သတင်း

ယူကရိန်းငြိမ်းချမ်းရေး အလားအလာ အမြင့်ဆုံး မြင့်တက်လာဟု အမေရိကန်ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၆ ရက်။ အမေရိကန်ပြည်ထောင်စု၊ ယူကရိန်းနှင့် ဥရောပခေါင်းဆောင်များသည် ဂျာမနီနိုင်ငံ၊ ဘာလင်မြို့၌ တနင်္ဂနွေနေ့နှင့် တနင်္လာနေ့များတွင် နှစ်ရက်ကြာ ဆွေးနွေးမှုများ ပြုလုပ်ခဲ့ပြီးနောက် ယူကရိန်းစစ်ပွဲ ငြိမ်းချမ်းရေးအတွက် အလားအလာများ ပိုမိုမြင့်မားလာခဲ့သည်။ ယင်းဆွေးနွေးပွဲများမှ နေတိုး (NATO) ပုံစံ လုံခြုံရေး အာမခံချက်များ ကို ယူကရိန်းအား ပေးအပ်ရန် အမေရိကန်ဘက်က ကမ်းလှမ်းခဲ့ခြင်းကြောင့် ငြိမ်းချမ်းရေး လမ်းကြောင်းပေါ်တွင် မျှော်လင့်ချက်များ ဖြစ်ပေါ်ခဲ့သည်။ သို့သော်လည်း၊ ရုရှားနှင့် ငြိမ်းချမ်းရေး သဘောတူညီမှု၏ တစ်စိတ်တစ်ပိုင်းအဖြစ် နယ်မြေအချို့ကို စွန့်လွှတ်ရန် တောင်းဆိုချက်များအပေါ် ယူကရိန်းဘက်က လက်မခံနိုင်သေးသဖြင့် နယ်မြေပိုင်ဆိုင်မှု ဆိုင်ရာ အငြင်းပွားမှုမှာ ဆက်လက်တည်ရှိနေဆဲ ဖြစ်သည်။ တနင်္လာနေ့တွင် ဗြိတိန်ဝန်ကြီးချုပ် Keir Starmer အပါအဝင် ဥရောပခေါင်းဆောင်များက ပူးတွဲကြေညာချက်တစ်စောင် ထုတ်ပြန်ခဲ့ရာတွင် အဓိက လုံခြုံရေး အာမခံချက်များ ပါဝင်သည်။ ၎င်းတို့မှာ- ဥရောပ ဦးဆောင်သော နိုင်ငံစုံ ပူးပေါင်းစစ်အင်အား တစ်ရပ်ကို ယူကရိန်းတပ်မတော်အတွက် ထောက်ပံ့ရန်နှင့် ၎င်း၏ လေပိုင်နက်နှင့် ပင်လယ်ပြင်ကို ကာကွယ်ရန် ဖွဲ့စည်းပေးမည်။ ဗြိတိန်နှင့် အခြား ဥရောပနိုင်ငံများက တရားဝင် စည်းနှောင်မှုရှိသော ကတိကဝတ် တစ်ရပ် ပေးအပ်မည်ဖြစ်ပြီး၊ အနာဂတ်တွင် လက်နက်ကိုင် တိုက်ခိုက်မှု ဖြစ်ပွားပါက ငြိမ်းချမ်းရေးနှင့် လုံခြုံရေးကို ပြန်လည် ထူထောင်ရန်အတွက် အရေးယူ ဆောင်ရွက်မည်။ ယူကရိန်း၏ တပ်ဖွဲ့အင်အားကို ငြိမ်းချမ်းရေးကာလတွင် စစ်သည် ၈၀၀,၀၀၀ ဖြင့် ထားရှိနိုင်ရန် ရေရှည်နှင့် သိသာထင်ရှားသော ထောက်ပံ့မှုများ ကို ဥရောပက ပေးအပ်မည်။ အနာဂတ် တိုက်ခိုက်မှုတိုင်းကို ကြိုတင်သတိပေးနိုင်ရန် အမေရိကန် ဦးဆောင်သော အပစ်အခတ်ရပ်စဲရေး စောင့်ကြည့်မှုနှင့် အတည်ပြုရေး ယန္တရား တစ်ခုကို စီစဉ်ထားသည်။ ယူကရိန်း ပြန်လည်တည်ဆောက်ရေးအတွက် ရင်းနှီးမြှုပ်နှံမှု ပြုလုပ်ရာ၌ ဥရောပတွင် ပိတ်ဆို့ထိန်းသိမ်းထားသော ရုရှားနိုင်ငံ၏ ပိုင်ဆိုင်မှုများ ကို အသုံးပြုခြင်းလည်း ပါဝင်လာနိုင်ခြေရှိသည်။ ဤဆွေးနွေးပွဲများ ဖြစ်ပေါ်နေစဉ်ပင် တိုက်ပွဲများ ဆက်လက်ဖြစ်ပွားနေပြီး၊ ယူကရိန်း၏ ရေအောက် ဒရုန်းများက ရုရှားရေငုတ်သင်္ဘောတစ်စီးကို ပထမဆုံးအကြိမ် တိုက်ခိုက်နိုင်ခဲ့သည့် ထူးခြားဖြစ်ရပ်တစ်ခုလည်း ရှိခဲ့သည်။

ယူကရိန်းငြိမ်းချမ်းရေး အလားအလာ အမြင့်ဆုံး မြင့်တက်လာဟု အမေရိကန်ပြော

ယူကရိန်းငြိမ်းချမ်းရေး အလားအလာ အမြင့်ဆုံး မြင့်တက်လာဟု အမေရိကန်ပြော  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၆ ရက်။  အမေရိကန်ပြည်ထ…

