NMG Doh – Page 44 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Feb 25

ယူကရိန်းအရေး ဥရောပသမဂ္ဂအတွင်း သဘောထားကွဲလွဲ၊ ယူကရိန်း ထောက်ပံ့မှု ဟန်ဂေရီ ကန့်ကွက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၅ ရက်။ ရုရှား-ယူကရိန်းစစ်ပွဲ (၄) နှစ်ပြည့်မြောက်ရန် နီးကပ်လာချိန်တွင် ရုရှားအပေါ် ချမှတ်မည့် ဒဏ်ခတ်ပိတ်ဆို့မှုအသစ်များကို ဥရောပသမဂ္ဂ (EU) က အတည်မပြုနိုင်ခဲ့ကြောင်း ဥရောပ သမဂ္ဂက သတင်းထုတ်ပြန်သည်။ ဟန်ဂေရီနိုင်ငံ၏ မမျှော်လင့်ထားသော ကန့်ကွက်မှုများကြောင့် ယခုကဲ့သို့ အစီအစဉ်များ ကြန့်ကြာသွားရခြင်းဖြစ်သည်ဟု EU နိုင်ငံခြားရေးမူဝါဒဆိုင်ရာ အကြီးအကဲ ကာဂျာ ကာလာ့စ် (Kaja Kallas) က ပြောကြားခဲ့သည်။ အဆိုပါ ဒဏ်ခတ်ပိတ်ဆို့မှုများသည် ယူကရိန်းအတွက် ယူရို ၉၀ ဘီလီယံ (ဒေါ်လာ ၁၀၆ ဘီလီယံ) တန်ဖိုးရှိ အကြီးစားချေးငွေအသစ်နှင့်အတူ ရုရှားကို စီးပွားရေးအရ ပိုမိုဖိအားပေးရန် ရည်ရွယ်ခြင်းဖြစ်သည်။ သို့သော် EU အဖွဲ့ဝင်များထဲတွင် ရုရှားနှင့် အရင်းနှီးဆုံးဖြစ်သော ဟန်ဂေရီက ပိတ်ဆို့မှုနှင့် ချေးငွေအစီအစဉ်နှစ်ခုစလုံးကို ဟန့်တားမည်ဟု ခြိမ်းခြောက်ထားသည်။ ဂျာမန်ဝန်ကြီးချုပ် ဖရက်ဒရစ် မာ့ဇ် (Friedrich Merz) က ယခုအချိန်သည် လမ်းဆုံလမ်းခွသို့ ရောက်ရှိနေပြီဖြစ်၍ ယူကရိန်းအပေါ် ထောက်ခံမှုများ မလျော့ပါးစေရန် တိုက်တွန်းထားပြီး ပြင်သစ်သမ္မတ မာခရွန်ကလည်း ယူကရိန်းကို ဆက်လက်ကူညီသွားမည်ဟု ကတိပြုထားသည်။

ယူကရိန်းအရေး ဥရောပသမဂ္ဂအတွင်း သဘောထားကွဲလွဲ၊ ယူကရိန်း ထောက်ပံ့မှု ဟန်ဂေရီ ကန့်ကွက်

