စစ်ကောင်စီ – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကောင်စီ

ဖားကန့်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၁ ရက်။ ကချင်ပြည်ရှိ မြန်မာနိုင်ငံ၏ အဓိက ကျောက်စိမ်းထွက်ရာ ဒေသဖြစ်သော ဖားကန့်မြို့နယ် တွင် စစ်ကော်မရှင် တပ်ဖွဲ့က ညမထွက်ရအမိန့် နှင့် လူငါးဦးထက် ပိုမစုရအမိန့် များကို ထပ်မံထုတ်ပြန်လိုက်ကြောင်း ဒေသခံများက ပြောသည်။ ဖားကန့် ဒေသခံ အမျိုးသားတစ်ဦးက “၁၄၄ မထုတ်တာတောင် ဖမ်းဆီးတာ၊ စစ်ဆေးတာ၊ ပစ်သတ်တာတွေက ဆက်တိုက်ဆိုတော့ အခုက ပိုဆိုးမှာပေါ့ဗျာနော်။ အခု ဒီလိုလိုက်တော့ ဥပဒေမဲ့လုပ်နေရာကနေ ဥပဒေအရ လုပ်တာဆိုပြီး အဖမ်းခံတာ၊ ပစ်သတ်ခံရတာ တွေ ပိုများလာမှာပေါ့ဗျာ” ဟု ပြောသည်။ ညရေးညတာ ကိစ္စများ ပေါ်လာပါက အခက်ကြုံနိုင်သည်ဟု လည်း ပြောသည်။ “ညဘက်တွေမှာ တိုက်ပွဲတွေ ရုတ်တရက် ဖြစ်လာရင်ပေါ့ လူနာတွေကို အရေးပေါ် အခြေအနေအရ ကယ်ဆယ်ရေးလုပ်ဖို့ ကူညီဖို့ ပိုခက်ခဲသွားမယ်။ သွားကယ်တဲ့လူကအစ အဖမ်းခံရတာမျိုး ပစ်သတ်ခံရတာမျိုး တွေ ဖြစ်လာမှာပေါ့နော်” ဟု အဆိုပါ ဒေသခံက ဆက်ပြောသည်။ ဖားကန့်မြို့နယ် (အုပ်ချုပ်ရေးမှူး) က လက်မှတ်ရေးထိုးထားသော အဆိုပါ အမိန့်ကို ရာဇဝတ်ကျင့်ထုံး ဥပဒေပုဒ်မ ၁၄၄ အရ ၂၀၂၅ ခုနှစ်၊ အောက်တိုဘာလ ၈ ရက်နေ့ တွင် စတင် အသက်သွင်းခဲ့သည်။ အဆိုပါ ညမထွက်ရအမိန့် ကို ည ၁၀ နာရီမှ နံနက် ၄ နာရီအထိ သတ်မှတ်ထားသည်။ ယင်းအမိန့်သည် ဖားကန့်မြို့နယ်အတွင်း စစ်ရေးတင်းမာမှုများ ဆက်လက်မြင့်တက်နေဆဲ ဖြစ်ကြောင်းကို ပြသ နေသည်။ KIO/KIA သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက “သူတို့ကတော့ အခု ရွေးကောက်ပွဲလည်း နီးလာပြီဆိုတော့ ရွေးကောက်ပွဲနယ်မြေတွေ၊ မဲဆွယ်နယ်မြေတွေ ပိုပြီးမှ တိုးချဲ့နိုင်ဖို့အတွက် လက်လွှတ်ဆုံးရှုံး ခဲ့တဲ့ စခန်းဟောင်းတွေ နေရာဟောင်းတွေ ပြန်ရနိုင်ဖို့အတွက် ကြိုးစားတဲ့ အနေနဲ့ အခုလိုမျိုး ၁၄၄ တွေ ချတာ နေမှာ။ တိုက်ပွဲကို မထိန်းနိုင်လို့ ပြည်သူလူထုဘက်ကို လှည့်ပြီးမှ အဲ့လိုမျိုး လုပ်တာပဲလို့ ကျနော်ကတော့ သုံးသပ်ပါတယ်” ဟု ပြောသည်။ ထို့အပြင် မြို့နယ်အတွင်းရှိ လမ်းမများ၊ လမ်းသွယ်များနှင့် အများပြည်သူနှင့် သက်ဆိုင်သော နေရာများတွင် လူငါးဦး သို့မဟုတ် ငါးဦးထက် ပိုမို၍ စုဝေးခြင်းကို လုံးဝ မပြုလုပ်ရဟု ဆိုသည်။ စုဝေးခြင်း၊ ဟောပြောခြင်း၊ ဖျက်ဆီးခြင်းနှင့် ရုန်းရင်းဆန်ခတ်ပြုမူခြင်းမျိုး မှန်သမျှကိုလည်း တားမြစ်ထားသည်။ ထိုအမိန့်ကို မလိုက်နာပါက တည်ဆဲဥပဒေများ အရ အရေးယူခံရမည် ဖြစ်ကြောင်း ထုတ်ပြန်ချက်တွင် ဖော်ပြ ထားသည်။ ဗိုလ်မှူးကြီးနော်ဘူက “၁၄၄ ထုတ်တာပဲ ဖြစ်ဖြစ်၊ မထုတ်တာပဲ ဖြစ်ဖြစ် ပြည်သူလူထုကို ပစ်ခတ်တာတွေ၊ ဖမ်း ဆီးတာတွေ စစ်ဆေးတာတွေ အများကြီး လုပ်နေတာ။ ဒါပေမယ့် အဲ့ဒီ ၁၄၄ ထုတ်ပြီ ဆိုလို့ရှိရင်တော့ ပိုပြီးမှ သတိထားဖို့ လိုတာပေါ့နော်” ဟု ပြောသည်။ အမိန့်ထုတ်ပြန်ရခြင်း၏ တရားဝင်အကြောင်းပြချက်အဖြစ် စစ်ကော်မရှင်ဘက်မှ ဒေသတွင်း ရာဇဝတ်မှုများနှင့် လုယက်မှုများ များပြားလာခြင်းကြောင့် လုံခြုံရေးထိန်းသိမ်းရန်ဟု ဆိုသည်။ သို့သော် နိုင်ငံရေး လေ့လာသူများနှင့် ဒေသခံများ၏ သုံးသပ်ချက်မှာ မတူညီပေ။ ဖားကန့်မြို့နယ်သည် ကချင်လွတ်လပ်ရေး တပ်မတော် (KIA) နှင့် ပြည်သူ့ကာကွယ်ရေး တပ်ဖွဲ့ (PDF) ပူးပေါင်း တပ်များ၏ ထိုးစစ်ဒဏ်ကို အပြင်းအထန် ခံနေရသောဒေသ ဖြစ်သည်။ စစ်ကော်မရှင်တပ်အနေဖြင့် စစ်ရေးဖိအားကြောင့် လုံခြုံရေးကို အပြင်းအထန် တင်းကျပ်နေရသည်ဟု သုံးသပ်မှု များ ရှိနေသည်။ နိုင်ငံရေးလေ့လာသူများက ဤအမိန့်သည် အရပ်သား ပြည်သူများ၏ လှုပ်ရှားမှုကို ထိန်းချုပ်ရန် နှင့် စစ်ကော်မရှင်တပ်၏ စစ်ရေးလှုပ်ရှားမှုများကို ပိုမို လွယ်ကူစေရန် ရည်ရွယ်ပြီး ထုတ်ပြန်ခြင်း ဖြစ်ကြောင်း ဝေဖန်သုံးသပ်ထားသည်။ ဖားကန့်မြို့နယ်ရှိ ဒေသခံများမှာမူ ညမထွက်ရ အမိန့်ကြောင့် လုပ်ငန်းဆောင်တာများနှင့် လူမှုရေးကိစ္စရပ်များ တွင် အခက်အခဲများစွာနှင့် ရင်ဆိုင်ရနိုင်ပြီး လုံခြုံရေး အခြေအနေအတွက် စိုးရိမ်ပူပန်မှုများ မြင့်တက်နေသည်ဟု ပြောသည်။  ဓါတ်ပုံ - Tarlin Mg

