aa – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: aa

ဘူးသီးတောင်နှင့် မောင်တောတွင် အေအေနှင့် ARSA တို့ တိုက်ပွဲများ ဆက်တိုက်ဖြစ်ပွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ရခိုင်ပြည်၊ မောင်တောမြို့နယ် ရခိုင်-ဘင်္ဂလားဒေ့ရှ် နယ်စပ်နှင့် ဘူးသီးတောင်မြို့နယ်တို့တွင် အာရက္ခတပ်တော် (AA) နှင့် ARSA မွတ်ဆလင် လက်နက်ကိုင်အဖွဲ့တို့အကြား တိုက်ပွဲများ ဆက်တိုက်ဖြစ်ပွားလျက်ရှိကြောင်း ဒေသတွင်း စစ်ရေးသတင်းအရင်းအမြစ်များက ပြောသည်။ မောင်တောမြို့နယ်မြောက်ပိုင်း မိုင်တိုင် (၅၆) အနီးရှိ Y Hlan Zone နှင့် မီးဇင်ဖာရား အကြားတွင် တိုက်ပွဲပြင်း ထန်ခဲ့ပြီး စက်တင်ဘာ ၂၈ ရက်အထိ ထိတွေ့တိုက်ပွဲအချို့ ဆက်လက်ဖြစ်ပွားခဲ့သည်။ ထို့ပြင် မောင်တောတောင်ပိုင်း မွတ်ဆလင်ကျေးရွာများဖြစ်သည့် ဂိုရာခါလီရွာ၊ ဘူးသီးတောင်မြို့နယ် ဂူတာပြင် ကျေးရွာနှင့် တောင်ဘဇားကျေးရွာတို့အပါအဝင် မေယုတောင်တန်းဘက်တွင်ပါ တိုက်ပွဲများ ဖြစ်ပွားခဲ့ခြင်း ဖြစ်သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “မောင်တောတောင်ပိုင်း မွတ်ဆလင်ရွာတွေဖြစ်တဲ့ ဂိုရာခါလီရွာ၊ ဘူးသီးတောင်၊ ဂူတာပြင်ရွာတွေမှာဖြစ်တာပါ။ မေယုတောင်တန်းဘက်လည်း တိုက်ပွဲရှိတယ်။ အေအေကလည်း လုံခြုံရေးအရ ကင်းလှည့်တာတွေရှိသလို ARSA ဘက်က ကျေးရွာတွေကို ဝင်လာတာတွေ ရှိနေတယ်။ မွတ်ဆလင် လက်နက်ကိုင်တွေက ဘင်္ဂလားဒေ့ရှ်ဘက်ကို ဝင်လိုက် ရခိုင်ဘက် ပြန်လာလိုက် ဒီလိုတွေ လုပ်နေတယ်။ နယ်စပ်က ရွာတွေက ဒေသခံတွေကတော့ စိုးရိမ်ပါတယ်” ဟု ပြောသည်။ ပြီးခဲ့သည့် စက်တင်ဘာလ ၂ ရက်နေ့တွင် မောင်တောတောင်ပိုင်း ဂိုရာခါလီရွာ၌ လည်းကောင်း၊ စက်တင်ဘာ ၁၅ ရက်တွင် ဘူးသီးတောင်မြို့နယ် ဂူတာပြင်ရွာ၌ လည်းကောင်း၊ စက်တင်ဘာ ၂၁ ရက်တွင် ဘူးသီးတောင်မြို့နယ် တောင်ဘဇားရွာ၌ လည်းကောင်း ARSA နှင့် AA တို့ တိုက်ပွဲဖြစ်ပွားခဲ့ပြီး နှစ်ဖက် ထိခိုက်ကျဆုံးမှုများ ရှိခဲ့သည်။ ထို့ပြင် မောင်တောမြို့နယ်မြောက်ပိုင်း မိုင်တိုင် (၅၆) အနီး၌ ARSA အဖွဲ့က အာရက္ခတပ်တော် (AA) တပ်စခန်း ကို လာရောက်တိုက်ခိုက်သဖြင့် ထိတွေ့တိုက်ပွဲ ဖြစ်ပွားခဲ့ပြီး AA ဘက်က နယ်မြေရှင်းလင်းရေးများ ဆက် လက်ဆောင်ရွက်နေကြောင်း ဒေသတွင်း သတင်းဌာနတစ်ခုဖြစ်သည့် DMG ၏ ဖော်ပြချက်အရ သိရသည်။ ယခုကဲ့သို့ ARSA ၏ တိုက်ခိုက်မှုသည် လက်ရှိဖြစ်ပွားနေသည့် စစ်တွေတိုက်ပွဲနှင့်လည်း ဆက်စပ်နိုင်ကြောင်း စစ်ရေးအကဲခတ်များက သုံးသပ်ကြသည်။ စစ်တွေတိုက်ပွဲတွင် စစ်ကော်မရှင်တပ်များ နောက်ဆုတ်နေရချိန်၌ ARSA နှင့် စစ်ကော်မရှင်တပ်တို့ ပူးပေါင်းကာ အဘက်ဘက်မှ ထိုးစစ်ဆင် တိုက်ခိုက်လာခြင်းဖြစ်နိုင်ကြောင်း ရခိုင်စစ်ရေးလေ့လာစောင့်ကြည့်သူတစ်ဦး၏ ပြောကြားချက်ကို ကိုးကား၍ DMG က ဖော်ပြထားသည်။ မွတ်ဆလင် လက်နက်ကိုင်အဖွဲ့များဖြစ်ကြသည့် ARSA၊ ARA နှင့် RSO တို့သည် ဘင်္ဂလားဒေ့ရှ်နယ်စပ်မှ တစ်ဆင့် ရခိုင်ပြည်အတွင်းသို့ စိမ့်ဝင်လှုပ်ရှားကာ AA တပ်စခန်းများကို တိုက်ခိုက်ခြင်း၊ ဒေသခံများကို ဖမ်းဆီး သတ်ဖြတ်ခြင်း၊ ခြုံခိုတိုက်ခိုက်ခြင်းများအပြင် ပြန်ပေးဆွဲခြင်းများကို လုပ်ဆောင်လျက်ရှိကြောင်း ဒေသခံများက ပြောသည်။ မေယုတောင်တန်းအတွင်း ARSA အဖွဲ့ စိမ့်ဝင်လှုပ်ရှားနေသည့် သတင်းများကြောင့် AA ဘက်က ရပ်ရွာ လုံခြုံရေးအတွက် အလှည့်ကျ ကင်းစောင့်ခိုင်းမှုများ ပြုလုပ်ထားသည်။ ထို့ပြင် မောင်တောခရိုင်အတွင်း မွတ်ဆလင်လက်နက်ကိုင်အဖွဲ့များ၏ အန္တရာယ်ကို ကာကွယ်ရန်နှင့် လုံခြုံရေး တိုးမြှင့်ရန်အတွက် AA က ဩဂုတ်လ ၉ ရက်နေ့မှ စတင်၍ ည ၁၀ နာရီမှ နံနက် ၄ နာရီအတွင်း ညမထွက်ရ အမိန့် ထုတ်ပြန်ထားသည်။ #ARSA #AA

