လေကြောင်းတိုက်ခိုက်မှု – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: လေကြောင်းတိုက်ခိုက်မှု

မော်ချီးတွင် အရပ်သား ပစ်မှတ်များ တိုက်ခိုက်ခံနေရ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၇ ရက်။ စစ်ကော်မရှင်က ‘ရန်နိုင်မင်း’ စစ်ဆင်ရေးဖြင့် ကရင်နီပြည် မော်ချီးသို့ ဦးတည်စစ်ကြောင်းထိုးနေပြီး အရပ်သားနေရာများကို ပစ်မှတ်ထား တိုက်ခိုက်မှုများပြားလာနေသည်။ ကရင်နီပြည်အတွင်း စစ်ကော်မရှင်တပ်သည် ‘ရန်နိုင်မင်း’ ဟု အမည်ပေးထားသည့် စစ်ဆင်ရေးဖြင့် မော်ချီး ဒေသသို့ ဦးတည်ကာ စစ်ကြောင်းထိုးလျက်ရှိပြီး၊ ထိုဖြစ်စဉ်တွင် တိုက်ပွဲနှင့်မသက်ဆိုင်သည့် အရပ်သား နေထိုင် ရာ နေရာများကို ပစ်မှတ်ထားတိုက်ခိုက်မှုများ ဆက်တိုက်ကျူးလွန်နေသည်။ မော်ချီးသည် ကရင်နီ ပြည်အတွင်း ခဲမဖြူနှင့် အဖြိုက်နက် သယံဇာတ ထွက်ရာ ဒေသ ဖြစ်ပြီး လက်ရှိတွင် တော်လှန်ရေး တပ်ဖွဲ့များ ထိန်းချုပ်မှု အောက်တွင် ရှိသည်။ စစ်ကော်မရှင်တပ်သည် စစ်ကြောင်းမထိုးမီ နယ်မြေရှင်းလင်းရေးအဖြစ် ဖားဆောင်းနှင့် ဖရူဆိုဒေသတွင်းရှိ လူထုနေထိုင်ရာ ကျေးရွာများ၊ နေရာများကို လေကြောင်းနှင့် လက်နက်ကြီးများအသုံးပြုကာ ကြိုတင်တိုက်ခိုက် လေ့ရှိကြောင်း ကရင်နီပြည် ကြားကာလအုပ်ချုပ်ရေးကောင်စီ (IEC) အတွင်းရေးမှူး-၂ ဦးဗညားက ပြောသည်။ ဦးဗညားက “စစ်ရေးအရကတော့ လောလောဆယ် ဖရူဆို-ထားလဲ နားမှာပဲ တိုက်ပွဲတွေတော့ ဖြစ်နေတယ်လို့ ပြောလို့ရတယ်ပေါ့။ ဒါပေမဲ့ ဖားဆောင်းဘက်မှာတော့ တိုက်ပွဲတွေကတော့ ငြိမ်နေသေးတယ်ပေါ့နော်။ ငြိမ်နေ သော်ငြားလည်း သူတို့ကတော့ ရှင်းလင်းရေးအတွက် စစ်ကြောင်းတွေ မထိုးခင်မှာ တချို့နယ်မြေတွေကို ကြို တင်ပြီးတော့မှ ဗုံးကြဲတာ အကျင့်ရှိတယ်ပေါ့နော်။ လက်နက်ကြီးနဲ့ မှီရင်တော့ လက်နက်ကြီးနဲ့ လှမ်းပစ် တယ်” ဟု လက်ရှိမြေပြင်အခြေအနေကို ရှင်းပြသည်။ လက်ရှိတွင် ဒီးမော့ဆို - ဖရူဆို - ဘောလခဲ လမ်းမကြီးတစ်လျှောက်၌ စစ်ကော်မရှင်တပ်နှင့် ကရင်နီ တော်လှန် ရေးတပ်များအကြား ထိတွေ့တိုက်ပွဲများ ခပ်စိပ်စိပ်ဖြစ်ပွားနေသည်။ စစ်ကော်မရှင်သည် အတုအယောင် ရွေးကောက်ပွဲကာလ အပြီးတွင် ရပ်နားထားသော စစ်ဆင်ရေးများကို ပြန်လည်အရှိန်မြှင့်လာခြင်းဖြစ်သည်ဟု ဆိုသည်။ ဦးဗညားက “စစ်ရေးက အရင်ရွေးကောက်ပွဲကာလမှာတော့ နည်းနည်းနားထားတာပေါ့နော်။ ရွေးကောက်ပွဲ ပြီးတာနဲ့ သူတို့ချက်ချင်း စစ်ကြောင်းပြန်ထိုးတယ်။ အခုသွားနေတဲ့ စစ်ဆင်ရေးပုံစံကြည့်ရမယ်ဆို ရန်နိုင်မင်း စစ်ဆင်ရေးပါ။ ၆ လ ၁ နှစ်တောင် ပြည့်တော့မယ်လေနော်။ အရင်တုန်းက ဖယ်ခုံကနေ မိုးဗြဲ၊ မိုးဗြဲကနေ လွိုင်ကော်၊ လွိုင်ကော်ကနေ ဒီးမော့ဆို၊ ဒီးမော့ဆိုကနေ ဖရူဆို၊ ဖရူဆိုကနေ ဘောလခဲကို ဆင်းမယ့်လမ်းပေါ့၊ ပြီးတော့မှ ဘောလခဲကနေ ဖားဆောင်း၊ ဖားဆောင်းကနေ မော်ချီးကို တက်မယ်ဆိုပြီးတော့မှ ကနဦးကျနော်တို့ သိထားတဲ့ စစ်ရေးအရ ရန်နိုင်မင်းစစ်ကြောင်းရဲ့ သဘောသဘာဝ ဖြစ်တယ်” ဟု ပြောသည်။ မတ်လအတွင်း စစ်ကော်မရှင်၏ ရမ်းသန်းပစ်ခတ်မှုများကြောင့် ပြည်သူများမှာ စိုးရိမ်ထိတ်လန့်နေရပြီး ထပ်ဆင့် စစ်ဘေးရှောင်နေရသည့် အခြေအနေဖြစ်နေသည်။ ဦးဗညားက ဆက်လက်၍ “ဖရူဆို၊ မော်ချီး၊ ဖားဆောင်းဘက်မှာကတော့ စစ်တပ်က ဗုံးကြဲနေတာ ဆက်တိုက် ပေါ့နော်။ ထိခိုက်မှုကလည်း တချို့ရှိတယ်။ ဖားဆောင်းတို့ ဖရူဆိုတို့ကို ပစ်တဲ့ဟာက စစ်ရေးအရ တိုက်ရိုက် သက်ဆိုင်မှု ရှိတာပေါ့။ ဒါပေမဲ့ တိုက်ပွဲဖြစ်တဲ့နေရာ မဟုတ်ဘူးပေါ့နော်။ လူထုတွေရှိတဲ့နေရာကို ဗုံးကြဲနေ တယ် ပစ်ခတ်နေတယ်ဆိုတာ တွေ့ရပါတယ်” ဟု ပြောသည်။ စစ်ရေးထိခိုက်မှုများအနေဖြင့် မတ်လ ၅ ရက်နေ့က ဖရူဆို-ထားလဲ လမ်းမကြီးပေါ်တွင် စစ်ကော်မရှင်၏ ဘက်ဟိုးယာဉ်ပါ စစ်ယာဉ်တန်း ကြားဖြတ်တိုက်ခိုက်ခံရပြီး စစ်တပ်ဘက်မှ ၃ ဦးသေဆုံးကာ ဘက်ဟိုးယာဉ် လည်း ပျက်စီးခဲ့ကြောင်း KNDF က ထုတ်ပြန်ထားသည်။ သို့သော် စစ်ကော်မရှင်ဘက်က လက်တုံ့ပြန်သည့်အနေဖြင့် အရပ်သားများကို တိုက်ခိုက်ခဲ့ရာ မတ်လ ၁၅ ရက်တွင် ဖရူဆို၌ Y-12 လေယာဉ်ဖြင့် ဗုံးကြဲသဖြင့် စစ်ရှောင်အမျိုးသမီးတစ်ဦး ဒဏ်ရာရခဲ့သည့်အပြင် မတ်လ ၈ ရက်နေ့ကလည်း လက်နက်ကြီးကြောင့် စပါးကျီနှင့် စားနပ်ရိက္ခာများ ပျက်စီးခဲ့ရသည်။ ထို့အပြင် မတ်လ ၁၄ ရက်နေ့တွင် ဖားဆောင်းနှင့် မော်ချီးအကြား ၉ မိုင်ဒေသကို လေကြောင်းမှ ဗုံးကြဲသဖြင့် ဒေသခံတစ်ဦး ဒဏ်ရာရခဲ့ပြီး၊ မတ်လ ၁၀ ရက်ကလည်း မော်ချီးဒေသ၌ လေကြောင်းတိုက်ခိုက်မှုကြောင့် အရပ်သားများ ထိခိုက်ဒဏ်ရာရရှိခဲ့ကြောင်း မြေပြင်သတင်းများက ပြောသည်။ #မော်ချီး #စစ်ကော်မရှင် #အရပ်သား # ရန်နိုင်မင်းစစ်ဆင်ရေး #လေကြောင်းတိုက်ခိုက်မှု

