သတင်း

ကသာ အဝင်အထွက် ပိတ်ထားပြီး ဗုံးကြဲ တိုက်ခိုက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၄ ရက်။   လူပေါင်း ၈၀ ခန့် သေဆုံးခဲ့ရသည့် တိုက်ခိုက်မှု နောက်ပိုင်း စစ်ကိုင်းတိုင်း ဒေသကြီး၊ ကသာမြို့တွင် စစ်ကော်မရှင်တပ်က မြို့အဝင်အထွက် လမ်းကြောင်းအားလုံးကို ပိတ်ဆို့ထားပြီး လေကြောင်းမှတစ်ဆင့် နေ့ရောညပါ အပြင်းအထန် ဗုံးကြဲတိုက်ခိုက်နေခြင်းကြောင့် ဒေသခံ ပြည်သူ ၅,၀၀၀ ခန့် မြို့အတွင်း ပိတ်မိနေသည်။   ပြီးခဲ့သည့် မတ်လ ၂၀ ရက်နေ့က စစ်ဘေးရှောင်များ ခိုလှုံနေသည့် မဟာလေးထပ်ကျောင်းတိုက် ဗုံးကြဲခံရပြီး နောက်ပိုင်း စစ်ကော်မရှင်တပ်သည် ဂျက်လေယာဉ်၊ Y-12 အပါအဝင် လေယာဉ် ၁၀ စီးကျော်ဖြင့် ကသာမြို့ ပေါ်သို့ ၄ ရက်ဆက်တိုက် ဗုံးမိုးရွာချနေခြင်းဖြစ်သည်။   မတ်လ ၂၃ ရက်နေ့ (ယမန်နေ့) ကလည်း ရပ်ကွက် ၅ ထဲ လေကြောင်းမှ ဗုံးကြဲခဲ့သည့်အပြင် ယနေ့ထိ လေယာဉ်သံများ ဆက်ကြားနေရသည်ဟု မြို့ခံများက ပြောသည်။   လက်ရှိတွင် ဆက်သွယ်ရေးလိုင်းများနှင့် အင်တာနက်လိုင်းများ ဖြတ်တောက်ခံထားရသဖြင့် မြို့တွင်းရှိ မိသားစု ဝင်များနှင့် အဆက်အသွယ်ပြတ်တောက်ကာ စိုးရိမ်ပူပန်မှုများ မြင့်တက်နေသည်။   မြို့ခံအမျိုးသားတစ်ဦးက “မြို့ထဲမှာ ပိတ်မိနေတာ ၅,၀၀၀ ကျော်ပြီ။ စစ်တပ်က မြို့ပြင်ထွက်တဲ့သူမှန်သမျှ ပစ်သတ်မယ်လို့ ခြိမ်းခြောက်ထားတာ။ ကျနော်တို့ကို လူသားဒိုင်းလို လုပ်ထားပြီး မြို့ပေါ်ကို ဗုံးတွေ ဆက် တိုက်ကြဲနေတာပဲ။ ရပ်ကွက် (၅) ဘက်မှာလည်း ဗုံးတွေကျနေတယ်။ ဘယ်သူတွေ ထိခိုက်ကုန်ပြီလဲ ဆိုတာ တော့ အတိအကျ မသိရဘူး။ သွားကြည့်လို့လည်း မရဘူး” ဟု ပြောသည်။   မတ်လ ၂၀ ရက်နေ့ တိုက်ခိုက်မှုတွင် သံဃာတော်နှင့် အရပ်သား ၈၀ ခန့် သေဆုံးခဲ့ရပြီး အလောင်းအများစုမှာ မီးလောင်ကျွမ်းခဲ့သဖြင့် မည်သူမည်ဝါဖြစ်ကြောင်း ခွဲခြား၍မရမီ စစ်ကော်မရှင်က အလျင်အမြန် သင်္ဂြိုဟ်ခိုင်းခဲ့ ကြောင်း မြို့ခံများက ပြောသည်။   ထို့ပြင် ဒဏ်ရာရရှိသူ ၃၀ ကျော်မှာလည်း ဆေးရုံ၊ ဆေးခန်းများ ပိတ်ထားသဖြင့် လုံလောက်သော ဆေးဝါး ကုသခွင့်မရဘဲ အသက်အန္တရာယ် စိုးရိမ်နေရသည့် အခြေအနေဖြစ်နေသည်။   ကသာမြို့ပြင်တွင် စစ်ဘေးရှောင်နေရသူ မြို့ခံတစ်ဦးကလည်း “မြို့ထဲက လူတွေကတော့ အကုန်ထွက်ချင်နေ ကြတာပဲ။ ဒါပေမဲ့ လမ်းတွေကို သံချပ်ကာကားတွေနဲ့ ပိတ်ထားတော့ ဘယ်မှသွားလို့မရဘူး။ အခု ဖုန်းလိုင်းတွေ လည်း မရတော့ မိသားစုတွေ ဘာဖြစ်နေလဲဆိုတာ မသိရလို့ လူမှုကွန်ရက်ပေါ်မှာတင်ပြီး လူချင်း အဆက် အသွယ်ရအောင် လိုက်စုံစမ်းနေရတယ်” ဟု ပြောသည်။   ယခု ကသာမြို့တွင်း ပိတ်မိနေသည့် ပြည်သူများမှာ ၂၀၂၆ နှစ်ဆန်းပိုင်းတွင် တိုက်ပွဲများ ငြိမ်သက်လာသဖြင့် မြို့သို့ပြန်လည်ဝင်ရောက်လာသူများနှင့် ထွက်ပြေးတိမ်းရှောင်ခြင်း မရှိဘဲ ဆက်နေထိုင်နေသူများ ဖြစ်သည်။   ဒေသတွင်း တော်လှန်ရေးအင်အားစုများဘက်ကလည်း စစ်ကော်မရှင်သည် အရပ်သားပြည်သူများကို ဓားစာခံ အဖြစ် အသုံးချရန် မြို့တွင်းသို့ ပြန်လည်ဝင်ရောက်နေထိုင်ရန် ဖိအားပေးနေခြင်းဖြစ်ကြောင်း၊ ထို့ကြောင့် မြို့တွင်းသို့ ပြန်လည်ဝင်ရောက်ခြင်းမပြုဘဲ ဘေးလွတ်ရာတွင်သာ ဆက်လက်ခိုလှုံကြရန် သတိပေးချက်များ ထုတ်ပြန်ထားသည်။     ထို့ပြင် တိုက်ပွဲများမှာ အချိန်မရွေး ပြန်လည်ပြင်းထန်လာနိုင်သည့်အပြင် စစ်ကော်မရှင်၏ မြေပြင်စစ်ကြောင်း များမှာ လည်း မြို့တွင်းရှိ အရပ်သားများကို ပစ်မှတ်ထားကာ ဖမ်းဆီးနှိပ်စက်မှုများ ပြုလုပ်နိုင်သောကြောင့် တော်လှန်ရေးတပ်ဖွဲ့များက မြို့တွင်းသို့ ပြန်လည်ဝင်ရောက်ခြင်း မပြုကြရန် တိုက်တွန်းထားသည်။   စစ်ကော်မရှင်သည် ကသာမြို့အပြင် စစ်ကိုင်းတိုင်းအတွင်းရှိ ကနီ၊ မြောင်နှင့် ကျွန်းလှမြို့နယ်များကိုလည်း လေကြောင်းမှတစ်ဆင့် ဆက်တိုက် ဗုံးကြဲတိုက်ခိုက်နေသည်။   မတ်လ ၂၁ ရက်က ကနီမြို့နယ်ထဲက ဆူးလေကုန်းကျေးရွာရှိ စာသင်ကျောင်းနှင့် ဘုန်းကြီးကျောင်းကို ဂျက်ဖိုက် တာ ၇ စီးဖြင့် ဗုံးကြဲခဲ့သလို၊ မတ်လ ၂၃ ရက်နေ့ကလည်း မြောင်မြို့နယ် သောင်ကြီးကျေးရွာကို ဗုံးကြဲခဲ့သဖြင့် အရပ်သားများ ထပ်မံသေဆုံးခဲ့ရသည်။   ဓါတ်ပုံ - Indaw Revolution (IR)   #ကသာမြို့ #စစ်ကိုင်းတိုင်း #ဗုံးကြဲတိုက်ခိုက်  

