သတင်း

ရုရှားအန္တရာယ်ကို ဗြိတိန် MI-6 အကြီးအကဲ သတိပေး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၇ ရက်။ ဗြိတိန်နိုင်ငံခြားထောက်လှမ်းရေးအေဂျင်စီ (MI-6) ၏ ပထမဆုံးသော အမျိုးသမီးအကြီးအကဲ ဘလေ့စ် မက်တာဝဲလ်လီက ရုရှား၏ နယ်မြေချဲ့ထွင်ရေး ရည်မှန်းချက်များနှင့် ပတ်သက်၍ ပြင်းထန်စွာ သတိပေးလိုက်သည်။ ရုရှားသမ္မတ ပူတင်သည် ငြိမ်းချမ်းရေးဆွေးနွေးမှုများကို အချိန်ဆွဲကာ ယူကရိန်းတစ်နိုင်ငံလုံးကို သိမ်းပိုက်ရန်နှင့် NATO အဖွဲ့ဝင်များကို နှောင့်ယှက်ရန် ပြင်ဆင်နေသည်ဟု သူမက ဆိုသည်။ လက်ရှိကမ္ဘာ့အခြေအနေသည် စစ်ပွဲနှင့် ငြိမ်းချမ်းရေးကြားရှိ မရေရာသော နယ်မြေထဲသို့ ရောက်ရှိနေပြီး ရုရှားသည် ဆိုင်ဘာတိုက်ခိုက်မှုများ၊ ဒရုန်းဖြင့် နှောင့်ယှက်မှုများနှင့် သတင်းမှားဖြန့်ဝေခြင်းစသည့် ရှုပ်ထွေးသော ဗျူဟာများကို ကျင့်သုံးနေကြောင်း စွတ်စွဲထားသည်။ ဤကဲ့သို့ ရန်လိုသည့် လုပ်ရပ်များကို တုံ့ပြန်ရာတွင် ဗြိတိန်အနေဖြင့် ဒုတိယကမ္ဘာစစ်အတွင်းကကဲ့သို့ ရဲရင့်သော နည်းလမ်းများကို အသုံးပြုသွားမည်ဖြစ်သော်လည်း နည်းပညာနှင့် ဗျူဟာမြောက် အသာစီးရယူမှုများဖြင့်သာ တုံ့ပြန်သွားမည်ဟု အတည်ပြုပြောကြားခဲ့သည်။

ရုရှားအန္တရာယ်ကို ဗြိတိန် MI-6 အကြီးအကဲ သတိပေး

ရုရှားအန္တရာယ်ကို ဗြိတိန် MI-6 အကြီးအကဲ သတိပေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၇ ရက်။  ဗြိတိန်နိုင်ငံခြားထောက်လှမ်းရေးအေဂျ…

  • December 18, 2025
မြန်မာနိုင်ငံအတွင်း ရုရှားနိုင်ငံသားများ ပြန်ပေးဆွဲခံနေရဟု ရုရှား သံရုံးထုတ်ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၇ ရက်။ မြန်မာနိုင်ငံအတွင်း ရုရှားနိုင်ငံသား (၃) ဦး ပြန်ပေးဆွဲခံရပြီး ငွေညှစ်တောင်းခံမှုများ ရှိနေကြောင်း ရုရှားသံရုံးကို ကိုးကား၍ သတင်းများက ဖော်ပြသည်။ အဆိုပါ ဖြစ်စဉ်များအတွက် မိသားစုဝင်များက သံရုံးသို့ အကူအညီ တောင်းခံလာခြင်းဖြစ်ပြီး လက်ရှိတွင် မြန်မာနိုင်ငံခြားရေးဝန်ကြီးဌာနနှင့် ပြည်တွင်းအာဏာပိုင်များထံ အကြောင်းကြားကာ ရှာဖွေကယ်ဆယ်ရေးလုပ်ငန်းများကို လုပ်ဆောင်နေသည်။ လွန်ခဲ့သည့်တစ်ပတ်ကလည်း ရုရှားဓာတ်ပုံမော်ဒယ်တစ်ဦး ပြန်ပေးဆွဲခံခဲ့ရပြီး ပြန်ပေးသမားများက အမေရိကန်ဒေါ်လာ ၁၀,၀၀၀ တောင်းခံခဲ့သည့် ဖြစ်စဉ်ရှိခဲ့သည်။ မြန်မာနိုင်ငံဆိုင်ရာ ရုရှားသံအမတ်ကြီးကလည်း ထိုင်းနိုင်ငံမှတစ်ဆင့် လူကုန်ကူးခံရကာ မြန်မာနိုင်ငံရှိ ကျားဖြန့် (ငွေလိမ်လုပ်ငန်း) များတွင် အတင်းအဓမ္မ ခိုင်းစေခံနေရသည့် ရုရှားနိုင်ငံသား အများအပြား ရှိနေနိုင်ကြောင်း သတိပေးထားသည်။ လွန်ခဲ့သည့် တစ်နှစ်အတွင်း၌လည်း အလားတူ ပိတ်မိနေသည့် ရုရှားနိုင်ငံသား (၆) ဦးခန့်ကို အိမ်နီးချင်းနိုင်ငံများ၏ အကူအညီဖြင့် ကယ်ထုတ်နိုင်ခဲသည်ဟု သတင်းများတွင် ဖော်ပြထားသည်။

မြန်မာနိုင်ငံအတွင်း ရုရှားနိုင်ငံသားများ ပြန်ပေးဆွဲခံနေရဟု ရုရှား သံရုံးထုတ်ပြော

မြန်မာနိုင်ငံအတွင်း ရုရှားနိုင်ငံသားများ ပြန်ပေးဆွဲခံနေရဟု ရုရှား သံရုံးထုတ်ပြော  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၇ ရက်။  …

