သတင်း

မွန်နှင့် တနင်္သာရီ လေကြောင်းတိုက်ခိုက်မှု ကလေးများအပါအဝင် ၅ ဦးသေ၊ ၁၀ ဦး ဒဏ်ရာရ

သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၁ ရက်။ စစ်ကော်မရှင်တပ်သည် အောက်တိုဘာလ ၉ ရက်နေ့နှင့် ၁၀ ရက်နေ့တွင် တိုက်ပွဲဖြစ်ပွားခြင်း မရှိဘဲ မွန်ပြည်နှင့် တနင်္သာရီတိုင်းဒေသကြီး အတွင်းရှိ အရပ်သားကျေးရွာများကို လေကြောင်းဖြင့် ဆက်တိုက် ဗုံးကြဲတိုက်ခိုက်ခဲ့ သည်။ ထိုသို့ ရက်စက်သော တိုက်ခိုက်မှုများကြောင့် ကလေးငယ်များ အပါအဝင် အရပ်သားပြည်သူများ သေဆုံး ဒဏ်ရာရ ခဲ့ရပြီး၊ ရာနှင့်ချီသော ဒေသခံ ပြည်သူများသည် ဘေးလွတ်ရာသို့ ထွက်ပြေးတိမ်းရှောင်နေကြရသည်။ ကေအဲန်ယူ (KNU) တပ်မဟာ (၁) နယ်မြေဖြစ်သည့် မွန်ပြည်၊ ဘီးလင်းမြို့နယ်၊ ပျဉ်းမပင်ဆိပ်အနောက်ကျေးရွာ သည် အောက်တိုဘာ ၉ ရက်နေ့၊ ည ၈ နာရီ ဝန်းကျင် အချိန်တွင် စစ်ကော်မရှင်တပ်၏ လေယာဉ်ဖြင့် ဗုံးကြဲ တိုက်ခိုက်မှုကို ခံခဲ့ရသည်။ တိုက်ပွဲ ဖြစ်ပွားခြင်း မရှိသည့် အရပ်သားပစ်မှတ်ကို တိုက်ရိုက် ပစ်မှတ်ထားခဲ့ခြင်းကြောင့် ကလေးငယ်များ အပါအဝင် အရပ်သား ၅ ဦးအထိ သေဆုံးခဲ့ပြီး၊ ၁၀ ဦးထက်မနည်း ဒဏ်ရာရရှိခဲ့ ကြောင်း ဒေသတွင်း သတင်း ရင်းမြစ်များက အတည်ပြုပြောဆိုသည်။ နောက်တစ်နေ့ဖြစ်သည့် အောက်တိုဘာလ ၁၀ ရက်နေ့ (ယနေ့)၊ နံနက်ပိုင်းတွင်လည်း တနင်္သာရီတိုင်းဒေသကြီး၊ တနင်္သာရီမြို့နယ်ထဲက တကူကျေးရွာကို စစ်ကော်မရှင်တပ်က တိုက်လေယာဉ်ဖြင့် ထပ်မံ ဗုံးကြဲတိုက်ခိုက်ခဲ့ သည်။ အဆိုပါ ဗုံးသည် ကျေးရွာထဲသို့ တိုက်ရိုက်ကျရောက်ခဲ့ရာ အရပ်သားပြည်သူ ၁၀ ဦးထက်မနည်း ထိခိုက် ဒဏ်ရာရရှိ ခဲ့သည်။ ထို့ပြင် တကူကျေးရွာရှိ မီးသတ်ရုံး အဆောက်အအုံလည်း ဗုံးထိမှန်၍ ပျက်စီးဆုံးရှုံးခဲ့သည်။ ယခုကဲ့သို့ စစ်တပ်က တိုက်ပွဲ ဖြစ်ပွားခြင်း မရှိသော အရပ်သားများကို ပစ်မှတ်ထားသည့် လေကြောင်း တိုက် ခိုက်မှုများကြောင့် တနင်္သာရီနှင့် ထားဝယ်မြို့နယ်ထဲရှိ ကျေးရွာပေါင်းများစွာမှ ရာနှင့်ချီသော ဒေသခံ ပြည်သူများ သည် မိမိတို့၏ နေအိမ်များမှ စွန့်ခွာကာ ဘေးလွတ်ရာ တောတောင်များသို့ ထွက်ပြေး တိမ်းရှောင်နေကြရသည်။ စစ်ဘေးရှောင်များ အနေဖြင့် အရေးပေါ် အမိုးအကာ၊ စားနပ်ရိက္ခာနှင့် ဆေးဝါးများ အပါအဝင် အခြေခံ လူသား ချင်းစာနာမှု အကူအညီများ အရေးတကြီး လိုအပ်နေကြောင်း အကူအညီပေးနေသူများက ပြောသည်။

မွန်နှင့် တနင်္သာရီ လေကြောင်းတိုက်ခိုက်မှု ကလေးများအပါအဝင် ၅ ဦးသေ၊ ၁၀ ဦး ဒဏ်ရာရ



မွန်နှင့် တနင်္သာရီ လေကြောင်းတိုက်ခိုက်မှု ကလေးများအပါအဝင် ၅ ဦးသေ၊ ၁၀ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၁ ရက်။ စစ်ကေ…

