NMG Doh – Page 49 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Feb 18

ထိုင်းနိုင်ငံ ပသုမ်ဌာနီတွင် သေနတ်ကိုင်ဆောင်ထားသူ တစ်ဦး လွတ်မြောက်နေခြင်းကြောင့် စာသင်ကျောင်း ၁၄ ကျောင်း ပိတ်ထား သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၈ ရက်။ ၂၀၂၆ ခုနှစ်၊ ဖေဖော်ဝါရီလ ၁၈ ရက်နေ့ (ယနေ့) တွင် ထိုင်းနိုင်ငံ၊ ပသုမ်ဌာနီခရိုင်၊ လတ်လုမ်ကယောက်မြို့နယ်ရှိ စာသင်ကျောင်း (၁၄) ကျောင်းကို ဘေးကင်းလုံခြုံရေးအရ အရေးပေါ် ပိတ်လိုက်ကြောင်း ထိုင်းပညာရေးဝန်ကြီးဌာနက ထုတ်ပြန်ခဲ့သည်။ အသက် (၃၀) အရွယ်ရှိ "နိုပရတ် ဂျင်တို" (ခေါ်) အယ်လ် (L) ဆိုသူဖြစ်ပြီး ၎င်းသည် ချွန်ဘူရီခရိုင်တွင် ဇနီးဖြစ်သူအား ကိုယ်ထိလက်ရောက် ကျူးလွန်မှု၊ ကယ်ဆယ်ရေးယာဉ်အား သေနတ်ဖြင့် ပစ်ခတ်မှုများ ကျူးလွန်ပြီးနောက် ထွက်ပြေးလွတ်မြောက်နေသူ ဖြစ်သည်။ တရားခံသည် လတ်လုမ်ကယောက်ရှိ ၎င်း၏နေအိမ်သို့ ထွက်ပြေးလာပြီး ယောက္ခမဖြစ်သူအား သေနတ်ဖြင့် ချိန်ရွယ်ကာ ဇနီးဖြစ်သူနှင့် တွေ့ဆုံပေးရန် ခြိမ်းခြောက်ခဲ့သည်။ ယောက္ခမဖြစ်သူမှာ ထွက်ပြေးလွတ်မြောက်သွားခဲ့သော်လည်း တရားခံမှာ လက်နက်များနှင့်အတူ လွတ်မြောက်နေဆဲ ဖြစ်သည်။ စာသင်ကျောင်းများကို တိုက်ရိုက်ပစ်မှတ်ထား တိုက်ခိုက်ခြင်းမျိုး မရှိသေးသော်လည်း တရားခံမှာ အကြမ်းဖက်တတ်သည့် သမိုင်းကြောင်းရှိပြီး လက်နက်ကိုင်ဆောင်ထားသဖြင့် ကျောင်းသားများ၏ ဘေးကင်းလုံခြုံရေးအတွက် ကြိုတင်ကာကွယ်သည့်အနေဖြင့် ပိတ်ထားခြင်း ဖြစ်သည်။ Wat Na Mai Community School၊ Bua Kaew Kesaorn School နှင့် Wat Bua Khwan School အပါအဝင် ဒေသတွင်းရှိ ကျောင်းပေါင်း (၁၄) ကျောင်း ဖြစ်ပါသည်။ သတင်းအောက်ပိုင်းတွင် ကျောင်းစာရင်းကို ဖော်ပြထားသည်။ လက်ရှိတွင် ရဲတပ်ဖွဲ့က တရားခံအား အပြင်းအထန် ရှာဖွေနေပြီး ပြည်သူများအနေဖြင့် အဆိုပါ တရားခံအား တွေ့ရှိပါက ရဲစခန်းဖုန်း ၀၉၄-၉၆၉၉၃၆၅ သို့မဟုတ် အရေးပေါ်ဖုန်း ၁၉၁ သို့ ချက်ချင်း ဆက်သွယ်အကြောင်းကြားရန် နှိုးဆော်ထားပါသည်။ ပိတ်ထားလိုက်ရသော ကျောင်းစာရင်း 1. Sangkaruk Bumrung School 2. Wat Bo Ngoen School (Prachanukul Wittaya) 3. Wat Nekkhamararam School 4. Samwa Witthaya School 5. Wat Lam Maha Mek School (Pracharat-Anusorn) 6. Sawangrat Bumrung School 7. Khlong Lat Chang School (Janthaset- Uphatham) 8. Prachum Wittaya School 9. Wat Na Mai Community School 10. Wat Bua Suwan Pradit School 11. Khlong La Khaon School 12. Wat Bua Khwan School 13. Bua Kaew Kesaorn School 14. Ban Khlong Kwang Bon School

ထိုင်းနိုင်ငံ ပသုမ်ဌာနီတွင် သေနတ်ကိုင်ဆောင်ထားသူ တစ်ဦး လွတ်မြောက်နေခြင်းကြောင့် စာသင်ကျောင်း ၁၄ ကျောင်း ပိတ်ထား