  • December 18, 2025
ရွေးကောက်ပွဲမှာ စစ်အုပ်စုအား လူသတ်လိုင်စင် ပေးမည့် လုပ်ရပ်ဖြစ်ဟု တက်ကြွလှုပ်ရှားသူများ ထောက်ပြ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၇ ရက်။ စစ်ကော်မရှင်က ကျင်းပရန် ပြင်ဆင်နေသည့် ရွေးကောက်ပွဲသည် လူ့အခွင့်အရေး ချိုးဖောက်မှုများကို ဆက် လက် ကျူးလွန်ရန်နှင့် စစ်အုပ်စုအတွက် ‘လူသတ်လိုင်စင်’ တရားဝင်ရရှိအောင် ပြုလုပ်ပေးမည့် လုပ်ရပ်သာ ဖြစ်ကြောင်း တက်ကြွလှုပ်ရှားသူများက ဝေဖန်ထောက်ပြလိုက်သည်။ အဆိုပါ ရွေးကောက်ပွဲသည် လူ့အခွင့်အရေး ချိုးဖောက်မှုများကို တရားဝင် ကျူးလွန်နိုင်အောင် ဖန်တီးမည့် အခင်းအကျင်း ဖြစ်သောကြောင့် ပြည်သူများအနေဖြင့် ဆန့်ကျင်ကြရန်နှင့် နိုင်ငံတကာကလည်း လက်မခံဘဲ ကန့်ကွက်ပေးရန် လိုအပ်ကြောင်း ကျေးလက်မြေအဖွဲ့ ဒါရိုက်တာ ဒေါ်မူစဲက တိုက်တွန်းပြောဆိုသည်။ မတရားမှုများကို နှုတ်ဆိတ်မနေဘဲ ထုတ်ဖော်ပြောဆိုရန် အရေးကြီးပုံနှင့် ပတ်သက်၍ ဒေါ်မူစဲက “လူ့အခွင့် အရေး ချိုးဖောက်မှုနဲ့ ပတ်သက်ပြီးတော့ မြန်မာပြည်သား တစ်ဦးချင်းစီရော၊ နိုင်ငံတကာကရောပေါ့နော်။ ချိုး ဖောက် ခံရမှုတွေကို တွေ့ရှိတဲ့အခါ ခံရတဲ့အခါမှာ ဆိတ်ဆိတ် မနေပဲနဲ့ ဖွင့်ပြောရမယ်ပေါ့နော်။ ထုတ်ဖော်ရ မယ်။ ကျမ တို့က တိတ်ဆိတ်နေမယ် နှုတ်ဆိတ်နေမယ် ဆိုလို့ရှိ ရင်တော့ ဒီစစ်အုပ်စုကို လူသတ်လိုင်စင်တွေ သူတို့လက်ထဲ ပေးလိုက်သလို ဖြစ်မှာပဲပေါ့” ဟု ပြောသည်။ လက်ရှိတွင် စစ်ကော်မရှင်တပ်သည် ၎င်းတို့၏ ရွေးကောက်ပွဲကို ဝေဖန်သူများအား ဖမ်းဆီးနှိပ်စက်ခြင်း၊ ပြည်သူ များအား မဲထည့်ရန် အကျပ်ကိုင် ခြိမ်းခြောက်ခြင်းနှင့် ကြိုတင်မဲမထည့်ပါက တက္ကသိုလ်တက်ခွင့် မပေးခြင်း စသည့် လူ့အခွင့်အရေး ချိုးဖောက်မှုများကို ဗြောင်ကျကျ ကျူးလွန်နေသည်ဟု လူ့အခွင့်အရေး လှုပ်ရှားသူ များက ဆိုသည်။ လွတ်လပ်စွာ ဆန္ဒမဲပေးပိုင်ခွင့် ချိုးဖောက်ခံနေရသည့် အခြေအနေနှင့် ပတ်သက်၍ ရှမ်းလူ့အခွင့်အရေးမဏ္ဍိုင် (SHRF) ၏ ပြောရေးဆိုခွင့်ရှိသူ ယိင်းလျန်းဟန်က ယခုကဲ့သို့ ထောက်ပြသည်။ “အဓိကကတော့ ရွေးကောက်ပွဲဆိုတာ ဒီမိုကရေစီနည်းလမ်း ကျကျနဲ့ပေါ့နော် ဖိအားပေးပြီး မဲပေးတာမျိုး မရှိရဘူး။ ကိုယ်မဲပေးချင်တဲ့လူ ပေးလို့ရတယ်။ မဲမပေးချင်တဲ့သူ မပေးရဘူး။ ဒီလိုပြည်သူတွေ လွတ်လပ်စွာ ဆန္ဒမဲပေးပိုင်ခွင့် ရှိတယ်။ ဒါပေမဲ့ အခုလိုမျိုး ဖိအားပေးတာက ဒါကလွတ်လပ်စွာ မဲပေးပိုင်ခွင့်ကို ချိုးဖောက် ရာ ကျနေတယ်ရှင့်။” ဤကဲ့သို့ လွတ်လပ်စွာ ရွေးချယ်ပိုင်ခွင့်ကို ပိတ်ပင်တားဆီးနေသည့်အပြင် စစ်ကော်မရှင်သည် ၎င်းတို့၏ ရွေးကောက်ပွဲ အောင်မြင်ရေးအတွက် ပြည်သူများအား နည်းလမ်းမျိုးစုံဖြင့် အကျပ်ကိုင်လျက်ရှိသည်။ မဲပေးပိုင်ခွင့်ကို ခြိမ်းခြောက်ခံနေရသည့် အခြေအနေနှင့် ပတ်သက်၍လည်း ဒေါ်မူစဲက “ပြည်သူတွေကနေပြီး တော့မှ အခုက ပြည်သူတွေမှာ ဆုပ်လည်း စူး စားလည်းရူး သူတို့က အမျိုးမျိုး ဒီရွေးကောက်ပွဲမှာ အတု အယောင် ရွေးကောက်ပွဲမှာ သူတို့က မဲထည့်ခိုင်းမယ်။ ဖိအားပေးတယ်။ တကယ်က ဆိုလို့ရှိရင် ဒီဟာက ပြည် သူတွေက နိုင်ငံသားတိုင်း နိုင်ငံရေး အခွင့်အရေးကို ချိုးဖောက်ခံနေရတာ ဖြစ်တယ်။ ပြည်သူတွေသည် သူတို့ မဲပေးချင်ပေးမယ်။ မပေးချင်မပေးဘူး။ ဒါပေမယ့် အခုက ခြိမ်းခြောက်တယ်။ မပေးလို့ရှိရင် ဘယ်လို ဆိုပြီး တော့ ခြိမ်းခြောက်တယ်” ဟု ပြောသည်။ ထို့အပြင် မွန်ပြည်လူ့အခွင့်အရေးဖောင်ဒေးရှင်း (HURFOM) ဒါရိုက်တာ နိုင်အဲမွန်ကလည်း ရွေးကောက်ပွဲ ကာ လနှင့် နီးကပ်လာချိန်တွင် လေကြောင်းတိုက်ခိုက်မှုနှင့် ရွာမီးရှို့မှုများ ပိုမိုများပြားလာပုံကို ယခုကဲ့သို့ ပြောသည်။ “တော်တော်များများက ရွေးကောက်ပွဲနဲ့ ဆက်စပ်ပြီးတော့ကို ချိုးဖောက်မှုတွေ ပြန်ပြီးတော့ တိုးပွားနေတာ တွေ ရှိတယ်။ Airstrike တွေက အများကြီး တိုးလာတာတွေ့ရတယ်။ နောက်တစ်ခုက ခုနကလိုမျိုး အမျိုး သမီးတွေ ကလေးတွေ နောက်တစ်ခါ ရွာတွေ မီးရှို့ခံရတာတွေပိုများလာတယ်။ အခုလိုမျိုး ရွေးကောက်ပွဲ ကာလနဲ့ နီးလာလေ ချိုးဖောက်မှုတွေက များလာလေဆိုတဲ့ အနေအထားကို ပြနေပါတယ်။” စစ်ကော်မရှင်၏ အစီအစဉ်အရ ရွေးကောက်ပွဲကို အပိုင်း ၃ ပိုင်း ခွဲ၍ ကျင်းပသွားမည်ဖြစ်ပြီး၊ ပထမပိုင်းကို လာမည့် ဒီဇင်ဘာလ ၂၈ ရက်နေ့တွင် လည်းကောင်း၊ ဒုတိယပိုင်းကို ၂၀၂၆ ခုနှစ် ဇန်နဝါရီလ ၁၁ ရက်နေ့တွင် လည်းကောင်း ကျင်းပသွားရန် သတ်မှတ်ထားသည်။ အပိုင်း ၃ ကိုမူ ဇန်နဝါရီလ ၂၅ ရက်နေ့တွင် ကျင်းပမည်ဟု ကြေညာထားသည်။ သို့သော်လည်း ဤရွေးကောက်ပွဲသည် စစ်တပ်၏ အကျိုးစီးပွားအတွက်သာဖြစ်ပြီး ပြည်သူများ စစ်ကျွန်ဘဝမှ ရုန်းထွက်၍ မရအောင် အစီအစဉ်တကျ ပြုလုပ်ခြင်းသာ ဖြစ်သည်ဟု တက်ကြွလှုပ်ရှားသူများက ရှုမြင်ကြ သည်။ ပြည်သူတို့၏ လူ့အခွင့်အရေး ဆုံးရှုံးနေရမှုများကို အဆုံးသတ်နိုင်ရန် စစ်အာဏာရှင် အမြစ်ပြတ်ရေးအတွက် အားသွန်ခွန်စိုက် လုပ်ဆောင်ကြရန် NUG ယာယီသမ္မတ ဒူဝါလရှီးက ၇၇ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့တွင် တိုက်တွန်းထားသည်။ အလားတူ သြစတြေးလျ၊ ယူကေ၊ ကနေဒါနှင့် ဥရောပသမဂ္ဂ (EU) တို့ကလည်း စစ်ကော်မရှင်၏ ရွေးကောက်ပွဲ သည် အကြမ်းဖက်မှုများကို ပိုမိုဆိုးရွားစေပြီး စစ်မှန်သည့် ဖြေရှင်းနည်းနှင့် ပိုမိုဝေးကွာစေနိုင်ကြောင်း ပူးတွဲသတိပေး ထုတ်ပြန်ထားကြသည်။  

