aa – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: aa

၇ လအတွင်း လူကုန်ကူးမှု အပါအဝင် ဥပဒေချိုးဖောက်မှု ၃၅ မှုကို AA အရေးယူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၃၀ ရက်။ ရခိုင်ပြည်အတွင်းမှ လူငယ်များ ပြည်ပသို့ ထွက်ခွာရာတွင် တရုတ်မယားအဖြစ် ရောင်းစားခံရခြင်း အပါအဝင် လူကုန်ကူးခံနေရသည့် ဖြစ်စဉ်များရှိနေပြီး ၇ လတာကာလအတွင်း လူကုန်ကူးမှုနှင့် ပြည်ပအလုပ်အကိုင်ဆိုင်ရာ ဥပဒေချိုးဖောက်သည့် အမှုစုစုပေါင်း ၃၅ မှုကို အရေးယူထားကြောင်း အာရက္ခတပ်တော် (AA) က ထုတ်ပြန် သည်။ အာရက္ခပြည်သူ့တော်လှန်ရေး အစိုးရ၏ အလုပ်သမားနှင့် လူဝင်မှုကြီးကြပ်ရေးဆိုင်ရာဌာန (DLEPS) သည် လူကုန်ကူးမှု တားဆီးနှိမ်နင်းရေးကို လုပ်ဆောင်လျက်ရှိရာ ၂၀၂၆ ခုနှစ်၊ ဇန်နဝါရီလမှ ဇူလိုင်လအထိ ၇ လတာ အတွင်း လူကုန်ကူးမှု အပါအဝင် ပြည်ပအလုပ်အကိုင်ဆိုင်ရာ ဥပဒေချိုးဖောက်မှု အမှု ၃၅ မှုကို အရေးယူခဲ့ပြီး မဟာမိတ် နယ်မြေများရှိ မိတ်ဖက် အဖွဲ့အစည်းများနှင့် ပူးပေါင်း ဆောင်ရွက်လျက်ရှိသည်။ ရက္ခိုင်အမျိုးသားအဖွဲ့ချုပ်/ အာရက္ခတပ်တော် (ULA/AA) က အမျိုးသားကာကွယ်ရေးဆိုင်ရာ အရေးပေါ် ပြဋ္ဌာန်းချက် (NDEP) ကို ၂၀၂၅ ခုနှစ်၊ မတ်လ ၁၈ ရက်မှ စတင်ပြဋ္ဌာန်းခဲ့ပြီးနောက်ပိုင်း အဆိုပါ ပြဋ္ဌာန်းချက်ကို ရှောင်ရှားရန်နှင့် စစ်အုပ်စုတပ်၏ စစ်မှုထမ်းဥပဒေကြောင့် ပြည်သူအချို့သည် လူကုန်ကူး ပွဲစားများနှင့် ချိတ် ဆက်ကာ အာရက္ခပြည် အပြင်ဘက်သို့ ထွက်ခွာနေကြခြင်းဖြစ်သည်။ ရခိုင်လူငယ်တစ်ဦးက “ကျနော်တို့ တောင်ကုတ်၊ ဂွ၊ သံတွဲဘက်က လူငယ်တွေ စစ်မှုထမ်းဖို့ ကြောက်လို့ ထွက် ပြေးကြတာ ရှိတယ်လေ။ ကျောက်ဖြူမှာလည်း ရှိတယ်။ အဲ့ဒါကတော့ လူကုန်ကူးမှုလို့ ပြောလို့မရဘူး။ အခု အဲ့လိုထွက်ပြေးတာတွေကို ဖမ်းမိလို့ အရေးယူတယ်။ ဘယ်မှာဖမ်းထားတယ်ဆိုတာ စုံစမ်းမရတာတွေလည်း ရှိတယ်” ဟု ပြောသည်။ ရခိုင်လူငယ်အများစုသည် ထိုင်းနိုင်ငံသို့ လူကုန်ကူးခံရပြီး ငါးဖမ်းလုပ်ငန်း၊ စိုက်ပျိုးရေးနှင့် ဆောက်လုပ်ရေး လုပ်ငန်းခွင်များ၌ အတင်းအဓမ္မ ခိုင်းစေခံနေရသည့်အပြင် ရှမ်းမြောက်ဒေသ၊ ထိုင်း-မြန်မာနယ်စပ်နှင့် ထိုင်းနိုင်ငံ အတွင်းရှိ အွန်လိုင်းလိမ်လည်မှု (ကျားဖြန့်) လုပ်ငန်းများ၌ ပိတ်လှောင် ခိုင်းစေခံနေရကြောင်း AA ထုတ်ပြန်ချက် တွင် ဖော်ပြထားသည်။ ထို့ပြင် တရုတ်နှင့် ထိုင်း စသည့် အိမ်နီးချင်း နိုင်ငံများသို့ တရားမဝင် နည်းလမ်းများဖြင့် ဝင်ရောက်ရန် ကြိုးစား ချိန်တွင် လူကုန်ကူးဂိုဏ်းများ၏ ရောင်းစားခြင်းကို ခံနေကြရပြီး အထူးသဖြင့် တရုတ်နိုင်ငံသို့ လူကုန်ကူးခံရသူ များသည် တရုတ်မယားအဖြစ် ရောင်းစားခံနေကြရသည်။ ပွဲစားများက “လစာကောင်းသော အလုပ်ရမည်”၊ “ကလေးတစ်ယောက် မွေးပေးလျှင် ဘယ်လောက်ရမည်” ဟု လိမ်လည် စည်းရုံးကာ ဖုန်းများ သိမ်းဆည်း၍ မိသားစုနှင့် ဆက်သွယ်ခွင့် မရဘဲ ပိတ်လှောင်ထားသည့် ဖြစ်စဉ် များလည်း ကြုံတွေ့နေရသည်။ “ငရဲတွင်းသို့ သက်ဆင်းသကဲ့သို့ အဆိုးဝါးဆုံး ကြုံတွေ့နေရသော်လည်း ကျားဖြန့် အပါအဝင် လူကုန်ကူးခံရ သူများမှာ ဘာသာစကား အခက်အခဲများနှင့်အတူ အမှုဖွင့် တိုင်တန်းခွင့် မရဘဲ ရင်ဆိုင်နေကြရသည်” ဟု AA ၏ ထုတ်ပြန်ချက်၌ ရေးသားထားသည်။ ထို့ပြင် တရားမဝင် နယ်စပ်ဖြတ်ကျော်စဉ် သက်ဆိုင်ရာ အာဏာပိုင်များ၏ ဖမ်းဆီးခြင်းကို ခံရသကဲ့သို့ အလုပ် ရှင်များ၏ ရိုက်နှက် နှိပ်စက်မှုများ၊ လုပ်ငန်းခွင်အတွင်း အလုပ်သမား အခွင့်အရေး မရရှိခြင်းနှင့် အသက် အန္တရာယ် ထိခိုက်မှုများကိုပါ ကြုံတွေ့နေကြရသည်။ လက်ရှိတွင် မြန်မာနိုင်ငံ အပါအဝင် အိမ်နီးချင်း ဒေသများ၌ လူကုန်ကူးမှု လုပ်ငန်းများ ဆက်လက် ရှိနေဆဲ ဖြစ် သောကြောင့် အာရက္ခပြည်သူ့တော်လှန်ရေး အစိုးရအနေဖြင့် ယင်းကိစ္စရပ်များကို တားဆီး ကာကွယ် နှိမ်နင်းနိုင် ရေးအတွက် အဟုန်မြှင့် ကြိုးပမ်း ဆောင်ရွက်လျက်ရှိသည်ဟု ဆိုသည်။ (ဓာတ်ပုံ - AA Info Desk/ ပုံဟောင်း) #လူကုန်ကူးမှု #AA #အာရက္ခတပ်တော်

