PDF – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: PDF

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ခံ လိမ်လည် အလှူခံသူတစ်ဦး ကို ဖမ်းဆီးထားစဉ် ထွက်ပြေးသောကြောင့် ပစ်ခတ်ဖမ်းဆီးရာ သေဆုံးသွားသည်ဟု နီးစပ်သူများက ပြောသည်။ တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ် နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ကို အလွဲသုံး စားပြုကာ ကျပ်သိန်းပေါင်းများစွာ လိမ်လည်အလှူခံပြီး ခြိမ်းခြောက်ငွေတောင်းခံနေသူ အဖွဲ့ဝင်ငါးဦးထဲမှ တစ်ဦးကို ပစ်ခတ်ဖမ်းဆီးရမိခဲ့ကြောင်း ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ “ကျနော်တို့ ကျွန်းစုမြို့နယ် နယ်မြေခံ ပကဖ အဖွဲ့နာမည်ကို အလွဲသုံးစားလုပ်ပြီး ကျပ်သိန်းပေါင်းများစွာ လိမ်လည် အလှူခံ ခြိမ်းခြောက်ငွေတောင်းနေတဲ့ အဖွဲ့ဝင်ငါးဦးထဲက တစ်ဦးကို ပစ်ခတ်ဖမ်းဆီးရမိခဲ့ပါတယ်။” ၎င်းအား မိုင်းတွေးကျေးရွာနေ ဒေသခံတစ်ဦးထံမှ ကျွန်းစု-ပကဖ တာဝန်ခံနာမည်ကို သုံးပြီး ကျပ် ၂၇ သိန်း အား တောင်းယူခဲ့သည့် သတင်းရရှိ၍ ဖမ်းဆီးခဲ့ခြင်းဖြစ်သည်။ နိုဝင်ဘာလ ၃၀ ရက်နေ့ ညပိုင်းတွင် ဖမ်းဆီးရမိသူသည် ပန်းဇင်ကျေးရွာရှိ ပြည်ခိုင်ဖြိုးပါတီဝင် ပျူစောထီး ခေါင်းဆောင် ဦးတင်စိုးဆိုသူ၏ ညီတစ်ဝမ်းကွဲတော်စပ်သူ ဦးကျော်ဝင်းဆိုသူ ဖြစ်သည်ဟု ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ ပကဖ တပ်ဖွဲ့ဝင်တစ်ဦး၏ ပြောပြချက်အရ ဒီဇင်ဘာ ၁ ရက်နေ့ မွန်းလွဲပိုင်းတွင် ဦးကျော်ဝင်းသည် ဖမ်းဆီး စစ်ဆေးနေစဉ်အတွင်း လက်ထိပ်ချွတ်၍ ထွက်ပြေးခဲ့ရာ ရှော်တောမော်ကျေးရွာ အနီး၌ လိုက်လံဖမ်းဆီးရာမှ ပြန်လည်ခုခံမှုများ ရှိ၍ အသေပစ်ခတ်ဖမ်းဆီးခဲ့ရသည်ဟု ဆိုသည်။ ဖမ်းဆီးရမိသူ ဦးကျော်ဝင်းအား စစ်ဆေးရာတွင် လွန်ခဲ့သည့် နှစ်နှစ်ခန့်ကတည်းက PDF/ပကဖ အမည်ခံပြီး ၎င်းအပါအဝင် စုစုပေါင်း ငါးဦးဖြင့် စုဖွဲ့ထားကြောင်း ထွက်ဆိုခဲ့သည်ဟု ကျွန်းစု-ပကဖ တာဝန်ရှိသူက ပြောသည်။ “ဖမ်းဆီးစစ်ဆေးတဲ့ အခါမှာ လွန်‌ခဲ့တဲ့၂ နှစ်လောက် ကတည်းက PDF၊ ပကဖ အမည်ခံပြီး စုစုပေါင်း ၅ ဦးနဲ့ စုဖွဲ့ထားတာ၊ ပန်းဇင်ကျေးရွာ အုပ်ချုပ်ရေးမှူး ဝင်းလတ်ထံက ၂၅ သိန်း၊ မိုင်းတွေး ကျေးရွာမှ ၂၇ သိန်း ဖုန်းဆက်တောင်းတယ်၊ တခြားအုပ်ကြီးတွေကိုလည်း ခြိမ်းခြောက်တောင်းတာတွေ ရှိသေးတယ်” ဟု ပကဖ တာဝန်ရှိသူတစ်ဦးက ပြောသည်။ ၎င်းအဖွဲ့သည် ကဘင်ကျေးရွာအုပ်စုရှိ ဘဒ္ဒနဲကျေးရွာအုပ်စု၊ သဲဖြူကျွန်းတွင်လည်း ခြိမ်းခြောက်ငွေတောင်းခံ သဖြင့် ရွာသားများက Wave Pay ဖြင့် ကျပ် ၄၀ သိန်းကျော် ပေးဆောင်ခဲ့ရသေးကြောင်း ပေါ်ပေါက်ခဲ့သည်။ ထို့အပြင် မိုင်းတွေးကျေးရွာ ကျောင်းထိုင်ဆရာတော်ထံမှ ပင်လျှင် ကျပ်သိန်း ၃၀၀ ကို ခြိမ်းခြောက်တောင်းယူခဲ့ သေးကြောင်း စစ်ဆေးတွေ့ရှိခဲ့သည်ဟု ဆိုသည်။ သဲဖြူကျွန်းကျေးရွာမှ ခြိမ်းခြောက်ငွေတောင်းခံမှု အပြီးတွင် ကျွန်းစု-ပကဖ အဖွဲ့မှ သတင်းရရှိခဲ့ပြီး၊ နောက်ထပ် ကျေးရွာများတွင် ထပ်မံခြိမ်းခြောက်ခြင်းမခံရအောင် အချိန်မီ တားဆီးနိုင်ခဲ့ကြောင်း ဆိုသည်။ လိမ်လည်သူများက တနင်္သာရီမြို့နယ်-ပကဖ တာဝန်ခံ ဖိုးတက်တိုး ၏ နာမည်ကိုပင် အလွဲသုံးစားပြုပြီး 'ဖိုးဆေးတံ' ဟု အမည်ပြောင်ဖြင့် လိမ်လည်ခြိမ်းခြောက်ခဲ့သေးကြောင်းလည်း ပကဖ အဖွဲ့မှ စစ်ဆေးတွေ့ရှိခဲ့ သည်။ လက်ရှိတွင် ကျွန်းစုမြို့နယ် ပြည်သူ့ကာကွယ်ရေးအဖွဲ့သည် ဦးကျော်ဝင်းနှင့်အတူ လိမ်လည်မှုများတွင် ပါဝင် ပတ်သက်ခဲ့သည့် ကျန်လေးဦး၏ အမည်နှင့် နေရပ်လိပ်စာများကိုပါ သိရှိထားပြီးဖြစ်ကြောင်း အတည်ပြုပြောဆို သည်။