ရွေးကောက်ပွဲမှာ စစ်အုပ်စုအား လူသတ်လိုင်စင် ပေးမည့် လုပ်ရပ်ဖြစ်ဟု တက်ကြွလှုပ်ရှားသူများ ထောက်ပြ

ရွေးကောက်ပွဲမှာ စစ်အုပ်စုအား လူသတ်လိုင်စင် ပေးမည့် လုပ်ရပ်ဖြစ်ဟု တက်ကြွလှုပ်ရှားသူများ ထောက်ပြ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၇ ရ…

  • December 17, 2025
ရွေးကောက်ပွဲ ကာကွယ်သည့် ဥပဒေဖြင့် တော်လှန်ရေး အင်အားစုများအား အမှုဖွင့် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၇ ရက်။ ယခုလအတွင်း ကျင်းပရန်ပြင်ဆင်နေသည့် စစ်ကော်မရှင် စီစဉ်သည့် ရွေးကောက်ပွဲကို ဆန့်ကျင်ကန့်ကွက်သည့် တော်လှန် ရေး အင်အားစုများနှင့် လူငယ်များကို စစ်ကော်မရှင်က ရွေးကောက်ပွဲ ဥပဒေများ အသုံးပြု၍ အရှိန်မြှင့် ဖမ်းဆီး အရေးယူမှုများ ပြုလုပ်လာနေသည်။ အထူးသဖြင့် ကရင်နီပြည်အတွင်း ရွေးကောက်ပွဲ ဆန့်ကျင်ဆန္ဒပြမှုကြောင့် ကရင်နီပြည်လူငယ်များသမဂ္ဂ (UKSY) မှ တာဝန်ရှိသူများကို ရွေးကောက်ပွဲနှောင့်ယှက်မှု ပုဒ်မဖြင့် အမှုဖွင့်လိုက်ကြောင်း စစ်ကော်မရှင်က ဒီဇင်ဘာလ ၁၆ ရက်နေ့တွင် ထုတ်ပြန်ခဲ့သည်။ UKSY မှ တာဝန်ရှိသူများကို ဒီဇင်ဘာလ ၁၀ ရက်နေ့က လွိုင်ကော်မြို့မ ရဲစခန်းတွင် ရွေးကောက်ပွဲများကို နှောင့် ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေပုဒ်မ ၂၃ (က) ဖြင့် အမှုဖွင့်ခဲ့ခြင်းဖြစ်သည်။ ဤအခြေအနေနှင့်ပတ်သက်၍ UKSY သတင်းနှင့်ပြန်ကြားရေးတာဝန်ရှိသူက “ဒါက ပြည်သူလူထု ရွေးကောက် ပွဲကို ဆန့်ကျင်တဲ့သူတွေအားလုံး ဖမ်းဆီးအရေးယူမယ့် ကိစ္စမျိုးတော့ သူတို့ ထုတ်ပြန်ထားတယ်။ လက်ရှိ အနေ အထားအရတော့ ကျနော်တို့ UKSY အပေါ် အကျိုးသက်ရောက်မှုတော့မရှိဘူး။ ဒါက သူတို့ ခြိမ်းခြောက်ထား တဲ့ဟာပဲ ဖြစ်တယ်” ဟု ပြောသည်။ စစ်ကော်မရှင် ဝါဒဖြန့်သတင်းစာများ၏ ဖော်ပြချက်အရ မဲရုံမဖွင့်ရန် ဖုန်းဆက်ပြောဆိုခဲ့သည့် ကချင်လွတ်လပ် ရေး အဖွဲ့ KIO အရာရှိ ဇော်မိုင် အပါအဝင် ရန်ကုန်၊ ကရင်နီ၊ ကချင်နှင့် ရှမ်းပြည်တို့မှ တော်လှန်ရေးအဖွဲ့ဝင် ၁၂ ဦးကိုလည်း အမှုဖွင့်ထားသည်။ ၎င်းတို့အထဲတွင် မြောက်ဥက္ကလာပမြို့နယ်မှ ကိုယ်စားလှယ်လောင်းကို ခြိမ်းခြောက်ခဲ့သည်ဆိုသော ‘ကောင်းကင် ပြာ’ အမည်ရှိ Facebook အကောင့်ပိုင်ရှင်နှင့် ကျောင်းဆရာမများကို ခြိမ်းခြောက်သည်ဟု စွပ်စွဲခံရ သည့် PDF တပ်ဖွဲ့ဝင်များလည်း ပါဝင်နေသည်။ လွတ်လပ်သော မြန်မာသတင်းမီဒီယာကောင်စီ (IPCM) ဥက္ကဋ္ဌ နန်းဖော့ဂေက “စစ်အုပ်စုအနေနဲ့က သူတို့ ရွေး ကောက်ပွဲ မအောင်မြင်မှာ စိုးရိမ်တာပေါ့နော်။ အများပြည်သူကလည်း သူတို့လည်းသိပါတယ်။ သူတို့ရဲ့ ရွေး ကောက်ပွဲ မအောင်မြင်အောင် အခက်အခဲ ဟန့်တားတွေ ဖြစ်စေမယ့် အန္တရာယ်မျိုးတွေကို ရှင်းထားတဲ့အနေနဲ့ လွတ်လပ်စွာ ရေးသားထုတ်ဖော်ခွင့်ကိုပါ ခြိမ်းခြောက်တဲ့ ပုံစံမျိုးဖြစ်တာပေါ့” ဟု သုံးသပ်ပြောဆိုသည်။ မြန်မာအင်တာနက်ပရောဂျက် (MIP) ၏ အချက်အလက်များအရ ယခုနှစ် နိုဝင်ဘာလအထိ နိုင်ငံတစ်ဝန်းတွင် ရွေးကောက်ပွဲ ကာကွယ်ရေး ဥပဒေဖြင့် ဖမ်းဆီးခံရသူ ၃၂ ဦးရှိနေပြီး အခြားစစ်ဆေးဆဲနှင့် ဖမ်းဆီးခံရသူ စုစုပေါင်းမှာ အယောက် ၁၀၀ ထက်မနည်း ရှိနေပြီဖြစ်သည်။ ဇူလိုင်လကုန်ပိုင်းတွင် ပြဋ္ဌာန်းခဲ့သည့် အဆိုပါဥပဒေသည် အနည်းဆုံး ထောင်ဒဏ် ၃ နှစ်မှ အမြင့်ဆုံး သေဒဏ် အထိ ပြစ်ဒဏ်ချမှတ်နိုင် သဖြင့် ပြည်သူများအား ပြင်းထန်စွာ ခြိမ်းခြောက်သည့် ဥပဒေဖြစ်သည်ဟု တက်ကြွ လှုပ်ရှားသူများက ထောက်ပြနေကြသည်။ ဥရောပသမဂ္ဂ (EU) အပါအဝင် နိုင်ငံတကာ အဖွဲ့အစည်းများကလည်း ဒီဇင်ဘာလ ၂၈ ရက်နေ့တွင် မြို့နယ် ၁၀၂ မြို့နယ်၌ စတင်ရန်စီစဉ်နေသည့် ဤရွေးကောက်ပွဲသည် လွတ်လပ်ပြီး တရားမျှတမှုရှိမည်မဟုတ်ကြောင်း ကြေညာထားသော်လည်း စစ်ကော်မရှင်ကမူ ၎င်းတို့၏ ရွေးကောက်ပွဲ လုပ်ငန်းစဉ်ကို နှောင့်ယှက်သူမှန်သမျှအား ပြင်းထန်စွာ အရေးယူမည်ဟု ဆက်လက်ခြိမ်းခြောက်နေဆဲ ဖြစ်သည်။ ဓာတ်ပုံ - ကရင်နီပြည် လူငယ်များသမဂ္ဂ (UKSY)  

