NMG Doh – Page 42 – Network Media Group

NMG Doh

Author: NMG Doh

May 5

မော်လူးမြို့ကို တော်လှန်ရေးတပ်များ လက်လွှတ်ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၅ ရက်။ စစ်ကိုင်းတိုင်းဒေသကြီး၊ အင်းတော်မြို့နယ်ရှိ တော်လှန်ရေးအင်အားစုများ ၂ နှစ်နီးပါးကြာ စိုးမိုးထားခဲ့သည့် မော်လူးမြို့ကို ယနေ့ မေလ ၅ ရက်နေ့ နံနက်ပိုင်းတွင် စစ်တပ် စစ်ကြောင်းများက ပြန်လည်ဝင်ရောက်စီးနင်းကာ ထိန်းချုပ်လိုက်ပြီဖြစ်ကြောင်း စစ်ရေးသတင်းရင်းမြစ်များက ပြောသည်။ ပြီးခဲ့သည့် ဧပြီလ ၃၀ ရက်နေ့က အင်းတော်မြို့ကို ပြန်လည်ထိန်းချုပ်ခဲ့သည့် စစ်တပ် စစ်ကြောင်းသည် မေလ ၂ ရက်နေ့မှ စတင်ကာ မော်လူးမြို့သို့ ဦးတည်ထွက်ခွာလာခဲ့ခြင်း ဖြစ်ပြီး ၃ ရက်အကြာတွင် မြို့တွင်းသို့ ဝင်ရောက် သွားခြင်းဖြစ်သည်။ စစ်ရေးသတင်းရင်းမြစ်တစ်ဦးက မော်လူးမြို့၏ အခြေအနေနှင့် ပတ်သက်၍ “မော်လူးပါတာတော့ သေချာသွား ပြီ။ ဘယ်လိုလဲဆိုတာတော့ အသေးစိတ်မသိသေးဘူး။ သေချာသွားပြီဝင်သွားတာ။ မနေ့ကဝင်တာတော့ မဟုတ် ဘူး။ ဒီနေ့မနက်ပိုင်းမှ ရောက်သွားတာဟုတ်တယ်” ဟု အတည်ပြုပြောသည်။    မြစ်ကြီးနား-မန္တလေး ကားလမ်းမကြီးနဘေးရှိ မော်လူးမြို့ကို စစ်တပ် စစ်ကြောင်းများ ဝင်ရောက်လာခြင်း ကြောင့် မော်လူးမြို့ခံများနှင့် နဘား၊ ပင်ဝယ်၊ ဟဲနု အပါအဝင် အင်းတော်-မော်လူး လမ်းပိုင်းရှိ ကျေးရွာ ၂၀ ကျော်မှ ဒေသခံများသည် ဘေးလွတ်ရာသို့ အရေးပေါ် ထွက်ပြေးတိမ်းရှောင်နေကြရသည်။ မော်လူးမြို့ကို ၂၀၂၃ ခုနှစ်၊ ဒီဇင်ဘာလတွင် ကချင်လွတ်လပ်ရေးတပ် KIA၊ ကျောင်းသားတပ်မတော် ABSDF NUG လက်အောက်ခံ ပူးပေါင်းတပ်ဖွဲ့များက သိမ်းပိုက်ခဲ့ခြင်းဖြစ်ပြီး ယခု ၂ နှစ်နီးပါးအကြာတွင် ပြန်လည် လက်လွှတ်လိုက်ရခြင်း ဖြစ်သည်။ ယခုကဲ့သို့ နယ်မြေအချို့ ပြန်လည်လက်လွှတ်လိုက်ရသည့် အခြေအနေနှင့် ပတ်သက်၍ ပြည်သူ့ကာကွယ်ရေး တပ်မတော် (PDF) ၅ နှစ်ပြည့်နေ့တွင် ပြည်ထောင်စုဝန်ကြီးချုပ် မန်းဝင်းခိုင်သန်းက ယခုကဲ့သို့ ပြောသည်။ “စစ်ရေးသဘော သဘာဝအရ လိုအပ်တဲ့အခါမှာ တန်ပြန်ထိုးစစ်မှ ခုခံစစ်ကို တဖန်ဆင်နွှဲရတဲ့အခါ စိတ်ဓာတ် ရေးရာအရ အားလျော့မသွားကြဖို့ သတိပေးလိုပါတယ်၊ ဒါဟာ ရန်သူကိုကြောက်လို့ မဟုတ်ဘဲ ပြည်သူကို မျက်နှာမူတဲ့ ပြည်သူ့ကာကွယ်ရေး တပ်မတော်ရဲ့ ဆုံးဖြတ်ချက်တွေ ဖြစ်သလို ရှေ့ဆက်ရမယ့် ဗျူဟာမြောက် တိုက်ပွဲများအတွက် အင်အားစုဆောင်းတာလည်း ဖြစ်ပါတယ်။” ဝန်ကြီးချုပ်က ဆက်လက်၍ စစ်တပ်၏ သာလွန်အင်အားနှင့် ရင်ဆိုင်ရချိန်တွင် ပြည်သူများ၏ အသက်အိုးအိမ် ကို ကာကွယ်ရန်နှင့် အစုလိုက်အပြုံလိုက် ထိခိုက်မှုများ မရှိစေရန်အတွက် အချို့နယ်မြေများတွင် နည်းဗျူဟာ အရ ယာယီဆုတ်ခွာပေးခဲ့ရခြင်းဖြစ်ကြောင်းလည်း ဖြည့်စွက်ပြောဆိုထားသည်။ #မော်လူး #စစ်ကိုင်းတိုင်း #အင်းတော်

