NMG Doh – Page 42 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Mar 2

မိုးကုတ်နှင့် မိုးမိတ်တွင် တိုက်ပွဲများ ဆက်လက် ဖြစ်ပွားဆဲဖြစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂ ရက်။ စစ်ကော်မရှင်တပ်က ပြန်လည်ဝင်ရောက်တပ်စွဲထားသည့် မန္တလေးတိုင်း၊ မိုးကုတ်မြို့နှင့် ရှမ်းပြည် မြောက်ပိုင်း မိုးမိတ်မြို့တို့တွင် ယခုနှစ်ဆန်းပိုင်းအတွင်း တိုက်ပွဲကြီးငယ် ၁၇ ကြိမ်ထက်မနည်း ဖြစ်ပွားခဲ့ပြီး စစ်တပ်ဘက် မှ အကျအဆုံးများသည်ဟု အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာန က ထုတ်ပြန်သည်။ စစ်အုပ်စုဘက်မှ မြို့တွင်းပိုင်း၌ တည်ငြိမ်နေသယောင် ဝါဒဖြန့်ချိမှုများ ပြုလုပ်နေသော်လည်း မြို့နှင့် တစ်မိုင်ခန့် သာဝေးသည့် ပတ်ဝန်းကျင်ကျေးရွာများတွင် နေ့စဉ်နီးပါး တိုက်ပွဲများ ပြင်းထန်နေဆဲဖြစ်သည်ဟု ဆိုသည်။ တရုတ်နိုင်ငံ၏ ကြားဝင်စေ့စပ်မှုအရ ပြီးခဲ့သည့် ၂၀၂၅ ခုနှစ်၊ နိုဝင်ဘာလကုန်တွင် တအာင်းတပ်မတော် (TNLA) က မိုးကုတ်နှင့် မိုးမိတ်မြို့တို့မှ ပြန်လည်ဆုတ်ခွာပေးခဲ့ရသည်။ သို့သော် စစ်ကော်မရှင်တပ်များ ပြန်လည်ဝင်ရောက်လာသည့် နောက်တစ်နေ့မှစ၍ ပြည်သူ့ကာကွယ်ရေး တပ်မ တော် (PDF) ပူးပေါင်းတပ်များက ခုခံစစ်ဆင်ရေးများကို အရှိန်မြှင့်လုပ်ဆောင်ခဲ့ရာ ယနေ့အချိန်အထိ စစ်ရေး တင်းမာမှုများ လျော့ပါးသွားခြင်း မရှိသေးပေ။ မြေပြင်အခြေအနေနှင့် ပတ်သက်၍ မိုးကုတ်မြို့ခံ အမျိုးသမီးတစ်ဦးက “မြို့ထဲမှာတော့ အရင်ကထက် ငြိမ်သလို ရှိပေမယ့် အနောက်ခြမ်းဘက်ကတော့ လက်နက်ကြီးသံတွေ နေ့တိုင်းလိုလိုမျိုး မဟုတ်ရင်တောင် မကြာမကြာ ကြားနေရတာ။ မြို့ပြင်ထွက်တာနဲ့ တိုက်ပွဲအသံတွေက ကြားနေရပြီ ဟုတ်တယ်။ တစ်ခါတလေဆို ရှော့တိုက် ဒုံးသံလိုမျိုး၊ လက်နက်ကြီးသံလိုမျိုး ကြားရတယ်။ မြို့ထဲအထိပါ တုန်သွားတာမျိုး ရှိတယ်” ဟု ပြောသည်။ NUG ကာကွယ်ရေးဝန်ကြီးဌာန၏ ထုတ်ပြန်ချက်အရ ဇန်နဝါရီလအတွင်း တိုက်ပွဲကြီး ၇ ကြိမ်နှင့် ဖေဖော်ဝါရီလ အတွင်း တိုက်ပွဲကြီးငယ် ၁၀ ကြိမ် ဖြစ်ပွားခဲ့ရာ စစ်ကော်မရှင်ဘက်မှ ၂၁ ဦး သေဆုံးခဲ့ပြီး PDF ရဲဘော်အချို့ လည်း ထိခိုက်ကျဆုံးမှုများ ရှိခဲ့သည်။ ထို့ပြင် တိုက်ပွဲအတွင်း ဖမ်းဆီးရမိသည့် စစ်သုံ့ပန်းများကိုလည်း စနစ်တကျ ထိန်းသိမ်းစောင့်ရှောက်ထား ကြောင်း မြေပြင်ရှိ စစ်ရေးသတင်းရင်းမြစ်က ပြောသည်။ တော်လှန်ရေးတပ်ဖွဲ့ဝင်တစ်ဦးက “စစ်တပ်ဘက်က မြို့ကို သူတို့စိုးမိုးထားနိုင်ပြီလို့ ပြောနေတာက ဟန်ပြ သက် သက်ပဲ။ ကျနော်တို့ PDF တွေက မြို့ပတ်ပတ်လည်မှာ ရှိနေတယ်။ သူတို့ရဲ့ ထောက်ပံ့ရေး လမ်းကြောင်း တွေနဲ့ အုပ်ချုပ်ရေးပစ်မှတ်တွေကို အထူးစစ်ဆင်ရေးတွေနဲ့ နေ့တိုင်း ထိုးနှက်နေတာ။ မြို့အနောက်ခြမ်းက ရွာတွေမှာ ဆိုရင် သူတို့ တော်တော်လေး အထိနာနေတာတွေ ရှိပါတယ်” ဟု ပြောသည်။ လက်ရှိတွင် PDF တပ်ဖွဲ့များသည် စစ်ရေးတိုက်ခိုက်မှုများအပြင် နယ်မြေလုံခြုံရေးနှင့် မူးယစ်ဆေးဝါး တားဆီး နှိမ်နင်းရေး လုပ်ငန်းများကိုပါ ပူးတွဲဆောင်ရွက်နေကြောင်း ဆိုသည်။ ပုသိမ်-မုံရွာ လမ်းပိုင်းနှင့် မိုးကုတ်-မိုးမိတ် လမ်းပိုင်းတလျှောက် စစ်ရေးအခြေအနေမှာ အချိန်မရွေး ပေါက်ကွဲနိုင် သည့် အနေအထားတွင် ရှိနေသဖြင့် ခရီးသွားပြည်သူများ အနေဖြင့် လုံခြုံရေးသတိ အထူးရှိကြရန် တော်လှန်ရေးအဖွဲ့များက သတိပေးထားသည်။