ဘူးသီးတောင်နှင့် မောင်တောတွင် အေအေနှင့် ARSA တို့ တိုက်ပွဲများ ဆက်တိုက်ဖြစ်ပွား

ရခိုင်-အိန္ဒိယ နယ်စပ်လမ်းကြောင်း ပြန်ဖွင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ အိန္ဒိယ-ရခိုင် နယ်စပ် ကုန်သွယ်ရေးလမ်းကြောင်းများကို ပြန်လည်ဖွင့်လှစ်ရန် မာရာလူငယ်အဖွဲ့ (MTP) နှင့် ရက္ခိုင်အမျိုးသားအဖွဲ့ချုပ် (ULA/AA) တို့ သဘောတူညီခဲ့ကြကြောင်း ဒေသတွင်း ကုန်သည်များက ပြောသည်။ မာရာလူငယ်အဖွဲ့ (MTP) နှင့် ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) တို့ ပူးပေါင်း အစည်း အဝေး ပြုလုပ်ခဲ့ပြီးနောက် အိန္ဒိယ-ရခိုင် နယ်စပ်ကုန်သွယ်ရေး လမ်းကြောင်းများကို ပြန်လည်ဖွင့်လှစ်ရန် စက်တင်ဘာလ ၂၄ ရက်နေ့တွင် သဘောတူညီခဲ့ကြခြင်း ဖြစ်သည်။ ပြီးခဲ့သည့် စက်တင်ဘာလ ၁၆ ရက်နေ့မှ စတင်၍ ယာယီပိတ်ထားခဲ့သည့် လိုဒေါ (Lodaw)၊ လိုမာဆူ (Lomasu) နှင့် ခယ်ခုံ/ခိုင်ခီ (Khaikhy) ကုန်သွယ်ရေး လမ်းကြောင်းများကို စက်တင်ဘာလ ၂၄ ရက်နေ့၊ နံနက်ပိုင်းတွင် MTP ဌာနချုပ် တည်ရှိရာ ဆိုင်းဟားမြို့၌ နှစ်ဖက်တာဝန်ရှိသူများ တွေ့ဆုံဆွေးနွေးအပြီး ပြန်လည်ဖွင့်လှစ်ခဲ့ခြင်း ဖြစ်သည်။ ဒေသခံ ကုန်သည်တစ်ဦးက “စက်တင်ဘာ ၂၄ ရက် မနက် ၆ နာရီခွဲလောက်မှာ MTP ဌာနချုပ် ဆိုင်းဟားမှာ တွေ့ဆုံကြပါတယ်။ ULA/AA ဘက်က နယ်စပ်ဆက်ဆံရေးအရာရှိ (Border Relation Officer) နဲ့ မြို့နယ် အုပ်ချုပ်ရေးမှူး (County Administrator) တို့ တက်ရောက်ပါတယ်။ MTP ဘက်က တာဝန်ရှိသူတွေ တက် ရောက်ကြပြီး နှစ်ဖက်တွေ့ဆုံမှုကနေ ရခိုင်နဲ့ မရာကြား ချစ်ကြည်ရေး ပိုမိုတိုးမြှင့်ဖို့နဲ့ ပူးပေါင်းလက်တွဲဖို့ သဘောတူကြပါတယ်။ အဓိကအရေးကြီးတဲ့ နယ်စပ်ကုန်သွယ်ရေးကို ယာယီရပ်ဆိုင်းရာကနေ ပြန်လည် ဖွင့် လှစ်ဖို့ သဘောတူလိုက်ပါပြီ” ဟု ပြောသည်။ အဆိုပါ နယ်စပ်ကုန်သွယ်ရေးလမ်းကြောင်းသည် မီဇိုရမ်ပြည်နယ်တောင်ပိုင်း ခယ်ခုံ/ခိုင်ခီကျေးရွာ ကုန်သွယ် ရေးဂိတ်၌ စက်တင်ဘာလ ၁၄ ရက်နေ့က ကုန်တင်စက်လှေ ဦးစားပေး အလှည့်ကျစနစ်နှင့် ပတ်သက်၍ အငြင်း ပွားမှု ဖြစ်ပွားကာ ဂိတ်ရုံး မီးရှို့ခံရသည့် ဖြစ်စဉ်ကြောင့် စက်တင်ဘာလ ၁၆ ရက်နေ့မှ စတင်၍ MTP ဘက်က ယာယီ ပိတ်ထားခဲ့ခြင်း ဖြစ်သည်။ အဆိုပါ မီးရှို့ဖျက်ဆီးမှုဖြစ်စဉ်တွင် ပါဝင်သူများကို ULA/AA ၏ တရားဥပဒေစိုးမိုးရေးနှင့် တရားစီရင်ရေးဌာန (ဒီလပ်) က ဖမ်းဆီးထိန်းသိမ်းထားပြီး ဥပဒေအတိုင်း အရေးယူဆောင်ရွက်လျက်ရှိကြောင်း ULA/AA ပြောရေး ဆိုခွင့်ရှိသူ ဦးခိုင်သုခက ဒေသတွင်း သတင်းမီဒီယာများကို ပြောဆိုထားသည်။ ရခိုင်ကုန်သည်တစ်ဦးက “အခုတော့ နယ်စပ်လမ်းကြောင်းက ပုံမှန်အတိုင်း ပြန်ဖြစ်သွားပါပြီ။ သွားလာလို့ ရသလို ကုန်ပစ္စည်းတွေလည်း ပုံမှန်ချလို့ ရနေပါပြီ။ လမ်းပိတ်သွားတဲ့ ရက်ပိုင်းအတွင်းမှာတင် ကုန်စည်စီးဆင်း မှု တော်တော်လေး နှောင့်နှေးသွားခဲ့ပါတယ်။ အခုလို နှစ်ဖက် အမြန်ဆုံး ညှိနှိုင်းပြီး လမ်းပြန်ဖွင့်ပေးလိုက်တာ ဟာ ဒေသခံ ပြည်သူအကုန်လုံးအတွက် အရမ်းကောင်းပါတယ်” ဟု ပြောသည်။ အိန္ဒိယ-အာရက္ခ နယ်စပ်ကုန်သွယ်ရေးလမ်းကြောင်းသည် စစ်အာဏာသိမ်းပြီးနောက် စစ်အုပ်စုတပ်၏ လမ်းပန်း ဆက်သွယ်ရေး ပိတ်ဆို့ခံထားရသည့် ရခိုင်ပြည်နှင့် ချင်းပြည်တောင်ပိုင်း (ပလက်ဝ) ဒေသတို့အတွက် စက်သုံး ဆီ၊ ဆေးဝါးနှင့် စားသောက်ကုန်များကို အဓိက တင်သွင်းနေရသည့် တစ်ခုတည်းသော အသက်ရှူပေါက် ဖြစ် သည်။ လမ်းကြောင်း ပိတ်ထားသည့် ရက်ပိုင်းအတွင်း ကုန်စည်စီးဆင်းမှု နှောင့်နှေးခဲ့ရုံသာမက ကုန်တင်ကုန်ချ လုပ်ကိုင် နေရသည့် ဒေသခံ ရာနှင့်ချီ စားဝတ်နေရေး ခက်ခဲခဲ့ရကြောင်း ဒေသခံများက ပြောသည်။ လက်ရှိတွင် အိန္ဒိယ-အာရက္ခ နယ်စပ်ဒေသအများစုကို ULA/AA က ထိန်းချုပ်ထားပြီး ကုန်သွယ်ရေးဆိုင်ရာ စည်းမျဉ်းများ ချမှတ်ကာ အကောက်ခွန် ကောက်ခံခြင်းများ ပြုလုပ်လျက်ရှိရာ၊ ယခုကဲ့သို့ လမ်းကြောင်း ပြန် လည်ဖွင့်လှစ်နိုင်ခြင်းက ဒေသခံ ပြည်သူများ၏ စားဝတ်နေရေးနှင့် ဒေသတွင်း စီးပွားရေးအတွက် ကြီးမားသည့် အထောက်အကူ ဖြစ်လာမည် ဖြစ်သည်။ #ULA #AA #မာရာလူငယ် #MTP

