အခြေအနေကြောင့် လူသားချင်းစာနာမှု အကူအညီတွေကလည်း အခုထိ သူတို့ဆီ မရောက်နိုင် သေး ဘူး။ ချိတ်ဆက်ပေးနေတုန်းပဲဗျ” ဟု ပြောသည်။   လက်ရှိတွင် လုံခြုံရေးစိုးရိမ်ရမှုကြောင့် စစ်ဘေးရှောင်ပြည်သူများထံသို့ လူသားချင်းစာနာမှုဆိုင်ရာ အကူအညီ များ ရောက်ရှိနိုင်ခြင်း မရှိသေးဘဲ အရေးပေါ်ရိက္ခာများ အထူးလိုအပ်နေသည်။   CTER အဖွဲ့က ထိခိုက်ခံရသည့်နယ်မြေများသို့ သွားရောက်ရန် ကြိုးပမ်းနေသော်လည်း အချို့နေရာများတွင် လမ်းကြောင်းများ ပိတ်ဆို့နေဆဲဖြစ်သည်ဟု မေလ ၁၁ ရက်နေ့တွင် ထုတ်ပြန်ထားသည်။။   ဖရူဆိုမြို့နယ်အတွင်း၌ ခမရ (၅၃၁)၊ ခမရ (၄၂၈) နှင့် အမှတ် (၁၄) စစ်လေ့ကျင့်ရေးကျောင်းတို့မှ တပ်ရင်းများက ယခုရက်ပိုင်းအတွင်း စစ်ကြောင်းထိုးမှုများ ခပ်စိပ်စိပ်လုပ်ဆောင်လာနေခြင်း ဖြစ်သည်ဟု ဒေသခံများနှင့် စစ်ရှောင်များက ပြောသည်။   ကရင်နီလူမှုအသင်းအဖွဲ့များ၏ စာရင်းအရ ပြည်နယ်အတွင်းရှိ လူဦးရေ ၄ သိန်းဝန်းကျင်အနက် ၃ သိန်းနီးပါးမှာ စစ်ဘေးရှောင်နေကြရပြီး စားနပ်ရိက္ခာနှင့် ဆေးဝါးများ အရေးပေါ်လိုအပ်လျက်ရှိသည်ဟု ဆိုသည်။   ဓါတ်ပုံ - CTER-Karenni   #KarenIDPs #ကရင်နီစစ်ရှောင်စခန်း #ဖရူဆိုမြို့နယ်

စစ်တပ်က ကရင်နီ စစ်ရှောင်စခန်းကို မီးရှို့ 

စစ်တပ်က ကရင်နီ စစ်ရှောင်စခန်းကို မီးရှို့ သတင်းနှင့်မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  ကရင်နီပြည်၊ ဖရူဆိုမြို့နယ် အရှေ့ခြမ်းတွင် စစ်တ…

