စစ်ကောင်စီ – Page 3 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကောင်စီ

ကချင် နယ်စပ် ဂိတ် အချို့ ပြန်လည် ဖွင့်လှစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ ကချင်လွတ်လပ်ရေးအဖွဲ့ KIO/KIA ထိန်းချုပ်ရာ လွယ်ဂျယ်၊ လိုင်ဇာ၊ မိုင်ဂျာယန် နယ်စပ်ဂိတ် ၃ ခု ပြန်လည် ဖွင့်လှစ်လိုက်သည်ဟု ဒေသခံများက ပြောသည်။ KIO/KIA က ထိန်းချုပ်ထားသည့် မြန်မာ-တရုတ်နယ်စပ်ဂိတ်များအနက် လွယ်ဂျယ်၊ လိုင်ဇာ (နားဘန်း) နှင့် မိုင်ဂျာယန် နယ်စပ်ဂိတ် (၃) ခုကို တရုတ် အာဏာပိုင်များနှင့် ညှိနှိုင်းကာ အောက်တိုဘာလ ၂၅ ရက်နေ့မှစ၍ ပြန်လည်ဖွင့်လှစ်လိုက်ပြီဖြစ်ကြောင်း KIA က သတင်းမီဒီယာများကို အတည်ပြု ပြောကြားသည်။ ဒေသခံ ပြည်သူလူထု အတွက် အဓိကလိုအပ်သည့် စားသုံးကုန်ပစ္စည်းများကို တရုတ်နိုင်ငံဘက်မှ တင်သွင်းရန် နှင့် မြန်မာဘက်မှ ငှက်ပျောအပါအဝင် သစ်သီးဝလံနှင့် သီးနှံများကို ပြန်တင်ပို့နိုင်ရန် တရုတ်ဘက်နှင့် ညှိနှိုင်းပြီး ပြန်ဖွင့်ခြင်းဖြစ်ကြောင်း ဒေသခံများက ပြောသည်။ လိုင်ဇာဒေသခံ အမျိုးသားတစ်ဦး က “လိုင်ဇာ နယ်စပ်ဂိတ် လွတ်လွတ်လပ်လပ်ကြီးတော့ မဟုတ်ပေမဲ့ လူအဝင် အထွက်တော့ ရပြီ။ တရုတ်ဘက်က ဆောက်လုပ်ရေး ပစ္စည်းတွေ သယ်ယူလို့ ရသလို မြန်မာဘက်ခြမ်းက လူတွေလည်း သွားလို့ရပြီ” ဟု ပြောသည်။ လက်ရှိတွင် ပြန်လည်ဖွင့်လှစ်သည့် ဂိတ်သုံးခုမှာ (လွယ်ဂျယ်၊ လိုင်ဇာ၊ မိုင်ဂျာယန်) မှလွဲ၍ KIA ထိန်းချုပ်ထား သည့် ကန်ပိုက်တီမြို့နယ် နယ်စပ်ဂိတ်နှင့် မံစီမြို့နယ်ထဲက မန့်ဝိန်းကြီးဂိတ်တို့ကမူ လတ်တလော ပြန်မဖွင့် သေးဘူးဟု ဒေသခံများ၏ ပြောပြချက်အရ သိရသည်။ ကျန်ရှိသည့် နယ်စပ်ဂိတ်များ ပြန်ဖွင့်နိုင်ရန် KIO/KIA တာဝန်ရှိသူများက တရုတ်နှင့် ဆက်လက် ဆွေးနွေးညှိနှိုင်း နေကြောင်း ဒေသခံများက ပြောသည်။ လိုင်ဇာနှင့် မိုင်ဂျာယန် နယ်စပ်ဂိတ်များ ပြန်လည်ဖွင့်လှစ်လိုက်သည့် အောက်တိုဘာလ ၂၅ ရက်နေ့မှ စတင်၍ လူအဝင်အထွက်နှင့် ကုန်စည်အချို့ သယ်ဆောင်မှုများ စတင်ခဲ့ပြီဖြစ်ကြောင်း ဒေသခံများက အတည်ပြုသည်။ အခြား ဒေသခံ အမျိုးသားတစ်ဦး ကလည်း နယ်စပ်ဂိတ်အနီး အခြေအနေကို “လိုင်ဇာ နယ်စပ်ဂိတ်မှာတော့ လူအဝင်အထွက်လုပ်နေပြီ။ ဒီဘက်ခြမ်းက လူတွေလည်း သွားကြတယ်။ တရုတ်ဘက်ခြမ်းက လူတွေလည်း လာကြတယ်။ ကုန်ပစ္စည်းနဲ့ ပတ်သက်တာတော့ ဘယ်လိုလဲတော့ မသိဘူး” ဟု ဆိုသည်။ လက်ရှိတွင် မြန်မာဘက်ခြမ်းမှ နယ်စပ်ဖြတ်ကျော် လိုသူများအတွက် လိုအပ်သည့် နယ်စပ်ဖြတ်ကျော်ခွင့် အထောက်အထား (Border Pass) အတွက် ညှိနှိုင်းနေဆဲဖြစ်ကြောင်း သိရသည်။ KIO/KIA က လိုင်ဇာနှင့် မိုင်ဂျာယန် နယ်စပ်ဂိတ်များ ပြန်လည်ဖွင့်လှစ်သည့် အောက်တိုဘာ ၂၅ ရက်မှ နိုဝင်ဘာ ၁ ရက်နေ့အထိ နယ်စပ်ဂိတ်မှ လူအဝင်အထွက်နှင့် ကုန်စည်သယ်ဆောင်မှု အခြေအနေကို နေ့တိုင်း ညနေ ၆ နာရီထက် နောက်မကျဘဲ ကချင်လွတ်လပ်ရေး ကောင်စီ (KIC) ရုံးသို့ အချိန်မီ တင်ပြရန် ညွှန်ကြားစာ ထုတ်ထားသည်။ KIO/KIA သည် ၂၀၂၄ ခုနှစ် မတ်လမှ စတင်၍ ကချင်ဒေသထဲရှိ စစ်တပ်စခန်းများကို ထိုးစစ်ဆင်ခဲ့ပြီး၊ ၂၀၂၄ နှစ်ကုန်ပိုင်းတွင် လွယ်ဂျယ်မြို့နှင့် နယ်စပ်ဂိတ်ကို ထိန်းချုပ်နိုင်ခဲ့ကာ ၂၀၂၅ ဇန်နဝါရီလတွင် မံစီမြို့နှင့် နိုဝင်ဘာလတွင် ကန်ပိုက်တီမြို့တို့ကို ဆက်လက်သိမ်းပိုက်ခဲ့သည်။