ရခိုင်-အိန္ဒိယ နယ်စပ်လမ်းကြောင်း ပြန်ဖွင့်

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အမျိုးသမီး သေဆုံးသူ မြင့်တက်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်အတွင်း မြေပြင်တိုက်ပွဲများတွင် အာရက္ခတပ်တော် (AA) နှင့် စစ်အုပ်စုတပ်တို့ တိုက်ပွဲများ ပြင်းထန် လျက်ရှိပြီး စစ်အုပ်စုတပ်ဘက်မှ လေကြောင်းနှင့် လက်နက်ကြီးများဖြင့် ဆက်တိုက် ပစ်ခတ်တိုက်ခိုက်နေခြင်း တို့ကြောင့် ဒေသခံ အမျိုးသမီးများ ထိခိုက်သေဆုံးမှု သိသိသာသာ မြင့်တက်လာနေကြောင်း ဒေသခံများနှင့် ပရဟိတဆောင်ရွက်နေသူများက ပြောသည်။ လက်ရှိတွင် ရခိုင်ပြည် မြောက်ပိုင်းနှင့် တောင်ပိုင်းရှိ မြို့နယ်များအပြင် နယ်စပ်ဒေသ ၄ နေရာထက်မက၌ တိုက်ပွဲများ ပြင်းထန်နေပြီး စစ်အုပ်စုတပ်ဘက်မှ စစ်ရေးအရ အရေးနိမ့်လာချိန်တွင် အရပ်သားများ လှုပ်ရှား သွားလာသည့် နေရာများနှင့် ကျေးရွာများကို လေကြောင်းမှ ပစ်မှတ်ထား ဗုံးကြဲနေသည်ဟု ဆိုသည်။ ပရဟိတဆောင်ရွက်နေသူ အမျိုးသားတစ်ဦးက “ဩဂုတ်လနဲ့ စက်တင်ဘာလမှာ ရခိုင်ကို ဗုံးကြဲတာ ပိုများလာ တယ်။ ရခိုင်တောင်ပိုင်း ဂွ၊ သံတွဲ၊ တောင်ကုတ်အပြင် မြောက်ပိုင်းက မြို့တွေမှာလည်း အမျိုးသမီး သေဆုံးတာ တွေ များတယ်။ သံတွဲ ကျောက်ကြီးက ဘုန်းကြီးကျောင်းနားကို စစ်တပ် ဗုံးကြဲတာမှာ သေဆုံးတာ အမျိုးသမီး တွေ ပိုများတယ်။ အခု ပုဏ္ဏားကျွန်း၊ ရသေ့တောင်၊ စစ်တွေ နယ်စပ် အပါအဝင် ရခိုင်တစ်ပြည်လုံးကို ကြဲနေ တာပါ” ဟု လက်ရှိ မြေပြင်အခြေအနေကို ပြောသည်။ ပြီးခဲ့သည့် ဩဂုတ်လ ၁၀ ရက်နေ့ကလည်း သံတွဲမြို့နယ်၊ ကျောက်ကြီးကျေးရွာ ဘုန်းကြီးကျောင်း အနီးပတ်ဝန်း ကျင်သို့ စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် အမျိုးသမီး ၁၁ ဦး အပါအဝင် ဒေသခံ ၁၆ ဦး ဗုံးစထိမှန် သေဆုံးခဲ့ပြီး ပြည်သူအများအပြား ဒဏ်ရာရရှိခဲ့သည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စက်တင်ဘာလ ၂၂ ရက်နေ့ ထုတ်ပြန်ချက် အရ ပြီးခဲ့သည့် ဇူလိုင်လ ၁ ရက်မှ စက်တင်ဘာလ ၂၂ ရက်အထိ သုံးလနီးပါး ကာလအတွင်း နိုင်ငံတစ်ဝန်း စစ်အုပ်စုတပ်ကြောင့် အမျိုးသမီး စုစုပေါင်း ၈၉ ဦး သေဆုံးခဲ့ရာတွင် ရခိုင်ပြည်မှ အယောက် ၃၀ ပါဝင်သဖြင့် အမျိုးသမီး သေဆုံးမှု အများဆုံး ဒေသဖြစ်ခဲ့ကြောင်း ဖော်ပြထားသည်။ AAPP ၏ စာရင်းများအရ အဆိုပါ သုံးလတာအတွင်း သေဆုံးခဲ့ရသည့် အမျိုးသမီး ၈၉ ဦးအနက် ၇၆ ဦးမှာ လေကြောင်းမှ တိုက်ခိုက်ခံရမှုကြောင့် သေဆုံးခဲ့ရခြင်းဖြစ်ပြီး အသက် ၁၈ နှစ်အောက် မိန်းကလေး ၁၂ ဦး ပါဝင်သည် ဟု ဆိုသည်။ AAPP က “သေဆုံးရသည့် အကြောင်းအရင်းအနေဖြင့် (၇၆) ဦးမှာ လေကြောင်းဖြင့် တိုက်ခိုက်မှု ကြောင့် အများဆုံး သေဆုံးခဲ့ပြီး သေဆုံးသူများအနက် ရခိုင်ပြည်နယ်၌ (၃၀) ဦးဖြင့် အများဆုံး သေဆုံးခဲ့သည်” ဟု သတင်းထုတ်ပြန်ချက်တွင် ထည့်သွင်းဖော်ပြထားသည်။ ၂၀၂၁ ခုနှစ် ဖေဖော်ဝါရီလ ၁ ရက် စစ်အာဏာသိမ်းချိန်မှ ၂၀၂၆ ခုနှစ် စက်တင်ဘာလ ၂၂ ရက်နေ့အထိ စစ်အုပ်စု တပ်နှင့် ၎င်း၏ လက်ပါးစေများကြောင့် နွေဦးတော်လှန်ရေးကာလအတွင်း သေဆုံးခဲ့ရသည့် ပြည်သူ စုစုပေါင်း ၈,၄၁၈ ဦး ရှိပြီဖြစ်ကြောင်းလည်း AAPP ၏ စာရင်းများတွင် ဖော်ပြထားသည်။ ဓါတ်ပုံ - (စစ်တပ်၏ လေကြောင်းတိုက်ခိုက်မှုကြောင့် သေဆုံးခဲ့ရသည့် ပလက်ဝ၊ စိမ်းညှင်းဝကျေးရွာမှ မူလတန်းကျောင်းသားနှင့် ဒေသခံများ။ / AA) #ရခိုင်ပြည်နယ် #AA #စစ်အုပ်စု

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အမျိုးသမီး သေဆုံးသူ မြင့်တက်လာ

ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ ရခိုင်ပြည်အတွင်း အာရက္ခတပ်တော် (AA) ထိန်းချုပ်ထားသည့် မြို့နယ်အချို့၌ ဒေသတွင်း ငွေကြေးလည်ပတ် စီးဆင်းမှု နည်းပါးလာပြီး လက်ငင်းငွေသား ရရှိရန် ခက်ခဲနေသဖြင့် ငွေလွှဲ၊ ငွေထုတ် ဝန်ဆောင်ခများ မြင့်တက် လာနေသည်ဟု ဒေသခံများက ပြောသည်။ ပြည်ပနှင့် အခြားဒေသများမှ AA ထိန်းချုပ်နယ်မြေများသို့ ငွေလွှဲပို့ရာတွင် ယခင်က ငွေတစ်သိန်းလျှင် ဝန်ဆောင် ခ ၅,၀၀၀ ကျပ်ကျော်မှ ရာခိုင်နှုန်း အဆင့်ဆင့် တိုးမြင့်လာခဲ့ပြီး ယခု စက်တင်ဘာလ နောက်ဆုံးပတ်တွင် တစ်သိန်းလျှင် ၇,၀၀၀ ကျပ်အထိ ဝန်ဆောင်ခ ပေးနေရကြောင်း ဒေသခံများက ပြောသည်။ စစ်အုပ်စု၏ လေကြောင်းတိုက်ခိုက်မှုများ၊ လမ်းပန်းဆက်သွယ်ရေး အခက်အခဲများနှင့် သယ်ယူပို့ဆောင် ရေး ထိန်းချုပ်ခံထားရမှုများကြောင့် ဒေသတွင်း၌ စီးပွားရေး လုပ်ကိုင်ရခက်ခဲကာ ပြည်ပရောက် မိသားစုဝင်များ လှေခါးထစ်ပေးပို့သည့် ငွေကြေးကိုသာ အဓိက အားထားနေရသူများမှာ ငွေထုတ်ခ မြင့်တက်လာသည့်အတွက် ထပ်မံ အခက်တွေ့နေကြရသည်။ ရခိုင်ပြည်တောင်ပိုင်းတွင် နေထိုင်သည့် ဒေသခံ အမျိုးသမီးတစ်ဦးက “အခု ကျမတို့ဒေသမှာ စီးပွားရေးလည်း မကောင်းဘူး။ နေ့စဉ်လိုလို ဗုံးကြဲနေတာကြောင့် လုပ်စားလို့က ဘာမှမရဘူး။ ပင်လယ်ဆင်းတာ၊ လယ်စိုက်တာ လည်း မအောင်မြင်ဘူး။ အဲတော့ နိုင်ငံခြားမှာ အလုပ်လုပ်နေတဲ့ သားသမီးတွေ၊ တခြားနေရာမှာ လုပ်နေကြတဲ့ ဆွေမျိုးတွေ၊ လင်တွေ၊ မိသားစုတွေဆီက ငွေကို အားထားပြီး စားနေရတာ။ အဲ့အချိန်မှာ ငွေလွှဲခတွေက ဈေး တက်လာတယ်။ တစ်သိန်းကို ခုနစ်ထောင်လောက် ပေးနေရတယ်။ အဲ့ဒါ နေရာတိုင်းမှာမရ၊ ထုတ်မယ့် နေရာကို မိုင်ချီပြီး သွားထုတ်ရတာပါ။ တော်တော် ခက်ခဲပါတယ်” ဟု ပြောသည်။ ထို့ပြင် ၂၀၂၆ ခုနှစ် ဇွန်လ ၁၁ ရက်တွင် KBZ Bank ၏ စနစ်အဆင့်မြှင့်တင်မှု ပြုလုပ်ပြီးနောက် KPay နှင့် KBZ ဘဏ် ဒစ်ဂျစ်တယ် ဝန်ဆောင်မှု အကောင့်အချို့ ပိတ်ပင်ခံရခြင်း သို့မဟုတ် အသုံးပြုခွင့် ကန့်သတ်ခံရခြင်းတို့ ကြောင့် ငွေလွှဲဝန်ဆောင်မှု လုပ်ကိုင်သူများအနေဖြင့် လက်ငင်းငွေသား ထုတ်ပေးရာတွင် ပိုမို ကြန့်ကြာ ခက်ခဲ လာခြင်း ဖြစ်သည်။ ယခုကဲ့သို့ ငွေထုတ်ခများ ဆက်တိုက်မြင့်တက်ပြီး ငွေသားရှားပါးလာရသည့် အကြောင်းရင်းနှင့် ပတ်သက်၍ ဒေသတွင်း ငွေလွှဲဝန်ဆောင်မှု လုပ်ကိုင်သူတစ်ဦးက ယခုကဲ့သို့ ပြောသည်။ “လမ်းကြောင်းတွေ ပိတ်ထားတော့ ဒေသတစ်ခုနဲ့တစ်ခု ငွေသားသယ်ဖို့က တော်တော်ခက်တယ်။ အပြင်မှာ ငွေစက္ကူအသစ် လည်ပတ်မှု မရှိသလောက်ဖြစ်နေသလို တဖက်မှာလည်း ဘဏ် KPay အကောင့်တွေ မကြာ ခဏ အပိတ်ခံရတာ၊ ကန့်သတ်ခံရတာတွေ ရှိတယ်။ ငွေထုတ်ပေးမယ့်သူတွေဘက်မှာ လက်ငင်းငွေသားရဖို့ အရင်းအနှီးနဲ့ သွားရေးလာရေးစရိတ် ပိုများလာတဲ့အခါ ဝန်ဆောင်ခကို တိုးယူရတော့တာပါ။” အခြားတစ်ဖက်တွင်လည်း ငွေသား ရှားပါးမှုနှင့်အတူ လက်ရှိ လည်ပတ်နေသည့် ငွေစက္ကူများအနက် ဟောင်း နွမ်း စုတ်ပြဲနေသော ငွေစက္ကူများကို အချို့သော စျေးဆိုင်များက လက်ခံရန် ငြင်းဆန်ကြသဖြင့် လက်ထဲတွင် ငွေရှိနေသော်လည်း လိုအပ်သည့် ကုန်ပစ္စည်းများကို ချက်ချင်း ဝယ်ယူ၍ မရသည့် အခြေအနေများနှင့်လည်း ကြုံတွေ့နေရသည်။ လက်ရှိတွင် ပြည်ပရောက် မိသားစုဝင်များ၏ ထောက်ပံ့ငွေဖြင့် မိသားစု စားဝတ်နေရေး၊ ကလေးများ၏ ပညာ ရေးနှင့် ဆေးဝါးစရိတ်များအတွက် တိုက်ရိုက် သုံးစွဲနေရသည့် အိမ်ထောင်စုများမှာ အပိုကုန်ကျစရိတ်များ ပေးဆောင်နေရသဖြင့် ငွေသားစီးဆင်းမှု ပုံမှန်ဖြစ်ရေးနှင့် ဒစ်ဂျစ်တယ် ငွေကြေး ဝန်ဆောင်မှု အခက်အခဲများကို အမြန်ဆုံး ဖြေရှင်းပေးရန် လိုအပ်နေကြောင်း ဒေသခံများက ထောက်ပြထားကြသည်။ ဓာတ်ပုံ - (AFP / မြန်မာငွေစက္ကူ ရေတွက်နေသူတစ်ဦးအား ၂၀၂၁ ခုနှစ် ဧပြီလ ၁၉ ရက်နေ့က တွေ့ရစဉ်။) #AA #ရခိုင်ပြည်နယ်