ဖားကန့်တွင် ညမထွက်ရ အမိန့်ထုတ်ပြန်

သောကြာနေ့ည ရုပ်သံသတင်း (၁၀-၁၀-၂၅) ဒီကနေ့ အစီအစဉ်ထဲမှာတော့.... - မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ - မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ - ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ - ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ - ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ - ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။ - ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ ...... စတာတွေတင်ဆက်ထားပါတယ်။

သောကြာနေ့ည ရုပ်သံသတင်း (၁၀-၁၀-၂၅)

မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရ၍ ကလေးအပါ အရပ်သား ၈ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၀ ရက်။ ရှမ်းပြည်နယ်မြောက်ပိုင်း၊ မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရမှုကြောင့် ကလေးငယ်များ အပါအဝင် အရပ်သား ၈ ဦး ထိမှန် သေဆုံးခဲ့သည်။ စစ်ကော်မရှင်တပ်၏ လေကြောင်းတိုက်ခိုက်မှုထဲ ကလေး အပါအဝင် အရပ်သားပြည်သူ ၈ ဦး သေဆုံးခဲ့ရပြီး၊ အများအပြား ဒဏ်ရာရရှိခဲ့ကြောင်း ဒေသခံများက ပြောသည်။ ဒေသခံ အမျိုးသားတစ်သီးက “Airstrike ဖြစ်သွားတယ်။ မိုးမိတ်ဘက်မှာ။ ကိုသိန်းနိုင်အိမ်မှာ ၃ ယောက်၊ ဦးစိုးမြင့်အိမ်မှာ ၂ ယောက်၊ ဒေါ်ခင်မာရီ အိမ်က တစ်ယောက်၊ ဦးသိန်းဇော်အိမ်က တစ်ယောက်၊ နောက်ပြီး တခြားအိမ်က တစ်ယောက်လည်းပါတယ်။ ဒဏ်ရာရတာလည်း များတယ်။ အဲ့ဒီထဲမှာ ကလေးတစ်ယောက်က တော့ အသက်အန္တရာယ်က လွှတ်သွားတယ်။ ဒါပေမယ့် ခြေထောက်ဖြတ်ရမယ့် အခြေအနေမျိုးပေါ့နော်။ ထိသွားတာက တော်တော်ဆိုးတယ်” ဟု ပြောသည်။ အဆိုပါ တိုက်ခိုက်မှုမှာ တိုက်ပွဲဖြစ်ပွားခြင်းမရှိဘဲ အရပ်သားနေအိမ်များကို တိုက်ရိုက်ပစ်မှတ်ထားခြင်း ဖြစ်သည်ဟု ဆိုသည်။ စစ်ကော်မရှင်တပ်က ပေါင် ၅၀၀ ဗုံး၊ ပေါင်း ၂၅၀ ဗုံးတို့ဖြင့် အောက်တိုဘာလ ၉ ရက်နေ့၊ ညနေ ၆ နာရီကျော် အချိန်ခန့်တွင် ကြဲခဲ့ခြင်း ဖြစ်သည်။ အသက် ၃ နှစ်အရွယ် အပါအဝင် ဒေသခံပြည်သူ စုစုပေါင်း ၈ ဦး သေဆုံးခဲ့ရခြင်း ဖြစ်သည်။ အမျိုးသား ၅ ဦး၊ အမျိုးသမီး ၂ ဦး နှင့် ကလေးတစ်ဦး သေဆုံးခဲ့ပြီး ထိခိုက်ဒဏ်ရာ ရရှိသူ ၇ ဦး ရှိခဲ့သည်ဟု မြေပြင် သတင်းအရင်းအမြစ်က ပြောသည်။ ဒဏ်ရာရသူများထဲတွင် အသက် ၁၀ နှစ်အရွယ် ကလေးငယ်တစ်ဦး ပါဝင်ပြီး၊ ၎င်းမှာ ခြေထောက်တစ်ဖက် ဆုံးရှုံးသည်အထိ ဒဏ်ရာပြင်းထန်ခဲ့သည်။ လေကြောင်းမှ ဗုံးကြဲမှုထဲ ဗုံးပေါက်ကွဲမှုကြောင့် ကျေးရွာရှိ နေအိမ် ၇ လုံး ထိမှန် ပျက်စီးဆုံးရှုံးခဲ့သည်။ စစ်ကော်မရှင်တပ်သည် ဝဲဘောင်ကျေးရွာကို ဗုံးကြဲပြီးနောက် တစ်ညတည်းမှာပင် တောင်အင်တိုင်းဒေသ ဘက်သို့ ဗုံး ၂ လုံး ထပ်မံ ကြဲချခဲ့ကြောင်း မြေပြင် သတင်းအရင်းအမြစ်က ဆိုသည်။ အောင်တအင်တိုင်းဒေသ လေကြောင်းတိုက်ခိုက်ခံရမှုထဲ ထိခိုက်သေဆုံးမှုများ မရှိခဲ့သော်လည်း၊ ယခုဖြစ်စဉ် သည် စစ်ကော်မရှင်တပ်က တိုက်ပွဲဖြစ်ပွားခြင်းမရှိသည့် အရပ်သားပြည်သူများ၏ နေထိုင်ရာ နေရာများကို ပစ်မှတ်ထား ဗုံးကြဲတိုက်ခိုက်နေသည်ကို ထင်ရှားစေသည်ဟု ဆိုကြသည်။ မိုးမိတ်မြို့နယ်သည် ၂၀၂၄ ခုနှစ် ဇန်နဝါရီလအတွင်းက ကချင်လွတ်လပ်ရေး တပ်မတော် KIA၊ ကျောင်းသားတပ် ABSDF နှင့် တအာင်းတပ် TNLA မဟာမိတ်တပ်ဖွဲ့များ၏ ထိုးစစ်ဆင်မှုကြောင့် စစ်ရေးပြင်းထန်ခဲ့ပြီးနောက်ပိုင်း စစ်ကော်မရှင်၏ လေကြောင်းတိုက်ခိုက်မှုများ မကြာခဏ ပစ်မှတ်ထားခံရသည့် နယ်မြေတစ်ခုဖြစ်သည်။ လက်ရှိဖြစ်ပွားခဲ့သော လေကြောင်းတိုက်ခိုက်မှုသည် တိုက်ပွဲမရှိသည့် အရပ်သား နေထိုင်ရာ နေရာကို တိုက်ရိုက် ပစ်မှတ်ထားခြင်း ဖြစ်ပြီး၊ စစ်တပ်သည် ၎င်းတို့ လက်လွှတ်ဆုံးရှုံးထားသည့် နယ်မြေများတွင် အရပ်သားများ အပေါ် လေကြောင်းဖြင့် ဖိအားပေး အကြမ်းဖက်သည့် စစ်ရေးဗျူဟာကို ဆက်လက်ကျင့်သုံးနေခြင်း ဖြစ်ကြောင်း လေ့လာသူများက သုံးသပ်သည်။

မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရ၍ ကလေးအပါ အရပ်သား ၈ ဦး သေဆုံး

တိုက်ပွဲများ ဖြစ်ပွားလာနေခြင်းကြောင့် ဒီးမော့ဆို စစ်ရှောင်များ ထပ်မံ စစ်ဘေးရှောင်ရမည်ကို စိုးရိမ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ကရင်နီပြည်၊ ဒီးမော့ဆိုမြို့နယ်အတွင်း စစ်ကော်မရှင်တပ်၏ ထိုးစစ်ဆင်မှုကြောင့် နှစ်ဖက်ထိတွေ့တိုက်ပွဲများ ဖြစ်ပွားလာနေသည့်အတွက် ထပ်မံ၍ စစ်ရှောင်ရမည်ကို စိုးရိမ်နေကြရသည်ဟု ဒေသခံများနှင့် စစ်ရှောင်ပြည် သူများက ပြောသည်။ ရွေးကောက်ပွဲ ဖြစ်မြောက်ရေး အတွက် နယ်မြေများ ပြန်လည် ထိန်းချုပ်နိုင်ရန် ဩဂုတ်လမှစ၍ စစ်ကော်မရှင် တပ်က ဒီးမော့ဆိုမှ ဖရူဆိုမြို့ လမ်းမကြီးတစ်လျှောက် ထိုးစစ်ဆင်လာသဖြင့် ဒီးမော့ဆိုမြို့နယ် အတွင်း နှစ်ဖက် ကြား တိုက်ပွဲများ ပြင်းထန်လာနေခြင်း ဖြစ်သည်။ ထို့သို့ နှစ်ဖက် ထိတွေ့တိုက်ပွဲများ ပြင်းထန်လာသည့်အတွက် စစ်ကော်မရှင်က စစ်ရေးပစ်မှတ် အရပ်သား ပစ်မှတ် မခွဲခြားဘဲ လက်နက်ကြီး၊ ဒရုန်းနှင့် လေကြောင်း တိုက်ခိုက်မှုများ ပိုမိုပြုလုပ်လာမည်ကို စိုးရိမ်နေကြ သည်ဟု ဒီးမော့ဆိုအနောက်ခြမ်းက စစ်ရှောင်များက ပြောသည်။ စစ်ဘေးရှောင် အမျိုးသမီးတစ်ဦးက “လေယာဉ်ဆိုလည်း နေ့တိုင်းဝဲနေ။ ဒရုန်းသံဆိုလည်း တစ်ခါလေ ကြား တယ်။ လက်နက်ကြီးသံလည်း နေ့တိုင်းလိုလို ကြားတယ်။ စိုးရိမ်စရာတွေတော့ အမျာကြီးပေါ့နော်။ သူတို့က လျှောက်ကြဲမယ်လို့လည်း ကြားတယ်။ စစ်ရှောင်တို့ ကျောင်းတို့နေရာကို လိုက်ကြဲမယ်လို့လည်း ကြားတယ်။ အဲ့ဒါကြောင့်မို့လို့ လေယာဉ် လာတယ်ဆိုရင် စိုးရိမ်ရတယ်” ဟု ပြောသည်။ လက်နက်ကြီး၊ ဒရုန်း၊ လေကြောင်း ဗုံးကြဲတိုက်ခိုက်မှုများကြောင့် စာသင်ကျောင်များကိုလည်း မကြာခဏ ပိတ် ထားရလေ့ရှိသည်ဟု အဆိုပါ စစ်ရှောင်အမျိုးသမီးက ဆက်ပြောသည်။ “အဓိက ကလေးတွေပေါ့နော်။ ပညာရေး အဓိက ဦးစားပေးချင်တယ်။ ပြီးလို့ရှိရင် ကောင်းကောင်းနဲ့ ပြီးဆုံး စေ ချင်တယ်။ အခုက ကျောင်းဖွင့်လိုက် ပိတ်လိုက်ဆိုတော့ သူတို့လည်း ဒီတစ်သက်တော့ ကျောင်းပြီးနိုင်မှာ မဟုတ် ဘူး ထင်တယ်။ လေယာဉ်က နေ့တိုင်းဝဲ ကျောင်းက တစ်ချိန်လုံးပိတ် ဆိုတော့ အဆင်မပြေဘူးလေ။” စစ်ရေး ပြင်းထန်လာမှုများကြောင့် လူထုအနေဖြင့် လုံခြုံရေးအရ တစ်နေရာမှ တစ်နေရာသို့ သွားလာရန်နှင့် လုပ်ငန်းများ လုပ်ရန်လည်း အခက်အခဲများနှင့် ရင်ဆိုင်နေကြရသည်ဟု ကရင်နီပြည် ကြားကာလ အုပ်ချုပ် ရေးကောင်စီ အတွင်းရေးမှူး - ၂ ဦးဗညားက ပြောသည်။ “စစ်ရေးက ပိုတင်းမာလာတယ်။ နောက်စစ်ရေးကလည်း ပိုကျယ်ပြန့်လာတယ်ပေါ့နော်။ အဲ့ကြောင့်မို့ လူထု တွေက ပိုပြီးတော့မှ စိုးရိမ်ပူပန်စိတ် ရှိတယ်ပေါ့။ အထူးသဖြင့် ကျန်းမာရေးဆိုင်ရာအရ သွားလာရတာ အခက် အခဲပိုရှိ သွားတယ်။ တချို့နေရာဆိုရင် ဥပမာ ဒီးမော့ဆိုအရှေ့နဲ့ ဒီးမော့ဆိုအနောက် ကူးဆက်သွားဖို့ အရမ်း ခက်ခဲ သွားတယ်ပေါ့နော်။ ပုံမှန် ကူးသန်းရောင်းဝယ်ရေးလည်း လုပ်လို့ မရတော့သလို လူနာတွေကို ပို့တာတွေ လူနာနဲ့ ပတ်သက်ပြီးတော့ ကျန်းမာရေးဆိုင်ရာ ကုသမှုတွေ နောက်ပြီးတော့မှ သာရေးနာရေး ကိစ္စတွေမှာ သွား လာဆက်ဆံလို့ မရတဲ့ ပုံစံဖြစ်သွားတာပေါ့။” မြေပြင်က စစ်ရေး အခြေအနေများကြောင့် ဖရူဆို - ထားလဲ - နန်းဖဲ လမ်းမကြီး အပါအဝင် လမ်းသွယ်များ အားလုံးကို စက်တင်ဘာလ ၂၃ ရက်နေ့မှစ၍ ရက်အကန့်အသတ်မရှိ ပိတ်ထားမည် ဖြစ်ကြောင်းနှင့် လွိုင်ကော် - ဒီးမော့ဆို - ဖရူဆို - ဘောလခဲ လမ်းမကြီးကိုလည်း အသုံးပြုသွားလာခြင်း မလုပ်ကြရန် ကရင်နီတော်လှန်ရေး အဖွဲ့များက အသိပေး ထုတ်ပြန်ထားသည်။ တိုက်ပွဲများနှင့် စစ်ကော်မရှင်တပ်၏ လေကြောင်း၊ ဒရုန်း၊ လက်နက်ကြီး တိုက်ခိုက်မှုများကြား ကာလကြာရှည် နေထိုင်ကြရသည့် စစ်ရှောင်များသည် အသက်အန္တရာယ်အပြင် စိတ်ပိုင်းဆိုင်ရာ ထိခိုက်မှုများပါ ရှိလာနေကြသည်။ စစ်ရှောင် အမျိုးသမီးတစ်ဦးက “အခုဆိုတိုက်ပွဲလည်း ရက်တိုင်းလိုလိုဖြစ်တယ်။ မနက်ဆိုလည်း ဒုန်းဒုန်း ဒိုင်း ဒိုင်းနဲ့။ လေယာဉ်ဆိုလည်း အမြဲ နားစွင့်ပြီးနေရတယ်။ လက်နက်ကြီးသံလည်း နေ့တိုင်း လိုလိုကြားတယ်။ စိုးရိမ်စရာတွေတော့ အမျာကြီးပေါ့နော်။ ဒီမှာကလူထုတွေ တအားထူထပ်တော့ အဆင်မပြေတော့ဘူး။ တစ် နေ့က ဆိုလည်း လက်နက်ကြီးတွေ ထုလာတယ်။ အစ်မတို့ဆို မအိပ်ဘဲနဲ့ အောက်ပြေးဆင်း ပြီးတော့ ဗုံးခိုကျင်း ဘေးမှာ သွားနေ လက်နက်ကြီးလာတော့ ကိုယ့်နားမှာ မီးနီနီနဲ့လာ အဲ့လိုမျိုးဆို ကြောက်ရတယ်။ အခုဆို စစ် သားလည်း တော်တော်လေး နီးလာပြီးကော။ ပြေးစရာနေရာလည်း ကုန်ပြီ မရှိတော့ဘူးလေ” ဟု ပြောသည်။ တိုက်ပွဲ အခြေအနေများကြောင့် လွိုင်နန်းဖမြို့နယ်၊ ဒီးဘောင်းခူမြို့နယ်နှင့် နန်းမယ်ခုံမြို့နယ်အတွင်း စစ်ရေးအရ သွားလာ လှုပ်ရှားနေသည့် တပ်ဖွဲ့များနှင့် အရေးပေါ် ကျန်းမာရေး (နာရေး) လိုအပ်ချက်အရ သွားလာရမည့် သူများမှ အပ မည်သူမဆို လုံခြုံရေးအရ ည ၉ နာရီ မှ နံနက် ၄ နာရီအတွင်း သွားလာ လှုပ်ရှားခြင်း မပြုကြရန် သက်ဆိုင်ရာ မြို့နယ်ပူးပေါင်း အုပ်ချုပ်ရေး ကော်မတီက စက်တင်ဘာလ ၂၆ ရက်နေ့တွင် ထုတ်ပြန်ထားသည်။ ကရင်နီပြည်ရှိ ပြည်သူများအနေဖြင့် သက်ဆိုင်ရာ ဒေသတွင်း တပ်ရင်းတပ်ဖွဲ့များ၏ ထုတ်ပြန်ထားချက်များကို လိုက်နာကြရန်နှင့် စစ်ရေးသတိရှိကြရန် ကရင်နီတော်လှန်ရေးတပ်များက အသိပေး ပြောဆိုထားသည်။

