NMG Doh – Page 48 – Network Media Group

NMG Doh

Author: NMG Doh

Feb 19

အမေရိကန်က လာမည့်အပတ်တွင် အီရန်ကို တိုက်ခိုက်ရန် အသင့်ဖြစ်နေပြီ သတင်းနှင့် မီဒီယာကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၉ ရက်။ အမေရိကန်ပြည်ထောင်စုအနေဖြင့် အီရန်နိုင်ငံအား လာမည့်သီတင်းပတ်ကုန်တွင် စတင်တိုက်ခိုက်နိုင်သည့်အထိ စစ်ရေးအရ အသင့်ပြင်ဆင်ထားကြောင်း သတင်းရင်းမြစ်များကို ကိုးကား၍ CNN သတင်းဌာနက ထုတ်ပြန်ခဲ့သည်။ သို့သော်လည်း သမ္မတ ဒေါ်နယ်ထရမ့်အနေဖြင့် အဆိုပါစစ်ဆင်ရေးကို စတင်ရန် တရားဝင်အမိန့်ပေးမည့် နောက်ဆုံးဆုံးဖြတ်ချက်ကိုမူ ယခုထက်တိုင် ချမှတ်ခြင်း မရှိသေးပေ။ လတ်တလောရက်ပိုင်းအတွင်း အမေရိကန်သည် အရှေ့အလယ်ပိုင်းဒေသသို့ လေကြောင်းနှင့် ရေကြောင်းစစ်အင်အားများကို သိသာထင်ရှားစွာ ဖြည့်တင်းထားရှိသည်။ ကမ္ဘာ့အဆင့်မြင့်ဆုံး လေယာဉ်တင်သင်္ဘော USS Gerald Ford သည် လာမည့်သီတင်းပတ်ကုန်တွင် ဒေသတွင်းသို့ ရောက်ရှိလာမည်ဖြစ်ပြီး ဗြိတိန်အခြေစိုက် တိုက်လေယာဉ်များနှင့် ဆီဖြည့်လေယာဉ်များကိုလည်း အရှေ့အလယ်ပိုင်းနှင့် နီးစပ်ရာဒေသများသို့ ပြောင်းရွှေ့နေရာချထားပြီး ဖြစ်သည်။ ဂျနီဗာမြို့၌ အီရန်နှင့် အမေရိကန်ကိုယ်စားလှယ်များအကြား သွယ်ဝိုက်သောနည်းဖြင့် တွေ့ဆုံဆွေးနွေးမှုများ ပြုလုပ်ခဲ့ကြသော်လည်း ထူးခြားသောရလဒ်တစ်စုံတစ်ရာ ထွက်ပေါ်လာခြင်း မရှိသေးပေ။ အိမ်ဖြူတော်က သံတမန်ရေးရာနည်းလမ်းကို ပထမဦးစားပေးအဖြစ် ထားရှိသော်လည်း စစ်ရေးအရ တိုက်ခိုက်ရန် အမြဲတမ်းအသင့်ပြင်ဆင်ထားကြောင်း ဆိုသည်။ တစ်ဖက်တွင်လည်း အီရန်နိုင်ငံသည် ၎င်းတို့၏ နျူကလီးယားစက်ရုံများကို ကွန်ကရစ်နှင့် မြေစာများအသုံးပြု၍ မြေအောက်တွင် ပိုမိုခိုင်ခံ့အောင် အရေးပေါ်ခံစစ်ပြင်ဆင်နေကြောင်း ဂြိုဟ်တုဓာတ်ပုံများအရ သိရှိရသည်။ လာမည့်အင်္ဂါနေ့တွင် ကျရောက်မည့် နိုင်ငံတော်အခြေပြမိန့်ခွန်း၊ ဆောင်းရာသီအိုလံပစ်ပွဲ ပြီးဆုံးမည့်ရက်နှင့် ရာမာဒန်ဥပုသ်လ စတင်မှုတို့သည် စစ်ဆင်ရေးစတင်မည့်အချိန်အပေါ် သက်ရောက်မှုရှိနိုင်ကြောင်း သုံးသပ်ကြသည်။

