သတင်း

ချင်းပြည်မြောက်ပိုင်း ကလေး-တီးတိန်လမ်းပိုင်း တိုက်ပွဲ ပြင်းထန်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၆ ရက်။   ချင်းပြည် မြောက်ပိုင်း၊ တီးတိန်မြို့ကို စစ်အင်အားဖြည့်တင်းရန် ကြိုးပမ်းလာသည့် စစ်တပ် စစ်ကြောင်းကို ချင်းတော်လှန်ရေး ပူးပေါင်းတပ်ဖွဲ့များက ခုခံတိုက်ခိုက်နေသဖြင့် ကလေး-တီးတိန်လမ်းပိုင်းတွင် တိုက်ပွဲများ ၅ ရက်ဆက်တိုက် ပြင်းထန်နေသည်။   အဆိုပါတိုက်ပွဲသည် ပြီးခဲ့သည့် မေလ ၁ ရက်နေ့ကတည်းက စတင်ခဲ့ခြင်းဖြစ်ပြီး လက်ရှိတွင် စစ်တပ် စစ်ကြောင်းမှာ တီးတိန်မြို့နှင့် မိုင် ၂၀ အကွာအဝေးသို့ ရောက်ရှိလာပြီဖြစ်သည်။   စစ်ကိုင်းတိုင်း၊ ကလေးမြို့ဘက်မှ တက်လာသည့် အဆိုပါစစ်ကြောင်းတွင် အင်အား ၃၀၀ ခန့် ပါဝင်နေပြီး ၎င်းတို့အနက် ဖလမ်းမြို့ကို ပြန်လည်ထိန်းချုပ်ထားသည့် စစ်ကြောင်းများလည်း ပူးပေါင်းပါဝင်နေကြောင်း မြေပြင်စစ်ရေးသတင်းရင်းမြစ်များက ဆိုသည်။   တိုက်ပွဲပြင်းထန်နေမှုနှင့် ပတ်သက်၍ ချင်းတော်လှန်ရေးသတင်းရင်းမြစ်တစ်ခုက “တိုက်ပွဲက နေ့တိုင်းလိုလို ဖြစ်နေတာ။ ထိခိုက်ကျဆုံးမှုကလည်း နှစ်ဖက်လုံးများတယ်။ အခုက ဒီစစ်ကြောင်းကို မရရအောင် ရှေ့ဆက်မရအောင် တားထားရတယ်။ မတား နိုင်ဘူး ဆိုရင်တော့ အတော် ခက်သွားမယ်။ ဖလမ်းကလည်း မရတော့ဘူး။ အခုက ဖလမ်း-ဟားခါးလမ်းပိုင်းကို ဆက်ထိန်းချုပ်ဖို့ ထိုးတာတာ” ဟု ပြောသည်။   စစ်တပ် စစ်ကြောင်းသည် ၎င်းတို့ထိန်းချုပ်ထားသည့် တီးတိန်မြို့ကို အင်အားဖြည့်တင်းရန်နှင့် အိန္ဒိယ-မြန်မာ နယ်စပ်ရှိ ရိခေါဒါရ်မြို့ကို ပြန်လည်စိုးမိုးနိုင်ရန် ရည်ရွယ်၍ စစ်ကြောင်းထိုးလာခြင်းဖြစ်နိုင်ကြောင်း စစ်ရေး လေ့လာသူများက ခန့်မှန်းထားသည်။   လက်ရှိတွင် တော်လှန်ရေးအဖွဲ့များက အာလွယ်ကျေးရွာအနီးမှ ဟန့်တားထားသဖြင့် စစ်တပ်ဘက်မှ လေကြောင်းပစ်ကူများ သုံးစွဲကာ အပြင်းအထန် တိုက်ခိုက်နေခြင်း ဖြစ်သည်။ တ ိုက်ပွဲအခြေအနေနှင့် ပတ်သက်၍ ဒေသခံတစ်ဦးက “အင်အားကတော့ ဒီဘကက်လာတာ ၃၀၀ လောက်ရှိ မယ်။ ဖလမ်းကနေ ပြန်ခေါက်လာတာက ၂၀၀ လောက်ရှိမယ်။ ဆိုတော့ တော်တော်များတယ်။ စစ်တပ် စစ်ကြောင်းကို ချင်းညီနောင် (CB) ပေါ့၊ ချင်းကောင်စီ၊ ချင်းတော်လှန်ရေးအင်အားစုတွေ ပေါင်းပြီး တိုက်နေ တာပါ” ဟု ပြောသည်။   တိုက်ပွဲများအတွင်း နှစ်ဖက်ထိခိုက်ကျဆုံးမှုများ ရှိနေသကဲ့သို့ တီးတိန်မြို့ပေါ်၌ တိုက်ပွဲများ ကူးစက်လာမည်ကို စိုးရိမ်သဖြင့် မြို့ခံများသည် ဧပြီလကုန်ပိုင်းကတည်းက ရိခေါဒါရ်နှင့် ကလေးမြို့ဘက်များသို့ ကြိုတင် တိမ်းရှောင်နေကြရသည်။   ချင်းပြည် အတွင်း၌ လက်ရှိတွင် ချင်းညီနောင်အဖွဲ့များက မတူပီ၊ မင်းတပ်နှင့် ကန်ပက်လက်မြို့တို့ကို ထိန်းချုပ် ထားသော်လည်း စစ်တပ်က ဖလမ်း၊ ဟားခါးနှင့် တီးတိန်မြို့တို့ကို ဆက်လက်ထိန်းချုပ်ထားဆဲ ဖြစ်သည်။   ထို့ကြောင့် တီးတိန်မြို့သို့ ဦးတည်လာသည့် ယခုစစ်ကြောင်းကို မတားဆီးနိုင်ပါက တော်လှန်ရေး အင်အားစုများ အတွက် မြို့သိမ်းတိုက်ပွဲဆင်နွှဲရန် ပိုမိုခက်ခဲသွားနိုင်ကြောင်း သုံးသပ်မှုများ ရှိနေသည်။   #တီးတိန်တိုက်ပွဲ

