သတင်း

လန်ဆယ်တွင် စစ်တပ်၊ ပြည်သူ့ပူးပေါင်းအဖွဲ့နှင့် KIA ကြား တိုက်ပွဲများ ပြင်းထန်နေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   ကချင်ပြည်၊ ဆော့လော်မြို့နယ်ထဲက လန်ဆယ်မြို့တွင် စစ်ကော်မရှင်တပ်၊ ပြည်သူ့စစ်ပူးပေါင်းအဖွဲ့နှင့် ကချင်  လွတ်လပ်ရေး တပ်မတော် KIA တို့အကြား တိုက်ပွဲများ ပြင်းထန်နေသည်။   စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုခဲ့သောကြောင့် ကလေးများ အပါအဝင် အရပ်သားများ ထိမှန်သေဆုံးခဲ့သည်။   မြေပြင်သတင်းအရင်းအမြစ်က“ ၂၂ ရက်နေ့က လေယာဉ်နဲ့ ဗုံးကြဲတဲ့အချိန် သေတာရှိတယ် ဆိုတာ ဟုတ်ပါ တယ်။ ပြောရမယ်ဆိုရင် ဒီ လန်ဆယ်ဘက်ကို ဗုံးကြဲတာ ပြည်သူလူထုတွေကတော့ ကလေးအပါ သုံးယောက် ပေါ့ သေသွားတယ်။ အဆောက်အအုံတွေ ထိပြီး ပျက်စီးကုန်တာလည်းရှိပါတယ်” ဟု ပြောသည်။   KIA နှင့် ပူးပေါင်းအဖွဲ့က သိမ်းပိုက်ထားသော လန်ဆယ်မြို့ကို ပြန်ရရေးအတွက် စစ်တပ်နှင့် ဦးတန်ဂူးတန် ဦးဆောင်သည့် ပြည်သူ့စစ် ပူးပေါင်းအဖွဲ့က စက်တင်ဘာလ ၁၉ ရက်နေ့က စတင်၍ ထိုးစစ်ဆင်လာခြင်း ဖြစ်သည်။   ခေါင်းလန်ဖူးဘက်မှ ထိုးစစ်ဆင်လာခြင်းဖြစ်ပြီး လန်ဆယ်မြို့သို့ မရောက်ခင် လာဟီဆင်ကျေးရွာ အနီးဝန်းကျင် ၌ နှစ်ဖက်ကြား တိုက်ပွဲများ ဖြစ်ပွားခဲ့သည်ဟု မြေပြင်သတင်းအရင်းအမြစ်က ပြောသည်။   စက်တင်ဘာလ ၂၂ ရက်နေ့က လန်ဆယ်မြို့ကို စစ်တပ်က လေကြောင်းမှ ဗုံးကြဲ တိုက်ခိုက်ခဲ့ရာ ကလေးများ အပါအဝင် ပြည်သူ ၃ ဦး ထိမှန် သေဆုံးခဲ့သည်။   စက်တင်ဘာလ ၂၃ ရက်နေ့အထိ နှစ်ဖက်ကြားတိုက်ပွဲများ ဆက်လက်ဖြစ်ပွားနေသည်ဟု မြေပြင် သတင်းအရင်းအမြစ်များက အတည်ပြုပြောဆိုသည်။

လန်ဆယ်တွင် စစ်တပ်၊ ပြည်သူ့ပူးပေါင်းအဖွဲ့နှင့် KIA ကြား တိုက်ပွဲများ ပြင်းထန်နေ

လန်ဆယ်တွင် စစ်တပ်၊ ပြည်သူ့ပူးပေါင်းအဖွဲ့နှင့် KIA ကြား တိုက်ပွဲများ ပြင်းထန်နေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂၃ ရက်။ ကချင်ပြည…

  • September 23, 2025
လွိုင်ကော် - ဒီးမော့ဆို - ဖရူဆို - ဘောလခဲ လမ်းကြီးကို ကရင်နီတပ်ပေါင်းစုက သွားလာခွင့် ပိတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   ကရင်နီပြည်ထဲက လွိုင်ကော် - ဒီးမော့ဆို - ဖရူဆို - ဘောလခဲ လမ်းမကြီးကို ကရင်နီ အမျိုးသားများ ကာကွယ် ရေးတပ် - KNDF က သွားလာခွင့် ပိတ်လိုက်သည်။   မြေပြင်က စစ်ရေး အခြေအနေများကြောင့် အဆိုပါ လမ်းမကြီးကို ဖြတ်သန်း သွားလာခွင့် ပိတ်လိုက်ရခြင်း ဖြစ်သည်ဟု KNDF က ထုတ်ပြန်သည်။   “လွိုင်ကော် - ဒီးမော့ဆို - ဖရူဆို - ဘောလခဲ လမ်းမကြီးအား မြေပြင်စစ်ရေး အခြေအနေအရ စက်တင်ဘာလ (၂၃) ရက်နေ့မှစ၍ အသုံးပြု၍ ဖြတ်သန်းသွားလာခြင်း မပြုလုပ်ကြရန် အများပြည်သူများအား အသိပေး အပ်ပါသည်” ဟု ထုတ်ပြန်ထားသည်။ စက်တင်ဘာလ ၂၃ ရက်နေ့မှ စတင်၍ အဆိုပါ လမ်းမကြီးအား ဖြတ်သန်းသွားလာခြင်းမျိုး မလုပ်ကြရန် အများပြည်သူကို အသိပေးအပ်သည်ဟု ထုတ်ပြန်သည်။   ထို့အပြင် သြဂုတ်လက စတင်၍ ဒီးမော့ဆို - ဖရူဆိုကြား လမ်းမကြီးတလျှောက် ထိုးစစ်ဆင်လာသော စစ်ကော်မရှင်တပ်နှင့် ကရင်နီ တော်လှန်ရေး ပူးပေါင်းအဖွဲ့တို့ကြား မြေပြင်၌ ယနေ့ချိန်ထိ တိုက်ပွဲများ ဆက်ဖြစ်နေသည်။   ပြီးခဲ့သည့်ပတ်ကလည်း ဖရူဆိုမြို့ကို စစ်ကော်မရှင်၏ စစ်ယာဉ်တန်း ရောက်လာခဲ့ပြီး ရိက္ခာ၊ ခဲယမ်း၊ လူအင်အားများ ဖြည့်တင်းထားသည်ဟု မြေပြင် သတင်းအရင်းအမြစ်က ဆိုသည်။   အလားတူ စက်တင်ဘာလ ၂၀ ရက်နေ့ကစတင်ပြီး  ဘောလခဲ လမ်းမကြီးဖက်ကိုလည်း စစ်ကော်မရှင်တပ်က ဦးတည် စစ်ရေးလှုပ်ရှားမှုများ ရှိလာနေသည်ဟု KNDF က ဆိုသည်။   ထို့ကြောင့် ဘောလခဲလမ်းမကြီး ဘက်၌လည်း နှစ်ဖက်ကြား တိုက်ပွဲများ ဖြစ်နေသည့်အတွက် ပြည်သူများ အနေဖြင့် စစ်ရေး သတိရှိကြရန် KNDF က အသိပေး ထုတ်ပြန်ထားသည်။

လွိုင်ကော် – ဒီးမော့ဆို – ဖရူဆို – ဘောလခဲ လမ်းမကြီးကို ကရင်နီတပ်ပေါင်းစုက သွားလာခွင့် ပိတ်

လွိုင်ကော် - ဒီးမော့ဆို - ဖရူဆို - ဘောလခဲ လမ်းမကြီးကို ကရင်နီတပ်ပေါင်းစုက သွားလာခွင့် ပိတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂၃ ရက်။…

  • September 23, 2025
လေကြောင်း၊ ဒရုန်း၊ လက်နက်ကြီး ပစ်ကူများကြားမှ ဗန်းမောက်မြို့ကို တော်လှန်ရေးပူးပေါင်းအဖွဲ့ သိမ်းပိုက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   လေကြောင်း၊ ဒရုန်း၊ လက်နက်ကြီး ပစ်ကူများ ကြားမှ စစ်ကိုင်းနှင့် ကချင်အစပ်ဒေသရှိ၊ ကသာခရိုင်ထဲက ဗန်းမောက်မြို့ကို တော်လှန်ရေး ပူးပေါင်းအဖွဲ့က သိမ်းလိုက်ပြီဟု အမှတ် ၁ စစ်ဒေသက ပြောသည်။   ဗန်းမောက်မြို့ကို စက်တင်ဘာလ ၁၅ ရက်နေ့တွင် ထိုးစစ်ဆင်တိုက်ခိုက်ခဲ့ခြင်း ဖြစ်ပြီး ၅ ရက်အကြာ စက်တင် ဘာလ ၂၀ ရက်နေ့တွင် သိမ်းနိုင်ခဲ့ခြင်း ဖြစ်သည်ဟု ထုတ်ပြန်ချက်က ဆိုသည်။   ဗန်းမောက်တိုက်ပွဲတွင် စစ်ကော်မရှင်တပ်နှင့် ရှမ်းနီတပ်မတော် (SNA) တို့က ပေါင်းပြီး တိုက်ခိုက်ခဲ့ခြင်း ဖြစ်သည်။ စက်တင်ဘာလ ၂၀ ရက်နေ့ ညနေပိုင်းမှာ SNA တပ်ဖွဲ့ဝင်များက ဗန်းမောက်မြို့ထဲမှ ဆုတ်ခွာသွား သည်ဟု မြေပြင် သတင်းအရင်းအမြစ်က ပြောသည်။   “ဗန်းမောက်က သူတို့ဘက်က ဆုတ်သွားတယ်။ မြို့ကိုပေးလိုက်တယ်ပေါ့ဗျာ။ စစ်တပ်နဲ့ ရှမ်းနီအဖွဲ့တွေက ဗန်းမောက် အနောက်ဘက်မှာ ရှိနေတုန်းပဲ။ အနောက်ခြမ်းမှာ ရှိတုန်းပဲ။ အဲ့ဒီဒေသ ရွှေနဲ့ သစ် အဓိကလုပ်ကြ တော့ သူတို့က အဲ့ဒီဒေသထဲကနေတော့ လုံးဝထွက်သွားတာမျိုးမဟုတ်ဘူး။ ရှိနေကြတုန်းပဲ” ဟု မြေပြင် သတင်းအရင်းအမြစ်က ပြောသည်။   ဗန်းမောက်မြို့ကို လက်လွှတ်လိုက်ရသည့် စစ်ကော်မရှင်တပ်နှင့် ရှမ်းနီတပ် SNA ပူးပေါင်းအဖွဲ့တို့က လက်ရှိတွင် ဗန်းမောက်မြို့ဝန်းကျင်က ရွှေချောင်း၊ ပင်းဟင်းခါးနှင့် သာယာကုန်းကျေးရွာတို့တွင် ထိုင်ထားသည်ဟု ဆိုသည်။   အလားတူ ဗန်းမောက်မြို့ မြောက်ဘက်ခြမ်းက မံကုန်းနှင့် အနောက်တောကျေးရွာတွင်လည်း ဆက်ရှိနေသည်သေးဟု အမှတ် ၁ စစ်ဒေသက ထုတ်ပြန်ထားသည်။   မြေပြင် သတင်းအရင်းအမြစ်က “အခြေအနေကတော့ ဆက်စောင့်ကြည့်ရမယ့် အခြေအနေဖြစ်တယ်ဗျ။ သူတို့ရဲ့ လုပ်ငန်းတွေက ရှိနေတော့ မြို့ကိုပဲ လက်လွှတ်လိုက်တာ မြို့ပတ်ပတ်လည်မှာက သူတို့ရှိတုန်းပဲ။ တိုက်ပွဲတွေက ဆက်ပြီး ရှိအုံးမယ့် အနေအထားဆိုတာ အတိအကျပြောလို့ရတယ်။ လွယ်လွယ်နဲ့တော့ ဒီလူတွေက ဗန်းမောက်ဒေသကို လက်လွှတ်မှာ မဟုတ်ဘူးဗျ။ သူတို့စီးပွားရေးရှိတယ်လေဗျာ” ဟု ဆက် ပြော သည်။   ဗန်းမောက်မြို့သိမ်း တိုက်ပွဲထဲ စစ်တပ်က လေကြောင်းမှ ဗုံးကြဲတိုက်ခိုက်မှု ၁၀ ကြိမ်လုပ်ခဲ့သည့်အပြင် လက်နက်ကြီး၊ ဒရုန်းများနှင့်လည်း ဆက်တိုက် ပစ်ကူခဲ့သည်ဟု ဆိုသည်။   အဆိုပါ မြို့သိမ်း တိုက်ပွဲထဲ ရှမ်းနီတပ် SNA က ဗိုလ် ၁ ဦး အပါအဝင် အလောင်း ၇ လောင်းကို ရခဲ့သည်ဟု အမှတ် ၁ စစ်ဒေသ၏ ထုတ်ပြန်ချက်အရ သိရသည်။   အလားတူ တော်လှန်ရေး တပ်ဖွဲ့များဘက်ကလည်း ၆ ဦး ကျဆုံးခဲ့သည်ဟု မြေပြင် သတင်းအရင်းအမြစ်က ပြောသည်။