ကချင် နယ်စပ် ဂိတ် အချို့ ပြန်လည် ဖွင့်လှစ်

နမ္မတူ မြေပြင်နှင့် လေကြောင်း တိုက်ခိုက်မှုများကြောင့် ဒေသခံ ၅၀၀ ကျော် ထွက်ပြေး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ ရှမ်းပြည် မြောက်ပိုင်း၊ TNLA ထိန်းချုပ်ထားသည့် နမ္မတူမြို့သည် ယခုလအတွင်း စစ်ကော်မရှင်တပ်၏ ပြင်းထန် သော တိုက်ခိုက်မှုများနှင့် ရင်ဆိုင်နေရပြီး၊ လေကြောင်းတိုက်ခိုက်မှု ၅ ကြိမ်အထိ ကြုံတွေ့ခဲ့ရသည်။ အောက်တိုဘာလ ၂၃ ရက်နေ့၊ ညပိုင်းက နမ္မတူမြို့ပေါ်ကို စစ်တပ်က ဂျက်တိုက်လေယာဉ်ဖြင့် ဗုံးထပ်မံကြဲချခဲ့ ခြင်း ဖြစ်သည်။ ယခင်တိုက်ခိုက်မှုများတွင် ကလေးအပါအဝင် အရပ်သား ၃ ဦး သေဆုံးခဲ့ပြီး၊ နေအိမ်၊ စာသင်ကျောင်းနှင့် ဘုန်းကြီးကျောင်းများ ပျက်စီးခဲ့သည်ဟု သိရသည်။ လက်ရှိတွင် စစ်ကောင်စီတပ်က နမ္မတူမြို့ဘက်သို့ မြေပြင်ထိုးစစ်များပါ ဆင်နွှဲလာနေသဖြင့် ဒေသခံ ၅၀၀ ကျော်ခန့် ထပ်မံ ထွက်ပြေးတိမ်းရှောင်နေရသည်။ တိုက်ပွဲများကြောင့် သတင်းအချက်အလက်နှင့် ဆက်သွယ်ရေးများပါ ပြတ်တောက်နေသဖြင့် စစ်ဘေးရှောင်များ အတွက် လူသားချင်းစာနာမှု အကူအညီများ အရေးတကြီး လိုအပ်နေကြောင်း အကူအညီပေးနေသူများက ပြော သည်။

နမ္မတူ မြေပြင်နှင့် လေကြောင်း တိုက်ခိုက်မှုများကြောင့် ဒေသခံ ၅၀၀ ကျော် ထွက်ပြေး  

စွယ်တော်ကုန်းစခန်းကို စစ်တပ် ပြန်လည်ထိန်းချုပ်ထားသော်လည်း လေးကေကော်ကိုမူ မထိန်းချုပ်နိုင်သေး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၁ ရက်။ ကရင်ပြည်နယ်၊ မြဝတီမြို့နယ်၊ လေးကေကော်မြို့သစ် အနီးရှိ စစ်ရေးအရ အရေးပါသော စွယ်တော်ကုန်းစခန်း ကို စစ်တပ်က ပြန်လည် ထိန်းချုပ်လိုက်ပြီ ဖြစ်သော်လည်း မြို့ကိုမူ အပြည့်အဝ ထိန်းချုပ်နိုင်ခြင်း မရှိသေးပေ။ အဆိုပါစခန်းကို စစ်ကော်မရှင်တပ်က အောက်တိုဘာလ (၁၈) ရက်နေ့တွင် ပြန်ထိန်းချုပ်ခဲ့ခြင်းဖြစ်သည်ဟု ကရင်အမျိုးသား လွတ်မြောက်ရေးတပ် (KNLA) စစ်ရေး အရင်းအမြစ်များက ပြောသည်။ KNLA နှင့် ပူးပေါင်းတပ်များက တစ်နှစ်ကြာ ထိန်းချုပ်ထားခဲ့ပြီးနောက် မြဝတီတောင်ပိုင်းကို စစ်ကြောင်း ထိုးခြင်းဖြင့် ပြန်လည်ရယူခဲ့ခြင်းဖြစ်သည်။ ထို့အပြင် လေးကေ့ကော်မြို့သစ် ရပ်ကွက် (၄) ကိုပါ စစ်ကော်မရှင်တပ်က ဝင်ရောက်လာနေသည်ဟု မြေပြင် သတင်းအရင်းအမြစ်က ပြောသည်။ စစ်ကော်မရှင်တပ်သည် ကရင်နယ်ခြားစောင့်တပ် (BGF) နှင့် ပူးပေါင်း၍ အောက်တိုဘာလဆန်းမှစ၍ လေးကေကော်ဒေသကို ထိုးစစ်ဆင်လာခဲ့ခြင်း ဖြစ်သည်။ စွယ်တော်ကုန်းသည် မြဝတီတစ်မြို့လုံးကို အပေါ်စီးမှ မြင်ရသဖြင့် စစ်ရေးဗျူဟာအရ အထူးအရေးပါသော စခန်းဖြစ်သည်။ သို့သော် တော်လှန်ရေးပူးပေါင်းတပ်များက စခန်းကို သိမ်းယူပြီးနောက် စစ်ကော်မရှင်တပ် တပ်စွဲမထားနိုင်ရန် တောင်ကြော တစ်ခုလုံးကို မြေအပြောင်းရှင်းပြီး ကွင်းပြင်အဖြစ် ပြုလုပ်ထားခဲ့သည်ဟု တော်လှန်ရေးတပ်ဖွဲ့ တာဝန်ရှိသူက ပြောသည်။ ထို့ကြောင့် စစ်ကော်မရှင်တပ်သည် စွယ်တော်ကုန်းကို ပြန်လည်ထိန်းချုပ်နိုင်ခဲ့သော်လည်း ထိုနေရာ၌ တပ်စွဲနေထိုင်နိုင်ခြင်းတော့ မရှိသေးကြောင်း ဆိုသည်။ စစ်ကော်မရှင်တပ်သည် စွယ်တော်ကုန်းစခန်းနှင့် မြို့သစ် ရပ်ကွက်အချို့ကို ပြန်လည်ထိန်းချုပ်နိုင်ခဲ့သော်လည်း လေးကေကော်မြို့ တစ်မြို့လုံးကို အပြည့်အဝ ထိန်းချုပ်နိုင်ခြင်းမျိုးတော့ မရှိသေးကြောင်း သိရသည်။ လတ်တလောတွင် စစ်ကော်မရှင်တပ်/BGF ပူးပေါင်းတပ်များသည် လေးကေကော်ဒေသအပြင် ဖလူး၊ မင်းလက်ပံ၊ အင်ကြင်းမြိုင်စသည့် ဒေသများကို စစ်ဆင်နေသည်။ အလားတူ KNLA နှင့် ပူးပေါင်းတပ်များကလည်း အနီးပတ်ဝန်းကျင်နေရာများမှ နေ၍ တန်ပြန်ဖြတ်တောက် တိုက်ခိုက်နေဆဲဖြစ်သည်။ အဆိုပါ တိုက်ပွဲများထဲ မြေပြင်၌ နှစ်ဖက် ထိခိုက်ကျဆုံးမှုများ ရှိနေသည်။

