သတင်း

ပဲခူးတိုင်း အတွင်း ကပစ ၁၆ အနီးရှိ ၆၆၆ ပွိုင့် စခန်းကုန်းကို AA သိမ်းပိုက်

ပဲခူးတိုင်း အတွင်း ကပစ ၁၆ အနီးရှိ ၆၆၆ ပွိုင့် စခန်းကုန်းကို AA သိမ်းပိုက်

ပဲခူးတိုင်း အတွင်း ကပစ ၁၆ အနီးရှိ ၆၆၆ ပွိုင့် စခန်းကုန်းကို AA သိမ်းပိုက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။  အာရက္ခတပ်တ…

  • October 16, 2025
မြန်မာနိုင်ငံ အခြေအနေကို ICC. သို့လွှဲရန်၊ လေယာဉ်ဆီ ပိတ်ဆို့ရန် CHRO တောင်းဆို သတင်းနှင့် မီဒီယာ ကွန်ရက်။
၂၀၂၅ ခုနှစ် အောက်တိုဘာလ ၁၆ ရက်။ ချင်းပြည်တွင် စစ်ကော်မရှင်တပ်၏ လေကြောင်းအကြမ်းဖက်မှု မြင့်တက်လာမှုအပေါ် CHRO မှ မြန်မာ့ အခြေအနေအား ICC သို့ လွှဲပြောင်းရန်နှင့် လေယာဉ်ဆီ ပိတ်ဆို့ရန် တောင်းဆိုလိုက်သည်။ စစ်ကော်မရှင်တပ်ဖွဲ့သည် ချင်းပြည်ရှိ စာသင်ကျောင်း၊ ဆေးရုံနှင့် နေအိမ်များကဲ့သို့သော အရပ်ဘက် ပစ်မှတ်များကို လေကြောင်းမှ တိုက်ခိုက်မှုများ ပိုမိုတိုးမြှင့် လုပ်ဆောင်နေသည့် အတွက်၊ ချင်းလူ့အခွင့်အရေး အဖွဲ့ (CHRO) က အောက်တိုဘာလ ၁၅ ရက်နေ့တွင် အရေးပေါ် တောင်းဆိုချက်များ ထပ်မံထုတ်ပြန်ခဲ့သည်။ CHRO ၏ တောင်းဆိုချက်များမှာ မြန်မာ့အခြေအနေကို အပြည်ပြည်ဆိုင်ရာ ရာဇဝတ်တရားရုံး (ICC) သို့ လွှဲပြောင်းပေးရန်၊ ကမ္ဘာလုံးဆိုင်ရာ လက်နက်ပိတ်ဆို့ရေးနှင့် လေယာဉ်ဆီ ချက်ချင်းပိတ်ပင်ရေးတို့ ပါဝင်သည်။ CHRO အမှုဆောင်ဒါရိုက်တာ ဆလိုင်းဇအုပ်လိန်းက “ဒီနောက်ဆုံး ရက်စက်ကြမ်းကြုတ်မှုဟာ စစ်ကောင်စီရဲ့ လူ့အသက်ကို နယ်ပယ်မဲ့ လျစ်လျူရှုမှုကို နောက်ထပ် သက်သေပြနေတာပဲ။ နိုင်ငံတကာ အသိုက်အဝန်းဟာ ပိုပြီး ဆောင်ရွက်ရပါမယ်” ဟု ပြောသည်။   ၎င်းက တရားမျှတမှုနှင့် တာဝန်ခံမှုကို အရေးတကြီး အကောင်အထည်ဖော်ရန် တောင်းဆိုခဲ့ပြီး၊ အာဆီယံ အဖွဲ့ဝင် နိုင်ငံများ အနေဖြင့်လည်း ဤရက်စက်သော ရာဇဝတ်မှုများကို ပြတ်ပြတ်သားသား ရှုတ်ချရန်နှင့် ဒေသတွင်း၌ အပြစ်ပေးခံရခြင်းမှ ကင်းလွတ်ခွင့်ကို လက်ခံမည်မဟုတ်ကြောင်း ပြသရန် တိုက်တွန်းခဲ့သည်။   CHRO ၏ ထုတ်ပြန်ချက်အရ အောက်တိုဘာလ ၁၃ ရက်နေ့၊ နံနက် ၁၀ နာရီခွဲတွင် ဟားခါးမြို့နယ်၊ ဗန်ဟား ကျေးရွာရှိ စာသင်ကျောင်းကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ စာသင်နေစဉ်အတွင်း ကျောင်းအဆောက်အအုံအား တိုက်ရိုက်ထိမှန်ခဲ့သည်။   ယင်းတိုက်ခိုက်မှုကြောင့် ကျောင်းသားနှစ်ဦး သေဆုံးခဲ့ရပြီး၊ ကျောင်းအုပ်ဆရာမကြီးနှင့် အခြားကလေးတစ်ဦး တို့ အပါအဝင် ဒဏ်ရာရရှိသူ အများအပြားရှိခဲ့ကာ၊ အချို့ကို သတိမေ့မြောနေသည့် အခြေအနေဖြင့် တွေ့ရှိခဲ့ရသည်ဟု ဆိုသည်။   စစ်ကော်မရှင်တပ်က စက်တင်ဘာလ ၁၄ ရက်နေ့တွင် ရွေးကောက်ပွဲကျင်းပမည့် အစီအစဉ်ကို ကြေညာခဲ့ပြီး နောက် ချင်းပြည်အတွင်း အရပ်ဘက် အဆောက်အအုံများအား ပစ်မှတ်ထားသည့် လေကြောင်း တိုက်ခိုက်မှု များကို ပိုတိုးလုပ်လာသည်ဟု ဆိုသည်။   စက်တင်ဘာလ ၂၁ ရက်နေ့မှ အောက်တိုဘာလ ၁၃ ရက်နေ့အကြား စစ်ကော်မရှင်တပ်၏ လေကြောင်း တိုက်ခိုက်မှု ခြောက်ကြိမ်တွင် မတူပီ၊ မင်းတပ်၊ ပလက်ဝနှင့် ဟားခါးမြို့နယ်များရှိ စာသင်ကျောင်းများ၊ ဆေးရုံ များ၊ ဘုရားကျောင်းများနှင့် နေအိမ်များကို ပစ်မှတ်ထားတိုက်ခိုက်ခဲ့သည်။   ယင်းတိုက်ခိုက်မှုများကြောင့် ကလေးခြောက်ဦး အပါအဝင် စုစုပေါင်း ကိုးဦး သေဆုံး ခဲ့ပြီး ၃၃ ဦး ထက်မနည်း ဒဏ်ရာရရှိခဲ့ကြောင်း မှတ်တမ်းများတွင် ဖော်ပြထားသည်။   အဆိုပါ တိုက်ခိုက်မှုများထဲ စက်တင်ဘာ ၂၁ ရက်နေ့ မင်းတပ်မြို့၌ နေအိမ် ခုနစ်လုံး ပျက်စီးခဲ့ရသည်။   စက်တင်ဘာ ၂၉ ရက်နေ့တွင် ပလက်ဝမြို့ရှိ ဆေးရုံကို လေကြောင်းမှ တိုက်ခိုက်ခဲ့ရာ လူနှစ်ဦးသေဆုံးပြီး ၁၆ ဦး ဒဏ်ရာရရှိခဲ့သည်။   အောက်တိုဘာ ၄ ရက်နေ့ကလည်း မင်းတပ်မြို့၌ နေအိမ် ၁၀ လုံး ထပ်မံပျက်စီးခဲ့ပြီး လူသုံးဦး ဒဏ်ရာရရှိခဲ့ သည်။   ထို့အပြင် အောက်တိုဘာ ၈ ရက်နေ့တွင် မင်းတပ်မြို့နယ်၊ ထိန်ချောင်းကျေးရွာရှိ စာသင်ကျောင်းကို ဗုံးကြဲခဲ့၍ ပြည်သူ လေးဦး သေဆုံးပြီး ၂၀ ကျော် ဒဏ်ရာရရှိခဲ့သည်။   အောက်တိုဘာ ၁၃ ရက်နေ့တွင်မူ ဟားခါးမြို့နယ်၊ ဗန်ဟားကျေးရွာရှိ စာသင်ကျောင်း ဗုံးကြဲခံရမှုကြောင့် ကျောင်းသားနှစ်ဦး သေဆုံးခဲ့သည်။   ချင်းလူ့အခွင့်အရေးအဖွဲ့ (CHRO) က မြန်မာ့အခြေအနေကို အပြည်ပြည်ဆိုင်ရာ ရာဇဝတ်တရားရုံး (ICC) သို့ လွှဲပြောင်းပေးရန်၊ စစ်တပ်၏ လေကြောင်းစစ်ဆင်ရေးကို ရပ်တန့်နိုင်ရန်အတွက် ကမ္ဘာလုံးဆိုင်ရာ လက်နက်ပိတ်ဆို့ရေးနှင့် လေယာဉ်ဆီ ချက်ချင်းပိတ်ပင်ရန် တောင်းဆိုထားသည်။   ထို့အပြင် စစ်တပ်၏ အာဏာရင်းမြစ်များကို ပစ်မှတ်ထား သည့် ပိုမိုအားကောင်းပြီး ညှိနှိုင်းဆောင်ရွက်သော ပိတ်ဆို့အရေးယူမှုများ ချမှတ်ရန် အထူးအလေးထား တိုက်တွန်းထားသည်။    