လေကြောင်း၊ ဒရုန်း၊ လက်နက်ကြီး ပစ်ကူများကြားမှ ဗန်းမောက်မြို့ကို တော်လှန်ရေးပူးပေါင်းအဖွဲ့ သိမ်းပိုက်

လေကြောင်း၊ ဒရုန်း၊ လက်နက်ကြီး ပစ်ကူများကြားမှ ဗန်းမောက်မြို့ကို တော်လှန်ရေးပူးပေါင်းအဖွဲ့ သိမ်းပိုက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘ…

  • September 23, 2025
စစ်ကော်ရှင်နှင့် ပူးပေါင်းနေသည့် ကသည်းလက်နက်ကိုင်အဖွဲ့ တိုက်ခိုက်ခံရ၊ သေဆုံးမှုများ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   စစ်ကိုင်းတိုင်း၊ ကလေးမြို့နယ်ထဲ၌ မြန်မာစစ်တပ်နှင့် ပေါင်းနေသော အိန္ဒိယနိုင်ငံဘက်က ကသည်းလက်နက် ကိုင် တပ်ဖွဲ့ တိုက်ခိုက်ခံရပြီး သေဆုံးမှုများခဲ့သည်ဟု အမှတ် ၁ စစ်ဒေသက ထုတ်ပြန်သည်။   ကလေးမြို့နယ်ထဲက နန်းဟန်နွဲ့ကျေးရွာတွင် တပ်စွဲထားသည့် မြန်မာစစ်တပ်နှင့် ပေါင်းနေသော အိန္ဒိယနိုင်ငံက ကသည်း လက်နက်ကိုင်အဖွဲ့ကို ပြည်သူ့ကာကွယ်ရေးတပ် (PDF) ၏ ကလေးခရိုင် အခြေစိုက် အမှတ် ၄ တပ်ရင်းက ဒရုန်းဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။   “ကလေးခရိုင် အမှတ် ၄ တပ်ရင်းမှ စက်တင်ဘာလ ၁၅ ရက်တွင် ဒရုန်းဖြင့် ဗုံးကြဲချ တိုက်ခိုက်ခဲ့သည်။ မိမိတို့ ဘက်မှ ဗုံးကြဲချ တိုက်ခိုက်သဖြင့် စစ်ကော်မရှင် ဗိုလ်တစ်ဦး ဦးစီးသည့် ကသည်းလက်နက်ကိုင် တပ်စိတ် (၁) စိတ် သေဆုံးခဲ့သည့်အပြင် စစ်ကော်မရှင် ဗိုလ်မှူးတစ်ဦး ထိခိုက်ဒဏ်ရာရခဲ့သည်” ဟု ထုတ်ပြန်ထားသည်။   တိုက်ခိုက်ခံရမှုထဲ ကသည်းလက်နက်ကိုင်အဖွဲ့က တပ်စိတ်တစ်စိတ် (၁၀ ဦးဝန်းကျင်) သေဆုံးခဲ့သည်ဟု အမှတ် ၁ စစ်ဒေသက စက်တင်ဘာလ ၂၃ ရက်နေ့တွင် သတင်းထုတ်ပြန်ထားသည်။   အဆိုပါ တိုက်ခိုက်မှုကို စက်တင်ဘာလ ၁၅ ရက်နေ့ တွင် လုပ်ဆောင်ခဲ့ခြင်း ဖြစ်သည်ဟု ဆိုသည်။   မြန်မာစစ်တပ်နှင့် ပူးပေါင်းထားသော ကသည်းလက်နက်ကိုင်တပ်မှာ အင်အား ၆၀ ဝန်းကျင် ရှိနေပြီး စက်တင် ဘာလ ပထမပတ်ကတည်းက ကလေးမြို့နယ်ထဲ စစ်ကြောင်းထိုး ဝင်လာခြင်း ဖြစ်သည်ဟု အမှတ် ၁ စစ်ဒေသ က ပြောသည်။   ထို့အပြင် ကသည်းလက်နက်ကိုင်တပ်ဖွဲ့က ဗိုလ်ကြီး တစ်ဦး ဦးစီးသော တပ်ဖွဲ့က အင်အား ၃၀ ခန့်မှာလည်း ကလေးမြို့ရှိ အမှတ် (၁၀) တပ်မတော်တန်းမြင့် လေ့ကျင့်ရေးကျောင်း၌ အရာရှိသင်တန်း တက်နေကြသည်ဟု ဆိုသည်။   ကသည်းလက်နက်ကိုင်တပ်ဖွဲ့မှာ စစ်တပ်က အာဏာသိမ်းပြီးနောက် ၂၀၂၁ ခုနှစ်က စပြီး တမူးခရိုင်ထဲက တမူး မြို့နယ်နှင့် ခန္တီးခရိုင်ထဲက ဟုမ္မလင်းမြို့နယ်တို့တွင် စစ်ကော်မရှင်တပ်နှင့် ပူးပေါင်းကာ တော်လှန်ရေးတပ်ဖွဲ့များ ကို မကြာခဏ တိုက်ခိုက်နေသည်ဟု မြေပြင် သတင်းအရင်းအမြစ်များက ပြောသည်။   တမူးခရိုင်အတွင်း% ကသည်းလက်နက်ကိုင် တပ်ဖွဲ့များမှာ ပူးပေါင်းအင်အား (၅၀၀) ကျော်ခန့် ရှိသည်ဟု အမှတ် ၁ စစ်ဒေသ၏ ထုတ်ပြန်ချက်အရ သိရသည်။   အဆိုပါ ကသည်းလက်နက်ကိုင်အဖွဲ့မှာ စစ်ကိုင်းတိုင်း၊ တမူးခရိုင်ထဲက ဟဲဇင်းကျေးရွာအတွင်း ဝင်ရောက် နေထိုင်နေသည်မှာ ၁၀ စုနှစ် တစ်စုကျော်ရှိလာပြီ ဖြစ်ပြီး လက်နက်နှင့် မူးယစ်ဆေးဝါးများ ရောင်းဝယ်မှုများ လုပ်သည်ဟု မြေပြင် သတင်းအရင်းအမြစ်များက ဆိုသည်။

စစ်ကော်ရှင်နှင့် ပူးပေါင်းနေသည့် ကသည်းလက်နက်ကိုင်အဖွဲ့ တိုက်ခိုက်ခံရ၊ သေဆုံးမှုများ

စစ်ကော်ရှင်နှင့် ပူးပေါင်းနေသည့် ကသည်းလက်နက်ကိုင်အဖွဲ့ တိုက်ခိုက်ခံရ၊ သေဆုံးမှုများ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂၃ ရက်။ စစ်…