မော်လူးမြို့ကို တော်လှန်ရေးတပ်များ လက်လွှတ်ရ

May 5

သိမ်းဆည်းနယ်မြေ အချို့ လက်လွှတ်နေရကြောင်း NUG ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၅ ရက်။ စစ်အုပ်စု၏ သာလွန်အင်အားဖြင့် ထိုးစစ်ဆင် တိုက်ခိုက်မှုများကြောင့် သိမ်းပိုက်ထိန်းချုပ်ထားသည့် နယ်မြေ အချို့ကို ပြန်လည် လက်လွှတ်နေရသည်ဟု အမျိုးသား ညီညွတ်ရေး အစိုးရ NUG ဝန်ခံပြောဆိုလိုက်သည်။ အဆိုပါ ပြောဆိုမှုကို မေလ ၅ ရက်နေ့ (ယနေ့)တွင် ကျရောက်သည့် ပြည်သူ့ကာကွယ်ရေး တပ်မတော် PDF ဖွဲ့စည်းတည်ထောင်ခြင်း ၅ နှစ်ပြည့် အထိမ်းအမှတ်နေ့ မိန့်ခွန်းတွင် NUG တာဝန်ရှိသူများက ပြောဆိုလိုက် ခြင်းဖြစ်သည်။ NUG ယာယီ သမ္မတ ဒူဝါလရှီးလက “ကျနော်တို့အနေနဲ့ လက်ရှိအချိန်မှာ ကြုံတွေ့နေရတဲ နိုင်ငံရေး စိန်ခေါ်ချက်တွေ အမြောက်အများရှိနေသလို စစ်ရေးအရ လက်လွတ်ဆုံးရှုံးရမှုတစ်ချို့လည်း ခပ်စိပ်စိပ် ကြုံတွေ့နေကြရပါတယ်။ တော်လှန်ရေးရဲ့သ ဘောဟာ အနိမ့်အမြင့် အတက်အကျတွေ ရှိတတ်သလို ရှေ့ နှစ်လှမ်းတိုး နောက်တစ်လှမ်းဆုတ်ရတဲ့ ဖြစ်စဉ်မျိုးတွေလည်း ရှိတတ်ကြောင်းပြောကြားလိုပါတယ်။” ဟု ပြောသည်။ တရုတ်၏ ကြားဝင် ဆောင်ရွက်မှုကြောင့် ရှမ်းမြောက်ဒေသရှိ တော်လှန်ရေး တပ်ဖွဲ့များ သိမ်းဆည်းထားသော မြို့ အချို့ကို လက်လွှတ်ခဲ့ရသည်။ ယင်းတို့တွင် လားရှိုး၊ ကွတ်ခိုင်၊ ကျောက်မဲ၊ သီပေါ၊ နောင်ချိုတို့ပါဝင်သည်။ ထို့အပြင် မကြာသေးမီက မန္တလေးတိုင်းဒေသကြီးအတွင်းရှိ မတ္တရာနှင့် တကောင်းနယ်မြေများ၊ မိုးကုတ်နှင့်မိုးမိတ်မြို့များ၊ နှင့် စစ်ကိုင်းတိုင်း အတွင်း ထီးချိုင့်၊ ဗန်းမောက်၊ ကသာ၊ အင်းတော်၊ မော်လူး စသည့် မြို့များကို စစ်တပ်က ပြန်လည် ထိန်းချုပ်နိုင်ခဲ့သည်။ နယ်မြေအချို့ကို လက်လွတ်ထားရသော်လည်း လက်ရှိ အနေအထားအရ မြေပြင်ပကတိအခြေအနေကို လျစ်လျူရှု့၍ မရသကဲ့သို့ အားလုံးမျှော်မှန်းသည့် တော်လှန်ရေး ရည်မှန်းချက် ပန်းတိုင်ကိုလည်း မျက်ခြေပျက် ၍ မရကြောင်း NUG ယာယီ သမ္မတ ဒူဝါလရှီးလ က ဆိုသည်။ NUG ပြည်ထောင်စုဝန်ကြီးချုပ် မန်းဝင်းခိုင်သန်း ကလည်း ထိန်းချုပ်နယ်မြေများမှ ယာယီဆုတ်ခွာခြင်းသည် ပြည်သူလူထုများ၏ အသက်အိုးအိမ်စည်းစိမ် ထိခိုက်မှုကို ရှောင်ရှားရန် လုပ်ဆောင်ရခြင်းဖြစ်သည်ဟု ပြောသည်။ မန်းဝင်းခိုင်သန်းက “ကျွန်တော်တို့ ပြည်သူ့ကာကွယ်ရေး တပ်ဖွဲ့တွေအနေနဲ့ စစ်ရေးအောင်မြင်မှုတွေ ရရှိနေတဲ့ ကြားကပဲ အကြမ်းဖက် စစ်တပ်ရဲ့ သာလွန်အင်အားနဲ့ ရင်ဆိုင်ကြရတဲ့အခါမှာ ပြည်သူလူထုရဲ့ အသက်အိုးအိမ် စည်းစိမ်ကို ကာကွယ်ဖို့နဲ့ အစုလိုက်အပြုံလိုက် ထိခိုက်နစ်နာမှုတွေ မဖြစ်ပေါ်စေဖို့ အတွက် အလေးထား စဉ်းစားခဲ့ရတာတွေကြောင့် တချို့သော စစ်ဆင်ရေးနယ်မြေတွေမှာ နည်းဗျူဟာအရ ခံစစ်အနေအထားနဲ့ ရင်ဆိုင်ခဲ့ရတာတွေ၊ ယာယီဆုတ်ခွာပေးခဲ့ရတဲ့ မြေပြင် အမှန်တရားတွေ ရှိခဲ့ပါတယ်။” ဟု ပြောသည်။ သိမ်းပိုက်ထိန်းချုပ်ထားသည့် နယ်မြေများမှ ယာယီ ဆုတ်ခွာလိုက်ခြင်းသည် ရန်သူကို ကြောက်၍ မဟုတ်ဘဲ ရှေ့ဆက် ရမည့် ဗျူဟာမြောက် တိုက်ပွဲများအတွက် အင်အားစုဆောင်ခြင်းဖြစ်သည်ဟု မန်းဝင်းခိုင်သန်း က ဆိုသည်။ နယ်မြေဆုတ်ခွာမှုများနှင့် အခက်အခဲ အချို့ရှိသော်လည်း တော်လှန်ရေး အောင်မြင်သည့်အထိ ဆက်လက်တိုက်ပွဲဝင် သွားမည်ဟု NUG ကာကွယ်ရေး ဝန်ကြီးဌာန ပြည်ထောင်စု ဝန်ကြီး ဦးရည်မွန်ကလည်း ပြောသည်။ “လက်ရှိ အခြေအနေမှာ ငါတို့ သိမ်းပိုက်ထားတဲ့ မြို့တချို့ ယာယီစွန့်ခွာရမှု အပါအဝင် အခက်အခဲတချို့ရှိပေမဲ့ ငါတို့အားလုံးရဲ့ ခိုင်မာတဲ သံဋိဌာန်၊ ပြင်းပြတဲ့ ယုံကြည်ချက်၊ ထက်မြက်တဲ့ ညာဏ်ပညာနဲ့ ရင့်သန်တဲ့ စိတ်ခွန်အားကို အရင်းတည်ပြီး လက်တလောအခြေအနေကို အတူတကွ ရင်ဆိုင်ကျော်လွှားကြရမယ်။တော်လှန်ရေး ပန်းတိုင် မရောက်မချင်း စိတ်ဇွဲမလျှော့စတမ်း ဆက်လက်ချီတက်တိုက်ပွဲဝင်သွားကြရမယ်” NUG အနေဖြင့် ပြည်သူ့ကာကွယ်ရေး တပ်မတော်ကို PDF ဖွဲ့စည်းတည်ထောင်ပြီး ၅ နှစ်တာ ကာလအတွင်းတွင် တိုင်းရင်း သား လက်နက်ကိုင် မဟာမိတ် တော်လှန်ရေး အဖွဲ့အစည်းများနှင့်အတူ ပြည်နယ်နှင့် တိုင်းဒေသကြီးများရှိ နယ်မြေအများအပြားကို သိမ်းပိုက်ထိန်းချုပ်နိုင်ခဲ့ပြီး အုပ်ချုပ်ရေး ယန္တရားများကိုလည်း ခိုင်ခိုင်မာမာ တည်ဆောက်နိုင် ခဲ့ကြသည်။ သို့သော် စစ်အုပ်စုက တော်လှန်ရေး အဖွဲ့အစည်းများအတွင်း သပ်သျှိုသွေးခွဲမှုများနှင့် အိမ်နီးချင်းနိုင်ငံအချို့၏ အဖက်ဖက်မှ ပံ့ပိုးကူညီမှုများကို ရယူကာ သာလွန်အင်အားဖြင့် ထိုးစစ်ဆင် တိုက်ခိုက်ရာမှ NUG နှင့် မဟာမိတ်ပူးပေါင်းတပ်များက နယ်မြေအချို့ကို ပြန်လည် လက်လွှတ်ခဲ့ ရခြင်းဖြစ်သည်။ #NUG #NUGကာကွယ်ရေးဝန်ကြီးဌာန #PDF #မန်းဝင်းခိုင်သန်း #ဦးရည်မွန် #ဒူဝါလရှီးလ

