PDF – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: PDF

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂ ရက်။ တော်လှန်ရေး ပူးပေါင်းတပ်များက ကသာမြို့လယ်အထိ ထိုးစစ်ဆင်နိုင်ခဲ့ပြီး စစ်ကော်မရှင် အခြေစိုက်စခန်း ၄ ခုကို သိမ်းပိုက်ထားနိုင်သည်ဟု မြေပြင်စစ်ရေး သတင်းရင်းမြစ်များက ပြောသည်။ စစ်ကိုင်းတိုင်းနှင့် ကချင်ပြည်အစပ်ရှိ ဗျူဟာကျသည့် ခရိုင်ရုံးစိုက်ရာ ကသာမြို့သိမ်းတိုက်ပွဲကို ရွေးကောက်ပွဲ မတိုင်မီ ၂ ရက်အလို ဒီဇင်ဘာ ၂၆ ရက်က စတင်ခဲ့ခြင်း ဖြစ်သည်။ တိုက်ပွဲ အတွင်း တော်လှန် ရေးပူးပေါင်းတပ်ဖွဲ့များက မြို့ပြင်ရှိ ကာကင်းစခန်း ၂ ခုကို ရှေးဦးစွာ သိမ်းပိုက်နိုင်ခဲ့ခြင်းဖြစ်ပြီး၊ ဒီဇင်ဘာလ ၃၀ ရက်နေ့တွင် မြို့တွင်းရှိ စစ်ကောင်စီတပ်စွဲထားရာ အမှတ် (၅) ရပ်ကွက်မှ စိုးမိုးကုန်း (ဘုန်းကြီးကျောင်း) နှင့် အမှတ် (၈) ရပ်ကွက်ရှိ စေတီကုန်းအထိုင်စခန်းတို့ကိုပါ ထပ်မံ သိမ်းပိုက်နိုင်ခဲ့ခြင်း ဖြစ်သည်။ ကသာဒေသခံ တော်လှန်ရေးတပ်ဖွဲ့ဝင်တစ်ဦးက မြေပြင်စစ်ရေးအခြေအနေနှင့် ပတ်သက်၍ ယခုကဲ့သို့ အတည်ပြု ပြောဆိုသည်။ “လက်ရှိကတော့ စခန်း ၄ ခု ရထားပြီ။ တော်လှန်ရေးတပ်တွေ မြို့ထဲကို တောက်လျှောက်ဝင်သွားပြီး မြို့ရဲ့ တစ်ဝက်လောက် ရောက်နေပြီ။ မြို့လယ်ခေါင်လို့တောင် ပြောလို့ရပါတယ်။ စစ်ကောင်စီဘက်ကတော့ ခမရ ၃၀၉ တပ်ရင်းတစ်ခုကနေပဲ အဓိကခုခံနိုင်တော့တဲ့ အခြေအနေပါ။” အမျိုးသားညီညွတ်ရေး အစိုးရ (NUG) လက်အောက်ခံ PDF တပ်ဖွဲ့များနှင့် ကချင်လွတ်လပ်ရေး တပ်မတော် (KIA) ပူးပေါင်းတပ်များ၏ ထိုးစစ်ဆင်မှုကြောင့် စစ်ကော်မရှင်တပ်သည် မြေပြင်လမ်းကြောင်းများ ပြတ်တောက်နေသည်ဟု ဆိုသည်။ ဇန်နဝါရီ ၂ ရက် ယနေ့နံနက်ပိုင်းတွင် ထောက်ပို့လေယာဉ် ၂ စီးအသုံးပြုကာ ခမရ ၃၀၉ တပ်ရင်းအတွင်းသို့ ရိက္ခာနှင့် စစ်ကူတပ်သားများ လေကြောင်းမှတစ်ဆင့် ချပေးခဲ့သည်။ စစ်ကော်မရှင်တပ်သည် ခမရ ၃၀၉ တပ်ရင်းအတွင်းမှ နေ၍ ဒရုန်းနှင့် လက်နက်ကြီးများအသုံးပြုကာ မြို့ပေါ် ရပ်ကွက်များသို့ နေ့စဉ်ဗုံးကြဲတိုက်ခိုက်နေသဖြင့် လူနေအိမ်အများအပြား မီးလောင်ပျက်စီးလျက်ရှိသည်။ ထို့အပြင် Y-12 လေယာဉ်ဖြင့် မြို့ပတ်ပတ်လည်ကို ဗုံးအလုံးပေါင်း ၆၀ ကျော် ဆက်တိုက်ကြဲချခဲ့သလို မြို့အဝင် အထွက်လမ်းများကိုလည်း ပိတ်ဆို့ထားခဲ့သည်။ သို့သော်လည်း ဒီဇင်ဘာလ ၃၁ ရက်နေ့တွင် တော်လှန်ရေးတပ်ဖွဲ့များက လမ်းကြောင်းများ ရှင်းလင်းပေးခဲ့သဖြင့် မြို့ခံပြည်သူများသည် ဘေးလွတ်ရာသို့ အစုလိုက်အပြုံလိုက် ထွက်ခွာနိုင်ခဲ့ကြသည်။ ကသာမြို့မှ စစ်ဘေးရှောင်လာသည့် ဒေသခံတစ်ဦးက ၎င်းတို့ကြုံတွေ့ခဲ့ရသည့် အခြေအနေကို ယခုကဲ့သို့ ပြောပြသည်။ “အရင်နေ့တွေက စစ်တပ်က မြို့ထွက်လမ်းတွေအကုန် ပိတ်ထားတာ။ အခု PDF တွေက မြို့တစ်ဝက်ရပြီ ဆို တော့မှ သူတို့ထိန်းထားတဲ့ နေရာတွေကနေ ပြည်သူတွေ ထွက်လာနိုင်တာပါ။ တော်လှန်ရေးအဖွဲ့တွေက လမ်း ရှင်းပေးတာ၊ ကူညီပေးတာတွေ လုပ်ပေးတယ်။ လေယာဉ်ကလည်း တစ်ညလုံး ဗုံးတွေပတ်ချနေတာ။” လက်ရှိတွင် ကသာမြို့၏ တစ်ဝက်နီးပါးကို တော်လှန်ရေးတပ်များက ထိန်းချုပ်ထားပြီး ခမရ ၃၀၉ တပ်ရင်း အနီးနှင့် ဇေယျာချောင်ရပ်ကွက်များ၌ တိုက်ပွဲများ ဆက်လက်ပြင်းထန်နေသည်။ တိုက်ပွဲအတွင်း စစ်ကော်မရှင် တပ်သား ၅၀ ကျော်ကို အရှင်ဖမ်းမိထားပြီး လက်နက်ခဲယမ်း အချို့ကိုလည်း သိမ်းဆည်းရမိထားသည်ဟု ဆိုသည်။ ကသာခရိုင်အတွင်းရှိ အင်းတော်နှင့် ဗန်းမောက်မြို့များကို ၂၀၂၅ ခုနှစ်အတွင်း တော်လှန်ရေးတပ်ဖွဲ့များက သိမ်းပိုက်ထိန်းချုပ်ထားပြီးဖြစ်ရာ၊ ခရိုင်မြို့ဖြစ်သည့် ကသာကိုပါ သိမ်းပိုက်နိုင်ရေး ထိုးစစ်ဆင်နေခြင်း ဖြစ်သည်။ သို့သော် စစ်ကော်မရှင်တပ်က လေကြောင်းနှင့် လက်နက်ကြီးများကို အလွန်အကျွံ အသုံးပြု၍ ခုခံနေသဖြင့် အရပ်သားထိခိုက်မှုများ ပိုမိုရှိလာနိုင်မည်ကို ဒေသခံများက စိုးရိမ်လျက်ရှိကြသည်။ ကသာ မြို့သိမ်း တိုက်ပွဲနှင့်အတူ ဗန်းမော် တိုက်ပွဲကိုလည်း တော်လှန်ရေး တပ်ဖွဲ့များက စစ်ရှိန် ပြန်မြှင့်ထားခဲ့သည်။

