NMG Doh – Page 45 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Feb 24

ဗုံးသီးဟောင်း တစ်လုံးကို စမ်းသပ်စစ်ဆေးရာမှ ဒီးမော့ဆို ဒေသခံ ကာကွယ်ရေး တပ်ဖွဲ့ဝင် ၂ ဦး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ကရင်နီပြည်၊ ဒီးမော့ဆိုမြို့နယ် အနောက်ဘက်ခြမ်း တစ်နေရာတွင် မပေါက်ကွဲသေးသည့် လက်နက်ကြီး ဗုံးသီးဟောင်းတစ်လုံးကို စမ်းသပ်စစ်ဆေးရာမှ ပေါက်ကွဲမှုဖြစ်ပွားပြီး ဒေသခံကာကွယ်ရေးတပ်ဖွဲ့ဝင် ၂ ဦး သေဆုံးကာ ၁ ဦး ပြင်းထန်ဒဏ်ရာရရှိခဲ့သည်။ ဖြစ်စဉ်မှာ ပြီးခဲ့သည့် ဖေဖော်ဝါရီလ ၂၂ ရက် နံနက် ၈ နာရီခန့်တွင် ဒီးမော့ဆိုမြို့နယ် အနောက်ဘက်ခြမ်းရှိ တဲအိမ်တစ်လုံး၌ ဖြစ်ပွားခဲ့ခြင်းဖြစ်သည်။ စစ်ကော်မရှင်တပ်မှ ပစ်ခတ်ထားသော်လည်း မပေါက်ကွဲဘဲ ကျန်ရှိနေသည့် ၆၀ မမ လက်နက်ကြီးကျည်အား ဒေသခံကာကွယ်ရေးတပ်ဖွဲ့ဝင် ၃ ဦးက ပြန်လည်အသုံးပြုရန်ရည်ရွယ်၍ စနက်တံဖြုတ်ကြည့်ရာမှ ပေါက်ကွဲမှု ဖြစ်ပွားခဲ့ခြင်းဖြစ်သည်။ ဒေသတွင်း ခိုလှုံနေထိုင်သည့် စစ်ဘေးရှောင်တစ်ဦးက “ဗုံးသီးက ရှိနေတာ တော်တော်ကြာပြီ။ ဘယ်ကတည်း က ကျထားတာလည်း မသိဘူး။ သူတို့ကလည်း တွေ့တော့ အဟောင်းဆိုပြီး ထင်တာ။ ပြန်သုံးလို့လည်းရအောင် ဖြုတ်ကြည့်မယ်ဆိုပြီး ဖြုတ်လိုက်တာနဲ့ ထကွဲတယ် ပြောတယ်။ ဒဏ်ရာရထားတဲ့တစ်ယောက် အပြောပေါ့။ သူတို့ အသံကြားတာနဲ့ ချက်ချင်းသွားတာပဲ။ ဟိုရောက်တော့ တစ်ယောက်က သေနေပြီ” ဟု ပြောသည်။ ပေါက်ကွဲမှုအတွင်း အသက် ၃၀ ဝန်းကျင်အရွယ်ရှိ အမျိုးသား ၂ ဦး သေဆုံးခဲ့ရပြီး၊ ကျန်ရှိသည့်တစ်ဦးမှာမူ ခြေထောက်တွင် ပြင်းထန်ဒဏ်ရာများ ရရှိခဲ့သဖြင့် အရေးပေါ် ကုသပေးနေရကြောင်း စစ်ရှောင်များက ပြော သည်။ ၎င်း၏ ဒဏ်ရာမှာ စိုးရိမ်ရသည့်အခြေအနေရှိနေပြီး အခြေအနေ ပိုမိုဆိုးရွားလာပါက ခြေထောက်ဖြတ်ပစ်ရမည့် အခြေအနေတွင် ရှိနေသည်ဟု နီးစပ်သူများက ပြောဆိုသည်။ နီးစပ်သည့် ကာကွယ်ရေးတပ်ဖွဲ့ဝင်တစ်ဦးက “တစ်ယောက်က ပွဲချင်းပြီးတယ်။ နောက်တစ်ယောက်က ဆေးရုံ မှာ ဆုံးတာ။ ရောက်တာနဲ့ ဘာမှမကြာလိုက်ဘူး။ ဒဏ်ရာပြင်းလို့လား မသိဘူး။ ကုတင်ပေါ်ရောက်တာနဲ့ အသက်ထွက်တာပဲ။ ဘာမှတောင် သူမပြောနိုင်တော့ဘူး” ဟု ပြောသည်။ လက်ရှိတွင် ဒီးမော့ဆိုမြို့နယ်၏ ၉၀ ရာခိုင်နှုန်းခန့်ကို ကရင်နီတော်လှန်ရေး ပူးပေါင်းတပ်ဖွဲ့များက ထိန်းချုပ်ထား သော်လည်း မြို့ပေါ်နေရာအချို့တွင် စစ်ကော်မရှင်တပ်၏ ခလရ ၄၂၇ နှင့် ခလရ ၁၀၂ တပ်ရင်းများက အခိုင်အမာ နေရာယူထားဆဲဖြစ်သည်။ စစ်ကော်မရှင်တပ်သည် ပြီးခဲ့သည့် ရွေးကောက်ပွဲမတိုင်မီနှင့် ရွေးကောက်ပွဲကာလများအတွင်း ဒီးမော့ဆိုမြို့နယ် အား အလုံးစုံပြန်လည်ထိန်းချုပ်နိုင်ရန် လေကြောင်းနှင့် လက်နက်ကြီး တိုက်ခိုက်မှုများကို အဆက်မပြတ် ပြုလုပ်ခဲ့သည်။ ယခု ရွေးကောက်ပွဲအပြီးကာလတွင်လည်း မြေပြင်ထိုးစစ်များကို ယခင်ထက် ပိုမိုအရှိန်မြှင့် လုပ်ဆောင်လာနေ သဖြင့် မြေပြင်တွင် မပေါက်ကွဲသေးသည့် လက်နက်ကြီးကျည် အကြွင်းအကျန်များမှာ ဒေသခံများနှင့် တော်လှန်ရေးအဖွဲ့ဝင်များ အတွက် ကြီးမားသော ခြိမ်းခြောက်မှုတစ်ခု ဖြစ်နေဟု ဆိုကြသည်။ #စစ်လက်ကျန်ပစ္စည်း #ပေါက်ကွဲ #ကရင်နီပြည် #ဒီးမော့ဆိုမြို့နယ်