တိုက်ပွဲများ ဖြစ်ပွားလာနေခြင်းကြောင့် ဒီးမော့ဆို စစ်ရှောင်များ ထပ်မံ စစ်ဘေးရှောင်ရမည်ကို စိုးရိမ်

ထားဝယ်ထောင်တွင် နိုင်ကျဉ်းတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ တနင်္သာရီတိုင်း၊ ထားဝယ်မြို့ရှိ အကျဉ်းထောင်တွင် အသက် ၄၈ နှစ်အရွယ် နိုင်ငံရေး အကျဉ်းသား ဖြစ်သူ ကိုအောင်ကိုဦး သေဆုံးသွားသည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် (PPNM)က ထုတ်ပြန်သည်။ သေဆုံးချိန်တွင် ပြင်ပ ဆေးရုံတွင် ကုသခွင့်ရခဲ့သော်လည်း အကျဉ်းထောင်တွင်း လုံလောက်သည့် ကျန်းမာရေးစောင့်ရှောက်မှု မရရှိခြင်းကြောင့် နှလုံး၊ ဆီးချို၊ ကျောက်ကပ် ရောဂါများဖြင့် သေဆုံးခဲ့ရခြင်း ဖြစ်သည်ဟု PPNM က ပြောသည်။ PPNM ဦးဆောင် ကော်မတီဝင် ကိုသိုက်ထွန်းဦးက “မကျဆုံးခင်မှာ အကျဉ်းထောင် ပြင်ပမှာရှိတဲ့ ဆေးရုံကို တက်ရောက် ကုသခွင့် ရပါတယ်။ ဘာလို့လဲဆိုတော့ ထားဝယ်အကျဉ်းထောင်မှာ ထောင်ဆေးရုံ မရှိဘဲနဲ့ ဆရာ ဝန်လည်း မရှိဘူးပေါ့။ ဒါကြောင့်မို့လို့ ကျန်းမာရေး မကောင်းတဲ့လူ၊ နာတာရှည်သမားတွေ အတွက်ကတော့ ထောင်ထဲမှာ ကုသနိုင်တဲ့ အခြေအနေ မရှိတဲ့အတွက် ပြင်ပဆေးရုံကို ပို့ဆောင်ပြီးမှ ကုသခွင့်ရပြုနေရတဲ့ အခြေ အနေတစ်ခု ဖြစ်ပါတယ်ခင်ဗျာ။ အဲတော့ ဆုံးသွားတာကလည်း အကျဉ်းထောင်ပြင်ပမှာ ဆုံးသွားတယ်လို့ စုံစမ်း သိရှိရပါတယ် ခင်ဗျာ” ဟု ပြောသည်။ ၎င်းမှာ ရောဂါခံကြောင့် မသေဆုံးမီကတည်းက မကြာခဏ ဆေးကုသမှု ခံယူနေရပြီး အောက်တိုဘာလ ၃ ရက်နေ့၌ ရုတ်တရက် ရောဂါဖောက်၍ သေဆုံးခဲ့ရသည်ဟု ဆိုသည်။ အကျဉ်းထောင်တွင်းရှိ တာဝန်ရှိသူများ အနေဖြင့် အကျဉ်းသားများအား လုံလောက်သည့် ကျန်းမာရေး စောင်ရှောက်မှုကို အချိန်နှင့် တပြေးညီ ပေးရန်လိုအပ်နေသည်ဟု ကိုသိုက်ထွန်းဦးက အကြံပြုသည်။ “အဓိကအားဖြင့် ထောင်တွင်းသေဆုံးမှု လျော့ကျဖို့အတွက်ဆိုရင် လက်ရှိအခြေအနေမှာ လက်တွေ့ကျကျ ဆောင်ရွက်နိုင်မယ့်သူတွေက အကျဉ်းထောင် အောက်မှာ ရှိနေတဲ့ အကျဉ်းဦးစီး ဝန်ထမ်းတွေနဲ့ ထောင်ဆရာဝန် တွေ ဖြစ်ပါတယ်။ အဲတော့ အကျဉ်းထောင်ထဲမှာ လုံလောက်တဲ့ ကျန်းမာရေး စောင့်ရှောက်မှုကို ပေးမယ်။ အရေးပေါ် ဖြစ်နေတဲ့သူတွေကို ထောင်ပြင်ပဆေးရုံတွေကို အချိန်နဲ့ တပြေးညီ ပို့မယ်။ ရောဂါနည်းနည်း သက် သာလာရင် ထောင်ကို ခေါ်ပြန်တာထက်စာရင် ရောဂါပျောက်ကင်းနိုင်လောက်အောင် လုံးဝကင်းရှင်းသွား အောင်အထိ ကုသခွင့် ရရှိအောင် စီမံပေးတာမျိုးတွေပေါ့နော်။” ထို့အပြင် ကိုသိုက်ထွန်းဦးက “ပြီးတော့ ထောင်ထဲမှာပဲ အကျဉ်းသား အခွင့်အရေးပေါ့နော်။ ကျနော်တို့ ပိုပြီး တော့မှတော့ မတောင်း ပါဘူး။ အကျဉ်းသား အခွင့်အရေးကို ပြည့်ပြည့် ဝဝ ပေးဖို့ပေါ့နော်” ဟု အကြံပြုထား သည်။ ကိုအောင်ကိုဦးမှာ ၂၀၂၁ ခုနှစ် စစ်အာဏာသိမ်းသည့် အစောပိုင်းကာလများ အတွင်း ဦးဆောင်သပိတ် လှုပ်ရှား ခဲ့သူ တစ်ဦး ဖြစ်ပြီး ယင်းနှစ် မေလ ၁၄ ရက်နေ့၌ ဖောက်ခွဲရေး ပစ္စည်းများနှင့်အတူ ဖမ်းဆီးခံခဲ့ရခြင်း ဖြစ်သည်။ ထို့နောက် စစ်ကော်မရှင်က ပုဒ်မ ၅၀၅ - က/ ပေါက်ကွဲ - ၅ တို့ဖြင့် ထောင်ဒဏ် ၈ နှစ် ချမှတ်ခဲ့ပြီးနောက် လျှော့ ရက်များဖြင့် လွတ်ငြိမ်းချမ်းသာခွင့် ရမည့်ဆဲဆဲ အခြေအနေတွင် ထိခိုက်သေဆုံးခဲ့ရခြင်း ဖြစ်သည်။ တနင်္သာရီတိုင်းမှ နိုင်ကျဉ်းများအား ထားရှိသည့် ထားဝယ် အကျဉ်းထောင်တွင် အိုးဘို၊ သာယာဝတီ၊ သရက် စသည့်ထောင်များကဲသို့ အခြေအနေ ဆိုးရွားခြင်း မရှိဘဲ လက်ရှိ၌လည်း ထောင်ဝင်စာခွင့်ပြုသည့် အခြေအနေ ရှိသည်ဟု ထောင်နှင့် နီးစပ်သူများက ပြောသည်။