မော်ချီးတွင် အရပ်သား ပစ်မှတ်များ တိုက်ခိုက်ခံနေရ

ထီးချိုင့်ကို စစ်တပ်က သုံးရက်ဆက်ဗုံးကြဲ၊ သံဃာနှင့်ကိုရင်များအပါအဝင် ၁၂ ဦးသေဆုံး   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၅ ရက်။ စစ်ကိုင်းတိုင်း၊ ထီးချိုင့်တွင် သုံးရက်ဆက် လေကြောင်းဗုံးကြဲမှုကြောင့် သံဃာတော်များနှင့် ကိုရင်များအပါအဝင် ၁၂ ဦး သေဆုံးခဲ့ပြီး ဆေးရုံနှင့် သာသနာ့အဆောက်အအုံများပါ ပျက်စီးခဲ့ကြောင်း ဒေသခံများက ပြောသည်။ ထီးချိုင့်မြို့နယ်အတွင်းရှိ ကျေးရွာများကို စစ်ကော်မရှင်တပ်က မတ်လ ၈ ရက်နေ့မှ ၁၀ ရက်နေ့အထိ သုံးရက် ဆက်တိုက် လေကြောင်းမှ ဗုံးကြဲတိုက်ခိုက်ခဲ့ရာ ဦးဇင်း ၂ ပါးနှင့် ကိုရင် ၄ ပါးအပါအဝင် စုစုပေါင်း ၁၂ ဦး သေဆုံးခဲ့ရပြီး သာသနာ့အဆောက်အအုံများနှင့် ဆေးရုံများ ပြင်းထန်စွာ ပျက်စီးခဲ့ခြင်း ဖြစ်သည်။ စစ်ကော်မရှင်သည် တိုက်ပွဲဖြစ်ပွားခြင်းမရှိဘဲ ဇီးကုန်း၊ စပ်စား၊ ထုံးကြီးကျွန်းနှင့် အလယ်တောကျေးရွာတို့ကို ပစ်မှတ်ထားကာ ဂျက်ဖိုက်တာများဖြင့် ဗုံးကြဲခဲ့ခြင်းဖြစ်သည်။ အဆိုပါ တိုက်ခိုက်မှုများအနက် မတ်လ ၁၀ ရက်နေ့က ဇီးကုန်းကျေးရွာကို တိုက်ခိုက်မှုမှာ သေဆုံးမှု အများဆုံး ဖြစ်ခဲ့ပြီး သံဃာတော်များအပါအဝင် ၁၂ ဦးအထိ အသက်ဆုံးရှုံးခဲ့ရသည်။ ဖြစ်စဉ်နှင့်ပတ်သက်၍ ထီးချိုင့်မြို့ဒေသခံ အမျိုးသမီးတစ်ဦးက “ဇီးကုန်းရွာက ထီးချိုင့်မြို့နဲ့သိပ်မဝေးဘူး။ လေကြောင်းတိုက်ခိုက်တာလည်းမခံရဖူးဘူး။ ဒီရွာမှာ စစ်ရှောင်တွေလည်းခိုလှုံနေကြတာဟုတ်တယ်။ တိုက်ပွဲ ဖြစ်ပွားတာလည်းမရှိပါဘူး။ အိမ်သစ်တောင်မတက်လိုက်ရဘဲ လေကြောင်းတိုက်ခိုက်မှုမှာ ပါသွားတာတွေ လည်း ရှိပါတယ်။ အသက်မပြည့်တဲ့ကလေးတွေရော၊ ကိုရင်လေးတွေရော၊ ဦးဇင်းတွေရောသေဆုံးခဲ့ရတာပါ” ဟု ပြောသည်။ ဇီးကုန်းကျေးရွာ တိုက်ခိုက်ခံရမှုတွင် ကိုရင် ၈ ပါး၊ ဘုန်းကြီး ၁ ပါးနှင့် ပြည်သူ ၃ ဦး ဒဏ်ရာရရှိခဲ့သည့်အပြင် ဘုန်းကြီးကျောင်း၊ သိမ်၊ ဓမ္မာရုံနှင့် နေအိမ်များစွာ ပျက်စီးခဲ့ရသည်။ ထို့ပြင် မတ်လ ၈ ရက်နေ့ကလည်း အလယ်တောစံပြကျေးရွာရှိ တိုက်နယ်ပြည်သူ့ဆေးရုံဝန်းအတွင်းသို့ ပေါင် ၂၀၀ ဗုံးများ ကြဲချခဲ့သဖြင့် ဆဌမတန်းကျောင်းသူတစ်ဦး အပါအဝင် ၂ ဦး ဒဏ်ရာရရှိခဲ့သည်။ မတ်လ ၉ ရက်နေ့တွင်လည်း စပ်စားကျေးရွာသို့ ပေါင် ၅၀၀ ဗုံးဖြင့် တိုက်ခိုက်ခဲ့ရာ ပြည်သူ ၃ ဦး ဒဏ်ရာရခဲ့ပြီး၊ ထုံးကြီးကျွန်းကျေးရွာတွင်မူ လေကြောင်းတိုက်ခိုက်မှုကြောင့် ပြည်သူ ၃ ဦး သေဆုံးကာ နေအိမ်များ မီးလောင် ပျက်စီးခဲ့ရသည်။ စစ်ကော်မရှင်တပ်သည် မတ်လ အစောပိုင်းမှစတင်ကာ စစ်ကိုင်းနှင့် ကချင်ပြည်အစပ်ရှိ ထီးချိုင့်၊ ပင်လည်ဘူး၊ ကောလင်းနှင့် မော်လူးမြို့တို့ကို လေကြောင်းမှတစ်ဆင့် အပြင်းအထန် တိုက်ခိုက်နေသဖြင့် ဒေသခံပြည်သူများ မှာ ဘေးလွတ်ရာသို့ အစုလိုက်အပြုံလိုက် တိမ်းရှောင်နေကြရသည်။ ယခုကဲ့သို့ ဘာသာရေး အဆောက်အအုံများနှင့် ဆေးရုံများကိုပါမချန် ပစ်မှတ်ထား တိုက်ခိုက်နေခြင်းမှာ လူသား မျိုးနွယ် အပေါ် ကျူးလွန်သည့် ရာဇဝတ်မှုဖြစ်ကြောင်း လူ့အခွင့်အရေးလှုပ်ရှားသူများက ဝေဖန်ထောက်ပြထား ကြသည်။ #စစ်ကိုင်းတိုင်း #ထီးချိုင့် #လေကြောင်းတိုက်ခိုက်