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ

CDM ဆရာမ နှင့် ခင်ပွန်း ဓါးဖြင့်အချက်ပေါင်းများစွာ ထိုးသတ်ခံရ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ တနင်္သာရီတိုင်း ပုလောမြို့နယ်အတွင်း CDM ဆရာမ တစ်ဦးနှင့် သူ၏ ခင်ပွန်းတို့ ဓါးဖြင့် အချက်ပေါင်းများစွာ ထိုးသတ်ခံရသည်။ တနင်္သာရီတိုင်းဒေသကြီး၊ မြိတ်ခရိုင်၊ ပုလောမြို့နယ်အတွင်းရှိ ဆားခဲကျေးရွာတွင် CDM ဆရာမတစ်ဦးနှင့် ခင်ပွန်းဖြစ်သူတို့သည် ၎င်းတို့၏ နေအိမ်အတွင်း၌ပင် ဓားဖြင့် အချက်ပေါင်းများစွာ ထိုးသတ်ခြင်း ပြည်သူ့ကာကွယ်ရေးတပ်မတော်၊ မြိတ်ခရိုင် အမှတ် (၁) တပ်ရင်းထံမှ သိရသည်။ ဖြစ်စဉ်မှာ ဒီဇင်ဘာလ ၁၆ ရက်နေ့ နံနက် ၂ နာရီခန့်တွင် အသက် ၄၉ နှစ်အရွယ်ရှိ CDM ဆရာမ ဒေါ်အေးသီအောင်နှင့် ခင်ပွန်းဖြစ်သူတို့အား အမည်မသိ လူတစ်စုက နေအိမ်အတွင်း ဝင်ရောက်လုပ်ကြံခဲ့ခြင်း ဖြစ်သည်။ သတ်ဖြတ်ခံရသူ ဒေါ်အေးသီအောင်သည် ပုလောမြို့နယ် ပညာရေးဘုတ်အဖွဲ့ဝင်တစ်ဦး ဖြစ်ပြီး တော်လှန်ရေး နယ်မြေအတွင်းရှိ ကလေးငယ်များ၏ ပညာရေးအတွက် ရှေ့တန်းမှ ဦးဆောင်ကြိုးပမ်းနေသူတစ်ဦးလည်း ဖြစ်သည်။ အခင်းဖြစ်ပွားခဲ့သည့် အခြေအနေနှင့်ပတ်သက်၍ ဒေသခံရွာသားတစ်ဦးက "နေအိမ်ထဲမှာပဲ ဒေါ်အေးသီတာတို့ လင်မယားကို ဓားနဲ့ အချက်ပေါင်းမနည်းဘူး ထိုးသတ်ခံရတာ။ ပါးစပ်တွေ၊ လည်ပင်းတွေနဲ့ မျက်နှာတွေမှာ ရစရာမရှိအောင်ပါပဲ။ ဆရာမကြီးမှာက ဒဏ်ရာပိုများတယ်၊ ယောကျာ်းလုပ်တဲ့သူမှာက နည်းတယ်။ သူတို့အိမ်နေရာက လူပြတ်တယ်" ဟု ပြောသည်။ ဆားခဲကျေးရွာသည် ပြည်သူ့ကာကွယ်ရေးအဖွဲ့များ စိုးမိုးထားသည့် နယ်မြေအတွင်း တည်ရှိပြီး ယခုကဲ့သို့ တော်လှန်ရေးတွင် တက်ကြွစွာ ပါဝင်နေသည့် ပညာရေးဝန်ထမ်းတစ်ဦး ရက်စက်စွာ လုပ်ကြံခံရမှုအပေါ် ဒေသခံများအကြား တုန်လှုပ်ခြောက်ခြားမှုများ ဖြစ်ပေါ်နေသည်။ သတ်ဖြတ်ခံခဲ့ရသည့် ဇနီးမောင်နှံ၏ ရုပ်အလောင်းများကို ဒီဇင်ဘာလ ၁၇ ရက်နေ့ နံနက်ပိုင်းတွင် ကျေးရွာ သုသာန်၌ မီးသင်္ဂြိုဟ်လိုက်ပြီဖြစ်ကြောင်း ရွာသားများက ပြောသည်။ ဤလုပ်ရပ်သည် လူမဆန်သော အကြမ်းဖက်လုပ်ရပ်ဖြစ်ကြောင်းနှင့် ကျူးလွန်သူများကို ဖမ်းဆီးအရေးယူနိုင်ရန် အထူးစုံစမ်းစစ်ဆေးရေးအဖွဲ့ ဖွဲ့စည်းဆောင်ရွက်နေကြောင်း မြိတ်ခရိုင် အမှတ် (၁) တပ်ရင်းက သတင်း ထုတ်ပြန်ခဲ့သည်။ “ဆရာမတို့ လင်မယားနှစ်ဦးကို ရက်စက်စွာ သတ်ဖြတ်ခြင်းသည် လူမဆန်သော အကြမ်းဖက်လုပ်ရပ်မျိုး ဖြစ်သဖြင့် ပြင်းထန်စွာ ရှုတ်ချသည်” ဟု ထုတ်ပြန်ချက်တွင် ဖော်ပြထားသည်။ လက်ရှိတွင် မြိတ်ခရိုင်အတွင်း၌ စစ်ကော်မရှင်တပ်များနှင့် ဒေသခံကာကွယ်ရေးတပ်များ အကြား စစ်ရေး တင်းမာမှုများ ရှိနေသည်။ တော်လှန်ရေးအင်အားစုများ စိုးမိုးထားသည့် နယ်မြေများအတွင်း၌ပါ ယခုကဲ့သို့ လုပ်ကြံသတ်ဖြတ်မှုများ ပေါ်ပေါက်လာခြင်းကြောင့် နယ်မြေလုံခြုံရေးနှင့် ပတ်သက်၍ စိုးရိမ်မှုများ မြင့်တက်လျက်ရှိကြောင်း ဒေသခံများက ပြောသည်။