Feb 25

တရုတ်က ဂျပန်ကုမ္ပဏီ ၂၀ ကို အမည်ပျက်စာရင်းသွင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်။ ဖေဖော်ဝါရီလ ၂၅ ရက်။ ဂျပန်နိုင်ငံ၏ စစ်ရေးတိုးချဲ့မှုများကို တုံ့ပြန်သည့်အနေဖြင့် တရုတ်စီးပွားရေးဝန်ကြီးဌာနက ဂျပန်ကုမ္ပဏီနှင့် အဖွဲ့အစည်း ၂၀ ကို အမည်ပျက်စာရင်း (Blacklist) သွင်းလိုက်သည်။ ယင်းစာရင်းတွင် Mitsubishi၊ IHI ကော်ပိုရေးရှင်း၊ ဂျပန်အမျိုးသားကာကွယ်ရေးအကယ်ဒမီနှင့် ဂျပန်အာကာသအေဂျင်စီ (JAXA) တို့ ပါဝင်သည်။ အဆိုပါအဖွဲ့အစည်းများသို့ စစ်ဘက်နှင့် အရပ်ဘက် နှစ်မျိုးသုံးပစ္စည်းများ (Dual-use items) တင်ပို့မှုကို တရုတ်အစိုးရက တားမြစ်လိုက်ပြီး၊ Subaru နှင့် ENEOS အပါအဝင် အခြားကုမ္ပဏီ ၂၀ ကိုလည်း စောင့်ကြည့်စာရင်း (Watch list) ထဲသို့ ထည့်သွင်းခဲ့သည်။ ယခုလုပ်ရပ်ကြောင့် ဂျပန်ကုမ္ပဏီကြီးအချို့၏ ရှယ်ယာဈေးနှုန်းများ ကျဆင်းသွားခဲ့သည်။ အထူးသဖြင့် လက်နက်နှင့် လျှပ်စစ်ကားထုတ်လုပ်မှုတွင် အရေးပါသော "မြေရှားသတ္တု" (Rare-earth elements) များ တင်ပို့မှု ကန့်သတ်ခံရနိုင်ခြင်းကြောင့် နည်းပညာကဏ္ဍတွင် ထိခိုက်မှုများ ရှိလာနိုင်ကြောင်း သုံးသပ်ကြသည်။ ဂျပန်အစိုးရကမူ ယင်းသည် နိုင်ငံတကာလုပ်ထုံးလုပ်နည်းနှင့် ကွဲလွဲနေကြောင်း တရုတ်သံရုံးသို့ ကန့်ကွက်လွှာ ပေးပို့ထားသည်။ #တရုတ်ဂျပန်အားပြိုင်မှု #တရုတ်ဂျပန်ကုန်သွယ်ရေး

တရုတ်က ဂျပန်ကုမ္ပဏီ ၂၀ ကို အမည်ပျက်စာရင်းသွင်း

Feb 25

ဂျာမန်ဝန်ကြီးချုပ် တရုတ်နိုင်ငံ ခရီးစဉ်အတွင်း စီးပွား ကူးသန်းရေးနှင့် ယူကရိန်းစစ်ပွဲ ကိစ္စ ဆွေးနွေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၅ ရက်။ ဂျာမနီနိုင်ငံ၏ ဝန်ကြီးချုပ်သစ် ဖရက်ဒရစ် မာ့ဇ် (Friedrich Merz) သည် ရာထူးတက်လာပြီးနောက် ၎င်း၏ ပထမဆုံး တရုတ်နိုင်ငံခရီးစဉ်အဖြစ် ဘေဂျင်းမြို့သို့ ရောက်ရှိနေသည်။ ဝန်ကြီးချုပ်နှင့်အတူ Volkswagen၊ BMW နှင့် Siemens ကဲ့သို့သော ကုမ္ပဏီကြီး ၃၀ မှ အမှုဆောင်အရာရှိချုပ်များလည်း လိုက်ပါသွားကြသည်။ မာ့ဇ်က ယူကရိန်းစစ်ပွဲ ရပ်ဆိုင်းရန်အတွက် တရုတ်နိုင်ငံတွင် ဩဇာအရှိဆုံးဖြစ်ကြောင်းနှင့် သမ္မတ ရှီကျင့်ဖျင်ကသာ ရုရှားကို ဖိအားပေးမည်ဆိုပါက စစ်ပွဲသည် ချက်ချင်းရပ်တန့်သွားနိုင်ကြောင်း ပြောကြားခဲ့သည်။ စစ်ပွဲအရေး ဆွေးနွေးမှုများရှိသော်လည်း ဂျာမန်စီးပွားရေးလုပ်ငန်းရှင်များက တရုတ်ဈေးကွက်တွင် ဆက်လက်ရင်းနှီးမြှုပ်နှံရန် ဆန္ဒရှိနေကြသည်။ တရုတ်ဘက်ကမူ ဂျာမန်ဝန်ကြီးချုပ်ကို လှိုက်လှဲစွာ ကြိုဆိုခဲ့ပြီး၊ စစ်ပွဲအရေးကို နိုင်ငံရေးအရ ဖြည်းဖြည်းချင်း ဖြေရှင်းသွားရန်နှင့် နှစ်နိုင်ငံ စီးပွားရေးပူးပေါင်းဆောင်ရွက်မှုမှတစ်ဆင့် ကမ္ဘာ့တည်ငြိမ်ရေးကို တည်ဆောက်သွားရန် တုံ့ပြန်ခဲ့သည်။ #ဂျာအနီဝန်ကြီးချုပ် #တရုတ်ခရီးစဉ် #ယူကရိန်းစစ်ပွဲရပ်စဲရေး