ကသာ အဝင်အထွက် ပိတ်ထားပြီး ဗုံးကြဲ တိုက်ခိုက်

ကသာ အဝင်အထွက် ပိတ်ထားပြီး ဗုံးကြဲ တိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၄ ရက်။  လူပေါင်း ၈၀ ခန့် သေဆုံးခဲ့ရသည့် တိုက်ခိုက…

  • March 24, 2026
ကိုးကန့်တပ်များ နမ့်ခမ်းမှ တပ်ဆုတ်၊ တအာင်းအလံများ ၁၀၅ မိုင်တွင် ပြန်လွှင့်ထူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၄ ရက်။ ရှမ်းမြောက် နမ့်ခမ်းမှ ကိုးကန့်တပ် (MNDAA) တပ်ဖွဲ့ဝင်များ ဆုတ်ခွာသွားပြီး ၁၀၅ မိုင်တွင်လည်း တအာင်းအလံများ ပြန်လည်လွှင့်ထူထားသည်ဟု ဒေသခံများက ပြောသည်။ တအာင်းတပ် (TNLA) နှင့် ကိုးကန့်တပ် (MNDAA) တို့အကြား နယ်မြေစိုးမိုးမှုဆိုင်ရာ သဘောတူညီချက်ရရှိပြီး နောက် နမ့်ခမ်းမြို့နယ်အတွင်း ကျူးကျော်ဝင်ရောက်ခဲ့သည့် MNDAA တပ်ဖွဲ့ဝင်များ ပြန်လည် ဆုတ်ခွာသွား သကဲ့သို့၊ ၁၀၅ မိုင် ကုန်သွယ်ရေးဇုန်တွင်လည်း တအာင်းအလံများ ပြန်လည်စိုက်ထူလာကြောင်း ဒေသခံများနှင့် သတင်းရင်းမြစ်များက ပြောသည်။ ပြီးခဲ့သည့် မတ်လ ၂၀ ရက်က လောက်ကိုင်မြို့တွင် နှစ်ဖက်ခေါင်းဆောင်များ တွေ့ဆုံဆွေးနွေးပြီးနောက် မတ်လ ၂၃ ရက် နံနက်ပိုင်းမှ စတင်ကာ နမ့်ခမ်းမြို့အရှေ့ဘက် ပန်းဆေးဒေသတွင် အင်အားဖြည့်တင်းထားသည့် MNDAA တပ်ဖွဲ့ဝင် ရာနှင့်ချီ၍ စစ်ကားအစီးရေ ၇၀ ကျော်ဖြင့် နမ့်ဖတ်ကာလမ်းပိုင်းမှတစ်ဆင့် ကွတ်ခိုင်မြို့ ဘက်သို့ ပြန်လည်ဆုတ်ခွာသွားခဲ့ခြင်းဖြစ်သည်။ မြေပြင်အခြေအနေနှင့် ပတ်သက်၍ နမ့်ခမ်းဒေသခံတစ်ဦးက ယခုကဲ့သို့ ပြောသည်။ “နမ့်ခမ်းဘက်မှာတော့ နမ့်ခမ်းနဲ့ ကွတ်ခိုင်အစပ်ဖြစ်တဲ့ ဒီ ၁၂ မိုင် အရင်က TNLA ရဲ့ ဂိတ်ပေါ့နော် အဲ့ဒီ အကျော်မှာ ရောက်နေတဲ့ ဒီနမ့်ခမ်းမြို့ထဲကို ရောက်နေတဲ့ ကိုးကန့်တပ်တွေကတော့ တပ်ဆုတ်သွားပါပြီ။ ကိုးကန့်တပ်ကတော့ ကွတ်ခိုင်နယ်တကြောလုံးကို သူတို့အုပ်ချုပ်မယ်ပေါ့။ အဲ့ဒါကြောင့် မနေ့က ဒီနမ့်ခမ်း နယ်ဘက်ကို ကျူးကျော်နေတဲ့ အရှေ့ကိုရောက်နေတဲ့ ကိုးကန့်စစ်သားတွေက နောက်ဆုတ်သွားပါပြီ။” ထို့ပြင် ပြီးခဲ့သည့်ရက်ပိုင်းက ကိုးကန့်တပ် MNDAA ဘက်မှ တအာင်းအလံများကို ဖြုတ်ချပြီး အုပ်ချုပ်ရေး အဖွဲ့ဝင်များကို