October 2025 – Page 12 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: October 2025

Oct 9

လေးကေကော်တွင် တိုက်ပွဲ ပြင်းထန်၊ KNLA ပူးပေါင်းတပ်က နေရာအချို့မှ ယာယီဆုတ် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။ မြန်မာ - ထိုင်းနယ်စပ်၊ ကရင်ပြည်ရှိ လေးကေကော်မြို့သစ်တွင် စစ်ကော်မရှင်တပ်နှင့် KNLA ဦးဆောင်သော ပူးပေါင်းတပ်ဖွဲ့တို့ကြား တိုက်ပွဲများ အောက်တိုဘာလ ၉ ရက်နေ့အထိ ပြင်းထန်နေဆဲဖြစ်ကြောင်း မြေပြင် သတင်းအရင်း အမြစ်များ အရ သိရသည်။ စက်တင်ဘာလ အစောပိုင်းမှ စတင်၍ စစ်ကော်မရှင်တပ်ဖွဲ့များသည် လူအင်အား အလုံးအရင်းဖြင့် မြဝတီမြို့ တောင်ပိုင်းသို့ ထိုးစစ်ဆင်လာခဲ့သည်။ နယ်ခြားစောင့်တပ် (BGF) အဖွဲ့၏ အကူအညီဖြင့် စစ်ကြောင်း ၅ ခုခန့် ပူးပေါင်းကာ လေးကေကော်ကို ပိတ်ဆို့ တိုက်ခိုက်နေခြင်း ဖြစ်သည်။ အောက်တိုဘာလ ပထမအပတ်အတွင်း စစ်တပ်၏ ထိုးစစ်နှင့် လေကြောင်းပစ်ကူများကြောင့် ကရင် အမျိုးသား လွတ်မြောက်ရေး တပ်မတော် KNLA ပူးပေါင်းတပ်ဖွဲ့သည် စစ်နည်းဗျူဟာအရ လေးကေ့ကော်မြို့သစ်ရှိ ရပ်ကွက် ၃ မှ ဆေးရုံကုန်းနှင့် ရပ်ကွက် ၅ မှ ရေကန်ကုန်း နေရာတို့မှ ယာယီ ဆုတ်ခွာပေးထားရသည်။ မြေပြင်ထိုးစစ်များအပြင် လေကြောင်းတိုက်ခိုက်မှုများ ပါဝင်သော စစ်ပွဲများက ဆက်လက် ပြင်းထန်နေဆဲဖြစ်၍ ဒေသခံပြည်သူများသည် ကြီးမားသော အသက်အန္တရာယ် စိုးရိမ်မှုများနှင့် ရင်ဆိုင်နေရသည်။ လက်ရှိ စစ်ရေး အခြေအနေများကြောင့် လေးကေကော်ဒေသနှင့် ဖလူးကျေးရွာအုပ်စုမှ ကျေးရွာပေါင်း ၈ ရွာ ခန့်ရှိ စစ်ဘေးရှောင်ပြည်သူ ၃,၄၀၀ ကျော်မှာ နေရပ်စွန့်ခွာခဲ့ရသည်။ အဆိုပါစစ်ဘေးရှောင်များသည် ထိုင်း-မြန်မာ နယ်စပ် သောင်ရင်းမြစ်ကမ်းဘေး တစ်လျှောက်၌ ခိုလှုံနေကြရ သည်။ ထိုင်းစစ်တပ်နှင့် ထိုင်းနယ်ခြားစောင့်တပ်ဖွဲ့များကလည်း လေးကေ့ကော်ဒေသနှင့် မျက်နှာချင်းဆိုင် နယ်စပ် တစ်လျှောက်တွင် လုံခြုံရေးကို တင်းတင်းကျပ်ကျပ် တိုးမြှင့်ချထားသည်။ ထို့အပြင် မြန်မာဘက်မှ ထွက်ပြေးလာသော စစ်ရှောင်ပြည်သူများကို ယာယီ လက်ခံထားရှိနိုင်ရန် အတွက် ယာယီနေရာများကိုလည်း စီစဉ်ပေးထားကြောင်း ထိုင်းသတင်းများက ဖော်ပြသည်။