၇ လအတွင်း လူကုန်ကူးမှု အပါအဝင် ဥပဒေချိုးဖောက်မှု ၃၅ မှုကို AA အရေးယူ

AA က စစ်တွေခရိုင်အတွင်း ငှက်ဖျားနှင့် သွေးလွန်တုပ်ကွေး ရောဂါထိန်းချုပ်ရေး ကွင်းဆင်းကုသ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၂၈ ရက်။ ရခိုင်ပြည်၊ စစ်တွေခရိုင်အတွင်း အဖျားရောဂါ အဖြစ်များနေသည့် ကျေးရွာ ၃ ရွာနှင့် စစ်ဘေးရှောင်စခန်း ၂ ခုတို့မှ ပြည်သူ ၆၀၀ နီးပါးကို အာရက္ခတပ်တော် (AA) ၏ ကျန်းမာရေးအဖွဲ့က ကွင်းဆင်း၍ ကျန်းမာရေး စစ်ဆေး ကုသမှုများ လုပ်ဆောင်ပေးခဲ့ကြောင်း ဒေသခံများက ပြောသည်။ စစ်တွေခရိုင်အတွင်း အဖျားရောဂါ အဖြစ်များနေသည့် အဆိုပါ ကျေးရွာများနှင့် စစ်ရှောင်စခန်းများမှ ပြည်သူ ၅၉၀ ကျော်ကို ဩဂုတ်လ ၁၇ ရက်နေ့မှ ဩဂုတ်လ ၂၁ ရက်နေ့အထိ ၅ ရက်တိုင်တိုင် အခမဲ့ ဆေးကုသပေးခဲ့ ခြင်း ဖြစ်သည်။ AA နှင့် နီးစပ်သည့် ဆရာဝန်တစ်ဦးက “ငှက်ဖျားနဲ့ သွေးလွန်တုတ်ကွေးကို တတ်နိုင်သလောက် ထိန်းနေတာပါ။ စစ်တွေခရိုင်က ရွာတွေနဲ့ စစ်ရှောင်စခန်းတွေကို ကွင်းဆင်းခဲ့တယ်။ နေရာအတိအကျ ပြောလို့ အဆင်မပြေလို့ ပါ။ ကျနော်တို့ ကျန်းမာရေး အသိပေးတာပါ လုပ်ခဲ့ပါတယ်” ဟု ပြောသည်။ ထိုသို့ ကွင်းဆင်း ဆေးကုသပေးရာတွင် ဆေးဝါး ကုသပေးခြင်းအပြင် ငှက်ဖျားနှင့် သွေးလွန်တုပ်ကွေး ကာကွယ် ရေးဆိုင်ရာ ကျန်းမာရေး အသိပညာပေးခြင်းများကိုပါ ဆောင်ရွက်ပေးခဲ့ပြီး ယခုကဲ့သို့ အခမဲ့ ဆေးကုသပေးမှု များကို စဉ်ဆက်မပြတ် ဆောင်ရွက်ပေးလျက်ရှိသည်။ လက်ရှိ ရခိုင်ပြည်အတွင်း စစ်အုပ်စုတပ်၏ ကုန်းလမ်း၊ ရေလမ်း ပိတ်ဆို့ထားမှုများကြောင့် ဆေးဝါးနှင့် ကျန်းမာ ရေး ထောက်ပံ့ပစ္စည်းများ ပြတ်လပ်နေချိန်တွင် မိုးရာသီ ကာလအတွင်း ကျေးရွာများနှင့် စစ်ဘေးရှောင် စခန်းများ၌ ငှက်ဖျားနှင့် သွေးလွန်တုပ်ကွေး ကူးစက်ရောဂါများ ပိုမိုအဖြစ်များလာနေခြင်း ဖြစ်သည်။ အခမဲ့ ဆေးကုသမှုနေသည့် အပေါ် ရခိုင်ဒေသခံ လူငယ်တစ်ဦးက “အခုလို လမ်းပန်းဆက်သွယ်ရေးတွေ ပိတ်ပြီး ဆေးဝါးဝယ်ဖို့ ခက်ခဲနေတဲ့အချိန်မှာ ရောဂါတွေဖြစ်တော့ တော်တော်လေး ဒုက္ခရောက်ကြရတာပါ။ အခုလို ကျန်းမာရေးအဖွဲ့တွေ ကိုယ်တိုင် ရွာအထိ ဆေးလာကုပေးကြတဲ့အတွက် ဆေးဖိုးဝယ်ယူဖို့ အခက်အခဲရှိနေတဲ့ မိသားစုတွေနဲ့ စစ်ဘေးရှောင်တွေအတွက် အများကြီး အထောက်အကူဖြစ်တာပေါ့။ ရခိုင်က နေရာဒေသတိုင်း ကို သွားဖို့လိုပါတယ်။ အားလုံးက လိုအပ်နေတာပါ” ဟု ပြောသည်။ စစ်တွေခရိုင်အပြင် ရခိုင်ပြည်အတွင်းရှိ အခြားခရိုင်များမှ မြို့နယ်၊ ကျေးရွာများတွင်လည်း ဒေသခံ ပြည်သူများ ကို အခမဲ့ ဆက်လက်ကုသပေးသွားမည် ဖြစ်သည်ဟု ဆိုသည်။ ထို့ပြင် အဖျားရောဂါများ သာမက မျက်စိခွဲစိတ် ကုသခြင်း၊ သွားရောဂါ ဝေဒနာရှင်များအား ကုသပေးခြင်း၊ ကာ ကွယ်ဆေးထိုးပေးခြင်း၊ မိခင်နှင့်ကလေး ကျန်းမာရေး စောင့်ရှောက်မှု လုပ်ငန်းများ၊ ရောဂါကာကွယ် ထိန်းချုပ် ရေး လုပ်ငန်းများနှင့် အထွေထွေ ရောဂါဝေဒနာရှင်များကိုပါ အခြေခံ ဆေးကုသမှုများ အပြည့်အဝ လုပ်ဆောင် ပေးလျက်ရှိသည်။ ဓာတ်ပုံ - (AA Info Desk / AA ကျန်းမာရေးအဖွဲ့က စစ်တွေခရိုင်အတွင်းရှိ ဒေသခံ ပြည်သူများနှင့် စစ်ဘေး ရှောင်များအား အခမဲ့ ကွင်းဆင်း ဆေးကုသပေးနေစဉ်။) #AA #ငှက်ဖျား #သွေးလွန်တုတ်ကွေး