Feb 18

ထိုင်းအစိုးရသစ်၏ မြန်မာ့အရေး ချဉ်းကပ်မှုနှင့် မူဝါဒအပြောင်းအလဲများ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၈ ရက်။ (ဘန်ကောက်ပို့စ် (Bangkok Post) သတင်းစာတွင် ဝါရင့်သတင်းစာဆရာ ကာဝီ ချောင်ကစ်တာဝန်း (Kavi Chongkittavorn) ရေးသားသည့် "THAI PIVOT" အမည်ရှိ ဆောင်းပါးမှ ကောက်နုတ် တင်ပြထားသည်) မကြာမီက ကျင်းပခဲ့သော ထိုင်းနိုင်ငံ အထွေထွေရွေးကောက်ပွဲ၌ ဖုမ်ဂျိုင်ထိုင်းပါတီ (Bhumjaithai Party) အပြတ်အသတ် အနိုင်ရရှိခဲ့ပြီးနောက်၊ ဝန်ကြီးချုပ် အနုတင် ချန်ဝီရကူးလ် (Anutin Charnvirakul) ဦးဆောင်သည့် ဒုတိယမြောက် အစိုးရသက်တမ်းတွင် ထိုင်းနိုင်ငံ၏ နိုင်ငံခြားရေးမူဝါဒသည် ပိုမိုခိုင်မာ၍ ထက်မြက်သော လမ်းကြောင်းသို့ ကူးပြောင်းလာရန် ရှိနေသည်။ အထူးသဖြင့် မြန်မာ့အရေးနှင့် ပတ်သက်၍ အနုတင် (၂) အစိုးရသည် ယခင်အစိုးရများထက် ပိုမို၍ "မူဝါဒနှင့် အခြေခံစံနှုန်းများအပေါ် ရပ်တည်သည့် သံတမန်ရေး" (Principled Diplomacy) ကို ကျင့်သုံးလာမည် ဖြစ်သည်။ ဤအခြေအနေသည် မြန်မာစစ်ကောင်စီအပေါ် ဆက်ဆံရာတွင် ယခင်ကထက် ပိုမိုပြတ်သားသော တောင်းဆိုမှုများ ရှိလာနိုင်သည့် လက္ခဏာတစ်ရပ် ဖြစ်ပါသည်။ +++ အာဆီယံ ဘုံသဘောတူညီချက်အပေါ် ရပ်တည်ချက် +++ အနုတင်အစိုးရသစ်သည် မြန်မာနိုင်ငံအနေဖြင့် အာဆီယံ၏ ဘုံသဘောတူညီချက် ၅ ရပ် (5PC) ကို အပြည့်အဝ လိုက်နာရန် မျှော်လင့်ထားပါသည်။ အထူးသဖြင့် အောက်ပါအချက်များကို အလေးထား ဆောင်ရွက်သွားဖွယ် ရှိပါသည်။ • ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားများအားလုံး လွှတ်ပေးရန်။ • သက်ဆိုင်သူအားလုံး ပါဝင်နိုင်သည့် နိုင်ငံရေးဆွေးနွေးပွဲများ ဖြစ်ပေါ်လာစေရန်။ • လူသားချင်းစာနာမှုဆိုင်ရာ အကူအညီများကို အဟန့်အတားမရှိ ပေးအပ်နိုင်ရန်။ +++ဖူးခက်တွေ့ဆုံပွဲနှင့် အချက်ပြမှုများ +++ လောလောဆယ်တွင် ထိုင်းနိုင်ငံခြားရေးဝန်ကြီး သီဟာဆက် ဖူကက်ကော (Sihasak Phuangketkeow) သည် မြန်မာစစ်ကောင်စီ၏ နိုင်ငံခြားရေးဝန်ကြီး ဦးသန်းဆွေနှင့် ဖူးခက်မြို့တွင် တွေ့ဆုံရန် စီစဉ်ထားပါသည်။ ဤတွေ့ဆုံမှုသည် မြန်မာ့ရွေးကောက်ပွဲအလွန် အခြေအနေများကို ဆွေးနွေးရန်ဖြစ်ပြီး ထိုင်းနိုင်ငံအနေဖြင့် မြန်မာ့အရေးတွင် အဓိက "ကြားခံတံတား" (Bridge) အဖြစ် ဆောင်ရွက်လိုသည့် ဆန္ဒကို ပြသခြင်း ဖြစ်သည်။ သို့သော် မြန်မာဘက်မှ သိသာထင်ရှားသည့် တိုးတက်မှု (Meaningful Progress) ပြသနိုင်မှသာ ထိရောက်သော ဆက်ဆံရေး ဖြစ်ထွန်းမည်ဟု ထိုင်းဘက်က အတိအလင်း ဆိုထားပါသည်။ +++ နယ်စပ်တည်ငြိမ်ရေးနှင့် အမျိုးသားအကျိုးစီးပွား +++ မြန်မာ့ပြည်တွင်းစစ်ကြောင့် ဖြစ်ပေါ်လာသည့် စစ်ဘေးရှောင်ဒုက္ခသည်များနှင့် နေရပ်စွန့်ခွာရသူ (Displaced Persons) များပြားလာမှုသည် ထိုင်းနိုင်ငံအတွက် စိုးရိမ်စရာ ဖြစ်လာပါသည်။ ထို့ကြောင့် နယ်စပ်တည်ငြိမ်ရေးအတွက် စစ်ကောင်စီသာမက အခြားသော သက်ဆိုင်သူများ (Stakeholders) အားလုံးနှင့်ပါ ထိတွေ့ဆက်ဆံသွားရန် ထိုင်းအစိုးရက ပြင်ဆင်ထားပါသည်။ အနုတင် (၂) အစိုးရသည် အမျိုးသားရေးဝါဒီ (Nationalist) မဲဆန္ဒရှင်များ၏ ထောက်ခံမှုဖြင့် အာဏာရလာခြင်းကြောင့် ထိုင်းနိုင်ငံ၏ လုံခြုံရေးနှင့် စီးပွားရေးအကျိုးစီးပွားကို အဓိကထား ကာကွယ်သွားမည် ဖြစ်သည်။ ထို့ကြောင့် မြန်မာ့အရေးသည် ထိုင်းနိုင်ငံ၏ အကျိုးစီးပွားကို ထိခိုက်လာပါက ယခင်ကထက် ပိုမိုပြတ်သားသော တုံ့ပြန်မှုများ မြင်တွေ့ရနိုင်ပါသည်။ အချုပ်အားဖြင့်ဆိုသော် အနုတင် (၂) အစိုးရ၏ မြန်မာ့အရေး ချဉ်းကပ်ပုံသည် "အခြေအနေသတ်မှတ်ချက်များအပေါ် မူတည်၍ ထိတွေ့ဆက်ဆံခြင်း" (Engagement with Conditions) ပုံစံသို့ ကူးပြောင်းသွားမည်ဖြစ်ကြောင်း ဆောင်းပါးရှင် ကာဝီက သုံးသပ်တင်ပြထားပါသည်။