CDM ဆရာမ နှင့် ခင်ပွန်း ဓါးဖြင့်အချက်ပေါင်းများစွာ ထိုးသတ်ခံရ

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၇ ရက်။ တနင်္သာရီတိုင်းအတွင်း လှုပ်ရှားနေသည့် အမျိုးသားညီညွတ်ရေး အစိုးရ (NUG) ၏ အထူးတိုင်းစစ်ဌာန ဗျူဟာမှူး တစ်ဦး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို ကရင်အမျိုးသားအစည်းအရုံး (KNU) တပ်မဟာ ၄ လက်အောက်ခံ တပ်များက ဖမ်းဆီးထိန်းသိမ်းထားသည်ဟု ထားဝယ်ခရိုင်အမှတ် ၂ တပ်ရင်းက ပြောသည်။ ယနေ့ (ဒီဇင်ဘာ ၁၇ ရက်) နံနက်ပိုင်းတွင် ဖမ်းဆီးထိန်းသိမ်းလိုက်ကြောင်း ထားဝယ်ခရိုင်အမှတ် ၂ တပ်ရင်းက တာဝန်ရှိသူ တစ်ဦးက ပြောသည်။ ဖြစ်စဉ်နှင့်ပတ်သက်၍ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ဘာကြောင့်ဆိုတာလည်း အသေအချာ မသိရသေးဘူး။ အခုက ဆက်ပြီးဖမ်းထားတုန်းပဲ။ တပ်မဟာ ၄ တပ်ရင်း ၁၂ ဌာနချုပ်ကို ခေါ်သွားတယ်လို့တော့ သိရတယ်။ ဗျူဟာမှူးရယ်၊ တပ်ရင်းမှူးရယ်၊ ရဲဘော်အချို့ရယ်က နယ်စပ်ကအပြန် သူတို့တပ်ကို ဖြတ်ရတာမှာ အဲဒီမှာ ထိန်းလိုက်တာ။ ပြီးမှ ဒီမနက်မှာ တပ်ခွဲက ရဲဘော်တွေနဲ့ ထောက်ပို့တွေကိုပါ ဆက်တိုက်ဖမ်းတာ အားလုံး ၄၀ ကျော်၊ ၅၀ နီးပါး ရှိနေပြီ” ဟု ပြောသည်။ ဖမ်းဆီးခံရသူများထဲတွင် အထူးတိုင်းစစ်ဌာန နည်းဗျူဟာ ၃၃ ဗျူဟာမှူး စောဒါးကို၊ တနင်္သာရီတိုင်းစစ်ဌာန ဒရုန်းတပ်ရင်း ဒုတပ်ရင်းမှူး ဒိုရာ နှင့် ထားဝယ်ခရိုင်အမှတ် ၂ တပ်ရင်း (T5) တပ်ရင်းမှူး မင်းသားကြီးတို့ကဲ့သို့ အဆင့်မြင့်အရာရှိများ ပါဝင်နေသည်။ ၎င်းတို့အား KNU တပ်မဟာ ၄၊ တပ်ရင်း ၁၂ လက်အောက်ခံ ကစယ်ဒိုကျားတပ်ဖွဲ့နှင့် ပုတီးတစ်လုံးတပ်ဖွဲ့တို့က ဖမ်းဆီးကာ လက်နက်ခဲယမ်းများကိုပါ သိမ်းဆည်းထားခြင်းဖြစ်သည်။ ဒေသခံများ၏ ပြောဆိုချက်အရ ပြီးခဲ့သည့် ဒီဇင်ဘာလ ၁၆ ရက်နေ့က ထားဝယ်ခရိုင်အမှတ် ၂ တပ်ရင်း တပ်ဖွဲ့ဝင်များနှင့် KNU တပ်ရင်း ၁၂ အောက်ရှိ တပ်ဖွဲ့ဝင်များအကြား ပြဿနာတစ်စုံတစ်ရာ ဖြစ်ပွားခဲ့သည်။ အဆိုပါ ဖြစ်စဉ်များနှင့် ပတ်သက်၍ KNU တာဝန်ရှိသူများကို ဆက်သွယ်နေဆဲ ဖြစ်သည်။ ထိုဖြစ်စဉ် နောက်ပိုင်းတွင် ယခုကဲ့သို့ ဖမ်းဆီးမှုများ ဆက်တိုက်ဖြစ်ပွားလာခြင်းဖြစ်ပြီး လက်ရှိတွင် KNU က သရက်ချောင်းမြို့နယ် ဂုံညှင်းဆိပ်လှေဆိပ် အပါအဝင် လှေဆိပ်အချို့ကိုလည်း ပိတ်ထားကြောင်း ဒေသခံများ၏ ပြောပြချက်အရ သိရသည်။ KNU တပ်မဟာ ၄ အတွင်းရေးမှူး ပဒိုအယ်နားကမူ အခြေအနေအသေးစိတ် မသိရသေးကြောင်း Dawei Watch သတင်းဌာနကို ဖြေကြားထားသည်။ NUG လက်အောက်ခံ တပ်ဖွဲ့ဝင်များအနေဖြင့် ဤဖြစ်စဉ်အပေါ် အမြန်ဆုံး တွေ့ဆုံဖြေရှင်းနိုင်ရန် ကြိုးပမ်းနေ သည်ဟု ဆိုသည်။ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ကျနော်တို့ကတော့ ဘုံရန်သူကိုတိုက်ဖို့အတွက် တော်လှန်သူ တွေနဲ့ လက်တွဲပြီးသွားနေပါတယ်။ မြေပြင်ပွတ်တိုက်မှုလေးတွေကို တွေ့ဆုံညှိနှိုင်းဆွေးနွေးတာတော့ အကောင်းဆုံးပေါ့။ အခုလိုကတော့ ဘယ်လိုမှအဆင်မပြေပါဘူး။ ကျနော်တို့ ဝန်ကြီးဌာနနဲ့ တိုင်းစစ်ဌာနတွေကို တင်ပြထားပြီးပါပြီ။ သူတို့ဘက်ကလည်း တွေ့ဆုံမှုတွေအတွက် လုပ်ဆောင်နေတယ်လို့ သိရတယ်” ဟု ပြော သည်။ လက်ရှိတွင် နှစ်ဖက်တာဝန်ရှိသူများ အကြား တင်းမာမှုများ လျော့ကျစေရန်နှင့် ဖမ်းဆီးခံထားရသူများ ပြန်လည် လွတ်မြောက်ရေးအတွက် အဆင့်မြင့်တာဝန်ရှိသူများအကြား ညှိနှိုင်းမှုများ ဆက်လက်လုပ်ဆောင်နေသည်ဟု ဆိုသည်။   ဓါတ်ပုံ - ဖမ်းဆီးခံထားရသည့် အမှတ် ၃၃ ဗျူဟာမှူး ကိုဘိ (ခ) စောဒါးကို နှင့် ထားဝယ်ခရိုင် အမှတ် ၂ တပ်ရင်းမှူး မင်းသားကြီးတို့၏ ပုံ (Crd)