  • December 16, 2025
ဒေါ်အောင်ဆန်းစုကြည် သေဆုံးနေပြီး ဖြစ်နေမှာကို စိုးရိမ်ကြောင်း သားဖြစ်သူ ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၆ ရက်။ စစ်ကော်မရှင်၏ အကျဉ်းချထားခြင်းခံနေရသော နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်၏ ကျန်းမာရေး အခြေအနေနှင့် သတင်းအချက်အလက်များ မရရှိနိုင်ခြင်းကြောင့် ၎င်းသည် အသက်ရှင်လျက် ရှိသေးခြင်း ရှိ၊ မရှိ မသေချာတော့ကြောင်း သားဖြစ်သူ Kim Aris (ဦးထိန်လင်း) က စိုးရိမ်ပူပန်စွာ ထုတ်ဖော် ပြောဆိုလိုက်သည်။ Kim Aris က မိခင်ဖြစ်သူသည် စစ်တပ်၏ ဖမ်းဆီးထိန်းသိမ်းမှု အောက်တွင် ကွယ်လွန်သွားပြီ ဖြစ်သည်ကိုပင် မသိနိုင်မည်ကို စိုးရိမ်ကြောင်း ဒီဇင်ဘာလ ၁၄ ရက်နေ့က ဂျပန်နိုင်ငံ၊ တိုကျိုမြို့တွင် ပြုလုပ်သည့် 'All In One Piece' လှုပ်ရှားမှုအတွင်း ရိုက်တာ (Reuters) သတင်းဌာနနှင့် အင်တာဗျူးရာတွင် ပြောဆိုခဲ့ခြင်း ဖြစ်သည်။ Kim Aris သည် မိခင်ဖြစ်သူ၏ ကျန်းမာရေးနှင့် ပတ်သက်ပြီး နှစ်အတော်ကြာ ဆက်သွယ်ခွင့်မရခဲ့ဘဲ စစ်အာဏာ သိမ်းပြီးနောက်ပိုင်းတွင် နှလုံး၊ အရိုး၊ သွားဖုံးဆိုင်ရာ ကျန်းမာရေး ပြဿနာများ ရှိနေသည်ဟူသော သတင်းများ ကို တဆင့်စကားဖြင့်သာ ကြားသိခဲ့ရသည်ဟု ဆိုသည်။ Kim Aris က “ဒီနေ့ ကျနော်ဟာ သားတစ်ယောက်အနေနဲ့ စကားပြောနေတာဖြစ်ပြီး အဓိပ္ပာယ်ရှိတဲ့ နိုင်ငံတကာ လုပ်ဆောင်မှုအတွက် တောင်းဆိုနေသူ တစ်ဦးလည်း ဖြစ်ပါတယ်။ ကျနော့်ရဲ့ မိခင်ဖြစ်သူ ဒေါ်အောင်ဆန်း စုကြည်ဟာ မိသားစုနဲ့ အဆက်ဖြတ်ခံရပြီး၊ သူမရဲ့ အခွင့်အရေးတွေ ချုပ်ချယ်ခံရကာ အသံတိတ် ဆိတ်နေတဲ့ အနေအထားနဲ့ ငါးနှစ်နီးပါးခန့် အဆက်အသွယ် လုံးဝဖြတ်တောက်ခံထားရပါတယ်” ဟု ၎င်း၏ လူမှုကွန်ရက် စာမျက်နှာတွင် ပြောဆိုထားသည်။ ၎င်းက မိခင်ဖြစ်သူ၏ ကျန်းမာရေးနှင့် လုံခြုံရေးအပေါ် အလေးအနက် စိုးရိမ်ကြောင်း ပြောကြားရာတွင် ဒေါ်အောင်ဆန်းစုကြည်မှာ အသက် ၈၀ အရွယ်ရှိပြီဖြစ်ပြီး ကျန်းမာရေးပြဿနာများ ဆက်လက်ခံစားနေရဆဲ ဖြစ်ကြောင်း ထောက်ပြခဲ့သည်။ ထို့ပြင် ဒေါ်အောင်ဆန်းစုကြည်၏ နှလုံးရောဂါ အခြေအနေမှာ ပိုမိုဆိုးရွားလာနေသည်ဟု နားလည်ထားပြီး၊ “နှလုံးရောဂါက ဘယ်အချိန်မဆို အသက်ဆုံးသွားနိုင်တယ်ဆိုတာ ကျနော်တို့အားလုံး သိပါတယ်” ဟု သား ဖြစ်သူ Kim Aris က ရိုက်တာ (Reuters) သတင်းဌာနနှင့် အင်တာဗျူးရာတွင် ထည့်သွင်းပြောဆိုထားသည်။။ မိသားစု၊ ရှေ့နေများနှင့် အဆက်အသွယ် လုံးဝဖြတ်တောက်ခံထားရသော မိခင်၏ လုံခြုံရေးသည် ၎င်း၏ အဓိက စိုးရိမ်စရာဖြစ်ကြောင်း ပြောသည်။ ၎င်းက မိခင်ဖြစ်သူသည် နေပြည်တော်၌ အကျဉ်းချခံထားရသည်ဟု ယုံကြည်ပြီး လွန်ခဲ့သည့် နှစ်နှစ်က နောက် ဆုံး ရရှိခဲ့သော စာထဲတွင် အကျဉ်းခန်းတွင်း နွေနှင့် ဆောင်းရာသီတို့၌ အပူချိန်လွန်ကဲမှုကို ခံစားရကြောင်း ရေးသားထားသည်ဟုလည်း ထုတ်ဖော်ခဲ့သည်။ Kim Aris က ကမ္ဘာအနှံ့ ပဋိပက္ခများစွာ ဖြစ်ပွားနေချိန်တွင် လူအများ မြန်မာနိုင်ငံအကြောင်းကို မေ့လျော့နေ မည်ကို စိုးရိမ်မိကြောင်း ပြောသည်။ ဒေါ်အောင်ဆန်းစုကြည်သည် အရင်က နိုင်ငံတကာ၏ အလေးထားမှုကို အလွန်ရရှိခဲ့သော်လည်း ရခိုင်ပြည် အရေးအခင်းကြောင့် နိုင်ငံတကာပုံရိပ် ကျဆင်းသွားပြီးနောက် မြန်မာ့အရေးကို လူအများ လျစ်လျူရှုလာ ကြောင်း ထောက်ပြခဲ့သည်။ Kim Aris က မိခင်ဖြစ်သူ၏ လွတ်လပ်မှု ဆုံးရှုံးရခြင်းသည် မြန်မာပြည်သူ သန်းပေါင်းများစွာ၏ လွတ်လပ်မှုကို ထင်ဟပ်နေကြောင်းနှင့် "All in One Piece" လှုပ်ရှားမှုသည် လူသန်းပေါင်းများစွာအတွက် ဂုဏ်သိက္ခာ၊ တရားမျှတမှုနှင့် ငြိမ်းချမ်းရေးကို ပြန်လည် ဖော်ဆောင်ရန် ဖြစ်ကြောင်း ရှင်းပြသည်။ ၎င်းက မြန်မာနိုင်ငံသည် ပဋိပက္ခလမ်းကြောင်းကို တစ်ယောက်တည်း ရုန်းကန်နေရသည်ဟု ထောက်ပြပြီး နိုင်ငံတကာ အသိုက်အဝန်းကို ပြတ်ပြတ်သားသား ရပ်တည်ရန် တောင်းဆိုခဲ့သည်။ “ခင်ဗျားတို့ရဲ့ သံတမန်ရေးရာ ဖိအားပေးမှုဟာ အရေးကြီးပါတယ်။ ခင်ဗျားတို့ရဲ့ ပြတ်ပြတ်သားသား ပြောဆိုလုပ်ဆောင်လိုစိတ်ဟာ အသက်တွေကို ကယ်တင်နိုင်ပါလိမ့်မယ်” ဟု ၎င်းက တိုက်တွန်းထားသည်။ Kim Aris သည် စစ်ကော်မရှင်၏ ရွေးကောက်ပွဲများကို ပယ်ချရန်၊ နိုင်ငံရေးအကျဉ်းသားများ လွတ်မြောက်ရေး ကို တောင်းဆိုပေးရန်နှင့် ကမ္ဘာလုံးဆိုင်ရာ စင်မြင့်ပေါ်မှာ မြန်မာနိုင်ငံ မမေ့လျော့ခံရဖို့ အားထုတ်ပေးရန် ဂျပန် နိုင်ငံရေးသမားများ၊ အစိုးရအရာရှိများနှင့် တွေ့ဆုံစဉ် မေတ္တာရပ်ခံခဲ့သည်။ ပြည်တွင်းပြည်ပရှိ မြန်မာပြည်သူများအား ရည်ညွှန်းပြောဆိုရာတွင် ဒီမိုကရေစီရေး လှုပ်ရှားမှုသည် လေးနှစ် ကျော် ကြာမြင့်နေပြီဖြစ်သော်လည်း အရှုံးမပေးဘဲ ရုန်းကန်ခဲ့ကြသည့်အတွက် ချီးကျူးခဲ့သည်။ ဒေါ်အောင်ဆန်းစုကြည်အား စစ်ကော်မရှင်က လူထုလှုံ့ဆော်မှု၊ အဂတိလိုက်စားမှု စသည့် အမှုပေါင်းစုံဖြင့် စုစုပေါင်း ထောင်ဒဏ် ၂၇ နှစ် ချမှတ်ထားပြီး လက်ရှိတွင် နေပြည်တော်၌ ထိန်းသိမ်းထားသည်ဟု သတင်းများ ထွက်ပေါ်လျှက်ရှိသည်။ ၎င်း၏ သားဖြစ်သူက မိခင်သည် နိုင်ငံရေးကိစ္စတွင် ဝင်မပါစေလိုသော်လည်း လက်ရှိအနေအထားအရ မိမိကိုယ်တိုင် လုပ်ဆောင်ရခြင်းဖြစ်ကြောင်းလည်း ထုတ်ဖော်ခဲ့သည်။

ဓါတ်ပုံ - Kim Aris - Htein Lin
ကိုးကား - Reuters  

ဒေါ်အောင်ဆန်းစုကြည် သေဆုံးနေပြီး ဖြစ်နေမှာကို စိုးရိမ်ကြောင်း သားဖြစ်သူ ပြော

ဒေါ်အောင်ဆန်းစုကြည် သေဆုံးနေပြီး ဖြစ်နေမှာကို စိုးရိမ်ကြောင်း သားဖြစ်သူ ပြော  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၆ ရက်။  စစ်က…

