မော်လူးတိုက်ပွဲ နှစ်ပတ်ကျော်ကြာ ပြင်းထန်နေ၊ ဒရုန်းဗုံးကျ၍ အရပ်သား ၂ ဦး ဒဏ်ရာရ

သတင်းနှင့် မီဒီယာ ကွန်ရက်။
၂၀၂၆ ခုနှစ်၊ နိုဝင်ဘာလ ၁၉ ရက်။

စစ်ကိုင်း-ကချင်အစပ်၊ အင်းတော်မြို့နယ်၊ မော်လူးမြို့တွင် နိုဝင်ဘာလဆန်းပိုင်းမှ စတင်ဖြစ်ပွားနေသည့် နှစ်ဖက် တိုက်ပွဲများမှာ ၁၆ ရက်ကျော်ကြာ ပြင်းထန်နေပြီး  အရပ်သား သေဆုံးထိခိုက်မှုများ လည်း မြင့်တက်နေသည်။

မြို့တွင်းရောက်ရှိနေသည့် စစ်အုပ်စုတပ် ယာဉ်တန်းများ ဒရုန်းကြောင့် ပိုက်ကွန်ကာရံ ပုန်းအောင်းနေရသည်ဟု တော်လှန်ရေး တပ်ဖွဲ့ဝင်အချို့က ပြောသည်။

ပြီးခဲ့သည့် နိုဝင်ဘာ ၂ ရက်က မန္တလေးမှ မြစ်ကြီးနားသို့ တက်လာသည့် စစ်အုပ်စုတပ်၏ စစ်ကားအစီးရေ ၁၂၀ ပါ ယာဉ်တန်းသည် ထီးချိုင့်-ကသာလမ်းပိုင်းနှင့် အင်းတော် – မော်လူးလမ်းပိုင်းတို့တွင် တော်လှန်ရေးတပ်ဖွဲ့များ ၏ ကြားဖြတ်တိုက်ခိုက်မှုကြောင့် ကား ၁၀ စီးထက်မနည်း မီးလောင်ပျက်စီးခဲ့သည်။

အဆိုပါ ယာဉ်တန်းမှ ပြတ်ကျန်ရစ်သည့် စစ်ကားအချို့သည် နိုဝင်ဘာလ ၁၆ ရက်နေ့မှသာ မော်လူးမြို့သို့ ရောက် ရှိလာခဲ့ပြီး ဒရုန်းဗုံးကြဲခံရမည်ကို စိုးရိမ်သဖြင့် မိုးကာများအုပ်ကာ ပိုက်ကွန်များဖြင့် ကာရံရပ်နားထားကြသည်။

နယ်မြေခံ တော်လှန်ရေးတပ်ဖွဲ့ဝင်တစ်ဦးက “မော်လူးတိုက်ပွဲ့ ဖြစ်လိုက် နားလိုက်ပဲ။ စစ်အုပ်စုတပ် ပြန်ပြီးတော့ ဝင်ထိုင်ကတည်းက တိုက်ပွဲက ဆက်တိုက်ဖြစ်နေတာ။ ပြီးခဲ့တဲ့ တစ်လလောက်က နည်းနည်းငြိမ်သွားပေမဲ့ အခု နိုဝင်ဘာလဆန်းက စပြီး တိုက်ပွဲတွေ ပြန်ပြင်းထန်နေတာ ၁၆ ရက် ရှိနေပြီ၊ ပြောရမယ်ဆိုရင် နှစ်ပတ်ကျော် သွားပြီ။ ကသာလမ်းပိုင်းမှာ အတိုက်ခံရပြီး ပြတ်ကျန်ခဲ့တဲ့ စစ်ကားတွေလည်း မော်လူးထဲ ရောက်လာပြီး ဒရုန်းဗုံးထိမှာစိုးလို့ မိုးကာတွေအုပ်၊ ပိုက်ကွန်တွေ ပတ် ကာပြီး ပုန်းနေကြတယ်” ဟု ပြောသည်။

ယခုကဲ့သို့ မြို့တွင်း၌ စစ်ရေးတင်းမာနေစဉ် ယမန်နေ့ နိုဝင်ဘာလ ၁၈ ရက်နေ့၊ မွန်းလွဲ ၃ နာရီ အချိန်ခန့်ကလည်း မော်လူးမြို့၊ ပေကုန်းကျေးရွာရှိ စက်သုံးဆီလှောင်ခြံအတွင်းသို့ ဒရုန်းဗုံး ကျရောက်ပေါက်ကွဲခဲ့သဖြင့် ဆီလာဝယ်သည့် အရပ်သားနှစ်ဦး ပြင်းထန်ဒဏ်ရာ ရရှိခဲ့သည်။