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား

ဗန်းမော်မြို့သိမ်းတိုက်ပွဲမှ အညာ PDF ရဲဘော်များ ၇ လကြာခရီးအပြီး နေရပ်သို့ ပြန်လည်ရောက်ရှိ  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာ ၁၆ ရက်။ စစ်ကိုင်းတိုင်း၊ ယင်းမာပင်ခရိုင်မှ ဒေသခံ ပြည်သူ့ကာကွယ်ရေးတပ်ဖွဲ့ (PDF) ရဲဘော်များသည် ကချင်ပြည်၊ ဗန်းမော်မြို့သိမ်းတိုက်ပွဲအထိ သွားရောက် တာဝန်ထမ်းဆောင်ခဲ့သည့် ခုနစ်လကျော်ကြာ ခရီးရှည်စစ်ဆင်ရေး အပြီးတွင် နေရပ်သို့ ပြန်လည်ရောက်ရှိပြီ ဖြစ်သည်။ ဒီဇင်ဘာလ ၁၄ ရက်နေ့၌ ၎င်းတို့၏ နေရပ်ရင်းဒေသသို့ ပြန်လည်ရောက်ရှိလာပြီ ဖြစ်ကြောင်း ဗိုလ်စွမ်းသူမောင် က ပြောသည်။ ယင်းမာပင်ခရိုင်အခြေစိုက် တပ်ရင်း ၂၈ နှင့် ၃၁ မှ စုစုပေါင်း ရဲဘော် ၆၉ ဦး ပါဝင်ခဲ့သည့် ဤစစ်ဆင်ရေး ခရီးစဉ်သည် ရှမ်းမြောက် (၁၀၂၇) စစ်ဆင်ရေး ကာလ၌ စတင်ခဲ့ခြင်း ဖြစ်သည်။ ထို့နောက် စစ်ကိုင်းတိုင်းအတွင်းမှ ကောလင်းနှင့် ပင်လည်ဘူးမြို့သိမ်းတိုက်ပွဲများ အပြင် နောက်ဆုံးတွင် ကချင်လွတ်လပ်ရေး တပ်မတော် KIA ဦးဆောင်သော ဗန်းမော်မြို့သိမ်းတိုက်ပွဲအထိ ချီတက်ခဲ့ခြင်းဖြစ်သည်။ အညာဒေသမှ PDF များ၏ ဤသို့ နယ်မြေဒေသမရွေး ခရီးရှည် ချီတက်ကာ ပူးပေါင်းပါဝင် တိုက်ခိုက်မှုသည် စစ်အာဏာရှင်ကို ဆန့်ကျင်ရာတွင် တော်လှန်ရေး အင်အားစုများအကြား ခိုင်မာသည့် မဟာမိတ်စိတ်ဓာတ် နှင့် စစ်ရေးပူးပေါင်းဆောင်ရွက်မှုကို ထင်ဟပ်ပြသခြင်း ဖြစ်ကြောင်း ကာကွယ်ရေး တပ်ဖွဲ့ဝင်များက ပြောသည်။ သုံးသပ်မှုများ ရှိနေသည်။ တပ်ရင်းမှူး ဗိုလ်စွမ်းသူမောင် က “ရဲဘော်တွေ တာဝန်ကျေပြီး မိခင်တပ်ရင်းကို ပြန်လာနိုင်ခဲ့ပေမယ့် အပြန် ခရီး မှာ လူမစုံခဲ့တဲ့အတွက် ဆရာ စိတ်မကောင်းပါဘူး။ ဒါပေမယ့် ပန်းနဲ့ပစ်တဲ့ ပွဲမဟုတ်တော့ ပေးဆပ်ခဲ့ရတဲ့ ရဲဘော်တွေအတွက် ဆရာ ဝမ်းနည်းစိတ် တစ်ဖက်နဲ့ ဂုဏ်ယူပါတယ်။ တာဝန်ကျေပါတယ်" ဟု ပြောသည်။ တပ်ရင်းမှူး ဗိုလ်စွမ်းသူမောင် ၏ ပြောဆိုချက်အရ ဤခရီးရှည်စစ်ဆင်ရေး ကာလအတွင်း တပ်ခွဲမှူး ရဲဘော် နိုင်းနိုင်း အပါအဝင် ရဲဘော် ၅ ဦး ကျဆုံးခဲ့ရပြီး၊ ၇ ဦး ဒဏ်ရာရရှိခဲ့သည် ဟု သိရသည်။ ကျန်ရှိသည့် ရဲဘော်များသည် တိုက်ပွဲတာဝန်များ ပြီးဆုံး၍ အောင်ပွဲခံပြန်လာခြင်းဖြစ်သော်လည်း ကျဆုံးသွားသူ များအတွက် ဝမ်းနည်းပူဆွေးမှုများလည်း ရှိနေသည်။ ဒေသခံတစ်ဦးက “ကျနော်တို့ အညာသားရဲဘော်တွေဟာ ဒီလောက်အဝေးကြီးအထိ ချီတက်ပြီး တခြား တိုင်းရင်းသားဒေသတွေမှာပါ သွားကူညီ တိုက်ခိုက်ခဲ့တာကို တကယ်ကို ဂုဏ်ယူမဆုံးဖြစ်ရပါတယ်။ သူတို့ရဲ့ အနစ်နာခံမှုဟာ တော်လှန်ရေးအတွက် အရေးကြီးတဲ့ စိတ်ဓာတ်ကို ပြသတာပါ” ဟု ပြောသည်။ လက်ရှိတွင် KIA ဦးဆောင်သော မဟာမိတ်တပ်ဖွဲ့များက ဗန်းမော်မြို့နယ်ကို ထိန်းချုပ်ထားဆဲ ဖြစ်ပြီး၊ မြို့သိမ်း တိုက်ပွဲတွင် စစ်ကော်မရှင်တပ်က လေကြောင်းမှတစ်ဆင့် မကြာခဏ တိုက်ခိုက်မှုများ ပြုလုပ်လျက်ရှိရာ၊ မြို့နယ်အတွင်း၌ စစ်ရေးတင်းမာမှုများ ဆက်လက်ရှိနေဆဲဖြစ်ကြောင်း ဒေသခံ သတင်းရင်းမြစ်များ၏ ပြောပြ ချက်အရ သိရသည်။

ဗန်းမော်မြို့သိမ်းတိုက်ပွဲမှ အညာ PDF ရဲဘော်များ ၇ လကြာခရီးအပြီး နေရပ်သို့ ပြန်လည်ရောက်ရှိ  

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၅ ရက်။ တရုတ်၏ ကြီးကြပ်မှုဖြင့် တအာင်းအမျိုးသား လွတ်မြောက်ရေး တပ်မတော် (TNLA) မှ စစ်ကော်မရှင် တပ်ကို မိုးကုတ်-မိုးမိတ်ဒေသ နယ်မြေပြန်လွှဲပေးသည့် အစီအစဉ်ကို အမျိုးသားညီညွတ်ရေး အစိုးရ (NUG) က လက်မခံကြောင်း တရားဝင် ပြောဆိုလိုက် သည်။ NUG သည် အဆိုပါဒေသသို့ ပြန်လည် ဝင်ရောက်လာသော စစ်ကော်မရှင်တပ်များကို ပြည်သူလူထုနှင့် လက်တွဲ ၍ ဆက်လက်တိုက်ပွဲဝင်သွားမည်ဟု ပြောဆိုခဲ့ပြီး၊ လက်ရှိ တိုက်ပွဲများကြောင့် အရပ်သား သေဆုံးမှုများရှိနေ ကြောင်း ဒေသခံများက ဆိုသည်။ NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ဒီဇင်ဘာလ ၁၁ ရက်နေ့တွင် ထုတ် ပြန် ပြောဆိုခဲ့ခြင်းဖြစ်ပြီး၊ ထိုဒေသကို ပြန်လည်ထိန်းချုပ်နိုင်ရေး 'စစ်ဆင်ရေး စစ်ဦးစီးအဖွဲ့' ကို နိုဝင်ဘာလ ၉ ရက်နေ့ကပင် ဖွဲ့စည်းကာ စစ်ရေးလှုပ်ရှားမှုများ လုပ်ဆောင်ခဲ့ကြောင်း ပြောသည်။ တအာင်းတပ် TNLA နှင့် စစ်ကော်မရှင်တပ်တို့အကြား နိုဝင်ဘာလကုန်ပိုင်းက ပြုလုပ်ခဲ့သော နယ်မြေ ပြန်လွှဲ ပေးရေး သဘောတူညီချက်ကို NUG အနေဖြင့် လုံးဝလက်မခံနိုင်ကြောင်း ဦးနေဘုန်းလတ်က ပြောသည်။ “မိုးကုတ် - မိုးမိတ် ဒေသသို့ ကျူးကျော်ဝင်ရောက်လာသော အကြမ်းဖက် စစ်အုပ်စုတပ်တွေကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ပွဲဝင်လျက် ရှိနေပြီး နယ်မြေစိုးမိုးထိန်းချုပ်နိုင်မှု ပြန်လည်ရရှိနိုင်ရေး အတွက် ဆက်လက် တိုက်ပွဲဝင်နေပါတယ်။ မိုးကုတ်–မိုးမိတ်ဒေသသို့ ကျူးကျော်ဝင်လာတဲ့ စစ်အုပ်စုတပ်တွေ ကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ခိုက်မယ့်အပြင် နယ်မြေစိုးမိုးမှု ပြန်လည်ရရှိရေး အတွက် စစ်ရေးအရှိန်မြှင့်သွားမယ်။” မိုးကုတ် - မိုးမိတ်ဒေသသည် နိုင်ငံရေးနှင့် စစ်ရေးအရ အထိမခံသော အခြေအနေဖြစ်သောကြောင့် တရားဝင် ထုတ်ပြန်ချက်များကို အဆောတလျင် မထုတ်ပြန်နိုင်ခဲ့သော်လည်း စစ်ဆင်ရေးများကို စနစ်တကျ ကွပ်ကဲ ဆောင်ရွက်ခဲ့ကြောင်း ဦးနေဘုန်းလတ်က ရှင်းပြသည်။ နိုဝင်ဘာလ ၃၀ ရက်နေ့မှ ဒီဇင်ဘာလ ၆ ရက်နေ့အတွင်း တိုက်ပွဲကြီး ၉ ပွဲအထိ ဖြစ်ခဲ့ပြီး စစ်ကော်မရှင်၏ အရေးပါသည့် စခန်းကုန်းတစ်ခုကို သိမ်းပိုက်နိုင်ခဲ့သည်ဟုလည်း NUG က အတည်ပြုထားသည်။ စစ်ကော်မရှင်တပ်များ မိုးကုတ်နှင့် မိုးမိတ်မြို့များသို့ ပြန်လည် ဝင်ရောက်လာပြီးနောက် နိုဝင်ဘာလ ၃၀ ရက်နေ့မှ စတင်၍ တိုက်ပွဲများ ဆက်တိုက်ဖြစ်ပွားခဲ့ကာ စစ်ကော်မရှင်တပ်က လေကြောင်း တိုက်ခိုက်မှုများကိုပါ လုပ်ခဲ့သည်။ မိုးမိတ်မြို့အနီး ဗုံးကြဲတိုက်ခိုက်မှုကြောင့် ကိုယ်ဝန်ဆောင် အမျိုးသမီးတစ်ဦး အပါအဝင် အရပ်သား ၁၁ ဦး သေဆုံးခဲ့သည် ဟု ဒေသခံများက ပြောသည်။ စစ်ရေးတင်းမာမှုများကြောင့် အရပ်သားပြည်သူများမှာ လုံခြုံရေးအရ ပိုမိုစိုးရိမ်ပူပန်နေရကြောင်း ဒေသခံ တစ်ဦးက ၎င်းတို့၏ အခြေအနေကို ယခုကဲ့သို့ ပြောသည်။ “အခုရက်ပိုင်းမှာ တိုက်ပွဲတွေ ပြန်ဖြစ်လာတော့ အရပ်သားတွေက ကြားထဲက ပိတ်မိပြီး ခံနေရတာပါ။ မိုးမိတ် ဘက် ဗုံးကြဲတိုက်ခိုက်တော့ ကလေးတွေ၊ ကိုယ်ဝန်ဆောင် အမျိုးသမီးတွေပါ သေဆုံးခဲ့ရတယ်။ ဒီလို နယ်မြေ ပြန်လွှဲတာတွေကြောင့် ပြည်သူတွေရဲ့ လုံခြုံရေး ပိုဆိုးလာတာကိုပဲ မြင်ရတယ်။” အဆိုပါဒေသတွင်း စစ်ရေးလှုပ်ရှားမှုများနှင့် ပတ်သက်၍ ကချင်လွတ်လပ်ရေးအဖွဲ့ (KIO/KIA) ၏ ပြောရေး ဆိုခွင့်ရှိသူ ဗိုလ်မှူးကြီးနော်ဘူကလည်း KIA ၏ မဟာမိတ်တပ်ဖွဲ့များ အပေါ် ကူညီထောက်ပံ့မည့် အခြေအနေကို ယခုကဲ့သို့ ပြောသည်။ “တိုက်ပွဲ ဖြစ်လို့ ရှိရင်တော့ အမြဲတမ်းကူညီကြတဲ့ သဘောမျိုးနဲ့ ကူညီတဲ့ အနေအထားလောက်တော့ ရှိမှာပါ။ ဒါပေမယ့် လက်တွေ့ အခြေအနေကတော့ ဘယ်လောက်အထိ ဘယ်လိုအခြေအနေ ရှိတယ်ဆိုတာကတော့ အခုကတော့ ကျနော်က ပြောလို့တော့ အဆင်မပြေဘူးခင်ဗျာ။” မိုးမိတ်မြို့နယ်တွင် KIA တပ်ရင်းများ၊ ABSDF နှင့် PDF များ ပူးပေါင်း၍ အခြေချထားကြောင်း၊ TNLA ဆုတ်ခွာ သည့် မိုးမိတ်မြို့နှင့်ပတ်သက်၍ KIA အနေဖြင့် စစ်ရေးအရ လုပ်ဆောင်ရန် မရှိသော်လည်း မဟာမိတ်တပ်ဖွဲ့များ စစ်ရေးလှုပ်ရှားလာပါက ကူညီသွားမည်ဟု ဗိုလ်မှူးကြီးနော်ဘူက နိုဝင်ဘာလတွင် သတင်းနှင့်မီဒီယာ ကွန်ရက် သတင်းဌာနကို ထုတ်ဖော်ပြောဆိုခဲ့ဖူးသည်။