  • December 16, 2025
မြောင်းမြထောင်တွင် နိုင်ကျဉ်းသာမက ရာဇဝတ်သားများပါ ငွေညှစ်ခံနေရ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၆ ရက်။ ဧရာဝတီတိုင်း၊ မြောင်းမြအကျဉ်းထောင်တွင် ထောင်အာဏာပိုင်များက နိုင်ငံရေးအကျဉ်းသားများသာမက ရာဇဝတ် အကျဉ်းသားများကိုပါ ရိုက်နှက်အကြမ်းဖက်မှုနှင့် ငွေညှစ်တောင်းခံမှုများ လုပ်နေသည်ဟု မြန်မာ နိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် (PPNM) က ထုတ်ပြန်သည်။ အကျဉ်းသားများ၏ အသက်အန္တရာယ်ကို ခြိမ်းခြောက်နိုင်သည့် လုပ်ရပ်များအထိ ပါဝင်နေပြီး၊ ဒုထောင်ပိုင် အပါအဝင် ထောင်ဝန်ထမ်းအချို့သည် အရက်သေစာ သောက်စားမူးယစ်ကာ အကျဉ်းသားများကို လေးခွများ ဖြင့် ပစ်ခတ်မှုများပါ ပြုလုပ်နေကြောင်း ထောင်နှင့်နီးစပ်သူများက ပြောသည်။ PPNM ပြောရေးဆိုခွင့်ရှိသူ မလင်း က “ဘယ်လို ပြောလို့ရလဲ ဆိုလို့ရှိရင် အပြင်ဘက်ကနေမှ လေးဂွနဲ့ ပစ်တာ ဆိုလို့ရှိရင် အထဲထဲတွေရော ထိတယ် ပေါ့နော်။ အဲ့ဒီအိပ်ဆောင်တွင်းထဲမှာ ဒီ အကျဉ်းသား၊ နိုင်ငံရေး အကျဉ်း သားရယ်လို့ မကွဲတော့ဘဲနဲ့ အပြင်ကနေမှ ဟို ပစ်တဲ့ပုံစံမျိုးဆိုတော့လေ။ တခြားအကျဉ်းသားတွေလည်း ရိုက် နှက်ခံနေရတာမျိုးလည်း ဖြစ်ပါတယ်” ဟု ပြောသည်။ PPNM ၏ ထုတ်ပြန်ချက်အရ မြောင်းမြထောင်တွင် ထောင်ဝန်ထမ်းများဖြစ်သော တပ်ကြပ်ကြီး ဦးမြင့်ချို၊ တပ်သား ဦးရဲဝေထွန်း နှင့် ဦးမြတ်မင်းအောင် တို့က ဦးဆောင်ကာ မိသားစုဝင်များထံမှ အကြောင်းပြချက်မရှိ ငွေကြေးများ ကောက်ခံနေကြသည်။ ငွေကြေးမပေးနိုင်သည့် အကျဉ်းသားများမှာ အခန်းပြောင်းခြင်း၊ အဆောင်ပြောင်းခြင်းများ ပြုလုပ်ကြရပြီး၊ ယင်းသို့ ကောက်ခံရရှိသည့် ငွေကြေးများမှာ အကျဉ်းသားများထံသို့ မရောက်ရှိကြောင်း ဖော်ထုတ်ထားသည်။ ထိုသို့ ငွေတောင်းခံရာတွင် အိပ်ဆောင်မှူးများဖြစ်ကြသည့် ဝန်ထမ်း ဦးမျိုးသက်အောင် (အိပ်ဆောင် ၂)၊ ဦးရဲဟိန်း နှင့် ဦးအောင်ထက် (အိပ်ဆောင် ၃)၊ ဦးစိုးရန်နိုင်၊ ဦးပြောင်ကြီး နှင့် ဦးထက်ဝေကို (အိပ်ဆောင် ၅ နှင့် ၆) တို့လည်း ပူးပေါင်းကူညီနေသည်ဟု ဆိုသည်။ မြောင်းမြထောင် ဒုထောင်ပိုင် ဦးတင့်ဆွေဝင်း သည်လည်း သောက်စားမူးယစ်သည့်အခါများ၌ အကျဉ်းသား များအား စိန်ခေါ်၍ လေးခွဖြင့် ပစ်ခတ်သောင်းကျန်းလေ့ရှိပြီး၊ ကျန်တပ်သားများကိုလည်း ၎င်းအတိုင်း ပြုမူစေ သည်ဟု ထောင်နှင့်နီးစပ်သူများက ပြောသည်။ ထို့ပြင် တပ်သား ဦးမြတ်မင်းအောင်ဆိုသူကလည်း မူးယစ်လာပါက တောင်ယာလုပ်ကိုင်သည့် အကျဉ်းသားများ အား အနိုင်ကျင့်နှိပ်စက်သည်ဟု ဆိုသည်။ အာဏာပိုင်များသည် ထောင်တွင်း ရာဇဝတ်သားများကိုပင် ခန့်အပ်ကာ အခြားအကျဉ်းသားများအား နှိပ်စက်ခိုင်း စေနေကြောင်း မလင်းက ဆက်ပြောသည်။ “ဒီလက်ပါးစေတွေပေါ့နော်။ အကျဉ်းသားတွေကို သူတို့က မွေးမြူထားလိုက်တယ်ပေါ့နော်။ သူတို့ရဲ့ ဘက် တော်သားအဖြစ် အဲ့ဒီမှာ အကျဉ်းသားတွေကမှ တစ်ဆင့် နိုင်ငံရေးအကျဉ်းသားတွေကို နှိပ်စက်တာမျိုးတွေ လည်း ကြုံနေရတာ ဖြစ်တဲ့အတွက် မြောင်းမြထောင်အတွက်ကို အားလုံးဝိုင်းဝန်းပြီးတော့ပေါ့နော် သတင်း ထုတ်ပြန် ပေးကြဖို့၊ ရပ်တည်ပေးကြဖို့ အတွက် PPNM ဘက်ကနေမှ တိုက်တွန်းနှိုးဆော်အပ်ပါတယ်။” ထောင်တွင်းဈေးဘားတွင် ရောင်းချသည့်နေရာ၌ အပြင်ဈေးထက် သုံးဆခန့် ဈေးတင်ရောင်းချပြီး ထောင် အာဏာပိုင်များအတွက် ငွေရှာပေးနေသူမှာ သူရမြင့်လွင် (ခ) သားလေး ဆိုသူဖြစ်ပြီး၊ ၎င်းသည် ပုသိမ်ထောင် တွင် မူးယစ်ဆေး ရောင်းချမှုဖြင့် ပြောင်းရွှေ့လာသူဖြစ်သည်ဟု ဆိုသည်။ ထို့ပြင် ထောင်တွင်း တန်းစီနေရာများအတွက် လာဘ်ထိုးရလေ့ရှိရာ၊ ယခုလက်ရှိ တစ်လလျှင် ကျပ်သိန်း ၅၀ ခန့် ရှာဖွေပေးနေသူများမှာ လူသတ်မှု၊ မုဒိန်းမှုဖြင့် သေဒဏ်ကျခံနေရသည့် မင်းထက် (ခ) ဘိုကြီး နှင့် ခန့်ဝေ တို့ ဖြစ်ကြောင်း စုံစမ်းသိရှိရသည်ဟု PPNM က ဆိုသည်။  

မြောင်းမြထောင်တွင် နိုင်ကျဉ်းသာမက ရာဇဝတ်သားများပါ ငွေညှစ်ခံနေရ

မြောင်းမြထောင်တွင် နိုင်ကျဉ်းသာမက ရာဇဝတ်သားများပါ ငွေညှစ်ခံနေရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၆ ရက်။  ဧရာဝတီတိုင်း၊ မြောင…