ရခိုင်တွင် ငွေသားပြတ်လပ်မှုကြောင့် ငွေထုတ်ခ မြင့်တက်

စစ်တွေ-ပုဏ္ဏားကျွန်းအစပ် တိုက်ပွဲတွင် စစ်တပ်ဘက်မှ တပ်သားများနှင့် လက်နက်များ ဆုံးရှုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၀ ရက်။ ရခိုင်ပြည်ကို ပြန်လည်သိမ်းပိုက်ရန် ထိုးစစ်ဆင်နေသည့် စစ်အုပ်စုတပ်သည် စစ်တွေ-ပုဏ္ဏားကျွန်းမြို့နယ်အစပ် တိုက်ပွဲများအတွင်း အကျအဆုံးများပြားနေသည့်အပြင် တပ်သားများနှင့် လက်နက်ခဲယမ်းများပါ ဆုံးရှုံးနေရ သည်။ ပြီးခဲ့သည့် စက်တင်ဘာလ ၁၆ ရက်နေ့က ကွမ်းတောင်နှင့် အမြင့်ကျွန်းကျေးရွာကြား ဖြစ်ပွားခဲ့သည့် တိုက်ပွဲ အတွင်း ပခုက္ကူအခြေစိုက် အမှတ် (၁၀၁) တပ်မဌာနချုပ်လက်အောက်ခံ၊ ခလရ (၂၅၂) တပ်ရင်းမှ တပ်သား အောင်ပြည့်စုံနှင့် တပ်သား မိုင်ကယ်တို့အပါအဝင် စစ်သား ၄ ဦးထက်မနည်း စစ်သုံ့ပန်း အဖြစ် ဖမ်းဆီးခံခဲ့ရသည်။ အလားတူ ဒရုန်းအပါအဝင် လက်နက်ခဲယမ်းများကိုပါ အာရက္ခတပ်တော် (AA) က သိမ်းဆည်းရရှိခဲ့သည်။ ဖမ်းဆီးခံခဲ့ရသူ တပ်သား အောင်ပြည့်စုံ က “အင်အားများတယ်ဆိုပြီး တပ်စိတ်မှူးက ပြေးတယ်။ ကျနော်တို့ကို ထားခဲ့တယ်။ ကျနော်တို့ ဖမ်းခံလိုက်ရတယ်။ သစ္စာလည်းမရှိဘူး၊ ကိုယ်ချင်းစာစိတ်လည်းမရှိဘူး၊ သားသမီး စိတ်ဓာတ်လည်းမရှိဘူး” ဟု ထွက်ဆိုထားသည်။ စစ်အုပ်စုတပ်သည် ရခိုင်ပြည်ကို ပြန်လည်သိမ်းပိုက်နိုင်ရေးအတွက် စက်တင်ဘာလ ၄ ရက်နေ့မှစ၍ စစ်ကြောင်းများခွဲကာ စစ်အင်အား ၁,၀၀၀ ကျော်ဖြင့် '၄၉၂၆ စစ်ဆင်ရေး' (ရန်နိုင်အောင်စစ်ဆင်ရေး) ကို စတင် ခဲ့ခြင်း ဖြစ်သည်။ သို့သော်လည်း တိုက်ပွဲများအတွင်း အရှုံးများနှင့် ရင်ဆိုင်နေရပြီး စစ်ကြောင်းပါ တပ်သားများမှာ တိုက်ပွဲဧရိယာ အတွင်း အကျအဆုံး များပြားလျက်ရှိသည်။ ထိုကဲ့သို့ ထိုးစစ်များ စစ်ရေးအရ အဆင်မပြေဖြစ်နေ၍ စစ်အုပ်စုတပ်သည် အရပ်သား ပြည်သူများနေထိုင်ရာ ကျေးရွာများသို့ လေကြောင်းဗုံးကြဲမှုနှင့် လက်နက်ကြီး ပစ်ခတ်မှုများကို ဆက်တိုက် ပြုလုပ်လျက်ရှိသည်။ စက်တင်ဘာလ ၁၇ ရက်နေ့ နံနက်ပိုင်းကလည်း ပုဏ္ဏားကျွန်းမြို့နယ်၊ ကွမ်းတောင်ကျေးရွာနှင့် မင်းချောင်း တံတား အနီးဝန်းကျင်သို့ စစ်တိုက်လေယာဉ်များဖြင့် တစ်နေ့လုံးနီးပါး လေကြောင်းမှ တိုက်ခိုက်ခဲ့သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “စစ်တွေနဲ့ ပုဏ္ဏားကျွန်း အစပ်က ရွာတွေကိုစစ်တပ် က လေယာဉ်တွေရော၊ ဒရုန်းတွေပါ သုံးပြီး အုပ်စုလိုက် ဗုံးကြဲနေတာ။ တိုက်ပွဲက ၂ ပတ်ကျော် ပြင်းထန်လာ တာပါ” ဟု ပြောသည်။ လက်ရှိတွင် စစ်တွေ-ပုဏ္ဏားကျွန်း အစပ်၌ တိုက်ပွဲများ ပြင်းထန်နေဆဲဖြစ်ပြီး လေကြောင်းနှင့် လက်နက်ကြီး တိုက်ခိုက်မှုများကြောင့် ပုဏ္ဏားကျွန်းမြို့နယ်အတွင်းရှိ ကွမ်းတောင်၊ စပါးထား၊ ဖက်ကျနှင့် ဒီပါရုံ အပါအဝင် ကျေးရွာ ၂၀ ကျော်မှ ဒေသခံများသည် ဘေးလွတ်ရာသို့ တိမ်းရှောင်နေကြရသည်။ ထို့ပြင် စစ်အုပ်စုတပ်သည် ကျောက်ဖြူ၊ စစ်တွေ၊ သံတွဲနှင့် ဂွမြို့နယ်တို့ရှိ AA ထိန်းချုပ်နယ်မြေများကို ပြန်လည် ရယူရန် ထိုးစစ်ဆင်နေသည့်အပြင် ရခိုင်ရိုးမအရှေ့ဘက်ခြမ်းရှိ မကွေး၊ ပဲခူး၊ ဧရာဝတီတိုင်း ဒေသကြီးများနှင့် ချင်းပြည်၊ မင်းတပ်မြို့နယ်တို့မှတစ်ဆင့် ရခိုင်ဘက်သို့ ထိုးဖောက်ဝင်ရောက်နိုင်ရန်လည်း ကြိုးပမ်းလျက် ရှိသည်။ ဓါတ်ပုံ - (စစ်တွေ-ပုဏ္ဏားကျွန်းအစပ် တိုက်ပွဲအတွင်း သိမ်းဆည်းရမိသော လက်နက်ခဲယမ်းများနှင့် စစ်သုံ့ပန်း များ။ / AA Info Desk) #စစ်တွေ

စစ်တွေ-ပုဏ္ဏားကျွန်းအစပ် တိုက်ပွဲတွင် စစ်တပ်ဘက်မှ တပ်သားများနှင့် လက်နက်များ ဆုံးရှုံး

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၉ ရက် ရခိုင်ပြည်၊ စစ်တွေ-ပုဏ္ဏားကျွန်းအစပ်တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ ပြင်းထန်လျက်ရှိပြီး AA က စစ်အုပ်စုတပ်၏ ကာကင်းစခန်းအချို့ကို ထိန်းချုပ်သိမ်းပိုက်ထားကြောင်း မြေပြင် စစ်ရေးသတင်းရင်းမြစ်များက ပြောသည်။ စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ စက်တင်ဘာလ ၄ ရက်နေ့မှစ၍ ထိုးစစ်ဆင်တိုက်ခိုက်လာ ခြင်း ဖြစ်ပြီး တိုက်ပွဲဖြစ်ပွားနေသည်မှာ ၁၆ ရက်ခန့်ရှိပြီဖြစ်သည်။ အဆိုပါ တိုက်ပွဲများအတွင်း နှစ်ဖက်အကျအဆုံးများရှိနေပြီး စစ်အုပ်စုတပ်၏ စပါးထား၊ ဆားကုန်းပို့၊ ခမောင်း တော ကာကင်းစခန်းများနှင့် ရွှေမင်းဂံရေတပ်စခန်း၏ ကာကင်းစခန်းဖြစ်သည့် အမြင့်ကျွန်း တံတားဂိတ်များကို AA က ထိန်းချုပ်သိမ်းပိုက်ထားခြင်းဖြစ်သည်။ ဒေသခံစစ်ရေးသတင်းရင်းမြစ် အမျိုးသားတစ်ဦးက “ပထမ ၁၄ ရက်နေ့ကတည်းက စစ်တပ် စစ်ကြောင်းတွေ စစ်တွေ - ပုဏ္ဏားကျွန်းအစပ်ကို ထိုးလာတော့ စပါးထား၊ ဆားကုန်းပို့၊ ခမောင်းတော ကာကင်းစခန်းတွေကို စစ်တပ်က ထိန်းလိုက်တယ်၊ ရက်ကြာရှည်လာတော့ အေအေရဲ့ တန်ပြန်ထိုးစစ်ကို မနိုင်တော့လို့ အကျအဆုံးနဲ့ ပြန်ဆုတ်တယ်၊ လက်ရှိ ပင်လယ်ရေပြင်တွေမှာလည်း စစ်တပ်အလောင်းတွေ များတယ်” ဟု ပြောသည်။ လက်ရှိတွင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်ရှိ မင်းချောင်းတံတား၊ ဝါဘို၊ အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတောနှင့် ကွမ်းတောင် ကျေးရွာတို့တွင် စစ်အင်အား ရာချီ ဖြန့်ကျက်ထားဆဲ ဖြစ်သည်။ ဒေသခံတစ်ဦးက “လက်ရှိမင်းချောင်းတံတား၊ ဝါဘို အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတော၊ ကွမ်းတောင် ဘက်တွေ မှာ စစ်တပ် ဘက်က စစ်အင်အားတိုးပြီးဖြန့်တယ်။ ဒါပေမယ့် အေအေသတ်ကွင်း ထဲဝင်သလိုဖြစ်နေတယ်။ ရခိုင် ကို အပြင်ဘက်က စစ်ကြောင်းထိုးမရတော့ အတွင်းထဲက သူတို့ထိန်းချုပ်တဲ့ စစ်တွေကတဆင့် အင်အားဖြည့်ပြီး စစ်ကြောင်းထိုးတာ အေအေကလည်းတော်တော်ခုခံယူနေရတယ်” ဟု ပြောသည်။ ထို့ပြင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ လေယာဉ်အုပ်စုလိုက်ဖြင့် လာရောက်ဗုံးကြဲ တိုက်ခိုက် နေသည့် အပြင် လက်နက်ကြီးများ၊ ဒရုန်းများဖြင့်လည်း နေ့စဉ် ပစ်ခတ်လျက်ရှိရာ AA ဘက်ကလည်း လက်နက်ကြီးများဖြင့် ပြန်လည်ပစ်ခတ်နေသဖြင့် တိုက်ပွဲများ အပြင်းအထန် ဖြစ်ပွားနေသည်။ လက်ရှိစစ်ရေး အနေအထားအရ AA သည် ပုဏ္ဏားကျွန်းဘက်မှတစ်ဆင့် စစ်တွေမြို့အနီးသို့ တန်ပြန်ထိုးစစ်ဖြင့် ရှေ့တိုးလာလျက်ရှိသည်။ အလားတူ စက်တင်ဘာလ ၁၈ ရက် နံနက်ပိုင်းမှ နေ့လယ်ပိုင်းအထိ စစ်တွေ၊ ပုဏ္ဏားကျွန်း၊ ဝီရဌာနီ (ပေါက်တော) နှင့် သံတွဲမြို့များကို စစ်အုပ်စုတပ်က ဂျက်ဖိုက်တာ လေယာဉ်များ အုပ်စုလိုက်အသုံးပြု၍ လေကြောင်းမှ တိုက်ခိုက်ခဲ့သည်။ စစ်အုပ်စုတပ်သည် လေကြောင်းနှင့် ရေကြောင်း ပစ်ကူအပြင် ရွှေမင်းဂံရေတပ်စခန်း၊ အမြင့်ကျွန်းရှိ လက်နက် ကြီးအထိုင်စခန်း၊ စစ်တွေပါဒလိတ်တပ်ရင်း၊ အမြောက်တပ်၊ ခလရ (၂၀)၊ ခလရ (၂၃၂)၊ ခလရ (၂၇၀)၊ ခမရ (၃၄၄) စသည့် စစ်တွေ-ပုဏ္ဏားကျွန်း ကားလမ်းပေါ်တွင် အခြေစိုက်ထားသည့် တပ်ရင်းများမှလည်း လက်နက်ကြီးများဖြင့် တိုက်ပွဲဖြစ်ပွားရာနေရာများသို့ ဆက်continuous ပစ်ကူပေး တိုက်ခိုက်လျက်ရှိသည်။ ဓာတ်ပုံ - Crd #AA #စစ်တွေ #ပုဏ္ဏားကျွန်း