AA က စစ်တွေခရိုင်အတွင်း ငှက်ဖျားနှင့် သွေးလွန်တုပ်ကွေး ရောဂါထိန်းချုပ်ရေး ကွင်းဆင်းကုသ

ပလက်ဝနှင့် ပုဏ္ဏားကျွန်းရှိ အလှကုန်ဆိုင်များကို AA ၏ FDA စစ်ဆေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၂၈ ရက်။ အာရက္ခတပ်တော် (AA) ထိန်းချုပ်ထားသည့် ချင်းပြည်၊ ပလက်ဝမြို့နယ်နှင့် ရခိုင်ပြည်၊ ပုဏ္ဏားကျွန်းမြို့နယ်တို့ အတွင်းရှိ အလှကုန်ဆိုင်များ၌ သုံးစွဲရန် မသင့်သည့် အလှကုန်များနှင့် သက်တမ်းကုန် ပစ္စည်းများ ရောင်းချနေ သည်ကို တွေ့ရှိရသဖြင့် AA ၏ အစားအသောက်နှင့် ဆေးဝါးကြီးကြပ်ရေးဌာနခွဲ (FDA) က သိမ်းဆည်း အရေး ယူမှုများ ပြုလုပ်ခဲ့သည်။ ဩဂုတ်လ ၁၄ ရက်နေ့က ပလက်ဝမြို့နယ်အတွင်းရှိ အလှကုန်ဆိုင် ၁၂ ဆိုင်ကို AA ၏ FDA မှ ကွင်းဆင်း စစ်ဆေးခဲ့ရာ သုံးစွဲရန် မသင့်သော အလှကုန်များ တွေ့ရှိသည့်ဆိုင် ၈ ဆိုင်နှင့် သက်တမ်းကုန် ပစ္စည်းများ တွေ့ရှိသည့်ဆိုင် ၉ ဆိုင်ကို တွေ့ရှိခဲ့သည်။ အလားတူ ပုဏ္ဏားကျွန်းမြို့နယ်အတွင်း အလှကုန်ဆိုင်များကို ဩဂုတ်လ ၁၁ ရက်က စစ်ဆေးခဲ့ရာတွင်လည်း သုံးစွဲရန် မသင့်သည့် အလှကုန်များ တွေ့ရှိသည့်ဆိုင် ၉ ဆိုင်နှင့် သက်တမ်းကုန် ပစ္စည်းများ တွေ့ရှိသည့်ဆိုင် ၈ ဆိုင် ရှိခဲ့သည်။ ရခိုင်ဒေသခံ အလှကုန် ရောင်းချသည့် ကုန်သည် အမျိုးသမီးတစ်ဦးက “ကျမတို့လည်း သတိထားရပါတယ်။ အခုက ရခိုင်မှာ ပြည်ပက အလှကုန်တွေ ဝင်ရောက်တာရှိတယ်။ အိန္ဒိယ ရှိတယ်၊ ထိုင်း ရှိတယ်၊ နောက် ဘင်္ဂလားဒေ့ရှ် ရှိတယ်။ သက်ဆိုင်ရာ စကားစာအရ သက်တမ်းကို ကြည့်ပြီး သတိထားရပါတယ်။ အလှအပ ကြိုက်တဲ့ အမျိုးသမီးတွေရဲ့ မျက်နှာတွေမှာ တစ်ခုခုဖြစ်သွားရင် တော်တော် စိတ်ထိခိုက်ရမယ်။ ဒါကြောင့် အခုလို စစ်ဆေးပေးတာ ကြိုဆိုပါတယ်” ဟု ပြောဆိုသည်။ ကွင်းဆင်းစစ်ဆေးစဉ် တွေ့ရှိခဲ့သည့် သုံးစွဲရန် မသင့်သော အလှကုန်များနှင့် သက်တမ်းကုန် ပစ္စည်းများကို တပါ တည်း သိမ်းဆည်းခဲ့ပြီး ဆိုင်ပိုင်ရှင်များကို ခံဝန်လက်မှတ် ရေးထိုးစေကာ တားမြစ်ကုန်ပစ္စည်းများကို ထပ်မံ ရောင်းချခြင်း မပြုကြရန် FDA က သတိပေး ပြောဆိုခဲ့သည်။ ယခုနှစ် ဖေဖော်ဝါရီလအတွင်းက အာဆီယံဒေသတွင်း နိုင်ငံများ၏ PMAS (Post-Marketing Alert System) အစီအစဉ်အရ သုံးစွဲရန် မသင့်ဟု တားမြစ်ပိတ်ပင်ထားသည့် ထိုင်း၊ မလေးရှား၊ ဖိလစ်ပိုင်၊ အင်ဒိုနီးရှားနှင့် ဘရူနိုင်းနိုင်ငံထုတ် အလှကုန်ပစ္စည်း ၂၉ မျိုးသည် ရခိုင်ပြည်အတွင်းသို့ နည်းမျိုးစုံဖြင့် ဝင်ရောက်လာနိုင် ကြောင်း ဆိုသည်။ အဆိုပါ တားမြစ် ဓာတုပစ္စည်းများ ပါဝင်သည့် အလှကုန်များကို သုံးစွဲပါက အရေပြား ယားယံခြင်း၊ ရောင်ရမ်း ခြင်း၊ အဖြူအနီကွက်များ ဖြစ်ခြင်း၊ ခန္ဓာကိုယ်အတွင်းသို့ စုပ်ယူ၍ ထုံကျဉ်ခြင်း၊ ကြွက်သား တုန်ခါခြင်း၊ ပင်ပန်း နွမ်းနယ်ခြင်းနှင့် စိတ်ကျရောဂါများ ဖြစ်ပွားနိုင်သည့်အပြင် ရေရှည် သုံးစွဲပါက ကျောက်ကပ် ပျက်စီးသည်အထိ အန္တရာယ် ဖြစ်ပေါ်စေနိုင်ကြောင်း အာရက္ခပြည်သူ့ကျန်းမာရေးဌာန က အသိပေးထားသည်။ ဓါတ်ပုံ - Crd #ပလက်ဝ #ပုဏ္ဏားကျွန်း #AA #FDA