  • December 16, 2025
မြန်မာ၊ တရုတ်၊ ထိုင်း ကိုယ်စားလှယ်များ ကျားဖြန့်ကိစ္စ မြဝတီတွင် ဆွေးနွေး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၆ ရက်။ ကရင်ပြည်၊ မြဝတီဒေသရှိ အွန်လိုင်း ငွေလိမ်လုပ်ငန်းများ (ခေါ်) 'ကျားဖြန့်' များကို အမြစ်ပြတ် ရှင်းလင်းရန် အတွက်ဆိုကာ မြန်မာ၊ တရုတ်နှင့် ထိုင်း သုံးနိုင်ငံမှ ကိုယ်စားလှယ်များသည် ဒီဇင်ဘာလ ၁၅ ရက်နေ့တွင် မြဝတီ၌ တွေ့ဆုံဆွေးနွေးခဲ့ကြကြောင်း ဒေသခံ BGF နှင့် နီးစပ်သူများက ပြောသည်။ ဆွေးနွေးပွဲသို့ တရုတ်နိုင်ငံ၊ ပြည်သူ့လုံခြုံရေး လက်ထောက်ဝန်ကြီး မစ္စတာ လျိုကျုံးရိ (Mr. Liu Zhongyi) ကိုယ်တိုင် တက်ရောက်ခဲ့ပြီး မြဝတီမြို့နယ်အတွင်းရှိ ကျားဖြန့်လုပ်ငန်းများ အဓိကတည်ရှိရာ KK Park နှင့် BGF ထိန်းချုပ်ရာ ရွှေကုက္ကိုလ် နယ်မြေ တို့ကို သွားရောက် စစ်ဆေးခဲ့သည်ဟု ဆိုသည်။ အဓိက ဆွေးနွေးမှုများတွင် ကျားဖြန့်နှင့် ပတ်သက်သည့် တရားခံများနှင့် လုပ်သားများကို သက်ဆိုင်ရာ နိုင်ငံ များသို့ ပြန်လည်လွှဲပြောင်းရေးကိစ္စများ ပါဝင်ခဲ့သည်။ လက်ရှိတွင် မြဝတီဒေသရှိ ကျားဖြန့်လုပ်ငန်းများမှ ဖမ်းဆီးထိန်းသိမ်းထားသော တရုတ်နိုင်ငံသားများကို တရုတ်ဘက်က ပြန်လည်ခေါ်ဆောင်ရန် သဘောတူညီမှု ရရှိခဲ့ကြောင်း BGF နှင့် နီးစပ်သည့် သတင်းရင်းမြစ်က  အတည်ပြုသည်။ “တရုတ်ဘက်က ပြည်သူ့လုံခြုံရေး လက်ထောက်ဝန်ကြီး ကိုယ်တိုင် မြဝတီ၊ KK Park နဲ့ ရွှေကုက္ကိုလ်လို ကျားဖြန့်စခန်းတွေကို လာရောက် စစ်ဆေးခဲ့တာပါ။ ဖမ်းဆီးထားတဲ့ တရုတ်နိုင်ငံသား တရားခံနဲ့ လုပ်သား တွေကို ချက်ချင်း ပြန်လွှဲဖို့လည်း ဆွေးနွေးခဲ့ကြတယ်လို့ ပြောတယ်ဗျ” ဤတွေ့ဆုံဆွေးနွေးမှုသည် ကျားဖြန့်တိုက်ဖျက်ရေးတွင် အမေရိကန်နိုင်ငံ ပါဝင်လာပြီး နောက်ကွယ်မှ တရုတ် အရာရှိများကို ဖော်ထုတ်ရန် ပြောဆိုပြီးနောက် ဖြစ်ပေါ်လာခြင်း ဖြစ်သည်။ စစ်ကော်မရှင်၏ ထုတ်ပြန်ချက်အရ ကျားဖြန့်ကိစ္စကို အကြောင်းပြု၍ ပြည်ပနိုင်ငံများ၏ ဝင်ရောက် စွက်ဖက် မှုကို လက်မခံရန် မြန်မာနှင့် တရုတ်တို့ ဆွေးနွေးသဘောတူခဲ့ကြသည်။ ထို့အပြင် ကျားဖြန့်တိုက်ဖျက်ရေးကို ဒေသတွင်း နိုင်ငံများသာ ပေါင်းစပ်ညှိနှိုင်း ဆောင်ရွက်သွားရန် ကိုလည်း သဘောတူညီခဲ့သည်ဟု ဆိုသည်။ မြဝတီဒေသခံတစ်ဦးက “ဒီလို နိုင်ငံတကာအဆင့်အထိ လာရောက် စစ်ဆေးတာ၊ ဆွေးနွေးတာတွေဟာ နယ်စပ် ဒေသမှာ ကျားဖြန့်လုပ်ငန်းတွေဟာ ဘယ်လောက်အထိ အမြစ်တွယ်နေပြီလဲ ဆိုတာကို ပြသနေတာပါပဲ။ တကယ်တော့ ကျားဖြန့်ကို အမြစ်ဖြတ်ဖို့ဆိုတာ BGF လို ဒေသခံ အာဏာပိုင်တွေရဲ့ ပူးပေါင်းပါဝင်မှု မပါဘဲ မဖြစ်နိုင် ပါဘူး။ တရုတ်နဲ့ ထိုင်းက ဖိအားပေးမှ အခုလို လှုပ်ရှားလာတာကို တွေ့ရပါတယ်” ဟု ပြောသည်။ ထိုသို့ သုံးနိုင်ငံ ပူးပေါင်းဆောင်ရွက်မှုသည် နယ်စပ်ဒေသလုံခြုံရေးနှင့် တရားဥပဒေစိုးမိုးရေးအတွက် အရေးပါ သော ခြေလှမ်းဖြစ်သော်လည်း၊ ဒေသခံများကမူ လုပ်ငန်းများ လုံးဝ ရပ်တန့်သွားမည်ဆိုသည်ကို မယုံကြည်သေးပဲ အခြေအနေကို စောင့်ကြည့်လျက်ရှိသည်။ လက်ရှိ ကျားဖြန့် နှိမ်နင်းရေး ဆွေးနွေးမှုများ ပြုလုပ်ရာ မြဝတီမြို့နယ်သည် ကရင်အမျိုးသားအစည်းအရုံး (KNU) ၏ ထိန်းချုပ်နယ်မြေအချို့နှင့် နီးစပ်နေပြီး စစ်ရေးတင်းမာမှုများ မကြာခဏဖြစ်ပွားရာ ဒေသလည်း ဖြစ်သည်။ KNU ဘက်မှ တရားဝင် ထုတ်ပြန်ချက်များအရ၊ ၎င်းတို့သည် ဒေသတွင်း မူးယစ်ဆေးဝါးနှင့် တရားမဝင် စီးပွားရေးလုပ်ငန်းများ အပါအဝင် ကျားဖြန့်လုပ်ငန်းများကိုပါ အမြစ်ဖြတ် တိုက်ဖျက်ရန် တောင်းဆိုထားပြီး၊ စစ်ကော်မရှင်၏ အုပ်ချုပ်ရေးအောက်တွင် ရှိနေသည့် တရားမဝင် လုပ်ငန်းများကို KNU က ခွင့်ပြုထားခြင်း မရှိကြောင်း ပြောဆိုလေ့ရှိသည်။ ထို့အပြင် KNU က စစ်ကော်မရှင်ကို တော်လှန်တိုက်ခိုက်နေချိန်တွင် ယခုကဲ့သို့ နိုင်ငံတကာ အာဏာပိုင်များမှ ကျားဖြန့်ကိစ္စအတွက် ဝင်ရောက်လာခြင်းသည် ဒေသတွင်း တည်ငြိမ်ရေးနှင့် ငြိမ်းချမ်းရေးအတွက် အမှန် တကယ် အကျိုးပြုစေမည့် ရလဒ်များ ပေါ်ပေါက်လာရန် လိုလားကြောင်း တောင်းဆိုမှုများ ပြုလုပ်ထားသည်။    

မြန်မာ၊ တရုတ်၊ ထိုင်း ကိုယ်စားလှယ်များ ကျားဖြန့်ကိစ္စ မြဝတီတွင် ဆွေးနွေး

မြန်မာ၊ တရုတ်၊ ထိုင်း ကိုယ်စားလှယ်များ ကျားဖြန့်ကိစ္စ မြဝတီတွင် ဆွေးနွေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၆ ရက်။  ကရင်ပြည်၊…

  • December 16, 2025
စစ်ရေး ပူးပေါင်း လုပ်ဆောင်ရန် နွေဦးတော်လှန်ရေး မဟာမိတ် တပ်ပေါင်းစု ဖွဲ့စည်း သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၆ ရက်။ လေးနှစ်နီးပါးကြာမြင့်လာသည့် နွေဦးတော်လှန်ရေးတွင် စစ်ရေးအရွေ့ကို ပိုမိုအားကောင်းစေရန် ရည်ရွယ်၍ တော်လှန်ရေးအင်အားစု ၁၉ ဖွဲ့ ပါဝင်သည့် နွေဦးတော်လှန်ရေးမဟာမိတ်တပ်ပေါင်းစု (Spring Revolution Alliance - SRA) ကို ဒီဇင်ဘာ ၁၅ ရက်နေ့တွင် တရားဝင် ဖွဲ့စည်းကြောင်း ထုတ်ပြန်ကြေညာလိုက်သည်။ ဤတပ်ပေါင်းစု ပေါ်ပေါက်လာခြင်းသည် နိုင်ငံတစ်ဝှမ်းရှိ တော်လှန်ရေးအင်အားစုများ အကြား စုစည်းမှု ခိုင်မာ စေပြီး၊ အာဏာသိမ်းစစ်တပ်ကို တိုက်ခိုက်ရာတွင် ပိုမိုမဟာဗျူဟာကျသည့် ပူးပေါင်းတိုက်ပွဲဝင်မှုများ ဖော်ဆောင်နိုင်ရေးအတွက် အရေးပါသော အလှည့်အပြောင်းတစ်ခုဖြစ်ကြောင်း SRA က ဆိုသည်။ SRA တွင် ကရင်နီအမျိုးသားများ ကာကွယ်ရေးတပ် (KNDF)၊ ဗမာပြည်သူ့လွတ်မြောက်ရေးတပ်တော် (BPLA)၊ ချင်းညီနောင် (CB)၊ မွန်ပြည်တော်လှန်ရေးတပ် (MSRF) နှင့် ကျောင်းသားလက်ရုံးတပ်တော် (SAF) ကဲ့သို့သော အဓိကကျသည့် တိုက်ပွဲဝင်အဖွဲ့များ ပါဝင်သည်။ နိုင်ငံတစ်ဝှမ်း ဒေသအသီးသီးမှ အခြေစိုက်သည့် ၎င်းတို့၏ စုစုပေါင်းအင်အားမှာ သောင်းဂဏန်းအထိ ရှိနေကြောင်း SRA က အသိပေးထားသည်။ SRA အဖွဲ့ဝင် ကိုမင်းဟန်ထက် က လေးနှစ်နီးပါးကြာလာသည့် တော်လှန်ရေးကာလအတွင်း စုစည်းမှု ပိုမို ခိုင်မာစေရန်နှင့် စစ်ရေးအရွေ့အားကောင်းစေရန် အတွက် တပ်ပေါင်းစုကို ဖွဲ့လိုက်ခြင်း ဖြစ်သည်ဟု သတင်းမီဒီယာ များကို ပြောဆိုထားသည်။ ၎င်းတို့၏ ရည်မှန်းချက်မှာ ‘တပ်ပေါင်းစုဖြင့် အောင်ပွဲခံမည်’ ဟူသည့် ကြွေးကြော်သံအတိုင်း စစ်ရေးထိုးစစ်များ ကို ဆက်လက်ဆောင်ရွက်သွားရန် ဖြစ်သည်။ SRA ၏ ဦးဆောင်ကော်မတီအဖွဲ့ဝင်နှင့် ပြောရေးဆိုခွင့်ရှိသူ ခွန်းဘီထူး က တပ်ပေါင်းစု ဖွဲ့စည်းခြင်း မပြုမီ ကတည်းက အမျိုးသားညီညွတ်ရေးအစိုးရ (NUG) ၏ ကာကွယ်ရေးဝန်ကြီးနှင့် ယာယီသမ္မတတို့နှင့် တွေ့ဆုံ ညှိနှိုင်းမှုများ ပြုလုပ်ခဲ့ကြောင်း PVTV ကို ပြောသည်။ ကိုခွန်းဘီထူး က “အရေးကြီးတဲ့ အနှစ်သာရတစ်ခုကတော့ ဒီနေ့တော်လှန်ရေးမှာ ကျနော်တို့ရဲ့ အရင်းမြစ်တွေ၊ ကျနော်တို့ရဲ့ အဆက်အသွယ်တွေ၊ ကျနော်တို့ရဲ့ ထောက်ပို့လမ်းကြောင်းတွေကို အတူတူမျှဝေသုံးစွဲပြီးမှ ဒီတော်လှန်ရေးခရီးကို တောင့်ခံပြီးမှ ဖြတ်ကျော်ကြဖို့ရယ် အောင်မြင်မှုတွေကို ဆွတ်ခူးပေးနိုင်ဖို့ အတွက်ကို ကျနော်တို့ သဘောတူလိုက်တဲ့ဟာက အရေးကြီးဆုံး တော်လှန်ရေးရည်မှန်းချက် ဖြစ်ပါတယ်” ဟု ပြောသည်။ SRA သည် NUG နှင့် ချိတ်ဆက်မှု အားကောင်းကောင်းဖြင့် ဆက်လက် ဆောင်ရွက်သွားမည်ဖြစ်ပြီး၊ NUG ၏ Command and Control (COC) အောက်တွင် ရပ်တည်သည့် PDF/ပကဖ များကိုသာမက၊ ERO (တိုင်းရင်း သား လက်နက်ကိုင်အဖွဲ့) များ၏ စီမံမှုအောက်တွင် မရှိသော တပ်ဖွဲ့များကိုပါ စုစည်းကာ တော်လှန်ရေး အရှိန် အဟုန်ကို မြှင့်တင်ရန် ရည်ရွယ်သည်ဟု ၎င်းက ဖြည့်စွက်ပြောသည်။ ဗမာအမျိုးသား တော်လှန်ရေးတပ်မတော် (BNRA) ကလည်း ဒီဇင်ဘာ ၁၆ ရက်နေ့ ထုတ်ပြန်သော သဝဏ်လွှာတွင် ဤမဟာမိတ်တပ်ပေါင်းစု ပေါ်ပေါက်လာခြင်းကို ဝမ်းမြောက်ဂုဏ်ယူစွာ ကြိုဆို ကြောင်း ဖော်ပြခဲ့သည်။ "စစ်ရေးကဏ္ဍ" ကို ပိုမိုကောင်းမွန်သည့် အခြေအနေသို့ မြှင့်တင်နိုင်မည့် SRA ၏ အင်အားသည် နွေဦးတော်လှန် ရေးအတွက် မျှော်လင့်ချက်ရောင်နီ ဖြစ်ကြောင်း BNRA က သုံးသပ်ထားသည်။ ဤတပ်ပေါင်းစု ဖွဲ့စည်းနိုင်ရေးအတွက် တော်လှန်ရေးတပ်ဖွဲ့ ၇ ဖွဲ့သည် ၂၀၂၅ ခုနှစ်၊ မေလတွင် စတင် ညှိနှိုင်းခဲ့ ကြပြီး၊ နိုဝင်ဘာလ ပထမအပတ်၌ ကနဦးတွေ့ဆုံဆွေးနွေးပွဲ ပြုလုပ်ခဲ့သည်။ ထို့နောက် ဘုံသဘောတူညီချက်များ ရရှိခဲ့ပြီးနောက် လွတ်မြောက်နယ်မြေ တစ်ခုတွင် နိုဝင်ဘာလ ၂၁ ရက်နေ့မှ စ၍ သုံးရက်ကြာ တပ်ပေါင်းစုဖြစ်မြောက်ရေး ညီလာခံကို ကျင်းပကာ အဖွဲ့ဝင် ၁၉ ဖွဲ့ဖြင့် SRA ကို အောင်မြင်စွာ ဖွဲ့စည်းနိုင်ခဲ့ခြင်း ဖြစ်သည်။  