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၆ ရက်။ တနင်္သာရီတိုင်း ဒေသကြီး၊ မြန်မာ-ထိုင်းနယ်စပ်ရှိ အရေးပါသော ကုန်သွယ်ရေးမြို့ဖြစ်သည့် မောတောင်မြို့သိမ်း တိုက်ပွဲ ကြောင့် တိမ်းရှောင်ခဲ့ရသည့် ဒေသခံ ၃,၀၀၀ ဝန်းကျင် သည် နေရပ်သို့ ပြန်၍ မရသည့်အပြင် ထိုင်းဘက်ခြမ်းတွင်ပါ ဆက်လက်ခိုလှုံရန် ခက်ခဲနေသည်ဟု အကူအညီပေးနေသူများက ပြောသည်။ မောတောင်မြို့ကို ကရင်အမျိုးသား လွတ်မြောက်ရေး တပ်မတော် (KNLA) ဦးဆောင်သည့် ပူးပေါင်းတပ်က နိုဝင်ဘာ ၁၄ ရက်နေ့တွင် အပြီးသတ် သိမ်းပိုက်နိုင်ခဲ့သော်လည်း၊ မြို့၏ အဓိက လမ်းမကြီးပေါ်ရှိ သိန်ခွန်း နှင့် သဲဖြူကျေးရွာ တို့တွင် နိုဝင်ဘာလ ၁၅ ရက်နေ့မှစ၍ ယနေ့အထိ တိုက်ပွဲများ ပြင်းထန်နေဆဲ ဖြစ်သည်။ စစ်ကော်မရှင်တပ်သည် အင်အား အလုံးအရင်းဖြင့် စစ်ကြောင်းထိုးခြင်း၊ လေကြောင်းတိုက်ခိုက်မှုများ ဆက်တိုက် လုပ်နေခြင်းတို့ကြောင့် ဒေသခံများသည် မြို့ထဲသို့ ပြန်လည်ဝင်ရောက်နေထိုင်ရန် စိုးရိမ်ကြောက်ရွံ့ နေကြရသည်။ ခုနှစ်စင်ကြယ်အဖွဲ့ (မြိတ်ခရိုင် စစ်ဘေးရှောင် ကူညီရေး) အဖွဲ့ဝင် ကိုဘလက် က “မောတောင်မြို့အဝင်ဖြစ်တဲ့ သိန်ခွန်းနဲ့ သဲဖြူဆိုတဲ့ကျေးရွာတွေမှာက လက်ရှိအချိန်အထိ တိုက်ပွဲတွေ အရမ်းကြီး ပြင်းထန်နေဆဲဖြစ်တယ်။ အဲ့နှစ်ရွာမှာ စစ်တိုက်နေခြင်းက မောတောင်မြို့ကို ပိတ်ဆို့ လိုက်သလို ဖြစ်တယ်ပေါ့နော်။ အကယ်၍ စစ်ရှောင် တွေက မြို့ထဲကိုပြန်ဝင်ပြီးနေမယ်ဆိုရင် ကျနော်တို့ လေယာဉ်ကို ကြောက်ရတဲ့အနေအထား စိန်ခေါ်မှု ဖြစ်နေ တယ်ပေါ့နော်” ဟု ပြောသည်။ မောတောင်မြို့ဒေသခံ ၁,၄၀၀ ဦးကျော်သည် နိုဝင်ဘာလ ၁၁ ရက်နေ့မှ စ၍ မြန်မာ - ထိုင်းနယ်စပ်ရှိ အလယ်ဂိတ်တွင် တိမ်းရှောင်နေထိုင်ခဲ့ကြသည်။ သို့သော်လည်း စစ်ရှောင်များက အမှိုက်များကို စနစ်တကျ မစွန့်ပစ်ခြင်း၊ ယာယီတဲဆောက်လုပ်ရာတွင် ထိုင်းပိုင် သစ်များကို ခုတ်ယူခြင်းတို့ကြောင့် ထိုင်းအာဏာပိုင်တို့က နိုဝင်ဘာလ ၂၄ ရက်နေ့မှစ၍ နေရပ်ပြန်ခိုင်းသည့် အခြေအနေနှင့် ရင်ဆိုင်ခဲ့ရသည်။ ထို့ကြောင့် စစ်ရှောင်အချို့သည် လေကြောင်းအန္တရာယ်ကို စိုးရိမ်စိတ်ဖြင့်ပင် မြန်မာဘက်ခြမ်းရှိ လုံခြုံသည့် နေရာများသို့ ပြန်လည်ပြောင်းရွှေ့နေကြရသည် ဟု ကိုဘလက်က ဆက်ပြောသည်။ “အဓိကအားဖြင့်က ထောင်နဲ့ချီတဲ့ လူဦးရေတွေက အနီးနားဝန်ကျင်မှာ ယာယီတဲတွေဆောက်ဖို့အတွက် သစ်ခုတ်တဲ့ဟာသည် ထိုင်းရဲ့သစ်တွေ တော်တော်များကိုလည်း ခုတ်တဲ့ဟာထဲမှာ ပါသွားတယ်ပေါ့နော်။ ဆိုတော့ အဲ့လို အခြေအနေမျိုးဖြစ်တဲ့ အခါ ကြတော့ ထိုင်းအာဏာပိုင်တွေက လူဦးရေလျော့ပါးသွားအောင် လုပ်လိုက် တဲ့ဟာမျိုးပဲ ကျနော်ထင်တယ်။” မောတောင်မြို့အနီး တောထဲနှင့် ဥယျာဉ်ခြံများထဲတွင် တိမ်းရှောင်နေရသူ ၇၀၀ ကျော်ရှိပြီး၊ စစ်ကော်မရှင်၏ ရမ်းသန်းပစ်ခတ်မှုများကြောင့် နေရပ်မပြန်ရဲကြသေးပေ။ ကမ်းမယ့်လက်အဖွဲ့ဝင် ကိုပိုင်ကိုဦး က “ပြန်ဝင်လို့ မရသေးဘူးဆိုတာ စစ်ကြောင်းလည်း အမြဲတမ်းထိုးတယ်။ ရဟတ်ယာဉ် ဂျက်ဖိုက်တာနဲ့ ရမ်းသမ်းပစ်လာနေတယ်။ လေယာဉ်နဲ့ ဗုံးကြဲတယ်။ လူရှိတဲ့နေရာတွေကြဲတယ်။ အဲ့တာက အမြဲတမ်း တွေ့မြင်နေရတာကိုးနော်။ ဘယ်လောက် ကြာကြာစစ်ရှောင်ရမလဲ ဆိုရင် အနည်းဆုံး ၂လ ဝန်းကျင်လောက်မှာ ရှိတယ်” ဟု ပြောသည်။ လက်ရှိတွင် စစ်ဘေးရှောင်များအတွက် အစားအစာ ရိက္ခာခြောက်များ၊ စောင်၊ အနွေးထည်များအပြင် ကလေးများအတွက် နို့မှုန့်နှင့် နို့တိုက်ပစ္စည်းများပါ အဓိက လိုအပ်နေကြောင်း အကူအညီပေးနေသူများက ပြော သည်။ စစ်ကော်မရှင်ဘက်က မောတောင်မြို့ကို နည်းအမျိုးမျိုးဖြင့် ပြန်လည်ရယူရန် ကြိုးပမ်းနေခြင်းကြောင့် ဒေသခံ ပြည်သူများအနေဖြင့် ပိတ်ဆို့မှုဒဏ် အမျိုးမျိုးကို ရင်ဆိုင်လာရနိုင်သည်ဟု ကိုဘလက်က ပြောသည်။ ထို့ကြောင့် စစ်ရှောင်အရေးကို အားစိုက်လုပ်ဆောင်ရန်အတွက် သက်ဆိုင်ရာ လူသားချင်း စာနာထောက်ထားမှု အဖွဲ့များ၊ NGO အဖွဲ့အစည်းများ နှင့် ထိုင်းနိုင်ငံသို့ ရောက်ရှိနေသည့် အဖွဲ့အစည်းများအနေဖြင့် မောတောင် စစ်ဘေးရှောင်များကို ကူညီပေးကြရန်နှင့် ဝိုင်းဝန်းအသံထုတ်ပေးကြရန် တိုက်တွန်းနှိုးဆော်ထားသည်။ ဓါတ်ပုံ - ကိုဘလက်