မိုးကုတ်နှင့် မိုးမိတ်တွင် တိုက်ပွဲများ ဆက်လက် ဖြစ်ပွားဆဲဖြစ်

Mar 2

ကော်သူးလေပြည်ကို ပြည်ထောင်စု ယူနစ် တစ်ခု အဖြစ် တည်ထောင်ဖွဲ့စည်းမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂ ရက်။ ကရင်ဘိုးဘေးတို့၏ မျှော်လင့်ချက်ဖြစ်သလို ကရင်တစ်မျိုးသားလုံး၏ အိပ်မက်လည်းဖြစ်သည့် ‘ကော်သူးလေ ပြည်’ တည်ဆောက်ရေးကို ဖက်ဒရယ် ပြည်ထောင်စုမူဘောင် အတွင်းမှပင် အကောင်အထည် ဖော်သွားမည် ဖြစ်ကြောင်း ကရင်အမျိုးသားအစည်းအရုံး (KNU) က အတိအလင်း ပြောကြားလိုက်သည်။ အဆိုပါ တည်ဆောက်ရေးသည် ပြည်ထောင်စုမှ ခွဲထွက်ရန်မဟုတ်ဘဲ တိုင်းရင်းသားညီအစ်ကိုများနှင့်အတူ တန်းတူညီမျှစွာ ယှဉ်တွဲနေထိုင်နိုင်မည့် ပြည်နယ်တစ်ခုအဖြစ် ရည်ရွယ်ခြင်းဖြစ်သည်ဟု ဆိုသည်။ “ကော်သူးလေ” ဟူသည့် အမည်နာမနှင့် ပတ်သက်၍ KNU ပြောရေးဆိုခွင့်ရှိသူ ပဒိုစောတောနီးက “ကျနော်တို့က ကော်သူးလေပြည်သားတွေဆိုတာက ကျနော်တို့ ဒီဘိုးဘွားတွေကနေ လက်ဆင့်ကမ်းလာတဲ့ အမည်နာမ တစ်ခု အနေနဲ့ ကျနော်တို့ ကရင်တွေ နေထိုင်တဲ့ တိုင်းပြည်နော်။ ဒါပေမယ့် သူ့ရဲ့ မူရင်းအဓိပ္ပာယ်ကတော့ မကောင်းမှု အလုံးစုံကင်းစင်တဲ့ တိုင်းပြည်လို့ အဓိပ္ပာယ်သက်ရောက်ပါတယ်။ အဲ့ဒီထဲမှာကတော့ ကျနော်တို့ နေထိုင်ကြတာ ဖြစ်တယ်” ဟု ပြောသည်။ KNU အနေဖြင့် ကော်သူးလေပြည် တည်ဆောက်ရေး မူဝါဒကို ၁၉၅၆ ခုနှစ်ကတည်းက စတင်ချမှတ်ခဲ့ခြင်း ဖြစ် ပြီး ယခုလက်ရှိ တော်လှန်ရေးကာလ အကူးအပြောင်းတွင် အပြောင်းအလဲတစ်ခု ဖြစ်ပေါ်စေရန်အတွက် ‘ကော်သူးလေချာတာ’ (Kawthoolei Charter) ကို ရေးဆွဲပြဋ္ဌာန်းကာ လက်တွေ့ကျကျ ဆောင်ရွက်နေပြီ ဖြစ် သည်။ ပဒိုစောတောနီးက ဆက်လက်၍ “နှစ်ပေါင်း ခုနှစ်ဆယ်ထဲမှာပဲ ကျနော်တို့ မယိမ်းမယိုင်ပဲ ပြည်ထောင်စု စစ်စစ် ကို တည်ဆောက်မယ်ဆိုတာ ကျနော်တို့ ခံယူချက်ပြင်းပြင်းနဲ့ပဲ ကျနော်တို့ ချီတက်နေပါတယ်။ အဲဒါကြောင့်မို့ လို့ ကျနော်တို့ ပြောနေတဲ့ ကော်သူးလေပြည်က လွတ်လပ်ချုပ်ခြာအာဏာရှိတဲ့ ကျနော်တို့ သီးခြားနိုင်ငံလည်း မဟုတ်ပါဘူး။ ကျနော်တို့ ပြည်ထောင်စုထဲမှာ ပြည်ထောင်စုအဖွဲ့ဝင် ဆက်ရှိမယ်။ ကျနော်တို့ တခြားညီအစ်ကို လက်တွဲပြီးတော့ အင်မတန်ဖွံ့ဖြိုးတိုးတက် ခိုင်မာတဲ့ ပြည်ထောင်စု၊ သာယာဝပြောတဲ့ ပြည်ထောင်စုတစ်ခု တည်ဆောက်နိုင်ဖို့အတွက် ကျနော်တို့ ဆက်ပြီးတော့ ရုန်းကန်နေကြပါတယ်” ဟု ပြောသည်။ ကော်သူးလေပြည်ကို လက်ရှိ KNU ထိန်းချုပ်ထားသည့် တပ်မဟာ ၇ ခု (သထုံ၊ တောင်ငူ၊ ညောင်လေးပင်၊ မြိတ်-ထားဝယ်၊ ဖာပွန်၊ ဒူးပလာယာ နှင့် ဘားအံခရိုင်) အပေါ် အခြေခံကာ တည်ဆောက်သွားရန် ရည်မှန်းထား သည်။ သို့သော် အဆိုပါဒေသများတွင် ကရင်လူမျိုးများသာမက ဗမာ၊ ရှမ်း၊ မွန်၊ ပအိုဝ်း အစရှိသည့် တိုင်းရင်းသား ပေါင်းစုံ စုပေါင်းနေထိုင်ကြသည့်အတွက် နယ်မြေအငြင်းပွားမှုများကို ရှောင်ရှားကာ အားလုံးလက်ခံနိုင်သည့် ငြိမ်းချမ်းစွာ ယှဉ်တွဲနေထိုင်ရေးမူကို ကျင့်သုံးသွားမည်ဟု ဆိုသည်။ “ကျနော်တို့ ပြည်ထောင်စုကို ဖွဲ့နိုင်ရေးအတွက် ပြည်နယ်အသီးသီးမှာရှိတဲ့ ပြည်နယ်တွေက သူ့မှာသူ ဖွဲ့စည်းပုံ အခြေခံဥပဒေဆိုတာလည်း ရှိရမယ်လေ။ ဒါပေမယ့် ကျနော်တို့ ဒီလိုမျိုး တော်လှန်ရေးကာလ အကူးအပြောင်း ဖြစ်နေတဲ့ ကာလတွေမှာတော့ ဒီလိုမျိုး တကယ်တိကျခိုင်မာတဲ့ ဖွဲ့စည်းပုံအခြေခံဥပဒေကို မသုံးနိုင်သေးတဲ့ အနေအထားမှာ ကော်သူးလေပဋိညာဉ်ဆိုတဲ့ တစ်ခုကိုတော့ ကျနော်တို့ ပြဋ္ဌာန်းပြီးတော့ လုပ်ဆောင်သွားဖို့ ရှိတာပေါ့” ဟု ပဒိုစောတောနီးက အကူးအပြောင်းကာလ အုပ်ချုပ်ရေးယန္တရားနှင့် ပတ်သက်၍ ရှင်းပြသည်။ လက်ရှိမြေပြင်အခြေအနေတွင် စစ်ကောင်စီတပ်များသည် ၂၀၂၁ ခုနှစ်နောက်ပိုင်း ဆုံးရှုံးသွားသော နယ်မြေများ ကို ပြန်လည်ရရှိရန် KNU ထိန်းချုပ်နယ်မြေများအတွင်း အပြင်းအထန် ထိုးစစ်ဆင်နေသဖြင့် တိုက်ပွဲများ နေ့စဉ်နှင့်အမျှ ဖြစ်ပွားလျက်ရှိသည်။ စစ်ရေးတင်းမာမှုများ ကြုံတွေ့နေရသော်လည်း KNU အနေဖြင့် အောက်ခြေမှ အထက်သို့ သွားသည့် (Bottom-up) ပြည်ထောင်စုစနစ်ကို တည်ဆောက်ရန်အတွက် ကော်သူးလေပြည် ဖော်ဆောင်ရေးကို ဆက်လက်ရုန်းကန် သွားမည်ဟု ပြောသည်။