  • September 23, 2025
ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   ကချင်ပြည် ဗန်းမော်၊ ဝိုင်းမော်နှင့် ဖားကန့်တို့တွင် စစ်ရေးတင်းမာမှုများနှင့်အတူ တိုက်ပွဲများ ဆက်လက် ဖြစ်ပွား နေပြီး စစ်ကော်မရှင်တပ်က တပ်အင်အားတိုးချဲ့ဖြည့်တင်းမှုများ လုပ်ဆောင်နေသည်ဟု ကချင်လွတ်လပ်ရေး အဖွဲ့ KIO/KIA က ပြောသည်။   ရွေးကောက်ပွဲမတိုင်ခင် ရှုံးဆုံးသွားသည့် နယ်မြေများအား ပြန်လည်ထိန်းချုပ်နိုင်ရေး ဗန်းမော်၊ ဝိုင်းမော်နှင့် ဖားကန့်ဒေသတို့ကို စစ်ကော်မရှင်က ပြင်းပြင်းထန်ထန် ထိုးစစ်ဆင် တိုက်ခိုက်နေသည်ဟု KIO ပြောရေးဆိုခွင့် ရှိသူ ဗိုလ်မှူးကြီးနော်ဘူက ပြောသည်။   “ကချင်ပြည်နယ်ရဲ့ စစ်ရေးအခြေအနေကတော့ ဗန်းမော်ဘက်က ခါတိုင်းပြောသလိုပေါ့ အမြဲတမ်း တိုက်ပွဲတွေ ရှိပါတယ်။ နောက်ဝိုင်းမော်ဘက်မှာ တိုက်ပွဲရှိပါတယ်။ ဖားကန့်ဘက်မှာ တိုက်ပွဲတွေ ရှိပါတယ်။ အဲဒီ ၃ နေရာ ကတော့ လောလောဆယ် ကချင်ပြည်နယ်မှာ တိုက်ပွဲအခြေအနေတွေ စစ်ရေးအခြေအနေကတော့ တင်းမာတဲ့ အနေအထား ဖြစ်ပါတယ်။ အခု လောလောဆယ်ကတော့ သူတို့လည်း ဒီဇင်ဘာလမှာ ရွေးကောက်ပွဲလုပ်မယ်လို့ အားလုံးအသိ ဖြစ်ပါတယ်။ ရွေးကောက်ပွဲမရောက်ခင်မှာ သူတို့ ကချင်ပြည်နယ် တော်တော်များများမှာ သူတို့ က မဲပုံးတွေထောင်နိုင်ဖို့ မဲရုံတွေထောင်နိုင်ဖို့ စစ်ရေးကနေ တော်တော်ကြိုးစားတဲ့ဟာမျိုး ကြိုးစားတာလို့ ကျနော် သုံးသပ်မိပါတယ်။”   တိုက်ပွဲဖြစ်ပွားနေသည့် မြို့နယ် ၃ မြို့နယ်ထဲ စစ်ကော်မရှင်တပ်က တပ်အင်အား ဖြည့်တင်းထားသည်ဟု ဗိုလ်မှူးကြီးနော်ဘူက ဆက်ပြောသည်။   “ဗန်းမော်ဘက်မှာကတော့ သူတို့ရဲ့ ၈ လပိုင်းမှာ သင်္ဘောဝင်တဲ့ အဲဒီနောက်ပိုင်းမှာ သင်္ဘောမှာ စစ်အင်အားတွေ လက်နက်အင်အားတွေ ဖြည့်ထားတယ်။ အဲဒါကြောင့် သူတို့က စစ်ဆင်ရေးတွေလည်း တော်တော် ပြင်းပြင်း ထန်ထန် သူတို့လှုပ်ရှားတာတွေ့ရပါတယ်။ ကျန်တဲ့ ဖားကန့်တို့ ဝိုင်းမော်တို့မှာကတော့ မပခ အင်အားတွေပဲ ဖြစ်မှာ။ အပြင်ကနေ စစ်အင်အားတွေ ဝင်လာတာကတော့ မကြားရသေးပါဘူး။”   ဖားကန့်မြို့နယ်ထဲကို ကာမိုင်းဘက်မှ ဝင်လာသည့် စစ်ကော်မရှင် စစ်ကြောင်းမှာ ဖားကန့်ကို ဝင်ရောက်သွားပြီ ဟု ဗိုလ်မှူးကြီးနော်ဘူက ပြောသည်။   ဖားကန့်ကို ဝင်ရောက်ရာ၌ လက်နက်ကြီးများ၊ ဒရုန်းများဖြင့် လူနေရပ်ရွာများထဲ ပစ်ခတ်ခဲ့သည့်အတွက် အရပ် သား ပြည်သူ သေဆုံးမှုများ ရှိခဲ့သည်။   ထို့အပြင် ဗန်းမော်ဘက်တွင် နှစ်ဖက်ကြား စစ်ရေးတင်းမာမှုများနှင့် အတူ စစ်ကော်မရှင်တပ်က လက်နက်ကြီး ဖြင့် ပစ်ခတ်မှုများကို ဆက်တိုက် လုပ်ဆောင်နေသည်ဟု ဆိုသည်။   ဗန်းမော်မြို့က နေရာအချို့ကိုလည်း စစ်ကော်မရှင်တပ်က စက်တင်ဘာလ ဒုတိယပတ်မှစတင်၍ ပြန်လည် ထိန်း ချုပ်နိုင်ပြီ ဖြစ်သည်ဟု KIO ပြောခွင့်ရက ဆိုသည်။ ပြောဆိုပါတယ်။   ဗိုလ်မှူးကြီး နော်ဘူ က “သူတို့ကတော့ ထိန်းချုပ်နိုင်တယ်လို့တော့ ပြောတယ်။ ဒါပေမဲ့ အပြီးအပိုင်ပေါ့နော အားလုံး သူတို့ ထိန်းချုပ်တဲ့အနေအထားတော့ မရှိပါဘူး။ ကျနော်တို့ KIA နဲ့ ပူးပေါင်းတပ်တွေလည်း မြို့တွင်း မှာလည်း နဂိုအတိုင်း ရှိပါတယ်။ နောက် သူတို့ရဲ့တပ်စခန်းတွေ သူတို့ရဲ့ တပ်ရင်းဌာနချုပ် ပတ်ဝန်းကျင်မှာ လည်း ကျနော်တို့လည်း နေရာယူထားတာရှိပါတယ်။ ဆိုတော့ သူတို့လည်း ရှိတယ်။ ကျနော်တို့လည်း ရှိတာ ပေါ့။ အချင်းချင်း စောင့်ကြည့်တဲ့ အနေအထား ဖြစ်ပါတယ်ခင်ဗျာ” ဟု ပြောသည်။   စစ်ကော်မရှင်တပ်က စက်တင်ဘာလ ၁၁ ရက်နေ့တွင် ဗန်းမော် သံချပ်ကာကားတပ်ရင်းနှင့် ခလရ ၂၃၆ ကို ပြန်လည်ထိန်းချုပ်ထားပြီဟု ဗိုလ်မှူးကြီးနော်ဘူက ပြောသည်။   စစ်ကော်မရှင်တပ်က ကချင်ပြည်အပြင် တစ်နိုင်ငံလုံးအတိုင်းအတာဖြင့် ၎င်းတို့ ရှုံးဆုံးထားရသည့် နယ်မြေများ ကို ရွေးကောက်ပွဲ မတိုင်မီ ပြန်လည်ရယူနိုင်ရေး ပြင်းပြင်းထန်ထန် ထိုးစစ်ဆင် တိုက်ခိုက်နေခြင်း ဖြစ်သည်။   ပြန်လည်ရယူဖို့ ကြိုးစားနေသည့် နယ်မြေများ၌ ရွေးကောက်ပွဲ ပြုလုပ်နိုင်ရေး ရည်ရွယ်ချက်ဖြင့် ယခုကဲ့သို့ အင်အား အလုံးအရင်းဖြင့် ထိုးစစ်ဆင် တိုက်ခိုက်နေခြင်း ဖြစ်သည်ဟု တော်လှန်ရေး အင်အားစုများက ပြော သည်။   #ကချင် #ဗန်းမော် #ဖားကန့် #ဝိုင်းမော် #စစ်ကော်မရှင်

ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့

ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂၃ ရက်။  ကချင်ပြည် ဗန်းမော်၊ ဝိုင်…

  • September 23, 2025
စစ်ကော်မရှင်တပ်က အရပ်သားများ၊ ဘာသာရေး အဆောက်အဦများ၊ ဘုရားကျောင်းများအား ပစ်မှတ်ထား၊ စစ်ရာဇဝတ်မှုများကျူးလွန်နေဟု IEC ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   စစ်ကော်မရှင်တပ်က ကရင်နီပြည် အပါအဝင် နိုင်ငံတစ်ဝှမ်း၌ လူထုရပ်ရွာများထဲ အပြင် ဘာသာရေး အဆောက် အအုံများ၊ ဘုရားကျောင်းများကို ရည်ရွယ်ချက်ရှိရှိ ပစ်မှတ်ထား တိုက်ခိုက်နေခြင်းမှာ စစ်ရာဇဝတ်မှုကို ကျူး လွန်ခြင်း ဖြစ်သည်ဟု ကရင်နီပြည်သူများနှင့် ကရင်နီ ကြားကာလ အုပ်ချုပ်ရေးကောင်စီ IEC က ပြောသည်။   စစ်ကော်မရှင်တပ်က ကရင်နီပြည်၊ ဒီးမော့ဆိုမြို့နယ်ထဲက တနန်းဥကွိုင်ကျေးရွာရှိ ခရစ်ယာန် ဘုရားကျောင်းကို လေကြောင်းမှ ဗုံးကြဲတိုက်ခိုက်ခဲ့သည်။   နှစ်ဖက်ကြား ထိတွေ့တိုက်ပွဲ ဖြစ်ပွားခြင်းမျိုး မရှိဘဲ တနန်းဥကွိုင်ကျေးရွာထဲကို စက်တင်ဘာလ ၁၇ ရက်နေ့၊ နံနက် ၁၀ နာရီကျော်အချိန်ခန့်တွင် လေကြောင်းမှ ဗုံးကြဲခဲ့သောကြောင့် ဘုရားကျောင်း ပျက်စီးသွားသည်ဟု ဒေသခံများက ပြောသည်။   စစ်ကော်မရှင်တပ်က ယခုကဲ့သို့ ဘာသာရေး အဆောက်အအုံများကို ရည်ရွယ်ချက်ရှိရှိ ပစ်မှတ်ထားပြီး ဗုံးကြဲ တိုက်ခိုက်နေခြင်းက စစ်ရာဇဝတ်မှုမြောက်သည်ဟု IEC အတွင်းရေးမှူး ၂ ဦးဗညားက ပြောသည်။   “စစ်ရာဇဝတ်မှု မြောက်တယ်ပေါ့နော်။ ဒါကသေချာတာတစ်ခုကတော့ တပ်ပိုင်းဆိုင်ရာပုဂ္ဂိုလ်တွေက သူတို့ ပစ်မှတ်ထားတဲ့နေရာမှာ ဘာသာရေး အဆောက်အအုံတွေကို မထိရဘူးဆိုတာပါတယ်နော်။ နောက်ဆုံးရှင်းရှင်း ပြောရရင် တချို့အဆောက်အအုံတွေတောင်မှ ပစ်ခတ်ဖို့ဆိုရင်တောင်မှ တိကျတဲ့ ပစ်မှတ်ပဲပြောရမယ်ပေါ့နော်။ ဘာမှတိုက်ပွဲလည်း မရှိဘူး။ လူလည်းမနေ စစ်ရေးပစ်မှတ်အဖြစ် ပြန်သုံးတာလည်း မဟုတ်တဲ့ အဆောက်အအုံ ကို ပစ်ခတ်တိုက်ခိုက်ခြင်းက လူထု အများပိုင် အဆောက်အအုံကို ဖျက်ဆီးခြင်းဟာ စစ်ရာဇဝတ်မှု မြောက် တယ်လို့ ပြောလို့ရတယ်ပေါ့နော်။”   စစ်တပ်က အာဏာသိမ်းပြီး ချိန်မှစတင်ပြီး ယခုနှစ် ဩဂုတ်လအထိ ကရင်နီပြည်နှင့် ကယန်းဒေသအတွင်းရှိ ဘာသာရေး အဆောက်အအုံပေါင်း ၅၈ လုံးပျက်စီးခဲ့သည်ဟု တိုးတက်သော ကရင်နီပြည်သူ့အင်အားစု - PKPF အဖွဲ့က စက်တင်ဘာလ ၁ ရက်နေ့တွင် ထုတ်ပြန်ထားသည်။   တနန်းဥကွိုင်ရွာခံ အမျိုးသမီးတစ်ဦးက “အဲ့ဒီဘုရားကျောင်းက ကိုယ်တွေအတွက်ဆိုရင် အမှတ်တရများစွာ ရှိတဲ့နေရာ၊ ပြီးတော့ ပြောရရင် လူငယ်ပဲဖြစ်ဖြစ် လူကြီးပဲဖြစ်ဖြစ် ရွာသားတွေ ဆုံဆည်းရာဆိုလည်း မမှားဘူး ပေါ့နော်။ ဘုရားဝတ်ပြုကြတယ်။ ကိုယ်ဆိုလည်း ငယ်ငယ်ကနေ ဒီစစ်ပြေးမတိုင်ခင်အထိ အဲ့ဒီဘုရားကျောင်း ကိုပဲ အမှီပြုပြီး နေလာခဲ့ရသလို ဘုရားကျောင်းမှာလည်း ဘုရားရဲ့ နှုတ်ကပတ်တော်ကို နားထောင်ရင်းနဲ့ ကြီး ပြင်းလာခဲ့ရတယ်။ ဆိုတော့ ပိုပြီးတော့ ဒါဝမ်းနည်းစရာ ဖြစ်တယ်ပေါ့နော်“ ဟု ပြောသည်။   တနန်းဥကွိုင်ကျေးရွာမှာ စစ်ကော်မရှင်တပ်နှင့် ကရင်နီတော်လှန်ရေး ပူးပေါင်းအဖွဲ့တို့ ကြား ထိတွေ့တိုက်ပွဲများ ဖြစ်ပွားနေသည့် နေရာနှင့် နီးသည်ဟု ဆိုသည်။   သို့သော်လည်း အဆိုပါ တနန်းဥကွိုင်ကျေးရွာထဲ၌ နှစ်ဖက်ကြား တိုက်ပွဲများ ဖြစ်ပွားခြင်းမျိုး မရှိခဲ့ဘူးဟု ရွာသားများက ပြောသည်။   အနီးအနားရှိ အခြားကျေးရွာများတွင် တိုက်ပွဲများ ဖြစ်ပွားနေခြင်းကြောင့် ရွာသားများမှာမူ ကျေးရွာထဲ၌ အမြဲ မနေကြဘူးဆိုသည်။ ထို့ကြောင့် လေယာဉ် ဗုံးကြဲခံရချိန်၌ ဘုရားကျောင်းသာ ပျက်စီးသွားပြီး လူထုမှာမူ ထိခိုက် ခြင်းမျိုး မရှိခဲ့ပေ။   ဘာသာရေးဆိုင်ရာ အဆောက်အအုံများမှာ သက်ဆိုင်ရာ ဘာသာဝင်များ၏ အထွဋ်အမြတ်ထားသည့် နေရာ ဖြစ်ပြီး စုပေါင်းအလှူငွေများဖြင့် ဆောက်လုပ်ထားခြင်း ဖြစ်၍ ဒေသခံပြည်သူ ရွာသားများ၏ စည်းလုံးညီညွတ်မှု ကို ပြသသည့် နေရာလည်း ဖြစ်သည်ဟု ဆိုကြသည်။   ထို့အပြင် ဘာသာဝင်များအတွက် ငြိမ်းချမ်းမှု၊ အချင်းချင်းကြား ဝိညာဉ်ရေးပိုင်းဆိုင်ရာ တည်ဆောက်ရာ၊ ခွန် အားယူရာ နေရာ၊ ဗိမာန်တော် ဖြစ်သောကြောင့် ယခုကဲ့သို့ ပျက်စီးသွားသည့် အပေါ် ရွာသားများက စိတ်မကောင်း ဖြစ်နေကြသည်။   #IEC #Karenni #တနန်းဥကွိုင်ကျေးရွာ #PKPF #စစ်ရာဇဝတ်မှု