သိမ်းဆည်းနယ်မြေ အချို့ လက်လွှတ်နေရကြောင်း NUG ပြော

May 4

KNU ထိန်းချုပ်ထားသည့် မောတောင်ကို လေယာဉ်ဖြင့် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၄ ရက်။ ထိုင်း-မြန်မာနယ်စပ် ကရင့်အမျိုးသား အစည်းအရုံး KNU က မကြာသေးခင်က သိမ်းပိုက်ထားသည့် မောတောင်မြို့ပေါ်ကို စစ်တပ်က လေယာဉ်ဖြင့် ဗုံးကြဲတိုက်ခိုက်ခဲ့ရာ လသားအရွယ် ကလေးငယ်တစ်ဦး အပါအဝင် အရပ်သား ၄ ဦး ထိခိုက်ဒဏ်ရာရရှိပြီး နေအိမ်များ ပျက်စီး ဆုံးရှုံးခဲ့သည်။ စစ်တပ်က လေယာဉ်နှစ်စီးဖြင့် တနင်္သာရီတိုင်းဒေသကြီး၊ မြိတ်ခရိုင်၊ မောတောင်မြို့ပေါ်ရှိ သုဿာန်နှင့် ကာစီနိုရုံအနီးသို့ မတ်လ ၂ ရက်နေ့၊ မွန်းလွဲ ၂ နာရီဝန်းကျင်တွင် ဗုံးကြဲတိုက်ခိုက်ခဲ့ခြင်း ဖြစ်သည်။ အဆိုပါ လေကြောင်းတိုက်ခိုက်မှုနှင့် ပတ်သက်၍ ဘေးလွတ်ရာသို့ တိမ်းရှောင်နေရသည့် အသက် ၅၀ ခန့်အရွယ် ဒေသခံအမျိုးသားတစ်ဦးက ယခုကဲ့သို့ ပြောသည်။ "ဗုံးလာကြဲတာ လေယာဉ်နှစ်စီးနဲ့ ရှေ့ဆင့်နောက်ဆင့် ကြဲချသွားတာ။ အိမ်တွေလည်း မီးလောင်တယ်။ လူက တော့ သိသလောက် ထိခိုက်တာ လေးယောက်ရှိပြီလို့တော့ သိရတယ်။ ကိုယ်တွေလည်း ပုန်းရှောင်နေရတာ ဆိုတော့ အသေးစိတ်တော့ မသိရသေးဘူးလေ။" မောတောင်မြို့ကို ပြည်သူ့ကာကွယ်ရေး ပူးပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက်ပိုင်း စစ်တပ်ဘက် က မြို့ပေါ်သို့ လေကြောင်းဖြင့် ပထမဆုံးအကြိမ် ဗုံးကြဲတိုက်ခိုက်လာခြင်း ဖြစ်သည်။ စစ်တပ်သည် ပြီးခဲ့သည့် ဧပြီလ ၂၆ ရက်နှင့် ၂၇ ရက်နေ့များတွင်လည်း မောတောင်မြို့အနီးရှိ ကျေးရွာများကို လေကြောင်းမှ တိုက်ခိုက်ခဲ့ရာ အမှတ် ၆ ကျေးရွာမှ ရွာသားနှစ်ဦး သေဆုံးခဲ့ပြီး နေအိမ်များ ပျက်စီးခဲ့သည့် ဖြစ်စဉ်များလည်း ရှိခဲ့သည်။ တစ်ဖက်တွင်မူ ထိုင်းနိုင်ငံ၊ ပရာကျွတ်ခီရီခန် ပြည်နယ်အုပ်ချုပ်ရေးမှူးက မောတောင်ဒေသတွင်း တိုက်ပွဲများ ရပ်တန့်သွားပြီဟုဆိုကာ နယ်စပ်ဂိတ်၌ ယာယီသတ်မှတ်ထားသည့် ကန့်သတ်ချက်များကို ဧပြီလ တတိယပတ်မှ စတင်ကာ ဖယ်ရှားမည့် အမိန့်ကို လက်မှတ်ရေးထိုး အတည်ပြုပေးထားသည်။ အဆိုပါ ဖြေလျှော့မှုအရ ဆင်ခွန်း-မောတောင် နယ်စပ်ဂိတ်မှာ ကုန်သွယ်ရေးလုပ်ငန်းများကို နေ့စဉ် နံနက် ၆ နာရီမှ ညနေ ၆ နာရီအထိ ခွင့်ပြုသွားမည်ဟု ထိုင်းသတင်းဌာနများက ဆိုသည်။ ယခင်က အင်္ဂါနှင့် စနေနေ့တို့တွင် နံနက် ၈ နာရီမှ မွန်းတည့်ချိန်အထိသာ ယာယီဖွင့်လှစ်ပေးခဲ့ခြင်း ဖြစ်သည်။ နယ်စပ်ဂိတ် ပြန်လည်ဖွင့်လှစ်ခြင်းသည် ထိုင်း-မြန်မာ နယ်စပ်စီးပွားရေး တည်ငြိမ်စေရေးအတွက် အရေးကြီးသည့် ခြေလှမ်းဖြစ်သည်ဟု ထိုင်းအာဏာပိုင်များက ဆိုသည်။ ထိုသို့ နယ်စပ်ဂိတ်၌ ယာယီသတ်မှတ်ချက်ကို ဖယ်ရှားလိုက်သည့်နောက်၊ လက်ရှိတွင် စစ်တပ်က မောတောင်မြို့ နှင့် အနီးဝန်းကျင်ရှိ ကျေးရွာများကို ရက်ပိုင်းအတွင်း ဆက်တိုက်ဆိုသလို လေကြောင်းမှ ဗုံးကြဲနေသဖြင့် ဒေသခံများအနေဖြင့် ဘေးလွတ်ရာသို့ ပြောင်းရွှေ့နေထိုင်ကြရသည်။ ထို့ကြောင့် လေကြောင်း အန္တရာယ်ကို အထူးသတိပြုကြရန်နှင့် ဗုံးခိုကျင်းများ စနစ်တကျ ဆောက်လုပ်နေထိုင် ကြရန် ပြည်သူ့ကာကွယ်ရေး ပူးပေါင်းတပ်ဖွဲ့က ဒေသခံပြည်သူများကို သတိပေးနှိုးဆော်ထားသည်။ #KNU #မောတောင်မြို့ #စစ်တပ် #လေကြောင်းတိုက်ခိုက်

