October 2025 – Page 3 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: October 2025

Oct 28

စစ်ကော်မရှင်၏ ရွေးကောက်ပွဲ မဲဆွယ်ကာလ စတင်၊ တော်လှန်ရေး အင်အားစုများက ဆန့်ကျင်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၈ ရက်။ စစ်ကောင်စီလက်အောက်ခံ ပြည်ထောင်စု ရွေးကောက်ပွဲ ကော်မရှင် (UEC) က ၂၀၂၅ ခုနှစ် အထွေထွေ ရွေးကောက်ပွဲအတွက် မဲဆွယ်စည်းရုံးရေး ကာလကို ယနေ့ အောက်တိုဘာလ ၂၈ ရက်နေ့မှ စတင်လိုက်ပြီ ဖြစ်ကြောင်း တရားဝင် ကြေညာလိုက်သည်။ UEC က ပါတီ ကိုယ်စားလှယ်လောင်းများ အနေဖြင့် မူဝါဒနှင့် ကတိကဝတ်များကို စည်းရုံးဟောပြောခွင့်၊ ပိုစတာများ စိုက်ထူခွင့် ရပြီဟု ဆိုသော်လည်း ရွေးကောက်ပွဲ ဥပဒေကို တိကျစွာ လိုက်နာရန် သတိပေးထားသည်။ တစ်ချိန်တည်းမှာပင် အထွေထွေသပိတ် ပေါင်းစပ်ညှိနှိုင်းရေး အင်အားစု (GSCB) က စစ်ကောင်စီက ကျင်းပမည့် ရွေးကောက်ပွဲ၏ မဲဆွယ်စည်းရုံးရေးကာလကို သပိတ်မှောက် ဆန့်ကျင်ရေးကာလ အဖြစ် သတ်မှတ်ကြောင်း ထုတ်ပြန် ကြေညာခဲ့သည်။ လက်ရှိ မြေပြင်အခြေအနေတွင် မြို့နယ်အများအပြား၌ တိုက်ပွဲများ ပြင်းထန်နေဆဲဖြစ်ပြီး နိုင်ငံရေးပါတီ အများစုမှာ လူထုစည်းရုံးမှုကြီးများ မလုပ်နိုင်သေးဘဲ အွန်လိုင်းနှင့် ဒေသအလိုက် သေးငယ်သော လှုပ်ရှားမှုများ ဖြင့်သာ စတင်နေရသည်။ ရွေးကောက်ပွဲ စောင့်ကြည့်သူနှင့် နိုင်ငံရေး လေ့လာသုံးသပ်သူတစ်ဦးက “တရားမျှတမှုနဲ့ လုံခြုံရေး လုံးဝမရှိတဲ့ အချိန်မှာ စစ်ကောင်စီက အတင်းအဓမ္မ လုပ်မယ့် ဒီရွေးကောက်ပွဲက ပြည်သူ့ဆန္ဒကို ဘယ်တော့မှ အမှန်အတိုင်း ထင်ဟပ်နိုင်မှာ မဟုတ်ဘူး။ ဒါဟာ စစ်အာဏာရှင် သက်ဆိုးရှည်ဖို့အတွက် လုပ်တဲ့ အယောင်ပြပွဲ သက်သက်ပဲ” ဟု မှတ်ချက်ပေးသည်။ စိုးရိမ်စရာ အဓိကအချက်များမှာ စစ်ဘေးရှောင်ဦးရေ များပြားနေခြင်းနှင့် အမျိုးသား ညီညွတ်ရေး အစိုးရ (NUG) အပါအဝင် တော်လှန်ရေး အင်အားစုများ ထိန်းချုပ်ထားသည့် ဒေသများတွင် ရွေးကောက်ပွဲကို လွတ် လွတ်လပ်လပ် လုပ်နိုင်မည့် အခြေအနေ လုံးဝမရှိခြင်းတို့ ဖြစ်သည်။ NUG နှင့် တော်လှန်ရေးအင်အားစုများကမူ စစ်ကော်မရှင်တပ်၏ ရွေးကောက်ပွဲကို ပြတ်ပြတ်သားသား ကန့်ကွက်ထားပြီး ဖြစ်သည်။

စစ်ကော်မရှင်၏ ရွေးကောက်ပွဲ မဲဆွယ်ကာလ စတင်၊ တော်လှန်ရေး အင်အားစုများက ဆန့်ကျင်

Oct 28

ULA/AA မှ Fortify Rights အဖွဲ့၏ ထုတ်ပြန်ချက်ကို 'ဘက်လိုက်မှု' ဟု ပြင်းထန်စွာ ကန့်ကွက်  သတင်းနှင့် မီဒီယာ ကွန်ရက် ၂၀၂၅ ခုနှစ်၊ အောက်တိုဘာလ ၂၈ ရက်။ အာရက္ခတပ်တော် (ULA/AA) သည် ရခိုင်အရေးနှင့် ပတ်သက်၍ လူ့အခွင့်အရေး ဆိုင်ရာ ထုတ်ပြန်ချက်တစ်ခု ထုတ်ပြန်ခဲ့သည့် နိုင်ငံတကာ အဖွဲ့အစည်းဖြစ်သော Fortify Rights အပေါ် ပြင်းပြင်းထန်ထန် ကန့်ကွက်လိုက် ကြောင်း အောက်တိုဘာ ၂၅ ရက်နေ့တွင် စာထုတ်ပြန်ခဲ့သည်။ ULA/AA က Fortify Rights ၏ လုပ်ဆောင်ချက်များသည် ဘက်လိုက်မှုများ ရှိနေပြီး၊ ရခိုင်ပြည်သူများ၏ ဘေးကင်းလုံခြုံမှုကိုပါ ထိခိုက်စေနိုင်သည်ဟု စွပ်စွဲသည်။ Fortify Rights အဖွဲ့ကို ၎င်းတို့ ထောက်ခံအားပေးသည့် အကြမ်းဖက် အဖွဲ့အစည်းများကို ကူညီနေသည့် အဖွဲ့အစည်းများအား ဖော်ထုတ်ချေပနေသည့် အဖွဲ့အဖြစ် ULA/AA က တုံ့ပြန် စွပ်စွဲထားသည်။ ULA/AA နှင့် နီးစပ်သည့် နိုင်ငံရေး လေ့လာသူတစ်ဦးက “Fortify Rights ရဲ့ လုပ်ရပ်တွေဟာ လူ့အခွင့်အရေး၊ တရားမျှတမှုနဲ့ ငြိမ်းချမ်းရေးကို ဖော်ဆောင်နေပါတယ်ဆိုတဲ့ ရခိုင်ပြည်သူတွေကို အကာအကွယ် မပေးနိုင်ဘဲ အဲဒီရည်မှန်းချက်တွေကိုပါ ဆန့်ကျင်ဖျက်ဆီးနေတာ ဖြစ်တယ်” ဟု ဝေဖန်ပြောကြားသည်။ ထို့အပြင် ULA/AA က Fortify Rights အနေဖြင့် မြန်မာနိုင်ငံအတွင်းက တိုင်းရင်းသား၊ ဘာသာရေးနှင့် ဒေသဆိုင်ရာ ပဋိပက္ခများကို ပိုမိုပြင်းထန်လာစေရန် ရည်ရွယ်ချက်ရှိရှိ လုပ်ဆောင်နေသည် ဟုလည်း ပြစ်တင် ဝေဖန်ခဲ့သည်။ ထို့ကြောင့် ULA/AA က Fortify Rights အနေဖြင့် ၎င်းတို့၏ ရပ်တည်ချက်ကို ပြန်လည်သုံးသပ်ပြီး ရခိုင်ပြည်သူ များ၏ အသက်အိုးအိမ် စည်းစိမ်ကို ခြိမ်းခြောက်နေသည့် ဘက်လိုက်မှုများကို ချက်ချင်း ရပ်တန့်ရန် အခိုင်အမာ တောင်းဆိုလိုက်သည်။