ထီးချိုင့်ကို စစ်တပ်က သုံးရက်ဆက်ဗုံးကြဲ၊ သံဃာနှင့်ကိုရင်များအပါအဝင် ၁၂ ဦးသေဆုံး  

လေကြောင်းတိုက်ခိုက်မှုကို စကားလုံးဖြင့် တားမရဟု အာဆီယံအမတ်များ သတိပေး   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂ ရက်။   စစ်ကော်မရှင်၏ လေကြောင်းတိုက်ခိုက်မှုများကို စကားလုံးသက်သက်ဖြင့် တားဆီး၍မရနိုင်တော့ကြောင်းနှင့် အာဆီယံအနေဖြင့် ‘ပြည်တွင်းရေးမစွက်ဖက်ရေး’ မူဝါဒကို ကျော်လွန်ကာ လက်တွေ့ကျသည့် ဖိအားများပေးရန် အာဆီယံ လူ့အခွင့်အရေးဆိုင်ရာ လွှတ်တော်အမတ်များအဖွဲ့ (APHR) က တိုက်တွန်းလိုက်သည်။ မြန်မာနိုင်ငံတွင် စစ်အာဏာသိမ်းမှု ၅ နှစ်ပြည့်မြောက်ချိန် ဖေဖော်ဝါရီလ ၁ ရက်နေ့၌ အာဆီယံ လူ့အခွင့်အရေး ဆိုင်ရာ လွှတ်တော်အမတ်များအဖွဲ့ (APHR) က တိုက်တွန်းလိုက်ခြင်း ဖြစ်သည်။ မြန်မာပြည်သူများ ၅ နှစ်တာ ခံစားနေရသည့် ဘေးဒုက္ခများသည် နယ်စပ်ကိုကျော်လွန်၍ ဒေသတွင်း မတည်ငြိမ်မှုများ အထိ ရိုက်ခတ်လာနေပြီဖြစ်ကြောင်း APHR က ထောက်ပြထားသည်။ ထိုင်းလွှတ်တော်အမတ် ရန်စီမံရုန်းက “စကားလုံးတွေနဲ့ပဲ ပြောနေလို့ လေကြောင်းတိုက်ခိုက်မှုတွေကို တားနိုင် မှာ မဟုတ်သလို၊ ဖိအားမပါတဲ့ တွေ့ဆုံဆွေးနွေးမှုတွေကလည်း အရပ်သားတွေကို မကာကွယ်နိုင်ဘူး” ဟု ပြောဆိုလိုက်ပြီး စစ်ကော်မရှင်အပေါ် ထိရောက်သည့် အရေးယူမှုများ ပြုလုပ်ရန် တောင်းဆိုခဲ့သည်။ အလားတူ ၂၀၂၆ ခုနှစ်၏ အာဆီယံဥက္ကဋ္ဌ ဖြစ်လာသည့် ဖိလစ်ပိုင်နိုင်ငံမှ လွှတ်တော်အမတ် လိုင်လာဒီလီမာက လည်း မြန်မာ့အရေးအတွက် ရေရှည်တည်တံ့သော ဖြေရှင်းနည်းများကို အာဆီယံက မဖြစ်မနေ ရှာဖွေရမည်ဟု ဆိုသည်။ စစ်ကော်မရှင်က အတင်းအဓမ္မ ကျင်းပခဲ့သည့် ရွေးကောက်ပွဲအပေါ်တွင်လည်း APHR က ပြင်းပြင်းထန်ထန် ကန့်ကွက်ထားပြီး ယင်းသည် စစ်ရာဇဝတ်ကောင်များကို အကာအကွယ်ပေးရန် ရည်ရွယ်သည့် ‘ဟန်ပြ’ ဖြစ်စဉ်သာဖြစ်ကြောင်း ဝေဖန်ခဲ့သည်။ ပြည်သူများသည် လက်တုံ့ပြန်ခံရမည်ကို ကြောက်ရွံ့၍သာ မဲပေးခဲ့ကြရခြင်းဖြစ်ပြီး၊ အတိုက်အခံပါတီများကို ဖယ်ထုတ်ထားသည့် အဆိုပါရွေးကောက်ပွဲ၌ ကြံ့ခိုင်ရေးပါတီက အနိုင်ရရှိခြင်းမှာ ကြိုတင်ဇာတ်တိုက်ထား သည့်အတိုင်းသာ ဖြစ်သည်ဟု APHR က ဆိုသည်။