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား

စစ်ကော်မရှင် ဒရုန်းကြောင့် ဖားကန့်တွင် သားအမိသားအဖ ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ ကချင်ပြည်၊ ဖားကန့်မြို့နယ်ထဲတွင် စစ်ကော်မရှင်၏ ဒရုန်းဗုံး ပစ်ခတ်မှုကြောင့် မိသားစု ၃ ဦး သေဆုံးခဲ့သည်ဟု ဒေသခံများက ပြောသည်။ ဖားကန့်မြို့ပေါ်ရှိ ဗျူဟာကုန်းမှ စစ်ကော်မရှင်တပ်သားများက ပစ်ခတ်လိုက်သည့် ဒရုန်းဗုံး ထိမှန်ပေါက်ကွဲမှု ကြောင့် မိသားစုတစ်စုတည်းမှ မိဘနှစ်ဦးနှင့်အတူ အသက် ၁၃ နှစ်အရွယ် ကလေးငယ်တစ်ဦးပါ စုစုပေါင်း ၃ ဦး သေဆုံးခဲ့ကြောင်း ဒေသခံသတင်းရင်းမြစ်များက ပြောသည်။ ယမန်နေ့ ဒီဇင်ဘာလ ၇ ရက်နေ့၊ ည ၁၁ နာရီဝန်းကျင်ခန့်တွင် လုံးခင်းအုပ်စု၊ မလောင်ကျေးရွာရှိ နေအိမ်တစ်လုံး ပေါ်သို့ စစ်ကော်မရှင်တပ်၏ ဒရုန်းဗုံးသီး ကျရောက်ပေါက်ကွဲခဲ့ခြင်းဖြစ်သည်။ ဒေသခံအမျိုးသားတစ်ဦးက “သူတို့က ရမ်းသမ်းပစ်လိုက်တာ။ မလောင်ရွာမှာရှိတဲ့ မိသားစုတစ်စုရဲ့ နေအိမ်ကို တည့်တည့်ကျတာ။ အဖေအမေကတော့ ပွဲချင်းပြီးဆုံးသွားတယ်။ မြင်မကောင်းအောင်ဘဲ ဒဏ်ရာတွေရပြီး ဆုံးသွားတာ။ ၄ လသား ကလေးလေးကတော့ အထိအခိုက်မရှိ ကျန်ခဲ့တယ်။ ကလေးငယ်လေးကတော့ မိဘမဲ့ လေး ဖြစ်သွားတာပေါ့” ဟု ပြောသည်။ သေဆုံးသူ မိဘနှစ်ဦးမှာ ပွဲချင်းပြီး သေဆုံးခဲ့ရပြီး၊ အဆိုပါ မိသားစု၏ လသားအရွယ်ကလေးငယ်မှာ အသက်ရှင် ကျန်ရစ်ခဲ့သော်လည်း မိဘမဲ့ဘဝသို့ ရောက်ရှိသွားပြီဟု ဒေသခံများက ပြောသည်။ လက်ရှိတွင် ဖားကန့်မြို့နယ်အတွင်း ကြီးမားသည့် ထိပ်တိုက်တိုက်ပွဲများ မရှိသေးသော်လည်း နှစ်ဖက်တပ်ဖွဲ့များ စောင့်ကြည့်နေသည့် အခြေအနေဖြစ်ပြီး၊ စစ်ကော်မရှင်ဘက်မှ ဒရုန်းဗုံးအပါအဝင် လက်နက်ကြီးများဖြင့် ရမ်းသမ်းပစ်ခတ်မှုများကြောင့် အရပ်သား သေဆုံးမှုများ မကြာမကြာ ဖြစ်ပေါ်နေသည်ဟု ဒေသခံများက ဆိုသည်။ စစ်ကော်မရှင်တပ်သည် ယမန်နေ့ ညပိုင်းမှစ၍ ယနေ့ ဒီဇင်ဘာလ ၈ ရက်နေ့၊ နံနက်ပိုင်းအထိ လက်နက်ကြီးများ နှင့် ဒရုန်းဗုံးများဖြင့် ရမ်းသမ်းပစ်ခတ်နေဆဲ ဖြစ်သည်ဟုလည်း ဒေသခံများက ပြောသည်။ ဒေသခံ အမျိုးသားတစ်ဦးက ယခုလက်ရှိ လှုပ်ရှားမှုများသည် လာမည့်ရွေးကောက်ပွဲနှင့် ဆက်စပ်နိုင်ကြောင်း သုံးသပ် သည်။ “ဖားကန့်မှာက စစ်ရေးလှုပ်ရှားမှုတွေရှိတဲ့အခါမှာ လက်နက်ကြီးတွေ၊ ဒရုန်းတွေနဲ့ အပြန်အလှန် ပစ်ခတ်မှုတွေ ရှိပါတယ်။ ပြီးတော့ ရွေးကောက်ပွဲ ကျင်းပတဲ့ကာလလည်း ဖြစ်နေတော့ သူတို့ဘက်က မြို့တွင်းလှုပ်ရှားပြတာ၊ စစ်ဆေးပြတာတွေ ရှိတယ်။ ရှေ့ရှောက်ပြီးတော့လည်း တိုက်ပွဲတွေ ဖြစ်လာနိုင်တယ်၊ ရွေးကောက်ပွဲကို ဆက် ကျင်းပရင်ပေါ့” ဟု ၎င်းက ပြောသည်။ စစ်ကော်မရှင်တပ်သည် ယခုလအတွင်း ကျင်းပမည့် ရွေးကောက်ပွဲ အောင်မြင်စွာ ဖြစ်မြောက်ရေးအတွက် ဖားကန့်မြို့နယ်တွင်း စစ်အင်အား အလုံးအရင်းဖြင့် နေရာယူထားပြီး နှစ်ဖက် လက်နက်ကိုင်များအကြား မကြာခဏ ထိတွေ့မှုများ ဖြစ်နေသည့် ဒေသလည်း ဖြစ်သည်။ ပြီးခဲ့သည့် အောက်တိုဘာနှင့် နိုဝင်ဘာလများတွင်လည်း နှစ်ဖက်တပ်များ အကြား ထိတွေ့တိုက်ပွဲများကြောင့် ကလေးငယ်များ အပါအဝင် အရပ်သားသေဆုံးမှုများ မြင့်တက်ခဲ့သည်။