မြန်မာနိုင်ငံ အခြေအနေကို ICC သို့လွှဲရန်၊ လေယာဉ်ဆီ ပိတ်ဆို့ရန် CHRO တောင်းဆို

မြန်မာနိုင်ငံ အခြေအနေကို ICC သို့လွှဲရန်၊ လေယာဉ်ဆီ ပိတ်ဆို့ရန် CHRO တောင်းဆို သတင်းနှင့် မီဒီယာ ကွန်ရက်။၂၀၂၅ ခုနှစ် အောက်တိုဘာလ ၁၆ ရက်။  ချ…

  • October 16, 2025
မြန်မာစစ်တပ်အပေါ် ပိတ်ဆို့မှုများ ပြန်လည်စတင်ရန် ဗြိတိန်ကို တိုက်တွန်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၆ ရက်။   ဗြိတိန်အစိုးရအား မြန်မာစစ်တပ်အပေါ် ပိတ်ဆို့အရေးယူမှုများ ပြန်လည်စတင်ရန် Burma Campaign UK ထုတ်ပြန် တောင်းဆိုလိုက်သည်။   ဗြိတိန်အစိုးရသည် မြန်မာစစ်တပ်ထံ စီးဝင်နေသော ဝင်ငွေ၊ လက်နက်နှင့် စစ်ပစ္စည်းများကို ဖြတ်တောက်ရန် ပုံမှန်အရေးယူမှုများ ပြန်လည်ချမှတ်ရန် Burma Campaign UK က အောက်တိုဘာလ ၁၅ ရက်နေ့တွင် တောင်းဆိုလိုက်ခြင်း ဖြစ်သည်။   ဗြိတိန်အစိုးရက မြန်မာစစ်တပ်အပေါ် နောက်ဆုံးအကြိမ် ပစ်မှတ်ထားအရေးယူမှု ပြုလုပ်ခဲ့သည်မှာ ၂၀၂၄ ခုနှစ်၊ အောက်တိုဘာလ ၂၉ ရက်နေ့ နောက်ပိုင်းဖြစ်သဖြင့် တစ်နှစ်နီးပါး ကြာမြင့်ခဲ့ပြီ ဖြစ်ကြောင်း Burma Campaign UK က ထောက်ပြသည်။   ၂၀၂၁ ခုနှစ်တွင် မြန်မာနိုင်ငံ၌ စစ်အာဏာသိမ်းပြီးနောက်ပိုင်း ဗြိတိန်အစိုးရနှင့် မဟာမိတ်များသည် စစ်တပ်၏ လူ့အခွင့်အရေး ချိုးဖောက်မှုများနှင့် နိုင်ငံတကာ ဥပဒေ ချိုးဖောက်မှုများကို လျှော့ချနိုင်ရန်အတွက် ဝင်ငွေ၊ လက်နက်နှင့် စစ်ပစ္စည်းရင်းမြစ်များကို စနစ်တကျ ပစ်မှတ်ထား၍ အရေးယူရန် မူဝါဒကို ချမှတ်ခဲ့ပြီး ကမ္ဘာကို ဦးဆောင်ခဲ့သည်။   သို့သော်လည်း လက်ရှိတွင် ဗြိတိန်၏ အရေးယူဆောင်ရွက်မှုနှုန်းသည် ရပ်တန့်လုနီးပါး ဖြစ်နေပြီး အမေရိကန် (USA)၊ ဥရောပသမဂ္ဂ (EU)၊ ကနေဒါနှင့် သြစတြေးလျတို့ ချမှတ်ထားသည့် အရေးယူမှုများအားလုံးကိုပင် လိုက်မီခြင်း မရှိတော့ကြောင်း Burma Campaign UK က ဝေဖန်ခဲ့သည်။   ဗြိတိန်အစိုးရသည် မြန်မာစစ်တပ်အပေါ် ငါးနှစ်နီးပါးအတွင်း အရေးယူခဲ့သည့် ပမာဏထက် ရုရှားအပေါ် တစ်ရက်တည်းတွင် ပိုမိုအရေးယူမှုများ ပြုလုပ်ခဲ့သည်ဟုလည်း ၎င်းတို့က ထောက်ပြသည်။   Burma Campaign UK ၏ ဒါရိုက်တာ မာ့ခ် ဖာမာနာ (Mark Farmaner) က “၂၀၂၁ အာဏာသိမ်းပြီးနောက် ဗြိတိန်အစိုးရဟာ မြန်မာစစ်တပ်ကို ပစ်မှတ်ထား အရေးယူရာမှာ ကမ္ဘာကို ဦးဆောင်ခဲ့တယ်။ အခုတော့ သူတို့ကိုယ်တိုင်တောင် နောက်ကနေ လိုက်မလုပ်နိုင်တော့ဘူး” ဟု ပြောကြားသည်။   “မြန်မာပြည်သူတွေဟာ စစ်အုပ်ချုပ်ရေးကို ခုခံဖို့ သူတို့တတ်နိုင်သမျှ အရာအားလုံး လုပ်ဆောင်နေချိန်မှာ၊ ကျွန်တော်တို့ အနည်းဆုံးလုပ်နိုင်တာက စစ်တပ်ဆီကို ရောက်နေတဲ့ ငွေကြေးနဲ့ လက်နက်တွေကို လျှော့ချဖို့ပါ ပဲ” ဟု ၎င်းက ဆက်ပြောသည်။   ဗြိတိန်အစိုးရ၏ အရေးယူမှုများ ဆက်လက်မချမှတ်ခြင်းသည် လာမည့် ဒီဇင်ဘာလတွင် ပြုလုပ်ရန် စီစဉ်ထား သည့် ရွေးကောက်ပွဲ ဟန်ဆောင်ပွဲ (sham elections) မတိုင်မီ တိုက်ခိုက်မှုများကို တိုးမြှင့်နေသော မြန်မာစစ်တပ်အား အားပေးရာရောက်ပြီး စစ်တပ်၏ အားတက်စရာ ဖြစ်စေခဲ့ကြောင်း Burma Campaign UK က သုံးသပ်သည်။   ထိုရွေးကောက်ပွဲများသည် မြန်မာနိုင်ငံအပေါ် စစ်တပ်၏ ထိန်းချုပ်မှုကို အကန့်အသတ်မရှိ ဆက်လက် တည်မြဲ စေရန် ရည်ရွယ်သည်။   ထိရောက်မှုရှိစေရန်အတွက် အရေးယူမှုများကို ပစ်မှတ်အမျိုးမျိုး အပေါ် စုပေါင်းသက်ရောက်မှု ရှိစေရန်နှင့် စဉ်ဆက်မပြတ် ချမှတ်ရန် လိုအပ်ကြောင်း Burma Campaign UK က တိုက်တွန်းထားသည်။   Burma Campaign UK သည် ၎င်းတို့၏ ထောက်ခံသူများကို ဗြိတိန်နိုင်ငံခြားရေးဝန်ကြီး Yvette Cooper ထံသို့ စာရေးသား၍ မြန်မာစစ်တပ်အပေါ် အရေးယူမှုများ ပြန်လည်စတင်ရန် တောင်းဆိုစေရန်လည်း တိုက်တွန်းလျက် ရှိသည်။