  • October 11, 2025
မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရ၍ ကလေးအပါ အရပ်သား ၈ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၀ ရက်။ ရှမ်းပြည်နယ်မြောက်ပိုင်း၊ မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရမှုကြောင့် ကလေးငယ်များ အပါအဝင် အရပ်သား ၈ ဦး ထိမှန် သေဆုံးခဲ့သည်။ စစ်ကော်မရှင်တပ်၏ လေကြောင်းတိုက်ခိုက်မှုထဲ ကလေး အပါအဝင် အရပ်သားပြည်သူ ၈ ဦး သေဆုံးခဲ့ရပြီး၊ အများအပြား ဒဏ်ရာရရှိခဲ့ကြောင်း ဒေသခံများက ပြောသည်။ ဒေသခံ အမျိုးသားတစ်သီးက “Airstrike ဖြစ်သွားတယ်။ မိုးမိတ်ဘက်မှာ။ ကိုသိန်းနိုင်အိမ်မှာ ၃ ယောက်၊ ဦးစိုးမြင့်အိမ်မှာ ၂ ယောက်၊ ဒေါ်ခင်မာရီ အိမ်က တစ်ယောက်၊ ဦးသိန်းဇော်အိမ်က တစ်ယောက်၊ နောက်ပြီး တခြားအိမ်က တစ်ယောက်လည်းပါတယ်။ ဒဏ်ရာရတာလည်း များတယ်။ အဲ့ဒီထဲမှာ ကလေးတစ်ယောက်က တော့ အသက်အန္တရာယ်က လွှတ်သွားတယ်။ ဒါပေမယ့် ခြေထောက်ဖြတ်ရမယ့် အခြေအနေမျိုးပေါ့နော်။ ထိသွားတာက တော်တော်ဆိုးတယ်” ဟု ပြောသည်။ အဆိုပါ တိုက်ခိုက်မှုမှာ တိုက်ပွဲဖြစ်ပွားခြင်းမရှိဘဲ အရပ်သားနေအိမ်များကို တိုက်ရိုက်ပစ်မှတ်ထားခြင်း ဖြစ်သည်ဟု ဆိုသည်။ စစ်ကော်မရှင်တပ်က ပေါင် ၅၀၀ ဗုံး၊ ပေါင်း ၂၅၀ ဗုံးတို့ဖြင့် အောက်တိုဘာလ ၉ ရက်နေ့၊ ညနေ ၆ နာရီကျော် အချိန်ခန့်တွင် ကြဲခဲ့ခြင်း ဖြစ်သည်။ အသက် ၃ နှစ်အရွယ် အပါအဝင် ဒေသခံပြည်သူ စုစုပေါင်း ၈ ဦး သေဆုံးခဲ့ရခြင်း ဖြစ်သည်။ အမျိုးသား ၅ ဦး၊ အမျိုးသမီး ၂ ဦး နှင့် ကလေးတစ်ဦး သေဆုံးခဲ့ပြီး ထိခိုက်ဒဏ်ရာ ရရှိသူ ၇ ဦး ရှိခဲ့သည်ဟု မြေပြင် သတင်းအရင်းအမြစ်က ပြောသည်။ ဒဏ်ရာရသူများထဲတွင် အသက် ၁၀ နှစ်အရွယ် ကလေးငယ်တစ်ဦး ပါဝင်ပြီး၊ ၎င်းမှာ ခြေထောက်တစ်ဖက် ဆုံးရှုံးသည်အထိ ဒဏ်ရာပြင်းထန်ခဲ့သည်။ လေကြောင်းမှ ဗုံးကြဲမှုထဲ ဗုံးပေါက်ကွဲမှုကြောင့် ကျေးရွာရှိ နေအိမ် ၇ လုံး ထိမှန် ပျက်စီးဆုံးရှုံးခဲ့သည်။ စစ်ကော်မရှင်တပ်သည် ဝဲဘောင်ကျေးရွာကို ဗုံးကြဲပြီးနောက် တစ်ညတည်းမှာပင် တောင်အင်တိုင်းဒေသ ဘက်သို့ ဗုံး ၂ လုံး ထပ်မံ ကြဲချခဲ့ကြောင်း မြေပြင် သတင်းအရင်းအမြစ်က ဆိုသည်။ အောင်တအင်တိုင်းဒေသ လေကြောင်းတိုက်ခိုက်ခံရမှုထဲ ထိခိုက်သေဆုံးမှုများ မရှိခဲ့သော်လည်း၊ ယခုဖြစ်စဉ် သည် စစ်ကော်မရှင်တပ်က တိုက်ပွဲဖြစ်ပွားခြင်းမရှိသည့် အရပ်သားပြည်သူများ၏ နေထိုင်ရာ နေရာများကို ပစ်မှတ်ထား ဗုံးကြဲတိုက်ခိုက်နေသည်ကို ထင်ရှားစေသည်ဟု ဆိုကြသည်။ မိုးမိတ်မြို့နယ်သည် ၂၀၂၄ ခုနှစ် ဇန်နဝါရီလအတွင်းက ကချင်လွတ်လပ်ရေး တပ်မတော် KIA၊ ကျောင်းသားတပ် ABSDF နှင့် တအာင်းတပ် TNLA မဟာမိတ်တပ်ဖွဲ့များ၏ ထိုးစစ်ဆင်မှုကြောင့် စစ်ရေးပြင်းထန်ခဲ့ပြီးနောက်ပိုင်း စစ်ကော်မရှင်၏ လေကြောင်းတိုက်ခိုက်မှုများ မကြာခဏ ပစ်မှတ်ထားခံရသည့် နယ်မြေတစ်ခုဖြစ်သည်။ လက်ရှိဖြစ်ပွားခဲ့သော လေကြောင်းတိုက်ခိုက်မှုသည် တိုက်ပွဲမရှိသည့် အရပ်သား နေထိုင်ရာ နေရာကို တိုက်ရိုက် ပစ်မှတ်ထားခြင်း ဖြစ်ပြီး၊ စစ်တပ်သည် ၎င်းတို့ လက်လွှတ်ဆုံးရှုံးထားသည့် နယ်မြေများတွင် အရပ်သားများ အပေါ် လေကြောင်းဖြင့် ဖိအားပေး အကြမ်းဖက်သည့် စစ်ရေးဗျူဟာကို ဆက်လက်ကျင့်သုံးနေခြင်း ဖြစ်ကြောင်း လေ့လာသူများက သုံးသပ်သည်။

မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရ၍ ကလေးအပါ အရပ်သား ၈ ဦး သေဆုံး

မိုးမိတ်၊ ဝဲဘောင်ကျေးရွာ လေကြောင်းတိုက်ခိုက်ခံရ၍ ကလေးအပါ အရပ်သား ၈ ဦး သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၀ ရက်။ ရှမ်းပြည…

  • October 10, 2025
အားပြင်းငလျင်ကြောင့် ဖိလစ်ပိုင်နှင့် အင်ဒိုနီးရှားတွင် ဆူနာမီသတိပေးချက် ထုတ်ပြန်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၀ ရက်။   အင်အားပြင်းငလျင်ကြောင့် ဖိလစ်ပိုင်နဲ့ အင်ဒိုနီးရှား နိုင်ငံတွေမှာ ဆူနာမီ သတိပေးချက်တွေ ထုတ်ပြန်ထားပါတယ်။   ဒီကနေ့ မနက် ဒေသစံတော်ချိန် ၉ နာရီ ၄၅ မိနစ်မှာ မဂ္ဂနီကျု ၇.၄ ရှိတဲ့ ငလျင်တစ်ခုက ဖိလစ်ပိုင် တောင်ပိုင်း မင်ဒနောင်း (Mindanao) မြို့အရှေ့တောင်ဘက် ကမ်းလွန်ပင်လယ်ပြင်ကို ဗဟိုပြုပြီး လှုပ်ခတ်ခဲ့ခြင်း ဖြစ်ပါတယ်။   မြေအောက် ၅၈.၁ ကီလိုမီတာအနက်မှာ ဗဟိုပြုတဲ့ ငလျင်ကြောင့် ဖိလစ်ပိုင်မှာ ၃ မီတာ (၁၀ပေ) ရှိတဲ့ ဆူတာမီလှိုင်းတွေ ဖြစ်နိုင်ပြီး အင်ဒိုနီးရှားမှာတော့ ဆူနာမီလှိုင်းတွေဟာ ၁ မီတာလောက်အထိ ရှိနိုင်တယ်လို့ အမေရိကန် ဆူနာမီသတိပေး စနစ်က ထုတ်ပြန်ထားပါတယ်။   ဖိလစ်ပိုင်တောင်ပိုင်း မင်ဒနောင်းမှာတော့ ပျက်စီးမှုတွေ ရှိခဲ့ပြီး အရေးပေါ် ကယ်ဆယ်ရေး လုပ်သားတွေက ကမ်းခြေမှာ ရှိတဲ့ ပြည်သူတွေကို ဘေးကင်းရာကို ရွှေ့ပြောင်းဖို့ ကူညီပေးနေကြပါတယ်။   ငလျင်ကြောင့် ထိခိုက်သေဆုံးမှု သတင်းတွေတော့ မရှိသေးပါဘူး။   အင်ဒိုနီးရှားမှာလည်း ငလျင်လှုပ်ခတ်မှုကို ခံစားရတယ်လို့ ဆိုပါတယ်။ ဆူလာဝေဆီ ကျွန်းနဲ့ ပါပူဝါ ဒေသတွေမှာတော့ ဆူနာမီ သတိပေးချက် ထုတ်ပြန်ထားပါတယ်။  

အားပြင်းငလျင်ကြောင့် ဖိလစ်ပိုင်နှင့် အင်ဒိုနီးရှားတွင် ဆူနာမီသတိပေးချက် ထုတ်ပြန် 

အားပြင်းငလျင်ကြောင့် ဖိလစ်ပိုင်နှင့် အင်ဒိုနီးရှားတွင် ဆူနာမီသတိပေးချက် ထုတ်ပြန် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၀ ရက်။ အင်အ…