စွယ်တော်ကုန်းစခန်းကို စစ်တပ် ပြန်လည်ထိန်းချုပ်ထားသော်လည်း လေးကေကော်ကိုမူ မထိန်းချုပ်နိုင်သေး  

ရွေးကောက်ပွဲကို “ဝ” ထောက်ခံမည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၈ ရက်။ ‘ဝ’ ပြည် သွေးစည်းညီညွတ်ရေး တပ်မတော် (UWSA) က စစ်ကော်မရှင်က ကျင်းပမည့် ရွေးကောက်ပွဲကို အားပေးထောက်ခံသွားမည် ဖြစ်ကြောင်း တရားဝင် ပြောလိုက်သည်။ UWSA ၏ လားရှိုးမြို့ ဆက်ဆံရေးရုံး တာဝန်ခံ ဦးညီရမ်း က အောက်တိုဘာလ ၁၅ ရက်နေ့တွင် နေပြည်တော်၌ ကျင်းပခဲ့သော တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး စာချုပ် (NCA) လက်မှတ်ရေးထိုးခြင်း (၁၀) နှစ်ပြည့် အခမ်းအနားတွင် သတင်းမီဒီယာများ၏ မေးမြန်းမှုကို ဖြေကြားရင်း အတည်ပြုခဲ့ခြင်း ဖြစ်သည်။ ဦးညီရမ်းက ၎င်းတို့ ဗဟိုဌာနချုပ်အနေဖြင့်လည်း ရွေးကောက်ပွဲကို အားပေးထောက်ခံသွားမည် ဆိုသည့် သဘောထားကို ထုတ်ပြန်ခဲ့ပြီးဖြစ်ကြောင်း အလေးထား ပြောကြားခဲ့သည်။ “ဒီရွေးကောက်ပွဲကို ကျနော်တို့ ‘ဝ’ အဖွဲ့အနေနဲ့ အားပေးထောက်ခံသွားမယ်ဆိုတဲ့ message ကျနော်တို့ ပေးလို ပါတယ်။ တခြားမီဒီယာတွေ တချို့ရေးတာတွေက အဲဒါမမှန်ပါဘူး။ ကျနော်တို့ ‘ဝ’ အဖွဲ့ ‘UWSA’ ရဲ့ ရွေးကောက်ပွဲနဲ့ ပတ်သက်ပြီးမှ ကျနော်တို့ အားပေး ထောက်ခံသွားမယ်ဆိုတဲ့ သဘောထားပဲ ကျနော်ပေးလို ပါတယ်” ဟု ဦးညီရမ်းက ပြောသည်။ ရှမ်းမြောက်ဒေသနှင့် ပတ်သက်သည့် အခြားကိစ္စရပ်များမှာ တစ်ကဏ္ဍဖြစ်ပြီး၊ ရွေးကောက်ပွဲကို ထောက်ခံခြင်း မှာမူ UWSA ၏ သဘောထားဖြစ်ကြောင်း ၎င်းက ရှင်းပြခဲ့သည်။ UWSA ၏ လက်ရှိ ရပ်တည်ချက်သည် ယခင် သမ္မတ ဦးသိန်းစိန်နှင့် အမျိုးသား ဒီမိုကရေးစီ အဖွဲ့ချုပ် NLD အစိုးရ လက်ထက်များက ရွေးကောက်ပွဲ ကျင်းပခွင့်ကို တောက်လျှောက် ငြင်းဆန်ခဲ့ဖူးသည့် အခြေအနေနှင့် ကွဲလွဲနေသည်။ ထိုစဉ်က UWSA ထိန်းချုပ်နယ်မြေများ ဖြစ်သော ဟိုပန်နှင့် ပန်လုံတို့တွင် ရွေးကောက်ပွဲကျင်းပရန် ခွင့်ပြု တောင်းဆိုချက်များကို UWSA က ပယ်ချခဲ့သည်။ ထို့ကြောင့် ယခု စစ်ကော်မရှင်၏ ရွေးကောက်ပွဲကို ထောက်ခံသော်လည်း၊ ၎င်းတို့ ထိန်းချုပ်နယ်မြေများအတွင်း ရွေးကောက်ပွဲ ကျင်းပခွင့် ပြု၊ မပြု ဆိုသည့် မေးခွန်းများ ကြီးမားနေဆဲဖြစ်သည်။ ဦးညီရမ်းကမူ နယ်မြေအတွင်း ကျင်းပခွင့်ကိစ္စကို ရှင်းရှင်းလင်းလင်း မဖြေကြားခဲ့ပေ။ စိတ်ဝင်စားဖွယ် အချက်မှာ ပြီးခဲ့သည့် စက်တင်ဘာလကပင် UWSA ထိန်းချုပ်ဒေသဖြစ်သည့် ဟိုပန်နှင့် ပန်လုံမြို့များတွင် စစ်ကော်မရှင်က စည်းရုံးရေးဆင်းခြင်း၊ မဲဆွယ်ခြင်းမျိုး တွေ့ရှိပါက တရားစီရင်ရေးဌာနကို တိုင်ကြားနိုင်ကြောင်း ‘ဝ’ လူငယ့်အသံ က ဖော်ပြခဲ့ဖူးခြင်း ဖြစ်သည်။ စစ်ကော်မရှင်၏ ပထမအသုတ် ရွေးကောက်ပွဲ ကျင်းပမည့် မြို့နယ် ၁၀၂ မြို့နယ် စာရင်းတွင်လည်း UWSA ထိန်းချုပ်ဒေသဖြစ်သည့် ဟိုပန်မြို့နယ်နှင့် အခြားနယ်မြေများ ပါဝင်ခြင်း မရှိသေးပေ။ စစ်ကော်မရှင်က ရွေးကောက်ပွဲများကို အပိုင်းလိုက်ခွဲ၍ လာမည့် ဒီဇင်ဘာလ ၂၈ ရက်နေ့တွင် စတင်ကျင်းပ မည်ဟု ထုတ်ပြန်ထားသည်။ UWSA ၏ ယခုကဲ့သို့ ရွေးကောက်ပွဲ အပေါ် ထောက်ခံချက်သည် တရုတ်နိုင်ငံ၏ ဖိအားများကြောင့် ဖြစ်နိုင် ကြောင်း လေ့လာစောင့်ကြည့်သူများက သုံးသပ်ကြသည်။ UWSA ၏ ယခုရပ်တည်ချက်သည် လက်ရှိ မြန်မာ့နိုင်ငံရေး အခြေအနေနှင့် တော်လှန်ရေး အင်အားစုများ အပေါ် မည်သို့ သက်ရောက်မှုရှိလာမည်ကို စောင့်ကြည့်ရမည် ဖြစ်သည်။