ULA/AA မှ Fortify Rights အဖွဲ့၏ ထုတ်ပြန်ချက်ကို ‘ဘက်လိုက်မှု’ ဟု ပြင်းထန်စွာ ကန့်ကွက် 

Oct 28

KIO မှ မြန်မာ-တရုတ် နယ်စပ်ဂိတ် ၇ ခုကို တရုတ်နှင့် ညှိနှိုင်းကာ ပြန်ဖွင့်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၈ ရက်။ ကချင်လွတ်လပ်ရေးအဖွဲ့ (KIO/KIA) က ထိန်းချုပ်ထားသည့် မြန်မာ - တရုတ် နယ်စပ်ဂိတ်အားလုံးကို တရုတ် အာဏာပိုင်များနှင့် ညှိနှိုင်းဆွေးနွေးပြီးနောက် ပြန်လည်ဖွင့်လှစ်လိုက်ပြီ ဖြစ်ကြောင်း KIO ဘက်က အတည်ပြုခဲ့ သည်။ KIO ပြောခွင့်ရ ဗိုလ်မှူးကြီးနော်ဘူက “နယ်စပ်ဂိတ်ကတော့ ၂၄ ရက်နေ့ ညသန်းခေါင် ၁၂ နာရီ အချိန်မှာ ဖွင့် တယ်လို့ သူတို့က ကျနော်တို့ကို အကြောင်း ကြားလာတယ်။ မန်ဝိန်းကြီးရယ်၊ လွယ်ဂျယ်၊ ကျနော်တို့ လိုင်ဇာ နောက်ပြီးမှ ကန်ပိုင်တီတို့ ပန်ဝါ၊ ဖီမော် အဲ့တကြောလုံး ဖွင့်တာပေါ့။ အားလုံး ဒီနယ်စပ်ဂိတ် တကြောလုံးဖွင့် ပါတယ်” ဟု ပြောသည်။ ပြန်လည်ဖွင့်လှစ်လိုက်သည့် ဂိတ်များမှာ လွယ်ဂျယ်၊ လိုင်ဇာ၊ မိုင်ဂျာယန်၊ ကန်ပိုင်တီ၊ မံစီ၊ ပန်ဝါနှင့် ဖီမော် စသည့် အရေးပါသော ဂိတ်များဖြစ်ပြီး၊ အောက်တိုဘာလ ၂၄ ရက်နေ့ ညပိုင်းကစတင်၍ ဖွင့်လှစ်ခဲ့ခြင်း ဖြစ်သည်။ "ဒီလို ဂိတ်တွေ ပြန်ဖွင့်တာဟာ ဒေသခံပြည်သူတွေအတွက် အဓိက လိုအပ်တဲ့ စားသုံးကုန် ပစ္စည်းတွေကို တရုတ်ဘက်ကနေ တင်သွင်းဖို့နဲ့ မြန်မာဘက်က ထွက်ကုန်ဖြစ်တဲ့ ငှက်ပျောအပါအဝင် သီးနှံတွေ ပြန်တင်ပို့ နိုင်ဖို့အတွက် အဓိက ရည်ရွယ်တာ ဖြစ်ပါတယ်" ဟု လိုင်ဇာဒေသခံ ကုန်သည်တစ်ဦးက ပြောပြသည်။ လက်ရှိတွင် အဆိုပါ ဂိတ်သုံးခုမှ လူအဝင်အထွက်နှင့် ကုန်စည်သယ်ဆောင်မှုများ စတင်နေပြီ ဖြစ်သည်။ သို့သော်လည်း မြန်မာဘက်ခြမ်းမှ နယ်စပ်ဖြတ်ကျော်လိုသူများအတွက် လိုအပ်သည့် နယ်စပ်ဖြတ်ကျော်ခွင့် အထောက်အထား (Border Pass) ကိစ္စရပ်များကိုမူ နှစ်ဖက် ဆက်လက် ညှိနှိုင်းဆောင်ရွက်နေဆဲဖြစ်ကြောင်း KIO ပြောခွင့်ရ ဗိုလ်မှူးကြီးနော်ဘူက ပြောကြားသည်။ ဤသို့ ပြန်လည် ဖွင့်လှစ်နိုင်ခြင်းသည် စစ်ရေးတင်းမာမှုများကြားမှ ဒေသခံများ၏ စီးပွားရေး လည်ပတ်မှုကို တစ်ဖန် ပြန်လည် အသက်သွင်းနိုင်ရန် ကြိုးပမ်းမှုအဖြစ် လေ့လာသူ အချို့က ရှုမြင်ကြသည်။ အလားတူ စစ်ရေး မတည်ငြိမ်မှုများကြားမှ နယ်စပ်ဂိတ်များ ပြန်ဖွင့်နိုင်ခဲ့ခြင်းကြောင့် ဒေသခံများအတွက် အဓိက စားသုံးကုန် တင်သွင်းမှုနှင့် စိုက်ပျိုးရေးထွက်ကုန်များ ပြန်လည် တင်ပို့နိုင်ရေး အခွင့်အလမ်းများ ရရှိနိုင်ရေး မျှော်လင့်နေကြသည်။