မောင်းထုတ်ခဲ့သည့် ၁၀၅ မိုင် ကုန်သွယ်ရေးဇုန်၌ ယနေ့တွင် တအာင်းအလံများကို ပြန်လည် စိုက်ထူခွင့် ရရှိလာခဲ့သည်။ သို့သော် အုပ်ချုပ်ရေးယန္တရားတွင် တအာင်းတပ်ဖွဲ့များ ပြန်လည်တာဝန်ယူခြင်း မရှိသေးကြောင်း ဒေသခံများက ပြောသည်။ “ဒီနေ့မနက်မှာတော့ ဒီညီနောင်မဟာမိတ် အုပ်ချုပ်တဲ့ ဒီ ၁၀၅ မိုင်ထဲမှာတော့ TNLA အလံတွေကို အကုန်လုံး ပြန်စိုက်ထူထားတာ တွေ့ရပါတယ်။ ၁၀၅ မိုင်မှာတော့ ကျနော်ကြားသိရသလောက်ကတော့ ဒီဘက်မှာတော့ TNLA အုပ်ချုပ်ရေးကတော့ မထိုင်တော့ဘူးလို့ ကြားသိရပါတယ်။ အရင်တုန်းကတော့ ဒီမှာ ၃ ဖွဲ့ထိုင်တာပေါ့ နော်။ အခုတော့ ဒီမှာ AA ရယ် MNDAA ရယ် နှစ်ဖွဲ့ပဲ ထိုင်မယ်လို့တော့ ကြားသိရပါတယ်။ အခွန်နဲ့ ပတ်သက် ရင်တော့ ဒီတိုင်းပဲ အခွန်ကို ၃ ဖွဲ့ကောက်မယ်လို့တော့ ကြားသိရပါတယ်။ TNLA ရဲ့ အခွန်လည်း ဒီဘက်မှာ ရှိမှာပေါ့။” လက်ရှိတွင် နမ့်ခမ်းမြို့အတွင်း ထိုးစစ်ဆင်လာမည်ကို စိုးရိမ်နေသည့် ဒေသခံများမှာ တပ်ဆုတ်ခွာမှုကြောင့် စိတ်အေးသွားရပြီဟု ဆိုကြသည်။ ယခုကဲ့သို့ ကိုးကန့်တပ် တပ်ဆုတ်ခွာမှုနှင့် တအာင်းအလံ ပြန်လည်စိုက်ထူမှုများသည် နှစ်ဖက်ခေါင်းဆောင်များ အကြား ရရှိထားသည့် သဘောတူညီချက် ၅ ချက်ပါ တပ်နေရာချထားရေးနှင့် မဟာမိတ်အချင်းချင်း အသိအမှတ်ပြုရေးဆိုင်ရာ အချက်များကို လက်တွေ့အကောင်အထည်ဖော်လာခြင်း ဖြစ်သည်။ ညီနောင်မဟာမိတ်အဖွဲ့ဝင် နှစ်ဖွဲ့အကြား ဖြစ်ပွားခဲ့သည့် ယင်းအငြင်းပွားမှုသည် ခေါင်းဆောင်ပိုင်းများ၏ ဆွေးနွေးမှုအရ ပြေလည်မှုရရှိသွားပြီဖြစ်သော်လည်း လားရှိုး-နမ္မတူ လမ်းပိုင်းရှိ အီနိုင်းကျေးရွာကဲ့သို့ နေရာ အချို့တွင်မူ MNDAA တပ်များ ဆက်လက်ရှိနေသေးကြောင်း ဒေသတွင်းသတင်းရင်းမြစ်များ၏ ဖော်ပြချက်အရ သိရသည်။ ဓာတ်ပုံ - (ပုံဟောင်း) #MNDAA #TNLA #ကိုးကန့်တပ် #တအာင်းတပ် #ကွတ်ခိုင်တိုက်ပွဲ

ကိုးကန့်တပ်များ နမ့်ခမ်းမှ တပ်ဆုတ်၊ တအာင်းအလံများ ၁၀၅ မိုင်တွင် ပြန်လွှင့်ထူ

ကိုးကန့်တပ်များ နမ့်ခမ်းမှ တပ်ဆုတ်၊ တအာင်းအလံများ ၁၀၅ မိုင်တွင် ပြန်လွှင့်ထူ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၄ ရက်။ ရှမ်းမြောက် နမ့…