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ

ငွေကြေး မတတ်နိုင်သော မိုးကုတ်မြို့ခံများ မြို့မှ မထွက်ခွာနိုင်ကြ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၇ ရက်။ တအာင်းတပ်မတော် (TNLA) က မိုးကုတ်နှင့် မိုးမိတ်မြို့တို့ကို စစ်ကော်မရှင်ထံ ပြန်လည်အပ်နှံမည့် ဆုံးဖြတ် ချက်ကြောင့် မြို့ခံများ စစ်ဘေးရှောင်နေကြသော်လည်း၊ ငွေကြေး အဆင်မပြေသူများမှာ ရွှေ့ပြောင်းနိုင်ခြင်း မရှိပဲ အခက်ကြုံနေကြသည်။ စစ်ရှောင်စရိတ်များ ကြီးမြင့်ခြင်း၊ လမ်းပန်းဆက်သွယ်ရေး ပြတ်တောက်မှုကြောင့် ကုန်ဈေးနှုန်းများ မြင့်တက် နေခြင်းတို့သည် မိုးကုတ်နှင့် မိုးမိတ် ဒေသခံ ပြည်သူများ အခက်တွေ့နေကြသည်။ TNLA မှ အဆိုပါမြို့များမှ နိုဝင်ဘာ ၂၅ ရက်နေ့တွင် ဆုတ်ခွာမည်ဟု ထုတ်ပြန်ပြီးနောက်၊ မိုးကုတ်နှင့် မိုးမိတ် မြို့များမှ ပြည်သူအများအပြားသည် စစ်ဘေးရှောင်ရန် ကြိုးပမ်းနေကြသော်လည်း ရွှေ့ပြောင်းစရိတ် ကြီးမြင့်မှုက ငွေကြေးမတတ်နိုင်သည့် ပြည်သူများကို တားဆီးထားသည်။ မိုးကုတ်မြို့ခံတစ်ဦးက “အိမ်ပြောင်းရတာက ဈေးကြီးပေးပြီးတော့ ပြောင်းနေရတာပေါ့နော်။ ပိုက်ဆံရှိတဲ့ သူတွေလောက်ပဲ ပြောင်းနိုင်နေတာပေါ့။ ပိုက်ဆံမရှိတဲ့သူတွေကျတော့ မပြောင်းနိုင်ဘူးပေါ့နော်” ဟု လက်ရှိ အခြေအနေကို ရှင်းပြခဲ့သည်။ လက်ရှိတွင် စီးပွားရေး မပြေလည်သူများ၊ နေရပ်ကို စွန့်ခွာရန် စိတ်မပါသူများသာ မြို့ပေါ်တွင် အများဆုံး ကျန်ရှိနေပြီး၊ တော်တော်များများ စွန့်ခွာသွားသဖြင့် မြို့သည် ‘မရှိသလောက်’ ဖြစ်နေပြီ ဟုလည်း ဒေသခံများ က ပြောဆိုသည်။ အပစ်အခတ် ရပ်စဲထားသော်လည်း စစ်ရေးပဋိပက္ခများ၏ နောက်ဆက်တွဲ အခြေအနေများကြောင့် ဒေသ၏ စီးပွားရေးသည် လုံးဝ နလန်မထူနိုင်သေးဘဲ ကုန်ဈေးနှုန်းများမှာ ဆက်လက် မြင့်တက်နေသည်။ စီးပွားရေးကဏ္ဍမှာ အဆုံးထိ ကျဆင်းနေသည့် အပြင် လမ်းပန်းဆက်သွယ်ရေး ပြတ်တောက်ခြင်းနှင့် ဂိတ်များမှ ငွေကြေး အတင်းအကျပ် တောင်းခံမှုများကိုလည်း ခံနေရသည်ဟု မိုးကုတ်မြို့ခံများက ပြောသည်။ “အခုက လမ်းပန်းဆက်သွယ်ရေး မကောင်းလို့သာ ဒီဘက်မှာ မြှင့်တက်တာလေး ကုန်ဈေးနှုန်းတွေက။ လမ်းပန်းဆက်သွယ်ရေး လမ်းကြောင်းတွေ ဖွင့်ပေးရမယ်။ နောက်ပြီးတော့မှ ဂိတ်တွေရှိတဲ့နေရာမှာ ဂိတ်တွေ ကနေပြီးတော့မှ ငွေတောင်းတာမျိုး မဟုတ်ဘဲ လုံခြုံရေးအရ စစ်ဆေးတာမျိုး ဆိုရင်တော့ ပြည်သူတွေ အနေနဲ့ နားလည်ပေးလို့ရတယ်” ဟု မိုးကုတ်ဒေသခံက ပြောသည်။ တအာင်းတပ် TNLA မှ မြို့ကို ပြန်လည်လွှဲပြောင်းပေးမည့် ဆုံးဖြတ်ချက်အပေါ် ဒေသခံများသည် စိုးရိမ် ထိတ်လန့်ရုံသာမက စိတ်ပျက်ဝမ်းနည်းမှုများပါ ဖြစ်နေကြသည်။ မိုးမိတ် ဒေသခံတစ်ဦးက “အဲ့ဒီ ထုတ်ပြန်ချက် ကြေညာတဲ့နေ့ကဆိုလို့ရှိရင် သက်ကြီးရွယ်အိုတွေကအစပေါ့နော် ယောက်ယက်တွေ ခတ်ပြီးတော့မှ သူတို့လည်း စိုးရိမ်ကြောင့်ကြမှုတွေရော မလုံခြုံမှုတွေရော အကုန်လုံး ပေါင်းပြီးပေါ့လေးနော် အဲ့လိုမျိုး ဒီဟာကြီးကို မဖြစ်စေချင်တာပေါ့” ဟု ပြောသည်။ လက်ရှိတွင် စစ်ရှောင်ရန် မတတ်နိုင်ဘဲ ကျန်ခဲ့သူများအတွက် စားဝတ်နေရေးနှင့် ဘေးကင်းလုံခြုံရေးသည် အဓိက စိန်ခေါ်မှု ဖြစ်နေသည်။ ဒေသခံပြည်သူများသည် ကုန်ဈေးနှုန်း ကြီးမြင့်မှု၊ ငွေကြေး အခက်အခဲနှင့် လုံခြုံရေး မတည်ငြိမ်မှုများအကြား မည်သည့် အဖွဲ့အစည်းကမှ မိမိတို့၏ ဘဝလုံခြုံရေးနှင့် စီးပွားရေးအပေါ် မထိခိုက်စေရန်သာ အဓိက မျှော်လင့် တောင်းဆိုနေကြသည်။