မြန်မာစစ်တပ်အပေါ် ပိတ်ဆို့မှုများ ပြန်လည်စတင်ရန် ဗြိတိန်ကို တိုက်တွန်း

မြန်မာစစ်တပ်အပေါ် ပိတ်ဆို့မှုများ ပြန်လည်စတင်ရန် ဗြိတိန်ကို တိုက်တွန်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။  ဗြိတိန်အစိုးရ…

  • October 16, 2025
မုံရွာ-မန္တလေးလမ်း တွင် စစ်ကော်မရှင်တပ်မှ ရမ်းသန်း ပစ်ခတ်၊ ဆုတောင်းပြည့် ဘုရားပွဲအပြန် လူငယ် ၄၀ ခန့်အား ပေါ်တာဆွဲ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၆ ရက်။   မုံရွာ-မန္တလေးလမ်း စစ်ရေးတင်းမာမှုနှင့် မြို့ပေါ် ပွဲတော်အပြန် လူငယ် ၄၀ နီးပါး ပေါ်တာဆွဲ ဖမ်းဆီးခံရသည်ဟု ဒေသခံများက ပြောသည်။   စစ်ကိုင်းတိုင်း၊ မုံရွာမြို့အဝင်အထွက် ဖြစ်သော မုံရွာ-မန္တလေးလမ်းပိုင်းတွင် စစ်တပ်က ကင်းပုန်းများချကာ ရမ်းသန်းပစ်ခတ်မှုများ လုပ်နေသဖြင့် ခရီးသွားလာရေး အန္တရာယ်ရှိနေပြီး၊ တစ်ချိန်တည်းမှာပင် မြို့ပေါ်ရှိ ဘုရားပွဲတော်မှ အပြန် လူငယ်အယောက် ၄၀ နီးပါး ပေါ်တာဆွဲ ဖမ်းဆီးခံခဲ့ရကြောင်း ဒေသခံများက ပြောသည်။   အောက်တိုဘာလ ၁၀ ရက်နေ့မှ စတင်၍ အောက်တိုဘာလ ၁၅ ရက်နေ့အထိ မုံရွာ-မန္တလေး လမ်းမပေါ်၌ စစ်ကော်မရှင်တပ်က ကင်းပုန်းများ နေရာအနှံ့ချထားခြင်းနှင့်အတူ စစ်ရေးတင်းမာမှုများ ဖြစ်ပေါ်နေသည်။   ဒေသခံများ၏ ပြောကြားချက်အရ နတ်ရေကန်ကျေးရွာအနီးတွင် လမ်းပိတ်ဆို့ထားကာ၊ ရေပိုးစားကျေးရွာနား တွင် ရမ်းသန်းပစ်ခတ်မှုများ ပြုလုပ်နေခြင်းကြောင့် ခရီးသွားလာသူများ လမ်းကြောင်းကို ရှောင်တိမ်းနေကြရ သည်။   မုံရွာမြို့ထဲမှလည်း မိုင်းဖျက်ယာဉ် (ဂျန်မာကား) များ ထွက်ခွာလာသည်ဟု ဆိုသည်။   မုံရွာမြို့အနီး ဒေသခံတစ်ဦးက “မုံရွာ-မန္တလေးလမ်းကတော့ အခြေအနေမကောင်းဘူး။ လမ်းကြောင်းက နေ့တိုင်း ရှိပုံရတယ်။ မုံရွာ-မန္တလေး လမ်းမပေါ်မှာ ဒီကောင်တွေက ကင်းပုန်းတွေ နေရာအနှံ့ချထားတာဗျ။ နတ်ရေကန်ရွာနားမှာဆို လမ်းကို ပိတ်ထားတယ်လို့ ပြောတယ်။ ပြီးတော့ ရေပိုးစားရွာနားမှာဆိုလည်း ရမ်း သမ်း ပစ်ခတ်မှုတွေ ရှိနေတာကြောင့် ဒေသခံတွေကတော့ ဒီနေ့လမ်းကြောင်းကို ရှောင်ခိုင်းနေကြတာ” ဟု ပြောသည်။   စစ်ကော်မရှင်တပ်သည် မကြာခဏ တိုက်ခိုက်ခံနေရသောကြောင့် ခရီးသွားယာဉ်များကို ရှေ့မှ မောင်းခိုင်းခြင်း နှင့် မိုင်းရှင်းခိုင်းခြင်းများ ပြုလုပ်နေသည့်အတွက် တိုက်ပွဲမရှိသော်လည်း ခရီးစဉ်များ ကြန့်ကြာမှုများ ဖြစ်ပေါ်နေ ကြောင်း ခရီးသွားများက ဆိုသည်။   ဒေသခံများက ခရီးသွားပြည်သူများအနေဖြင့် လမ်းကြောင်းသတင်းကို နားစွင့်ပြီးမှသာ သွားလာကြရန် အကြံပြုထားသည်။   တစ်ပြိုင်နက်တည်းမှာပင် မုံရွာမြို့ပေါ်ရှိ ဆုတောင်းပြည့် ဘုရားကြီးပွဲတော်ကို လာရောက်လည်ပတ်သည့် လူငယ်များအား စစ်ကော်မရှင်တပ်က ပေါ်တာဆွဲ ဖမ်းဆီးငွေညှစ်မှုများ လုပ်ဆောင်နေသည်။ “တချို့က အခုထိ ဘာမှ အဆက်သွယ်မရဘူးလို့ ကြားတယ်။ မိသားစုဝင်တွေ မိဘတွေကတော့ စိတ်ပူနေကြ တာ ပေါ့ဗျာနော်။ ဖမ်းခံရတဲ့သူတွေထဲက တချို့ကတော့ ပြန်လွတ်တယ်လို့လည်း သိရတယ်” ဟု မြို့ခံတစ်ဦးက ပြောသည်။   အောက်တိုဘာလ ၁၃ ရက်နေ့ ညပိုင်းမှ စတင်၍ ၁၄ ရက်နေ့အထိ စတိတ်ရှိုးပွဲမှ အပြန်တွင် လူငယ် ၄၀ ထက် မနည်း ပေါ်တာဆွဲ ဖမ်းဆီးခံခဲ့ရကြောင်း မြို့ခံများက အတည်ပြုပြောသည်။ စစ်ကော်မရှင် တပ်ဖွဲ့ဝင်များက အိမ်စီးကားများဖြင့် လိုက်လံ ဖမ်းဆီးနေခြင်း ဖြစ်သည်ဟု ဒေသခံများက ပြောသည်။   ဖမ်းဆီးခံရသူများအနက် အချို့မှာ အဆက်အသွယ် ပြတ်တောက်နေဆဲဖြစ်သော်လည်း၊ အချို့မှာ ငွေပေးပြီး ပြန်လည်လွတ်မြောက်လာကြောင်း မြို့ခံများက ဆိုသည်။   စစ်ကော်မရှင်တပ်သည် လူငယ်အများစု အကြိုက် ပျော်ပွဲရွှင်ပွဲများ ကျင်းပပေးပြီး ပွဲမှအပြန် လူငယ်များကို ပေါ်တာဆွဲ ဖမ်းဆီးငွေညှစ်ခြင်းများ မကြာခဏ လုပ်ဆောင်နေသည်ဟု မြို့ခံများက ပြောသည်။   မြို့ပေါ်တွင် ပေါ်တာဆွဲ ဖမ်းဆီးမှုများ ပြုလုပ်နေသကဲ့သို့ တစ်ဖက်တွင်လည်း ကျေးရွာများကို စစ်ကြောင်းထိုး မီးရှို့ဗုံးကြဲ သတ်ဖြတ်ခြင်းများ ဆောင်ရွက်နေပြီး၊ အခြားတစ်ဖက်တွင်မူ လာမည့် ရွေးကောက်ပွဲအတွက် စည်းရုံးလှုံ့ဆော်မှုများပါ ပြုလုပ်နေကြောင်း ဒေသခံများက ပြောကြားခဲ့သည်။

မုံရွာ-မန္တလေးလမ်း တွင် စစ်ကော်မရှင်တပ်မှ ရမ်းသန်း ပစ်ခတ်၊ ဆုတောင်းပြည့် ဘုရားပွဲအပြန် လူငယ် ၄၀ ခန့်အား ပေါ်တာဆွဲ