  • March 24, 2026
မြောင်မြို့နယ်အတွင်း ဗုံးကြဲသဖြင့် အရပ်သား ၆ ဦးသေဆုံးပြီး အိမ်ခြေ ၅၀ ကျော် မီးလောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၄ ရက်။ မြောင်မြို့နယ်ထဲက သောင်ကြီးကျေးရွာကို စစ်ကော်မရှင်တပ် လေကြောင်းမှ ဗုံးကြဲခဲ့ရာ ကလေးငယ်အပါအဝင် ၆ ဦး သေဆုံးကာ အိမ်ခြေ ၅၀ ကျော် မီးလောင်ပြာကျသွားသည်။ စစ်ကိုင်းတိုင်းဒေသကြီး၊ မြောင်မြို့နယ်အတွင်းရှိ သောင်ကြီးကျေးရွာကို စစ်တပ်က တိုက်လေယာဉ်ဖြင့် ဗုံးကြဲ တိုက်ခိုက်ခဲ့ခြင်းကြောင့် အသက် ၆ နှစ်အရွယ် ကလေးငယ်တစ်ဦး အပါအဝင် ဒေသခံ ၆ ဦးထက်မနည်း သေဆုံးပြီး၊ လူနေအိမ် ၅၀ ကျော် မီးလောင်ပျက်စီးခဲ့ကြောင်း ဒေသတွင်းသတင်းရင်းမြစ်များက ပြောသည်။ မြောင်မြို့နယ်မှာ စစ်ကိုင်းတိုင်း တောင်ဘက်စွန်း မြို့နယ်ဖြစ်ပြီး မန္တလေးတိုင်း၊ မကွေးတိုင်းတို့နှင့် ဆက်လျက် တည်ရှိသည်။ ပြီးခဲ့သည့် မတ်လ ၂၃ ရက်နေ့၊ မွန်းလွဲ ၁၂ နာရီခန့်တွင် မန္တလေးမြို့၊ တံတားဦးလေတပ်စခန်းမှ တက်လာသည့် ဂျက်ဖိုက်တာ တိုက်လေယာဉ်တစ်စင်းသည် တိုက်ပွဲဖြစ်ပွားခြင်းမရှိသည့် သောင်ကြီးကျေးရွာအတွင်းသို့ ဗုံး ၄ လုံး ကြဲချတိုက်ခိုက်ခဲ့ခြင်းဖြစ်သည်။ အဆိုပါ ဗုံးသီးများသည် ကျေးရွာလူနေရပ်ကွက်များအတွင်း တည့်တည့်ကျရောက်ပေါက်ကွဲခဲ့သဖြင့် နေအိမ်များ နှင့်အတူ လူများပါ မီးလောင်သေဆုံးခဲ့ရသည်။ ဒေသခံတစ်ဦးက မြေပြင်အခြေအနေနှင့် ပတ်သက်၍ “ဗုံးက ရွာလယ်ခေါင် အိမ်တွေပေါ်ကိုပဲ တည့်တည့် ကျ တာ။ အိမ်တွေကလည်း စိပ်တော့ မီးက ချက်ချင်းကို ဟုန်းခနဲ လောင်သွားတာပဲ။ သေတဲ့သူတွေဆိုရင် မီးထဲ ပါသွားလို့ ဘယ်သူဘယ်ဝါမှန်းတောင် ခွဲမရတော့ဘူး။ အခုထိလည်း မီးလောင်နေတဲ့ အပျက်အစီးပုံတွေထဲမှာ အလောင်းတွေ ထပ်ရှိဦးမလားဆိုပြီး ရှာနေရတုန်းပဲ” ဟု ပြောသည်။ ထိုတိုက်ခိုက်မှုကြောင့် အသက် ၆ နှစ်အရွယ် ယောက်ကျားလေးတစ်ဦးနှင့် လူကြီး ၅ ဦး နေရာတွင်ပင် သေဆုံးခဲ့ပြီး၊ ကလေးငယ်များ အပါအဝင် ၂၀ ကျော် ဒဏ်ရာရရှိခဲ့သည်။ ထို့ပြင် ကျေးရွာအတွင်းရှိ လယ်ယာသုံးနွား အကောင် ၂၀ ကျော်လည်း သေဆုံးခဲ့ရကြောင်း ဒေသခံများက ပြောသည်။ မြောင်မြို့နယ်အတွင်း၌ စစ်ကော်မရှင်တပ်သည် အရပ်သားပစ်မှတ်များကို လေကြောင်းမှတစ်ဆင့် ဆက်တိုက် ပစ်မှတ်ထားနေပြီး ပြီးခဲ့သည့် မတ်လ ၂၀ ရက်နေ့ကလည်း နဘက်ကျေးရွာကို ဗုံးကြဲတိုက်ခိုက်ခဲ့သဖြင့် ရက်သားအရွယ် ကလေးငယ်တစ်ဦး သေဆုံးခဲ့ရသည့်ဖြစ်စဉ် ဖြစ်ပွားခဲ့ပါသေးသည်။ လက်ရှိတွင် အိမ်ခြေ ၁,၀၀၀ ခန့်ရှိသည့် သောင်ကြီးကျေးရွာမှ ဒေသခံ ၄,၀၀၀ နီးပါးမှာ ဘေးလွတ်ရာသို့ ထွက်ပြေးတိမ်းရှောင်နေကြရသည်။ #မြောင်မြို့နယ်လေကြောင်းတိုက်ခိုက်မှု #သောင်ကြီးကျေးရွာ #စစ်ကိုင်းတိုင်း

မြောင်မြို့နယ်အတွင်း ဗုံးကြဲသဖြင့် အရပ်သား ၆ ဦးသေဆုံးပြီး အိမ်ခြေ ၅၀ ကျော် မီးလောင်

မြောင်မြို့နယ်အတွင်း ဗုံးကြဲသဖြင့် အရပ်သား ၆ ဦးသေဆုံးပြီး အိမ်ခြေ ၅၀ ကျော် မီးလောင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၄ ရက်။ မြောင်မြ…