ဗုံးစထိမှန်မှုကြောင့် အသက် ၂၇ နှစ်အရွယ် အမျိုးသမီးမှာ ဦးခေါင်းတွင် ဗုံးစထိမှန်ကာ အသက်အန္တရာယ် စိုးရိမ်ရသည့် အခြေအနေဖြင့် မိုးညှင်းဆေးရုံမှတစ်ဆင့် မြစ်ကြီးနားဆေးရုံသို့ လွှဲပြောင်းပို့ဆောင်ထားရပြီး အတူပါလာသည့် အမျိုးသားတစ်ဦးမှာ ပေါင်ပြဲဒဏ်ရာ ရရှိခဲ့သည်။

မော်လူးမြို့ခံတစ်ဦးက “ဆီဆိုင်မှာ ပိုက်ဆံရှင်းနေတုန်း ရုတ်တရက် ဒရုန်းဗုံး ကျလာတာပါ။ မိန်းကလေးက ခေါင်းကို တိုက်ရိုက်ထိသွားတော့ နေရာမှာတင် လဲကျသွားတယ်လို့ ပြောတာပဲ။ မိုးညှင်းဆေးရုံကို ပို့ပေမဲ့ ဒဏ်ရာပြင်းလွန်းလို့ မြစ်ကြီးနားကို ထပ်လွှဲလိုက်ရတယ်။ အသက်အန္တရာယ် စိုးရိမ်ရတဲ့သဘောပဲ” ဟု ပြောသည်။

မော်လူးမြို့အတွင်း နှစ်ဖက်တိုက်ပွဲများ ပြင်းထန်နေချိန် ဖြစ်သောကြောင့် အဆိုပါ ဒရုန်းဗုံးကို မည်သည့် အဖွဲ့အစည်းက ကြဲချခဲ့သည်ကိုမူ အတည်မပြုနိုင်သေးပေ။ နိုဝင်ဘာလ ၃ ရက်နေ့မှ စတင် ယနေ့ချိန်ထိ ဖြစ်ပွား နေသည့် မော်လူးတိုက်ပွဲကာလအတွင်း စစ်အုပ်စုတပ်၏ လေကြောင်းနှင့် ဒရုန်းတိုက်ခိုက်မှုများကြောင့် အရပ်သားပြည်သူ ၆ ဦး သေဆုံးကာ ၅ ဦးထက်မနည်း ထိခိုက်ဒဏ်ရာ ရရှိထားသည်။

စစ်ကိုင်းတိုင်း၊ အင်းတော်မြို့နယ် မြောက်ခြမ်းရှိ မော်လူးမြို့ကို တော်လှန်ရေးတပ်ဖွဲ့များက ၂၀၂၄ နှင့် ၂၀၂၅ ခုနှစ် များအတွင်း နှစ်နှစ်ကျော်ကြာ ထိန်းချုပ်ထားနိုင်ခဲ့သော်လည်း ယခုနှစ် ဧပြီလကုန်ပိုင်းတွင် စစ်အုပ်စုတပ်က စစ်ကြောင်းထိုးကာ အင်းတော် – မော်လူး ကားလမ်းတစ်လျှောက်ကို ပြန်လည်ထိန်းချုပ်ခဲ့သည်။

ထို့ပြင် ပြီးခဲ့သည့် အောက်တိုဘာလအတွင်းကလည်း အင်းတော်မြို့ တောင်ဘက်ခြမ်းရှိ သံဘို၊ မဲဇာ၊ နန့်သဲ၊ ပိန်းအင်း၊ မအူကုန်း၊ ဂျုံးဂျုံးဂျနှင့် လယ်ပြင် စသည့်ကျေးရွာများသို့ စစ်အုပ်စုတပ် စစ်ကြောင်းထိုးမှုကြောင့် တစ်လနီးပါးကြာ တိုက်ပွဲများ ဖြစ်ပွားခဲ့သေးသည်။

ပုံစာ – ၂၀၂၅ ခုနှစ်၊ ဧပြီလက အင်းတော်မြို့ရှိ စစ်အုပ်စုတပ်စခန်းအား တော်လှန်ရေးတပ်ဖွဲ့များ သိမ်းပိုက်ပြီး နောက် မြင်ကွင်း။ – ပုံဟောင်း / (ဓာတ်ပုံ – Original uploader)