ကော်သူးလေပြည်ကို ပြည်ထောင်စု ယူနစ် တစ်ခု အဖြစ် တည်ထောင်ဖွဲ့စည်းမည်

Mar 2

အီရန် အပေါ်တိုက်ခိုက်မှုနှင့် အီရန်၏ တုန့်ပြန်မှုများအပေါ် အရှေ့တောင်အာရှ နိုင်ငံများ၏တုန့်ပြန်မှု သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၂ ရက်။ အီရန် အပေါ် အမေရိကန်နှင့် အစ္စရေး နိုင်ငံတို့ ပူးတွဲ တိုက်ခိုက်မှုနှင့် အီရန်၏ ဒေသအတွင်း တုန့်ပြန်မှုတို့အပေါ် အရှေ့တောင်အာရှနိုင်ငံများ၏ တု့န်ပြန်မှုများကို The Diplomat မဂ္ဂဇင်းတွင် ဆောင်းပါးရှင် ဆီဘက်စတီယန် စထရန် ဂီယို Sebastian Strangio က ရေးသား တင်ပြထားသည်။ အဆိုပါ ဆောင်းပါး အနှစ်ချုပ်ကို ပြန်လည် တင်ပြထားပါသည်။ မလေးရှားနိုင်ငံက အီရန် တွင် တိုက်ခိုက်မှုများနှင့် အီရန်၏ ဒေသအတွင်း တန်ပြန်တိုက်ခိုက်မှုများကို ရှုတ်ချလိုက်ပြီး အင်ဒို နီးရှား သမ္မတက အီရန်နှင့် အမေရိကန်။ အစ္စရေးတို့ အကြား ကြားဝင် ညှိနှိုင်းပေးရန် အသင့်ရှိသည်ဟု ပြောကြားလိုက်သည်။ ကျန် အရှေ့တောင် အာရှနိုင်ငံ အများစု အနေဖြင့် တိုက်ခိုက်မှုများအပြီးတွင် သက်ဆိုင်ရာ နိုင်ငံများ အနေဖြင့် ထိန်းထိန်းသိမ်းသိမ်းလုပ်ဆောင်ရန်နှင့် နိုင်ငံရေးအရ ဆွေးနွေးမှုများ ပြန်လည်စတင်ရန် တောင်းဆိုချက်များ ထုတ်ပြန်ခဲ့ကြသည်ဟု ဆိုသည်။ ဒေသတွင်းတွင် အပွင့်လင်းဆုံး တုံ့ပြန်ခဲ့သည့်အစိုးရမှာ မွတ်စလင်အများစုနေထိုင်သော မလေးရှားနိုင်ငံဖြစ်သည်။ မလေးရှားနိုင်ငံခြားရေးဝန်ကြီးဌာနသည် အီရန်အပေါ် အမေရိကန်-အစ္စရေး၏ တိုက်ခိုက်မှုများအပြင် ဆော်ဒီအာရေဗျ၊ ဘာရိန်း၊ အာရပ်စော်ဘွားများပြည်ထောင်စု၊ ကူဝိတ်နှင့် ကာတာနိုင်ငံတို့ရှိ အမေရိကန်အခြေစိုက်စခန်းများကို အီရန်က လက်စားချေဒုံးကျည်များဖြင့် ပြန်လည်တိုက်ခိုက်ခဲ့မှုကိုပါ ရှုတ်ချခဲ့သည်။ မလေးရှား နိုင်ငံခြားရေး ဝန်ကြီးဌာန၏ ကြေညာချက်တွင် “ဤအရေးကြီးသောအချိန်တွင် ဒေသတွင်းမတည်မငြိမ်ဖြစ်စေပြီး ပိုမိုကျယ်ပြန့်သော ကမ္ဘာလုံးဆိုင်ရာ အကျိုးဆက်များ ဖြစ်ပေါ်စေနိုင်သည့် တင်းမာမှုများ ထပ်မံမမြင့်တက်စေရန် ဘက်အားလုံးက အစွမ်းကုန် ထိန်းထိန်းသိမ်းသိမ်း လုပ်ဆောင်ရမည်” ဟု ဖော်ပြထားသည်။ မလေးရှားဝန်ကြီးချုပ် အန်ဝါအီဘရာဟင်ကမူ အလီခါမေနီ လုပ်ကြံခံရမှုကို “လုံးဝဥဿုံ” ရှုတ်ချခဲ့ပြီး ဤတိုက်ခိုက်မှုများသည် အရှေ့အလယ်ပိုင်းကို “ကြီးမားသော အန္တရာယ်နှင့် ရေရှည်မတည်ငြိမ်မှု” ဆီသို့ တွန်းပို့လိုက်ခြင်းဖြစ်သည်ဟု ဆိုသည်။ အီရန်အပေါ် တိုက်ခိုက်မှုများကို ရှုတ်ချသည့် လွှတ်တော်အဆိုတစ်ရပ် တင်သွင်းရန်လည်း ၎င်းက ကတိပြုခဲ့သည်။ “ဇီယွန်ဝါဒီ အစ္စရေးရဲ့ ရက်စက်မှုဟာ ဘယ်တော့မှ ရပ်တန့်မှာ မဟုတ်ပါဘူး၊ ဘာလို့လဲဆိုတော့ သူတို့ဟာ လူသားချင်းစာနာစိတ် ကင်းမဲ့သွားကြပြီ ဖြစ်လို့ပါ” ဟု မနေ့က အခမ်းအနားတစ်ခုတွင် ၎င်းက ပြောကြားခဲ့သည်။ အင်ဒိုနီးရှား နိုင်ငံခြားရေးဝန်ကြီးဌာနကလည်း သက်ဆိုင်သူအားလုံးကို “ထိန်းထိန်းသိမ်းသိမ်း လုပ်ဆောင်ရန်နှင့် ဆွေးနွေးမှုနှင့် သံတမန်ရေးကို ဦးစားပေးရန်” တိုက်တွန်းသည့် ကြေညာချက် ထုတ်ပြန်ခဲ့သည်။ ထို့ပြင် “နိုင်ငံတိုင်း၏ အချုပ်အခြာအာဏာနှင့် နယ်မြေပိုင်ဆိုင်မှုကို လေးစားရန်နှင့် အငြင်းပွားမှုများကို ငြိမ်းချမ်းသောနည်းလမ်းဖြင့် ဖြေရှင်းရန် အရေးကြီးကြောင်း” ထပ်လောင်းအတည်ပြုခဲ့သည်။ တစ်ချိန်တည်းမှာပင် အင်ဒိုနီးရှား သမ္မတ ပရာဘိုဝို ဆူဘီယန်တိုက တီဟီရန်သို့ သွားရောက်ကာ “ကြားဝင်စေ့စပ်ပေးရန်” ဆန္ဒရှိကြောင်း ပြောကြားခဲ့သော်လည်း မည်သည့်ဘက်ကမျှ ၎င်း၏အဆိုပြုချက်အပေါ် တုန့်ပြန်ခြင်း မရှိသေးပေ။ တစ်ချိန်တည်းမှာပဲ ထိုင်းနိုင်ငံခြားရေးဝန်ကြီးဌာနရဲ့ ယာယီပြောရေးဆိုခွင့်ရှိသူက ထိုင်းနိုင်ငံ အနေဖြင့် “အခြေအနေကို အလွန်စိုးရိမ်စွာနဲ့ အနီးကပ် စောင့်ကြည့်နေပါတယ်” ဟု သတင်းထောက်များကို ပြောခဲ့သည်။ အရှေ့အလယ်ပိုင်းက ထိုင်းနိုင်ငံသား ၁၁၀,၀၀၀ ကို သတိပေးထားပြီး သူတို့ကို ရွှေ့ပြောင်းဖို့ “အစီအစဉ်” တစ်ခု “ပြင်ဆင်ထားပြီး” ဖြစ်တယ်လို့ သူက ထပ်လောင်း ပြောကြားခဲ့ပါတယ်။ ဖိလစ်ပိုင် နိုင်ငံခြားရေးဝန်ကြီး ထရီဆာ လာဇာရိုက သက်ဆိုင်သူအားလုံးကို တွေ့ဆုံဆွေးနွေးမှုနှင့် ညှိနှိုင်းမှုများဆီသို့ “ချက်ချင်း” ဦးတည်ရန် တောင်းဆိုခဲ့သည်။ ဗီယက်နမ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Pham Thu Hang က စနေနေ့က သတင်းစာရှင်းလင်းပွဲတွင် သူမ၏အစိုးရသည် “သက်ဆိုင်ရာအဖွဲ့အစည်းအားလုံးအနေဖြင့် အမြင့်ဆုံးထိန်းထိန်းသိမ်းသိမ်းလုပ်ဆောင်ရန်၊ တင်းမာမှုမြင့်တက်စေသောလုပ်ရပ်များအားလုံးကို ချက်ချင်းရပ်တန့်ရန်၊ အရပ်သားများနှင့် မရှိမဖြစ်လိုအပ်သော အခြေခံအဆောက်အအုံများကို ကာကွယ်ရန်နှင့် နိုင်ငံတကာဥပဒေ၊ ကုလသမဂ္ဂပဋိဉာဉ်စာတမ်းနှင့် သက်ဆိုင်ရာကုလသမဂ္ဂဆုံးဖြတ်ချက်များနှင့်အညီ ငြိမ်းချမ်းသောနည်းလမ်းများဖြင့် ကွဲပြားမှုများကို ဖြေရှင်းရန်” တောင်းဆိုကြောင်း ပြောကြားခဲ့သည်။ စင်ကာပူနိုင်ငံခြားရေးဝန်ကြီးဌာနက “ညှိနှိုင်းမှုများ မအောင်မြင်ခြင်းနှင့် စစ်ပွဲဖြစ်ပွားခြင်းအတွက် ဝမ်းနည်းကြောင်း” ဖော်ပြခဲ့ပြီး အလားတူပင် “နိုင်ငံတကာဥပဒေနှင့် ကုလသမဂ္ဂပဋိဉာဉ်စာတမ်း၏ အခြေခံမူများနှင့်အညီ ငြိမ်းချမ်းသောဖြေရှင်းချက်ရရှိရန် ညှိနှိုင်းမှုများသို့ ပြန်လည်ဝင်ရောက်ရန်” အဖွဲ့အစည်းအားလုံးကို တိုက်တွန်းခဲ့သည်။ ကမ္ဘောဒီးယားနိုင်ငံခြားရေးဝန်ကြီးဌာနကလည်း အလားတူပင် “သက်ဆိုင်ရာအဖွဲ့အစည်းအားလုံးအနေဖြင့် အရပ်သားများ၏ အသက်များကို ထိခိုက်စေပြီး ငြိမ်းချမ်းရေးကို ထိခိုက်စေမည့် နောက်ထပ်တင်းမာမှုများကို ရှောင်ရှားရန် အမြင့်ဆုံးထိန်းထိန်းသိမ်းသိမ်းလုပ်ဆောင်ရန်” တောင်းဆိုခဲ့သည်။ #အီရန်စစ်ပွဲ #အာဆီယံ #အရှေ့တောင်အာရှနိုင်ငံများ