စစ်ကော်မရှင် ဒရုန်းကြောင့် ဖားကန့်တွင် သားအမိသားအဖ ၃ ဦး သေဆုံး

ကချင်-စစ်ကိုင်း အစပ် ဗန်းမောက် မြို့နယ် အတွင်း လေကြာင်း တိုက်ခိုက်မှုကြောင့် အရပ်သား တစ်ဦးသေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ တော်လှန်ရေးတပ်များ ထိန်းချုပ်ထားသော ဗန်းမောက်မြို့နယ်ရှိ တရုတ်လုပ်ငန်းရှင်ပိုင် ရွှေလုပ်ကွက် လေကြောင်း တိုက်ခိုက်ခံရပြီး အရပ်သားတစ်ဦး သေဆုံးသွားသည်ဟု ဒေသခံများက ပြောသည်။ စစ်ကိုင်းတိုင်းဒေသကြီး၊ ဗန်းမောက်မြို့နယ် တောင်ပိုင်းရှိ ရွှေလုပ်ကွက်တစ်ခုအား စစ်ကော်မရှင်တပ်က ဂျက် ဖိုက်တာ လေယာဉ်ဖြင့် ဗုံးကြဲတိုက်ခိုက်ခဲ့ရာ အရပ်သားတစ်ဦး သေဆုံးပြီး တရုတ်လူမျိုးလုပ်ငန်းရှင် အချို့ အပါအဝင် ၅ ဦး ဒဏ်ရာရရှိခဲ့ကြောင်း ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့ (ပအဖ) က ထုတ်ပြန်ချက် အရ သိရသည်။ ဒေသခံအမျိုးသားတစ်ဦးက “မြို့နယ် ၃ ခုဆုံတဲ့နေရာပေါ့လေ။ အဲ့ဒီနေရာမှက တရုတ်လုပ်ငန်းရှင်ပိုင်တဲ့ ရွှေ လုပ်ကွက်က အကြီးကြီး၊ တောင်ကြောတစ်ခုလုံး တရုတ်တွေ လုပ်ကိုင်တဲ့ ရွှေလုပ်ကွက်ပေါ့။ ကြဲသွားတာက ရွှေလုပ်ကွက်ထဲဆိုတော့ တစ်ယောက်သေတယ်။ နောက်ထပ် ၅ ယောက်လောက်က ဒဏ်ရာရတယ်” ဟု ပြောသည်။ ဒီဇင်ဘာလ ၇ ရက်နေ့ မွန်းလွဲ ၂ နာရီဝန်းကျင်ခန့်က ဗန်းမောက်မြို့ပေါ်နှင့် မိုင် ၂၀ ခန့်အကွာတွင် တည်ရှိသော 'သုံးမြေဆုံရွှေလုပ်ကွက်' ကို စစ်ကော်မရှင်က လေကြောင်းမှ တိုက်ခိုက်ခဲ့ခြင်းဖြစ်သည်။ အဆိုပါ ရွှေလုပ်ကွက်သည် အင်းတော်၊ ဗန်းမောက်နှင့် ဝန်းသိုမြို့နယ် သုံးခုဆုံရာဒေသဖြစ်ပြီး၊ တရုတ်လုပ်ငန်း ရှင်များ ပိုင်ဆိုင်လုပ်ကိုင်သည့် လုပ်ကွက်ကြီး ဖြစ်ကြောင်း ဒေသခံများက ဆိုသည်။ လေယာဉ်တိုက်ခိုက်မှုတွင် တံတားဦးမှ တက်လာသည့် ဂျက်ဖိုက်တာ ၂ စီးဖြင့် ဗုံးသီး ၈ လုံးအသုံးပြုကာ ၄ ကြိမ်တိုင်တိုင် ဗုံးကြဲတိုက်ခိုက်ခဲ့သည်ဟု အခြေအနေသိရှိသူများက ပြောသည်။ သေဆုံးသူမှာ အသက် ၃၃ နှစ်အရွယ် ကိုငြိမ်းဆိုသူ ဖြစ်ပြီး ထိခိုက်ဒဏ်ရာရရှိသူ ၅ ဦးအနက်မှ ၂ ဦးသည် တရုတ်လူမျိုး လုပ်ငန်းရှင်များ ဖြစ်သည်ဟု ဒေသခံများက အတည်ပြုသည်။ ယခုရက်ပိုင်းအတွင်း တော်လှန်ရေး အင်အားစုများ သိမ်းပိုက်ထားသည့် ဗန်းမောက်မြို့ပေါ်တွင် နှစ်ဖက်တပ်များ အကြား တိုက်ပွဲများ ပြင်းထန်လျှက်ရှိသည်။ ပြီးခဲ့သည့် နိုဝင်ဘာလ ၃၀ ရက်နေ့မှ စတင်ကာ စစ်ကော်မရှင်တပ်နှင့် ရှမ်းနီအမျိုးသားတပ်မတော် (SNA) ပူးပေါင်းတပ်များက ဗန်းမောက်မြို့ ပြန်လည်ရရှိရေးအတွက် အပြင်းအထန် ထိုးစစ်ဆင်နေခြင်း ဖြစ်သည်။ ဒီဇင်ဘာလ ၇ ရက်နေ့အထိ စစ်ကော်မရှင်တပ်သည် ဗန်းမောက်မြို့နယ်အတွင်း လေကြောင်းအသုံးပြု တိုက်ခိုက် မှု ၆ ရက်ဆက်တိုက် ရှိလာပြီ ဖြစ်ကြောင်း ဗန်းမောက်မြို့နယ် ပအဖ က ထုတ်ပြန်ထားသည်။

ကချင်-စစ်ကိုင်း အစပ် ဗန်းမောက် မြို့နယ် အတွင်း လေကြာင်း တိုက်ခိုက်မှုကြောင့် အရပ်သား တစ်ဦးသေ