အမေရိကန်က လာမည့်အပတ်တွင် အီရန်ကို တိုက်ခိုက်ရန် အသင့်ဖြစ်နေပြီ

Feb 19

အဖွဲ့ဝင် ကတ်ပြားများကို စားရိတ်တောင်းရန် အဓမ္မ လုပ်ခိုင်းနေဟု ပအိုဝ်းပြည်သူ့စစ်ကို စွပ်စွဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၉ ရက်။ ပအိုဝ်းပြည်သူ့စစ် (PNA) အဖွဲ့က ဒေသခံများကို ပြည်သူ့စစ်အဖွဲ့ဝင်ကတ်များ ပြုလုပ်ရန် ဖိအားပေး စေခိုင်းခြင်းမှာ စစ်ကော်မရှင် ထံ စစ်အသုံးစရိတ် တင်ပြတောင်းခံရန်အတွက်သာ ဖြစ်သည်ဟု နီးစပ်သူများက ပြောသည်။ ရှမ်းပြည် တောင်ပိုင်း၊ ညောင်ရွှေမြို့နယ်အတွင်းရှိ သပြေကုန်းကျေးရွာတွင် ရွာသားများကို ကတ်ပြားများ ပြုလုပ်စေခြင်း ဖြစ်သည်။ PNA ရာထူးကြီးပိုင်းများနှင့် နီးစပ်သူများ၏ အဆိုအရ အဆိုပါကတ်များ ပြုလုပ်ခြင်းမှာ တပ်ဖွဲ့ဝင်အင်အား စာရင်း ပြသနိုင်ရန်သာ ဖြစ်ပြီး ဒေသခံများအနေဖြင့် ပြည်သူ့စစ်ထဲသို့ အမှန်တကယ် ဝင်ရောက်စစ်မှုထမ်းရန် မလိုဟု ဆိုထားသော်လည်း မြေပြင်တွင်မူ ဒေသခံများက ယုံကြည်မှုမရှိဘဲ စိုးရိမ်ပူပန်နေကြသည်။ ပြည်သူ့စစ်ကတ် ရရှိထားသူတစ်ဦးနှင့် နီးစပ်သည့် အမျိုးသမီးတစ်ဦးက မြေပြင်အခြေအနေကို ယခုကဲ့သို့ ပြောပြသည်။ “သူကြီးကတော့ အဲဒါရှိရင် ဗမာစစ်တပ်က စစ်မှုထမ်း မခေါ်ဘူးလို့ ပြောတယ်။ အခု လုပ်ကြတာ တော့ အဲဒါ ကြောက်လို့ မဟုတ်ပါဘူး။ PNO က ဒါလုပ်ဆို တစ်ရွာလုံး လုပ်ရတာပဲ။ ပအိုဝ်းထုံးစံလို ဖြစ်နေပါ ပြီ။ မယုံရပါဘူး။ ဟိုတစ်ခါကလည်း လာခေါ်တာ ပါသွားတာပဲလေ။ သင်တန်းတက်တဲ့ လူတွေပေါ့။” သပြေကုန်းကျေးရွာရှိ အသက် ၁၈ နှစ်မှ ၃၅ နှစ်အတွင်း အမျိုးသားများကို ဖေဖော်ဝါရီလ ၁၀ ရက်နေ့ ကျေးရွာ အစည်းအဝေး၌ ကတ်ပြုလုပ်ရန် မှာကြားထားပြီး လာမည့် မတ်လအတွင်း PNA တာဝန်ရှိသူများက လာရောက် စစ်ဆေးမည်ဟု ဆိုသည်။ အဆိုပါ ကတ်ရှိပါက ယာဉ်လိုင်စင်များ မလိုအပ်ဘဲ ရှမ်းပြည်နယ်အတွင်း လွတ်လပ်စွာ သွားလာနိုင်မည် ဟု လည်း PNA က ဝါဒဖြန့်ထားကြောင်း ဒေသခံများက ပြောသည်။ ငွေကြေးကောက်ခံမှုနှင့် ပတ်သက်၍ PNA ဒုစစ်ဦးစီးချုပ် နေဝင်းထွန်းနှင့် နီးစပ်သူတစ်ဦးက “ပိုက်ဆံကတော့ မပေးရပါဘူး။ မပေးရဘူးဆိုတာက မကောက်တာ မဟုတ်ဘူး။ အရင်တစ်ခါ ကောက်ပြီးပြီ။ အဲဒီတုန်းက တိုင် ကြလို့တောင် သူတို့အပေါ်မှာ ပြဿနာတက်ကြသေးတယ်။ အခုတော့ မကောက်ဘူး။ နောက်လကျရင်တော့ ရိက္ခာကြေး ကောက်မယ်လို့ မှာခဲ့တယ်” ဟု ပြောသည်။ လက်ရှိတွင် PNA သည် သပြေကုန်းကျေးရွာ၌ ၂၀၂၄ ခုနှစ်အတွင်း စစ်သင်တန်းများ ပေးခဲ့သလို၊ ၂၀၂၅ ခုနှစ် ဖေဖော်ဝါရီလတွင် လူအင်အား ၈,၀၀၀ ကျော်ဖြင့် အင်အားပြပွဲများ ပြုလုပ်ကာ စစ်ရေးလှုပ်ရှားမှုများ အရှိန်မြှင့်တင်ထားသည်။ ထို့ပြင် စစ်ကော်မရှင်က ခေါ်ယူထားသည့် စစ်မှုထမ်းများအတွက် လစာငွေများကိုလည်း ဒေသခံများထံမှ ကောက်ခံနေသဖြင့် သပြေကုန်းဒေသခံများမှာ ဆက်ကြေးကောက်ခံမှုနှင့် လူသစ်စုဆောင်းမှုဒဏ်ကို အစဉ်တစိုက် ခံစားနေရကြောင်း ဆိုသည်။ ဓါတ်ပုံ - ပုံဟောင်း

အဖွဲ့ဝင် ကတ်ပြားများကို စစ်သုံးစရိတ်တောင်းရန် အဓမ္မ လုပ်ခိုင်းနေဟု ပအိုဝ်းပြည်သူ့စစ်ကို စွပ်စွဲ

Feb 19

ထားဝယ် နည်းပညာ တက္ကသိုလ်အနီး တိုက်ပွဲ ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၉ ရက်။ တနင်္သာရီတိုင်း၊ ထားဝယ်မြို့နယ်ရှိ နည်းပညာတက္ကသိုလ်အနီးတွင် စစ်ကော်မရှင်တပ်နှင့် တော်လှန်ရေး ပူးပေါင်းတပ်ဖွဲ့များ အကြား တိုက်ပွဲပြင်းထန်စွာဖြစ်ပွားခဲ့ပြီး စစ်တပ်ဘက်က လေကြောင်းတိုက်ခိုက်မှုအပြင် အမြောက်တပ်များဖြင့်ပါ ပစ်ကူပေးတိုက်ခိုက်ခဲ့ကြောင်း ဒေသခံများက ပြောသည်။ ပြီးခဲ့သည့် ဖေဖော်ဝါရီလ ၁၆ ရက် နံနက် ၆ နာရီခန့်တွင် မောင်မယ်ရှောင်ကျေးရွာရှိ ထားဝယ်နည်းပညာ တက္ကသိုလ်၌ တပ်စွဲထားသော စစ်ကော်မရှင်တပ်ဖွဲ့ကို ပြည်သူ့ကာကွယ်ရေး ပူးပေါင်းတပ်ဖွဲ့များက ဝင်ရောက် တိုက်ခိုက်ခဲ့ခြင်း ဖြစ်သည်။ တိုက်ပွဲအတွင်း နှစ်ဖက်အပြန်အလှန် ပစ်ခတ်မှုများ ပြင်းထန်ခဲ့ပြီးနောက် နံနက် ၁၀ နာရီခွဲခန့်တွင် စစ်ကော်မရှင် တပ်က Y-12 လေယာဉ်တစ်စီး အသုံးပြုကာ တက္ကသိုလ် အနီးတစ်ဝိုက်သို့ ဗုံးကြဲတိုက်ခိုက်ခဲ့ခြင်း ဖြစ်သည်။ မြေပြင်အခြေအနေနှင့် ပတ်သက်၍ ဘေးလွတ်ရာသို့ တိမ်းရှောင်နေရသည့် အသက် ၄၀ ကျော်အရွယ် ဒေသခံရွာသားတစ်ဦးက ယခုကဲ့သို့ ပြောသည်။ “နည်းပညာတက္ကသိုလ်နား တစ်ဝိုက်မှာ မနက်အစောကြီး ၆ နာရီလောက်မှာ ပစ်ခတ်တဲ့အသံတွေ စပြီးကြားရ တာ၊ လက်နက်ကြီးရော လက်နက်ငယ်တွေရော အသံစုံပဲ။ ထားဝယ်မြို့နယ် ဇဟာရွာနဲ့ ရေဖြူမြို့နယ် ကျောက် ကညာရွာတွေက စစ်ကော်မရှင် အမြောက်တပ်တွေဘက်ကလည်း လက်နက်ကြီးတွေနဲ့ အချက်ရေ မနည်းဘူး ပစ်ကူကြသေးတယ်။” စစ်ကော်မရှင်တပ်သည် နည်းပညာတက္ကသိုလ်အနီး အပြင် ရဲအိုင်နှင့် ပဒိုင်းချောင်းကျေးရွာများဘက်ကိုလည်း လေကြောင်းမှ ဗုံးကြဲခဲ့သည့်အပြင် စက်သေနတ်များဖြင့်ပါ ပစ်ခတ်ခဲ့သဖြင့် ထိခိုက်ပျက်စီးမှုများ ရှိနိုင်သော် လည်း အသေးစိတ်ကိုမူ အတည်မပြုနိုင်သေးပေ။ မောင်မယ်ရှောင်ကျေးရွာသည် တော်လှန်ရေးအင်အားစုများနှင့် စစ်ကော်မရှင်တပ်တို့ အကြား မကြာခဏ ဆိုသလို တိုက်ပွဲများဖြစ်ပွားရာ နယ်မြေတစ်ခုဖြစ်ပြီး ၂၀၂၄ ခုနှစ် နှစ်ဆန်းပိုင်းကတည်းက ရွာသားများမှာ နေရပ် စွန့်ခွာကာ ရွာလုံးကျွတ် တိမ်းရှောင်နေကြရခြင်း ဖြစ်သည်။ ယခုတစ်ကျော့ပြန် တိုက်ပွဲများကြောင့် ဒေသခံများမှာ နေရပ်ပြန်နိုင်ရန် မျှော်လင့်ချက် ပိုမိုဝေးကွာသွားခဲ့ရသလို၊ စစ်ဘေးရှောင်စခန်းများတွင်လည်း စိုးရိမ်ထိတ်လန့်စွာဖြင့် နေထိုင်နေကြရသည်။