KNU ထိန်းချုပ်ထားသည့် မောတောင်ကို လေယာဉ်ဖြင့် ဗုံးကြဲ

May 4

စစ်တပ်စစ်ကြောင်းများ မော်လူးသို့ ဦးတည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၄ ရက်။ စစ်ကိုင်းတိုင်းဒေသကြီး၊ အင်းတော်မြို့ကို ပြန်လည်ထိန်းချုပ်ခဲ့သည့် စစ်တပ်သည် အမျိုးသားညီညွတ်ရေး အစိုးရ (NUG) ၏ အုပ်ချုပ်ရေး ယန္တရား လည်ပတ်နေသော မော်လူးမြို့သို့ ဦးတည် စစ်ကြောင်းထိုးလာနေသဖြင့် ဒေသခံများ ဘေးလွတ်ရာသို့ ထိန့်လန့်တိမ်းရှောင်နေကြရသည်။ အင်းတော်နှင့် မော်လူးမြို့ကြားရှိ တုံးလုံကျေးရွာအနီးသို့ စစ်တပ် စစ်ကြောင်းများ ရောက်ရှိနေပြီဖြစ်ကြောင်း ဒေသခံတစ်ဦးက အတည်ပြုပြောသည်။ “တုံးလုံရွာဘက်ကိုရောက်ပြီလို့သိရတယ်။ မော်လူးမြို့နားပေါ့ ၅ မိုင်၊ ၇ မိုင်ပတ်ချာလည်ပေါ့။ အင်းတော်နဲ့ မော်လူးကြားမှာ အဲ့ရွာက။ မော်လူးမြို့ကိုဦးတည်ပြီး ပြီးခဲ့တဲ့ မေလ ၂ ရက်နေ့ကတည်းကထွက်သွားတာ” ဟု ဒေသခံတစ်ဦးက ပြောသည်။ မော်လူးမြို့သည် အင်းတော်မြို့၏ မြောက်ဘက် မိုင် ၅၀ ခန့်အကွာ၊ မြစ်ကြီးနား-မန္တလေး ဗျူဟာလမ်းမကြီး ပေါ် တွင် တည်ရှိပြီး စစ်ရေးအရ အရေးပါသည့် မြို့တစ်မြို့ဖြစ်သည်။ အဆိုပါမြို့ကို ၂၀၂၃ ခုနှစ်၊ ဒီဇင်ဘာလအတွင်းက ကချင်လွတ်လပ်ရေး တပ်မတော် (KIA)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး- ကျောင်းသား တပ်မတော် (ABSDF) နှင့် NUG လက်အောက်ခံ ပူးပေါင်းတပ်ဖွဲ့များက တိုက်ခိုက်သိမ်းပိုက်ထားခြင်း ဖြစ်သည်။ ယခုစစ်ကြောင်းထိုးလာသည့် တပ်ဖွဲ့များသည် ထီးချိုင့်၊ တကောင်း၊ ကသာနှင့် အင်းတော်မြို့တို့ကို စစ်တပ်က ပြန်လည် ထိန်းချုပ်ရာတွင် ပါဝင်ခဲ့သည့် တပ်ဖွဲ့များဖြစ်ပြီး တိုက်ပွဲများအတွင်း လက်နက်ခဲယမ်းနှင့် အသေခံ ဒရုန်း (Kamikaze Drone) များကို အမြောက်အမြား အသုံးပြုလေ့ရှိကြောင်း မြေပြင်သတင်းရင်းမြစ်က ဆို သည်။ စစ်ရေးတင်းမာမှု မြင့်တက်လာခြင်းကြောင့် အင်းတော်-မော်လူး လမ်းပိုင်းရှိ ကျေးရွာသားများနှင့် မြို့ပေါ် ဒေသခံများမှာ ကြိုတင်တိမ်းရှောင်နေကြရပြီး ကာကွယ်ရေးတပ်ဖွဲ့များနှင့် နီးစပ်သည့် ဒေသခံတစ်ဦးကလည်း ယခုကဲ့သို့ သတိပေးနှိုးဆော်ထားသည်။ “အရပ်သားတွေကိုတော့ အဓိကကတော့ စစ်ကြောင်းနဲ့ဝေးရာကို ရှောင်ကြဖို့မှာ ချင်တယ်။ နီးမှမရှောင်နဲ့ပေါ့ ကြိုရှောင်ထားကြပေါ့လေ။ ပစ္စည်းတွေကြိုရွှေ့ကြပေါ့လေ။ နီးမှရှောင်ရင်တော့ လက်နက်ကြီးတွေ မတော် တဆ ထိတတ်တယ်လေ။ အဓိကကတော့ ရှောင်ကြဖို့ပါပဲ။” စစ်တပ်သည် ၎င်းတို့လက်လွှတ်ခဲ့ရသည့် မြို့ရွာများကို ပြန်လည်ထိန်းချုပ်နိုင်ရန် အင်အားအလုံးအရင်းဖြင့် စစ်ကြောင်းထိုးမှုများ ဆက်တိုက်ပြုလုပ်နေသဖြင့် မြောက်ပိုင်းစစ်မျက်နှာတွင် စစ်ရေးအခြေအနေမှာ ပိုမို ပြင်းထန်လာနိုင်ကြောင်း စစ်ရေးလေ့လာသူများက သုံးသပ်နေကြသည်။ #မော်လူး #အင်းတော်မြို့ #စစ်တပ်ထိုးစစ် #စစ်ကိုင်းတိုင်း