ထိုင်းအစိုးရသစ်၏ မြန်မာ့အရေး ချဉ်းကပ်မှုနှင့် မူဝါဒအပြောင်းအလဲများ

Feb 17

ဗိုလ်နဂါးတပ်နှင့် NUG ၏ ကာကွယ်ရေး တပ်ဖွဲ့များ အကြား ပစ်ခတ်မှုများ ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၇ ရက်။ စစ်ကိုင်းတိုင်း၊ ပုလဲမြို့နယ်အတွင်း အခြေစိုက်သော ဗိုလ်နဂါး ဦးဆောင်သည့် BNRA နှင့် NUG လက်အောက်ခံ MOD တပ်ရင်းတပ်ဖွဲ့များကြား အပြန်အလှန် ပစ်ခတ်မှုများ ပြင်းပြင်းထန်ထန် ဖြစ်ပွားနေသည်။ ပုလဲမြို့နယ်အတွင်း တော်လှန်ရေးအင်အားစု အချင်းချင်းကြား စစ်ရေးပဋိပက္ခများ အရှိန်မြင့်တက်လာပြီး ဗမာအမျိုးသား တော်လှန်ရေး တပ်မတော် (BNRA) နှင့် အမျိုးသားညီညွတ်ရေးအစိုးရ (NUG) လက်အောက်ခံ ကာကွယ်ရေးတပ်ဖွဲ့များအကြား ယနေ့ ဖေဖော်ဝါရီ ၁၇ ရက် နံနက်ပိုင်းမှ စတင်ကာ အပြန်အလှန် ပစ်ခတ်မှုများ ပြင်းထန်စွာ ဖြစ်ပွားနေသည်။ ယနေ့ နံနက် ၇ နာရီခွဲခန့်မှစတင်၍ ပုလဲမြို့နယ်အတွင်းရှိ ချင်ပြစ်ကျေးရွာနှင့် ပုပ္ပါကျေးရွာအနီးရှိ BNRA ဂိတ် စခန်းများကို NUG ကာကွယ်ရေးဝန်ကြီးဌာန (MOD) လက်အောက်ခံ တပ်ရင်းများက လက်နက်ကြီးများ၊ စက် သေနတ်များနှင့် ဒရုန်းများကို အသုံးပြု၍ လာရောက်တိုက်ခိုက်ခဲ့ခြင်းဖြစ်ကြောင်း BNRA ခေါင်းဆောင် ဗိုလ်နဂါး က ၎င်း၏ လူမှုကွန်ရက်စာမျက်နှာတွင် ရေးသားထားသည်။ ပုလဲမြို့နယ်အတွင်း ဖြစ်ပွားနေသည့် စစ်ရေးအခြေအနေနှင့် ပတ်သက်၍ ဗိုလ်နဂါးက ယခုကဲ့သို့ ရေးသားဖော်ပြ ထားသည်။ “NUG ရဲ့ MOD တပ်ရင်းတွေဟာ ဒီနေ့နံနက် ၇ နာရီခွဲမှစ BNRA ဂိတ်စခန်းများအား လက်နက်ကြီး ပစ်ခတ် ခြင်းနှင့် ဒရုန်းဗုံးသီးများဖြင့်ပါ ကိုလာရောက်တိုက်ခိုက်နေပြီဖြစ်ပါသည်။ အစိုးရအမည်ခံထားခြင်း၊ စစ်ဒေသ တစ်တွင်လည်း KIA အဖွဲ့အစည်းမှ ဦးဆောင်ခြင်းကြောင့် ထိုသို့အကျည်းတန်သော လုပ်ရပ်ကို တော်လှန်ဘက် အချင်းချင်း ပြုလုပ်မည်မဟုတ်ဟု လွန်ခဲ့သော နှစ်များအတွင်း ယူဆထားခဲ့ဖူးသော်လည်း ယခုအခါ အံ့သြဖွယ် ဆိုးသွမ်းမှုကိုမြင်ရပြီ ဖြစ်ကြောင်းနှင့် ပြည်သူအများ လတ်တလော အချိန်အတွင်း ဘေးလွတ်ရာ စစ်ရေး သတိပြု နေကြပါရန် အရေးပေါ် အသိပေးနှိုးဆော်အပ်ပါသည်” အဆိုပါ စစ်ရေးပဋိပက္ခသည် ပြီးခဲ့သည့် ဖေဖော်ဝါရီ ၁၂ ရက်နေ့က နှစ်ဖက်တပ်ဖွဲ့ဝင်များအကြား လက်နက် ပြန်အပ်ရေးကိစ္စ ညှိနှိုင်းရာမှ အငြင်းပွားမှုဖြစ်ပွားကာ NUG လက်အောက်ခံ ယင်းမာပင်ခရိုင် တပ်ရင်း (၄) မှ ရဲဘော်တစ်ဦး သေဆုံးခဲ့သည့် ဖြစ်စဉ်အပြီးတွင် အခြေအနေများ ပိုမိုဆိုးရွားလာခဲ့ခြင်း ဖြစ်သည်။ အဆိုပါဖြစ်စဉ်နှင့် ပတ်သက်၍ BNRA အဖွဲ့က ကျူးလွန်ထားသည်ဆိုသော ရာဇဝတ်မှုများနှင့် စပ်လျဉ်း၍ ဖမ်းဆီးစစ်ဆေးမှုများ ပြုလုပ်နိုင်ရန်အတွက် ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနနှင့် ကာကွယ်ရေး ဝန်ကြီးဌာနတို့ ပူးပေါင်းဆောင်ရွက်လျက်ရှိကြောင်း NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က သတင်းမီဒီယာများသို့ ဖြေကြားထားသည်။ လက်ရှိတွင် တော်လှန်ရေးတပ်ဖွဲ့အချင်းချင်းကြား ပစ်ခတ်မှုများကြောင့် ချင်ပြစ်၊ ကြာစီ၊ ပုပ္ပါ နှင့် မောင်းတုံ ကျေးရွာများမှ ဒေသခံပြည်သူများသည် အိုးအိမ်စွန့်ခွာကာ ဘေးလွတ်ရာသို့ အရေးပေါ် တိမ်းရှောင်နေရသည်။ နှစ်ဖက် ထိခိုက်ကျဆုံးမှု အခြေအနေကို သီးခြားအတည်ပြုနိုင်ခြင်း မရှိသေးသော်လည်း မြေပြင်တွင် စစ်ရေး တင်းမာမှုများ ဆက်လက်ရှိနေဆဲဖြစ်ကာ ဒေသခံများကတော့ တော်လှန်ရေးအင်အားစုများအကြား သွေးကွဲမှု များ အပေါ် စိုးရိမ်ပူပန်လျက် ရှိကြသည်။