ဗုံးသီးဟောင်း တစ်လုံးကို စမ်းသပ်စစ်ဆေးရာမှ ဒီးမော့ဆို ဒေသခံ ကာကွယ်ရေး တပ်ဖွဲ့ဝင် ၂ ဦး သေဆုံး

Feb 24

တောင်ကြီးတွင် အမျိုးသမီးများကို စစ်မှုထမ်းရန်အတွက် စာရင်းကောက်ယူသဖြင့် လူထု အကြား စိုးရိမ်မှု မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ရှမ်းပြည်၏ မြို့တော် တောင်ကြီးမြို့ပေါ်ရှိ ရပ်ကွက်အချို့တွင် ယခုဖေဖော်ဝါရီလ နောက်ဆုံးပတ်အတွင်း အမျိုးသမီးများကိုပါ စစ်မှုထမ်းရန်အတွက် စာရင်းကောက်ယူမှုများ စတင်ပြုလုပ်လာသဖြင့် မြို့ခံလူထုအကြား စိုးရိမ်ထိတ်လန့်နေကြသည်။ စစ်ကော်မရှင် လက်အောက်ခံ အထွေထွေအုပ်ချုပ်ရေးဦးစီးဌာနက တောင်ကြီးမြို့ရှိ ကန်အောက်၊ ဈေးပိုင်းနှင့် ဟော်ကုန်းရပ်ကွက်များတွင် စစ်မှုထမ်းရန် လိုအပ်ချက်အရဟုဆိုကာ အသက် (၁၈) နှစ်မှ (၂၇) နှစ်အတွင်းရှိ အမျိုးသမီးငယ်များကို အဓိကပစ်မှတ်ထား စာရင်းကောက်ယူနေခြင်းဖြစ်သည်။ စာရင်းကောက်ယူရာတွင် အမျိုးသမီးများကို စိတ်အေးစေမည့် စကားများဖြင့် ဖျောင်းဖျပြောဆိုမှုများ ရှိနေ ကြောင်း ဈေးပိုင်းရပ်ကွက်အတွင်းရှိ စစ်မှုထမ်းရန် အကျုံးဝင်သည့် အမျိုးသမီးငယ်တစ်ဦးက ပြောပြသည်။ "သူတို့ပြောပုံအရတော့ လောလောဆယ် စာရင်းသက်သက်ပဲတဲ့။ အရမ်းမကြောက်ဖို့တော့ ပြောတယ်။ ခေါ်ရင်လည်း မိန်းကလေးဆိုတော့ စစ်မတိုက်ရဘူးပေါ့။ ဘွဲ့ရဆိုရင် သူတို့ ရာထူးပေးမယ်။ နှစ်ပြည့်ရင်လည်း ထွက်လို့ရမယ်ပေါ့။ ဒါပေမဲ့ ရပ်ကွက်တိုင်းတော့ မလာသေးဘူး ပြောတယ်" ဟု ၎င်းက ပြောသည်။ လက်ရှိသတ်မှတ်ချက်အရ Non-CDM ဝန်ထမ်းများ၊ အိမ်ထောင်သည်များ၊ ကလေးရှိသူများနှင့် ကျောင်းသူများ ကိုမူ ကင်းလွတ်ခွင့်ပေးထားသေးကြောင်း ဆိုသည်။ သို့သော်လည်း စာရင်းသွင်းခံရသူများကိုမူ နီးစပ်ရာစစ်တပ်သို့ အမြန်ဆုံးသတင်းပို့ရန်နှင့် ဤသတင်း အချက် အလက်များကို အွန်လိုင်းပေါ်တင်ခြင်း၊ ပေါက်ကြားအောင်ပြုလုပ်ခြင်းများ လုံးဝမပြုလုပ်ရန် တင်းကျပ်စွာ မှာကြားထားကြောင်း မြို့ခံများက ပြောသည်။ ဟော်ကုန်းရပ်ကွက်ရှိ သမီးပျိုနှစ်ဦးရှိသည့် မိခင်တစ်ဦးကမူ လက်ရှိကင်းလွတ်ခွင့်များအပေါ် စိတ်မအေးနိုင်ဘဲ ရှေ့ရေးအတွက် စိုးရိမ်မကင်း ဖြစ်နေသည်။ "တောင်ကြီးမှာတော့ စစ်မှုထမ်းစထွက်ကတည်းက ကလေးတွေ ကျောင်းပြန်တက်ကြတယ်လေ။ အဲဒီအတွက် က စိတ်အရမ်းမပူရဘူး။ ကျမစိုးရိမ်တာက အခုအခြေအနေမဟုတ်ဘူး။ နောက်ပိုင်း ခေါ်စရာလူကုန်သွားရင် ကျောင်းသားတွေဘက် လှည့်မှာ။ အဲဒီကျရင် ကျောင်းသားလား၊ ကျားလား၊ မလား အကုန်ပါမှာ။ အဲဒီ တစ်ချက်တော့ ကျမသမီးတွေအတွက် စိတ်ပူတယ်" ဟု ၎င်းက ပြောသည်။ ယခုစာရင်းကောက်ယူထားသူများကို လာမည့်မတ်လကုန် သို့မဟုတ် သင်္ကြန်ကာလအပြီးတွင် ဆင့်ခေါ်ဖွယ်ရှိ သည်ဟု မြို့ခံများအကြား သတင်းများ ပျံ့နှံ့နေသည်။ မြို့မဈေးအနီးရှိ ဈေးသည်တစ်ဦးကမူ လူစည်ကားရာ ရပ်ကွက်များကို ဦးစားပေးကောက်ယူခြင်းမှာ သတင်း ပြန့်နှံ့မှုကို ထိန်းချုပ်ရန် ရည်ရွယ်ပုံရကြောင်းနှင့် အုပ်ချုပ်ရေးမှူးအချို့မှာ ၎င်းတို့သားသမီးများကို ဝန်ထမ်း စာရင်းသွင်းကာ ကင်းလွတ်ခွင့်ရအောင် ကြိုတင်စီစဉ်နေကြကြောင်း သုံးသပ်ပြောဆိုသည်။ မြို့မဈေးရှိ ဈေးသည်တစ်ဦးက “ဒီရပ်ကွက်တွေက ဈေးနားပတ်ပတ်လည်ဆိုတော့ လူဝင်လူထွက်များ တယ် လေ။ စာရင်းအရင်ကောက်ရင် သတင်းပြန့်မလား တွေးတာလည်း ပါမှာပါ။ တခြားရပ်ကွက်တွေက အသံ မကြား ဘူးလေ။ အုပ်ကြီးတချို့ကတော့ သူတို့ သားသမီးတွေ ဝန်ထမ်းစာရင်း သွင်းထားပြီ” ဟု ပြောသည်။ စစ်ကော်မရှင်၏ စစ်မှုထမ်းဥပဒေတွင် အပတ်စဉ် (၅) မှစ၍ အမျိုးသမီးများကို မိမိဆန္ဒအလျောက်သာ လက်ခံ မည်ဟု ကြေညာထားသော်လည်း တောင်ကြီးမြို့တွင် ယခုကဲ့သို့ အိမ်တိုင်ရာရောက် စာရင်းကောက်ယူလာ ခြင်းမှာ အတင်းအကြပ် စုဆောင်းမည့်သဘော သက်ရောက်နေသည်။ ရှမ်းပြည် တောင်ပိုင်းရှိ မြို့ကြီးများတွင် စစ်ကော်မရှင်၏ အုပ်ချုပ်ရေးယန္တရား ပိုမိုတင်းကျပ်လာခြင်းနှင့်အတူ နိုင်ငံရေး တက်ကြွလှုပ်ရှားသူများ နည်းပါးသွားသည့် အခြေအနေကို အခွင့်ကောင်းယူကာ ယခုကဲ့သို့ အမျိုးသမီး များကိုပါ စစ်မှုထမ်းရန် ပထမဆုံးအကြိမ် စာရင်းကောက်ယူလာခြင်းဖြစ်ကြောင်း ဆိုကြသည်။ #တောင်ကြီး #စစ်မှုထမ်း #အမျိုးသမီး #စစ်ကော်မရှင် #အမျိုးသမီးစစ်မှုထမ်း