စစ်တပ်စစ်ကြောင်းများ မော်လူးသို့ ဦးတည်

May 4

သတင်းလွတ်လပ်ခွင့် ဆက်လက် ကျဆင်းနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၄ ရက်။ မြန်မာနိုင်ငံတွင် သတင်းလွတ်လပ်ခွင့် အခြေအနေမှာ ဆက်လက်ကျဆင်းနေပြီး သတင်းသမားများသည် စစ်အုပ်စု၏ ဘက်ပေါင်းစုံမှ ခြိမ်းခြောက်မှုများနှင့် ရင်ဆိုင်နေရကြောင်း လွတ်လပ်သော မြန်မာသတင်းမီဒီယာ ကောင်စီ (IPCM) က ပြောသည်။ မေလ ၃ ရက်နေ့တွင် ကျရောက်သည့် ကမ္ဘာ့သတင်းမီဒီယာ လွတ်လပ်ခွင့်နေ့တွင် ပြောဆိုလိုက်ခြင်း ဖြစ်သည်။ IPCM အတွင်းရေးမှူး ဦးတိုးဇော်လတ်က “ကမ္ဘာ့လွတ်လပ်ခွင့် အစီရင်ခံစာကနေစရမယ်ဆိုရင် အခုအခြေအနေ က သတင်းထောက်လုပ်ရတာ အဆိုးရွားဆုံး အခြေအနေ ဖြစ်နေပါတယ်။ RSF ရဲ့ စာတမ်းကို ကြည့်လိုက်တာနဲ့ လွန်ခဲ့တဲ့ ၂၅ နှစ်အတွင်းမှာ တစ်ကမ္ဘာလုံးဆိုင်ရာ သတင်းလွတ်လပ်ခွင့် အကျဆုံးနှစ်လို့ ပြောသွားပါတယ်။ မြန်မာပြည်ကတော့ အလွန်မှစိုးရိမ်စရာ အကောင်းဆုံး သတင်းရယူခွင့်နဲ့ ပတ်သက်ရင် အဆိုးရွားဆုံး ဖြစ်နေ သေးတယ်။ အဲ့လိုပဲ ဥပဒေနဲ့ ပတ်သက်ရင်လည်း မီဒီယာတွေကို မီဒီယာဥပဒေနဲ့ ဖမ်းတာမဟုတ်ဘဲနဲ့ အကြမ်း ဖက်ပုဒ်မတို့ တခြားမဆိုင်တဲ့ ဥပဒေပုဒ်မတွေနဲ့ ဖမ်းတယ်” ဟု ပြောသည်။ ၂၀၂၆ ခုနှစ် အစောပိုင်းတွင် စစ်တပ်ဘက်က သတင်းသမားများကို အသစ်ထပ်မံဖမ်းဆီးခြင်း မရှိတော့ သော်လည်း ၎င်းမှာ သတင်းလွတ်လပ်ခွင့် တိုးတက်လာခြင်းမဟုတ်ဘဲ ဖိနှိပ်မှုပုံစံ ပြောင်းလဲသွားခြင်းသာ ဖြစ်သည်ဟု အသံအဖွဲ့၏ အစီရင်ခံစာက သုံးသပ်ထားသည်။ စစ်အုပ်စုသည် နိုင်ငံတကာသတင်းဌာနအချို့ကို ကန့်သတ်ချက်ဖြင့် ခွင့်ပြုပေးခြင်းနှင့် အကျဉ်းသားအချို့ကို လွှတ်ပေးခြင်းဖြင့် ၎င်းတို့၏ တရားဝင်မှုကို ဟန်ပြလုပ်ဆောင်နေသော်လည်း လက်တွေ့တွင် လိုင်စင်ပိတ်သိမ်း ခြင်းနှင့် ထောက်လှမ်းစောင့်ကြည့်ခြင်းများဖြင့် မီဒီယာများကို ပြင်းထန်စွာ ဆက်လက်ထိန်းချုပ်ထားဆဲ ဖြစ်သည်။ အဆိုပါ အခြေအနေနှင့် ပတ်သက်၍ CJ Platform အယ်ဒီတာချုပ် ကိုမင်းသူဝင်းထွဋ်က အသံအဖွဲ့က မေလ ၂ ရက်နေ့တွင် လုပ်ခဲ့သည့် စကားဝိုင်းတွင် ယခုကဲ့သို့ ပြောသည်။ “စစ်အုပ်စုကတော့ ကျနော်တို့ မီဒီယာ လွတ်လပ်ခွင့်ကို ပိတ်ပင်တားဆီးထားတာကတော့ အားလုံးအသိပဲ ဖြစ်တယ်ပေါ့။ ကျနော်တို့ကိုယ်တိုင်လည်း သတင်းတွေကို ဗရမ်းဗတာ ထုတ်လုပ်နေကြတာ မဟုတ်ဘူး ပေါ့ နော်။ မီဒီယာဆိုတာ ကျနော်တို့ ပြည်သူနဲ့ အုပ်ချုပ်သူတို့ နှစ်ခုကြားထဲကို ပေါင်းကူးပေးတဲ့ ပေါင်းကူးတံတား တစ်ခုဖြစ်တယ်ပေါ့နော်။ ဒါကို ကျနော်တို့ အပေါ်မှာ နားလည်ဖို့ လိုအပ်ပါတယ်။” စစ်အာဏာသိမ်းချိန်မှစ၍ ၂၀၂၆ ခုနှစ် မေလအထိ မတရားဖမ်းဆီးခံခဲ့ရသည့် မီဒီယာသမား ၂၁၆ ဦး ရှိခဲ့ပြီး၊ ၎င်းတို့အနက် ၁၃ ဦးမှာ သေဆုံးခဲ့ရကာ ၉ ဦးမှာ စစ်အုပ်စု၏ လက်ချက်ကြောင့် ဖြစ်သည်။ ၂၀၂၆ ခုနှစ် မတ်လအတွင်း ၇ ဦးနှင့် ဧပြီလတွင် ၁ ဦး ပြန်လည်လွတ်မြောက်လာပြီးနောက် လက်ရှိတွင် သတင်းသမား ၁၈ ဦး အကျဉ်းထောင်အသီးသီး၌ ကျန်ရှိနေဆဲဖြစ်သည်။ အကျဉ်းကျခံနေရသူများအနက် ဓာတ်ပုံသတင်းထောက် မြတ်သူကျော်မှာ အင်းစိန်အကျဉ်းထောင်အတွင်း ကိုယ်ထိလက်ရောက် ညှဉ်းပန်းနှိပ်စက်ခံနေရပြီး၊ ကိုစိုင်းဇော်သိုက်မှာလည်း အရေးပေါ် ဆေးကုသမှု လိုအပ်နေ ကြောင်း IPCM က အသိပေးထားသည်။ သတင်းသမားများသည် စစ်အုပ်စုအပြင် အခြားသော လက်နက်ကိုင်အဖွဲ့အစည်းများ၏ ခြိမ်းခြောက်မှုများကို လည်း ရင်ဆိုင်နေရကြောင်း အသံအဖွဲ့က ထောက်ပြထားသည်။ ထို့ကြောင့် တော်လှန်ရေးအင်အားစုများ စိုးမိုးထားသည့် ဒေသများတွင်လည်း သတင်းသမားများကို အကာ အကွယ်ပေးမည့် ဥပဒေများ ဖော်ဆောင်သင့်ကြောင်း ကိုမင်းသူဝင်းထွဋ်က တိုက်တွန်းထားသည်။ “စစ်အုပ်စုဖမ်းဆီးသလိုမျိုးပဲ သူတို့အတွက်ကို မလိုက်ရင် ငါ့ဘက်မလိုက်ရင် မင်းလူမိုက်ဆိုတဲ့ ပုံစံမျိုးတော့ ကျနော်တို့ မဖြစ်စေချင်ဘူးပေါ့နော်။ ဒီဒေသတွင်းကို အုပ်ချုပ်နေတဲ့သူတွေ အကုန်လုံး ဘက်စုံပေါ့နော် အားလုံးကလည်း မီဒီယာ လွတ်လပ်ခွင့်ကို ဘယ်လိုပဲဖြစ်ဖြစ် ပေးနိုင်ဖို့ ဒါလေးတစ်ခုကိုလည်း ဒီနေရာကနေ တောင်းဆိုချင်တယ်။” သျှမ်းသံတော်ဆင့် သတင်းဌာနမှ မြန်မာပိုင်း အယ်ဒီတာ နန်းဆိုင်နွမ်ကလည်း လွတ်လပ်သော မီဒီယာသည် ဖက်ဒရယ် ဒီမိုကရေစီ တည်ဆောက်ရေးတွင် မရှိမဖြစ်လိုအပ်ကြောင်း ယခုကဲ့သို့ ပြောသည်။ “ဒီမီဒီယာသာ မရှိဘူးဆိုရင် ကျနော်တို့ ပြည်နယ်ထဲမှာ လူ့အခွင့်အရေးချိုးဖောက်ခံနေရတဲ့ အမှုတွေလည်း ကျနော်တို့ ဖော်ထုတ်နိုင်မှာမဟုတ်တဲ့အတွက် ဒါ့ကြောင့် ကျနော်တို့ ဒီမီဒီယာကို ဆက်ပြီးတော့ လွတ်လွတ် လပ်လပ် သတင်းတွေ ဖော်ပြလို့ရအောင် အဖက်ဖက်ကလည်း ကူညီပေးစေချင်တယ်။” လက်ရှိတွင် နယ်စည်းမခြား သတင်းထောက်များအဖွဲ့ (RSF) ၏ အညွှန်းကိန်းအရ မြန်မာနိုင်ငံသည် ကမ္ဘာ့နိုင်ငံ ပေါင်း ၁၈၀ အနက် အဆင့် ၁၆၆ တွင် ရှိနေပြီး သတင်းလွတ်လပ်ခွင့် အဆိုးရွားဆုံး နိုင်ငံ ၂၀ စာရင်းတွင် ပါဝင်နေဆဲ ဖြစ်သည်။ အာဆီယံ နိုင်ငံများအတွင်းတွင် မြန်မာနိုင်ငံ၏ သတင်းလွတ်လပ်ခွင့်မှာ ဒုတိယမြောက် အဆိုးဆုံးဖြစ်နေသည်။ ဗြိတိန်နှင့် နယ်သာလန်သံရုံးများကလည်း မြန်မာသတင်းသမားများကို ချက်ချင်းလွှတ်ပေးရန်နှင့် လွတ်လပ်သော မီဒီယာများကို အကာအကွယ်ပေးရန် ဆက်လက်တောင်းဆိုထားကြသည်။ #လွတ်လပ်စွာပြောဆိုရေးသားခွင့် #မြန်မာသတင်းမီဒီယာကောင်စီ #IPCM #သတင်းလွတ်လပ်ခွင့်