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ခံ လိမ်လည် အလှူခံသူတစ်ဦး ကို ဖမ်းဆီးထားစဉ် ထွက်ပြေးသောကြောင့် ပစ်ခတ်ဖမ်းဆီးရာ သေဆုံးသွားသည်ဟု နီးစပ်သူများက ပြောသည်။ တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ် နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ကို အလွဲသုံး စားပြုကာ ကျပ်သိန်းပေါင်းများစွာ လိမ်လည်အလှူခံပြီး ခြိမ်းခြောက်ငွေတောင်းခံနေသူ အဖွဲ့ဝင်ငါးဦးထဲမှ တစ်ဦးကို ပစ်ခတ်ဖမ်းဆီးရမိခဲ့ကြောင်း ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ “ကျနော်တို့ ကျွန်းစုမြို့နယ် နယ်မြေခံ ပကဖ အဖွဲ့နာမည်ကို အလွဲသုံးစားလုပ်ပြီး ကျပ်သိန်းပေါင်းများစွာ လိမ်လည် အလှူခံ ခြိမ်းခြောက်ငွေတောင်းနေတဲ့ အဖွဲ့ဝင်ငါးဦးထဲက တစ်ဦးကို ပစ်ခတ်ဖမ်းဆီးရမိခဲ့ပါတယ်။” ၎င်းအား မိုင်းတွေးကျေးရွာနေ ဒေသခံတစ်ဦးထံမှ ကျွန်းစု-ပကဖ တာဝန်ခံနာမည်ကို သုံးပြီး ကျပ် ၂၇ သိန်း အား တောင်းယူခဲ့သည့် သတင်းရရှိ၍ ဖမ်းဆီးခဲ့ခြင်းဖြစ်သည်။ နိုဝင်ဘာလ ၃၀ ရက်နေ့ ညပိုင်းတွင် ဖမ်းဆီးရမိသူသည် ပန်းဇင်ကျေးရွာရှိ ပြည်ခိုင်ဖြိုးပါတီဝင် ပျူစောထီး ခေါင်းဆောင် ဦးတင်စိုးဆိုသူ၏ ညီတစ်ဝမ်းကွဲတော်စပ်သူ ဦးကျော်ဝင်းဆိုသူ ဖြစ်သည်ဟု ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ ပကဖ တပ်ဖွဲ့ဝင်တစ်ဦး၏ ပြောပြချက်အရ ဒီဇင်ဘာ ၁ ရက်နေ့ မွန်းလွဲပိုင်းတွင် ဦးကျော်ဝင်းသည် ဖမ်းဆီး စစ်ဆေးနေစဉ်အတွင်း လက်ထိပ်ချွတ်၍ ထွက်ပြေးခဲ့ရာ ရှော်တောမော်ကျေးရွာ အနီး၌ လိုက်လံဖမ်းဆီးရာမှ ပြန်လည်ခုခံမှုများ ရှိ၍ အသေပစ်ခတ်ဖမ်းဆီးခဲ့ရသည်ဟု ဆိုသည်။ ဖမ်းဆီးရမိသူ ဦးကျော်ဝင်းအား စစ်ဆေးရာတွင် လွန်ခဲ့သည့် နှစ်နှစ်ခန့်ကတည်းက PDF/ပကဖ အမည်ခံပြီး ၎င်းအပါအဝင် စုစုပေါင်း ငါးဦးဖြင့် စုဖွဲ့ထားကြောင်း ထွက်ဆိုခဲ့သည်ဟု ကျွန်းစု-ပကဖ တာဝန်ရှိသူက ပြောသည်။ “ဖမ်းဆီးစစ်ဆေးတဲ့ အခါမှာ လွန်‌ခဲ့တဲ့၂ နှစ်လောက် ကတည်းက PDF၊ ပကဖ အမည်ခံပြီး စုစုပေါင်း ၅ ဦးနဲ့ စုဖွဲ့ထားတာ၊ ပန်းဇင်ကျေးရွာ အုပ်ချုပ်ရေးမှူး ဝင်းလတ်ထံက ၂၅ သိန်း၊ မိုင်းတွေး ကျေးရွာမှ ၂၇ သိန်း ဖုန်းဆက်တောင်းတယ်၊ တခြားအုပ်ကြီးတွေကိုလည်း ခြိမ်းခြောက်တောင်းတာတွေ ရှိသေးတယ်” ဟု ပကဖ တာဝန်ရှိသူတစ်ဦးက ပြောသည်။ ၎င်းအဖွဲ့သည် ကဘင်ကျေးရွာအုပ်စုရှိ ဘဒ္ဒနဲကျေးရွာအုပ်စု၊ သဲဖြူကျွန်းတွင်လည်း ခြိမ်းခြောက်ငွေတောင်းခံ သဖြင့် ရွာသားများက Wave Pay ဖြင့် ကျပ် ၄၀ သိန်းကျော် ပေးဆောင်ခဲ့ရသေးကြောင်း ပေါ်ပေါက်ခဲ့သည်။ ထို့အပြင် မိုင်းတွေးကျေးရွာ ကျောင်းထိုင်ဆရာတော်ထံမှ ပင်လျှင် ကျပ်သိန်း ၃၀၀ ကို ခြိမ်းခြောက်တောင်းယူခဲ့ သေးကြောင်း စစ်ဆေးတွေ့ရှိခဲ့သည်ဟု ဆိုသည်။ သဲဖြူကျွန်းကျေးရွာမှ ခြိမ်းခြောက်ငွေတောင်းခံမှု အပြီးတွင် ကျွန်းစု-ပကဖ အဖွဲ့မှ သတင်းရရှိခဲ့ပြီး၊ နောက်ထပ် ကျေးရွာများတွင် ထပ်မံခြိမ်းခြောက်ခြင်းမခံရအောင် အချိန်မီ တားဆီးနိုင်ခဲ့ကြောင်း ဆိုသည်။ လိမ်လည်သူများက တနင်္သာရီမြို့နယ်-ပကဖ တာဝန်ခံ ဖိုးတက်တိုး ၏ နာမည်ကိုပင် အလွဲသုံးစားပြုပြီး 'ဖိုးဆေးတံ' ဟု အမည်ပြောင်ဖြင့် လိမ်လည်ခြိမ်းခြောက်ခဲ့သေးကြောင်းလည်း ပကဖ အဖွဲ့မှ စစ်ဆေးတွေ့ရှိခဲ့ သည်။ လက်ရှိတွင် ကျွန်းစုမြို့နယ် ပြည်သူ့ကာကွယ်ရေးအဖွဲ့သည် ဦးကျော်ဝင်းနှင့်အတူ လိမ်လည်မှုများတွင် ပါဝင် ပတ်သက်ခဲ့သည့် ကျန်လေးဦး၏ အမည်နှင့် နေရပ်လိပ်စာများကိုပါ သိရှိထားပြီးဖြစ်ကြောင်း အတည်ပြုပြောဆို သည်။