တောင်ကြီးတွင် အမျိုးသမီးများကို စစ်မှုထမ်းရန်အတွက် စာရင်းကောက်ယူသဖြင့် လူထု အကြား စိုးရိမ်မှု မြင့်တက်

Feb 24

ကျေးရွာဈေးတန်း ဗုံးကြဲ တိုက်ခိုက်ခံရ၊ ကလေးနှင့် အမျိုးသမီးများ အပါအဝင် အရပ်သား ၁၇ ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရခိုင်ပြည် ပုဏ္ဏားကျွန်း မြို့နယ်အတွင်းရှိ ကျေးရွာဈေးတန်းတစ်ခုကို ဖေဖော်ဝါရီ ၂၄ ရက် မွန်းလွဲပိုင်းတွင် စစ်တပ်က လေကြောင်းမှ ဗုံးကြဲတိုက်ခိုက်ခဲ့ခြင်းကြောင့် ကလေးငယ်များနှင့် အမျိုးသမီးများအပါအဝင် အရပ်သားပြည်သူ ၁၇ ဦး အစုလိုက်အပြုံလိုက် သေဆုံးမှု ဖြစ်ပွားခဲ့သည်။ ယနေ့ မွန်းလွဲ ၂ နာရီ ၇ မိနစ်အချိန်ခန့်တွင် စစ်ကော်မရှင်တပ်၏ ဂျက်ဖိုက်တာတစ်စီးက ပေါင် ၅၀၀ ဗုံး နှစ်လုံးအား ပုဏ္ဏားကျွန်းမြို့နယ်ရှိ လူစည်ကားရာ ယိုးငူကျေးရွာဈေးတန်းကို ၏ကြဲချခဲ့ခြင်းဖြစ်ကြောင်း အာရက္ခတပ်တော် (AA) က အတည်ပြု ထုတ်ပြန်ထားသည်။ ထိုတိုက်ခိုက်မှုကြောင့် ဈေးရောင်းဈေးဝယ်လုပ်နေသူများနှင့် စစ်ဘေးရှောင်များအကြား သေဆုံးသူ ၁၇ ဦးအပြင် နောက်ထပ် ၁၄ ဦးမှာလည်း ဒဏ်ရာပြင်းထန်စွာ ရရှိခဲ့ကြသည်။ မြေပြင်တွင် ကူညီကယ်ဆယ်ရေးလုပ်ဆောင်နေသည့် ဒေသခံတစ်ဦးက “ဈေးတန်းကတော့ ပျက်စီးသွားတာပဲ။ ဗုံးက ဈေးထဲကို ကျတာပေါ့နော်။ သေတဲ့သူတွေထဲမှာ ကလေးတွေနဲ့ အမျိုးသမီးတွေက အများဆုံးပဲ။ ဒဏ်ရာရတဲ့သူတွေလည်း များတယ်” ဟု ပြောသည်။ ယခု ၂၀၂၆ ခုနှစ်အတွင်း စစ်ကော်မရှင်တပ်သည် ရခိုင်ပြည်အနှံ့ စစ်ရေးရှုံးနိမ့်မှုများကို တုံ့ပြန်သည့်အနေဖြင့် ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ဘူးသီးတောင်နှင့် ကျောက်ဖြူမြို့နယ် တို့ရှိ လူနေရပ်ကွက်နှင့် ကျေးရွာများကို လေကြောင်းမှ ဆက်တိုက်တိုက်ခိုက်နေခြင်းဖြစ်သည်။ တိုက်ပွဲမရှိသည့် နေရာများကိုပါ ပစ်မှတ်ထားလာခြင်းကြောင့် ရခိုင်ပြည်သူများမှာ လေကြောင်းအန္တရာယ်ကို အကြီးအကျယ် စိုးရိမ်ထိတ်လန့်နေကြရသည်။ ယနေ့ လေကြောင်းဗုံးကြဲမှုထဲတွင် လူနေအိမ်နှင့် ဈေးဆိုင်ခန်း အချို့လည်း မီးလောင်ပြာကျသွားခဲ့ရသည်။ ပုဏ္ဏားကျွန်းမြို့နယ်မှ ပရဟိတလုပ်ဆောင်နေသူ ကိုဝေဟင်အောင်က “သေဆုံး ဦး ရေ တိုးလာတယ်။ ၁၇ ဦးရှိသွားပြီ။ ပုဏ္ဏားကျွန်းမြို့နယ်၊ ယိုးငူ ကျေးရွာကို အကြမ်းဖက် စစ် ကော်မရှင်က ၂း၀၆ နာရီခန့် လေယဥ်နဲ့ ပစ်ခတ်တဲ့အတွက် သေဆုံးသူ ၁၂ဦးနဲ့ ဒဏ်ရာရသူ ၂၀ဦးထက်မနည်း ရှိဟု ကနဦးသိရ” ဟု ၎င်း၏ လူမှုကွန်ရက်စာမျက်နှာတွင် ရုပ်သံဖိုင်နှင့်အတူ တင်ထားသည်။ ယခုဖြစ်ရပ်သည် အာရက္ခတပ်တော် (AA) ထိန်းချုပ်ထားသည့် နယ်မြေအတွင်း လတ်တလောကာလ၌ လူအသေအပျောက် အများဆုံး ဖြစ်ရပ်တစ်ခု ဖြစ်လာခဲ့သည်။ စစ်ကော်မရှင်တပ်သည် ယမန်နေ့ညပိုင်းကလည်း စစ်ကိုင်းတိုင်း၊ မြင်းမူမြို့နယ်ကို လေကြောင်းမှ ဗုံးကြဲခဲ့သဖြင့် ကလေးငယ်တစ်ဦးအပါအဝင် ၁၀ ဦး သေဆုံးခဲ့သေးသည်။ အာရက္ခတပ်တော်က အုပ်ချုပ်ရေးယန္တရား ဖော်ဆောင်နေသည့် ဒေသများကို စစ်ကော်မရှင်တပ်က ပစ်မှတ်ထား ကာ လေကြောင်းဖြင့် ဆက်တိုက် တိုက်ခိုက်နေသဖြင့် အရပ်သားသေဆုံးမှုမှာ တစ်နေ့ထက်တစ်နေ့ မြင့်တက် လျက်ရှိသည်။ #ပုဏ္ဏားကျွန်းလေကြောင်းတိုက်ခိုက်မှု #ရခိုင်ပြည်နယ် #ကျေးရွာစျေးတန်း #ဂျက်ဖိုက်တာ

ကျေးရွာဈေးတန်း ဗုံးကြဲ တိုက်ခိုက်ခံရ၊ ကလေးနှင့် အမျိုးသမီးများ အပါအဝင် အရပ်သား ၁၇ ဦးသေဆုံး