စစ်ကော်မရှင်တပ်က အရပ်သားများ၊ ဘာသာရေး အဆောက်အဦများ၊ ဘုရားကျောင်းများအား ပစ်မှတ်ထား၊ စစ်ရာဇဝတ်မှုများကျူးလွန်နေဟု IEC ပြော

စစ်ကော်မရှင်တပ်က အရပ်သားများ၊ ဘာသာရေး အဆောက်အဦများ၊ ဘုရားကျောင်းများအား ပစ်မှတ်ထား၊ စစ်ရာဇဝတ်မှုများကျူးလွန်နေဟု IEC ပြော သတင်းနှင့် မီဒီယာ ကွန်ရက်…

  • September 23, 2025
ရပ်ကျေးတာဝန်ခံ ပြောင်းလဲရန် ပြည်သူများ ဆန္ဒပြ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   လောင်းလုံးမြို့နယ်ထဲတွင် ဒေသခံ ရွာသားများက ရပ်ကျေးတာဝန်ခံ ပြောင်းလဲပေးရန် ဆန္ဒပြတောင်းဆိုမှု ဖြစ်ပွားခဲ့သည်။   ထားဝယ်ခရိုင်၊ လောင်းလုံးမြို့နယ်၊ ကျောက်တွင်းကျေးရွာ အုပ်စုတွင် မြို့နယ် ပြည်သူ့ အုပ်ချုပ်ရေးအဖွဲ့ (ပအဖ) မှ ခန့်အပ်ထားသည့် ကျေးရွာတာဝန်ခံကို အလိုမရှိကြောင်း ဆန္ဒပြခဲ့ကြသည်ဟု ရွာသားများက ပြော သည်။   ဆန္ဒပြရာတွင် ပါဝင်ခဲ့သူ အသက် ၅၀ ခန့်အရွယ် ကျောက်တွင်းရွာသား တစ်ဦးက “ရွာရဲ့ကိစ္စတွေ အလုပ် လုပ် စရာရှိတာတွေကို အခုချိန်အထိ ရွာသားတွေနဲ့ တိုင်ပင်နှီးနှောတာမျိုး မရှိဘူး၊ သူ့သဘောနဲ့သူ လုပ်ချင်သလို လုပ်နေတယ်။ ရွာသားတွေက တိုင်တိုင်ပင်ပင်နဲ့ ဂရုတစိုက် အလုပ် လုပ် စေချင်ပေမဲ့ သူက လက်မခံဘူး” ဟု ပြောသည်။   မြို့နယ်ပြည်သူ့ အုပ်ချုပ်ရေးအဖွဲ့ (ပအဖ) က ခန့်အပ်ထားသည့် ရပ်ကျေးတာဝန်ခံမှာ ကျေးရွာ၏ ကိစ္စရပ်များတွင် ရွာသားများနှင့် တိုင်ပင်လေ့မရှိဘဲ ၎င်းသဘောအလျှောက် လုပ်ကိုင်လေ့ရှိသူ ဖြစ်သည်ဟု ရွာသားများက ဆိုသည်။   အဆိုပါ ကျေးရွာတာဝန်ခံ လဲပေးရန် ကျောက်တွင်းကျေးရွာသား ၅၀ ကျော်က စက်တင်ဘာလ ၁၉ ရက်နေ့ နံနက်ပိုင်းက ကျေးရွာအတွင်း လမ်းလျှောက်ဆန္ဒပြခဲ့ခြင်း ဖြစ်သည်။   လက်ရှိ ရပ်ကျေး တာဝန်ခံနေရာတွင် ရွာသားများ ကိုယ်တိုင်ရွေးချယ်သည့် အခြား ရပ်ကျေးတာဝန်ခံ တစ်ဦးနှင့် အမြန်ဆုံး အစားထိုးပေးရန် လိုလားသည်ဟု ရွာသားများက ပြောသည်။   မြို့နယ်ပြည်သူ့ အုပ်ချုပ်ရေးအဖွဲ့မှ ခန့်အပ်ထားသည့် ကျောက်တွင်းကျေးရွာ ရပ်ကျေးတာဝန်ခံကမူ ဆန္ဒပြရာ တွင် ပြောဆိုမှုများမှာ ဟုတ်မှန်ခြင်း မရှိဘူးဟု ငြင်းဆိုထားသည်။   ရပ်ရွာကိစ္စရပ်များအတွက် ရွာသားများအား အသေးအမွှားကိစ္စရပ်က အစ အစည်းအဝေး ခေါ်ယူကာ အမြဲ တိုင်ပင်လေ့ရှိပြီး ၎င်းအနေဖြင့် ကျန်းမာရေး အခြေအနေအရ နုတ်ထွက်ခွင့်ပြုရန် မြို့နယ် ပအဖ တာဝန်ရှိသူ များကို ခွင့်တောင်းထားပြီး ဖြစ်သည်ဟု ဆိုသည်။   ထို့ကြောင့် မိမိအနေဖြင့် ရွာသားများ ရွေးချယ်သည့် ရပ်ကျေးတာဝန်ခံ ခန့်အပ်မည့် ကိစ္စကိုလည်း လက်ခံ နိုင်သည်ဟု ဆိုသည်။   လောင်းလုံးမြို့နယ် ပြည်သူ့အုပ်ချုပ်ရေးအဖွဲ့မှ ခန့်အပ်ထားသည့် ‌ရပ်ကျေး တာဝန်ခံအစား ရွာသားများ ကိုယ်တိုင် ရွေးချယ်သည့် ရပ်ကျေးတာဝန်ခံအား ပြောင်းလဲခန့်အပ်သည့် ပုံစံကို ကျေးရွာအချို့တွင် စတင် လုပ်ဆောင်နေပြီ ဖြစ်သည်ဟု ရွာသားများ၏ ပြောပြချက်အရ သိရသည်။ #လောင်းလုံးမြို့နယ် #ထားဝယ် #ပကဖ #ပအဖ #ကျောက်တွင်းကျေးရွာ  

ရပ်ကျေးတာဝန်ခံ ပြောင်းလဲရန် ပြည်သူများ ဆန္ဒပြ 

ရပ်ကျေးတာဝန်ခံ ပြောင်းလဲရန် ပြည်သူများ ဆန္ဒပြ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂၃ ရက်။  လောင်းလုံးမြို့နယ်ထဲတွင် ဒေသခံ ရွာသားမျာ…

  • September 23, 2025
ရေဖြူ-ကံပေါက်လမ်း စစ်ဆေးရေးဂိတ်သစ်ကြောင့် ကုန်သည်နှင့် ဒေသခံများ အခက်ကြုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။   ထားဝယ်ခရိုင်၊ ရေဖြူမြို့နယ် ကလိန်အောင် - ကံပေါက်လမ်းပိုင်းတွင် စစ်ကော်မရှင်တပ်မှ စက်တင်ဘာလ ဒုတိယ ပတ်မှစတင်၍ စစ်ဆေးရေးဂိတ် အသစ်တစ်ခု ထပ်တိုးပြီး ပိုမို တင်းကြပ်လာခဲ့သည်ဟု လမ်းပိုင်းကို အသုံးပြုနေသည့် ကားသမားများက ပြောသည်။   ကလိန်အောင်မြို့နှင့် ကံပေါက်တိုက်နယ်ကို ဆက်သွယ်ထားသည့်လမ်းပေါ်ရှိ စစ်ကော်မရှင်တပ်နှင့် ဆက်စပ် သည့် ဦးပိုင်ကုမ္ပဏီပိုင် ဆီအုန်းခြံနှင့် ဂန့်ဂေါ်တောင် ဘူတာအကြား ပြည်ထောင်စု ကားလမ်းမကြီးပေါ်တွင် တိုးချဲ့ ဖွင့်လှစ်ထားခြင်း ဖြစ်သည်။   အသက် ၄၀ ခန့်အရွယ် ကားသမားတစ်ဦးက “ဂန့်ဂေါ်တောင် စစ်ဆေးရေးဂိတ်က ဖြတ်သန်းရတာ အဆင်ပြေ တယ်။ လူဟောင်းတွေ ဖြစ်နေတော့ မိတ်ဆွေ တွေ ဖြစ်နေကြပြီ၊ အခုဂိတ် အသစ်က လူက အသစ်တွေဆိုတော့  အစစ်အဆေးက နည်းနည်း ကြမ်းတယ်။ နောက်ပြီး ဂိတ်တစ်ခုနဲ့ တစ်ခုက အဆက်အသွယ် မရှိတော့ ပထမဂိတ် က ဆန်အိတ်ကို ခွင့်ပြုပေးလိုက်ပေမဲ့ နောက်တစ်ဂိတ်က ခွင့်မပြုဘူး။ ဆွဲချတာခံရတယ်။ စကားပြောနေရတာ တွေ ရှိတယ်” ဟု ပြောသည်။   ယခင်ကလည်း အဆိုပါ လမ်းပိုင်းတွင် ဂန့်ဂေါ်တောင် စစ်ဆေးရေးဂိတ်တစ်ခု တည်ရှိပြီး လက်ရှိတွင် စစ်ဆေး ရေး ဂိတ်နှစ်ခုစလုံးကို မောရဝတီရေတပ်မှ နေရာယူထားသည်ဟု ရွာသားများက ဆိုသည်။   ပြီးခဲ့သည့် သြဂုတ်လ နောက်ဆုံးအပတ်က ဦးပိုင်ကုမ္ပဏီ ဆီအုန်းခြံမှ အရာရှိတစ်ဦး အပါအဝင် ဝန်ထမ်းမိသားစု ခုနစ်ဦးကို ပြည်သူ့ကာကွယ်ရေး ပူးပေါင်းတပ်ဖွဲ့များက ဖမ်းဆီးသွားပြီးနောက် ဆီအုန်းခြံနှင့် ဆက်စပ်နေသည့် ဖားချောင်းအုပ်စုကို စစ်ကော်မရှင်တပ်မှ ရက်သတ္တပတ်ကြာ စစ်ကြောင်းထိုးခဲ့သေးကြောင်း ဆိုသည်။   စစ်ကြောင်းထိုးပြီးသည့် နောက် ယခုကဲ့သို့ စစ်ရေးဂိတ်အသစ်ကို ဖွင့်လှစ်ခဲ့ခြင်း ဖြစ်သည်။   စစ်ကော်မရှင်တပ်မှ ကလိန်အောင် လမ်းပိုင်းတွင် ဂိတ်နှစ်ခု၊ သဲချောင်းကျေးရွာအုပ်စုနှင့် ဖောင်းတောကျေးရွာ အုပ်စုတွင် ပျူစောထီး ဂိတ်နှစ်ဂိတ်၊ မင်းသားကျေးရွာအုပ်စုတွင် ပျူစောထီးဂိတ် တစ်ခုတို့အပြင် ပယကျေးရွာ တွင် တပ်စွဲထားကာ ကံပေါက်တိုက်နယ်အတွင်း ပြည်သူ့ကာကွယ်ရေး တပ်ဖွဲ့များ ဝင်ရောက်လာခြင်းကို ကာ ကွယ် ပြင်ဆင်ထားသည်ဟု ဆိုသည်။   ကံပေါက်တိုက်နယ်တွင် စစ်ကော်မရှင်တပ်၏ မောရဝတီ ရေတပ်စခန်း ဌာနချုပ်နှင့် စစ်အုပ်စုအတွက် နိုင်ငံခြားဝင်ငွေ အများအပြား ရရှိနေသည့် ကမ်းလွန်ရေနံနှင့် သဘာဝဓာတ်ငွေ့လုပ်ကွက်များ တည်ရှိသည်။ #ထားဝယ် #ကံပေါက် #ရေဖြူမြို့နယ် #ကလိန်အောင်မြို့ #စစ်ကော်မရှင်  