လေးကေကော်တွင် တိုက်ပွဲ ပြင်းထန်၊ KNLA ပူးပေါင်းတပ်က နေရာအချို့မှ ယာယီဆုတ်

Oct 9

မင်းတပ် စာသင်ကျောင်း ဗုံးကြဲခံရ၊ ကျောင်းသား ၃ ဦးနှင့် မသန်စွမ်း အမျိုးသမီး ၁ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။ ချင်းပြည်၊ မင်းတပ်မြို့နယ်ထဲ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ ကလေးများနှင့် မသန်စွမ်း အမျိုးသမီး အပါအဝင် အရပ်သား ၄ ဦး သေဆုံးခဲ့သည်။ မင်းတပ်မြို့နယ်ထဲက ထင်ချောင်းကျေးရွာရှိ စာသင်ကျောင်းဝင်းထဲ ဗုံးကျရောက်ပေါက်ကွဲခဲ့ခြင်း ဖြစ်သည်ဟု ဒေသခံများက ပြောသည်။ လေကြောင်း ဗုံးကြဲခံရမှုကြောင့် အထက်တန်းကျောင်းသား ၃ ဦးအပြင် ကျောင်းဝင်းထဲက မသန်စွမ်း အမျိုးသမီး တစ်ဦး ထိမှန်သေဆုံးသွားခဲ့သည်။ CDF - Mindat သတင်းပြန်ကြားရေး နှင့် မှတ်တမ်းဌာန က “အကြမ်းဖက် စစ်ကောင်စီက မင်းတပ်မြို့နယ် တိုက်နယ် ၂ ရှိ ကျေးရွာ (၂) ရွာကို မနေ့ ညနေ ၃ ကြိမ်ပေါ့နော် လေကြောင်းကနေ တိုက်ခိုက်ခဲ့တာပါ။ တိုက် ခိုက်မှုများကြောင့် ကျေးရွာရှိ ဘော်ဒါဆောင်များတွင် ပညာ သင်ကြားနေကြသော ကျောင်းသား ၃ ဦး၊ အဆောင်နေ မသန်စွမ်း အမျိုးသမီး တစ်ဦးတို့ သေဆုံးတယ်။ ၁၀ ယောက်ကျော် ထိခိုက်ဒဏ်ရာရရှိခဲ့တယ်။ စာသင်ဆောင်တွေ အပါအဝင် ပြည်သူနေအိမ် ၆ လုံး ထိခိုက် ပျက်စီးခဲ့တယ်” ဟု ပြောသည်။ ကျေးရွာအတွင်းရှိ ဘော်ဒါကျောင်းဆောင်နှင့် စာသင်ကျောင်းကို အဓိကထား ဗုံးကြဲတိုက်ခိုက်ခံခဲ့ရခြင်း ဖြစ်သည်ဟု မြေပြင် သတင်းအရင်းအမြစ်က ပြောသည်။ အောက်တိုဘာလ ၈ ရက်နေ့ ညပိုင်းတွင် လေကြောင်းမှာ ဗုံးကြဲခဲ့ခြင်းကြောင့် ကျောင်းဝင်းထဲက ကလေးများ စာကျက်နေသည့် နေရာ၌ ကျရောက်ပေါက်ကွဲခဲ့ခြင်း ဖြစ်သည်။ သေဆုံးသူ ၄ ဦးအပြင် ကျောင်းသူ၊ ကျောင်းသား ၁၅ ဦးလည်း ထိမှန်ဒဏ်ရာ ရခဲ့သည်ဟု မြေပြင် သတင်း အရင်းအမြစ်က ပြောသည်။ လေကြောင်းမှ ဗုံးကြဲ တိုက်ခိုက်ခံရမှုမကြောင့် စာသင်ဆောင်များ အပါအဝင် နေအိမ် (၆) လုံးလည်း ထိမှန် ပျက်စီးကုန်သည်ဟု CDF - Mindat အဖွဲ့က အောက်တိုဘာလ ၉ ရက်နေ့တွင် သတင်းထုတ်ပြန်ထား သည်။ စာသင်ကျောင်းများဖြစ်သည့် အရပ်သားပစ်မှတ်များကို ဦးတည်သော လေကြောင်းတိုက်ခိုက်မှုမှာ နိုင်ငံတကာ ဥပဒေအရ စစ်ရာဇဝတ်မှု မြောက်သည်ဟု ဆိုကြသည်။

မင်းတပ် စာသင်ကျောင်း ဗုံးကြဲခံရ၊ ကျောင်းသား ၃ ဦးနှင့် မသန်စွမ်း အမျိုးသမီး ၁ ဦး သေဆုံး