ဗိုလ်နဂါးတပ်နှင့် NUG ၏ ကာကွယ်ရေး တပ်ဖွဲ့များ အကြား ပစ်ခတ်မှုများ ပြင်းထန်

Feb 17

စစ်ကော်မရှင် လေကြောင်းနှင့် လက်နက်ကြီး တိုက်ခိုက်မှုကြောင့် ကလေးများအပါအဝင် အရပ်သားများ သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၇ ရက်။ ဖားကန့်တွင် လေကြောင်းနှင့် လက်နက်ကြီး ပစ်ခတ်မှုကြောင့် ကလေးငယ်များ အပါအဝင် အရပ်သား ထိခိုက်သေဆုံးမှုများ ဆက်တိုက်ဖြစ်ပွားနေသည်။ ကချင်ပြည်၊ ဖားကန့်ရတနာမြေတွင် တိုက်ပွဲများ ပြင်းထန်နေသည်မှာ နှစ်ပတ်ကျော်ကြာမြင့်လာပြီ ဖြစ်ကာ လုံးခင်းနယ်မြေရဲစခန်း စီးနင်းတိုက်ခိုက်ခံရမှုနှင့်အတူ စစ်ကော်မရှင်တပ်၏ လေကြောင်းနှင့် လက်နက်ကြီးဖြင့် ပစ်ခတ်မှုများကြောင့် ကလေးငယ်များအပါအဝင် အရပ်သားထိခိုက်သေဆုံးမှုများ ဆက်တိုက်ဖြစ်ပွားနေသည်။ ပြီးခဲ့သည့် ဖေဖော်ဝါရီလ ၁၄ ရက်နေ့ နံနက်အစောပိုင်း ၂ နာရီခန့်မှစတင်၍ လုံးခင်းကျေးရွာအုပ်စု၊ ငြိမ်းချမ်းသာယာ (ခေါ်) ခွန်ဆာကုန်းရှိ လုံးခင်းနယ်မြေရဲစခန်းကို ကချင်လွတ်လပ်ရေးတပ်မတော် (KIA/KPDF) ပူးပေါင်းတပ်များက ဝင်ရောက်တိုက်ခိုက်ခဲ့ခြင်းဖြစ်သည်။ အဆိုပါတိုက်ပွဲအတွင်း လုံးခင်းရဲစခန်းကို တော်လှန်ရေးအင်အားစုများက အလုံးစုံရှင်းလင်းနိုင်ခဲ့သော်လည်း စစ်ကော်မရှင်တပ်ဘက်မှ လက်နက်ကြီးနှင့် လေကြောင်းပစ်ကူများကို ကျေးရွာများအတွင်းသို့ ရည်ရွယ်ချက်ရှိရှိ ပစ်ခတ်ခဲ့ခြင်းကြောင့် ပြည်သူများ သေဆုံးဒဏ်ရာရခဲ့ကြသည်။ ဖေဖော်ဝါရီ ၁၄ ရက်နေ့ ညနေပိုင်းတွင် လုံးခင်းရဲစခန်းအနီးရှိ ‘ပြည့်စုံကောင်း’ ထမင်းဆိုင်နောက်ကျော အိမ်ငှားဆောင်ပေါ်သို့ လက်နက်ကြီးကျည် တည့်တည့်ကျရောက်ခဲ့သည့် ဖြစ်စဉ်နှင့် ပတ်သက်၍ ဒေသခံတစ်ဦး က ယခုကဲ့သို့ ပြောသည်။ “ဒီ ၁၄ ရက်နေ့ ညနေ ၄ နာရီခွဲလောက်က လုံးခင်းရွာထဲက အိမ်ခန်းငှားနေတဲ့ အဆောင်ပေါ် စကစ လက်နက် ကြီး ကျတာပါ။ အဲဒီအချိန်က မိသားစုတွေ ထမင်းစားနေကြတဲ့အချိန်၊ ကလေး လေးယောက်နဲ့ လူကြီးနှစ် ယောက် ထိခိုက်ဒဏ်ရာ ရခဲ့ပါတယ်။ လုံးခင်းကို တော်လှန်ရေး အင်အားစုက စီးမိထားချိန် စကစဘက်က ပြည်သူ့တွေ နေအိမ်ကြားထဲကို လက်နက်ကြီးနဲ့ ပစ်ခတ်ခဲ့တာ ဖြစ်ပါတယ်။” တိုက်ပွဲသည် ဖေဖော်ဝါရီလ ၁၅ ရက်နေ့အထိ ဆက်လက်ပြင်းထန်ခဲ့ပြီး ဂျက်လေယာဉ်ဖြင့် တိုက်ခိုက်မှုကြောင့် ဆိုင်းတောင် ရွာဟောင်းလမ်းရှိ RC ဘုရားကျောင်း ထိမှန်ကာ အမျိုးသားတစ်ဦး သေဆုံးခဲ့ရသည်။ ထို့ပြင် ငြိမ်းချမ်းသာယာ အပိုင်း(၂) အတွင်းရှိ နေအိမ်တစ်လုံး လက်နက်ကြီးထိမှန်ကာ အမျိုးသားတစ်ဦး သေဆုံးပြီး သုံးဦး ဒဏ်ရာရရှိခဲ့သည့်အပြင် မီးလောင်ကျွမ်းမှုများလည်း ဖြစ်ပွားခဲ့သည်။ မြေပြင်တွင် တိုက်ပွဲဖြစ်ပွားနေသည့် အခြေအနေကို ဒေသခံ အမျိုးသားတစ်ဦးက ဆက်လက်ပြောပြသည်။ “လုံးခင်းနယ်မြေ ရဲစခန်းအနီး ငြိမ်းချမ်းသာယာ အပိုင်း (၂) က အိမ်တစ်လုံး လက်နက်ကြီးကျည်ကျပြီး မီးလောင်သွားတာလည်း ရှိတယ်။ အခုတော့ ပြည်သူအများစု စစ်ဘေးရှောင်နေကြရပြီ။ ပစ္စည်းဥစ္စာထက် အသက်က အရေးကြီးတာမို့ အကုန်လုံး ဂရုစိုက်ကြဖို့၊ ဘေးကင်းဖို့က အဓိကပေါ့ဗျာနော်” ဟု ပြောသည်။ လက်ရှိတွင် KIA ပူးပေါင်းတပ်များက လုံးခင်းရဲစခန်းကို ဖျက်ဆီးပြီးနောက် ပြန်လည်ဆုတ်ခွာသွားချိန်တွင် စစ်ကော်မရှင်ဘက်မှ ရှမ်းနီတပ် (SNA) ပါဝင်သော စစ်ကူများ ရောက်ရှိလာပြီး ကျေးရွာအတွင်း နေရာယူ ထားသဖြင့် တော်လှန်ရေးတပ်များက ဒရုန်းဖြင့် ပြန်လည်ဗုံးကြဲတိုက်ခိုက်နေကြောင်း ဒေသခံများက ပြောသည်။ ဖားကန့်တွင် ဇန်နဝါရီလ ၃၀ ရက်နေ့ခန့်မှ စတင်ကာ စစ်ကြောင်းထိုးလာသည့် စစ်ကော်မရှင်တပ်နှင့် KIA တို့ အကြား နှစ်ပတ်ကျော်ကြာ ဖြစ်ပွားနေသည့် တိုက်ပွဲများကြောင့် မရှီကထောင်၊ ထုံးဘို နှင့် ဂျန်ကပ် ကျေးရွာတို့မှ ဒေသခံများ တိမ်းရှောင်နေရသည်။ #ဖားကန့်တိုက်ပွဲ #လက်နက်ကြီးပစ်ခတ်မှု #KIA #စစ်ကော်မရှင် #SNA