ဂျာမန်ဝန်ကြီးချုပ် တရုတ်နိုင်ငံ ခရီးစဉ်အတွင်း စီးပွား ကူးသန်းရေးနှင့် ယူကရိန်းစစ်ပွဲ ကိစ္စ ဆွေးနွေး

Feb 25

ထိုင်း ဝန်ကြီးချုပ်ဟောင်း သက်ဆင် ခံဝန်ဖြင့် လွတ်မြောက်ခွင့်ရမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီ ၂၅ ရက်။ ယခုအခါ Klong Prem ဗဟိုအကျဉ်းထောင်တွင် ပြစ်ဒဏ်ကျခံနေရသော ထိုင်းဝန်ကြီးချုပ်ဟောင်း သက်ဆင် ရှင်နာဝပ်သည် ၂၀၂၆ ခုနှစ်၊ မေလ ၉ ရက်နေ့တွင် ခံဝန်ဖြင့် လွတ်မြောက်ခွင့် ရရှိတော့မည်ဖြစ်သည်။ အကျင့်ပျက်ခြစားမှုဖြင့် ချမှတ်ခံထားရသော ထောင်ဒဏ် (၁) နှစ်အနက် (၈) လ ကျခံပြီးနောက် ခံဝန်ဖြင့် လွတ်မြောက်ခွင့် ရမည်ဟု ထိုင်း ပြုပြင်ရေး ဌာန (အကျဉ်းဦးစီးဌာန) က ပြောကြားလိုက်သည်။ လက်ကျန် ရက် အနည်းငယ်သာ ကျန်ရှိခြင်းကြောင့် အီလက်ထရွန်နစ် ခြေချင်းဝတ် (EM bracelet) တပ်ဆင်ရန်လည်း မလိုအပ်ဟု ဆိုသည်။ မေလ ၉ ရက်နေ့သည် စနေနေ့ဖြစ်သော်လည်း အကျဉ်းသားအခွင့်အရေးအရ နံနက် ၇ နာရီမှ ၈ နာရီအတွင်း လွှတ်ပေးရမည်ဖြစ်သည်။ ပြစ်ဒဏ်၏ သုံးပုံနှစ်ပုံ (၈ လ) ကို ကျခံပြီးဖြစ်သောကြောင့် ခံဝန်လျှောက်ထားနိုင်သည့် စည်းကမ်းနှင့် ကိုက်ညီနေခြင်းဖြစ်သည်။ ကျန်ရှိနေသည့် ပြစ်ဒဏ်ကာလ တိုတောင်းသောကြောင့် ခြေချင်းဝတ် တပ်ဆင်ရန် မလိုသော်လည်း ခံဝန်ကြီးကြပ်ရေးဌာနသို့ သတ်မှတ်ထားသည့် ရက်ချိန်းများအတိုင်း သွားရောက် သတင်းပို့ရမည်ဖြစ်သည်။ အကျဉ်းထောင် တာဝန်ရှိသူများ၏ ပြောကြားချက်အရ သက်ဆင်သည် ပြစ်ဒဏ်ကာလ အပြည့်အဝ စေ့သွားသည့်အခါတွင် အကျဉ်းထောင်မှ လွတ်မြောက်ကြောင်း သက်သေခံလက်မှတ်ကို ရရှိမည်ဖြစ်သည်။ သက်ဆင်၏ ထောက်ခံသူများဖြင့် ဖွဲ့စည်းထားသော Pheu Thai ပါတီသည် နောက်ဆုံးကျင်းပသော ရွေးကောက်ပွဲတွင် တတိယ နေရာက အနိုင်ရရှိခဲ့ပြီး နေရာ အများဆုံးရရှိသော ဖွမ်ဂျိုင်ထိုင်းပါတီနှင့် ညွန့်ပေါင်း အစိုးရ ဖွဲ့ရန် သဘောတူညီချက် ရရှိထားပြီး ဖြစ်သည်။ #ထိုင်းဝန်ကြီးချုပ်ဟောင်းသက်ဆင် #PheuThaiParty