ရွေးကောက်ပွဲကို “ဝ” ထောက်ခံမည်

စစ်ကော်မရှင် စစ်ကြောင်းကို DNLA ၏ ဒူကရ စစ်ကြောင်းက တိုက်ခိုက်၊ စစ်ကော်မရှင် စစ်သား ၅ ဦးသေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၆ ရက်။ ထားဝယ်တွင် လက်နက်ခဲယမ်းပို့ စစ်ကော်မရှင်တပ်ဖွဲ့ကို “ဓဝယ် အမျိုးသား လွတ်မြောက်ရေး တပ်တော် (DNLA)” ၏ ဒူကရ စစ်ကြောင်းက တိုက်ခိုက်ခဲ့ရာ စစ်သား ၅ ဦး သေဆုံးခဲ့သည်။ ထားဝယ်ခရိုင်၊ ထားဝယ်မြို့နယ်၊ မောင်မယ်ရှောင်ကျေးရွာအနီးတွင် အောက်တိုဘာလ ၁၃ ရက်နေ့က ရေဖြူမြို့ ဘက်သို့ လက်နက်ခဲယမ်းများ ပို့ဆောင်ရန် ထွက်ခွာလာသည့် စစ်ကော်မရှင်တပ်၏ အင်အား ၁၀၀ ခန့်ပါ စစ်ကြောင်းသည် ဒူကရစစ်ကြောင်း၏ တိုက်ခိုက်မှုကို ခံခဲ့ရခြင်း ဖြစ်သည်။ ထိုတိုက်ခိုက်မှုကြောင့် စစ်ကော်မရှင်တပ်ဘက်မှ ၅ ဦး သေဆုံးခဲ့ပြီး ဒူကရစစ်ကြောင်းဘက်မှ ထိခိုက်မှုမရှိဘဲ ဆုတ်ခွာနိုင်ခဲ့ကြောင်း ဒေသခံရွာသားများနှင့် တာဝန်ရှိသူများက ပြောသည်။ အဆိုပါ စစ်ကော်မရှင် စစ်ကြောင်းသည် ဇဟာကျေးရွာ အခြေစိုက် အမှတ် ၃၀၂ အမြောက်တပ်မှ ထွက်ခွာလာ ခြင်း ဖြစ်သည်။ ဒူကရစစ်ကြောင်း တာဝန်ရှိသူတစ်ဦးက “တိုက်ခိုက်မှုထဲမှာ လက်နက်ကြီးနဲ့ အသုံးချပစ်ခတ်တာမျိုး မရှိပါဘူး။ စစ်ကော်မရှင်တပ်ဘက်က ငါးယောက် သေဆုံးသွားတယ်” ဟု ပြောသည်။ တိုက်ခိုက်မှုဖြစ်ပွားပြီးနောက် အောက်တိုဘာလ ၁၄ ရက်နေ့ နံနက်အစောပိုင်းတွင် စစ်ကော်မရှင် တပ်ဖွဲ့ဝင်များ သည် မောင်မယ်ရှောင်ကျေးရွာ အတွင်းသို့ ဝင်ရောက်နေရာယူခဲ့ကြောင်း ၎င်းက ဆက်ပြောသည်။ မောင်မယ်ရှောင်ကျေးရွာသည် ရေး - ထားဝယ်သွား ကားလမ်းမကြီးပေါ်တွင် တည်ရှိပြီး ထားဝယ်မြို့နှင့် နီးကပ်သော ရွာကြီးတစ်ရွာဖြစ်သည်။ မကြာခဏဆိုသလို နှစ်ဖက်ထိတွေ့တိုက်ပွဲများ ဖြစ်ပွားခြင်းနှင့် စစ်ကော်မရှင်တပ်ဖွဲ့မှ နေအိမ်များကို မီးရှို့ဖျက်ဆီးခြင်းများကြောင့် ရွာသားများမှာ ရွာလုံးကျွတ် ထွက်ပြေးတိမ်းရှောင်နေကြရသည်မှာ တစ်နှစ်ကျော် ပြီ ဖြစ်ကြောင်း ဒေသခံများက ပြောသည်။

စစ်ကော်မရှင် စစ်ကြောင်းကို DNLA ၏ ဒူကရ စစ်ကြောင်းက တိုက်ခိုက်၊ စစ်ကော်မရှင် စစ်သား ၅ ဦးသေ