  • March 24, 2026
တရုတ်၏ တောင်တရုတ်ပင်လယ်ပြင် ချဲ့ထွင်မှု ဗီယက်နမ်ကန့်ကွက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၄ ရက်။   တောင်တရုတ်ပင်လယ်ပြင်အတွင်း အငြင်းပွားဖွယ်ရာ ပါရာဆဲလ်ကျွန်းစု (Paracel Islands) ရှိ အန္တလော့ကျွန်း (Antelope Reef) တွင် တရုတ်နိုင်ငံက မြေယာချဲ့ထွင်နေမှုအပေါ် ဗီယက်နမ်အစိုးရက ပြင်းထန်စွာ ကန့်ကွက်လိုက်သည်။   အမေရိကန်အခြေစိုက် CSIS အဖွဲ့၏ အစီရင်ခံစာအရ တရုတ်နိုင်ငံသည် အဆိုပါကျွန်းတွင် ပေ ၉,၀၀၀ ကျော် (မီတာ ၂,၇၀၀) ရှည်လျားသော လေယာဉ်ကွင်း၊ ရဟတ်ယာဉ်ကွင်းနှင့် သင်္ဘောကျင်းများကို အရှိန်အဟုန်ဖြင့် တည်ဆောက်နေသည်။   ဤလုပ်ဆောင်ချက်သည် အဆိုပါဒေသကို တရုတ်နိုင်ငံ၏ အကြီးဆုံးစစ်အခြေစိုက်စခန်းအဖြစ် ပြောင်းလဲရန်နှင့် ကမ်းခြေစောင့်တပ်များ အမြဲတမ်းတပ်စွဲရန် ပြင်ဆင်ခြင်းဖြစ်သည်ဟု ယူဆရသည်။   ဗီယက်နမ်နိုင်ငံခြားရေးဝန်ကြီးဌာနကမူ ၎င်းတို့အခေါ် ဟိုအန်းဆကျွန်းစု (Hoang Sa) အတွင်း ဗီယက်နမ်၏ ခွင့်ပြုချက်မပါဘဲ လုပ်ဆောင်နေသည့် မည်သည့်လုပ်ရပ်မဆိုသည် တရားမဝင်ကြောင်းနှင့် အတည်မဖြစ်ကြောင်း ထုတ်ပြန်ခဲ့သည်။   နိုင်ငံတကာပင်လယ်ပြင်ဆိုင်ရာဥပဒေ (UNCLOS) အရ ကျွန်းများကို လူလုပ်ချဲ့ထွင်ခြင်းသည် ဥပဒေကြောင်းအရ ပိုင်နက်အခွင့်အရေး ပိုမိုရရှိစေမည်မဟုတ်သော်လည်း တရုတ်နိုင်ငံသည် လက်တွေ့နယ်ပယ်တွင် အင်အားသုံး၍ ကျွန်းတုများ တည်ဆောက်ကာ နယ်မြေစိုးမိုးရေးကို တစိုက်မတ်မတ် ဆောင်ရွက်လျက်ရှိသည်။

တရုတ်၏ တောင်တရုတ်ပင်လယ်ပြင် ချဲ့ထွင်မှု ဗီယက်နမ်ကန့်ကွက် 

တရုတ်၏ တောင်တရုတ်ပင်လယ်ပြင် ချဲ့ထွင်မှု ဗီယက်နမ်ကန့်ကွက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၄ ရက်။  တောင်တရုတ်ပင်လယ်ပြင်အတွင်း အင…

  • March 24, 2026
ယူကေနှင့် ထိုင်းနိုင်ငံတို့တွင် ဦးနှောက်အမြှေးရောင်ရောဂါ ဖြစ်ပွား   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၄ ရက်။   ယူနိုက်တက်ကင်းဒမ်း (UK) နိုင်ငံတွင် ဖြစ်ပွားနေသော ဦးနှောက်အမြှေးရောင်ရောဂါ (Meningococcal Group B - MenB) ကူးစက်မှုသည် ပြီးခဲ့သည့်စနေနေ့က အမြင့်ဆုံးအဆင့်သို့ ရောက်ရှိခဲ့ပြီးနောက် လက်ရှိတွင် ပြန်လည်လျော့နည်းလာသည်ဟု ဆိုသည်။   ယူကေတွင် လက်ရှိအတည်ပြုလူနာ ၂၀ ဦးနှင့် စောင့်ကြည့်လူနာ ၉ ဦး၊ စုစုပေါင်း ၂၉ ဦးရှိနေပြီး မတ်လ ၁၅ ရက်နေ့နောက်ပိုင်းတွင် ထပ်တိုးသေဆုံးသူ မရှိခဲ့ပေ။   တစ်ချိန်တည်းမှာပင် ထိုင်းနိုင်ငံ၌လည်း ၂၀၂၆ ခုနှစ် ဇန်နဝါရီလမှ မတ်လလယ်အထိ လူနာ ၅ ဦးတွေ့ရှိကာ ၃ ဦး သေဆုံးခဲ့ကြောင်း အစိုးရက ထုတ်ပြန်ထားသည်။   ထိုင်းနိုင်ငံရှိ ဖြစ်စဉ်သည် ယူကေနှင့် တိုက်ရိုက်ပတ်သက်မှုမရှိသော်လည်း ထိုင်းအစိုးရအနေဖြင့် ခရီးသွားများအား ကြိုတင်သတိပေးချက်များ ထုတ်ပြန်ထားသည်။   ဗြိတိန်သို့ သွားရောက်မည့် ခရီးသွားများအနေဖြင့် ခရီးမထွက်ခွာမီ အနည်းဆုံး ၁၀ ရက်ကြိုတင်၍ ကာကွယ်ဆေးထိုးနှံကြရန် တိုက်တွန်းထားသည်။   အဆိုပါရောဂါသည် ပြင်းထန်ဖျားနာခြင်း၊ ပြင်းထန်စွာ ခေါင်းကိုက်ခြင်း၊ ဇက်ကြောတောင့်ခြင်းနှင့် အရေပြားတွင် သွေးခြေဥသကဲ့သို့ အကွက်များပေါ်ခြင်း စသည့်လက္ခဏာများ ပြသတတ်သည်။   ကြိုတင်ကာကွယ်ရန်အတွက် လက်ကို စနစ်တကျဆေးကြောခြင်း၊ လူထူထပ်သောနေရာများတွင် နှာခေါင်းစည်း (Mask) တပ်ဆင်ခြင်းနှင့် ဖျားနာနေသူများနှင့် အနီးကပ်ထိတွေ့မှုကို ရှောင်ကြဉ်ခြင်းတို့ကို လိုက်နာဆောင်ရွက်ရန် လိုအပ်ပါသည်။  