Oct 9

ဒဏ်ရာရ ကျားသစ်ကို မြစ်ရေထဲမှာ ကယ်ဆယ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။ ဘရာဇီးနိုင်ငံ ရီယို နီဂရို (Rio Negro) က ကျယ်ပြောတဲ့ မြစ်ရေပြင်ထဲမှာ ကျားသစ် တစ်ကောင်ဟာ အသက် လုပြီး ကူးခေတ်နေတာကို အမေဇုံ စစ်တပ်ရဲအရာရှိတွေက တွေ့ပြီး ကယ်ဆယ်ခဲ့ကြပါတယ်။ ဒီကယ်တင်တဲ့ အဖြစ်အပျက်ကိုတော့ Netflare (နက်ဖလဲ) က ဗီဒီယို မှတ်တမ်း တင်ထားခဲ့ပါတယ်။ ကျားသစ်ဟာ စစ်ရဲတွေရဲ့ မော်တော်ဘုတ် ရောက်လာတဲ့အခါ လှေဆီကို သတိကြီးကြီးနဲ့ ကူးခတ်လာခဲ့ပါတယ်။ လှေပေါ်မှာ ရှိတဲ့ ရဲတွေက အရေးပေါ်လုပ်ထားတဲ့ ရေပေါ်ပေါ်တဲ့ ချပ်ပြားတစ်ခုကို ရေထဲကို ချထားပေးပါတယ်။ ကျားသစ်ဟာ တောရိုင်းတိရစ္ဆာန်ဖြစ်ပေမယ့် လှေနားကို ကပ်လာပြီး ချပေးထားတဲ့ ချပ်ပြားလေးကို တွယ်ပြီး လိုက်လာခဲ့ပါတယ်။ ကျားသစ် က ရေပေါ်ချပ်ပြားပေါ်မှာ တည်တည်ငြိမ်ငြိမ်ရှိလာတဲ့ အခါ ခြေကုန်လက်ပန်းကျနေတဲ့ ကျားသစ်ကို ကမ်းရှိရာကို အသာအယာ ဆွဲခေါ်လာခဲ့ကြရပါတယ်။ ကမ်းပေါ်မှာတော့ တိရစ္ဆာန် ကယ်ဆယ်ရေးအဖွဲ့တွေက အသင့်စောင့်နေကြပြီး ကျားသစ်လေးကို ကယ်တင်ခဲ့ပါတယ်။ တိရစ္ဆာန် ဆရာဝန်တွေရဲ့ အဆိုအရ ကျားသစ်မှာ သေနတ်ဒဏ်ရာတွေ အများအပြား ရှိနေပြီး ကျည်စ အများအပြားလည်း အရေပြားအောက်မှာ ရှိနေပါတယ်။ ကမ်းပေါ်မှာတော့ သူ့ကို အထူးကြပ်မတ်ကုသမှု လုပ်ထားပြီး ဆရာဝန်တွေက စောင့်ကြည့် ပေးထားပါတယ်။ အခြေအနေတည်ငြိမ်လာနေပြီး ကျားသစ်လေး ရဲ့ ကျန်းမာရေး စိတ်ချရတဲ့ အခါ တောရိုင်းထဲကို ပြန်လွှတ်ပေးမယ်လို့ ဆိုပါတယ်။ သေနတ်ဒဏ်ရာ တွေဟာ ဘယ်သူ့ လက်ချက် ဖြစ်တယ်ဆိုတာကိုတော့ အရာရှိတွေက ထုတ်ပြောတာ မရှိပါဘူး။

ဒဏ်ရာရ ကျားသစ်ကို မြစ်ရေထဲမှာ ကယ်ဆယ်

Oct 9

ဘုံဘေမြို့ ဒုတိယလေဆိပ်သစ် ဖွင့်လှစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။ တောင်များကိုဖြို မြစ်များကို လမ်းကြောင်း ပြောင်းပြီး ဆယ်စုနှစ်နှင့် ချီ၍ တည်ဆောက်နေခဲ့သည့် အိန္ဒိယ နိုင်ငံ ဘုံဘေမြို့က Navi Mumbai (NMI) နိုင်ငံတကာ လေဆိပ်သစ် ဖွင့်ပွဲကို အောက်တိုဘာ ၈ ရက်က ကျင်းပခဲ့သည်။ ဘုံဘေ ခေါ် Mumbai မြို့ လေဆိပ်သည် အရှေ့တောင်အာရှနဲ့ ဥရောပ ခရီးစဉ်တွေ အကြား ခရီးတထောက်နားရာ လေဆိပ်များထဲမှ တစ်ခု ဖြစ်သည်။ လေဆိပ်ဆောက်လုပ်ရေးသည် နှစ်ပေါင်း ၂၀ ခန့်ကြာမြင့်ခဲ့သည်။ ဆောက်လုပ်ရေး လုပ်ငန်းစဉ်များထဲတွင် တောင်များကို ပြားပြားဝပ်သွားအောင် ဖြိုရသည်၊ မြစ်များကို လမ်းကြောင်း ပြောင်းပေးရသည်၊ ချောက်ကြီးများကို တံတားတွေ ထိုးခဲ့ရသည်ဟု CNN သတင်းဌာနက ဖော်ပြသည်။ ကမ္ဘာ့ လူဦးရေ အထူထပ်ဆုံးမြို့များတွင် ပါဝင်သော ဘုံဘေမြို့သည် ဒုတိယမြောက် နိုင်ငံတကာ လေဆိပ်ကို ဖွင့်လှစ်နိုင်ခဲ့ခြင်း ဖြစ်သည်။ ပထမလေဆိပ်ဖြစ်သည့် BOM လေဆိပ်သည် တစ်နှစ်ကို ခရီးသည် ၅၄ သန်းကို ဝန်ဆောင်မှု ပေးနေရပြီး ခရီးသည်များ များလွန်း၍ လူတန်းရှည်များဖြင့် စောင့်ဆိုင်းရသော လေဆိပ်ဖြစ်သည်။ ယခုလေဆိပ်သစ်တွင် ဆိပ်ခံတာမီနယ် ၄ ခု အထိ ဆောက်လုပ်သွားမည် ဖြစ်ပြီး လက်ရှိ ပြီးစီးထားသည့် တာမီနယ် တစ်ခုထဲပင်လျှင် တစ်နှစ်လျှင် ခရီးသည် သန်း ၂၀ ကို ဝန်ဆောင်မှု ပေးသွားမည်ဟု ဆိုသည်။ လေဆိပ်ဆောက်လုပ်မှု အပြည့်အဝ ပြီးစီးသွားပါက တစ်နှစ်လျှင် ခရီးသည် သန်း ၉၀ ကို ဝန်ဆောင်မှု ပေးနိုင်မည်ဟု ဆိုသည်။ လေဆိပ်အသစ်ကြောင့် ဘုံဘေမြို့တည်ရှိရာ မဟာရပ်ရှ်ထရာ (Maharashtra) ပြည်နယ်မှ လယ်ယာထွက်ကုန်များနှင့် ရေလုပ်ငန်းထွက်ကုန်များကို ဥရောပ၊ အရှေ့အလယ်ပိုင်းဒေသ နိုင်ငံများနှင့် အခြား ကမ္ဘာ့ဈေးကွက်များကို လွယ်လွယ်ကူကူ မြန်မြန်ဆန်ဆန် တင်ပို့နိုင်တော့မည်ဟု အာဏာပိုင်များက ပြောသည်။