စစ်ရေး ပူးပေါင်း လုပ်ဆောင်ရန် နွေဦးတော်လှန်ရေး မဟာမိတ် တပ်ပေါင်းစု ဖွဲ့စည်း

စစ်ရေး ပူးပေါင်း လုပ်ဆောင်ရန် နွေဦးတော်လှန်ရေး မဟာမိတ် တပ်ပေါင်းစု ဖွဲ့စည်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၆ ရက်။  လေးနှစ…

  • December 16, 2025
လာမည့်နှစ်တွင် လူ ၁၂ သန်းကျော် ဆာလောင်မွတ်သိပ်မှုဒဏ်ခံရမည်ဟု WFP ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ လာမည့် ၂၀၂၆ ခုနှစ်တွင် မြန်မာပြည်သူ ၁၂ သန်းကျော်သည် ဆာလောင်မွတ်သိပ်မှုဒဏ်ကို ပြင်းထန်စွာ ခံစားရနိုင် သည်ဟု ကမ္ဘာ့စားနပ်ရိက္ခာအစီအစဉ်အဖွဲ့ကြီး (WFP) က သတိပေး ထုတ်ပြန်လိုက်သည်။ နိုင်ငံအနှံ့ ပဋိပက္ခများ ပြင်းထန်လာခြင်း၊ စစ်တပ်၏ ပိတ်ဆို့ဖြတ်တောက်မှုများကြောင့်နှင့် နေရပ်စွန့်ခွာရသူ (IDPs) အရေအတွက်မှာလည်း ၄ သန်းနီးပါးအထိ မြင့်တက်လာနိုင်ခြင်းတို့ကြောင့် မြန်မာနိုင်ငံ၏ လူသားချင်းစာနာ ထောက်ထားမှု အခြေအနေသည် စိုးရိမ်ဖွယ်အဆင့်သို့ ရောက်ရှိလာနေပြီး မြန်မာ့ဝမ်းရေး အကျပ် အတည်းမှာ အလွန်အမင်း ဆိုးရွားလာနေကြောင်း WFP က ဒီဇင်ဘာလ ၁၁ ရက်နေ့တွင် ထုတ်ပြန်သည်။ WFP ၏ ထုတ်ပြန်ချက်အရ လက်ရှိတွင် ကလေးငယ်များနှင့် မိခင်ပေါင်း လေးသိန်းကျော်သည် အာဟာရချို့တဲ့ မှုကို ပြင်းပြင်းထန်ထန် ခံစားနေရသည်။ ၎င်းတို့သည် နေ့စဉ်စားသောက်ရေးအတွက် အာဟာရ နည်းပါးလှသည့် ထမင်းဖြူသက်သက် သို့မဟုတ် ဆန်ပြုတ်ကျဲကျဲကိုသာ အားပြုမှီဝဲနေကြရသည့် အခြေအနေကို ရင်ဆိုင်နေရသည်ဟု WFP က ဆိုသည်။ စစ်ကိုင်းတိုင်းဒေသမှ စစ်ဘေးရှောင် မိခင်တစ်ဦးက “ကျမတို့တောထဲမှာ ပုန်းနေရတော့ ဘယ်သူမှ လာမကူနိုင် ဘူး။ ကလေးတွေအတွက် နို့မှုန့်ဆို ဝေးရောပဲ။ အိမ်က ပါလာတဲ့ ဆန်လေးနဲ့ ဆန်ပြုတ်ကျဲကျဲပဲ ပြုတ်တိုက်နေ ရတာ။ ကလေးတွေ ပိန်သွားတာ တွေ့ရတော့ မိခင်တစ်ယောက် အနေနဲ့ ရင်ထဲမှာ အရမ်းနာကျင်ရတယ်” ဟု ပြောသည်။ စစ်ကိုင်းတိုင်းဒေသကြီး၊ ကလေးမြို့နယ်တွင် ပြီးခဲ့သည့် သုံးလကျော်က စစ်ကော်မရှင်တပ်များ စစ်ကြောင်းထိုး ဝင်ရောက်ပြီးနောက် မြို့ဝင်/ထွက် လမ်းမကြီးများကို ပိတ်ဆို့ထားမှုကြောင့် တောတောင်အတွင်း ထွက်ပြေး တိမ်းရှောင်နေကြရသည့် ဒေသခံ ထောင်နှင့်ချီသည်လည်း စားနပ်ရိက္ခာ ပြတ်လပ်မှုနှင့် ရင်ဆိုင်နေရသည် ဟု စစ်ဘေးရှောင်များအား အကူအညီပေးနေသူများနှင့် ဒေသခံများက ပြောသည်။ သုံးလကျော်ကြာ လမ်းကြောင်းပိတ်ဆို့ ခံထားရခြင်းကြောင့် အစားအသောက် အကူအညီများ ရရှိရန် ခက်ခဲနေ ပြီး စစ်ရှောင်ပြည်သူ အများစုသည် ဆန်ပြုတ်ကျဲကျဲကိုသာ ကျိုချက်အားပြု စားသောက်နေရသည်ဟု အကူအညီပေးရေးအဖွဲ့များက ထောက်ပြသည်။ ကလေးမြို့လူထုတိုက်ပွဲ ဦးဆောင်ကော်မတီ ပြောရေးဆိုခွင့်ရှိသူက “အရေးပေါ်က ဆန်နဲ့ရိက္ခာနဲ့၊ ဒီအရေးပေါ် လူသုံးကုန်ပစ္စည်းတွေလည်း လိုတယ်။ လက်ရှိ ရာသီဥတုပြောင်း ကာလကြောင့်မို့လို့ ဒီဖျားနာတာတွေရော ဖြစ်နေကြတော့ ဒီအရေးပေါ် ကျန်းမာရေး ကူညီစောင့်ရှောက်မှုတွေ လိုအပ်ပါတယ်။ လိုတာ ပြောရရင်တော့ အကုန်ပဲဗျာ” ဟု ပြောသည်။ WFP မြန်မာနိုင်ငံဆိုင်ရာ ဌာနေကိုယ်စားလှယ် မစ္စတာ မိုက်ကယ်ဒန်ဖို့ဒ် (Mr. Michael Dunford) က မြန်မာနိုင်ငံ၏ အခြေအနေသည် ကမ္ဘာပေါ်၌ အဆိုးရွားဆုံးသော အကျပ်အတည်းများထဲမှ တစ်ခုဖြစ်နေသော် လည်း နိုင်ငံတကာ၏ အာရုံစိုက်မှု နည်းပါးနေကြောင်း ထောက်ပြထားသည်။ “မြန်မာနိုင်ငံရဲ့ အခြေအနေဟာ ကမ္ဘာပေါ်မှာ အဆိုးရွားဆုံး ဆာလောင်မွတ်သိပ်မှု အကျပ်အတည်းတွေထဲက တစ်ခု ဖြစ်ပါတယ်။ ဒါပေမဲ့ ကံမကောင်းစွာပဲ နိုင်ငံတကာရဲ့ အာရုံစိုက်မှုဟာ အခြားနေရာတွေလောက် မရရှိသေးဘူး ဆိုတာကို ကျနော်တို့ ထောက်ပြလိုပါတယ်” ဟု မစ္စတာ ဒန်ဖို့ဒ်က ပြောသည်။ ထို့အပြင် စစ်ကော်မရှင်တပ်၏ ပိတ်ဆို့မှုသည် အလှူရှင်များ၏ ကူညီထောက်ပံ့မှုများကို စစ်ရှောင်များထံ အရောက်ပို့ဆောင်ရန် အခက်အခဲ ဖြစ်စေသည်ဟု ကရင်နီပြည်မှ စစ်ဘေးရှောင်တစ်ဦး၏ က ပြောသည်။ “အခုလို တိုက်ပွဲတွေ ပြင်းထန်နေတဲ့အချိန်မှာ လမ်းတွေကလည်း ပိတ်ထားတော့ အပြင်က အကူအညီတွေ လာဖို့ အရမ်းခက်တယ်။ လာရင်တောင်မှ စစ်သားတွေရဲ့ စစ်ဆေးတာ၊ ပိတ်ပင်တာတွေ အများကြီး ခံရတယ်။ ဒါကြောင့် အလှူရှင်တွေ ဘယ်လောက်ပဲ ကူညီချင်ချင်၊ ဒီပစ္စည်းတွေက ကျနော်တို့ စစ်ရှောင်တွေဆီကို အရောက်လာဖို့ မလွယ်ဘူး။ ဒါကြောင့် စားနပ်ရိက္ခာက တဖြည်းဖြည်း ပြတ်လပ်လာတယ်။” ကုလသမဂ္ဂ အဖွဲ့အစည်းများ အနေဖြင့် ရန်ပုံငွေ အလွန်အမင်း နည်းပါးနေမှုနှင့် ရင်ဆိုင်နေရသောကြောင့် ၂၀၂၆ ခုနှစ်တွင် အကူအညီ လိုအပ်နေသူ ၁၂ သန်းကျော်ထဲမှ ၁.၃ သန်းကိုသာ အကူအညီပေးရန် ရည်မှန်းထားပြီး ယင်း အတွက်ပင် အမေရိကန်ဒေါ်လာ ၁၂၅ သန်း အရေးတကြီး လိုအပ်နေသည် ဟု WFP က နိုင်ငံတကာကို တောင်းဆိုထားသည်။ ဓါတ်ပုံ - Karenni Humanitarian Team (KHT)