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ

ရခိုင်တွင် AA ထိန်းချုပ်ထားသော မြို့နယ် သုံးခုကို စစ်တပ် လေကြောင်းမှ ဗုံးကြဲ၊ အရပ်သားတစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၈ ရက်။ ရခိုင်ပြည်အတွင်း အာရက္ခတပ်တော် (AA) ထိန်းချုပ်ထားသည့် မြို့နယ်များကို စစ်အုပ်စုတပ်က ဆက်တိုက် လေကြောင်းတိုက်ခိုက်မှုများ ပြုလုပ်လျက်ရှိရာ သံတွဲ၊ ပုဏ္ဏားကျွန်းနှင့် ရှေးဟောင်းယဉ်ကျေးမှုနယ်မြေ မြောက်ဦးမြို့တို့ပါ ဗုံးကြဲခံရပြီး အရပ်သားတစ်ဦး ဒဏ်ရာပြင်းထန်စွာ ရရှိခဲ့ကြောင်း ဒေသခံများက ပြောသည်။ စက်တင်ဘာလ ၁၈ ရက်နေ့၊ နံနက် ၁၁ နာရီကျော်တွင် သံတွဲမြို့နယ်၊ သစ်ငုတ္တိုကျေးရွာနှင့် ဆိုးပုံကျေးရွာ အနီး ဝန်းကျင်သို့ စစ်အုပ်စုတပ်က ဂျက်ဖိုက်တာဖြင့် ဗုံး ၁၀ လုံးထက်မနည်း ကြဲချတိုက်ခိုက်ခဲ့သဖြင့် ဘုန်းတော်ကြီး ကျောင်းအနောက်ဘက် လယ်ကွင်းပြင်နှင့် တောင်တန်းများတွင် ကျရောက်ပေါက်ကွဲခဲ့သည်။ သံတွဲဒေသခံတစ်ဦးက “ဒီနေ့ ဗုံးကြဲသွားတာက သံတွဲ-ဂွ ကားလမ်းမပေါ်က သစ်ငုတ္တိုရွာနားတင် ဗုံးတွေ လာ ကြဲသွားတာ။ ရွာဘုန်းကြီးကျောင်း နောက်ဘက် လယ်ကွင်းတွေနဲ့ ဆိုးပုံရွာဘက်က တောင်တန်းတွေပေါ်မှာ ပေါက်ကွဲသံတွေ အကျယ်ကြီး ကြားရတယ်။ ဂျက်ဖိုက်တာနဲ့ ဗုံး ၁၀ လုံးမက ကြဲသွားတာ။ ထိခိုက်မှု အခြေ အနေတော့ လောလောဆယ် စုံစမ်းနေတုန်းပဲ” ဟု ပြောသည်။ သံတွဲမြို့နယ်တွင် စစ်အုပ်စုတပ်က ပြီးခဲ့သည့် လများအတွင်းကပင် လေကြောင်းမှ ပစ်မှတ်ထား ဗုံးကြဲခဲ့သည့် အပြင် ယခုအခါ ကားလမ်းမ အနီးဝန်းကျင်ရှိ ကျေးရွာများအထိ တိုက်ခိုက်မှုကို တိုးမြှင့်လုပ်ဆောင်လာခြင်း ဖြစ် သည်။ ထို့ပြင် ရှေးဟောင်းယဉ်ကျေးမှုနယ်မြေ ဖြစ်သည့် မြောက်ဦးမြို့ပေါ်သို့လည်း စက်တင်ဘာလ ၁၇ ရက်နေ့၊ နေ့လည်ပိုင်းတွင် စစ်အုပ်စုတပ်က တိုက်လေယာဉ် ၃ စီးဖြင့် ပတ်လည်ဗုံးကြဲခဲ့သဖြင့် မြို့ခံများ ဘေးလွတ်ရာ ဗုံးခိုကျင်းများအတွင်း ပုန်းခိုခဲ့ကြရသည်။ မြောက်ဦးမြို့ခံတစ်ဦးက “မွန်းတည့်ခါနီးမှာ တိုက်လေယာဉ် ၃ စီးနီးပါး မြို့ပေါ်ကို ဝဲပြီး ဆက်တိုက် ဗုံးကြဲတာ။ ဗုံးသံတွေက ဆက်တိုက်ပဲ။ ၄ လုံးလောက် တခါတည်းကြဲသွားတာ။ ပြည်သူတွေလည်း ကြောက်လန့်ပြီး ဗုံးခိုကျင်းတွေထဲမှာ ပုန်းနေကြရတယ်။ အသံတွေ တိတ်သွားတော့မှ ပြန်ထွက်ပေါ့။ အခြေအနေကတော့ အမြဲသတိထားကြည့်ပြီး နေရတာ” ဟု ပြောသည်။ အလားတူ စက်တင်ဘာလ ၁၇ ရက် နံနက်ပိုင်းနှင့် ညပိုင်းတို့တွင် ပုဏ္ဏားကျွန်းမြို့နယ် ကွမ်းတောင်ကျေးရွာ၊ မင်းချောင်းတံတားအနီးနှင့် ဖက်ကျကျေးရွာတို့ကို စစ်အုပ်စုတပ်က ဂျက်ဖိုက်တာ၊ Y-12 လေယာဉ်များ အသုံးပြု၍ ၁၀ ကြိမ်ထက်မနည်း ဗုံးကြဲသည့်အပြင် စက်သေနတ်များဖြင့်ပါ ပစ်ခတ်ခဲ့သဖြင့် ဖက်ကျကျေးရွာမှ ရွာသားတစ်ဦး ဒဏ်ရာပြင်းထန်စွာ ရရှိခဲ့သည်။ ပုဏ္ဏားကျွန်း ဒေသခံတစ်ဦးက “စစ်တွေဘက်ကနေ စစ်ကြောင်းထိုးဖို့ ကြိုးစားပေမဲ့ AA က ထိရောက်စွာ ပိတ် ဆို့ထားတော့ စစ်အုပ်စုတပ်က ရှေ့မတိုးနိုင်ဘူး။ အဲဒါကြောင့် လေကြောင်းနဲ့ လက်နက်ကြီးကိုပဲ သုံးပြီး ရွာတွေ ကို ရမ်းသန်းပစ်နေတာ။ စက်တင်ဘာ ၁၇ ရက်ရော၊ ၁၆ ရက်နေ့ရော ကြဲတယ်။ ကွမ်းတောင်နဲ့ မင်းချောင်း တံတားဘက်ကို တစ်နေကုန် ဗုံးကြဲရုံမက စက်သေနတ်တွေနဲ့ပါ လှမ်းပစ်နေတာ။ ဖက်ကျရွာက ရွာသား တစ်ယောက် ဒဏ်ရာရသွားတယ်” ဟု ပြောသည်။ စစ်တွေ-ပုဏ္ဏားကျွန်း အစပ်တွင် စက်တင်ဘာလ ၄ ရက်နေ့မှစ၍ တိုက်ပွဲများ ပြင်းထန်နေပြီး စစ်အုပ်စုတပ်သည် ပုဏ္ဏားကျွန်းဘက်သို့ စစ်ကြောင်းထိုးရန် ကြိုးပမ်းသော်လည်း AA ၏ ပိတ်ဆို့ခုခံမှုကြောင့် ရှေ့ဆက်မတိုးနိုင်ဘဲ လေကြောင်းနှင့် လက်နက်ကြီးကိုသာ အဓိက အားပြု ပစ်ခတ်နေခြင်းဖြစ်သည်။ လက်ရှိတွင် အဆိုပါ လေကြောင်းတိုက်ခိုက်မှုများကြောင့် ထိခိုက်ပျက်စီးမှု အနောက်ဆက်တွဲ အခြေအနေ အသေးစိတ်ကို ဆက်လက် စုံစမ်းလျက်ရှိသည်။ #AA #Rakhine