ထားဝယ် နည်းပညာ တက္ကသိုလ်အနီး တိုက်ပွဲ ပြင်းထန်

Feb 19

ကဗျာ ဆရာ ဝင်းမြင့် ကွယ်လွန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၉ ရက်။ ‘စိတ်ဆိုတာ ကျယ်ပြောပြန့်ကားပေမယ့် ရုပ်ဆိုရင် ပေါက်ကွဲထိရှလွယ်တယ်’ ဟု ရေးဖွဲ့ခဲ့သော ခေတ်ပြိုင် ကဗျာဆရာ ဝင်းမြင့်သည် သူချစ်မြတ်နိုးသော ကဗျာကောင်းများစွာကို ချန်ရစ်ကာ ဘဝတစ်ပါးသို့ ကူးပြောင်း သွားခဲ့ပြီ ဖြစ်သည်။ ကဗျာဆရာဝင်းမြင့်၏ ဈာပနအခမ်းအနားကို ဖေဖော်ဝါရီလ ၁၇ ရက် နေ့လယ်ပိုင်းတွင် ပုသိမ်မြို့၊ သရောင်း ချောင်း သုဿန်သို့ ပို့ဆောင်၍ မီးသင်္ဂြိုဟ်ခဲ့ကြသည်။ ကွယ်လွန်သူ ကဗျာဆရာဝင်းမြင့်၏ နောက်ဆုံးခရီးသို့ ပုသိမ်မြို့ခံ မိတ်ဆွေများ၊ ကဗျာချစ်မြတ်နိုးသူများနှင့် အတူ ရန်ကုန်မြို့မှ ရောက်ရှိလာကြသော အနုပညာမိတ်ဆွေများ၊ ကဗျာဆရာများက လိုက်ပါပို့ဆောင် ဂုဏ်ပြုခဲ့ ကြသည်။ ဆရာနှင့် ညီအစ်ကိုရင်းချာကဲ့သို့ နှစ်ရှည်လများ အတူနေထိုင်ခဲ့သူ ကဗျာဆရာတစ်ဦးက ဆရာဝင်းမြင့်၏ ကဗျာခရီးစဉ်အပေါ် ယခုကဲ့သို့ မှတ်ချက်ပြုသည်။ “ဝင်းမြင့်က ကဗျာကောင်းတွေအများချန်ထားပြီး သေသွားပြီ။ ကဗျာလောကကြီးကတော့ ကဗျာဆရာတွေ တစ်ယောက်ပြီးတစ်ယောက် ဆုံးပါးသွားပေမယ့် ကဗျာရေစီးကြောင်းက ဘယ်တော့မှမရပ်တန့်သွားပါဘူး။ အမြဲရှင်သန်နေမှာပါ။” ဆရာဝင်းမြင့်သည် ၁၉၉၅ ခုနှစ်က "ပဲ့တင်" ကဗျာဖြင့် ဖြူးမိတ်ဆွေများစာကြည့်အသင်း စာပေဆုကို ရရှိခဲ့သူ ဖြစ်ပြီး ကဗျာစုပ်ယူဖန်တီးနိုင်စွမ်း အားကောင်းသူအဖြစ် အနုပညာအသိုင်းအဝိုင်းက အသိအမှတ်ပြုကြသည်။ ပဲ့တင် ### မိုးအညို့မှာ အိပ်တန်းပြန်တဲ့ဌက်အုပ်ကို စိတ်နဲ့ ပစ်ချကြည့်မိတယ်။ ကိုယ့်အပေါ်အကုသိုလ်တွေ ဘယ်လောက်ပြုတ်ကျလာမလဲလို့။ တိုးတိုးဖော်ရယ် စိတ်ဆိုတာကျယ်ပြောပြန့်ကားပေမယ့် ရုပ်ဆိုရင်ပေါက်ကွဲထိရှလွယ်တယ်။ နံရံရှိရင်တော့ ပဲ့တင်ထပ်စမြဲမဟုတ်လား။ မိုးတိမ်တွေရေ ငါ့အော်သံတွေပြန်မလာတော့ဘူးလား ငါ့နားတွေလိုက်လာခဲ့ပြီ။   ဝင်းမြင့် ၁၉၉၅ စက်တင်ဘာ ရုပ်ရှင်တေးကဗျာမဂ္ဂဇင်း ရန်ကုန်မှ ကဗျာဆရာတစ်ဦးကလည်း ဆရာ့အနုပညာအပေါ် ယခုကဲ့သို့ ဆိုသည်။ “သူက ကဗျာစုပ်ယူအားကောင်းတာပေါ့နော်။ ဖြတ်ကနဲမြင်တာတစ်ခုကို ကဗျာအဖြစ် ဖန်တီးနိုင်စွမ်း အား ရှိတယ်။ အဲဒါကလည်း ကပြက်ကချော်မဟုတ်ဘူး။ နှစ်ကြောင်းထဲဖြစ်စေ၊ ကဗျာရှည်တစ်ပုဒ်ပဲဖြစ်စေ ရသ မြောက်တယ်၊ ကဗျာအရာ မြောက်တယ်။” ဆရာသည် သွေးတိုးနှင့် နှလုံးရောဂါအခံရှိသော်လည်း ဆရာဝန်နှင့် ပြသခြင်းမရှိဘဲ နေ့စဉ် သမထကျင့်စဉ်ကိုသာ အားထုတ်လေ့ရှိကြောင်း နီးစပ်သူများက ဆိုသည်။ ဆရာကွယ်လွန်ခဲ့သည့် ဖြစ်စဉ်နှင့် ပတ်သက်၍ တူဖြစ်သူ ကိုထက်ဝေယံက ယခုကဲ့သို့ ပြောပြသည်။ “အဲဒီနေ့ကတော့ အမေနဲ့အဖေက ဆေးခန်းသွားမှာမို့ သူကအိမ်စောင့်ရင်း အပေါ်ထပ်သူ့အခန်းမှာ နေခဲ့တာ။ ဆေးခန်းပိတ်လို့ အမေတို့က ခဏ ပြန်လာတော့ 'မောင်လေး သွားချင်သွားတော့' ဆိုပြီးပြောတာ ဘာသံမှ မကြားလို့ အပေါ်တက်ကြည့်မှ ကုတင်ပေါ်မှာ လှဲရက်နဲ့ အသက်မရှိတော့တာ တွေ့ရတာ။ အိပ်နေတဲ့ အတိုင်း လေးပါပဲ။” သရောင်းချောင်းသုဿန်တွင် ပြုလုပ်သည့် နောက်ဆုံးခရီးစဉ်တွင် ကဗျာဆရာ မောင်ပြည့်မင်းက နှုတ်ဆက် စကား ပြောကြားခဲ့ပြီး၊ အနုပညာရှင် ရင်အေးက တယောထိုး၍လည်းကောင်း၊ ပုသိမ်နှင့် ရန်ကုန်မှ ကဗျာဆရာ များက ကဗျာရွတ်ဆို၍လည်းကောင်း ကဗျာဆရာတစ်ဦး၏ နောက်ဆုံးခရီးကို နှုတ်ဆက်ခဲ့ကြသည်။ ကဗျာဆရာဝင်းမြင့်သည် ၁၉၆၈ ခုနှစ်တွင် ပုသိမ်မြို့၌ မွေးဖွားခဲ့ပြီး၊ ၁၉၉၅ ခုနှစ်တွင် ‘ပဲ့တင်’ ကဗျာဖြင့် စာပေဆု ရရှိခဲ့ကာ၊ ၂၀၁၂ ခုနှစ်တွင် ‘နိုင်ငံတော်မျှော်ခြင်း’ ကဗျာဖြင့် အလယ်ရိုးမ ကဗျာဆုကို ထပ်မံရရှိခဲ့သည်။ ကွယ်လွန်ချိန်အထိ တစ်ကိုယ်တော် လုံးချင်းကဗျာစာအုပ် ၁၃ အုပ် အပါအဝင် စုစုပေါင်းစာအုပ် ၁၉ အုပ် ထွက်ရှိခဲ့ကာ နောက်ဆုံးစာအုပ်မှာ ၂၀၂၄ ခုနှစ်တွင် ထွက်ရှိသည့် ‘နှင်းမှုန်ရည်ကြွယ်’ ဖြစ်သည်။ ၂၀၂၆ ခုနှစ်၊ ဖေဖော်ဝါရီ ၁၅ ရက် ညနေပိုင်းတွင် ပုသိမ်မြို့ နေအိမ်၌ အေးချမ်းစွာ ကွယ်လွန်သွားခြင်း ဖြစ်သည်။