စစ်ကော်မရှင် လေကြောင်းနှင့် လက်နက်ကြီး တိုက်ခိုက်မှုကြောင့် ကလေးများအပါအဝင် အရပ်သားများ သေဆုံး

Feb 17

ရှမ်းတောင် ကဒူးကြီးဒေသကို ပအိုဝ်းပြည်သူ့စစ်က လက်နက်ကြီးဖြင့် ပစ်ရာ အရပ်သား ၂ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၇ ရက်။ မောက်မယ်မြို့နယ် ကဒူးကြီးဒေသ ကျေးရွာအတွင်းသို့ ပအိုဝ်းပြည်သူ့စစ် (PNA) အဖွဲ့က လက်နက်ကြီးဖြင့် ပစ်ခတ်ခဲ့ရာ အရပ်သား ၂ ဦး ပြင်းထန် ဒဏ်ရာများ ရရှိခဲ့သည်။ ရှမ်းပြည်နယ်တောင်ပိုင်း၊ မောက်မယ်မြို့နယ်ရှိ ပအိုဝ်းအမျိုးသား လွတ်မြောက်ရေး တပ်မတော် (PNLA) ထိန်းချုပ်ရာ ကဒူးကြီးဒေသအတွင်းသို့ စစ်ကော်မရှင်နှင့် ပအိုဝ်းပြည်သူ့စစ် (PNA) ပူးပေါင်းတပ်များက လက်နက်ကြီးဖြင့် ပစ်ခတ်ခဲ့ရာ နာဟီးကျေးရွာအတွင်း ကျရောက်ပေါက်ကွဲပြီး အရပ်သား (၂) ဦး ဒဏ်ရာများ ပြင်းထန်စွာ ရရှိခဲ့ခြင်း ဖြစ်သည်။ ပြီးခဲ့သည့် ဖေဖော်ဝါရီလ ၁၄ ရက်နေ့ ညနေ ၃ နာရီခန့်တွင် ပွန်ချောင်းအား ဖြတ်ကျော်ဝင်ရောက်လာသည့် စစ်ကော်မရှင် ပူးပေါင်းတပ်သည် ဗန်းမတ်ကျေးရွာ၌ အထိုင်ချကာ တိုက်ပွဲဖြစ်ပွားခြင်းမရှိသည့် နာဟီးကျေးရွာသို့ ရည်ရွယ်ချက်ရှိရှိ ပစ်ခတ်ခဲ့ခြင်း ဖြစ်သည်။ အဆိုပါ ဖြစ်စဉ်နှင့် ပတ်သက်၍ PNLA ပြောရေးဆိုခွင့်ရှိသူ ခွန်ရိန်းယံက “အဲဒီ လက်နက်ကြီးနဲ့ ပစ်တာ အဲဒီ နာဟီးကျေးရွာထဲကို ကျတာဖြစ်ပါတယ်။ နာဟီးကျေးရွာကတော့ ဟိုတိုက်ပွဲနဲ့ မဆိုင်တဲ့နေရာမှာ ဖြစ်ပါတယ်။ ဒါပေမဲ့ စစ်ကောင်စီနဲ့ စစ်ကောင်စီလက်အောက်ခံ BGF က အဲဒီရွာထဲကို လက်နက်ကြီးနဲ့ ပစ်ခတ်ပစ်ထည့်တာ ပေါ့လေ။ အဲဒီမှာ အမျိုးသားတစ်ဦး၊ အမျိုးသမီးတစ်ဦး ဒဏ်ရာရပြီးတော့ အမျိုးသမီးက ဒဏ်ရာပြင်းထန်နေ တဲ့ အခြေအနေဖြစ်တယ်” ဟု အတည်ပြု ပြောသည်။ စစ်ကော်မရှင် ဦးဆောင်ကျင်းပမည့် ရွေးကောက်ပွဲ မတိုင်မီကာလများ ကတည်းက ကဒူးကြီးဒေသအတွင်းသို့ PNA ပူးပေါင်းစစ်ကြောင်းများသည် နေ့စဉ်နီးပါး ထိုးဖောက်ဝင်ရောက်ရန် ကြိုးပမ်းခဲ့ပြီး ဖေဖော်ဝါရီ ၁၃ ရက်နေ့ တွင် ဗန်းမတ်ကျေးရွာအတွင်းသို့ ဝင်ရောက်စိုးမိုးနိုင်ခဲ့ခြင်း ဖြစ်သည်။ ခွန်ရိန်းယံက ဆက်လက်၍ "ဒီကျေးရွာတွေက တိုက်ပွဲနဲ့လည်း မဆိုင်ပါဘူးဗျာ။ အခုလိုမျိုး PNO၊ BGF အနေနဲ့ ပအိုဝ်းလူမျိုးတွေရဲ့ ကျေးရွာ၊ ပအိုဝ်းလူမျိုးတွေ နေထိုင်တဲ့နေရာကို လက်နက်ကြီးနဲ့ ပစ်ထည့်တာကတော့ စိတ်မကောင်းဘူးပေါ့ဗျာ။ မဖြစ်သင့် မဖြစ်ထိုက်၊ မလုပ်သင့် မလုပ်ထိုက်တဲ့ဟာတွေကို လုပ်နေတာကျတော့ ပြည်သူတွေကို ရန်သူလို သဘောထားပြီး တိုက်ခိုက်နေတာ လုံးဝ ကန့်ကွက်ရှုတ်ချပါတယ်" ဟု ၎င်း၏ သဘောထားကို ပြောဆိုသည်။ ကဒူးကြီးဒေသအတွင်း မြေပြင်အခြေအနေမှာ ဆိုးရွားလျက်ရှိပြီး ဖေဖော်ဝါရီ ၁၂ ရက်နေ့တွင်လည်း ဗန်းမတ်၊ မုဲင်းဟုဲင်း နှင့် ဟမ်းဗွာ ကျေးရွာများကို အသေခံဒရုန်း (Kamikaze Drone) များဖြင့် ဗုံးကြဲတိုက်ခိုက်ခဲ့သဖြင့် နေအိမ် ၂၀ ခန့် ပျက်စီးခဲ့ရသည့်အပြင်၊ ဖေဖော်ဝါရီ ၁၃ ရက်နေ့၌လည်း ဗန်းမတ်ကျေးရွာရှိ အရပ်သားနေ အိမ်များကို မီးရှို့ဖက်ဆီးမှုများ ပြုလုပ်ခဲ့သေးသည်။ စစ်ရေးလေ့လာသူများ၏ သုံးသပ်ချက်အရ ၁၀၂၇ စစ်ဆင်ရေးနောက်ပိုင်း တိုင်းရင်းသားလက်နက်ကိုင် အဖွဲ့များနှင့် စစ်ကော်မရှင်အကြား အပစ်ရပ်စဲရေး သဘောတူညီချက်များ ရှိလာပြီးနောက် PNLA အနေဖြင့် မဟာမိတ်အင်အား စုစည်းမှုအပိုင်းတွင် စိန်ခေါ်မှုများရှိနေပြီး စစ်ကော်မရှင် ပူးပေါင်းတပ်များကို တစ်ဖွဲ့တည်း ခုခံရင်ဆိုင်နေရသည့် အနေအထားသို့ ရောက်ရှိနေသည်ဟု ဆိုသည်။ #PNLA #PNLO #PNO #PNA #ပအိုဝ်းပြည်သူစစ်

ရှမ်းတောင် ကဒူးကြီးဒေသကို ပအိုဝ်းပြည်သူ့စစ်က လက်နက်ကြီးဖြင့် ပစ်ရာ အရပ်သား ၂ ဦး ဒဏ်ရာရ