ချင်းပြည်မြောက်ပိုင်း ကလေး-တီးတိန်လမ်းပိုင်း တိုက်ပွဲ ပြင်းထန် 

ချင်းပြည်မြောက်ပိုင်း ကလေး-တီးတိန်လမ်းပိုင်း တိုက်ပွဲ ပြင်းထန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။  ချင်းပြည် မြောက်ပိုင်း၊ တ…

  • May 6, 2026
အိန္ဒိယ အစိုးရရဲ့ မြွေဆိုး၊ မိချောင်း နယ်ခြား တံတိုင်းသစ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၆ ရက်။   အိန္ဒိယအစိုးရဟာ ဘင်္ဂလားဒေ့ရှ်နယ်စပ်က တရားမဝင် ဝင်ရောက်မှုတွေကို တားဆီးဖို့အတွက် ထူးဆန်းအံ့သြဖွယ်ကောင်းတဲ့ နည်းလမ်းသစ်တစ်ခုကို စတင်ဖို့ ကြံစည်နေပါတယ်။   အဲဒါကတော့ နယ်စပ်ခြံစည်းရိုး ခတ်ဖို့ခက်တဲ့ နေရာတွေမှာ အဆိပ်ပြင်းမြွေတွေနဲ့ ဗိုက်ဆာနေတဲ့ မိကျောင်းကြီးတွေကို အစောင့်အရှောက်အဖြစ် အသုံးပြုဖို့ပဲ ဖြစ်ပါတယ်။   အိန္ဒိယနဲ့ ဘင်္ဂလားဒေ့ရှ် နယ်စပ်ဟာ ကီလိုမီတာ ၄,၀၀၀ ကျော် ရှည်လျားပါတယ်။   အဲဒီထဲမှာ တောင်ကုန်းတွေ၊ ရွှံ့နွံတောတွေနဲ့ မြစ်ချောင်းတွေ အရမ်းများတဲ့အတွက် သံဆူးကြိုးခတ်ဖို့ မဖြစ်နိုင်တဲ့ နေရာလပ်တွေ ရှိနေပါတယ်။   အဲဒီနေရာတွေမှာ လူတွေအစောင့်ချမယ့်အစား သားရဲတိရစ္ဆာန်တွေကို 'သဘာဝခြံစည်းရိုး' အဖြစ် ချထားဖို့ အိန္ဒိယနယ်ခြားစောင့်တပ် (BSF) က ညွှန်ကြားချက် ထုတ်ပြန်လိုက်တာပါ။   ဒါပေမဲ့ ဒီအစီအစဉ်အပေါ် လူ့အခွင့်အရေး တက်ကြွလှုပ်ရှားသူတွေကတော့ အပြင်းအထန် ဝေဖန်နေကြပါတယ်။ '   မြွေနဲ့ မိကျောင်းဆိုတာ ဘယ်သူက အိန္ဒိယနိုင်ငံသား၊ ဘယ်သူက တရားမဝင် ဝင်ရောက်သူဆိုတာကို ခွဲခြားနိုင်မှာ မဟုတ်ဘူး' လို့ သူတို့က ထောက်ပြကြပါတယ်။   ဒါကြောင့် ဒီလုပ်ရပ်ဟာ လူသားမဆန်ရုံတင်မကဘဲ အနီးနားက ဒေသခံတွေအတွက်ပါ အသက်အန္တရာယ် အရမ်းရှိတယ်လို့ ထောက်ပြကြပါတယ်။   တိရစ္ဆာန် ထိန်းသိမ်းရေးသမားတွေဘက်ကလည်း ဒါဟာ ဂေဟစနစ်ကို ဖျက်ဆီးရာရောက်တယ်လို့ သတိပေးနေပါတယ်။   တကယ်လို့ ရေကြီးလို့ ဒီအဆိပ်ပြင်းမြွေတွေဟာ လူနေရပ်ကွက်တွေထဲ ရောက်သွားရင် ဘာဖြစ်မလဲ ဆိုတာလည်း မတွေးဝံ့စရာ အခြေအနေပဲ ဖြစ်ပါတယ်။   #အိန္ဒိယဘင်္ဂလားဒေ့ရ်နယ်စပ်ဖြတ်ကျော်