ဘုံဘေမြို့ ဒုတိယလေဆိပ်သစ် ဖွင့်လှစ်

Oct 9

အစ္စရေးနှင့် ဟားမာ့စ် ငြိမ်းချမ်းရေး ပထမဆင့် သဘောတူညီချက်ရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။ အစ္စရေးနှင့် ဟားမာ့စ်အကြား ပထမဆင့် ငြိမ်းချမ်းရေး အစီအစဉ်ကို လက်မှတ်ရေးထိုးနိုင်ခဲ့ပြီဟု အမေရိကန် သမ္မတ ဒေါ်နယ်ထရန့်က ပြောသည်။ အဆိုပါ သဘောတူညီချက်နှင့် ပတ်သက်၍ အစ္စရေး ဝန်ကြီးချုပ် ဘင်ဂျမင် နေတန်ရာဟုက ဘုရားသခင် အကူအညီနှင့် ဓါးစာခံများကို အိမ်ပြန်ခေါ်လာနိုင်တော့မည်ဟု ပြောလိုက်သည်။ ဟားမာ့စ်များကတော့ အဆိုပါသဘောတူညီချက်အရ ဂါဇာ စစ်ပွဲ အဆုံးသတ်သွားမည် ဖြစ်ပြီး သိမ်းပိုက်ထားသူများ နောက်ပြန်ဆုတ်မည်၊ အကူအညီများ ဝင်လာမည်၊ အကျဉ်းသားများကို အပြန်အလှန်လဲလှယ်ကြမည်ဟု ဆိုသည်။ အမေရိကန် အဆင့်မြင့်အရာရှိတစ်ဦးက ဓါးစာခံများ လာမည့် တနင်္လာနေ့တွင် လွတ်လာမည်ဟု မျှော်လင့်ကြောင်း CNN သတင်းဌာနကို ပြောသည်။ ငြိမ်းချမ်းရေးအတွက် အတားအဆီး ဖြစ်နေသော ဟားမာ့စ်များ အကြွင်းမဲ့ လက်နက်ချရေးနှင့် ဂါဇာကို အနာဂတ်တွင် မည်သူက အုပ်ချုပ်သွားမည် ဆိုသည့် ကိစ္စများနှင့် ပတ်သက်၍ သမ္မတ ထရန့်၏ လူမှု မီဒီယာတွင်မူ ပြောပြထားခြင်း မရှိပေ။ အစ္စရေးတပ်များကို သတ်မှတ်ထားသည့် မျဉ်းအထိ ပြန်ဆုတ်ရန် ကိစ္စကို အတည်ပြုရန် အောက်တိုဘာ ၉ ရက်တွင် အစ္စရေး အစိုးရ အစည်းအဝေးကို ခေါ်ယူထားသည်ဟု ဝန်ကြီးချုပ် နေတန်ရာဟုက ပြောသည်။