ကဗျာ ဆရာ ဝင်းမြင့် ကွယ်လွန်

Feb 18

RFA ပြန်လာပြီ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၈ ရက်။ Radio Free Asia လွတ်လပ်သော အာရှ အသံ၏ တရုတ်ဘာသာဖြင့် အသံလွှင့်ထုတ်မှုများ ပြန်လည် စတင်လိုက်ပြီ ဖြစ်ကြောင့် RFA အမှုဆောင်အရာရှိချုပ်က ယမန်နေ့က ပြောကြားခဲ့သည်ဟု ရိုက်တာ သတင်းတွင် ဖော်ပြချက်ကို ဘန်ကောက်ပို့စ် သတင်းစာက ထပ်ဆင့်ဖော်ပြသည်။ လတ်တလောတွင် တရုတ် (Mandarin)၊ တိဗက် (Tibetan) နှင့် ဝီဂါ (Uyghur) ဘာသာစကားများဖြင့် ထုတ်လွှင့်မှုများကို ပြန်လည်စတင်ခဲ့ခြင်း ဖြစ်သည်။ RFA ဥက္ကဋ္ဌနှင့် CEO ဖြစ်သူ (ဘေးဖန်) Bay Fang က ယခုကဲ့သို့ ပြန်လည်ထုတ်လွှင့်နိုင်ခြင်းမှာ ပုဂ္ဂလိက အသံလွှင့်ဝန်ဆောင်မှု ကုမ္ပဏီများနှင့် စာချုပ်ချုပ်ဆို ဆောင်ရွက်နိုင်ခဲ့ခြင်းကြောင့် ဖြစ်သည်ဟု LinkedIn တွင် ရေးသားခဲ့သည်။ RFA ပြောရေးဆိုခွင့်ရှိသူ Rohit Mahajan ၏ ပြောကြားချက်အရ မြန်မာ၊ တိဗက် နှင့် မြောက်ကိုရီးယား နိုင်ငံများသို့လည်း ပုဂ္ဂလိက ကုမ္ပဏီများနှင့် ချိတ်ဆက်ကာ အသံလွှင့်ထုတ်လွှင့်မှုများ ဆောင်ရွက်နေပြီဖြစ်သည်ဟု ဆိုသည်။ မကြာမီတွင် မြန်မာဘာသာ အစီအစဉ်များကို လှိုင်းတို (Short-wave) နှင့် လှိုင်းလတ် (Medium-wave) ကြိမ်နှုန်းများမှတစ်ဆင့် နားဆင်နိုင်မည် ဖြစ်သည်။ ယခုလအစောပိုင်းတွင် သမ္မတ ထရမ့် လက်မှတ်ရေးထိုးခဲ့သည့် နှစ်ပါတီသဘောတူ ရန်ပုံငွေဥပဒေအရ RFA ကို ကြီးကြပ်သည့် US Agency for Global Media (USAGM) အတွက် ဒေါ်လာ ၆၅၃ သန်း ခွင့်ပြုခဲ့သည်။ ယင်းပမာဏသည် ယခင်နှစ်များကထက် နည်းပါးသော်လည်း USAGM ကို ပိတ်ပစ်ရန် ထရမ့် တောင်းဆိုခဲ့သည့် ပမာဏထက်တော့ ပိုမိုများပြားနေသည်။ ပြီးခဲ့သည့်နှစ်တွင် သမ္မတ ထရမ့်က ခန့်အပ်ခဲ့သည့် USAGM ယာဉ်အမှုဆောင်အရာရှိချုပ် Kari Lake သည် အခွန်ထမ်းပြည်သူများ၏ ငွေကြေးကို ဖြုန်းတီးခြင်းနှင့် ထရမ့်အပေါ် ဘက်လိုက်မှုရှိခြင်းတို့ကို အကြောင်းပြကာ RFA နှင့် Voice of America (VOA) တို့ထံ ပေးအပ်သည့် ရန်ပုံငွေများကို ရပ်ဆိုင်းခဲ့သည်။ ယင်းလုပ်ရပ်ကြောင့် ဝန်ထမ်းအမြောက်အမြား အလုပ်ထုတ်ခံခဲ့ရပြီး အမေရိကန်၏ သြဇာလွှမ်းမိုးမှုကို တရုတ်ထံ ပေးအပ်လိုက်သလိုဖြစ်သည်ဟု ဝေဖန်မှုများ ထွက်ပေါ်ခဲ့သည်။ ဝါရှင်တန်ရှိ တရုတ်သံရုံး ပြောရေးဆိုခွင့်ရှိသူကမူ RFA သည် တရုတ်နိုင်ငံအပေါ် အပုပ်ချသည့် သတင်းမှားများကို နှစ်ရှည်လများ ဖြန့်ဝေနေသည့် အဖွဲ့အစည်းဖြစ်သည်ဟု စွပ်စွဲပြောကြားခဲ့သည်။