  • May 11, 2026
မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၁၁ ရက်။   ထိုင်းနိုင်ငံအတွင်း တရားမဝင် ဝင်ရောက်လာသည့် မြန်မာလုပ်သားများ ဆက်တိုက်ဖမ်းဆီးခံနေရပြီး မေလ ပထမပတ်အတွင်း အယောက် ၁၅၀ ကျော် ဖမ်းဆီးခံခဲ့ရသည်ဟု အလုပ်သမားအရေး ဆောင်ရွက်နေသူများက ပြောသည်။   မြန်မာနိုင်ငံအတွင်းရှိ အလုပ်အကိုင်ရှားပါးမှုနှင့် စစ်မှုထမ်းဥပဒေဆိုင်ရာ စိုးရိမ်မှုများကြောင့် ထိုင်းနိုင်ငံအတွင်း သို့ မှောင်ခိုလမ်းကြောင်းများမှတစ်ဆင့် ဝင်ရောက်လာသည့် မြန်မာလုပ်သား ၁၅၀ ကျော်ကို မေလ ပထမပတ် အတွင်း၌ ထိုင်းအာဏာပိုင်များက ဆက်တိုက်ဖမ်းဆီးခဲ့ကြောင်း အလုပ်သမားအရေး ဆောင်ရွက်သူများက ပြောသည်။   အကြီးမားဆုံး ဖမ်းဆီးရမိမှုမှာ ဖိစ်စုနုလုခ်ခရိုင်အတွင်း ဖြစ်ပွားခဲ့ခြင်းဖြစ်ပြီး မေလ ၇ ရက်နေ့၊ ညပိုင်းတွင် အမှတ် ၁၁ လမ်းမကြီးပေါ်၌ မောင်းနှင်လာသည့် ပစ်ကပ်ကား ၁၀ စီးခန့်ကို စစ်ဆေးရာမှ စတင်ခဲ့ခြင်းဖြစ်သည်။   ထိုစဉ်က အချို့ကားများမှာ မောင်းနှင်ထွက်ပြေးခဲ့သော်လည်း အာဏာပိုင်များက မေလ ၈ ရက်နေ့၊ နံနက်အထိ နီးစပ်ရာတောများအတွင်း လိုက်လံရှာဖွေခဲ့ရာ မြန်မာလုပ်သား ၁၁၀ ကျော်ကို ထပ်မံဖမ်းဆီးရမိခဲ့သည်။   အလုပ်သမားအရေး လိုက်လံဆောင်ရွက်ပေးနေသူ အမျိုးသားတစ်ဦးက “သူတို့ စဝင်လာကတည်းက ကားတန်း အရှည်ကြီးပဲလေ။ ပစ်ကပ်ကားနဲ့ကို လူအပြည့်တင်လာတာဆိုတော့ ဘယ်သူက မစစ်ဘဲနေမလဲ။ တောလမ်းက သွားတာလည်း မဟုတ်ဘူး။ အခုတော့ မိပြီလေ။ ဒီချိန် အောက်လမ်းကလာရင် လမ်းကြောင်း သေချာစုံစမ်းကြ ပါ။ ဖြစ်နိုင်ရင် အပေါ်ကပဲ လာစေချင်တယ်။ ပွဲစားတွေကတော့ ပိုက်ဆံရရင်ပြီးရော နှပ်ချခဲ့မှာပဲ” ဟု ပြောသည်။   ထို့ပြင် မေလ ၆ ရက်နေ့တွင် တာခ့်ခရိုင်၊ တာ့ဆောင်ယန်းမြို့နယ်၌ မြန်မာလုပ်သား ၁၉ ဦး၊ မေလ ၄ ရက်နေ့တွင် အဆိုပါမြို့နယ်အတွင်း၌ပင် ၁၁ ဦးနှင့် မေလ ၃ ရက်နေ့တွင် အယုဒ္ဓယခရိုင် အာရှလမ်းမကြီးပေါ်၌ ၉ ဦး စုစုပေါင်း မြန်မာလုပ်သား ၁၅၀ ကျော်ခန့် ဖမ်းဆီးခံခဲ့ရခြင်း ဖြစ်သည်။   အခြားအလုပ်သမားအရေး ဆောင်ရွက်သူတစ်ဦးကလည်း “ဒီနောက်ပိုင်းတော့ မဲဆောက်ဘက်က တအားဖမ်း တော့ တခြားလမ်းကြောင်း ပြန်ဝင်ကြတယ်။ အဲဒါလည်း မိတာပဲ။ ကျနော်ကတော့ မစွန့်စားစေချင်ဘူး။ မြန်မာငွေ အနည်းဆုံး သိန်း ၄၀ လောက်ကုန်တာလေ။ မိရင်လည်း ပလုံမှာ။ မလုပ်ကြပါနဲ့” ဟု ဖြည့်စွက် ပြောဆိုသည်။   ပွဲစားများ၏ အဆိုအရ တရားမဝင် လမ်းကြောင်းများမှတစ်ဆင့် ဝင်ရောက်ရန် တစ်ဦးလျှင် ထိုင်းဘတ်ငွေ ၂၀,၀၀၀ (မြန်မာငွေ ၂၆ သိန်းကျော်မှ သိန်း ၄၀ ခန့်အထိ) ကုန်ကျစရိတ်ရှိနေကြောင်း သိရသည်။   မွန်ပြည် လူ့အခွင့်ရေးဖောင်ဒေးရှင်း (HURFOM) ၏ အချက်အလက်များအရ ယခုနှစ် ဇန်နဝါရီလမှ မတ်လအထိ သုံးလတာအတွင်း တရားမဝင် မြန်မာလုပ်သား ၉၀၀ နီးပါး ဖမ်းဆီးခံထားရပြီး ဖြစ်သည်။   မြန်မာပြည်တွင်းရှိ စီးပွားရေးကျဆင်းမှု၊ ကုန်ကြမ်းရှားပါးမှုနှင့် ပြည်သူ့စစ်မှုထမ်း ဆင့်ခေါ်စာများကြောင့် ဖမ်းဆီးမှုများပြားနေသော်လည်း ထိုင်းနိုင်ငံဘက်သို့ ထွက်ခွာသူဦးရေမှာ နေ့စဉ်နှင့်အမျှ တိုးများလာနေသည်။   #ရွှေ့ပြောင်းအလုပ်သမား #migrantworker

မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ

မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၁၁ ရက်။  ထိုင်းနိုင်င…

  • May 11, 2026
×Close