မုံရွာ-မန္တလေးလမ်း တွင် စစ်ကော်မရှင်တပ်မှ ရမ်းသန်း ပစ်ခတ်၊ ဆုတောင်းပြည့် ဘုရားပွဲအပြန် လူငယ် ၄၀ ခန့်အား ပေါ်တာဆွဲ သတင်းနှင့် မီဒီယာ ကွန်ရက်။၂၀၂၅ ခု…

  • October 16, 2025
ဖရူဆိုအနောက်ဘက် ကရင်နီ စစ်ရှောင်များ အရေပြားရောဂါ တနှစ်ကြာအထိ မပျောက်ကင်းသေး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၆ ရက်။ ကရင်နီပြည်၊ ဖရူဆိုမြို့ အနောက်ဘက်ရှိ ဟူဘောမြို့နယ်ထဲက စစ်ဘေးရှောင်များတွင် အရေပြား ယားနာများ တစ်နှစ်ကြာ ဆိုးရွားစွာ ဖြစ်ပွားနေပြီး ဆေးဝါးနှင့် ကျန်းမာရေးစောင့်ရှောက်မှုများ လိုအပ်နေသည်။ ဟူဘောမြို့နယ် စစ်ဘေးရှောင်စခန်းများတွင် အရေပြားယားနာ ပြဿနာ တစ်နှစ်ကြာလာသည့်တိုင် မပျောက်ဘဲ ပိုမိုဆိုးရွားလာသည်ဟု ဆိုသည်။ ဟားမူစစ်ရှောင်စခန်းတွင် နေထိုင်သည့် အမျိုးသမီးတစ်ဦးက “ဆေးလိမ်းရရင်တော့ နည်းနည်းသက်သာတယ်။ ဆေးမလိမ်းရရင်တော့ တစ်ညလုံး ကုတ်ရတော့ အိပ်ရေးပျက်ရတယ်။ အခုဆို အမာရွတ်တွေ ထတဲ့ဟာလည်း ထ၊ အသစ်ဖြစ်တဲ့ဟာတွေလည်းဖြစ်နေတယ်။ မွေးကင်းစတွေဖြစ်တဲ့ဟာ တအားဆိုးတယ်။ ခြေဖဝါး လက် ဖဝါးကြား၊ လက်သည်းကြားမှာ ဖြစ်ပြီး လက်သည်းတွေ ကွာတဲ့အထိ ဖြစ်ကြတယ်” ဟု လက်ရှိ အခြေအနေ ကို ပြောပြသည်။ ဟူဘောမြို့နယ်ရှိ စစ်ဘေးရှောင်များနှင့် ဒေသခံပြည်သူများအကြား အရေပြားယားနာ ဖြစ်ပွားမှုသည် လွန်ခဲ့ သည့်နှစ် အောက်တိုဘာလ ကတည်းက စတင်ခဲ့ပြီး ယခုလက်ရှိအချိန်အထိ မပျောက်ကင်းဘဲ ပိုမိုဆိုးရွားစွာ ခံစားနေရကြောင်း စစ်ဘေးရှောင်များက ပြောသည်။ ၎င်းတို့သည် ဆေးဝါးနှင့် ကျန်းမာရေးစောင့်ရှောက်မှုများ အရေးတကြီး လိုအပ်နေသည်။ ဟူဘောမြို့နယ်၊ ကေကောအုပ်စုရှိ ဟားမူစစ်ရှောင်စခန်းတွင် နေထိုင်သူများ၏ ပြောပြချက်အရ အရေပြား ယားနာများသည် လူကြီး၊ လူငယ်နှင့် ကလေးအားလုံး၏ ခန္ဓာကိုယ်အနှံ့တွင် ဖြစ်ပွားနေပြီး အထူးသဖြင့် ၁၈ နှစ်အောက် ကလေးငယ်များမှာ ပိုမိုဆိုးရွားစွာ ခံစားရသည် ဟုဆိုသည်။ ဟားမူစစ်ရှောင်စခန်းတွင် အိမ်ထောင်စု ၂၅ စုခန့်ရှိပြီး ယားနာအတွက် SULOKORTAF (hydrocortisone acetate cream) တံဆိပ်ပါ လိမ်းဆေးကို လိမ်းပါက သက်သာလာသည်ဟု ဆိုသည်။ သို့သော် ထိုဒေသတွင် အဆိုပါလိမ်းဆေးကို ရရှိရန် ခက်ခဲနေသည်။ အရေပြားယားနာအတွက် လိမ်းဆေး (Skinner) တစ်ဗူးလျှင် ကျပ် ၁၀,၀၀၀ ခန့် ပေးရပြီး ယားနာက ခန္ဓာကိုယ် တစ်ခုလုံးတွင် ဖြစ်ပွားနေသည့်အတွက် ဆေးတစ်ဗူးမှာ လူတစ်ဦးအတွက် တစ်ကြိမ်စာ လိမ်းရန်သာ ရှိသည်။ ထို့ကြောင့် ဆေးဆက်တိုက် လိမ်းနိုင်ရန် ငွေကြေးမတတ်နိုင်သည့် ပြဿနာများနှင့် ရင်ဆိုင်နေရကြောင်း စစ်ရှောင်အမျိုးသမီး တစ်ဦးက ရှင်းပြသည်။ ယားနာသည် ကြာရှည်စွာ ဖြစ်ပွားပါက ကျောက်ကပ်ထိပါ ထိခိုက်နိုင်သည်ဟု ကျန်းမာရေးဆိုင်ရာ သတိပေး ချက်များတွင် ကြားသိရခြင်းကြောင့် စိုးရိမ်ပူပန်မှုများလည်း ရှိနေသည်။ “အရင်တလောကဆို ကလေးတွေ ယားနာဖြစ်၊ တစ်ကိုယ်လုံး ဖောရောင်ပြီးတော့မှ ဆီးသွားတဲ့အခါမှာ ဆီးတွေနီတဲ့အထိ ဖြစ်သွားလို့ ဆေးရုံပို့ရတယ်” ဟုလည်း စစ်ရှောင်အမျိုးသမီးက ပြောသည်။ ကေကောအုပ်စုထဲတွင် ကျန်းမာရေးဆေးပေးခန်း ရှိသော်လည်း ဆေးဝါးမစုံလင်ခြင်းနှင့် ကျန်းမာရေးဝန်ထမ်း ပုံမှန်မရှိခြင်းတို့ကြောင့် စစ်ရှောင်များမှာ လမ်းပန်းဆက်သွယ်ရေး ခက်ခဲသည့်ကြားမှ ဟိုယာမြို့နယ်ရှိ ဆေးရုံ အထိ သွားရောက်ပြသနေရသည်။ ဟားမူကျေးရွာရှိ စစ်ရှောင်နှင့် ဒေသခံများအပါအဝင် ကေကော၊ ဖားဝေနှင့် ချီဘာခေါကျေးရွာတို့တွင်လည်း ယားနာများ ဆိုးရွားစွာ ဆက်လက်ဖြစ်ပွားနေကြောင်း ကေကောအုပ်စုနှင့် ရော်ဒေါ်ခေါအုပ်စုရှိ စစ်ဘေးရှောင် များအား ကူညီပေးနေသည့် စေတနာ့ဝန်ထမ်းအမျိုးသမီးတစ်ဦးက အတည်ပြု ပြောသည်။ စစ်ရှောင်ကာလ ကြာလာသည်နှင့်အမျှ လမ်းပန်းဆက်သွယ်ရေး ခက်ခဲသည့် ဟားမူစစ်ဘေးရှောင်စခန်းတွင် အဖက်ဖက်မှ လိုအပ်ချက်များ ရှိနေပြီး လတ်တလောတွင် မိုးကာ၊ အရေးပေါ် ယားနာပျောက်ဆေး နှင့် အခြားသော ဆေးဝါးများပါ လိုအပ်နေကြောင်း စစ်ဘေးရှောင်များက အကူအညီများ တောင်းခံထားသည်။      

ဖရူဆိုအနောက်ဘက် ကရင်နီ စစ်ရှောင်များ အရေပြားရောဂါ တနှစ်ကြာအထိ မပျောက်ကင်းသေး

ဖရူဆိုအနောက်ဘက် ကရင်နီ စစ်ရှောင်များ အရေပြားရောဂါ တနှစ်ကြာအထိ မပျောက်ကင်းသေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။ ကရင်နီပြ…