လေကြောင်းတိုက်ခိုက်မှုကို စကားလုံးဖြင့် တားမရဟု အာဆီယံအမတ်များ သတိပေး  

မင်္ဂလာဆောင်အိမ်အား ဒရုန်းဗုံးကြဲချ၊ လူငယ်တစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၁ ရက်။ မန္တလေးတိုင်းဒေသကြီး၊ ညောင်ဦးတွင် မင်္ဂလာဆောင်ကျင်းပနေသည့် နေအိမ်အား စစ်ကော်မရှင်တပ်က ဒရုန်းဖြင့် ဗုံးကြဲခဲ့ရာ လူငယ်တစ်ဦး ပြင်းထန်ဒဏ်ရာများရရှိခဲ့သည်ဟု မြို့ခံများက ပြောသည်။ ညောင်ဦးမြို့နယ်ရှိ ကျေးရွာတစ်ရွာတွင် မင်္ဂလာပွဲကျင်းပနေစဉ် စစ်ကော်မရှင်တပ်က ဒရုန်းဖြင့် ဗုံးကြဲ တိုက်ခိုက် ခဲ့ခြင်းကြောင့် မင်္ဂလာပွဲ၌ အလုပ်လုပ်ကိုင်နေသည့် လူငယ်တစ်ဦး ပြင်းထန်စွာ ဒဏ်ရာရရှိသွားခြင်း ဖြစ်သည်။ ဖြစ်စဉ်မှာ ဇန်နဝါရီလ ၂၀ ရက်နေ့၊ နံနက် ၇ နာရီခွဲခန့်တွင် ပုဂံမြို့၏ အရှေ့တောင်ဘက်ရှိ ချောင်းရှည်ကျေးရွာ တွင် မင်္ဂလာဆောင်ကျင်းပနေစဉ် နေအိမ်ပေါ်သို့ အရှေ့မြောက်အရပ်မှ ပျံသန်းလာသည့် စစ်ကော်မရှင်တပ်က ဒရုန်း ဗုံးတစ်လုံး ကြဲချခဲ့ခြင်းဖြစ်သည်။ အဆိုပါ ပေါက်ကွဲမှုကြောင့် မင်္ဂလာဆောင်တွင် ဆောင်းဘောက် (Sound System) လိုက်ဖွင့်ပေးနေသည့် လူငယ်တစ်ဦး ထိခိုက်ဒဏ်ရာရရှိခဲ့ပြီး နေအိမ်လည်း ပျက်စီးသွားခဲ့သည်။ ဖြစ်စဉ်နှင့်ပတ်သက်၍ အသက် ၄၀ ကျော်အရွယ် ချောင်းရှည်ရွာသားတစ်ဦးက “မင်္ဂလာဆောင်တွေမှာ sound box လိုက်အငှားဖွင့်တဲ့ ကောင်လေးကတော့ ဒဏ်ရာအတော်လေး များတယ်လို့ ကြားတယ်။ အိမ်ပေါ်တည့် တည့် ကျတာဆိုတော့ အိမ်ကတော့ ပျက်စီးတယ်။ အခုကတော့ အဲ့ဒီကောင်လေး ဆေးရုံမှာပါ” ဟု ပြောသည်။ ချောင်းရှည်ကျေးရွာကို ဗုံးချခဲ့သည့် အဆိုပါ ဒရုန်းသည်ပင် မိနစ်ပိုင်းအကြာတွင် အရှေ့တောင်ဘက်ရှိ ချောင်းဝ ကျေးရွာဘက်သို့ ဆက်လက် ပျံသန်းသွားပြီး ဘောလုံးကွင်းအတွင်း ထပ်မံဗုံးကြဲခဲ့သော်လည်း လူနှင့် အဆောက် အအုံ ထိခိုက်မှု မရှိခဲ့ကြောင်း ဒေသခံများက ဆိုသည်။ ညောင်ဦးနယ်အတွင်း ယခုကဲ့သို့ ကျေးရွာများအား ပစ်မှတ်ထား တိုက်ခိုက်နေမှုသည် ပြီးခဲ့သည့်ရက်ပိုင်း အတွင်း က ဖြစ်ပွားခဲ့သည့် တိုက်ပွဲများနှင့် ဆက်စပ်နိုင်ကြောင်း ယူဆရသည်ဟု ဒေသခံများက ဆိုသည်။ ဇန်နဝါရီလ ၁၈ ရက်နေ့က ညောင်ဦး-ကျောက်ပန်းတောင်း ကားလမ်းဘေးရှိ ထနောင်းဝန်းကျေးရွာအနီးနှင့် ရှော်ပင်ကျေးရွာဘူတာ အရှေ့မြောက်ဘက်တွင် စစ်ကော်မရှင်တပ်နှင့် တော်လှန်ရေးတပ်ဖွဲ့များ အကြား ထိတွေ့ တိုက်ပွဲ ဖြစ်ပွားခဲ့သည်။ အဆိုပါ တိုက်ပွဲအခြေအနေနှင့်ပတ်သက်၍ တော်လှန်ရေးတပ်ဖွဲ့ဝင်များနှင့် နီးစပ်သူတစ်ဦးက “မိုင်းကွင်းထဲ ဝင် လာလို့ မိုင်းဆွဲတိုက်ခဲ့တာ ဂန့်ဂါက ပျူ ၃ ယောက်သေတာကတော့ သေချာတယ်။ လက်နက်တွေလည်း ရလိုက် တယ်။ ထုတ်ပြန်တာတော့ မရှိသေးဘူး” ဟု ပြောသည်။ စစ်ကော်မရှင်တပ်သည် ဇန်နဝါရီလ ၁၇ ရက်နေ့ကလည်း အင်အား ၁၀၀ ခန့်ဖြင့် စစ်ကြောင်းထိုးကာ ဇီးစားမြင် ကျေးရွာရှိ နေအိမ်များကို မီးရှို့ဖျက်ဆီးခဲ့သည်။ လက်ရှိတွင် စစ်ကော်မရှင်တပ်ဖွဲ့ဝင်များသည် နပ္ပလင်ကျေးရွာတွင် တပ်စွဲထားပြီး၊ ရွှေလှိုင်းဒေသတွင် မော်တော် ယာဉ်များနှင့် ခရီးသွား ပြည်သူများကို တင်းတင်းကြပ်ကြပ် စစ်ဆေးမှုများ ပြုလုပ်နေသည့်အတွက် နယ်မြေ အတွင်း စစ်ရေးတင်းမာမှုများ ဆက်လက်ရှိနေကြောင်း မြေပြင်သတင်းရင်းမြစ်က ပြောသည်။