အစ္စရေးနှင့် ဟားမာ့စ် ငြိမ်းချမ်းရေး ပထမဆင့် သဘောတူညီချက်ရ

Oct 8

ပူတာအိုတွင် စစ်တပ်ထောက်ခံပွဲကို လုံခြုံရေး အပြည့်ဖြင့် ကျင်းပ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ကချင်ပြည် မြောက်ဖျားပိုင်းက ပူတာအိုမြို့တွင် စစ်ကော်မရှင်တပ်နှင့် ပြည်သူ့စစ် ထောက်ခံပွဲ လုပ်ခဲ့သည်ဟု ဒေသခံများက ပြောသည်။ စစ်တပ် ထောက်ခံပွဲကို လုံခြုံရေးအပြည့်ဖြင့် လုပ်ခဲ့ခြင်း ဖြစ်သည်ဟု မြို့ခံအချို့က ပြောသည်။ လက်နက် ယူနီဖောင်း အပြည့်အစုံနှင့် ပြည်သူ့စစ်အဖွဲ့ဝင်များ၊ ရဲတပ်ဖွဲ့ဝင်များက လုံခြုံရေး ယူထားပြီး ပူတာအို မြို့ပေါ်တွင် စစ်ကော်မရှင်နှင့် ပြည်သူ့စစ်အဖွဲ့တို့ကို ထောက်ခံသည့်ပွဲအား အောက်တိုဘာလ ၇ ရက်နေ့က လုပ်ခဲ့ ကြခြင်း ဖြစ်သည်။ လူအင်အား ၂၀၀ ကျော်ခန့်က လှည့်လည်စီတန်းပြီး စစ်တပ်နှင့် ပြည်သူ့စစ်အဖွဲ့တို့ကို ထောက်ခံကြောင်း၊ ကချင် လွတ်လပ်ရေး တပ်မတော် KIA ကို ဆန့်ကျင်ကြောင်း ဆန္ဒထုတ်ဖော်ခဲ့ကြခြင်း ဖြစ်သည်ဟု ဒေသခံတစ်ဦးက ပြောသည်။ ဦးတန်ဂူးတန် ပိုင်ဆိုင်သည့် ခြံဝန်းထဲတွင် လူစုပြီး ဆန္ဒပြမှုကို စစ်ကော်မရှင် လက်အောက်ခံ ခေါင်လန်ဖူးဌာနေ ပြည်သူ့စစ်အဖွဲ့နှင့် ၎င်းတို့ကို ကျောထောက်နောက်ခံပြုထားသည့် ရိုးရာယဉ်ကျေးမှုအဖွဲ့တို့က ဦးဆောင်ပြီး လုပ် ခဲ့ခြင်း ဖြစ်သည်။ ဘိုးဘွားပိုင်နယ်မြေများ တည်တံ့ရေး၊ တိုင်းရင်းသားများ စည်းလုံးညီညွတ်ရေး၊ လန်ဆယ်ဒေသ ပြန်လည်ရရှိ ရေး၊ လန်ဆယ်ဒေသ စစ်ဆင်ရေးများ အောင်ရမည်ဟု ကြွေးကြော်ခဲ့ကြသည့်အပြင် အဆိုပါ စာသားများပါသော ဗီနိုင်းများ ကိုင်ပြီး လှည့်လည်ခဲ့ကြခြင်း ဖြစ်သည်။ အလားတူ အောက်တိုဘာ ၄ ရက်နေ့တွင်လည်း ခေါင်လန်ဖူးမြို့၌ စစ်တပ် ထောက်ခံပွဲလုပ်ခဲ့ကြသေးသည်ဟု မြေပြင် သတင်းအရင်းအမြစ်က ဆိုသည်။

ပူတာအိုတွင် စစ်တပ်ထောက်ခံပွဲကို လုံခြုံရေး အပြည့်ဖြင့် ကျင်းပ

Oct 8

ထိုင်းတွင် နိုင်ငံခြားဧည့်သည်တိုင်း ဘတ် ၃၀၀ အခွန်ပေးရတော့မည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ နိုင်ငံခြားခရီးသွားများထံမှ ဝင်ကြေး ဘတ် ၃၀၀ ကောက်ခံမည့် စီမံချက်ကို ထိုင်းနိုင်ငံက မကြာခင် စတင်တော့ မည်။ အဆိုပါ အခွန်ကောက်ခံမှုမှာ နိုင်ငံခြား ခရီးသွားများထံမှ ကောက်ခံသွားမည်ဟု ပြောဆိုထုတ်ပြန်ထားသော ကြောင့် မြန်မာနိုင်ငံသား ခရီးသွားများလည်း အကျုံးဝင်မည် ဖြစ်သည်။ ဘတ် ၃၀၀ အခွန်ကောက်ခံမည့် ကိစ္စကို လေးလအတွင်း အပြီးသတ် အကောင်အထည် ဖော်နိုင်အောင် ရည်ရွယ် ထားသည်ဟု ဘန်ကောက်ပို့စ် သတင်းဌာနက အောက်တိုဘာ လဆန်းတွင် သတင်းဖော်ပြသည်။ ခရီးသွားလာရေးနှင့် အားကစား ဝန်ကြီးဌာန၊ ဝန်ကြီး Atthakorn Sirilatthayakorn က ခရီးသွားများအနေဖြင့် အဆိုပါအခွန် ကို ဝန်ထုပ်ဝန်ပိုးကဲ့သို့ မမြင်ကြရန်နှင့် မိမိတို့ (ခရီးသွားများ) ၏ ဘေးကင်းလုံခြုံရေး (အာမခံအတွက်) နှင့် ခရီးသွား အခြေခံ အဆောက်အအုံများ ဖွံ့ဖြိုးတိုးတက်ရေးအတွက် အသုံးပြုသွားမှာ ဖြစ်ကြောင်း ရှင်းလင်း ပြောဆိုထားသည်။ ထိုအစီအစဉ်မှာ ၂၀၂၅ ခုနှစ် အကုန် (သို့မဟုတ်) ၂၀၂၆ ခုနှစ် အစောပိုင်းတွင် စတင်နိုင်သည်ဟု ထိုင်းသတင်း များက ဆိုသည်။ ကုန်းလမ်းနှင့် ရေကြောင်းမှ ဝင်ရောက်လာသူများအတွက် ဘတ် ၁၅၀ မှ ဘတ် ၃၀၀ ကြား အခွန်ကောက် သွားမှာ ဖြစ်ပြီး ရက် ၃၀ မှ ရက် ၆၀ အတွင်း အကြိမ်များစွာ ဝင်ထွက်ခွင့်ပြုမည့် အစီအစဉ် ဖြစ်သည်ဟု Khaosod သတင်းက ဆိုသည်။ အလားတူ လေယာဉ်ဖြင့် ဝင်လာကြမည့် ဧည့်သည်များမှာမူ ဘတ် ၃၀၀ ပေးဆောင်ရမည် ဖြစ်သည်။ ထိုသို့ အခွန်ကောက်ခံရသည့် အကြောင်းအရင်းမှာ ခရီးသွားများအနေဖြင့် ကျန်းမာရေးစောင့်ရှောက်မှုနှင့် မတော်တဆ ထိခိုက်မှု အာမခံအတွက် အသုံးပြုရန်နှင့် ခရီးသွားလုပ်ငန်း ဖွံ့ဖြိုးတိုးတက်ရေး၊ လုံခြုံရေးပိုင်း၌ တိုးမြင့်သွားမည့် နေရာများ၌ အသုံးပြု ရည်ရွယ်သည်ဟု ဆိုသည်။ သို့သော် အလုပ်ပါမစ် ရှိသောသူ (Work Permit Holders)၊ ထိုင်းနိုင်ငံ တရားဝင် အလုပ်လုပ်နေသည့် သူများ၊ Transit ခရီးသည်များ၊ ထိုင်းနိုင်ငံကို ဖြတ်ပြီး တတိယနိုင်ငံကို ဆက်သွားမည့် ခရီးသည်များ၊ သံတမန် (သို့မ ဟုတ်) အထူးဗီဇာဖြင့် ဝင်ရောက်လာမည့်သူများနှင့် အသက် ၂ နှစ်အောက် ကလေးများက အခွန်ကင်းလွတ်ခွင့် ရမည် ဖြစ်သည်။ အဆိုပါ အစီအစဉ်ကို ၂၀၂၄ ခုနှစ်က စတင်ပြီး ကောက်ခံရန် ရည်ရွယ်ခဲ့သော်လည်း၊ COVID-19 ကပ်ရောဂါနှင့် ထိုင်းနိုင်ငံတွင်း အစိုးရ အပြောင်းအလဲများကြောင့် ရွှေ့ဆိုင်းခဲ့ရသည်ဟု ထိုင်းသတင်းများက ဆိုသည်။