ငွေကြေး မတတ်နိုင်သော မိုးကုတ်မြို့ခံများ မြို့မှ မထွက်ခွာနိုင်ကြ

အမျိုးသမီးအား သေနတ်ဖြင့် ခြိမ်းခြောက်ရိုက်နှက်သည့် PDF စစ်ထောက်ချုပ်အား တိုင်ကြားမှု အရေးမယူသေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၅ ရက်။ အမျိုးသမီးတစ်ဦးအား နေပြည်တော် PDF စစ်ထောက်ချုပ်က သေနတ်ဖြင့် ခြိမ်းခြောက် ရိုက်နှက်ခြိမ်းခြောက်မှုအား တိုင်ကြားထားသော်လည်း တုံ့ပြန်မှု မရှိသေးဘူးဟု အကူအညီပေးနေသူများက ပြောသည်။ အရပ်သား အမျိုးသမီးတစ်ဦးအား သေနတ်ဖြင့် ခြိမ်းခြောက်၍ ရိုက်နှက်ခဲ့သည့် နေပြည်တော် PDF အဖွဲ့က စစ်ထောက်ချုပ် ဗိုလ်ဓူဝံကို အရေးယူပေးပါရန် အမျိုးသား ညီညွတ်ရေးအစိုးရ (NUG) ထံ တိုင်ကြားထားသည် ဟု အမျိုးသမီးအရေး တက်ကြွလှုပ်ရှားသူများနှင့် အကူအညီပေးနေသူများက ပြောသည်။ ပြည်သူကို စစ်အာဏာရှင်၏ နှိပ်စက်မှုမှ ကာကွယ်ရန် တော်လှန်ရေးလုပ်နေသည့်ကာလ၌ အကြီးအကဲတစ်ဦး၏ ယခုကဲ့သို့ ပြုလုပ်ခြင်းသည် တော်လှန်ရေး၏ ဂုဏ်သိက္ခာကိုပါ ထိခိုက်စေသည်ဟု ဝေဖန်မှုများ ရှိနေသည်။ ဖြစ်စဉ်မှာ နိုဝင်ဘာလ ၈ ရက်နေ့ ညပိုင်းက ကရင်နီ (ကယား) ပြည်၊ ဒီးမော့ဆိုမြို့နယ် အနောက်ဘက်ခြမ်း၌ ဗိုလ်ဓူဝံ ဖွင့်လှစ်ထားသည့် ဟော့ပေါ့ဆိုင်တွင် လာရောက်ခိုလှုံနေသူ မသန္တာအောင် (ညောင်ရွှေဇာတိ) ဆိုသူ အမျိုးသမီးအား ဗိုလ်ဓူဝံက ကျူးလွန်ခဲ့ခြင်း ဖြစ်သည်။ ၎င်းသည် ဗိုလ်ဓူဝံ၏ ဇနီးနှင့် ငယ်သူချင်းဖြစ်သောကြောင့် ထိုည၌ ဗိုလ်ဓူဝံတို့ လင်မယား စကားများရာတွင် လည်ပင်းညှစ်ခံထားရသည့် ဇနီးသည်အား ကူညီဖြန်ဖြေပေးခဲ့ရာမှ အဆိုပါ အကြမ်းဖက်မှု စတင်ခဲ့ခြင်း ဖြစ်သည်။ နီးစပ်သူ တစ်ဦးက “ဘာကြောင့်ရိုက်တယ်လို့လည်း အဲ့လို ရေရေရာရာလည်း မရှိဘူးဗျ။ ရန်ဖြစ်နေတဲ့ အချိန် မှာ အဲ့အစ်မ တားတဲ့ပုံစံမျိုးပေါ့။ ဘာလို့ ရန်ဖြစ်နေကြတာလဲလို့ သွားမေးတဲ့ အချိန်မှာ ငါတို့ရန်ဖြစ်နေကြတာ နင့်ကြောင့်ပဲဆိုတဲ့ ပုံစံမျိုး ဖြစ်သွားတာပေါ့။ ပြီးတော့မှ ဗုံးကျင်းထဲကနေ သေနတ် ၃ လက်ပေါ့။ အရှည် ၂ လက် အတိုတစ်လက် ယူလာပြီးတော့ သူရိုက်လိုက်တာပေါ့။ ပြီးတော့ သေနတ်နဲ့ ချိန်တယ်” ဟု ဖြစ်စဉ်ကို ရှင်းပြသည်။ နီးစပ်သူတစ်ဦး၏ ပြောကြားချက်အရ ဗိုလ်ဓူဝံသည် ဖြန်ဖြေပေးသူ မသန္တာအောင်ကို ရန်ဖြစ်ရခြင်း၏ အကြောင်းရင်းဟု စွပ်စွဲကာ ဒေါသထွက်ခဲ့ပြီးနောက် အကြမ်းဖက်ကျူးလွန်ခဲ့ကြောင်း ဆိုသည်။ မသန္တာအောင်သည် သေနတ်ဖြင့် နားထင်အား ချိန်ရွယ်ခြင်း၊ နားရင်းနှင့် လက်မောင်းများအား သေနတ်ဒင်ဖြင့် ထုနှက်ခြင်းတို့ကို ခံခဲ့ရပြီး အညိုအမည်း စွဲကျန်သည့် ဒဏ်ရာများ ရရှိခဲ့သည်။ လက်ရှိ ဖြစ်စဉ်အား NUG ၏ ကာကွယ်ရေး ဝန်ကြီးဌာန (MOD) အပါအဝင်၊ ကရင်နီပြည် ရဲတပ်ဖွဲ့ (KSP)၊ ကရင်နီ အမျိုးသမီးများ အစည်းအရုံး (KNOW) စသည့် သက်ဆိုင်ရာ အဖွဲ့အစည်းပေါင်းများစွာထံ တိုင်ကြားခဲ့သည်။ သို့သော် လတ်တလောတွင် နေပြည်တော် PDF ဗဟိုက တိုင်စာမရရှိသေးဟု ငြင်းဆိုနေပြီး၊ အခြားအဖွဲ့အစည်း များကလည်း အရေးယူရန် တုံ့ဆိုင်းနေကြောင်း ဆိုသည်။ လိုက်ပါကူညီဆောင်ရွက်ပေးနေသည့် တော်လှန်ရေး တပ်ဖွဲ့ဝင်တစ်ဦးက “ဒီမနက်ကတည်းက အဲဒီ အစ်မနဲ့ စကားပြော ဖြစ်တာပေါ့။ ဖြစ်တဲ့နေ့ကတည်းက ဘယ်လိုလုပ်ရမလဲ တိုင်ပင်တာပေါ့လေ။ လောလောဆယ်တော့ မထူးသေးဘူး။ တိုင်ထားတဲ့ အဆင့်ပဲ ရှိသေးတယ်။ အဲလောက်ပဲ ပြောလို့ရမယ်ဗျ” ဟု ပြောသည်။ မသန္တာအောင်၏ ဒဏ်ရာသည် မပြင်းထန်သော်လည်း တော်လှန်ရေးတပ်ဖွဲ့ဝင် တစ်ဦးက လက်နက်ဖြင့် အရပ် သားကို ချိန်ရွယ်ရိုက်နှက်သည့် ကိစ္စရပ်အား ထိထိရောက်ရောက် အရေးယူပေးရန် ကူညီဆောင်ရွက်သူများက တောင်းဆိုလျက်ရှိသည်။ “အဓိက ပြည်သူကို သေနတ်နဲ့ ချိန်တယ်။ ရုံးမှာ အကြီးအကဲ ဖြစ်နေတဲ့ လူတစ်ယောက်က လက်နက်နဲ့ ချိန်လို့ ရလားပေါ့။ ဒါကိုမကြိုက်လို့ ကျနော်တို့က တော်လှန်ရေး လုပ်တာလေနော်။ အဲအချိန်မှာ ဒီလိုမျိုး လုပ်တာတွေ ကို ကျနော်တို့က လက်မခံဘူးပေါ့နော်။ အဲ့အတွက် တိုင်ရတာ ဖြစ်တာပေါ့နော်။ ပြီးတော့ တခြားအမျိုးသမီး တွေလည်း လူမသိသူမသိ ခံရတာတွေ အများကြီးပဲပေါ့။ ဒါတွေကြောင့် တရားစွဲကြတာပါ” ဟု ကူညီပေးနေသူ တစ်ဦးက ပြောသည်။ ထို့ကြောင့် ကံယာကံရှင် မသန္တာအောင် အပါအဝင် ယခင် ကျူးလွန်ခံရသူများကပါ အလားတူဖြစ်စဉ်များ ထပ် မဖြစ်စေရန် ထိထိရောက်ရောက် အရေးယူပေးဖို့ တောင်းဆိုထားကြောင်း နီးစပ်သူများက ပြောသည်။

အမျိုးသမီးအား သေနတ်ဖြင့် ခြိမ်းခြောက်ရိုက်နှက်သည့် PDF စစ်ထောက်ချုပ်အား တိုင်ကြားမှု အရေးမယူသေး