ထားဝယ်ထောင်တွင် နိုင်ကျဉ်းတစ်ဦး သေဆုံး

ပုလောက စစ်ကော်မရှင် စခန်းကို KNLA နှင့် ပူးပေါင်းအဖွဲ့ သိမ်းယူ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ ပုလောမြို့နယ်ထဲက ထမင်းမစားကျေးရွာတွင် ရှိနေသည့် စစ်ကော်မရှင်တပ်၏ စစ်ခန်းကို ကရင်အမျိုးသား လွတ်မြောက်ရေး တပ်မတော် KNLA နှင့် ပူးပေါင်းအဖွဲ့က တိုက်ခိုက်သိမ်းယူလိုက်သည်။ KNLA နှင့် ပူးပေါင်းအဖွဲ့က သိမ်းယူလိုက်သည့် စစ်တပ်စခန်းမှာ တနင်္သာရီတိုင်း မြိတ် - ထားဝယ်ခရိုင်၊ ပုလောမြို့နယ်၊ ထမင်းမစားကျေးရွာတွင် ရှိနေသည်ဟု စုပေါင်းထိုင်ထားသည့် စခန်းဖြစ်သည်။ အဆိုပါ စစ်ကော်မရှင်စခန်းကို KNLA နှင့် ပူးပေါင်းတပ်ဖွဲ့ စက်တင်ဘာလ ၈ ရက်နေ့တွင် တိုက်ခိုက် သိမ်းပိုက် နိုင်ခဲ့ခြင်း ဖြစ်သည်ဟု ကရင်အမျိုးသား အစည်းအရုံး KNU က ထုတ်ပြန်သည်။ ထမင်းမစားကျေးရွာတွင် အမှတ် ၂၈၀ ခြေလျင်တပ်ရင်း၊ အမှတ် ၃၀၉ အမြောက်တပ်ရင်းနှင့် အမှတ် ၁၂ တပ်မတော် လေ့ကျင့်ရေး သင်တန်းကျောင်းတို့က အင်အား ၄၀ ခန့်ဖြင့် တပ်စွဲထားခြင်း ဖြစ်သည်။ အဆိုပါ စစ်တပ်စခန်းကို KNLA၊ တပ်မဟာ(၄) လက်အောက်ခံ KNDO တပ်ရင်း (၇)၊ တပ်ခွဲ (၂)၊ တပ်ခွဲ (၅)၊ KNLA အထူးတပ်ဖွဲ့၊ ပုလောပြည်သူ့ကာကွယ်ရေး တပ်ဖွဲ့နှင့် တော်လှန်ရေး ပူးပေါင်းတပ်ဖွဲ့‌တို့က တိုက်ခိုက် သိမ်းပိုက်ခဲ့ခြင်း ဖြစ်သည်။ ထမင်းမစားကျေးရွာ စခန်းသိမ်း တိုက်ပွဲတွင် စစ်တပ်ဘက်က ထိခိုက်သေဆုံးမှု အချို့ရှိခဲ့သည့် အပြင် လက်နက်ခဲယမ်းများကိုလည်း သိမ်းယူရရှိခဲ့သည်ဟု KNU က ဆိုသည်။ မြိတ် - ပုလော - ထားဝယ် လမ်းပိုင်းတစ်လျှောက်တွင် စစ်ကော်မရှင်တပ်နှင့် KNLA ပူးပေါင်းအဖွဲ့တို့ကြား ထိတွေ့ တိုက်ပွဲများ ဆက်တိုက်ဖြစ်ပွားလျှက်ရှိသည်။