ရွေးကောက်ပွဲ ကာကွယ်သည့် ဥပဒေဖြင့် တော်လှန်ရေး အင်အားစုများအား အမှုဖွင့်

ရွေးကောက်ပွဲ ကာကွယ်သည့် ဥပဒေဖြင့် တော်လှန်ရေး အင်အားစုများအား အမှုဖွင့် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၇ ရက်။  ယခုလအတွင်း…

  • December 17, 2025
မြောက်ဦးဆေးရုံး ဗုံးကြဲခံရပြီးနောက် ရခိုင်ဒေသ ကျန်းမာရေး စောင့်ရှောက်မှုအတွက် AA က နိုင်ငံတကာ အကူအညီတောင်းခံ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၇ ရက်။ စစ်ကော်မရှင်၏ မြောက်ဦးပြည်သူ့ဆေးရုံအပေါ် လေကြောင်းမှ ဗုံးကြဲတိုက်ခိုက်မှုကြောင့် ရခိုင်ဒေသ တစ်ခုလုံး ၏ ကျန်းမာရေးစောင့်ရှောက်မှု စနစ်မှာ ပြိုလဲလုနီးပါး အခြေအနေနှင့် ရင်ဆိုင်နေရပြီး အာရက္ခတပ်တော် (AA) က နိုင်ငံတကာအသိုင်းအဝိုင်းထံ အရေးပေါ် ဆေးဝါးအကူအညီများ တောင်းခံလိုက်သည်။ ပြီးခဲ့သည့် ဒီဇင်ဘာလ ၁၀ ရက် (အပြည်ပြည်ဆိုင်ရာ လူ့အခွင့်အရေးနေ့) ညပိုင်းတွင် စစ်ကော်မရှင်တပ်က ပေါင် ၅၀၀ ဗုံးများဖြင့် မြောက်ဦးဆေးရုံကို ပစ်မှတ်ထားတိုက်ခိုက်ခဲ့ခြင်းဖြစ်သည်။ အဆိုပါဖြစ်ရပ်ကြောင့် လသားအရွယ် ကလေးငယ်များ အပါအဝင် အရပ်သားလူနာများနှင့် ဆေးရုံဝန်ထမ်း စုစုပေါင်း ၃၃ ဦး သေဆုံးကာ ၇၇ ဦး ပြင်းထန်စွာ ဒဏ်ရာရရှိခဲ့ကြောင်း AA က ထုတ်ပြန်ထားသည်။ အာရက္ခတပ်တော် (AA) ၏ ထုတ်ပြန်ချက်တွင် အဆိုပါဆေးရုံသည် အရပ်သားပြည်သူများကိုသာ ကုသပေးနေ သည့် အရပ်ဘက်ဆေးရုံစစ်စစ် ဖြစ်ကြောင်း ဖော်ပြထားသည်။ ဗုံးကြဲမှုကြောင့် ဆေးရုံအဆောက်အအုံများ ပျက်စီးကာ လုပ်ငန်းများ လုံးဝရပ်တန့်သွားခဲ့ရသလို ဒေသတွင်းရှိ အခြားသော ဆေးရုံများမှာလည်း လေကြောင်းအန္တရာယ်ကြောင့် အတည်တကျမရှိဘဲ ခက်ခဲစွာ ရွှေ့ပြောင်း ကုသနေရသည့် အခြေအနေ ဖြစ်နေသည်။ ယင်းအခြေအနေနှင့် ပတ်သက်၍ အာရက္ခတပ်တော် (AA) က “ဆက်လက်၍ အစုလိုက်အပြုံလိုက် သေဆုံး ထိခိုက်နစ်နာခဲ့ရသူများ၏ တရားမျှတမှုရရှိရေးအတွက် ဆက်လက် ပူးပေါင်းကူညီပေးရန်နှင့် အရေးပေါ် လိုအပ် နေသော ဆေးရုံသုံးပစ္စည်းများနှင့် ဆေးဝါးများအတွက် ဝိုင်းဝန်းပံ့ပိုးကူညီပေးကြပါရန်ကိုလည်း အကူအညီ တောင်းခံအပ်ပါသည်” ဟု ဒီဇင်ဘာလ ၁၄ ရက်နေ့တွင် ထုတ်ပြန်တောင်းဆိုထားသည်။ မြေပြင်အခြေအနေအရ ရခိုင်ပြည်နယ်အတွင်း စစ်ကော်မရှင်က လမ်းပန်းဆက်သွယ်ရေးနှင့် ကုန်စည်စီးဆင်း မှုများကို ဖြတ်တောက်ထားခြင်းကြောင့် ဆေးဝါးပြတ်လပ်မှု ဒဏ်ကိုလည်း ပြင်းထန်စွာ ခံစားနေရသည်။ ဒေသခံတစ်ဦးက “ဆေးရုံကလည်း ဗုံးကြဲခံရတော့ ဘယ်သွားရမှန်းမသိတော့ဘူး။ ဆေးဝါးကလည်း ပြတ်နေ တော့ အရေးပေါ်လူနာတွေဟာ ဆေးကုသခွင့်မရဘဲ အသက်ဆုံးရှုံးရနိုင်တဲ့ အန္တရာယ်နဲ့ ရင်ဆိုင်နေရပါတယ်” ဟု ပြောသည်။ လက်ရှိတွင် အာရက္ခတပ်တော် (AA) က ထိန်းချုပ်ထားသည့် နယ်မြေများအတွင်း စစ်ဘေးရှောင်ဦးရေ တိုးပွား လာနေသလို၊ စစ်ကော်မရှင်က ဆေးရုံ၊ စာသင်ကျောင်းနှင့် ဘုန်းကြီးကျောင်းများကိုပါ ပစ်မှတ်ထား တိုက်ခိုက် နေခြင်းကြောင့် လူသားချင်းစာနာမှုဆိုင်ရာ အကူအညီများမှာ ယခင်ကထက် ပိုမိုလိုအပ်လျက်ရှိကြောင်း ဒေသခံများက ပြောသည်။ မြောက်ဦးဆေးရုံ ဗုံးကြဲခံရပြီး နောက်ရက်၌ပင် ကျောက်ဖြူမြို့နယ်၊ ငလုံးစုကျေးရွာအတွင်းသို့ စစ်ကော်မရှင်က ဂျက်ဖိုက်တာဖြင့် ဗုံးနှစ်လုံး ထပ်မံကြဲချတိုက်ခိုက်ခဲ့ရာ အပြစ်မဲ့အရပ်သား ၈ ဦး သေဆုံးပြီး ၁၀ ဦးထက်မနည်း ဒဏ်ရာရရှိခဲ့သည်။ ထို့အပြင် ဒီဇင်ဘာလ ၁၂ ရက်နေ့ ညပိုင်းနှင့် ၁၃ ရက်နေ့ အစောပိုင်းတို့တွင်လည်း ပုဏ္ဏားကျွန်း၊ ပေါက်တော၊ ရသေ့တောင်နှင့် မြောက်ဦးမြို့နယ်ရှိ ကျေးရွာများသို့ Cluster ဗုံး (ခcluster bomb) များ၊ ရော့ကတ်များနှင့် ဂျက်ဖိုက်တာများ အသုံးပြုကာ အရှိန်အဟုန်ပြင်းစွာ ဆက်လက်တိုက်ခိုက်ခဲ့သည်။ ဤကဲ့သို့ အရပ်သားပြည်သူများ နေထိုင်ရာ ကျေးရွာများကို ပစ်မှတ်ထားကာ နေ့ညမပြတ် ဗုံးကြဲနေသည့် လုပ်ရပ်များသည် စစ်ရာဇဝတ်မှုများကို ပြောင်ပြောင်တင်းတင်း ထပ်မံကျူးလွန်နေခြင်းဖြစ်ကြောင်း တော်လှန်ရေးအင်အားစုများက ထောက်ပြကြသည်။ လက်ရှိတွင် ရခိုင်ပြည်နယ်တစ်ခွင်၌ လေကြောင်းရန်အန္တရာယ် အထူးစိုးရိမ်ရသည့် အခြေအနေဖြစ်နေသဖြင့် ပြည်သူများအနေဖြင့် အထူးသတိထားကြရန်နှင့် နိုင်ငံတကာအနေဖြင့်လည်း အဆိုပါ အစုလိုက်အပြုံလိုက် သတ်ဖြတ်မှုများအတွက် ထိရောက်စွာ အရေးယူပေးရန် အရေးပေါ်လိုအပ်လျက်ရှိသည်ဟု AA က ထုတ်ပြန် ထားသည်။ ဓါတ်ပုံ - Wai Hun Aung/AA    