ထိုင်း ဝန်ကြီးချုပ်ဟောင်း သက်ဆင် ခံဝန်ဖြင့် လွတ်မြောက်ခွင့်ရမည်

Feb 24

ကမ္ဘောဒီးယားက အမေရိကန်မှ ဒေါ်လာ ၃.၂၄ ဘီလီယံတန်ဖိုးရှိ လေယာဉ်ဝယ်ယူမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ကမ္ဘောဒီးယားဝန်ကြီးချုပ် ဟွန်မာနက် (Hun Manet) ၏ အမေရိကန်ခရီးစဉ်အတွင်း Air Cambodia လေကြောင်းလိုင်းအတွက် Boeing 737 MAX လေယာဉ် အစီး ၂၀ ဝယ်ယူရန် သဘောတူညီချက် ရရှိခဲ့သည်။ ဒေါ်လာ ၃.၂၄ ဘီလီယံ တန်ဖိုးရှိသော ဤအရောင်းအဝယ်သည် နှစ်နိုင်ငံစီးပွားရေး ဆက်ဆံရေးတွင် အရေးပါသော မှတ်တိုင်တစ်ခု ဖြစ်လာခဲ့ကြောင်း ဖေဖော်ဝါရီလ ၂၀ ရက်နေ့တွင် ထုတ်ပြန်ခဲ့သည်။ ဤစီမံကိန်းသည် အမေရိကန်နိုင်ငံတွင် အလုပ်အကိုင်ပေါင်း ၁၂,၀၀၀ ကျော် ဖန်တီးပေးနိုင်မည်ဖြစ်ပြီး ကမ္ဘောဒီးယားနိုင်ငံအတွက်မူ လေကြောင်းကဏ္ဍ ခေတ်မီလာစေရန်နှင့် ခရီးသွားလုပ်ငန်း၊ ကုန်သွယ်ရေးကဏ္ဍများ ဖွံ့ဖြိုးတိုးတက်စေရန် အထောက်အကူပြုမည်ဟု ခမာတိုင်းမ် သတင်းစာ က ဆိုသည်။ ၂၀၂၅ ခုနှစ်အတွင်း နှစ်နိုင်ငံကုန်သွယ်မှု ၂၉ ရာခိုင်နှုန်း တိုးတက်လာခဲ့ခြင်းနှင့်အတူ ကမ္ဘောဒီးယားပို့ကုန်များအပေါ် အမေရိကန်က အခွန်နှုန်းထား ၁၉ ရာခိုင်နှုန်းခန့် သတ်မှတ်ပေးရန်လည်း ယခုခရီးစဉ်အတွင်း ညှိနှိုင်းနိုင်ခဲ့ကြသည်။ #ကမ္ဘောဒီးယား #Boeing737MAX # ကမ္ဘောဒီးယားဝန်ကြီးချုပ်ဟွန်မာနက် #HunManet