သတင်းလွတ်လပ်ခွင့် ဆက်လက် ကျဆင်းနေ

May 4

ဖားကန့်တွင် လက်နက်ကြီးကြောင့် ကလေးငယ် အပါအဝင် အရပ်သားများ ဒဏ်ရာရ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မေလ ၄ ရက်။ ကချင်ပြည်၊ ဖားကန့်တွင် ကချင်လွတ်လပ်ရေးတပ်မတော် KIA နှင့် စစ်တပ်တို့ကြား တိုက်ပွဲများ ပြင်းထန်နေပြီး လက်နက်ကြီးကျည်ကြောင့် ကလေးငယ် အပါအဝင် အရပ်သားများ ထိမှန်ဒဏ်ရာ ရခဲ့သည်။ ဖားကန့်မြို့နယ်တွင် ယနေ့ မေလ ၄ ရက်နေ့ နံနက်ပိုင်းမှစတင်ကာ စစ်တပ်နှင့် (KIA) ပူးပေါင်းတပ်တို့အကြား တိုက်ပွဲများ ပြန်လည်ပြင်းထန်လာပြီး စစ်တပ်ဘက်မှ ပစ်ခတ်သည့် လက်နက်ကြီးကျည်များ ကျေးရွာများထဲ ကျရောက်ပေါက်ကွဲသဖြင့် ကလေးငယ်တစ်ဦး အပါအဝင် အရပ်သားအချို့ ထိခိုက်ဒဏ်ရာရရှိခဲ့သည်ဟု ဒေသခံများက ပြောသည်။ လက်ရှိမြေပြင်အခြေအနေနှင့် ပတ်သက်၍ လုံးခင်းဒေသခံအမျိုးသားတစ်ဦးက “တိုက်ပွဲက မနေ့ညကတည်းက စဖြစ်နေတာ။ ဒါပေမယ့် ဒီရက်ပိုင်းက ဆက်တိုက်ဖြစ်နေတာလို့ ပြောလို့ရတယ်။ ဒီကနေ့မနက်မှ ပိုပြင်းထန် လာတာ။ ကုဋေရွာက အမျိုးသားတစ်ယောက်တော့ ပြင်းပြင်းထန်ထန် ဒဏ်ရာရသွားတယ်။ လယ်ပြင်မှာလည်း ကလေးတစ်ယောက် ထိတယ်။ သူကတော့ မစိုးရိမ်ရ ဒဏ်ရာရထားတယ်။ လောလောဆယ်တော့ ကျနော်တို့ အတည်ပြုနိုင်တာ အဲ့ဒီ ၂ ယောက်ပဲ။ ကျန်တဲ့ ထိခိုက်မှုတွေ ရှိနိုင်ပါသေးတယ်” ဟု ပြောသည်။ ယနေ့ နံနက် ၅ နာရီခွဲခန့်မှ စ၍ ဖားကန့်မြို့နယ်၊ လုံးခင်းကျေးရွာရှိ ဂေါက်ကွင်းနှင့် သင်္ချိုင်းနေရာများတွင် တပ်စွဲထားသည့် စစ်တပ်စခန်းများကို KIA နှင့် ကချင်ဒေသ ပြည်သူ့ ကာကွယ်ရေး တပ် KPDF ပူးပေါင်းတပ်များက ဒရုန်းများအသုံးပြု၍ စတင်တိုက်ခိုက် ခဲ့ရာမှ နှစ်ဖက်တိုက်ပွဲ ပြင်းထန်ခဲ့ခြင်းဖြစ်သည်။ တနေကုန်နီးပါး လက်နက်ကြီး၊ လက်ငယ် ပစ်ခတ်သံများနှင့် ပေါက်ကွဲသံများ ဒေသအတွင်း ဆက်တိုက် ကြားနေ ရသည်ဟု ဒေသခံများက ပြောသည်။ တိုက်ပွဲအတွင်း စစ်တပ်၏ တပ်မကုန်းဘက်မှ လက်နက်ကြီးများဖြင့် ပြန်လည်ပစ်ခတ်ခဲ့ရာတွင် ကုဋေကျေးရွာ လမ်းဆုံ၌ အမျိုးသားတစ်ဦး အပြင်းအထန် ဒဏ်ရာရရှိခဲ့ပြီး လယ်ပြင်ကျေးရွာ၌လည်း ကျည်ကျရောက်ခဲ့သဖြင့် ကလေးငယ်တစ်ဦး ထိခိုက်ဒဏ်ရာရရှိခဲ့သည်။ ထို့အပြင် လုံးခင်းကျေးရွာရှိ ကချင်နှစ်ခြင်း ခရစ်ယာန် အဖွဲ့ချုပ် KBC ဘုရားကျောင်းအတွင်းသို့လည်း လက်နက်ကြီးကျည် တစ်လုံး ကျရောက် ပေါက်ကွဲခဲ့သည်။ တိုက်ပွဲကြောင့် လုံးခင်းကျေးရွာမှ ဒေသခံအချို့မှာ နီးစပ်ရာ ဘုန်းကြီးကျောင်းများသို့ သွားရောက် စစ်ရှောင် နေကြရသည်။ အလားတူ ပြီးခဲ့သည့် မေလ ၂ ရက်နေ့ ညနေပိုင်းကလည်း ဖားကန့်-ကာမိုင်း လမ်းပိုင်းရှိ တံတားညီနောင်ဂိတ်နှင့် ပျားအုံကျေးရွာကြားတွင် အရပ်သားကားတစ်စီးကို စစ်တပ်က လက်နက်ကြီးဖြင့် ပစ်ခတ်ခဲ့သဖြင့် အမျိုးသား ၂ ဦးနှင့် အမျိုးသမီး ၁ ဦး ဒဏ်ရာရရှိခဲ့သည့် ဖြစ်စဉ်တစ်ခု ရှိခဲ့သည်။ ဖားကန့်-ကာမိုင်း လမ်းပိုင်းကို စစ်ရေးအခြေအနေများကြောင့် KIA ဘက်က ဧပြီလ ၂၂ ရက်နေ့မှစတင်ကာ ယာယီ ပိတ်ထားသော်လည်း လမ်းပိုင်းဖြတ်သန်းသည့် အရပ်သားကားများကို စစ်တပ်ဘက်က ပစ်ခတ်သဖြင့် ပြီးခဲ့သည့် ရက်ပိုင်းအတွင်း လူသေဆုံးမှုနှင့် ဒဏ်ရာရမှုများ ဆက်တိုက်ရှိနေကြောင်း ဒေသတွင်း သတင်းရင်းမြစ် များက ပြောသည်။ တော်လှန်ရေး အင်အားစုများဘက်ကလည်း ဒေသခံပြည်သူများအနေဖြင့် လေကြောင်းရန်ကို အထူးသတိပြု ကြရန် သတိပေးနှိုးဆော်ထားသည်။ #ဖားကန့်တိုက်ပွဲ #ကချင်ပြည်နယ်စစ်ရေးအခြေအနေ