Feb 17

တရုတ်နှစ်သစ်ကူးနှင့် မီးမြင်းနှစ် ကြိုဆိုပွဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၇ ရက်။ တရုတ်နှစ်သစ်ကူး (နွေဦးပွဲတော်) အထိမ်းအမှတ်အဖြစ် တရုတ်ရုပ်သံကွန်ရက် CGTN တွင် လူသားများနှင့် AI စွမ်းရည်သုံး လူသားစက်ရုပ်များ ပူးပေါင်းတင်ဆက်သည့် ကွန်ဖူးပြပွဲတစ်ခုကို ပြသခဲ့ပါသည်။ ထိုပြပွဲတွင် စက်ရုပ်များ၏ တိကျမှုနှင့် နူးညံ့ပျော့ပြောင်းသော လှုပ်ရှားမှုများကို ထည့်သွင်းပုံဖော်သွားခဲ့ပါသည်။ တရုတ်ရိုးရာ ပြက္ခဒိန်အရ ယနေ့ ဖေဖော်ဝါရီ ၁၇ ရက်တွင် "မီးမြင်းနှစ်" သို့ စတင်ရောက်ရှိပြီ ဖြစ်ပါသည်။ ရိုးရာထုံးတမ်းစဉ်လာအရ နဂါးနှင့် ခြင်္သေ့အကများဖြင့် ကံကောင်းခြင်းကို ခေါ်ယူကြသလို၊ လူကြီးများက လူငယ်များကို "အန်ပေါင်း" (အနီရောင်စာအိတ်) ပေးကမ်းခြင်း၊ မိသားစုစုံညီစွာဖြင့် ကံကောင်းခြင်းနှင့် ရေရှည်တည်တံ့ခြင်းကို အဓိပ္ပာယ်ဆောင်သော ဟင်းလျာ ၈ မျိုး သို့မဟုတ် ၉ မျိုးကို ချက်ပြုတ်စားသောက်ခြင်းများဖြင့် စည်ကားသိုက်မြိုက်စွာ ဆင်နွှဲလျက်ရှိကြပါသည်။ အနှစ် ၆၀ လျှင် တစ်ကြိမ်သာ ကျရောက်တတ်သည့် ဤနှစ်သည် ခွန်အားနှင့် တက်ကြွမှုကို ကိုယ်စားပြုသဖြင့် အပြောင်းအလဲသစ်များ ပြုလုပ်ရန် အခွင့်အရေးကောင်းသောနှစ်ဟု ယူဆကြပါသည်။ #တရုတ်နှစ်သစ်ကူး #AIစွမ်းရည်သုံးကွန်ဖူးပြကွက်

တရုတ်နှစ်သစ်ကူးနှင့် မီးမြင်းနှစ် ကြိုဆိုပွဲ

Feb 17

AI ထိပ်သီးအစည်းအဝေးကို အိန္ဒိယတွင် ကျင်းပ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၇ ရက်။ ကမ္ဘာ့ AI နည်းပညာ၏ အနာဂတ်ကို ပုံဖော်မည့် "အေအိုင် သက်ရောက်မှုဆိုင်ရာ ထိပ်သီးအစည်းအဝေး" (AI Impact Summit) ကို အိန္ဒိယနိုင်ငံ၊ နယူးဒေလီမြို့တွင် ဖေဖော်ဝါရီ ၁၇ ရက်တွင် ဒုတိယမြောက်နေ့အဖြစ် ဆက်လက်ကျင်းပနေပါသည်။ ယခင်နှစ်များက ယူကေ၊ ကိုရီးယားနှင့် ပြင်သစ်နိုင်ငံတို့တွင် ကျင်းပခဲ့စဉ်က "ဘေးကင်းရေး" နှင့် "နိုင်ငံကြီးများ၏ အားပြိုင်မှု" ကိုသာ အဓိကထားခဲ့သော်လည်း ယခုတစ်ကြိမ်တွင်မူ ဖွံ့ဖြိုးဆဲနိုင်ငံများ (Global South) အတွက် အကျိုးရှိမည့် "အားလုံးအကျုံးဝင်ရေး" (Inclusivity) ဘက်သို့ ဦးတည်လာခဲ့ပါသည်။ အိန္ဒိယအစိုးရသည် အနောက်နိုင်ငံများအပေါ် အမှီအခိုကင်းသော "လွတ်လပ်သည့် ဒစ်ဂျစ်တယ် အချုပ်အခြာအာဏာ" ကို ဖော်ဆောင်ရန်အတွက် ဒေါ်လာ ၁.၂ ဘီလီယံ အသုံးပြုမည့် "AI Mission" အစီအစဉ်ကို တင်ပြခဲ့ပါသည်။ သို့သော် ပညာရှင်အချို့က စီးပွားရေးဖွံ့ဖြိုးမှုကိုသာ အာရုံစိုက်လာခြင်းကြောင့် AI ၏ ဘေးအန္တရာယ်ကင်းရှင်းရေးကိစ္စများ နောက်တန်းသို့ ရောက်သွားမည်ကို စိုးရိမ်လျက်ရှိကြပါသည်။ အစည်းအဝေးနောက်ဆုံးနေ့တွင် "ဒေလီကြေညာစာတမ်း" ထွက်ပေါ်လာရန် ရှိနေပါသည်။ #AIထိပ်သီးအစည်းအဝေး #အိန္ဒိယနိုင်ငံ #AIImpactSummit #နယူးဒေလီမြို့ #ဒေလီကြေညာစာတမ်း