မင်္ဂလာဆောင်အိမ်အား ဒရုန်းဗုံးကြဲချ၊ လူငယ်တစ်ဦး ဒဏ်ရာရ

ဝက်လက် ဗုံးကြဲတိုက်ခိုက်မှုအတွင်း ၂ လသား အပါအဝင် အရပ်သား ၄ ဦး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၇ ရက်။ စစ်ကိုင်းတိုင်း၊ ဝက်လက်မြို့နယ် အတွင်း တိုက်ပွဲမရှိဘဲ ဗုံးကြဲတိုက်ခိုက်ခံရပြီး ၂ လသား ကလေးအပါအဝင် ၄ ဦး သေဆုံးခဲ့သည်ဟု ဒေသခံများက ပြောသည်။ ဝက်လက်မြို့နယ်အတွင်းရှိ ကျေးရွာများကို စစ်ကော်မရှင်တပ်က လေကြောင်းမှ အကြောင်းမဲ့ ဗုံးကြဲတိုက်ခိုက်ခဲ့ ရာ နှစ်လသားအရွယ် ကလေးငယ်တစ်ဦးနှင့် သက်ကြီးရွယ်အိုများ အပါအဝင် အရပ်သား ၄ ဦး သေဆုံးသွားခဲ့ ကြောင်း ဒေသခံများက ပြောသည်။ မြေပြင်တွင် ကြုံတွေ့ခဲ့ရသည့် အခြေအနေနှင့်ပတ်သက်၍ ဒေသခံတစ်ဦးက “ဘာတိုက်ပွဲမှ မရှိဘဲ ဒီတိုင်း လာကြဲတာဗျ။ လေယာဉ်သံကြားလို့ ပြေးတုန်းရှိသေးတယ်၊ ဗုံးက ကျလာပြီ။ ရှောင်ချိန်တောင် မရလိုက်ကြ ဘူး။ ၂ လသား ကလေး ဆိုတာ ဘာမှတောင် မသိသေးရှာဘူး၊ အတော်လူစိတ်မရှိကြတာဗျ။ ရွာက စာသင် ကျောင်းရော၊ အိမ်တွေရော အကုန်မီးလောင်ကုန်တာပဲ” ဟု ပြောသည်။ ဇန်နဝါရီလ ၆ ရက်နေ့၊ နံနက်ပိုင်းတွင် မန္တလေး တံတားဦးလေဆိပ်မှ တက်လာသည့် တိုက်လေယာဉ် နှစ်စီးသည် ဝက်လက်မြို့နယ် တောင်ခြမ်းရှိ ပေါက်ကန်ဘူတာကျေးရွာနှင့် ရေသောက်ကန်ကျေးရွာရှိ စာသင်ကျောင်းများကို ပစ်မှတ်ထားကာ ဗုံး ၃ ကြိမ် ကြဲချခဲ့ခြင်းဖြစ်သည်။ အဆိုပါ တိုက်ခိုက်မှုကြောင့် ၂ လသားအရွယ် ကလေးငယ်တစ်ဦးနှင့် အသက် ၆၀ ကျော်၊ ၇၀ ကျော်အရွယ် အဖွားနှစ်ဦးမှာ နေရာ၌ပင် ပွဲချင်းပြီး သေဆုံးခဲ့ပြီး၊ ဦးခေါင်းတွင် ပြင်းထန်ဒဏ်ရာရရှိခဲ့သည့် အသက် ၄၀ အရွယ် အမျိုးသမီးတစ်ဦးမှာလည်း ဆေးကုသမှုခံယူနေစဉ် ညနေပိုင်းတွင် ထပ်မံသေဆုံးသွားခဲ့သည်။ ဗုံးဒဏ်ကြောင့် ကျေးရွာအတွင်းရှိ စာသင်ကျောင်း၊ လူနေအိမ်များနှင့် ကား၊ ဆိုင်ကယ်အချို့လည်း မီးလောင် ပျက်စီးခဲ့ရသည်။ ဝက်လက်မြို့နယ်အတွင်းတွင် စစ်ကော်မရှင်တပ်က လေကြောင်းတိုက်ခိုက်မှုများကို နေ့စဉ်နီးပါး ကျူးလွန်နေပြီး ပြီးခဲ့သည့် ဒီဇင်ဘာလအတွင်း၌ပင် ၁၄ ကြိမ်အထိ ဗုံးကြဲခဲ့ရာ သံဃာတော်များနှင့် ကလေးသူငယ်များအပါအဝင် စုစုပေါင်း ၂၆ ဦး သေဆုံးခဲ့ပြီး ဖြစ်သည်။ Wetlet Informational Network (ဝက်လက် သတင်းကွန်ရက်) မှ တာဝန်ရှိသူတစ်ဦးကလည်း “စစ်တပ်က မြေပြင်မှာ စစ်ကြောင်း ထိုးရုံ တင် မကဘဲ ပြည်သူတွေကို ပစ်မှတ်ထားပြီး လေကြောင်းကနေပါ စနစ်တကျ ကြိုတင်စီစဉ် တိုက်ခိုက်နေတာ ပါ။ တိုက်ပွဲမရှိတဲ့ နေရာတွေကို ဗုံးကြဲတာဟာ စစ်ရာဇဝတ်မှု ကျူးလွန်နေတာဖြစ်လို့ ဒါတွေကို သက်သေ အဖြစ် မှတ်တမ်းတင်ထားပါတယ်” ဟု ပြောသည်။ အမျိုးသားညီညွတ်ရေးအစိုးရ (NUG)၊ လူ့အခွင့်အရေး ဝန်ကြီးဌာန၏ ဇန်နဝါရီ ၄ ရက်နေ့၊ ထုတ်ပြန်ချက်အရ အာဏာသိမ်း ၅ နှစ်အတွင်း စစ်ကောင်မရှင်၏ လေကြောင်းတိုက်ခိုက်မှုဖြစ်စဉ်ပေါင်း ၄၄၉၈ ကြိမ် ရှိခဲ့သည်။ အဆိုပါ စစ်ကော်မရှင်၏ လေကြောင်းတိုက်ခိုက်မှုများကြောင့် သေဆုံးခဲ့ရသည့် အရပ်သားပြည်သူ ၄,၆၈၃ ဦး ရှိပြီး သေဆုံးသူများထဲတွင် အသက် ၁၈ နှစ်အောက် ကလေးသူငယ် ၆၃၇ ဦး ပါဝင်သည်ဟု ထုတ်ပြန်ထားသည်။