ထိုင်းတွင် နိုင်ငံခြားဧည့်သည်တိုင်း ဘတ် ၃၀၀ အခွန်ပေးရတော့မည်

Oct 8

မုံရွာ နမခ တိုက်ခိုက်ခံရမှု အရာရှိ/စစ်သား ၁၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာ ၈ ရက်။ မုံရွာမြို့အခြေစိုက် အနောက်မြောက်တိုင်း စစ်ဌာနချုပ် (နမခ) ကို ဒေသခံ တော်လှန်ရေးတပ်ဖွဲ့များက ရော့ကတ် ၁၀ လုံးနှင့် ပစ်ခတ် တိုက်ခိုက်ခဲ့ရာ စစ်တပ်ဘက်က အရာရှိ ၅ ဦး အပါအဝင် ၁၂ ဦး သေဆုံးခဲ့သည်။ အဆိုပါ တိုက်ခိုက်မှုမှာ စစ်ကိုင်းတိုင်းဒေသကြီး၊ မုံရွာမြို့ပေါ်ရှိ အရေးပါသော စစ်ရေးပစ်မှတ်တစ်ခုကို တော် လှန်ရေး အဖွဲ့များဘက်က ကြီးမားသည့် ထိုးစစ်ဆင် တိုက်ခိုက်မှု ဖြစ်ပြီး ရိက္ခာဂိုဒေါင် ၂ လုံးလည်း ပျက်စီး သွားခဲ့သည်။ စစ်တိုင်းရုံးက အရာရှိ ၅ ဦး ပွဲချင်းပြီး သေဆုံးခဲ့ပြီး ရိက္ခာဂိုထောင်စောင့် စစ်သား ၂ ဦးလည်း ပွဲချင်းပြီး သေဆုံး ခဲ့သည်ဟု Chindwin Rocket Brother (CRB) အဖွဲ့က အောက်တိုဘာလ ၇ ရက်နေ့တွင် သတင်းထုတ်ပြန်သည်။ ထို့အပြင် တပ်တွင်းမိသားစု ၅ စု ထိခိုက်ခဲ့ပြီး အဆိုပါ ထိခိုက်မှုထဲ၌ မိသားစုဝင် ၅ ဦးက ပွဲချင်းပြီး သေဆုံး သွားခဲ့သည်။ အလားတူ ထိမှန် ဒဏ်ရာရသွားသည့် သူများကိုမူ တပ်ဆေးရုံသို့ အရေးပေါ်ပို့ခဲ့ရသည်ဟု ဆိုသည်။ ထိုတိုက်ခိုက်မှုကို အောက်တိုဘာလ ၂ ရက်နေ့၊ ည ၈ နာရီအချိန်၌ တော်လှန်ရေးတပ်များ ပူးပေါင်းပြီး လုပ်ခဲ့ခြင်း ဖြစ်သည်ဟုလည်း ဗမာ့တပ်တော်က ထုတ်ပြန်ထားသည်။ ရိက္ခာဂိုဒေါင် ၂ ခု ပျက်စီးခဲ့ခြင်းကြောင့် ရှေ့တန်း စစ်ဆင်ရေးအတွက် စစ်ရေးအရ အရေးပါသည့် ထောက်ပံ့ရေး ပိုင်းကို ထိခိုက်စေနိုင်သည်ဟု သုံးသပ်မှုများ ရှိနေသည်။ မုံရွာ နမခ ကို တိုက်ခိုက်နိုင်ခဲ့ခြင်းမှာ စစ်ကိုင်းတိုင်းအတွင်းက ဒေသခံ တော်လှန်ရေးအင်အားစုများ အတွက် အရေးပါသည့် စစ်ရေးအောင်မြင်မှု တစ်ခုအဖြစ် တော်လှန်ရေး တပ်ဖွဲ့များက သုံးသပ်ထားသည်။ နမခ သည် စစ်ကိုင်းတိုင်းနှင့် ချင်းပြည် မြောက်ပိုင်းက စစ်ဆင်ရေးတို့ကို ဦးဆောင်ကွပ်ကဲသည့် ဗဟိုဌာန ဖြစ် သောကြောင့် အဆိုပါ ဌာနချုပ်ကို တိုက်ခိုက်နိုင်ခြင်းမှာ ဒေသတွင်း စစ်တပ်၏ ထိန်းချုပ်မှုနှင့် လုံခြုံရေး အားနည်းချက်ကို မီးမောင်းထိုးပြရာ ရောက်သည်ဟုလည်း ဆိုကြသည်။ သို့သော် စစ်ကော်မရှင်တပ်ဘက်ကမူ ယခု တိုက်ခိုက်ခံရမှုနှင့် ပတ်သက်၍ တစ်စုံတစ်ရာ ထုတ်ဖော်ပြောဆိုခြင်း မျိုး မရှိသေးပေ။