ချင်း-စစ်ကိုင်း အစပ်တွင် တိုက်ပွဲများ ပြင်းထန်၊ စစ်ကော်မရှင်တပ်ဖွဲ့ဝင် ၅၀ ကျော် သေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၄ ရက်။ ချင်း-စစ်ကိုင်း နယ်စပ်တိုက်ပွဲများ အရှိန်မြင့်၊ လေကြောင်းတိုက်ခိုက်မှုများ ကြားမှ စစ်ကော်မရှင်တပ်ဖွဲ့ဝင် ၅၀ ကျော် သေဆုံးခဲ့သည်ဟု ချင်းပြည်ကောင်စီ ထုတ်ပြန်သည်။ ချင်းပြည်နယ်နှင့် စစ်ကိုင်း-မကွေးဒေသ နယ်နိမိတ်တစ်လျှောက်တွင် နိုဝင်ဘာလ တတိယပတ်အတွင်း တိုက်ပွဲများ အရှိန်အဟုန်ဖြင့် ပြန်လည်မြင့်တက်ခဲ့ပြီး စစ်ကော်မရှင်တပ်ဖွဲ့ဝင် ၅၀ ကျော် ထပ်မံသေဆုံးခဲ့သည်ဟု ချင်းပြည်ကောင်စီ (Council of Chinland) ကာကွယ်ရေးဌာနက ထုတ်ပြန်ကြေညာခဲ့သည်။ အဆိုပါ ထုတ်ပြန်ချက်တွင် စစ်ကော်မရှင်တပ်သည် ဂျက်တိုက်လေယာဉ်များအပြင် Y-12 လေယာဉ်များဖြင့်ပါ ဗုံးကြဲတိုက်ခိုက်မှုများ ပြုလုပ်ခဲ့သော်လည်း တော်လှန်ရေး မဟာမိတ်တပ်ဖွဲ့များက ကြံ့ကြံ့ခံခုခံကာကွယ်နိုင်ခဲ့ ကြောင်း ထုတ်ပြန်ချက်ထဲ၌ ဖော်ပြထားသည်။ မြေပြင် သတင်းအရင်းအမြစ် တစ်ဦးက “လက်ရှိမှာ တိုက်ပွဲက ဆက်လက် ပြင်းထန်နေဆဲဖြစ်ပေမယ့် လေယာဉ် အဆမတန် သုံးနေတာကို ခုခံကာကွယ် တိုက်ခိုက်နေပါတယ်” ဟု ပြောသည်။ တိုက်ပွဲများသည် ကလေး-ဂန့်ဂေါလမ်းပိုင်းအပြင် ဖလမ်းနှင့် တီးတိန်မြို့နယ်အတွင်း၌ပါ အပြင်းအထန်ဖြစ်ပွားခဲ့ ခြင်း ဖြစ်သည်။ ချင်းပြည်ကောင်စီ၏ ထုတ်ပြန်ချက်အရ စစ်ကော်မရှင်တပ်သည် တော်လှန်ရေးတပ်များအား အပြင်းအထန် ထိုးစစ်ဆင်ခဲ့ရာတွင် လေကြောင်းအင်အားကို အဆမတန် အသုံးပြုခဲ့သည်။ အထူးသဖြင့် နိုဝင်ဘာလ ၁၈ ရက်နေ့ တစ်ရက်တည်းမှာပင် ဗုံးအလုံးရေ ၁၅၀ ကျော်အထိ ကြဲချခဲ့သည်ဟု ဆိုသည်။ ထို့အပြင် စစ်ကော်မရှင်တပ်သည် မြေပြင်စစ်ဆင်ရေးများတွင် ဒရုန်းများကိုလည်း အဆမတန် အသုံးပြုနေသည် ကို တွေ့ရကြောင်း ဖော်ပြထားသည်။ ထိုသို့သော ပြင်းထန်သည့် လေကြောင်းအန္တရာယ်ကြားမှ ချင်းလဲန်အစိုးရတပ်ဖွဲ့ စစ်ကြောင်း (၁) နှင့် (၂) တို့သည် ကျောင်းသားတပ်မတော် (ABSDF) ၊ ကန်ပက်လက်တော်လှန်ရေးတပ် (KRF)၊ ယောကာကွယ် ရေးတပ် (YDF) အပါအဝင် မဟာမိတ်အဖွဲ့ကြီးများစွာဖြင့် လက်တွဲကာ စစ်ကော်မရှင်တပ်ကို ထိုးဖောက်တိုက်ခိုက်ခဲ့ခြင်း ဖြစ်သည်။ တော်လှန်ရေးပူးပေါင်းတပ်များ၏ ထိုးစစ်ကြောင့် စစ်ကော်မရှင်တပ်ဖွဲ့ဝင် အယောက် ၅၀ ခန့် သေဆုံးခဲ့ပြီး၊ ဒဏ်ရာရရှိသူများကို စစ်ကော်မရှင်တပ်က Mi-17 ရဟတ်ယာဉ်များဖြင့် သယ်ထုတ်သွားရသည်ဟု ဆိုသည်။ တော်လှန်ရေးတပ်များဘက်ကလည်း စစ်သုံ့ပန်းအချို့အပြင် လက်နက်ခဲယမ်းများကိုပါ ထပ်မံသိမ်းဆည်းရမိခဲ့ ကြောင်း ထုတ်ပြန်ခဲ့သည်။ ပူးပေါင်းတပ်ဖွဲ့ တာဝန်ရှိသူ တစ်ဦးက “ကျနော်တို့ဘက်က အခုလို ကြီးမားတဲ့ ထိုးစစ်ကို အောင်မြင်စွာ တန်ပြန် နိုင်ခဲ့တာဟာ မဟာမိတ်အဖွဲ့အစည်းတွေရဲ့ စည်းလုံးညီညွတ်မှုနဲ့ ရဲဘော်တွေရဲ့ စိတ်ဓာတ်ခွန်အားကြောင့်ပါပဲ” ဟု ပြောသည်။ လက်ရှိ တိုက်ပွဲဖြစ်ပွားရာ နယ်မြေဖြစ်သည့် ကလေး-ဂန့်ဂေါလမ်းပိုင်းသည် ယခင်ကတည်းက စစ်ရေးအရ အရေးပါသော လမ်းကြောင်းဖြစ်ပြီး ချင်းပြည်နှင့် မကွေး၊ စစ်ကိုင်းဒေသတို့အတွက် ထောက်ပို့လမ်းကြောင်း လည်း ဖြစ်သည်။ စစ်ကော်မရှင်တပ်သည် မြေပြင်တွင် အသာစီးမရသည့် အခါတိုင်း လေကြောင်းအင်အားကို အပြင်းအထန် အသုံးပြုလေ့ရှိပြီး၊ ယခုတိုက်ပွဲများတွင်လည်း အင်အားကြီး လေကြောင်းတိုက်ခိုက်မှုကြားမှ တော်လှန်ရေး အင်အားစုများက ကြံ့ကြံ့ခံနေရဆဲ ဖြစ်ကြောင်း ဒေသခံ သတင်းရင်းမြစ်များ၏ ပြောပြချက်အရ သိရသည်။ တိုက်ပွဲအခြေအနေမှာ ဆက်လက်တင်းမာနေဆဲဖြစ်ပြီး စစ်ကော်မရှင်တပ်ဘက်က စစ်အင်အားနှင့် ရိက္ခာများ ဖြည့်တင်းလျက်ရှိသည်ဟု ဆိုသည်။

ချင်း-စစ်ကိုင်း အစပ်တွင် တိုက်ပွဲများ ပြင်းထန်၊ စစ်ကော်မရှင်တပ်ဖွဲ့ဝင် ၅၀ ကျော် သေဆုံး 