ဝက်လက် ဗုံးကြဲတိုက်ခိုက်မှုအတွင်း ၂ လသား အပါအဝင် အရပ်သား ၄ ဦး သေဆုံး

ဟားခါး မြို့နယ်အတွင်း သန်းခေါင်ယံ ဗုံးကြဲမှုအတွင်း မိသားတစ်စုလုံး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၇ ရက်။ ချင်းပြည် ဟားခါးမြို့နယ်အတွင်း စစ်ကော်မရှင် တပ်က ညသန်းခေါင်းယံတွင် ဗုံးကြဲ တိုက်ခိုက်ရာ ကလေးငယ်များအပါအဝင် မိသားစု တစ်စုလုံး သေဆုံးသွားခဲ့သည်။ နေအိမ်တစ်လုံးပေါ်သို့ ဗုံးသီးတည့်တည့်ကျရောက်ပေါက်ကွဲခဲ့ပြီး အသက် ၃၈ နှစ် အရွယ် မိခင်ဖြစ်သူနှင့် အသက် ၆ နှစ်၊ ၃ နှစ်အရွယ် ကလေးငယ်နှစ်ဦးမှာ အခင်းဖြစ်နေရာတွင်ပင် ပွဲချင်း ပြီး သေဆုံးခဲ့သည်။ ပြီးခဲ့သည့် ဇန်နဝါရီလ ၄ ရက်နေ့၊ ည ၁၂ နာရီဝန်းကျင်တွင် ဟားခါး-မှန်တော ကားလမ်းပေါ်ရှိ အိမ်ခြေ ၈၀ ခန့် ရှိသော ဟားလ်တာကျေးရွာသို့ တိုက်ပွဲဖြစ်ပွားခြင်းမရှိဘဲ လေကြောင်းမှ ဗုံးသီးများ ကြဲချခဲ့ခြင်းဖြစ်သည်။ ပြင်းထန်ဒဏ်ရာများဖြင့် အသက်လုခဲ့ရသည့် ဖခင်ဖြစ်သူမှာလည်း ဆေးရုံသို့ ပို့ဆောင်ကုသရန် ကြိုးစားနေစဉ် အတွင်း ဇန်နဝါရီလ ၅ ရက် မွန်းလွဲပိုင်းတွင် ထပ်မံသေဆုံးသွားခဲ့သဖြင့် မိသားစုတစ်စုလုံး အသက်ဆုံးရှုံးခဲ့ရခြင်း ဖြစ်သည်။ မြေပြင်အခြေအနေနှင့် ပတ်သက်၍ ဒေသခံတစ်ဦးက “လေကြောင်းဗုံးကြဲခံရလို့ သားအမိတွေ သေဆုံးတယ်လို့ ကြားရတဲ့အချိန်မှာပဲ အခု ဖခင်ဖြစ်သူပါ ထပ်ဆုံးသွားပြီလို့ သိရတော့ တကယ့်ကို စိတ်မကောင်း ဖြစ်ရပါ တယ်။ ဘယ်လိုမှ မခံစားနိုင်တဲ့ကိစ္စပါ။ ဖခင် ဖြစ်သူဆိုရင် ဒဏ်ရာတွေက အရမ်းပြင်းလို့ ဆေးရုံပို့တဲ့လမ်းမှာပဲ ဆုံးသွားရှာတာ” ဟု ပြောသည်။ သေဆုံးခဲ့သည့် မိသားစုတွင် သားသမီး ၅ ဦးရှိသည့်အနက် ၈ နှစ်အရွယ် သမီးဖြစ်သူသည်လည်း ခြေနှစ်ဖက်နှင့် လက်တစ်ဖက်တွင် ထိခိုက်ဒဏ်ရာများရရှိကာ လက်ရှိတွင် ဟားခါးဆေးရုံ၌ ဆေးကုသမှု ခံယူနေရသည်။ ထို့အပြင် ကျေးရွာအတွင်းရှိ အသက် ၂၉ နှစ်အရွယ် ကိုယ်ဝန်ဆောင် အမျိုးသမီးတစ်ဦးအပါအဝင် အခြား ဒေသခံ ၃ ဦးလည်း ဒဏ်ရာရရှိခဲ့ပြီး နေအိမ် ၂၀ ထက်မနည်း ထိခိုက်ပျက်စီးခဲ့သည်။ ချင်းကာကွယ်ရေးတပ် (CDF-Hakha) ၏ တာဝန်ရှိသူတစ်ဦးက “ဒီရွာတွေက မြို့ပေါ်ကနေ ၄၅ မိုင်လောက် ဝေးပါတယ်။ အနီးအနားမှာ တိုက်ပွဲလည်းမရှိဘူး၊ တော်လှန်ရေးတပ်သားတွေ နေတဲ့နေရာလည်း မဟုတ် ပါဘူး။ အခုလို အပြစ်မဲ့ပြည်သူတွေကို ညသန်းခေါင်ယံမှာ ပစ်မှတ်ထားတိုက်ခိုက်တာက စစ်ရာဇဝတ်မှုကို ပြောင်ပြောင်တင်းတင်း ကျူးလွန်တာပဲ” ဟု ပြောသည်။ ဟားလ်တာကျေးရွာသည် ပြီးခဲ့သည့် ၂၀၂၅ ခုနှစ် ဖေဖော်ဝါရီလအတွင်းကလည်း လေကြောင်းတိုက်ခိုက်မှု ဒဏ်ကို ခံခဲ့ရဖူးပြီး ယခုအခါတွင်လည်း ထပ်မံတိုက်ခိုက်ခံရခြင်းဖြစ်သည်။ လက်ရှိတွင် ကျေးရွာအတွင်းရှိ ပြည်သူများသည် နာရေးကိစ္စများ ဆောင်ရွက်ပြီးနောက် လေကြောင်းရန်ကို စိုးရိမ်သဖြင့် နီးစပ်ရာ တောင်ယာများနှင့် တောတောင်များအတွင်းသို့ စစ်ဘေးရှောင်နေကြရသည်။

ဟားခါး မြို့နယ်အတွင်း သန်းခေါင်ယံ ဗုံးကြဲမှုအတွင်း မိသားတစ်စုလုံး သေဆုံး

ကသာအနီး ကျေးရွာဗုံးကြဲမှုတွင် အရပ်သား ၁ ဦးသေ၊ ၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၃ ရက်။ ကသာအနီး ကျေးရွာတစ်ရွာကို စစ်ကော်မရှင်က ဗုံးကြဲတိုက်ခိုက်မှုကြောင့် အရပ်သား တစ်ဦး သေဆုံးပြီး အခြား ၃ ဦး ဒဏ်ရာရရှိခဲ့သည်။ စစ်ကိုင်းတိုင်း၊ ကသာမြို့သိမ်းတိုက်ပွဲအတွင်း စစ်ကော်မရှင်၏ လေကြောင်းတိုက်ခိုက်မှုကြောင့် ကျေးရွာ အတွင်းရှိ ခေါက်ဆွဲဆိုင်တွင် ထိုင်နေသည့် အသက် ၅၀ ကျော်အရွယ် အမျိုးသားတစ်ဦး ဗုံးစထိမှန်သေဆုံးခဲ့ပြီး အရပ်သား ၃ ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။ ဇန်နဝါရီလ ၂ ရက် မွန်းလွဲ ၁ နာရီဝန်းကျင်တွင် မြို့သိမ်းတိုက်ပွဲဖြစ်ပွားရာ ကသာမြို့နှင့် ၁၅ မိုင်ခန့်အကွာရှိ မိုးတားလေးတိုက်နယ်၊ ဟဲနားကျေးရွာအတွင်းသို့ စစ်ကောင်စီလေယာဉ်က ဗုံးကြဲတိုက်ခိုက်ခဲ့ခြင်းဖြစ်သည်။ ဗုံးသီးကျရောက်ပေါက်ကွဲသည့်နေရာနှင့် မလှမ်းမကမ်းရှိ ခေါက်ဆွဲဆိုင်အတွင်း ထိုင်နေသူများ ဗုံးစထိမှန်ခဲ့ခြင်း ဖြစ်ကြောင်း ဒေသခံများက ပြောသည်။ ဖြစ်စဉ်နှင့်ပတ်သက်၍ ဒေသခံအမျိုးသမီးတစ်ဦးက “ခေါက်ဆွဲဆိုင်မှာထိုင်နေတာ။ ဗုံးအစအနသွားထိတာ။ ဗုံးသီးကျတဲ့နေရာနဲ့က နည်းနည်းဝေးတယ်။ ၃ ယောက်ဒဏ်ရာရပြီး ၁ ယောက်သေတယ်” ဟု အတည်ပြု ပြောဆိုသည်။ စစ်ကော်မရှင်တပ်သည် မြို့သိမ်းတိုက်ပွဲစတင်သည့် ဒီဇင်ဘာလနောက်ဆုံးပတ်မှ စတင်ကာ ယနေ့အထိ ကသာမြို့ပတ်ပတ်လည်နှင့် အနီးနားရှိကျေးရွာများကို လေကြောင်းမှ အပြင်းအထန် တိုက်ခိုက်နေခြင်းဖြစ်သည်။ ထိုသို့ တိုက်ခိုက်မှုများကြောင့် ကသာမြို့ပေါ်ရှိ ပတ္တမြားရပ်ကွက်မှ ပတ္တမြားစျေးနှင့် အထက (၂) စာသင်ကျောင်း ဆောင် အချို့ မီးလောင်ပျက်စီးခဲ့ရသည်။ ဇန်နဝါရီ ၂ ရက် ညပိုင်း ၇ နာရီဝန်းကျင်တွင်လည်း လေကြောင်းတိုက်ခိုက်မှုများ ဆက်တိုက်ရှိနေခဲ့ပြီး ဗုံးခိုကျင်း များအတွင်း ပုန်းအောင်းနေရသည့် စစ်ဘေးရှောင် အမျိုးသားတစ်ဦးက မြေပြင်အခြေအနေကို ယခုကဲ့သို့ ပြောပြသည်။ “ပျံတာနိမ့်နိမ့်လေး။ ကျဲနေတာ။ ကျနော်တို့လည်း ဗုံးခိုကျင်းထဲဝင်နေတာ။ မြန်လိုက်တာ အဲ့တိုက်လေယာဉ် တွေက နီးမှသိရတာ။ အခြေအနေကတော့ မကောင်းဘူးနေမှာ အဲ့လိုလာရင်။” တော်လှန်ရေး ပူးပေါင်းတပ်ဖွဲ့များသည် ဒီဇင်ဘာလ ၂၈ ရက် (စစ်ကော်မရှင်၏ အတုအယောင် ရွေးကောက်ပွဲ နေ့) တွင် ကသာမြို့သိမ်းတိုက်ပွဲကို စတင်ဆင်နွှဲခဲ့ခြင်းဖြစ်ပြီး၊ တိုက်ပွဲတစ်ပတ်အကြာတွင် မြို့လယ်ခေါင်အထိ ဝင်ရောက်စိုးမိုးထားနိုင်ပြီဖြစ်သည်။ လက်ရှိတွင် ခမရ ၃၀၉ တပ်ရင်းအနီးတစ်ဝိုက်၌ တိုက်ပွဲများ အပြင်းထန်ဆုံးဖြစ်ပွားနေပြီး နေအိမ်အများအပြား မီးလောင်ပျက်စီးနေသကဲ့သို့ မြို့ခံအများစုမှာလည်း ဘေးလွတ်ရာသို့ တိမ်းရှောင်နေကြရသည်။ တော်လှန်ရေး အင်အားစုများသည် ၂၀၂၃ ခုနှစ်ကတည်းက ကသာမြို့ပေါ်မှလွဲ၍ ကျေးရွာအုပ်စုအများစုကို ထိန်းချုပ်ထားခဲ့ခြင်း ဖြစ်ပြီး၊ ၂၀၂၅ ခုနှစ် နှစ်ကုန်ပိုင်းတွင်မှ မြို့သိမ်းတိုက်ပွဲကို အရှိန်မြှင့်တင်ကာ အပြတ်အသတ် တိုက်ခိုက်လာခြင်း ဖြစ်ကြောင်း မြေပြင်သတင်းရင်းမြစ်များက ပြောသည်။