  • October 10, 2025
ထိုင်းတွင် Pink Card လျှောက်လွှာတင်ရန် အောက်တိုဘာ ၁၅ ရက်နေ့တွင် စမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။   ထိုင်းနိုင်ငံတွင် စာရွက်စာတမ်း အထောက်အထားများ မရှိသည့် ရွှေ့ပြောင်းလုပ်သားများ အတွက် တရားဝင် အလုပ်လုပ်ခွင့်နှင့် ယာယီနေထိုင်ခွင့်ရရှိမည့် Pink Card (ပန်းရောင်ကတ်/ပန်းရောင်ဘတ်) အသစ်ကို ထုတ်ပေး ရန် ထိုင်းအစိုးရက ထုတ်ပြန်ကြေညာလိုက်သည်။   ဤ Pink Card (ပန်းရောင်ဘတ်) အစီအစဉ်သည် မြန်မာ၊ ကမ္ဘောဒီးယား၊ လာအိုနှင့် ဗီယက်နမ် နိုင်ငံသားများ အတွက် အထူးရည်ရွယ်သည်ဟု ထိုင်းသတင်းများက ဆိုသည်။   ထိုင်းအစိုးရ၏ ရည်ရွယ်ချက်မှာ လက်ရှိ ထိုင်းနိုင်ငံအတွင်း၌ အထောက်အထားမဲ့ နေထိုင် အလုပ်လုပ်ကိုင်နေ ကြသော ရွှေ့ပြောင်း အလုပ်သမားများ တရားဝင်ဖြစ်ရေး ဖြစ်သည်။   ခန့်မှန်းခြေ ၅ သိန်းမှ ၇ သိန်းဝန်းကျင် ရှိသော ရွှေ့ပြောင်းလုပ်သားများ အားလုံးကို တရားဝင် အလုပ်လုပ်ကိုင်ခွင့် ရရှိစေရန်နှင့် ၎င်းတို့၏ အလုပ်သမား အခွင့်အရေးများကို ကာကွယ်ပေးရန် ဖြစ်သည်ဟု ထိုင်းအစိုးရက ဆိုသည်။   အထောက်အထားမဲ့ ရွှေ့ပြောင်းလုပ်သားများ Pink Card လျှောက်ထားခြင်း လုပ်ငန်းစဉ်ကို အဓိကအားဖြင့် အဆင့် သုံးဆင့် ခွဲခြား လုပ်ဆောင်ရမည် ဖြစ်သည်။   အမည်စာရင်းပေးသွင်းခြင်းနှင့် ယာယီလုပ်ကိုင်ခွင့်၊ ဆေးစစ်ခြင်းနှင့် အာမခံဝယ်ယူခြင်း၊ လက်ဗွေနှိပ်ခြင်းနှင့် ဗီဇာလျှောက်ထားခြင်း စသဖြင့် အဆင့် ၃ ဆင့်ရှိသည်။   ပထမဦးဆုံးအနေဖြင့် အောက်တိုဘာလ ၁၅ ရက်နေ့မှ ၂၉ ရက်နေ့ အတွင်း လူသစ် အမည်စာရင်း (Name Lists) များကို သက်ဆိုင်ရာဌာနတွင် ပေးသွင်းရမည်။   အမည်စာရင်းသွင်းပြီးသည်နှင့် ၎င်းလုပ်သားများသည် ဒီဇင်ဘာလ ၂၈ ရက်နေ့အထိ ယာယီအလုပ်လုပ်ခွင့်ကို ရရှိသွားမည်ဖြစ်သည်။   ဒုတိယအဆင့်အနေဖြင့် အောက်တိုဘာလ ၃၀ ရက်နေ့မှ ဒီဇင်ဘာလ ၂၆ ရက်နေ့ ကာလအတွင်းတွင် ရွှေ့ပြောင်း အလုပ်သမားများက ဆေးစစ်ခြင်း၊ ကျန်းမာရေးအာမခံ ဝယ်ယူခြင်း နှင့် Work Permit (အလုပ်လုပ်ခွင့် လက်မှတ်) အတွက် လိုအပ်သော ငွေကြေးများကို သွင်းခြင်းတို့ကို ဆက်လက်ဆောင်ရွက်ရမည်။   အထက်ပါ ပထမနှင့် ဒုတိယအဆင့် လုပ်ငန်းစဉ်အားလုံး ပြီးစီးသွားပါက နောက်ဆုံးအဆင့် အနေဖြင့် ထိုင်းနိုင်ငံ ၏ လူဝင်မှုကြီးကြပ်ရေး (လဝက) ရုံးများတွင် လက်ဗွေနှိပ်ခြင်း နှင့် ဗီဇာ (Visa) လျှောက်ထားခြင်း တို့ကို ဆက်လက် ဆောင်ရွက်ရမှာဖြစ်သည်။   ဤလုပ်ငန်းစဉ်များ ပြီးဆုံးသွားပါက ရွှေ့ပြောင်းလုပ်သားများသည် တစ်နှစ်သက်တမ်း (၂၀၂၆ ခုနှစ်၊ အောက်တို ဘာလ ၁၄ ရက်နေ့အထိ) တရားဝင် အလုပ်လုပ်ခွင့်ကို ရရှိမှာဖြစ်သည်။

ထိုင်းတွင် Pink Card လျှောက်လွှာတင်ရန် အောက်တိုဘာ ၁၅ ရက်နေ့တွင် စမည်

ထိုင်းတွင် Pink Card လျှောက်လွှာတင်ရန် အောက်တိုဘာ ၁၅ ရက်နေ့တွင် စမည်  သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၉ ရက်။ ထိုင်းနိုင်ငံတွင…

  • October 9, 2025
ဝိုင်းမော်နှင့် ဗန်းမော်တွင် တိုက်ပွဲပြင်းထန်၊ KIA နှင့် ပူးပေါင်းတပ်က တပ်စခန်းအချို့ ပြန်သိမ်း

 သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။   ကချင်ပြည်၊ ဝိုင်းမော်နှင့် ဗန်းမော်မြို့နယ်အတွင်း စစ်ကော်မရှင်တပ်ဖွဲ့များနှင့် ကချင် လွတ်လပ်ရေး တပ်မတော် (KIA) ဦးဆောင်သော ပူးပေါင်းအဖွဲ့တို့ကြား တိုက်ပွဲများ ဆက်လက်ပြင်းထန်နေပြီး စစ်ကော်မရှင်တပ်ဘက်မှ နေရာအချို့ ဆုတ်ခွာပေးထားရသည်။   အောက်တိုဘာလ ၉ ရက်နေ့အထိ ဝိုင်းမော်နှင့် ဗန်းမော်မြို့နယ် နှစ်ခုစလုံးတွင် နှစ်ဖက်တိုက်ပွဲများ ပြင်းပြင်းထန်ထန် ဆက်ဖြစ်နေသည်ဟု မြေပြင် သတင်းအရင်းအမြစ်က ပြောသည်။   ပြီးခဲ့သည့်ရက်ပိုင်းအတွင်း KIA ပူးပေါင်းတပ်ဖွဲ့သည် စစ်ကော်မရှင်တပ်၏ ရှေ့တန်းစခန်းအချို့ကို ပြန်လည် သိမ်းပိုက်နိုင်ခဲ့သည် ဟု KIO/KIA ပြောခွင့်ရသူ ဗိုလ်မှူးကြီး နော်ဘူက အတည်ပြုပြောသည်။   အောက်တိုဘာလ ၈ ရက်နေ့တွင် စစ်ကော်မရှင်တပ်က လေကြောင်းပစ်ကူနှင့် မြစ်ကြီးနားမှ လက်နက်ကြီး ပစ်ကူများ ရယူနေသည့်ကြားမှပင် KIA က ၎င်းတို့၏ ကာကင်းစခန်း/ကင်းစခန်း အချို့ကို သိမ်းယူနိုင်ခဲ့သည်။   ဝိုင်းမော်ဒေသတွင် လမြန်ကျေးရွာအနီးရှိ စစ်ကော်မရှင်တပ်နှင့် ပြည်သူ့စစ်အဖွဲ့ ပူးပေါင်းတပ်စွဲထားသော စခန်းငယ် (ကင်းစခန်း) နှစ်ခုကို သိမ်းပိုက်ရရှိခဲ့သည်။   ဗန်းမော်မြို့နယ်ထဲတွင်လည်း ခလရ ၄၇ အနီးရှိ စစ်ကော်မရှင်တပ်ဖွဲ့များ တပ်စွဲထားသည့် နေရာ ၄ နေရာ ထက် မနည်းကို KIA ပူးပေါင်းတပ်များက တိုက်ခိုက်သိမ်းယူနိုင်ခဲ့သည်။   အလားတူ အောက်တိုဘာလ ၇ ရက်နေ့က ဗန်းမော်တိုက်ပွဲ၌ စစ်ကော်မရှင်ဘက်မှ ဗိုလ်မှူး ၁ ဦး အပါအဝင် အရာရှိနှင့် စစ်သားအချို့ သေဆုံးမှုများ ရှိခဲ့ကြောင်း ဗိုလ်မှူးကြီး နော်ဘူက ပြောသည်။   ဗန်းမော်တိုက်ပွဲသည် ၁၀ လနီးပါး ကြာမြင့်လာပြီ ဖြစ်ပြီး ကချင်ပြည်အတွင်း အပြင်းထန်ဆုံးနှင့် အကြာရှည်ဆုံး တိုက်ပွဲများထဲမှ တစ်ခုဖြစ်သည်။   နှစ်ဖက်တပ်ဖွဲ့များသည် မြို့တွင်းနှင့် မြို့နားတစ်ဝိုက်ရှိ စစ်ရေးအရ အရေးပါသော စခန်းများကို အပြန်အလှန် သိမ်းပိုက်လိုက်၊ ပြန်ပေးလိုက် အနေအထားဖြင့် တိုက်ပွဲများ ဆက်ဖြစ်နေကြသည်။   လအတော်ကြာ တိုက်ပွဲများကြောင့် ဗန်းမော်မြို့မှာ တော်တော်များများ ပျက်စီးဆုံးရှုံးခဲ့ရပြီး၊ အရပ်သား ထောင်နှင့်ချီ သည်လည်း နေရပ်စွန့်ခွာကာ စစ်ဘေးရှောင်နေရဆဲ ဖြစ်သည်။

ဝိုင်းမော်နှင့် ဗန်းမော်တွင် တိုက်ပွဲပြင်းထန်၊ KIA နှင့် ပူးပေါင်းတပ်က တပ်စခန်းအချို့ ပြန်သိမ်း



ဝိုင်းမော်နှင့် ဗန်းမော်တွင် တိုက်ပွဲပြင်းထန်၊ KIA နှင့် ပူးပေါင်းတပ်က တပ်စခန်းအချို့ ပြန်သိမ်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ …

  • October 9, 2025
လေးကေကော်တွင် တိုက်ပွဲ ပြင်းထန်၊ KNLA ပူးပေါင်းတပ်က နေရာအချို့မှ ယာယီဆုတ်   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။   မြန်မာ - ထိုင်းနယ်စပ်၊ ကရင်ပြည်ရှိ လေးကေကော်မြို့သစ်တွင် စစ်ကော်မရှင်တပ်နှင့် KNLA ဦးဆောင်သော ပူးပေါင်းတပ်ဖွဲ့တို့ကြား တိုက်ပွဲများ အောက်တိုဘာလ ၉ ရက်နေ့အထိ ပြင်းထန်နေဆဲဖြစ်ကြောင်း မြေပြင် သတင်းအရင်း အမြစ်များ အရ သိရသည်။   စက်တင်ဘာလ အစောပိုင်းမှ စတင်၍ စစ်ကော်မရှင်တပ်ဖွဲ့များသည် လူအင်အား အလုံးအရင်းဖြင့် မြဝတီမြို့ တောင်ပိုင်းသို့ ထိုးစစ်ဆင်လာခဲ့သည်။   နယ်ခြားစောင့်တပ် (BGF) အဖွဲ့၏ အကူအညီဖြင့် စစ်ကြောင်း ၅ ခုခန့် ပူးပေါင်းကာ လေးကေကော်ကို ပိတ်ဆို့ တိုက်ခိုက်နေခြင်း ဖြစ်သည်။   အောက်တိုဘာလ ပထမအပတ်အတွင်း စစ်တပ်၏ ထိုးစစ်နှင့် လေကြောင်းပစ်ကူများကြောင့် ကရင် အမျိုးသား လွတ်မြောက်ရေး တပ်မတော် KNLA ပူးပေါင်းတပ်ဖွဲ့သည် စစ်နည်းဗျူဟာအရ လေးကေ့ကော်မြို့သစ်ရှိ ရပ်ကွက် ၃ မှ ဆေးရုံကုန်းနှင့် ရပ်ကွက် ၅ မှ ရေကန်ကုန်း နေရာတို့မှ ယာယီ ဆုတ်ခွာပေးထားရသည်။   မြေပြင်ထိုးစစ်များအပြင် လေကြောင်းတိုက်ခိုက်မှုများ ပါဝင်သော စစ်ပွဲများက ဆက်လက် ပြင်းထန်နေဆဲဖြစ်၍ ဒေသခံပြည်သူများသည် ကြီးမားသော အသက်အန္တရာယ် စိုးရိမ်မှုများနှင့် ရင်ဆိုင်နေရသည်။   လက်ရှိ စစ်ရေး အခြေအနေများကြောင့် လေးကေကော်ဒေသနှင့် ဖလူးကျေးရွာအုပ်စုမှ ကျေးရွာပေါင်း ၈ ရွာ ခန့်ရှိ စစ်ဘေးရှောင်ပြည်သူ ၃,၄၀၀ ကျော်မှာ နေရပ်စွန့်ခွာခဲ့ရသည်။   အဆိုပါစစ်ဘေးရှောင်များသည် ထိုင်း-မြန်မာ နယ်စပ် သောင်ရင်းမြစ်ကမ်းဘေး တစ်လျှောက်၌ ခိုလှုံနေကြရ သည်။   ထိုင်းစစ်တပ်နှင့် ထိုင်းနယ်ခြားစောင့်တပ်ဖွဲ့များကလည်း လေးကေ့ကော်ဒေသနှင့် မျက်နှာချင်းဆိုင် နယ်စပ် တစ်လျှောက်တွင် လုံခြုံရေးကို တင်းတင်းကျပ်ကျပ် တိုးမြှင့်ချထားသည်။   ထို့အပြင် မြန်မာဘက်မှ ထွက်ပြေးလာသော စစ်ရှောင်ပြည်သူများကို ယာယီ လက်ခံထားရှိနိုင်ရန် အတွက် ယာယီနေရာများကိုလည်း စီစဉ်ပေးထားကြောင်း ထိုင်းသတင်းများက ဖော်ပြသည်။

လေးကေကော်တွင် တိုက်ပွဲ ပြင်းထန်၊ KNLA ပူးပေါင်းတပ်က နေရာအချို့မှ ယာယီဆုတ် 

လေးကေကော်တွင် တိုက်ပွဲ ပြင်းထန်၊ KNLA ပူးပေါင်းတပ်က နေရာအချို့မှ ယာယီဆုတ် သတင်းနှင့်မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၉ ရက်။ မြန်မာ - ထိုင…