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ကရင်အမျိုးသား အစည်းအရုံး KNU က ဘားအံနယ်မြေအတွင်း စစ်ကော်မရှင်၏ ရွေးကောက်ပွဲကို တရားဝင် ပိတ်ပင် ဆန့်ကျင်လိုက်ပြီး ပြည်သူ့ဆန္ဒ အလွဲသုံးစားလုပ်ခြင်းဟု ထုတ်ပြန် ပြောဆိုလိုက်သည်။ ကရင်အမျိုးသားအစည်းအရုံး (KNU) ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက စစ်ကော်မရှင် က လာမည့် ဒီဇင်ဘာလ ၂၈ ရက်နေ့တွင် ကျင်းပရန် ပြင်ဆင်နေသည့် ရွေးကောက်ပွဲကို ၎င်းတို့ ထိန်းချုပ်နယ်မြေ အတွင်း လုံးဝ ခွင့်ပြုမည်မဟုတ်ဘဲ ဆန့်ကျင်သွားမည်ဟု နိုဝင်ဘာလ ၁၇ ရက်နေ့တွင် တရားဝင် ထုတ်ပြန် ကြေညာလိုက်သည်။ KNU ၏ ထုတ်ပြန်ချက်အရ၊ စစ်ကော်မရှင်သည် နိုင်ငံတစ်ဝန်းတွင် စစ်ရာဇဝတ်မှုများကို ပေါ်ပေါ်ထင်ထင် ကျူးလွန်နေသည့် အဖွဲ့ဖြစ်ပြီး၊ ၎င်းတို့ ကျင်းပမည့် ရွေးကောက်ပွဲသည် တိကျမှန်ကန်သည့် ရလဒ်မဟုတ်ဘဲ ပြည်သူ့ သဘောဆန္ဒကို အလွဲသုံးစားပြုမည့် အတုအယောင် ရွေးကောက်ပွဲ သာဖြစ်ကြောင်း သတ်မှတ်သည်။ KNU ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက ဒေသခံပြည်သူများကို စစ်အာဏာရှင် သက်ဆိုး ရှည်စေမည့် ယင်းရွေးကောက်ပွဲတွင် ပူးပေါင်းပါဝင်ခြင်း မပြုဘဲ၊ အကြမ်းမဖက်သောနည်းဖြင့် ဆန့်ကျင်ရန် တိုက်တွန်းထားသည်။ KNU ၏ ပြောဆိုချက်တွင် စစ်ကော်မရှင်သည် ၎င်းတို့၏ ရွေးကောက်ပွဲ အောင်မြင်ရေးအတွက် ပြည်သူလူထု အပေါ် ဖိအားပေးမှုများ ပြုလုပ်နေကြောင်း ဖော်ပြသည်။ စစ်ကော်မရှင်သည် စစ်မှုထမ်းဥပဒေနှင့် စစ်ဘေးဒဏ်များကို အသုံးချပြီး ပြည်သူများအား မိမိနေရပ်သို့ မပြန်နိုင်အောင် ပြုလုပ်နေသည်။ ကျန်ရှိနေသော ပြည်သူများကိုလည်း ခြိမ်းခြောက်ဖိအားပေးကာ အတင်းအဓမ္မ မဲပေးခိုင်းစေမှုများ ဖြင့် ရင်ဆိုင်နေရသည်ဟု ဆိုသည်။ ထို့အပြင် စစ်ကော်မရှင်သည် ရွေးကောက်ပွဲစနစ်ကို ပြည်သူများ နားလည်ရခက်ခဲစေသော မဲပေးနည်းစနစ်များ၊ အထူးသဖြင့် ၎င်းတို့လိုချင်သည့် ရလဒ်ထွက်စေရန် ရည်ရွယ်သည့် အီလက်ထရောနစ်မဲပေးသည့် လုပ်ငန်းစဉ် များကို အသုံးပြုနေသည်ဟု KNU က ထောက်ပြသည်။ ကရင်စစ်ရှောင်များကို အကူအညီပေးနေသူ တစ်ဦးက "ဒီနယ်မြေမှာဆို စစ်ကြောင့် ပြည်သူတွေ ဘေးလွတ်ရာ ထွက်ပြေးနေရတာ၊ စားဝတ်နေရေး ခက်ခဲနေရတာတွေပဲ ရှိတယ်။ ဒီလိုအခြေအနေမှာ ရွေးကောက်ပွဲ လုပ်မယ် ဆိုတာဟာ လူထုရဲ့ အခက်အခဲကို လုံးဝ မထောက်ထားဘဲ သူတို့ရဲ့ နိုင်ငံရေး ထွက်ပေါက် တစ်ခုတည်းကိုပဲ ကြည့်တာဖြစ်ပါတယ်” ဟု ပြောသည်။ အဆိုပါ ရွေးကောက်ပွဲကို အဓိက တော်လှန်ရေး အင်အားစုများဖြစ်သည့် အမျိုးသားညီညွတ်ရေးအစိုးရ (NUG)၊ ကရင်အမျိုးသား အစည်းအရုံး (KNU) အပါအဝင် အာရက္ခတပ်တော် (AA) စသည့် အဖွဲ့အစည်းများကလည်း တရားမဝင်သော အတုအယောင် ရွေးကောက်ပွဲအဖြစ် ပြင်းပြင်းထန်ထန် ဆန့်ကျင်ထားသည်။ နိုင်ငံရေး လေ့လာသူတစ်ဦးက “KNU ကနေ နယ်မြေဒေသအလိုက် ပြတ်သားတဲ့ ဆန့်ကျင်မှုကို ပြသလိုက်တာ ဟာ စစ်ကောင်စီရဲ့ ရွေးကောက်ပွဲကို တရားဝင်မှု (legitimacy) လုံးဝ မပေးဘူးဆိုတာ ပြသလိုက်တာပဲ” ဟု ပြောသည်။ ပြီးခဲ့သည့် နိုဝင်ဘာလ ၂ ရက်နေ့ကလည်း ကရင်ပြည်၊ ဘားအံမြို့တွင် စစ်ကော်မရှင် လက်အောက်ခံ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ၏ ဆိုင်းဘုတ်ကို ဆုတ်ဖြဲမှုဖြင့် လူငယ်နှစ်ဦး ဖမ်းဆီးခံခဲ့ ရသေးရာ ရွေးကောက်ပွဲနှင့် ပတ်သက်သည့် ဖိနှိပ်မှုများ ရှိနေကြောင်း ထပ်မံတွေ့ရှိရသည်။ ဘားအံမြို အမှတ် ၂ ရပ်ကွက်၊ အုပ်ချုပ်ရေးမှူးရုံး ရှေ့၌ စိုက်ထူထားသည့် USDP ပါတီက လွှတ်တော်ကိုယ်စား လှယ်လောင်း ဝန်ကြီးချုပ်ဦး စောမြင့်ဦး၏ မဲဆွယ်ဗီနိုင်းဖျက်ဆီးခံရပြီး လူငယ် ၂ ဦးကို စစ်ကော်မရှင်က ဖမ်းဆီးခဲ့ပြီး ပုဒ်မ ၂၄ - က ဖြင့် အမှုဖွင့်ထားခြင်း ဖြစ်သည်။

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင်

ကန့်ဘလူနဲ့ ခင်ဦးကြား စစ်ကော်မရှင်တပ် စစ်ကြောင်းလိုက် ပြုတ် သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ နိုဝင်ဘာလ ၁၃ ရက်။ စစ်ကိုင်းတိုင်း၊ ကန့်ဘလူနှင့် ခင်ဦးမြို့နယ်ကြားတွင် စစ်ကော်မရှင်၏ အဓိက ထိုးစစ်ဆင်နေသော တပ်မ (၃၃) လက်အောက်ခံ စစ်ကြောင်းတစ်ခုလုံး နိုဝင်ဘာလ ၁၂ ရက်နေ့၌ အပြီးအပိုင် ပျက်စီးသွားခဲ့ကြောင်း ဒေသတွင်း တော်လှန်ရေးတပ်ဖွဲ့များနှင့် စစ်ရေးသတင်းရင်းမြစ်များက အတည်ပြု ထုတ်ပြန်လိုက်သည်။ အဆိုပါတိုက်ပွဲတွင် စစ်ကြောင်းမှူးဖြစ်သူ တပ်မ ၃၃ ဗျူဟာမှူး၏ အလောင်းပါ ရရှိခဲ့ပြီး၊ စစ်ကော်မရှင် တပ်ဖွဲ့ဝင် ၂၇ ဦးအထိ အရှင်ဖမ်းမိကာ လက်နက်ခဲယမ်း အများအပြား သိမ်းဆည်းရရှိခဲ့ကြသည်။ နိုဝင်ဘာလ ၁၂ ရက်နေ့တွင် ကန့်ဘလူမြို့နယ်၊ ယင်းတိုက်ကျေးရွာနှင့် ခင်ဦးမြို့နယ်၊ ရှားတောကျေးရွာကြား၌ ကန့်ဘလူခရိုင် ပကဖ အထူးလှုပ်ရှားတပ်ရင်း၊ ရေဦးမြို့နယ် ပကဖ 'ဓူဝံအဖွဲ့'၊ ရွှေဘိုခရိုင် (ခင်ဦး) အမှတ် (၃) တပ်ရင်း အပါအဝင် တော်လှန်ရေးအင်အားစုများ ပူးပေါင်းကာ စစ်ကောင်စီ၏ နှစ်ဖက်ညှပ် စစ်ကြောင်းကို ကြားဖြတ်တိုက်ခိုက်ခဲ့ခြင်းဖြစ်သည်။ စစ်ကြောင်းကို တိုက်ခိုက်ရာတွင် ကန့်ဘလူနယ်မှ နာမည်ကြီး ဘုန်းကြီး ဝါသဝ၏ ပျူစောထီးအဖွဲ့ဝင် အများ အပြား ပါဝင်ခဲ့ကြောင်းလည်း မြေပြင် သတင်းအရင်းအမြစ်များက ပြောသည်။ တော်လှန်ရေးအင်အားစုနှင့် နီးစပ်သူတစ်ဦးက “ဒီတိုက်ပွဲကတော့ စစ်ကိုင်းတိုင်းရဲ့ စစ်မျက်နှာမှာ အောင်ပွဲတစ်ခု ပါ။ တပ်မ ၃၃ လို အဓိကတပ်ရင်းရဲ့ စစ်ကြောင်းတစ်ခုလုံး အပျောက်နော်။ မြေပြင်မှာ စစ်ကြောင်းထိုးတိုင်း ပြုတ်ကုန်တာဟာ ကျနော်တို့အတွက် အားရကျေနပ်စရာပါပဲ” ဟု ပြောသည်။ ကန့်ဘလူမြို့နယ် ပကဖက ဖမ်းမိထားသည့် စစ်သုံ့ပန်းများ၏ ရုပ်သံမှတ်တမ်းကို နိုဝင်ဘာလ ၁၂ ရက်နေ့တွင် ထုတ်ပြန်ခဲ့သည်။ အဆိုပါ ရုပ်သံတွင် စစ်သုံ့ပန်းများမှာ ရွှံ့များပေနေပြီး မြေပြင်ပေါ် လဲကျနေသည့် ပုံစံဖြင့် ပြည်သူ့ကာကွယ်ရေး ရဲဘော်များ၏ ရှေ့တွင် စစ်ဆေးမေးမြန်းခံနေရသည်ကို တွေ့ရသည်။ ကနဦး ထုတ်ပြန်ချက်တွင် စစ်သုံ့ပန်း ၁၄ ဦး ဟု ဖော်ပြထားသော်လည်း နောက်ပိုင်း သတင်းရင်းမြစ်များ၏ အတည်ပြုချက်အရ ၂၇ ဦးအထိ အရှင်ဖမ်းမိထားပြီး လက်နက် ၂၇ လက် သိမ်းဆည်းရမိခဲ့သည်ဟု ကန့်ဘလူခရိုင် တပ်ရင်း ၃ တာဝန်ရှိသူတစ်ဦးက အတည်ပြု ပြောသည်။ ကန့်ဘလူခရိုင် PDF တာဝန်ရှိသူတစ်ဦးက “တကယ်တော့ သူတို့ (စစ်ကောင်စီ) ရဲ့ အားက မြေပြင် ထက် လေကြောင်းကိုပဲ အားထားနေရတာကို ဒီတိုက်ပွဲက သက်သေပြလိုက်တာပါပဲ” ဟု ပြောသည်။ စစ်ကော်မရှင် စစ်ကြောင်းမှာ အပြင်းအထန် အထိနာပြီး သေဆုံးဒဏ်ရာရသူ၊ အဖမ်းခံရသူ များပြားခဲ့ခြင်း ကြောင့် စစ်တပ်က ၎င်းတို့၏ အနောက်မြောက်တိုင်းစစ်ဌာနချုပ် (နမခ) မှ Gyrocopter သုံးစီးဖြင့် နိုဝင်ဘာ ၁၂ ရက်နေ့ ညနေ ၃ နာရီခွဲ အချိန်ခန့်တွင် လေကြောင်းတိုက်ခိုက်မှုများ ပြုလုပ်ခဲ့သည်။ အဆိုပါ တိုက်ပွဲများကြောင့် ခင်ဦးနယ် အနောက်မြောက်ခြမ်းရှိ ငါးရုံကြီး၊ ရှားတော၊ ကျောက်တိုင်၊ ကျီစု စသည့် ကျေးရွာများမှ ပြည်သူ ငါးထောင်ကျော် ထွက်ပြေးတိမ်းရှောင်နေရကြောင်း ခင်ဦးမြို့နယ် သတင်းမှန် ပြန်ကြား ရေးအဖွဲ့က ဆိုသည်။ စစ်ကော်မရှင်တပ်သည် စစ်ကိုင်းတိုင်းရှိ ဗျူဟာလမ်းကြောင်းများကို ထိန်းချုပ်ရန် ကြိုးစားနေသော်လည်း တော်လှန်ရေး အင်အားစုများ၏ ခုခံမှုကြောင့် အထိနာနေခြင်း ဖြစ်သည်။ ပြီးခဲ့သည့် စက်တင်ဘာလကလည်း ခင်ဦး - ရွှေဘို လမ်းပိုင်းတိုက်ပွဲတွင် ဒုဗိုလ်မှူးကြီး အဆင့်များ အပါအဝင် စစ်သည်များစွာ သေဆုံးခဲ့ဖူးသည်။