အီရန် အပေါ်တိုက်ခိုက်မှုနှင့် အီရန်၏ တုန့်ပြန်မှုများအပေါ် အရှေ့တောင်အာရှ နိုင်ငံများ၏တုန့်ပြန်မှု

Mar 2

အီရန် စစ်ပွဲကြောင့် လေယာဉ် ခရီးစဉ်များ ရပ်ဆိုင်း၊ ရေလမ်းကြောင်းများပိတ်ပြီး ရေနံဈေးတက် သတင်းနှင့် မီဒီယာ ကွန်ရက်။ ၂၀၂၆ ခုနှစ် မတ်လ ၂ ရက်။ အရှေ့အလယ်ပိုင်း စစ်ရေးပဋိပက္ခများကြောင့် အီရန်၊ အစ္စရေး၊ အီရတ်၊ ကာတာ၊ ဘာရိန်း၊ ကူဝိတ်နှင့် ဆီးရီးယားနိုင်ငံတို့သည် လေပိုင်နက်များကို ပိတ်သိမ်းခဲ့သဖြင့် ကမ္ဘာတစ်ဝှမ်းရှိ ခရီးသည်များ သောင်တင်လျက်ရှိသည်။ Emirates လေကြောင်းလိုင်းသည် ဒူဘိုင်းအဝင်အထွက်ခရီးစဉ်အားလုံးကို ရပ်နားခဲ့ပြီး British Airways နှင့် Virgin Atlantic တို့လည်း ခရီးစဉ်များဖျက်သိမ်းခြင်းနှင့် လမ်းကြောင်းလွှဲခြင်းများ ပြုလုပ်နေရသည်။ ဗြိတိန်နိုင်ငံခြားရေးရုံးကလည်း ဒေသတွင်းနိုင်ငံများသို့ ခရီးမသွားရန်နှင့် ရောက်ရှိနေသူများ ဘေးကင်းရာတွင် ခိုလှုံရန် သတိပေးချက်ထုတ်ပြန်ထားသည်။ ရေကြောင်းကဏ္ဍတွင်လည်း ဟော်မုဇ်ရေလက်ကြားအနီး၌ သင်္ဘော ၃ စီးထက်မနည်း တိုက်ခိုက်ခံခဲ့ရသည်။ ကမ္ဘာ့ရေနံနှင့် သဘာဝဓာတ်ငွေ့ ၂၀ ရာခိုင်နှုန်းခန့် ဖြတ်သန်းသယ်ယူရာ ယင်းရေလက်ကြားအား မဖြတ်သန်းရန် အီရန်က သတိပေးထားခြင်းကြောင့် ရေကြောင်းကုန်သွယ်မှုများ ရပ်တန့်လုနီးပါး ဖြစ်ပွားခဲ့သည်။ ဤမတည်ငြိမ်မှုများကြောင့် အာရှဈေးကွက်ဖွင့်ချိန်တွင် ကမ္ဘာ့ရေနံဈေးနှုန်းသည် ၁၀ ရာခိုင်နှုန်းကျော်အထိ မြင့်တက်ခဲ့ပြီး ကမ္ဘာ့စီးပွားရေးအပေါ် ကြီးမားသော သက်ရောက်မှုများ ရှိလာနိုင်ကြောင်း ကျွမ်းကျင်သူများက သုံးသပ်ထားသည်။ #အီရန်စစ်ပွဲ #ရေနံစျေးတက် #လေယာဉ်ခရီးစဉ်ရပ်ဆိုင်း

အီရန် စစ်ပွဲကြောင့် လေယာဉ် ခရီးစဉ်များ ရပ်ဆိုင်း၊ရေလမ်းကြောင်းများပိတ်ပြီး ရေနံဈေးတက်

Mar 2

ဒေသအတွင်း အီရန်၏ လက်တုန့်ပြန်မှု သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂ ရက်။ အီရန်နိုင်ငံ၏ တုံ့ပြန်တိုက်ခိုက်မှုများသည် ဒေသတွင်းရှိ နိုင်ငံပေါင်း ၆ နိုင်ငံထက်မနည်းသို့ ပျံ့နှံ့သွားခဲ့ရာ ဒူဘိုင်း၊ ဘာရိန်း၊ ဂျော်ဒန်နှင့် ကူဝိတ်နိုင်ငံတို့တွင် ပေါက်ကွဲမှုများ ဖြစ်ပွားခဲ့သည်။ ဒူဘိုင်းမြို့ရှိ Fairmont ဟိုတယ်အား ဒုံးကျည်ထိမှန်၍ မီးလောင်ကျွမ်းခဲ့သဖြင့် လူ ၄ ဦး ဒဏ်ရာရရှိခဲ့ပြီး၊ အဘူဒါဘီလေဆိပ်တိုက်ခိုက်ခံရမှုတွင် လူ ၁ ဦး သေဆုံးကာ ၇ ဦး ဒဏ်ရာရရှိခဲ့သည်။ ဘာရိန်းနိုင်ငံရှိ အမေရိကန်ရေတပ်အခြေစိုက်စခန်းနှင့် အထပ်မြင့်အဆောက်အအုံတစ်ခုတို့ တိုက်ခိုက်ခံခဲ့ရသလို၊ ကူဝိတ်နိုင်ငံတကာလေဆိပ်သို့လည်း ဒရုန်းတစ်စင်း ပျက်ကျသဖြင့် အဆောက်အအုံ ပျက်စီးကာ ဝန်ထမ်းအချို့ ဒဏ်ရာရရှိခဲ့သည်။ ဂျော်ဒန်နိုင်ငံ Irbid မြို့တွင်လည်း ဒုံးကျည်အပိုင်းအစများကြောင့် မီးလောင်မှုများဖြစ်ပွားခဲ့သည်။ တစ်ချိန်တည်းမှာပင် အီရတ်ရှိ Kataib Hezbollah နှင့် ယီမင်ရှိ ဟူသီ (Houthi) အဖွဲ့တို့ကလည်း အမေရိကန်စစ်စခန်းများကို တိုက်ခိုက်မည်ဟု ကြေညာကာ စစ်ပွဲအတွင်း ပါဝင်လာခဲ့ကြသည်။ အီရန်နိုင်ငံခြားရေးဝန်ကြီးကမူ ဤတိုက်ခိုက်မှုများသည် မိမိကိုယ်ကိုယ်ခုခံကာကွယ်ခြင်းသာ ဖြစ်ကြောင်း ပြောကြားခဲ့သော်လည်း တိုက်ခိုက်ခံရသည့်နိုင်ငံများက ယင်းသည် အချုပ်အခြာအာဏာကို ထိပါးခြင်းဖြစ်သည်ဟု တုံ့ပြန်ခဲ့ကြသည်။ #ဒူဘိုင်း #ဘာရိန်း #ဂျော်ဒန် #ကူဝိတ် #အီရန်တိုက်ပွဲ