ဖားကန့်တွင် လက်နက်ကြီးကြောင့် ကလေးငယ် အပါအဝင် အရပ်သားများ ဒဏ်ရာရ

May 4

အိန္ဒိယ ရေတပ် ဦးစီးချုပ် မြန်မာနိုင်ငံသို့ လာရောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၄ ရက်။ ၂၀၂၆ ခုနှစ် မေလ ၂ ရက်နေ့မှ ၅ ရက်နေ့အထိ အိန္ဒိယရေတပ်ဦးစီးချုပ် Admiral Dinesh K Tripathi သည် မြန်မာနိုင်ငံသို့ ၄ ရက်တာ လာရောက်မည်ဟု The Economic Times, Indian Awaaz အပါအဝင် သတင်းဌာန အများအပြားတွင် ဖော်ပြထားသည်။ မေလ ၂ ရက်နေ့တွင် အိန္ဒိယ ရေတပ်ဦးစီးချုပ်သည် မြန်မာ့ရေတပ်၏ စစ်ရေယာဉ် UMS ကျန်စစ်သား (F12) ပေါ်သို့ တက်ရောက်လေ့လာခဲ့ရာ အမှတ် (၁) ရေယာဉ်စုမှူး ဗိုလ်မှူးကြီး ကျော်သက်နိုင်က ဂုဏ်ပြုတပ်ဖွဲ့ဖြင့် ကြိုဆိုခဲ့သည်။ ဤခရီးစဉ်မှာ ဘင်္ဂလားပင်လယ်အော်အတွင်းမှ တရုတ်နှင့် အိန္ဒိယ အာရှအင်အားကြီးနှစ်နိုင်ငံ၏ ဩဇာပြိုင်ပွဲတွင် အိန္ဒိယက ၎င်း၏ကစားကွက်ကို ခိုင်မာအောင် ထပ်မံခင်းကျင်းလိုက်ခြင်းပင် ဖြစ်သည်။ မြန်မာနိုင်ငံသည် ပထဝီနိုင်ငံရေးအရ တရုတ်နိုင်ငံအတွက် အိန္ဒိယသမုဒ္ဒရာသို့ ထွက်ပေါက်ဖြစ်သကဲ့သို့၊ အိန္ဒိယနိုင်ငံအတွက်လည်း ၎င်း၏ "Act East" မူဝါဒအရ အရှေ့တောင်အာရှသို့ ဆက်သွယ်ပေးသည့် တစ်ခုတည်းသော တံခါးပေါက်ဖြစ်သည်။ တရုတ်နိုင်ငံသည် မြန်မာနိုင်ငံတွင် စီးပွားရေးအရ အသာစီးရယူထားသည်။ တရုတ်-မြန်မာ စီးပွားရေးစင်္ကြံ (CMEC)၊ ကျောက်ဖြူရေနက်ဆိပ်ကမ်းနှင့် သဘာဝဓာတ်ငွေ့ပိုက်လိုင်းများသည် တရုတ်၏ "ပတ်လမ်းတစ်ခု၊ လမ်းကြောင်းတစ်ခု" (BRI) စီမံကိန်း၏ အစိတ်အပိုင်းများဖြစ်သည်။ တရုတ်၏ ဩဇာမှာ ကြီးမားသော ရင်းနှီးမြှုပ်နှံမှုများနှင့် နိုင်ငံတကာစင်မြင့်တွင် မြန်မာကို အကာအကွယ်ပေးသည့် အခန်းကဏ္ဍတို့အပေါ် အခြေခံထားသည်။ အိန္ဒိယနိုင်ငံသည် တရုတ်ကဲ့သို့ စီးပွားရေးအရ အလုံးအရင်းနှင့် မဝင်ရောက်နိုင်သော်လည်း လုံခြုံရေး မိတ်ဖက်အဖြစ် ပုံဖော်ကာ ဩဇာတည်ဆောက်သည်။ Admiral Tripathi ၏ ယခုခရီးစဉ်တွင် မြန်မာ့ရေတပ်သို့ စစ်ဘက်သုံးပစ္စည်းများ ထောက်ပံ့ပေးခြင်း၊ ပူးတွဲကင်းလှည့်ခြင်း (IMCOR) နှင့် နည်းပညာဖလှယ်ခြင်းတို့လုပ်ဆောင်ခဲ့သည်။ ဤခရီးစဉ်အတွင်း မြန်မာ့တပ်မတော်မှ စစ်ဘက်ဆိုင်ရာ ထိပ်သီးခေါင်းဆောင်များနှင့် တွေ့ဆုံကာ ရေကြောင်းလုံခြုံရေးနှင့် ကာကွယ်ရေးကဏ္ဍဆိုင်ရာ ပစ္စည်းကိရိယာများ လွှဲပြောင်းပေးအပ်ခြင်းများကို ဆောင်ရွက်ခဲ့သည်။ အိန္ဒိယရေတပ်ဦးစီးချုပ်သည် ရန်ကုန်မြို့ရှိ ဗဟိုရေတပ်ကွပ်ကဲမှုဌာနချုပ်နှင့် ရေတပ်လေ့ကျင့်ရေး ဌာနချုပ်တို့သို့ သွားရောက်ခဲ့ပြီး ဗဟိုရေတပ်ကွပ်ကဲမှုဌာနချုပ်မှူး ရဲမှူးချုပ် အောင်အောင်နိုင်၊ ရေတပ်လေ့ကျင့်ရေးဌာနချုပ်မှူး ရဲမှူးချုပ် ခွန်အောင်ကျော် တို့နှင့် တွေ့ဆုံခဲ့သည်။ ထို့အပြင် ခရီးစဉ်အတွင်း မြန်မာ့တပ်မတော် အထွေထွေအရာရှိချုပ် (ကြည်း၊ ရေ၊ လေ) ဗိုလ်ချုပ်ကြီး ရဲဝင်းဦး၊ ကာကွယ်ရေးဝန်ကြီး ဗိုလ်ချုပ်ကြီး ထွန်းအောင် နှင့် ရေတပ်ဦးစီးချုပ် ဗိုလ်ချုပ်ကြီး ထိန်ဝင်း တို့နှင့်လည်း တွေ့ဆုံရန် အစီအစဉ်ရှိထားသည်။ မြန်မာနိုင်ငံသည် အိန္ဒိယနိုင်ငံ၏ 'Neighbourhood First' (အိမ်နီးချင်းဦးစားပေး)၊ 'Act East' နှင့် 'MAHASAGAR' (ဒေသတွင်း အားလုံးအတွက် လုံခြုံရေးနှင့် ဖွံ့ဖြိုးတိုးတက်ရေး) မူဝါဒများအရ အလွန်အရေးပါသော မဟာဗျူဟာမြောက် အိမ်နီးချင်းနိုင်ငံဖြစ်သည်။ နိုင်ငံနှစ်ခုသည် ၁,၆၄၀ ကီလိုမီတာ ရှည်လျားသော ကုန်းတွဲနယ်နိမိတ်ကို မျှဝေထားသည်။ အိန္ဒိယနှင့် မြန်မာရေတပ်တို့သည် IMNEX ရေတပ်လေ့ကျင့်ခန်း၊ IMCOR ပူးတွဲကင်းလှည့်ခြင်းနှင့် ရေကြောင်းမြေပုံတိုင်းတာခြင်း (Hydrography surveys) တို့တွင် ပုံမှန်ပူးပေါင်းဆောင်ရွက်လျက်ရှိသည်။ ယခု ခရီးစဉ်အတွင်း Admiral Tripathi သည် မြန်မာ့တပ်မတော် အာဇာနည်ဗိမာန်၌ လွမ်းသူ့ပန်းခွေချ အလေးပြုခြင်းကိုလည်း ပြုလုပ်သွားမည်ဖြစ်သည်။ #AdmiralTripathi #အိန္ဒိယရေတပ်ဦးစီးချုပ် #AdmiralDineshKTripathi