လာမည့်နှစ်တွင် လူ ၁၂ သန်းကျော် ဆာလောင်မွတ်သိပ်မှုဒဏ်ခံရမည်ဟု WFP ပြော

လာမည့်နှစ်တွင် လူ ၁၂ သန်းကျော် ဆာလောင်မွတ်သိပ်မှုဒဏ်ခံရမည်ဟု WFP ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။ လာမည့် ၂၀၂၆ ခုနှစ်…

  • December 15, 2025
မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၅ ရက်။   တရုတ်၏ ကြီးကြပ်မှုဖြင့် တအာင်းအမျိုးသား လွတ်မြောက်ရေး တပ်မတော် (TNLA) မှ စစ်ကော်မရှင် တပ်ကို မိုးကုတ်-မိုးမိတ်ဒေသ နယ်မြေပြန်လွှဲပေးသည့် အစီအစဉ်ကို အမျိုးသားညီညွတ်ရေး အစိုးရ (NUG) က လက်မခံကြောင်း တရားဝင် ပြောဆိုလိုက် သည်။   NUG သည် အဆိုပါဒေသသို့ ပြန်လည် ဝင်ရောက်လာသော စစ်ကော်မရှင်တပ်များကို ပြည်သူလူထုနှင့် လက်တွဲ ၍ ဆက်လက်တိုက်ပွဲဝင်သွားမည်ဟု ပြောဆိုခဲ့ပြီး၊ လက်ရှိ တိုက်ပွဲများကြောင့် အရပ်သား သေဆုံးမှုများရှိနေ ကြောင်း ဒေသခံများက ဆိုသည်။ NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ဒီဇင်ဘာလ ၁၁ ရက်နေ့တွင် ထုတ် ပြန် ပြောဆိုခဲ့ခြင်းဖြစ်ပြီး၊ ထိုဒေသကို ပြန်လည်ထိန်းချုပ်နိုင်ရေး 'စစ်ဆင်ရေး စစ်ဦးစီးအဖွဲ့' ကို နိုဝင်ဘာလ ၉ ရက်နေ့ကပင် ဖွဲ့စည်းကာ စစ်ရေးလှုပ်ရှားမှုများ လုပ်ဆောင်ခဲ့ကြောင်း ပြောသည်။ တအာင်းတပ် TNLA နှင့် စစ်ကော်မရှင်တပ်တို့အကြား နိုဝင်ဘာလကုန်ပိုင်းက ပြုလုပ်ခဲ့သော နယ်မြေ ပြန်လွှဲ ပေးရေး သဘောတူညီချက်ကို NUG အနေဖြင့် လုံးဝလက်မခံနိုင်ကြောင်း ဦးနေဘုန်းလတ်က ပြောသည်။ “မိုးကုတ် - မိုးမိတ် ဒေသသို့ ကျူးကျော်ဝင်ရောက်လာသော အကြမ်းဖက် စစ်အုပ်စုတပ်တွေကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ပွဲဝင်လျက် ရှိနေပြီး နယ်မြေစိုးမိုးထိန်းချုပ်နိုင်မှု ပြန်လည်ရရှိနိုင်ရေး အတွက် ဆက်လက် တိုက်ပွဲဝင်နေပါတယ်။ မိုးကုတ်–မိုးမိတ်ဒေသသို့ ကျူးကျော်ဝင်လာတဲ့ စစ်အုပ်စုတပ်တွေ ကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ခိုက်မယ့်အပြင် နယ်မြေစိုးမိုးမှု ပြန်လည်ရရှိရေး အတွက် စစ်ရေးအရှိန်မြှင့်သွားမယ်။” မိုးကုတ် - မိုးမိတ်ဒေသသည် နိုင်ငံရေးနှင့် စစ်ရေးအရ အထိမခံသော အခြေအနေဖြစ်သောကြောင့် တရားဝင် ထုတ်ပြန်ချက်များကို အဆောတလျင် မထုတ်ပြန်နိုင်ခဲ့သော်လည်း စစ်ဆင်ရေးများကို စနစ်တကျ ကွပ်ကဲ ဆောင်ရွက်ခဲ့ကြောင်း ဦးနေဘုန်းလတ်က ရှင်းပြသည်။ နိုဝင်ဘာလ ၃၀ ရက်နေ့မှ ဒီဇင်ဘာလ ၆ ရက်နေ့အတွင်း တိုက်ပွဲကြီး ၉ ပွဲအထိ ဖြစ်ခဲ့ပြီး စစ်ကော်မရှင်၏ အရေးပါသည့် စခန်းကုန်းတစ်ခုကို သိမ်းပိုက်နိုင်ခဲ့သည်ဟုလည်း NUG က အတည်ပြုထားသည်။ စစ်ကော်မရှင်တပ်များ မိုးကုတ်နှင့် မိုးမိတ်မြို့များသို့ ပြန်လည် ဝင်ရောက်လာပြီးနောက် နိုဝင်ဘာလ ၃၀ ရက်နေ့မှ စတင်၍ တိုက်ပွဲများ ဆက်တိုက်ဖြစ်ပွားခဲ့ကာ စစ်ကော်မရှင်တပ်က လေကြောင်း တိုက်ခိုက်မှုများကိုပါ လုပ်ခဲ့သည်။ မိုးမိတ်မြို့အနီး ဗုံးကြဲတိုက်ခိုက်မှုကြောင့် ကိုယ်ဝန်ဆောင် အမျိုးသမီးတစ်ဦး အပါအဝင် အရပ်သား ၁၁ ဦး သေဆုံးခဲ့သည် ဟု ဒေသခံများက ပြောသည်။ စစ်ရေးတင်းမာမှုများကြောင့် အရပ်သားပြည်သူများမှာ လုံခြုံရေးအရ ပိုမိုစိုးရိမ်ပူပန်နေရကြောင်း ဒေသခံ တစ်ဦးက ၎င်းတို့၏ အခြေအနေကို ယခုကဲ့သို့ ပြောသည်။ “အခုရက်ပိုင်းမှာ တိုက်ပွဲတွေ ပြန်ဖြစ်လာတော့ အရပ်သားတွေက ကြားထဲက ပိတ်မိပြီး ခံနေရတာပါ။ မိုးမိတ် ဘက် ဗုံးကြဲတိုက်ခိုက်တော့ ကလေးတွေ၊ ကိုယ်ဝန်ဆောင် အမျိုးသမီးတွေပါ သေဆုံးခဲ့ရတယ်။ ဒီလို နယ်မြေ ပြန်လွှဲတာတွေကြောင့် ပြည်သူတွေရဲ့ လုံခြုံရေး ပိုဆိုးလာတာကိုပဲ မြင်ရတယ်။” အဆိုပါဒေသတွင်း စစ်ရေးလှုပ်ရှားမှုများနှင့် ပတ်သက်၍ ကချင်လွတ်လပ်ရေးအဖွဲ့ (KIO/KIA) ၏ ပြောရေး ဆိုခွင့်ရှိသူ ဗိုလ်မှူးကြီးနော်ဘူကလည်း KIA ၏ မဟာမိတ်တပ်ဖွဲ့များ အပေါ် ကူညီထောက်ပံ့မည့် အခြေအနေကို ယခုကဲ့သို့ ပြောသည်။ “တိုက်ပွဲ ဖြစ်လို့ ရှိရင်တော့ အမြဲတမ်းကူညီကြတဲ့ သဘောမျိုးနဲ့ ကူညီတဲ့ အနေအထားလောက်တော့ ရှိမှာပါ။ ဒါပေမယ့် လက်တွေ့ အခြေအနေကတော့ ဘယ်လောက်အထိ ဘယ်လိုအခြေအနေ ရှိတယ်ဆိုတာကတော့ အခုကတော့ ကျနော်က ပြောလို့တော့ အဆင်မပြေဘူးခင်ဗျာ။” မိုးမိတ်မြို့နယ်တွင် KIA တပ်ရင်းများ၊ ABSDF နှင့် PDF များ ပူးပေါင်း၍ အခြေချထားကြောင်း၊ TNLA ဆုတ်ခွာ သည့် မိုးမိတ်မြို့နှင့်ပတ်သက်၍ KIA အနေဖြင့် စစ်ရေးအရ လုပ်ဆောင်ရန် မရှိသော်လည်း မဟာမိတ်တပ်ဖွဲ့များ စစ်ရေးလှုပ်ရှားလာပါက ကူညီသွားမည်ဟု ဗိုလ်မှူးကြီးနော်ဘူက နိုဝင်ဘာလတွင် သတင်းနှင့်မီဒီယာ ကွန်ရက် သတင်းဌာနကို ထုတ်ဖော်ပြောဆိုခဲ့ဖူးသည်။  