ရေဖြူ-ကံပေါက်လမ်း စစ်ဆေးရေးဂိတ်သစ်ကြောင့် ကုန်သည်နှင့် ဒေသခံများ အခက်ကြုံ

ရေဖြူ-ကံပေါက်လမ်း စစ်ဆေးရေးဂိတ်သစ်ကြောင့် ကုန်သည်နှင့် ဒေသခံများ အခက်ကြုံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂၃ ရက်။  ထားဝယ်ခရိုင်…

  • September 23, 2025
နူရာ ဝဲစွဲ၊ လဲရာ သူခိုးထောင်းသည့် နောင်အင်းလေး   ဆိုင်းနှောင် ရေးသည်။   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၂ ရက်။   ‘ပလပ် ပလပ်’ ဆိုသည့် ရေလှိုင်းရိုက်သံများ အဆက်မပြတ် ကြားနေရသည်။   ဖောင်တော်ဦးဘုရား ဘေးရှိ ရေချောင်းမှ ရေလှိုင်းများသည် ဘုရားရင်ပြင် ကမ်းစပ်တစ်လျှောက်လုံး၌ ရိုက်ခတ်နေခြင်း ဖြစ်သည်။   အင်းလေးကန် ရေမျက်နှာပြင် မြင့်တက်နေသည့်ကြားက လူထုဘဝထက် စစ်ကော်မရှင်၏ ပွဲဖြစ်မြောက် ရေးကို ဦးစားပေးမည့် ဖောင်တော်ဦးဘုရားပွဲ စီစဉ်မှုမှာလည်း ဒေသခံများအတွက် အိမ်မက်ဆိုး တစ်ခုဖြစ် လာလေသည်။   “ဈေးရောင်းရဖို့ မပြောနဲ့။ ရေထပ်တက်လာလို့ ပစ္စည်းတွေ ရွှေ့နေရပြီ။ ပွဲခင်းနေရာတွေမှာလည်း ရေဝင် နေသေးတယ်။ ထပ်တက်လာရင် မတွေးရဲစရာပဲ” ဟု ဘုရားဈေးသည် ကိုကျော်သန်း (အမည်လွှဲ)က လက်ရှိအခြေအနေကို ပြောပြသည်။   အင်းလေးကန်၏ ရေမျက်နှာပြင်မှာ မကြာသေးမီကမှ အနည်းငယ် မြင့်တက်လာပြီး ဘုရားရင်ပြင်အထိ ရေများ ပြန်ဝင်ရောက်မည့်အလား လှိုင်းလုံးများ ပုတ်ခတ်လျက် ရှိသည်။   ဘုရားရင်ပြင်ပေါ်သို့ ဒုတိယအကြိမ် ရေဝင်ရောက်ရန် တပေခန့်သာ လိုတော့သည်။   ထိုသတင်းမှာ တံငါသည်များအတွက် အားတက်စရာ ဖြစ်သော်လည်း ဒေသခံများအတွက် အိမ်မက်ဆိုး တစ်ခု ဖြစ်နေသည်။   ပြီးခဲ့သည့် ဩဂုတ်လအလယ်ပိုင်းကလည်း ဘုရားရင်ပြင်ပေါ်သို့ ရေဝင်ရောက်ခဲ့ဖူးပြီး စက်တင်ဘာလ အစပိုင်းရောက်မှသာ ပြန်ကျသွားခဲ့ခြင်း ဖြစ်သည်။   ရှမ်းပြည်တောင်ပိုင်းရှိ ကလော၊ ညောင်ရွှေ၊ တောင်ကြီး၊ ပင်လောင်း စသည့်ဒေသများ၌ ဇူလိုင်လ ၂၇ ရက်နေ့မှ စ၍ မိုးသည်းထန်စွာ ရွာသွန်းခဲ့ရာ ထိုရေများမှာ အင်းလေးကန်အတွင်းသို့ စီးဆင်းလာခဲ့သည်။   မိုးရေချိန် ၄.၇၅  လက်မ အထိ ရောက်ရှိခဲ့ပြီး ရေမျက်နှာပြင် ငါးပေခန့် အထိ မြင့်တက်လာခဲ့သည်။ ရေမြင့်တက်မှုကြောင့် ရေပေါ်ကျေးရွာ တစ်ရာကျော်၌ လူနေအိမ်အောက်ထပ်များ ရေဝင်ရောက်ခဲ့သည်။   ပျက်စီးဆုံးရှုံးမှုမှာ လူနေအိမ် တစ်ရာကျော်ခန့်အထိ ရှိပြီး လက်ရှိချိန်အထိ ရေလွှမ်းခံနေရဆဲ ဖြစ်သည်။   ရေများ ပတ်လည်ဝန်းရံလျက်ရှိသော အင်းလေးဒေသတွင် မကြာမီကာလအတွင်း ဖောင်တော်ဦးဘုရား ဒေသစာရီကြွချီ ပူဇော်ပွဲ ကျင်းပရန် ပြင်ဆင်လျက်ရှိသည်။    ရေကြီးရေလျှံမှု ဖြစ်နေသည့်ကြား စစ်ကော်မရှင်က မဖြစ်မနေ ကျင်းပရန် လုပ်ဆောင်နေခြင်း ဖြစ်သည်။   လက်ရှိ အခြေအနေမှာ ပထမအကြိမ် ရေကြီးပြီးနောက် ရေအနည်း ကျဆင်းပြီးနောက်ပိုင်း ရေများ တစ်ရိပ် ရိပ် ပြန်တက်လာချေပြီ။   ဖောင်တော်ဦး ဘုရားရင်ပြင်သို့ ရေနောက်တစ်ကြိမ်ဝင်ရောက်ရန် လှိုင်းလုံးများက ရှေ့ပြေးနိမိတ်အလား ဖော်ပြနေကြသည်။   လူနေအိမ်များကြားတွင်လည်း ရေအလုံးစုံ မကျသေးသည့်အပြင် ဘုရားဈေးဆိုင်ခန်းများ၌လည်း ရေများ ကျန်နေဆဲ ဖြစ်သည်။   ဖောင်တော်ဦးဘုရား ပရဝမ်တွင်းရှိ ဈေးဆိုင်ခန်းပေါင်း ခန့်မှန်းခြေ ၂၀၀ ကျော်ရှိသည့်အနက် ၅၀ ဝန်းကျင်ခန့် မှာ ရေကြီးရေလျှံမှုကြောင့် ပိတ်ထားရဆဲဖြစ်ပြီး ဘုရားအောက်ဆိုင်ခန်း ၅၀ ကျော်မှာလည်း ရောင်းချခွင့် မပြုသေးချေ။   ရေကြီးရေလျှံမှုကြောင့် ကုန်ဈေးနှုန်း ကြီးမြင့်မှု မရှိသော်လည်း သွားရေးလာရေးနှင့် ဝင်ငွေနည်းပါးမှု အခက်အခဲများ ကြုံနေရဆဲ ဖြစ်သည်။   “မြောက်ဘက်ကုန်းမြင့်ကျတဲ့ ဆိုင်တွေတော့ ရောင်းလို့ရမယ်။ တောင်ဘက်ခြမ်းကတော့ မရနိုင်သေးဘူး။ အခုတောင် ကြွေပြားအသစ်ခင်းထားတာက နည်းနည်းမြင့်လို့ ခံသာတာ။ အဟောင်းသာဆို ဝင်နေလောက် ပြီ” ဟု ကိုကျော်သန်းက ရေပြင်ကို ငေးကြည့်ရင်း ကြုံနေရသည့် အခြေအနေများကို ရင်ဖွင့်သည်။   ပြီးခဲ့သည့်နှစ် စက်တင်ဘာလတွင်လည်း အင်းလေးဒေသရှိ ကျေးရွာအုပ်စုပေါင်း ၃၄ စု၊ ကျေးရွာပေါင်း ၄၄၆ ရွာ ရှိသည့်အနက် ရေပြင်ကျေးရွာ ၁၇၁ ရွာ၌ လူနေအိမ်ပေါင်း တစ်ထောင်ကျော် ရေဘေးသင့်ခဲ့ရပြီး လူပေါင်း ၁၀၀ ကျော် သေဆုံးခဲ့ကြရသည်။ ထို့အပြင် အိုးမဲ့အိမ်မဲ့ ဖြစ်သူများမှာလည်း ဒေသခံလူထု၏ သုံးပုံတစ်ပုံခန့်ထိ ရှိသွားခဲ့သည်။   ထိုနည်းတူစွာ ယခုနှစ် မတ်လတွင် ဖြစ်ပွားခဲ့သည့် ငလျင်ဘေးကြောင့်လည်း အိမ်ခြေ ၂၆၀၀ ခန့် ထိခိုက် ပျက်စီးခဲ့ရပြီး သေဆုံးသူဦးရေ ၁၀၀ ကျော်ခန့်အထိ မြင့်တက်သွားသည်။   အချို့လူနေအိမ်များမှာ ငွေကြေးမပြည့်စုံမှုကြောင့် ယခုချိန်ထိ ပြန်လည်တည်ဆောက်နိုင်ခြင်း မရှိသေးပေ။   ပြီးခဲ့သည့်နှစ် နှင့် ယခုနှစ် ရေကြီးမှုအတွင်း အင်းဝန်ကြီး ဦးအောင်ကြည်ဝင်း အပါအဝင် စစ်ကော်မရှင် လက်အောက်ခံ ဌာနဆိုင်ရာများမှ လာရောက်ကူညီမှုများ မရှိခဲ့ဘဲ ကိုယ်ထူကိုယ်ထဖြင့်သာ ပြန်လည် ထူထောင်ခဲ့ရလေသည်။   ဤသို့သော ‘နူရာဝဲစွဲ’ အခြေအနေများကြား၌ လူထုအနေဖြင့် ပွဲရေးထက် ဝမ်းရေးကိုသာ ဦးစားပေးနေရ လေ၏။   ရေဘေးသင့် ကေလာကျေးရွာ ဒေသခံ အမျိုးသားတစ်ဦးက “ဦးအောင်ကြည်ဝင်းက တခါမှတောင် လာ မကြည့်ပါဘူး။ ဌာနဆိုင်ရာတွေလည်း မလာကြပါဘူး။ ဒေသခံတွေနဲ့ တခြား မြေပြန့်ဘက်က အလှူရှင်တွေ ကြောင့်သာ အိမ်တွေ ပြန်ဆောက်နိုင်တာပါ။ ပွဲသာလုပ်ချင်နေတာ။ ဒုက္ခရောက်တုန်းကတော့ ဘာမှ မကူညီ ပေးဘူး” ဟု ပြောပြသည်။   ပွဲတော်အား အင်းတိုင်းရင်းသားရေးရာ ဝန်ကြီး ဦးအောင်ကြည်ဝင်းနှင့် စစ်ကောင်မရှင်ကို ထောက်ခံသည့် လူနည်းစုတို့က ဦးစီးကျင်းပခြင်း ဖြစ်သည်။   ထို့အပြင် ၎င်းတို့ လက်ဝေခံ အင်းအမျိုးသား အဖွဲ့ချုပ်ပါတီနှင့် ပအိုဝ်းအမျိုးသား အဖွဲ့ချုပ်ပါတီ (PNO) တို့မှလည်း ပါဝင်ကူညီမည်ဟု ပြောင်ပြောင်တင်းတင်း ကြေညာထားသည်။   ဦးအောင်ကြည်ဝင်းမှာ အင်းအမျိုးသား အဖွဲ့ချုပ် ပါတီ၏ ဥက္ကဋ္ဌဟောင်း ဖြစ်ပြီး စစ်အာဏာသိမ်း ကာလ အတွင်း တိုင်းရင်းသားရေးရာ ဝန်ကြီးဖြစ်လာသူ တစ်ဦးဖြစ်သည်။   ၎င်းထံ၌ ဦးဇော်လတ်နှင့် ဦးဖိုးသာထူး ဆိုသည့် လက်ရုံး နှစ်ဦးရှိပြီး ပျူစောထီးများလည်း မွေးထားသည်။ လက်ရှိ အင်းလေးဒေသ စစ်မှုထမ်း ခေါ်ယူရေး၌ ၎င်းလက်ရုံးတပ်များက ဦးဆောင်လျက်ရှိသည်။   ဦးအောင်ကြည်ဝင်းမှာ ၂၀၁၀ ခုနှစ် ဦးသိန်းစိန် အစိုးရ လက်ထက်ကတည်းကပင် စစ်ဗိုလ်ချုပ်များနှင့် နီးကပ်သည့် ဆက်ဆံရေးရှိသူ ဖြစ်သည်။ လက်ရှိတွင်လည်း စစ်မှုထမ်းကောက်ခံရာ၌ ၎င်း၏ ပျူစောထီး တပ်ဖြင့် လိုက်လံစုဆောင်းနေသူ ဖြစ်သည်။   ၎င်းတည်ထောင်ထားသည့် အင်းအမျိုးသားအဖွဲ့ချုပ်ပါတီမှာ အမျိုးသားဒီမိုကရေစီအဖွဲ့ချုပ် (NLD) နှင့် ယှဉ်ပြိုင်ရသော ရွေးကောက်ပွဲတိုင်းတွင် ရှုံးနိမ့်ခဲ့ဖူးသည်။   စစ်ကော်မရှင်က ပြုလုပ်မည့် ရွေးကောက်ပွဲကို NLD က သပိတ်မှောက်ချိန်တွင် အင်းအမျိုးသားအဖွဲ့ချုပ်က  ဝင်ရောက်ယှဉ်ပြိုင်မည်ဟု ကြေညာထားသေးသည်။   လက်ရှိကာလ၌လည်း ပါတီဝင်များ အနေဖြင့် ရွေးကောက်ပွဲအတွက် သန်းခေါင်စာရင်းများ ကောက်ယူနေ သည်။ ယှဉ်ပြိုင်မည့် ကိုယ်စားလှယ် စာရင်းများကိုမူ ထုတ်ပြန်ကြေညာထားခြင်း မရှိသေးပေ။   ဘုရားအနီးတွင် နေထိုင်သည့် တက်ကြွလှုပ်ရှားသူ အမျိုးသမီးတစ်ဦးက “ဘုရားပွဲ ကျင်းပတာကိုတော့ စစ်ကောင်စီရဲ့ ဖိအားနဲ့ ဦးဆောင်မှုနဲ့ပေါ့။ အစည်းအဝေး လုပ်တုန်းကလည်း အင်းဝန်ကြီး ဦးအောင်ကြည် ဝင်းတို့က ဦးဆောင်ပြီး သူတို့ထောက်ခံတဲ့ လူနည်းစုလောက်နဲ့ပဲ ဆုံးဖြတ်ခဲ့တာပေါ့” ဟု ပြောပြသည်။   ၂၀၂၄ ခုနှစ်၊ ဖေဖော်ဝါရီလ ၁၀ ရက်နေ့ စစ်မှုထမ်း ဥပဒေပြဌာန်းပြီးသည့် နောက်ပိုင်း ယခု အပတ်စဉ် ၁၇ ရောက်သည်အထိ အင်းလေးဒေသ၌ စစ်မှုထမ်း လစဉ်ခေါ်ယူလေ့ရှိသည်။   ကျေးရွာအုပ်စုပေါင်း ၃၄ စုမှ အပတ်စဉ် တစ်ခုစီ၌ တစ်အုပ်စုလျှင် လေးဦး ခေါ်ယူခြင်း ဖြစ်သည်။ အချို့ကျေးရွာများမှာ ငွေကြေးဖြင့် လူစားထိုးခေါ်ယူကြသော်လည်း အများစုမှာ မလွတ်ကင်းနိုင်ကြချေ။     အင်းလေးအမျိုးသမီး သမဂ္ဂအဖွဲ့မှ အတွင်းရေးမှူး မကြိုးကြာက “ဘုရားပွဲကတော့ အာဏာမသိမ်းခင် ကာလထက်တော့ စည်မှာ မဟုတ်ဘူးပေါ့နော်။ ဘာဖြစ်လို့လဲဆိုတော့ လက်ရှိ မြန်မာနိုင်ငံမှာက အလုပ်ကိုင် ရှားပါးတာရယ်၊ စစ်မှုထမ်း‌ ခေါ်တာရယ်ကြောင့် အင်းလေးဒေသမှာရှိတဲ့ လူငယ်တွေလည်း နိုင်ငံခြား ထွက် ပြီး အလုပ်လုပ်ကြတယ်ပေါ့နော်။ ပြီးလို့ချင်ရင် သူတို့ စစ်အာဏာရှင်ကို တော်လှန်ချင်လို့ တောခိုသွားတဲ့ လူငယ် လည်း ရှိတယ်ပေါ့နော်” ဟု ဒေသတွင်း အခြေအနေများကို ရှင်းပြသည်။   ဘုရားပွဲတော် ကျင်းပသည်မှာ လူထုစီးပွားရေးနှင့် သက်ဆိုင်မှု မရှိကြောင်း၊ လက်ရှိ ရေကြီးကာလ၌ ဘုရားပွဲ ကျင်းပမည်ဆိုပါက ဈေးသည်များ အနေဖြင့်လည်း ရောင်းချရန် အဆင်မပြေကြောင်း အင်းလေးအမျိုးသမီး သမဂ္ဂအဖွဲ့က ၎င်းတို့၏ သဘောထားများကို ပြောပြသည်။   အလားတူ တက်ကြွလှုပ်ရှားသည့် အဖွဲ့အစည်းများနှင့် တောတွင်းရောက် အင်အားစုများကလည်း စစ်ကော်မရှင်က ကျင်းပမည့် ပွဲတော်ကို ကန့်ကွက်ထားသည်။   မကြိုးကြာက “ဘုရားပွဲကျင်းပမယ်ဆိုတော့ စစ်တပ်ထောက်ခံတဲ့ လူနည်းစုက ပျော်ချင်လည်း ပျော်နေမှာ ပေါ့ ကျမအနေနဲ့ကျတော့ မပျော်နိုင်ပါဘူး။ ဘာဖြစ်လို့လဲ‌ဆိုရင် ဒီလောက် ဘေးအန္တရာယ်တွေ ကျရောက် နေတဲ့ကြားက ဖြစ်နေတဲ့ အချိန်မှာတော့ ဟိုလူ့ကိုကယ်ပါ ဒီလူ့ကိုကယ်ပါနဲ့။ အခု ကျတော့ ဒုက္ခမရောက် တော့တဲ့အတိုင်း ပျော်နေကြမယ်ဆိုရင် သူများတွေ ဘယ်လိုမြင်ကြမလဲ ကျမကတော့ ရှက်မိတယ်။ ဒါက နှစ်စဉ် ကျင်းပတဲ့ ပွဲမို့လို့ပါ။ ဘုရားကို ကြည်ညိုတယ်‌ ဆိုတာ တန်းခိုးကြီးတဲ့ ဘုရားတွေဖူးမှ မဟုတ်ပါဘူး။ စိတ်နှလုံးသားနဲ့ပဲ ဆိုင်တာပါ” ဟု ၎င်း၏ သဘောထားကို ဆက်လက်ပြောပြသည်။   ပအိုဝ်းပြည်သူ့စစ်အဖွဲ့ (PNA) မှ ပွဲတော်ကာလ တစ်လျှောက်လုံး၌ လုံခြုံရေး ယူပေးမည်ဆိုသည့် အချက်မှာ လည်း ဒေသခံများအတွက် စိုးရိမ်စရာ ဖြစ်နေသည်။   အဘယ်ကြောင့်ဆိုသော် PNA သည် ပအိုဝ်းဒေသများ အတွင်း ၎င်းအင်အား တိုးချဲ့ရေးအတွက် စစ်မှုထမ်း များ လစဉ်စုဆောင်းလျက် ရှိသည်။ ထို့အပြင် တစ်ဖက်တစ်လမ်းမှလည်း ၎င်းက စစ်ကော်မရှင်အတွက် လူကောက်ခံ ပေးနေရသည်။   ၂၀၂၅ ခုနှစ်၊ ဇန္နဝါရီလအတွင်း ညောင်ရွှေမြို့နယ်၊ အင်းလေးဒေသ၊ ဘုရားတောင်ကျေးရွာ၌ စစ်ဘေးရှောင် များ နေရပ်ပြန်လာချိန်တွင် PNA အဖွဲ့က တစ်အိမ်လျှင် ကျပ်တစ်သိန်း စစ်အသုံးစရိတ် ကောက်ခံခဲ့ပြီး တပ်သား ၁၀ ဦးထက်မနည်း စုဆောင်းခဲ့ဖူးသည်ဟု ဒေသခံများက ပြောပြသည်။   ၂၀၂၃ ခုနှစ်၊ နိုဝင်လဘာလအတွင်း ဖြစ်ပွားခဲ့သည့် တစ်လေးလုံး စစ်ဆင်ရေးအတွင်း အင်းလေးဒေသ အရှေ့ ဖက်ကမ်း၌ PNA နှင့် တော်လှန်ရေးတပ်တို့အကြား တိုက်ပွဲ အကြိမ်ကြိမ် ဖြစ်ခဲ့ဖူးသည့်အပြင် လက်ရှိကာလ အထိလည်း မကြာခဏ PNA က တပ်သားစုဆောင်းမှုလည်း လုပ်ဆောင်နေဆဲ ဖြစ်သည်။   ၂၀၂၅ ခုနှစ်၊ ဖေဖော်ဝါရီလအတွင်း စစ်တပ်နှင့် PNA ပူးပေါင်းတပ်များက ညောင်ရွှေမြို့နယ်၊ အင်းလေး ဒေသ၊ ရေပူကျေးရွာရှိ တော်လှန်ရေးတပ် စခန်းနှစ်ခုကိုလည်း သိမ်းပိုက်ခဲ့ဖူးသည်။   ဘုရားအနောက်ဘက် ကျေးရွာတွင် နေထိုင်သည့် မသန်းမြင့် (အမည်လွှဲ)ဆိုသူက “အင်းလေးဒေသ ရှေ့ဖက် ကမ်းမှာ စပြီးတိုက်ပွဲ ဖြစ်လာတော့ PNO က တချို့ရွာတွေဝင်ပြီး ထိန်းထားတယ်။ အဲဒီမှာ အရင်နှစ်ကဆို လူကောက်တာတွေ၊ ရိက္ခာစုတာတွေ ခဏခဏ ဖြစ်တယ်။ အခုလည်း ဝင်လိုက်ထွက်လိုက်ပဲ။ ဒီလို လူတွေ က ပွဲလုံခြုံရေးဆိုတော့ ကျမတို့ သားသမီးတွေကို ဘယ်လိုစိတ်နဲ့ ပွဲလွှတ်ရမလဲ” ဟု ပြောသည်။   ဖောင်တော်ဦးဘုရားပွဲမှာ လွန်ခဲ့သည့် နှစ်ပေါင်းများစွာကတည်းက စ၍ အင်းသားလူမျိုးတို့ နှစ်စဉ် ကျင်းပ လေ့ရှိသည့် ဘာသာရေး ပွဲတော်တစ်ခု ဖြစ်သည်။   မည်သည့် ခုနှစ်က စတင်ကျင်းပသည်ကိုမူ သမိုင်းမှတ်တမ်းများ၌ ဖော်ပြထားခြင်း မရှိပါ။   နှစ်စဉ် သီတင်းကျွတ် လဆန်း ၁ ရက်နေ့ (စက်တင်ဘာလ ၂၂ ရက်နေ့) မှ စတင်၍ သီတင်းကျွတ် လပြည့် ကျော် ၃ ရက်နေ့ (အောက်တိုဘာလ ၉ ရက်နေ့) အထိ ၂၁ ရက်ကြာ ကျင်းပခဲ့သည်မှာ ခေတ်အဆက်ဆက်ပင် ဖြစ်သည်။   ထိုကာလများအတွင်း ဖောင်တော်ဦးဘုရားမှာ ရတနာစံကျောင်းတော်မှ ထွက်ခွါပြီး ၂၁ ဌာနသို့ လှည့်လည် ကြွချီ အပူဇော်ခံခြင်း ဖြစ်သည်။   ဘုရားဆိုက်ရောက်ရာ ဒေသအသီးသီးသို့ ကြွချပြီးနောက် ကျောင်းတော်သို့ ပြန်ဝင်သည့်နေ့တွင် ပွဲတော် ပြီးဆုံးကြသည်။   ပွဲတော်တစ်လျှောက် ဘုရားဖောင်လှေအား လူ ၁၀၀ ကျော်ပါသည့် ဆွဲလှေများက ခြေထောက်ဖြင့် လှော် ခတ်ကာ ကျေးရွာ အသီးသီးသို့ ပင့်ဆောင်ကြရသည်။   ဘုရားဖောင်လှေ အနီးတစ်ဝိုက်တွင် ဆွမ်းတော်ကြီး ကပ်လှူသည့် ဖောင်လှေများ၊ နတ်သမီးကဲသို့ ဝတ်ဆင်၍ ကပြဖျော်ဖြေရသည့် လှေယာဉ်ငယ်များကလည်း ခြံရံလိုက်ပါရသေးသည်။   ထိုသို့ ရိုးရာယဉ်ကျေးမှု မပျက် ကျင်းပကြသည့် ဘုရားပွဲတော်အား စစ်အာဏာ မသိမ်းမီက ပြည်တွင်း ခရီးသွားများ သာမက နိုင်ငံခြားသား ဧည့်သည်များလည်း လာရာက်လည်ပတ်ကြသည်။   ဒေသစာရီကြွချီ အပူဇော်ခံပွဲကို စစ်အာဏာသိမ်းသည့် ၂၀၂၁ ခုနှစ်တွင် မကျင်းပဖြစ်ခဲ့ပေ။ သို့သော် ၂၀၂၂ ခုနှစ်တွင် ဒေသခံများက ဖောင်တော်ဦးဘုရား မပါဝင်ဘဲ အခြား ရုပ်ပွားတော်များနှင့် အစားထိုး၍  အကျဉ်း ချုံး ကျင်းပခဲ့ကြသည်။   ယင်းနောက်ပိုင်း ၂၀၂၃ ခုနှစ်တွင် စစ်ကော်မရှင်က ဦးဆောင်၍ အာဏာသိမ်းပြီးနောက်ပိုင်း ပထမဆုံး အကြိမ်ကျင်းပခဲ့ကြပြန်သည်။ ထိုကာလများ၌ စစ်အာဏာမသိမ်းခင်က ကျင်းပသော ပွဲတော်များကဲ့သို့ စည်ကားခြင်း မရှိခဲ့ပေ။   ၂၀၂၄ ခုနှစ်တွင်ကား စစ်ကော်မရှင်က ကျင်းပရန် လျာထားခဲ့သော်လည်း ရေဘေး အခက်အခဲများကြောင့် ပွဲတော် ရပ်ဆိုင်းခဲ့ရလေသည်။ အလားတူ ၁၉၈၈ ခုနှစ် အရေးအခင်း ကာလများ၌လည်း ဘုရားပွဲ မကျင်းပ ဖြစ်ခဲ့ချေ။   ဖောင်တော်ဦး ဘုရားပွဲတော်မှာ ရိုးရာအားဖြင့် ချစ်ခင် နှစ်လိုဖွယ်ကောင်းပါသည်။ သို့သော် ယခုနှစ် ကျင်းပ မည့် ပွဲတော်မှာ စစ်ကော်မရှင်၏ ပယောဂများ ပါဝင်နေသည်။ ဘုရားပွဲ ဖြစ်မြောက်ခဲ့သော် ပထမဆုံး အမြတ်ထွက်မည့်သူမှာ စစ်ကော်မရှင်သာ ဖြစ်သည်။   ပွဲတော် တည်ငြိမ်အေးချမ်းစွာ ပြီးဆုံးပါက ၎င်းအနေဖြင့် လာမည့် ရွေးကောက်ပွဲအတွက် အမည်ကောင်း ရနိုင်သည်။ ပွဲတော်အား အသုံးချ၍ မဲများ သိမ်းကျုံးယူမည့် အနေအထား ဖြစ်နေသည်။   တစ်ဖက်တစ်လမ်း၌လည်း ကန်ထရိုက်ဆွဲသူများနှင့် လောင်းကစားဝိုင်း ပိုင်ရှင်များက ပွဲဖြစ်မြောက်ရန် ဝိုင်းဝန်း ဖိအားပေးနေကြသည်။   အလားတူ ရှေးရိုးစွဲ လူကြီးများမှလည်း ဘုရားပွဲ မဖြစ်၍ ယခင်နှစ် သဘာဝ ဘေးအန္တရာယ်များ ကြုံခဲ့ရသည် ဆိုသည့် ယူဆချက်များလည်း စွဲကိုင်ထားကြသည်။   “ပွဲဖြစ်ရင် ဈေးရောင်းရမယ်။ ဒေသခံတွေ စီးပွားရေး ပြေလည်လာမယ်ဆိုတာတွေက အာပလာတွေပါ။ လောလောဆယ်တောင် ဆိုင်တွေက ရေမြုပ်နေတာ။ ဘယ်သူကလာကြပြီး ဘယ်သူ့ကို ရောင်းကြမှာလဲ။ ပင်နီယက်တဲ့ သူတွေတော့ ဆွဲလှေအတွက်ဆိုတော့ ရောင်းရမှာပေါ့။ ဒါကလည်း လူနည်းစုပါ” ဟု ဘုရား ဈေးသည် ကိုကျော်သန်းက ဒေသခံများ၏ စီးပွားရေး အခြေအနေကို သုံးသပ်ပြသည်။   အင်းလေး ဖောင်တော်ဦး ဘုရားမှာ ခေတ်အဆက်ဆက် စစ်ခေါင်းဆောင်များ၏ ယတြာချေရာ နေရာ ဖြစ် လေ၏။   ဦးသန်းရွှေ လက်ထက်မှ စ၍ ဦးသိန်းစိန် လက်ထက်အထိ တစ်မျိုးပြီးတစ်မျိုး မရိုးရသော ယတြာများဖြင့် ၎င်းတို့ အာဏာတည်မြဲအောင် ပြုလုပ်နိုင်သည်ဟု စစ်ခေါင်းဆောင်များက ယုံကြည်ကြသည်။   ယခင် စစ်အာဏာ မသိမ်းမီကလည်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ယတြာဟု ဆိုကာ ဖောင်တော်ဦးဘုရား ဆင်းတုတော်များကို မှန်လုံအိမ်ဖြင့် ထည့်၍ နှစ်နှစ်ကျော်ခန့်အထိ ပိတ်လှောင်ဖူးသည်။   ထိုကာလများအတွင်း ဘုရားဖူး ဧည့်သည်များပင်လျှင် ရွှေသင်္ကန်း ကပ်လှူခွင့် မရခဲ့ပေ။   ယခု ကျင်းပမည့် ပွဲတော်မှာလည်း စစ်ခေါင်းဆောင်၏ ယတြာကြောင့်သာ အလျင်စလို စီစဉ်လိုက်ခြင်း ဖြစ်နိုင်သည်ဟု ဒေသခံများကြားတွင် ပြောဆိုမှုများ ရှိနေသည်။   ယတြာဟု ဆိုရခြင်းမှာ ရှေးယခင်ကတည်းက စစ်ခေါင်းဆောင်များ မကြာခဏ ဘုရားသို့ လာရောက်ခြင်း၊ လာရောက်ချိန်တိုင်း၌လည်း ပေါ်ပေါ်ထင်ထင် ယတြာပြုလုပ်ခြင်း၊ ယခင် ဘုရားအား မှန်လုံဖြင့် အုပ်မိုးပြီး အချိန်မှစ၍ မင်းအောင်လှိုင်က ၎င်းအာဏာ တည်မြဲသည်ဟု ဂေါပကများအား ပြောဆိုခဲ့ခြင်း၊ လက်ရှိ ကျင်းပမည့် ပွဲတော်၌လည်း ဆွဲလှေလှော်သူများ ဝတ်ဆင်မည့် ဘောင်းဘီ အရောင်ကို ၎င်းကသာ သတ်မှတ် ပေးခြင်း၊ ဘုရားကြွချီမည့် ကျေးရွာများတွင် ရေမြုပ်နေသော်လည်း အတင်းအကြပ် ကျင်းပခိုင်းခြင်း စသည့် အချက်များကြောင့် ဒေသခံများက ပြောနိုင်ခြင်း ဖြစ်သည်။   အစည်းအဝေးအား ဩဂုတ်လ ၁ ရက်နေ့တွင် ဖော်တော်ဦးဘုရား၌ စစ်ကော်မရှင် ဦးဆောင်မှုဖြင့် ပြုလုပ်ခဲ့ ပြီး ပွဲတော် ကျင်းပရန် ဆုံးဖြတ်ခဲ့ကြခြင်း ဖြစ်သည်။   အစည်းအဝေး၌ သံဃာတော် နာယက ဆရာတော်များ၊ ဂေါဗကအဖွဲ့ဝင်များနှင့် ဘုရားလူကြီးများက ရေကြီး နေသဖြင့် ပွဲကျင်းပရန် မသင့်ဟု ပြောဆိုခဲ့သော်လည်း စစ်ကော်မရှင် လက်အောက်ခံ လူနည်းစုများက ကျင်းပမည်ဟု ဆုံးဖြတ်ခဲ့ခြင်း