KIO မှ မြန်မာ-တရုတ် နယ်စပ်ဂိတ် ၇ ခုကို တရုတ်နှင့် ညှိနှိုင်းကာ ပြန်ဖွင့်  

Oct 28

TNLA ဒေသတွင် လေကြောင်းတိုက်ခိုက်မှုများကြောင့် အရပ်သား ၄၉ ဦး ကျဆုံး   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၈ ရက်။ တအာင်းတပ် TNLA ထိန်းချုပ်နယ်မြေတွင် စစ်ကော်မရှင်၏ တိုက်ခိုက်မှုများကြောင့် အရပ်သား ၄၉ ဦး သေဆုံးခဲ့သည်။ တအာင်းအမျိုးသား လွတ်မြောက်ရေးတပ်မတော် (TNLA) ထိန်းချုပ်နယ်မြေများတွင် စစ်ကော်မရှင်တပ်၏ လေကြောင်းနှင့် ဒရုန်းတိုက်ခိုက်မှုများကြောင့် အောက်တိုဘာလ ၁ ရက်နေ့မှ ၂၆ ရက်နေ့အထိ အရပ်သား ထိခိုက်သေဆုံးမှု စံချိန်တင် မြင့်တက် လာခဲ့ကြောင်း TNLA က သတင်းထုတ်ပြန်သည်။ TNLA ၏ စာရင်းအရ စုစုပေါင်း သံဃာတော်နှင့် ကလေးငယ်များအပါအဝင် အရပ်သား ၄၉ ဦး သေဆုံးခဲ့ပြီး ၇၁ ဦး ဒဏ်ရာရရှိခဲ့သည် ဟု သိရသည်။ ၎င်းတို့သည် စစ်ကော်မရှင်တပ်က အရပ်သားပစ်မှတ်များကို မတရားတိုက်ခိုက်နေမှု၏ အဆိုးရွားဆုံး သက်သေ များ အဖြစ် မြင်တွေ့ရသည်။ နောက်ဆုံး တိုက်ခိုက်မှုများအဖြစ် အောက်တိုဘာ ၂၅ ရက်နှင့် ၂၇ ရက်တို့တွင် နမ္မတူမြို့နယ်၊ မန်လီကျေးရွာနှင့် မိုးမိတ်မြို့နယ်၊ မန်ကျည်းပင်ကျေးရွာတို့ တိုက်ခိုက်ခံခဲ့ရသည်။ နမ္မတူကို စစ်ကော်မရှင်တပ်က ဒရုန်းဖြင့် ဗုံး ၅ လုံး ကြဲချခဲ့ပြီး၊ မိုးမိတ်ကို လေကြောင်းမှ ဗုံးကြဲတိုက်ခိုက်ခဲ့သည်။ ဒေသတွင်း ကူညီကယ်ဆယ်ရေး လုပ်နေသူ တစ်ဦးက “ဒီလအတွင်း နမ္မတူ၊ မန်တုံ၊ နမ့်ဆန်၊ သီပေါ၊ မိုးကုတ်၊ မိုးမိတ် စတဲ့ မြို့နယ်တွေမှာ လေကြောင်းနဲ့ ဗုံးကြဲတိုက်ခိုက်မှုတွေကို သူတို့ဒီ စစ်ကောင်စီ က အရှိန်မြှင့် လုပ် ဆောင်ခဲ့တယ်။ အရပ်သားတွေနေတဲ့ နေရာတွေကို ရည်ရွယ်ချက်ရှိရှိ ပစ်မှတ်ထားတာဟာ စစ်ရာဇဝတ်မှု ကျူးလွန်နေ တာဖြစ်တယ်လို့ နိုင်ငံရေး လေ့လာသူတွေက ထောက်ပြနေပါတယ်” ဟု မှတ်ချက်ပြုခဲ့သည်။ TNLA ၏ ထုတ်ပြန်ချက်အရ ဤတိုက်ခိုက်မှုများကြောင့် နေအိမ် ၁၇၃ လုံး၊ စာသင်ကျောင်း ၅ ကျောင်းနှင့် ဘုန်းကြီးကျောင်း ၇ ကျောင်း တို့ ဗုံးစထိမှန် ပျက်စီးခဲ့ရပြီး ရွာသူရွာသားများလည်း ဘေးလွတ်ရာသို့ ထွက်ပြေး တိမ်းရှောင်ခဲ့ကြရသည်။ စစ်ကော်မရှင်ဘက်က TNLA ထိန်းချုပ်နယ်မြေများအား လေကြောင်းဖြင့် ပစ်မှတ်ထား တိုက်ခိုက်ခြင်းမှာ ဤဒေသအတွင်း တော်လှန်ရေး အရှိန်အဟုန်ကို နှောင့်ယှက်ရန်နှင့် အရပ်သားများ အပေါ် ဖိအားပေးရန် ရည်ရွယ်ခြင်း ဖြစ်သည်ဟု နိုင်ငံရေး လေ့လာသူများက သုံးသပ်ကြသည်။