ယူကေနှင့် ထိုင်းနိုင်ငံတို့တွင် ဦးနှောက်အမြှေးရောင်ရောဂါ ဖြစ်ပွား 

ယူကေနှင့် ထိုင်းနိုင်ငံတို့တွင် ဦးနှောက်အမြှေးရောင်ရောဂါ ဖြစ်ပွား  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၄ ရက်။  ယူနိုက်တက်ကင်းဒမ်း …

  • March 24, 2026
အီရန်ရှိ လျှပ်စစ်ဓါတ်အားပေးစက်များ တိုက်ခိုက်မှု ခေတ္တရွှေ့ဆိုင်း   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၄ ရက်။   အမေရိကန်သမ္မတ ဒေါ်နယ်ထရန့်က အီရန်နိုင်ငံနှင့် ငြိမ်းချမ်းရေးဆွေးနွေးမှုများမှာ အပြုသဘောဆောင်သည့် တိုးတက်မှုများရှိနေသဖြင့် အီရန်လျှပ်စစ်ဓာတ်အားပေးစက်ရုံများအား တိုက်ခိုက်မည့်အစီအစဉ်ကို ၅ ရက် ရွှေ့ဆိုင်းလိုက်ကြောင်း ထုတ်ဖော်ပြောကြားခဲ့သည်။   အီရန်နိုင်ငံအနေဖြင့် ဟော်မုဇ်ရေလက်ကြားကို အာရှ အချိန် ယနေ့မွန်းလွဲပိုင်း နောက်ဆုံးထား၍ ပြန်လည်ဖွင့်လှစ်ပေးရန်၊ ပျက်ကွက်ပါက စစ်ရေးအရ တုံ့ပြန်မည်ဟူသော အမေရိကန်၏ ရာဇသံထုတ်ပြန်ပြီးနောက် ထွက်ပေါ်လာခြင်းဖြစ်သည်။   သို့သော် အီရန်အစိုးရပိုင်မီဒီယာများကမူ ဆွေးနွေးမှုများရှိနေခြင်းကို ငြင်းဆိုထားပြီး သမ္မတထရန့်သည် အီရန်၏တုံ့ပြန်မှုကို စိုးရိမ်သဖြင့် နောက်ဆုတ်သွားခြင်းဖြစ်သည်ဟု တုံ့ပြန်ရေးသားထားသည်။   အခြားတစ်ဖက်တွင်မူ အီရန်နိုင်ငံခြားရေးဝန်ကြီးဌာန အဆင့်မြင့်အရာရှိတစ်ဦးက အမေရိကန်ထံမှ ကမ်းလှမ်းချက်များကို ကြားခံနိုင်ငံများမှတစ်ဆင့် လက်ခံရရှိထားပြီး ယင်းအချက်အလက်များကို သုံးသပ်နေကြောင်း CBS သတင်းဌာနသို့ အတည်ပြုပြောကြားထားသည်။     လက်ရှိဖြစ်ပွားနေသော ၂၄ ရက်ကြာ စစ်ပွဲအတွင်း အမေရိကန်က အီရန်ပစ်မှတ်ပေါင်း ၉,၀၀၀ ကျော်ကို တိုက်ခိုက်ခဲ့ရာ ကလေးငယ် ၂၁၄ ဦး အပါအဝင် လူပေါင်း ၃,၂၀၀ ကျော် သေဆုံးခဲ့ကြောင်း လူ့အခွင့်အရေးအဖွဲ့များက ထုတ်ပြန်ထားသည်။   အီရန်နိုင်ငံကလည်း ဟော်မုဇ်ရေလက်ကြားအတွင်း ရေမိုင်းများ အမြောက်အမြား ချထားပြီးဖြစ်ကြောင်းနှင့် လျှပ်စစ်ဓာတ်အားပေးစက်ရုံများ တိုက်ခိုက်ခံရပါက ရေလက်ကြားကို လုံးဝပိတ်ပစ်မည်ဟု ခြိမ်းခြောက်ထားသည်။ #အီရန်စစ်ပွဲ #ဟော်မုဇ်ရေလက်ကြား

အီရန်ရှိ လျှပ်စစ်ဓါတ်အားပေးစက်များ တိုက်ခိုက်မှု ခေတ္တရွှေ့ဆိုင်း

အီရန်ရှိ လျှပ်စစ်ဓါတ်အားပေးစက်များ တိုက်ခိုက်မှု ခေတ္တရွှေ့ဆိုင်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၄ ရက်။  အမေရိကန်သမ္မတ ဒေါ်နယ…