ပုလောက စစ်ကော်မရှင် စခန်းကို KNLA နှင့် ပူးပေါင်းအဖွဲ့ သိမ်းယူ  

ဖရူဆိုသို့ စစ်ကြောင်းထိုးလာသော စစ်ကော်မရှင်တပ်များ တိုက်ခိုက်ခံနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ကရင်နီပြည်၊ ဖရူဆိုမြို့နယ်ထဲသို့ စစ်ကြောင်းထိုးလာနေသည့် စစ်ကော်မရှင်တပ် တိုက်ခိုက်ခံရပြီး ထိခိုက် သေဆုံးမှုများ ရှိနေသည်။ ကရင်နီ တော်လှန်ရေး ပူးပေါင်းအဖွဲ့က စစ်ကော်မရှင် စစ်ကြောင်းကို ဟန့်တား တိုက်ခိုက်နေသဖြင့် မြေပြင်တွင် နှစ်ဖက်ကြား တိုက်ပွဲများ ပြင်းထန်နေသည်ဟု မြေပြင် သတင်းအရင်းအမြစ်က ပြောသည်။ ကရင်နီ တော်လှန်ရေး ပူးပေါင်းအဖွဲ့ တာဝန်ရှိသူတစ်ဦးက “သူတို့ ‘ကဒါးလား’ အထိတော့ ရောက်ပြီပေါ့နော်။ မနေ့က စဖြစ်တယ်။ တိုက်ပွဲတွေတော့ တောက်လျှောက် ဆက်ပြီးတော့ ဖြစ်နေသေးတယ်ပေါ့နော်” ဟု ပြော သည်။ နှစ်ဖက်ကြား တိုက်ပွဲမှာ ဩဂုတ်လ ၂၅ ရက်နေ့က စဖြစ်ခဲ့သည်ဟု ဆိုသည်။ ဩဂုတ်လ ၂၅ ရက်နေ့က တိုက်ခိုက်ခံရမှုထဲ စစ်သား ၃ ဦး သေဆုံးခဲ့သည့်အပြင် ၆ ဦး ထိမှန် ဒဏ်ရာ ရခဲ့သည်ဟု ကရင်နီ တော်လှန်ရေး ပူးပေါင်းတပ်ဘက်က ပြောသည်။ ဒီးမော့ဆိုမြို့နယ်ဘက်မှ ထိုးစစ်ဆင်လာသည့် အင်အားရာဂဏန်းပါရှိသော စစ်ကြောင်းသည် လက်ရှိတွင် ဖရူဆို မြို့မှ ၈ မိုင်ခန့် အကွာတွင်ရှိသော ထီးသော်ကူးနှင့် ကဒါးလားကျေးရွာထဲ၌ ဝင်ရောက်နေရာယူထားပြီး စစ်ရေး ဆက်လက်တင်းမာနေသည်ဟု ဆိုသည်။ ထို့အပြင် ဒီးမော့ဆိုမြို့နယ်ထဲ၌လည်း တိုက်ပွဲများ ဆက်လက်ပြင်းထန်နေပြီး စစ်ကော်မရှင်တပ်၏ ဒရုန်းနှစ်စီး ကို ကရင်နီ ပူးပေါင်းတပ်ဖွဲ့ဘက်က ဖျက်ဆီးနိုင်ခဲ့သည်။ ဒီးမော့ဆိုမြို့နယ်မှ ဖရူဆိုမြို့နယ်ဘက်ကို ပြည်ထောင်စု လမ်းမကြီးအတိုင်း စစ်ကော်မရှင်တပ်က စစ်ကြောင်း ထိုးနေခြင်း ဖြစ်သည်။ ကရင်နီ တော်လှန်ရေး တပ်ဖွဲ့ဝင်တစ်ဦးက “တိုက်ပွဲက ဆက်တိုက်ဖြစ်တော့ ချေမှုန်းရေးတက်တဲ့ အချိန် သူ့တို့ ဘက်က ထိခိုက်ကျဆုံးမှု နည်းနည်းရှိတယ်ပေါ့နော်။ လောလောဆယ် ကဒါးလား၊ ထီးသော်ကူး အထိတော့ သူတို့ နေရာယူထားတယ်ပေါ့နော်” ဟု ပြောသည်။ စစ်ကော်မရှင်တပ်ဘက်က သေဆုံးဒဏ်ရာရသူများကို ဆိုင်ကယ်ဖြင့် လာရောက်သယ်ဆောင်ကာ ဒီးမော့ဆိုမြို့ ဘက်သို့ ပြန်လည်ပို့ဆောင်ခဲ့သည်ဟု ဆိုသည်။ ဩဂုတ်လ ၂၅ ရက်နေ့တွင် ဖရူဆိုအခြေစိုက် စစ်ကော်မရှင် တပ်စခန်းသည် ပြည်သူများ အစုလိုက်အပြုံလိုက် မီးရှို့သတ်ဖြတ်ခံခဲ့ရသော ဖရူဆိုအနောက်ခြမ်းရှိ မိုဆိုကျေးရွာအနီးထဲ နေရာအထိ စစ်ကြောင်းထိုးလာခဲ့သည်ဟု ဒေသခံများက ပြောသည်။ ဖရူဆိုမြို့နယ်တွင် စစ်ကော်မရှင်တပ် လက်အောက်ခံ အမှတ် (၁၄) တန်းမြင့် စစ်ရေးလေ့ကျင့်ရေးကျောင်း အပြင် ခမရ - ၄၂၈၊ ခမရ - ၅၃၁ တို့ အခြေချ တပ်စွဲထားသည်။ ဒီးမော့ဆိုမြို့နယ်ဘက်မှ ထွက်လာသော အဆိုပါ စစ်ကြောင်းသည် ဆက်လက် စစ်ကြောင်းထိုးရန် ပြင်ဆင်နေပြီး ဘောလခဲ အထိ စစ်ကြောင်းထိုးနိုင်သည်ဟု စစ်ရေးလေ့လာသုံးသပ်သူများက ပြောသည်။ Photo - CJ ဖရူဆိုမြို့အတွင်း ဝင်ရောက်စစ်ကြောင်းထိုးနေသည့် စစ်ကောင်စီတပ်သားများ (ပုံဟောင်း )