  • October 16, 2025
ပဋိပက္ခဆက်နွယ် လိင်အကြမ်းဖက်မှု ပိုများလာ သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ အောက်တိုဘာလ ၁၆ ရက်။ မြန်မာနိုင်ငံတွင် ပဋိပက္ခနှင့်ဆက်နွယ်သော လိင်ပိုင်းဆိုင်ရာ အကြမ်းဖက်မှုများ ပိုများလာဟု အမျိုးသမီး အဖွဲ့အစည်းများ ထောက်ပြလိုက်သည်။ နိုင်ငံတစ်ဝန်း စစ်အာဏာသိမ်းပြီး နောက်ပိုင်းတွင် အမျိုးသမီးများသည် ဥပဒေ အကာအကွယ်မဲ့သည့် ပဋိပက္ခ နှင့် ဆက်နွယ်သော လိင်ပိုင်းဆိုင်ရာ အကြမ်းဖက်ခံရမှုများ ပိုမိုများပြားလာကြောင်း အမျိုးသမီးအဖွဲ့အစည်း များက ထုတ်ဖော်ပြောကြားသည်။ မြန်မာ့ အမျိုးသမီးသမဂ္ဂ (BWU) ၏ အောက်တိုဘာလ ၁၀ ရက်နေ့ ထုတ်ပြန်ချက်အရ ယခုနှစ် စက်တင်ဘာလ အတွင်း ပဋိပက္ခနှင့်ဆက်နွယ်သည့် လိင်ပိုင်းဆိုင်ရာ အကြမ်းဖက်မှုကြောင့် အမျိုးသမီး ၁ ဦး သေဆုံးခဲ့ပြီး ၁၅ ဦး ထိခိုက်ဒဏ်ရာရရှိခဲ့သည်။ အုပ်ချုပ်ရေးယန္တရား မလည်ပတ်နိုင်သည့် ဒေသများနှင့် စစ်ကော်မရှင်၏ ထိန်းချုပ်မှု အားနည်းသည့် ဧရိယာ များတွင် လိင်ပိုင်းဆိုင်ရာ အကြမ်းဖက်မှု ကြောင့် သေဆုံးမှုအထိ ဖြစ်ပွားလေ့ရှိကြောင်း ကရင်နီ အမျိုးသမီး အစည်းအရုံး (KNOW) မှ မော်ဖရေးမြာက ပြောသည်။ ၎င်းက “ဒီပဋိပက္ခကာလအတွင်းမှာ စစ်တပ်ကနေ မဟုတ်လို့ရှိရင်လည်း စစ်ကောင်စီနဲ့ ဆက်နွယ်ပြီးတော့ အရပ်ဝတ်ပုံစံမျိုးတွေနဲ့ အမျိုးသမီးကို လိင်ပိုင်းဆိုင်ရာ စော်ကားတာ၊ အကြမ်းဖက်တာ၊ အုပ်စုလိုက် မုဒိမ်း ကျင့်တာ အဲ့လိုမျိုးတွေလည်း လွယ်လင့်တကူ ပိုဖြစ်လာတယ်” ဟု ပြောသည်။ လက်နက်အားကိုးခြင်း၊ အင်အားကြီးသူက အားနွဲ့သူအပေါ် အာဏာပါဝါပြပြီး လိင်ပိုင်းဆိုင်ရာ အမြတ်ထုတ် အကြမ်းဖက်ခြင်းများ ပိုမိုဖြစ်ပွားနေသည်ဟုလည်း ၎င်းက ထောက်ပြသည်။ စစ်ပဋိပက္ခကာလအတွင်း လူ့အခွင့်အရေး ချိုးဖောက်မှုများ နည်းအမျိုးမျိုးဖြင့် ပိုမိုများပြားလာရာ အထူးသဖြင့် အမျိုးသမီးငယ်များနှင့် အမျိုးသမီးများအတွက် စိတ်ပိုင်းဆိုင်ရာ၊ ရုပ်ပိုင်းဆိုင်ရာ လုံခြုံမှု သိသိသာသာ ကင်းမဲ့လာရကြောင်း အမျိုးသမီးအဖွဲ့အစည်းများက ပြောသည်။ ကျူးလွန်ခံရသည့် အမျိုးသမီးများအနေဖြင့် တိုင်ကြားရမည့်နေရာများအား သိရှိသော်လည်း လက်ရှိတွင် ရဲ အပါအဝင် ဥပဒေထိန်းသိမ်းရေး အဖွဲ့အစည်းများသည် စစ်ကော်မရှင် အောက်တွင် ရှိနေခြင်းကြောင့် တိုင်ကြားမှု ပြုလုပ်ပါက မိသားစုနှင့် ပတ်ဝန်းကျင်ကိုပါ ခြိမ်းခြောက်ခံရမည့် အန္တရာယ်များ ပိုမိုများပြားလာသည်ဟု မော်ဖရေးမြာက ပြောသည်။ “အခု ကာလ အနေအထားနဲ့က ၁၀၀ ရာခိုင်နှုန်း အကာအကွယ် ပုံစံမျိုးကတော့ သိပ့်မရှိတဲ့အနေအထားမှာ တိုင်ကြားမှုတွေက သိပ့်မရဲကြတဲ့ အနေအထားမျိုး” ဖြစ်နေကြောင်း ထောက်ပြသည်။ ကျူးလွန်သူ၏ အာဏာပါဝါနှင့် ရာထူးအရ တိုင်ကြားလိုက်၍ လူသိများလာပါက ဂုဏ်သိက္ခာ ထိခိုက်စေသည်ဟု ခြိမ်းခြောက်ခံရခြင်းများကြောင့်ပင် တိုင်ကြားလိုစိတ် ပျောက်ဆုံးသွားရသည်များ ရှိကြောင်း ၎င်းက ဖြည့်စွက် ပြောဆိုသည်။ ထို့ကြောင့် မည်သည့်အဖွဲ့အစည်း၊ တပ်ရင်းတပ်ဖွဲ့နှင့် မည်သူမဆို ပဋိပက္ခနှင့်ဆက်နွယ်သည့် လိင်ပိုင်းဆိုင်ရာ အကြမ်းဖက်မှု၊ အမြတ်ထုတ် စော်ကားမှုနှင့် တာဝန်ယူမှု၊ တာဝန်ခံမှု မရှိခြင်းတို့ကို ကျူးလွန်ပါက တရားမျှတမှု အတွက် အရေးယူနိုင်ရန် ပူးပေါင်းပါဝင်ကြဖို့ ၎င်းက တိုက်တွန်းထားသည်။ တော်လှန်ရေး တပ်ရင်းတပ်ဖွဲ့များ အတွင်း စစ်ပဋိပက္ခနှင့် ဆက်နွယ်သည့် လိင်ပိုင်းဆိုင်ရာ အကြမ်းဖက်မှုများ မရှိစေရေးအတွက် အမျိုးသမီး အဖွဲ့အစည်းများက အစဉ်အမြဲ တွေ့ဆုံအကြံပြု တိုက်တွန်းနေရသည်ဟု ဆိုသည်။ ၎င်းတို့၏ တောင်းဆိုချက်မှာ စစ်ဘက်ဆိုင်ရာ ကျင့်ဝတ်စည်းမျဉ်းမူဝါဒများ ရေးဆွဲရာတွင် အမျိုးသမီးများအား အကာအကွယ်ပေးမည့် မူဝါဒ၊ ဥပဒေပြဋ္ဌာန်းချက်နှင့် စည်းကမ်းချက်များကို မဖြစ်မနေ ထည့်သွင်း အကျုံးဝင်စေ ရန် ဖြစ်ကြောင်း မော်ဖရေးမြာက ပြောသည်။ “ပဋိပက္ခနဲ့ ဆက်နွယ်နေတဲ့ အကြမ်းဖက်မှုတွေကို ပပျောက်ဖို့အတွက် အကာအကွယ်ပေးဖို့အတွက် ဆိုတာက လည်း ပဋိပက္ခနဲ့ဆက်နွယ်နေတဲ့ အခြေခံ သဘောတရားနားလည်မှ ဘယ်လိုဟာမျိုးကိုတော့ စစ်ပဋိပက္ခနဲ့ ဆက် နွယ်နေတဲ့ အကြမ်းဖက်မှု မြောက်ပါတယ်ဆိုတဲ့ဟာ တွေ့ဆုံပြီး လုပ်ရတဲ့အနေအထားမျိုးလည်း သွားရတယ်။” စစ်အာဏာသိမ်းပြီး နောက်ပိုင်းတွင် အမျိုးသမီးများသည် လိင်ပိုင်းဆိုင်ရာ အကြမ်းဖက်ခံရမှု အပြင် စစ်တပ်၏ နည်းမျိုးစုံဖြင့် လူ့အခွင့်အရေး ချိုးဖောက်မှုများကြောင့် နေ့စဉ်နှင့်အမျှ အသက်ဆုံးရှုံးနေရသည်။ BWU ၏ မှတ်တမ်းများအရ စက်တင်ဘာလအတွင်း စစ်ကော်မရှင်၏ လူ့အခွင့်အရေး ချိုးဖောက်မှုများကြောင့် ကိုယ်ဝန်ဆောင်နှင့် မိန်းကလေးငယ်များ အပါအဝင် အမျိုးသမီး ၄၇ ဦး သေဆုံးခဲ့ပြီး ဒဏ်ရာရရှိသူ ၅၇ ဦး ရှိခဲ့သည်။

ဓာတ်ပုံ - Women Alliance Burma - အမျိုးသမီးမဟာမိတ်အင်အားစု (ပုံဟောင်း)    

ပဋိပက္ခဆက်နွယ် လိင်အကြမ်းဖက်မှု ပိုများလာ

ပဋိပက္ခဆက်နွယ် လိင်အကြမ်းဖက်မှု ပိုများလာ သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။ မြန်မာနိုင်ငံတွင် ပဋိပက္ခနှင့်ဆက်နွယ်သော လိ…

  • October 16, 2025
ပြည်သူ့စစ်မှုထမ်းတပ်သားသစ်များ တပ်တွင်း ဖိနှိပ်မှု ခံနေရဟု ထွက်ပြေးလာသူများက ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၆ ရက်။ စစ်ကော်မရှင်တပ်ထဲတွင် ပြည်သူ့စစ်မှုထမ်း တပ်သားသစ်များ ဖိနှိပ်ခံရဟု ကရင်နီ အမျိုးသားများ ကာကွယ် ရေးတပ် (KNDF) ထံ ခိုလှုံလာသူက ပြောသည်။ စစ်ကော်မရှင် တပ်ဖွဲ့ဝင်များထဲတွင် ပြည်သူ့စစ်မှုထမ်း တပ်သားသစ်များမှာ အရာရှိများနှင့် စစ်သည်အချင်းချင်း ခွဲခြားဆက်ဆံခြင်း၊ ဖိနှိပ်အနိုင်ကျင့်ခံရခြင်းများနှင့် စစ်သည်တစ်ဦး၏ အခွင့်အရေးကိုပါ ချိုးဖောက်ခံနေရ ကြောင်း တော်လှန်ရေးတပ်ဖွဲ့များထံ ထွက်ပြေးခိုလှုံလာသူများက ဖွင့်ဟပြောဆိုသည်။ ကရင်နီပြည်၊ ဒီးမော့ဆိုမြို့ တိုက်ပွဲ စစ်မြေပြင်မှ (KNDF) ထံသို့ ထွက်ပြေးခိုလှုံလာသည့် စစ်ကော်မရှင်တပ်၏ ပြည်သူ့စစ်မှုထမ်း အပတ်စဉ် ၅ မှ တပ်သား အောင်ကိုကိုဟိန်းက ၎င်းတို့ ခံစားရသည့် ဖိနှိပ်မှုများကို ပြောပြခဲ့ သည်။ တပ်သား အောင်ကိုကိုဟိန်းက “တပ်ကြပ်ကြီးတွေက အောက်က ပြည်သူ့စစ်မှုထမ်းကို အနိုင်ကျင့်တယ်။ တပ်ကြပ်ကြီးကလည်း သူ့အထက်က စည်သူဆိုတဲ့သူဆိုတာ ရှိတယ်။ အဲ့ဒီ စည်သူကလည်း တပ်ကြပ်ကြီးကို အနိုင်ကျင့်တယ်။ ကိုယ့်အဖေအရွယ်လောက် ရှိတဲ့သူကို သားအရွယ်လောက်တွေက အနိုင်ကျင့်နေတာ။ ခေါင်းဖြူကြီးတွေကို သားအရွယ်လောက်တွေက အနိုင်ကျင့်ရင်လည်း ခံရတယ်။ ကျနော်တို့ ဆိုတာ ဝေလာ ဝေးပေါ့ဗျာ။ ကျနော်တို့ ပြည်သူ့စစ်မှုထမ်းတွေ သူတို့အချင်းချင်းတောင် အနိုင်အရမ်းကျင့်တာ” ဟု ပြောသည်။ ထို့အပြင် စစ်ကော်မရှင်တပ်သည် ရှေ့တန်းစစ်မြေပြင်တွင် ဒဏ်ရာရရှိသည့် တပ်သားသစ်များကို အချိန်မီ ဆေးကုသခွင့်မပေးဘဲ အနာမကျက်သေးမီ စစ်မြေပြင်သို့ ပြန်ပို့ခြင်းများ ပြုလုပ်သည်ဟု ၎င်းက ဆက်ပြောသည်။ ကျဆုံးသွားသည့် ရဲဘော်များကိုလည်း ၎င်းတို့၏ စစ်မှုထမ်းအဖွဲ့အစည်းအလိုက် ဖြစ်သလို မြေမြုပ်ခြင်း၊ မိသားစုကို အချိန်မီ အသိမပေးဘဲ ဆက်သွယ်မှု ပိတ်ပင်ထားခြင်းများ ပြုလုပ်ကြောင်း တပ်သား အောင်ကိုကိုဟိန်းက ဖွင့်ဟခဲ့သည်။ ပြည်သူ့ပန်းတိုင် ဦးဆောင်ကော်မတီဝင် ကိုနောင်ရိုးက စစ်ကောင်စီ အရာရှိများ၏ ဤသို့သော လုပ်ဆောင်မှုများ သည် စစ်သားတစ်ယောက် ရသင့်ရထိုက်သည့် အခွင့်အရေးများကို လျစ်လျူရှု ချိုးဖောက်ခြင်းနှင့် လုပ်ပိုင်ခွင့် အလွဲသုံးစားပြုခြင်း ဖြစ်သည်ဟု မှတ်ချက်ပြုသည်။ စစ်သားတစ်ဦး စစ်မြေပြင်တွင် ကျဆုံးပါက မိသားစုကို ဆက်သွယ် အကြောင်းကြားခြင်း၊ ပင်စင်လစာ ခံစားခွင့် ကိစ္စများ ဆောင်ရွက်ပေးရခြင်းတို့မှာ တပ်မတော်၏ လုပ်ထုံးလုပ်နည်းနှင့် သတ်မှတ်အခွင့်အရေးများ ဖြစ်ကြောင်း ကိုနောင်ရိုးက ရှင်းပြသည်။ ဒဏ်ရာရရှိသည့် စစ်သားများကိုလည်း လိုအပ်သော ဆေးကုသမှုပေးရန်နှင့် ပြန်လည်ကောင်းမွန်လာမှသာ စစ်ဆင်ရေးတာဝန် ပြန်လည်ပေးအပ်ရန် လိုအပ်ကြောင်း ကိုနောင်ရိုးက ဆိုသည်။ “စစ်သား တစ်ယောက်ရဲ့ အခွင့်အရေးကို လျစ်လျူရှူ ချိုးဖောက်တာ၊ လုပ်ပိုင်ခွင့် အလွဲသုံးစားပြုတာ ဖြစ်ပါ တယ်။ စစ်မှုထမ်းတွေဟာ အခြေအနေတိုင်းမှာ သတ်မှတ် အခွင့်အရေးတွေ ရှိပါတယ်။ ကျဆုံးတာ၊ ကိုယ်အင်္ဂါ အစိတ်အပိုင်း ထိခိုက်တာ၊ ဒဏ်ရာရရှိတာ စတဲ့အခြေအနေ အလိုက် သတ်မှတ်ခံစားခွင့်များ ရှိပါတယ်။ (ဥပမာ- ‌ခြေလက် ပြတ်တောက်သွားရင် မသန်စွမ်းထောက်ပံ့မှု နှုန်းထားပေးတာ။” စစ်မှုထမ်းတပ်သားသစ်များသည် အခွင့်အရေးများ ပိတ်ပင်ခံထားရသည့်အပြင် လူသားဒိုင်းအဖြစ် အသုံးချ ခံနေရကြောင်း ထောက်ပြကာ၊ အခွင့်အလမ်း အမြဲစောင့်ကြည့်ပြီး အခွင့်သာသည်နှင့် ရုန်းထွက်ကြရန် ၎င်းက တိုက်တွန်းပြောကြားခဲ့သည်။ ပြည်သူ့ပန်းတိုင်က အောက်တိုဘာလ ၁၀ ရက်နေ့တွင် ထုတ်ပြန်သည့် စာရင်းအရ စက်တင်ဘာလအတွင်း စစ်ကော်မရှင်အဖွဲ့ဝင် စစ်သား၊ ရဲနှင့် ပြည်သူ့စစ် စုစုပေါင်း ၁၁၇ ဦး အလင်းဝင်ပူးပေါင်း၊ လက်နက်ချ သို့မဟုတ် စစ်သုံ့ပန်းအဖြစ် ဖမ်းဆီးခံခဲ့ရသည်။ ထိုအထဲတွင် အလင်းဝင်ပူးပေါင်းလာသူ ၆၉ ဦး အနက် ၄၁ ဦး မှာ စစ်မှုထမ်းတပ်သားသစ်များ ဖြစ်သည်။ ယခုနှစ် ဇန္နဝါရီလမှ စက်တင်ဘာလ အထိ ပြည်သူ့ပန်းတိုင်၏ မှတ်တမ်းများအရ စစ်ကော်မရှင်တပ်မှ အလင်းဝင်ပူးပေါင်း၊ လက်နက်ချနှင့် စစ်သုံ့ပန်း စုစုပေါင်း ၂,၁၂၁ ဦး ရှိခဲ့သည်။ ဓာတ်ပုံ - ပုံဟောင်း (ကရင်နီ အမျိုးသားများ ကာကွယ်ရေးတပ် - KNDF)

ပြည်သူ့စစ်မှုထမ်းတပ်သားသစ်များ တပ်တွင်း ဖိနှိပ်မှု ခံနေရဟု ထွက်ပြေးလာသူများက ပြော

ပြည်သူ့စစ်မှုထမ်းတပ်သားသစ်များ တပ်တွင်း ဖိနှိပ်မှု ခံနေရဟု ထွက်ပြေးလာသူများက ပြော  သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။ စစ…

  • October 16, 2025
ဝက်လက် အနီး စစ်ကော်မရှင်က ဂိုင်ရိုကော်ပတာ သုံးပြီး တိုက်ခိုက်နေ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၆ ရက်။ စစ်ကိုင်းတိုင်း ဒေသကြီး၊ ဝက်လက်မြို့အနီး၌ တိုက်ပွဲပြင်းထန်နေပြီး စစ်ကော်မရှင်တပ်၏ လေကြောင်းပစ်ကူ တွင် ဂိုင်ရိုကော်ပတာများ ပထမဆုံးအကြိမ် အသုံးပြုနေသည်။ ဝက်လက်မြို့နယ်တွင် စစ်တပ်နှင့် တော်လှန်ရေးအင်အားစုများအကြား တိုက်ပွဲပြင်းထန်နေပြီး၊ စစ်ကော်မရှင် တပ်က တိုက်ပွဲအတွင်း ဂိုင်ရိုကော်ပတာ (Gyrocopter) ၃ စီး အပါအဝင် ဂျက်ဖိုက်တာများကို အသုံးပြု၍ တိုက်ခိုက်နေကြောင်း စစ်ရေးသတင်းရင်းမြစ်များက ပြောသည်။ စစ်ရေးသတင်းရင်းမြစ်တစ်ဦးက “ပွင့်ပွင့်လင်းလင်း ပြောရရင်တော့ ရွာသာကြီးဘက်မှာ တိုက်ပွဲဖြစ်နေတာပါ။ အဲ့ဒီမှာ အထိုင် စစ်ကြောင်းရှိတာကို တိုက်နေတာပါ။ အရပ်သား အထိအခိုက်တော့ မရှိဘူးလို့ သိရတယ်” ဟု အတည်ပြု ပြောဆိုသည်။ အောက်တိုဘာလ ၁၂ ရက်နေ့မှစတင်ကာ တော်လှန်ရေး အင်အားစုများက ဝက်လက်မြို့ အထွက်ရှိ စစ်ကော်မရှင်တပ်ဖွဲ့ဝင်များ တပ်စွဲထားသည့် ရွာသာကြီးကျေးရွာကို ထိုးစစ်ဆင် တိုက်ခိုက်နေခြင်း ဖြစ်သည်။ မုံရွာမြို့ အနောက်မြောက်တိုင်း စစ်ဌာနချုပ် (နမခ) မှ ဂိုင်ရိုကော်ပတာ ၃ စီးဖြင့် ဝက်လက်မြို့နယ် အနောက် ဘက်ခြမ်းရှိ တိုက်ပွဲဧရိယာတစ်ဝိုက်ကို အောက်တိုဘာလ ၁၃ ရက်နေ့ တစ်ရက်တည်းမှာပင် ၃ ကြိမ်တိတိ ဗုံးကြဲတိုက်ခိုက်ခဲ့သည်။ ထို့အပြင် အောက်တိုဘာလ ၁၄ ရက်နေ့၊ နံနက်ပိုင်းတွင်လည်း ဂိုင်ရိုကော်ပတာဖြင့် ဆက်လက်တိုက်ခိုက်နေ ကြောင်း သိရသည်။ စစ်ကော်မရှင်တပ်သည် တိုက်ပွဲအတွင်း ဂိုင်ရိုကော်ပတာကို အသုံးပြုကာ ခုခံပစ်ကူပေးခြင်းမှာ ယခု ဝက်လက် တိုက်ပွဲတွင် ပထမဆုံးအကြိမ် ဖြစ်ကြောင်း ဒေသခံများက ပြောသည်။ စစ်ကော်မရှင်တပ်သည် ယခုနောက်ပိုင်း ကုန်ကျစရိတ် နည်းပါးသည့် တိုက်ခိုက်ရေးယာဉ်များကို အသုံးပြု၍ လေကြောင်း တိုက်ခိုက်မှုများကို ခပ်စိပ်စိပ် ပြုလုပ်လာနေသည်ဟု ဒေသခံများက ပြောသည်။ ပြီးခဲ့သည့် စက်တင်ဘာလ ၂၉ ရက်နေ့တွင်လည်း မုံရွာ နမခ မှ တက်လာသည့် ဂိုင်ရိုကော်ပတာ တစ်စီး၏ တိုက်ခိုက်မှုကြောင့် ရေဦးနှင့် တန့်ဆည်မြို့နယ် အစပ်ရှိ ဖန်ခါးဇင်ကျေးရွာရှိ အမျိုးသမီးတစ်ဦး သေဆုံးခဲ့ရပြီး၊ ဘုန်းကြီးကျောင်းဆောင် တစ်ခုပါ ပျက်စီးခဲ့ဖူးသည်။ စစ်ကော်မရှင်တပ်သည် ကုန်ကျစရိတ် နည်းပါးသည့် တိုက်ခိုက်ရေးယာဉ် အမျိုးအစားဖြစ်သော အင်ဂျင်တပ် လေထီး (ပါရာမော်တာ) ကိုလည်း ယမန်နှစ်က စတင်ကာ စစ်ကိုင်း၊ မန္တလေး၊ မကွေးနှင့် ပဲခူးတိုင်း ဒေသကြီးများတွင် စတင်အသုံးပြုခဲ့သည်။ ထိုမှတစ်ဆင့် ယခုနှစ် နှစ်လယ်ပိုင်းမှစတင်၍ ဂျိုင်ရိုကော်ပတာ အမျိုးအစား တိုက်ခိုက်ရေး ယာဉ်များကို မန္တလေးတိုင်း (မြင်းခြံဒေသ) နှင့် စစ်ကိုင်းတိုင်း စသည့် မြေပြန့်ဒေသများတွင်ပါ အသုံးပြုလာခြင်း ဖြစ်သည်။ လေကြောင်း ကင်းထောက်အဖွဲ့များ၏ ထုတ်ပြန်ချက်အရ တစ်နာရီလျှင် ၉၅ မိုင်နှုန်း ပျံသန်းနိုင်သည့် ဂျိုင်ရို ကော်ပတာသည် ပါရာမော်တာထက် ပျံသန်းနှုန်း ပိုမိုမြင့်မားသည့် အပြင် မောင်းနှင်သူတစ်ဦးနှင့် နောက်ထပ် လူတစ်ဦးပါ လိုက်ပါစီးနင်းနိုင်သည့် အားသာချက်များရှိသည်။ ဓာတ်ပုံ - Wetlet Informational Network  