Feb 24

ဗြိတိန်အကယ်ဒမီ (BAFTA) ဆုပေးပွဲသတင်းထုတ်လွှင့်မှုအတွင်း လူမျိုးရေး စော်ကားသည့် အော်ဟစ်သံများ ပါဝင်ခဲ့မှုအပေါ် BBC တောင်းပန် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၄ ရက်။ ဗြိတိန်နိုင်ငံ၏ အမြင့်ဆုံး အကယ်ဒမီ ရုပ်ရှင်ထူးချွန်ဆုပေးပွဲဖြစ်သော BAFTA ဆုပေးပွဲ ထုတ်လွှင့်မှုအတွင်း လူမျိုးရေးခွဲခြားစော်ကားသည့် အသုံးအနှုန်းများ ပါဝင်သွားခဲ့ခြင်းနှင့် ပတ်သက်၍ BBC သတင်းဌာနက တရားဝင် ပြန်လည်တောင်းပန်ခဲ့သည်။ ဆုပေးပွဲအခမ်းအနားတွင် လူမည်းမင်းသားများဖြစ်ကြသော မိုက်ကယ် ဘီ ဂျော်ဒန် (Michael B. Jordan) နှင့် ဒယ်လ်ရွိုင်း လင်ဒို (Delroy Lindo) တို့က စင်မြင့်ပေါ်၌ ပထမဆုံးဆုကို ပေးအပ်နေစဉ်အတွင်း၊ ဧည့်သည်တော်အဖြစ် တက်ရောက်လာသူ ဂျွန် ဒေဗစ်ဆင် (John Davidson) က လူမျိုးရေးစော်ကားသည့် စကားလုံးများကို အော်ဟစ်ခဲ့ခြင်း ဖြစ်ပါသည်။ ဂျွန် ဒေဗစ်ဆင်သည် မိမိကိုယ်တိုင် မထိန်းချုပ်နိုင်ဘဲ အကြောဆွဲခြင်းနှင့် အသံများထွက်ပေါ်ခြင်း ဖြစ်တတ်သည့် တောင်းရက်ဝေဒနာစု (Tourette’s Syndrome) ခံစားနေရသူ တစ်ဦးဖြစ်ပါသည်။ အဆိုပါ အခမ်းအနားကို တိုက်ရိုက်ထုတ်လွှင့်ခြင်းမဟုတ်ဘဲ ၂ နာရီခန့် နောက်ကျ၍ ထုတ်လွှင့်ခဲ့ခြင်းဖြစ်သော်လည်း BBC အနေဖြင့် အဆိုပါ စော်ကားသည့် အော်ဟစ်သံများကို တည်းဖြတ်ဖြတ်တောက်ခြင်း (Edit) မပြုလုပ်ဘဲ ထုတ်လွှင့်ခဲ့မိပါသည်။ ထို့အပြင် တနင်္လာနေ့နံနက်ပိုင်းအထိ BBC iPlayer အွန်လိုင်းပလပ်ဖောင်းပေါ်၌ အဆိုပါအတိုင်း ဆက်လက်ရှိနေခဲ့ခြင်းကြောင့် ပြင်းထန်သော ဝေဖန်မှုများနှင့် ရင်ဆိုင်ခဲ့ရသည်။ နောက်ပိုင်းတွင် BBC က အဆိုပါဖြစ်ရပ်အတွက် တောင်းပန်ခဲ့ပြီး iPlayer ပေါ်ရှိ ဗီဒီယိုကိုလည်း ပြန်လည်ပြင်ဆင်ခဲ့သည်။ ဆုပေးအပ်သည့် မင်းသားနှစ်ဦးစလုံးသည် အဆိုပါအခြေအနေကို တည်ငြိမ်စွာဖြင့် ကျော်ဖြတ်နိုင်ခဲ့သော်လည်း မင်းသား ဒယ်လ်ရွိုင်း လင်ဒိုက BAFTA အဖွဲ့အစည်းအနေဖြင့် ၎င်းတို့အား နောက်ပိုင်းတွင် လာရောက်ရှင်းပြခြင်း သို့မဟုတ် စကားပြောဆိုခြင်း မရှိခဲ့သည့်အပေါ် စိတ်မကောင်းဖြစ်မိကြောင်း ထုတ်ဖော်ပြောကြားခဲ့သည်။ ထို့အတူ အခမ်းအနားတက်ရောက်လာသူ အနုပညာရှင်များဖြစ်ကြသော ဂျေမီ ဖောက်စ် (Jamie Foxx) နှင့် ဝန်ဒဲလ် ပီးယားစ် (Wendell Pierce) တို့ကလည်း ထိုသို့အော်ဟစ်မှုသည် မည်သည့်အကြောင်းပြချက်ဖြင့်မဆို လက်ခံနိုင်စရာမရှိကြောင်းနှင့် ကာယကံရှင် မင်းသားနှစ်ဦးကို အပြည့်အဝ တောင်းပန်သင့်ကြောင်း ဝေဖန်ခဲ့ကြသည်။ BAFTA အဖွဲ့အစည်းက ဖြစ်ပွားခဲ့သော အခြေအနေအရပ်ရပ်အတွက် အပြည့်အဝ တာဝန်ယူကြောင်းနှင့် ထိခိုက်နစ်နာခဲ့သူအားလုံးကို အနူးအညွတ် တောင်းပန်ကြောင်း ထုတ်ပြန်ခဲ့သည်။ တစ်ဖက်တွင်လည်း အဆိုပါဆုပေးပွဲ၌ပင် ဆုရဒါရိုက်တာ အကီနိုလာ ဒေးဗီးစ် ဂျူနီယာ (Akinola Davies Jr) ၏ ပါလက်စတိုင်းလွတ်လပ်ရေး "Free Palestine" ဟု ထည့်သွင်းပြောကြားခဲ့သည့် မိန့်ခွန်းအပိုင်းကိုမူ အချိန်အကန့်အသတ်ကြောင့်ဟုဆိုကာ BBC က ဖြတ်တောက်ခဲ့ပြန်သဖြင့် သတင်းဌာန၏ ဘက်လိုက်မှုနှင့် တည်းဖြတ်မှုစံနှုန်းများအပေါ် ဝေဖန်မှုများ ထပ်မံထွက်ပေါ်လျက် ရှိသည်။ #BBC #BAFTA

ဗြိတိန်အကယ်ဒမီ (BAFTA) ဆုပေးပွဲသတင်းထုတ်လွှင့်မှုအတွင်း လူမျိုးရေး စော်ကားသည့် အော်ဟစ်သံများ ပါဝင်ခဲ့မှုအပေါ် BBC တောင်းပန်