ဖရူဆိုသို့ စစ်ကြောင်းထိုးလာသော စစ်ကော်မရှင်တပ်များ တိုက်ခိုက်ခံနေရ

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။ ကရင်နီပြည်၊ ဒီးမော့ဆိုမြို့ကို အပြည့်အဝ ပြန်လည်ထိန်းချုပ်နိုင်ပြီ ဖြစ်ကြောင်း စစ်ကော်မရှင်တပ်က ထုတ်ပြန် မှုမှာ ဝါဒဖြန့်ခြင်းသာ ဖြစ်သည်ဟု ကရင်နီတော်လှန်ရေးတပ်ဖွဲ့များက ပြောသည်။ ဒီးမော့ဆိုမြို့ကို ထိန်းချုပ်နိုင်ရေး စစ်ကော်မရှင်တပ်က ကြိုးပမ်းနေဆဲဖြစ်ပြီး မြေပြင်တွင် တိုက်ပွဲများ ပြင်းပြင်း ထန်ထန် ဖြစ်ပွားနေသည်ဟု ဒေသခံ ကာကွယ်ရေး တပ်ဖွဲ့များက ပြောသည်။ ဒီးမော့ဆိုမြို့နယ် ကာကွယ်ရေးတပ်မှ တပ်ဖွဲ့ဝင်တစ်ဦး “တစ်မြို့လုံးကို ထိန်းချုပ်နိုင်တာ မဟုတ်သေးဘူး။ အဓိက မြို့မနေရာကိုပဲ ရထားတာပါ။ ဒီအရှေ့ဘက်ကို တော်တော်ရထားတယ်။ အနောက်ဘက်မှာတော့ ဒေါငံ ခါးကနေ မားနာပလော့ထိ ရထားတယ်” ဟု ပြောသည်။ ‘ရန်နိုင်မင်း’ စစ်ဆင်ရေးအဖြစ် သြဂုတ်လ ၄ ရက်နေ့မှ ၁၉ ရက်နေ့အထိ ထိုးစစ်ဆင်ပြီး နောက် မြို့တစ်ခုလုံးကို ထိန်းချုပ်နိုင်ခဲ့ခြင်း ဖြစ်သည်ဟု စစ်ကော်မရှင်တပ်က ကြေညာခဲ့သည်။ သို့သော် မြေပြင်ရှိ တော်လှန်ရေး တပ်ဖွဲ့များ၏ ပြောပြချက်အရ မြို့မဧရိယာနှင့် အချို့သော နေရာများကိုသာ ထိန်းချုပ်ထားနိုင်သေးသည်ဟု ဆိုသည်။ ဒီးမော့ဆိုမြို့ အဝင်ဆိုင်းဘုတ်၊ ငွေတောင်ဆည်၊ မြို့နယ်ခန်းမ၊ ဆေးရုံနှင့် အထက်တန်းကျောင်း ရှေ့၌ ရိုက်ထား သော ဓါတ်ပုံများနှင့် အတူ စစ်ကော်မရှင်တပ်က မြို့ကို ထိန်းချုပ်လိုက်ပြီဟု ထုတ်ပြန်လာသည်။ အဆိုပါ ထုတ်ပြန်မှုမှာ ဝါဒဖြန့်ခြင်း သက်သက်သာဖြစ်ကြောင်း၊ သတင်းအမှားသာ ဖြစ်ကြောင်း မြေပြင် ရှိ သတင်းအရင်းအမြစ်များက ပြောသည်။ စစ်ကော်မရှင်တပ်သည် ဒေသအခြေစိုက် ခလရ ၁၀၂ နှင့် ခမရ ၄၂၇ တို့ကို အခြေစိုက်ကာ အင်အား ၃၀၀ ကျော် ဖြင့် ဒီးမော့ဆို အနောက်ဘက်ခြမ်းရှိ ဒေါငံခါးကျေးရွာဘက်သို့ စစ်ကြောင်း နှစ်ကြောင်းဖြင့် ဆက်လက် စစ်ကြောင်းထိုးနေသည်ဟု မြေပြင် သတင်းအရင်းအမြစ်က ပြောသည်။ ထို့အပြင် လေကြောင်း၊ လက်နက်ကြီး၊ တင့်ကားအပြင် အထူးသဖြင့် ဒရုန်းများကို အဓိက အသုံးပြုကာ မြို့ကို ပြန်လည်ရရှိရေး အပြင်းအထန် ကြိုးစားနေသည်ဟု ဒေသတွင်းရှိ ကာကွယ်ရေးတပ်ဖွဲ့များက ဆိုသည်။ စစ်ကော်မရှင်၏ ထုတ်ပြန်ချက်အရ သြဂုတ်လ ၄ ရက်နေ့တွင် ဒီးမော့ဆိုမြို့ မြောက်ဘက်ခြမ်းရှိ ရွှေယောက် ရပ်ကွက်နှင့် အရှေ့တောင်ဘက်ရှိ ပါဒေါဒူကျေးရွာတို့မှ စတင်ထိုးစစ်ဆင်ခဲ့သည်ဟု ဆိုသည်။ ထို့နောက် အောင်မင်္ဂလာ၊ စည်ပင်သာယာရပ်ကွက်များအပါအဝင် မြို့ပေါ်ရှိ ရဲစခန်း၊ ထွေအုပ်ရုံးစသည့် အစိုးရ ရုံးများကို ဆက်တိုက်သိမ်းပိုက်ကာ သြဂုတ်လ ၁၉ ရက်နေ့တွင် မြို့တစ်ခုလုံးကို အလုံးစုံသိမ်းပိုက်နိုင်ပြီဟု ထုတ် ပြန်ခဲ့ခြင်း ဖြစ်သည်။ စစ်ကော်မရှင်တပ်သည် အင်အားအလုံးအရင်းဖြင့် ရှမ်း - ကရင်နီ နယ်စပ်ရှိ မိုးဗြဲမြို့ကို ဇူလိုင်လ ၁၆ ရက်နေ့တွင် ပြန်လည် ထိန်းချုပ်နိုင်ခဲ့ပြီးနောက် ဒီးမော့ဆိုမြို့ကိုလည်း ပြန်လည် ထိန်းချုပ်နိုင်ရေး ကြိုးစားနေခြင်း ဖြစ်သည်။ ကယန်းအမျိုးသား တပ်မတော် (KNA) နိုင်ငံရေး ဦးဆောင်ကော်မတီမှ ခွန်းရဲခေါင်က “လက်နက်ကိုင် တော်လှန် ရေးမှာလည်း ကျနော်တို့ အားကောင်းတဲ့ အချိန်မှာ ရန်သူစိုးမိုးတဲ့ နယ်မြေတွေကို စိုးမိုးသိမ်းပိုက်ထားတာ ရှိ သလို၊ ကျနော်တို့ဘက်က အားနည်းလာတဲ့ အခါမှာ လည်း ရန်သူရဲ့ အလုံးအရင်းနဲ့ ဝိုင်းဝန်း ပိတ်ဆို့ပြီးတော့မှ တိုက်ခိုက်တာ ခံရပါတယ်၊ ဒါဟာ တော်လှန်စစ်ရဲ့ သဘော သဘာဝပဲ ဖြစ်ပါတယ်။ ဒီအတွက်ကြောင့် ရန်သူရဲ့ တိုးချဲ့လာတဲ့အပေါ်မှာ ကျနော်တို့ စစ်ရေးအရ ဘယ်လို တုံ့ပြန်ကြမလဲဆိုတာကို စဉ်းစား တိုင်ပင်ပြီးတော့မှ ရန်သူကို ချေမှုန်းနိုင်တဲ့ နည်းနာတွေကို စုစည်းပြီး ဒါကို ကျနော်တို့ တုံ့ပြန်သွားကြရမှာ ဖြစ်ပါတယ်” ဟု ပြောသည်။ ဖယ်ခုံ၊ မိုးဗြဲ၊ ဒီးမော့ဆိုမြို့တို့ကို ကရင်နီ တော်လှန်ရေး တပ်များက တစ်လေးလုံး စစ်ဆင်ရေးကာလ အတွင်း ထိန်းချုပ်ထားခဲ့ပြီးနောက် ဒေသခံများ နေရပ်သို့ ပြန်လည်နေထိုင်ခဲ့ကြသည်။ သို့သော် လက်ရှိ စစ်တပ်၏ ထိုးစစ်များကြောင့် မိုးဗြဲ၊ ဖယ်ခုံနှင့် ဒီးမော့ဆိုမြို့နယ်တို့ထဲမှ ဒေသခံ တစ်သောင်းခွဲ ကျော်မှာ ထပ်မံ ထွက်ပြေး တိမ်းရှောင်နေကြရသည်ဟု ကရင်နီပြည် ကြားကာလ အုပ်ချုပ်ရေး ကောင်စီ IEC နှင့် အကူtညီပေးနေသော အဖွဲ့အစည်းများက ပြောသည်။ ဒီးမော့ဆိုမြို့ ထိုးစစ်အတွင်း စစ်တပ်က အရပ်သားများကို လူသားဒိုင်းကာ အဖြစ် အသုံးပြုခဲ့ကြောင်း ကရင်နီ အမျိုးသားများ ကာကွယ်ရေးတပ် (KNDF) က သြဂုတ်လ ၁၈ ရက်နေ့တွင် ထုတ်ပြန်ခဲ့ပြီး လွိုင်ကော် - ဒီးမော့ဆို - ဖရူဆို ပြည်ထောင်စုလမ်းမကြီးနှင့် လမ်းသွယ်များကို အသုံးမပြုရန် ပြည်သူများကို သတိပေးထားသည်။ ယခုနှစ်ကုန်တွင် ကျင်းပမည်ဟု ထုတ်ပြန်ထားသော ရွေးကောက်ပွဲအတွက် စစ်ကော်မရှင်တပ်မှ နယ်မြေ စိုးမိုးမှု ပြန်လည်ရယူနေခြင်း ဖြစ်သည်။