ဖားကန့်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၁ ရက်။ ကချင်ပြည်ရှိ မြန်မာနိုင်ငံ၏ အဓိက ကျောက်စိမ်းထွက်ရာ ဒေသဖြစ်သော ဖားကန့်မြို့နယ် တွင် စစ်ကော်မရှင် တပ်ဖွဲ့က ညမထွက်ရအမိန့် နှင့် လူငါးဦးထက် ပိုမစုရအမိန့် များကို ထပ်မံထုတ်ပြန်လိုက်ကြောင်း ဒေသခံများက ပြောသည်။ ဖားကန့် ဒေသခံ အမျိုးသားတစ်ဦးက “၁၄၄ မထုတ်တာတောင် ဖမ်းဆီးတာ၊ စစ်ဆေးတာ၊ ပစ်သတ်တာတွေက ဆက်တိုက်ဆိုတော့ အခုက ပိုဆိုးမှာပေါ့ဗျာနော်။ အခု ဒီလိုလိုက်တော့ ဥပဒေမဲ့လုပ်နေရာကနေ ဥပဒေအရ လုပ်တာဆိုပြီး အဖမ်းခံတာ၊ ပစ်သတ်ခံရတာ တွေ ပိုများလာမှာပေါ့ဗျာ” ဟု ပြောသည်။ ညရေးညတာ ကိစ္စများ ပေါ်လာပါက အခက်ကြုံနိုင်သည်ဟု လည်း ပြောသည်။ “ညဘက်တွေမှာ တိုက်ပွဲတွေ ရုတ်တရက် ဖြစ်လာရင်ပေါ့ လူနာတွေကို အရေးပေါ် အခြေအနေအရ ကယ်ဆယ်ရေးလုပ်ဖို့ ကူညီဖို့ ပိုခက်ခဲသွားမယ်။ သွားကယ်တဲ့လူကအစ အဖမ်းခံရတာမျိုး ပစ်သတ်ခံရတာမျိုး တွေ ဖြစ်လာမှာပေါ့နော်” ဟု အဆိုပါ ဒေသခံက ဆက်ပြောသည်။ ဖားကန့်မြို့နယ် (အုပ်ချုပ်ရေးမှူး) က လက်မှတ်ရေးထိုးထားသော အဆိုပါ အမိန့်ကို ရာဇဝတ်ကျင့်ထုံး ဥပဒေပုဒ်မ ၁၄၄ အရ ၂၀၂၅ ခုနှစ်၊ အောက်တိုဘာလ ၈ ရက်နေ့ တွင် စတင် အသက်သွင်းခဲ့သည်။ အဆိုပါ ညမထွက်ရအမိန့် ကို ည ၁၀ နာရီမှ နံနက် ၄ နာရီအထိ သတ်မှတ်ထားသည်။ ယင်းအမိန့်သည် ဖားကန့်မြို့နယ်အတွင်း စစ်ရေးတင်းမာမှုများ ဆက်လက်မြင့်တက်နေဆဲ ဖြစ်ကြောင်းကို ပြသ နေသည်။ KIO/KIA သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက “သူတို့ကတော့ အခု ရွေးကောက်ပွဲလည်း နီးလာပြီဆိုတော့ ရွေးကောက်ပွဲနယ်မြေတွေ၊ မဲဆွယ်နယ်မြေတွေ ပိုပြီးမှ တိုးချဲ့နိုင်ဖို့အတွက် လက်လွှတ်ဆုံးရှုံး ခဲ့တဲ့ စခန်းဟောင်းတွေ နေရာဟောင်းတွေ ပြန်ရနိုင်ဖို့အတွက် ကြိုးစားတဲ့ အနေနဲ့ အခုလိုမျိုး ၁၄၄ တွေ ချတာ နေမှာ။ တိုက်ပွဲကို မထိန်းနိုင်လို့ ပြည်သူလူထုဘက်ကို လှည့်ပြီးမှ အဲ့လိုမျိုး လုပ်တာပဲလို့ ကျနော်ကတော့ သုံးသပ်ပါတယ်” ဟု ပြောသည်။ ထို့အပြင် မြို့နယ်အတွင်းရှိ လမ်းမများ၊ လမ်းသွယ်များနှင့် အများပြည်သူနှင့် သက်ဆိုင်သော နေရာများတွင် လူငါးဦး သို့မဟုတ် ငါးဦးထက် ပိုမို၍ စုဝေးခြင်းကို လုံးဝ မပြုလုပ်ရဟု ဆိုသည်။ စုဝေးခြင်း၊ ဟောပြောခြင်း၊ ဖျက်ဆီးခြင်းနှင့် ရုန်းရင်းဆန်ခတ်ပြုမူခြင်းမျိုး မှန်သမျှကိုလည်း တားမြစ်ထားသည်။ ထိုအမိန့်ကို မလိုက်နာပါက တည်ဆဲဥပဒေများ အရ အရေးယူခံရမည် ဖြစ်ကြောင်း ထုတ်ပြန်ချက်တွင် ဖော်ပြ ထားသည်။ ဗိုလ်မှူးကြီးနော်ဘူက “၁၄၄ ထုတ်တာပဲ ဖြစ်ဖြစ်၊ မထုတ်တာပဲ ဖြစ်ဖြစ် ပြည်သူလူထုကို ပစ်ခတ်တာတွေ၊ ဖမ်း ဆီးတာတွေ စစ်ဆေးတာတွေ အများကြီး လုပ်နေတာ။ ဒါပေမယ့် အဲ့ဒီ ၁၄၄ ထုတ်ပြီ ဆိုလို့ရှိရင်တော့ ပိုပြီးမှ သတိထားဖို့ လိုတာပေါ့နော်” ဟု ပြောသည်။ အမိန့်ထုတ်ပြန်ရခြင်း၏ တရားဝင်အကြောင်းပြချက်အဖြစ် စစ်ကော်မရှင်ဘက်မှ ဒေသတွင်း ရာဇဝတ်မှုများနှင့် လုယက်မှုများ များပြားလာခြင်းကြောင့် လုံခြုံရေးထိန်းသိမ်းရန်ဟု ဆိုသည်။ သို့သော် နိုင်ငံရေး လေ့လာသူများနှင့် ဒေသခံများ၏ သုံးသပ်ချက်မှာ မတူညီပေ။ ဖားကန့်မြို့နယ်သည် ကချင်လွတ်လပ်ရေး တပ်မတော် (KIA) နှင့် ပြည်သူ့ကာကွယ်ရေး တပ်ဖွဲ့ (PDF) ပူးပေါင်း တပ်များ၏ ထိုးစစ်ဒဏ်ကို အပြင်းအထန် ခံနေရသောဒေသ ဖြစ်သည်။ စစ်ကော်မရှင်တပ်အနေဖြင့် စစ်ရေးဖိအားကြောင့် လုံခြုံရေးကို အပြင်းအထန် တင်းကျပ်နေရသည်ဟု သုံးသပ်မှု များ ရှိနေသည်။ နိုင်ငံရေးလေ့လာသူများက ဤအမိန့်သည် အရပ်သား ပြည်သူများ၏ လှုပ်ရှားမှုကို ထိန်းချုပ်ရန် နှင့် စစ်ကော်မရှင်တပ်၏ စစ်ရေးလှုပ်ရှားမှုများကို ပိုမို လွယ်ကူစေရန် ရည်ရွယ်ပြီး ထုတ်ပြန်ခြင်း ဖြစ်ကြောင်း ဝေဖန်သုံးသပ်ထားသည်။ ဖားကန့်မြို့နယ်ရှိ ဒေသခံများမှာမူ ညမထွက်ရ အမိန့်ကြောင့် လုပ်ငန်းဆောင်တာများနှင့် လူမှုရေးကိစ္စရပ်များ တွင် အခက်အခဲများစွာနှင့် ရင်ဆိုင်ရနိုင်ပြီး လုံခြုံရေး အခြေအနေအတွက် စိုးရိမ်ပူပန်မှုများ မြင့်တက်နေသည်ဟု ပြောသည်။  ဓါတ်ပုံ - Tarlin Mg