ဒေသအတွင်း အီရန်၏ လက်တုန့်ပြန်မှု

Mar 2

အီရန်စစ်ပွဲ အပေါ် နိုင်ငံတကာ တုန့်ပြန်မှုများ သတင်းနှင့် မီဒီယာ ကွန်ရက်။ ၂၀၂၆ ခုနှစ် မတ်လ ၂ ရက်။ အမေရိကန်နှင့် အစ္စရေးတို့၏ သီတင်းပတ်ကုန် တိုက်ခိုက်မှုကြောင့် အီရန်နိုင်ငံ၏ အမြင့်ဆုံးခေါင်းဆောင် အယာတိုလာ အလီခါမေနီ (Ayatollah Ali Khamenei) ကွယ်လွန်သွားပြီဖြစ်ကြောင်း အီရန်အစိုးရသတင်းဌာနများက အတည်ပြုခဲ့သည်။ ယင်းဖြစ်စဉ်ကြောင့် အီရန်နိုင်ငံသည် ဒေသတွင်းရှိ အမေရိကန်စစ်အခြေစိုက်စခန်းများနှင့် အမေရိကန်၏ မဟာမိတ်များဖြစ်သော ကာတာ၊ ဘာရိန်း၊ UAE၊ ဂျော်ဒန်နှင့် ကူဝိတ်နိုင်ငံများသို့ ဒုံးကျည်များဖြင့် လက်တုန့်ပြန်တိုက်ခိုက်ခဲ့သည်။ နိုင်ငံတကာအသိုက်အဝန်းအနေဖြင့် စစ်ပွဲကျယ်ပြန့်လာမည်ကို စိုးရိမ်လျက်ရှိပြီး ကုလသမဂ္ဂအထွေထွေအတွင်းရေးမှူးချုပ်က စစ်ပွဲများချက်ချင်းရပ်ရန် တောင်းဆိုခဲ့သည်။ ရုရှားနှင့် တရုတ်နိုင်ငံတို့က အမေရိကန်နှင့် အစ္စရေး၏လုပ်ရပ်သည် အချုပ်အခြာအာဏာကို ချိုးဖောက်ခြင်းဖြစ်ကြောင်း ရှုတ်ချခဲ့ကြသည်။ တရုတ်အစိုးရက မည်သည့် အကြောင်းပြချက်နှင့် မဆို အခြားနိုင်ငံတစ်ခု၏ ပြည်တွင်းရေးကို လက်နက်အားကိုးပြီး စွက်ဖက်တာကို လက်မခံဘူးဟု ဆိုသည်။ စစ်ပွဲကျယ်ပြန့်လာပါက ကမ္ဘာ့စီးပွားရေးနှင့် ရေနံစျေးနှုန်းကို ထိခိုက်နိုင်တာကြောင့် အားလုံးက ထိန်းထိန်းသိမ်းသိမ်း လုပ်ဆောင်ကြဖို့ လည်း တရုတ်က တိုက်တွန်းထားသည်။ ပြင်သစ်၊ ဂျာမနီနှင့် ဗြိတိန်ခေါင်းဆောင်များကမူ တိုက်ခိုက်မှုတွင် ပါဝင်ခြင်းမရှိကြောင်း ပြောဆိုသော်လည်း အီရန်အနေဖြင့် နျူကလီးယားအစီအစဉ်ကိုရပ်တန့်ကာ ဆွေးနွေးမှုလမ်းကြောင်းကိုရွေးချယ်ရန် တိုက်တွန်းခဲ့သည်။ ဗြိတိန် ဝန်ကြီးချုပ်က အမေရိကန်က ဗြိတိန်ရှိ စစ်အခြေစိုက်စခန်းများကို အသုံးပြုမည်ဆိုပါက သုံးခွင့်ပေးမည်ဟု ပြောသည်။ ဆော်ဒီအာရေဗျနိုင်ငံကမူ အိမ်နီးချင်းနိုင်ငံများအပေါ် အီရန်၏တိုက်ခိုက်မှုကို ပြင်းထန်စွာရှုတ်ချခဲ့သည်။ #အီရန်စစ်ပွဲ #နိုင်ငံတကာ #အစ္စရေး #အမေရိကန်

အီရန်စစ်ပွဲ အပေါ် နိုင်ငံတကာ တုန့်ပြန်မှုများ

Feb 27

တောင်ကိုရီးယား ကလေးမွေးဖွားနှုန်း ပြန်မြင့်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၇ ရက်။ ကမ္ဘာ့ကလေးမွေးဖွားနှုန်း အနိမ့်ဆုံးဖြစ်သော တောင်ကိုရီးယားနိုင်ငံတွင် ၂၀၂၅ ခုနှစ်၌ မွေးဖွားနှုန်း ၀.၈၀ အထိ နှစ်နှစ်ဆက်တိုက် ပြန်လည်မြင့်တက်လာခြင်းက လူဦးရေလျော့နည်းမှု အကျပ်အတည်းအတွက် မျှော်လင့်ချက်တစ်ရပ် ဖြစ်လာစေသည်။ အစိုးရ၏ တွန်းအားပေးမှုကြောင့် လက်ထပ်မှုနှုန်း မြင့်တက်လာခြင်းသည် မွေးဖွားနှုန်းကို အထောက်အကူပြုနေခြင်း ဖြစ်ပါသည်။ သို့သော်လည်း စင်ကာပူ (၀.၉၅)၊ တရုတ် (၁.၀) နှင့် ဂျပန် (၁.၁၈) တို့တွင် မွေးဖွားနှုန်း နိမ့်ကျနေဆဲဖြစ်သည်။ အဓိကအတားအဆီးများမှာ အိမ်ရာဈေးနှုန်းကြီးမြင့်မှု၊ ပညာရေးကုန်ကျစရိတ် မြင့်မားမှုနှင့် အလုပ်ခွင်ဖိအားများကြောင့် ဖြစ်ကြောင်း သုံးသပ်ထားကြပါသည်။ နိုင်ငံတစ်နိုင်ငံ လူဦးရေတည်ငြိမ်ရန် မွေးဖွားနှုန်း ၂.၁ ရှိရန် လိုအပ်သဖြင့် အဆိုပါနိုင်ငံများမှာ စိန်ခေါ်မှုများစွာ ရင်ဆိုင်နေရဆဲ ဖြစ်ပါသည်။ #တောင်ကိုရီးယား #ကလေးမွေးဖွားနှုန်း