ပလက်ဝနှင့် ပုဏ္ဏားကျွန်းရှိ အလှကုန်ဆိုင်များကို AA ၏ FDA စစ်ဆေး

AA ထံ စစ်မှုထမ်းရန် ရောက်လာသည့် အသက်မပြည့်သေးသူ ၃ ဦးကို မိဘထံ ပြန်အပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၈ ရက်။ ရခိုင်ပြည်၊ ပုဏ္ဏားကျွန်းမြို့နယ်တွင် အာရက္ခတပ်တော် (AA) ထံ စစ်မှုထမ်းရန် လာရောက် ပူးပေါင်းခဲ့သည့် အသက်မပြည့်သေးသော ကလေးငယ် ၃ ဦးအား AA က မိဘများထံ ပြန်လည် အပ်နှံ ပေးခဲ့သည်။ မိဘများထံ ပြန်လည်အပ်နှံခဲ့သည့် ကလေးငယ်များမှာ ပုဏ္ဏားကျွန်းမြို့နယ်၊ ကြံခင်းကျေးရွာမှ အသက် ၁၃ နှစ် အရွယ်ရှိကြသော မောင်ကျော်ဆန်းဦး၊ မောင်စိုးနိုင်ဦးနှင့် အသက် ၁၄ နှစ်အရွယ် မောင်ဝင်းမင်းသန်းတို့ ဖြစ်ကြသည်။ ၎င်းတို့သည် ပြီးခဲ့သည့် ဩဂုတ်လ ၁၃ ရက်နေ့က မိဘများကို အသိမပေးဘဲ ၎င်းတို့၏ စိတ်ဆန္ဒအတိုင်း AA ထံ စစ်မှုထမ်းရန်အတွက် ကျေးရွာမှ ထွက်ခွာလာခဲ့ကြခြင်း ဖြစ်သည်။ AA နှင့် နီးစပ်သည့် ဒေသခံ အမျိုးသားတစ်ဦးက “ဩဂုတ်လ ၁၃ ရက်နေ့က အေအေဆီဝင်မယ်ဆိုပြီး ရောက် လာတာ။ စစ်မှုထမ်းဖို့ စစ်သားလုပ်ဖို့လာတယ်လို့ ပြောတယ်။ တပ်တော်ရဲ့ စခန်းတစ်ခုရှိတဲ့နေရာကို ရောက် လာကြတာ။ တပ်တော်က ဒီကလေးတွေကို စစ်ဆေးဖို့ တစ်ရက်နှစ်ရက်လောက် ထိန်းသိမ်းထားပြီး အခုလို မိဘတွေဆီ ပြန်အပ်တာ။ အသက်ပြည့်ရင်တော့ တစ်မျိုးပေါ့” ဟု ပြောသည်။ အဆိုပါ ကလေးငယ်များသည် ပညာသင်ကြားရမည့် အရွယ်ဖြစ်သည့်အပြင် တာဝန်ထမ်းဆောင်ရန် အသက် မပြည့်သေးသဖြင့် AA ဘက်မှ မိဘများနှင့် ဆက်သွယ်ကာ ယနေ့ (ဩဂုတ်လ ၁၈ ရက်) နံနက်ပိုင်းတွင် ပြန်လည် လွှဲပြောင်း အပ်နှံခဲ့ခြင်း ဖြစ်သည်။ လက်ရှိတွင် စစ်ရေးအရ အရေးကြီးသည့် ကာလဖြစ်သော်လည်း မိမိစိတ်ဆန္ဒအတိုင်း AA ထံ တာဝန်ထမ်း ဆောင်ရန် လာရောက်ပါက အသက်ပြည့်မီခြင်း ရှိမရှိနှင့် ကျန်းမာရေး အခြေအနေများကို သေချာစွာ စစ်ဆေးပြီး မှသာ လက်ခံမည်ဟု AA ဘက်က ဆိုထားသည်။ ထို့ပြင် ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) ၏ အမျိုးသားကာကွယ်ရေး အရေးပေါ် ပြဋ္ဌာန်းချက် (NDEP) တွင် စစ်မှုထမ်း ခေါ်ယူရာတွင်လည်း တာဝန်ထမ်းဆောင်ရန် အသက်ပြည့်မီမှု၊ ကျန်းမာရေး ကောင်းမွန်မှုနှင့် အခြားလိုအပ်သည့် အချက်အလက်များကို သေချာစွာ စိစစ်ပြီးမှသာ ခေါ်ယူလျက်ရှိကြောင်း ဖော်ပြထားသည်။ အာရက္ခတပ်တော် (AA) သည် ၎င်းတို့ ထိန်းချုပ်ထားသည့် ရခိုင်ပြည်အတွင်းရှိ မြို့နယ်များနှင့် ချင်းပြည်၊ ပလက် ဝဒေသတို့တွင် အမျိုးသားကာကွယ်ရေးဆိုင်ရာ အရေးပေါ်ပြဋ္ဌာန်းချက် (NDEP) ကို ပြဋ္ဌာန်း၍ အသက် ၁၈ နှစ်မှ ၄၅ နှစ်ကြား အမျိုးသားများနှင့် အသက် ၁၈ နှစ်မှ ၃၅ နှစ်ကြား အမျိုးသမီးများကို စစ်မှုထမ်းရန် ခေါ်ယူ လျက်ရှိသည်။ သို့သော်လည်း အဖွဲ့အစည်း အောက်ခြေအဆင့်တွင် အသက်မပြည့်သေးသူများနှင့် ကိုယ်ဝန်ဆောင်၊ ကလေး မိခင်အချို့ ပါဝင်သွားသည်ဆိုသော စွပ်စွဲချက်များနှင့် ကုလသမဂ္ဂ၏ ကလေးသူငယ်နှင့် လက်နက်ကိုင် ပဋိပက္ခ ဆိုင်ရာ အစီရင်ခံစာများ (UN CAAC) တွင် AA အား ကလေးစစ်သူရဲ သုံးစွဲသည့် အဖွဲ့အဖြစ် ဖော်ပြခံရမှုများ ရှိခဲ့ဖူးသည်။ ပြီးခဲ့သည့် ၂၀၂၅ ခုနှစ်၊ ဖေဖော်ဝါရီလအတွင်းက မောင်တောမြို့နယ်၊ ခုံတိုင်ကျေးရွာမှ ကိုယ်ဝန်ဆောင်တစ်ဦးနှင့် အသက်မပြည့်သေးသည့် ကလေးငယ်နှစ်ဦးအပါအဝင် ကျေးရွာသား ၄၀ နီးပါးကို AA က စစ်မှုထမ်းခေါ်ခဲ့ ကြောင်း ဒေသခံများက ပြောဆိုထားသည်။ အဆိုပါ စွပ်စွဲချက်များနှင့် ပတ်သက်၍ ULA/AA ဘက်ကမူ NDEP စည်းမျဉ်းများအရ အသက်ပြည့်မီသူများနှင့် ကျန်းမာရေး ကောင်းမွန်သူများကိုသာ စိစစ်ခေါ်ယူခြင်းဖြစ်ပြီး ကိုယ်ဝန်ဆောင်နှင့် ကလေးမိခင်များကို အဓမ္မ ခေါ်ယူခြင်း မရှိကြောင်း ၂၀၂၅ ခုနှစ်၊ ဩဂုတ်လတွင် တုံ့ပြန်ထားသည်။ ထို့ပြင် ကလေးစစ်သူရဲ အသုံးပြုမှုကို လုံးဝ လက်မခံသည့် မူဝါဒအတိုင်း အသက်မပြည့်သေးဘဲ မိမိစိတ်ဆန္ဒ အရ သို့မဟုတ် မိဘမသိဘဲ ရောက်ရှိလာသည့် ကလေးငယ်များကို စစ်သားအဖြစ် လက်မခံဘဲ မိဘများထံ ပြန် လည်အပ်နှံပေးလျက်ရှိကြောင်း ရှင်းလင်းထားသည်။ ဓါတ်ပုံ - (ပေးပို့ - Crd) #AA #ကလေးစစ်သား