  • October 9, 2025
မင်းတပ် စာသင်ကျောင်း ဗုံးကြဲခံရ၊ ကျောင်းသား ၃ ဦးနှင့် မသန်စွမ်း အမျိုးသမီး ၁ ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။   ချင်းပြည်၊ မင်းတပ်မြို့နယ်ထဲ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ ကလေးများနှင့် မသန်စွမ်း အမျိုးသမီး အပါအဝင် အရပ်သား ၄ ဦး သေဆုံးခဲ့သည်။   မင်းတပ်မြို့နယ်ထဲက ထင်ချောင်းကျေးရွာရှိ စာသင်ကျောင်းဝင်းထဲ ဗုံးကျရောက်ပေါက်ကွဲခဲ့ခြင်း ဖြစ်သည်ဟု ဒေသခံများက ပြောသည်။   လေကြောင်း ဗုံးကြဲခံရမှုကြောင့် အထက်တန်းကျောင်းသား ၃ ဦးအပြင် ကျောင်းဝင်းထဲက မသန်စွမ်း အမျိုးသမီး တစ်ဦး ထိမှန်သေဆုံးသွားခဲ့သည်။   CDF - Mindat သတင်းပြန်ကြားရေး နှင့် မှတ်တမ်းဌာန က “အကြမ်းဖက် စစ်ကောင်စီက မင်းတပ်မြို့နယ် တိုက်နယ် ၂ ရှိ ကျေးရွာ (၂) ရွာကို မနေ့ ညနေ ၃ ကြိမ်ပေါ့နော် လေကြောင်းကနေ တိုက်ခိုက်ခဲ့တာပါ။ တိုက် ခိုက်မှုများကြောင့် ကျေးရွာရှိ ဘော်ဒါဆောင်များတွင် ပညာ သင်ကြားနေကြသော ကျောင်းသား ၃ ဦး၊ အဆောင်နေ မသန်စွမ်း အမျိုးသမီး တစ်ဦးတို့ သေဆုံးတယ်။ ၁၀ ယောက်ကျော် ထိခိုက်ဒဏ်ရာရရှိခဲ့တယ်။ စာသင်ဆောင်တွေ အပါအဝင် ပြည်သူနေအိမ် ၆ လုံး ထိခိုက် ပျက်စီးခဲ့တယ်” ဟု ပြောသည်။   ကျေးရွာအတွင်းရှိ ဘော်ဒါကျောင်းဆောင်နှင့် စာသင်ကျောင်းကို အဓိကထား ဗုံးကြဲတိုက်ခိုက်ခံခဲ့ရခြင်း ဖြစ်သည်ဟု မြေပြင် သတင်းအရင်းအမြစ်က ပြောသည်။   အောက်တိုဘာလ ၈ ရက်နေ့ ညပိုင်းတွင် လေကြောင်းမှာ ဗုံးကြဲခဲ့ခြင်းကြောင့် ကျောင်းဝင်းထဲက ကလေးများ စာကျက်နေသည့် နေရာ၌ ကျရောက်ပေါက်ကွဲခဲ့ခြင်း ဖြစ်သည်။   သေဆုံးသူ ၄ ဦးအပြင် ကျောင်းသူ၊ ကျောင်းသား ၁၅ ဦးလည်း ထိမှန်ဒဏ်ရာ ရခဲ့သည်ဟု မြေပြင် သတင်း အရင်းအမြစ်က ပြောသည်။   လေကြောင်းမှ ဗုံးကြဲ တိုက်ခိုက်ခံရမှုမကြောင့် စာသင်ဆောင်များ အပါအဝင် နေအိမ် (၆) လုံးလည်း ထိမှန် ပျက်စီးကုန်သည်ဟု CDF - Mindat အဖွဲ့က အောက်တိုဘာလ ၉ ရက်နေ့တွင် သတင်းထုတ်ပြန်ထား သည်။   စာသင်ကျောင်းများဖြစ်သည့် အရပ်သားပစ်မှတ်များကို ဦးတည်သော လေကြောင်းတိုက်ခိုက်မှုမှာ နိုင်ငံတကာ ဥပဒေအရ စစ်ရာဇဝတ်မှု မြောက်သည်ဟု ဆိုကြသည်။

မင်းတပ် စာသင်ကျောင်း ဗုံးကြဲခံရ၊ ကျောင်းသား ၃ ဦးနှင့် မသန်စွမ်း အမျိုးသမီး ၁ ဦး သေဆုံး

မင်းတပ် စာသင်ကျောင်း ဗုံးကြဲခံရ၊ ကျောင်းသား ၃ ဦးနှင့် မသန်စွမ်း အမျိုးသမီး ၁ ဦး သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၉ ရက်။ …

  • October 9, 2025
ဒဏ်ရာရ ကျားသစ်ကို မြစ်ရေထဲမှာ ကယ်ဆယ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။   ဘရာဇီးနိုင်ငံ ရီယို နီဂရို (Rio Negro) က ကျယ်ပြောတဲ့ မြစ်ရေပြင်ထဲမှာ ကျားသစ် တစ်ကောင်ဟာ အသက် လုပြီး ကူးခေတ်နေတာကို အမေဇုံ စစ်တပ်ရဲအရာရှိတွေက တွေ့ပြီး ကယ်ဆယ်ခဲ့ကြပါတယ်။   ဒီကယ်တင်တဲ့ အဖြစ်အပျက်ကိုတော့ Netflare (နက်ဖလဲ) က ဗီဒီယို မှတ်တမ်း တင်ထားခဲ့ပါတယ်။ ကျားသစ်ဟာ စစ်ရဲတွေရဲ့ မော်တော်ဘုတ် ရောက်လာတဲ့အခါ လှေဆီကို သတိကြီးကြီးနဲ့ ကူးခတ်လာခဲ့ပါတယ်။ လှေပေါ်မှာ ရှိတဲ့ ရဲတွေက အရေးပေါ်လုပ်ထားတဲ့ ရေပေါ်ပေါ်တဲ့ ချပ်ပြားတစ်ခုကို ရေထဲကို ချထားပေးပါတယ်။   ကျားသစ်ဟာ တောရိုင်းတိရစ္ဆာန်ဖြစ်ပေမယ့် လှေနားကို ကပ်လာပြီး ချပေးထားတဲ့ ချပ်ပြားလေးကို တွယ်ပြီး လိုက်လာခဲ့ပါတယ်။   ကျားသစ် က ရေပေါ်ချပ်ပြားပေါ်မှာ တည်တည်ငြိမ်ငြိမ်ရှိလာတဲ့ အခါ ခြေကုန်လက်ပန်းကျနေတဲ့ ကျားသစ်ကို ကမ်းရှိရာကို အသာအယာ ဆွဲခေါ်လာခဲ့ကြရပါတယ်။   ကမ်းပေါ်မှာတော့ တိရစ္ဆာန် ကယ်ဆယ်ရေးအဖွဲ့တွေက အသင့်စောင့်နေကြပြီး ကျားသစ်လေးကို ကယ်တင်ခဲ့ပါတယ်။   တိရစ္ဆာန် ဆရာဝန်တွေရဲ့ အဆိုအရ ကျားသစ်မှာ သေနတ်ဒဏ်ရာတွေ အများအပြား ရှိနေပြီး ကျည်စ အများအပြားလည်း အရေပြားအောက်မှာ ရှိနေပါတယ်။   ကမ်းပေါ်မှာတော့ သူ့ကို အထူးကြပ်မတ်ကုသမှု လုပ်ထားပြီး ဆရာဝန်တွေက စောင့်ကြည့် ပေးထားပါတယ်။   အခြေအနေတည်ငြိမ်လာနေပြီး ကျားသစ်လေး ရဲ့ ကျန်းမာရေး စိတ်ချရတဲ့ အခါ တောရိုင်းထဲကို ပြန်လွှတ်ပေးမယ်လို့ ဆိုပါတယ်။   သေနတ်ဒဏ်ရာ တွေဟာ ဘယ်သူ့ လက်ချက် ဖြစ်တယ်ဆိုတာကိုတော့ အရာရှိတွေက ထုတ်ပြောတာ မရှိပါဘူး။ 