အိန္ဒိယ အစိုးရရဲ့ မြွေဆိုး၊ မိချောင်း နယ်ခြား တံတိုင်းသစ်

အိန္ဒိယ အစိုးရရဲ့ မြွေဆိုး၊ မိချောင်း နယ်ခြား တံတိုင်းသစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။  အိန္ဒိယအစိုးရဟာ ဘင်္ဂလားဒေ့ရှ်…

  • May 6, 2026
လူတူစက်ရုပ် (Humanoid Robot) ကြောင့် လေယာဉ် ခရီးစဉ်နောက်ကျမှု ဖြစ်ပွား   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၆ ရက်။   အမေရိကန်ပြည်ထောင်စု၊ အောက်ကလန်မှ ဆန်ဒီယေဂိုသို့ ပျံသန်းမည့် Southwest လေကြောင်းလိုင်း၏ ခရီးစဉ်တစ်ခုတွင် "Bebop" အမည်ရှိ လူတူစက်ရုပ်တစ်ရုပ်ကြောင့် လေယာဉ်ထွက်ခွာချိန် တစ်နာရီကျော်ကြာ နောက်ကျခဲ့ရသည်။   အလေးချိန် ပေါင် ၇၀ ရှိသော အဆိုပါစက်ရုပ်ကို ပိုင်ဆိုင်သည့်ကုမ္ပဏီသည် စက်ရုပ်ကို သေတ္တာအတွင်းထည့်၍ တင်ပို့ရန် အလေးချိန်မကိုက်ညီသဖြင့် ခရီးသည်လက်မှတ်ဝယ်ယူကာ ထိုင်ခုံတွင် သီးသန့်တင်ဆောင်ခဲ့ခြင်းဖြစ်သည်။     သို့သော် စက်ရုပ်အတွင်း ပါဝင်သော လီသီယမ်ဘက်ထရီမှာ လေကြောင်းလိုင်း၏ လုံခြုံရေးသတ်မှတ်ချက်ထက် ပိုမိုကြီးမားနေသဖြင့် စစ်ဆေးခြင်းနှင့် ဖြုတ်ယူသိမ်းဆည်းခြင်းများ လုပ်ဆောင်ခဲ့ရခြင်းကြောင့် ခရီးစဉ်နှောင့်နှေးခဲ့ရခြင်းဖြစ်သည်။   အဆိုပါဖြစ်စဉ်နှင့် ပတ်သက်၍ လူမှုကွန်ရက်ပေါ်တွင် ကုမ္ပဏီ၏ ကြော်ငြာလိုမှု (Publicity Stunt) အဖြစ် ဝေဖန်မှုများရှိသလို၊ လေယာဉ်နောက်ကျမှုကြောင့် ခရီးစဉ်လွဲချော်ခဲ့ရသည့် ခရီးသည်များ၏ မကျေနပ်မှုများလည်း ထွက်ပေါ်လျက်ရှိသည်။   စက်ရုပ်များက အလုပ်ကိုသာမက လေယာဉ် ထိုင်ခုံကို ပါ လုယူနေပြီဟု နောက်ပြောင်ပြောဆိုမှုများလည်း ရှိနေသည်။   #HumanoidRobot