TNLA ဒေသတွင် လေကြောင်းတိုက်ခိုက်မှုများကြောင့် အရပ်သား ၄၉ ဦး ကျဆုံး 

Oct 28

စစ်ကော်မရှင်၏ ရွေးကောက်ပွဲ ဗျူဟာနှင့် ကုလသမဂ္ဂ သံအမတ် ရာထူးတိုက်ပွဲ   ပီတာ ရေးသည်  သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ ကုလသမဂ္ဂဆိုင်ရာ သံအမတ်ရာထူးသည် နိုင်ငံတစ်နိုင်ငံ၏ အချုပ်အခြာအာဏာနှင့် ဂုဏ်သိက္ခာကို ကိုယ်စားပြု ရုံ သာမက နိုင်ငံတကာအကူအညီများ ရရှိရေး၊ တရားဥပဒေဆိုင်ရာ ရပ်တည်နိုင်ခွင့်နှင့် ကမ္ဘာ့သံတမန် ဆက်ဆံရေးတို့ အတွက်ပါ အဆုံးအဖြတ်ပေးနိုင်သည်။  စစ်ကော်မရှင်မှ ဦးဆောင်ကျင်းပရန် စီစဉ်နေသည့် လာမည့် ဒီဇင်ဘာ ၂၈ ရက်နေ့ ရွေးကောက်ပွဲသာ ဖြစ်မြောက် သွားပါက လာမည့်နှစ် ၂၀၂၆ ခုနှစ်တွင် မြန်မာနိုင်ငံဆိုင်ရာ ကုလသမဂ္ဂသံအမတ်နေရာအတွက် စိန်ခေါ်မှုများ ပိုမိုမြင့်မားလာနိုင်သည်ဟု နိုင်ငံရေးလေ့လာသုံးသပ်သူများနှင့် ဥပဒေပညာရှင်များက သုံးသပ်ကြသည်။  ထိုရွေးကောက်ပွဲကို အသုံးချကာ နိုင်ငံတကာ အသိအမှတ်ပြုမှုရယူ၍ ကုလသမဂ္ဂဆိုင်ရာ သံအမတ်နေရာကို ပြန်လည်ရယူရန် ကြိုးပမ်းလိမ့်မည်ဟု Progressive Voice ၏ တည်ထောင်သူနှင့် အကြံပေးဘုတ်အဖွဲ့ ဥက္ကဋ္ဌ ဒေါ်ခင်ဥမ္မာက ပြောသည်။  ဒေါ်ခင်ဥမ္မာက “စစ်အုပ်စုရဲ့ အဓိကဗျူဟာက သူတို့ပြုလုပ်မယ့် အတုအယောင် ရွေးကောက်ပွဲကနေ အရပ်သား အစိုးရ ဟန်ပြတစ်ခုကို ဖန်တီးပြီး အဲ့ဒီကနေတစ်ဆင့် နိုင်ငံတကာအသိအမှတ်ပြုမှုရဖို့ ကြိုးစားမှာပဲ” ဟု ပြောသည်။  ဤသည်မှာ နိုင်ငံတကာအသိအမှတ်ပြုမှုကို ပြန်လည်ရယူရန် ယခင်က အသုံးပြုခဲ့သော နည်းလမ်းဟောင်းကို ပြန်လည်အသုံးချရန် ရည်ရွယ်ခြင်းဖြစ်ကြောင်း (ND-Burma) ပြောရေးဆိုခွင့်ရှိသူ ဆန်ထွယ်က ပြောသည်။  “ကျမတို့ ၂၀၁၁ မှာလည်း အတွေ့အကြုံ ရှိပြီးလေနော်။ ဒီ constitution ကို သူတို့ referendum လုပ်တုန်းက လည်း ၂၀၀၈ ပေါ့နော်။ နာဂစ်မုန်တိုင်း ဝင်တဲ့အချိန်မှာ သူတို့ constitution referendum လုပ်ပြီးမှ၊ ဟုတ်ပါ တယ် ဒီ constitution က ပြည်သူတွေ အကုန်ထောက်ခံပါတယ် ဆိုတဲ့ဟာမျိုးကို သူတို့လုပ်ခဲ့တဲ့ အတွေ့အကြုံ လည်း ရှိတယ်။ ဒါကထပ်ပြီးမှ လုပ်မယ့် သူတို့ရဲ့ အစီအစဉ် ဖြစ်တယ်။"  ထို့အပြင် စစ်ကော်မရှင်က ၎င်းတို့သည် လက်ရှိနိုင်ငံတော်၏ အချုပ်အခြာအာဏာနှင့် အုပ်ချုပ်ရေးယန္တရားကို အမှန်တကယ် ထိန်းချုပ်ထားသူများ ဖြစ်သည်ဟု နိုင်ငံတကာသို့ တင်ပြကာ ၎င်းတို့၏ တရားဝင်မှုကို တည်ဆောက်ရန် ကြိုးပမ်းလျက်ရှိသည်။   ၎င်းတို့သည် ဒေါ်အောင်ဆန်း စုကြည် လက်ထက်က ခန့်အပ်ထားသော ကုလသမဂ္ဂ သံအမတ် ဦးကျော်မိုးထွန်းကို ဖယ်ရှားပြီး ၎င်းတို့ဘက်မှ ကိုယ်စားလှယ်တစ်ဦးကို ခန့်အပ်ရန် တရားဝင် ယုံကြည်လွှာ (Credential Letters) တင်သွင်းရန် ဆက်လက် ကြိုးပမ်းနေပါသည်။  ပြည်သူ့အချုပ်အခြာအာဏာ၏ သင်္ကေတ၊ သံအမတ် ဦးကျော်မိုးထွန်း  ၂၀၂၁ ခုနှစ် စစ်အာဏာမသိမ်းမီက မြန်မာနိုင်ငံ၏ ကုလသမဂ္ဂဆိုင်ရာ အမြဲတမ်း ကိုယ်စားလှယ် အဖြစ် သံအမတ်ကြီး ဦးကျော်မိုးထွန်းက တာဝန်ထမ်းဆောင်လျက်ရှိသည်။   အာဏာသိမ်းမှု ဖြစ်ပွားပြီး မကြာမီတွင် ၎င်းသည် ကုလသမဂ္ဂ အထွေထွေ ညီလာခံ၌ စစ်ကော်မရှင်ကို ဆန့်ကျင် ကြောင်း လက်သုံးချောင်း ထောင်၍ လူသိရှင်ကြား ကြေညာခဲ့သည့်အပြင် တရားဝင် ရွေးကောက်ခံ ထားရသည့် အမျိုးသား ညီညွတ်ရေး အစိုးရ (NUG) ကိုသာ ကိုယ်စားပြုကြောင်း ပြောကြားခဲ့သည်။  စစ်တပ်၏ တရားမဝင် စစ်အာဏာသိမ်းမှုနှင့် လူ့အခွင့်အရေး ချိုးဖောက်မှုများကြောင့် ကုလသမဂ္ဂ၏ ကိုယ်စားလှယ်များ အထောက်အထား စာတမ်း စစ်ဆေးရေး ကော်မတီ (Credential Committee) က စစ်ကော်မရှင်၏ ကိုယ်စားလှယ်ကို အသိအမှတ်မပြုဘဲ သံအမတ်ကြီး ဦးကျော်မိုးထွန်းအား မြန်မာပြည်သူများ ၏ ကိုယ်စားပြုခွင့် ဆက်လက်ပေးထားခဲ့သည်။  ဦးကျော်မိုးထွန်းသည် နိုင်ငံတကာမှ လစ်လျူရှု မထားစေရန် မြန်မာ့အရေးကို တင်ပြခြင်း၊ စစ်ကော်မရှင်၏ ရက်စက် ကြမ်းကြုတ်သော စစ်ရာဇဝတ်မှုများကို အခိုင်အမာ ဖော်ထုတ်ခြင်း၊ အမျိုးသား ညီညွတ်ရေ းအစိုးရ (NUG) အတွက် နိုင်ငံတကာ သံတမန်ရေး ကွန်ရက်များ ဖော်ဆောင်ပေးခြင်းနှင့် စစ်ကော်မရှင်၏ တရားဝင်မှုကို ဟန့်တားခြင်း စသည့် အရေးပါသော လုပ်ငန်းများကို ဆောင်ရွက်နိုင်ခဲ့သည်ဟု နိုင်ငံရေး လေ့လာစောင့်ကြည့်သူ များက ဆိုသည်။  ထို့ကြောင့် ဦးကျော်မိုးထွန်း၏ ရပ်တည်ချက်သည် မြန်မာပြည်သူများ အတွက် အလွန်အရေးပါကြောင်း လူ့အခွင့် အရေး မှတ်တမ်းကွန်ရက် (မြန်မာနိုင်ငံ) (ND-Burma) မှ ပြောရေးဆိုခွင့်ရှိသူ ဆန်ထွယ် က အလေးထား ပြောကြားခဲ့သည်။   “ကျမတို့ရဲ့ အသံ၊ ကျမတို့ရဲ့ ဒီတော်လှန်ရေး အဖွဲ့အစည်းတွေအတွက် သူက ရပ်တည်တဲ့လူ ဖြစ်တဲ့ အတွက် ကြောင့်မို့လို့ သူဆက်ရှိသင့်တယ်” ဟု သူက ဆိုသည်။  အလားတူ Progressive Voice ၏ တည်ထောင်သူနှင့် အကြံပေးဘုတ်အဖွဲ့ ဥက္ကဋ္ဌ ဒေါ်ခင်ဥမ္မာကလည်း ဦးကျော်မိုးထွန်း၏ အခန်းကဏ္ဍသည် ပြည်သူ့ အချုပ်အခြာ အာဏာ၏ သင်္ကေတ တစ်ခုဖြစ်ကြောင်း ပြောသည်။   “တိုင်းပြည်ကို ကိုယ်စားပြုခွင့်ဆိုတဲ့ ခုံမှာ ဦးကျော်မိုးထွန်းက ပြည်သူကို ကိုယ်စားပြု၊ တိုင်းပြည်ကို ကိုယ် စားပြု ထိုင်ခွင့်ရနေခြင်းက ကျမတို့ ပြည်သူတွေရဲ့ တိုင်းပြည်ရဲ့ အချုပ်အခြာ အာဏာဟာ ပြည်သူ့လက်ထဲမှာ ရှိနေတယ်ဆိုတဲ့ ဥစ္စာကို ကျမတို့က ဒါလုံးဝ ခိုင်ခိုင်မာမာ ယုံကြည်ခွင့်ရမယ်” ဟု ရှင်းပြခဲ့သည်။  စစ်ကော်မရှင်က သံအမတ်ဦးကျော်မိုးထွန်းအား ‘တရားမဝင် အဖွဲ့အစည်း၏ ကိုယ်စားလှယ်’ အဖြစ် သတ်မှတ် ကာ ဖယ်ရှားရန် ကြိုးပမ်းနေသည်။   ကုလသမဂ္ဂတွင် တရားဝင် ကိုယ်စားလှယ်နေရာ ရရှိခြင်း မရှိသေးသောကြောင့် စစ်ကော်မရှင် အနေဖြင့် နိုင်ငံ တကာ အသိုင်းအဝိုင်းနှင့် တိုက်ရိုက် ထိတွေ့ဆက်ဆံရန်နှင့် နိုင်ငံတကာ အကူအညီများ ရယူရန် အခက်အခဲများ စွာ ရင်ဆိုင်နေရသည်ဟု နိုင်ငံတကာရေးရာ လေ့လာသုံးသပ်သူများက မှတ်ချက်ပြုကြသည်။   အမေရိကန်၊ ဥရောပသမဂ္ဂ စသည့် နိုင်ငံတကာ အဖွဲ့အစည်းများကလည်း စစ်အုပ်စု၏ ရွေးကောက်ပွဲ အပေါ် တရားဝင် စောင့်ကြည့်သူများ စေလွှတ်ခြင်း မပြုလုပ်တော့ကြောင်း ထုတ်ပြန် ကြေညာထားပြီး၊ ရွေးကောက်ပွဲကို လက်ခံမည် မဟုတ်ကြောင်း ၎င်းတို့၏ သဘောထားကို ထုတ်ဖော်ထားသည်။  CC ဆုံးဖြတ်ချက် - ရုရှား/တရုတ်၏ ဩဇာနှင့် နိုင်ငံရေးအပေးအယူများ  သံအမတ် နေရာကို အဆုံးအဖြတ် ပေးနိုင်မည့် ကုလသမဂ္ဂ အထွေထွေ ညီလာခံ၏ ကိုယ်စားလှယ်များ အထောက်အထား စာတမ်း စစ်ဆေးရေး ကော်မတီ (Credential Committee) အဖွဲ့ဝင် (၉) နိုင်ငံပါဝင်သည်။  အဆိုပါ (၉) နိုင်ငံအတွင်း၌ စစ်ကော်မရှင်နှင့် နီးကပ်သော ဆက်ဆံရေးရှိပြီး ရွေးကောက်ပွဲကို ထောက်ခံသည့် ရုရှားနှင့် တရုတ် နိုင်ငံတို့လည်း ပါဝင်နေသည်။   ရုရှားနှင့် တရုတ်သည် ကော်မတီ၏ ဆုံးဖြတ်ချက်ကို တိုက်ရိုက် ပြောင်းလဲနိုင်ခြင်း မရှိသော်လည်း၊ ၎င်းတို့၏ နိုင်ငံရေး ဩဇာကို အသုံးပြု၍ သံအမတ်နေရာအတွက် ဆုံးဖြတ်ချက်ကို နှောင့်နှေးသွားအောင် လုပ်ဆောင်နိုင် စွမ်းရှိသည်။  ထိုမျှသာမက အခြားသော ကော်မတီ အဖွဲ့ဝင်များ အပေါ်လည်း လွှမ်းမိုးနိုင်ခြေရှိသည်ဟု ဒေါ်ခင်ဥမ္မာက သုံးသပ်သည်။  “ဒီ ကိုးနိုင်ငံထဲမှာ တရုတ်လည်း ပါတယ်။ ရုရှားလည်း ပါတယ်လေနော်။ အဲ့တော့ ဦးကျော်မိုးထွန်း ဆက်ပြီး တော့မှ တိုင်းပြည် ကိုယ်စားပြုခွင့် ရှိနေတဲ့ နေရာကိုတော့ စစ်အုပ်စု က လွှတ်လာမယ့်သူကို သူတို့နေရာ ပေးနိုင်ဖို့အတွက်ကို နေရာရနိုင်ဖို့အတွက်ကိုတော့ သူတို့ကြိုးစားမှာပဲလေ။”  Credential Committee (CC) အဖွဲ့ဝင်နိုင်ငံများ အနေဖြင့် ယခု ၂၀၂၅ ခုနှစ် နိုဝင်ဘာ/ဒီဇင်ဘာလများတွင် သက်တမ်းကုန်ဆုံးမည့် မြန်မာနိုင်ငံဆိုင်ရာ သံအမတ်နေရာအတွက် စိစစ် အတည်ပြုရန် ဆုံးဖြတ်ချက် ချမှတ် မည် ဖြစ်သည်။  ထို့ကြောင့် ယခုနှစ်အတွက်လည်း (Credential Committee) အဖွဲ့ဝင် နိုင်ငံများ၏ ဆုံးဖြတ်ချက်ပေါ် ဂရုစိုက် စောင့်ကြည့်သွားရမည်ဟု ဦးကျော်မိုးထွန်းက စက်တင်ဘာ ၂၄ ရက်နေ့တွင် PPTV နှင့် ပြုလုပ်သော အင်တာဗျူး ကဏ္ဍတွင် ပြောကြားခဲ့သည်။  “အရင်နှစ်တွေက (Credential Committee) ဆုံးဖြတ်ချက်ကို ကြည့်ရင် ဒီဆုံးဖြတ်ချက်တွေက အချိန်မရွေး ပြန်ဆွေးနွေးလို့ ရတယ်ဆိုတဲ့ ပုံစံမျိုးလေးကို ဖော်ပြထားတဲ့ အတွက်ကြောင့်လည်းပေါ့နော် ကျနော်တို့တွေ အနေနဲ့တော့ ဒါအမြဲတမ်း ဂရုစိုက်ပြီးတော့ စောင့်ကြည့်သွားဖို့တော့ လိုပါတယ်။”  လာမည့် ကုလသမဂ္ဂဆိုင်ရာ မြန်မာနိုင်ငံရ၏ အမြဲတမ်း ကိုယ်စားလှယ်နေရာ အတွက် ဆုံးဖြတ်ချက်ချရာတွင် အဓိကကျသော အခန်းကဏ္ဍတွင် ပါဝင်မည့်နိုင်ငံ (၉) နိုင်ငံမှာ ဘဟားမားစ် (Bahamas)၊ ချီလီ (Chile)၊ တရုတ် (China)၊ နမီးဘီးယား (Namibia)၊ ပါလောင်း (Palau) ၊ ရုရှား (Russian Federation)၊ ဆီယာရာလီယွန် (Sierra Leone) ၊ ဆွီဒင် (Sweden)၊ အမေရိကန်ပြည်ထောင်စု (United States of America) တို့ဖြစ်ကြသည်။  စစ်ကော်မရှင် ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် ကော်မတီအဖွဲ့ဝင် နိုင်ငံတွင် ပါဝင်သော နှစ်နိုင်ငံ ဖြစ်သည့် ရုရှားနှင့် တရုတ်နိုင်ငံသို့ သွားရောက်ကာ ကောင်းမွန်သော မဟာမိတ်ဆက်ဆံရေးကို တည်ဆောက်ထားသည်။  ရွေးကောက်ပွဲ နောက်ကွယ်မှ လူ့အခွင့်အရေးနှင့် စစ်ရာဇဝတ်မှုများ  ဤအခြေအနေများကြောင့် ကုလသမဂ္ဂဆိုင်ရာ မြန်မာသံအမတ် နေရာသည် ယခင်နှစ်များထက် ပို၍ စိန်ခေါ်မှု ကြီးလာသည်။   စစ်ကော်မရှင်ဘက်မှ သံအမတ်နေရာအား ရယူသွားနိုင်ပါက “စစ်အုပ်စုကိုပဲ ကိုယ်စားပြုမယ်၊ စစ်အုပ်စုကို အကျိုးပြုမယ်၊ လူ့အခွင့်အရေး ချိုးဖောက်မှုတွေ ဖြစ်နေတာ မဟုတ်ပါဘူးဆိုပြီး ကာပြောမယ်” ဟု ဒေါ်ခင်ဥမ္မာ က ပြောသည်။  မွန်ပြည် လူ့အခွင့်အရေး ဖောင်ဒေးရှင်း (HURFOM) ဒါရိုက်တာ နိုင်အဲမွန်ကလည်း “ရွေးကောက်ပွဲအလွန်ဆိုရင် ဒီထက်ဆိုးတဲ့ လူ့အခွင့်အရေး ချိုးဖောက်မှုတွေ ဒီထက်ဆိုးရွားတဲ့ ဥပဒေတွေနဲ့ ဒီတိုင်းပြည်က ဆက်ပြီးသွားရ မယ့် ကိစ္စဖြစ်တယ်။ ဒါကြောင့်မို့လို့ ဘာပဲဖြစ်ဖြစ် ကျနော်တို့ လက်သင့်ခံလို့ ရမယ့် အခင်းအကျင်း မဟုတ်ဘူး” ဟု ပြောသည်။  အောက်တိုဘာ ၆ ရက်နေ့တွင် ပြုလုပ်သော ကုလသမဂ္ဂ အစည်းအဝေး၌ သံအမတ် ဦးကျော်မိုးထွန်းက စစ်ကော်မရှင်၏ ရွေးကောက်ပွဲသည် ပြည်သူများ၏ အသံကို ကိုယ်စားပြုမည် မဟုတ်ဘဲ စစ်တပ်အား ပြည်သူ များ အပေါ် လူမဆန်သည့် ရာဇဝတ်မှုများ ဆက်လက် ကျူးလွန်စေနိုင်မည့် လိုင်စင်ကိုသာ ပေးအပ်ရာ ရောက်မည် ဖြစ်ကြောင်း မိန့်ခွန်းတွင် ထည့်သွင်းပြောကြားခဲ့သည်။   ထို့အပြင်၊ ရွေးကောက်ပွဲကို ဆန့်ကျင်သော ပြည်သူ့ သပိတ်မှောက် လှုပ်ရှားမှုများ၊ မဲပေးမှုနှင့် ရွေးကောက်ပွဲ ယန္တရားကို နှောင့်ယှက်သည့် လုပ်ရပ်များစွာကို တော်လှန်ရေး အင်အားစုများမှ ပြုလုပ်ခဲ့ပြီး၊ ရွေးကောက်ပွဲကို တရားဝင်မှု မရှိကြောင်း ပြည်တွင်းမှပါ ဖော်ထုတ်ခဲ့ကြသည်။  စိန်ခေါ်မှုများအား တုံ့ပြန်ခြင်းနှင့် ရှေ့ဆက်ရန်  စစ်ကော်မရှင်သည် အတုအယောင် ရွေးကောက်ပွဲမှ တဆင့် နိုင်ငံတကာထံမှ တရားဝင်မှု ပြန်လည် ရရှိရန် ကြိုးပမ်းနေမှုများကို သက်ဆိုင်သည့် အဖွဲ့အစည်းများမှ ညီညွတ်စွာဖြင့် တုန့်ပြန်ရန် လိုအပ်သည်ဟု ဒေါ်ခင်ဥမ္မာက အကြံပြုထားသည်။  “NUG အပါအဝင်က နိုင်ငံတကာကို သူတို့ဆက်ပြီး တင်ပြနေမယ်။ ပြီးသွားရင် တော်လှန်ရေး အင်အားစုတွေ ကလည်း ကိုယ်လုပ်စရာ ရှိတာကို ကိုယ် ဒီထက်ပိုပြီးတော့မှ အားကောင်းစွာနဲ့ ပိုပြီးတော့မှ လုပ်နိုင်ကြမယ် ဆိုရင် ကျမထင်တယ် ဒီကိစ္စတွေက ကျမတို့ လောလောဆယ် စိတ်တော့ စိတ်ပူကြရမယ်၊ ပြင်ဆင်ကြရမယ်၊ တိုင်ပင်ကြရမယ်၊ ကာကွယ်ကြရမယ်။ ဒါပေမဲ့ ကိုယ်လုပ်နိုင်ရင် လုပ်နိုင်သလောက် ကျမတို့ ဒီစစ်အုပ်စုကို ကြောက်စရာ မလိုဘူးဆိုတာကိုတော့ ကျမ ပြောချင် တယ်။”  အမျိုးသားညီညွတ်ရေးအစိုးရ (NUG) ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က လည်း အောက်တိုဘာ ၁ ရက်နေ့တွင် ပြုလုပ်သော နိုင်ငံတကာနှင့် ပြည်သူလူထုများအား သတင်းစကား ပြောကြားခြင်း အစီအစဉ် တွင် ပြည်သူများ၏ အသံကို ဆက်လက်ဖော်ထုတ်ခွင့်အတွက် သံအမတ်ကြီး ဦးကျော်မိုးထွန်းကို ဆက်လက်ရပ်တည်ခွင့်ပေးရန် (Credential Committee) အဖွဲ့ဝင်နိုင်ငံများကို ထည့်သွင်း တောင်းဆိုထားသည်။  ဦးနေဘုန်းလတ်က “ကုလသမဂ္ဂလို နေရာမှာ လူထုထောက်ခံတဲ့ သံအမတ်ကြီး ဦးကျော်မိုးထွန်း မြန်မာနိုင်ငံကို ကိုယ်စားပြု ရှိနေခြင်းဟာ မြန်မာနိုင်ငံနဲ့ မြန်မာ ပြည်သူလူထုအတွက် အလွန် အရေးကြီးလှပါတယ်။ သံအမတ် ကြီး ဦးကျော်မိုးထွန်းရဲ့ ကိုယ်စားပြုခွင့်ကို ဆက်လက် ထောက်ခံပေးကြဖို့လည်း Credential Committee ဝင်နိုင်ငံများကို မေတ္တာရပ်ခံ တိုက်တွန်းလိုပါတယ်” ဟု ပြောသည်။  စစ်ကော်မရှင်သည် ယခုနှစ်ကုန်တွင် ကျင်းပမည်ဟုကြွေးကြော်ထားသော ရွေးကောက်ပွဲမှတဆင့် ကုလသမဂ္ဂမှ တဆင့် နိုင်ငံတကာတွင် တရားဝင်မှုကို ပြန်လည်ရယူရန် ကြိုးပမ်းနေသည်။   ထိုကြိုးပမ်းမှုများသည် နိုင်ငံရေး ထွက်ပေါက် တစ်ခုတည်း မဟုတ်ဘဲ ကျူးလွန်ခဲ့သော စစ်ရာဇဝတ်မှုများနှင့် လူသားမျိုးနွယ် အပေါ် ကျူးလွန်သော ရာဇဝတ်မှုများအတွက် နိုင်ငံတကာ တရားရုံးများတွင် တရားစွဲဆို ခံရခြင်းမှ ကာကွယ်ရန်အပြင် စစ်အာဏာရှင် စနစ်ကိုပါ ထပ်မံ ထိန်းချုပ်သွားနိုင်ရန် ရည်ရွယ်သည်ဟု ကျွမ်းကျင် သူများမှ သုံးသပ်ကြသည်။   ယင်းအခြေအနေများအရ ၂၀၂၆ ခုနှစ် ဇန်နဝါရီလတွင် မြန်မာနိုင်ငံ၏ ကုလသမဂ္ဂ ကိုယ်စားလှယ် နေရာသည် ယခင်နှစ်များကထက် နိုင်ငံရေးအရ ပိုမိုပြင်းထန်သော စိန်ခေါ်မှုကို ရင်ဆိုင်ရဖွယ်ရှိကြောင်း နိုင်ငံတကာရေးရာ လေ့လာသူများက သုံးသပ်ထားကြသည်။