RFA ပြန်လာပြီ

Feb 18

Air Force One အရောင်ပြောင်းမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၈ ရက်။   အမေရိကန်သမ္မတများ စီးနင်းသည့် Air Force One လေယာဉ်ကို သမ္မတ ဒေါ်နယ်ထရမ့် လိုလားသည့် ဆေးအရောင်သို့ ပြောင်းလဲ ရန် အမေရိကန် လေတပ်က သဘောတူလိုက်သည်။ ၁၉၆၀ ပြည့်နှစ်ကျော် ဂျွန်အက်ဖ်ကနေဒီ လက်ထက်ကတည်းက အသုံးပြုလာသည့် ရိုးရာ ကောင်းကင်ပြာရောင် (Baby Blue) ကို ဖယ်ရှားပြီး သမ္မတ ဒေါ်နယ်ထရမ့် အဆိုပြုထားသည့် အနီ၊ အဖြူ၊ အပြာရင့်နှင့် ရွှေရောင် (Red, White, Dark Blue, and Gold) ဆေးများဖြင့် ပြောင်းလဲသုတ်ရန် အမေရိကန်လေတပ်က အတည်ပြုလိုက်ပြီ ဖြစ်သည်။ ဆေးရောင်ပြောင်းလဲမည့် လေယာဉ်များတွင် လက်ရှိ Boeing ကုမ္ပဏီက တည်ဆောက်နေသည့် 747-8 လေယာဉ်သစ် နှစ်စီး။ ကာတာနိုင်ငံက လက်ဆောင်ပေးထားသည့် 747-8 ဇိမ်ခံလေယာဉ် နှင့် ဒုသမ္မတ၊ သမ္မတကတော်နှင့် အစိုးရအဖွဲ့ဝင်များ စီးနင်းသည့် လေယာဉ်ငယ် (၄) စီး တို့ ပါဝင်မည်ဖြစ်သည်။ သမ္မတ ဒေါ်နယ်ထရမ့် ပထမအကြိမ် သမ္မတ ဖြစ်စဉ် ၂၀၁၉ ခုနှစ်တွင် ဤအရောင်ကို အဆိုပြုခဲ့သော်လည်း ဘိုင်ဒင်အစိုးရလက်ထက်တွင် "အပူလွန်ကဲမှု ပြဿနာ" ရှိနိုင်သည်ဆိုကာ ပယ်ဖျက်ခဲ့သည်။ ၂၀၂၅ ခုနှစ်မှာ ဒေါ်နယ်ထရမ့် ဒုတိယအကြိမ် သမ္မတ ဖြစ်လာချိန်တွင် ဤ အစီအစဉ်ကို ပြန်လည် အသက်သွင်းခဲ့ခြင်းလည်း ဖြစ်သည်။ လေယာဉ်ရဲ့ အောက်ခြေပိုင်းကို အပြာရင့်ရောင် သုတ်ထားပြီး အလယ်တွင် အနီရောင်အစင်းကြောင်း ပါဝင်မည် ဖြစ်သည်။ #AirForceOne #အမေရိကန်လေတပ် #သမ္မတထရမ့်