လူတူစက်ရုပ် (Humanoid Robot) ကြောင့် လေယာဉ် ခရီးစဉ်နောက်ကျမှု ဖြစ်ပွား 

လူတူစက်ရုပ် (Humanoid Robot) ကြောင့် လေယာဉ်ခရီးစဉ်နောက်ကျမှု ဖြစ်ပွား သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။  အမေရိကန်ပြည်ထောင်စ…

  • May 6, 2026
ထိုင်းအစိုးရက ထိုင်း-ကမ္ဘောဒီးယား ရေပိုင်နက်သဘောတူ စာချုပ်ကို ဖျက်သိမ်း

ထိုင်းအစိုးရက ထိုင်း-ကမ္ဘောဒီးယား ရေပိုင်နက်သဘောတူ စာချုပ်ကို ဖျက်သိမ်း

ထိုင်းအစိုးရက ထိုင်း-ကမ္ဘောဒီးယား ရေပိုင်နက်သဘောတူ စာချုပ်ကို ဖျက်သိမ်း သတင်းနှင့် မီဒီယာ ကွန်ရက်။၂၀၂၆ ခုနှစ်  မေလ ၆ ရက်။  ပင်လယ်ပြင်ရ…

  • May 6, 2026
ဟော်မုဇ် ရေလက်ကြား 'Project Freedom' စစ်ဆင်ရေးကို သမ္မတထရန့် ခေတ္တရပ်နား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၆ ရက်။   အမေရိကန်သမ္မတ ဒေါ်နယ်ထရန့်သည် ဟော်မုဇ်ရေလက်ကြား (Strait of Hormuz) အတွင်း ပိတ်မိနေသော ကုန်သွယ်ရေးသင်္ဘောများကို စစ်ရေးအရ အကာအကွယ်ပေးမည့် "Project Freedom" စစ်ဆင်ရေးကို နှစ်ရက်အကြာတွင် ခေတ္တရပ်နားကြောင်း ကြေညာခဲ့သည်။   အီရန်နိုင်ငံနှင့် ငြိမ်းချမ်းရေးသဘောတူညီချက် ရရှိနိုင်ရန် ဆွေးနွေးမှုများ တိုးတက်လာခြင်းကြောင့် ယခုကဲ့သို့ ဆိုင်းငံ့လိုက်ခြင်း ဖြစ်သည်ဟု ဆိုသည်။   လက်ရှိတွင် အမေရိကန်နှင့် အီရန်တာဝန်ရှိသူများသည် ပါကစ္စတန်နိုင်ငံ၊ အစ္စလာမ္မာဘတ်မြို့၌ မျက်နှာစုံညီ ဆွေးနွေးပွဲများ ပြုလုပ်လျက်ရှိသည်။     အီရန်နိုင်ငံခြားရေးဝန်ကြီးသည်လည်း တရုတ်နိုင်ငံသို့ ရောက်ရှိကာ ငြိမ်းချမ်းရေးဆိုင်ရာကိစ္စရပ်များကို ဆွေးနွေးနေသည်။   အဆိုပါ ငြိမ်းချမ်းရေး အလားအလာများကြောင့် ကမ္ဘာ့ရေနံစိမ်းဈေးနှုန်းများမှာလည်း ဒုတိယမြောက်နေ့အဖြစ် ဆက်လက်ကျဆင်းလျက်ရှိသည်။   အမေရိကန်နိုင်ငံခြားရေးဝန်ကြီး မာကိုရူဘီယို (Marco Rubio) က အမေရိကန်အနေဖြင့် ဦးစွာပစ်ခတ်တိုက်ခိုက်မည်မဟုတ်ဘဲ ခုခံကာကွယ်ရေးကိုသာ အဓိကထား ဆောင်ရွက်သွားမည်ဖြစ်ကြောင်း အတည်ပြုပြောကြားထားသည်။

ဟော်မုဇ် ရေလက်ကြား ‘Project Freedom’ စစ်ဆင်ရေးကို သမ္မတထရန့် ခေတ္တရပ်နား 

ဟော်မုဇ်ရေလက်ကြား'Project Freedom' စစ်ဆင်ရေးကို သမ္မတထရန့် ခေတ္တရပ်နား သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။ အမေရိကန်သမ္မတ ဒေါ်နယ်ထရ…

