အမေရိကန်စစ်စခန်းများအတွင်း မြေရှားသတ္တုသန့်စင်စက်ရုံများ တည်ဆောက်ခွင့်ပြု
သတင်းနှင့်မီဒီယာ ကွန်ရက်။
၂၀၂၆ ခုနှစ်၊ ဇူလိုင်လ ၈ ရက်။
ကမ္ဘာ့မြေရှားသတ္တု (Rare Earth) သန့်စင်သည့်လုပ်ငန်းများကို တရုတ်နိုင်ငံက ထိန်းချုပ်ထားမှုကို တုံ့ပြန်ရန် အမေရိကန်နှင့် မဟာမိတ်နိုင်ငံများသည် သတ္တုရိုင်းတူးဖော်ခြင်းသာမက သန့်စင်ရေးလုပ်ငန်းများကိုပါ အပြင်းအထန် လုပ်ဆောင်လျက်ရှိရာ အမေရိကန်အစိုးရက စစ်တပ်စခန်းများအတွင်း ပုဂ္ဂလိကကုမ္ပဏီများကို မြေရှားသတ္တုသန့်စင်စက်ရုံများ တည်ဆောက်ခွင့်ပြုလိုက်ပြီဖြစ်သည်။
အမေရိကန်စစ်တပ်သည် ယူတာပြည်နယ် (Utah) ရှိ စစ်လက်နက်ပစ္စည်းသိုလှောင်ရုံစခန်းအတွင်း၌ စစ်ဘက်ဆိုင်ရာတွင် မရှိမဖြစ်လိုအပ်သော ရှားပါးဒြပ်စင်နှစ်မျိုးဖြစ်သည့် ဒစ်ပရိုစီယမ် (Dysprosium) နှင့် တာဘီယမ် (Terbium) တို့ကို သန့်စင်မည့် စက်ရုံကြီးတစ်ခု တည်ဆောက်ရန် ပြင်ဆင်နေသည်။
အဆိုပါ ဓာတ်စင်နှစ်မျိုးသည် F-35 တိုက်လေယာဉ်များ၊ Patriot ဒုံးကျည်စနစ်များနှင့် ရေငုပ်သင်္ဘောများတွင် အသုံးပြုသည့် သံလိုက်များ အပူချိန်လွန်ကဲသော ပတ်ဝန်းကျင်၌ လုပ်ဆောင်နိုင်ရန် အဓိကလိုအပ်သော ကုန်ကြမ်းများဖြစ်သည်။
အမေရိကန်စစ်တပ်၏ ဥပဒေသစ်အရ ၂၀၂၇ ခုနှစ် ဇန်နဝါရီလ ၁ ရက်နေ့မှစတင်ကာ အမေရိကန် စစ်လက်နက်ပစ္စည်းများတွင် တရုတ်နိုင်ငံမှလာသော မြေရှားသတ္တုနှင့် သံလိုက်များကို လုံးဝမသုံးစွဲရန် ပိတ်ပင်ထားသည်။
သို့ဖြစ်ရာ စစ်လက်နက်ထုတ်လုပ်သည့် ကုမ္ပဏီကြီးများသည် ၎င်းတို့၏ ထုတ်ကုန်များတွင် တရုတ်ကုန်ကြမ်းမပါဝင်ကြောင်း သက်သေမပြနိုင်ပါက စစ်တပ်နှင့် စာချုပ်ချုပ်ဆိုခွင့် ဆုံးရှုံးမည်ဖြစ်သည်။
၎င်းစက်ရုံစီမံကိန်းကို ၂၀၂၇ ခုနှစ်တွင် စတင်တည်ဆောက်ပြီး ၂၀၂၈ ခုနှစ်၌ အပြည့်အဝလည်ပတ်ရန် ရည်မှန်းထားကာ၊ ကုန်ကြမ်းများကို တရုတ်နိုင်ငံအစား ကနေဒါ၊ ဂရင်းလန်း (Greenland)၊ မွန်တားနားနှင့် ဝိုင်အိုမင်း (Wyoming) ပြည်နယ်များမှ ရယူရန် ချိတ်ဆက်ထားသည်။
ထို့ပြင် အမေရိကန်စစ်တပ်သည် နောက်ထပ်စစ်စခန်း ၃ ခုတွင်လည်း အခြားအရေးကြီးတွင်းထွက်များ သန့်စင်မည့် စီမံကိန်းများ ဆက်လက်လုပ်ဆောင်သွားမည်ဟု ဆိုသည်။