Air Force One အရောင်ပြောင်းမည်

Feb 18

အမေရိကန်က ပဉ္စမျိုးဆက် တိုက်လေယာဉ်တွေ အရှေ့အလယ်ပိုင်းကို ပို့ဆောင် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၈ ရက်။ အရှေ့အလယ်ပိုင်းဒေသတွင် တင်းမာမှုများ မြင့်တက်လာနေချိန်တွင် အမေရိကန်ပြည်ထောင်စုသည် ကမ္ဘာ့အဆင့်မြင့်ဆုံး စစ်ဘက်လေယာဉ်များကို အင်အားအလုံးအရင်းဖြင့် ဒုတိယမြောက်နေ့အဖြစ် ဆက်တိုက် ဖြန့်ကြက်နေသည်။ စစ်ရေးလေ့လာသူများနှင့် ဂြိုဟ်တုအချက်အလက်များအရ အမေရိကန် လေတပ်သည် ကမ္ဘာ့အဆင့်မြင့်ဆုံး ပဉ္စမမျိုးဆက် တိုက်လေယာဉ်များ ဖြစ်သည့် F-35A Lightning II နှင့် ဝေဟင်စိုးမိုးရေး တိုက်လေယာဉ် F-22 Raptor များကို အရှေ့အလယ်ပိုင်းသို့ ဦးတည် စေလွှတ်နေခြင်း ဖြစ်သည်။ ထို့အပြင် မြေပြင်ပစ်မှတ်များကို အဝေးမှ တိတိကျကျ တိုက်ခိုက်နိုင်သည့် F-15E Strike Eagle များ၊ အမေရိကန်လေတပ်၏ ပင်မဒေါက်တိုင် F-16 တိုက်လေယာဉ်များနှင့် အတူ ဝေဟင်တိုက်ပွဲများကို ကြိုတင်ထောက်လှမ်း ထိန်းချုပ်ပေးနိုင်သည့် အေဝက် AWACS လေယာဉ်တွေကိုပါ အစုလိုက်အပြုံလိုက် ဖြန့်ကြက်နေခြင်း ဖြစ်သည်။ သတင်းရင်းမြစ်များ၏ အဆိုအရ အဆိုပါ F-35 တိုက်လေယာဉ်အုပ်စုသည် အတ္တလန်တိတ်သမုဒ္ဒရာအတွင်းက Lajes (လာဂျက်စ်) လေတပ်စခန်းတွင် ခေတ္တရပ်နားပြီး အရှေ့အလယ်ပိုင်းကို ဆက်လက်ထွက်ခွာနေသည်ဟု ဆိုသည်။ ထူးခြားချက်အနေဖြင့် ဗင်နီဇွဲလားနိုင်ငံအနီးတွင် စစ်ဆင်ရေးဆောင်ရွက်နေသည့် တိုက်လေယာဉ်များကိုပင် ရုပ်သိမ်း၍ အရှေ့အလယ်ပိုင်းသို့ အရေးပေါ် ပြောင်းရွှေ့ခိုင်းထားခြင်း ဖြစ်သည်။ အမေရိကန်အစိုးရက တရားဝင် အကြောင်းပြချက် မထုတ်ပြန်သေးသော်လည်း ယခုလုပ်ဆောင်ချက်သည် ဒေသတွင်းရှိ ရန်လိုသည့် အင်အားစုများကို ဟန့်တားရန်နှင့် အမေရိကန်၏ စစ်အင်အားကို ထုတ်ဖော်ပြသရန်အတွက်ဖြစ်ကြောင်း ကျွမ်းကျင်သူများက သုံးသပ်ထားကြသည်။ #အမေရိကန်တိုက်လေယာဉ် #အရှေ့အလယ်ပိုင်း

အမေရိကန်က ပဉ္စမျိုးဆက် တိုက်လေယာဉ်တွေ အရှေ့အလယ်ပိုင်းကို ပို့ဆောင်

Feb 18

တရုတ် လျှို့ဝှက်နျူကလီးယား လျို့ဝှက် စမ်းသပ်မှုအပေါ် အမေရိကန်က အချက်အလက်သစ်များ ထုတ်ဖော် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၈ ရက်။ အမေရိကန်အစိုးရသည် ၂၀၂၀ ပြည့်နှစ်အတွင်း တရုတ်နိုင်ငံ၌ ပြုလုပ်ခဲ့သည်ဟု ယူဆရသော မြေအောက်နျူကလီးယား စမ်းသပ်ပေါက်ကွဲမှုဆိုင်ရာ အထောက်အထားသစ်များကို ထုတ်ဖော်လိုက်သည်။ လက်ထောက်နိုင်ငံခြားရေးဝန်ကြီး ခရစ္စတိုဖာ ယော၏ အဆိုအရ ၂၀၂၀ ပြည့်နှစ်၊ ဇွန်လ ၂၂ ရက်နေ့က တရုတ်နိုင်ငံအနောက်ပိုင်း၊ လော့ပ်နော် (Lop Nor) စမ်းသပ်ကွင်းတွင် ပြင်းအား ၂.၇၅ ရှိသော ပေါက်ကွဲမှုတစ်ခု ဖြစ်ပွားခဲ့သည်ကို ကာဇက်စတန်ရှိ စောင့်ကြည့်ရေးစခန်းက ဖမ်းယူရရှိခဲ့သည်ဟု ဆိုသည်။ အမေရိကန်ဘက်က ယင်းဖြစ်စဉ်သည် နျူကလီးယားစမ်းသပ်မှုဖြစ်ကြောင်း အခိုင်အမာ စွပ်စွဲထားသော်လည်း နိုင်ငံတကာ နျူကလီးယားစမ်းသပ်မှု ပိတ်ပင်ရေးအဖွဲ့ (CTBTO) ကမူ အတည်ပြုရန် အချက်အလက် မလုံလောက်သေးကြောင်း တုံ့ပြန်ထားသည်။ တရုတ်အစိုးရကလည်း ယင်းစွပ်စွဲချက်များကို ငြင်းဆိုထားပြီး အမေရိကန်သည် နျူကလီးယားစာချုပ်သစ်အတွက် တရုတ်အပေါ် ဖိအားပေးရန် ရည်ရွယ်ချက်ရှိရှိ လုပ်ဆောင်နေခြင်းဖြစ်ကြောင်း တုံ့ပြန်ထားသည်။ တရုတ်အနေဖြင့် ၂၀၃၀ ခုနှစ်တွင် နျူကလီးယား ထိပ်ဖူး ၁၀၀၀ အထိ ပိုင်ဆိုင်လာမည်ဟု ပင်တဂွန်က ခန့်မှန်းထားသည်။