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  တရုတ်၏ ကြ…

  • December 15, 2025
ရွေးကောက်ပွဲမှာ စစ်ကျွန်ဘဝ သွပ်သွင်းရန်သာ ဖြစ်ကြောင်း လှုပ်ရှားသူများ သုံးသပ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ စစ်ကော်မရှင်က ကျင်းပရန် စီစဉ်နေသည့် အတုအယောင် ရွေးကောက်ပွဲသည် တရားမျှတမှု မရှိဘဲ စစ်အာဏာ ရှင်စနစ် သက်ဆိုးရှည်စေရန်နှင့် ပြည်သူများ စစ်ကျွန်ဘဝမှ ရုန်းထွက်၍ မရအောင် လုပ်ဆောင် ခြင်းသာ ဖြစ်သည်ဟု အရပ်ဘက် တက်ကြွလှုပ်ရှားသူများက ပြောဆိုလိုက်သည်။ စစ်ကော်မရှင်သည် ရွေးကောက်ပွဲ၏ အပိုင်း (၁) ကို လာမည့် ဒီဇင်ဘာလ ၂၈ ရက်နေ့၊ အပိုင်း (၂) ကို ၂၀၂၆ ခုနှစ်၊ ဇန်နဝါရီလ ၁၁ ရက်နေ့နှင့် အပိုင်း (၃) ကို ဇန်နဝါရီလ ၂၅ ရက်နေ့တို့တွင် အသီးသီး ကျင်းပသွားမည်ဟု ထုတ်ပြန်ကြေညာထားသည်။ အဆိုပါ ရွေးကောက်ပွဲသည် စစ်ကော်မရှင်၏ စီမံကိန်းဖြစ်သောကြောင့် ပြတ်ပြတ်သားသား ဆန့်ကျင်ကြရန် လိုကြောင်း ကျေးလက်မြေအဖွဲ့ ဒါရိုက်တာ ဒေါ်မူစဲက တိုက်တွန်းပြောဆိုသည်။ “ဒီအတုအယောင် ရွေးကောက်ပွဲသည် ကျမတို့ကို စစ်ကျွန်ဘဝကနေ ပြီးတော့မှ လုံးဝရုန်းထွက်လို့ မရအောင် လုပ်မယ့် ရွေးကောက်ပွဲ ဖြစ်တယ်။ သူတို့ရေးထားတဲ့ ရွေးကောက်ပွဲ ဥပဒေသည် ဒီလိုပဲ ဖြစ်တဲ့ အတွက်ကြောင့် မို့လို့ ဒီဥစ္စာကို ကျမတို့ ပြတ်ပြတ်သားသား ဆန့်ကျင်ရမယ်။ ပြတ်ပြတ် သားသား အတုအယောင် ရွေးကောက် ပွဲ ပါဆိုပြီး ကျမတို့ ထုတ်ဖော်ဖို့လိုတယ်။“ ထို့အပြင် ရွေးကောက်ပွဲ အကြိုကာလတွင် စစ်တပ်၏ ဖိနှိပ်မှုများ ပိုမိုမြင့်တက်လာကြောင်း မွန်ပြည် လူ့အခွင့်အရေး ဖောင်ဒေးရှင်း (HURFOM) ဒါရိုက်တာ နိုင်အဲမွန်က ထောက်ပြသည်။ “ရွေးကောက်ပွဲ ကာလနဲ့ စပ်လျင်းပြီးတော့ နယ်မြေ ပိတ်ပင်တားဆီးတာ၊ ကန့်သတ်တာရှိတယ်။ အချက် အလက်တွေ မခိုင်လုံဘဲနဲ့ ခရီးသွားတဲ့ ကိစ္စတွေကို တားမြစ်တာ ရှိလာတယ်။ အဲ့အပေါ်မှာ ငွေ တွေ မတရား တောင်းပြီးတော့မှ ပြီးသွားတာမျိုး၊ အကြောင်းမဲ့ ဖမ်းဆီးပြီးတော့မှ ငွေညှစ်တဲ့ ကိစ္စမျိုး၊ ဆိုင်ကယ်တို့ ကားတို့ သိမ်းလိုက်တာမျိုးတွေက ပို ဖြစ်လာတယ်။ စီးပွားရေး၊ လူမှုရေး၊ ယဉ်ကျေးမှု နဲ့ ပတ်သက်တဲ့ ESCR right တွေ ချိုးဖောက်မှု ပိုဖြစ်လာတယ်။” စစ်ကော်မရှင်သည် စစ်ရှောင်ပြည်သူများထံ စားနပ်ရိက္ခာ တင်ပို့မည့် လမ်းကြောင်းများကိုပါ ပိတ်ဆို့ နေသောကြောင့် အရေးပေါ် အကူအညီ လိုအပ်နေသည့် စစ်ရှောင်ပြည်သူများအတွက် အခြေခံ စားနပ်ရိက္ခာ ပြတ်လပ်မှုနှင့် ရင်ဆိုင်နေရသည်ဟု နိုင်အဲမွန်က ပြောသည်။ စစ်အာဏာရှင်စနစ် အမြစ်ပြတ်မှသာ ပြည်သူများ၏ မတရားမှုများကို အဆုံးသတ်နိုင်မည် ဖြစ်ကြောင်း NUG ယာယီသမ္မတ ဒူဝါလရှီးလကလည်း ၇၇ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အထိမ်းအမှတ် ပြောကြားချက်တွင် တိုက်တွန်းခဲ့သည်။ “ဖက်ဒရယ် ဒီမိုကရေစီစနစ် တည်ဆောက်ဖို့ကလည်း စစ်အာဏာရှင်စနစ်ကို ချေမှုန်းနိုင်ရေးနဲ့ တိုက်ရိုက် ဆက်စပ် နေပါတယ်။ စစ်အာဏာရှင် သက်ဆိုးရှည်နေသ၍ ပြည်သူတွေဟာ အချိန်တိုင်း လူ့အခွင့်အရေးကို ဆက်လက် ဆုံးရှုံးနေကြရအုံးမှာ ဖြစ်ပါတယ်။ ပြည်သူတွေ ကြုံနေရတဲ့ မတရားမှုတွေကို အဆုံးသတ်နိုင်ဖို့ စစ်အာဏာရှင်စနစ် အမြစ်ပြတ်ရေးကို အားသွန်ခွန်စိုက် လုပ်ဆောင်ဖို့ လေးနက်စွာ တိုက်တွန်း လိုပါတယ်။” နိုင်ငံတကာ အဖွဲ့အစည်းများ ဖြစ်သော သြစတြေးလျ သံရုံး၊ ယူကေ၊ ကနေဒါနှင့် ဥရောပသမဂ္ဂ (EU) တို့က လည်း စစ်ကော်မရှင်၏ ရွေးကောက်ပွဲသည် တင်းမာမှုနှင့် အကြမ်းဖက်မှုများကို ပိုမိုဆိုးရွား စေနိုင်ပြီး စစ်မှန် သည့် ဖြေရှင်းနည်းနှင့် ပိုမိုဝေးကွာစေနိုင်ကြောင်း ပူးတွဲ ထုတ်ပြန်ပြောဆိုထားသည်။ ဓာတ်ပုံ - စစ်ကိုင်းဒေသ သပိတ်အင်အားစု  