  • May 6, 2026
ရန်ကုန်-ထားဝယ် ကားလမ်း တလျှောက် စစ်တပ်က အင်အားအလုံးအရင်းဖြင့် စစ်ကြောင်းထိုး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၆ ရက်။   တနင်္သာရီတိုင်းဒေသကြီး၏ အဓိကကုန်သွယ်ရေး သွေးကြော ဖြစ်သော ရန်ကုန်-ထားဝယ် ကားလမ်းမပေါ်ရှိ ကျေးရွာများကို စစ်တပ်က ဧပြီလနောက်ဆုံးအပတ်မှ စတင်ကာ အင်အား အလုံးအရင်းဖြင့် စစ်ကြောင်းထိုးလာနေသည်ဟု ဒေသခံများက ပြောသည်။   မလွှဲတောင်နှင့် ကလိန်အောင်မြို့ကြား စစ်ကြောင်းထိုးနေသည့် အင်အား ၁၀၀ ခန့်ပါဝင်သည့် အဆိုပါ စစ်ကြောင်းသည် ဧပြီလ ၂၇ ရက်နေ့က မလွှဲတောင်ဘက်မှ ကျွဲတလင်း ကျေးရွာသို့ ရောက်ရှိလာပြီးနောက် ကလိန်အောင်မြို့ဘက်သို့ ဆက်လက်ထွက်ခွာခဲ့ခြင်းဖြစ်သည်။   စစ်ကြောင်းဖြတ်သန်းရာ လမ်းတလျှောက်ရှိ ကျွဲတလင်း၊ သာယာမွန်နှင့် မိုင် ၆၀ ရွာတို့တွင် စစ်တပ် စစ်ကြောင်း က သေနတ်များ၊ လက်နက်ကြီးများဖြင့်ပါ ရမ်းသန်းပစ်ခတ်ခဲ့သည်ဟု ဒေသခံများက ပြောသည်။   စစ်ကြောင်း၏ လှုပ်ရှားမှုနှင့်ပတ်သက်၍ မရမ်းချောင်းရွာသားတစ်ဦးက “မေလ ၃ ရက်မှာ စစ်တပ် စစ်ကြောင်း က မလွှဲတောင်ဘက်ကို ပြန်တက်လာတယ်။ အခုက မရမ်းချောင်းရွာဘက်ကို ပြန်ရောက်နေတာပေါ့နော်။ လမ်းကြောင်းတလျှောက်လည်း ပစ်ခတ်ပြီး ဝင်လာတာဗျ” ဟု ပြောသည်။   ယခု စစ်ကြောင်းထိုးခံနေရသည့် မလွှဲတောင်-ကလိန်အောင် လမ်းပိုင်းသည် ရန်ကုန်မြို့နှင့် တနင်္သာရီတိုင်းကို ချိတ်ဆက်ထားသည့် အဓိကလမ်းမကြီးပေါ်တွင် တည်ရှိပြီး စစ်ရေးအရ ဗျူဟာကျသည့် နေရာဖြစ်သည်။   အလားတူ မလွှဲတောင်-ကလိန်အောင် လမ်းပိုင်းသည် မွန်ပြည်နှင့် တနင်္သာရီတိုင်းကို ဆက်သွယ်ထားသည့် အဓိက အဝင်တံခါးလည်းဖြစ်ပြီး ရန်ကုန်မြို့မှ ကုန်စည်များ စီးဆင်းရာ အဓိကကုန်သွယ်ရေး သွေးကြောလည်း ဖြစ်သည်။   အဆိုပါလမ်းပိုင်း၌ ကျေးရွာ ၁၀ ရွာကျော် တည်ရှိနေခြင်းကြောင့် စစ်တပ်၏ လက်နက်ကြီး၊ လက်နက်ငယ် ပစ်ခတ်မှုများက ဒေသခံများက စိုးရိမ်နေကြသည်။   ယနေ့အချိန်ထိ တော်လှန်ရေးအင်အားစုများနှင့် ထိတွေ့တိုက်ပွဲ ဖြစ်ပွားခြင်း မရှိသေးသော်လည်း စစ်တပ်၏ စစ်ကြောင်းလှုပ်ရှားမှုများကြောင့် ဒေသခံများမှာ ဘေးလွတ်ရာသို့ တိမ်းရှောင်နေကြရသည်။   ထို့ပြင် နယ်စပ်ကုန်သွယ်ရေးအတွက် အရေးပါသည့် မောတောင်မြို့တွင်လည်း စစ်တပ်က လေကြောင်းမှ ဗုံးကြဲ တိုက်ခိုက်မှုများ ဆက်တိုက် လုပ်ဆောင်နေသည်။   မေလ ၂ ရက်နေ့က လေယာဉ်ဖြင့် ဗုံးကြဲမှုကြောင့် နှစ်လသားအရွယ် ကလေးငယ်တစ်ဦး အပါအဝင် မိသားစုဝင် ၃ ဦး ဒဏ်ရာရရှိခဲ့ပြီး နေအိမ်တစ်ဆောင်လည်း မီးလောင်ပျက်စီးခဲ့သည်။   လက်ရှိတွင် ထိုင်း-မြန်မာနယ်စပ် ထိုင်းဘက်ခြမ်း၌လည်း ထိုင်းစစ်သားများက လုံခြုံရေးများ တင်းကျပ်ထား သည်။   #တနင်္သာရီကုန်သွယ်ရေးလမ်း