ရခိုင်တွင် AA ထိန်းချုပ်ထားသော မြို့နယ် သုံးခုကို စစ်တပ် လေကြောင်းမှ ဗုံးကြဲ၊ အရပ်သားတစ်ဦး ဒဏ်ရာရ

ရခိုင်၌ စစ်တပ်၏ လေကြောင်းတိုက်ခိုက်မှုကြောင့် ၅ ရက်အတွင်း အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၄ ရက်။ ရခိုင်ပြည်အတွင်း စစ်ရေးပစ်မှတ် မဟုတ်သည့် အရပ်သားပြည်သူများ နေထိုင်ရာ မြို့၊ ကျေးရွာများနှင့် သမိုင်း ဝင် ဘုန်းကြီးကျောင်းများကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့ရာ ၅ ရက်အတွင်း အပြစ်မဲ့ အရပ်သား ၇ ဦး သေဆုံးသွားကြောင်း အာရက္ခတပ်တော် (AA) က စက်တင်ဘာလ ၁၄ ရက်နေ့တွင် သတင်း ထုတ်ပြန်သည်။ စစ်အုပ်စုတပ်သည် စက်တင်ဘာလ ၁၀ ရက်မှ ၁၃ ရက်အထိ ဂျက်တိုက်လေယာဉ်များနှင့် အသေခံဒရုန်းများ (Suicide Drones) အသုံးပြုကာ ဆက်တိုက် ဗုံးကြဲတိုက်ခိုက်ခဲ့ခြင်းဖြစ်သည်။ အဆိုပါ တိုက်ခိုက်မှုများကြောင့် အရပ်သားပြည်သူများ သေဆုံး၊ ဒဏ်ရာရရှိခဲ့သည့်အပြင် နေအိမ်၊ ဈေးဆိုင်များ နှင့် ဘာသာရေး အဆောက်အအုံများပါ ပျက်စီးဆုံးရှုံးခဲ့ရသည်။ ရခိုင်ပြည်မြောက်ပိုင်း ဒေသခံတစ်ဦးက “ရခိုင်ပြည်ကို မြောက်ပိုင်း၊ တောင်ပိုင်းအပြင် ပလက်ဝကိုပါ ဗုံးကြဲနေ တာပါ။ ပြည်သူတွေ ဘယ်လိုနေရမလဲ ဗုံးခိုကျင်းထဲက မထွက်ရပါဘူး။ ဘုရားပုထိုးတွေ ပျက်စီးတယ်။ စား ဝတ်နေရေး အဆင်မပြေဖြစ်တယ်။ ဆေးကုသတာမှာ ဆေးဝါးလိုအပ်ချက်တွေရှိတယ်။ ဒီလိုအခက်အခဲတွေ ကြားမှာ ရခိုင်လူထု အသက်ရှင်ဖို့ပါ ခက်ခဲလာတယ်၊ မိသားစုတွေ တကွဲတပြားနဲ့ ဒုက္ခတွေလည်း များပါတယ်” ဟု ပြောသည်။ စက်တင်ဘာလ ၁၃ ရက်နေ့ မွန်းလွဲ ၁၂ နာရီ ၅၆ မိနစ်ခန့်တွင် ပုဏ္ဏားကျွန်းမြို့၊ သမိုင်းဝင် ဦးရာဇ်တော်ဘုရား တည်ရှိရာ တောင်ခြေရင်း ကြိုးတံတားအနီး ဝန်းကျင်ကို စစ်အုပ်စုတပ်က ဂျက်တိုက်လေယာဉ်ဖြင့် ၃ ကြိမ်တိုင် ဗုံးကြဲခဲ့သည့်အပြင် စက်သေနတ်ဖြင့်ပါ ပစ်ခတ်တိုက်ခိုက်ခဲ့သည်။ အဆိုပါ ဖြစ်စဉ်ကြောင့် ပုဏ္ဏားကျွန်းမြို့နယ် စေတီရင်းကျေးရွာမှ ဒေါ်စိုးစိုး မှာ မျက်နှာတွင် ဗုံးစထိမှန်ကာ သေဆုံးခဲ့ပြီး မဖြူဖွေး (၉ နှစ်) နှင့် ဒေါ်ကျော့စိန် (၇၁ နှစ်) တို့ ထိခိုက်ဒဏ်ရာ ရရှိခဲ့သည်။ ထို့ပြင် ပုဏ္ဏားကျွန်းမြို့သို့ အလည်ရောက်ရှိနေသည့် ရသေ့တောင်မြို့မှ ဦးမိုးမိုး နှင့် ဦးအောင်ဝင်းမောင်တို့လည်း ဒဏ်ရာရရှိခဲ့ကာ ဦးမိုးမိုးမှာ ပြင်းထန်ဒဏ်ရာဖြင့် သေဆုံးသွားခဲ့သည်။ ပြီးခဲ့သည့် စက်တင်ဘာလ ၄ ရက်နေ့ကလည်း ပုဏ္ဏားကျွန်းမြို့နယ်ရှိ သမိုင်းဝင် ဂူဝဘုရားကို စစ်အုပ်စုတပ်က လေကြောင်းမှ ဗုံးကြဲခဲ့သဖြင့် ဘုရားဆင်းတုတော်များ ပျက်စီးခဲ့ရသေးသည်။ စက်တင်ဘာလ ၁၁ ရက်နေ့ ညသန်းခေါင် ၁၂ နာရီ ၃၆ မိနစ်ခန့်တွင် ပုဏ္ဏားကျွန်းမြို့နယ် ကျောက်ဆိပ်ကျေးရွာ ဘုန်းကြီးကျောင်းကို စစ်အုပ်စုတပ်က အသေခံဒရုန်းဖြင့် ဗုံးခွဲတိုက်ခိုက်ခဲ့ရာ စစ်ဘေးရှောင် သားအမိနှစ်ဦး ဖြစ်သည့် ဒေါ်လှသန်းယဉ်နှင့် သမီးဖြစ်သူ ဦးသန်းခင်တို့ ဗုံးစထိမှန်ခဲ့ပြီး ဒေါ်လှသန်းယဉ်မှာ ဒဏ်ရာပြင်းထန် သဖြင့် ဆေးကုသမှု ခံယူနေစဉ် သေဆုံးသွားခဲ့သည်။ ထို့ပြင် စက်တင်ဘာလ ၁၁ ရက်နေ့ ညနေ ၄ နာရီခန့်တွင် တောင်ကုတ်မြို့နယ် ရွာသစ်ကေကျေးရွာကို လေယာဉ် ၂ စီးဖြင့် ဗုံးကြဲခဲ့ရာ ဦးတင်မောင် (၅၉ နှစ်) မှာ ဦးခေါင်းကို ဗုံးစထိမှန်၍ နေရာတွင်ပင် ပွဲချင်းပြီး သေဆုံးခဲ့ပြီး ဦးမြင့်ရွှေ (၆၇ နှစ်) ဒဏ်ရာရရှိကာ နေအိမ် ၂ လုံးလည်း ပျက်စီးသွားသည်။ စက်တင်ဘာလ ၁၀ ရက်နေ့ ည ၉ နာရီ ၄၅ မိနစ်ခန့်ကလည်း ဂွမြို့နယ်၊ ကျိန္တလီမြို့ အမှတ် (၁) နှင့် (၂) ရပ်ကွက်သို့ ဂျက်တိုက်လေယာဉ်ဖြင့် ဗုံးသီး ၂ လုံး ကြဲချခဲ့သဖြင့် အမှတ် (၁) ရပ်ကွက်မှ ဦးကျော်ခင် (၈၅ နှစ်) မှာ နေရာတွင် ပွဲချင်းပြီး သေဆုံးခဲ့ကာ အမှတ် (၂) ရပ်ကွက်မှ ဦးချစ်ဆန်းမောင် (၅၅ နှစ်) ဒဏ်ရာရရှိခဲ့ပြီး နေအိမ် ၉ လုံး ပျက်စီးခဲ့ရသည်။ စက်တင်ဘာလ ၁၂ ရက်နေ့ ညနေ ၄ နာရီ ၁၅ မိနစ်ခန့်တွင်လည်း ချင်းပြည် (ရခိုင်ဒေသစပ်) ဆမီးမြို့နယ်၊ ဘွေလီ ကျေးရွာအနီးကို ဂျက်တိုက်လေယာဉ်ဖြင့် ဗုံးကြဲခဲ့သဖြင့် အရပ်သားများ၏ နေအိမ်၊ ဈေးဆိုင်များနှင့် မော်တော် ယာဉ် ၁ စီး ထိခိုက်ပျက်စီးခဲ့ရသည်။ စစ်အုပ်စုတပ်သည် အာရက္ခဒေသအတွင်း စစ်ရေးပစ်မှတ် မဟုတ်သော အပြစ်မဲ့ အရပ်သားပြည်သူများ နေထိုင် ရာ နေရာများကို နေ့စဉ်နှင့်အမျှ ဗုံးကြဲတိုက်ခိုက်နေသဖြင့် အရပ်သား ထိခိုက်သေဆုံးမှုနှင့် အဆောက်အအုံ ပျက်စီးဆုံးရှုံးမှုများ မြင့်တက်လျက်ရှိသည်။ ဓာတ်ပုံ - (လေကြောင်းဗုံးကြဲမှုကြောင့် ထိခိုက်ပျက်စီးမှုများ / AA) #AA #ရခိုင်