  • March 24, 2026
မြန်မာဘက်ပို့မည့် ဒီဇယ် လီတာ ၂၀၀၀၀ မဲဆောက်တွင် ဖမ်းမိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၃ ရက်။   ထိုင်း-မြန်မာနယ်စပ်၊ မဲဆောက်မြို့တွင် မြန်မာနိုင်ငံဘက်ခြမ်းသို့ မှောင်ခိုလမ်းကြောင်းမှတစ်ဆင့် တရားမဝင် ပို့ဆောင်မည့် ဒီဇယ်ဆီလီတာ ၂၀၀၀၀ နှင့်အတူ ဆီသယ်ယာဉ်တစ်စီးကို ထိုင်းအာဏာပိုင်များက ဖမ်းဆီးရမိခဲ့သည်။   ပြီးခဲ့သည့် မတ်လ ၂၂ ရက်နေ့ မွန်းလွဲပိုင်းတွင် တာ့ခ်ခရိုင်မှ စစ်တပ်၊ ရဲနှင့် အကောက်ခွန်အရာရှိများ ပါဝင်သော ပူးပေါင်းစစ်ဆေးရေးအဖွဲ့သည် သတင်းပေးချက်အရ မဲဆောက်မြို့၊ ထာ့ဆိုင်လိုဝက်ဒေသရှိ သောင်ရင်းမြစ် ကမ်းဘေးတစ်လျှောက် ရှာဖွေစစ်ဆေးခဲ့ခြင်းဖြစ်သည်။   ထိုသို့ စစ်ဆေးစဉ် မြဝတီဘက်ခြမ်းရှိ ကာစီနိုရုံများနှင့် မျက်နှာချင်းဆိုင်၊ ဂျပန်ပစ္စည်းဟောင်းများ တင်ပို့သည့် “၁၃ ဂိတ်” ဝင်းအတွင်း ရပ်နားထားသော ဆယ်ဘီးတပ် ဆီသယ်ယာဉ်တစ်စီးကို တွေ့ရှိခဲ့ခြင်း ဖြစ်သည်။   အဆိုပါ ဆယ်ဘီးတပ်ယာဉ်ကို ဆီသယ်ယူနိုင်ရန် အထူးပြုပြင်ထားပြီး ယာဉ်ပေါ်တွင် ဒီဇယ်ဆီလီတာ ၂၀၀၀၀ (ဂါလံ ၂၀၀၀၀ ခန့်) ကို တင်ဆောင်ကာ မြန်မာနိုင်ငံသို့ မှောင်ခိုပို့ဆောင်ရန် ပြင်ဆင်နေစဉ် ဖမ်းဆီးရမိခဲ့ခြင်း ဖြစ်သည်။   အာဏာပိုင်များသည် ဆီတင်ကားမောင်းသူနှင့်အတူ မြန်မာနိုင်ငံသားတစ်ဦးကိုပါ ထိန်းသိမ်းခဲ့သည်ဟု ထိုင်းသတင်းဌာနများတွင် ဖော်ပြသည်။   ထို့ပြင် ဆီသယ်ကားနှင့် နီးစပ်ရာ ဂိုဒေါင်တစ်ခုအတွင်း ဝင်ရောက်ရှာဖွေရာတွင် ၄၅၀၀ လီတာဆံ့ သိုလှောင်ကန် နှစ်ခု (ဆီလီတာ ၃၀၀ ခန့် ကျန်ရှိ)၊ ၂၀၀ လီတာဆံ့ ဆီတိုင်ကီ ၁၀၁ လုံးနှင့် ၃၀ လီတာဆံ့ ဆီပုံး ၈၅ ပုံးတို့ကိုလည်း စစ်ဆေးတွေ့ရှိခဲ့သည်။   အဆိုပါ ပုံးများမှာ ဆီဖြည့်သွင်းပြီးပါက သောင်ရင်းမြစ်ကို ဖြတ်ကျော်၍ မှောင်ခိုတင်ပို့ မည့် ပစ္စည်းများ ဖြစ်မည်ဟု အာဏာပိုင်များက ယူဆထားသည်။   လက်ရှိတွင် တာ့ခ်ခရိုင်အတွင်းရှိ မြို့နယ် ၅ ခု၌ စက်သုံးဆီပြတ်လပ်မှုနှင့် ရင်ဆိုင်နေရပြီး ဒေသခံများမှာ ဆီဆိုင် များတွင် နာရီနှင့်ချီ တန်းစီဝယ်ယူနေရသည့် အခြေအနေဖြစ်နေသည်။   တစ်ဖက်ရှိ မြဝတီမြို့တွင်လည်း ဆီပြတ်လပ်နေမှုကြောင့် နယ်စပ်မှတစ်ဆင့် ဆီမှောင်ခိုတင်ပို့မှုများ မြင့်တက်လာနေခြင်း ဖြစ်သည်။   တာ့ခ်ခရိုင် အုပ်ချုပ်ရေးအဖွဲ့က စက်သုံးဆီမှောင်ခိုကူးမှုကို ပြတ်ပြတ်သားသား တားဆီးနှိမ်နင်းသွားမည်ဟု ထုတ်ပြန်ထားပြီး၊ ဖမ်းဆီးရမိသည့် ဆီသယ်ယာဉ်နှင့် လောင်စာဆီများကို သိမ်းဆည်းကာ ဥပဒေအရ အရေးယူ နိုင်ရန် မဲဆောက်ရဲစခန်းသို့ လွှဲပြောင်းပေးအပ်ထားကြောင်း ထိုင်းသတင်းများက ဆိုသည်။   #မြဝတီမဲဆောက် #စက်သုံးဆီမှောင်ခို

မြန်မာဘက်ပို့မည့် ဒီဇယ် လီတာ ၂၀၀၀၀ မဲဆောက်တွင် ဖမ်းမိ

မြန်မာဘက်ပို့မည့် ဒီဇယ် လီတာ ၂၀၀၀၀ မဲဆောက်တွင် ဖမ်းမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၃ ရက်။  ထိုင်း-မြန်မာနယ်စပ်၊ မဲဆောက်မြို…