ရန်ကုန်-ထားဝယ် ကားလမ်း တလျှောက် စစ်တပ်က အင်အားအလုံးအရင်းဖြင့် စစ်ကြောင်းထိုး

ရန်ကုန်-ထားဝယ် ကားလမ်း တလျှောက် စစ်တပ်က အင်အားအလုံးအရင်းဖြင့် စစ်ကြောင်းထိုး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။  တနင်္သာရီတိ…

  • May 6, 2026
ထားဝယ်ခရိုင် နေအိမ်ခြံဝင်းအတွင်း သစ်ပင်ခုတ်သူ မြေမြှုပ်မိုင်းထိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၆ ရက်။   ထားဝယ်ခရိုင်၊ အရှေ့တောဒေသရှိ သင်္ကန်းတုံးကျေးရွာတွင် နေအိမ်ခြံဝင်းအတွင်း သစ်ပင်ခုတ်ထွင်နေသည့် အမျိုးသားတစ်ဦး မြေမြှုပ်မိုင်းပေါက်ကွဲမှုကြောင့် ဒဏ်ရာရရှိခဲ့ကြောင်း ကျေးရွာသားများက ပြောသည်။   ပြီးခဲ့သည့် မေလ ၂ ရက်နေ့၊ ညနေ ၃ နာရီခွဲခန့်တွင် အသက် ၄၀ ခန့်ရှိ အမျိုးသားတစ်ဦးသည် ၎င်း၏ နေအိမ် ခြံဝင်းအတွင်းရှိ သစ်ပင်များကို ခုတ်ထွင်ရှင်းလင်းနေစဉ် သစ်ပင်လဲကျသည့်နေရာမှ မြေမြှုပ်မိုင်းတစ်လုံး ပေါက်ကွဲခဲ့ခြင်းဖြစ်သည်။   အဆိုပါပေါက်ကွဲမှုကြောင့် ၎င်းအမျိုးသား၏ ဘယ်ဘက်ခြေသလုံးတွင် မိုင်းစထိမှန်ဒဏ်ရာများ ရရှိခဲ့ပြီး လက်ရှိတွင် ဆေးကုသမှုခံယူနေရသည်။   ဒေသခံရွာသားတစ်ဦးက “သူ့အိမ်က စစ်တပ်မီးရှို့လို့ ပါသွားတာကြာပြီ၊ လက်ရှိက အနီးနားက ရွာတစ်ရွာမှာ နေပြီးတော့ သူ့ခြံထဲကိုဝင်ပြီး တောခုတ်တာပါ” ဟု ပြောသည်။   သင်္ကန်းတုံးကျေးရွာသည် ၂၀၂၂ ခုနှစ်ကတည်းက တိုက်ပွဲများကြောင့် ရွာလုံးကျွတ်နီးပါး နေရပ်စွန့်ခွာကာ စစ်ဘေးရှောင်နေကြရသည့် ကျေးရွာတစ်ရွာဖြစ်သည်။       စစ်တပ် လက်အောက်ခံ တပ်ဖွဲ့များက ကျေးရွာအတွင်းရှိ နေအိမ်များကို မီးရှို့ဖျက်ဆီးခဲ့ခြင်းကြောင့် လက်ရှိတွင် ကျေးရွာအတွင်း ပြန်လည်ဝင်ရောက်နေထိုင်သည့် အိမ်ထောင်စု သုံးလေးစုခန့်သာ ကျန်ရှိတော့ကြောင်း ရွာသားများက ပြောသည်။   တနင်္သာရီတိုင်းအတွင်းရှိ စစ်ဘေးသင့်ဒေသများတွင် မြေမြှုပ်မိုင်းအန္တရာယ်က ဒေသခံများအတွက် စိန်ခေါ်မှု တစ်ရပ် ဖြစ်လာနေသည်ဟု ဆိုကြသည်။   #မြေမြှုပ်မိုင်းအန္တရာယ် #မိုင်းပညာပေး