ကသာအနီး ကျေးရွာဗုံးကြဲမှုတွင် အရပ်သား ၁ ဦးသေ၊ ၃ ဦး ဒဏ်ရာရ

ကျောက်တော်မြို့နယ်က ကိုယ်ပိုင်အထက်တန်းကျောင်း ဗုံးကြဲခံရမှု ၂၂ ဦးသေဆုံး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၂ ရက်။ ရခိုင်ပြည် ကျောက်တော်မြို့နယ်ထဲက ကိုယ်ပိုင် အထက်တန်းကျောင်းကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့ရာ သေဆုံးသူ ၂၂ ဦး ရှိသွားပြီဟု ဒေသခံများက ပြောသည်။ စက်တင်ဘာလ ၁၂ ရက်နေ့၊ နံနက်အစောပိုင်း ၁ နာရီခန့်တွင် ကျောက်ဖြူမြို့နယ်ထဲက သရက်တပင်ကျေးရွာရှိ ပညာပန်းခင်းဆိုသည့် ကိုယ်ပိုင် အထက်တန်းကျောင်း ရှေ့တည့်တည့်ကို လေကြောင်းမှ ဗုံးကြဲခဲ့ခြင်း ဖြစ်သည်။ ဒေသခံတစ်ဦးက “တိုက်ပွဲလည်း မဖြစ်ပါဘူး။ အခုဖြစ်သွားတဲ့နေရာက ကျောင်းသားတွေ နေတဲ့ နေရာပါ။ ဒီလို နေရကို ဗုံးကြဲတာက လူမဆန်တဲ့ လုပ်ရပ်လို့ပဲ ပြောရမှာပေါ့ဗျာ။ ကျောင်း တာဝန်ရှိသူ ပြောပြချက်အရ ဆိုရင် ကလေးတွေက အိပ်ခါစပဲ ရှိသေးတယ်။ ကျောင်းသားတွေ စာကျက်ပြီး အိပ်ခါစလေးမှာ ဖြစ်သွားတာ တဲ့။ လေယာဉ်သံတော့ ကြားလိုက်တယ် ပြေးချိန် မရလိုက်ဘူးတဲ့” ဟု ပြောသည်။ လေကြောင်းမှ ပေါင် ၅၀၀ ဗုံး နှစ်လုံး ကျောင်းရှေ့ တည့်တည့်ကို ကြဲသွားခြင်း ဖြစ်သည်ဟု အာရက္ခတပ်တော် ULA/AA က ထုတ်ပြန်ထားသည်။ ဖြစ်ဖြစ်ချင်း၌ သေဆုံးသူ ၁၇ ဦး၊ ဒဏ်ရာ ရသူ အယောက် ၃၀ နီးပါးခဲ့ရာမှ စက်တင်ဘာလ ၁၂ ရက်နေ့၊ နေ့လည် ပိုင်း ၂ နာရီကျော်ခန့်တွင် သေဆုံးသူ ဦးရေ ထပ်တိုးလာကာ ယခုတွင် သေဆုံးသူ ၂၂ ဦး ရှိသွားပြီ ဖြစ်သည်။ ဒေသခံတစ်ဦးက “မြင်ရတွေ့ရတာ တကယ်ကို စိတ်မကောင်းစရာပါ။ လုပ်ရက်လိုက်ကြတာဗျာ။ ဘယ်လိုမှ ခွင့်လွှတ်စရာ အကြောင်းမရှိဘူး။ လူထုလည်း နာရေးရော စိုးရိမ်တာရော အဲ့လိုဖြစ်နေကြတာ။ ဟိုး ပြီးခဲ့ နှစ်ရက်လောက်ကလည်း ကင်းထောက်ပျံသွားတာရှိတယ်။ နောက်ပြီး ဇီးချောင်းဘက်ကို လာပစ်သွားတာ လည်း ရှိနေတော့ ထပ်လာမှာကိုလည်း စိုးရိမ်ကြတာတော့ရှိတယ်” ဟု ပြောသည်။ ဒဏ်ရာရထားသောသူများထဲ၌ အသက်အန္တရာယ် စိုးရိမ်ရသည့် သူများ ရှိနေသေးသည်ဟု ဆိုသည်။ ယခုဖြစ်စဉ်အတွင်း သေဆုံး ဒဏ်ရာ ရသူများထဲ ကျောင်းသား အများစု ပါဝင်သည်ဟု ဆိုသည်။ ကျောင်းသား များမှာ Grade 10၊ Grade 11၊ Grade 12 မှာ ကျောင်းသားများ ဖြစ်သည်ဟု ဆိုသည်။ ထို့အပြင် သေဆုံးဒဏ်ရာ ရသူများထဲ၌ ကိုယ်ပိုင်ကျောင်းအနီးရှိ အရပ်သားနေအိမ်များမှ အရပ်သားပြည်သူများ လည်း ပါသည်ဟု ဆိုကြသည်။ ဗုံးကြဲမှုကြောင့် ပညာပန်းခင်း ကိုယ်ပိုင်ကျောင်းအပြင် အနီးအနားရှိ အခြားကိုယ်ပိုင်ကျောင်း တစ်ကျောင်းလည်း လုံးဝပျက်စီးသွားသည် မြို့ခံများက ပြောသည်။ ကျောက်တော်မြို့နယ်၊ သရက်တပင်ကျေးရွာက ‘ပညာပန်းခင်း’ ကိုယ်ပိုင်အထက်တန်းကျောင်းနှင့် ‘အမြင်သစ်’ ကိုယ်ပိုင်အထက်ကျောင်းတို့ကို တပြိုင်တည်း ပေါင်း ၅၀၀ ဗုံး ၂လုံး ပစ်ခတ်သွားခြင်း ဖြစ်သည်ဟု ရခိုင်တက်ကြွလှုပ်ရှားသူ ကိုဝေဟင်အောင်က ၎င်း၏ လူမှုကွန်ရက် စာမျက်နှာတွေ ရေးသားထားသည်။ ကျောင်းနှစ်ကျောင်းလုံး လုံးဝ ပျက်စီးသွားသည့်အပြင် အနီးအနားပတ်ဝန်းကျင်က အရပ်သား နေအိမ် ၆ဆောင်လည်း လုံးဝပျက်စီးသွားသည်ဟု ဆိုသည်။ ဓါတ်ပုံ - ကိုဝေဟင်အောင်