Feb 23

ချင်းမိုင်တွင် ကျား အကောင် ၇၀ ကျော် သေဆုံး၊ အကြောင်းရင်းကို စစ်ဆေးနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၃ ရက်။ ချင်းမိုင် အနီး မယ့်ရင်း ခရိုင် အတွင်း ကျားမွေးမြူရေး ဥယျာဉ် တစ်ခုတွင် ကျားအကောင် ၇၀ ကျော် သေဆုံးပြီးနောက် Tiger Kingdom ခရီးသွား ဥယျာဥ်ကို နှစ်ပတ်ကြာ ပိတ်သိမ်းလိုက်ပြီး အသက်ရှင်ကျန်သည့် ကျားများကို နေရာ ရွေ့ပြောင်းခဲ့ရသည်ဟု ဘန်ကောက်ပို့စ် သတင်းစာတွင် ဖော်ပြသည်။ ထိုင်းနိုင်ငံ ချင်းမိုင်မြို့အနီးရှိ Tiger Kingdom သည် ခရီးသည်များ လာရောက်မှုကို ပိတ်ထားလိုက်ပြီး ကျားများသေဆုံးရခြင်းနှင့် ပတ်သက်၍ စုံစမ်းစစ်ဆေးနေစဉ်အတွင်း ဥယျာဉ် တစ်ခုလုံးကို ပိုးသတ်ဆေးဖြန်းခြင်းကို စတင်ခဲ့သည်ဟု ချင်းမိုင်ရှိ မွေးမြူရေး အရာရှိများက ပြောသည်။ ကျားသေများကို ချင်းမိုင် တက္ကသိုလ်သို့ ပို့ဆောင်ပြီး ဓါတ်ခွဲ စစ်ဆေးလျက်ရှိသည်။ Tiger Kingdom တွင် မွေးမြူထားသော ကျားများသည် ဖေဖော်ဝါရီလ ၈ ရက်မှ စတင်သေဆုံးခဲ့ပြီး အခုအခါ သေဆုံးသည့် ကျားအရေအတွက် ၇၀ ကျော်သွားခဲ့ပြီ ဖြစ်သည်။ ကနဦးယူဆချက်မှာ လူသိများသော ပုဂ္ဂလိကခြံတစ်ခုမှ ပေးသွင်းသည့် အစာအဖြစ် အသုံးပြုသော ကြက်သားစိမ်းကြောင့်ဟု ယူဆရသည်။ သို့သော် အာဏာပိုင်များက တိကျသောအကြောင်းရင်းကို အတည်မပြုနိုင်သေးကြောင်း အလေးပေးပြောကြားခဲ့သည်။ ငှက်တုတ်ကွေးရောဂါကြောင့် ဖြစ်သည်ဟူသော ကောလဟာလများလည်း ပြန့်နှံ့လျက်ရှိသော်လည်း အာဏာပိုင်များက မည်သည့် အတည်ပြုချက်ကိုမှ မပေးသေးပါ။ အသက်ရှင်ကျန်ရစ်သော ကျားများကို မယ့်တန်ခရိုင်ရှိ Tiger Kingdom ၏ စောင့်ရှောက်မှုဌာနသို့ ရွှေ့ပြောင်းစောင့်ကြည့်ထားသည်။ ချင်းမိုင်ရှိ Tiger Kingdom ဥယျာဉ်ကို Khum Sue Trakarn Co Ltd မှ လည်ပတ်ပြီး ကုမ္ပဏီကို အင်ဒိုချိုင်းနားကျားများ မွေးမြူရေးနှင့် ထိန်းသိမ်းစောင့်ရှောက်ရေးကို အဓိကထား၍ တည်ထောင်ခဲ့ပြီး တိရစ္ဆာန်လဲလှယ်မှုအတွက် ဒေသခံတိရစ္ဆာန်ရုံများနှင့် ပူးပေါင်းဆောင်ရွက်လေ့ရှိသည်။

