ဟော်မုဇ်ရေလက်ကြား သင်္ဘောများ ဖြတ်သန်း

ဟော်မုဇ်ရေလက်ကြား သင်္ဘောများ ဖြတ်သန်း

သတင်းနှင့် မီဒီယာကွန်ရက်။
၂၀၂၆ ခုနှစ်၊ ဇွန်လ ၂၅ ရက်။ 

အမေရိကန်နှင့် အီရန်နိုင်ငံတို့အကြား ဖြစ်ပွားခဲ့သည့် စစ်ရေးပဋိပက္ခကြောင့် ဟော်မုဇ်ရေလက်ကြား (Strait of Hormuz) အတွင်း ပိတ်မိနေခဲ့သော ရာနှင့်ချီသည့် ကုန်တင်သင်္ဘောများကို ကုလသမဂ္ဂ (UN) ၏ အရေးပေါ်အစီအစဉ်အောက်မှ စတင်ကယ်ထုတ်ရွှေ့ပြောင်းပေးနေပြီဖြစ်ပြီး ကမ္ဘာ့ ရေနံဈေးမှာလည်း ထိုးကျသွားခဲ့သည်။ 

ကုလသမဂ္ဂ၏ နိုင်ငံတကာရေကြောင်းအဖွဲ့ချုပ် (IMO) ၏ ပြောရေးဆိုခွင့်ရှိသူတစ်ဦးက ကွေ့အတွင်း သောင်တင်ပိတ်မိနေသည့် သင်္ဘောအမှုထမ်း ၁၁,၀၀၀ ခန့်နှင့် သင်္ဘောရာပေါင်းများစွာကို ဘေးကင်းရာသို့ ရွှေ့ပြောင်းပေးမည့် အစီအစဉ်အရ သင်္ဘောအချို့သည် ဗုဒ္ဓဟူးနေ့မှစတင်ကာ ဟော်မုဇ်ရေလက်ကြားကို ဖြတ်သန်းမောင်းနှင်နေပြီဖြစ်ကြောင်း ရိုက်တာ (Reuters) သတင်းဌာနသို့ အတည်ပြုပြောကြားခဲ့သည်။

ရိုက်တာသတင်းဌာနက စောင့်ကြည့်နေသည့် သင်္ဘောသွားလာမှု ခြေရာခံအချက်အလက်များအရ ပြီးခဲ့သည့် ၁၂ နာရီအတွင်း ရေနံစိမ်းစည်ပေါင်း ၅ သန်း တင်ဆောင်ထားသည့် ဧရာမရေနံတင်သင်္ဘော ၃ စင်းသည် ရေလက်ကြားမှ ထွက်ခွာလာခဲ့ပြီးဖြစ်ကာ ၎င်းတို့အနက် ၂ စင်းမှာ အာရှဘက်သို့ ဦးတည်မောင်းနှင်နေကြောင်း သိရသည်။ 

ထို့ပြင် ယခုကယ်ဆယ်ရေးအစီအစဉ်အောက်မှ သွေ့ခြောက်ကုန်စည်တင် သင်္ဘောနှစ်စင်းနှင့် ကုန်သေတ္တာတင် သင်္ဘောတစ်စင်းတို့လည်း ဟော်မုဇ်ရေလက်ကြားကို အောင်မြင်စွာ ဖြတ်သန်းသွားခဲ့ကြပြီး ဖြစ်သည်။ 

၎င်းအပြင် နောက်ထပ် သင်္ဘောအသေးစား ၃၅ စင်းနှင့် ရေနံတင်သင်္ဘော ၅ စင်းတို့သည်လည်း ရေလက်ကြားကို ဖြတ်သန်းရန် ပြင်ဆင်လျက်ရှိသည်။

အခုရက်ပိုင်းအတွင်း ဟော်မုဇ်ရေလက်ကြားတွင် တစ်ရက်လျှင် ပျမ်းမျှ သင်္ဘော ၂၅ စင်းထက်မနည်း ပြန်လည်သွားလာနေပြီဖြစ်သည်။ 

သို့သော်လည်း၊ ၎င်းပမာဏသည် စစ်ပွဲမဖြစ်ပွားမီက တစ်ရက်လျှင် သင်္ဘောအစင်းရေ ၁၂၅ စင်းအထိ သွားလာခဲ့သည့် ပုံမှန်ပမာဏနှင့် နှိုင်းယှဉ်ပါက အလွန်နည်းပါးသည့် ပမာဏသာ ရှိပါသေးသည်။ 

တစ်ဖက်တွင်လည်း ကမ္ဘာ့ရေနံဈေးနှုန်းများသည် စစ်ပွဲမတိုင်ခင် အချိန်ကစ၍ အနိမ့်ဆုံးဈေးနှုန်းသို့ ကျဆင်းသွားခဲ့သည်။