စစ်ကော်မရှင်၏ ရွေးကောက်ပွဲ ဗျူဟာနှင့် ကုလသမဂ္ဂ သံအမတ် ရာထူးတိုက်ပွဲ  

Oct 27

ထိုင်းရောက် မြန်မာများ ၉၀ ရက်တာ ဝတ်စားဆင်ယင်မှု အထူးသတိပြုရန် သတိပေးချက်   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ ထိုင်းနိုင်ငံတွင် နေထိုင် အလုပ်လုပ်ကိုင်နေကြသည့် မြန်မာ ရွှေ့ပြောင်းလုပ်သားများ အနေဖြင့် ဝတ်စား ဆင်ယင်မှုကို အထူးသတိပြုရန် သတိပေးချက် ထုတ်ပြန်ထားသည်။ ထိုင်းဘုရင်မင်းမြတ်ကြီး၏ မယ်တော်ကြီးဖြစ်သူ၊ မိဖုရားကြီး သီရိခေတ်သည် အောက်တိုဘာလ ၂၄ ရက်နေ့၊ ညပိုင်းက နတ်ရွာစံ ကံတော်ကုန်ခဲ့ပြီ ဖြစ်ကြောင်း တော်ဝင်အိမ်တော်ရုံးဗျူရိုက ထုတ်ပြန်ကြေညာခဲ့သည်။ အဆိုပါ အဖြစ်အပျက်ကြောင့် ထိုင်းအစိုးရအဖွဲ့သည် ဝမ်းနည်းခြင်း အထိမ်းအမှတ် အစီအစဉ်များကို ကြေညာ ခဲ့သည်။ အစိုးရရုံးများတွင် ရက် ၃၀ တိတိ နိုင်ငံတော်အလံကို တစ်ဝက်တိုင် လျှော့ချလွှင့်တင်မည်ဖြစ်ပြီး၊ အစိုးရ ဝန်ထမ်းနှင့် အရာရှိများသည် တစ်နှစ်တာလုံး ဝမ်းနည်းခြင်း အထိမ်းအမှတ် ဝတ်စုံ ဝတ်ဆင်ရမည် ဖြစ်သည်။ ထိုင်းအစိုးရက ပြည်သူအားလုံးကို ယနေ့မှစ၍ ရက် ၉၀ အတွင်း အနက်ရောင် သို့မဟုတ် အရောင်ဖျော့ ဝတ်ဆင်ရန် မေတ္တာရပ်ခံထားသည်။ ထို့အပြင် ဖျော်ဖြေရေးနေရာများဖြစ်သည့် ကာလာအိုကေဆိုင်၊ အရက်ဘီယာဆိုင်နှင့် ပွဲလမ်းသဘင် စသည့် ဖျော်ဖြေရေးလုပ်ငန်းများကိုလည်း ရက် ၃၀ အတွင်း အခြေအနေအရ ရပ်ဆိုင်းရန် သို့မဟုတ် လျှော့ချရန် မေတ္တာရပ်ခံထားသည်။ ထို့ကြောင့် ထိုင်းနိုင်ငံတွင် နေထိုင်အလုပ်လုပ်ကိုင်နေကြသည့် မြန်မာပြည်သူများအနေဖြင့် ရက် ၉၀ တိတိ ဝတ်စားဆင်ယင်မှုကို အထူးဂရုပြုကာ၊ ဒေသဓလေ့ထုံးတမ်းနှင့် အစိုးရ၏ မေတ္တာရပ်ခံချက်များကို လိုက်နာ ဆောင်ရွက်ကြရန် လိုအပ်ပါသည်။

ထိုင်းရောက် မြန်မာများ ၉၀ ရက်တာ ဝတ်စားဆင်ယင်မှု အထူးသတိပြုရန် သတိပေးချက်  

Oct 27

စစ်အုပ်စု၏ ရွေးကောက်ပွဲကို ပြတ်သားစွာ ငြင်းပယ်ရန် JFM က အာဆီယံသို့ တောင်းဆို   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ အောက်တိုဘာ ၂၆ ရက်နေ့ မှ ၂၈ ရက်နေ့အထိ မလေးရှားနိုင်ငံ၊ ကွာလာလမ်ပူတွင် ကျင်းပမည့် ၄၇ ကြိမ်မြောက် အာဆီယံ ထိပ်သီးအစည်းအဝေး မတိုင်မီ Justice For Myanmar (JFM) အဖွဲ့ကြီးက အာဆီယံသို့ အရေးပေါ် တောင်းဆိုမှုတစ်ခု ပြုလုပ်ခဲ့သည်။ JFM သည် မြန်မာစစ်အုပ်စု၏ တရားမဝင် ရွေးကောက်ပွဲကို ပြတ်ပြတ်သားသား ငြင်းပယ်ရန် နှင့် စစ်အုပ်စု၏ နိုင်ငံတကာရာဇဝတ်မှုများတွင် အာဆီယံ၏ ကြံရာပါပတ်သက်နေမှုကို အဆုံးသတ်ရန် အောက်တိုဘာလ ၂၃ ရက်နေ့တွင် ထုတ်ပြန်တိုက်တွန်းခဲ့ခြင်း ဖြစ်သည်။ JFM ၏ ထောက်ပြချက်အရ အာဆီယံအဖွဲ့ဝင် နိုင်ငံများတွင် အခြေစိုက်သော ကုမ္ပဏီ ၅၄ ခု ၏ စီးပွားရေး ဆက်နွှယ်မှုများသည် စစ်အုပ်စု၏ အကြမ်းဖက်စစ်ဆင်ရေးကို အသက်ဆက်ပေးနေသည်ဟု ဆိုသည်။ Justice For Myanmar ၏ ပြောရေးဆိုခွင့်ရှိသူ မရတနာမောင်က စစ်အုပ်စု၏ အမည်ခံရွေးကောက်ပွဲသည် ဒီမိုကရေစီလမ်းကြောင်းမဟုတ်ဘဲ 'အကြမ်းဖက်အုပ်ချုပ်မှုကို တရားဝင်မှုပေးရန် လှည့်ကွက်' သာဖြစ်သည်ဟု ဝေဖန်ပြောဆိုခဲ့သည်။ ထို့အပြင် စစ်အုပ်စုသည် ဒဏ်ခတ်ပိတ်ဆို့မှုများကို ရှောင်ရှားရန် "နစက" မှ "နလအက" အဖြစ် အမည် ပြောင်းလဲ ခဲ့ခြင်းသည်လည်း ပရိယာယ်သက်သက်ဖြစ်ကြောင်း JFM က အာဆီယံကို သတိပေးခဲ့သည်။ JFM ၏ အဓိကတောင်းဆိုချက် သုံးချက်မှာ စစ်အုပ်စု၏ ရွေးကောက်ပွဲကို ငြင်းဆန်ရန်၊ အာဆီယံ အဖွဲ့အစည်းများတွင် စစ်အုပ်စု၏ ကိုယ်စားလှယ်များကို ပိတ်ပင်ရန်နှင့် စစ်အုပ်စုထံ ငွေကြေး၊ လေယာဉ်ဆီ စီးဝင်မှုလမ်းကြောင်းများ ဖြတ်တောက်ရန်တို့ဖြစ်သည်။ စစ်အုပ်စု၏ ရာဇဝတ်မှုများမှ မြန်မာပြည်သူများကို သာမက ဒေသတွင်းကိုပါ ကာကွယ်ရန် အာဆီယံတွင် တာဝန်ရှိကြောင်း JFM က တိုက်တွန်းထားသည်။