ချင်းမိုင်တွင် ကျား အကောင် ၇၀ ကျော် သေဆုံး၊ အကြောင်းရင်းကို စစ်ဆေးနေ

Feb 23

သမ္မတ ဒေါ်နယ်ထရမ့်၏ နေအိမ်အနီး ချည်းကပ်လာသူကို သေနတ်ဖြင့် ပစ်သတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၃ ရက်။ အမေရိကန်သမ္မတ ဒေါ်နယ်ထရမ့်ရဲ့ ဖလော်ရီဒါပြည်နယ်၊ Mar-a-Lago အိမ်တော် လုံခြုံရေး နယ်မြေအတွင်းသို့ လက်နက်ကိုင်ဆောင်ပြီး ကျူးကျော်ဝင်ရောက်ခဲ့သူတစ်ဦးကို လုံခြုံရေး တပ်ဖွဲ့ဝင်များက ပစ်သတ်ခဲ့သည်။ ၂၀၂၆ ခုနှစ်၊ ဖေဖော်ဝါရီ ၂၂ ရက် (တနင်္ဂနွေနေ့) မနက်အစောပိုင်းတွင် သမ္မတထရမ့်၏ Mar-a-Lago နေအိမ် လုံခြုံရေးနယ်မြေအတွင်းသို့ လက်နက်ကိုင်ဆောင်ထားသူတစ်ဦး ကျူးကျော်ဝင်ရောက်ခဲ့သဖြင့် လုံခြုံရေးအဖွဲ့ (Secret Service) က ပစ်သတ်ခဲ့ခြင်းဖြစ်သည်။ ထိုအချိန်တွင် သမ္မတထရမ့်မှာ ဝါရှင်တန်ဒီစီတွင် ရောက်ရှိနေခဲ့သည်။ ပစ်သတ်ခံရသူမှာ အသက် ၂၁ နှစ်အရွယ် Austin T Martin ဖြစ်ပြီး မြောက်ကာရိုလိုင်းနား ပြည်နယ်သား ဖြစ်ပါသည်။ ၎င်း၏မိသားစုက တနင်္ဂနွေနေ့ မနက်အစောပိုင်းမှာပင် လူပျောက်တိုင်ကြားထားသူ ဖြစ်ပါသည်။ ၎င်းသည် မြောက်ကာရိုလိုင်းနားမှ ဖလော်ရီဒါသို့ ကားမောင်းလာစဉ် လမ်းခရီးတွင် သေနတ်ဝယ်ယူခဲ့ခြင်း ရှိ၊ မရှိကို အာဏာပိုင်များက စုံစမ်းနေပါသည်။ တရားခံကို Shotgun (ပြောင်းချောသေနတ်) တစ်လက်နှင့် လောင်စာဆီပုံး တစ်ပုံးကို ကိုင်ဆောင်ပြီး အိမ်တော်၏ မြောက်ဘက်ဂိတ်အနီးတွင် တွေ့ရှိခဲ့ခြင်း ဖြစ်သည်။ လုံခြုံရေးအဖွဲ့က လက်နက်ချရန် အမိန့်ပေးသော်လည်း ၎င်းက ဆီပုံးကိုချပြီး သေနတ်ဖြင့် ပြန်လည်ပစ်ခတ်မည့် အနေအထား ပြုလုပ်ခဲ့သဖြင့် လုံခြုံရေးအေးဂျင့်များက ပစ်ခတ်နှိမ်နင်းခဲ့ခြင်း ဖြစ်ပါသည်။ သမ္မတထရမ့်သည် ယခင်ကလည်း လုပ်ကြံသတ်ဖြတ်ရန် ကြိုးပမ်းမှုအချို့နှင့် ရင်ဆိုင်ခဲ့ရဖူးသည်။ ၂၀၂၄ ခုနှစ်၊ ဇူလိုင်လက ပင်ဆယ်လ်ဗေးနီးယားတွင် နားရွက်ကို သေနတ်မှန်ခဲ့ဖူးသလို၊ နောက်ပိုင်းတွင်လည်း ဂေါက်ကွင်း၌ လုပ်ကြံရန် ကြိုးပမ်းမှုတစ်ခု ရှိခဲ့ဖူးပါသည်။

သမ္မတ ဒေါ်နယ်ထရမ့်၏ နေအိမ်အနီး ချည်းကပ်လာသူကို သေနတ်ဖြင့် ပစ်သတ်

Feb 23

Messenger.com ဝဘ်ဆိုက်ကို ပိတ်သိမ်းမည် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၃ ရက်။ Messenger.com ဝက်ဘ်ဆိုက်ကို ဧပြီလ ၁၅ ရက်နေ့မှာ ပိတ်သိမ်းတော့မယ်လို့ မိခင် ကုမ္ပဏီ ဖြစ်တဲ့ Meta က ကြေညာလိုက်ပါတယ်။ အဲဒီလို ပိတ်သိမ်းလိုက်ပေမယ့် Messenger ဝန်ဆောင်မှုတွေကို Facebook က တဆင့် ဒါမှမဟုတ် ဖုန်း အက်ပလီကေးရှင်းက တဆင့် သုံးစွဲနေသူတွေ အတွက် သက်ရောက်မှု ရှိမှာ မဟုတ်ပဲ Messenger.com ကနေ့ သီးသန့် အကောင့်ဖွင့် သုံးစွဲသူတွေ အတွက်ပဲ အပြောင်းအလဲ ဖြစ်စေမှာ ဖြစ်ပါတယ်။ ဝန်ဆောင်မှု ရပ်ဆိုင်းလိုက်တာနဲ့ messenger.com က သုံးစွဲသူတွေကို Facebook ကနေ တဆင့် သုံးစွဲဖို့ အလိုအလျောက် ပြောင်းပေးမှာ ဖြစ်ပါတယ်။ Facebook အကောင့်မရှိပဲ Messenger အကောင့်ပဲ သုံးနေသူတွေ ဒါမှမဟုတ် Facebook အကောင့်ကို ပိတ်ထား (Deactivate) ပြီး Messenger တစ်ခုတည်းကိုပဲ ကွန်ပျူတာမှာ သီးသန့်သုံးချင်သူတွေအတွက် အခက်အခဲဖြစ်စေမှာ ဖြစ်ပါတယ်။ ဖုန်းနဲ့ပဲ သုံးနေတဲ့ Messenger သုံးစွဲသူတွေ အတွက်ကတော့ အပြောင်းအလဲ ရှိမှာ မဟုတ်ပါဘူး။ Meta ဟာ ပြီးခဲ့တဲ့လအနည်းငယ်ကလည်း Windows နဲ့ Mac အတွက် Messenger Desktop App တွေကို ပိတ်သိမ်းခဲ့ပါသေးတယ်။ ဒါဟာ ကုမ္ပဏီရဲ့ ကုန်ကျစရိတ်ကို လျှော့ချဖို့နဲ့ Messenger ကို Facebook App ထဲ ပြန်လည်ပေါင်းစည်းဖို့ (Merge) လုပ်ဆောင်နေတဲ့ ဗျူဟာတစ်ခု ဖြစ်တယ်လို့ ကျွမ်းကျင်သူတွေက သုံးသပ်ကြပါတယ်။