မြောက်ဦးဆေးရုံး ဗုံးကြဲခံရပြီးနောက် ရခိုင်ဒေသ ကျန်းမာရေး စောင့်ရှောက်မှုအတွက် AA က နိုင်ငံတကာ အကူအညီတောင်းခံ

မြောက်ဦးဆေးရုံး ဗုံးကြဲခံရပြီးနောက် ရခိုင်ဒေသ ကျန်းမာရေး စောင့်ရှောက်မှုအတွက် AA က နိုင်ငံတကာ အကူအညီတောင်းခံ သတင်းနှင့် မီဒီယာ ကွန်ရက်။၂၀၂၅ ခုနှစ်၊…

  • December 17, 2025
စစ်အုပ်စု ကိုယ်စားလှယ်ကို ကုလ လက်မခံ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၇ ရက်။ ကုလသမဂ္ဂတွင် စစ်အုပ်စု၏ ကိုယ်စားလှယ်ကို အစားထိုးခန့်အပ်ရန်နှင့် နိုင်ငံတကာ တရားဝင်မှုရရှိရန် စစ်ကော်မရှင်၏ အကြိမ်ကြိမ် ကြိုးပမ်းမှုသည် (၈၀) ကြိမ်မြောက် ကုလသမဂ္ဂ အထွေထွေညီလာခံတွင် နောက် ထပ်တစ်ကြိမ် ထပ်မံပယ်ချခံလိုက်ရသည်။ ပြီးခဲ့သည့် ဒီဇင်ဘာလ ၁၂ ရက်နေ့က ပြုလုပ်သည့် အရည်အချင်းစစ် ကော်မတီ (Credentials Committee) ၏ အစီရင်ခံစာ အတည်ပြုပွဲတွင် မြန်မာနိုင်ငံ၏ ကိုယ်စားပြုခွင့်ကို ဆက်လက်ရွှေ့ဆိုင်းရန် ဆုံးဖြတ်ခဲ့ခြင်းကြောင့် သံအမတ်ကြီး ဦးကျော်မိုးထွန်းကပင် ကုလသမဂ္ဂတွင် မြန်မာနိုင်ငံကိုယ်စားပြုအဖြစ် ယခင်နှစ်များအတိုင်း ဆက်လက် ရပ်တည်ခွင့် ရရှိခဲ့ခြင်း ဖြစ်သည်။ မြေပြင်တွင် ဆေးရုံ၊ စာသင်ကျောင်းများနှင့် အရပ်သားပြည်သူများအပေါ် လေကြောင်းမှ ဗုံးကြဲတိုက်ခိုက်ခြင်း စသည့် စစ်ရာဇဝတ်မှုများကို ဆက်တိုက်ကျူးလွန်နေခြင်းကြောင့် စစ်ကောင်စီသည် နိုင်ငံတကာ၏ ဖယ်ကြဉ် ခြင်းကို ဆက်လက်ကြုံတွေ့နေရခြင်း ဖြစ်သည်။ ဤဆုံးဖြတ်ချက်နှင့် ပတ်သက်၍ NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က “ကုလသမဂ္ဂလို နေရာမှာ လူထုထောက်ခံတဲ့ သံအမတ်ကြီး ဦးကျော်မိုးထွန်း မြန်မာနိုင်ငံကို ကိုယ်စားပြု ရှိနေခြင်းဟာ မြန်မာ နိုင်ငံနဲ့ မြန်မာပြည်သူလူထုအတွက် အလွန်အရေးကြီးလှပါတယ်” ဟု ပြောသည်။ သံအမတ်ကြီး ဦးကျော်မိုးထွန်းသည် (၇၉) ကြိမ်မြောက် ညီလာခံအတွင်း၌ မိန့်ခွန်းပေါင်းများစွာ ပြောကြားကာ မြန်မာ့အရေးကို ကမ္ဘာက အလေးထားလာအောင် ဆောင်ရွက်ခဲ့ပြီး လက်ရှိ (၈၀) ကြိမ်မြောက် ညီလာခံတွင် လည်း ပြည်သူတို့၏အသံကို ဆက်လက် တင်ပြနေဆဲ ဖြစ်သည်။ ၎င်း၏ ရပ်တည်ချက်နှင့် ပတ်သက်၍ Progressive Voice ၏ ဒေါ်ခင်ဥမ္မာက “တိုင်းပြည်ကို ကိုယ်စားပြုခွင့်ဆို တဲ့ ခုံမှာ ဦးကျော်မိုးထွန်းက ပြည်သူကို ကိုယ်စားပြု ထိုင်ခွင့်ရနေခြင်းက ကျမတို့ ပြည်သူတွေရဲ့ အချုပ်အခြာ အာဏာဟာ ပြည်သူ့လက်ထဲမှာ ရှိနေတယ်ဆိုတဲ့ ဥစ္စာကို ကျမတို့က ဒါလုံးဝ ခိုင်ခိုင်မာမာ ယုံကြည်ခွင့်ရမယ်” ဟု ဆိုသည်။ သံအမတ်ကြီးသည် မြန်မာနိုင်ငံတွင် စစ်အာဏာရှင်စနစ် အပြီးတိုင်ချုပ်ငြိမ်းရေး၊ ဖက်ဒရယ်ဒီမိုကရေစီ တည် ထောင်ရေးနှင့် ကျူးလွန်သူများကို နိုင်ငံတကာတရားစီရင်မှုဖြင့် အရေးယူနိုင်ရေးအတွက် ကုလသမဂ္ဂ မျက်နှာစာမှ ဆက်လက်ကြိုးပမ်းသွားမည်ဟု ဆိုသည်။ ND-Burma မှ ပြောရေးဆိုခွင့်ရှိသူ ဆန်ထွယ်ကလည်း “ကျမတို့ရဲ့ အသံ၊ ကျမတို့ရဲ့ ဒီတော်လှန်ရေး အဖွဲ့ အစည်းတွေအတွက် သူက ရပ်တည်တဲ့လူ ဖြစ်တဲ့အတွက်ကြောင့်မို့လို့ သူဆက်ရှိသင့်တယ်” ဟု ၎င်း၏ အခန်းကဏ္ဍ အရေးပါမှုကို အလေးပေး ပြောဆိုသည်။ လက်ရှိတွင် ကုလသမဂ္ဂဆိုင်ရာ မြန်မာအမြဲတမ်း ကိုယ်စားလှယ်အဖွဲ့ရုံး အနေဖြင့် မြန်မာပြည်သူများအပေါ် ရက်စက်ကြမ်းကြုတ်မှုများ ကျူးလွန်နေသည့် စစ်အုပ်စုနှင့် ၎င်း၏ အပေါင်းအပါများကို နိုင်ငံတကာ တရားစီရင် မှုဖြင့် တာဝန်ယူမှု၊ တာဝန်ခံမှုရှိလာစေရေးအတွက် အရှိန်မြှင့် ဆောင်ရွက်လျက်ရှိသည်ဟု ဆိုသည်။ စစ်ကော်မရှင်က ၎င်းတို့၏ တရားမဝင် အတုအယောင် ရွေးကောက်ပွဲကို နိုင်ငံတကာက အသိအမှတ် ပြုလာ စေရန် သံတမန်ရေးအရ ဖိအားပေးကြိုးပမ်းနေချိန်တွင် ကုလသမဂ္ဂက ယခုကဲ့သို့ သံအမတ်ကြီး ဦးကျော်မိုးထွန်း ကိုသာ ဆက်လက်အသိအမှတ်ပြုထားခြင်းသည် စစ်အုပ်စုအတွက် ကြီးမားသည့် သံတမန်ရေးရာ ထိုးနှက်ချက် တစ်ခုလည်း ဖြစ်နေသည်ဟု နိုင်ငံရေးလေ့လာသူများက သုံးသပ်ထားသည်။ ထို့ကြောင့် သံအမတ်ကြီး ဦးကျော်မိုးထွန်း ဦးဆောင်သည့် ကိုယ်စားလှယ်အဖွဲ့သည် လာမည့် (၈၀) ကြိမ်မြောက် ကုလသမဂ္ဂ အထွေထွေညီလာခံ သက်တမ်းတစ်လျှောက်လုံးတွင် မြန်မာ့အရေးနှင့် ပတ်သက်၍ နိုင်ငံတကာ၏ ထိရောက်သည့် အရေးယူဆောင်ရွက်မှုများ ပေါ်ပေါက်လာစေရန် အဓိကကျသည့် အခန်းကဏ္ဍမှ ဆက်လက် တာဝန်ယူသွားမည်ဖြစ်သည်။