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော

စစ်သင်္ဘောများ ဗန်းမော်ရောက်၊ တိုက်ပွဲများ ဆက်ဖြစ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၇ ရက်။ စစ်ကော်မရှင်တပ်၏ စစ်သင်္ဘောများ ကချင်ပြည်၊ ဗန်းမော်ကို ရောက်လာသည့် အချိန်တွင် မြေပြင်၌ တိုက်ပွဲ များ ဖြစ်နေသည်ဟု မြေပြင် အခြေအနေကို သိသော သတင်းအရင်းအမြစ်များက ပြောသည်။ ဧရာဝတီ မြစ်ကြောင်းအတိုင်း ဆန်တက်လာသည့် စစ်သင်္ဘောများမှာ ဗန်းမော်သို့ ဩဂုတ်လ ၁ ရက်နေ့၊ ည ၉ နာရီ အချိန်ခန့်တွင် ရောက်လာသည်ဟု ဆိုသည်။ မြေပြင်ရှိ ကာကွယ်ရေး တပ်ဖွဲ့ဝင်တစ်ဦးက “စစ်သင်္ဘောအုပ်စုက ဗန်းမော်ကိုသွားတဲ့ ဧရာဝတီ မြစ်ကြောင်း တလျှောက်မှာ ဆိုရင် ကျနော်တို့ တော်လှန်ရေးတပ်ဖွဲ့တွေရဲ့ တိုက်ခိုက်တာကို အကြိမ်ကြိမ်ခံခဲ့ရတယ်။ ဒီလို ခံခဲ့ရတဲ့ ကြားကနေပဲ ဗန်းမော်ကို ၁ ရက်နေ့က ရောက်လာတယ်။ ဗန်းမော်ကို ရောက်တာနဲ့ ဒီရောက်ရောက် ချင်းပေါ့ဗျာ သယ်လာတဲ့ လက်နက်တွေ၊ ရိက္ခာတွေ ချပေါ့။ ရိုးရိုးရောက်လာတာ မဟုတ်ဘူးနော်။ လေကြောင်း က ပစ်ကူ၊ လုံခြုံရေးတွေ မြေပြင်ထိုးစစ်တွေနဲ့ ရောက်လာတာ” ဟု ပြောသည်။ စစ်လက်နက် ရိက္ခာများ လာပို့သည့် စစ်ကော်မရှင်တပ်၏ စစ်သင်္ဘောများ ရောက်လာသည့်အချိန် ဩဂုတ်လ ၁ ရက်နေ့မှ ၄ ရက်နေ့အထိ မြေပြင်တွင် တိုက်ပွဲများ ဖြစ်ပွားနေသည်ဟု ဆိုသည်။ အဆိုပါ စစ်သင်္ဘော ရေယာဉ်တန်းမှာ ဗန်းမော်ကို ရောက်ရောက်ချင်း စစ်လက်နက် ရိက္ခာများ ချပေးခဲ့သည် မြေပြင်ရှိ ကာကွယ်ရေး တပ်ဖွဲ့ဝင်က ပြောသည်။ “ဗန်းမော်ကို ကျနော်တို့က ပိတ်ဆို့ထားတာ တော်တော်ကြာပြီလေနော်၊ ၇ လကျော်လောက် ရှိလာပြီဆိုတော့ သူတို့တပ်တွေအတွက် ပြောရရင်တော့ သူတို့လူတွေအတွက် ရိက္ခာ၊ အစားအစာ၊ ဆေးတို့၊ လက်နက်တို့ကို လာ ပို့ပေးတာလို့ပဲ ပြောရမှာပေါ့” ဟု ကာကွယ်ရေးတပ်ဖွဲ့ဝင်က ဆက်ပြောသည်။ ထိုသို့ စစ်လက်နက်ရိက္ခာများ ချပေးချိန်တွင် ဗန်းမော်ကမ်းနားတလျှောက်ရှိ ကျေးရွာများထဲ လက်နက်ကြီး/ငယ် များနှင့် ပစ်ခတ်ခဲ့သည်ဟု ဆိုသည်။ စစ်လက်နက်ရိက္ခာများ ချပေးနေသည့်အပြင် စစ်ကော်မရှင်တပ်က ခွန်သာ၊ တပ်ကလေး၊ ရွှေကျီးနားကျေးရွာ များထဲ ဝင်ရောက်နိုင်ရေးလည်း ကြိုးစားနေ သည်ဟု မြေပြင် သတင်းအရင်းအမြစ်က ပြောသည်။ အလားတူ ထိုစစ်သင်္ဘောအုပ်စုကို လုံခြုံရေး ယူပေးသည့် အနေဖြင့်လည်း လေကြောင်းမှ ကမ်းနားတဝိုက်နှင့် ကမ်းဘေးက ကျေးရွာများထဲကို ဗုံးကြဲတိုက်ခိုက်ခဲ့မှုများ ရှိခဲ့သည်ဟု ဆိုသည်။ စစ်ကော်မရှင်တပ်၏ လေကြောင်း ဗုံးကြဲတိုက်ခိုက်မှုထဲတွင် ဗန်းမော်ကျွန်းကြီးကျေးရွာက အမျိုးသမီးတစ်ဦး ထိမှန်သေဆုံးခဲ့သည်ဟု Banmaw Scout Team အဖွဲ့က ဆိုသည်။ ထိုစစ်သင်္ဘော ရေယာဉ်တန်းမှာ ဩဂုတ်လ ၄ ရက်နေ့တွင် အထက်ကို ဆက်လက် ဆန်တက်ရန် ကြိုးစားနေ သည့်အပြင် မြေပြင်၌လည်း ပစ်ခတ်မှုများ ဆက်ဖြစ်နေသည်ဟု ဆိုသည်။

စစ်သင်္ဘောများ ဗန်းမော်ရောက်၊ တိုက်ပွဲများ ဆက်ဖြစ်နေ

1 2 3 … 12 Next »

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm
Junta-Aligned Pa-O Militia Bans Residents from Leaving Villages — October 29, 2024 2:23 pm

Recent Posts

ဒိုက်ဦးထောင်တွင် နိုင်ကျဉ်း ၁၆ ဦးကို ခြေကျဉ်းဒေါက်များ ထည့်ထား
တနင်္သာရီတွင် လေကြောင်းတိုက်ခိုက်မှုကြောင့် အရပ်သား ၁၀ ဦးကျော် ဒဏ်ရာရ
ဖားကန့်တွင် ညမထွက်ရ အမိန့်ထုတ်ပြန်
၂၀၂၅ ခုနှစ် ငြိမ်းချမ်းရေး နိုဘယ်လ်ဆုရှင် မာရီယာ ကိုရီနာ မာချာဒို (သို့မဟုတ်) ဗင်နီဇွဲလား၏ သံမဏိ မိန်းမသား
မလေးရှား နိုင်ငံခြားရေး ဝန်ကြီး ခရီးစဉ်အပေါ် အာဆီယံ သတင်းထုတ်ပြန်

Archives

Archives

×Close