ကမ္ဘောဒီးယားက အမေရိကန်မှ ဒေါ်လာ ၃.၂၄ ဘီလီယံတန်ဖိုးရှိ လေယာဉ်ဝယ်ယူမည်

Feb 24

သမ္မတထရမ့်၏ အခွန်မူဝါဒကြောင့် ကမ္ဘာ့ကုန်သွယ်ရေး မရေမရာ ဖြစ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ အမေရိကန်သမ္မတ ဒေါ်နယ်ထရမ့်၏ "အမေရိကန် ပထမ" (America First) မူဝါဒနှင့် အမေရိကန်တရားစီရင်ရေးစနစ်တို့အကြား ဖြစ်ပွားလာသည့် ပဋိပက္ခသည် ကမ္ဘာ့ကုန်သွယ်ရေးလောကတွင် မရေရာမှုများကို ဖြစ်ပေါ်စေလျက် ရှိသည်။ သမ္မတထရမ့်က နိုင်ငံခြားသွင်းကုန်များအပေါ် အခွန်တိုးမြှင့်ရန် ကြိုးပမ်းမှုကို အမေရိကန်တရားရုံးချုပ်က ပယ်ချလိုက်သော်လည်း၊ ၎င်းက ဥပဒေဟောင်းတစ်ခုကို အသုံးပြု၍ ၁၅ ရာခိုင်နှုန်း အခွန်သစ် ထပ်မံတိုးကောက်မည်ဟု တုံ့ပြန်လိုက်ခြင်းကြောင့် နိုင်ငံတကာတွင် ဝေဖန်မှုများ ထွက်ပေါ်လာခဲ့သည်။ တရုတ်နိုင်ငံ စီးပွားကူးသန်းဝန်ကြီးဌာနက ဤလုပ်ရပ်သည် WTO စည်းမျဉ်းများကို ချိုးဖောက်ခြင်းဖြစ်ကြောင်း ပြစ်တင်ရှုတ်ချခဲ့ပြီး တူညီသော တုံ့ပြန်မှုများ ပြုလုပ်သွားမည်ဟု သတိပေးခဲ့သည်။ ဥရောပသမဂ္ဂ (EU) ကလည်း တရားရုံး၏ ဆုံးဖြတ်ချက်ကို ကြိုဆိုသော်လည်း ထရမ့်၏ အခွန်သစ်ခြိမ်းခြောက်မှုအတွက် တန်ပြန်ကောက်ခံမည့် စာရင်းများကို ပြင်ဆင်ထားကြောင်း အသိပေးထားသည်။ ဂျပန်အစိုးရက ဤသို့အခွန်တိုးမြှင့်မှုများသည် ကမ္ဘာ့စီးပွားရေး ပြန်လည်ဦးမော့လာမှုကို အဟန့်အတားဖြစ်စေနိုင်ကြောင်း ထောက်ပြခဲ့သည်။ အိန္ဒိယနိုင်ငံကမူ အခြေအနေအရပ်ရပ်ကို စောင့်ကြည့်ရန်အတွက် ဝါရှင်တန်သို့ သွားရောက်မည့် ကုန်သွယ်ရေးကိုယ်စားလှယ်အဖွဲ့၏ ခရီးစဉ်ကို ခေတ္တဆိုင်းငံ့လိုက်သည်။ #အမေရိကန် #ကုန်သွယ်ခွန် #ကုန်သွယ်ရေး # သမ္မတထရမ့်အခွန်မူဝါဒ

သမ္မတထရမ့်၏ အခွန်မူဝါဒကြောင့် ကမ္ဘာ့ကုန်သွယ်ရေး မရေမရာ ဖြစ်နေ

Feb 24

အီရန် တက္ကသိုလ်ကျောင်းသားများအကြား ဆန္ဒပြပွဲများ ပြန်လည် ကျယ်ပြန့်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ အီရန်အစိုးရက ရာသီဥတု အေးမြမှုကို အကြောင်းပြ၍ ဇန်နဝါရီလဆန်းမှစတင်ကာ ပိတ်ထားခဲ့သော တက္ကသိုလ်များကို စနေနေ့တွင် ပြန်လည်ဖွင့်လှစ်လိုက်ပြီးနောက် ကျောင်းသားထု၏ အစိုးရဆန့်ကျင်ရေး လှုပ်ရှားမှုများ တစ်ကျော့ပြန် ပြင်းထန်လာခဲ့သည်။ ဤဆန္ဒပြပွဲများသည် ဇန်နဝါရီလအတွင်းက အစိုးရ၏ အကြမ်းဖက်နှိမ်နင်းမှုများနောက်ပိုင်း ပထမဆုံးအကြိမ် ပေါ်ပေါက်လာသည့် အကြီးစားလှုပ်ရှားမှုများ ဖြစ်သည်။ မြို့တော်တီဟီရန်ရှိ အမျိုးသမီးသီးသန့် Al-Zahra တက္ကသိုလ် အပါအဝင် အဓိကမြို့ကြီးများတွင် ကျောင်းသားများက လက်ရှိ အစ္စလာမ္မစ်သမ္မတနိုင်ငံတော်အလံကို မီးရှို့ဖျက်ဆီးကြသလို၊ ၁၉၇၉ တော်လှန်ရေးမတိုင်မီ သျှားဘုရင် လက်ထက်က အသုံးပြုခဲ့သော "ခြင်္သေ့နှင့် နေမင်း" ပါ အလံများကို ကိုင်ဆောင်၍ ဆန္ဒပြခဲ့ကြသည်။ ထို့အပြင် ၂၀၂၂ ခုနှစ်ကတည်းက စတင်ခဲ့သော "အမျိုးသမီး၊ ဘဝ၊ လွတ်လပ်မှု" (Woman, Life, Freedom) ဟူသော ကြွေးကြော်သံများလည်း ပြန်လည်ထွက်ပေါ်လာခဲ့သည်။ တက္ကသိုလ်ဝင်းအတွင်း ဆန္ဒပြကျောင်းသားများနှင့် အစိုးရကျောထောက်နောက်ခံပြု Basij လက်နက်ကိုင်များအကြား ထိပ်တိုက်တွေ့ဆုံမှုများ ရှိနေသည်။ တစ်ဖက်တွင်လည်း အစိုးရလိုလားသည့် ကျောင်းသားအုပ်စုများက အမေရိကန်နှင့် အစ္စရေးအလံများကို မီးရှို့ကာ တန်ပြန်ဆန္ဒပြမှုများ ပြုလုပ်ခဲ့ကြသည်။ #အီရန်ဆန္ဒပြပွဲ #အီရန်တက္ကသိုလ်ကျောင်းသား

အီရန် တက္ကသိုလ်ကျောင်းသားများအကြား ဆန္ဒပြပွဲများ ပြန်လည် ကျယ်ပြန့်လာ

Feb 24

ဖိလစ်ပိုင်သမ္မတဟောင်း ဒူတာတေးအား ICC တွင် စတင်စစ်ဆေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ဖိလစ်ပိုင်သမ္မတဟောင်း ရိုဒရီဂို ဒူတာတေး (Rodrigo Duterte) ၏ သမ္မတသက်တမ်းအတွင်း ကျင့်သုံးခဲ့သော မူးယစ်ဆေးဝါး တိုက်ဖျက်ရေးစီမံချက်နှင့် ပတ်သက်၍ လူသားမျိုးနွယ်အပေါ် ကျူးလွန်သည့် ရာဇဝတ်မှုများ ရှိ၊ မရှိကို နယ်သာလန်နိုင်ငံ၊ သည်ဟိဂ်မြို့ရှိ အပြည်ပြည်ဆိုင်ရာ ရာဇဝတ်တရားရုံး (ICC) က စတင်စစ်ဆေးလျက် ရှိသည်။ စွပ်စွဲချက်များအရ ဒူတာတေးသည် ၂၀၁၆ ခုနှစ်မှ ၂၀၂၂ ခုနှစ်အတွင်း မူးယစ်ဆေးဝါး ရောင်းဝယ်ဖောက်ကားသူများနှင့် အသုံးပြုသူများကို တရားဥပဒေမဲ့ သတ်ဖြတ်ရန် အမိန့်ပေးခဲ့သဖြင့် လူပေါင်း ၃၀,၀၀၀ ခန့် သေဆုံးခဲ့ရသည်ဟု ဆိုသည်။ အဆိုပါသေဆုံးသူများထဲတွင် ကလေးသူငယ်များပင် ပါဝင်ခဲ့ကြောင်း လူ့အခွင့်အရေးအဖွဲ့များက ထောက်ပြထားသည်။ လက်ရှိတွင် အသက် ၈၀ အရွယ်ရှိပြီဖြစ်သော သမ္မတဟောင်း ဒူတာတေးသည် နယ်သာလန်နိုင်ငံရှိ အကျဉ်းထောင်တွင် ဖမ်းဆီးထိန်းသိမ်းခံထားရသည်မှာ တစ်နှစ်နီးပါး ရှိပြီဖြစ်သော်လည်း ၎င်းကမူ ပြစ်မှုကျူးလွန်ခြင်းမရှိကြောင်းနှင့် ICC ၏ စီရင်ပိုင်ခွင့်ကို အသိအမှတ်မပြုကြောင်း ငြင်းဆိုထားသည်။ ဖေဖော်ဝါရီလ ၂၃ ရက်နေ့မှစ၍ လေးရက်ကြာ ကျင်းပမည့် ဤကြားနာပွဲအပြီး ရက်ပေါင်း ၆၀ အတွင်း အထောက်အထား ခိုင်လုံမှု ရှိ၊ မရှိကို တရားသူကြီးများက ဆုံးဖြတ်မည် ဖြစ်သည်။ အကယ်၍ အထောက်အထား ခိုင်လုံပါက ဒူတာတေးသည် ICC တွင် ပထမဆုံးအကြိမ် တရားစွဲဆိုခြင်းခံရသည့် အာရှနိုင်ငံခေါင်းဆောင်ဟောင်း တစ်ဦး ဖြစ်လာမည် ဖြစ်သည်။ #ICC #ဒူတာတေး #Dutarta

ဖိလစ်ပိုင်သမ္မတဟောင်း ဒူတာတေးအား ICC တွင် စတင်စစ်ဆေး

Feb 24

တနင်္သာရီတိုင်းတွင် ဇန္နဝါရီလ အတွင်း နေအိမ် ၂၅၀ ကျော် မီးရှို့ဖျက်ဆီးခံရဟု သုတေသနအဖွဲ့ ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ တနင်္သာရီတိုင်းတွင် တစ်လအတွင်း နေအိမ် ၂၅၀ ကျော် မီးရှို့ဖျက်ဆီးခံခဲ့ရပြီး စစ်ဘေးရှောင် ၈ သောင်းကျော် အတွက် ရိက္ခာနှင့် ဆေးဝါးပြတ်လပ်မှု ကြုံတွေ့နေရသည်ဟု အကူအညီပေးနေသူများက ပြောသည်။ တနင်္သာရီတိုင်းအတွင်းရှိ ကျေးရွာများကို စစ်ကော်မရှင်တပ်က စစ်ကြောင်းထိုးဝင်ရောက်ကာ မီးရှို့ဖျက်ဆီးသည့် ဗျူဟာကို အရှိန်မြှင့်ကျင့်သုံးလာခြင်းကြောင့် ဇန်နဝါရီလတစ်လအတွင်း ဒေသခံနေအိမ် ၂၅၀ ကျော် ပြာကျခဲ့ရသည်။ ထို့အပြင် စစ်ဘေးရှောင်ဦးရေ ၈ သောင်းကျော်အထိ မြင့်တက်လာကြောင်း ဒေသတွင်း သုတေသနအဖွဲ့တစ်ခု ဖြစ်သည့် FE5Tanintaryi က ထုတ်ပြန်လိုက်သည်။ မြိတ်ခရိုင်အတွင်းရှိ ကျွန်းစု၊ တနင်္သာရီနှင့် ပုလောမြို့နယ်တို့သည် အများဆုံး မီးရှို့ဖျက်ဆီးခံခဲ့ရသည့် ဒေသများဖြစ်ပြီး၊ ၂၀၂၅ ခုနှစ် စက်တင်ဘာလမှ ယခု ဖေဖော်ဝါရီလဆန်းပိုင်းအထိ ခြောက်လတာကာလအတွင်း တိုင်းတစ်တိုင်းလုံးတွင် နေအိမ် ၈၀၀ ဝန်းကျင် မီးလောင်ပျက်စီးခဲ့ရသည်ဟု FE5 Tanintharyi က ဆိုသည်။ FE5Tanintaryi ၏ အယ်ဒီတာတစ်ဦးက လက်ရှိမြေပြင်အခြေအနေနှင့် ပတ်သက် ယခုကဲ့သို့ ပြောသည်။ “နေအိမ်မီးရှို့ခံရတဲ့ ပြည်သူတွေက စားရေးသောက်ရေးအပြင် နေထိုင်ရေးအတွက်ပါ အခက်တွေ့နေကြတဲ့ အနေအထား ရှိတယ်။ အဓိကကတော့ စစ်ကောင်စီတပ်က သူတို့ စစ်ကြောင်းတွေ၊ စခန်းတွေ တိုက်ခိုက်ခံရ တိုင်း အနီးနားက ကျေးရွာကို ပိုပြီး မီးရှို့တဲ့ ဗျူဟာကို ကျင့်သုံးလာတာပါ။” စစ်ကော်မရှင်တပ်သည် ဒေသခံလူထုအကြား အကြောက်တရားဖြစ်စေရန်နှင့် တော်လှန်ရေးအင်အားစုများ အပေါ် ထောက်ပံ့မှုအားနည်းသွားစေရန် ရည်ရွယ်၍ နေအိမ်များကို မီးရှို့နေခြင်းဖြစ်ကြောင်း၊ စစ်ကြောင်းထိုး လာစဉ် ရွာသားများကို ခေါ်ယူ၍ ‘တိုက်ခိုက်ခံရပါက ရွာကို မီးရှို့မည်’ ဟု ပေါ်ပေါ်တင်တင် ခြိမ်းခြောက်လေ့ရှိ သည်ဟု ဆိုသည်။ “တော်လှန်ရေးတပ်တွေကြောင့်မို့လို့ ရွာတွေကို မီးရှို့ရတာ ဆိုတဲ့ ဇာတ်ညွှန်းကို သူတို့က ပိုပြီးတော့ အကောင် အထည် ဖော်လာတာမျိုး တွေ့ရတယ်” ဟု အဆိုပါ အယ်ဒီတာက ဆက်ပြောသည်။ မီးရှို့ဖျက်ဆီးမှုများအပြင် အရပ်သားများကို လူသားဒိုင်းအဖြစ် ဖမ်းဆီးခြင်း၊ နေအိမ်ပစ္စည်းများ ဖောက်ထွင်း ခိုးယူခြင်းနှင့် လက်နက်ကြီး၊ ရေကြောင်းပစ်ခတ်မှုများကြောင့် ဇန်နဝါရီလအတွင်း နေရပ်စွန့်ခွာထွက်ပြေးရသူ အနည်းဆုံး ၈၅,၀၀၀ ခန့်အထိ ရှိလာခဲ့သည်။ ၎င်းတို့အနက် ထောင်ဂဏန်းခန့်သာ စစ်ဘေးရှောင်စခန်းများတွင် ခိုလှုံနိုင်ပြီး အများစုမှာ တောတောင်နှင့် ဥယျာဉ်ခြံများအတွင်း ဆိုးရွားစွာ နေထိုင်နေကြရသည်။ လက်ရှိ စစ်ဘေးရှောင်များ၏ ကျန်းမာရေးအခြေအနေနှင့် ပတ်သက်၍လည်း FE5Tanintaryi အယ်ဒီတာက ယခုကဲ့သို့ သတိပေးထားသည်။ “စစ်ဘေးရှောင်တွေမှာ အရေပြားရောဂါနဲ့ ငှက်ဖျားရောဂါ အဖြစ်များနေတဲ့အတွက် ဆေးဝါးလိုအပ်ချက်က အရမ်းမြင့်မားနေတယ်။ တိုက်ပွဲတွေ ငြိမ်တဲ့အချိန် ရွာထဲ ခဏပြန်ဝင်လိုက်၊ စစ်ကြောင်းလာရင် ပြန်ပြေးလိုက် နဲ့ စားနပ်ရိက္ခာ လိုအပ်ချက်ကလည်း အရမ်းများနေတာ သတိပြုမိတယ်။” ဇန်နဝါရီလအတွင်း စစ်ကော်မရှင်က ပြုလုပ်ခဲ့သည့် ရွေးကောက်ပွဲ အပိုင်း (၂) နှင့် (၃) ကာလများအတွင်း တိုက်ပွဲပေါင်း ၅၈ ကြိမ်ထက်မနည်း ဖြစ်ပွားခဲ့ပြီး စစ်တပ်ဘက်က ဒရုန်းဖြင့် ဗုံးချတိုက်ခိုက်မှုများ ပိုမိုလုပ် ဆောင်လာသည်။ ရှေ့လျှောက်တွင် တိုက်ပွဲများ ပိုမိုပြင်းထန်လာနိုင်ပြီး အလှူရှင်နည်းပါးလာခြင်းကြောင့် စစ်ဘေးရှောင်ကူညီရေး အဖွဲ့များမှာ ရှိနေသည့် လူဦးရေကိုပင် လုံလောက်စွာ မထောက်ပံ့နိုင်သည့် စိန်ခေါ်မှုကြီးနှင့် ရင်ဆိုင်နေရကြောင်း မြေပြင်ရှိ သတင်းရင်းမြစ်များက ပြောသည်။    ဓာတ်ပုံ - The Tanintharyi Times (ပုံဟောင်း) #တနင်္သာရီတိုင်း #နေအိမ်မီးရှို့ #စစ်ကော်မရှင် #FE5Tanintaryi #ပုလောမြို့နယ် #မြိတ်ခရိုင်

တနင်္သာရီတိုင်းတွင် ဇန္နဝါရီလ အတွင်း နေအိမ် ၂၅၀ ကျော် မီးရှို့ဖျက်ဆီးခံရဟု သုတေသနအဖွဲ့ ဆို

« Prev 1 … 42 43 44 45 46 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close