AA ထံ စစ်မှုထမ်းရန် ရောက်လာသည့် အသက်မပြည့်သေးသူ ၃ ဦးကို မိဘထံ ပြန်အပ်

ဧရာဝတီတိုင်းအတွင်း AA နှင့် တိုက်ပွဲများ ပြန်ဖြစ်ပြီး စစ်တပ် အထိနာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၄ ရက်။ ဧရာဝတီတိုင်းအတွင်းရှိ သာပေါင်းနှင့် ရေကြည်မြို့နယ် အစပ်ဒေသများတွင် အာရက္ခတပ်တော် (AA) နှင့် စစ်အုပ်စုတပ်တို့အကြား တိုက်ပွဲများ ဆက်လက် ပြင်းထန်နေပြီး စစ်တပ်ဘက်မှ အထိနာနေသဖြင့် ဒဏ်ရာ ရရှိသူအချို့ကို ကားများဖြင့် သယ်ယူနေရကြောင်း ဒေသတွင်း သတင်းရင်းမြစ်များက ပြောသည်။ ဩဂုတ်လ ၁၀ ရက်နေ့မှ ၁၂ ရက်နေ့အထိ သာပေါင်းမြို့နယ် သဲဖြူကျေးရွာနှင့် ရေကြည်မြို့နယ် ကမ္ဘားကြီး ကျေးရွာ အနောက်ဘက်ရှိ ကြောင်လျှာကျေးရွာ၊ ရွာသစ်ကလေးကျေးရွာတို့တွင် တိုက်ပွဲအချို့ ဖြစ်ပွားခဲ့ပြီး သဲဖြူနှင့် ဘောမိချောင်း ဒေသဘက်၌ တိုက်ပွဲများ အရှိန်ဟုန်မက ပိုမိုပြင်းထန်နေခြင်း ဖြစ်သည်။ ထို့ပြင် သာပေါင်းမြို့နယ် ရခိုင်ရိုးမအစပ် ဘောမိချောင်းဒေသရှိ ဝါးယားကျေးရွာနှင့် ကဇင်းတောကျေးရွာ ဘက်တွင်လည်း တိုက်ပွဲများ ဖြစ်ပွားနေပြီး စစ်အုပ်စုတပ်ဘက်မှ လက်နက်ကြီး ပစ်ခတ်သံများကို ပတ်ဝန်း ကျင်ကျေးရွာများမှ ဆက်တိုက် ကြားနေရသည်။ သာပေါင်းဒေသခံ စစ်ရေးသတင်းရင်းမြစ်တစ်ဦးက “အခုဖြစ်နေတာက ဘောမိချောင်း၊ ဝါးယားရွာနဲ့ ကဇင်း တောရွာဘက်မှာ ဖြစ်နေတာ။ အဲဒီနေရာတွေက ရခိုင်နယ်စပ် ရွှေသောင်ယံ မကျည်းဇင်ကနေ ရခိုင်ပြည်နယ် ဂွမြို့နယ်အထိ တောက်လျှောက် စပ်နေတာ။ တိုက်ပွဲက ရပ်လိုက် တိုက်လိုက်ပါပဲ” ဟု ပြောသည်။ ဧရာဝတီတိုင်းအတွင်းရှိ သဲဖြူ၊ ကင်ပွန်းချဉ်၊ ဝါးယားနှင့် ကဇင်းတော ကျေးရွာများသည် ရခိုင်ရိုးမအစပ် ဘောမိချောင်းတစ်လျှောက်ရှိ ဂွမြို့နယ်နှင့် နယ်နိမိတ်ချင်း ထိစပ်နေသည့် နေရာများဖြစ်ပြီး စစ်အုပ်စုတပ်က အင်အားသုံး စစ်ကြောင်းထိုးလာသဖြင့် AA တပ်ဖွဲ့များနှင့် တိုက်ပွဲဖြစ်ပွားရခြင်း ဖြစ်သည်။ “အမှန်တော့ ဂွကို စစ်ကြောင်းထပ်ထိုးတာ မတန့်ဘဲ ဆက်တိုက် နေတာ စစ်တပ်က။ ဩဂုတ် ၁၁ ရက် ညပိုင်း ကနေ အခု ၁၂ ရက်အထိ တိုက်ပွဲက ရပ်လိုက် တိုက်လိုက်ပါပဲ” ဟု အဆိုပါ သတင်းရင်းမြစ်က ဆက် ပြော သည်။ တိုက်ပွဲဖြစ်ပွားနေသည့် ကဇင်းတောကျေးရွာသည် ကြက်သွန်ကွင်း-သဲဖြူ လမ်းဆုံမှ ၇ မိုင်ခန့် ကွာဝေးပြီး ဝါးယားကျေးရွာနှင့် ၁၁ မိုင်ခွဲခန့်သာ ကွာဝေးသည်။ ဗျူဟာမှူးအဆင့် အုပ်ချုပ်နေသည့် သဲဖြူနှင့် ကင်ပွန်းချဉ် ကုန်းတို့မှ စစ်အုပ်စုတပ်က လက်နက်ကြီးများဖြင့် ဆက်တိုက် ပစ်ကူပေးလျက် ရှိသည်။ လက်ရှိတွင် စစ်အုပ်စုတပ်ဘက်မှ အင်အားအမြောက်အမြား အသုံးပြု၍ စစ်ကြောင်းထိုး နယ်မြေထိန်းချုပ်ရန် ကြိုးပမ်းနေသလို AA ဘက်ကလည်း ရိုးမတောင်ခြေ နယ်မြေများအတွင်း ပြောက်ကျားစစ်ဆင်ရေး စနစ်ဖြင့် ပြန်လည်ခုခံ တိုက်ခိုက်လျက်ရှိသည်။ ဒေသခံ စစ်ရေးလေ့လာသူတစ်ဦးက “ဘာပဲဖြစ်ဖြစ် AA ဘက်ကတော့ ထပ်တိုးလာတာမျိုး သိပ်မရှိဘူး။ စစ်တပ်က စစ်ကြောင်းထိုးရင် ဖြတ်တိုက်တယ်။ ဆုတ်ရင် လိုက်တိုက်ရင်း စခန်းတွေရတယ်။ အခုလည်း ကျွန်တော်တို့ ကြားရသလောက် စစ်တပ်က အကျအဆုံးများပြီး ဆုတ်လာတော့ AA က နောက်ကကပ်ပြီး လိုက်လာတာ။ သဲဖြူရွာ အနီးတစ်ဝိုက်တောင် ရောက်ခဲ့တယ်လို့ သိရတယ်” ဟု ပြောသည်။ တိုက်ပွဲများအတွင်း စစ်အုပ်စုတပ်ဘက်မှ လက်နက်ကြီးများကို အလွန်အကျွံ အသုံးပြု ပစ်ခတ်နေသဖြင့် တိုက်ပွဲနယ်မြေနှင့် နီးစပ်သည့် ကျေးရွာများမှ ဒေသခံပြည်သူ အများအပြားမှာ လုံခြုံရာ ဘေးလွတ်ရာနေရာ များသို့ တိမ်းရှောင်နေကြရသည်။ လက်ရှိအခြေအနေတွင် သာပေါင်းနှင့် ရေကြည်မြို့နယ် နယ်စပ်တောင်တန်း ဒေသများ၌ နှစ်ဖက်စစ်ရေး ဆက် လက် တင်းမာနေဆဲဖြစ်ပြီး ဒေသတွင်း သွားလာရေး လမ်းကြောင်းများကိုလည်း စစ်အုပ်စုတပ်က စစ်ဆေးမှုများ တင်းကျပ်ထားသည်။ စစ်အုပ်စုတပ်သည် သာပေါင်းနှင့် ရေကြည်မြို့နယ်များမှတစ်ဆင့် ရခိုင်ပြည်၊ ဂွမြို့နယ်အစပ်သို့ စစ်အင်အား ဖြန့်ကျက်နိုင်ရန်အတွက် အင်အား ၅၀၀ မှ ၇၀၀ အထိ ပေးပို့ဖြည့်တင်းကာ ထိုးစစ်ဆင်နေခြင်း ဖြစ်သည်။ အဆိုပါဒေသတွင် AA က စစ်အုပ်စုတပ်၏ ပွိုင့်စခန်းကုန်းများနှင့် ကာကင်းစခန်းများကို သိမ်းယူခဲ့ပြီး ရေကြည် မြို့နယ် ရုံးပင်ကျေးရွာနှင့် သာပေါင်းမြို့နယ် သာပေါင်းလေးကျေးရွာတို့တွင် တိုက်ပွဲများ ဖော်ဆောင်ခဲ့ရာ စစ် အုပ်စု တပ်ဖွဲ့ဝင်များ ကစဉ့်ကလျား ထွက်ပြေးခဲ့ရပြီး စစ်အုပ်စုတပ်ဖွဲ့ဝင်များ၏ ရုပ်အလောင်းများနှင့် လက်နက် ခဲယမ်းများကို AA ဘက်မှ သိမ်းဆည်းရမိခဲ့သည်။ ဓါတ်ပုံ - MOI #ဧရာဝတီတိုင်းတိုက်ပွဲ #AA