စစ်အုပ်စု ကိုယ်စားလှယ်ကို ကုလ လက်မခံ

စစ်အုပ်စု ကိုယ်စားလှယ်ကို ကုလ လက်မခံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၇ ရက်။  ကုလသမဂ္ဂတွင် စစ်အုပ်စု၏ ကိုယ်စားလှယ်ကို အစားထ…

  • December 17, 2025
NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၇ ရက်။ တနင်္သာရီတိုင်းအတွင်း လှုပ်ရှားနေသည့် အမျိုးသားညီညွတ်ရေး အစိုးရ (NUG) ၏ အထူးတိုင်းစစ်ဌာန ဗျူဟာမှူး တစ်ဦး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို ကရင်အမျိုးသားအစည်းအရုံး (KNU) တပ်မဟာ ၄ လက်အောက်ခံ တပ်များက ဖမ်းဆီးထိန်းသိမ်းထားသည်ဟု ထားဝယ်ခရိုင်အမှတ် ၂ တပ်ရင်းက ပြောသည်။ ယနေ့ (ဒီဇင်ဘာ ၁၇ ရက်) နံနက်ပိုင်းတွင် ဖမ်းဆီးထိန်းသိမ်းလိုက်ကြောင်း ထားဝယ်ခရိုင်အမှတ် ၂ တပ်ရင်းက တာဝန်ရှိသူ တစ်ဦးက ပြောသည်။ ဖြစ်စဉ်နှင့်ပတ်သက်၍ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ဘာကြောင့်ဆိုတာလည်း အသေအချာ မသိရသေးဘူး။ အခုက ဆက်ပြီးဖမ်းထားတုန်းပဲ။ တပ်မဟာ ၄ တပ်ရင်း ၁၂ ဌာနချုပ်ကို ခေါ်သွားတယ်လို့တော့ သိရတယ်။ ဗျူဟာမှူးရယ်၊ တပ်ရင်းမှူးရယ်၊ ရဲဘော်အချို့ရယ်က နယ်စပ်ကအပြန် သူတို့တပ်ကို ဖြတ်ရတာမှာ အဲဒီမှာ ထိန်းလိုက်တာ။ ပြီးမှ ဒီမနက်မှာ တပ်ခွဲက ရဲဘော်တွေနဲ့ ထောက်ပို့တွေကိုပါ ဆက်တိုက်ဖမ်းတာ အားလုံး ၄၀ ကျော်၊ ၅၀ နီးပါး ရှိနေပြီ” ဟု ပြောသည်။ ဖမ်းဆီးခံရသူများထဲတွင် အထူးတိုင်းစစ်ဌာန နည်းဗျူဟာ ၃၃ ဗျူဟာမှူး စောဒါးကို၊ တနင်္သာရီတိုင်းစစ်ဌာန ဒရုန်းတပ်ရင်း ဒုတပ်ရင်းမှူး ဒိုရာ နှင့် ထားဝယ်ခရိုင်အမှတ် ၂ တပ်ရင်း (T5) တပ်ရင်းမှူး မင်းသားကြီးတို့ကဲ့သို့ အဆင့်မြင့်အရာရှိများ ပါဝင်နေသည်။ ၎င်းတို့အား KNU တပ်မဟာ ၄၊ တပ်ရင်း ၁၂ လက်အောက်ခံ ကစယ်ဒိုကျားတပ်ဖွဲ့နှင့် ပုတီးတစ်လုံးတပ်ဖွဲ့တို့က ဖမ်းဆီးကာ လက်နက်ခဲယမ်းများကိုပါ သိမ်းဆည်းထားခြင်းဖြစ်သည်။ ဒေသခံများ၏ ပြောဆိုချက်အရ ပြီးခဲ့သည့် ဒီဇင်ဘာလ ၁၆ ရက်နေ့က ထားဝယ်ခရိုင်အမှတ် ၂ တပ်ရင်း တပ်ဖွဲ့ဝင်များနှင့် KNU တပ်ရင်း ၁၂ အောက်ရှိ တပ်ဖွဲ့ဝင်များအကြား ပြဿနာတစ်စုံတစ်ရာ ဖြစ်ပွားခဲ့သည်။ အဆိုပါ ဖြစ်စဉ်များနှင့် ပတ်သက်၍ KNU တာဝန်ရှိသူများကို ဆက်သွယ်နေဆဲ ဖြစ်သည်။ ထိုဖြစ်စဉ် နောက်ပိုင်းတွင် ယခုကဲ့သို့ ဖမ်းဆီးမှုများ ဆက်တိုက်ဖြစ်ပွားလာခြင်းဖြစ်ပြီး လက်ရှိတွင် KNU က သရက်ချောင်းမြို့နယ် ဂုံညှင်းဆိပ်လှေဆိပ် အပါအဝင် လှေဆိပ်အချို့ကိုလည်း ပိတ်ထားကြောင်း ဒေသခံများ၏ ပြောပြချက်အရ သိရသည်။ KNU တပ်မဟာ ၄ အတွင်းရေးမှူး ပဒိုအယ်နားကမူ အခြေအနေအသေးစိတ် မသိရသေးကြောင်း Dawei Watch သတင်းဌာနကို ဖြေကြားထားသည်။ NUG လက်အောက်ခံ တပ်ဖွဲ့ဝင်များအနေဖြင့် ဤဖြစ်စဉ်အပေါ် အမြန်ဆုံး တွေ့ဆုံဖြေရှင်းနိုင်ရန် ကြိုးပမ်းနေ သည်ဟု ဆိုသည်။ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ကျနော်တို့ကတော့ ဘုံရန်သူကိုတိုက်ဖို့အတွက် တော်လှန်သူ တွေနဲ့ လက်တွဲပြီးသွားနေပါတယ်။ မြေပြင်ပွတ်တိုက်မှုလေးတွေကို တွေ့ဆုံညှိနှိုင်းဆွေးနွေးတာတော့ အကောင်းဆုံးပေါ့။ အခုလိုကတော့ ဘယ်လိုမှအဆင်မပြေပါဘူး။ ကျနော်တို့ ဝန်ကြီးဌာနနဲ့ တိုင်းစစ်ဌာနတွေကို တင်ပြထားပြီးပါပြီ။ သူတို့ဘက်ကလည်း တွေ့ဆုံမှုတွေအတွက် လုပ်ဆောင်နေတယ်လို့ သိရတယ်” ဟု ပြော သည်။ လက်ရှိတွင် နှစ်ဖက်တာဝန်ရှိသူများ အကြား တင်းမာမှုများ လျော့ကျစေရန်နှင့် ဖမ်းဆီးခံထားရသူများ ပြန်လည် လွတ်မြောက်ရေးအတွက် အဆင့်မြင့်တာဝန်ရှိသူများအကြား ညှိနှိုင်းမှုများ ဆက်လက်လုပ်ဆောင်နေသည်ဟု ဆိုသည်။ 