တရုတ် လျှို့ဝှက်နျူကလီးယား လျို့ဝှက် စမ်းသပ်မှုအပေါ် အမေရိကန်က အချက်အလက်သစ်များ ထုတ်ဖော်

Feb 18

ဖိလစ်ပိုင်တွင် အမေရိကန်က ဒုံးကျည်စနစ်များ ထပ်မံဖြန့်ကြက်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၈ ရက်။ တောင်တရုတ်ပင်လယ်အတွင်း တရုတ်နိုင်ငံ၏ လုပ်ရပ်များကို ဟန့်တားရန်အတွက် အမေရိကန်ပြည်ထောင်စုသည် ဖိလစ်ပိုင်နိုင်ငံသို့ ခေတ်မီဒုံးကျည်စနစ်သစ်များ ထပ်မံစေလွှတ်ဖြန့်ကြက်ရန် စီစဉ်နေကြောင်း ၂၀၂၆ ခုနှစ်၊ ဖေဖော်ဝါရီ ၁၇ ရက်နေ့တွင် ထုတ်ပြန်ခဲ့သည်။ အမေရိကန်နှင့် ဖိလစ်ပိုင်တို့သည် ယခုနှစ်အတွင်း ပူးတွဲစစ်ရေးလေ့ကျင့်မှုများ တိုးမြှင့်ရန်နှင့် အဆင့်မြင့်ဒုံးကျည်စနစ်များအပြင် လူမဲ့လေယာဉ် (Drone) စနစ်များကိုပါ ဖိလစ်ပိုင်တွင် ထပ်မံဖြန့်ကြက်သွားရန် သဘောတူညီခဲ့ကြသည်။ ၂၀၂၄ ခုနှစ်ကတည်းက ဖိလစ်ပိုင်မြောက်ပိုင်းတွင် အမေရိကန်၏ Typhon အလတ်စားဒုံးကျည်စနစ်နှင့် သင်္ဘောဖျက်ဒုံးကျည်စနစ်များကို ချထားခြင်းအပေါ် တရုတ်က အပြင်းအထန် ကန့်ကွက်ခဲ့သည်။ ထိုလက်နက်များကို ပြန်လည်ရုပ်သိမ်းရန် တရုတ်က တောင်းဆိုသော်လည်း ဖိလစ်ပိုင်သမ္မတ ဖာဒီနန် မားကို့စ် ဂျူနီယာက ငြင်းဆန်ထားသည်။ အမေရိကန်နှင့် ဖိလစ်ပိုင် နှစ်နိုင်ငံစလုံးက တောင်တရုတ်ပင်လယ်အတွင်း တရုတ်၏ လုပ်ရပ်များသည် "တရားမဝင်ကြောင်း၊ အတင်းအဓမ္မလုပ်ဆောင်ခြင်းဖြစ်ကြောင်းနှင့် လှည့်ဖြားသည့်လုပ်ရပ်များဖြစ်ကြောင်း" ပြင်းပြင်းထန်ထန် ပြစ်တင်ရှုတ်ချခဲ့ကြသည်။ ဖြန့်ကြက်ထားသော Typhon ဒုံးကျည်စနစ်သည် မိုင်ပေါင်း ၁,၀၀၀ ကျော်အထိ ပစ်ခတ်နိုင်သဖြင့် ဖိလစ်ပိုင်မြောက်ပိုင်းမှနေ၍ တရုတ်ပြည်မကြီးကို ပစ်မှတ်ထားနိုင်သည့် အနေအထားတွင် ရှိနေသည်။ ဖိလစ်ပိုင်သံအမတ်ကြီး ရိုမူရက်ဒ်ဇ်က ယခုဖြန့်ကြက်မှုသည် မည်သည့်နိုင်ငံကိုမျှ ရန်စလိုခြင်းမဟုတ်ဘဲ တရုတ်၏ ရန်လိုမှုကို ဟန့်တားရန် (Deterrence) သက်သက်သာဖြစ်ကြောင်းနှင့် နောင်တွင် ဖိလစ်ပိုင်အနေဖြင့် အဆိုပါလက်နက်စနစ်များကို ဝယ်ယူနိုင်ရန်အတွက် ကြိုတင်လေ့လာခြင်းဖြစ်ကြောင်း ပြောကြားခဲ့သည်။

ဖိလစ်ပိုင်တွင် အမေရိကန်က ဒုံးကျည်စနစ်များ ထပ်မံဖြန့်ကြက်မည်

« Prev 1 … 46 47 48 49 50 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