စစ်အုပ်စု၏ ရွေးကောက်ပွဲကို ပြတ်သားစွာ ငြင်းပယ်ရန် JFM က အာဆီယံသို့ တောင်းဆို  

Oct 27

တိုက်ပွဲပြင်းထန်ရာ ဒေသများတွင် Spy Balloon များဖြင့် ထောက်လှမ်းနေဟု MDSI သတိပေး   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ မြန်မာနိုင်ငံ၏ စစ်ရေးပဋိပက္ခ ပြင်းထန်ရာဒေသများတွင် သူလျှိုပူပေါင်း (Spy Balloon) များ အသုံးပြု၍ ထောက်လှမ်းနေသည်ကို မြန်မာ့စစ်ဘက်ရေးရာနှင့် လုံခြုံရေးဆိုင်ရာ လေ့လာရေးအဖွဲ့ (MDSI) က အောက်တိုဘာလ ၂၅ ရက်နေ့တွင် သတိပေး ထုတ်ပြန်လိုက်သည်။ အဆိုပါ ပူပေါင်းများကို ၂၀၂၂ ခုနှစ်ကတည်းက စတင်တွေ့ရှိခဲ့ပြီး၊ လက်ရှိတွင် နယ်စပ်ဒေသများနှင့် ကရင်နီ၊ ကချင်၊ ရှမ်း၊ ကရင်နှင့် ရခိုင်ပြည် စသည့် တိုက်ပွဲပြင်းထန်ရာ ဒေသများတွင် ပေ ၆၀,၀၀၀ အထက် အမြင့်မှ ပျံသန်းနေသည်ကို သတိပြုရမည်ဟု ဆိုသည်။ ပူပေါင်းများ၏ အန္တရာယ်မှာ GPS အချက်ပြမှုများ၊ စစ်လက်နက်ပစ္စည်းများ၏ သတင်းအချက်အလက် အားလုံး ကို ခိုးယူနိုင်ခြင်း၊ Drone များနှင့် Wi-Fi ဆက်သွယ်မှုများကို ချိတ်ဆက်ကာ လေထဲမှ ထောက်လှမ်းခြင်း (Air Threat) တို့ကို လုပ်ဆောင်နိုင်ခြင်း ဖြစ်သည်။ ထို့ကြောင့် MDSI က ပြည်သူများကို အချက် သုံးချက် အလေးထား ဆောင်ရွက်ရန် တိုက်တွန်းထားသည်။ နံပါတ် တစ် အနေဖြင့် စောင့်ကြည့် သတင်းပို့ရန်၊ သံသယဖြစ်ဖွယ် အရာဝတ္ထုတွေ့ရှိပါက သတင်းပေးပို့ရန် ဖြစ်သည်။ နံပါတ် နှစ် အချက်မှာ ဖုံးကွယ် ကာကွယ်ရန်၊ စစ်စခန်းများနှင့် အရေးကြီးနေရာများကို အနီအောက်ရောင်ခြည် ခံနိုင်ရည်ရှိသည့် ပစ္စည်းများဖြင့် ဖုံးကွယ်ရန် တိုက်တွန်းထားသည်။ အချက် သုံးမှာ တန်ပြန်ဆောင်ရွက်ရန်၊ လိုအပ်ပါက ပစ်ခတ်ဖျက်ဆီးခြင်း (သို့မဟုတ်) လှိုင်းဖြတ်တောက်ခြင်း (Electronic Countermeasure) ဖြင့် တားဆီးကာကွယ်ရန်တို့ ဖြစ်ကြသည်။ နယ်မြေထောက်လှမ်းရေး Spy Balloon များ၏ အန္တရာယ်ကို သတိပြုပြီး မိမိတို့၏ လုံခြုံရေးအတွက် သက်ဆိုင် ရာ ကာကွယ်ရေးအဖွဲ့အစည်းများ၏ ညွှန်ကြားချက်ကို လိုက်နာကြဖို့ MDSI က တိုက်တွန်းထားသည်။

တိုက်ပွဲပြင်းထန်ရာ ဒေသများတွင် Spy Balloon များဖြင့် ထောက်လှမ်းနေဟု MDSI သတိပေး 

Oct 27

ကရင်ဆရာ၊ ဆရာမ ၁ သောင်းကျော်အတွက် ထောက်ပံ့ကြေး ၄၁% လိုအပ်နေ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ ကော်သူးလေဒေသ၊ ကရင်ပြည်အတွင်းရှိ ကျောင်းဆရာ၊ ဆရာမများ ပညာရေးလုပ်ငန်းများ ဆက်လက် လုပ်ကိုင်နိုင်ရန်အတွက် နှစ်စဉ်ထောက်ပံ့ကြေး ရန်ပုံငွေ အရေးပေါ် လိုအပ်နေကြောင်း ကရင်ပညာရေးနှင့် ယဉ်ကျေးမှုဌာန (KECD) နှင့် ကရင်ဆရာ၊ ဆရာမများအသင်း (KTWG) တို့က ပူးတွဲတောင်းဆိုလိုက်သည်။ ၂၀၂၅-၂၀၂၆ ပညာသင်နှစ်အတွက် ဆရာ၊ ဆရာမ ၁၀,၈၈၀ ဦးအတွက် တစ်ဦးလျှင် ထိုင်းဘတ်ငွေ ၁၂,၀၀၀ ဘတ်နှုန်း ပံ့ပိုးရန် ရည်ရွယ်ထားသော်လည်း၊ လက်ရှိတွင် ရန်ပုံငွေ ၅၉% သာ ရရှိထားပြီး ၄၁% ကို အရေးပေါ် ဖြည့်ဆည်းရန် လိုအပ်နေကြောင်း KTWG က အောက်တိုဘာလ ၂၀ ရက်နေ့ ထုတ်ပြန်ချက်တွင် ဖော်ပြသည်။ ရန်ပုံငွေ မလုံလောက်မှုသည် စီးပွားရေး မတည်ငြိမ်မှုနှင့် ကုန်ဈေးနှုန်း မြင့်တက်မှုတို့ကြောင့် ဆရာ၊ ဆရာမများ ၏ မိသားစုဝန်ထုပ်ဝန်ပိုးကို ပိုမိုကြီးလေးစေသည်ဟု KTWG က ထောက်ပြသည်။ ကျောင်းအုပ်ဆရာ စောဆဲဝါး၏ ပြောကြားချက်အရ ဒရုန်းပျံသန်းမှုနှင့် လေကြောင်းတိုက်ခိုက်မှုများကြောင့် ကြောက်ရွံ့စိတ်ဖြင့် တောထဲတွင် သင်ကြားနေရခြင်း၊ ခိုလှုံရန် မြေကျင်းများ တူးရခြင်း စသည့် အခက်အခဲများ ကြုံတွေ့နေရကြောင်း သိရသည်။ သို့သော် နှစ်စဉ်ထောက်ပံ့ကြေးသည် အခြေခံလိုအပ်ချက်များကို ဖြည့်ဆည်းပေးနိုင်၍ စာသင်ကြားရေးအပေါ် စိတ်အားထက်သန်မှုကို တိုးမြှင့်ပေးကြောင်း ၎င်းက ပြောကြားခဲ့သည်။ ဆရာ၊ ဆရာမ တစ်ဦးချင်းစီအတွက် ပံ့ပိုးကူညီနိုင်ပြီး စိတ်ဖိစီးမှုမရှိဘဲ ပညာရေးကို ဆက်လက် လုပ်ဆောင်နိုင် ရန် အတွက် အရေးပေါ် လိုအပ်နေသည့် ရန်ပုံငွေကို ဝိုင်းဝန်းကူညီပေးကြဖို့ KECD နှင့် KTWG တို့က အလေးအနက် တောင်းဆိုထားသည်။

ကရင်ဆရာ၊ ဆရာမ ၁ သောင်းကျော်အတွက် ထောက်ပံ့ကြေး ၄၁% လိုအပ်နေ

« Prev 1 2 3 4 5 … 17 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စစ်ကိုင်း လဝကရုံး ဗုံးပေါက်ကွဲမှုတွင် ဝန်ထမ်းနှင့် အရပ်သား ၂၀ ဦးခန့် ဒဏ်ရာရ
အလုပ်ရှာဖွေရေး အေးဂျင့်အဖြစ် တရုတ်သူလျှိုများ အသွင်ယူနေကြောင်း ဗြိတိန် MI5 ထုတ်ဖော်
ထိုင်း စားသုံးသူ ကောင်စီက ငွေလိမ်ကြော်ငြာများအတွက် Facebook (Meta) ကို တရားစွဲမည်
ကမ္ဘာ့ဖလားဝင်မည့် ဘရာဇီးအသင်း လေယာဉ်အား ရေဖြန်း ကောင်းချီးပေး
ယူကရိန်းကို အဖွဲ့ဝင်အဖြစ်လက်ခံရန် EU ဆွေးနွေးမည်၊ မျက်နှာချင်းဆိုင်တွေ့ရန် ရုရှားကို ယူကရိန်း သမ္မတ စာပို့

Archives

Archives

×Close