ဓါတ်ပုံ - ဖမ်းဆီးခံထားရသည့် အမှတ် ၃၃ ဗျူဟာမှူး ကိုဘိ (ခ) စောဒါးကို နှင့် ထားဝယ်ခရိုင် အမှတ် ၂ တပ်ရင်းမှူး မင်းသားကြီးတို့၏ ပုံ (Crd)  

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၇ ရက်။&n…

  • December 17, 2025
မြန်မာလုပ်သား ၃,၅၀၀ ကျော်ကို ထိုင်းက စစ်တပ်လက်သို့ အတင်းအကျပ် ပြန်လွှဲဟု Fortify Rights ပြော

သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာ ၁၆ ရက်။ ထိုင်းအာဏာပိုင်များသည် မြန်မာစစ်ကော်မရှင် အရာရှိများနှင့် ပူးပေါင်းကာ မြန်မာလုပ်သား ၃,၅၀၀ ကျော်ကို အတင်းအဓမ္မ ပြန်ပို့ခဲ့သည်ဟု လူ့အခွင့်အရေးအဖွဲ့ Fortify Rights က ထုတ်ပြန်ပြောဆိုလိုက်သည်။ ပြန်ပို့ခံရသူ အများစုမှာ စစ်တပ်၌ အတင်းအကျပ် စစ်မှုထမ်းခိုင်းစေခံရပြီး၊ ထိုလုပ်ရပ်များသည် အန္တရာယ်ရှိရာ သို့ ပြန်မပို့ရေးမူ (Refoulement) အပါအဝင် နိုင်ငံတကာဥပဒေများကို ချိုးဖောက်နေကြောင်း Fortify Rights က ဒီဇင်ဘာ ၁၂ ရက်နေ့တွင် ထုတ်ပြန်သည့် အစီရင်ခံစာ၌ ထောက်ပြပြောဆိုထားသည်။ Fortify Rights အဖွဲ့၏ အမှုဆောင်အရာရှိချုပ် Matthew Smith က “ထောင်ပေါင်းများစွာသော မြန်မာ ပြည်သူတွေကို စစ်မှုထမ်းဖို့ အတင်းအဓမ္မ စုဆောင်းခြင်း၊ ညှင်းပန်းနှိပ်စက်ခြင်းနဲ့ သေဆုံးနိုင်ခြေရှိတဲ့ အန္တရာယ် တွေကို သိပါလျက်နဲ့ မြန်မာစစ်အုပ်စု လက်ထဲကို ထိုင်းအရာရှိတွေက တွန်းပို့နေခြင်းက အလွန်ရက်စက် ကြမ်း ကြုတ်ရာ ရောက်ပါတယ်” ဟု ပြောသည်။ Fortify Rights ၏ ဖော်ထုတ်ချက်အရ ၂၀၂၄ ခုနှစ်အစပိုင်းမှစ၍ ထိုင်းအာဏာပိုင်များသည် ရနောင်း-ကော့သောင်း နယ်စပ်ဂိတ်မှတစ်ဆင့် မြန်မာနိုင်ငံသား ထောင်ပေါင်းများစွာကို ပြန်ပို့ခဲ့ခြင်း ဖြစ်သည်။ ပြန်ပို့ခံရသူများအနက် အများစုမှာ မြန်မာစစ်အုပ်စု၏ လက်ထဲတွင် သေနတ်ထောက် ခြိမ်းခြောက်ခံရကာ အတင်းအကျပ် စစ်မှုထမ်း စေခိုင်းခြင်းများ ကို ခံခဲ့ကြရသည်ဟု ဆိုသည်။ “ထိုင်းနိုင်ငံအနေဖြင့် မြန်မာအာဏာသိမ်းစစ်အုပ်စုနဲ့ တရားမဝင် ပူးပေါင်းဆောင်ရွက်နေမှုကို ချက်ချင်း ရပ် တန့်သင့်ပြီး၊ တာဝန်ခံမှု တာဝန်ယူမှုရှိစေရန် အာမခံခြင်းနဲ့ ထိရောက်သော ယန္တရားတစ်ရပ်ကို ဖော်ဆောင် ကာ မြန်မာနိုင်ငံသားတွေကို အတင်းအဓမ္မ ပြန်ပို့တာ၊ ညှဉ်းပန်းနှိပ်စက်ခြင်းနဲ့ လူကုန်ကူးခြင်းတို့မှ ကာကွယ်ပေး သင့်ပါတယ်” ဟု Fortify Rights အမှုဆောင်အရာရှိ Matthew Smith က ပြောသည်။ Fortify Rights က ထိုင်းအာဏာပိုင်များ၏ ယခုလုပ်ရပ်များသည် နိုင်ငံတကာဥပဒေအရ ညှဉ်းပန်းနှိပ်စက်မှု၊ အသက်အန္တရာယ်ရှိသော နေရာသို့ အတင်းအကျပ် ပြန်ပို့သည့် 'Refoulement' မူ ချိုးဖောက်မှုအပြင် လူကုန်ကူးမှုအဖြစ်ပင် သတ်မှတ်နိုင်သည် ဟု ထောက်ပြထားသည်။ ထို့ပြင် နယ်စပ်နှစ်ဖက်စလုံးရှိ အရာရှိများနှင့် ပွဲစားများက မြန်မာနိုင်ငံသားများအား ပြန်မပို့ရလေအောင်ဟု ဆိုကာ ဒေါ်လာထောင်ပေါင်းများစွာ ငွေညှစ်ယူခဲ့သည့် ဖြစ်စဉ်များလည်း ရှိခဲ့ကြောင်း အစီရင်ခံစာတွင် ဖော်ထုတ် ခဲ့သည်။ Fortify Rights အနေဖြင့် ထိုင်းအစိုးရအား မြန်မာစစ်အုပ်စုနှင့် ပူးပေါင်းဆောင်ရွက်မှုများ ချက်ချင်း ရပ်တန့်ရန် နှင့် ညှဉ်းပန်းနှိပ်စက် ခံရနိုင်ခြေရှိသူများအား ကာကွယ်ပေးနိုင်မည့် တရားဝင် ခိုလှုံခွင့်လုပ်ငန်းစဉ် တစ်ရပ်ကို မဖြစ်မနေ ထူထောင်ရန် တိုက်တွန်းတောင်းဆိုထားသည်။