ကျောက်တော်မြို့နယ်က ကိုယ်ပိုင်အထက်တန်းကျောင်း ဗုံးကြဲခံရမှု ၂၂ ဦးသေဆုံး

လေကြောင်းတိုက်ခိုက်မှုထဲ ၅ နှစ်အတွင်း အရပ်သား ၄၀ ဦးသေဆုံးဟု မင်းတပ် ပအဖ ထုတ်ပြန်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ချင်းပြည် တောင်ပိုင်း၊ မင်းတပ်မြို့နယ်ထဲ စစ်တပ်၏ လေကြောင်း တိုက်ခိုက်မှုများကြောင့် ၅ နှစ်အတွင်း ကလေးများ အပါအဝင် အရပ်သားပြည်သူ အယောက် ၄၀ သေဆုံးခဲ့သည်ဟု မင်းတပ်မြို့နယ် ပြည်သူ့ အုပ်ချုပ် ရေး အဖွဲ့က ထုတ်ပြန်သည်။ ထို့အပြင် ကလေးများနှင့် အမျိုးသမီးများ အပါအဝင် အရပ်သားပြည်သူ အယောက် ၁၂၀ ထိခိုက်ဒဏ်ရာရခဲ့ သည်ဟု ထုတ်ပြန်ချက်ထဲတွင် ဖော်ပြထားသည်။ အဆိုပါ အရေအတွက်မှာ စစ်တပ်က အာဏာသိမ်းပြီးနောက် ၂၀၂၁ ခုနှစ်၊ မေလ ၂၇ ရက်နေ့မှ ၂၀၂၅ ခုနှစ်၊ ဩဂုတ် ၃ ရက်နေ့ အထိ ကောက်ခံရရှိသော စာရင်း ဖြစ်သည်ဟု မင်းတပ်မြို့နယ် ပြည်သူ့ အုပ်ချုပ်ရေး အဖွဲ့က ဆိုသည်။ ၅ နှစ်တာအတွင်း မင်းတပ်မြို့ကို လေကြောင်းမှ ဗုံးကြဲတိုက်ခိုက်မှု အကြိမ်ရေ ၁၇၆ ကြိမ်ထက်မနည်း ကြဲခဲ့ သည်ဟု ဩဂုတ်လ ၂၃ ရက်နေ့ ထုတ်ပြန်ချက်ထဲ၌ ဖော်ပြထားသည်။ သို့သော် ၂၀၂၄ ခုနှစ်၊ နိုဝင်ဘာ ၉ ရက်နေ့မှ ဒီဇင်ဘာလ ၂၁ ရက်နေ့ အထိ CDF - မင်းတပ်နှင့် မဟာမိတ်တို့က ဆင်နွှဲခဲ့သော မြို့သိမ်းတိုက်ပွဲကာလအတွင်း လေကြောင်းတိုက်ခိုက်မှု အကြိမ်ရေ ၃၀၀ ကျော်နှင့် ထိခိုက်ပျက်စီး မှုတို့ကို ထည့်သွင်းမထားဘူးဟု ဆိုသည်။ လေကြောင်း ဗုံးကြဲ တိုက်ခိုက်မှုများ ဒေသခံပြည်သူများ၏ အိမ်အလုံးရေ ၁၇၂ လုံး၊ စာသင်ကျောင်း၊ ဆေးရုံ၊ ဆေးခန်းနှင့် အစိုးရ အဆောက်အအုံပေါင်း ၄၀၊ ဘုရားကျောင်း၊ ဘုန်ကြီးကျောင်း စသည့် ဘာသာရေး အဆောက်အအုံ ၁၈ လုံး ထိမှန် ပျက်စီးခဲ့သည်။ အထက်ပါ လေကြောင်းတိုက်ခိုက်မှုများကိုပါ ထည့်သွင်းရေတွက်မည်ဆိုပါက မင်းတပ်မြို့နယ်အတွင်း စစ်ကော်မရှင်တပ်က လေကြောင်းတိုက်ခိုက်မှု အကြိမ်ရေပေါင်း ၄၇၆ ကြိမ်ထက် မနည်း ကြဲခဲ့သည်ဟု ဆိုရမည်။ မင်းတပ်မြို့နယ်ကို CDF - မင်းတပ်နှင့် မဟာမိတ်တပ်ဖွဲ့တို့က ၂၀၂၄ ခုနှစ်၊ ဒီဇင်ဘာလတွင် တိုက်ခိုက် သိမ်းပိုက် နိုင်ခဲ့ခြင်း ဖြစ်သည်။ လက်ရှိတွင် မင်းတပ်မြို့နယ် ပြည်သူ့အုပ်ချုပ်ရေးအဖွဲ့က မြို့တွင်း အုပ်ချုပ်ရေးနှင့် ပြန်လည် ထူထောင်ရေး လုပ်ငန်းများကို လုပ်ဆောင်နေခြင်း ဖြစ်သည်။

လေကြောင်းတိုက်ခိုက်မှုထဲ ၅ နှစ်အတွင်း အရပ်သား ၄၀ ဦးသေဆုံးဟု မင်းတပ် ပအဖ ထုတ်ပြန်  

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

တောင်ကြီး အုပ်ချုပ်ရေးမှူးများ အပြောင်းအလဲ လုပ်မည်ဟု သတင်းများ ထွက်ပေါ်
ကိုးကန့် MNDAA နှင့် တအာင်း TNLA တို့ တိုက်ပွဲများ ရပ်ပြီး လောက်ကိုင်တွင် ဆွေးနွေး
မော်ချီးတွင် အရပ်သား ပစ်မှတ်များ တိုက်ခိုက်ခံနေရ
စစ်ကိုင်းတိုင်း ကောလင်းအစပ်က ရွှေဖောင်များကို လေကြောင်းမှ တိုက်ခိုက်
စစ်ပွဲ၏ ဒုက္ခအခက်အခဲများကိုသာ အသားပေးရန် သတင်းထောက်များကို ပုပ်ရဟန်းမင်းကြီး တိုက်တွန်း

Archives

Archives

×Close