AI ထိပ်သီးအစည်းအဝေးကို အိန္ဒိယတွင် ကျင်းပ

Feb 17

ကနေဒါက အယ်လ်ဘာတာ ခွဲထွက်ရေး လိုလားသူများ ဆန္ဒ ခံယူပွဲ ကျင်းပနိုင်ရန် ကြိုးပမ်း သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၇ ရက်။ ကနေဒါနိုင်ငံ၏ ရေနံနှင့် သဘာဝဓာတ်ငွေ့ အဓိကထွက်ရှိရာ အယ်လ်ဘာတာပြည်နယ်တွင် ဗဟိုအစိုးရ၏ စီးပွားရေးနှင့် သဘာဝပတ်ဝန်းကျင်ဆိုင်ရာ တင်းကျပ်သော စည်းမျဉ်းများအပေါ် မကျေနပ်မှုများကြောင့် လွတ်လပ်ရေးလိုလားသူများ၏ လှုပ်ရှားမှုများ အရှိန်မြင့်တက်လာနေပါသည်။ လွတ်လပ်ရေးလိုလားသည့် ဒေသခံများသည် လာမည့်အောက်တိုဘာလတွင် လူထုဆန္ဒခံယူပွဲတစ်ရပ် ပေါ်ပေါက်လာစေရန်အတွက် မဲဆန္ဒရှင် ၁၀ ရာခိုင်နှုန်း၏ လက်မှတ်များကို လာမည့် မေလ ၂ ရက်နေ့ နောက်ဆုံးထား၍ စုဆောင်းလျက်ရှိပါသည်။ ထူးခြားချက်အနေဖြင့် ခွဲထွက်ရေးလှုပ်ရှားသူများသည် ပြီးခဲ့သည့် ဇန်နဝါရီလအတွင်းက အမေရိကန်နိုင်ငံခြားရေးဝန်ကြီးဌာန အရာရှိများနှင့် ဝါရှင်တန်ဒီစီတွင် ၃ ကြိမ်တိုင်တိုင် တွေ့ဆုံခဲ့ကြောင်း သတင်းများ ထွက်ပေါ်နေပါသည်။ ထိုတွေ့ဆုံမှုတွင် လွတ်လပ်ရေးရရှိပါက အမေရိကန်ထံမှ ချေးငွေရယူရေးနှင့် ရေနံပိုက်လိုင်းအသစ် သွယ်တန်းရေးကိစ္စများကို တင်ပြခဲ့ကြသည်ဟု ဆိုပါသည်။ ကနေဒါဝန်ကြီးချုပ် မာ့ခ်ကာနေးကမူ အမေရိကန်အနေဖြင့် ကနေဒါ၏ အချုပ်အခြာအာဏာကို လေးစားရန် တိုက်တွန်းထားသည်။ စစ်တမ်းများအရ အယ်လ်ဘာတာပြည်နယ်သား ၂၀ ရာခိုင်နှုန်းခန့်မှာ ခွဲထွက်ရေးကို ထောက်ခံနေသည်။ #ကနေဒါ #အယ်လ်ဘာတာ #ခွဲထွက်ရေး #ကနေဒါဝန်ကြီးချုပ်မာ့ခ်ကာနေး

ကနေဒါက အယ်လ်ဘာတာ ခွဲထွက်ရေး လိုလားသူများ ဆန္ဒ ခံယူပွဲ ကျင်းပနိုင်ရန် ကြိုးပမ်း

Feb 17

အရှေ့အလယ်ပိုင်း အမေရိကန် စစ်အင်အား ထပ်ဖြည့် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၇ ရက်။ အမေရိကန်ပြည်ထောင်စုသည် အီရန်နိုင်ငံ၏ နျူကလီးယားအစီအစဉ်နှင့် ပြည်တွင်းဆန္ဒပြမှုများအပေါ် နှိပ်ကွပ်နေခြင်းတို့ကို ဖိအားပေးရန်အတွက် အရှေ့အလယ်ပိုင်းဒေသတွင် စစ်အင်အားကို အကြီးအကျယ် တိုးမြှင့်ချထားလျက်ရှိပါသည်။ ဘီဘီစီ (BBC) သတင်းဌာန၏ ဂြိုဟ်တုဓာတ်ပုံမှတ်တမ်းများအရ အမေရိကန်၏ "ယူအက်စ်အက်စ် အီဗရာဟင် လင်ကွန်း" (USS Abraham Lincoln) လေယာဉ်တင်သင်္ဘောသည် အီရန်ကမ်းလွန် ၇၀၀ ကီလိုမီတာခန့်အကွာသို့ ရောက်ရှိနေပြီဖြစ်သည်။ ထို့အပြင် ကမ္ဘာ့အကြီးဆုံး စစ်သင်္ဘောဖြစ်သော "ယူအက်စ်အက်စ် ဂျယ်ရယ်ဖို့ဒ်" (USS Gerald R. Ford) သည်လည်း လာမည့် ၃ ပတ်အတွင်း ဒေသတွင်းသို့ ရောက်ရှိလာမည် ဖြစ်ပါသည်။ လက်ရှိတွင် ပင်လယ်ကွေ့ဒေသ၌ အမေရိကန်စစ်သင်္ဘော ၁၂ စီးခန့် ဖြန့်ကြက်ထားသည့်အပြင် ဂျော်ဒန်နိုင်ငံရှိ စခန်းများတွင်လည်း F-15 နှင့် EA-18 တိုက်လေယာဉ်များကို အသင့်အနေအထားဖြင့် တိုးမြှင့်ချထားပါသည်။ အဆိုပါ အင်အားပြမှုကို တုံ့ပြန်သည့်အနေဖြင့် အီရန်နိုင်ငံကလည်း ဟော်မုဇ်ရေလက်ကြားတွင် ဒုံးကျည်များ ပစ်ခတ်၍ စစ်ရေးလေ့ကျင့်မှုများ ပြုလုပ်ခဲ့ပါသည်။ စစ်ရေးအကဲခတ်များက ယခုအကြိမ် အမေရိကန်၏ ပြင်ဆင်မှုသည် တစ်ရက်လျှင် တိုက်ပွဲဝင်လေယာဉ် အစီးရေ ၈၀၀ အထိ စေလွှတ်နိုင်စွမ်းရှိသဖြင့် ယခင်စစ်ဆင်ရေးများထက် ပိုမိုအားကောင်းပြီး ကျယ်ပြန့်သည်ဟု သုံးသပ်ထားကြပါသည်။ #အမေရိကန်တပ် #အရှေ့အလယ်ပိုင်း #အင်အားတိုးချ #နျူကလီးယားအစီအစဉ် #USSAbrahamLiconln

အရှေ့အလယ်ပိုင်း အမေရိကန် စစ်အင်အား ထပ်ဖြည့်

« Prev 1 … 47 48 49 50 51 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close