Messenger.com ဝဘ်ဆိုက်ကို ပိတ်သိမ်းမည်

Feb 23

မက္ကဆီကို မူးယစ်ရာဇာ "El Mencho" သေဆုံးပြီး အရေးပေါ် အခြေအနေ ကြေညာထား သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၂၃ ရက်။ မက္ကဆီကိုနိုင်ငံ၏ သြဇာအကြီးဆုံး မူးယစ်ရာဇာတစ်ဦးဖြစ်သူ CJNG ဂိုဏ်းခေါင်းဆောင် "El Mencho" (ခေါ်) နီမက်စီယို ရူဘင် အိုစီဂူရာ ကာဗင်တီးစ်သည် ၂၀၂၆ ခုနှစ်၊ ဖေဖော်ဝါရီလ ၂၂ ရက်နေ့တွင် မက္ကဆီကိုစစ်တပ်၏ စီးနင်းမှုအတွင်း ရရှိခဲ့သော ဒဏ်ရာများဖြင့် သေဆုံးသွားခဲ့ပါသည်။ ၎င်းသေဆုံးမှုကြောင့် မက္ကဆီကိုနိုင်ငံအတွင်းရှိ Jalisco ပြည်နယ်အပါအဝင် နေရာအမြောက်အမြား၌ ၎င်း၏နောက်လိုက်များက ကားများကို မီးရှို့ခြင်းနှင့် လမ်းပိတ်ဆို့ခြင်းများ ပြုလုပ်ကာ အင်အားပြတုံ့ပြန်ခဲ့ကြပါသည်။ အခြေအနေများ ဆိုးရွားလာသဖြင့် ပြည်နယ်အစိုးရက အရေးပေါ်အခြေအနေ (Code Red) ကြေညာခဲ့ရပြီး အများပြည်သူသုံး သယ်ယူပို့ဆောင်ရေးနှင့် လေကြောင်းခရီးစဉ်များကို ယာယီရပ်ဆိုင်းထားခဲ့ရပါသည်။ ရပ်ဆိုင်းထားသော လေကြောင်းလိုင်းများတွင် Delta, Southwest, Alaska နဲ့ Air Canada လေကြောင်းလိုင်းများ ပါဝင်သည်။ အမေရိကန်အစိုးရကမူ ဤမူးယစ်ရာဇာအား ဖမ်းဆီးရန် ဒေါ်လာ ၁၅ သန်း ဆုကြေးထုတ်ထားခဲ့ပြီး ၎င်း၏သေဆုံးမှုသည် မူးယစ်ဆေးဝါးတိုက်ဖျက်ရေးအတွက် ကောင်းမွန်သော တိုးတက်မှုဖြစ်ကြောင်း မှတ်ချက်ပြုခဲ့ပါသည်။ လက်ရှိတွင် ဒေသခံပြည်သူများအား အပြင်မထွက်ရန်နှင့် ဘေးကင်းရာ၌ ခိုလှုံနေကြရန် အာဏာပိုင်များက သတိပေးနှိုးဆော်ထားပါသည်။

မက္ကဆီကို မူးယစ်ရာဇာ “El Mencho” သေဆုံးပြီး အရေးပေါ် အခြေအနေ ကြေညာထား

Feb 23

ဗီယက်နမ်က Starlink ကို လုပ်ငန်း လိုင်စင် ခွင့်ပြုလိုက်ပြီ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၃ ရက်။ ဗီယက်နမ်အစိုးရသည် Elon Musk ၏ Starlink ဂြိုဟ်တုအင်တာနက်ကို နိုင်ငံအတွင်း စီးပွားဖြစ် လုပ်ကိုင်ခွင့်လိုင်စင်အား ၂၀၂၆ ခုနှစ်၊ ဖေဖော်ဝါရီလ ၂၂ ရက်နေ့တွင် အတည်ပြု ထုတ်ပေးလိုက်ပါသည်။ ဗီယက်နမ်နိုင်ငံသည် ဒေတာလုံခြုံရေးနှင့် ပတ်သက်၍ အလွန်တင်းကျပ်သော နိုင်ငံဖြစ်သော်လည်း ယခုအခါ နိုင်ငံခြားသားပိုင်ဆိုင်မှု ကန့်သတ်ချက်မရှိဘဲ (၅) နှစ်တိတိ စမ်းသပ်ခွင့်ပြုရန် ဝန်ကြီးချုပ်က လက်မှတ်ရေးထိုးခဲ့ခြင်း ဖြစ်ပါသည်။ Starlink ကုမ္ပဏီအနေဖြင့် ဗီယက်နမ်နိုင်ငံတစ်ဝန်းတွင် ဂိတ်ဝေးစခန်း (Gateway Station) ၄ ခု တည်ဆောက်မည်ဖြစ်ပြီး အသုံးပြုသူလက်ခံစက် (User Terminals) ပေါင်း ၆ သိန်းအထိ တပ်ဆင်ရန် စီစဉ်ထားပါသည်။ ဤခြေလှမ်းသည် ဗီယက်နမ်နိုင်ငံ၏ ဝေးလံခေါင်ဖျားဒေသများနှင့် ကျွန်းစုများတွင် ဒီဂျစ်တယ်ချိတ်ဆက်မှု မြှင့်တင်ရန်အတွက် သိသာထင်ရှားသော တိုးတက်မှုတစ်ခု ဖြစ်လာမည်ဖြစ်ပါသည်။

ဗီယက်နမ်က Starlink ကို လုပ်ငန်း လိုင်စင် ခွင့်ပြုလိုက်ပြီ

« Prev 1 … 43 44 45 46 47 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close