  • March 24, 2026
ဗုံးကြဲမှုကြောင့် အရပ်သား ၈၀ ခန့် အစုအပြုံလိုက် သေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၃ ရက်။   စစ်ကိုင်းတိုင်းဒေသကြီးအတွင်းရှိ ကသာ၊ မြောင်နှင့် ကနီမြို့နယ်များတွင် စစ်ကော်မရှင်တပ်က တိုက်လေယာဉ် များအသုံးပြု၍ လူနေကျေးရွာများ၊ ဘုန်းကြီးကျောင်းများနှင့် စာသင်ကျောင်းများကို ပစ်မှတ်ထားကာ ဗုံးကြဲ တိုက်ခိုက်ခဲ့ခြင်းကြောင့် အရပ်သား ၈၀ ခန့် အစုလိုက်အပြုံလိုက် သေဆုံးခဲ့ရသည်။   ကသာမြို့တွင် သံဃာနှင့် အရပ်သား ၈၀ ခန့် အစုလိုက်အပြုံလိုက် သေဆုံးခဲ့ရသလို၊ မြောင်မြို့နယ်တွင် လည်း ရက်သားအရွယ် ကလေးငယ်တစ်ဦး သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။   ကသာမြို့ပေါ်ရှိ စစ်ဘေးရှောင်များ ခိုလှုံနေသည့် ရပ်ကွက် (၃) မဟာလေးထပ် ဘုန်းကြီးကျောင်းကို စစ်ကော်မရှင်က တိုက်လေယာဉ် ၅ စီးဖြင့် ပြီးခဲ့သည့် မတ်လ ၂၀ ရက်နေ့ နံနက် ၁၁ နာရီခွဲခန့်တွင် ဗုံးကြဲ တိုက်ခိုက်ခဲ့ခြင်း ဖြစ်သည်။   အဆိုပါ တိုက်ခိုက်မှုကြောင့် ကျောင်းတိုက်အတွင်း ခိုလှုံနေသည့် သံဃာတော်များနှင့် စစ်ဘေးရှောင် ၈၀ ခန့် သေဆုံးခဲ့ပြီး ၃၀ ကျော် ပြင်းထန်စွာ ဒဏ်ရာရရှိခဲ့သည်။   အခင်းဖြစ်ပွားရာတွင် ပါဝင်ခဲ့သည့် ဒေသခံတစ်ဦးက “ကျောင်းပေါ်ကို ဗုံးတွေတည့်တည့်ကျတာ။ မီးလောင်တဲ့ အထဲပါသွားတော့ ရုပ်တွေက မပေါ်တော့ဘူး။ ကိုယ့်မိသားစုဝင် အလောင်းကိုတောင် ရှာမရတော့လို့ ၇၀ ကျော် လောက်ကို ကျောင်းဝန်းထဲမှာတင် စုပြီး မြေမြှုပ်သင်္ဂြိုဟ်လိုက်ရတယ်။ အခုလည်း မြို့အဝင်အထွက်တွေ ပိတ်ထားတော့ ဒဏ်ရာရတဲ့သူတွေ ဆေးကုဖို့ သွေးနဲ့ ဆေးဝါးတွေ အရေးပေါ် လိုနေပါတယ်” ဟု ပြောသည်။   အလားတူ မတ်လ ၂၀ ရက်နေ့တွင်ပင် မြောင်မြို့နယ်၊ နဘက်စံပြကျေးရွာကို တံတားဦးလေတပ်မှ တက်လာ သည့် တိုက်လေယာဉ်တစ်စီးက ဗုံးကြဲတိုက်ခိုက်ခဲ့ရာ တစ်လမပြည့်သေးသည့် ရက်သားအရွယ် ကလေးငယ် တစ်ဦး နေရာတွင်ပင် သေဆုံးခဲ့ပြီး၊ အမျိုးသမီးတစ်ဦးလည်း ဒဏ်ရာဖြင့် ကွယ်လွန် သွားခဲ့သည်။   မြောင်မြို့နယ် ဒေသခံတစ်ဦးကလည်း မြေပြင်အခြေအနေနှင့် ပတ်သက်၍ “တိုက်ပွဲဖြစ်တာလည်း မရှိဘဲနဲ့ ရွာထဲကို လာကြဲတာ။ ရက်သားလေးကတော့ ဗုံးစမှန်ပြီး နေရာမှာတင် ဆုံးသွားရှာတယ်။ ဆီစက်နားလည်း ဗုံးကျတော့ အိမ်တွေလည်း မီးလောင်ကုန်ပြီ။ ရွာထဲမှာ ဘယ်သူမှ မနေရဲတော့ဘဲ အကုန်ပြေးနေကြရတယ်” ဟု ပြောသည်။   ထို့အပြင် မတ်လ ၂၁ ရက်နေ့ကလည်း ကနီမြို့နယ်၊ ဆူးလေကုန်းကျေးရွာရှိ ဘုန်းကြီးကျောင်းနှင့် စာသင်ကျောင်း များကို တိုက်လေယာဉ် ၈ စီးဖြင့် တပြိုင်နက် ဗုံးကြဲခဲ့ရာ ဘုန်းကြီးတစ်ပါးနှင့် လူနှစ်ဦး ထိခိုက် ဒဏ်ရာရရှိကာ အဆောက်အအုံများစွာ ပျက်စီးခဲ့သည်။   လက်ရှိတွင် ကသာမြို့အဝင်အထွက်များကို စစ်ကော်မရှင်က ပိတ်ဆို့ထားပြီး မြို့ခံများမှာ မြို့ထဲတွင် ပိတ်မိနေ ကြသည်။   တစ်ဖက်တွင် ပြည်သူ့လေကြောင်းခရီးစဉ်များမှာ လေယာဉ်ဆီပြတ်လပ်မှုကြောင့် ဖျက်သိမ်းနေရသော်လည်း၊ စစ်ကော်မရှင်သည် ရုရှားနှင့် အီရန်နိုင်ငံများမှ လေယာဉ်ဆီများကို တိုးမြှင့်တင်သွင်းကာ တော်လှန်ရေးနယ်မြေရှိ အရပ်သားများအပေါ် ဗုံးကြဲရန် အရှိန်အဟုန်မြှင့် အသုံးပြုနေကြောင်း Justice for Myanmar က ထောက်ပြ ထားသည်။   #စစ်ကိုင်းတိုင်း #ကသာလေကြောင်းတိုက်ခိုက် #မြောင်လေကြောင်းတိုက်ခိုက်မှု #ကနီလေကြောင်းတိုက်ခိုက်မှု  

ဗုံးကြဲမှုကြောင့် အရပ်သား ၈၀ ခန့် အစုအပြုံလိုက် သေဆုံး

ဗုံးကြဲမှုကြောင့် အရပ်သား ၈၀ ခန့် အစုအပြုံလိုက် သေဆုံး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၃ ရက်။  စစ်ကိုင်းတိုင်းဒေသကြီးအတွင်းရှ…

  • March 24, 2026
×Close