အိန္ဒိယ ရေတပ် ဦးစီးချုပ် မြန်မာနိုင်ငံသို့ လာရောက်

May 4

ကီလို ၁၀၀၀ ကျော် အကွာရှိ ရုရှား ရေနံဆိပ်ကမ်းအား ယူကရိန်းဒရုန်းများဖြင့် တိုက်ခိုက် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မေလ ၄ ရက်။ ယူကရိန်းနယ်စပ်မှ ကီလိုမီတာ ၁,၀၀၀ ခန့် ဝေးကွာသော ရုရှားနိုင်ငံ၏ အရေးပါသော ပရီမော့စ်ခ် (Primorsk) ရေနံဆိပ်ကမ်းနှင့် သင်္ဘောများကို ယူကရိန်းက ဒရုန်းများဖြင့် တနင်္ဂနွေနေ့ညပိုင်းနှင့် ယနေ့နံနက်ပိုင်းတို့တွင် တိုက်ခိုက်ခဲ့သည်။ အဆိုပါ အကွာအဝေးမှာ ရန်ကုန်မြို့မှ မြစ်ကြီးနားမြို့အထိ အကွာအဝေးထက် ပိုမိုဝေးကွာပြီး ယူကရိန်း၏ တာဝေးပစ်ဒရုန်းနည်းပညာ မြင့်မားလာမှုကို သက်သေပြနေခြင်းဖြစ်သည်။ ပရီမော့စ်ခ်ဆိပ်ကမ်းသည် ရုရှားမှ ဥရောပနှင့် ကမ္ဘာ့ဈေးကွက်သို့ ရေနံတင်ပို့ရာတွင် အချက်အချာကျသော နေရာဖြစ်ပြီး၊ တိုက်ခိုက်မှုကြောင့် ရေနံသိုလှောင်ကန်များနှင့် သင်္ဘောအချို့ ထိခိုက်ပျက်စီးကာ ရေနံတင်ပို့မှု လုပ်ငန်းစဉ်များ ခေတ္တရပ်ဆိုင်းသွားခဲ့ရသည်။ ရုရှားကာကွယ်ရေးဝန်ကြီးဌာနက ဒရုန်းအများအပြားကို ပစ်ချနိုင်ခဲ့ကြောင်း သတင်းထုတ်ပြန်သော်လည်း ဆိပ်ကမ်း၌ မီးလောင်မှုများ ဖြစ်ပွားခဲ့ခြင်းကိုမူ ငြင်းဆိုခြင်းမရှိပေ။ စစ်မြေပြင်အခြေအနေအရ ယူကရိန်းအရှေ့ဘက်တွင် တိုက်ပွဲများ ဆက်လက်ပြင်းထန်နေသကဲ့သို့ ရုရှားကလည်း ယူကရိန်း၏ လျှပ်စစ်ဓာတ်အားပေးစက်ရုံများကို တန်ပြန်ဗုံးကြဲလျက်ရှိရာ မြို့အချို့၌ လျှပ်စစ်မီးပြတ်တောက်မှုများ ကြုံတွေ့နေရသည်။ ယူကရိန်းသည် အခုနောက်ပိုင်းတွင် ရုရှား၏ စီးပွားရေးအခြေခံ အဆောက်အအုံများကို ပစ်မှတ်ထားတိုက်ခိုက်လာရာ ၎င်းတို့၏ ဒရုန်းစွမ်းဆောင်ရည်မှာ နိုင်ငံတကာ၏ အာရုံစိုက်မှုကို ရရှိလာခဲ့သည်။ #ယူကရိန်းရုရှားစစ်ပွဲ

ကီလို ၁၀၀၀ ကျော် အကွာရှိ ရုရှား ရေနံဆိပ်ကမ်းအား ယူကရိန်းဒရုန်းများဖြင့် တိုက်ခိုက်

May 4

တရုတ်က အာဖရိကတွင် ထိုင်ဝမ်အပေါ် ပိတ်ဆို့ရန် ဖိအားပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၄ ရက်။ အာဖရိကတိုက်တွင် တရုတ်နိုင်ငံ၏ သံတမန်ရေးရာနှင့် စီးပွားရေးဆိုင်ရာ ပိတ်ဆို့မှုများ ပြင်းထန်နေသော်လည်း ထိုင်ဝမ်သမ္မတ လိုင်ချင်းတယ်သည် ၎င်းအား အသိအမှတ်ပြုထားသည့် အက်စ်ဝါတီးနီ (Eswatini) နိုင်ငံသို့ မေလ ၂ ရက်နေ့တွင် ရောက်ရှိသွားခဲ့သည်။ သမ္မတလိုင်သည် အက်စ်ဝါတီးနီဘုရင် မဆွာတီ (III) နှင့် တွေ့ဆုံကာ နှစ်နိုင်ငံကုန်သွယ်ရေး သဘောတူညီချက်များကို လက်မှတ်ရေးထိုးခဲ့သည်။ အဆိုပါခရီးစဉ်အား ဧပြီလကုန်တွင် သွားရောက်ရန် မူလက စီစဉ်ခဲ့သော်လည်း လမ်းခရီးရှိ မဒါဂတ်စကာ၊ မောရစ်ရှပ်နှင့် ဆေးရှဲလ်နိုင်ငံတို့က တရုတ်၏ ဖိအားပေးမှုကြောင့် ထိုင်ဝမ်သမ္မတလေယာဉ်အား ဖြတ်သန်းပျံသန်းခွင့် ရုတ်တရက် ပိတ်ပင်ခဲ့သဖြင့် နှောင့်နှေးခဲ့ရခြင်းဖြစ်သည်။ လက်ရှိတွင် အာဖရိကတိုက်၌ အက်စ်ဝါတီးနီသည် ထိုင်ဝမ်နှင့် သံတမန်အဆက်အသွယ်ရှိသည့် တစ်ဦးတည်းသော နိုင်ငံဖြစ်ပြီး ကမ္ဘာတစ်ဝန်းတွင် ထိုင်ဝမ်အား အသိအမှတ်ပြုသည့်နိုင်ငံ ၁၂ နိုင်ငံသာ ကျန်ရှိတော့သည်။ တစ်ချိန်တည်းမှာပင် ဇမ်ဘီယာနိုင်ငံ၌ ကျင်းပရန် ပြင်ဆင်ထားသည့် RightsCon 2026 နည်းပညာနှင့် လူ့အခွင့်အရေးညီလာခံကို ဖျက်သိမ်းလိုက်ကြောင်း အမေရိကန်အခြေစိုက် Access Now အဖွဲ့က ကြေညာခဲ့သည်။ အိမ်ရှင်ဇမ်ဘီယာအစိုးရသည် တရုတ်၏ ဖိအားပေးမှုကြောင့် ထိုင်ဝမ်ကိုယ်စားလှယ်များကို ချန်လှပ်ထားရန်နှင့် ဆွေးနွေးပွဲခေါင်းစဉ်အချို့ကို ကန့်သတ်ရန် ကြိုးပမ်းလာခြင်းကြောင့် ညီလာခံ၏ လွတ်လပ်ခွင့်ကို ရှေးရှု၍ ယခုကဲ့သို့ ဖျက်သိမ်းရန် ဆုံးဖြတ်ခဲ့ခြင်းဖြစ်သည်။ #ထိုင်ဝမ်သမ္မတလိုင်ချင်းတယ်

တရုတ်က အာဖရိကတွင် ထိုင်ဝမ်အပေါ် ပိတ်ဆို့ရန် ဖိအားပေး

« Prev 1 … 40 41 42 43 44 … 1,081 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