ရွေးကောက်ပွဲမှာ စစ်ကျွန်ဘဝ သွတ်သွင်းရန်သာ ဖြစ်ကြောင်း လှုပ်ရှားသူများ သုံးသပ်

သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  စစ်ကော်မရှင်က ကျင်းပရန် စီစဉ်နေသည့် အတုအယောင် ရွေးကောက်ပွဲသည် တရားမျှတမှု မရှိဘဲ စစ်အ…

  • December 15, 2025
နယ်စပ် ခြံစည်းရိုးတွင် တံတားပေါက်များ တပ်ဆင်ပေးမည့် ကမ်းလှမ်းချက် နာဂဒေသခံများ ပယ်ချ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၅ ရက်။   အိန္ဒိယအစိုးရက မြန်မာ-အိန္ဒိယ နယ်စပ်ရှိ နာဂဒေသတွင် ခြံစည်းရိုးကာရံရာတွင် သဘောတူညီချက် ရရန်အတွက်  မီတာ ၈၀၀ ခြားတိုင်း ဂိတ်ပေါက်များ ဖွင့်ပေးမည်ဟူသော ကမ်းလှမ်းချက်ကို ညီညွတ်သော တန်ရှန်းနာဂကောင်စီ (UTNC) နှင့် ဒေသခံများက ပယ်ချလိုက်သည်။   နယ်စပ်ခြံစည်းရိုးကာရံမှုသည် နာဂမိသားစုများကို ခွဲခြားစေပြီး၊ အဆိုပါ ဂိတ်ပေါက်များမှာလည်း လွတ်လပ်ခွင့် ကို ပိတ်ပင်မည့် ‘ချော့သိပ်မှု’ သာ ဖြစ်သည် ဟု ဒေသခံများက ပြောဆိုသည်။ အိန္ဒိယ၏ နယ်စပ်ခြံစည်းရိုး ကာရံမှုလုပ်ငန်းများသည် နယ်စပ် တစ်ဖက်တစ်ချက်ရှိ နာဂမိသားစုများကို ခွဲခြား လိုက်သကဲ့သို့ ဖြစ်သွားမည်ကို စိုးရိမ်သောကြောင့် ဒေသခံများ၏ ပြင်းပြင်းထန်ထန် ကန့်ကွက်မှုများနှင့် ရင်ဆိုင် နေရသည်။ အဆိုပါကန့်ကွက်မှုများကြောင့် လုပ်ငန်းခွင် ထိခိုက်မှုမရှိစေရန် အတွက်သာ အိန္ဒိယဘက်မှ ယခုကဲ့သို့ ဂိတ်ပေါက်များ ထားရှိပေးမည့် အစီအစဉ်ကို နိုဝင်ဘာလ နောက်ဆုံးအပတ်က UTNC နှင့် တွေ့ဆုံပွဲတွင် တင်ပြခဲ့ ခြင်း ဖြစ်သည်။ သို့သော်လည်း ဤကမ်းလှမ်းချက် အပေါ် ယုံကြည်မှု မရှိကြောင်း ဒေသခံများက ပြောသည်။  “ဒါတွေက လက်တွေ့မကျပါဘူး။ ဒါက သူတို့လုပ်ချင်တဲ့ဟာ တစ်ခုကို လုပ်ဖို့အတွက် ချော့သိပ်တဲ့ သဘောလောက်ပဲလို့ ကျနော်တို့က ယူဆပါတယ်။ သူတို့ ဖောက်ပေးသည့် တိုင် အောင် ဒီလမ်းပေါက်လေးတွေက ကျနော်တို့အတွက် လွတ်လပ်တဲ့ ကူးလူးဆက်ဆံမှု မဖြစ်နိုင်ဘူးဗျ။ ဘာလို့လဲ ဆိုတော့ ဒီအပေါက်တွေက အချိန်မရွေး ပိတ်လို့ရတယ်၊ အချိန်မရွေး သတ်မှတ်လို့ရတဲ့ အပေါက်တွေ ဖြစ်သွား မှာဗျ” ဟု နန်းယွန်းဒေသခံ အမျိုးသားတစ်ဦးက ပြောသည်။ နယ်စပ်ခြံစည်းရိုး ကာရံပြီး တံခါးပေါက်များ ဖွင့်ပေးမည့်ကိစ္စသည် လုံခြုံရေး အကြောင်းပြချက်ဖြင့် အချိန်မရွေး ပြန်လည်ပိတ်ပစ်နိုင်သည့် အန္တရာယ်ရှိနေကြောင်း UTNC တာဝန်ရှိသူ တစ်ဦးက သုံးသပ်သည်။ “အဲ့ဒီလိုခြားပြီး တံခါးပေါက် ဖွင့်ပေးမယ်ဆိုတဲ့ ကိစ္စကလည်း ပြည်သူက လက်ခံနိုင်မှာမဟုတ်ဘူး။ ဘာကြောင့် လဲဆိုရင် အစိုးရ လုံခြုံရေးအတွက် လုပ်နေတာ ဖြစ်တဲ့အတွက် အကြောင်း တစ်ခုခုကြောင့် နောက်နောင်မှာ ချန် ထားသော်ငြားလည်းပဲ ပြဿနာတွေ ဖြစ်လာရင် တံခါးပေါက် ပြန်ပိတ်သွားတာမျိုးတို့ ဖြစ်နိုင်တယ်။ ဒါကြောင့် ပြည်သူအတွက်တော့ ဘယ်လိုမှ ဒါက လွတ်လပ်မယ်လို့ မယူဆနိုင်တာ ဖြစ်တဲ့ အတွက်ကြောင့် လက်ခံမှာ မဟုတ်ဘူး။” အိန္ဒိယ အစိုးရသည် ယခင်က နယ်စပ်နေပြည်သူများ ဗီဇာမလိုဘဲ ၁၆ ကီလိုမီတာ အထိ ဝင်ထွက်သွားလာခွင့် ပြုထားသည့် Free Movement Regime (FMR) စနစ်ကို ရုတ်သိမ်းရန် ဆုံးဖြတ်ပြီးနောက် ယခုကဲ့သို့ ခြံစည်းရိုး ကာရံခြင်းများကို အရှိန်မြှင့်လုပ်ဆောင်လာခြင်း ဖြစ်သည်။ အိန္ဒိယ-မြန်မာ နယ်စပ်တစ်လျှောက် နာဂလူမျိုးများ နေထိုင်ရာ နယ်နိမိတ် စုစုပေါင်း အရှည်မှာ နာဂလန်း ပြည် နယ် တစ်ခုတည်းတွင်ပင် ၂၁၅ ကီလိုမီတာ (၁၃၄ မိုင်) ခန့် ရှိကြောင်း အိန္ဒိယအစိုးရ သတင်းရင်းမြစ်များနှင့် ဒေသန္တရအစီရင်ခံစာများက ဖော်ပြသည်။ UTNC အနေဖြင့် ဒေသခံ ပြည်သူလူထု၏ ဆန္ဒအရ ခြံစည်းရိုး ကာရံခြင်းကို လုံးဝ ရပ်တန့်ပေးရန်သာ ဆက် လက် တောင်းဆိုသွားမည်ဖြစ်ပြီး၊ အိန္ဒိယအစိုးရက ဆက်လက်တင်းမာနေပါက ကန့်ကွက်မှုများကို ပိုမိုပြင်းထန် စွာ လုပ်ဆောင်သွားမည် ဖြစ်ကြောင်း နာဂဒေသခံများက ပြောသည်။

နယ်စပ် ခြံစည်းရိုးတွင် တံတားပေါက်များ တပ်ဆင်ပေးမည့် ကမ်းလှမ်းချက် နာဂဒေသခံများ ပယ်ချ

နယ်စပ် ခြံစည်းရိုးတွင် တံတားပေါက်များ တပ်ဆင်ပေးမည့် ကမ်းလှမ်းချက် နာဂဒေသခံများ ပယ်ချ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  အိ…

  • December 15, 2025
×Close