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၆ ရက်။ တနင်္သာရီတိုင်း ဒေသကြီး၊ မြန်မာ-ထိုင်းနယ်စပ်ရှိ အရေးပါသော ကုန်သွယ်ရေးမြို့ဖြစ်သည့် မောတောင်မြို့သိမ်း တိုက်ပွဲ ကြောင့် တိမ်းရှောင်ခဲ့ရသည့် ဒေသခံ ၃,၀၀၀ ဝန်းကျင် သည် နေရပ်သို့ ပြန်၍ မရသည့်အပြင် ထိုင်းဘက်ခြမ်းတွင်ပါ ဆက်လက်ခိုလှုံရန် ခက်ခဲနေသည်ဟု အကူအညီပေးနေသူများက ပြောသည်။ မောတောင်မြို့ကို ကရင်အမျိုးသား လွတ်မြောက်ရေး တပ်မတော် (KNLA) ဦးဆောင်သည့် ပူးပေါင်းတပ်က နိုဝင်ဘာ ၁၄ ရက်နေ့တွင် အပြီးသတ် သိမ်းပိုက်နိုင်ခဲ့သော်လည်း၊ မြို့၏ အဓိက လမ်းမကြီးပေါ်ရှိ သိန်ခွန်း နှင့် သဲဖြူကျေးရွာ တို့တွင် နိုဝင်ဘာလ ၁၅ ရက်နေ့မှစ၍ ယနေ့အထိ တိုက်ပွဲများ ပြင်းထန်နေဆဲ ဖြစ်သည်။ စစ်ကော်မရှင်တပ်သည် အင်အား အလုံးအရင်းဖြင့် စစ်ကြောင်းထိုးခြင်း၊ လေကြောင်းတိုက်ခိုက်မှုများ ဆက်တိုက် လုပ်နေခြင်းတို့ကြောင့် ဒေသခံများသည် မြို့ထဲသို့ ပြန်လည်ဝင်ရောက်နေထိုင်ရန် စိုးရိမ်ကြောက်ရွံ့ နေကြရသည်။ ခုနှစ်စင်ကြယ်အဖွဲ့ (မြိတ်ခရိုင် စစ်ဘေးရှောင် ကူညီရေး) အဖွဲ့ဝင် ကိုဘလက် က “မောတောင်မြို့အဝင်ဖြစ်တဲ့ သိန်ခွန်းနဲ့ သဲဖြူဆိုတဲ့ကျေးရွာတွေမှာက လက်ရှိအချိန်အထိ တိုက်ပွဲတွေ အရမ်းကြီး ပြင်းထန်နေဆဲဖြစ်တယ်။ အဲ့နှစ်ရွာမှာ စစ်တိုက်နေခြင်းက မောတောင်မြို့ကို ပိတ်ဆို့ လိုက်သလို ဖြစ်တယ်ပေါ့နော်။ အကယ်၍ စစ်ရှောင် တွေက မြို့ထဲကိုပြန်ဝင်ပြီးနေမယ်ဆိုရင် ကျနော်တို့ လေယာဉ်ကို ကြောက်ရတဲ့အနေအထား စိန်ခေါ်မှု ဖြစ်နေ တယ်ပေါ့နော်” ဟု ပြောသည်။ မောတောင်မြို့ဒေသခံ ၁,၄၀၀ ဦးကျော်သည် နိုဝင်ဘာလ ၁၁ ရက်နေ့မှ စ၍ မြန်မာ - ထိုင်းနယ်စပ်ရှိ အလယ်ဂိတ်တွင် တိမ်းရှောင်နေထိုင်ခဲ့ကြသည်။ သို့သော်လည်း စစ်ရှောင်များက အမှိုက်များကို စနစ်တကျ မစွန့်ပစ်ခြင်း၊ ယာယီတဲဆောက်လုပ်ရာတွင် ထိုင်းပိုင် သစ်များကို ခုတ်ယူခြင်းတို့ကြောင့် ထိုင်းအာဏာပိုင်တို့က နိုဝင်ဘာလ ၂၄ ရက်နေ့မှစ၍ နေရပ်ပြန်ခိုင်းသည့် အခြေအနေနှင့် ရင်ဆိုင်ခဲ့ရသည်။ ထို့ကြောင့် စစ်ရှောင်အချို့သည် လေကြောင်းအန္တရာယ်ကို စိုးရိမ်စိတ်ဖြင့်ပင် မြန်မာဘက်ခြမ်းရှိ လုံခြုံသည့် နေရာများသို့ ပြန်လည်ပြောင်းရွှေ့နေကြရသည် ဟု ကိုဘလက်က ဆက်ပြောသည်။ “အဓိကအားဖြင့်က ထောင်နဲ့ချီတဲ့ လူဦးရေတွေက အနီးနားဝန်ကျင်မှာ ယာယီတဲတွေဆောက်ဖို့အတွက် သစ်ခုတ်တဲ့ဟာသည် ထိုင်းရဲ့သစ်တွေ တော်တော်များကိုလည်း ခုတ်တဲ့ဟာထဲမှာ ပါသွားတယ်ပေါ့နော်။ ဆိုတော့ အဲ့လို အခြေအနေမျိုးဖြစ်တဲ့ အခါ ကြတော့ ထိုင်းအာဏာပိုင်တွေက လူဦးရေလျော့ပါးသွားအောင် လုပ်လိုက် တဲ့ဟာမျိုးပဲ ကျနော်ထင်တယ်။” မောတောင်မြို့အနီး တောထဲနှင့် ဥယျာဉ်ခြံများထဲတွင် တိမ်းရှောင်နေရသူ ၇၀၀ ကျော်ရှိပြီး၊ စစ်ကော်မရှင်၏ ရမ်းသန်းပစ်ခတ်မှုများကြောင့် နေရပ်မပြန်ရဲကြသေးပေ။ ကမ်းမယ့်လက်အဖွဲ့ဝင် ကိုပိုင်ကိုဦး က “ပြန်ဝင်လို့ မရသေးဘူးဆိုတာ စစ်ကြောင်းလည်း အမြဲတမ်းထိုးတယ်။ ရဟတ်ယာဉ် ဂျက်ဖိုက်တာနဲ့ ရမ်းသမ်းပစ်လာနေတယ်။ လေယာဉ်နဲ့ ဗုံးကြဲတယ်။ လူရှိတဲ့နေရာတွေကြဲတယ်။ အဲ့တာက အမြဲတမ်း တွေ့မြင်နေရတာကိုးနော်။ ဘယ်လောက် ကြာကြာစစ်ရှောင်ရမလဲ ဆိုရင် အနည်းဆုံး ၂လ ဝန်းကျင်လောက်မှာ ရှိတယ်” ဟု ပြောသည်။ လက်ရှိတွင် စစ်ဘေးရှောင်များအတွက် အစားအစာ ရိက္ခာခြောက်များ၊ စောင်၊ အနွေးထည်များအပြင် ကလေးများအတွက် နို့မှုန့်နှင့် နို့တိုက်ပစ္စည်းများပါ အဓိက လိုအပ်နေကြောင်း အကူအညီပေးနေသူများက ပြော သည်။ စစ်ကော်မရှင်ဘက်က မောတောင်မြို့ကို နည်းအမျိုးမျိုးဖြင့် ပြန်လည်ရယူရန် ကြိုးပမ်းနေခြင်းကြောင့် ဒေသခံ ပြည်သူများအနေဖြင့် ပိတ်ဆို့မှုဒဏ် အမျိုးမျိုးကို ရင်ဆိုင်လာရနိုင်သည်ဟု ကိုဘလက်က ပြောသည်။ ထို့ကြောင့် စစ်ရှောင်အရေးကို အားစိုက်လုပ်ဆောင်ရန်အတွက် သက်ဆိုင်ရာ လူသားချင်း စာနာထောက်ထားမှု အဖွဲ့များ၊ NGO အဖွဲ့အစည်းများ နှင့် ထိုင်းနိုင်ငံသို့ ရောက်ရှိနေသည့် အဖွဲ့အစည်းများအနေဖြင့် မောတောင် စစ်ဘေးရှောင်များကို ကူညီပေးကြရန်နှင့် ဝိုင်းဝန်းအသံထုတ်ပေးကြရန် တိုက်တွန်းနှိုးဆော်ထားသည်။ ဓါတ်ပုံ - ကိုဘလက်

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ

1 2 3 … 10 Next »

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm
Junta-Aligned Pa-O Militia Bans Residents from Leaving Villages — October 29, 2024 2:23 pm

Recent Posts

အမေရိကန်တွင် ကရင်လူငယ်များဖြင့် ဖွဲ့စည်းထားသည့် K-Fam ဂိုဏ်းဝင်များကို လက်နက်များနှင့်အတူ ဖမ်းဆီးရမိ
ဒေသတွင်းတင်းမာမှုကို တုံ့ပြန်ရန် ဂျပန်နှင့် ဖိလစ်ပိုင်တို့ လုံခြုံရေးစာချုပ်များ လက်မှတ်ရေးထိုး
တရုတ်-ကနေဒါ ဆက်ဆံရေး ဦးမော့လာတော့မလား
Apple နှင့် Google တို့ AI နည်းပညာ ပူးပေါင်းဆောင်ရွက်ရန် သဘောတူ
ဂရင်းလန်ကျွန်းအရေး အမေရိကန်-ဥရောပ ဆက်ဆံရေး တင်းမာ

Archives

Archives

×Close