ဓါတ်ပုံ - Ranong Immigration

မြန်မာလုပ်သား ၃,၅၀၀ ကျော်ကို ထိုင်းက စစ်တပ်လက်သို့ အတင်းအကျပ် ပြန်လွှဲဟု Fortify Rights ပြော

မြန်မာလုပ်သား ၃,၅၀၀ ကျော်ကို ထိုင်းက စစ်တပ်လက်သို့ အတင်းအကျပ် ပြန်လွှဲဟု Fortify Rights ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာ ၁၆ ရက်။…

  • December 16, 2025
ဗန်းမော်မြို့သိမ်းတိုက်ပွဲမှ အညာ PDF ရဲဘော်များ ၇ လကြာခရီးအပြီး နေရပ်သို့ ပြန်လည်ရောက်ရှိ

သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာ ၁၆ ရက်။ စစ်ကိုင်းတိုင်း၊ ယင်းမာပင်ခရိုင်မှ ဒေသခံ ပြည်သူ့ကာကွယ်ရေးတပ်ဖွဲ့ (PDF) ရဲဘော်များသည် ကချင်ပြည်၊ ဗန်းမော်မြို့သိမ်းတိုက်ပွဲအထိ သွားရောက် တာဝန်ထမ်းဆောင်ခဲ့သည့် ခုနစ်လကျော်ကြာ ခရီးရှည်စစ်ဆင်ရေး အပြီးတွင် နေရပ်သို့ ပြန်လည်ရောက်ရှိပြီ ဖြစ်သည်။ ဒီဇင်ဘာလ ၁၄ ရက်နေ့၌ ၎င်းတို့၏ နေရပ်ရင်းဒေသသို့ ပြန်လည်ရောက်ရှိလာပြီ ဖြစ်ကြောင်း ဗိုလ်စွမ်းသူမောင် က ပြောသည်။ ယင်းမာပင်ခရိုင်အခြေစိုက် တပ်ရင်း ၂၈ နှင့် ၃၁ မှ စုစုပေါင်း ရဲဘော် ၆၉ ဦး ပါဝင်ခဲ့သည့် ဤစစ်ဆင်ရေး ခရီးစဉ်သည် ရှမ်းမြောက် (၁၀၂၇) စစ်ဆင်ရေး ကာလ၌ စတင်ခဲ့ခြင်း ဖြစ်သည်။ ထို့နောက် စစ်ကိုင်းတိုင်းအတွင်းမှ ကောလင်းနှင့် ပင်လည်ဘူးမြို့သိမ်းတိုက်ပွဲများ အပြင် နောက်ဆုံးတွင် ကချင်လွတ်လပ်ရေး တပ်မတော် KIA ဦးဆောင်သော ဗန်းမော်မြို့သိမ်းတိုက်ပွဲအထိ ချီတက်ခဲ့ခြင်းဖြစ်သည်။ အညာဒေသမှ PDF များ၏ ဤသို့ နယ်မြေဒေသမရွေး ခရီးရှည် ချီတက်ကာ ပူးပေါင်းပါဝင် တိုက်ခိုက်မှုသည် စစ်အာဏာရှင်ကို ဆန့်ကျင်ရာတွင် တော်လှန်ရေး အင်အားစုများအကြား ခိုင်မာသည့် မဟာမိတ်စိတ်ဓာတ် နှင့် စစ်ရေးပူးပေါင်းဆောင်ရွက်မှုကို ထင်ဟပ်ပြသခြင်း ဖြစ်ကြောင်း ကာကွယ်ရေး တပ်ဖွဲ့ဝင်များက ပြောသည်။ သုံးသပ်မှုများ ရှိနေသည်။ တပ်ရင်းမှူး ဗိုလ်စွမ်းသူမောင် က “ရဲဘော်တွေ တာဝန်ကျေပြီး မိခင်တပ်ရင်းကို ပြန်လာနိုင်ခဲ့ပေမယ့် အပြန် ခရီး မှာ လူမစုံခဲ့တဲ့အတွက် ဆရာ စိတ်မကောင်းပါဘူး။ ဒါပေမယ့် ပန်းနဲ့ပစ်တဲ့ ပွဲမဟုတ်တော့ ပေးဆပ်ခဲ့ရတဲ့ ရဲဘော်တွေအတွက် ဆရာ ဝမ်းနည်းစိတ် တစ်ဖက်နဲ့ ဂုဏ်ယူပါတယ်။ တာဝန်ကျေပါတယ်" ဟု ပြောသည်။ တပ်ရင်းမှူး ဗိုလ်စွမ်းသူမောင် ၏ ပြောဆိုချက်အရ ဤခရီးရှည်စစ်ဆင်ရေး ကာလအတွင်း တပ်ခွဲမှူး ရဲဘော် နိုင်းနိုင်း အပါအဝင် ရဲဘော် ၅ ဦး ကျဆုံးခဲ့ရပြီး၊ ၇ ဦး ဒဏ်ရာရရှိခဲ့သည် ဟု သိရသည်။ ကျန်ရှိသည့် ရဲဘော်များသည် တိုက်ပွဲတာဝန်များ ပြီးဆုံး၍ အောင်ပွဲခံပြန်လာခြင်းဖြစ်သော်လည်း ကျဆုံးသွားသူ များအတွက် ဝမ်းနည်းပူဆွေးမှုများလည်း ရှိနေသည်။ ဒေသခံတစ်ဦးက “ကျနော်တို့ အညာသားရဲဘော်တွေဟာ ဒီလောက်အဝေးကြီးအထိ ချီတက်ပြီး တခြား တိုင်းရင်းသားဒေသတွေမှာပါ သွားကူညီ တိုက်ခိုက်ခဲ့တာကို တကယ်ကို ဂုဏ်ယူမဆုံးဖြစ်ရပါတယ်။ သူတို့ရဲ့ အနစ်နာခံမှုဟာ တော်လှန်ရေးအတွက် အရေးကြီးတဲ့ စိတ်ဓာတ်ကို ပြသတာပါ” ဟု ပြောသည်။ လက်ရှိတွင် KIA ဦးဆောင်သော မဟာမိတ်တပ်ဖွဲ့များက ဗန်းမော်မြို့နယ်ကို ထိန်းချုပ်ထားဆဲ ဖြစ်ပြီး၊ မြို့သိမ်း တိုက်ပွဲတွင် စစ်ကော်မရှင်တပ်က လေကြောင်းမှတစ်ဆင့် မကြာခဏ တိုက်ခိုက်မှုများ ပြုလုပ်လျက်ရှိရာ၊ မြို့နယ်အတွင်း၌ စစ်ရေးတင်းမာမှုများ ဆက်လက်ရှိနေဆဲဖြစ်ကြောင်း ဒေသခံ သတင်းရင်းမြစ်များ၏ ပြောပြ ချက်အရ သိရသည်။

ဗန်းမော်မြို့သိမ်းတိုက်ပွဲမှ အညာ PDF ရဲဘော်များ ၇ လကြာခရီးအပြီး နေရပ်သို့ ပြန်လည်ရောက်ရှိ



ဗန်းမော်မြို့သိမ်းတိုက်ပွဲမှ အညာ PDF ရဲဘော်များ ၇ လကြာခရီးအပြီး နေရပ်သို့ ပြန်လည်ရောက်ရှိ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာ ၁၆ ရက်။ …

  • December 16, 2025
×Close