ဧရာဝတီတိုင်းအတွင်း AA နှင့် တိုက်ပွဲများ ပြန်ဖြစ်ပြီး စစ်တပ် အထိနာ

ဖမ်းဆီးထိန်းသိမ်းထားသည့် မူးယစ်ဆေးသုံးစွဲသည့် ကျောင်းသားနှင့် လူငယ် ၁၉ ဦးကို AA ပြန်လွှတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၂ ရက်။ ရခိုင်ပြည်၊ ကျောက်တော်မြို့နယ်တွင် မူးယစ်ဆေးဝါး သုံးစွဲမှုဖြင့် ဖမ်းဆီးထိန်းသိမ်းထားသည့် ကျောင်းသားနှင့် လူငယ် ၁၉ ဦးကို ဩဂုတ်လ ၁၁ ရက်နေ့တွင် အာရက္ခတပ်တော် (AA) က မိဘအုပ်ထိန်းသူများထံ အာမခံဖြင့် ပြန်လည်လွှတ်ပေးလိုက်ကြောင်း နီးစပ်သူများက ပြောသည်။ အဆိုပါ လွတ်မြောက်လာသူများ အနက် အသက် ၂၀ အောက် ကျောင်းသား ၁၃ ဦး ပါဝင်ပြီး ကျောက်တော် မြို့နယ်တွင် အခမ်းအနားပြုလုပ်၍ မိဘများထံ ပြန်လည်အပ်နှံခဲ့ခြင်းဖြစ်သည်။ AA နှင့် နီးစပ်သည့် အမျိုးသမီးတစ်ဦးက “အေအေတာဝန်ရှိသူတွေ၊ ဒီလပ်တာဝန်ရှိသူတွေ၊ မြို့နယ်အဆင့် တာ ဝန်ရှိသူတွေနဲ့ ရပ်ရွာအုပ်ချုပ်ရေး တာဝန်ရှိသူတွေက မနက်ပိုင်းမှာ မိဘတွေဆီ ပြန်လည်အပ်နှံခဲ့တာပါ။ နောက် နောင် မူးယစ်ဆေးဝါး မသုံးစွဲဖို့ ကတိခံဝန်နဲ့ ပြန်လည်အပ်နှံခဲ့တာပါ။ ကျန်းမာရေးအခြေအနေကို စစ်ဆေးခဲ့ပြီး ကြိမ်ဒဏ် ပြစ်ဒဏ်ပေးခဲ့တာတွေလည်း ရှိပါတယ်” ဟု ပြောသည်။ အာရက္ခပြည် ပြည်သူ့လုံခြုံရေးတပ်ဖွဲ့ (DLEPS) သည် အဆိုပါ ကျောင်းသားလူငယ်များကို မူးယစ်ဆေးဝါး သုံးစွဲမှုမှ ကင်းဝေးစေရန်နှင့် အနာဂတ်ဘဝ လှပစေရန် ခေါ်ယူထိန်းကျောင်းခြင်း၊ အကျင့်စာရိတ္တ ပြုပြင်ခြင်းနှင့် အသိပညာပေးခြင်းများ ပြုလုပ်ခဲ့ပြီး မိဘများထံ မအပ်နှံမီ ကျန်းမာရေးစစ်ဆေးကာ ကြိမ်ဒဏ် ၃ ချက်မှ ၅ ချက်အထိ ပေးခဲ့သည်။ ထို့ပြင် ပြန်လည်လွတ်မြောက်လာသည့် လူငယ်များအနေဖြင့် နောက်ထပ် မူးယစ်ဆေးဝါး သုံးစွဲမှုဖြင့် ထပ်မံ ဖမ်းဆီးခံရပါက ယခင်ပြစ်ဒဏ်များကိုပါ တပေါင်းတည်း ကျခံရမည်ဖြစ်သည်။ ကျောက်တော်မြို့နယ်အတွင်း ကျောင်းသား ၁၃ ဦး၊ DLEPS တပ်ဖွဲ့ဝင် ၇ ဦးနှင့် မူးယစ်ဆေးဝါး သုံးစွဲ၊ ရောင်းချ သူများ အပါအဝင် စုစုပေါင်း ၇၇ ဦးကို DLEPS တပ်ဖွဲ့က လွန်ခဲ့သည့် ဇွန်လနှင့် ဇူလိုင်လအတွင်း ဖမ်းဆီးခဲ့ခြင်း ဖြစ်သည်။ ရခိုင်ပြည်တွင် ၂၀၂၃ ခုနှစ် တိုက်ပွဲများ စတင်ချိန်မှစ၍ ပညာရေးစနစ်များ ရပ်တန့်ကာ ကျောင်းသားနှင့် လူငယ် များ ကျောင်းပြင်ပသို့ ရောက်ရှိခဲ့ရပြီးနောက် မူးယစ်ဆေးဝါး သုံးစွဲမှုများ ရှိလာခဲ့သည်။ AA နှင့် DLEPS တို့အနေဖြင့် ဒေသတွင်း မူးယစ်ဆေးဝါး ကင်းစင်ရေးနှင့် တရားဥပဒေ စိုးမိုးရေးအတွက် အထူး ကြပ်မတ် ထိန်းသိမ်းဆောင်ရွက်သွားမည်ဟု တာဝန်ရှိသူများက ပြောဆိုထားသည်။ #ကျောက်တော်မြို့နယ် #AA