မုံရွာ နမခ တိုက်ခိုက်ခံရမှု အရာရှိ/စစ်သား ၁၂ ဦး သေဆုံး

Oct 8

မိုင်းလုံနှင့် မိုင်းငေါ့ လေကြောင်း တိုက်ခိုက်ခံရမှုထဲ အရပ်သား တစ်ဒါဇင်သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ရှမ်းပြည် မြောက်ပိုင်း၊ ကျောက်မဲခရိုင်ထဲက မြို့နယ်ခွဲ အဆင့်ရှိသည့် မိုင်းလုံမြို့နယ်နှင့် မိုင်းငေါ့မြို့နယ်တို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား တစ်ဒါဇင်သေဆုံးခဲ့သည်။ မိုင်းလုံမြို့နယ်ထဲက မန်ဟုန်းကျေးရွာ လေကြောင်း တိုက်ခိုက်ခံရမှုထဲ ဒေသခံ ၁၀ ဦး သေဆုံးခဲ့ပြီး ၃ ဦး ထိမှန် ဒဏ်ရာ ရခဲ့သည်။ အလားတူ အောက်တိုဘာလ ၈ ရက်နေ့၊ နံနက်ပိုင်း ၁၁ နာရီအချိန်ခန့်တွင် မိုင်းငေါ့မြို့ကို လေကြောင်းကနေ ဗုံးကြဲတိုက်ခိုက်ခဲ့ရာ ပြည်သူ ၂ ဦးသေဆုံးခဲ့ပြီး ၂ ဦး ဒဏ်ရာ ရရှိခဲ့သည်။ မိုင်းလုံမြို့နယ်နှင့် မိုင်းငေါ့မြို့နယ်တို့ကို နှစ်ရက် ဆက်တိုက် ဗုံးကြဲတိုက်ခိုက်သွားခဲ့ခြင်း ဖြစ်သည်။ အဆိုပါ မြို့နယ်တို့မှာ တအာင်းတပ် TNLA က ထိန်းချုပ်ထားသည့် ဒေသများ ဖြစ်သည်။ မိုင်းလုံးဖြစ်စဉ်နှင့် ပတ်သက်၍ ဒေသခံတစ်ဦးက “ဖြစ်တဲ့နေရာက မိုးကုတ် လမ်းမကြီးကနေ သွားရတာ။ တော် တော်လေး သွားရတဲ့ရွာပါ။ ဒီရွာကို မနေ့က နေ့လည် ၁၂ နာရီခွဲလောက်မှာ လာကြဲသွားတာပါ။ မိုင်းလုံမြို့နယ် ထဲက ရွာပါ။ ရွာနာမည်လား မန်ဟုန်းရွာလို့ ခေါ်တယ်။ ပေါင် ၂၅၀ ဗုံးနှစ်လုံး ကြဲသွားတယ်ဆိုတာ မှန်ပါတယ် ဗျ။ TNLA က ထုတ်ထားသလိုပဲ ဒီ သေတဲ့လူတွေ ကလေးတစ်ယောက်ပါတာလည်း မှန်ပါတယ်ဗျ။ သေဆုံး အားလုံးက ၁၀ ယောက်ပါ” ဟု ပြောသည်။ မန်ဟုန်းကျေးရွာကို အောက်တိုဘာလ ၇ ရက်နေ့၊ နေ့လည် ၁၂ ခွဲအချိန်ခန့်တွင် စစ်ကော်မရှင်တပ်က လေကြောင်းမှ ပေါင် ၂၅၀ ဗုံး ၂ လုံးကြဲခဲ့ခြင်း ဖြစ်သည်ဟု ဒေသခံများက ပြောသည်။ လေကြောင်း တိုက်ခိုက်ခံရမှုထဲ အသက် ၂ နှစ်အရွယ် ကလေးတစ်ဦး အပါအဝင် ပြည်သူ ၁၀ ဦး သေဆုံးခဲ့ပြီး ၃ ဦး ထိမှန်ဒဏ်ရာ ရခဲ့သည်ဟု တအာင်းတပ် TNLA က ထုတ်ပြန်ထားသည်။ ထို့အပြင် ကျေးရွာထဲက အရပ်သား နေအိမ်များလည်း ထိမှန်ပျက်စီးကုန်သည်ဟု ဆိုသည်။ အလားတူ အောက်တိုဘာလ ၈ ရက်နေ့ (ယနေ့)၊ နံနက်ပိုင်း ၁၁ နာရီအချိန်ခန့်ကလည်း မိုင်းငေါ့မြို့ကို လေကြောင်းမှ ဗုံးကြဲတိုက်ခိုက်ခဲ့သောကြောင့် ပြည်သူ ၂ ဦး သေဆုံးပြီး ၂ ဦး ထိမှန်ဒဏ်ရာ ရရှိခဲ့သည်။ မိုင်းငေါ့မြို့ကို ပေါင် ၂၅၀ ဗုံးနှင့် ကြဲခဲ့ရာ အရပ်သား ထိမှန်သေဆုံးဒဏ်ရာ ရရှိမှုများအပြင် အိမ် ၈ လုံး ထက် မနည်း ထိမှန်ပျက်စီးသွားခဲ့သည်ဟု မြေပြင် သတင်းအရင်းအမြစ်က ပြောသည်။ မိုင်းငေါ့ဒေသခံ အမျိုးသား တစ်ဦးက “လေယဉ်ကျသွားတာ ရဲစခန်းရှေ့မှာ ၂ လုံးကျတာ၊ အဲ့ဘက်မှာ လူထိ သွားတယ် ဒဏ်ရာလည်းရတယ်၊ ရော့ကဒ်လည်း ပစ်တယ်၊ ရော့ကဒ်က ထွေအုပ်ရုံးမှာနဲ့ ရဲစခန်း လမ်းကြားမှာ ကျတာ၊ ဘန်ခေါက်ရွာသွားတဲ့လမ်းပေါ့၊ အခုလောလောဆယ် လေယဉ်က မြို့ထဲမှာ ကြဲသွားပြီ” ဟု တအာင်း အမျိုးသမီးဖွဲ့ TWO ကို ပြောသည်။ စစ်ကော်မရှင်တပ်က မိုင်းငေါ့မြို့က စျေးရပ်ကွက်တွင် ရော့ကဒ် ဗုံး (၂) လုံး၊ တာလုံရပ်ကွက်တွင် ရော့ကဒ် ဗုံး (၂) လုံး ကြဲချတိုက်ခိုက်ခဲ့ခြင်း ဖြစ်သည်။ အသက် (၅၀) နှစ် အရွယ်ရှိ ဒေါ်လှရီ၊ အသက် (၅၆) နှစ်အရွယ် ဦးရွှေဟုန်း ထိမှန်သေဆုံးခဲ့ပြီး အသက် (၁၈) နှစ် အရွယ်ရှိ မထွေးထွေးအောင်နှင့် အသက် (၅၀) နှစ် အရွယ် ဦးတင်မောင်အေးတို့ကို ထိမှန်ဒဏ်ရာရရှိခဲ့သည်ဟု တအာင်းတပ် TNLA က ထုတ်ပြန်သည်။

မိုင်းလုံနှင့် မိုင်းငေါ့ လေကြောင်း တိုက်ခိုက်ခံရမှုထဲ အရပ်သား တစ်ဒါဇင်သေဆုံး

« Prev 1 … 10 11 12 13 14 … 17 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စစ်ကိုင်း လဝကရုံး ဗုံးပေါက်ကွဲမှုတွင် ဝန်ထမ်းနှင့် အရပ်သား ၂၀ ဦးခန့် ဒဏ်ရာရ
အလုပ်ရှာဖွေရေး အေးဂျင့်အဖြစ် တရုတ်သူလျှိုများ အသွင်ယူနေကြောင်း ဗြိတိန် MI5 ထုတ်ဖော်
ထိုင်း စားသုံးသူ ကောင်စီက ငွေလိမ်ကြော်ငြာများအတွက် Facebook (Meta) ကို တရားစွဲမည်
ကမ္ဘာ့ဖလားဝင်မည့် ဘရာဇီးအသင်း လေယာဉ်အား ရေဖြန်း ကောင်းချီးပေး
ယူကရိန်းကို အဖွဲ့ဝင်အဖြစ်လက်ခံရန် EU ဆွေးနွေးမည်၊ မျက်နှာချင်းဆိုင်တွေ့ရန် ရုရှားကို ယူကရိန်း သမ္မတ စာပို့

Archives

Archives

×Close