ဝက်လက် အနီး စစ်ကော်မရှင်က ဂိုင်ရိုကော်ပတာ သုံးပြီး တိုက်ခိုက်နေ

ဝက်လက် အနီး စစ်ကော်မရှင်က ဂိုင်ရိုကော်ပတာ သုံးပြီး တိုက်ခိုက်နေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။ စစ်ကိုင်းတိုင်း ဒေသကြ…

  • October 16, 2025
တိုက်ပွဲ ပြင်းထန်လာသဖြင့် ဗန်းမောက် ဒေသခံများ စစ်ရှောင် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ အောက်တိုဘာလ ၁၆ ရက်။ စစ်ကိုင်းတိုင်းဒေသကြီး၊ ဗန်းမောက်မြို့အနီး တိုက်ပွဲပြင်းထန်လာမှုကြောင့် ကျေးရွာ ၁၅ ရွာမှ ဒေသခံ ၂,၀၀၀ ခန့် စစ်ဘေးတိမ်းရှောင်နေရသည်။ ဗန်းမောက်မြို့အနီးတွင် စစ်ကော်မရှင်တပ်နှင့် ရှမ်းနီအမျိုးသား တပ်မတော် (SNA) ပူးပေါင်းတပ်ဖွဲ့တို့၏ ထိုးစစ် ကြောင့် ဒေသကာကွယ်ရေး ပူးပေါင်းတပ်ဖွဲ့များနှင့် တိုက်ပွဲများ ပြင်းထန်လာနေသည်။ အဆိုပါ စစ်ရေးတင်းမာမှု အခြေအနေများကြောင့် ကျေးရွာပေါင်း ၁၅ ရွာခန့်မှ အရပ်သားများ ဘေးလွတ်ရာသို့ ထွက်ပြေး တိမ်းရှောင်နေရကြောင်း ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့ (ပအဖ) က ထုတ်ပြန်ထားသည်။ စစ်ရေးအခြေအနေ သိရှိသူ ဒေသခံတစ်ဦးက “အခုတိုက်ပွဲက စက်တောကျေးရွာဘက်မှာ ဖြစ်နေတာ။ စစ်ဘေး ရှောင်တွေကတော့ များလာတယ်။ တော်လှန်ရေး အင်အားစုတွေဘက်ကို ပြေးလာတာတွေလည်း ရှိသလို ဗန်းမောက် အနောက်ဘက်ခြမ်းကို ပြေးသွားတာတွေလည်းရှိတယ်။ အခုမြို့သိမ်းပြီးတဲ့နောက်ပိုင်း SNA က ထိုးစစ်ဆင်လာတော့ စက်တောရွာအထိ သူတို့ရောက်လာကြတာ။ အခုတော့ အဲ့ဘက်မှာဘဲ တိုက်ပွဲတွေက ဆက်ဖြစ်နေတယ်” ဟု ပြောသည်။ တော်လှန်ရေးအင်အားစုများက ဗန်းမောက်မြို့ကို ထိန်းချုပ်ပြီးနောက်ပိုင်းတွင် စစ်ကော်မရှင်တပ်နှင့် SNA ပူးပေါင်းတပ်ဖွဲ့သည် မြို့ကို ပြန်လည်သိမ်းပိုက်ရန် အင်အားဖြည့်တင်းကာ ထိုးစစ်ဆင်မှု အရှိန်မြှင့် လုပ်ဆောင် လာခြင်း ဖြစ်သည်။ ထို့ကြောင့် နှစ်ဖက်တပ်များအကြား တိုက်ပွဲများ ပိုမိုပြင်းထန်လာနေသည်ဟု မြေပြင် သတင်းအရင်းအမြစ်များ က ပြောသည်။ လက်ရှိတွင် ဗန်းမောက်မြို့နှင့် အနီးတစ်ဝိုက်ရှိ စက်တောကျေးရွာ အနီး၌ နှစ်ဖက်တပ်များ တိုက်ပွဲပြင်းထန်နေ ကြောင်း သိရသည်။ စစ်ဘေးရှောင်တိမ်းနေရသည့် ကျေးရွာများတွင် စက်တော၊ အလယ်ရွာ၊ နားယကာ၊ ကံရွာ၊ ကြောင်လည်၊ ပင်ဟင်းခါး၊ ခမိုး၊ မြစ်သေးချင်း စသည့် ကျေးရွာများ အပါအဝင် စုစုပေါင်း ကျေးရွာ ၁၅ ရွာခန့် ပါဝင်ပြီး စစ်ရှောင်အရေအတွက် စုစုပေါင်း ၂ ထောင်ဝန်းကျင် ရှိနေသည်ဟု စစ်ရှောင်အရေး ကူညီပေးနေသူများက ခန့်မှန်းထားသည်။ ဗန်းမောက် - ပအဖ ၏ ထုတ်ပြန်ချက်အရ စစ်ဘေးရှောင် အများစုသည် သက်ကြီးရွယ်အိုများနှင့် ကလေးသူငယ်များ ဖြစ်ကြပြီး၊ အစားအသောက်၊ ဆေးဝါး၊ အဝတ်အထည်နှင့် ခြင်ထောင်များ အရေးတကြီး လိုအပ်လျက်ရှိသည်။ ဗန်းမောက် - ပအဖ ၏ လူမှုကွန်ရက် စာမျက်နှာတွင် “ဒီနေ့အထိ စစ်ရှောင်တွေက တဖွဲဖွဲရောက်ရှိလာ နေပါ တယ်။ အရေးပေါ် ကျန်းမာရေး စောင့်ရှောက်မှုတွေကို ပြည်သူ ၃၀၀ ထက်မနည်းကို ဆေးဝါးကုသပေးပြီး ဖြစ်ပါတယ်။ ရေရှည်မှာ အကူအညီတွေ လိုအပ်နေအုံးမှာပါ” ဟု ရေးသားထားသည်။ ဗန်းမောက်မြို့ကို ပြီးခဲ့သည့် စက်တင်ဘာလ ၂၀ ရက်နေ့တွင် တော်လှန်ရေးအင်အားစုများက သိမ်းပိုက်ထိန်းချုပ် ခဲ့ပြီး ခမိုးနှင့် စက်တော ကျေးရွာများကိုပါ ထိန်းချုပ်နိုင်ခဲ့သည်။ သို့သော် အောက်တိုဘာလ ၄ ရက်နေ့တွင် ဟုမ္မလင်းမှ တပ်မ ၃၃ လက်အောက်ခံ စစ်ကော်မရှင်တပ်များနှင့် SNA တပ်သားများ ပူးပေါင်းကာ ထိုးစစ်ဆင်လာသဖြင့် အဆိုပါ ကျေးရွာနှစ်ရွာကို တော်လှန်ရေး အင်အားစုက လက်လွှတ်ခဲ့ရသည်။ လက်ရှိတွင် ဗန်းမောက်မြို့ကို လက်မလွှတ်ရရေး တော်လှန်ရေး အင်အားစုဘက်က ပြင်းပြင်းထန်ထန် ခုခံကာ ကွယ်နေပြီး၊ စစ်ကော်မရှင် ပူးပေါင်းတပ်ဖွဲ့ကမူ တစ်ရက်ခြား လေကြောင်း တိုက်ခိုက်မှုများ ပြုလုပ်နေသည့် အပြင် သာလွန် အင်အားများဖြင့်ပါ မြေပြင်ထိုးစစ်ဆင်လာနေသည်။

တိုက်ပွဲ ပြင်းထန်လာသဖြင့် ဗန်းမောက် ဒေသခံများ စစ်ရှောင်

တိုက်ပွဲ ပြင်းထန်လာသဖြင့် ဗန်းမောက် ဒေသခံများ စစ်ရှောင် သတင်းနှင့် မီဒီယာ ကွန်ရက်။၂၀၂၅ ခုနှစ်၊ အောက်တိုဘာလ ၁၆ ရက်။ စစ်ကိုင်းတိုင်းဒေသကြီး၊ ဗန်းမ…

  • October 16, 2025
×Close