ရခိုင်၌ စစ်တပ်၏ လေကြောင်းတိုက်ခိုက်မှုကြောင့် ၅ ရက်အတွင်း အရပ်သား ၇ ဦး သေဆုံး

ရခိုင်မြောက်ပိုင်း မောင်တောနယ်စပ်တွင် ကင်းလှည့်နေသည့် AA နှင့် ARSA, RSO ပူးပေါင်းအဖွဲ့ တိုက်ပွဲဖြစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၃၁ ရက်။ ရခိုင်-ဘင်္ဂလားဒေ့ရှ် နယ်စပ်၊ မောင်တောမြို့နယ် တောင်ပိုင်းတွင် လုံခြုံရေးကင်းလှည့်နေသည့် အာရက္ခတပ် တော် (AA) နှင့် နယ်စပ်မှ ခိုးဝင်လာသော ARSA၊ RSO ပူးပေါင်းအဖွဲ့တို့ တိုက်ပွဲဖြစ်ပွားခဲ့ပြီး လက်နက်ကိုင် ၆ ဦးကို အရှင်လက်ရ ဖမ်းဆီးရမိခဲ့ကြောင်း ဒေသခံ စစ်ရေးသတင်းရင်းမြစ်များက ပြောသည်။ မောင်တောမြို့နယ်၊ ကျောက်ပန္ဒူကမ်းခြေနှင့် ဂြင်းတောချောင်းဝကျေးရွာ ပတ်ဝန်းကျင်တို့တွင် ဩဂုတ်လ ၂၉ ရက်နှင့် ၃၀ ရက်နေ့တို့၌ ကင်းလှည့်နေသည့် AA တပ်စိတ်များနှင့် ဘင်္ဂလားဒေ့ရှ်ဘက်မှ ခိုးဝင်လာသော ARSA၊ RSO ပူးပေါင်းအဖွဲ့တို့ ထိတွေ့တိုက်ပွဲဖြစ်ပွားခဲ့ခြင်း ဖြစ်သည်။ ဒေသခံ စစ်ရေးသတင်းရင်းမြစ် အမျိုးသားတစ်ဦးက “နှစ်ရက်ဖြစ်တယ်လို့ သိရတယ်။ ၂၉ ရက်နဲ့ ၃၀ ရက်နေ့ တွေမှာ ဖြစ်တာ။ ARSA၊ RSO အဝင်အထွက် စိပ်နေတာသိလို့ အေအေက ကင်းလှည့်နေတာ။ အခုတည့်တည့် တိုးတာပဲ။ အေအေက အရှင်နဲ့ အသေ ဖမ်းမိတာတွေရှိတယ်။ ထုတ်ပြန်ပါလိမ့်မယ်” ဟု ပြောသည်။ အဆိုပါ တိုက်ပွဲအတွင်းမှ ARSA နှင့် RSO လက်နက်ကိုင် ၆ ဦးကို ဖောက်ခွဲရေးပစ္စည်းများ အပါအဝင် အခြား လက်နက်ခဲယမ်းများနှင့်အတူ အာရက္ခတပ်တော် (AA) က အရှင်လက်ရ ဖမ်းဆီးရမိခဲ့သည်။ လက်ရှိတွင် တိုက်ပွဲဖြစ်ပွားရာ အနီးဝန်းကျင်များကို AA က လိုက်လံရှင်းလင်းလျက်ရှိပြီး နယ်စပ်လုံခြုံရေး အင်အားများကိုလည်း ထပ်မံတိုးမြှင့်ထားသည်။ မောင်တော နယ်စပ်ဒေသတွင် ARSA၊ RSO နှင့် ARA အပါအဝင် အကြမ်းဖက် လက်နက်ကိုင်အဖွဲ့များသည် ဒေသခံ အရပ်သားပြည်သူများအား ခြုံခိုတိုက်ခိုက်ခြင်း၊ ပြန်ပေးဆွဲခြင်းနှင့် ငွေညှစ်ခြင်းများကို မကြာခဏ ပြုလုပ်လေ့ရှိသည်။ ထို့ကြောင့် ဩဂုတ်လ ၉ ရက်နေ့မှစ၍ မောင်တောမြို့နယ်တွင် ညမထွက်ရအမိန့် ထုတ်ပြန်ထားပြီး မြို့တွင်း၊ မြို့ပြင် ဂိတ်ချစစ်ဆေးခြင်းနှင့် ကင်းလှည့်ခြင်းများကို နေ့ရောညပါ ပြုလုပ်ကာ လုံခြုံရေး ပိုမိုတင်းကြပ် ထားသည်။ ဓါတ်ပုံ - (ပုံဟောင်း / Crd) #AA #ARSA #RSO

ရခိုင်မြောက်ပိုင်း မောင်တောနယ်စပ်တွင် ကင်းလှည့်နေသည့် AA နှင့် ARSA, RSO ပူးပေါင်းအဖွဲ့ တိုက်ပွဲဖြစ်

1 2 3 … 7 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close