ဖားကန့်တွင် ညမထွက်ရ အမိန့်ထုတ်ပြန်

သောကြာနေ့ည ရုပ်သံသတင်း (၁၀-၁၀-၂၅) ဒီကနေ့ အစီအစဉ်ထဲမှာတော့.... - မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ - မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ - ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ - ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ - ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ - ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။ - ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ ...... စတာတွေတင်ဆက်ထားပါတယ်။

သောကြာနေ့ည ရုပ်သံသတင်း (၁၀-၁၀-၂၅)

မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရ၍ ကလေးအပါ အရပ်သား ၈ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၀ ရက်။ ရှမ်းပြည်နယ်မြောက်ပိုင်း၊ မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရမှုကြောင့် ကလေးငယ်များ အပါအဝင် အရပ်သား ၈ ဦး ထိမှန် သေဆုံးခဲ့သည်။ စစ်ကော်မရှင်တပ်၏ လေကြောင်းတိုက်ခိုက်မှုထဲ ကလေး အပါအဝင် အရပ်သားပြည်သူ ၈ ဦး သေဆုံးခဲ့ရပြီး၊ အများအပြား ဒဏ်ရာရရှိခဲ့ကြောင်း ဒေသခံများက ပြောသည်။ ဒေသခံ အမျိုးသားတစ်သီးက “Airstrike ဖြစ်သွားတယ်။ မိုးမိတ်ဘက်မှာ။ ကိုသိန်းနိုင်အိမ်မှာ ၃ ယောက်၊ ဦးစိုးမြင့်အိမ်မှာ ၂ ယောက်၊ ဒေါ်ခင်မာရီ အိမ်က တစ်ယောက်၊ ဦးသိန်းဇော်အိမ်က တစ်ယောက်၊ နောက်ပြီး တခြားအိမ်က တစ်ယောက်လည်းပါတယ်။ ဒဏ်ရာရတာလည်း များတယ်။ အဲ့ဒီထဲမှာ ကလေးတစ်ယောက်က တော့ အသက်အန္တရာယ်က လွှတ်သွားတယ်။ ဒါပေမယ့် ခြေထောက်ဖြတ်ရမယ့် အခြေအနေမျိုးပေါ့နော်။ ထိသွားတာက တော်တော်ဆိုးတယ်” ဟု ပြောသည်။ အဆိုပါ တိုက်ခိုက်မှုမှာ တိုက်ပွဲဖြစ်ပွားခြင်းမရှိဘဲ အရပ်သားနေအိမ်များကို တိုက်ရိုက်ပစ်မှတ်ထားခြင်း ဖြစ်သည်ဟု ဆိုသည်။ စစ်ကော်မရှင်တပ်က ပေါင် ၅၀၀ ဗုံး၊ ပေါင်း ၂၅၀ ဗုံးတို့ဖြင့် အောက်တိုဘာလ ၉ ရက်နေ့၊ ညနေ ၆ နာရီကျော် အချိန်ခန့်တွင် ကြဲခဲ့ခြင်း ဖြစ်သည်။ အသက် ၃ နှစ်အရွယ် အပါအဝင် ဒေသခံပြည်သူ စုစုပေါင်း ၈ ဦး သေဆုံးခဲ့ရခြင်း ဖြစ်သည်။ အမျိုးသား ၅ ဦး၊ အမျိုးသမီး ၂ ဦး နှင့် ကလေးတစ်ဦး သေဆုံးခဲ့ပြီး ထိခိုက်ဒဏ်ရာ ရရှိသူ ၇ ဦး ရှိခဲ့သည်ဟု မြေပြင် သတင်းအရင်းအမြစ်က ပြောသည်။ ဒဏ်ရာရသူများထဲတွင် အသက် ၁၀ နှစ်အရွယ် ကလေးငယ်တစ်ဦး ပါဝင်ပြီး၊ ၎င်းမှာ ခြေထောက်တစ်ဖက် ဆုံးရှုံးသည်အထိ ဒဏ်ရာပြင်းထန်ခဲ့သည်။ လေကြောင်းမှ ဗုံးကြဲမှုထဲ ဗုံးပေါက်ကွဲမှုကြောင့် ကျေးရွာရှိ နေအိမ် ၇ လုံး ထိမှန် ပျက်စီးဆုံးရှုံးခဲ့သည်။ စစ်ကော်မရှင်တပ်သည် ဝဲဘောင်ကျေးရွာကို ဗုံးကြဲပြီးနောက် တစ်ညတည်းမှာပင် တောင်အင်တိုင်းဒေသ ဘက်သို့ ဗုံး ၂ လုံး ထပ်မံ ကြဲချခဲ့ကြောင်း မြေပြင် သတင်းအရင်းအမြစ်က ဆိုသည်။ အောင်တအင်တိုင်းဒေသ လေကြောင်းတိုက်ခိုက်ခံရမှုထဲ ထိခိုက်သေဆုံးမှုများ မရှိခဲ့သော်လည်း၊ ယခုဖြစ်စဉ် သည် စစ်ကော်မရှင်တပ်က တိုက်ပွဲဖြစ်ပွားခြင်းမရှိသည့် အရပ်သားပြည်သူများ၏ နေထိုင်ရာ နေရာများကို ပစ်မှတ်ထား ဗုံးကြဲတိုက်ခိုက်နေသည်ကို ထင်ရှားစေသည်ဟု ဆိုကြသည်။ မိုးမိတ်မြို့နယ်သည် ၂၀၂၄ ခုနှစ် ဇန်နဝါရီလအတွင်းက ကချင်လွတ်လပ်ရေး တပ်မတော် KIA၊ ကျောင်းသားတပ် ABSDF နှင့် တအာင်းတပ် TNLA မဟာမိတ်တပ်ဖွဲ့များ၏ ထိုးစစ်ဆင်မှုကြောင့် စစ်ရေးပြင်းထန်ခဲ့ပြီးနောက်ပိုင်း စစ်ကော်မရှင်၏ လေကြောင်းတိုက်ခိုက်မှုများ မကြာခဏ ပစ်မှတ်ထားခံရသည့် နယ်မြေတစ်ခုဖြစ်သည်။ လက်ရှိဖြစ်ပွားခဲ့သော လေကြောင်းတိုက်ခိုက်မှုသည် တိုက်ပွဲမရှိသည့် အရပ်သား နေထိုင်ရာ နေရာကို တိုက်ရိုက် ပစ်မှတ်ထားခြင်း ဖြစ်ပြီး၊ စစ်တပ်သည် ၎င်းတို့ လက်လွှတ်ဆုံးရှုံးထားသည့် နယ်မြေများတွင် အရပ်သားများ အပေါ် လေကြောင်းဖြင့် ဖိအားပေး အကြမ်းဖက်သည့် စစ်ရေးဗျူဟာကို ဆက်လက်ကျင့်သုံးနေခြင်း ဖြစ်ကြောင်း လေ့လာသူများက သုံးသပ်သည်။

မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရ၍ ကလေးအပါ အရပ်သား ၈ ဦး သေဆုံး

တိုက်ပွဲများ ဖြစ်ပွားလာနေခြင်းကြောင့် ဒီးမော့ဆို စစ်ရှောင်များ ထပ်မံ စစ်ဘေးရှောင်ရမည်ကို စိုးရိမ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ကရင်နီပြည်၊ ဒီးမော့ဆိုမြို့နယ်အတွင်း စစ်ကော်မရှင်တပ်၏ ထိုးစစ်ဆင်မှုကြောင့် နှစ်ဖက်ထိတွေ့တိုက်ပွဲများ ဖြစ်ပွားလာနေသည့်အတွက် ထပ်မံ၍ စစ်ရှောင်ရမည်ကို စိုးရိမ်နေကြရသည်ဟု ဒေသခံများနှင့် စစ်ရှောင်ပြည် သူများက ပြောသည်။ ရွေးကောက်ပွဲ ဖြစ်မြောက်ရေး အတွက် နယ်မြေများ ပြန်လည် ထိန်းချုပ်နိုင်ရန် ဩဂုတ်လမှစ၍ စစ်ကော်မရှင် တပ်က ဒီးမော့ဆိုမှ ဖရူဆိုမြို့ လမ်းမကြီးတစ်လျှောက် ထိုးစစ်ဆင်လာသဖြင့် ဒီးမော့ဆိုမြို့နယ် အတွင်း နှစ်ဖက် ကြား တိုက်ပွဲများ ပြင်းထန်လာနေခြင်း ဖြစ်သည်။ ထို့သို့ နှစ်ဖက် ထိတွေ့တိုက်ပွဲများ ပြင်းထန်လာသည့်အတွက် စစ်ကော်မရှင်က စစ်ရေးပစ်မှတ် အရပ်သား ပစ်မှတ် မခွဲခြားဘဲ လက်နက်ကြီး၊ ဒရုန်းနှင့် လေကြောင်း တိုက်ခိုက်မှုများ ပိုမိုပြုလုပ်လာမည်ကို စိုးရိမ်နေကြ သည်ဟု ဒီးမော့ဆိုအနောက်ခြမ်းက စစ်ရှောင်များက ပြောသည်။ စစ်ဘေးရှောင် အမျိုးသမီးတစ်ဦးက “လေယာဉ်ဆိုလည်း နေ့တိုင်းဝဲနေ။ ဒရုန်းသံဆိုလည်း တစ်ခါလေ ကြား တယ်။ လက်နက်ကြီးသံလည်း နေ့တိုင်းလိုလို ကြားတယ်။ စိုးရိမ်စရာတွေတော့ အမျာကြီးပေါ့နော်။ သူတို့က လျှောက်ကြဲမယ်လို့လည်း ကြားတယ်။ စစ်ရှောင်တို့ ကျောင်းတို့နေရာကို လိုက်ကြဲမယ်လို့လည်း ကြားတယ်။ အဲ့ဒါကြောင့်မို့လို့ လေယာဉ် လာတယ်ဆိုရင် စိုးရိမ်ရတယ်” ဟု ပြောသည်။ လက်နက်ကြီး၊ ဒရုန်း၊ လေကြောင်း ဗုံးကြဲတိုက်ခိုက်မှုများကြောင့် စာသင်ကျောင်များကိုလည်း မကြာခဏ ပိတ် ထားရလေ့ရှိသည်ဟု အဆိုပါ စစ်ရှောင်အမျိုးသမီးက ဆက်ပြောသည်။ “အဓိက ကလေးတွေပေါ့နော်။ ပညာရေး အဓိက ဦးစားပေးချင်တယ်။ ပြီးလို့ရှိရင် ကောင်းကောင်းနဲ့ ပြီးဆုံး စေ ချင်တယ်။ အခုက ကျောင်းဖွင့်လိုက် ပိတ်လိုက်ဆိုတော့ သူတို့လည်း ဒီတစ်သက်တော့ ကျောင်းပြီးနိုင်မှာ မဟုတ် ဘူး ထင်တယ်။ လေယာဉ်က နေ့တိုင်းဝဲ ကျောင်းက တစ်ချိန်လုံးပိတ် ဆိုတော့ အဆင်မပြေဘူးလေ။” စစ်ရေး ပြင်းထန်လာမှုများကြောင့် လူထုအနေဖြင့် လုံခြုံရေးအရ တစ်နေရာမှ တစ်နေရာသို့ သွားလာရန်နှင့် လုပ်ငန်းများ လုပ်ရန်လည်း အခက်အခဲများနှင့် ရင်ဆိုင်နေကြရသည်ဟု ကရင်နီပြည် ကြားကာလ အုပ်ချုပ် ရေးကောင်စီ အတွင်းရေးမှူး - ၂ ဦးဗညားက ပြောသည်။ “စစ်ရေးက ပိုတင်းမာလာတယ်။ နောက်စစ်ရေးကလည်း ပိုကျယ်ပြန့်လာတယ်ပေါ့နော်။ အဲ့ကြောင့်မို့ လူထု တွေက ပိုပြီးတော့မှ စိုးရိမ်ပူပန်စိတ် ရှိတယ်ပေါ့။ အထူးသဖြင့် ကျန်းမာရေးဆိုင်ရာအရ သွားလာရတာ အခက် အခဲပိုရှိ သွားတယ်။ တချို့နေရာဆိုရင် ဥပမာ ဒီးမော့ဆိုအရှေ့နဲ့ ဒီးမော့ဆိုအနောက် ကူးဆက်သွားဖို့ အရမ်း ခက်ခဲ သွားတယ်ပေါ့နော်။ ပုံမှန် ကူးသန်းရောင်းဝယ်ရေးလည်း လုပ်လို့ မရတော့သလို လူနာတွေကို ပို့တာတွေ လူနာနဲ့ ပတ်သက်ပြီးတော့ ကျန်းမာရေးဆိုင်ရာ ကုသမှုတွေ နောက်ပြီးတော့မှ သာရေးနာရေး ကိစ္စတွေမှာ သွား လာဆက်ဆံလို့ မရတဲ့ ပုံစံဖြစ်သွားတာပေါ့။” မြေပြင်က စစ်ရေး အခြေအနေများကြောင့် ဖရူဆို - ထားလဲ - နန်းဖဲ လမ်းမကြီး အပါအဝင် လမ်းသွယ်များ အားလုံးကို စက်တင်ဘာလ ၂၃ ရက်နေ့မှစ၍ ရက်အကန့်အသတ်မရှိ ပိတ်ထားမည် ဖြစ်ကြောင်းနှင့် လွိုင်ကော် - ဒီးမော့ဆို - ဖရူဆို - ဘောလခဲ လမ်းမကြီးကိုလည်း အသုံးပြုသွားလာခြင်း မလုပ်ကြရန် ကရင်နီတော်လှန်ရေး အဖွဲ့များက အသိပေး ထုတ်ပြန်ထားသည်။ တိုက်ပွဲများနှင့် စစ်ကော်မရှင်တပ်၏ လေကြောင်း၊ ဒရုန်း၊ လက်နက်ကြီး တိုက်ခိုက်မှုများကြား ကာလကြာရှည် နေထိုင်ကြရသည့် စစ်ရှောင်များသည် အသက်အန္တရာယ်အပြင် စိတ်ပိုင်းဆိုင်ရာ ထိခိုက်မှုများပါ ရှိလာနေကြသည်။ စစ်ရှောင် အမျိုးသမီးတစ်ဦးက “အခုဆိုတိုက်ပွဲလည်း ရက်တိုင်းလိုလိုဖြစ်တယ်။ မနက်ဆိုလည်း ဒုန်းဒုန်း ဒိုင်း ဒိုင်းနဲ့။ လေယာဉ်ဆိုလည်း အမြဲ နားစွင့်ပြီးနေရတယ်။ လက်နက်ကြီးသံလည်း နေ့တိုင်း လိုလိုကြားတယ်။ စိုးရိမ်စရာတွေတော့ အမျာကြီးပေါ့နော်။ ဒီမှာကလူထုတွေ တအားထူထပ်တော့ အဆင်မပြေတော့ဘူး။ တစ် နေ့က ဆိုလည်း လက်နက်ကြီးတွေ ထုလာတယ်။ အစ်မတို့ဆို မအိပ်ဘဲနဲ့ အောက်ပြေးဆင်း ပြီးတော့ ဗုံးခိုကျင်း ဘေးမှာ သွားနေ လက်နက်ကြီးလာတော့ ကိုယ့်နားမှာ မီးနီနီနဲ့လာ အဲ့လိုမျိုးဆို ကြောက်ရတယ်။ အခုဆို စစ် သားလည်း တော်တော်လေး နီးလာပြီးကော။ ပြေးစရာနေရာလည်း ကုန်ပြီ မရှိတော့ဘူးလေ” ဟု ပြောသည်။ တိုက်ပွဲ အခြေအနေများကြောင့် လွိုင်နန်းဖမြို့နယ်၊ ဒီးဘောင်းခူမြို့နယ်နှင့် နန်းမယ်ခုံမြို့နယ်အတွင်း စစ်ရေးအရ သွားလာ လှုပ်ရှားနေသည့် တပ်ဖွဲ့များနှင့် အရေးပေါ် ကျန်းမာရေး (နာရေး) လိုအပ်ချက်အရ သွားလာရမည့် သူများမှ အပ မည်သူမဆို လုံခြုံရေးအရ ည ၉ နာရီ မှ နံနက် ၄ နာရီအတွင်း သွားလာ လှုပ်ရှားခြင်း မပြုကြရန် သက်ဆိုင်ရာ မြို့နယ်ပူးပေါင်း အုပ်ချုပ်ရေး ကော်မတီက စက်တင်ဘာလ ၂၆ ရက်နေ့တွင် ထုတ်ပြန်ထားသည်။ ကရင်နီပြည်ရှိ ပြည်သူများအနေဖြင့် သက်ဆိုင်ရာ ဒေသတွင်း တပ်ရင်းတပ်ဖွဲ့များ၏ ထုတ်ပြန်ထားချက်များကို လိုက်နာကြရန်နှင့် စစ်ရေးသတိရှိကြရန် ကရင်နီတော်လှန်ရေးတပ်များက အသိပေး ပြောဆိုထားသည်။

တိုက်ပွဲများ ဖြစ်ပွားလာနေခြင်းကြောင့် ဒီးမော့ဆို စစ်ရှောင်များ ထပ်မံ စစ်ဘေးရှောင်ရမည်ကို စိုးရိမ်

« Prev 1 2 3 4 5 … 15 Next »

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ
တော်လှန်ရေး အစုအဖွဲ့များအကြား သွေးကွဲမှုများ ရှောင်ကျဉ်ရန် KNDF ခေါင်းဆောင်ပြော
ထားဝယ် ဗဟိုသင်္ကြန်မဏ္ဍာပ် အနီး ဒရုန်း တိုက်ခိုက်မှုတွင် အမျိုးသမီးတစ်ဦး ဒဏ်ရာရ
စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့

Archives

Archives

×Close