ဖြစ်သည်။   သို့သော် ပွဲကျင်းပမည့် စရိတ်ကိုမူ ထုတ်ပေးခြင်း မရှိဘူးဟု ဒေသခံများက ပြောသည်။   ဘုရားဈေးသည် တစ်ဦးဖြစ်သည့် မကြည်ပြာ(အမည်လွှဲ)က “ဘုန်းကြီးတွေ ကန့်ကွက်တဲ့ကြားက အတင်း လုပ်တာပါ။ ဘုန်းကြီးတွေက ရေလည်း တရိပ်ရိပ်တက်နေလို့ အဆင်မပြေနိုင်ဘူး ပြောတာကို မင်းအောင် လှိုင်က သူတာဝန်ယူမယ်ဆိုပြီး ထလုပ်တာ။ ယတြာက သေချာပေါက်ပါတယ်။ ဆွဲလှေသမားတွေ ဝတ်မယ့် ရှမ်းဘောင်းဘီကို စကစ စီစဉ်ပေးတယ်ပြောတယ်။ သူတို့ ယတြာတွေပါ” ဟု ပြောသည်။   စစ်ကော်မရှင်က ပွဲတော်နှင့် ဆက်စပ်၍ အင်းအမျိုးသား အဖွဲ့ချုပ်ပါတီနှင့် အင်းလေးလူထုတို့ အကြား ချစ် ကြည်ရင်းနှီးမှု ရရန်အတွက်လည်း ရည်ရွယ်နေသည်။   ယခင်က အင်းလေးဒေသ၌ ပါတီ နှစ်ခု ရှိပြီး ယင်းပါတီများမှာ စစ်ကော်မရှင် အလိုကျ ဖြစ်ကြသည်။ အင်းအမျိုးသား ဖွံ့ဖြိုးရေးပါတီမှာ ၂၀၁၀ ရွေးကောက်ပွဲအတွင်း အနိုင်ရခဲ့ဖူးသည်။   သို့သော် ခရိုနီများထံ လာဘ်ယူ၍ အင်းအရှေ့ဘက်ကမ်းတွင် ဟိုတယ်ဇုန်များ တည်ဆောက်ခွင့် ပေးမှု ကြောင့် ဒေသခံများက ၂၀၁၅ ရွေးကော်ပွဲ၌ ထပ်မံ မဲမပေးကြတော့ချေ။   ထိုကာလများ အတွင်း အင်းအရှေ့ဘက်ကမ်း တစ်လျှောက် သစ်တောများ ပြုန်းတီးခဲ့ရဖူးသည်။ ပြီးခဲ့သည့် ၂၀၂၀ ရွေးကော်ပွဲတွင်လည်း စစ်ကော်မရှင် ထောက်ခံသူများက အင်းအမျိုးသား အဖွဲ့ချုပ်ပါတီကို အလျင် အမြန် ဖွဲ့စည်း၍ ယှဉ်ပြိုင်ခဲ့ကြသည်။   အင်းအမျိုးသား ဖွံ့ဖြိုးတိုးတက်ရေး ပါတီမှ ဦးအောင်ကြည်ဝင်းက နှုတ်ထွက်ပြီး ပါတီသစ်တွင် ဥက္ကဋ္ဌ နေရာယူကာ ဖွဲ့စည်းတည်ထောင်ခဲ့ခြင်း ဖြစ်သည်။   ကိုယ်စားလှယ်လောင်း နေရာတွင် ရွှေအင်းသာ ဟိုတယ်ပိုင်ရှင် ဒေါ်တင်ရီ (အန်တီအင်း) အား ဝင်ရောက် ယှဉ်ပြိုင်စေခဲ့သည်။ ထိုပါတီမှာလည်း ဝက်ဝက်ကွဲ ရှုံးနိမ့်ခဲ့ပြန်သည်။   ဒေါ်တင်ရီနှင့် နီးစပ်သည့် ဒေသခံ တက်ကြွလှုပ်ရှားသူ တစ်ဦးက “အရင်ကတော့ အန်တီအင်းက သူအနိုင်ရ ရင် ဘာလုပ်ပေးမယ် ညာလုပ်ပေးမယ် ပြောခဲ့တာတော့ ရှိတယ်။ အဲဒါတွေက ရှုံးသွားလို့လားတော့ မသိ ဘူး။ ဘာမှဖြစ်မလာဘူး။ အင်းပါတီကိုလည်း စကစနဲ့ တစ်တွဲတွဲမို့ လူတွေက သိပ်မကြည်ကြတော့ဘူး။ ရေကြီး တုန်းကဆို ဦးအောင်ကြည်ဝင်း တခါမှ လာမကြည့်ဘူးလေ။ အခုချိန်မှာ ပွဲသာဖြစ်ရင် အင်းပါတီ ကိုလည်း လူတွေက ပြန်လက်ခံလာမယ်။ သူတို့ ဦးစီးတာကိုး။ စကစလည်း အင်းပါတီကို အသုံးချပြီး သူတို့ စိတ် ကြိုက် ထိန်းချုပ်လို့ရမယ်ပေါ့။ အင်းပါတီနဲ့ ဒေသခံ ပြန်အဆင်ပြေသွားရင် စစ်မှုထမ်းအတွက်လည်း ပူစရာ မလိုတော့ဘူးလေ” ဟု ပြောသည်။   စစ်ကော်မရှင်က ကျင်းပမည့် ဒေသစာရီကြွချီ အပူ‌ဇော်ခံပွဲကို တော်လှန်ရေး အင်အားစုများ၊ တက်ကြွ လှုပ်ရှားသူများနှင့် အင်းလေး ပြည်သူ့ကာကွယ်ရေးတပ် အင်း-PDF တို့ကလည်း ထောက်ခံမှုမရှိကြောင်း ပြောဆိုထားသည်။    သို့သော် စစ်ကော်မရှင် လော်ဘီ အကောင့်တုများနှင့် ၎င်းတို့ လက်အောက်ခံ ပါတီဝင်များ၊ ပျူစောထီးများ ကသာ ပွဲတော်ကျင်းပမည့် အချိန်ဇယားကို ဖြန့်ဝေလျက်ရှိသည်။   အင်းလေး PDF မှ တပ်ဖွဲ့ဝင် တစ်ဦးက “ဖောင်တော်ဦး ဘုရားပွဲအတွက် IPDF အနေနဲ့ တစ်စုံတရာ ကာ ကွယ် ပေးဖို့တော့ မရှိပါဘူးနော်။ ဒီဘုရားပွဲနဲ့ ပတ်သက်ပြီးတော့ တခြားသော အကြောင်းအရာများ ဖြစ် လာလို့ ရှိရင်လည်း ကျနော်တို့ အနေနဲ့ တာဝန်ယူဖို့လည်း မရှိသလို ပြီးတော့ ဒီဘုရားပွဲကို အားပေးတာမျိုး လည်း မရှိဘူးပေါ့နော်” ဟု ၎င်း၏သဘောထားကို ပြောဆိုထားသည်။   ဆက်ရသော် ပွဲတော်အား အောင်မြင်စွာ ကျင်းပနိုင်ရေးအတွက် စစ်ကော်မရှင်ဘက်မှ ကြိုတင် မစီမံနိုင်ခဲ့ပါ က လုံခြုံရေး အခက်အခဲများ မဖြစ်မနေ ကြုံရနိုင်သည်။   ယခင်နှစ်များကလည်း အင်းလေး တောင်ပိုင်းဒေသများ အတွင်း ဖြစ်ပွားခဲ့သည့် ပွဲတော်များ၌လည်း စစ်တပ် နှင့် ၎င်းတို့ လက်အောက်ခံ ပြည်သူ့စစ်များက ဝင်ရောက်ဖျက်ဆီးမှုများ ကြုံခဲ့ရဖူးသည်။   ယခုလည်း အင်းလေး ကန်ပတ်လမ်း အရှေ့ဘက်ကမ်းနှင့် အနောက်ဘက်ကမ်း လမ်းနှစ်ခုလုံးတွင် စစ်ကော်မ ရှင်နှင့် PNA တို့က ပူးတွဲ ဂိတ်များ ဖွင့်လှစ်ထားပြီး ညအချိန်မတော် သွားလာသည့် ဒေသခံများအား ငွေကြေး တောင်းခံခြင်း၊ ပေါ်တာဆွဲခြင်းများ ပြုလုပ်နေဆဲ ဖြစ်သည်။   သို့ဖြစ်၍ စစ်မှုထမ်း ခေါ်ယူမှုများကြောင့် ရှောင်တိမ်းနေရသည့် လူငယ်များ အတွက်လည်း ပွဲတော်အား ပျော်ရွှင်ဖွယ်ရာ အဖြစ် မမြင်နိုင်တော့ဘဲ ငိုကြွေးရသည့် အိမ်မက်ဆိုးအဖြစ်သာ ကျန်ရစ်ခဲ့မည်ကို စိုးရိမ်နေရ သည်။   ထို့အပြင် PNA နှင့် အင်းလေး ပျူစောထီး ကဲ့သို့သော ဒေသတွင်း လက်နက်ကိုင် အဖွဲ့များကိုလည်း ပွဲလုံခြုံ ရေးအဖြစ် အသုံးချမည်ဆိုပါက လူထု တိုက်ရိုက် ကြုံတွေ့နေဆဲ ဖြစ်သော စစ်ဘေး၊ စစ်မှုထမ်းဘေးတို့နှင့် အန္တရာယ် ကြုံလာရနိုင်ပြီး ပွဲတော်ကာလအတွင်း အခွန်ကောက်ခံမှုပါ တိုးမြင့်လာနိုင်သည်ဟု PDF တပ်ဖွဲ့ ဝင်က ပြောသည်။   လာမည့် နှစ်များအတွင်း စစ်ကော်မရှင်၏ ဦးဆောင်မှုမှ လွတ်ကင်းအောင် အင်းအမျိုးသား စာပေနှင့် ယဉ် ကျေးမှုအဖွဲ့နှင့် ဒေသတွင်း လူငယ်များက ကြိုတင်ကာကွယ်နိုင်ပါက အင်းလေးဒေသ၏ နှလုံးသည်း ပွတ်ဖြစ်သည့် ဖောင်တော်ဦး ဘုရားပွဲတော်ကို မူလယဉ်ကျေးမှု ရိုးရာနှင့်အညီ ပြန်လည် ကျင်းပလာနိုင်မည် ဖြစ်သည်။ #Inlay #Nyaungshwe #ဖောင်တော်ဦး #PNA #PDF #စစ်မှုထမ်း #ဘုရားပွဲ #ဖောင်တော်ဦးဘုရားပွဲ #ခရိုနီ

နူရာ ဝဲစွဲ၊ လဲရာ သူခိုးထောင်းသည့် နောင်အင်းလေး

နူရာ ဝဲစွဲ၊ လဲရာ သူခိုးထောင်းသည့် နောင်အင်းလေး ဆိုင်းနှောင် ရေးသည်။ သတင်းနှင့် မီဒီယာ ကွန်ရက်။၂၀၂၅ ခုနှစ်၊ စက်တင်ဘာလ ၂၂ ရက်။ ‘ပလပ် ပလပ်’ ဆိုသ…

  • September 23, 2025
×Close