ဖမ်းဆီးထိန်းသိမ်းထားသည့် မူးယစ်ဆေးသုံးစွဲသည့် ကျောင်းသားနှင့် လူငယ် ၁၉ ဦးကို AA ပြန်လွှတ်

မောင်တောခရိုင်တွင် AA က ညမထွက်ရအမိန့် ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၂ ရက်။ ရခိုင်ပြည်၊ မောင်တောခရိုင်အတွင်း လုံခြုံရေး အခြေအနေများကြောင့် ည ၁၀ နာရီမှ နံနက် ၄ နာရီအထိ ည မထွက်ရ အမိန့်ကို ဩဂုတ်လ ၉ ရက်နေ့မှ စတင်၍ အာရက္ခတပ်တော် (AA) က ထုတ်ပြန်လိုက်သည်။ မောင်တောခရိုင်အတွင်း ဆူပူသောင်းကျန်းမှုများ ဖြစ်ပေါ်စေရန် RSO၊ ARSA နှင့် ARA အဖွဲ့များက ရည်ရွယ် လုပ်ဆောင်နေကြခြင်း ဖြစ်သည်ဟု AA က ဆိုသည်။ အဆိုပါအဖွဲ့များသည် တစ်ဖက်နိုင်ငံကို အခြေခံ၍ အာရက္ခပြည်အတွင်းသို့ ထိုးဖောက်ဝင်ရောက်ကာ အရပ်သား များကို သတ်ဖြတ်ခြင်း၊ ပြန်ပေးဆွဲခြင်း၊ ချောင်းမြောင်းတိုက်ခိုက်ခြင်းနှင့် လုယက်ခြင်းများ ပြုလုပ်လျက်ရှိ သည်ဟု ဆိုသည်။ သို့ဖြစ်ပါ၍ ဒေသခံပြည်သူများ၏ လုံခြုံရေးအတွက် ယခုကဲ့သို့ ညမထွက်ရအမိန့် ထုတ်ပြန်ရခြင်းဖြစ်ကြောင်း AA က ထုတ်ပြန်ထားသည်။ ဒေသခံ ပရဟိတဆောင်ရွက်နေသူ အမျိုးသားတစ်ဦးက “အခုလပိုင်းတွေမှာ မောင်တော ဘင်္ဂလားနယ်စပ်မှာ မွတ်ဆလင်လက်နက်ကိုင် အဖွဲ့တွေလှုပ်ရှားလာတာတွေရှိတယ်။ နောက် ဘင်္ဂလားဘက်က ခြံစည်းရိုးခတ်ဖို့ လုပ်လာတာတွေရှိတယ်။ ဒေသခံ တိုင်းရင်းသားကျေးရွာတွေမှာ မွတ်ဆလင်လက်နက်ကိုင်အဖွဲ့တွေ က လှုပ်ရှား နေတာတွေ သတင်းတွေကြားတော့ အေအေက အခုလို ထုတ်ပြန်တာ ကောင်းတယ်လို့မြင်တယ်” ဟု ပြော သည်။ ဘူးသီးတောင်နှင့် မောင်တောမြို့နယ်များတွင် နေထိုင်ကြသည့် ပြည်သူများအနေဖြင့် ညမထွက်ရအမိန့်ကို မပျက်မကွက် လိုက်နာရန်နှင့် သတ်မှတ်ထားသည့်အချိန်အတွင်း သွားလာရန် မဖြစ်မနေလိုအပ်ပါက သက် ဆိုင်ရာ အုပ်ချုပ်ရေးတာဝန်ရှိသူများထံ ကြိုတင်အကြောင်းကြားကာ ခွင့်ပြုချက်ရယူပြီးမှ သွားလာကြရန်လည်း AA က အသိပေးထားသည်။ အမိန့်ကို လိုက်နာရန် ပျက်ကွက်သူများရှိပါက သက်ဆိုင်ရာဥပဒေ၊ စည်းမျဉ်းများနှင့်အညီ အရေးယူ ဆောင်ရွက် သွားမည်ဖြစ်ပြီး အဆိုပါ ညမထွက်ရအမိန့်သည် ဩဂုတ်လ ၉ ရက်နေ့မှ စတင်၍ ပြန်လည်ရုပ်သိမ်းကြောင်း ထပ်မံထုတ်ပြန်သည်အထိ အတည်ဖြစ်သည်ဟု ဆိုသည်။ AA သည် မောင်တောနှင့် ဘူးသီးတောင် မြို့နယ်တစ်ခုလုံးနီးပါးကို ထိန်းချုပ်နိုင်ရန် စစ်ဆင်ရေးများ ဆက်လက် ဆောင်ရွက်နေစဉ်အတွင်း နယ်စပ်အနီး တောတောင်များနှင့် စခန်းများမှ ထွက်ခွာလာသည့် မွတ်ဆလင် လက်နက်ကိုင်များနှင့် တိုက်ပွဲများ ရံဖန်ရံခါ ဖြစ်ပွားလျက်ရှိသည်။ #AA #မောင်တောခရိုင်

မောင်တောခရိုင်တွင် AA က ညမထွက်ရအမိန့် ထုတ်ပြန်

စစ်ရှုံးနေသော စစ်တပ်က စိတ်ဓာတ်မြှင့်တင်ရန် AA နှင့် PDF အလင်းဝင်သည်ဟု ဝါဒဖြန့်

မင်းပြားနှင့် ပေါက်တောမြို့များကို ရှေးရခိုင်ခေတ် အမည်များသို့ AA တရားဝင် အမည်ပြောင်းလဲ

« Prev 1 2 3 4 … 7 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close