ကန့်ဘလူနဲ့ ခင်ဦးကြား စစ်ကော်မရှင်တပ် စစ်ကြောင်းလိုက် ပြုတ်

တနင်္သာရီတိုင်းအတွင်း ထိုင်းနယ်စပ်တွင် တိုက်ပွဲများ ပြင်းထန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၃ ရက်။ တနင်္သာရီတိုင်း ထိုင်းနယ်စပ် မောတောင်တွင် တိုက်ပွဲများ ပြင်းထန်နေပြီး စစ်ကော်မရှင်၏ လေကြောင်းဖြင့် ဗုံးကြဲတိုက်ခိုက်မှု ကြောင့် မြို့မဈေး မီးလောင်သွားသည့်အပြင် ဒေသခံများ ဘေးလွှတ်ရာသို့ ထွက်ပြေးတိမ်းရှောင်နေကြရသည်။ တနင်္သာရီတိုင်း၊ မောတောင်မြို့တွင် နိုဝင်ဘာလ ၁၀ ရက်နေ့က စတင်ခဲ့သော တော်လှန်ရေးတပ်ဖွဲ့များနှင့် စစ်ကော်မရှင်တပ်တို့မှာ မြေပြင်၌ တိုက်ပွဲများ ပြင်းထန်လာပြီးနောက် လေကြောင်းမှပါ ထိုးစစ်ဆင် တိုက်ခိုက်မှုများ လုပ်လာသည်ဟု ဒေသခံများက ပြောသည်။ နိုဝင်ဘာလ ၁၂ ရက်နေ့တွင် စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့ရာ မြို့မဈေး၊ နာရီစင်နှင့် မွန်ကျောင်းတို့ မီးလောင်ပျက်စီးကာ မြို့ခံ ၂၀၀၀ နီးပါး ထိုင်းနယ်စပ်သို့ ထွက်ပြေးတိမ်းရှောင်နေရကြောင်း ဒေသခံ သတင်းရင်းမြစ်များက အတည်ပြု ပြောသည်။ စစ်ကော်မရှင်တပ်သည် မောတောင်မြို့ရှိ ၎င်းတို့ ထိန်းချုပ်ထားသော စခန်းများမှ လက်နက်ကြီးများဖြင့် စတင် ပစ်ခတ်ခဲ့ပြီး တိုက်ပွဲ ဒုတိယနေ့ (နိုဝင်ဘာလ ၁၂ ရက်နေ့) နံနက် ၉ နာရီခွဲ အချိန်ခန့်တွင် ဂျက်တိုက်လေယာဉ် (Y - 12) ဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။ အဆိုပါ ဗုံးကြဲမှုဖြစ်စဉ်နှင့် ပတ်သက်၍ အသက် ၃၅ နှစ်အရွယ် မောတောင်မြို့ခံ အမျိုးသမီးတစ်ဦး က “လေယာဉ်လာကြဲတာ နာရီဝက်လောက် ကြာတယ်။ နည်းနည်းနှောနှောမဟုတ်ဘူး။ လက်ရှိ ပုန်းရှောင်နေတဲ့ နေရာအထိ မြေကြီးတွေ တုန်နေတာပါပဲ။ မြို့ထဲမှာ ပိတ်မိနေတဲ့သူတွေလည်းရှိတယ်” ဟု ပြောသည်။ ဗုံးကြဲတိုက်ခိုက်မှုနှင့် လက်နက်ကြီး ပစ်ခတ်မှု အသံများကို ထိုင်းနိုင်ငံဘက်ခြမ်း ဆင်ခွန်နယ်ခြားဂိတ်မှပင် ရှင်းလင်းစွာ မြင်တွေ့ကြားသိနေရကြောင်း စစ်ရှောင်များအား အကူအညီပေးနေသူများက ဆိုသည်။ တိုက်ပွဲများကြောင့် မောတောင်မြို့တစ်မြို့လုံးနီးပါးရှိ ဒေသခံ လူဦးရေ ၂၀၀၀ နီးပါးခန့်သည် ထိုင်း -မြန်မာ နယ်စပ်ရှိ ဆင်ခွန် (အလယ်ဂိတ်) စခန်းအနီး လမ်းမကြီးနံဘေးနှင့် ရော်ဘာတောများထဲသို့ ထွက်ပြေးတိမ်းရှောင် နေကြရသည်။ စစ်ဘေးရှောင်များထဲတွင် အမျိုးသမီးများ၊ သက်ကြီးရွယ်အိုများနှင့် ကလေးငယ်များစွာ ပါဝင်ပြီး၊ အချို့မှာ ထိုင်းနိုင်ငံဘက်ခြမ်းသို့ ဝင်ရောက်တိမ်းရှောင်ခဲ့ကြသည်။ လက်ရှိ တိမ်းရှောင်နေသူများ အတွက် စားနပ်ရိက္ခာ၊ ဆေးဝါးနှင့် အမိုးအကာများ အပါအဝင် လူသားချင်း စာနာ ထောက်ထားမှုဆိုင်ရာ အကူအညီများ အရေးပေါ်လိုအပ်နေကြောင်း စစ်ရှောင်များကို ကူညီပေးနေသူများ၏ ပြောပြချက်အရ သိရသည်။ မောတောင်မြို့သည် ထိုင်းနိုင်ငံ၊ ဆင်ခွန်းမြို့နှင့် ထိစပ်နေသည့် အရေးပါသော နယ်စပ်ကုန်သွယ်ရေးမြို့ ဖြစ်ပြီး၊ တိုက်ပွဲများကြောင့် နယ်စပ်ကုန်သွယ်ရေးလမ်းကြောင်းမှာလည်း ရပ်တန့်သွား ခဲ့သည်။ တနင်္သာရီတိုင်းသည် KNU တပ်မဟာ (၄) နယ်မြေဖြစ်ရာ တော်လှန်ရေး တပ်ဖွဲ့များသည် စစ်ကော်မရှင်၏ နယ်စပ်စခန်းအချို့ကို သိမ်းပိုက်ထားခဲ့ခြင်း ဖြစ်သည်။ ထို့ကြောင့် စစ်ကော်မရှင်က လက်လွတ်ဆုံးရှုံးခဲ့ရသည့် နယ်မြေများကို ပြန်လည်ရယူရန်နှင့် ပြည်သူကို အကြောက်တရားသွင်းရန် ရည်ရွယ်ကာ လေကြောင်းဖြင့် ထိုးစစ်ဆင် တိုက်ခိုက် ခြင်း ဖြစ်သည်ဟု KNU က သတင်းမီဒီယာများကို ပြောဆိုထားသည်။