ဒဏ်ရာရ ကျားသစ်ကို မြစ်ရေထဲမှာ ကယ်ဆယ်

ဒဏ်ရာရ ကျားသစ်ကို မြစ်ရေထဲမှာ ကယ်ဆယ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၉ ရက်။  ဘရာဇီးနိုင်ငံ ရီယို နီဂရို (Rio Negro) က ကျယ်ပြေ…

  • October 9, 2025
ဘုံဘေမြို့ ဒုတိယလေဆိပ်သစ် ဖွင့်လှစ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။   တောင်များကိုဖြို မြစ်များကို လမ်းကြောင်း ပြောင်းပြီး ဆယ်စုနှစ်နှင့် ချီ၍ တည်ဆောက်နေခဲ့သည့် အိန္ဒိယ နိုင်ငံ ဘုံဘေမြို့က Navi Mumbai (NMI) နိုင်ငံတကာ လေဆိပ်သစ် ဖွင့်ပွဲကို အောက်တိုဘာ ၈ ရက်က ကျင်းပခဲ့သည်။   ဘုံဘေ ခေါ် Mumbai မြို့ လေဆိပ်သည် အရှေ့တောင်အာရှနဲ့ ဥရောပ ခရီးစဉ်တွေ အကြား ခရီးတထောက်နားရာ လေဆိပ်များထဲမှ တစ်ခု ဖြစ်သည်။   လေဆိပ်ဆောက်လုပ်ရေးသည် နှစ်ပေါင်း ၂၀ ခန့်ကြာမြင့်ခဲ့သည်။   ဆောက်လုပ်ရေး လုပ်ငန်းစဉ်များထဲတွင် တောင်များကို ပြားပြားဝပ်သွားအောင် ဖြိုရသည်၊ မြစ်များကို လမ်းကြောင်း ပြောင်းပေးရသည်၊ ချောက်ကြီးများကို တံတားတွေ ထိုးခဲ့ရသည်ဟု CNN သတင်းဌာနက ဖော်ပြသည်။   ကမ္ဘာ့ လူဦးရေ အထူထပ်ဆုံးမြို့များတွင် ပါဝင်သော ဘုံဘေမြို့သည် ဒုတိယမြောက် နိုင်ငံတကာ လေဆိပ်ကို ဖွင့်လှစ်နိုင်ခဲ့ခြင်း ဖြစ်သည်။   ပထမလေဆိပ်ဖြစ်သည့်  BOM လေဆိပ်သည် တစ်နှစ်ကို ခရီးသည် ၅၄ သန်းကို ဝန်ဆောင်မှု ပေးနေရပြီး ခရီးသည်များ များလွန်း၍ လူတန်းရှည်များဖြင့် စောင့်ဆိုင်းရသော လေဆိပ်ဖြစ်သည်။   ယခုလေဆိပ်သစ်တွင် ဆိပ်ခံတာမီနယ် ၄ ခု အထိ ဆောက်လုပ်သွားမည် ဖြစ်ပြီး လက်ရှိ ပြီးစီးထားသည့် တာမီနယ် တစ်ခုထဲပင်လျှင် တစ်နှစ်လျှင် ခရီးသည် သန်း ၂၀ ကို ဝန်ဆောင်မှု ပေးသွားမည်ဟု ဆိုသည်။   လေဆိပ်ဆောက်လုပ်မှု အပြည့်အဝ ပြီးစီးသွားပါက တစ်နှစ်လျှင် ခရီးသည် သန်း ၉၀ ကို ဝန်ဆောင်မှု ပေးနိုင်မည်ဟု ဆိုသည်။   လေဆိပ်အသစ်ကြောင့် ဘုံဘေမြို့တည်ရှိရာ မဟာရပ်ရှ်ထရာ (Maharashtra)  ပြည်နယ်မှ လယ်ယာထွက်ကုန်များနှင့် ရေလုပ်ငန်းထွက်ကုန်များကို ဥရောပ၊ အရှေ့အလယ်ပိုင်းဒေသ နိုင်ငံများနှင့် အခြား ကမ္ဘာ့ဈေးကွက်များကို လွယ်လွယ်ကူကူ မြန်မြန်ဆန်ဆန် တင်ပို့နိုင်တော့မည်ဟု အာဏာပိုင်များက ပြောသည်။

ဘုံဘေမြို့ ဒုတိယလေဆိပ်သစ် ဖွင့်လှစ်

ဘုံဘေမြို့ ဒုတိယလေဆိပ်သစ် ဖွင့်လှစ်  သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၉ ရက်။  တောင်များကိုဖြို မြစ်များကို လမ်းကြောင်း ပြောင်း…

  • October 9, 2025
×Close