ထားဝယ်ခရိုင် နေအိမ်ခြံဝင်းအတွင်း သစ်ပင်ခုတ်သူ မြေမြှုပ်မိုင်းထိ

ထားဝယ်ခရိုင် နေအိမ်ခြံဝင်းအတွင်း သစ်ပင်ခုတ်သူ မြေမြှုပ်မိုင်းထိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၆ ရက်။  ထားဝယ်ခရိုင်၊ အရှေ့တောဒေ…

  • May 6, 2026
မြောက်ကိုရီးယား အမျိုးသမီး ဘောလုံးသင်း တောင်ကိုရီးယားတွင် ကစားမည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မေလ ၅ ရက်။   မြောက်ကိုရီးယား အမျိုးသမီးဘောလုံးကလပ်အသင်း တောင်ကိုရီးယားနိုင်ငံကို သွားရောက် ကစားရမှာ ဖြစ်ပါတယ်။   ဒါဟာ ၈ နှစ်အတွင်း ပထမဆုံးအကြိမ် မြောက်ကိုရီးယားအားကစားသမားတွေ တောင်ကိုရီးယားမြေပေါ် ခြေချမယ့်ခရီးစဉ်လည်း ဖြစ်ပါတယ်။   မြောက်ကိုရီးယားကလပ်အသင်းဖြစ်တဲ့ နေဂိုလျန်အမျိုးသမီး ဘောလုံး အသင်း (Naegohyang Women’s FC) ဟာ တောင်ကိုရီးယားကလပ်ဖြစ်တဲ့ ဆူဝမ် အမျိုးသမီး ဘောလုံး အသင်း ( Suwon FC Women ) အသင်းနဲ့ လာမယ့် မေလ ၂၀ ရက် မှာ ယှဉ်ပြိုင်ကစားမှာဖြစ်ပါတယ်။   ဒီပွဲဟာ အာရှအမျိုးသမီး ချန်ပီယံပွဲ Asian Women's Champions League ရဲ့ ဆီမီးဖိုင်နယ်ပွဲစဉ်ဖြစ်ပြီး တောင်ကိုရီးယားနိုင်ငံ၊ ဆူဝမ် (Suwon) မြို့မှာ ကျင်းပမှာပါ။   မြောက်ကိုရီးယားဘက်က ကစားသမား ၂၇ ဦးနဲ့ ဝန်ထမ်း ၁၂ ဦး၊ စုစုပေါင်း ၃၉ ဦး လာရောက်ဖို့ စာရင်းပေးထားပါတယ်။   အခုခရီးစဉ်ဟာ ၂၀၁၈ ခုနှစ် ပြုံချမ်းဆောင်းရာသီအိုလံပစ်နောက်ပိုင်း မြောက်ကိုရီးယား အားကစားသမားတွေ တောင်ကိုရီးယားကို ပထမဆုံးအကြိမ် လာရောက်တာဖြစ်ပါတယ်။   တောင်ကိုရီးယားသမ္မတ လီဂျေမြွန်း (Lee Jae Myung) အနေနဲ့ အေးစက်နေတဲ့ နှစ်နိုင်ငံဆက်ဆံရေးကို ပြန်လည်ကောင်းမွန်အောင် ကြိုးပမ်းနေချိန်နဲ့လည်း တိုက်ဆိုင်နေပါတယ်။   ပြီးခဲ့တဲ့နှစ်တွေမှာ မြောက်ကိုရီးယားက တောင်ကိုရီးယားကို "အန္တရာယ်အရှိဆုံး ရန်သူနိုင်ငံ" လို့ သတ်မှတ်ခဲ့သလို၊ ကိုဗစ်ကြောင့် နယ်စပ်တွေပိတ်ထားခဲ့လို့ အားကစားဖလှယ်မှုတွေလည်း ရပ်ဆိုင်းနေခဲ့တာပါ။   တောင်ကိုရီးယား ပြန်လည်ပေါင်းစည်းရေးဝန်ကြီးဌာနကတော့ ဒါဟာ နိုင်ငံတကာကလပ် အသင်းအဆင့် ပြိုင်ပွဲဖြစ်တဲ့အတွက် အစိုးရအနေနဲ့ အနည်းငယ်ပဲ ပါဝင်ပတ်သက်မှာဖြစ်ပေမယ့် လိုအပ်တဲ့ ကူညီထောက်ပံ့မှုတွေတော့ ပေးသွားမယ်လို့ ပြောထားပါတယ်။     တကယ်လို့ မြောက်ကိုရီးယားအသင်းသာ နိုင်ခဲ့ရင် မေလ ၂၃ ရက်မှာ ကျင်းပမယ့် ဗိုလ်လုပွဲကို ဆက်လက်ယှဉ်ပြိုင်ရမှာဖြစ်ပြီး Melbourne City ဒါမှမဟုတ် Tokyo Verdy အသင်းနှစ်သင်းထဲက တစ်သင်းနဲ့ တွေ့ရမှာပါ။     ရှုံးခဲ့ရင်တော့ နောက်တစ်နေ့မှာပဲ နေရပ်ပြန်ကြမှာ ဖြစ်ပါတယ်။   #မြောက်ကိုရီးယားဘောလုံးအသင်း #တောင်ကိုရီးယားအမျိုးသမီးဘောလုံးအသင်း #AsianWomensChampionsLeague # NaegohyangWomensFC #SuwonFCWomen