တနင်္သာရီတိုင်းအတွင်း ထိုင်းနယ်စပ်တွင် တိုက်ပွဲများ ပြင်းထန်

အင်းတော် တော်လှန်ရေး အဖွဲ့က အင်းတော်မြို့နယ်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၇ ရက်။ စစ်ကိုင်းတိုင်း၊ ကသာခရိုင်အတွင်းရှိ အင်းတော်မြို့နယ်တွင် နယ်မြေလုံခြုံရေးနှင့် တရားဥပဒေစိုးမိုးရေးအတွက် ညမထွက်ရအမိန့် ထုတ်ပြန်လိုက်သည်။ အင်းတော်မြို့နယ်ကို အပြီးသတ်သိမ်းပိုက် ထိန်းချုပ်ထားသည့် ပြည်သူ့ကာကွယ်ရေးတပ်ဖွဲ့ (PDF) က နယ်မြေ လုံခြုံရေးနှင့် တရားဥပဒေစိုးမိုးရေးအတွက် ညမထွက်ရအမိန့် ကို နိုဝင်ဘာလ ၁ ရက်နေ့မှစတင်ကာ ရက်အကန့် အသတ်မရှိ ထုတ်ပြန်လိုက်ကြောင်း Indaw Revolution (IR) အဖွဲ့က ထုတ်ပြန်သည်။ တော်လှန်ရေးအင်အားစုများ လွှမ်းမိုးထားသည့် အင်းတော်မြို့နယ်တွင် မကြာသေးမီက မှောင်ရိပ်ခို ခိုးဆိုး လုယက်မှုများ၊ မူးယစ်ရမ်းကားမှုများ များပြားလာခြင်းကြောင့် အဆိုပါပြစ်မှုများ လျော့ပါးစေရန်အတွက် ညအချိန် သွားလာခွင့်ကို ကန့်သတ်လိုက်ခြင်းဖြစ်သည်ဟု ဖော်ပြထားသည်။ ထုတ်ပြန်ချက်အရ ဒေသခံပြည်သူများသည် ည ၈ နာရီမှ နံနက် ၄ နာရီအထိ မြို့နယ်အတွင်း ဖြတ်သန်းသွား လာခြင်း မပြုလုပ်ရန် ကန့်သတ်ထားသည်။ အမိန့်ထုတ်ပြန်ရခြင်း၏ အဓိကအကြောင်းရင်းနှင့် ပတ်သက်၍ အင်းတော် PDF နှင့် နီးစပ်သူတစ်ဦးက “အဓိက တော့ အင်းတော်မြို့နယ်မှာ ခိုးဆိုးလုယက်မှုတွေ များလာတယ်။ မူးယစ်ရမ်းကား သောင်းကျန်းတာတွေ များ လာတာကြောင့်ပါ။ ပြီးရင် အမှောင်ခိုပြီးတော့ မူးယစ်ဆေး သုံးစွဲတာတွေ၊ ခိုးမှုတွေ များလာတာပေါ့လေ။ ဒါ့ကြောင့် သူတို့အနေနဲ့ ဒီအကြောင်းအရာတွေ ပပျောက်အောင် ဆောင်ရွက်စရာရှိတဲ့အတွက် အမိန့်ထုတ်ပြန် လိုက်တာပေါ့” ဟု ပြောသည်။ သို့သော် ညမထွက်ရအမိန့် ထုတ်ပြန်ချက်အတွင်း တော်လှန်ရေး တပ်ဖွဲ့ဝင်များ၏ တာဝန်အရ သွားလာခြင်း နှင့် ပြည်သူများ အနေဖြင့် ကျန်းမာရေးအရ အရေးပေါ် သွားလာခြင်းများကိုမူ အဆိုပါ ကန့်သတ်ချက်မှ ကင်းလွတ် ခွင့် ပြုထားသည်။ “တော်လှန်ရေးတပ်တွေ တာဝန်အရ သွားလာခြင်းနဲ့ ပြည်သူတွေ အရေးပေါ် ကျန်းမာရေး အခြေနေအရ သွားလာခြင်းတွေတော့ ကန့်သတ်မှုမှာ မပါဝင်ဘူး” ဟုလည်း ၎င်းဒေသခံအဖွဲ့နှင့် နီးစပ်သူက ပြောသည်။ အင်းတော်မြို့နယ်သည် စစ်ကိုင်းတိုင်းနှင့် ကချင်ပြည်အစပ်၊ ရွှေဘို - မြစ်ကြီးနား လမ်းမကြီးပေါ်တွင် တည်ရှိ သည့် ဗျူဟာမြောက် အချက်အချာကျသော မြို့နယ် ဖြစ်သည်။ တော်လှန်ရေး အင်အားစုများက အင်းတော်မြို့ကို ပြီးခဲ့သည့် ဧပြီလ ၇ ရက်နေ့တွင် အပြီးသတ် သိမ်းပိုက် ထိန်းချုပ်ခဲ့ပြီးနောက် အမျိုးသား ညီညွတ်ရေး အစိုးရ (NUG) ၏ အုပ်ချုပ်ရေး ယန္တရားများ လည်ပတ်နေသော ဒေသတစ်ခုလည်း ဖြစ်သည်။ မြို့ကို သိမ်းပိုက်ပြီး နောက်ပိုင်း စစ်ကော်မရှင်တပ်က မြို့ပေါ်သို့ ပြန်လည် ထိုးစစ်ဆင်ခြင်း မရှိသေးဘဲ အခြေ အနေ ငြိမ်သက်နေသဖြင့် ဒေသခံများလည်း နေရပ်၌ ပြန်လည်နေထိုင်လျက်ရှိသည်။ သို့ရာတွင် ဒေသတွင်း တရားဥပဒေ စိုးမိုးရေး ထိခိုက်လာမှုများကြောင့် PDF အနေဖြင့် ယခုကဲ့သို့ အချိန်ကန့် သတ် ထိန်းချုပ်မှုများ ပြုလုပ်လာခြင်းဖြစ်သည်ဟု ဒေသခံအချို့က ဆိုသည်။ ဓါတ်ပုံ - အင်းတော် PDF အဖွဲ့ (Indaw Revolution (IR))

အင်းတော် တော်လှန်ရေး အဖွဲ့က အင်းတော်မြို့နယ်တွင် ညမထွက်ရ အမိန့်ထုတ်ပြန်

« Prev 1 2 3 4 … 10 Next »

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့
BBC က ဝန်ထမ်း ၂၀၀၀ လျှော့မည်
ဥရောပတွင် လေယာဉ်ဆီ ၆ ပတ်စာသာကျန်တော့သည်ဟု IEA ဆို
အငြင်းပွား တောင်တရုတ်ပင်လယ်တွင် တရုတ်လှေမှ ပြင်းထန်သော အဆိပ်ငွေ့များ ဖမ်းဆီးရမိ

Archives

Archives

×Close