တောင်ကိုရီးယား ကလေးမွေးဖွားနှုန်း ပြန်မြင့်လာ

Feb 27

တော်ဝင်ခွေးလေး "MI-6" နှင့် ၄၅ ကြိမ်မြောက် Cobra Gold စစ်ရေးလေ့ကျင့်မှု သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၇ ရက်။ ထိုင်းနိုင်ငံတွင် ကျင်းပလျက်ရှိသော ၄၅ ကြိမ်မြောက် Cobra Gold 2026 စစ်ရေးလေ့ကျင့်မှုတွင် ထိုင်းမင်းသမီး Sirivannavari ၏ တော်ဝင်အလုပ်အကျွေးပြုခွေး "MI-6" သည် ရှာဖွေကယ်ဆယ်ရေးကဏ္ဍ၌ ထူးချွန်စွာ ပါဝင်လေ့ကျင့်ခဲ့သည်။ ဖေဖော်ဝါရီ ၂၆ ရက်နေ့က ပြုလုပ်သော ဆူနာမီဘေးအန္တရာယ် ပုံတူကယ်ဆယ်ရေးလေ့ကျင့်ခန်းတွင် MI-6 သည် အပျက်အစီးများကြား ပိတ်မိနေသူများကို စနစ်တကျ ရှာဖွေဖော်ထုတ်ပေးနိုင်ခဲ့သည်။ ယခုနှစ် စစ်ရေးလေ့ကျင့်မှုတွင် နိုင်ငံပေါင်း ၃၀ မှ စစ်သည်အင်အား ၈,၀၀၀ ကျော် ပါဝင်ပြီး ကုန်း၊ ရေ၊ လေ အပြင် ဆိုက်ဘာနှင့် အာကာသလုံခြုံရေးကိုပါ အထူးပြုလေ့ကျင့်နေခြင်း ဖြစ်သည်။ အဆိုပါစစ်ရေးလေ့ကျင့်မှုတွင် မြန်မာနိုင်ငံကိုမူ ဖိတ်ကြားခြင်း မရှိခဲ့ပါ။ #CobraGold2026 #MI6

တော်ဝင်ခွေးလေး “MI-6” နှင့် ၄၅ ကြိမ်မြောက် Cobra Gold စစ်ရေးလေ့ကျင့်မှု

Feb 27

အမေရိကန်မှီခိုမှုလျှော့ရန် ကနေဒါဝန်ကြီးချုပ် အာရှ-ပစိဖိတ် စည်းရုံးရေးခရီးစဉ် စတင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၇ ရက်။ ကနေဒါဝန်ကြီးချုပ် မာ့ခ် ကာနီ (Mark Carney) သည် အမေရိကန်အပေါ် စီးပွားရေးအရ မှီခိုနေရမှုကို လျှော့ချရန်အတွက် အာရှ-ပစိဖိတ်ဒေသဆိုင်ရာ စည်းရုံးရေးခရီးစဉ်အဖြစ် ယနေ့ (ဖေဖော်ဝါရီ ၂၇ ရက်) တွင် အိန္ဒိယနိုင်ငံ၊ မွန်ဘိုင်းမြို့သို့ ရောက်ရှိလာခဲ့သည်။ ဝန်ကြီးချုပ်သည် မွန်ဘိုင်းမြို့တွင် နှစ်ရက်ကြာနေထိုင်၍ စီးပွားရေးလုပ်ငန်းရှင်များနှင့် တွေ့ဆုံမည်ဖြစ်ပြီး မတ်လ ၂ ရက်နေ့တွင် ဝန်ကြီးချုပ် မိုဒီနှင့် တွေ့ဆုံကာ စွမ်းအင်၊ AI နည်းပညာ၊ ကာကွယ်ရေးနှင့် စားနပ်ရိက္ခာလုံခြုံရေးတို့ကို ဆွေးနွေးသွားမည် ဖြစ်သည်။ ကနေဒါနိုင်ငံသည် အမေရိကန်သမ္မတ ထရမ့်၏ အခွန်တိုးမြှင့်မှုများကြောင့် ပို့ကုန်ကဏ္ဍတွင် အပြောင်းအလဲများ ပြုလုပ်ရန် ကြိုးပမ်းနေခြင်းဖြစ်ပြီး၊ လာမည့် ဆယ်စုနှစ်အတွင်း အမေရိကန်မဟုတ်သော အခြားနိုင်ငံများသို့ ပို့ကုန်တင်ပို့မှုကို နှစ်ဆတိုးရန် ရည်မှန်းထားသည်။ အိန္ဒိယခရီးစဉ် အပြီးတွင် ဩစတြေးလျနှင့် ဂျပန်နိုင်ငံများသို့ ဆက်လက်ထွက်ခွာမည် ဖြစ်သည်။ #MarkCarney #ကနေဒါဝန်ကြီးချုပ် #အာရှပစိဖိတ်ခရီးစဉ်

အမေရိကန်မှီခိုမှုလျှော့ရန် ကနေဒါဝန်ကြီးချုပ် အာရှ-ပစိဖိတ် စည်းရုံးရေးခရီးစဉ် စတင်

« Prev 1 … 40 41 42 43 44 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close