မြောက်ကိုရီးယား အမျိုးသမီး ဘောလုံးသင်း တောင်ကိုရီးယားတွင် ကစားမည်

မြောက်ကိုရီးယား အမျိုးသမီး ဘောလုံးသင်း တောင်ကိုရီးယားတွင် ကစားမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  မြောက်ကိုရီးယား အမျိုး…

  • May 5, 2026
သီရိလင်္ကာတွင် ကျားဖြန့်လုပ်ဆောင်သော တရုတ် ၃၇ ဦးအား ဖမ်းဆီး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မေလ ၅ ရက်။   သီရိလင်္ကာရဲတပ်ဖွဲ့သည် ကိုလံဘိုမြို့ဆင်ခြေဖုံး တလန်ဂါမာ (Talangama) အရပ်ရှိ အွန်လိုင်းငွေလိမ်ဂိုဏ်း အခြေစိုက်စခန်းတစ်ခုကို ဝင်ရောက်စီးနင်းခဲ့ရာ တရုတ်နိုင်ငံသား ၃၇ ဦးကို ဖမ်းဆီးရမိခဲ့သည်။   ဖမ်းဆီးရမိသူများမှာ အမျိုးသမီးတစ်ဦး အပါအဝင် အသက် ၂၃ နှစ်မှ ၄၄ နှစ်အတွင်းရှိသူများဖြစ်ပြီး ၎င်းတို့နှင့်အတူ တက်ဘလက် ၃၅ လုံး၊ ဖုန်း ၁၄၇ လုံးနှင့် SIM ကတ် ၁၀၀ ကျော်ကို သက်သေခံအဖြစ် သိမ်းဆည်းခဲ့သည်။   ၎င်းတို့သည် ကမ္ဘာလှည့်ခရီးသွားဗီဇာ (Tourist Visa) ကို အသုံးပြု၍ ဝင်ရောက်လာကာ တရားမဝင် အလုပ်လုပ်ကိုင်နေသူများဖြစ်သည်။   သီရိလင်္ကာနိုင်ငံတွင် ယခုနှစ်အတွင်း တရုတ်နှင့် အိန္ဒိယနိုင်ငံသား ရာဂဏန်းကို ကျားဖြန့်လုပ်ငန်းများနှင့် ဆက်စပ်၍ ဖမ်းဆီးခဲ့ပြီးဖြစ်သည်။   သီရိလင်္ကာရှိ တရုတ်သံရုံးကလည်း ဆိုက်ဘာရာဇဝတ်မှုများ နှိမ်နင်းရေးတွင် ဒေသခံအာဏာပိုင်များနှင့် ပူးပေါင်းဆောင်ရွက်နေကြောင်း ပြောကြားခဲ့သည်။ #Scammer #Scam

သီရိလင်္ကာတွင် ကျားဖြန့်လုပ်ဆောင်သော တရုတ် ၃၇ ဦးအား ဖမ်းဆီး

သီရိလင်္ကာတွင် ကျားဖြန့်လုပ်ဆောင်သော တရုတ် ၃၇ ဦးအား ဖမ်းဆီး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မေလ ၅ ရက်။  သီရိလင်္ကာရဲတပ်ဖွဲ့သည် ကိုလ…

  • May 5, 2026
×Close